Oqaluuserisassani immikkoortoq 16-3 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Sisamanngorneq 28.oktober 1999 nal. 19.00
Ataatsimiinnermik aqutsisoq, Johan Lund Olsen, Inatsisartut Siulittaasuat:
Taavalu tullinguuppoq oqaluuserisassani immikkoortoq 16, Namminersornerullutik Oqartussat missingersuutaat pillugit Inatsisartut inatsisaattut siunnersuutip pingajussaaneerneqarnera. Tassani Aningaasaqarnermut Niuernermullu Naalakkersuisoq saqqummiussissaaq.
Josef Motzfeldt, Aningaasaqarnermut Niuernermullu Naalakkersuisoq:
Tassa maani pineqarpoq pingajussaanerinninneq soorlu siulittaasup oqaatigigaa: Namminersornerullutik Oqartussat missingersuutaat pillugit Inatsisartut inatsisissaattut siunnersuutip maanna pingajussaaneerneqarneranut Inatsiseqarnermut Ataatsimiititaliaq isumaliutissiissuteqanngimmat inatsisissatut siunnersuut massakkutut isikkoqartillugu akuersissutigineqarnissaa Inatsisartuni taasissutigineqartinnagu naatsumik oqaaseqalaarniarpunga.
Oktoberip 20-anni aappassaannerinninnermi missingersuutit pillugit inatsisissamik siunnersuut nallakkersuisut allannguutissatut siunnersuutaat pingasut ilanngullugit taamatut isikkoqartillugu akuersissutigineqarpoq. Allannguutit marluk inatsisiliornermut periaatsinut tunnganerupput, allannguulli kingulleq tassa § 34-mi imm. 6-annik ilanngussineq isumaqarpoq ilassutitut aningaasaliissutinut ilanngussisarneq pillugu § 26-mi aalajangersakkat ukioq 2000-mi januaarip aallaqqaataaniit atuutilissasut, taamaalilluni tamanna ima paasisariaqarpoq aappagu ukioq 2000-mi ilassutitut aningaasaliissutinut inatsisissatut siunnersuutinik saqqummiussisoqassanngitsoq.
Sanaartornermut iluarsagassanullu aningaasaateqarfiup 2000-mi januarip aallaqqaataani pilersinneqarnissaa siunertaralugu iliuusissat pisariaqartut naalakkersuisut aallartereerpaat. Tamatuma saniatigut allaffissornikkut aningaasanillu aqutsinermi suleriaatsinik allanngortitsirinissaq annertooq suliassaavoq taamatullu aamma soorunami puigornagu missingersuusiornermut maleruagassiortoqassalluni.
Siunissami Aningaasanut Inatsisaasartussat piffissaq akuersissuteqarfigisassaat eqqarsaatigalugu paasisinnaavara Inatsisartut aappassaaneerinninnermi ukiumut tulliuttumut Aningaasanut Inatsisissap akuersissutigineqartarnissaanut piffissarititatut ulloq novemberip aallaqqaataa aalajangiusimagaat. Piffissaq taanna aalajangersarneqarpoq kommunit missingersuutiminnut sunniutaasussanik suliaqarnissaannut piffissaqarluaqqullugit.
Oqaatigissavarattaaq naalakkersuisut Aningaasanut Inatsisissanut siunnersuutaat siunissami ileqquusumit siusinnerusukkut saqqummiunneqartalissammat, tassami inatisissatut siunnersuummi matumani kingusinnerpaamik septemberip aallaqqaataa killiliunneqarsimammat. Tamanna tunngavigalugu Aningaasaqarnermut Ataatsimiititaliaq naalakkersuisunut inussiarnersumik kajumissaassavarput septemberi aallartiinnartorlu Aningaasanut Inatsisissatut siunnersuummik suliaqartalersinnaaqqullugu.
Naggasiullugu oqaatigerusuppara Inatsiseqarnermut Ataatsimiititaliap aappassaaneerinninnermi isumaliutissiissummini oqaaatigimmagau imatut: Inatsisissatut siunnersuummi nutaaliarineqartut pitsaasuussut aammalu naalakkersuinikkut aalajangiiniarnerni tunngavissanut aningaasartuutaasartunillu nakkutilliinernut patajaallitaasaassasut. Taamaalilluni inatsisissatut siunnersuutip massakkutut isikkoqarluni akuersissutigineqarnissaa naalakkersuisut inassutigaat.
Johan Lund Olsen, Inatsisartut Siulittaasuat:
Tassa oqaatigineqareersutuut maannakkut tassa pingajussaanerinninneq ingerlanneqarpoq, taamaammat tassa taasisussaassagatta qanittukkut, taava Inatsisartuni ilaasortat maani najuutin-ngitsut qinnuigivakka maanngaqqullugit, tassa aamma oqaluuserisassani tullinnguuttuni aamma taaseqattaartussaassagatta.
Siullermilli apeqqutigeqqaasavara uani aallanik oqaasissaqartoqarumanersoq. Taamaattoqanngilaq, tassa taamaalilluta inatsisissatut siunnersuutip massakkutut taamatut isikkoqarluni pingajussaaneerneqarnerani isumaqataasut nikueqqussavakka.
26-it. Tassa Inatsisartunut
ilaasortat maani najuuttut. Tassa taamaalilluta immikkortoq 16 naammassivarput.
Oqaluuserisaq naammassivoq.