Oqaluuserisassani immikkoortoq 27-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 4. oktober 1999
nal. 13.02
Ataatsimiinnermik
aqutsisoq:
Anders Andreassen, Siulittaasoqarfimmi ilaasortaq, Siumut.
Alfred Jakobsen, Peqqinnissamut, Avatangiisinut
Ilageeqarnermullu Naalakkersuisoq:
Inuussutissanut,
Nunalerinermut Aalisarnermullu Ministeriaqarfik 1999-imi upernaakkut
Avatangiisinut Pinngortitamullu Pisortaqarfimmut saaffiginnippoq,
ilisimatitsissutigalugu Inuussutissanut ministerip 1998-imi aggustimi
nunatsinni angalanerani Naalagaaffiup Sinniisaanit ilisimatinneqarsimallutik
suliassat Kalaallit Nunaanni aalisakkanik misissuinernut siusinnerusukkut
ilaasimasut massakkulli Pinngortitaleriffiup suliaanut ilanngussimasut
Inuussutissanut Ministeriaqarfiup nakkutilliisutut suliassaanut ilaasut.
Aammattaaq
Ministeriaqarfiup ilisimatitsissutigaa Kalaallit Nunaanni aalisakkanik
misissuinerit Inatsisartut inatsisaatigut nr. 6-ikkut 8.juni 1994-imeersukkut
Pinngortitaleriffimmut nuunneqarnerata Inatsisartut peqqussutaatigut
pisimasariaqaraluarneranik uparuunneqarsimalluni.
Apeqqut taaneqartoq
Avatangiisinut Pinngortitamullu Pisortaqarfiup Inatsisileriffimmut
tusarniaatigisimavaa. Inatsisileriffik isumaqanngilaq Pinngortitaleriffik
peqqussutikkut malittarisassaqartinneqassasoq. Tamatumunnga tunngaviuvoq
Pinngortitaleriffik pillugu inatsimmi Kalaallit Nunaanni aalisakkanik
missuinernut erseqqissunik innersuussutitaqannginnera, Pinngortitaleriffillu
pillugu inatsisikkut siunertarineqarmat pinngortitamut avatangiisinullu
tunngasut aqunneqarnerata ataatsimut aalajangersaavigineqarnissaa kiisalu
Pinngortitaleriffiup aaqqissuussaanerata erseqqinnerusumik
aalajangersaavigineqarnissaa.
Taamaattumik
Inatsisileriffik isumaqarpoq paatsoortoqannginnissaa inatsisitigullu
tunngavissaqartitsinissaq eqqarsaatigalugit Kalaallit Nunaanni aalisakkanik
misissuinerit siusinnerusukkut suliarisimasaannik Pinngortitaleriffik
ingerlataqassappat inatsimmi nr. 847-mi 21. december 1988-imeersumi § 4
tunngavigalugu Inatsisartut peqqussutissaattut siunnersuusiortoqartariaqartoq,
tassanilu suliassat Kalaallit Nunaanni aalisakkanik misissuinernit
siusinnerusukkut isumagineqarlutillu aqunneqartut Pinngortitaleriffik pillugu
inatsit tunngavigalugu Pinngortitaleriffimmit massakkut aqunneqalernerat
aalajangersarlugu.
Inatsisileriffiup
oqaaseqaatai Inuussutissanut Ministeriaqarfimmut, inatsit
piginnaatitsissutaasoq eqqarsaatigalugu Danmarkimi suliassaqarfimmut
ministeriaqarfiusumut, saqqummiunneqarsimapput. Inatsisileriffiup periusissatut
siunnersuutigisaa Ministeriaqarfiup isumaqatigisimavaa.
Taamaattumik Inatsisartut
peqqussutissaattut siunnersuummi inatsisitigut tunngavissaqarnermut tunngasut
iluarsineqarnissaat aallaavigineqarpoq.
Inatsisartut
peqqussutissaattut siunnersuut susassaqartunut tusarniaatigineqarsimavoq,
akissutillu takkuttut periarfissaqartillugu siunnersuummut
ilanngunneqarsimallutik.
Hans Enoksen, Siumup oqaaseqartua:
Kalaallit Nunaanni aalisakkanik misissuinerit aaqqissuussaanerallu pillugu Inatsisartut peqqussutissaattut siunnersuut imaak Siumumiit oqaaseqarfigissavarput.
Inatsisartut peqqussutissaattut matumuna saqqummiunneqartoq tunngaveqarpoq Inussutissanut, Nunalerinermullu Aalisarnermullu Ministeriaqarfik upernaakkut Avatangiisinut Pinngortitamullu Pisortaqarfimmut saaffiginnissuteqarpoq, Kalaallit Nunaanni aalisakkanik misissuinermut siusinnerusukkut ilaasimagaluartut ullumikkut pinngortitaleriffiup suliaanut ilanngussimasut, ullumikkut Inuussutissanut Ministeriaqarfiup suliassaanut ilaasut.
Tamannalu tunngavigalugu matumuuna peqqussutissakkut iluarsiniarneqarpoq siornatigut Kalaallit Nunaanni aalisakkanik misissuinernik ingerlanneqartaraluartut ullumikkut Pinngortitaleriffimmi suliarisalernissaannut piginnaatitaaffilerneqassasoq, tamannalu allanngortitsiniarneq tunngaviatigut Siumumiit isumaqatigaarput. Tassami allaffissornikkut aningaasaqarnikkullu kinguneqartussaanngilaq, tassani tunngavissamik aaqqiineq kisimi pineqarmat. Kisiannili tassani maluginiaqqussavarput Danmarkimi Avatangiisinik Misissuisoqarfik, kiisalu Ministeriuneqarfik akissuteqarsimanngillat tamatumalu sillimaffigineqarnissaa kissaatigissaarput aningaasatigut sunniuteqarsinnaanera eqqarsaatigalugu.
Taamatut oqaaseqarluta peqqussutissap taamatut isikkoqarluni aappassaaneernearnissaanut ingerlaqqinnissaa innersuussutigaarput.
Godmand Jensen, Atassutip oqaaseqartua:
Kalaallit Nunaanni aalisakkanik misissuinerit aaqqissuussaanerat sulinerallu pillugit Inatsisartut peqqussutissaattut siunnersuummut imaattumik Atassummiit naatsumik oqaaseqaateqassaagut.
Atassummiit apeqqut qulaani pineqartoq paasivarput susassaqartunut assigiinngitsunut tusarniaassutigineqarsimasoq aammalu paasillugu allaffissornikkut kiisalu aningaasaqarnikkut kinguneqartussaanngitsoq.
Taamaattumik Atassutip Naalakkersuisut Inatsisartut peqqussutissaattut siunnersuummi inatsisitigut tunngavissaqarnissaannik kaammattuutaat erseqqarimmat tamakkiisumik isumaqataanerput nalunaarutigaarput.
Ole Lynge, Inuit Ataqatigiit oqaaseqartuat:
Inuit Ataqatigiit Kalaallit Nunaanni aalisakkanik misissuinerit aaqqissuussaanerat sulinerallu pillugit Inatsisartut peqqussutissaattut siunnersuut makkuninnga oqaaseqarfigissavaat.
Naalakkersuisut saqqummiussinerminni oqaatigineqartutut peqqissaarussinissaq inatsisitigullu tunngavissaqarnissaq eqqarsaatigalugit Inatsisartut peqqussutissaattut siunnersuusiornissamut iliuuseqarsimapput, piginnaatitsinermut inatsit malillugu aalajangersarneqarmat suliassat siornatigut Kalaallit Nunaanni Aalisakkanik Misissuiffimmit isumagineqartarsimasut allaffissuutigineqartarsimasullu maanna Kalaallit Nunaanni Pinngortitaleriffik pillugu inatsit naapertorlugu Pinngortitaleriffimmit isumagineqartalissasut.
Inuit Ataqatigiit siunnersuummut isumaqataapput, isumaqarlutali suliassat Pinngortitaleriffiup siunissami suliarisartaligassai aammalu suliassat sorliit Inuussutissanut ministereqarfiup nakkutigisassatut pisussaaffigilissaneraat pillugit Naalakkersuisut itinerusumik nassuiaateqassasut.
Aammattaaq Inuit Ataqatigiit isumaqarput Kalaallit Nunaanni Aalisakkanik Misissuiffiup aaqqissuussaanera suliaalu ullumikkorniit erseqqinnerulertariaqarput, tassani sunik qanorlu annertutigisunik suliaqartoqartarnera innuttaasunit ilisimaneqarneruleqqullugu.
Taamatut oqaaseqarluta Inuit Ataqatigiit siunnersuutip aappassaaneerlugu oqaluuserineqalinnginnerani Inatsisartut Avatangiisit pillugit Ataatsimiititaliaanit oqaluusereqqaarneqarnissaa innersuussutigissavarput.
Mogens Kleist, Kattusseqatigiit oqaaseqartuat:
Kalaallit Nunaanni aalisakkanik
misissuisarnerit aaqqissuussaanerat sulinerallu pillugit Inatsisartut
peqqussutissaannut siunnersuummut imatut Kattusseqatigiinniit
oqaaseqarusuppugut.
Inatsit nr. 847-mi 21. december
1988-imeersoq § 4 tunngavigalugu Kalaallit Nunaanni aalisakkanik misissuisarnerit
Pinngortitalerivimmit isumagineqalernissaat inatsisitigut peqqussusiornikkut
nuunneqarnissaat pissusissamisoortutut Kattusseqatigiinniit isigaarput.
Tassami Kalaallit Nunaanni
aalisakkanut misissuisarnerit Pinngortitaleriffiup ataaniilerpata naleqquttuunerussammat
Qallunaat Nunaanniit ingerlanneqaratik.
Taamatut oqaaseqarluta suliap
taamatut isikkoqarluni aappassaaneerneqarnissaminut ingerlaqqinnissaa
akuersissutigaarput.
Alfred Jakobsen, Peqqinnissamut, Avatangiisinut
Ilageeqarnermullu Naalakkersuisoq:
Partiit Kattusseqatigiillu
oqaaserisaannut uunga Kalaallit Nunaanni aalisakkanik misissuinerit
aaqqissuussaanerat sulinerallu pillugit Inatsisartut peqqussutissaattut
siunnersuummut saqqummiussaat naatsunnguamik imaalillugu oqaaseqarfigilaassavakka.
Tassa maluginiarpara
Siumukkormiut, Atassutikkormiut Kattusseqatigiillu immikkut uumap
peqqussutissatut siunnersuummi aappassaaniinnginnarani Avatangiisinut
Eqqissisimatitsinermullu Ataatsimiititaliami suliarineqarnissaa
inassutitaqanngitsut, kisiannilu Inuit Ataqatigiit oqaaseqartuata erseqqissumik
kissaatigalugu uumap peqqussutissatut siunnersuutip aappassaaniinnginnerani
Avatangiisinut Eqqissisimatitsinermullu Ataatsimiititaliami suliarineqarnissaa
inassutigalugu.
Naalakkersuisuninngaanniit
isumaqarpugut pissusissamisuussasoq taamatut suliarineqarnerata
ingerlaqqinnissaanik suliaqartoqarsinnaappat, tamannalu maani
Siulittaasoqarfimmut aamma taamaalillugu Naalakkersuisuninngaanniit
kaammattuutigerusussavarput.
Taavalu Siumukkormiut
oqaaseqartuanut, tassalu Danmarkimi Avatangiisinut Misissuisoqarfik aammalu
ministeriuneqarfik akissuteqarsimanngitsunngooq, aap, matumap piareersarnerani
taava akissuteqaatit pissarsiarisimanngisagut tassatuaapput Danmarkimi
Avatangiisinut Misissuisoqarfimminngaanniit.
Alla akissuteqaat, tassalu
ministeriuneqarfimminngaanniit akissuteqaat tigusimavarput uumap
piareersarnerata naammassereerlugu agguaanneqareertorlu, taamaattumik
Inatsisartunut eqqaasitsissutigilaaginnassavara akissuteqaat
ministeriuneqarfimminngaanneersoq taanna uumap aappassaaneerlugu
suliarinnginnerani Avatangiisinut Eqqissisimatitsinermullu Ataatsimiititaliap
suliarilerpagu taannartaa ilanngullugu aamma saqqummiunneqarumaarmat.
Taava Inuit Ataqatigiit
oqaaseqartuanut siunissami Pinngortitaleriffiup suut suliarisartaligassai
aammalu suliassat sorliit Inuussutissanik ministereqarfiup nakkutigisassaattut
pisussaaffigilissaneraat pillugit Naalakkersuisut itisilerutaannik
nassuiaateqassasut taamatut kissaateqarmat, taassumunnga
oqaatigilaaginnassavara, tassa manna tikillugu Pinngortitaleriffiup nunatsinnut
nuunneqareernerata kingorna taava Aalisakkanik Misissuisoqarfiup nunatsinnut
nuunneqareernerata kingorna suliassat Aalisakkanik Misissuisoqarfiup
ingerlatai, taakkua malinnaavigineqartuarmata Danmarkimi inuussutissanut
ministereqarfimminngaanniit imatut annerusumik pisussaaffeqanngikkaluarput,
taamaallaat siusinnerusukkut Qallunaat Nunaata naalagaaffiata ataani nunatsinni
Aalisakkanik Misissuisoqarfik ingerlanneqarallarmat ingerlatai, suliassai,
kiffartuussinerilu misissuinerilu taakkua tamarmik malinnaaffigineqaannarpoq
maannakut tassani inuussutissanik ministereqarfimminngaanniit.
Anders Andreassen, ataatsimiinnermik aqutsisoq:
Tassa maluginiarpara aamma soorlu
Naalakkersuisuni ilaasortap oqaatigereeraa amerlanerussuteqarluartut
kissaatiginngilaat ataatsimiititaliami ingerlaqqinnissaa, taamaattumillu
oqaatigisariaqarpoq Naalakkersuisut paasissutissanik erseqqinnerusunik aamma
ilaatigut saqqummiussisinnaajumaartut aappassaaneernerata nalaani.
Taamaalillluni suliassaq
ullumikkut siullermeerneqarnera taanna naammassisutut oqaatigisinnaavarput.
Oqaluuserisaq naammassivoq.