Oqaluuserisassani immikkoortoq 41-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 18. oktober 1999
nal. 14.25
Ataatsimiinnermik
aqutsisoq, Inatsisartut
Siulittaasuat Johan Lund Olsen:
Taanna siulittaasoqarfik
sinnerlugu saqqummiuttussaassavara. Qinnuigissavaralu siulittaasup tullia
siulleq ataatsimiinnermi aqutseqqullugu. Taavalu aamma eqqaasitsissutigissavara
tassani siunnersuuteqartoqarsimammat tassalu Jakob Siverthsen; taanna
sinnerlugu saqqummiussissaaq Finn Karlsen.
Ataatsimiinnermik
aqutsisoq: Anders
Andreassen, Siulittaasup tullia, Siumut.
Finn Karlsen, Siunnersuuteqartoq Jakob Sivertsen
sinnerlugu:
Inatsisartuni ilaasortap Jakob
Siverthsenip upernaaq Inatsisartut ataatsimiinnerisa naanissaata nalaani
siunnersuutaa maannakkut saqqummiutissavara uanga, imatullu imaqarpoq:
Inatsisartut upernaaq
ataatsimiinnerminni siulittaasoqarfimmi Atassut sinnerlugu ilaasortaatitatta
ilaquttaminik napparsimasoqarnera peqqutigalugu ataatsimiinnermi
peqataasinnaannginnera peqqutaalluni, upernaakkut ataatsimiinnerup
ingerlanerani Inatsisartuni ilaasortatut siulittaasoqarfimmi paasiumasagut
apuukkusutagullu ingerlatinneqarsinnaanngimmata assut kipiluttunarsimavoq,
Inatsisartut sulittaasoqarfianni ilaasortat sinniisussaqannginnerat
peqqutaalluni.
Inatsisartut ataatsimiinnerisa
nalaanni Inatsisartuni siulittaasoqarfiup tamarmiusup Inatsisartuni ilaasortat,
minnerunngitsumik partiit Inatsisartuni ilaasortaatitaqartut piumasaqaataannik
paasiumasaannillu naammaginartumik sullinneqarnissaa Atassummiit assut
pingaartikkatigu.
Kalaallit Nunaanni Inatsisartut
suleriaasiata 3. juni 1993-imeersup 13. maj 1996-imi allanngortinneqartup
aammalu novemberip 1-ani 1996-imi ilassuteqartinneqartup imatut
allanngortinneqarnissaa siunnersuutigaarput.
Kapital 2 § 2 imm. 3 imatut
oqaasertalerneqassasoq: Partiit Kattusseqatigiilluunniit siulittaasoqarfimmi
ilaasortaatitaqartut ilaasortaatitaat Inatsisartut ataatsimiinnerisa nalaanni
peqquteqavillutik peqataasinnaanngikkaangata ilaasortaagallartussamik
toqaasoqarsinnaapput.
Taamaalilluni siulittaasoqarfimmi
ilaasortat Inatsisartut ataatsimiinnerisa nalaanni tamarmiullutik Inatsisartuni
sullissisinnaanissaat qulakkeerneqassammat.
Johan Lund Olsen, Siulittaasoqarfik sinnerlugu
saqqummiussisoq, Inuit Aqatigiit:
Ukiuni arlaqalersuni
ataasianngeqaluta Inatsisartuni arlaqarunartugut misigisimasarpugut
sule-riaasitsinni najoqqutagut ullutsinnut naleqqunnerusunngorlugit
allanngortitertariaqartut. Ukioq ilivitsoq sinnilik allannguutissat
suliarinerat ingerlareersorlu suleriaasissatsitut siunnersuut siulittaasoqarfik
sinnerlugu saqqummiussinnaagakku nuannarutigeqaara.
Naluneqanngitsutut suleriaaseq
massakkut atugarput aallaveqarpoq Inatsisartut Naalakkersuisullu pillugit
Inatsisartut inatsisaannik; taamaattussaagamimi. Taamaakkaluartoq
siulittaasoqarfiup isumaa malillugu tulluarsorinnanngilaq Inatsisartut
sulineranni malittarisassat sukumiinerusut inatsisitigut aalajangersassallugit;
Inatsisartummi sulineranni najoqqutat pissutsit allanngoriartorneri malillugit
aamma pisariuallaanngitsumik allanngortinneqarsinnaasariaqarput naak soorunami
siunertarinngikkaluaripput qanoq pisoqaallattorlu allanngortinneqartarnissaat.
Maannangaaq oqaatigeriissavara
Inatsisartut Naalakkersuisullu pillugit Inatsisartut inatsisaata sapinngisamik
piaartumik allanngortinnissaa pisariaqassammat, imminnut assortuuttumik
imminnulluunniit tulluutinngitsunik aalajangersagaqartariaqanngimmat.
Taamaatumik siulittaasoqarfimmi
naatsorsuutigivarput piffissami ungasinngitsumik Naalakkersuisut inatsimmut
allannguutissanik Inatsisartunut aamma saqqummiussasaqarumaartut.
Naatsumik oqaatigalugu
siunnersuut saqqummiussaq akuerineqassaguni suleriaasitsinnik massakkut
atuuttumik allanngortitsilluinnartussaavoq.
Uani saqqummiussininni
suleriaasissatut siunnersuutip imai arlaqanngitsut kisiisa eqqartulaassavakka;
imaami siunnersuummi oqaaseqaatinilu aalajangersakkanut ataasiakkaanut
nassuiaatini sukumiisuni massakkut atuuttunut sanilliulugu sutigut
allannguuteqarnersoq takuneqarsinnaavoq.
Annerutillugit samminiarpakka
allanngortiterinermi annertuumi isummat pingaarnerit suut tunngaviunersut.
Siulliullugit tikitsiarusuppakka
suleriaatsimut massakkut atukkatsinnut sanilliullutik allannguutaasussat ilaat.
Suleriaaserput massakkut atuuttoq
aaqqissuussaanermigut suliassalluunniit ataasiakkaat eqqarsaatigalugit
najoqqutarissallugu ersarissutut oqaatigineqarsinnaanngilaq. Assersuutitut
taaneqarsinnaavoq Inatsisartut inatsisiliornertik naammaginartumik
ingerlassinnaassagunikku ersarissunik malittarisassaqartariaqartut, suliatillu
peqqissaarullugit ingerlassinnaasariaqarlugit. Taakkorpiaat siunnersuutikkut
matumuuna saqqummiunneqartukkut anguniarneqarput. Taakkununnga tunngasut
kingusinnerusukkut uterfigeqqissavakka.
Inatsisartut suliaat siornatigut
suliaannut sanilliukkaanni maluginiartariaqarpoq Inatsisartut inatsisiliortutut
piinnarnatik aammattaarli maannakkut Naalakkersuisunik nakkutilliisutut suliaat
malunnarnerulersimammat. Siulittaasoqarfimmit isumaqarpugut suliassat
allanngorneri eqqarsaatigalugit, Inatsisartuni ilaasortat oqaluuserissassanik
siunnersuusiorneranni kissaatiginartoq apeqqutitut, aalajangiiffigisassatut
siunnersuutitut nassuiaanneqarnissamik kissaatigisatut apeqqutilluunniit
aallavigalugit oqallinnissatut ilusilersortassagaat. Taamaattumik
ilusilersueriaatsit pineqartut suliassat suut pineqartillugit
atorneqarsinnaaneri suleriaasissatut siunnersuummi erseqqissaavigineqarput.
Malittarisassanik massakkut
atuuttunik allanngortitsinngitsoq § 13. imm. 1-imi allassimasoq una immikkut
oqaatigisariaqarpoq, tassalu Inatsisartut ataatsimiititaliaanni oqallisigisat
avammut matoqqasuummata. Aatsaat avammut saqqummiussisoqarsinnaavoq
oqaluuserisat ilaat immikkut annertussusillit tamanut tusarliunneqarsinnaasut
ataatsimiititaliami isumaqatigiissutigineqarsimappata.
Siunnersuut malillugu
inatsisissatut siunnersuutit, nassuiaatit il.il. oqaatsit atornagit
allakkatigulli saqqummiunneqartalissapput, aatsaalli siulittaasoqarfiup
akuersineratigut oqaluinnarluni naatsumik saqqummiunneqarsinnaalissallutik.
Qularinngilara siulittaasoqarfik akuerseqqullugu saaffigineqallattaartassasoq.
Taanna piaaralunga immikkut oqaatigaara nalaattagassat pillugit siumut piareersimareerniassagatta.
Massakkut isummerfigisassatut
siunnersuutit ataasiaannarlugit oqaluuserineqartarput, siunnersuutigineqarporli
siunissami marloriarlugit oqaluuserineqartalissasut. Taama
siunnersuuteqarnermut pissutaavoq, aalajangiiffigisassatut siunnersuuteqarnermi
siunertarineqarajummat inatsisiliortoqarnissaa, inatsisinik atuuttunik
allanngortitsisoqarnissaa, allanik annertunerusunik malittarisassiortoqarnissaa
il.il.
Aamma allannguutissatut
siunnersuutini immikkut maluginiaqqussavakka, oqaluuserisanik assigiinngitsunik
sammisaqarluni oqallinnerni piffissaliussatut siunnersuutit. Taakku ilaatigut
maannakkut atuuttunut allannguutissanik siunnersuutitaqarput, siunnersuummullu
ilaliussami takuneqarsinnaasallutik. Allannguutissanik siunnersuutitigut maannamut
ippigineqartartut ilaat tassaavoq, assersuutigalugu Inatsisartuni ilaasortat
Naalakkersuisuni ilaasortanut sanilliullutik oqaaseqarnissaminnut
piffissakinnerusarnerat taanna - aaqqiiviginiarneqarpoq, maannakkut
suleriaasissami nutaami.
Nunatsinni qinersisartut
qinigaattut nunatta aqunneqarnerani qullerpaatut inissisimasutut
inatsisiliortutullu sulinitsini najoqqutassaqartariaqarpugut, sapinngisamik
ersarissunik suliatsinnillu ilaatigut imaannanngissinnaasartunik
ingerlatsinitsinni nalorninata toqqammavigisinnaasatsinnik. Kikkulluunniit
inuiqatigiinnut annertuumik oqartussaaffillit taamak oqartussaanertik
sapinngisamik naapertuilluarlutik ingerlanniartariaqartarpaat.
Inatsisiliornitsigut allatigullu aalajangersaasarnitsigu innuttaasut
piginnaatillugillu pisussaafilersinnaasarpagut, taamatummi piginnaatitaagatta;
taamatulli piginnaatitaanitta pisussaaffilerpaatiguttaaq sianigisassat
arlalissuit inuit kikkulluunniit piginnaatitaaanerinut tunngasut aamma
innimigisariaqarivut, inatsisit atuuttut soorunami malillugit
kinaassuserrsiornatalu ingerlatsisariaqarnitsigut.
Inatsisartut sulinerata
sapinngisamik eqaatsumik ingerlasinnaanissaa qularnanngitsumik tamakkerluta
kissaatigeqaarput. Aamma siusinnerusukkut ataasiarnata eqqartortarparput
kissaatigi-nartoq Inatsisartuni oqallittarnivut qanoq iliorluni
eqeersimaarnerusumik aammalu pisimasut kingulliit ilanngullugittaaq
ingerlanneqarsinnaasariaqartut. Ilami ilaatigut atuffarlukujulluni
atuffassinersuaq ingerlatsertariaqalerparput.
Taamaakkaluartoq oqareernittut
assigiinngitsunik mianerisassaqarpugut saneqqussinnaanngisatsinnik. Aamma
pisariaqarluinnarpoq pingaartumik inatsisiliornitta pipallattumik pinnani
peqqissaartumilli ingerlanneqarnissaa; inatsisiliornermi taallatsiareerneratut
pisussaaffiuvoq imaannaanngitsoq. Aammattaaq saneqqussinnaanngilarput inuianni
oqaatsit marluk atorlugit ingerlanerput pissutigalugu sulinitta ilarujussuani
allatut ajornartumik nutserinerit pisariusut aatsaat aqqusaaqqaarlugit
suliatsinnik ingerlatsisariaqartarnerput.
Siuliini eqqaasakka
pissuterpiaapput allatut ajornartumik Siulittaasoqarfimmi pissutsit
misilittakkallu isumaliutigeqqinnerisigut, aalajangeratta Inatsisartut
ataatsimiinnerini oqaluuseritinniakkat nalinginnaasumik ataatsimiinnissaq
qaammammik ataatsimik sioqqullugu tiguneqareertarnissaat
siunnersuutiginiarlutigu. - Tassunga illua-tungiliullugu aammattaaq siuliini
eqqaasakka - tassalu Inatsisartuni oqallittarnerni pisut kingulliit
ilanngullugittaaq aammalu oqallinnerit sapinngisamik eqeersimaartumik
ingerlanneqartarnissaat - pisinnaassappata Siulittaasoqarfik pissutsit immikkut
atuutsillugit suleriaatsini aalajangersakkamik allaasumik
periarfissaqartitaasariaqarpoq.
Soorunami siunnersuut
aalajangersakkamik taamaattumik ilaqarpoq. Tassani eqqarsaatigineruakka
Inatsisartut ataatsimiinerisa nalaani Naalakkersuisunut apeqquteqarsinnaaneq
imaluunniit apeqquteqaatit aallavigalugit oqallinnissamik
siunnersuuteqarsinnaaneq. Soorunami imaassan-ngilaq periarfissaq taasaq
kingulleq, tassalu immikkut akuersissuteqartarneq, nalinginnarmik
atugaalertariaqarlersoq; taamaalisoqaraluarpammi Siulittaasoqarfik annertuumik
tatisimaniarneqalersinnaavoq.
Taamatut pisoqannginnissaa
tamattaalluta pisussaafffigaarput. Ingerlanitsinni misilittakkavut
najoqqutaralugit sapinngisamik oqimaaqatigiissumik periaaseqalernissaq
anguniartariaqarparput. Tamanna ajornaatsuinnaanavianngilaq; naammattumilli
piumassuseqarutta pisinnaasarpullu naapertorlugu arlatta soqutigisaat
pingaartitaallu pillugit ataqqeqatigiikkutta periarfissanik naammaginartunik
nassaassaqqaarpugut.
Aamma qularnanngilaq ilaasortat
ilaannit takuinnarlugu apersuuserneqarsinnaasoq sooq oqaluuserisassatut
siunnersuutit assigiinngitsut qanoq ilusilersornissaannik piumasaqarnermik aalaja-ngersagaqartoqartariaqarnersoq.
Ukiuni arlaqaleqisuni misilittakkatta takutittarpaat siunnersuutit aatsaat
tigoreernerini ilusissaattut ilusilersuisarneq piffissamik nukinnillu
annikigisassaanngitsunik aamma atuiffiusartoq. Taamakku pitillugit assorsuaq
Siulittaasoqarfimmiit siunnersuutigeruusupparput Inatsisartuni ilaasortat
ataasiakkaat oqaluuserisassanik siunnersuuteqarniarlutik akunnattooraangamik
Inatsisartut Allattoqarfianni sulisut saaffigisassagaat siunersiorlugit. Taama
periaaseqarnikkut piffissaq nukiillu sipaarneqaannaratik ilaatigut immaqa
pisariaqarpianngikkaluamik allaat aporaassutaasinnaasartut
ikilisinneqarsinnaassagaluarput.
Inatsisissatut peqqussutissatullu
siunnersuutit pillugit immikkut taarusuppakka pineqartut saqqummiunneqartassasut
soorunami ilusissatik iluseralugit; taassumatulli pingaartigaaq siunnersuusiat
suliarinerinut ilanngullugit susassaqartut inatsisitigut kalluarneqartussat
sapinngisamik isumasioreertarnissaat. Aamma pisariaqaqaaq tusarniaanerit
taamaattut pisarnissaat tusarniaavigisat naammattumik piffissaqartillugit.
Taamatut tusarniaanermi soorunami
siunertaanngilaq isumasiukkat isumaasa tamatigut malinneqartarnissaat,
isumasiukkalli ilaatigut siunnersuuteqarsinnaasarput, soorlu assersuutigalugu
inatsisinngortussap atuutilernermini atortikkuminartuunissaannut
aqqutissiuussisinnaasunik.
Nalunaarusianut tunngatillugu
taarusupparput nalunaarusiat ilaatigut annertuujusinnaasartut
naammassineqaraangamik ukiup ingerlanerani sukkulluunniit ilaasortanut
nassiunneqartarnissaat assorsuaq kissaatiginartoq.
Taamaaliornikkut ataatsimiinnerit
nalaanni ilaasortat atugassarpassuaqalertarnerminni
oqilisaanneqarsinnaagaluarput. Aamma ilanngullugu siornatigut eqqartoriigarput
ersarissumik oqaatigeqqittariaqarpoq, tassalu nalunaarusiat aalajangigassanik
ilaqartinnginnissaat.
Siulittaasoqarfimmiit
inassutigissavarput suleriaasissatut siunnersuut una saqqummiunneqarluni
oqaluuserineqareeruni oqaluuserinera unitsinneqarallassasoq, taavalu
siunnersuut nalilersorneqarlunilu inaarutaasumik oqaluuserineqannginnermini
Inatsisartut suleriaasissaannut ataatsimiititaliami suliarineqassasoq.
Taamatut oqaaseqarlunga
suleriaasissatut siunnersuut saqqummiuppara. Siulittaasoqarfimmi
qilanaarivarput Inatsisartunit qanoq isummersorfigineqassanersoq aamma
tusassallugu.
Lars Karl Jensen, Siumup oqaaseqartua:
Kalaallit Nunaanni Inatsisartut
suleriaasissaattut siunnersuut Siumumiit maluginiarparput annertuumik
ullutsinnullu suleriaatsimut naleqqussarlugu maanna allannguuteqartussatut
suliarineqarsimasoq.
Tamanna naapertuuppoq 1996-imi
ukiakkut Inatsisartut suleriaasiannik allannguinitsigut ataatsimiititaliat
ataavartut ataatsimiititaliallu allat inatsisit naapertorlugit
pilersinneqartussat, allattoqarfeqarnikkut sullinneqarnerisa Inatsisartut
allattoqarfianniit akisussaaffigineqalerlutik sullinneqarnerannut
naleqqussaanermut.
Siumumiit oqaatigeriissavarput
pingaartikkatsigu Inatsisartuni sulinermi malittarisassatigut
naleqqussaanissamik periarfissaqartoqarnissaq, Iatsisartunimi
Naalakkersuisunilu sulinerup allaffissornikkut immikkoortinneqarneratigut
suliassat ineriartortinneqarneranni pissutsinut naleqqussaanissaq
avaqqunneqarsinnaanngimmat.
Aamma matumani saqqummiussisummi
pineqartup, tassalu Inatsisartut Naalakkersuisullu pillugit Inatsisartut
inatsisaata allanngortinneqarnissaanik suliassat piaartumik
naammassineqarnissaat Siumumiit inassutigissavarput.Tamanna pingaaruteqarmat
Inatsisartut inatsisaannik suliaqarnermi ersarissumik malittarisaqarnissamut.
Taamatuttaaq Inatsisartut
siulittaasuat aamma Inatsisartut Siulittaasoqarfiat pillugu § 3-imi
saqqummiunneqartutut oqaasertaliunneqartut piaartumik
piviusunngortinneqarnissaat Siumumiit pingaartipparput.
Aamma Siumumiit
isumaqarluinnarpugut Inatsisartut siulittaasussartik siulittaasullu tullii
taakkualu sinniisissaat nutaamik qinersisoqareernerup kingornatigut
inissititernermi, tamatumalu kingorna ukiakkut Inatsisartut ukiuata
aallartinnerani katersuunnermi Inatsisartut nammineerlutik toqqagassatik
qinertassagaat.
Tamanna maannakkut periusiusunut
naapertuilluarneruvoq maannakkummi periusiusoq malillugu
Naalakkersuisunngortitsinermut atatillugu, Inatsisartuni siulittaasup
isumaqatigiinniutigineqartarnera inatsisartutigoortumik sulinerup
allanngortinneranut naleqqutinngitsutut isumaqarfigigatsigu.
Ataatsimiititaliat inatsisinik
tunngaveqarluni pilersinneqartartut aamma Inatsisartut ataatsimiititaliaasa
ataavartut, suunerinik inatsisissami allassimasoqarmat Siumumiit
apeqqutigerusupparput, inuutissarsiutinut tapersiisarnermut ataatsimiititaliaq,
naalisarlugu ESU-mik taasagarput siunissami qanoq inissisimassanersoq pillugu
misissuisoqarsimanersoq.
Maannakkut ESU-p
allaffissornikkut ingerlatitaanera Naalakkersuisoqarfimmiippoq,
ataatsimiititaliarlu inuttalersugaasarpoq Inatsisartuni ilaasortanik. Tamatumap
ujartorneranut tunngaviuvoq Inatsisartuni ataatsimiititaliat allat
inatsisiliornerinnarmik suliaqartarmata, ESU-milu ilaasortat Inatsisartuni
kisiartanngormata aningaasaliissutit atugassaritinneqartut iluini
aningaasaliissuteqartarnermik aalajangiisartuutitaasut.
Siumumiit aamma
suleriaqqinnissamut ilanngullugu ataatsimiititaliat ataavartut ilaasa
suliamikkut assigiiaarnerusut ataatsimoortinneqarsinnaanerat
misissoqqussavarput, maannakkummi Inatsisartuni ataatsimiititaliat 14-iupput,
ilaat suliamikkut imminnut qanittut, qanittutut inissisimasut.
Ilaatigut assersuutigalugu
isiginiarneqarsinnaavoq Suliffeqarnermut Niuernermullu ataatsimiititaliat
ataatsimoortinneqarsinnaanersuut, taakkuami suliamikkut arlalitsigut imminnut
qanittuusarmata.
Piffissami kingullermi
Inatsisartut ataatsimiittarneranni, oqaluuseritinniakkanik sukkulluunniit
tunnniussisinnaanerup atuunnerani misilittagaalersut aallaavigalugit Siumumiit
maluginiartarsimavarput, tamanna nassataqartartoq ataatsimiinnerit
ingerlaneranni oqaluuserisassat tulleriiaarnerisa
allanngorteqattaarneqartarnerannik.
Taamaattumik Siumumiit
taperserparput Inatsisartut ataatsimiinnissaannut oqaluuserisassatut
ilanngutsinniakkat kingusinnerpaamik ataatsimiinnerup aallartinnissaa
qaammammik ataatsimik sioqqullugu siulittaasoqarfimmut
nassiunneqartarnissaannik inassuteqarneq.
Naggataatigut Siumumiit taamatut
oqaaseqarluta Kalaallit Nunaanni Inatsisartut suleriaasissaattut siunnersuut
ilassilluarparput, inaarsarlugulu suliarineqarnissaanut suleqataasussat
sulilluarnissaannik kissaallutigit.
Siverth K Heilmann, Atassutip oqaaseqartua:
Kalaallit Nunaanni Inatsisartut
suleriaasissaattut siunnersuut pillugu imatut naatsumik Atassummiit
oqaaseqassaagut:
Sunaluunniit suleriaaseq
inatsilluunniit naleqqugunnaarsimappat piaartumik aaqqinneqartariaqarpoq.
Taamaattumik Atassummiit nuannaarutigaarput Inatsisartut siulittaasuata
siulittaasoqarfik sinnerlugu saqqummiinermini tunngavilersuutai Atassummiit
tamakkiisumik isumaqatigigatsigit.
Siulittaasoqarfiup Inatsisartut
ataatsimiinnerini oqaluuseritinniakkat nalinginnaasumik ataatsimiinnissaq
qaammammik ataatsimik sioqqullugu tiguneqareertarnissaannik siunnersuuteqarnera
Atassummiit tamakkiisumik isumaqatigaarput.
Tassami massakkutuut
ingerlaaserput eqqarsaatigalugu, oqaluuserisassanik tigooqqaasarneq
torrallataasutut oqaatigineqarsinnaanngimmat. Inatsisartut ataatsimiinnerisa
nalaanni amerlavallaaqaat ilaasortaat siunnersuutaat inortuilersutuulli
pipallattumillu suliariniarneqartarnerat.
Siunnersuuteqartut Inatsisartut
allattoqarfianni sulisut saaffigineqartarnissaannik
siunnersiorneqartarnissaannillu Siulittaasoqarfiup kaammattuuttaa Atassummiit
ilassilluarparput.
Atorfinititseriaatsimut
tunngatillugu suleriaasissamut nutaami ersarissarneqarmat Atassummiit
iluarisimaarparput, tassami ilisimaneqartutuut kingullermik Inatsisartut
siulittaasoqarfianni atorfinititsisoqarsimanera pissusissamisuunngitsutut
ingerlasoqarsimanera annertuumik tusagassiuutit aqqutigalugit
oqallisigineqarsimanera puigunnginnatsigu. Atassumiillu oqaatigissuarput
kingorna taama pisoqanngilluinnarnissaa anguniaqqullugu.
Atassummiit Inatsisartut
suleriaasianni § 57-ip, sinniisussaqartarnermut tunngasup oqaasertaata
qinerseriaatsimut ullumikkut naleqquttunngorsarnissaat kaammattuutigissuarput, ullumikkummi
qinerseriaaseq malillugu sinniisussaqartarneq atorunnaarnikuummat.
Inatsisartuni ilaasortap
Atassummeersup, Jakob Siverthsenip siulittaasoqarfimmi sinniisoqartitaanermut
tunngatillugu siunnersuutaa, siulittaasoqarfiup suleriaasissatta allannguuteqartinneqarnissaanut
isumaqataallutik aaqqiiviginiarmassuk Atassummiit iluarisimaarparput,
pisariaqarluinnartutullu nalilerlugu.
Oqareernitsitut Inatsisartut
suleriaasissaata - suleriaasissatta allannguuteqartinniarneqarnera
tamakkiisumik isumaqatigalugillu taperserigut, taamaammat allat
annertunerusumik oqaaseqarfiginagit siunnersuut nalilersorneqarlunilu
inaarutaasumik oqaluuserineqannginnermini Inatsisartut suleriaasissaannut
ataatsimiititaliami suliarineqarnissaa Atassummiit akuersaarparput.
Olga Poulsen, Inuit Ataqatigiit oqaaseqartuat:
Kalaallit Nunaanni Inatsisartut
suleriaasissaattut siunnersuut Inuit Ataqatigiinninngaannit ima
oqaaseqarfigissavarput:
Nuannaarutigaarput
qujassutigalugulu Siulittaasoqarfik Kalaallit Nunaanni Inatsisartut suleriaasissaannut
allannguutissamik siunnersuuteqarmat. Qularnanngilaq siunnesuut
akuerineqareeruni atuutilersinneqaruni ulluinnarni Inatsisartut suleriaaserput
erseqqinnerulerumaartoq, tamatsinnut iluaqutaasussamik.
Siunnersuut
misissoqqissaarsimavarput ukulu oqaaseqarfiginiarpagut:
Siulleq § 4-imi imm. 5
annertuumik Siulittaasoqarfimmut siunnersuutit qanoq isikkoqartussaanerinik
aalajangiinissamut piginnaatitsilersussaavoq. Tamanna aamma ajunngilaq,
kisianni kissaatiginassaaq qarasaasiakkut qanoq ilusilersuisinnaanermut
tunngatillugu pikkorissartinneqarsinnaanerup periarfissinneqarnissaa.
Siulittaasoqarfiup Inatsisartuni
ilaasortat siunnersorpai arlaatigut siunnersuusiornermut atatillugu
Inatsisartut allattoqarfianni sulisut saaffigisassagaat. Ullumikkut sulinitsinni
tamanna atorparput, ilaatigut immaqa ataatsimiititaliani allatsigut
suliakkersugaatsiartarlugit.
Taamaattumik Inuit
Ataqatigiinniit kissaatigissavarput siulittaasoqarfiup siunnersuummik
suliarinninnermini erseqqarissassagaa, Inatsisartut allattoqarfiani sulisut
sutigut qaqugukkullu saaffigisinnaagigut ersarissumik takussutissioqqullugit.
Aappaat. Kapital 4-imi § 7-imi
imm. 1-imi nr. 3-mi oqaaseq, sillimaniarnermullu atorneqarsimavoq.
Nassuiaataanilu oqaaseq isumannaallisaanermullu atorneqarsimalluni. Taakkua
eqqortortaata ikkunneqarnissaa kissaatigissavarput.
Aammalu §-ip taassumap
nassuiaataani oqaaseq, toqqatoqarneqartunit aaqqinneqassasoq imatut,
toqqartorneqartunit, kissaatigissallutigu.
Pingajuat. § 8 naapertorlugu
siulittaasoqarfiup inassuteqarnera malillugu Inatsisartut ataatsimii-titaliaat
ataavartut pilersissinnaavai.
Taamatullu aamma iliorsimapput
ataatsimiititalianik arlalissuarnik ataavartunik Inatsisartut
pilersitsisimammata. §-ip taassumap nassuiaataani ataatsimiititaliat pilersinneqarsimasut
allattornerini Kultureqanermut Ilinniartitaanermullu Ilageeqarnermullu
ataatsimiititaliaat atorneqarsimavoq. Ilageeqarnermut tassani inissisimanera
apeqqutigissavarput, eqqortuunersoq, tassami ilageeqarnermut tunngasut
Peqqinnissaqarfimmut nuunneqarnikuummata. Aammattaaq tassani §-imi nr. 11 aamma
14 naleqqussavagut.
Sisamaat. § 24 naapertorlugu
Inatsisartut inissititerlutik ataatsimeeqqaarnerminni siunnersuisoqatigiinnut
nævninut il.il. qinersisussaapput. Tamanna ilumoorpoq, siunnersuutilli nassuiaatitaani
Inatsisartut qinersisarunnaarsimasutut taaneqarput. Taassumap nassuiaatitaani
aaqqinneqarnisaa aamma kissaatigissavarput.
Tallimassaattut. § 34,
Naalakkersuisut nassuiaateqartarnerinut tunngassuteqarpoq. Naalakkersuisut
Inatsisartunut nassuiaateqartarnerat pingaaruteqartutut isigaarput. Taamatullu
pingaaruteqartigisutut isigaarput Inatsisartut nunatta avataani
ataatsimiititalianut assigisaannulluunniit ilaasortaasut
nassuiaateqartarnissaat. Taamaattumik Inatsisartut aamma nassuiaateqartarnissaat
pisussaafinngorlugu inissinneqartariaqartutut isigaarput,
ilanngutsinneqarnissaalu piumasaralugu.
Arfinilissaattut. § 39,
Inatsisartut sulinitsinnut assut iluaqutaassaaq, tassani pineqarpoq
oqaluuserisassanik tunniusiffissap killilerneqarnera. Ullumikkut pissutsit
imaapput, ilaatigut suliassat annertuut ullut ikittuinnaat
suliarisariaqarsimatillugit tuaviupiluttumillusooq suliarinnittarneq ilaatigut
takussaasarluni. Tamanna qimanneqarsinnaalissaaq, taamaalillutalu aamma
peqqissaartumik inuiaqatigiinnut akisussaassuseqartumik sullissinissatsinnut
piffissaqarlualissaagut.
Arfineq aappaat. § 53-ip imatut
aaqqiivigineqarnissaa imatut kissaatigissavarput: Inatsisartut ataatsimiinneri
kalaallisuinnaq ingerlanneqartassapput. Taamatut kissaateqarnitsinnut tunngavigaarput
nunarsuarmi sumiikkaluaruttaluunniit Inatsisartoqartuni periuseq tamanna
atorneqarmat.
Assersuutigalugu qallunaat
nunaanni nunatsinniit qallunaat Inatsisartuinut ilaasortaatitagut kalaallit
oqaasii atorlugit oqaaseqarsinnaatitaanngillat. Tamannalu uagut kalaallit
ataqqisariuarsimavarput.
Inuiattut kinaassuseqarnitsinnut
pingaaruteqarluinnarpoq kalaallit Inatsisartuisa oqaluttarfiat kalaallisut
oqaatsivut atorlugit oqariartortarfiunissaa. Tamassumallu ataqqineqarnissaa
Inuit Ataqatigiinniit sakkortuumik piumasarissavarput.
Inuit Ataqatigiinniit
siunnersuutigissavarput Inatsisartuni taasisoqassatillugu ilaasortaasut arlaat
peqquteqavilluni peqataasinnaanngippat, assersuutigalugu napparsimatillugu
imaluunniit qanigisaminik napparsimasoortillugu sinniisussaatalu
apuussinnaanissaa silamik allatigulluunniit peqquteqartumik peqataasinnaanissaa
akornuserneqarsimappat, illuatungiliuttut imaluunniit suleqatigiit
taasisinnaasumik ataatsimik, ataasinnaasimappat ilanngaasarnissaat,
clearingssystemimik taaneqartartup Inatsisartunut eqqunneqarnissaa.Taamatut
siunnersuuteqarpugut isumaqaratta Inatsisartuni oqimaaqatigiissumik
taasisarnissaq pingaaruteqartoq.
Inuit Ataqatigiinniit
Inatsisartut suleriaasissaattut siunnersuummik saqqummiussisup imatut oqarnera,
issuaaneq aallartippoq: "Inatsisartuni ilaasortaasugut tassaasugut nunatta
aqunneqarnerani qullerpaatut inissisimasut. Taamatut inissisimaneq annertuumik
pisussaaffiliivoq, annertuumillu akissussaaffimmik tunniussilluni".
Issuaaneq naavoq.
Taamatut oqarneq
isumaqatigilluinnarparput, ulluinnarnilu sulinitsinni eqqarsaatigisarnissaa
pisariaqartarpoq. Taamaattumik pisariaqarluinnarpoq paasinartumik
malikkuminartumillu najoqqutassaqarnissaq suleriaasissaqarnissarlu. Tamanna
pisariaqarluinnarpoq innuttaasut kukkuluttorluta sullisissanngikkutsigit.
Taamatut oqaaseqarluta Kalaallit
Nunaanni Inatsisartut suleriaasissaattut siunnersuut Inatsisartut
suleriaasissaannut ataatsimiititaliamut suliareqqinneqarnissaa
innersuutigissavarput.
Naggataagigut Inuit Ataqatigiinniit
piumasarissavarput 1996-imi Inatsisartut suleriaasissaannik nutarterinissamut
isumasioqatigiisitap isumaliutissiissummini suliakkiissutigisimasai partiinik
tamanit akuerineqarsimasut maannakkut siulittaasoqarfiusup suliniutigalugit
aallartissagai. Qujanaq.
Anthon Frederiksen, Kattusseqatigiit oqaaseqartuat:
Inatsisartut suleriaasissaattut
siunnersuut Kattusseqatigiinniit imaattumik oqaaseqarfigissuarput.
Siullermik
eqqaasitsissutigissuara oqaaseqaatissagut ataatsimut tamaat tunngaviatigut
oqaaseqarfigissagatsigit aammalu paragraf-it immikkoortut ataasiakkaat
oqaaseqarfigissannginnatsigit.
Inatsisartut suleriaasiata
allanngortinneqarnissaa pissutsinullu piviusunut naleqqussarneqarnissaa
pissusissamisoorluinnarpoq, minnerunngitsumik Inatsisartut eqaannerusumik
sapinngisamillu tamanut naammaginarnerusumik suleriarsinnaanerat anguniarlugu.
Taamaattumik Kattusseqatigiinniit suleriaasissatut siunnersuut tamakkisumik
taperserparput kisiannili soorunami aamma suleriaatsip naleqqussarneqarnerani
makkuninnga iluarsisariaqarsorisatsinnik uparuaarusulluta.
Siullermik Inatsisartut
ataatsimiinnissaannut siunnersuutit ataatsimiinnissaq sioqqullugu sapaatit
akunnerinik marlunnik piffissaliisarnerup sivitsorneqarnissaa Kattusseqatigiinniit
pissusissamisoortutut isigaarput tassami isumaqaratta Inatsisartuni sulinerup
piareersarluagaasumik aaqqissuulluagaasumillu ingerlattariaqarnissaa
pisariaqarluinnartoq. Taamaattumik Inatsisartunut ilaasortat siunnersuutaat
kingusinnerpaamik qaammammik ataatsimik ataatsimiinnissaq sioqqullugu
tunniutereertarneqarnissaat tamakkisumik taperserumavarput. Kiisalu ilaasortat
ilaat partiimiit partiimut allamut nuuttaannarput, soorunami tamanna inuup
nammineerluni akisussaaffigaa. Kattusseqatigiinniilli isumaqarpugut taamatut
pisoqartillugu Inatsisartut suleriaasissaannik ersarinnerusumik
aalajangersakkanik aamma peqartariaqartoq, aammalu ilaasortat ilaasa
ataatsimiititaliamiit ataatsimiititaliamut allamut nuuttarnerat pillugu aamma
tamatumani erseqqissaasoqartariaqartoq isumaqarpugut. Kiisalu
eqqaasitsissutigissuarput Kattusseqatigiinniit pingaartilluinnaratsigu inuit
qinigaannik Naalakkersuisoqarnissaq, soorlu aamma tamanna qinersisartut
ilaanniit ujartorneqartartoq. Taamaattumik Kattusseqatigiinniit sakkortuumik
kaammattuutigissuarput suliap ingerlanneqarnerani Inatsisartunut ilaasortat
tamanna pillugu aamma ersarissumik isummeqqullugit.
Naggataatigut Inatsisartuni
ilaasortap Jakob Sivertsen-ip siunnersuutaa suliap ingerlaqqinnerani sukumiisumik
ataatsimiititaliami susassaqarfiusumi oqallisigineqartariaqartoq isumaqarpugut.
Tassami sinniisussaqartarnermut tunngasut ilaatigut apeqqutit soqutiginartut
allaanngortitsinissamilu ilaatinneqartariaqarsorinarmata.
Naggaterpiaatigut
oqaatigissuarput siulittaasoqarfiup saqqummiussai inassuteqaataalu
tunngaviisigut isumaqatigigatsigit.
Taamatut naatsunnguamik
oqaaseqarluta suliap aappassaaneertinnagu oqaluuserineqannginnerani Inatsiartut
Inatsiseqarneq pillugu Ataatsimiititaliaani suliarineqarnissaa inassutigaarput.
Johan Lund Olsen, Inatsisartut Siulittaasuat:
Siullermi isumaqarpunga una
oqaatigeqqaartariaqartoq, siulittaasoqarfimminngaanniit ataatsimut isigalugu
una siunnersuutigisarput paasinarpoq partiinit tamanit aammalu
Kattusseqatigiinniit kissalaartumik maani ilassilluarneqartoq. Taanna
qujassutigissallugu pissutissaqarluarpugut.
Unali oqaatigeqqaalaarlara uani
oqaluuserisatsinnut tunngatillugu siunnersuuteqartoqarsimavoq, Atassut
sinnerlugu Jakob Sivertsen maani ataatsimiinnitsinni peqataanngitsoq, taanna
siunnersuuteqarsimavoq Inatsisartut Siulittaasoqarfianni
sinniisussaqartalissasugut, taanna maannakkut siunnersuummut ilanngutereerlugu
aaqqiiviginiarsimavarput, tassalu suleriaasissatsitut siunnersuummi § 3, imm.
4-ni taanna ilanngutereersimavarput. Oqaatigeriikkattuut ataatsimut isigalugu
iluarisimaarnarpoq partiit kiisalu Kattusseqatigiit una
Siulittaasoqarfimminngaanniit saqqummiussarput ilassilluarmassuk.
Taamatullu oqaaseqareerlunga
partiit saqqummiussaat ataasiakkaat naatsunnguamik oqaaseqarfigillattaassavakka,
suliarli maanga killeqaannartussaanngilaq ingerlaqqittussaassaaq tassa
Inatsisartut Suleriaasissaat pillugu Ataatsimiititaliami
suliarineqaqqittussaassaaq, taamaattumik Kattusseqatigiit oqaaseqartuat
kingulleq kissaateqaraluarpoq Inatsisartut Inatsiseqarneq pillugu
Ataatsimiititaliaanni una oqaluuserineqassasoq, taannali ajornakusuukujussaaq,
Inatsisartut Inatsiseqarneq pillugu ataatsimiititaliaannimmata allat
siulittaasoqarsimmi ilaasortaasut, taamaalillutillu akunnattuunganalaartumik
inissisimasinnaanerat eqqarsaatigalugu siunnersuutigisimavarput Inatsisartut
suleriaasissaat pillugu ataatsimiititaliamut, tassa
foretnings-ordensudvalg-imut ingerlatinneqarallassasoq. Kingusinnerusukkut
maani Inatsisartut saqqummiussivigineqarumaarput qularnanngitsumik
isumaliutissiissummik ataatsimmiinnerup matuma naammassineqannginnerani.
Siumup oqaaseqartuata
saqqummiussai arlallit tamavimmik ilumoortortalerujussuupput. Ilumoorpoq
Inatsisartut maannakkut suleriaasissarput nutaaq tassaammat 1996-imi
Inatsisartut ukiakkut ataatsimiinnerminni suleriaatsimik
allanngortiteriniarlutik kommission-imik pilersitsisareersimallutik
suliaqarnerannik aallaaveqartut, taakkuuppullu taamanili Inatsisartut
tunngaviusumik maani oqallisereerlutik aamma akuersissutigereersimasaannik
timitalersuiniarnerit.
Ataatsimiititaliat
eqqarsaatigalugit tikinneqartoq, apeqquteqaatigineqarpoq
erhvervsstøtte-udvalg-i, Inuussutissarsiutitigut tapersiisarnermut
Ataatsimiititaliaq siunissami qanoq inissisimassanersoq pillugu misissuisoqarsinnaannginnersoq,
tassunga tunngatillugu eqqaasitsissutigilaassavara 1995-imi tamannarpiaq maani
ataatsimiittarfimmi oqallisigineqarsimammat, taamani
inassutigineqaqqaaraluarpoq erhvervsstøtteudvalg-imi suliassat Naalakkersuisut
isumagisassaattut iluanneereermata Naalakkersuisoqarfinniittariaqartoq,
taamaammat taanna 1995-imi immikkut pappialartalersorlugu
nalilersuiffigineqareermat nassaarineqarsinnaavoq
uterfigineqapallassinnaallunilu, taannalu inassutiginarpoq uani suliap
ingerlateqqinneqarnerani ilanngullugu nalilersorneqassasoq.
Maluginniakkama ilagaat maani
oqaaseqartut tamarmik katersuuffigivaat suleriaasissatut siunnersuutigisatsinni
maannakkut saqqummiussarput, tassalu Inatsisartut ataatsimiilinnginnerini
qaammammmik ataatsimik piffissaliilluta oqaluuserisassanik
tunniussisareernissaq, taanna mannamut oqaaseqartut tamarmik tamakkiisumik
taperserpaat, isumaqarpunga taanna iluaqutaassaqisoq oqaluuserisassanik
tulleriinnilersuilluta aaqqissuussiniarnitsinnut, minnerunngitsumik tamanna
isumaqarpunga pitsaaqutaaginnassasoq qinersisartunik aamma ilaasortat
ataasiakkaat tusarniaanissaminnut annertuumik periarfissiisinnaassammat, tassa
Inatsisartut ataatsimiilernissaat qaammammik ataatsimik sioqqullugu
oqaluuserisassat sunik imaqassanersut ilisimareeraangatsigit taava
qularnanngitsumik sineriammi sumiluunniit tamani ataatsimiititsisarnerit
aqqutigalugit innutaasunik tusarniaasarnissaq periarfissarissaarnerulissaaq.
Atassutip oqaaseqartuata
saqqummiussai tamakkiisumik tapersersuinerupput siulittaasoqarfiup Inatsisartut
suleriaasissaattut siunnersuummik saqqummiussinerannut, kisianni tassani
anersaaruluuteqarlutik ilaatigut maannamut aasap ingerlanerani pisimasoq
eqqartorneqarpoq, tassa atorfinitsitsisimanermut tunngasut. Qularinngilara
atorfinitsitsisimanermut tunngasut Inatsisartut suleriaasissaat pillugu
ataatsimiititaliami tikinneqarumaartut, taamaattumik uani annerusumik taakkua
oqaaseqarfigissanngilakka.
Inuit Ataqatigiit oqaaseqartuata
saqqummiussinermini sukumiisorujussuarmik paragraf-it assigiinngitsorpassuit
oqaaseqarfigisaqaqattaarpai, tassa § 4, imm. 5, kap. 4-mi § 7, § 8,
taamatuttaaq paragraf-it allat arlalikasiit erseqqissaavigineqarnissaat
imissutigalugit. Taakkua suliap ingerlaqqinnerani ataatsimiititalami
sukumiisumik misissorneqassapput aammalu maanga Inatsisartunut erseqqissumik
saqqummiivigineqassapput.
Isumaqarpunga aamma immikkut
isummersorfigisariaqartoq aamma ullumikkut maani tassalu § 53-imi
aalajangersagaq, tassa Inatsisartut oqaluttarfianinngaanniit oqaatsit sorliit
atorneqartassanersut, tassami maannamut suleriaatsitsinni § 26-miugunarpoq
allassimavoq Inatsisartut oqaluttarfiaanni taamaallaat kalaallisut oqaatsivut
atorneqartassasut, taannali suli allanngortinneqarsimanngilaq. Maannakkut
Inatsisartut suleriaasissaanni nutaami § 53-imi maannamut pissusiulersimasoq
ikkunniarneqarsimavoq, kisiannili uani Inatsisartut namminneq
nalilersuisussaapput taanna qanorpiaq aaqqiivigineqassanersoq, aamma maannakkut
uani saqqummiunneqareermat, suleriaasissaq pillugu ataatsimiititaliami uterfigineqanngitsoornavianngilaq
taanna aammalu oqallisigineqassaaq.
Tassalu oqaatigeriikkattuut
Kattusseqatigiit oqaaseqartuata saqqummiussagut tamakkiisumik taperserlugit
oqaaseqarpoq, taannalu qutsatigissavara.
Suleriaqqinnissatsinnut
isumaqarpunga maannakkut toqqammavissaqarluartugut kingusinnerusukkullu aamma
maani inimi isumaliutissiissummik inaarutaasumik saqqummiussaqarnissatsinnut
maanna periarfissinneqarluarluta.
Ruth Heilmann, Siumut:
Uanga anersaaruluutikka ilaatigut
siulittaasoqarfimmut tunngasut oktober-ip 13-iani unnukkut allassimasakka
siulittaasoqarfimmut apuussimavakka, kisiannili aatsaat upernaamut
qaqinneqarsinnaasutut immata ilaatigullu paasinarluni allakkatigut
akineqaannarumaartut, peqqutigalugu maannakkut immikkortoq 41-mut tunngatillugu
eqqartugaasunut siunnersuutinullu assingusorujussuummata taamaattumik uani
oqaatigilaarusussimavakka.
Isumaqarpunga Inatsisartut
oqaluuserisassanngortitaasa oqaluuserineqaratik allakkatigut
akineqaannartarnerat atorunnaarsinneqartariaqartoq. Siunnersuuteqartaraluartut
allakkatigut akineqaannartarnerat pissusissamisuunngitsutut
isumaqarfigileraluttuinnarakku ukiuni tallimanngulersuni Inatsisartut
issiareerlunga. Tassani oqaluuserisassanngortitat immikkut ilaatigut taannaannaatillugu
oqaluuserineqartarput kisiannilu aamma oqaluuserisassanngortinneqartartut
oqaluuserineqartussat tamakkiisumik tulluarfiannut aamma ilaatigut
ilanngussuunneqartarput kisiannilu oqaluuserisassanngortinneqartartut ilaai
naak tassunga tulluartaraluartut aamma allakkatigut akineqaannartarlutik,
tassani qinersisartut taamaalillutik malinnaatinneqarsinnaangillat
siunnersuuterpassuit ilaatigut allakkatigut akineqartartut imaqarnerinik,
taamaattumik ilaannikkut asserluinnangajaanik Inatsisartut siunnersuuteqartarput,
kingusinnerusukkulli qaqinneqarlutik oqaluuserineqartarlutillu.
Taamaattumik taannaannaatillugu
oqaluuserisassanngortitseriataartoqartarpoq imaluunniit siunnersuutit ilaannut
ikkunneqartarlutik ilaannilu taamatut ikkunneqaraangata tupaallatsinneqartarpugut,
uffa allat pissuseqataat allakkatigut siusinnerukkut akiorneqaannarnikuusut.
Taamatut misigisaqartilluta qanoq ilioriataarnissaq assorujussuaq
ajornakusoortarpoq isumaqarpunga ilaasortat naligiimmik pineqarlutillu
sullinneqassappata pisariaqartoq oqaluuserisassanngortinneqartut tamarmik
sapinngisamik oqaluuserineqartariaqartut, taanna isumaqarpunga ilanngullugu
uani eqqartukkami anguniarneqartariaqartoq.
Aammalu siunnersuutit
tunniunneqartarnerisa qangatut killilerneqarnissaanik kissaateqarsimavunga,
tassami aasarli ilaatigut oqaluuserisassanngortitat ilaat suli
tusarfigineqanngillat imaalillunilu allakatigunaasiit immaqa
akineqaannarnissaat tutsiukkumaarpoq. Siunnersuutit kingullit maannakkut
imaaginnavinnerat taanna ilaatigut ilaasortaalluni malinnaaneq
ajornakusoortarpoq taamaalilluni ullunik 14-nik piffissaqarfigineqarlutik
suliarineqartussanngortarlutik tamanna isumaqarpunga naammaginanngitsoq aammalu
pissusissamisuunngitsoq. Isumaqarpungattaa nutaanngorsaasoriaqartoq aamma
Inatsisartunit qinnikkanit siunnersuutaasartut oqariartuutaasartullu
soqutigineqarnerulernissaat avammullu tusartinneqarnerulernissaat, taanna
pisariaqratuuvoq tamannalu aamma ilanngullugu uani eqqartugassat ilaattut
maannakkut saqqummiuppara. Taamaattumik aamma uani qaammammik ataatsimik
ataatsimiinniissaq sioqqullugu oqaluuserisassanngortitat siunnersuutillu
tunniutereerneqartarnissaanik uani siunnersuuteqarneq uanga
isumaqatigilluinnarpara.
Per Berthelsen, Siumut:
Kalaallit Nunaanni Inatsisartut
suleriaassissaattut siunnersuutip iluani saqqummiussat pitsaasut akornanni
assut amigaateqarama sassalaarpunga. Tassami ilaatigut maani annertuumik
eqqartorneqarput uparuaanertaqartunik ilaatigut pineqarlutik
tuaviussivallaartarnerit allanngortiterisarnerit allakkatigut akisarnerit
annertuallaartut. Isumaqarpunga tassani uterfigisariaqalersoq tamakkua
aaqqinniarnissaat eqqarsaatigalugu, tassalu siusinnerusukkullu Inatsisartut
aalajangiussimasaat siunissaq eqqarsaatigalugu upernaakkut ukiakkullu
ataatsimiinnerit sapaatit akunnerinik qulinik sivisussuseqarnissaannik
siunniussaqarneq.
Isumaqarpunga maanna
pisariaqalersoq taanna siunniutiinnaranagu aalajangersarneqartariaqalersorli.
Maannami suleriaatsit qimerloorutsigit sumillunniit illersorneqarsinnaangilaq
suleriaaserput. Tassanimi apeqqutaajunnaarmalluunniit ullut piunnaarlugit
unnualersorlugit sulinerit taamaakkaluaraangalluunniit ataatsimiititaliat
ilaasa suliassatik angummaffigisinnaaneq ajorpaat. Taama oqaaseqarneq
qinikkanik nallissuinissamik angusaqarniarfiunngilaq tassanili
eqqarsaatigilluinnarpakka sulisunnguakkuluit ilaatigut qasunermik
upperaannalerlutik pisartut. Taamatut ingerlatsineq nunatsinni tutsuiginartumik
ingerlatsinissamut aqqutissaasinnaanngilaq. Isumaqarluinnarpunga
pisariaqalersoq nalilersoqqissallugu pisariaqalinnginnersoq siunniussimasap
tassalu ataatsimiinnerit upernaakkut ukiakkullu sapaatit akunnerinik qulinik
sivisussuseqarnissaat inatsisitsinnut ilannguttariaqalinnginnersoq.
Soorunami tamanna akeqartussavoq,
taanna kialluunniit qimarratigisinnaanngilaa kisianni nalilersortariaqaligaq
uaniippoq Inatsisartutut inatsisiliorluta suliniarnitsinni innuttaasunik
pitsaanerpaamik sullissiniarnitsinni pisariaqalinnginnersoq piffissaq
sivisunerusoq atussallugu - naak tamanna assigiinngitsutigut allannguingaatsiarnernik
imaqassagaluartoq. Maani najugaqartuulluni tupinnanngilaq avataaninngaanniit
aggerlutik ataatsimiigiat angerlarsertarpata, kisianni qinigaavugut nunatsinni
innuttaasut pitsaanerpaamik sullinniassallugit, taamaattumillu taanna
utoqqatsissutitut atugassaajunnaarlugu aaqqissuinitsini
allanngorsaasariaqarpugut taamatut tupinnanngitsumik angerlarsertartut
periarfissillugit ilaquttaminnik aamma takusaqartarsinnaanissaannut, immaqa
ataatsimiinnerit ingerlanneqarnerini arlaatigut unikaallaffilerlugit imaluunniit
maanga tikillutik ataatsimiigiartartut tutsuiginarnerusumik
naammaginarnerusumillu najugaqarneq eqqarsaatigalugu inississinnaanissaat
aaqqissorlugu. Taamatummi aningaasartuutitaqarsinnaasumik allatigullu
allannguinermik imaqarsinnaasumik sullissiniarnitsinni demokrati
pitsaanerpaamik sullikkumallugu siunertaqarpugut.
Isumaqavippunga aamma taanna
aappassaanerinninnissaq pitinnagu Inatsisartut Inatsiseqarneq pillugu
Ataatsimiititaliaanut ilanngullugu naliiffigisassanngortinneqartariaqartoq.
Tassalu siunnersioreersup naqissuserlugu inatsisinut ilanngunneqarnissaa,
ataatsimiinnerit siunissami sivitsorneqarnissaat.
Jonathan Motzfeldt, Naalakkersuisut Siulittaasuat:
Qularutissaanngilaq maannakkut
suleriaasissamut tunngasoq eqqartorneqarnerani aamma Inatsisartut
Inatsisartoqarneq pillugu inatsit maani eqqartorneqarsimasinnaagaluarami,
kisianni taanna maannakkut pineqanngilaq imaassinnaavoq piffissami
kingusinnerusumi tikinneqarsinnaajumaartoq, maannakkut suleriaatsitsinni
malittarisassavut pineqarnerummata taakku marlussunnik oqaaseqarfigerusuppakka.
Siullermik oqaatigerusuppara
inumi maani sulineq uagut qangarsuarli peqataaffigisimasarput
ingerlanneqarnerani suleqatigiilluni eqaatsumik ingerlatsinikkut suliassat
naammassineqarsinnaapput. Isumaqarpunga suliassat eqarpallaartumik
ingerlatileraangatsigit sulisunik ulapisitsinerujussuit allarpassuillu
pilersartut taamaattumik maani ukiunni 20-ni Inatsisartuni sulineq
sanarfisimagatsigu sapinngisamik eqaatsumik sulinerit atorniarsimavagut
pingaartumillu forretningsorden-imi maleruagassat eqaatsumik atorlugit.
Inatsisit sanitsinni erfalaartittuarmagit ima oqarpoq ima ingerlassaagut
kisianni eqaatsumik aammalu paaseqatigiiffiusumik ingerlatsinerit atussagaani
suliassat artornanngillat naammassineqarsinnaallutillu.
Kisianni
malittarisassaararpassuit assatsinnik tigullugit tamaviisa
oqallisigileraangatsigit immitsinnut uumisaarutiinarata qasusarlutalu
uumilallutalu pinissatsinnut aallartisinneqartarpugut. Eqaatsumik sulineq
paaseqatigiinneeqartumillu arlaata arlani ornillugu paaseqatigiinniiartarnerit
atorneqartariaqarput. Korridor-inik oqallinnerit ingerlanerusariaqarput
mattusimanerit angivallaaqaat taamaattumillu tamakkua tungaatigut eqaatsumik
Inatsisartuni sulineq ingerlavissaqartinniartariaqrapoq.
Oqaatigerusutara siulleq
tassaavoq inatsisiliornermi sulinermi eqaallisaanerit taakkua assigiinngitsut
udvalg-inut mattulluta sulinerit qaangerlugit korridor-ini allanilu
oqaloqatigiinnerit ammarlugit taamaalillutali suliassanik paaseqatigiinnissamut
annertunerusumik nassaarniarnerit ingerlalernissaat ilinniagassaaginnarani
aamma pisussaaffiuvoq.
Inatsisartuni sulinitsinni
pingaartumik Naalakkersuisuulluni piffissaajarnartorujussuuvoq
apeqquterparujussuarnik saqqummiussuinerit. Pinngitsoorani allakkanik
akisisarneq atasariaqarpoq pissutigalugu qangalili ukiuni 20-ni nalunngilarput
saqqummiussat ilarparujussui kommunit malittarisassaanni allarpassuarnilu
tunngaveqartut innersuunneqarsinnaasartut akissuteqarfigalugillu allakkatigut
paaseqatigiiffigalugit.
Apeqquteqaatit pappiararparujussuarnik
marlunnik oqaasilerluta ingerlanniakkavut 1988-imi kingornatigulli
allannguiniarnermi siunertarisimavarput ilaatigut oqaluinnarluni apeqqutinik
saqqummiinerit maani inimi aammali Naalakkersuisut oqaluinnarlutik akinerat,
uani malittarisassatsinni aamma udvalg-ini suliarigatsigu § 42-mi periarfissaq
taanna ammaassimavarput, neriuutigalugu atorneqarnissaa. § 42-mi allassimavoq:
"Inatsisartuni ilaasortap pisortatigoortumik suliassaq pillugu
paasissutissinneqarnissaminik kissaateqaruni tamanna Naalakkersuisunut
apeqqutitut saqqummiussinnaavaa, apeqqut allaganngorlugu saqqummiunneqartassaaq
naatsumik erseqqissumillu ilusilerneqassaaq aammalu allaganngorlugu naatsumik
tunngavilersuutitaqassalluni.
Immokkoortoq 2, Island-ikkunni
aamma allaat atorneqarpoq aammalu maannakkut Danmark-imi forlketing-imi
atorneqalerluni, apeqquteqaateqartup kissaatigippagu apeqquteqaat Inatsisartuni
oqaluinnarluni saqqummiunneqarsinnaavoq Naalakkersuisut apeqquteqaat
akissuteqarfigisinnaanagu nalunaarpata suliarinera taamaasilluni
naammassineqassaaq. Taanna Inatsisartuni allani atorneqarpoq ministeri
oqarsimagaangat: ima ittumik oqarputit sapaatip akunnera kingulleq inimi maani
toqqarlugu aperineqartarpoq
Inatsisartuni allani alting-imi
maannakkulli aamma folketing-imi apeqqut una taava qanoq paasisariaqarpa?
Taanna piffissamik annertoorujussuarmik sipaarutaasinnaammat matumuuna
erseqqissaatigaara. Isumaqarama apeqquteqaaterparujussuit annertuumik
piffissamik tigooraasut aammalu marlunnik oqaaseqarnerputeqqarsaatigalugu
piffissarujussuarmik atuiffiusartut.
Naggataatigut oqaatigissavara una
maannakkut saqqummiunneqartoq pisariillisaanernik assigiinngitsunik
tikkuagaqartoq aamma isumaqatiginartunik oqaaseqarfigigatsigu Siumup
oqaaseqartuinit aammalu gruppeformand-ianinngaanniit oqaaserineqartut
ilanngullugit naggaterpiaatigut oqaatigilaarlara, ajornartoqanngilaq maannakkut
angallannikkut pissutsit iluarsiartorneranni kingumut ukiumut
pingasoriarluniluunniit Inatsisartunik qaaqqusisinnaaneq eqqarsaatigissallugu.
Aasimmiaasiit tusassavarput
akissarsui puigorlugit inuusugut kisianni Siumup gruppe-ata siulittaasuata
oqaatigisaa ilumoorluinnarpoq, suliassat ukiumut marloriaannarluni taama
sakkortutigisumik suliariniartarneri uagutsinnut sulisutsinnnut allanullu,
assorujussuaq inuttut annertuumik piumaffiginnittarpoq piffissamillu.
Taamaattumik Inatsisartut ukioq
naallugu ataatsimiissangippata ukiakkut, ukiuunerani upernaakkullu
ataatsimiinnerit inississinnaanerat misilereernikuuarput,
taamaaliortoqarsinnaavorli eqqarsaatigisariaqarput aningaasat
uniffiusinnaanngillat nunap siulersorneqarnera aammalu suliffiit nuannaralugit
ingerlassappata aamma taamaassaaq, suliassat taamak ittut
akilersinnaasariaqarpavut.
Otto Steenholdt, Atassut:
Siullermik Per Berthelsen-ip oqaatigisaa unnuat ilanngullugit ataatsimiittarnerit soorunami isumaqatiginngitssornanngilaq, taamak nukingiussanik sulissanngikkutta. Kisianni soorluuna Siulittaasoqarfiup suliassat takkussortut takkussortartullu sillimmaatereerlugit namminneq aalajangersinnaagaat sivisunerusumik ataatsimiinnissaq uani tullermi Inatsisartut naatsorsuutigeriissagaat.
Naalakkersuisut Siulittaasuata korridor-inik taallugu atorneqarnerulernissaa isumaqatigilluinnarpara, ilumut atorneqanngippallaaqaaq aamma Inatsisartut siulittaasussarsiornerani.
Ilumoorluinnarportaaq kommunit suliassaat maanga eqqussat amerlavallaarujussuaqaat, tamakkua mianersuutigisariaqarluinnarput.
Allakkatigullu akisassaagaluit soorlu - ila amerlavallaaqaat taama allakkatigut akisariaqartut, tassaannguatsiarpoq piffissaajaataasut aamma annersarisaat.
Suliffigisimasara eqqaalaarlara, allakkatigut akisineq folketing-imi atorneqanngilaq. Kisianni minister-it ima qinngarnartigalutillu quianartigisarput: aperiteriarlugu ataatsimilluunniit akiumaneqarneq ajorpoq, taava oqaluuserisaq qaangertarpoq, taamannallu ingasappallaaleraangata minister-it ilaata qaqeriarluni oqarfigisarpaa: suliassaq ingerlavoq, suliassaq suliarereersimavoq una atualaariuk, ataatigullu titarlugu oqaqqinnanilu, taava tullia ilanngussinnaanngussaq. Toqqaannavissumik malaatiinnarlugu minister-imut apeqquteqartarneq maani aamma amigaatigaarput.
Siumup oqaluttuata siulittaasussarsiortarneq pillugu oqaatigisai isumaqatigivallaaqigakkit aamma maanngaanniit oqaatigilaarusukkiga.
Atassumminngaanniit pingaartissimagatsigu Inatsisartut namminneq inatsimmi allassimasoq atorluarlugu akunnerminni namminneq siulittaasussartik qinissagaat, taavalu uagut maani oqaaseqarnitsinni ilannguttarparput Naalakkersuisunngortitsiniarnermi taanna immeraassutigineqassanngilaq. Kisianni taamak oqaraluartilluni ajornakusuussusia eqqarsaatigisimavara, tassa amerlanerussuteqartut qinertussaammassuk, ajornakusoorutaa uani takkutereerpoq Naalakkersuisunngoqatigiikkumalluni akuerineqarsinnaammat aatsaat amerlanerussuteqarluarluni Naalakkersuisooqatigiittoqarsinnaasoq. Taava tassani isussukulunngikkaluarunilluunniit naatsorsuutigereersinnaavarput una qinigassanngortissavarput taavalu taamaalilluni oqallisiginissaa ajornarseriivilluni, taanna eqqarsaatigisimavara.
Aanali uanga innersuukkusutaraluara, taamaattoqartillugu Inatsisartut silittaasussaanut qinersineqassatillugu, tassarpiaavoq Naalakkersuisut siulittaasuata oqaatigisaa, gruppe-t siulittaasui tassaasarput imminnut qaaqqoriarlutik oqaluuttut, kinatoruna isumaqatigiinniarsarisut allat qimallugit, una pitsaavallaaqaaq piukkussinnaavarput, illuatungiliuttuugaluaruni immaqa iluaqutaaginnassaaq, tassa taakku oqaloqatigiissutigisarpaat, ilaminnullu oqqullugu una isumaqatiginniutigikanneratsigu akuersaarsinnaagussiuk tusalaariartigu, qanoq issanersoq, tassa taanna folketing-imi assut atorneqartartoq.
Atassumminngaanniit assorsuaq aamma oqaatigisaq maani erseqqissumik oqaatigineqareeraluartoq, tassa Inatsisartut Siulittaasoqarfianni demokrati atorneqassaaq amerlanerussuteqartut piumasaat pinngitsoorani atorneqasaaaq. Taamaattumik uani atorfinitsitsinermut itisilernagu tamakkua tamaasa qullersaqarfiup Inatsisartut siulittaasoqarfiata nammineerluni aalajangigassaraa amerlanerussuteqartut piumasaat malilluinnarlugu, tassalu taanna Atassumminngaanniit erseqqissarusutara.
Inuit Ataqatigiinni § 7-imut tunngatillugu oqaatigisat uanga inuttut ima oqaaseqarfigilaarlakka. Folketing-imi ilumut taamaalluinnarpoq, oqaatigineqartarpoq qallunaatut oqalussaasi uanga apeqqutigisimavara formand-imut kalaallisut oqalussagaluaruma qanoq igissavisinga? aqqaqqussavakkit oqarfigalutillu oqaluttarfik taanna qallunaat oqaasii atorlugit atorneqassaaq. Oqallisigisariaqassaaq inatsisigut atoraanni kalaallit oqaasii tassaasut oqaatsit pingaarnerit.
Kisianni aamma qinersisarneq eqqarsaatigissagaanni nunaqqateqarpugut qinigaasinnaasunik kisianni tamatut aperigama nunami allamioq qallunaatut oqalussinnaanngitsoq qinigaappat qanoq pisoqassava, oqarfigineqassaaq qallunaatut ilinniaqqaarlutit oqaluttarfiliassaatit. Tamakku akissutit uanga pisareersimallugit uani saqqummiussaq assorujussuaq eqqarsarnartoqartippara oqallisigisariaqarluinnarmat isumaqarlungalu ataatsimiititaliami eqqartornqartariaqartoq.
Clearingssystem-i oqaatigisaq aamma assorsuaq nuannaraara, tassa taanna imaalillugu - nappersimasoqartillugu imaluunniit tikinngitsoortoqartillugu, amerlavallaaraangata paasinarsisarami Naalakkersuisut ikinnerussuteqartussanngortut kisianni taanna piumasarineqanngippat aamma gruppeformand-iisa isumaqatiginniutigissavaat - ukua uatsinninngaanniit piilaarallassavagut taasinermi ukua amigaatigisatta nalingi. Taamaalilluni ajoquteqanngitsumik ingerlasoqartarpoq. Taanna assorsuaq iluatinartututoqaatigerusutara atoreersimagatsigu, piaaraluni Naalakkersuisut uppitinneqassanngimmata tunngavissaqavillunilu kukkussuteqarnerit aallaavigalugit aatsaat uppitinneqariartussaammata qoqassinagit aamma ilaata napparsimaninngua iluatsinniarsaralugu Naalakkersuisunik uppisitsiniaasoqartassanngimmat.
Kattusseqatigiinnut oqaatigilaarlara inuit qinigaannik aatsaat Naalakkersuisoqartarnissaannik oqarneq eqqarsarnartortaqartorujussuuvoq. Inatsisitsinni aamma periarfissaqarpoq qinigaanngitsut kisianni killilimmik atorneqarnissaat Naalakkersuisoqartitsisuni sumiluuniit atorneqarluartuummat uanga taanna isumaqatigaara - killilimmik atuineq inatsisitigut periarfissaqarmat.
Asii C. Naarup, Inuit Ataqatigiit:
Uani Inatsisartut
suleriaasissaattut siunnersuummi kapital 12, aamma arlalinnik
oqaaseqarfigineqareeraluartoq, oqaaseqarfigerusullugu isumaliuutigeqqittariaqartutut
isumaqarfigigakku. Oqar-tarpugut inuusaaserput ilaqutariissutsimik
pingaartitsisuusoq. Inuusaaserput meerartatsinni ajunngitsumik
atugassaqartitsiniarnermik ilisarnaateqartoq. Inuussaaserput
atorfissaqaqatigiinnermik toqqammaveqartoq.
Inuunermi toqqammavissatut
iluatigilluinnartariaqakkatut tamatta isumaqarfigissannguatsiarpagut.
Ajoraluartumilli allaanngilaq tamakku Inatsisartunut ilaasortanut
atuutsinneqanngitsut. Ukioq manna Inatsisartuni sulineq, ima
aaqqissuussimavarput. Ataatsimiilluta aallartikkaangatta ima
ingerlarsortigisarluta uatsinnut qasuersaarfissaqartinnatalu
anersaartorfissaqartinneq ajorpugut.
Soorlu Inatsisartunut
ilaasortat pilersukkatsinnik angajoqqaatullu akisussaaffigisatsinnik
qitornaqanngitsugut, soorlu isumassugassatsinnik utoqqartaqanngitsugut. Soorlu
qinersisartunik tunuliaqutaqanngitsugut. Inatsisartuni sulinerup taamatut
aaqqissuussaanera nutaajunngilaq. Nutaajunnginneratali
akuersaaruminalersissinngilaa.
Inatsisartuni ilaasortaaneq
ilaqutariittut inuunerup tungaatigut pilliuteqarfiusarnera
pinngitsuuinneqarsinnaanngikkaluarpoq. Sapinngisamilli
minnerpaaffimmiitittariaqarpoq. Suleriaaserput allanngortittariaqarparput.
Naalakkersuinermik sulineq, ilaqutariittullu inooqatigiinneq
naammaginarnerusumik naapiffeqartissinnaajumallugit, oqimaaqatigiinnerusumillu
inississimalersillugit.
Inatsisartuni
aalajangigassat inuiaqatigiinni annertuumik siunissamullu ungasinnerusumut
sunniuteqartarmata peqqissaartumik nalilersorlugulu eqqarsaatigilluagaassapput.
Taamaattumik suleriaaserput eqqartoqqittariaqarparput, nutaanngorsarlugulu.
Sulisartut allat
peqatigiiffeqarneq aqqutigalugu sulinerminni atugassarititaasut
pitsaanerulersinniarlugit anguniagaqarlutik sulisarput - imaluunniit sorsuttarput.
Inatsisartunili ilaasortat peqatigiiffeqanngilagut uatsinnik illersuisunik,
taamaattumik ullumikkut suleriaasitta qaluuserinerani sulinitsinni pissutsit
atukkagut eqqartortariaqarpagut.
Ajornartorsiullu annerpaaq
tassa uniippoq, soorlu allap aamma tikkuareeraat, ukiumut marloriaannarluta
sivikitsukullammik ataatsimiittarnerput. Taakkuuku nalilersortariaqartut.
Tassaqaana nunarsuami allanik parlamenteqarpa - Inatsisartoqarpa taama
sivikitsigisumik ataatsimiittartunik.
Sivisunerusumik ataatsimiittarnissat
ilumut piffissanngorpoq. Aamma oqaatigineqareersutut taava unikaallattarluta,
taava ingerlaqqittarluta. Taamaaliorutta taava peqqissaartumik sulinermik
kinguneqassaaq. Ilaqutariissutsimut ataqqinninnerussaaq aamma qinersisartunik
ataavarnerusumik oqaloqarteqartarnissamik periarfissaliisuugut, taamaaliorutta.
Hans Enoksen, Siumut:
Ataatsimiittarnerup sivittorneqarnissaanik Siumup gruppeata siulittaasuata oqaatsit annissugai, tunngaviatigut sakkortuumik isumaqatigilluinnarpakka. Isumaqarpunga massakkut ataatsimiittarnerput tuaviuussaavallaartumik ingerlanneqartoq, allanngortinneqarluinnartariaqartoq.
Tassami isumaqatigiissutigereernikuungaluarparput ataatsimiittarnerit minnerpaamik sapaatip akunneri qulit ingerlanneqartassasut. Kisiannilu ataatsimiinneq aallartiinnartoq soraarfissarput titarneqareertarpoq, soorlu assersuutigalugu novemberip 2-aanni 3-anniluunniit soraassaagut.
Taava taamaalisoqaraangat sulinneq sukkasoorujussuarmik aallartinneqartarpoq, suliassat sukumiisumik suliarisariaqaraluartut ilaatigut qarsupilluinnartumik suliarineqartarlutik. Taanna kialuunniit miserrussinnaanngilaa.
Ataatsimiititaliani ataatsimiikkaagatta oqaaseq takornartaanngilaq, qaa tuaviorniaritsi uanga una piffissaq imaalippat allami ataatsimiittussaavunga, imaluunniit ima oqartoqartarpoq, ataatsimiinneq sukaruttortoq ataatsiimitaliami, tassa uanga massakkut anivunga uunga ataatsimiigialerama. Soorunaakua ilaatigut suliagut qarsupittumik ingerlasut tamakku kinguniinnai, pitsaanngequtai naammattoortarpagut. Uffa sukumiisumik suliarisuugutsigit tamakku aallaqqaataaniilli aaqqinneqarsinnaagaluartut.
Ataatsimiittarneq sivitsorneqartariaqarpoq. Qularinngilara ilaasortat Nuup avataani najugalliit aamma taanna piumassuseqarfigigaat, kisianni taamatut pisoqassappat sapinngisamik pitsanngorsaasoqartariaqarpoq, ilaasortat Nuup avataaninngaanniit aggersut inigisaasa tungaatigut, ineqarnerisa tungaatigut pitsanngorsaasoqartariaqarpoq.
Ilaatigut uagutsinnut ilungersunarluinnartarpoq qasunarluni sivisoorsuarmik hotelimi najugaqartitaasarnerput. Unnukkullu ilaanni sivisuumik ataatsimiinnerup kingorna, Jakob Siverthsenip aamma taanna oqaatiginikuuaa maanngaanniit oqaluttarfimmiit, ilaatigut nerisassaqarataluunniit neriffissaqarataluunniit angerlartarpugut, hotelimi imaaliallaannaq nerisoqarsinnaanngimmat.
Taamaammat ataatsimiittarnerup sivitsorneqarnissaanut pinngitsoorneqarsinnaanngilaq Nuup illoqarfiata avataaninngaanneersut inigisaasa tungaasigut pitsanngorsaaffigineqarnissaat. Tassa imaappoq, allatut ajornartumik inissialiortoqartariaqarpoq. Naak immaqa taanna namminersortut siutaanut tusarninngikkaluartoq, kisianni namminersortut pissutigiinnarlugit Inatsisartut sulinerat ingerlanneqarsinnaanngilaq. Innuttaasut aallaavigisavagut pitsaasumik sulissagutta.
Oqalussinnaatitaaffiit eqqarsaatigissagutsigit ilaatigut uagutsinnut ilaasortaannarnut ilungersunarluinnartarpoq, Naalakkersuisut killeqanngitsumik oqaluttut akeqqinniaraluarluta mattunneqaraangatta, uffalu oqaluttoqartartoq Inatsisartuni ilaasortat taakkuupput sulisitsisut.
Taanna aaqqiiffigineqartariaqarpoq aamma. Sivisunerusumik oqalussinnaatitaaneq ammarneqartariaqarpoq.
Ataatsimiititaliat ikilisarneqarsinnaanissaat aamma eqqumaffigineqartariaqarpoq. Isumaqarpunga ataatsimiiititaliat assigiiaartorujussuarmik suliallit massakkut arlallit ingerlasut. Ataatsimiititaliat eqiterneqarniarlit ilaasortaat amerlillugit, taamaalippat allanut nukissaqarnerulerluta aamma suliat piviusorsiornerusumik ingerlatilissavagut. Taanna aamma siulittaasoqarfimmi eqqarsaatigineqarnissaa kissaatigissavara.
Taavalu taassuma saniatigut ilaasortat piginnaatitaaffii qanoq ittuuppat. Massakkut qinersivik ataasiinnanngornikuuvoq. Taavalu angalasarnerit qanoq aaqqissuunneqassappat. Assersuutigiinnarlugu uanga Upernavimmukarniaruma taava Upernavimmeeriarlunga Illoqqortoormiunukarniaruma mattunneqassaangaa, imaluunniit qanoq.
Tassa massakkut qinigaaffik ataaseq isigigutsigu ataasiaannarluta qinigaaffitta avataanut angalassinnaagatta, kisiannili massakkut qinersivik atasinngornikuummat, tamakku qanoq eqqarsaatigineqarpat. Aamma innuttaasut qinersisartut sullinneqarnerat eqqarsaatigalugu, imaanngilaq angalaniaannarluni angalasoqartartoq, kisianni innuttaassut sullinneqartussat tassani eqqarsaatigineqartariaqarput.
Aammalu ataatsimiititaliani ilaasortat periarfissaat qanoq innersut ilanngullugu ersarissarneqartariaqarpoq. Assersuutigiinnarlugu kingullermik timmisartoqarfinni atoqqaartitsinermi angalaniarnermi pissusilersuutaasut isumaqarama uanga tunginninngaanniit akuersaarneqarsinnaanngitsut.
Ataatsimiititaliami ilaasortat soqutiginnikkaluarlutik Inatsisartut siulittaasoqarfianninngaaanniit oqarfigineqarsimapput, angalassagussi nammineq akilissavarsi. Isumaqarpunga taamatut aaqqissuussisoqarnissaa tulluanngitsoq allanngortinneqartariaqartorlu.
Massakkut ulapittangaaratta, assersuutigiinnarlugu siorna Inatsisartut
Direktøriannut tunngasoq maaniluunniit sianigineqanngilaq, isumaliutissiissut
maanga apuunneqarsimanersoq, tassa taama ulapitsigipput.Upperineqanngilagut
uagut ataatsimiititaliami ilaasortaasugut maani apuunnerani uppernarsaasugut.
Taama suliat qarsupitsigisumik ingerlanneqarsinnaanngillat. Taanna nassuerutigisariaqarparput tamatta.
Taamaammat sivisunerusumik, ajunngilaq qaammatit arfinillit atasuinnarmik
ataatsimiinnerit ingerlanneqartarniarlik. Qujanaq.
Anthon Frederiksen,
Kattusseqatigiit:
Oqaluttoq kingulleq uanga
pisussaagunanngikkaluarlunga akissallugu aamma siulittaasoqarfik sinnerlugu
oqalukkusunngikkaluarlunga maanngaanniit, taamaattoq isumaqarpunga
naqqittariaqarmat naqqittariaqarlugu.
Siulittaasoqarfik
aalajangersimanngilaq mittarfeqarfiit atoqqaartinnerannut tunngatillugu
ataatsimiititaliani angalasussat namminneerlutik akilertariaqagaannik.
Taamattut aalajangersimanngilaq siulittaasoqarfik. Siulittaasoqarfik
aalajangerpoq imatut, Angallannermut ataatsimiititaliaq qinnuteqarnera millugu,
aammalu ukiuni makkunani sipaarniarnermik piumasaqarneq, allaffissornikkut
aningaasartuutit amerlavallaartut oqaatigineqartuarpoq, ingerlatsinermut
aningaasartuutigut amerlavallaaqaat. Tamakku tunngavigalugit siulittaasoqarfik
aalajangerpoq, ajunngilaq angallannermut ataatsimiititaliap siulittaasua
akueritigu.
Pisariqanngimmat
ataatsimiititaliami ilaasortat tamarsuarmik Uummannamut, Qaarsuarsunnut
imaluunniit Maniitsumukarnissaat. Sussallutik mittarfeqarfiup atoqqaartinnerani
assiliaataassappat tamaani. Isumaqarpugut taamaattut pissutsit nunatta
aningaasaqarnera eqqarsaatigalugu isigisariaqartut.
Taamaattumik
pissutissaqanngilaq annerusumik isumaqanngitsumik angalaneq, inuiaqatigiit
akilertariaqaraat. Allaassagaluarpoq ataatsimiititaliaq pingaarutilimmik
suliaqarluni angalassappat.Taanna allatut isigineqartariaqarpoq, kisianni
atoqqaartitsineq pissutigiinnarlugu tassani najuuttariaqarneq immaqa
pisariaqavinngikkaluartoq sullutik innuttaasut akilissuaat angalanerit
taamaattut.Allat suliassanut pingaarutilinnut tunngasut taakkua
akilerneqartariaqarput inuiaqatigiinnit.
Kiisalu saqqummiinitsinni
aamma oqaatigaarput inuit qinigaannik Naalakkersuisoqartarnissaq taanna
eqqarsaatigineqartariaqartoq. Imaanngilaq silaannarmik tigusilluta taamatut
siunnersuuteqarluta oqartugut. Tamanna innuttaasunik qinersisartunik
siusinnerusukkulli nilliaatigineqartarpoq, aamma tusagassiuutitigut,
tusaanngitsuusaarsinnaanngilarput.
Aatsaaginnaqqinnaaq
oqaluttoqarpoq demokratii tunngavigalugu naalakkersuineq ataqqisariaqarparput.
Sooq qinersisarpugut, sooq inuiaqatigiit qinersisarpat? Qinersisarput
Naalakkersuisussaminnik toqqaaniarlutik. Isumaqarpunga innuttaasut demokratii
tunngavigalugu aalajangiisarneq malillugu ataqqineqassappat tamakku
ilanngullugit eqqarsaatigisariaqarigut.
Taamaammat
pissusissamisoorluinnartutut uagut Kattusseqatigiinniit isigaarput, inuit
qinigaat Naalakkersuisuusassappata, imaaginnanngitsoq Danmarkimi
Naalakkersuisuni qinigaanngitsunik toqqaasoqartarmat aamma uagut nunatsinni
taamaaliortariaqartugut.
Danmarkimi pissutsinik
issuaaginnarsinnaanngilagut. Taamaammat inuit qinersisartut ataqqillugit,
taanna oqaaseq uteqqillara, ataqqillugit! Imaanngitsoq inuit ataasiakkaat
narrutigatsigit. Tamanna taamannak paasineqassanngilaq. Ataqqitigu inuit
qinigaat tassaasariaqarmata naalakkersuinermik suliaqartut aammalu
sulerusullutik sassartarmata.
Ilanngullugu oqaatigissuara
saqqummiinitsinni suliap uuma aappassaaneerneqannginnerani inatsiseqarneq
pillugu ataatsimiititaliamut inassuteqarnerput kukkunerummat. Taanna
kukkunerput ajuusaarutigaarput, neriuppugut tamatumani asattuunneqarumaarluta,
aamma kukkusaratta uagut, ajoraluartumik.
Jørgen Wæver Johansen, Siumut:
Inatsisartuni ilaasortat arlallit, ilaatigut Per Berthelsen, Asii Chemnitz Narup, Hans Enoksenillu taakkartortarsimasaat uteqqinngikkaluarlugit tamaasa isumaqatigaakka, ataatsimiittarnerput allanngortariaqarpoq. Ataatsimiittarnigut taakkua sivitsorneqartariaqarput pinngitsooratik. Pinngitsoorata pisussaaffigaarput suliagut tamaasa peqqissaartumik suliarissallugit, aamma innuttaasut taanna kissaatigivaat. Taamaattumik kissaatigineqartoq taanna, pisussaaffipput naammassillugu suliarisariaqarparput.
Ilanngullugu Siumukkormiuniit taaneqartoq, aamma soqutiginartikkaluarpara tusassallugu partiinit allanit qanoq isumaqarfigineqarnersoq, ataatsimiititaliat ikinnerusut ilaasortalli immaqa amerlanerusut pilersinneqarnissaat. Ilami tamatta nalunngilarput ataatsimiititaliat ilaat suliassaqarpiarneq ajorput. Taamaattumik imminnut attuumassuteqartut taakkua katiterneqarsinnaaneri eqqarsaatigineqarsinnaalluartunut ilaavoq, isumaga naapertorlugu aamma ullormut oqaluuserisassanut ataatsimiititaliap imaluunniit siulittaasoqarfiullu nalilersuinerminni aamma ilaatittariaqagaat.
Assersuutigiinnarlugumi Savalimmiuni 7-iinnarnik ataatsimiititaliaqarput, taakkuli ataatsimiititaliat 7-it tamaavimmik suliassaqangaaramik ataavartumik sulisuupput, aamma arfineq marlunnik ilaasortaqarput.
§ 53-imut tunngatillugu IA-p oqaaseqaatai uanga Inatsisartuni ilaasortatut tamakkiisumik tapersersorpakka. Pissusissamisuuinnarpoq taamatut aaqqiissuteqarnissaq, aamma nunani suugaluartuniluunniit oqaatsit pinngaarinerit salliutinneqartarput. Pingaartinneqartarportaaq Inatsisartut oqaluttarfianniit taakkua atorneqarnissaat, taamaattumik tassunga tunngatillugu IA-p oqaaseqaatai uanga taperserpakka.
Kattusseqatigiinniit ujartorneqartoq partiiniit partiinut allanut nuuttarnerni erseqqinnerusunik malittarisassiortoqarnissaa, isumaqarpunga aamma ilanngullugu nalilersuinermi suliarineqartussanilu ilaatinneqartariaqartoq. Kisianni Inatsisartuni ilaasortamut Anthon Frederiksenimut erseqqissaatigissavara, uanga ataatsimiititaliani pingasuni siulittaasuugama, aamma qularinngilara Inatsisartap nalunngikkaa, ataatsimiititaliat pisussaaffeqarmata suliassaqarfimminnut tunngassunut malinnaassallutik.
Taannalu malinnaasussaatitaanerat isumaqanngilanga siulittaasoqarfimmit annertuumik killi-
lersorneqalernissaa orniginartoq. Aamma isumaqarpunga siulittaasoqarfimmiut ataatsimiititaliat ataasiakkaat nalilersuisinnaanerat pingaartinnerusariaqaraat, asuliinnarmi angalaniaannarluni angalasoqarneq ajorpoq. Inatsisartuni ataatsimiititaliat ilaat angalaniarluni qinnuteqarsimappat soorunalimi pissutissaqavilluni taamatut qinnuteqarsimassaaq.
Siverth K. Heilmann, Atassut:
Uanga isumaqarpunga aamma
ataatsimiinnermi aqutsisup oqaaseqarnera ilaatigut maani
oqariartuutigerusullugu qaqinissannut nappaagama. Partiit assigiinngitsut oqaaseqartut
siulittaasoqarfiup saqqummiunneqartoq isumaqatigilluinnarlugu annerpaaq,
suliassatut ataatsimiititaliamillu ingerlaqqinnissami
nalilersuutigineqartussat kaammattuutigineqartut isumaqarpunga taakku
eqqaamasariaqarigut.
Aammalu massakkut qularutiginngilara
siulittaasoqarfiup oqaatigineqartut namminneq tamakkua nalilersorumaaraat.
Kisianni uani ataatsimiititaliani inissititertarnermi Siumukkut oqaatigisaannut
partiit allat aperimmatigit, isumaqarpunga taaneqartut
nalilersorluarneqartariaqartut, siulittaasoqarfimmi.
Aammalu
eqqaamalaartariaqarparput, soorlu oqartoqareersoq ataatsimiititaliani
tigooqqaasarnitsinni arlalippassuusarput ilaanni inuup ataatsip
ataatsimiititaliamut ilaasortaaffii amerlasoorujussuit, imaluunniit
arlalissuusartut.
Taamaattumik tupinnarneq ajorpoq
ilai suliassaqarpianngitsut, ilaasortaaffeqarpianngitsut ilaalu
ataatsimiititalianut ilaasortaaffeqartaqigamik angummanneq sapilingajattartut.
Aamma uanga taanna misilereersimavara, kisianni agguataarineq isumaqarpunga
sukumiinerusumik tamatta partiit assigiinngitsut gruppeni ilikkartariaqaripput.
Soorlu aamma uanga ilinniarfigisimagakku massakkut pitsannguallatsissimaqigiga
sulinikkut.
Partiit oqaaseqartuinut
aatsaaginnaq oqaaseqaatitsinnut atatillugu IA-p saqqummiutaanut, kalaallisuinnaq
oqaaseqarnissamut oqaluttarfik una atorlugu, aammalu § 53-imi oqaatigineqartoq
isumaqarpunga uagut oqaatigisagut aalajangiusimagigut Atassumminngaanniit,
tassa soorunami kalaallisuinnaq oqaaseqarneq aammalu qallunaatut
oqaaseqarsinnaaneq taanna tassani § 53-imi allassimasoq, taanna
atuutiinnartariaqartoq.
Aamma
takorloorsinnaasariaqarparput partiit allat qallunaanik Inatsisartunik
ilaasortaatitaqalerunik imaluunniit arlalissuarnik
ilaasortaatitaqaleriassagaluarutta qanormi iliussaagut? Isumaqarpunga taanna
ataqqineqartariaqartoq, taanna taallatsialaaginnarpara.
Taava aamma Inatsisartuni
ilaasortat siunnersuuteqartarnerat, uanga paasilluinnaqqissaarpara
siulittaasoqarfiup kaammattuutigigaa, amerlavallaarujussuaqaagut eqqaallugu
siunnersuut tunngavilersorluagaanngitsoq Inatsisartunut ilaasortanut
saqqummiunneqartartoq. Suliassat ingerlalereersut eqqaallugillu
siunnersuutitullu tigullugillu.
Isumaqarpunga tamanna
qaangertariaqaleripput, aamma sulinitsinnut peqqissaarluta suliniarnitsinnut
kinguarsaataasarput. Taanna kaammattuugineqartoq tamatsinnit ataqqineqarnissaa
assut tusarluallaqunarpoq.
Naggataagullu Naalakkersuisut
siulittaasuata oqaatigisaanut tunngatillugu Inatsisartut
ataatsimiittarnissaanut tunngatillugu, isumaqarpunga aamma siulittaasoqarfiup
eqqarsaatigilluartariaqaraa, aammami siulittaasoqarfimmi uagut peqataatitarput,
kaammattuutigineqartut nalilersuinermi nalilersorluassagaat, tassalu
ajornanngippat Inatsisartut ataatsimiittarnerat ukiumut pingasoriarluni
pisarnissaa taanna misissorluarneqassasoq.
Sivisoorsuarmik ataatsimiittarneq
qimanneqassappat aammalu immaqa peqqissaartumik ataatsimiittarnerit
ingerlassappata, sivikinnerusut taamatut ukiumut pingasoriarluni
ataatsimiittarnissat nalilersorneqassappata uagut Atassutip tungaaninngaaniit
ajoriffissaqartinnavianngilarput. Qu-janaq.
Anders Andreassen, Siumut, ataatsimiinnermik aqutsisoq:
Erseqqissaatigissuara
oqaatigineqareersutut aamma partiinit Kattusseqatigiinniillu tunngaviusumik
isumaqatigiinneqarluarpoq. Taavalu aamma ilanngunniakkat allallu
ataatsimiititaliamut ingerlaqqinnissaa kissaatigineqarluni. Tassanilu aamma
saqqummiunneqartut tamarmik aammasoorunami eqqartorneqassapput.
Kisiannili oqallinneq manna,
sangutinnaveersaassavarput ilaasortanut ataasiakkaanut tunngasunik oqallinnermut.
Taamaattumik kissaatigissavara oqaaseqartussat tulliit sapinngisamik aamma
ilassutissanik allanik aamma saqqummiussaqarniarunik, taava tassani aamma
inissaqartassammat soorunami. Oqallisigissaqqaarparput aamma
ataatsimiititaliami, uterfigissuarpullu taakkua maani aamma eqqartorneqartut
tamarmik. Taava tulliulluni oqaaseqassaaq, Hans Enoksen Siumut.
Hans Enoksen, Siumut:
Kattusseqatigiinneersoq Anthon Frederiksen, illit nalilersussanngilatit ataatsimiititaliat ilaasortaasa soqutigisamik aallunnissaannut killilersornissaat. Illit soqutigassasarivat siulittaasoqarfimmi ilaasortat pitsaanerpaamik sulissunnissaat, taanna eqqarsaatigissavarsi, taanna naatsunnguamik oqaatigilaaginnarpara. Qujanaq.
Olga Poulsen, Inuit Ataqatigiit:
Siullermik oqaasissara Atassutip oqaluttuanut kingullermut tunngavoq. Tassani ajuusaarnarpoq uani Atassutip oqaaseqartuata siulliup erseqqarilluinnaqqissaartumik isumanni saqqummiukkamiuk, tassalu oqaluttarfimmi uani kalaallisut oqaatsit atorneqarnissaa erseqqarissumik saqqummiuppaa.
Ajuusaarnarpoq kingusinnerusukkut Atassumminngaanniit oqartoqarmat taamatut isumaqartoqanngitsoq. Naluara tassani gruppemik isumaqatigiinngissutigineqarsimanersoq, taanna uanga aamma nalilissanngilara. Kisianni soorlu imanna oqartoqarpoq, inunnut ataasiakkaanut tunngasumik oqallittoqartoq. Inunnut ataasiakkaanut tunngassunik maani oqallittoqanngilaq. Uaniuna tunngaviusumik oqallittoqartoq.
Taamaattumik oqartoqanngilaq qallunaaq imaluuunniit amerikkarmioq, imaluunniit Islandermioq kinaagaluartoq maanga qaqissanngitsoq. Imannaguna oqartugut, uanngaanniit oqalussagunik, Inatsisartut oqaluttarfianninngaanniit oqalussaguni, taava kalaallisut oqaatsit atortariaqarpai, tassa allamik naamik.
Oqanngilagut qallunaajussanngitsoq, oqanngilagut amerikkarmiuussanngitsoq, oqanngilagut kineseriussanngitsoq. Ilaa taanna isumaqarpunga pingaaruteqarpoq imaattussallugu. Uani Asii Chemnitz Narupip oqaasii qamuuna uumatikkut isumaqatigigaangaarpakka, tasssami maani Nuummiuugaluarluniluunniit malunnartorujorujussuummat Inatsisartuni sulineq, qanoq pikkunartigisoq naatsumik oqaatigalugu. Taamaattumik pisariaqarluinnarpoq suleriaasitta arlaatigut pinngitsoornani sivitsorneqarluniluunniit aaqqinneqarnissaa.
Taavalu taanna eqqaamassavarput, isumaqarpunga eqqaamasariaqaripput Naalakkersuisut imaluunniit Inatsisartut uagut tassaagatta inatsisinik pilersitsisartut - sulisartut, imaluunniit piareersaasartut, taavalu inatsisit eqqortinneqarnissaannut aammalu atortuulersinneqarnissaannut tassaasut Naalakkersuisut suliarinnittussat.
Naatsumik oqaatigalugu, tassa uagut, "Naalakkersuisut kiffarivagut", Inatsisartuusugut, aammalu kiffartuulluartarpaatigut tamatigut.
Maliinannguaq Markussen Mølgaard, Inuit Ataqatigiit:
Aap, oqallisigisagut soqutiginarput. Aamma eqqaamanartorujuuvoq ukiut marluk, pingasungajaat matuma siornagut suleriaaseq pillugu oqallikkatta maani, ilaatigut inuiaqatigiinni aamma oqallinneq annertooq pilersimasoq, aammalu partiit tamarmiusut akuerisaat ajoraluartumik ulloq manna tikillugu suli suliarineqarsimanngitsut, taakkua ullumikkut sammeqqikkatsigit. Neriuppugut kinguneqarluarumaartut.
Uani oqallinnermi ilaatigut eqqaaneqanngitsut tassa, meeqqiortuulluni inatsisartuuneq. Tassa qanittukkut nalunngilarput Arnat partiiat pilersinniarlugu oqallittoqartoq, ilaatigut arnat ikippallaarneri politikkimi oqariartuutigineqarluni.
Tamatumani pinngitsooratik patsisinut ilaapput meeqqiortuulluni atugassarititaassut inatsisartuulluni qanoq ilungersunarsinnaatigisut. Uanga eqqarsaqqajaasarpunga naak Nuummiuulluni ilungersunareeraluaqisoq, kisianni avataaninngaaneerluni suli ilungersunarneruvoq mikisunik meeraqarluni taamatut suliniarluni.
Taamaattumik suleriaqqinnissami taakkua eqqaamanissai aamma kaammattuutigeqqunaqaat, tassami imaattariaqanngimmat inuk tunuarsimaartariaqartoq, politikkimi soqutigisaqarnermini sulinissamut atugassarititaasut naammaginnginnamigit. Tassami maannakkut pissutsit piviusut imaapput ukiut sisamat ingerlaneranni ataatsimiinnerit, immaqa ukiumut pingasoriarluta ataatsimiittarsimagutta ataatsimiinnerit 12-it iluanni aappaasoq marloriarluni ilagineqarsinnaavoq.
Kisiannili tassani ilaanngillat meeqqat. Imaanngilaq uanga piumasaqarnertut annertuutut isigisinnaanngilara, imannalluunniit oqarusoqqajaanarpoq uimiit meeqqat pingaarnerusut, ingammik mikisut milutsitat nassarsinnaanissaat. Aammalu maani isersimasut ilaasa oqarneratuut, qaammatit arfinillit peqanngittarniarutta takorlooruminaattorujuuvoq taama sivisutigisumik meeqqatsinnik qimassimasaqartarnissarput.
Taamaattumik taamatut atugassarititaasut aamma arnaannaanngitsuni immaqa aamma eqqarsartoqarsinnaagaluarpoq angutit kisimiittut meerallit Inatsisartuni ilaasortaarusukkaluarlutik tunuarsimaartut meeqqaminnut atugassarititaasut pitsaanngimmata, avataaninngaaneerlutik.
Taamaattumik tamakkua eqqarsaatigineqarnerusariaqarput, maani oqaluttarfimminngaanniit meeqqat, meeqqanut atugassarititaasut annertuumik oqallisigisarpagut, meeqqat toqqissisimasut, meeqqat inuiaqatigiinni inissisimanerat pitsaanerpaamik sulissutigerusullugu.
Isumaqarpunga tamatumani aamma immitsinnut minnerunngitsumik
qiviartariaqartugut. Taamaattumik taakkua suleriaqqinnissami eqqaamaqqunaqaat,
tassami pingaaruteqarmat maani sulinissami toqqissilluni suliniaraanni aamma
isumannaatsumik qimatsivissaqarlunilu aamma inissisimanissaq, ilaatigut
unnuarsuarmut sulisarneq eqqarsaatigalugu. Qujanaq.
Ruth Heilmann, Siumut:
Siullermik Maliinannguaq
Markussen Mølgaardip oqaaserisai kingulliit assorujussuaq taperserumavakka.
Tassami tikeraartitsisarneq taanna siusinnerusukkulli ilumoorpoq eqqartorneqareersoq
maannamut suli piviusunngortitsiffiunngimmat, tassami meeqqat
tikeraarsinnaatitaanerat Inatsisartut maani ataatsimiinneranni, taanna suli
atuutinngilaq. Taamaallaat uiusoq tikeraarsinnaatitaavoq.Taamaattumik
tassuunakkut eqaallisaanissaq eqqartorneqartillugu aamma tassuunakkut
eqaallisaasoqartariaqarpoq.
Aamma uani Hans Enoksenip
oqaatigisaa ilumoornerassavara assut, tassa Nuup avataaniittunut Inatsisartunut
ineqarnikkut atugassarititaasut maani naammaginanngitsorujussuummata. Tassami
allamik periarfissaqannginneq peqqutigalugu hotelimiittarpugut, ilaatigullu
aamma hotelimi allaat oqarfigineqartarluta ullumikkut immaqa ullut tulleriit
inissaqanngikkuit allamut nuuttariaqassuutit.
Isumaqarpunga tassuunakkut
siulittaasoqarfiup aamma suliarisariaqarpaa pingaarnersiuineq aamma hotelini
eqqarsaatigineqaqqullugu. Aammalu ilaatigut
katerisimaartarfinnguaqanngilagulluunniit tappikuga
ataasinnguartortut akornganiissanngikkutta. Taamaattumik tamakku aamma
eqqarsaatigalugit allatigut periarfissarsiuussinissaq Hans Enoksenip
siunnersuutigisaa taanna assorujussuaq uanga taperserusuppara.
Aammalu siulittaasoqarfiup
soqutigisariaqarpaa Inatsisartut naligiissumik sullinneqarnissaat. Tassani
assersuutigineqarpoq timmisartoqarfimmik atoqqaartitsinerni qanoq iliortoqarsimanera.
Ilaatigut Aasianni assersuutigiinnarlugu atoqqaartitsisoqarmat timmisartoq
ulikkaavillugu aammalu piumaffigineqanngitsut akiinissaminnut. Kisiannilu
Maniitsumi atoqqaartitsisoqar-
mat, soorunami nuannaarutigaagut
takkuttoqarmat, kisianni amerlanerusinnaagaluarput kiinnat utaqqisat.
Aammalu Inatsisartut
qinersisartut tikillugit sulisariaqarput, aammalu Inatsisartunut
atugassarititaasut angalanikkut aamma tassani eqaallisarneqartariaqartut.
Qinersisartut allaat ukiut sisamat qinigaaffiit iluanni qinikkatik takuneq
ajorpaat, isumaqarpunga tamakkua eqqarsaatigeqqinneqartariaqartut. Soorlu
oqartoqartoq, sineriak tamaat, aamma siunnersuuteqartoqartarpoq ilaannikkut,
sineriak tamaat Inatsisartut angalaartariaqarpaat, ataatsikkoorlutik.Tamakkua
isumaqarpunga eqqarsaatigalugit aamma suliniartoqartariaqartoq, ilaannai
periarfissaqartitaasarnerat taanna isumaqarpunga pissusissamisuunngitsoq.
Lars Karl Jensen, Siumut:
Siullermik Siumuminngaanniit
oqaaseqaatigut Inatsisartut siulittaasuannit ilassilluarneqarmata
nuannaarutigivarput.
Ukua soorunami suna tamaat
suleriaatsimut tunngasut eqqartorneqartut ilai oqaaseqarfiginnginnatsigit
aallaqqaammut naqitanngorlugit, peqquteqarpoq partiimi aamma kikkulluunniit
oqaaseqarsinnaammata, namminneq uummatiminninngaanniit pisunik.
Una uniffigisara ataaseq uanga
nammineerlunga qaqilaarniarpara, tassa Siumumi oqariartuutigigatsigu
siulittaasussarsiornermi, siulittaasup immeraatigineqartannginnissaa, soorlumi
Otto Steenholdtip aamma nammineerluni taanna taagaa.
Isumaqarpunga qanorluunniit
ilioraluarutta, aap mamaattua piissagipput. Tassa Inatsisartut namminneq
naqisimaneqartutut misigisimanatik namminneq toqqaasinnaanerat, iluminni
oqaluuserissavaat. Imaanngitsoq Naalakkersuisunngortitsilernermi
aalajangerneqarluni taanna pissasoq. Taamaattumik taassuma
iluarsiiffigineqarnissaanik inussiarnisaarfigineqarnerput aamma
nuannaaruutigivarput.
Aappassanik uani eqqaarusutara
tassaavoq maannakkut angalasarnermut tunngatillugu akiliunneqartarnermi
aalajangersakkat aallaaviata ukiuata nikinganerani uagut qinigaaqqittut
malugilluaratsigu ukioq manna aappatta angalasinnaaneranut
akiliunneqarsinnaanngitsoq.
Pissutsit tamakkua tusiattut
Inatsisartut suleriaasissaata iluaniittut malitagut aaqqissuunneqartariaqarput
aamma maannakkut suliareqqinnerani uuma.
Oqaatsinut tunngatillugu
ajoriffissaqartissimanngilara uanga uani § 53-ip oqaasertalerneqarnera,
suleriaasissatsinni. Isumaqarama maannakkut oqaatsitigut inissisimanerput
tassaasoq marluinnik oqaaseqarnissarput Namminersornerullutik Oqartussat
inatsisaatigut illersugaasoq, taamaattumillu aamma sooq inimi maani
allanngortiterissaagut.
Taamaalissagutta
Namminersornerullutik Oqartussat inatsisaat allanngoqqaartariaqassavarput.
Ajornaqaaq inatsit tunngaviusoq tussapiffigalugu ingerlaveqarsinnaanngilaq,
aaqqiisoqassappat inatsisit tunngaviit aaqqeqqaatariaqarput.
Jonathan Motzfeldt, Naalakkersuisut Siulittaasuat:
Lars Karl Jensenip
oqaaserisassama ilai attullartiarmagit aamma uanga oqaatigerusuppara, Otto
Steenholdtip oqaaserisai najoqqutaralugit uggornarpoq kalaallisuinnaq
oqaaseqartumik folketing-imut ilaasortaqarsimannginnatta. Taava qanoq danskit
tamanna aaqqinniarsimassagaluaraat, aamma pissanganassagaluarmat.
Uagut taanna naammattooratsigu qanoq
iliorpugut, tassani hjemmestyrep inatsisaa malillugu maani inimi
oqaluttassagatta kalaallisut, kisianni oqallinnigut aamma qallunaatut
malinnaaffigineqarsinnaaneri pingaartikkatsigu. Taavalu taanna periarfissaq
ammarsimavarput.
Isumaqarpunga taama eqaatsumik
aaqqiisarnerit aamma ingerlatissagigut. Aammalu tassuunakkut periarfissat
oqaatsit pissutigalugit ini manna mattunneqarsinnaanngilaq, innuttaasunut.
Ataatsimilluunniit oqaluttarfik manna, oqaatigineqassanngilaq kalaallisut
oqaasillik kisimik pigissagaat.
Nunap inuisa ilarparujussui aamma
oqaatsinik allanik atugaqarpata, innuttaaqataasutullu ilaam-mata periarfissaat
mattunnissaa mianersuulluinnartariaqarpoq. Taamaattumik qallunaatulluunniit
kalaallisulluunniit paasinarluartumik oqalussinnaasoq kinaluunniit
tikilluaqqusaali.
Nattaqqallisaartumik atuarnerit,
taakkua inooqataaffigisinnaavagut aamma taamaattuarsimavut immikkut
inatsisiliorluta piumasaqaateqassanngilagut atuffarissut kisimik maani
oqaluttassasut.
Kisianni mianersuutigilaassuarput
oqaatsit tungaasigut aqquteqarluta, manna oqaluttarfik
parnaarunniassannginnatsigu allanut. Isumaqarpunga kusanartumik Inatsisartuni
aaqqiisimasugut. Taamatut qallunaatut oqaasillit aamma periarfissikkatsigit
maanni oqaluttarfimminngaanniit oqalussinnaatillugit.
Ataaseq isumaqarpunga
oqilisaassissutaagaartussaq nutserisutsinnut nersunaqisunut, gruppini
oqaasissat sooq kalaallisuinnaq maani tunniunneqarneq ajorpat, taamaalilluni
aamma nutserisuninngaaniit malinnaaffigineqarsinnaassammata. Aamma
neriuutigaara nutserisut atukkagut pikkorissut nersunaqisullu aamma qallunaanik
kalaallisut oqalussinnaasunik nutserisunik peqalernissarput aamma taqqamani.
Taqqamaniilluni aamma qallunaatut nutsigassat, qallunaamut kalaallisut
ilinniarsimasumut qallunaaqatiminullu sukkasuumik oqariartuuteqarsinnaasumut
iluatinnassangaluaqaaq aamma qallunaamik kalaallisut oqalussinnaasumik aamma
taqqamani nutserisumik peqassangaluaraanni.
Tamakkunatigut aamma periarfissat
misissorneqarsinnaapput. Kisianni pingaarneruvoq matut matunaversaassangatsigit
maani.
Godmand Rasmussen, Atassut:
Uanga tupigusuutigilaarpara
oqallisissiaq una, siullermeerneqarnera aappassaaneerneqarnera allatulluunniit
allassimanngimmat. Imaannerluni ataasiaannarlugu oqaluuseriniarneqartoq
taannartaa.
Taava tassani paasisinnaavara
taamannak pingaaruteqartigisoq oqaluuserisassaq malunnarmat, partiit
oqariartortui assut naatsuliorsimasut. Sunaaffa taama takitigisumik
uummammioqartoqarsimagaluarpoq.
Ilumoortoq unaagunarpoq taanna
oqallisigissagutsigu inerneqarnavianngilaq, tassa isummat nutaarparpassuit
qallulerput. Taava pappialanngorlugu ingerlateqqittoqarniarli tassunga
tunngasumik. Isummat nuannersorparpassuit tusarpagut, tassunga tunngasut.
Inereerneqarsinnaanngilaq pappialartaqanngitsumik oqallikkaluarutta.
Naalakkersuisut Siulittaasuata
aatsaannguaq torrallalluinnarlugu oqaatigaa, ataatsimiittarneq
aaqqissuulluakkamik aallartippat, uagutsinnut tamanut pitsaanerpaamik taanna
kinguneqarsinnaasoq. Taamaattumik paasisinnaanngilara Siumup oqaluttuata Hans
Enoksenip oqaatigimmagu, ilaatigut qaammatit arfinillit angullugit
ataatsimiittarnissarput kissaatiginartimmagu.
Nutaamik ineriartorneq taama
nalilersuiffigineqarsinnaanngilaq. Pitsaasumik ineriartortitsissagutta
pitsaanerpaamik uagutsinnut aamma oqinnerpaamik suleriaaseq
ingerlattariaqarparput.
Uani oqallinneq uanga
nalileruminaatsittupilussuuara. Arnat partiiliorniarnissaat tassani
oqallisigineqanngilaq uani, minnerpaamilluunniit.
Angutit tunuarsimaarnerat kia
uppernarsisinnaavaa. 206-iulluita qineqqusaarpugut, angutit qassiusimappat.
Taanna tunuarsimaarfigineqarsimanerluni angutinit qinigassanngortittunit.
Taamaattoqarsinnaanngilaq, oqallinneq una pingaartorujorujussuaq massakkut
attorparput. Isummat pitsaasut saqqummeralerput, kisianni
inerneqarsinnaanngilaq.
Taamaattumik siunnersuutigiarpara
soqutiginarteqigutsigu tamatta, aamma soqutiginarpoq, pappialanngorlugu
oqallisigeqqinniartigu, inerunnanngilagut unnuarsuarmut oqallisigisinnaavarput
taanna naammassinagulu.
Anders Andreassen, Siumut ataatsimiinnermik aqutsisoq:
Qujanaq, Guulumaat
paatsuungaqqunagu oqaatigissavara, suliaq maani oqallisigineqareeruni
ataatsimiititaliamut ingerlaqqeqqaarallassammat. Tamatumalu kingornatigut aamma
maanga qaqeqqinneqassaaq, oqallisigineqaqqillunilu. Taava tulliulluni oqaaseqassaaq
Otto Steenholdt, Atassut.
Otto Steenholdt, Atassut:
Aap, Inuit Ataqatigiit oqaaseqartuannut Olga Poulsenimut qalleqqissassavara, taanna oqaatigisara ilissinnik isumaqatiginnillunga oqaaseqarnera, oqaatsimmi imannak ilagakku, uanga nammineq taanna isumagalugu, kisianni gruppemi oqallisigisimanagu, tassa taamaappoq.
Taannaana eqqaagiga, aatsaat siullermik § 53-imiittoq, maani oqallisigineqanngimmat. Matuma siunerujorujussuatigut uanga nammineerlunga taanna oqaatigisimagakku, eqqumiigalugu ataatsimiittarfinni nunani avannarlerni ataatsimiittartoqatigiit taanna aalajangiusimammassuk, maani nunami uagut oqaatsigut atorneqassapput, tassa ataatsimiinnerni.
Taannaana eqqaasitsissutigigiga, taamaattumik Jonathan Motzfeldtip imatut oqartissanngi-laanga, tassa oqaluttarfik uanga matuniaringa, allatut oqaasilinnut. Naamik, ataasiarunnaarluniuna pisarmat ataatsimiititaliamut piukkukkinga, oqarpata Jonathan Motzfeldt isumaqatigilluinnarparput, oqassaaq ajunngilluinnarpoq, kisiannili oqallisigeqqissappassuk isumaqarlunga iluatinnartuusoq.
Taamaattumik taamatut oqaaseqarpunga erseqqissarlugu, Atassutip oqaaseqartuata oqasii, tassaapput Atassutip gruppeata nammineq oqaasii, kisianni Atassummi allamik isumaqartortagut mattunneq ajorpagut, soorlu uanga nammineq massakkut taamaaliortunga, erseqqissarluguli uanga nammineq taanna oqaaseralugu, siornatigut aamma oqaatigereertarsimagakku.
Nunani allani pisimasut maanga eqqaanartillugit oqaatigiinnarpakka, pingaartikkakku aamma pingaartinneqartuarumagatta nammineq Hjemmestyre eqqukkatsigu oqaratta, oqaatsit pingaarnerit tassa kalaallit oqaasii.Tassunga tulluartillugu uanga qangali anittarsimagakku, taanna allanngortinngilara kisianni qularinngilara Atassummi ikinnerussuteqarlunga.
Olga Poulsen, Inuit Ataqatigiit, pingajussaaneerluni oqaaseqartoq:
Siullermik Atassutikkunnut utoqqatsissuunga taamatut paasinerluillunga oqaaseqarsimagama.
Taava uani malinnaaffigineqarsinnaanngitsutut oqariartunngilagut, soorunami kikkulluunniit malinnaasinnaasut malinnaassapput, inerterneqanngillat aamma taakkua malinnaasinnaajunnaartinneqarnissaat siunertarineqanngilaq. Taanna isumaqarpunga aamma oqariartuutitsinni ersin-ngitsoq, taamatut siunertaqartugut.
Taava Guulumaamut una oqaluuserisaq pappialartaqarpoq, taassumalu pappialartaraa tassani Inatsisartut suleriaasissaannut siunnersuummi § 53 uani eqqartoratsigu. Pappialartaqarpoq taamaammat.
Marluinnik oqaaseqartunik oqaraangatta, isumaqarpunga tassani eqqaamasariaqaripput marluinnik oqaaseqarneq imannak paasisarparput, tassa qallunaatut kalaallisullu oqalussinnaalluinnaqqissaartut, immaqa taama oqaatigalugu. Kisianni kalaalerpassuaqarpoq qallunaatut oqalussinnaanngivissortunik aammalu qallunaatut annikittuinnannguamik paasisartunik.
Taakkua annertunerusumik eqqarsaatigineqarneq ajorput. Isumaqarpunga taanna marluinnik oqartarnermi inuiaqatigiit marluinnik oqaaseqartuusugut, taamatut oqartarneq annertunerusumik toqqammavissaqanngilaq, pissutigalugu amerlanerussuteqartut maani nunatsinni tassapput, kalaallisut oqaaseqartut. Aammalu taakkua akornannganni qassit procentimmitaava ilivitsumik illuttut oqaaseqanngitsuuppat.
Josef Motzfeldt, Aningaasaqarnermut Niuernermullu Naalakkersuisoq, Inuit Ataqatigiit:
Ataatsimiinnermi aqutsisup akuerisinnaappanga Inuit Ataqatigiit siulittaasuattut oqaaseqarumagaluarpunga.
Tassa oqaaseqartut arlariit, Inatsisartut siuliittaasuattut inissisimmavik immeraassutigineqas-sanngitsoq imaluunniit niuerutaasariaqanngitsoq oqaatigaat. Taanna arlaleriarlugu Inuit Ataqatigiinni oqaatigisareersimasarput qujanaqaaq massakkut naappiffiummat.
Aamma suleriaatsimi ullumikkumut atuuttumi allassimavoq, § 2-ani allassimavoq, tamanna imatut pisassasoq, Inatsisartuni amerlanerusut qinigaat tassaassasoq qinigaasoq. Taamaattumik kingumut qiviarluta kukkussutigisarsimasagut eqqaassaganni 1997-imi upernaakkut aprilimi niuerutigineqarnera sakkortunerpaaq aallarnerneqartoq matumuuna kipitinneqartussatut neriuppunga inatsisartuninngaannit naqissusiivigineqartoq. Inatsisartuni siulittaasuuffik selskabimik siulittaasuuffimmik taarserlugu iveeqqatut kiilumut akilikkatut nioqqutigineqarnera taamani aallartinneqartoq isumaqarpunga massakkut amerlanernik maani tikkuaavigineqartoq tamaanga killeqartariaqartoq.
Oqaatsit sorliit pingaarneruppat. Oqaaseqartup kingulliup oqarneratut nammineq kalaallit oqaatsivut Namminersornerulernermi pingaarnertut oqaatigineqarput. Aammalu uani suleriaatsimi allassimasut najoqqutaralugit massakkumut atuuttumi 1995-iminngaannit ajoraluartumik taamanikkut iluarseriaraluaratsigu itigartinneqarpugut.
Iluarsineqanngisaannartoq ukiut sisamanngullartullu massakkut suleriaaserput unioqqutikannerlugu ingerlasimanerput massakkut aaqqinniarneqartoq malunnarsivoq, aqqut sorliussanersoq sulinerminni, ataatsimiititat sulinerminni taanna aalajangerumaarpaat.
Kisianni nalunaarutigineqartut imaannaanngitsuupput, oqaluttarfik manna inunnut ataasiakkaanut aalajangersimasumik oqaaseqartunut mattunniarneqanngitsoq erseqqissarneqarpoq, aamma tamanna taamaappoq.
Uagut folketingi assersuutigalugu, folketingimi sinniiserisagut qallunaatut oqaluttariaqarput. Aamma ajornanngimmat taamaaliorsinnaapput. Kisianni mumeriarutsigu immaqa imaattoqaraluarpoq, immaqa uffa innuttaasut akornanni folketingimi sinniiserisatsinnut sulinissamut piukkunnarnerusunik, innuttaasunut sullissisinissamik pikkorinnerusunik immaqa peqaruttortoq kalaallisuinnaq oqaasilinnik. Tamanna misilittagaqarfigineqarpoq, kalaallit sinniiserisatta folketingimi arlallit misilikkaluartarsimammassuk kalaallisut oqaatitik, oqaatsivut atorlugit oqaluttarfimmiit oqalussinnaanerlutik, itigartinneqartarput.
Ajornanngilaq nunap najukkap oqaasii pingaarnerit ilikkassallugit, tamanna uagut inuiaallu allat nalunngilarput. Aamma tassunga ilanngullugu assersuutissaqqippoq Baltikummimi, Letlandikkut makkua Ruslandimit anillutik namminiileramik ukiunik tallimanik periarfississimavaat tassani nunaqartut russisut oqaaseqarnermi saniatigut pinngitsooratik namminneq oqaatsiminik oqalulissasut. Tamanna anigorneqarpoq, anigorneqarsinnaavoq.
Islandimi, Savalimmiuni allaffissorneq oqaatsit ataatsit atorlugit
ingerlanneqarpoq. Tamanna ornissagutsigu Inatsisartuni sakkukinnerpaamik
piumasarisassarput tassaasariaqarpoq oqaluttarfik manna kalaallisut
oqaluffiussasoq. Tassa uanga
isumaga.
Hans Enoksen, Siumut, pingajussaanik oqaaseqartoq:
Tassa Gudmand Rasmussenip uanga
atera toqqarlugu taariarmagu maanngaqqippunga. Uanga aallaavigaara suliassat
peqqissaartumik suliarineqarnissaat. Assersuutigiinnarlugu illit
ungasinnatsukkut ataatsimiititaliami ataatsimiittaqattaarnitit ullormut
tallimariarlutit assut ilungersunartutut isigivatit. Taamakkuuku
pinngitsoortinniarlugit sulineq siammartinneqarnissaa uani aamma uanga
oqalliseqataaffigigiga, taanna erseqqissaassutigilaaginnarpara.
Pitsaasumik sulinissaq
anguniarpara, ajunngilaq qaammatit arfinillilluunniit ataatsimiinnerit
ingerlasalerniarlik. Kisianni Inatsisartunut ilaasortat atugarisaat
pitsanngortinneqassappata pingaartumik ineqarnikkut pissutsit
eqqarsaatigalugit. Qujanaq.
Anthon Frederiksen, Kattusseqatigiit:
Naqqiuteqarniarlunga maannarpunga
tassa Hans Enoksenip siusinnerulaartukkut oqaalulluni oqaatiginiartutut
ikkamiuk siulittaasoqarfimmi uanga kisimiilluinnarlunga aalajangiisimasunga
kikkut Qaarsuarsuliassanersut, kikkullu Maaniitsuliassanersut pillugit.
Kisianni Hans Enoksenip eqqaamasariaqarpaa, tassani ataatsimiititaliami aamma
Naalakkersuisuutitaqartut amerlanerussuteqarput. Amerlanerillu isumaat
ataatsimiititaliami tamani ataqqineqartarpoq.
Taamaattumik uannik kisimiillunga
pissuutitsiniarneq atorsinnaanngilluinnarpoq taamatut oqariartorneq. Qujanaq.
Ole Lynge, Inuit Ataqatigiit:
Nutaajusugut qanganisaasugullu,
tassa upernaaq qinigaanerma kingorna maluginiarpara pissutsit
allanngorujussuarsimasut. Immaqa ajornanngitsuaranngorsimavoq massakkut
piumaallallunilu arlaanut sammiveqarparani kisimi ingerlarsorsinnaaneq.
Taanna neriuppunga, taamatut
oqarnera paatsoorneqassanngitsoq, aamma ataasiakkaanut tunngatinngilara.
Kisianni Inatsisartoqarnermi maannakkut suleriaatsigut najoqqutaralugit,
aammalu Naalakkersuisunngortitsinermut atatillugu siulittaasoqarfimmi
inissiisarneq. Imaassinnaavoq ilumoortusi tassani taanna siulittaasoqarfik
tamanik Inatsisartunik illersuisussaammat, ajornanngippat tamattaalluta taava
qinertariaqaripput.
Aamma qinigassanngortittut
ilaannikkut arlaqarsinnaasarput. Kisianni tassa soorunami
isumaqatigiinniarfiusarmat manna Inatsisartoqarfik naggataatigut
paaseqatigiissutigineqartarpoq partiit suleqatigiissut imaluunniit
suleqatigiinngikkaluarunik illuatungiliuttut ilaatigut aamma
akuerseqataasarput, Inatsisartut siulittaasuanut tamakkiisumik
tunuliaqutaanissaq siunertaralugu.
Taamaallaat uanga taannartaa
assut apeqqusilaarusukkinga, siulittaasup immeraannertut
isikkulersinniarneqarnera ilumoorsorinnginnakku. Isumaqatigiinniarnikkut taakku
aamma anguneqartarmata.
Immaqa piukkunnarnerungaluarpoq
makkunani selskabini assigiinngitsuni siulittaasut taamatut allatuulli
partiilersuunnagit maani qinigassanngortitta..., immaqa aamma
imaassinnaavoq qineqqusaarnernut atatillugu Naalakkersuisussanik
aalajangersimasunik Naalakkersuisunut aamma immikkut
qinigassanngortitsisarnerup eqqunneqarsinnaaguni. Kisianni taamatut ilaa?
Eqaattumik nunarput taamatut - millionerpassuarnik inoqanngilagut,
avinngarusimasuninngaaneerpugut tamatta arlalissuulluta, taamaattumik
kissaatiginarpoq ataatsimiittarnerit aamma eqqarsaatigalugit immaqa
ataatsimiinneq ataaseq sivisoorsuutinngikkaluarlugu kisianni
ataatsimiittarnerit amerlinissai uagut avataaneersugut kissaatiginerugipput.
Tassa taanna qularineqassanngilaq
tamatta aamma allanik saniatigut suliaqarlutalu pisaratta. Aamma ukiut
sisamaannaat qinigaasarta ilaannikkut qinigaanngitsoorluni
kipiluttunartartorujuuvoq, suliffik qimassimasimangaanni. Taamaattumik taanna
siulittaasoqarnermut tunngasoq pingaartillugu uanga isumaga tassuunga anippara,
immeraassutigineqartutut taaneqarnera isumaqatiginnginnakku.
Johan Lund Olsen, Inatsisartut Siulittaasuat:
Takisoorsualiornianngilanga,
oqallinneq maani uummaarissoq soqutiginartorpassuarnik aamma
suleriaqqinnissatsinni, tassa suleriaasissaq pillugu ataatsimiititaliami,
suleqqinnissatsinnut aamma tunngaviliisuummata ajunngilluinnartumik.
Kisiannilu uanga
oqaaseqarfigilaarusuppara, tassa Inatsisartunut Ilaasortap aamma
Siulittaasoqarfimmi ilaasortap Anthon Frederiksen-ip una oqaatigisaa
ilumoormat, tassani mittarfeqarfittaassani, taakkua angalanerit
Siulittaasoqarfimmi tamarmiulluta aalajangigarigatsigu.
Tassa Siulittaasoqarfik
ataatsimoorpoq tamatumani suliarinninnermi, soorlumi suliassarpassuarni allani
aamma taamatorluinnaq ittoq.
Taava maluginiakkama pingaarnerit
ilagivaat aamma una aamma ersarilluinnartumik Inatsisartuni ilaasortani
arlalissuarnik uani oqaatigineqartoq tassaavoq ataatsimiinnerit
sivitsorneqartariaqartut, tasisariaqartut, tassani soorunami
isumaqataalluinnarpunga. Tassani aamma innersuussutigerusuppara tassa 1996-imi
ukiakkut Inatsisartut, tassa siulitta, aalajangereerpaat Inatsisartut
suleriaasiata iluarsaateqqinneqarneranut kommission-ip isumaliutissiissutaa
maani sammigamikku, taamani aalajangerput ataatsimiinnerit sivisuut marluk
sapaatit akunnerinik qulinik sivisussusillit, tassa taakkuupput Inatsisartut
sulinerminni aallaaviginiagassaat.
Kisianni tassa ajoraluartumik
maannamut taanna naammassiniarneqarsimanngilaq, kisianni aajuna paasisarput
ersarilluinnartoq ullumikkut taama ittariaqartoq. Taava taanna tunaartaralugu
tassa isumaqarpunga suleriaasissaq pillugu Ataatsimiititaliamut
isumaliutissiissusiassaq taamatut ilusilerniartariaqaripput.
Tassa ataatsimiinnerit
sivitsortariaqarput tasisariaqarput Inatsisartut peqqissaarullugu suliassartik
naammassiniassappassuk.
Maani saqqummiussuunneqartut
ilaasortaninngaanneersut amerlaqisut maannakkut pulaffiginianngilakka
oqaatigereerakku suleriaaseq pillugu ataatsimiititaliami taakkua
suliarineqassasut.
Kisiannili una ilisimasitsissutigerusuppara,
tassa Inatsisartut Naalakkersuisullu akissaasersorneqarnerat pillugu inatsit,
tassa vederlagslov, taanna suli allanngortinneqarsimanngimmat.
Ilisimaneqartutuut 1998-imi
ukiakkut ataatsimiinnermi maani Inatsisartuni aalajangerneqarpoq Nunarput
ataatsimut qinersivinngortinneqassasoq, taanalu tassa toqqammavigalugu
maannakkut nutaamik Inatsisartut katitigaalernikuupput.
Suliassaq taanna suli
naammassineqanngilaq, naammassisariaqarporlu piaartumik Inatsisartunut
ilaasortat maannakkut sumulluunniit qinersisartunik naapitsillutik
ataatsimiigiarsinnaanissaat Inatsimmik tunngavissaqarniassammat
erseqqilluinnartumik.
Tassunga tunngatillugu
ilisimatitsissutigissavara Naalakkersuisullu suleqatigiissutigalugu upernaamut
ukioq 2000-mut saqqummiussilersaaratta inatsimmut allannguutissamik.
Tunngavissiisussamik Inatsisartut maannakkut nutaat qinersivimmi ataatsimi
angalasalersinnaanissaat taanna aqqutissiuunneqarsinnaaqqullugu.
Taava eqqikkaassutitut
naggataarutigalugit oqaatigilaassavakka, tassa isumaqatigiissutit
taagulaassagakkit.
Tassa Inatsisartuni sulineq
kiisalu Naalakkersuinikkut pissutsit pillugit oqallinneq uummarissarneqassasoq
maani aamma isumaqatigiissutigineqarpoq. Uummaarinnerusumik
oqallittariaqarpugut tassa taanna oqariartuutigineqarpoq.
Pissutsit Nunamut
tunngassuteqartut Inatsisartuni pitsaanerusumik suliarineqartalernissaat
kissaatigineqarpoq, tassa sivisunerusumik ataatsimiittalernissagut taanna
ersarilluinnartumik kissaatigineqarpoq, inuit tamat oqartussaaqataanerisa ataqqinerannik
tamanna qularnaarissammat aamma Pisortat oqartussaasut malittarisassiaasa
malinneqarnissaat taama ililluni ataqqineqarnerulissammat.
Taava aamma una, taasinerni
peqataanngitsoortut amerlaqataannik illuata tungaanniittut taasinerisa
ilanngaaserneqartarnissaat, taanna periarfissaasoq taanna uani aamma
erseqqissumik kissaatigineqarpoq. Tassa clearing taanna assersuutigalugu
Folketing-imi atorneqarpoq kisianni Folketing-ip suleriaasissaanni
allassimanani, tassa partiit akunnerminni isumaqatigiissutigimmassuk, taanna
aamma maani ima iliallaannaq atulersinnaavarput. Taannalu aamma maani
kissaatigineqarpoq.
Taava kingusinnerpaamik
Inatsisartut ataatsimiinnissaat aalajangeriigaq qaammammik ataatsimik
sioqqullugu Naalakkersuisut ataatsimiinnermi pineqartumi inatsisisissatut
peqqussutissatullu siunnersuutigilersaakkaminnik Inatsisartut
Siulittaasoqarfiannut tunniussereertalernissaat aamma
isumaqataaffigineqartupilussuuvoq.
Tassa aamma taassuma saniatigut
tassa nassuiaatit, nalunaarusiat annertuut aamma piffissaalluartillugu, tassa
minnerpaamik qaammat ataaseq sioqqullugu Inatsisartunut
agguaanneqareertarnissaa taanna kissaatigineqarpoq.
Taava aamma saqqummiussatsinni
ilaatigut una aamma ilaasoq oqaatigilaarusuppara, isumaqarama aamma piffissami
aggersumi pingaaruteqaleraluttuinnartussaq sulinitsinni.
Tassa inatsisiliortarnermi
inatsisiliornerullu qanoq ingerlasarneri pillugit innuttaasunut suli
annerusumik paasissutissiisarnissarput aqqutissiuukkusukkatsigu aamma uani
suleriaasissatsinni nutaami, tassa qarasaasiatigut paasissutissiisarneq IT
informationsteknologi tassuunalu periarfissat innuttaasut Inatsisartullu
akornanni oqallinnermi annertusisami atorluarneqarnissaa
aqqutissiuukkusukkatsigu uani suleriaasitsinni.
Tassungalu tunngatillugu
ilisimatitsissutigerusuppara Inatsisartunut ilaasortat piffissami qaninnermi
qarasaasiaaqqanik angallattakkanik pilersorneqartussaapput. Qarasaasiaaqqat
taakkua atorneqartussaagamik Inatsartuni suliarineqartartut Internet-i
aqqutigalugu erngertumik sineriatsinni aggerfissinnut
pappiaralersunngikkaluarluni, kisianni Internet-i iluaqutigalugu pilertortumik
Inatsisartunut ilaasortanut anngunniarneqarsinnaaniassammata.
Aammalu taama ililluta
innuttaasut qinersisartut kikkulluunniit Inatsisartut sulineranni
Internet-ikkut peqataasalernissaat aqqutissiuukkumallugu.
Taava aamma suleriaasissami uani
nutaami periarfissaq nutaaq aamma ilisimatitsissutigilaarusuppara, tassa
Inatsisartut Ataatsimiititaliatik aqqutigalugit namminneerlutik maannakkut
tusarniaanernik aaqqissuussisalernissaat taanna aalajangersakkani
allassimasussanngormat.
Taanna ataasiaannarluta
misilittagaqarfigivarput, tassa siorna 1998-imi upernaakkut ataatsimiinermi,
taamani ilinniartitsisussaaleqineq ajornartorsiutaallarmat, suli taama
ikkaluarpoq, kisianni taamani annertuumik sammineqarnerata nalaani Inatsisartup
Kultureqarnermut Ilinniartitaanermullu Ataatsimiititaliaat Katuami ulloq
ilivitsoq atorlugu kikkunnik tamanik tusarniaallutik aaqqissuussipput.
Taakkua tusarniaasitsisarnerit
annertuserusullugit maannakkut kissaateqarpugut, uanilu suleriaasissami nutaami
aqqutissiuukkumallugu aalajangersagaliorsimavugut.
Kisianni tassa
oqaatigeriikkattuut maani partiit ullumikkut oqallinnerat
illuatinnartupilussuuvoq aamma uagut suleriaqqinnissatsinnut tunngaviliisuulluni,
tassa suleriaasissaq pillugu ataatsimiititaliap suleqqinnissaanut. Tassa
uterfigeqqissavarput isumaliutissiissutiliussaagut taavalu uani ukiaq manna
ataatsimiinnitta ingerlanerani suleriaasissaq nutaaq
akuersissutiginiartussaassavarput.
Oqaluuserisaq naammassivoq.