Oqaluuserisassani immikkoortoq 23-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Pingasunngorneq 29.september 1999 nal.13.50
Ataatsimiinnermik aqutsisoq, Inatsisartut Siulittaasuat Johan Lund Olsen:
Tassani siunnersuuteqartoq Maliinannguaq M. Mølgaard siunnersuumminik saqqummeeqqaassaaq, tamatuma kingorna Ineqarnermut, Attaveqarnermut Pilersuinermullu Naalakkersuisoq aamma saqqummiussissalluni. Siullermilli Maliinannguaq M. Mølgaard takanna.
Maliinannguaq M. Mølgaard, siunnersuumminik saqqummiussisoq, Inuit Ataqatigiit:
Ukiuni makkunani illoqarfiit ilaanni inissaaleqineq imaannaanngeqaaq. Ullumikkullu attartortitsinermut inatsit malillugu inip angissusaa qanorlu issusaa apeqqutaatinnagu qanoq akilertinneqartarnissaanut killiliisoqarsimanngilaq. Tamatuma kingunerisaanik Pisortaqarfiit suliffeqarfiillu sulisuminnut inissaqartitsinngitsut utaqqiisaangallartumik inissiisariaqartarput akisoqisumik akiliillutik.
Tamatumallu kingunerisarpaa aningaasarpassuit nakkutigineqanngitsumik piginnittunut ataasiakkaanut nakkartarneri, uffa massa Pisortaqarfinnit suliffeqarfinnillumi inissanut nutaanut sananermut atorsinnaagaluit.
Inissaaleqinerujussuaq qaangerniarneqassappat sapinngisamik sanaartornermut aningaasartuutit amerlasuut pisariaqartippavut, taamaattumillu inatsisartut suliariaasiat malillugu § 30 stk. 3 millugu aalajangigassanngorlugu siunnersuutigaara, ininut attartortitsinermut akit killilerneqarnissaasa oqallisineqarnissaat.
Aningaasat atugassarititaasut killeqarput, siunissamilu taamatut
ingerlaannassagutta inissaaleqinerup qaangerniarnera imaaliallaannarlugu
qaangernavianngilarput. Unalu ilisimatitsissutigissavara, una § 30 stk. 3
malillugu maannakkut una oqaluuseriniannginnatsigu, aammalu nammi-neerlunga
saaffiginnissutigisimagakku ineqarnermut inatsimmut attuumassuteqarmat,
tassanga ilanngullu oqaluuserineqarsinnaannginnersoq. Taannalu akuerineqarsimammat nuannaarutigaara.
Tassa ilisimatitsissutigissuara taanna siunnersuut augustimili
nassiunnikuugakku.
Steffen Ulrich Lynge, Ineqarnermut, Attaveqarnermut
Pilersuinermullu Naalakkersuisoq:
Tassa siunnersuummut tassunga
tunngatillugu oqaatigissavara kingusissukkut tigugatsigu, taamaattumik
Ineqarnermut Ataatsimiititaliamut aappassaaneernerani uumap
oqaluuserineqarnissaanut tunngatillugu innersuunneqarpoq.
Taava Naalakkersuisut sinnerlugit
matumuuna Inissianik attartorneq pillugu Inatsisartut peqqussutaata
allanngortinneqarneranik Inatsisartut peqqussutissaattut siunnersuut
saqqummiutissavara.
Peqqussutissatut siunnersuummik
saqqummiussineq pingaartumik inissanik innersuussisarneq pillugu
malittarisassanik eqaallisaanissamik pisariaqartitsinerup kinguneraa.
Aammattaaq peqqussutissatut siunnersuut kinguneqassaaq, malittarisassat
Naalakkersuisunit aalajangersarneqartartut malillugit attartortut pisuni
immikkut ittuni pisinnaatitaalissammata inigisartik inummut
attartortikkallarsinnaalernissaannik.
Piffissamik inigisamik inummut
allamut attartortitsigallartarnermut taarsiullugu periarfissat ilaattut
siunnersuutigineqarpoq, inummut allamut attartortitsigallartarneq atorunnaarsillugu
attartortup inigisamik attartornini iperartassagaa, inissamik allamik
tunineqarnissamik qularnaariffigineqarnikkut, piffissap peqanngiffiusup
naanerani inissarsiortutut utaqqisut allattorsimaffianni aallaqqaataaniit
utaqqinngikkaluarluni.
Kiisalu siunnersuutikkut
peqqussummi atuuttumi attartornerup nalaani attartortoq inissiap iluani
aserfallatsaaliinissamut pisussaaffia pillugu malittarisassani kalaallisut
danskisullu oqaasertaliussat imminnut naapertuutinnginnerat paasineqarmat,
tamanna iluarsineqarpoq.
Peqqussutissatut siunnersuut
Ineqartut Peqatigiiffiisa Kattuffiannut, Isumaginninnermut Suliffeqarfimmullu
Pisortaqarfimmut A/S Inissiaatileqatigiiffik INI-mut KANUKOKA-mullu
tusarniaaffigissutigineqarpoq.
Naalakkersuisut ilanngullugu oqaatigerusuppaat,
inissianik attartorneq pillugu peqqussutip annertuumik nutarterneqarnissaa
ineqarnermut tunngasumik nalilersuilluni suliaqarnermut atatillugu
aallartinneqarsimammat. Inatsisartut kingusinnerusukkut tamanna pillugu
nassuiaammik saqqummiussiffigiuumaarpagut.
Taamatut oqaaseqarlunga
peqqussutissatut siunnersuut Inatsisartunut oqaluuserisassanngortippara.
Vittus Mikaelsen, Siumup oqaaseqartua:
Siumut sinnerlugu ininik attartortarneq Inatsisartut peqqussutaata allanngortinneqarnissaanik Inatsisartut peqqussutissatut siunnersuutaanut imaattumik oqaaseqaateqarniarpugut.
Naalakkersuisuni inissianik attartortarneq pillugu Inatsisartut peqqussutaata allanngortinneqarnissaanik Inatsisartut peqqussutissaatut siunnersuutaatut Siumumiit sukumiisumik misissuataarparput.Inatsisartut peqqussutaata allanngortinneqarnissaanik siunnersuutip imarisaa Siumumiit iluarisimaarparput. Aammalu Siunnersuummi immikkuualuttut tamarmik tikinngikkaluarlugit ataasiakkaanut tunngatillugu imaattumik oqaasissaqarpugut ilassutissaqarlutalu.
Ineqarnermut Naalakkersuisup oqarneratuut inissianik innersuussisarneq pillugu malittarisassanik eqaallisaasoqarnissaa assut pisariaqartinneqarpoq, aammalu Naalakkersuisut tamatumuuna suliniutaat tamakkiisumik taperserumavarput.
Peqqutissap allanngortinneqarnissaanik siunnersuummi ineqartut inigisaminni immikkut ittumik pisoqartillugu attartortitsisinnaanerat ammaanneqassasoq, ammaanneqassaaq, tamannalu Naalakkersuisut malittarisassiornerisigut pissaaq. Ilinniagaqartut kiisalu isertitsivinni pineqaatissinneqarsimasut imaluunniit napparsimasut Danmarkimut katsorsartikkiartorsimasut tassani pineqarput.
Siumumiit isumaqarpugut ilinniagaqartut, sulisartut allat aammalu nappasimasut inigisaminnik allamut attartortitsisinnaanissaat salliutillugit periarfissinneqassasut. Taamaattoq isertitsivimmi pineqaatissinneqarsimasut pineqaatissinneqarsimanermi nalaanni inigisaminnik attartortitsisinnaanissaat isumaqataaffiginngilarput. Tassungalu taarsiullugu pineqaatissinneqarsimasut inissamik allamik tunineqarsinnaanissaat qulakkeerneqartarnissaat piumasarissavarput.
Inigisat allamut attartortinneqartarnerannut isumaqatigiissutit ersarissumik nakkutigineqarnissaat pisariaqartutut isigaarput, tamannalu peqqutigalugu allanngortinneqarnissaanik siunnersuutip suliarineqarnerani ilanngullugu nalilerneqartariaqarpoq.
Taamatut oqaaseqarluta Siumumiit innersuusutigissuarput Inatsisartut peqqussutissaata allan-ngortinneqarnissaanik siunnersuut aammalu Inatsisartuni ilaasortap, Maliinannguaq Markussen Mølgaardip siunnersuutaata ilanngullugu Ineqarnermut Ataatsimiititaliamut suliakkiissutigineqarnissaanut aappassaaneerlugu oqaluuserineqannginnermini.
Godmann Rasmussen, Atassutip oqaaseqartua:
Inissianik attartorneq pillugu Inatsisartut peqqussutaata allanngortinneqarneranut Inatsisartut peqqussutissaatut siunnersuummut Atassummiit imaattumik oqaaseqassaagut:
Aallaqqaatigalugu Atassummiit iluarisimaarparput saqqummiussaq manna pisinnagu tusarniaasoqarsimammat.
Inissaaleqinerujussuup nalaani inissarsiortuartut susoqarneranut malinnaajuarput, namminneq qaqugu tullinnguunnissaminnik neriuuteqartuarlutik.
Allannguutissatut saqqummiussaq Atassummiit pissusissamisoorsoraarput, inertummi sivisuumik sivikitsumilluunniit inimik atuisussaajunnaarallarneranni ini pineqartoq atuarluarniarneqartarmat.
Atassummiit iluaraarput ineqartoq uteqqinnermini inissaqartinneqartussatut siunnersuutikkut matumuuna qulakkiivigineqarmat utaqqisunut kingullersanngortitaanani.
Inissianik attartorneq pilluugu peqqussutip annertuumik nutarterneqarnissaa Naalakkersuisup oqaatigisaa qujarupparput, nassuiaatissaalu assut qilanaarilereerlugu.
Taama oqaaseqarluta peqqussutip allannguutissatut saqqummiunissaanut Atassumiit akuersivugut, naggataatigullu Ineqarnermut Ataatsimiititaliamut siunnersuupput ingerlasimasoq tullissaanik aappassaaneerneqarnerani ilanngunneqarnissaa naatsorsuutigissuarput.
Ole Lynge, Inuit Ataqatigiit oqaaseqartuat:
Tassa saqqummiussassarput neriuppunga Inatsisartunut agguaanneqangajalersoq. Inissanik innersuussisarnermi malittarisassat eqaallisarnissaannik pisariaqartitsisoqarnera ilumoorluinnarpoq. Apeqquserneqarsinnaavoq inissaqartitsiniarneq ataatsimut isigalugu sinerissap ilaani, inissaqarniarnikkut pissutsit allanut sanilliullugit ilungersunarluinnartuunerisa pisariaqalersimmagu, soorlu Nuuk, Upernavik, Ittoqqortoormiit peqqussutissap oqaaseqaataani oqaatigineqartutuut kisiisa toqqammavigalugit allanngortitsinissaq naammannersoq.
Taamaattorli peqqussutissatut siunnersuutip qulakkeerniartussavaa, aamma ininik attatugaqartut pisunik immikkut ittuni inigisaminnik inunnut allanut attartortitsigallarsinnaanerat. Taamatut pisoqartillugu Naalakkersuisut immikkut malittarisassiorsinnaanissaannik pisinnaatinneqarnissaat Inuit Ataqatigiit ippinnartoqartinngilaat.
Saqqummiussami Ineqarnermut Naalakkersuisup saqqummiussinermi inissianik attartorneq pillugu annertuumik nutarterisoqarnissaa siunertaralugu nalilersuinermi, tassa ataatsimoortumik nalilersuinermi suliaqarnermut atatillugu aallartinneqareersimanera Inuit Ataqatigiinniit pisariaqavissutut nalileratsigu oqaatiginngitsoorusunngilarput.
Tassa ullumikkut inissianik attartortitsinnermi malittarisassat tamakkiisumik nunarput tamakkerlugu naleqqussarneqarlutillu pisariillisarneqarnissaat pisariaqarluinnarpoq. Tassungalu atatillugu Ineqarnermut Naalakkersuisoq kissaateqarfigissuarput, inissiani ukiuni kingullerni najugaqareersimasut aningaasalersuereersimasullu namminneerlutik inigisaminnut akiliinermikkut aserfallatsaaliinermut tutsittagaat inissianik tamakkiisumik aserfallatsaaliinissamut tutsinnaveersaartariaqaraat.
Inuit Ataqatigiinniit isumaqaratta ineqartut peqatigiiffikkuutaarlutik aningaasat taakkua namminneq oqartussaaqatigiillutik siunertarminnut atorsinnaasariaqaraat. Soorlu pinnguartartinnik iluarsaassinermut imaluunniit allatigut ineqarfigisat avatangiisinut isikkuminarsaaniarnermut.
Ininik attartortitsisarnermut akit killiliivigineqarnissaannik Inatsisartuni ilaasortaq, Maliinan-nguaq Markussen Mølgaard, Inuit Ataqatigiit, siunnersuuteqarpoq. Siunnersuut Inuit Ataqatigiit tamakkiisumik taperserpaat. Pisariaqalivippoq ullummikkut attartortitsinermut inatsisit peqqussutillu allanngortinneqarnissaat.
Illoqarfinni annertuumik inissaaleqiffiusuni inissaaleqineq annertuumik atornerlunneqartutut taasariaqarpoq, tassami init angissusaat pitsaassusaalluunniit apeqqutaatinnagit akilersuisitsinerit naapertuutinngilluinnarput. Taamaattumik Inuiat Ataqatigiinniit inassutigissavarput Ineqarnermut Naalakkersuisup piaartumik tamanna iluarsiiviginiarlugu iliuuseqaqqullugu.
Inuit Ataqatigiit qilanaaraat Iatsisartunut ungasinngitsukkut Naalakkersuisut ininik attartortitsisarneq pillugu nassuiaammik saqqummiussilersaarnerat. Peqqussummut allannguutissatut siunnersuut manna annertunerusumik ingerlatsinermi aningaasartuuteqarnerulernermik kinguneqartussaanngilaq.
Taamaattumik Inuit Ataqatigiit akuersaarpaat peqqussutissatut siunnersuut taamatut isikkoqarluni aappassaaneerneqarnissaminut ingerlateqqinneqarnissaa.
Naggataatigut Inuit Ataqatigiinniit oqaatigissuarput, Inatsisartuni ilaasortap siunnersuutaasa pisariaqarnera malillugu matumunnga ilanngullugit suliassiissutigissaat Inatsisartut ineqarnermut ataatsimiititaliaanut isummerfigisassatut isummerfigineqassappata tamanna ajoriffissaqartinngikkipput.
Anthon Frederiksen, Kattusseqatigiit oqaaseqartuat:
Inissianik attartorneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut Kattusseqatigiinniit soqutigalugu misissorsimavarput, imatullu oqaaseqarfigissallugu.
Siullermik uggornarpoq Ineqarnermut Naalakkersuisup Inatsisartunut ilaasortap Maliinannguup Markussen Mølgaardip siunnersuutaanut tunngatillugu akissuteqaammini ersarinnerusumik oqaaseqarfigisimanngimmagu, tassa allakkatigut. Kisiannili isumaqatigaarput Ineqarnermut Aaatsimiititaliamut apeqqut taanna pillugu ingerlateqqinneqarnissaa innersuunneqarmat.
Peqqussumik allannguiniarneq pissusissamisoorpoq tapersersortariaqarlunilu, misilittakkammi takutippaat inissianik attartorneq pillugu peqqussutip maannakkut atuuttup allanngortinneqarnissaa pisariaqalersimasoq, minnerunngitsumik aamma inissianik iluarsartuussinerup aallatisarneqarnerani najugaqartut inissianut allanut innersuunneqartarnerat eqqarsaatigalugu.
Kattusseqatigiinniit pingaartitatta ilagilluinnarpaat, inuiaqatigiit toqqissisimasumik ineriartornissaat, taamaattumik inissianik attartortup inissiap ilaanik inissialluunniit tamarmi piffissap ilaani allamut attartortitsisinnaanera periarfissinneqassappat, isumaqarpugut attartortitsinissaq tamatigut A/S Inissiaatileqatigiiffik INI suleqatigalugu ingerlanneqartassasoq, tassa inissiat pisortanit suli pigineqarallartillugit aammalu A/S Inissiaatileqatigiiffik INI aqqutsisuugallartillugu tamanna pissusissamisuussammat.
Ilaatigummi tusartaannarparput ininik attartortut ilaasa iniminnik attartortitsigallarnermi akiligassarpassuaqalertarsimanerat, tassagooq attartortitaq akiliisimanngimmat. Pissutsit taamaattut ilaatigut aaqqiagiinnginnermik kinguneqarsinnaasartut pinngitsoorneqarnissaat isumaqarpugut ilanngullugit qulakkeerneqartariaqartut.
Tassami assersuutigalugu inissiamik attartortup iliniagaqarneq, pikkorissarneq imaluunniit ineqarfigisap avataani piffissami sivikinnerusumik sivisunerusumiluunniit qimagussimasariaqalernera pissutigalugu inigisap qimakkallartariaqalernerani isumannaatsumik aaqqiisoqarnissaa aammalu ineqartumut aningaasatigut sunniuteqapiluttussaanngitsumik aaqqiinissaq pisariaqarmat. Taamatullu aaqqissuussisinnaaneq aamma boligstøtte aqqutigalugu illutaarsimasunut atuutsinneqarnissaa ilanngullugu Kattusseqatigiinniit kaammattuutigerusupparput.
Ilanngullugulu kaammattuutigussuarput ineqartup iniminik attartortitsisinnaanerata atornerlunneqannginnissaa aamma qulakkeerniarlugu aalajangersakkani erseqqissaasoqartariaqartoq, tassa inuit kommuneqarfigisap avataaneersut imaluunniit nunami allaneersut immaqalu siusinnerusukkut inissarsiorlutit nalunaaruteqarsimanngitsut isumaqatigiissutip atorunnaarneratigut inissarsiortutut allatulli inissisimasariaqarnerat eqqaamasariaqarmat. Inissarsiortummi utaqqisorpassuit saneqqutiinnarlugit siornatigut inissarsiorsimanngitsunik ingiarneqartalernissaat akuersaarneqarsinnaanngimmat.
Kattusseqatigiinniit qularutiginngilarput inissianik attarneq pillugu peqqussutip eqaallisarneqarneratigut ineqartunut inissarsiortunut oqilisaarnermik kinguneqarnissaa.
Taamatut oqaaseqarluta suliap aappassaanneerneqannginnermini Inatsisartut Ineqarnermut Ataatsimiititaliaani sukumiisumik oqaluuserineqarnissaa inassutigaarput.
Steffen Ulrich Lynge, Ineqarnermut, Attaveqarnermut Pilersuinermullu Naalakkersuisoq:
Tassa qujanaq oqaaseqartunut. Maluginiarpara tamarmik innersuukkaat siunnersuut aappassaanniinnginnerani Ineqarnermut ataatsimiititaliami oqaluuserineqassasoq.
Tassani pilerivunga assut isumasioqatiginissaannut, taamaalillunga qujallunga oqaaseqarpunga.
Johan Lund Olsen, ataatsimiinnermik aqutsisoq:
Ja, taavalu maannakkut aamma oqaaseqarumalluni nalunaarpoq, Otto Steenholdt.
Otto Steenholdt, Atassut:
Siumup oqaaseqartuata oqaatigisai maani uparuaassuteqarfigilaarniarpakka.
Tassa isertitsivinni pineqaatissinneqarsimasut attartortitsisinnaanissaat isumaqataafffiginngimmassuk. Isumaqarpunga eqqartuusseriaaseq nunatsinni tassaasoq inuk pinerlussimasoq inuiaqatigiinnut uterteriarneqassasoq, tassa taassuma isumarpiaa.
Taamaattumik aamma pineqaatissinneqarsimasoq anilluni iserfissaaruttussaq isumaqarpunga ernumanartuusoq. Taamaattumik ataatsimiissutigineqalerpat taanna nalilersorluallaqquara, taakkua pineqaatissinneqarsimasut soorunami allatulli pineqartariaqarput, namminneq inigisaminnut utersinnaasariaqarput, inissaarullutik aamma ajornartorsiutit kigumut pulaffigeqqiinnarsinnaammatigik.
Taanna uanga assorsuaq mianersoqqussutigissavara, kisianni ataatsimiititaliap taanna nalilersuleruniuk ilanngukkumaarpaa.
Maliinannguup Markussen Mølgaardip siunnersuutaa oqallisigisassaanngitsoq massakkut nalunngikkaluarlugu attupillanneqareermat akineqarsimanngimmallu aamma kissaatiginassaaq, imatut oqassalluni, namminersorlutik privatit illuuteqarlutik atukkiisinnaaneq atukkiiniarnerminni akigiteqqusaat Inatsisartut Naalakkersuisulluunniit suliassaasa avataaniiippoq.
Taamatut oqarpunga kissaatiginartinneqassappat Inatsisartut imaluunniit kommunit namminneq inissaataat taamatut aalajangersaaffigineqassappata, tassa navianarsinnaasoq aajuna, taamatut akuliuffigineqassagunik privatimik atukkiisartut atukkiiumajunnaaratarsinnaanerat, massakkut nalunnginnakku Namminersornerullutik Oqartussat qujanartumik tamakkuninnga attartugaqartut akiliisarnerat annernaraluarpoq, kisianni akuliuffigineqarlutik attartortitsiumajunnaarpata inissaaleq pingaartuumik Nuummi suli annerulersussaammat. Akiliisarnerujussuuanik isumaqatigaakka, kisianni privatinut akuliuteriarnissaq taanna mianersoqqussutigaara.
Maliinannguaq Markussen Mølgaard, oqaaseqaqqittoq, Inuit Ataqatigiit:
Qujanaq, nuannaarutigaara siunnersuutiga ataatsimiititami oqaluuserineqarniarmat aamma neriuppunga sukumiisumik tassani eqqartorneqarumaartoq.
Oqaluttumut kingullermut oqaatigissuara aamma soorunami tamakkua iserfigineqanngitsoornavianngimmata, tassani ataatsimiititami aammalu innersuussutit tassani pissanganarput, qanoq oqariartuuteqassanersut. Uani pisortat illuutai kisiisa piniarussigit aamma assigiinngitsorujussuarmik aalajangiisoqarsinnaanera soorunami tassani takorloorneqarsinnaavoq. Oqartoqarsinnaalluni immaqa namminersortut imaluunniit illuutillit namminneq, immaqa taakkuuppulluunniit suli annerpaamik killeqanngitsumi qaffasinnerpaaffissaanik akiliisitsillutik attartortitsisartut.
Taamaattumik pissanganarpoq aamma Ineqarnermut Naalakkersuisup taassumap tungaatigut qanoq oqaaseqarumaarnera, isumaliutissiissut suliarineqariarpat. Taamaattumik neriuppunga tamakkua nalilersorluarneqarumaartut aammalu ataatsimut isigisumik nalilersorneqarumaartut. Ullumikkut ineqarnerup aammalu inissaaleqinerup annertoorsuarmik ajornartorsiutaalluni aammalu atornerlugaalluni ingerlanneqarnera isumaqarpunga isiginngitsuusaaginnarsinnaan-ngikkipput, qanorlu iliuuseqarfigisariaqarlugu. Qujanaq.
Vittus Mikaelsen, Siumup oqaaseqartua, oqaaseqaqqittoq:
Qujanaq. Partiit avataatigut oqaaseqartut Siumup oqaaseqaataa uparuaaneranut tunngatillugu erseqqissaatigilaarniarpara una, tassani allassimasut titarneq kingulleq ima erseqqitsigisumik allassimammat, uparuaassutigineqarpoq tassani isertitsivimmi isertinneqartartut eqqarsaatigalugit. Tassunga tunngatillugu titarneq kingulleq ima erseqqitsigisumik allassimavoq, tassungali taarsiullugu pineqaatissinneqarsimasumut inissamik allamik tunineqarnissaminut qulakkeerneqarnissaa qulakkeerneqarnissaa piumasarivarput.
Tassani annertunerpaamik eqqarsaatigivarput illoqarfiit anginerit. Illoqarfiit anginerit tassaapput inissiaqartut inissianik annertoorujussuarmik sanaartorfigineqarsimasut.
Taamatut pisoqaraangat, taamaalilluni aamma eqqarlerisai eqqorneqartarput, uteqqinnermini sumut inissinneqassava. Taamaattumik taannartaa inuiaqatigiit eqqissisimanissaat eqqarsaatigalugu, taamaattumik allaanerulaartumik periarfissinneqarnissaat taakkua Siumup tungaanin-ngaanniit uagut eqqarsaatigivarput.
Soorlu allamik periarfissinneqarnissaat tunineqarnissaminnut qulakkeerneqarsimasariaqarpoq, uternissaminut inissaanik. Taava taamaalilluni immikkoortitsineqassanngilaq tassani oqarnani, uani oqarsimasuugaluarutta taakku pineqassanngillat, kisianni naggataagut erseqqissaassutige-reerparput allamik periarfissamik ujarliussisoqartariaqartoq.
Ole Lynge, Inuit Ataqatigiit oqaaseqartuat oqaaseqaqqittoq:
Taannaana ineqartut ilaasa arlaannik peqquteqarlutik iniminnut uteqqissinnaannginnissaannik apeqqut uangattaaq ippinnartoqartikkiga, taamaattumik Ineqarnermut ataatsimiititaliami soorunami nalilersoqqinnissaa pisariaqarpoq.
Taassuma saniatigut Inuit Ataqatigiit saqqummiussatsinni aallaqqaasiigatta aamma oqarpugut, ilumut naammappaa. Inigissat inigineqanngikkallarneranni imaluunniit inissianik initaarniarlutik utaqqisutoqqat eqqarsaatiginerusariaqarpagut uani aamma, aaqqissuussineq ataatsimut tamaat isigissagutsigu.
Aamma ajornanngippallaamik taamatut "iluanaarniutigalugu" attartortitsisinnaaneq pinaveersimatinneqartariaqarpoq, immaqalu aqukkuminaannerpaat taanna ilagisinnaavaat.
Nuummiut, Illoqqortoormiormiut Upernavimmiullu immaqa nalunnginneruaat, kisianni atagu takulaariartigu. Nalunaarusiassaq pissangagiqaarput Ineqarnermut Naalakkersuisup nalunaarusiassaaq, taannalu aamma toqqammavigalugu Inuit Ataqatigiit peqataarusupput ataatsimoortumik nunarput tamakkerlugu attartortitsisarnermut malittarisassat aaqqissuussiffigineqarnissaannut.
Jonathan Motzfeldt, Naalakkersuisut Siulittaasuat:
Soorlu Ineqarnermut Naalakkersup oqaatigigaa aaqqissuussineq manna maannakkut pisariaqarluinnartutut pissuseqalersimavoq, tamatumani pinngitsoorumaneqanngillat siulliullugit personaleboligit, tassa sulisut inigisartagaat, taavalu aamma attartortinneqartut udlejningsboliginik taaneqartartut. Tassa taakkua ajornartorsiutaapput, illoqarfiilli ilaanni, pingaartumik soorunami Nuummi aamma allaat Upernavimmi Illoqqortoormiunilu takuneqarsinnaavoq ajornartorsiut aamma ittoq.
Periarfissaq Naalakkersuisut periarfissaat maannakkut atorniarneqarpoq ilaatigut kommunit namminneq isumaginninneq aqqutigalugu inissianik innersuussisarnerat, sulisunut inissanik innersuussisarneq kissaatigalugulu assigiinngitsunut inissianut illunullu taarseraattarnerit, taakkua Landsstyremit, Naalakkersuisunit aaqqissuunneqarnissaat maannakkut siunertarineqarmat.
Tassa taamatut periarfissaqarsimaneq atuussimagaluarpoq januarip aallaqqaataa 1997-imi, periarfissaq taanna atorunnaarsinneqarsimavoq. Assersuutitut taalara, illoqarfimmi maani, illoqarfinni ilinninnik angeqisunik tigummisaqarfiusuni, Ilinniarfissuarmi, ilinniarnertuunngorniat atuarfiini ukiut tamaasa takujuarsinnaanngilagut, ilinniartitsisut allaraangata inigisaat soorunami utaqqisunut tullernut pingaangata ilinniartitsisut atugassavut pinngitsoorsinnaanngisavut tikittut taava Sømandhjemmenut, hotelinut allanullu inissillugit utaqqisunut aamma ilannguttaratsigit.
Suleriaatsit taamaattut ilinniartitsinermiluunniit suliarisagut eqqarsaatigalugit erloqinarput. Taamaattumik maannakkut kommuninut Naalakkersuisut isumaqatigiissuteqarsinnaanerannut periarfissiineq oqilisaataassaaq, tamatsinnut aammalu ilaatigut suliffeqarfiit taamaatut eqqaasakka ajunngitsumik eqaatsumillu suliamikkut ingerlatitsisinnaanerannut.
Uani allat taakkartorneqartut partiininngaanniit Udvalgimi suliarisassaqqissutut uanga isumaqarfigigakkit taakku oqaaseqarfigissanngilakka, uanili ajornartorsiutigisagut Naalakkersuisuni aammalu allat sulisunut ajornartorsiutit aammalu isumaginninnikkut, kommunit paaseqatiginninnissamut aqqutissat erseqqinnerusumik tunngavissarsiorneqarnerat anguniarneqarnerat erseqqissarpara.
Johan Lund Olsen, ataatsimiinnermik aqutsisoq, Inatsisartut Siulittaasuat:
Ja qujanaq, taavalu tassa allanik oqaaseqartussaarummat tassa taamaalilluni immikkoortoq 23, tassalu Inissianik attartorneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut matumani siullermeerneqarnera naammassivarput. Tassalu oqaatigineqareersutuut aappassaaneerisoqartinnagu Ineqarnermut ataatsimiititaliamut innersuunneqassaaq.
Oqaluuserisaq naammassivoq.