Oqaluuserisassani immikkoortoq 41-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Tallimanngorneq 29. oktoberi 1999
nal. 15.35
Ataatsimiinnermik
aqutsisoq:Johan Lund
Olsen, inatsisartut siulittaasuat, Inuit Aqatigiit:
Kalaallit Nunaanni Inatsisartut
sileriaasissaannut siunnersuut pillugu Inatsisartut siuleriaasissaannut
ataatsimiititaliaq uani tassa apeqqummi aamma isumaliutissiisssuteqarsimavoq.
Inatsisartut suleriaasissaannut
Ataatsimiititaliaq suliarinninnermini ukuninnga inuttaqarpoq, tassa
Inatsisartuni ilaasortaq
Anders Andreassen (S)
Inatsisartuni ilaasortaq
Finn Karlsen (A)
Inatsisartuni ilaasortaq
Lars Karl Jensen (S)
Inatsisartuni ilaasortaq
Anthon Frederiksen (K)
kiisalu uanga
siulittaasutut Inatsisartuni ilaasortaq Johan Lund Olsen (IA)
Inatsisartut ulloq 18.
oktoberip 1999-imi ataatsimiinneranni oqaluuserinninneq
unitsikkallarneqareermat siunnersuullu Suleriassissanut Ataatsimiititaliamut
suliarisassanngortinneqareermat Kalaallit Nunaanni Inatsiartut
suleriaasissaannut siunnersuut ataatsimiititalip ulloq 23. oktober 1999-imi
ataatsimiinerannik suuliarineqarpoq.
Ataatsimiititaliap
iluarisimaarlugu maluginiarpaa siuunnersuutip suliarineqarnerani siunnersuut
ilassilluarneqarmat, siunnersuutilli ilaaniittut Inatsisartut kissaatigigaat
ataatsimiititaliamit erseqqinnerusumik oqaluuserineqassasut, kiisalu
Inatsisartut kissaatigigaat siunnersuutip imaasa ilai naqqiuteqarfigineqassasut.
Taamaammat
ataatsimiititaliaq siunnersuummut aallanngutissatut siunnersuutinik marlunnik,
ilanngunneqartunik suliaqarsimavoq.
Allannguutissatut
siunnersuutinut oqaaseqaatigineqartut saniatigut ataatsimiititaliaq imaattunik oqaaseqarumavoq:
Siunnersuummik
suliarinninnermi tamanut tunngatillugu kissaatigisatut oqaatigineqarpoq,
Inatsisartut ataaatsimiittarneri sivisunerusariaqartut. Taamaammat
ataatsimiititaliap siunnersuutigissavaa Inatsisartut ukiakkut ataatsimiinneri
tamatigut septemberimi taallimanngornerit aappaanni aallartittassasut. Tamatuma
saniatigut ataatsimiititaliap Inatsisartunut erseqqissaatigiumavaa, ukiakkut
ataatsimiinnerit novemberimi sapaatip akinnerinik siullernik marlunnik
ilallugit sivitsorneqarsinnaasut. Tamanna pisariaqalersinnaavoq Inatsisartut
ataatsimiittarneri aallavittut isigalugu sapaatip akunnerinik qulinik
sivisussuseqartassappata, tamannami tunngaviusumik akuersissutigineqarmat maani
inimi, tassa ukiakkut 1996-imi ataatsimiinnermi.
Aammattaaq Inatsisartut
ukiuanni Inatsisartut ileqquusumik pingasoriarlutik ataatsimiittarnissaat
isumaliutigineqarsinnaavoq, taamaaliornikkummi ukiakkut ataatsimiinerni sulineq
oqinnerulersinneqarsinnaassammat.
Ataatsimiititaliap
ilanngullugu siunnersuutigissavaa Inatsisartut ukiuata aallartilaarnerani
Inatsisartut ataatsimiititaliani inatsisit malillugit pilersinneqartussaasuni,
ataatsimiititalianilu ataavartuni ilaasortanik qinersisalissasut, soorlumi
siulittaasoqarfik taamatut qinerneqartartoq. Taamatut allannguutissatut
siunnersuummik saqqummiussisoqarpoq, Inatsisartummi ukiumut ataatsiarlutik
periarfissaqartariaqarmata ataatsimiititaliat amerlassusiisa suliassaqarfiillu
agguataariffigineqarnerisa allanngortinnissaannut, aamma ataatsimiititaliaq
isumaqarmat ataatsimiititaliat ilaasortalersugaanermikkut Inatsisartuni
ilaasortalersugaanermi agguataarineq malittariaqaraat.
Ataatsimiititaliat
amerlassusii aamma suliassaqarfiit agguataariffineqarneri pillugit Inatsisartut
suleriaasissaannut ataatsimiititaliap Inatsisartut 2000-imi Ukiakkut
Ataatsimiinnissaannut Inatsisartut Allattoqarfiat qinnuiginikuuaa
ataatsimiititalianut, nutaamik agguataarinissaq pillugu suliaqaqqullugu,
minnerunngitsumik ataatsimiititaliat amerlassusisa ikilisinneqarnissaat
siunertaralugu. Suliamut tassunga ilanngullugu isummerfigineqassaaq
Inuussutissarsiutinut Tapersiisarnermut Ataatsimiititaliaq tassa ESU siunissami
sumut inissinneqassanersoq.
Siunnersuutip
sulianerineqarnerani kaammattuutigineqarpoq siunnersuutip § 57-iata,
ilaasortanit sinniisussaqarnermut tunngasup, oqaasertaliivigineqarnera
allanngortinneqassasoq, taamaaliornikkut qinersisarnermut inatsimmi
oqaasertanut naapertuuuttunngorniarlugu.
Ataatsimiititaliap
suliarinninnerani erseqqissaatigineqarpoq, siunnersuut matumani taaneqartoq
atorlugu qinersisanermut inatsimmi inatsisartuni ilaasortamut kia
sinniisussaaneranut tunngasumut maleruagassat allanngortinneqarnissaat
eqqarsaatigineqanngitsoq. Kia inatsisartuni ilaasortamut sinniisussaanera
siunnersuummi matumani pineqartumi § 57-imi pinnani qinersisarnermulli
inatsimmi maleruagassatigut aalajangersaavigineqareerpoq.
Suliarinninnermi
oqaatigineqarportaaq kissaatigineqartoq, inatsisartut nunanut allanut
sillimaniarnermullu ataatsimiititaliaata taaguutaa siunnersuutip kalaallisuuani
nassuiaatinilu iluarsineqassasoq. Ataatsimiititaliap ajuusaarutigaa
siunnersuummi nassuiaatinilu taaguutit assigiinngimmata. Taamaammallu
inatsisartut allattoqarfiat qinnuigineqarpoq, nassuiaatini taanna aamma
iluarseqqullugu.
Suliarinninnermi
piumasaqaatigineqarportaaq inatsisartut ataatsimiititaliaat aamma nævnit
ataatsimiititaliallu Kalaallit Nunaata avataani inissisimasut
nassuiaasiortussaatitaasariaqartut. Inatsisartut suleriaasissaannut
ataatsimiititaliap erseqqissaatigissavaa, siunersuutip § 18-iatigut
periarfissaqartoqareersoq ataatsimiititaliap suliani allat pillugit allakkakkut
nassuiaasiornissaanut.Ataatsimiititaliap pissusissamisoorluinnartutut isigaa
nævnit ataatsimiititaliallu Kalaallit Nunaata avataani sulisut taamatut
sulinertik pingaaqisoq pillugu nassuiaasiortassappata.
Suliarinninnermi
sukumiisumik oqaluuserineqarpoq kalaallit oqaasiisa avataatigut oqaatsit allat
inatsisartut oqaluttarfianniit atorneqartariaqarnersut. Ataatsimiititaliap
aamma apeqqut taanna sukumiilluinnartumik oqaluuseraa, erseqqissassallugulu
siusinnerusukkut siulittaasoqarfiusoq aalajangernikuusoq qallunaat oqaasii
aamma inatsisartut oqaluttarfianniit atorneqarsinnaassasut.
Taamatut aalajangerneq
1995-imi qinersisoqarneraniilli inatsisartunit malinneqartuartarnikuuvoq, suleriaasissanulli
ataatsimiititaliaq aalajangernerup allanngortinnissaanut taamaalillunilu
siunnersuutip §53-iata allannguutissaanik siunnersuuteqarnissaminut
pissutissaqarsorinngilaq.
Inatsisartut
suleriaasissaannut ataatsimiititaliap tassunga atatillugu inatsisartunut
erseqqissaatigissavaa, oqaatsit sorliit pisortat ingerlatsiviini
atorneqartussaanersut pillugit aalajangernissaq inatsisartut namminneerlutik
aalajangiiffigisinnaanngikkaat. Kalaallit Nunaat nunatut nutaaliaasumik
silarsuarmut avatitsiniittumut ammasuulluni ingerlasuuvoq, nunatulli allatulli
pisussaaffeqarluni nunani assigiinngitsuni isumaqatigiissutigineqartunik
atuuttunik malinnittussaatitaasoq.
Kalaallit Nunaannuttaaq
tunngatillugu imaappoq, Namminersornerulluni Oqartussaanermut killissarititaasut
Namminersorneruneq pillugu inatsisikkut aalajangersaavigineqarsimallutik.
Namminersornerunermut inatsit allannguuteqartinneqassappat ataatsimiititaliap
paasinninnera malillugu pingaartuuvoq, allannguutissat taamaattut inatsisartuni
minnerunngitsumillu innuttaasut akornanni sukumiisumik
oqallisigineqartariaqartut.
Inatsisartut
suleriaasissaannut ataatsimiititaliap paasisimavaa Namminersorneruneq pillugu
inatsiseqarneq pillugu ataatsimiititaliarsuarmik Naalakkersuisut
pilersitsilersaartut, tassa Namminersorneq pillugu isumalioqatigiissitat aamma
ataasinngorpat maani inatsisartuni partiininngaanniit aamma
ilaasortaaffiginissaa eqqarsaatigalugu inuttalersorneqartussaq.
Tassunga atatillugu
ataatsimiititaliap kaammattuutigissavaa, oqaatsit pillugit apeqqut
ataatsimiititaliarsuup imaluunniit isumalioqatigiissitap suliassaatut
aalajangersakkamut ilanngunneqassasoq.
Taasisoqassatillugu partiit
assigisaasalu oqimaaqatigiinnerisa piaarinaatsoornikkut allanngornissaanik
pitsaaliuinerup, tassa clearing atortuulersinneqarnissaanut tunngatillugu
inatsisartut suleriaasissaannut ataatsimiititaliap inatsisartuni partiinut
Kattusseqatigiinnullu inassutigissavaa, taamatut aaqqissuussinissaq
akunnerminni isumaqatigiisssutigeqqullugu. Ataatsimiititaliarmi isumaqarmat taamatut
aaqqissuussineq inatsisartut suleriaasissaannut ilanngutissallugu
pissusissamisoortuunngitsoq.
Inatsisartuni ilaasortap
qaqugukkut pissuteqavilluni ataatsimiinnerni peqataasinnaanngissinnaaneranut
najoqqutassat erseqqissut pissarsiariumallugit ataatsimiititaliaq siunnersuutip
§ 56-ianit nassuiaatinik allanik ilanngullugit nassiunneqartunik aamma
suliaqarpoq.
Inatsisartut
suleriaasissaannut ataatsimiititaliap naggasiullugu ilisimatitsissutigissavaa,
ataatsimiititaliap inatsisartut allattoqarfiat nassuiaasiamik sapinngisamik
piaartumik aallartitseqqullugu qinnuigimmassuk, taassuma
inerneriniartussaallugu aningaasarsiaqartitaanermut inatsisip
nutarteriffigineqarnissaa. Tamanna pisariaqarluinnarpoq qinersisarnermut
inatsisip taamatullu inatsisartut suleriaasissaata allanngortinneqarneri
pissutigalugit.
Taamatut oqaaseqarluni
suleriaasissanut ataatsimiititaliap isumaqatigiittup inassutigivaa, Kalaallit
Nunaanni inatsisartut suleriaasissaannut siunnersuut, allannguutissatut
siunnersuutit marluk isumaliutissiissummut matumunnga aamma ilanngunneqartut
akuersissutigineqarneratigut iluserilikkani atorlugu inatsisartunik aamma
akuersissutigineqassasoq.
Lars Karl Jensen, Siumup oqaaseqartua:
Inatsisartut
suleriaasissaannut ataatsimiititaliap isumaliutissiissutaa Siumumit imatut
oqaaseqarfigissavarput.Aallaqqaatigalugu oqaatigissavarput, suleriaasissatut
siunnersuut ataatsimut isigalugu tunngaviatigut isumaqatigigatsigu.
Siumumiit isumaqarpugut
inatsisartut ukiuat aallarnerlugu inatsisartut ukiakkut septemberimi tamatigut
tallimanngornerit pingajuanni ataatsimiinnertik siulleq aallartittassagaat.
Aamma tapersersinnnaavarput ukiakkut ataatsimiinnerit pisariaqartitsineq
malillugu novemberimi sapaatit akunnerinik siullernik marlunnik
sivitsorneqartarsinnaanissaat. Tassani tamanna ukiakkut 1996-imi tunngaviusumik
aalaangersaanermut naapertuummat.
Inatsisartut ukiumut
pingasoriarlutik ataatsimiittarnissaat isumaqatigaarput, isumaqaratta
taamaalilluni suliassat siammarnerullugit piffissaqarfiginerullugillu
suliarineqartalissasut.Aammalu tamatuma saniatigut ilassutaasunik
aningaasaliissutit suliarinneriaasiat allanngortinneqarmat, suleriaatsimut
tamanna oqilisaataasussaassaaq.
Tassalu
siunnersuutigaarput, ataatsimiinnerit imaalissasut: inatsisartut ukiuat
ataatsimiinneq aallartittassaaq ukiakkut septemberimi tallimanngornerit
pingajuanni, ataatsimiinnerillu sinneri pisassasut inatsisinik suliaqarnermut
naapertuuttunik ukiuunerani februarimi aammalu upernaakkut aprilimi påskip
kingornatigut, aamma martsimi påskiusinnaavoq.
Piffissat
ataatsimiiffiusussat suliassat aallaavigalugit napertuuttumik
inissinneqartarnissaat tassani innersuussutigalutigu. Isumaqatigiippugut
inatsisartut ukiuata aallartinnerani ataatsimiiititaliani inatsisit malillugit
pilersinneqartussaasuni.Ataatsimiititalianilu ataavartuni ilaasortanik
qinersisoqalertarnissaa taperserniarlutigu, aammami siulittaasoqarfik pillugu
taamatut suleriaaseqaratta, tamanna naapertuuttutut isumaqarfigaarput.
Ataatsimiititaliat ilaasa
imminnut qanittumik suliaqartut ataatsimut kattunnerisigut ataatsimiititaliat
ikilineqarsinnaanerat tunngaviatigut isumaqatigaarput. Tamakkunannga
siulittaasoqarfik suliaqareerpat gruppemi nalilersorluarneqartariaqarput,
ataatsimiititaliat sorliit kattunneqarunik naleqqunnerussanersut, inatsisartunili
sulinermut sutigut sunniuteqassanersut aamma nalilersorluartariaqarmata.
Inatsisartut
oqaluttarfianniit kalaallisuinnaq oqaluttalernissaq Siumup siullermeertumik
uuma oqaluuserineqarnerani tunngaviusumik oqaaserisai innersuussutigissavagut.
Tamatumani naatsorsuutigisassat amerlammata, inassutigissavarput tamatuma
Namminersornerulersimaneq pillugu ataatsimiititaliarsuarsami
nalilersorluarneqarnissaa ilanngullugu inassutigissagatsigu.
Pingasunngornikkut
apeqquteqaateqartarnermi maannakkumut periuseq allatut
aaqqiivigineqarsinnaanersoq Siumumiit aamma misissoqqussavarput. Ilanngullugulu
Siumumiit siulittaasoqarfimmut eqqarsaatigeqqussavarput misissoqqullugulu
inatsisartut ataatsimiittarfianni Naalakkersuisunut toqqaannartumik
apersuisinnaanerit periarfissaqarnersut. Isumaqaratta tamanna inatsisartut
oqallinneranni uummarissaataallunilu qulaajaaffiusinnaasoq.
Inatsisartuni politikkikkut
oqimaaqatigiissuseq akornusernaversaarumallugu taasisarnermi periuserineqarsinnaasoq
clearingimik taaneqartartoq atorneqalissappat isumaqarpugut,
pisariaqalersillugu partiit akunnerminni paaseqatigiissutigissallugu
atortariaqaraat.
Aammalu inussiarnersumik
misissoqqussavarput, ataatsimiititaliani inatsisit malillugit pilersinneqartuni
ilaasortat ajunngitsorsiassaqarnissaat periarfissaqarnersoq, taamatullu aamma
ataatsimiititaliat ataatsimoortinneqalerpata, taanna suliniutigineqarmat suliat
annertussusiannut naleqquttumik aamma taakkunani ilaasortaasut ajunngitsorsiaqalersinnaanerat
ilanngulluguttaaq misissoqqussallutigu.
Siumumiit naggataatigut
inassutigissavarput, inatsisartut suleriaasiata allanngortinneqarnerani
naleqqussaatigineqartut ulloq decemberip aallaqqaataat 1999-imiit
atuutilersinneqassasut. Siumumiit taamatut oqaaseqarluta siulittaasoqarfiup
isumaliutissiissutaa tunngaviatigut akuersaarparput, siuliinilu immikkut
taasagut ilanngullugit suleriaqqinnissami nalilersuutigeqqullugit.
Siverth K. Heilmann, Atassutip oqaaseqartua:
Kalaallit Nunaanni inatsisartut
suleriaasissaattut siunnersuut pillugu siullermeerinermi Atassummiit
oqaaserisimasagut aalajangiusimagatsigit oqaatigisssavarput, imatullu
nangittumik naatsumik oqaaseqassalluta
Ataatsimiititaliap
allannguutissatut siunnersuutaanut atatillugu inatsisartut ataatsimiittarnerisa
sivitsorneqarnissaanut Atassummiit ataatsimiititaliap inassuteqaataanut
tamakkiisumik isumaqataanerput nalunaarutigissavarput. Tassa Atassummiit
ukiumut pingasoriarluni ataatsimiittoqartarnissaanut isumaqataavugut,
pingaartumik misilittagaasut aallavigalugit aamma ukiakkut ataatsimiinnerit
oqinnerulersinneqarnissaat qularutissaanngimmat.
Ataatsimiititaliat amerlassusiisa
suliassaqarfiilu agguataariffigineqartarnissaannut allanngortinneqarneri
pillugit ataatsimiititaliap siusinnerusukkut isummiunneqarsimasut Atassummiit
nalilersueqqinnissamut isumaqataanerput nalunaarutigaarput. Tassami
ataatsimiititaliat susassaqarfiinut assingusut katiterneqarsinnaaneri aamma
ilaasortaasut amerlisinneqarsinnaanerinut Atassummiit nalilersueqataanissamut
peqataarusuppugut.
Ataatsimiititaliap
isumaqatigiissup allannguutissatut siunnersuutinut oqaaseqarfiginngisatsinnut
isumaqataagatta Atassummit allannguutissatut siunnersuutinut akuersaarluta
taaseqataasssaagut.
Olga Poulsen, Inuit Ataqatigiit oqaaseqartuat:
Inuit Ataqatigiinniit
inatsisartut suleriaasissaannut ataatsimiititaliaq suliassaminik
suliarinnilluarsimaneranut qutsavigissavarput.
Ataatsimiititaliap
isumaliutissiissutimini siunnersuutigaa, inatsisartut ukiakkut ataatsimiinneri
tamatigut septemberimi tallimanngornerit aappaanni aallartittassasoq, aammalu
novemberimi sivitsorneqarsinnaasarumaartoq. Tamanna Inuit Ataqatigiinniit
isumaqatigigatsigu oqaatigissavarput.
Inatsisartut ileqquusumik aamma
ukiumut pingasoriarlutik ataatsimiittarsinnaanissaat aamma akuersaarparput.
Inuit Ataqatigiinniit
ajusaarutigaarput, inatsisartut oqaluttarfianninngaanniit kalaallisuinnaq
oqalunnissamik siunnersuuteqaqqinnerput akuersaarnartuutinneqanngimmat.
Nalunngisatsitut taamatut
siunnersuuteqarnerput tusagassiuutitigut kusananngilluinnartumik tiguneqarpoq.
Matumuuna sakkortuumik Inuit Ataqatigiinniit erseqqissaatigissavarput,
anguniagaq taanna angutserlugu anguniartuassagatsigu.
Oqaluttarfimmiit kalaallit
oqaasiinik atuinissamik siunnersuuteqarneq isumaqanngilaq, Kalaallit Nunaanni
qallunaatut oqaloqqusinngitsugut imaluunniit qallunaatut oqaatsinilluunniit
allanik ilinniaqqusinngitsugut.
Siunertaavoq nunami maani
oqaatsit pingaarnersaasa ataqqineqarlutik atorneqartarnissaat. Soorlumi nunani
allani oqaaserisat pingaarnerpaat taama pineqartartut. Kinaassutitsinnut
tunngavoq kalaallisullu immitsinnut ataqqinissatsinnut tunngalluni.
Inuit Ataqatigiinniit
ilisimaarilluinnarparput oqaatsinik allanik, pingaartumillu tuluttut
ilinniarnissap qanoq pingaaruteqartiginera. Ilinniartariaqarparpummi nunarsuup
sinnerani uagut nammineq eqqarsartariaaserput tunngavigalugu
saaffiginnissuteqarsinnaanissarput.
Inatsisartut suleriaasissaannut
ataatsimiititaliaq isumaqatigilluinnarparput Namminersulivinniarneq pillugu
kommissionimut siuliani taaneqartup suliassamut ilanngunneqarnissaanik
oqaaseqarnera.
Taasisoqassatillugu partiit
assigisaallu oqimaaqatigiinnerisa piaarinaatsoornikkut allanngornissaannik
pitsaaliuinerup atortuulersinnissaanut tunngatillugu ataatsimiititaliap partiinut
Kattusseqatigiinnullu kaammattuutaa Inuit Ataqatigiinniit isumaqatigivarput.
Taamatut oqaaseqarluta
isumaliutissiissut tusaatissatut tigullugu akuersaarparput.
Anthon Frederiksen, Kattusseqatigiit oqaaseqartuat:
Inatsisartut suleriaasissaattut siunnersuutip
siullermeerlugu oqaluuserinerani Kattusseqatigiinniit oqaaseqaatigut
innersuussutigalugit inatsisartut suleriaasissaannut ataatsimiititaliap
isumaliutissiissutaa imaattumik oqaaseqarfigissuarput.
Uggornarpoq suliap
siullermeerneqarluni oqaluuserineqarnerani Kattusseqatigiinniit oqaaseqaatitta
ilaat, tassa inuit qinigaannik Naalakkersuisoqarnermut tunngasoq annerusumik
eqqartorneqaqqinngimmat.
Tassami taamatut
siunnersuuteqarnitsinnut innuttaasut, tassa qinersisartut ilaat, qinikkanik
Naalakkersuisoqarnissamik piumasaqaateqartarnerat ataqqillugu
aallaavigilluinnaratsigu. Imaanngitsoq Naalakkersuisunngortinneqartartut inuit
qinigarinngisaat tatiginnginnatsigit, kisianniliuna qinersisartut piumasaat
taamaallillugu saqqummiukkipput.
Kisianni tassa paasivarput
taamatut piumasaqarnerput akuersaarneqanngitsoq. Soorunami
amerlanerussuteqartut isumaat tamatumani aamma ataqqillugu tusaatissatut
tigujumavarput.
Kiisalu Inatsisartut
suleriaasissaannut ataatsimiititaliap isumaliutissiissutaani allannguutissatut
siunnersuutip aappaani § 8-mi, 8-mut tunngatillugu allannguutissatut
siunnersuummi oqaaseqatigiit ukua, issuaavunga: "Ataatsimiititaliat
ataavartut sinneri", issuaaneq naavoq. Oqaatsit taakkua, qanoq
paasineqartariaqarnersut nassuiaatissaqarfigineqarnissai kissaatigaarput.
Tassa Kattusseqatigiinni
Inatsisartut suleriaasissaannut ataatsimiititaliamiit paasitinneqarnerput
naapertorlugu, Inatsisartut upernaaq inissitsitserlutik ataatsimiinneranni
ataatsimiititalianut inissitsitsernermi aalajangersakkat qinigaaffik tamaat
atuutissasut uppernarsarneqarmat. Tamannalu Inatsisartut ukiuata
aallartinnerani gruppet - suleqatigiit iluminni allannguissagunik, imaluunniit
partiimiit partiimut allamut nuuttoqarneratigut periarfissanik
eqaallisaanermut, tamatumani allannguineq eqaallisaanerinnarmik taamaallaat
siunertarineqartoq paasisariaqarmat.
Naggataatigut ataatsimiititaliat
amerlassusiisa ikilisinneqarnissaanut tunngatillugu Kattusseqatigiinniit
isumaqarpugut ataatsimiititaliamut, tassa suleriaasissaq pillugu
ataatsimiititaliap tamanna sukumiisumik nalilersuiffigisariaqaraa. Aammalu
inuutissarsiutinut tapersiisarnermut ataatsimiititaliaq sumut
inissinneqassanersumut apeqqut, Kattusseqatigiinniit annertuumik
eqqarsarnartoqartipparput. Tassanilu isumaqarluta taamatut
allannguisoqassappat, tapersiisarnermut ataatsimiititaliap katitigaanera -
tassa inuttalersungaanera, ilanngullugu eqqarsaatigilluarneqartariaqartoq.
Naggaterpiaatigullu Inatsisartut
ukiumut pingasoriarlutik ataatsimiittarnissaat Kattusseqatigiinniit aamma
isumaqataaffigaarput, taamatut naatsumik oqaaseqarluta allanngutissatut
siunnersuutit ilanngussallu ilanngullugit akuersaarpagut.
Johan Lund Olsen, Inatsisartut Siulittaasuat,
akissuteqartoq:
Ja, qujanaq. Tassa pisariaqarsorinngilara
maani takisoorsualiornissannut, tassa paasisinnaavara partiit,
Kattusseqatigiillu tassa tunngaviatigut maannakkut Kalaallit Nunaanni
Inatsisartut suliariaasissaattut siunnersuut, tassa ukioq ilivitsungajak
sukumiilluinnartumik peqqissaarullugulu suliarineqalereersimasoq, maannakkullu
aamma isumaliutissiiffigineqartoq taanna, ataatsimuut isigalugu
akuersaarnartuutinneqarpoq.
Kisiannili tassa partiit
maannakkut tassa naggataarutaasumik suliarinninnermi ataasiakkaat maannakkut
aappassaaneerinninnissamut siunnersuutigineqartoq, pingaartumik taanna
Inatsisartut ukiuat, qaqugukkut aallartittassanersoq taanna pillugu
isumaqatiginngitsoqalaarpoq. Tassami Siumut tassani erseqqilluinnartumik
maannakkullu oqaatigivaa: Inatsisartut ukiuat aallartittassasoq, ukiuakkut
septemberimi tallimanngornerit pingajuanni, kisiannili tassa Inatsisartut
suleriaasissaat pillugu ataatsimiititaliami isumaliutissiissummi uani
Atassutip, Inuit Ataqatigiit, Kattusseqatigiillu katersuuffigisaanni
oqaatigineqarluni, Inatsisartut ukiuat aallartittassasoq septemberimi
tallimanngornerit aappaanniit. Tassa taanna amerlanerussuteqartut tassa
kissaatigimmassuk taanna najoqqutarisariaqassavarput.
Taava aamma ukua Siumup
tungaanninngaanniit ilaatigut aamma tikkuarneqartut, oqaaseqarfigilaassavakka,
tassa pingasunngornikkut apeqquteqaateqartarnermi maannakkumut periuseq allatut
aaqqiivigineqarsinnaanersoq kissatiginartinneqarpoq, aamma
misissoqqinneqassasoq Siulittaasoqarfimminngaanniit taanna neriorsuutigiumavara
Siulittaasoqarfimmi eqqartortariaqaratsigu.
Tassunga tunngatillugu
ilisimatsitsissutigerusussavara Inatsisartut suleriaasissaat 1996-imi maani
Inatsisartuni kommissionilioreerluta annertuumik oqallisigineranut atatillugu
taamani isumalioqatigiissitamut ilaasortat, ilaatigut Islandimi Altingimut
paasisassarsiorlutik aamma angalasimammata, taamanilu aamma Islandip Altingiani
oqalliseriaaseq assorujussuaq aamma soqutigilersimagatsigu. Tassani aamma
torrutiinnavillugu Naalakkersuisunik apersuisarsinnaanerit ammaanneqarsimammata.
Taamaalillutillu aamma
Naalakkersuisut torrutiinnavillugu aamma akissuteqartarsinnaanissaat aamma
aqqutissiuunneqarsimalluni, taamaalilluni oqallinnerit ilaatigut tassa,
pappiaralersorujussuaqqaanngikkaluarluni uummaarinnerit pilersinneqarsinnaasarput.
Taamaammat taanna pingasunngornikkut apeqquteqaateqartarnermut maannakkumut
periuserineqartoq, tassa allan-ngortinneqarsinnaanera taanna
isumaliuutigeqqissallugu isumaqarpunga pissutissaqarluartoq, taannalu aammma
siulittaasoqarfimmi sukumiisumik eqqartortariaqassavarput.
Taava aamma Siumuminngaanniit
kissaatigineqarpoq, ataatsimiititaliani inatsisit malillugit pilersinneqartuni,
ilaasortat ajunngitsorsiassaqarnissaat periarfissaqarnersoq taanna aamma
misissorneqassasoq, imaluunniit misissoqquneqarpoq. Taanna tassa aamma
misissorneqartussaassaaq. Imaluunniit oqaatigivarput uani
isumaliutissiissutitsinni, una Inatsisartut Naalakkersuisullu
aningaasarsiaqartitaasarnerat pillugu inatsit, nutarteriffigineqartussaasoq,
tassa vederlagslov taanna Inatsisartut aallattoqarfianni aammalu
Naalakkersuisut inatsisileriffiannit, tassa lovkontor-iannit
Naalakkersuisunillu suleqateqarluta, tassa naammassiniartussaassavarput.
Neriuutigivarpullu tassa tullissaani Inatsisartut ataatsimiinnissaannut aamma
Naalakkersuisut peqatigigalugit aamma saqqummiussaqarsinnaajumaarluta.
Taanna vederlagslove
pinngitsooranimi allanngortariaqarpoq, tassami oqaatigineqareersutuut
siusinnerusukkut qinnersisarneq pillugu inatsit allanngormat, nunarput
ataatsimut qinersivinngornikuuvoq, taamaammat tassa taanna
pinngitsuunngiivilluni allanngortinneqartussaavoq. Taamaammallu uani aamma
Siumuminngaanniit misissungassaqqissutut tikkuarneqartut aamma periarfissaq
tamanna iluatsillugu aamma ilanngunneqarsinnaassapput.
Taava Atassut eqqarsaatigalugu,
qutsavigerusussavara partiit Atassut uani annertunerusumik
oqaaseqanngikkaluarlutik isumaliutissiissut tamakkiisumik uani
tapersersormassuk, aammalu maannakkut Inatsisartut nutaammik suleriaasissaattut
siunersuut taama kusanartigisumik aamma ilassilluarmassuk.
Kattusseqatigiit
eqqarsaatigalugit allannguutissatut siunersuummi § 8, eqqarsaatigalugu
paaserusuppaat taakkua oqaaseqatigiit ukua issuarneqartut, tassa
issuaqqissavakka: "Ataatsimiititaliat ataavartut sinneri", qanoq
paasineqassanersut. Tassa tassunga tunngatillugu immaqa
imaattussaasimanerugaluarpoq kalaallisuuani, ataatsimiititaliat ataavartut
allat, imaannani sinneri. Tassa qallunnatuuani takugaanni tassa oqaaseq
atorneqarmat: øvrig - tassa imaappoq kalaallisuunngortissagaanni tassa allat.
Taamaammat taanna aamma naqqiivigisariaqassaaq, naqqittariaqassavarput,
iluarsitittariaqartussaassavarput.
Kisianni tassa § 8-mut
tunngatillugu una aamma siunertaavoq, Inatsisartut ukiakkut
ataatsimiileraangatta nalunngilarput aammalu ilaanni upernaakkut ataatsimiikkaangatta,
siumortarparput gruppit nammineq iluminni aamma ataatsimiititaliani
assigiinngitsuni ilaasortaatitaminnik nikisitserusuttarlutik. Tassa tassani
tamakkorpiaat eqqarsaatigalugit taamatut maannakkut allannguutissamik
siunersuuteqarpugut, ataatsimiititaliap tungaaninngaanniit.
Tassa eqqaanerusumik
periarfissaqalernissarput taanna eqqarsaatigalugu, aammalu oqaatigigatsigu,
tassa Inatsisartut siulittaasoqarfiat ukiakkut aamma tamatigut
qinerneqartalernikuuvoq. Taamaammat tassunga aamma naapertuuppoq taamatut
periuseqalersimanitsinnut.
Taava Kattusseqatigiinniit
aggorineqarpoq, tassa siullermeerneqarnerani Kattusseqatigiit
tungaanninngaanniit oqaatigineqartoq tassa, inuit qinigaannik
Naalakkersuisoqartarnermut tunngasoq. Tassa taanna annerusumik eqqartorneqarsimanngimmat,
tassunga tunngatillugu oqaatigiinnarusussavara tassa Inatsisartut
Naalakkersuisullu pillugit tamanna periarfissaq inatsimmiimmat, taamaammallu
aamma taanna allanngortinniaraanni taava inatsit allanngortinniassallugu
siunnersuuteqartoqartariaqassaaq. Taannalu periarfissaq tassa Kattusseqatigiit
soorunami atukuttoorsinnaavaat.
Inuit Ataqatigiit saqqummiussaat
aamma una suleriaasissatsitut siunnersuut kusanartumik aamma
ilassissulluarpaat, aammalu tamakkiisumik tassa aamma tapersersorumallugu.
Kisianni tassa aamma tassani uggorineqarpoq, Inuit Ataqatigiinninngaanniillu
aamma ajuusaarutigineqarpoq kalaallisut oqaatsivut maani
oqaluttarfimminngaanniit kisimik atorneqarsinnaanngimmata.
Kisianni tassa taanna
inatsisartut suleriaasissaannut tunngatillugu ataatsimiititaliami tassa
oqaatigineqareersutuut sukumiilluinnartumik oqallisigineqarsimavoq.
Misissoqqissaarsimavarput aammalu tassani aamma innersuussutigisimavarput
inatsisartut 1995-imiilli tamanna attattualersimammassuk, aammalu qinerseqqereernerup
kingorna, tassa ukioq manna ilisimaneqartutuut 22. februar qinersereernerup
kingorna inatsisartullu nutaamik inissititereermata aamma taanna periuseq
ingerlaannarsimammat.
Taamaammat maannakkut
pingaartumik Namminersornerulernerput pillugu inatsisit taamatut aamma
aalajangersagaqartillugu allanngortitsiniarnissaq ajornakusuussammat.
Taamaamanuna aamma innersuussutigigipput imaluunniit inassutigigipput tassa
Namminersorneq pillugu isumalioqatigiissitamut pilersinneqartussamut taanna
apeqqut aamma ilanngullugu sukumiilluinnartumik aamma
nalilersuiffigineqartariaqartoq.
Taannami Namminersorneq pillugu
isumalioqatigiissitap suliassaa pingaarutilerujussuuvoq,
Namminersornerulernerput pillugu inatsimmik annertuumik
allannguisoqarsinnaanersoq aamma suliaqartussaassalluni.
Tassa nunanut allanut
sillimaniarnermullu apeqqutinut tunngasunuinnaanngitsoq, kisianni aamma uagut
maannakkut inatsisartut suleriaasissaannut ataatsimiititaliaminngaannit tassa
kaammattuutigivarput, oqaatsit pillugit aalajangersagaq pingaartumik tassa
Namminersornerulerneq pillugu inatsimmi § 9 imm. 1-imiittoq taanna aamma
ilanngullugu nalilersuiffigineqartariaqartoq.
Neriuuutigivarpullu tamanna aamma
tassani isumalioqatigiissitaliassarsuarmi aamma ilanngullugu misissorluarneqarumaartoq.
Tassalu taamatut oqaaseqarallarlunga qutsavigissavakka inatsisartuni partiit
aammalu Kattusseqatigiit inatsisartut suleriaasissaat una nutaaq, tassa
decemberip aallaqqaataanninngaanniit aamma atortussanngortinneqarnissaa uani
akuersissutigineqartoq, taanna taamatut ilassineqarmat, kusanartumik. Qujanaq.
Otto Steenholdt, Atassutip oqaaseqartuata avataatigut
oqaaseqartoq:
Maanngaanniit
oqaatigitsiagassakka immaqa imaassimasinnaavoq avataaniit tusarnaartut
eqqarsaatiginerullugit taamaaliortoqartartoq. Kisianni isumaqarluinnarama
ataatsimmiinnerup tallissutigilluinnartagai uparuartariaqartut,
ataatsimiititaliamullu assut innersuukkusunnartut ukua
eqqaasitsissutigilaarniarlugit. Suulluunniit saqqummiussat soorunami
akissuteqaataat atuarujussuarneqartarput Naalakkersuisunut
ilaasortaminngaanniit, maanngaanniit.
Naak agguaanneqareersimagaluartut
partiinut tamanut partiillu oqaasissiortartut, taakkorpiaat agguaateriikkat
aallaavigalugit. Soorlu ataatsimiititaliat akissuteqaataat
atuarujussuarneqartarput, eqqaamassavarpullu aamma aningaasat pillugit
inatsisissaq saqqummiunneqarnialeraangat nallinnaannavissumik Naalakkersuisut
maanngaanniit sivisoorujussuarmik atuffassisarmat. Massa aamma taakkorpiaat
agguaanneqarsimallutik partiinut tamanut paasinartumik oqaasissiorfigineqareersimagaluartut.
Assut uanga
kissaatigissagaluarakku taamatut soorlu finanslove eqqarsaatigalugu.
Quppersagaq tassani allassimasut kikkut partiit qanoq taasissamaarneri, kikkut
partiit naaggaassamaarneri, kikkullu partiit taasinngitsoorniarneri
erseqqissumik allassimasut atorlugit qupperaannarlugit sukkanerujussuarmik
periaaseq folketingimi atorneqartartoq misissorneqallaqqullugu. Tassa
aningaasanut inatsisissat pineqaleraangata soorunami pitsaasumik sulinissaq
taanna uparuarusunngilara, tusarnaartulliuku immaqa pillugit
taamaattarsimannguatsiartoq.
Aamma uparuanngitsoorusunngilara
uanga Naalakkersuisut oqalugiarujorujussuartarnersuat maani inatsisartut suna
pillugu oqallinnerat aallartikkaangat. Qulequtaq tassaasariaqassaaq Naalakkersuisup
pisussaasup kisimi, taama oqarta, akiuinissaa kisianni Naalakkersuisut ilaat
sunnguamilluunniit taaneqallatsiarlutillu tamaavissuarmik oqalugialeraangamik
nalunagulu aamma killilersorneqanngitsut uatsitullu maani inatsisartut
qinikkat, inatsisiliortut taakkua taamannarujussuaq killilersuiffigeriarlugit
oqallinnerit ilungersunarsisarput, ukua killilersuiffigineqanngitsut
taamannarujussuaq oqalugialeraangata.
Isumaqarlunga taanna
killilersimaarneqartariaqartoq, qulequtaq suna pineqarpoq, Naalakkersuisoruna
kina tassani oqaluttussaq, makku sinneri periarfissarsigunik namminerlu
pineqalerunik tassani akiuulluarniarumaarmata. Aamma taakku saqqummiussaminnik
atuarujorujussuartarnerat nalilersoqqittariaqarpoq, saqqummiussaat tamaavimmik
allareerlutik inatsisartunut gruppenullu agguaanneqareertarmata. Taama
naatsunnguamik oqaaseqatsiarpunga.
Johan Lund Olsen, Inatsisartut Siulittaasuat:
Ja qujanaq, tassa inatsisartuni
ilaasortaq Otto Steenholdt uani saqqummiussai eqqarsaatigalu-
git, tassa ilisimatitsissutigissavara
uani inatsisartut nutaamik suleriaasissaattut siunnersuutitsinnitassa taanna
atuffassisarnerujorujussuaq tassa annikillileriffiginiarparput.
Tassami ilumoorluinnaravit
pappilissat maani oqaluttarfimminngaanniit atuffassissutigineqartartut taakkua
ullut marluk imaluunniit pingasut sioqqullugit inatsisartuni ilaasortanut
tamanut agguaanneqareersimasarput, aammalu inatsisartut ataatsimiinnerini
malinnaasunut maani tamani aamma agguaanneqareersimasarlutik. Tassa
tusagassiorfinnut, Naalakkersuisoqarfinnut allarpassuuarnullu aamma
malinnaasunut. Taamaammat taakkua atuareersimaneqartarmata aammalu
inatsisartuni ilaasortat aammalumi soorunami Naalakkersuisut
piareersarsimmaffigereertassammatigik pisariaqassanngilaq taakkua uteqqillugit
aamma atuffassissutigisarnissaat.
Tassa taamaammat uani taakkua
annikillilerniarlugit, eqqaamaqqissaanngilara §-imi sorlermiinnersoq, kisianni
uani siunnersuummiipput. Tassa taamaammat taakkua aamma
nutarteriffigineqalerput.
Taava aamma una aappaatut oqaaseqarfigisat,
tassa oqaaseqarnermi piffissaliussat tassani aamma siunnersuuteqarpugut, tassa
ilanngussaq aamma ukununnga siunnersuutitsinnut ilanngunnikuuarput, tassa
bilagitut. Tassani malugeqqussavara ilaatigut Otto-p taanna tikkuagaa, tassa
Naalakkersuisut tulleriiaarlutik nappaasaqattaarlutik oqaaseqartarnerat,
pingaartumik immaqa aningaasanut inatsisit suliarigaangatsigit, ukiakkut
ammaalluni oqallinnerit maani pigaangamik.
Taakkua allatut siunissami aamma
periuseqarfigineqalernissaat aamma uani siunnersuuteqarfigigatsigu.Tassa
Inatsisartut Naalakkersuisullu naligiikanninnerusumik assigiikannernerusumik
oqaluttarfimminngaanniit oqaaseqarsinnaanissaat taanna anguniarlugu.
Finn Karlsen, Atassut, ataatsimiinermik aqutsisoq:
Tassalu allamik oqaaseqartoqartoqarnianngilaq,
ullumikkullu oqaluuserisassaq imm. 41, Kalaallit Nunaanni Inatsisartut
suleriaassissaattut siunnersuut nanginnerata oqaluuserineqarnera tamaanga
naammassivoq. Tassalu siulittaasup neriorsuineratuut Inatsisartut
siulittaasoqarfiata naammassillugu suliassarilerparput.
Oqaluuserisaq naammassivoq.