Oqaluuserisassani immikkoortoq 42-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 25. oktoberi
1999 nal.10.05
Ataatsimiinnermik
aqutsisoq:
Johan Lund Olsen, Inatsisartut Siulittaasuat.
Lars Karl Jensen, Kukkunersiunermut
Ataatsimiititaliap siulittaasua:
Siullermik Siulittaasumut qinnutigissavara
ukua quppernerit 20-ummata naalisarlugit saqqummiussinissara. Qujanaq.
Landskarsip 1998-imut
naatsorsuutaannut Inatsisartut landskarsip naatsorsuutaasa
kukkunersiorneqartarnerannut ataatsimiititaliamiit isumaliutissiissut.
Inatsisartut landskarsip
naatsorsuutaasa kukkunersiorneqartarneranut ataatsimiititaliaat landskarsip
naatsorsuutaasa kukkunersiorneqarneranni ukunannga inuttaqarpoq:
Lars Karl Jensen, Siumut,
siulittaasoq. Lars Sørensen , IA, siulittaasup tullia.Vittus Mikaelsen, Siumut.
Daniel Skifte, Atassut taamatullu aamma Inatsisartuni ilaasortaq Anders Nilsson
taassuma nassuiaatitaa kingusinnerusukkut tikissavara. Kiisalu Mogens Kleist
Kattusseqatigiinninngaaneersoq.
Inatsisartut
naatsorsuutaasa kukkunersiorneqartarnerannik ataatsimiititaliaat marsip 11-ani
1999 inissitsiterfiusumi ataatsimiinnermi saniatigut, ullut 11-t
ataatsimiiffigai, uani saqqummiunneqartumi takuneqarsinnaallutik ullut suut
ataatsimiiffiusimanersut.
Isumaliutissiissitip
imarai, siulleq aalllaqqaasiut. Aappaa landskarsip naatsorsuutaasa
kukkunersiorneqartarneranut ataatsimiititaliap tamanut tunngasumik
oqaaseqaatai. Pingajoralugu landskarsip natsorsuutaasa
kukkunersiorneqartarneranut ataatsimiititaliap oqaaseqaatai allat. Sisamaralugu
naggasiut, kiisalu aamma malugeqqussavara immikkoortut tallimaattut ilanngutat
1-miik 4-mut taakkua immikkut papialanngorlugit ilanngunneqarsimasut
innersuusutigiinnassavakka.
Siulliullugu aallaqqaasiut.
Naalakkersuisut ulloq aprilip 19-ani 1999 landskarsip 1998-imut naatsorsuutai
Inatsisartut allattoqarfianni tunniuppaat. Ulloq taannattaaq landskarsip
1998-imut naatsorsuutai landskarsip naatsorsuutaasa kukkunersiorneqartarnerani
ataatsimiititaliamut nassiunneqarput.
Kalaallit Nunaani
mittarfiit naatsorsuutaat, kiisalu Great Greenlandip naatsorsuutaasa
qallunaatuui, landskarsillu 1998-imut naatsorsuutaanut ilanngutap 1-p
kalaallisuua tamatuma malitsigisaanik kukkunersiuinermut ataatsimiititaliamut
nassiunneqarput.
KNR-ip 1998-imut
naatsorsuutai qallunaatuui ulloq maj 20-ani 1999 Inatsisartut allattoqarfiannut
nassiunneqarput. Kukkunersiuinermut ataatsimiititaliamiit kalaallisuut
naqitartaat iluatsitsiviunngitsumik nassiuteqquneqarsimagaluarput.
Kukkunersiuinermut
ataatsimiititalip oqaatigissavaa, atortussat ataatsimiititaliamut tunniunneqartussat
kalaallisut qallunaatullu oqaasertalerlugit tunniunneqartassasut, tamanna
tamakkiisumik pisimanngilaq, tamannalu kukkunersiuinermut ataatsimiititaliap
isornartutut isigaa. Tamakkua siunissami aaqqinniartariaqarput.
Landskarsip naatsorsuutaasa
kukkunersiorneqartarnerannut ataatsimiititaliami ilaasortat siulittaasoq Lars
Karl Jensen, siulittaasup tullia Lars Jørgensen, Vittus Mikaelsenip Daniel
Skifte aamma Mogens Kleistip landskarsip naatsorsuutai taakkununngalu
ilanngullugit Namminersornerusut sulliviutaasa naatsorsuutaat, Naalakkersuisut
nassuiaataat, namminerisamik kukkunersiuisorisat aamma kukkunersiuisut
avataaneersut 1998-imut naatsorsuutinik kukkunersiuinermut oqaaseqaataat
sukumiisumik misissuataarpaat.
Inatsisartuni ilaasortaq
Anders Nilsson siulittaasoqarfiup akuersineratigut Daniel Skiftemut
sinniisussatut piffisami septemberip 20-aniit oktoberip 18-at 1999 tikillugu
sinniisussatut inissisimavoq, Atassullu sinnerlugu isumaliutissiissummik
matumannga atsiueqataalluni.
Kukkunersiuinermut
ataatsimiititaliap ataatsimiitarnerisa isumasioqatigiittarneratalu saniatigut
ataatsimiititaliaq paasissutissanik amerlanerusunik piniarluni
Naalakkersuisunut allagaqarpoq. Kukkunersiuinermut ataatsimiititaliamiittaaq,
kukkunersiuisut avataaneersut qinnuigineqarput, pissutsit immikkut toqqartukkat
erseqqinnerusumik misissuiffigeqqullugit.
Kukkunersiuinermut
ataatsimiititaliap Naalakkersuisunut amerlanerusunik paasissutissanik piniagai
ilanngutaq A-mik nalunaaqutsikkat takuneqarsinnaapput. Naalakkersuisut
akissutaat tamakkinngikkaluarlugit isumaliutissiissutikkut matumuuna
oqaaseqarfigineqarput.
Immikkoortut aappaat.
Landskarsip naatsorsuutaasa kukkunersiorneqartarneranut ataatsimiititaliap
tamanut tunngasumik oqaaseqaatai:
Qarasaasiat ukioq 2000-mut
atasumik aaqqissuunneqarnissaat, kukkunersiuinermut ataatsimiititaliap
tupinnanngitsumik Naalakkersuisut nunatsinni qarasaasiat ukioq 2000-imut
atasumik aaqqissuunnissaannik iliuuseqarneri malittereqqissaarpai.
Namminerisamik
kukkunersiuisut kukkunersiuisullu avaataaneersut atortussanik tunniutaat
misissoreerlugit, kukkunersiuinermut ataatsimiititaliap maluginiarpaa
1999-imi upernaaq tikillugu Naalakkersuisoq ukioq 2000-imut atasumik
aaqqissuusiniarnermik suliaqarnerat pillugu, ersarissumik akisussaaneq
suliassallu agguataarineqarsimanngitsut. Tamanna naammaginanngilaq, ukiumummi
2000-imut atasumik qarasaasiatigut aaqqissuussinissamut sillimanissap
pisariaqartimmagu, inuiaqatigiinnut immikkut pingaarutilinni najoqqutassanik
erseqqilluinnartunik peqartariaqarneq, taakku tassaasinnaapput
Peqqinnissaqarfimmut, Nukissiuuteqarnermut, nioqqutissanillu pilersuinermut
tunngasut.
Qarasaasiat ukioq 2000-imut
atasumik aaqqissuunneqarnissaasa aaqqiivigineqarnissaat pillugu
kukkunersiuinermut ataatsimiititaliap, Naalakkersuisunut takussutissamik
tusaatissatut tiguneqartumik tassani takuneqarsinnaavoq, ilanngutaq 2-mi
pissarsiaqarpoq.
Naatsorsuuserinermut
ilitsersuusiat. Kukkunersiuinermut ataatsimiititaliap kissaatiginikuuaa
naatsorsuuserinermut ilitsisuusiarereernikunik Naalakkersuisut nassitsissasut.
Naatsorsuuserinermi ilitsisuusiat kukkunersiuinermut ataatsimiititaliamut
nassiunneqartoq ilanngussaq 3-mi atuarneqarsinnaapput.
Ataatsimiititaliap
erseqqissumik paaserusussimavaa Namminersornerullutik Oqartussap naat-sorsuuseriveqarnerat
il. il. pillugit, Inatsisartut inatsisaat nr. 23, 3. november 1994-imeersoq,
Naamminersornerulluni Oqartussat naatsorsuiveeraqarnerat pillugu,
Namminersornerullutik Oqartussat nalunaarutaat nr. 8, 27. februar
1995-imeersoq, kiisalu Namminersornerulluni Oqartussat naatsorsuuseriviat
pillugu kaajallaasitaq 1.oktober 1995 atulersoq naapertorlugit
naatsorsuuserinermut ilitsisuusiortoqarsimanersoq.
Naatsorsuuserinermut
ilitsisuusiatut pissarsiarineqartut pillugit, tamanut atortumik kukkunersiuinermut
ataatsimiititaliap inassutigissavaa taakkua ingerlaavartumik
nutarterneqartassasut, taamaaliornikkut pissusiviusumik sukkulluunniit
takutitsisuusinnaaqqullugit.
Taakkulu
naatsorsuusiorfiusartut immikkoortuni ataatsiakkaani aaqqissuussaaneq, suliassat
oqartussaaffiit akisussaaffiillu pillugit naleqqussarneqassasut.
Kukkunersiuinermut
ataatsimiititaliap inassutigissavaa 1999-p naannginnerani, Namminersornerulluni
naatsorsuuserinermik ingerlataqarfiit tamaasa pillugit naatsorsuuserinermik
ilitsisuusiortoqassasoq.
Kukkunersiuinermut
ataatsimiititaliaq kukkunersiueriaatsinut ilitsersuusianut atasunik
isumaginninnermut suliffeqarnermullu pisortaqarfik isornartorsiorumavaa,
aallaavissatut ilitsisuusianik suli naammassinnissimanngimmat. Taamatuttaaq Isumaginninnermut
Suliffeqarnermullu pisortaqarfik, nammineq ingerlatsivigisaminut taassumalu
ataani sullissivinnut, naatsorsuuserinermut ilitsersuusianik suli
suliaqarsimanngilaq. Massa ukiut arlerlugit kukkunersiuinermut atasumik
isornartorsiorneqartarsimagaluartoq.
Maleruagassallu
atuutilerneranik ukiut arlallit qaangiutereeraluartut tamakkununnga tunngasut
1999 naatinnagu aaqqinneqarsimasariaqarput. Inatsisartut landskarsip
naatsorsuutaasa kukkunersiorneqartarneranut ataatsimiititaliiata
naatsorsuuserinermut ilitsersuusiaasartut amigaatigineqartut
akuersissutigineqareersimasullu pissarsiarisimasariaqarlugit.
Kukkunersiuinermut
ataatsimiititaliap pingaartuusoq erseqqissarumavai, immikkoortunut
ataasiakkaanut namminneerlutik naatsorsuuserisartuusunut tunngatillugu,
Namminersornerusut pigisaasa nalillit, Namminersornerusut
naatsorsuuserisarnerat pillugu kaajallaasitakkut taaneqartutut pissusissaasutut
nalunaarsorneqartariaqarmata.
Ineqarnermut tunngasut. Landskarsip
naatsorsuutaasa kukkunersiorneqartarnerannut ataatsimiititaliap kukkunersiuisut
avataaneersut oqaaseqaataat tusaatissatut tiguaa, imatullu
oqaaseqarfigiumaallugit:
Landskarsip naatsorsuutaasa
kukkunersiorneqartarneranut ataatsimiititaliap inassutigaa Naalakkersuisut
suliniuteqassasut, inissiaqarfinni immikkoortortat naatsorsuutaasa
kukkunersiorneqartalernissaat pillugu.
Kukkunersiuinermut
ataatsimiititaliaq boligstøttemut akiligassatigut kinguartoorutinut tunngasut
ingerlanerat pillugu Naalakkersuisunut paasissutissanik pissarsivoq. Taakkulu
qanoq iliorluni millisinniarneqarsinnaanerat ataatsimoortumik iliuusissatut
pilersaarusiami peqartoqarnersoq apeqqutigalugu.
Taakkununnga ilanngullugu,
kukkunersiuinermut ataatsimiititaliap boligstøttemut inissianillu
najugaqarnermut akiligassanik kinguartoorutit 1986-imiit 1999-imut ingerlanerat
pillugu, INI A/S-p paasissutissiissutaanik Naalakkersuisunit pissarsivoq.
Kukkunersiuinermi ataatsimiititaliap oqaatigissavaa, kukkunersiuinermut
ataatsimiititaliap ineqarnermut immikkoortuni ukiorpassuarni akiligassatigut
kinguaattoorutit annertoorujussuarmik qaffariartornerat ataatsimut isigalugu,
ernumanertorujussuartut isigaa. Kissaatigalugulu taamatut ineriartortuarnera
Naalakkersuisuniit mumittuanut saatinneqassasoq.
Taakkununnga tunngatillugu
Naalakkersuisut piviusumik aallaavilimmik iliuusaat pillugit kukkunersiuinermut
ataatsimiititaliamiittaaq oqaatigineqassaaq, boligstøttemi akiligassatigut
kinguaattoorutit taarsigassarsianut nuunneqarsinnaanerannik Naalakkersuisut
innuttanut paasissutissiinerat 1998-imi ukiakkut ataatsimiinnermut atasumik
ajornarunnaarsinneqartoq, kingusinaarujussuarluni aallartinneqarsimasoq.
Paasissutissiineq 1999-i
aallartilaaginnartorli avammut saqqummiunneqarsimasariaqaraluarpoq. Siunissami
akiligassanik kinguaattoorutit ingerlanerat pillugu paasissutissat
kukkunersiuinermut ataatsimiititaliami pissarsiarineqartalernissaat
kissaatigineqarpoq. Taamaaliornikkut takuneqarsinnaalissammat iliuuserisat
iliiuusissatullu pilersaarutit aqqutigalugit akiligassanut kinguaat-toorutit
milliartulersimaneri, milliartulersimanersut.
Siunnersuisoqarfinnut
avataaneersunit sullississutsinik atuineq.
Namminersornerullutik Oqartussat 1998-imi 79 mio. kr.-nit missaat
siunnersortinut avataaneersunut atorpaat. Naalakkersuisut kukkunersiuinermut
ataatsimiititaliamut nalunaarusiorput, siunnersortit qanoq suliallit,
taamaalillunilu qanoq ittumik kiffartuusissutillit atorneqarnersut.
Kukkunersiuinermi
ataatsimiititaliap oqaatigissavaa, siunnersortit kiffartuussissutsinik aalaja-
ngersimasunik
suliaqartartutut atorneqartarnerat, silatussaarnerullunilu
tunngavissaqarluartuusortaaq. Suliassat taamaattut suliamut tunngasumik
suliaqartunik inuttaqarnikkullu sulisorisanik aalajangersimasunik atorfilinnit
suliarineqarsinnaatinnagit.
Kukkunersiuinermulli
ataatsimiititaliap piumasaqaatigissavaa, siunnersortinik avataaneersunik
atuinermi Naalakkersuisut maleruagassanik ersarissunik
atugassanngortitsisariaqartut. Maleruagassat landskarsip naatsorsuutaasa
kukkunersiorneqartarneranut ataatsimiititaliap akissarsiaqarnermik
isumaqatigiissutit nalinginnaasumik isumaqatiginninniarnikkut anguneqarsimasut,
siunnersortinik atuinermi sanioqqutaarneqaratillu qarsupinneqannginnissaanik
qulaqqeerusitsisuusut. Siunnersortinik isumaqatigiissutit minnerpaamik
piffissamut killilikkamut atuuttuusariaqarput, suliassallu suunerannik
erseqqilluinnartumik tunngavilersorluakkanillu imaqartariaqarlutik.
Kukkunersiuinermut
ataatsimiititaliap inassutigissavaa, siunnersortinik avataaneersunik atuinissamik
isumaqatigiissutit tamarmik aqutsinermut pisortaqarfimmut
nalunaarutigineqarlutillu taassumannga akuersissutigineqartassasut.
Siunnersortinik avataaneersunik atuineq kukkunersiuisarneq eqqarsaatigalugu
tamakkiisumik nassuiarneqarsinnaasuusariqarpoq.
Oqartussaaffinnut
ataatsiakkaanut tunngasunik oqaaseqaatit. 1998-imut kukkunersiuisut
oqaaseqaataat kukkunersiuisunit avataaneersunit suliarineqartoq tunngavigalugu
namminerisamik kukkunersuisunik akissutitut nassuiaatigineqartutut tappullugit
kukkunersiuinermut ataatsimiititaliap imaattumik oqaaseqaateqarniarpoq. Uani
eqqaaginnassavara taakkua ilaannai saqqummiutissagakkit.
Allaffeqarfik.
Kukkunersiuinermi ataatsimiititaliaq kreditkortip atorneqarneranut atatillugu
oqaaseqarumavoq, taakkunannga tunngasunik maleruagassat malinneqartariaqartut,
tassungalu ilanngullugu taakku angalanerup qaangiunneraniit kingusinnerpaamik
ullut 14-nit qaangiunneranni iluarsiivigineqarnissaat
naammassiseerneqarsimasussaasoq.
Aningaasaqarnermut
pisortaqarfik. Kukkunersiuinermi ataatsimiititaliap naatsorsuuserinermut
ilitsersuummut tunngatillugu tassunga aallarniutitut isummiussani
innersuussutigaa. Naatsorsuuserineqarmut ilitsersuusiat
naammassineqartariaqarput, ullorlu 16. februar 1999 qinersinermut atasumik
aaqqissuussaanikkut oqartussaanikkullu allanngortiterinermut pisunut
naapertuuttuusariaqarlutik.
Illuutinik assigiiaartunik
nalunaarsuisarnermut kukkunersiuinermut ataatsimiititaliamiit tamakkiisumik
tapersersorneqartumut, tunngatillugu kukkunersiuinermut ataatimiititaliap
pisariaqartutut isigaa, nalunaarsueriaatsimik Namminersornerusut
illuutigisaannik aalaakkaasuunngitsunillu pigisaannut tamakkiisumik
takussutissiisuusinnaasumik pilersitsisoqarnissaa.
Tamakkua
aaqqiivigineqarnissaanik suliap ingerlateqqinneratigut illuutit illukullu
toqqavii, assersuutigalugu nunaqarfikuniittut illut inoqanngitsut assigisaallu
ilaatinneqarnissaat naatsorsuutigineqartariaqarportaaq.
Kukkunersiuinermut
ataatsimiititaliap iluarisimaarlugu malugaa, Namminersornerulluni Oqartussat
aningaasaqarnermi qarasaasiatigut atortoqarfiata - jussip nakkutilliinikkut
isumannaallisaanikkullu pisariaqarneratut iluarsiivigineqarnissaanik
piumasasarisaq naammassinneqarsimasoq.
Akileraartarnermut
pisortaqarfik. Kukkunersiuinermut ataatsimiititaliap naammagisimaarnan-ngilluinnartutut
eqqarsarnartoqartutullu isigaa, akileraartarnermut pisortaqarfiup
akilersuisitsiniarnermut ingerlatsiviani pissutit arlallit, pissaasumik
ingerlanngimmata, sulinerlu amigarmat.
Namminersornerusut
aningaasaqarnikkut aqutsinerata patajaallisaavigineqarneranut ilaasutut
inassutigineqassaaq, pissutsit tamakkua iluarsineqarnissaat.
Inuussutissarsiutitigut
ilinniagaqarnermut sulisitsisut akiliutaata AIP-mik naalisartakkatta
aqutsivigineqarnerat, tassungalu ilanngullugu akilersuinerup malittarineqarfigineqarnera
iliuusissatut pilersaarut suleriaatsillu erseqqareqqissaartut malillugit
pisariaqarpoq, jussillu atugaaleriartornera 1999-si naatinnagu
naammasineqarsimasariaqarluni.
Isumaginninnermut
pisortallu suliassaataannut pisortaqarfik. Kukkunersiuinermut
ataatsimiititaliap naatsorsuusereriaatsimut ilitsersuusiat amigaatigineqartut
pillugit isumaliutissiissummini matumani, isornartusiuinini innersuussutigaa.
Kukkunersiuinermut
ataatsimiititaliap kukkunersiuisut avataaneersut oqaaseqaataat
erseqqis-saavigiumavaa. Taakkumi malillugit periuseqartoqartariaqarmat,
kommunenit ataasiakkaaniit kommunenit pisortaqarfik sinnerlugu aningaasanik
ingerlatsiffigisaannik kukkunersiuisut oqaaseqaataasa aaqqissugaasumik
malittariffigeqqinneqartarnerat qulakkeerneqartussaatitaaluni.
Periusissat tamakkua
paasitinneqarneq tunngavigalugu pilersinneqareersimapput, tamannalu
kukkunersiuinermut ataatsimiititaliap tusaatissatut tiguaa.
Kukkunersiuinermut
ataatsimiititaliaq kontomut pingaarnermut 30.13.10-mut innnarluutilinnik
Danmarkimi isumaginninnermut tunngatillugu qinnutigisimavai, kontomi tassani
aningaasaliissuteqarsimasut, pillugit erseqqinnerusumik
nassuiaateqarfigineqarnissaminut.
Kukkunersiuisut
avataaneersut nassiuaataat isumalitissiissummut uunga ilanngunneqarpoq, uani
innersuussutigissavara ilanngutaq 4. Kukkunersiuinermut ataatsimiititaliap
isornartorsiutaa, isumaliuutissiissutip immikkoortuani pingaarnermi 3-mi
eqikkarneqarpoq.
Alisarnermut Piniarnermut
Nunalerinermullu Pisortaqarfik. Inuussutissarsiutinut
taarsigassarsiniartarfimmit taasigassarsianut, tassalu ESU-mut tunngatillugu
pingaartorujussuuvoq akiligassanik kinguartoorutit akilersinniarneqarnerannut
malittarinneriaatsinik pisariitsunik pitsaasunillu pilersitsinissaq.
Piffissarmi ungasinnerusoq eqqarsaatigalugu allaffissornikkut
oqimaattorujussuussammat, aaqqissuussap tamatumap atortussanngortinnissaa.
Piffissaq sivittoriartortillugu akilersuutinik akilinngitsuukkanik
ajornartorsiut oqimaalliartuinnassaaq, kukkunersiuinermut ataatsimiititaliap
inassutigissavaa ESU-mit taarsigassarsiat pillugit aqutsineq siunissamut
isiginerusoq atorumallugu eqqarsartoqartariaqartoq.
Piffissaq ungasissoq
eqqarsaatigalugu siunertamut suliniutinullu pilersaaruteqarnissaq
pisariaqarpoq. Tamatuma ineriartorfiunera kukkunersiuinermi
ataatsimiititaliamit malittareqqissaarniarneqarpoq.
Peqqinnissamut Ilisimatusarnermullu Pisortaqarfik. Kukkunersiuinermi ataatsimiititaliap kukkunersiuisut oqaaseqaataat tusaatissatut tiguaa. Kukkunersiuinermulli ataatsimiititaliap akiligassat 1998-imut tunngasut, peqqinnissamut pisortaqarfiup arajutsisimasaasa kukkunersiorneqarnissaat sillimaffiginiarpaa. Taakku tassaapput aningaasat 8,5 mio. kr. -init missaanni amerlassusillit.
Takornariaqarnermut Angallannermut Niuernermut Attaveqarnermullu Pisortaqarfik. Allamut akileeqatigiissutissat aaqqivigineqarnissaannut malittarisassat qanimut malittarineqassapput. Taakkununnga ilanngullugit sulisorisanut akiliussissutigineqarallartartut. Periusissat aalajangersimasut malillugit tamakkua akileeqatigiissutigineqartarnissaat pisassapput.
Kukkunersiuinermut ataatsimiititaliap ernumanarteqalugu malugaa, pisortaqarfiup sullissinermut isumaqagitiissutigisai arlallit pillugit suliniutit aningaasartuutillu sullissinermut isumaqatigiisutuni aalajangersarneqartut qanimut nalunaarsorneqaarneq ajormata.
Kukkunersiuinermut ataatsimiititaliap inassutigissavaa, tamakkua aalajangersumik periuseqarfigineqarnissaannut aaqqissuussinerit pilertorluinnartumik ajornanngippallu siunissami sullissinermi isumaqatigiissutinut atortussanngortillugit pilersinneqassasut. Aningaasarpassuit anguniakkallu annertuut sullissinermut isumaqatigiissutitigut aalajangersaaffigineqarsimapput. Kukkunersiuinermullu ataatsimiititaliap pissutsit tamakkua ingerlaavartumik malittariniarpai.
Inatsisartut Allattoqarfiat. Kukkunersiuinermi ataatsimiititaliap kukkunersiuisut oqaaseqaataat, tusaatissatut tiguaa. Pitsaasutullu isigisani erseqqissarumallugu. Tassaasoq; angalaarnermi aningaasartuutit iluarsiiveqatigiissutigineqartarneranut tunngasut annertuumik pitsanngoriaateqarsimasut.
Tamatumunngalu tunngasoq ingerlaavartumik pitsaanerulersinniarneqartariaqartoq. Taamatuttaaq Inatsisartut allattoqarfiata, Inatsisartullu akornanni aningaasartuutit avissaartinnissaat aalajangersimanersumik isumannaarniartariaqartoq.
Taava Amutsiviit. Aamma taanna taasaqarfigilaassavara. Suliffeqarfiup 1998-imi amigartoorutai 14,7 mio. kr.-init 13,4 mio. kr.-inik tamakkiisuunngitsumik aningaasaliissuteqarnikkut matussusiiviginiarneqarput. Amigartoorutit sinneri 1,3 mio. kr.-ninik sinneqartut, ukiuni siuliini amigartoorutitut nuunneqartunut ilanngunneqassapput.
Kukkunersiuinermi ataatsimiititaliap maluginiarpaa sulliffeqarfik kukkunersiuisarneq eqqarsaatigalugu maleruagassatut malillugit akuerineqarsimasoq, ukiumoortumillu naatsorsuutinik suliffeqarfiup naatsorsuuseriveqarnera pillugu, nalunnaarummi atuuttumik Amutsiviit illuutaasa amusisarfiisalu naliliivigineqarneranni immikkut akuersisuteqarsimaneq, apersuuserneqarsimalluni.
Maannakkut immikkoortoq 3. Tassalu landskarsip naatsorsuutaasa kukkunersiorneqartarneranik ataatsimiititaliap oqaaseqaatai allat:
Namminersornerulluni Oqartussani atorfillit, siulersuisuni ilaasortaanersiaat. Kukkunersiuinermut ataatsimiititaliap, tassalu uagut siulerisatta. Ukiakkut ataatsimiinnermi 1998-imi oqaluuserisatut immikkoortoq 79-imut isumaliutissiissutaani, kukkunersiuinermut ataatsimiititaliaq inassuteqarpoq. Taamanikkut oqaasertaliussani taanna issuaaffigilaassavara: "Taamaammat ataatsimiititaliamiit inassutigineqassaaq, taamatut aaqqissuusisimaneq Naalakkersuisut sapinngisamik piaarnerpaamik allanngortissagaat. Taamaalilluni honorarip - akissarsiat - maannamut atorfilinnut tunniunneqarsinnaasimasut, toqqaannartumik landskarsimut ingerlaartunngortinneqassasut".
1997-imut landskarsip naatsorsuutaanut kukkunersiuinermut ataatsimiititaliap isumalitissiissutaanut Naalakkersuisut 19. April 1999 kukkunersiuinermut ataatsimiititaliamut suliamut tunngasumik suliarinneqqinneranni, siulersuisunilu ilaasortaanersinut tunngasut, nassuiaatigineqanngillat. Tamatuma malitsigisaanik kukkunersiuinermi ataatsimiititaliaq Naalakkersuisunut saaffi-ginnittariaqarsimavoq. Toqqarlugulu apeqqutigalugu inassuteqaat malinniarneqarnersoq, imaluunniit naamik. Kukkunersiuinermi ataatsimiititaliaq akissutisivoq, Naalakkersuisut suliassaq suli suliarigaat. Tassungalu ilanngullugu aaqqiissutaasinnaasut arlallit misissoraat.
Kukkunersiuinermut ataatsimiititaliaq suliamut atatillugu Inatsisartut aningaasaqarnermut ataatsimiititaliaannik ataatsimeeqatiginnippoq, Inatsisartullu ataatsimiititaliaanni marluusuni isumaqagiissutigineqarpoq, Naalakkersuisut pisussaasut, inassuteqaatinik Inatsisartuni akuersissutigineqartunik malinninnissaminnik.
Inatsisartut landskarsip naatsorsuutaasa kukkunersiorneqartarnerannik ataatsimiititaliaata sakkortoorujussuarmik uparuarpaa, annertoqisumillu eqqarsarnartoqartillugu, atorfillit Naalakkersuisuni atorfeqarnerminnut ilaatillugu Namminersornerusut tamakkiisumik, tamakkiinngitsumilluunniit ingerlatsiviutaanni piginnittuusunut siunniisuutitatut, siulersuisuni inissisimanermikkut siulersuisuni ilaasortaanersiat pillugit, ataatsimiititaliap ukiakkut 1998-imi isumaliutissiissutaasigut saqqummiussai Inatsisartuni akuersissutigineqartut, Naalakkersuisut suli eqqortissimanngimmatigit.
Taavalu atorfimmut atasumik biilerisap, telefonip, najugarisap, angalasarnerit, akileraartarnikkut nalunaarutaasartussaanerat aamma ajunngitsorsiat allat akileraarutigisassaatitaasut pillugit qulequtalimmut. Ataatsimut isigalugu kukkunersiuinermut ataatsimiititaliaq isumqarpoq, ajun-ngitsorsiat, aningaasaqarnikkut akiliisinnaassuseqarnermut sanilliullugit annertuallaartariaqan-ngitsut. Pisortatigoortumik naalakkersuinermik suliaqartunik, siunniunneqarpat aningaasaqarnikkut aqutsineq sukannersuusariaqartoq, mianersortumik assigisaanilluunniit pissuseqartoqartariaqartoq. Taava ajunngitsorsiat atorneqarnerat qanoq ilisukkulluunniit aningaasaqarnikkut akiliisinnaassusermut naapertuuttuusariaqarpoq. Taamaaqqataanillu aningaasartuuteqarfiginissaa tunuarsimaarfigineqartariaqarluni.
Kukkunersiuinermut ataatsimiititaliap 1998-imi ukiakkumiit, atorfimmut atasumik biilit pissarsiarineqartarnerannut atorneqarneranullu suliassaq, tassungalu ilanngullugu akileraarutitigut nalunaaruteqartussaanermut tunngasoq, malittarilerpaa.
Kukkunersiuinermi ataatsimiititaliap kukkunersiuisut avataaneersut qinniuginikuuai atorfinnut atasumik biilerisat atugaanera, akileraarutitigullu nalunaarutigineqartussaatitaanerat erseqqiinerusumik misissuiffigeqqullugit. Misissuinerup inernera Naalakkersuisunit ilisimatitsissutitut suliareqqitassatullu nassiunneqarnikuuvoq.
Kukkunersiuinermut ataatsimiititaliap Naalakkersuisut ajunngitsorsiat akileraarusigassaatitaasut akileraartarnikkut nalunaarutigineqartussaanera pillugit, Naalakkersuisut periuserisimassat eqqornerusumilluunniit periuserisimanngisaat. Oqaatsit sakkortuut atorlugit uparuaavigai.
Kukkunersiuinermut ataatsimiititaliap qitiusumik allaffeqarfimmi atorfimmut atasumik biilerisanut tunngatillugu tamanut atortumik 18. februar 1999-imi namminersornerusut najoqqutassiaat assut iluarisimaarpaa. Kaajallaasilarli annertuutigut erseqqissagassartaqartitsiterpoq.
Kukkunersiuinermut ataatsimiititaliap Naalakkersuisunit uppernarsivaa, kaajallaasitaq aammattaaq Namminersornerusut ataanni suliffeqarfinnut atuuttuusoq, tamaana erseqqissumik taaneqarsimasariaqarpoq. Kukkunersiuinermut ataatsimiititaliap kaammattuutigissavaa, Naalakkersuisut maleruagassat aammattaaq Namminersornerullutik ingerlatseqatigiiffiutaanni atuutilersinneqarnissaat nakkutigissagaat.
Taava maannakkut qulequtaqartoq :
Aningaasanut Inatsimmi, konto pingaarneq 30.13.10 Innarluutilinnut Danmarkimmiittunik Isumaginninneq.
1999-imut Inatsisartut ilassutitut aningaasaliissutinut Inatsisissaasa siulliannut siunnersuutip aappassaaneerneqarnissaanut atatillugu, Aningaasaqarnermut Ataatsimiititaliap kissaatiginikuuvaa konto pingaarneq 30.13.10 Innarluutilinnik Danmarkimiittunik Isumaginninneq Kukkunersiuinermut Ataatsimiititaliap misissuiffigissagaa.
Aningaasaqarnermut Ataatsimiititaliaq isumaqarmat, Ataatsimiititaliamut uppernarsarneqarsimanngitsoq aningaasartuuteqarnerussutit siumut takorloorneqarsinnaasimannginnersut. Aningaasaqarnermut Ataatsimiititaliaq oqaaseqarpoq inaarutaasumik aningaasartuutit qaffasissusiat ilisimaarineqarsimasariaqaraluartoq. Aningaasaqarnermut Ataatsimiititaliap Isumaginninnermut, Suliffeqarnermullu Naalakkersuisoq Hr. Mikael Petersen ulloq majip 19-at 1999 isumasioqatigaa, tamannalu tunngavigalugu qulaani taaneqartutut isornartorsiuisariaqarsimalluni.
1999-imut Inatsisartut Ilassutit Aningasaliissutinut Inatsisissaata siulliannut atatalillugu konto pingaarneq 30.13.10-mi 9 mio.kr.-nit aningaasaliissutigineqarput. Kukkunersiuinermi Ataatsimiititaliaq ulloq junip 21-at 1999 Isumaginninnermut, Suliffeqarnermullu Naalakkersuisumut allagaqarluni konto pingaarneq 30.13.10-mut atatillugu paasissutissanik ukununnga tunngasunik pissarsiniarpoq:
Siulleq: Naalakkersuisup nassuiaatigissagaaa ulloq majip 19-ni 1999 Aningaasaqarnermut Ataatsimiititaliamik isIsumasioqateqarnermini nassuiaatigisimasani.
Aapaattut: Konto 30.13.10-mut 1999-mi Inatsisissatut Inatsisartut Aningaasanut Inatsisissaanni naatsorsuinermut tunngaviusut paasissutissiissutigineqarnissaa. Tassungalu ilanngullugu naatsorsuinermut tunngavik 1999-mi 9 mio.kr.-ninik aningaasaliissuteqareersut qaavisigut aningaasaliissuteqarnissaannik qinnuteqaateqarnermut tunngaviusoq.
Pingajuattullu: Tulliullugu Kukkunersiuinermut Ataatsimiititaliap tassunga tunngatillugu aammalu inuit ukiuni 1997-miit 1999-mut Danmarkimiinnissamut passutarineqarnissamullu innersuussutigineqartut amerlassusiinut tunngatillugu isumaqatigiissutitigut tunngavigisat pillugit ilisimatinneqarumavoq.
Ulloq julip 23-at 1999 Kukkunersiuinermut Ataatsimiititaliaq Isumaginninnermut, Suliffeqarnermut Naalakkersuisumut nassuiaammik pissarsivoq. Nassuiaatikkut ilisimatitsissutigineqarpoq konto pingaarneq 30.13.10-mut atatillugu aningaasartuutit siumut eqqoriaruminaatsorujussuusut. Tamatumunngalu pissutaasoq akiligassat ukiut ingerlanerani akuttoqatigiiaamik tiguneqartannginnerat. Akiligassat ukiuni arlalinni kinguaattoortoqarsinnaasarnerat. Inuit Danmarkiliartinneqartartut Namminersornerullutik Oqartussanit akilerneqartussamik immikkut ikiorsiissutinik tunineqartariaqartarnerat, aamma aftenskoleni atuartinneqartarnerat, kiisalu 1998-mi ukiakkut naatsorsuutereriinngisamik inuit pingasut immikkut Danmarkimukartinneqartariaqarsimanerat.
Kukkunersiuinermut Ataatsimiititaliap nassuiaasiaq tamakkiisutut tamannalu tunngatillugu nassuiaatitut isiginngilaa.
Septemberillu 22-ni 1999 kukkunersiuisoq avataaneersoq qinnuvigalugu, konto pingaarneq 30.13.10 erseqqinnerusumik misissuiffigissagaa.
Ulloq oktoberip arfineq-aappaanni 1999 Kukkunersiuinermi Ataatsimiititaliap kukkunersiuisut avataaneersut konto pingaarneq 30.13.10-mut nalunaarusiaat oktoberip tallimaani 1999-meersoq pissarsiaraa, Isumaliutissiissummi ilanngutaq 4 innersuussutigisinnaavara.
Nalunaarusiakkut inerniliilluni oqaatigineqarpoq tassunga tunngasup aningaasaqarnikkut aqutsivigineqarnera naammaginartuusoq, kontumi aningaasartuutit allassimasut eqqortuusut, aamma isumaqatigiissuteqarnermut tunngaviusoq allanut isumaqatigiissuteqartarnermut sanilliullugu Namminersornerullutik Oqartussani ajornerusumik inissisimalersitsisuunngitsoq.
Tamatuma saniatigut nalunaarusiakkut naqissuserneqarpoq Pisortaqarfik, Danmarkskontorip Isumaginninnermi Immikkoortortaaniit 1998-mi augustusip 31-nili ilisimatinneqarsimasoq, 1998-mut 3,8 mio.kr.-ninik ilassutitut aningaasaliisoqarnissaanik pisariaqartitsisoqartoq. Taamaakkaluartoq Pisortaqarfik kontumi pingaarnermi tassani aningaasaliissutit 1,9 mio.kr. sinnilinnik ilanngarneqarnissaanik qinnuteqarpoq.
Kukkunersiuinermut Ataatsimiititaliami oqaatigineqassaaq, Isumaginninnermi Pisortaqarfiup 1998-mut tunngatillugu konto pingaarneq 30.13.10 piaaraluni tulleriiaarinermi pingaannginnittut inississimagaa.
Augustimmi 31-ni 1998 Pisortaqarfiup kontumi tassani 1998-mut tamarmut aningaasartuutigineqartussat siumut nalunngereersimammagit. Tamatumunnga tulliullugu tulleriiarinermi pingaannginnertut inissiineq 1999-mi Inatsisartut Ilassutitut Aningaasaliissutinut Inatsisissaattut siullianni aningaasaliissutigineqartutigut 9 mio.kr. matussuvigineqarpoq.
Aningaasanut Inatsimmut atatillugu piaaraluni tulleriiaarinermi pingaannginnittut inissiineq Kukkunersiuinermi Ataatsimiititaliamit sakkortuumik akerlerineqarpoq, taamaattoqartariaqanngilaq. Isumaginninnermut, Suliffeqarnermullu Naalakkersuisup Inatsisartut Aningaasaqarnermut Ataatsimiititaliaannit aamma Inatsisartut Kukkunersiuinermut Ataatsimiititaliaannit konto pingaarneq 30.13.10-mi atuineruneq nassuiaqqullugu toqqarluni aperineqarami, tassunga tunngasoq nassuiaateqarfiginngilaa, massa Pisortaqarfiup 1998-mi augustusip 31-nili ilisimareeraluaraa, 1998-mi tunngatillugu konto pingaarnermi aningaasartuutigisassat inaarutaasumik qanoq qaffasissuseqarumaarnersut.
Isumaginninnermut, Suliffeqarnermullu Naalakkersuisup pissutsit piviusut Pisortaqarfimmit ilisimaarineqareersut nassuiaatigisimanngimmagit, Kukkunersiuinermut Ataatsimiitsitaliamiit akuersaarneqarsinnaanngilluinnartutut isigineqarpoq Ataatsimiititaliamiillu oqaatigineqassaaq pissutsit taamaattut Inatsisartoqarnermut atatillugu atorneqartussaanngitsut.
Kukkunersiuinermut Ataatsimiitsitaliap suliamut tunngatillugu naggataatigut oqaatigissavaa, suliap imannaanngitsuunera pissutigalugu Isumaginninnermut, Suliffeqarnermillu Pisortaqarfik allaffeqarfittut misissuiffigineqassasoq, tassungalu ilanngullugu sukumiisumik misissorlugu konto 30.13.10-mut kontullu sinnerinut tunngatillugu Pisortaqarfimmi pissusiviusut Naalakkersuini Ilaasortani ilisimaneqarsimanersut.
Taassumalu malitsigisaanik maleruagassat atuuttut malillugit akisussaatitsisoqarsinnaanersoq. Kukkunersiuinermi Ataatsimiititaliaq isumaa malillugu, Inatsisartut Kukkunersiuinermi Ataatsimiititaliaq Aningaasaqarnermullu Ataatsimiititaliaq kukkusumik paasitinneqarsimammata, imaluunniit paasissutissanik nalunngeriikkanik pisariaqartunilli isertuunneqarsimammata.
Misissuinissami Namminersonerumik Kukkunersiuisut kiisalu kukkunersiuisut avataaneersut misissuinermi peqataassapput, pisariaqarnerillu naapertorlugu Inatsisilerituunik ikiorteqartoqarsinnaassaaq. Kukkunersiuinermi Ataatsimiititaliaq misissuinerup inernera pillugu ilisimatinneqassaaq.
Pissutsinut allanut
tunngasut.
Kukkunersiuinermi
Ataatsimiititaliartaaq Sisimiuni, Kangerluarsunnguami ikaartarfiliornermik
atasumik aningaasatigut aaqqiissuteqarfigeqatigiissutissat pillugit
tunisarniaasoqarsimavoq.
Kukkunersiuinermut
Ataatsimiititaliap Naalakkersuisut nassuiaataat tusaatissatut tiguaavaa,
nassuiaatikkullu oqaatigineqarpoq sanaamut naatsorsuutit 1999-p naalernerani
naammassineqassasut naatsorsuutigineqartoq.
Kukkunersiuinermut
Ataatsimiititaliaq Namminersornerusut ingerlatseqatigiiffiisa akiitsuinut
tunngasumik oqaloqatiginnissuteqartarsimavoq. Kukkunersiuinermut
Ataatsimiititaliap akiitsutigut pisussaaffeqarneranut tamakkua
imaannaanngitsorujussuartut isigaai, tamakkununnga ilanngullugit
Namminersornerusut qularnaveeqqusiissutitigut pisussaaffii,
Ataatsimiititaliallu aallaqqaammut kaammattuut nr. 4 Inatsisartut 1999-mut
Ilassutitut Aningaasaliissutissaannut 1-mut siunnersuutip Inatsisartuni
aappassaaneerneqarnerani Aningaasaqarnermut Ataatsimiititaliap
Isumaliutissiissutaani saqqummiunneqartoq taperserlugu oqaatigissavaa.
Tassa Aningaasaqarnermut
Ataatsimiititaliap kaammattuutaa nr. 4 imatut oqaasertaqarpoq:
Namminersornerusut
Ingerlatseqatigiiffiisa taarsigassarsinissamut pisussaaffittut (quersortoqarmat
paasinngilara oqaaseq ataaseq) ...naanerannut atasumik
Namminersornerullutik Oqartussat tamatigut inaarutaasumik
qularnaveerusiisussaanissamik tunngavik aallaavigalugu Aningaasaqarnermut
Ataatsimiititaliap inassutigaa Naalakkersuisut siunissami
ingerlatseqatigiiffiit taamaattut aningaasatigut inissisimanerat
aalajangersimasumik nassuiaatigisassagaat, tassungalu ilanngullugu
iluanaaruteqartoqassagaluarpat, Naalakkersuisut tamakkuninnga qanoq
isumalluuteqarniarnersut. Nassuiaat taamaattoq eqqarsaatigineqarsinnaavoq
ukiumoortumik ukiakkut ataatsimiinnerit tamaasa Inatsisartuni
aalajangersimasumik nassuiaatigineqartassasoq.
Kukkunersiuinermi
Ataatsimiititaliap Namminersornerusut Ingerlatsiviutaat namminersortitat
pillugit oqaatigissavaa, sulliviit pineqartut nakkutigineqarnerat nakkutilliivigineqarnerallu
Naalakkersuisuniit annertunerusunngortinneqartariaqartoq, sulliviit
ingerlatsivigineqarnerisa suliaasalu malittarineqarnerat
annertusineqartariaqarpoq.
Namminersornerusut
namminersornerusut ingerlatsiviutaasa, namminersortitat sullissinikkut
isumaqatigiissuteqarfigineqarnerannut isumaqatigiissuteqarfigineqarneri
pillugit Kukkunersiuinermi Ataatsimiititaliamiit siunissami
pisariaqartinneqarpoq isumaqatigiissutit tamakkua ammanerusumik
periuseqarfigineqassasut. Taamaaliornikkut kinaluunniit
periarfissinneqassammat, isumaqatigiissutit pineqartut malitseqartinnerat
eqqortinneqarnerallu paasisaqarfigissallugu, malittarissallugulu.
Eqqarsaatigineqartariaqarpoq
Namminersornerullutik Oqartussat Aningaasanut Inatsit aqqutigalugu ingerlatsivinnut
namminersortitanut aningaasarpassuarnik aningaasaliissuteqarmata,
illuatungaaniillu ingerlatsiviit namminersortitat, taakkua Namminersornerusunut
tunniussaqartussaatitaallutik.
Aningaasaliissutinut
illuatungiliullugu tunniussassat taakku tassaasinnaapput nioqqutissanik
tunniussuussinikkut isumannaarineq, ingerlatsinikkut isumannaarineq,
ingerlatsisinnaassuseqarneq, suliassaqartitsineq, sanaartukkanik
aalajangersimasunik ingerlassaqarneq, nioqqusiat ilaannik aalajangersimasumik
peqarnissaq, akinik aalajangersaasinnaaneq, assigisaallu pillugit
piumasarineqartut.
Kukkunersiuinermut
Ataatsimiititaliap arajutsimanngilaa, isumaqatigiissutit ilaannut tunngasut,
tamanut tusarliussassaangitsuunerat, tamakkua niuertutut ingerlatsinermi
isertuussassaasinnaallutillu pissutsinik iluanaarniarnermik ingerlassaqarnermik
ajoqutaasinnaasut, ajoqutaasinnaasunut tunngasinnaapput.
Kukkunersiuinermut
Ataatsimiititaliartaaq kukkunersiuisut avataaneersut oqaaseqaataat
tusaatissatut tiguaa. Isumaqarfigalugulu Namminersornerusut sullissinikkut
isumaqatigiissutaannut tunngasumik iliuuseqarneq patajaallisaaviginiarlugu
Aningaasaqarnermik Pisortaqarfik suliniuteqartariaqartoq.
Kukkunersiuinermut
Ataatsimiititaliap kukkunersiuisut avataaneersut oqaaseqaatigisaat
taperserlugit Naalakkersuisunut alaatsinaaqqussavai, Kalalliit Nunaanni
Mittarfeqarfinni, Amutsivinni minnerunngitsumillu Nukissiorfinni siunissami
aningaasaliissuteqartarnikkut ajornartorsiutaalerumaartut,
pisariaqartitaajumaartullu alaatsinaanneqarnissaat.
Naggasiut.
Kukkunersiuinermut
Ataatsimiititaliap periarfissaq manna atorlugu Kukkunersiuinermut
Ataatsimiititaliaasimasoq siulittaasorisimasaa Fru Kristine Raahauge
ilanngullugu qutsavigiumavaa pappialat sulinermini najoqqutassat,
inassuteqaatillu Ataatsimiititaliap sulinermini ingerlatseqqinnerani atugassat
Inatsisartut Landskarsip naatsorsuutaasa kukkunersiorneqartarnerannut
Ataatsimiititaliannut tunniussimammagit.
Kukkunersiuinermut
Ataatsimiititaliap piffissami aggersumi suliassariligassani
ingerlattalernissaat qilanaaraa, tamatumanilu Kukkunersiuinermut
Ataatsimiititaliap ataatsimiikulaarnerunissani aalajangersimasumik
siunertaqarluni angalasarnissani, kukkunersiuisunilu avataaneersunik
qaninnerusumik suleqateqarnissani pilersaarutigai.
Aamma Kukkunersiuinermut Ataatsimiititaliap
kukkunersiusunik avataaneersunik kukkunersiuisitsinermut
aningaasaliissutigineqartartut Inatsisartut ataannut inissinneqarnissaat
suliniutiginiarpaa, taamaalillutik oqartussaaneq, aningaasaliissutillu
ataatsimut katersorniarneqassammata.
Taakkua saniatigut
Kukkunersiuinermut Ataatsimiititaliap naammagisimaarpaa, kukkunersiuisut
immikkut uparuagaqaratik oqaasertaliinerat tunngavigalugu eqikkaalluni
oqaatigisinnaagamiuk, Landskarsip 1998-mut naatsorsuutai, Naalakkersuisut
saqqummiussaat naatsorsuuserinermi maleruagassatut atuuttut naapertorlugit
saqqummiunneqartartut, eqqortumillu takutitsisuusut.
Taamaakkaluartoq
Kukkunersiuinermut Ataatsimiititaliap maanngangaaq oqaatigeriissavaa,
Landskarsip 1998-mut naatsorsuutaani Peqqinnisaqarfimmut tunngatillugu 8,5 mio.
kr.-nit kukkunersiorneqarnissaat sillimaffiginiarini. Aningaasat 8,5
mio.kr.-nit taakkua tassaapput, 1998-mi aningaasartuutit Landskarsip 1998-mi
naatsorsuutaani ilaanngitsut.
Kukkunersiuinermut
Ataatsimiititaliap naammagisimaarpaa Landskarsip 1998-mut naatsorsuutaani
amigartoorutit missingersuutigineqarsimasunit ikinnerummata. Kukkunersiuinermut
Ataatsimiititaliap Naalakkersuisunut kaammattuutigissavaa aningaasatigut
sukannersumik ingerlatsineq ingerlatiinnaqqullugu.
Landskarsip naatsorsuutaasa
kukkunersiorneqartarnerannut ataatsimiititaliami ilaasortat isumaqatigiillutik,
Landskarsip 1998-mi naatsorsuutaasa kukkunersiuigassatut sillimaffigisassartaat
sillimaffigineqartussanngorlugu Inatsisartunut akuersissutigineqarnissaat
inassutigissavaat.
Naggaterpiaatigut
aallaqqaataani oqarnittut Ataatsimiititaliami Isumaliutissiissummi
suleqataapput, Mogens Kleist Kattusseqatigiit, Anders Nilsson Atassut, Vittus
Mikaelsen Siumut, Lars Sørensen Inuit Ataqatigiit, uvangalu Lars Karl Jensen.
Johan Lund Olsen, ataatsimiinermi aqutsisoq,
Inatsisartut Siulittaasuat:
Taavalu maannakkut
Isumaliutissiissummut akissuteqaqqaassaaq Aningaasaqarnermut, Niuernermullu
Naalakkeersuisoq Josef Tuusi Motzfeldt.
Josef Tuusi
Motzfeldt,
Aningaasaqarnermut, Niuernermullu Naalakkeersuisoq, Inuit Ataqatigiit:
Upernaaq april qaammataani
Upernaakkut Katersuunnermi Naalakkersuisut sinnerlugit Landskarsip 1998-mi
naatsorsuutai saqqummiunneqarput, Kukkunersiuisarnermullu Ataatsimiititaliamut
suliassanngorlugit ingerlateqqinneqarlutik.
Kukkunersiuisartut
avataaneersut upernaaq naatsorsuutit saqqummiunneqarneranni, naatsorsuutit
kukkunersiuisutut oqaaseqarfiusutut taakku isigineqartut.
Kukkunersiuisarnermi
Ataatsimiititaliap maannakkut 1998-mut Ladskarsip naatsorsuutai pillugit
Isumaliutissiissut suliarisimavaa. Ataatsimiititaliap Isumaliutissiissummini
pingaarnerutillugit taasai oqaaseqarfigerusuppakka.
Naalakkersuisuniit
aallaqqaasiullugu oqaatigissavarput atortussat kalaallisut, danskisullu
allassimaneri Inatsisartut Kukkunersiuisarnermut Ataatsimiititaliaanut
ataatsikkoortillugit nassiunneqanngimmata, tamatumunnga pissutaavoq atortussat
inaarsarneqartarnerat ilutigalugu nassiuussunneqarmata, taamaalilluni
Kukkunersiuisarnermut Ataatsismiititaliap sulinini sapinngisamik piaartumik
aallartinniassammagu.
Taamatuttaaq
ilisimatitsissutigissavara Kalaallit Nunaata Radioa Landskarsip naatsorsuutaasa
ilaattut ilaanngimmat. KNR Pisortat suliffeqarfiutigaat, Namminersortoq,
Immikkut naatsorsuutimik saqqummiussisartoq.
Ataatsimiititaliap
sulinermini Namminersornerullutik Oqartussat ukioq 2000-mut ikaarsaarniarnermi
qarasaasiaqarnikkut piareersimanerat pillugu apeqqut suliarisimavaa,
Naalakkersuisullu qinnuvigalugit katersuunnermi matumani tamanna pillugu
killiffimik nassuiaateqaqqullugit.
Tassunga tunngatillugu
oqaatigisinnaavara Naalakkersuisut augustusip ulluisa aqqaneq-aappaanni
aalajangiimmata ukioq 2000-mik taasaq, suliaq, suliassaq aallartinneqassasoq
siunertaralugu sapinngisamik annertunerpaamik nunatta ukioq 2000-mut
piareersimanissaa qulakkeerniarlugu.
Taamaammat
suleqatigiissitamik pilersitsisoqarpoq, Nunatsinni tamarmi inuutissarsiutinit
tamanit ukioq 2000-mut tunngatillugu suliarineqrsimasut pillugit
aaqqissuussamik paasissutissanik katersinissanik ilaatigut suliaqartumik.
Taamatuttaaq
Suleqatigiissitap qulakkiissavaa innuttaasut ukioq 2000-mut tunngatillugu
ajornartorsiutaalersinnaasunik paasissutissinneqarnissaat, kingulliullugulu
minnerunngitsumillu upalungaarsimanissamut pilersaarumik pigisaqareertoqassasoq.
Naalakkersuisuniit
novemberip affaani siullermi Inatsisartunut Ilaasortat Suleqatigiissitap
sulinera pillugu allakkatigut nassuiaammik nassiussivigineqarnissaat
isumagissavarput. Taamaammat Inatsiartunut Ilaasortanut
ilisimatitsissutigissavara Namminersornerullutik Oqartussat Internet-imi
qupperneranni ukioq 2000 pillugu paasissutissarpaalussuit
alakkarneqarsinnaammata.
Naatsorsuusiortarnermut
ilitsersuutit pillugit Ataatsimiititaliap oqaaseqaataanut tunngatillugu,
oqaatigisinnaavara naatsorsuusiortarneq pillugu kaajallaasitaq septemberip
20-neersoq 1995-mi iluarsaateqqinneqalermat, taassuma sulinermut ullutsinnullu
naleqqussarnissaa siunertaralugu.
Taamaalereerpat
Namminersornerullutik Oqartussat immikkoortortaqarfiinut naatsorsuusiortartunut
tamanut naatsorsuusiortarnermut ilitsersuutit iluarsisat suliarineqassapput,
taamatuttaaq suliassaqarfiit allatut agguaanneqarnerisa kingunerisaannik
iluarsiissutissat, tassa Naalakkersuisut nutaanngornerata kingorna.
Suliassaqarfiit ilaanni
taamatuttaaq Isumaginninnermut, Suliffeqarnermullu Pisortaqarfimmit
naatsorsuusiortarnermut ilitsersuutit suli amigaataanerannik,
Kukkunersiuisarnermut Ataatsimiititaliap isornartorsiuineranut tunngatillugu,
Naalaakkersuisut ilitsersuutit amigaataasut Kukkunersiuisarnermut
Ataatsimiititaliamit kissaatigineqartutut nassiunneqarnissaat isumaginiarpaat.
Naalakkersuisunut
Ataatsimiititaliaq isumaqatigaarput ineqarmut tunngassuteqartunik akiligassanik
kinguaattoorutit killut tungaanut allanngoriartornerat, ilorraap tungaanut
saatinniarlugu sulissutigineqartariaqarmat, aammattaarmi soorlu
Ataatsimiititaliami oqaatigineqartoq, ineqarnermut tapersiisarfimmit,
boligstøttemit taarsigassarsiat ilaatigut allatut aaqqiivigineqarnissaat
sulissutigalugu aallartittoqareerpoq. Ilumoorpoq aatsaat maannakkut tamanit
ilisimaneqalermat taarsigassarsiat allatut aaqqiivigineqarsinnaasut, kisianni
Inip ukioq manna siusunnerusukkut taarsigassarsiallit tamaviisa
allaffigiortoreersimavai 1999-milu junip 30-riliinnaraa taarsigassarsiallit
850-t taarsigassarsiatik allatut aaqqiivigitinniarlugit kissaateqarsimapput.
Tamakkununnga
tunngassuteqartunit taarsigassarsiat akilersorneqarnerannut kinguaattoortutit
allanngoriartornerat pillugu Kukkunersiuisarnermut Ataatsimiititaliap
siunissami ilisimatinneqartarnissani kissaatigaa. Soornuma Kukkunersiuisarnermi
Ataatsimiititaliaq akiligassanut kinguaattoorutit Landskarsip naatsorsuutaanut
ilanngunneqartartut pillugit paasissutissanik tunineqartassaaq, tassa
ineqarnermut tapersiisarfimmut akiligassanut kinguaattoorutinik aamma
ineqarnermut akiligassanut kinguaattoorutinik 1995 sioqqullugu pilersimasunik.
Akiligassanut
kinguaattoorutit allat inip najugaqarfiillu, najugaqatigiiffiillu ataasiakkaat
taamaallaat akunnerminni susassaqarfigaat. Namminersornerullutik Oqartussat
Siunnersortinik avataaneersunik atuisarnerannut tunngatillugu
Ataatsimiititaliaq kaammattuivoq, ersarissunik maleruagassaliortoqassasoq.
Siunnersortit akissarsianik isumaqatigiissutit, nalinginnaasumik
isumaqatigiissutitigut aalajangersarneqartut sanioqqutaarneqarnerannut
atorneqartariaqannginnissaat qulakkeerniarlugu. Peqatigitillugulu
Ataatsimiititaliap Siunnersortinut isumaqatigiissutit tamarmik Aqutsinermut
Pisortaqarfimmit akuersissutigineqartalernissaat kaammattuutigaa.
Naalakkersuisut Ataatsimiititaliaq
isumaqatigaat, Siunnersortinik avataaneersunik atuineq
isumatusaarnerusinnaasarmat tunngavissaqarluartarlunilu. Kisiannili sulisunik
atorfinittitsisarnernut taartigitinneqartariaqarani.
Taamaammat Naalakkersuisut
aammattaaq Ataatsimiititaliap kaammattuuineranik pissuteqartumik siunnersortit
avataaneersut atorneqartarnerat pillugu tunaartarisassaliorniarput.
Ataatsimiititaliaq tamakku saniatigut oqartussaaffiqarfiit ataasiaakaat
pillugit oqariartuuteqarpoq, nuannaarutigaara suliassat Naalakkersuisunut
aallartinneqareersut Ataatsimiititaliamit iluarineqarmata. Naalakkersuisut
maannakkut Ataatsimiititaliaq kaammattuutit saqqummiussai
sulissutigeqqissavaat, tassami ajornartorsiutinik taakkartorneqartunik
aaqqiinissaq pingaartilluinnaratsigu.
Ataatsimiititaliaq
suliffeqarfiit namminersortitat naatsorsuutaannik misissuigami
oqaaseqaateqarnissaminut kaammattuuteqarnissaminut assigisaannulluunniit
pissutissarsisimanngilaq. Tamanna soorunalimi nuannaarutissaavoq,
naatsorsuutimmi taakku siulliummata Namminersornerullutik Oqartussat
suliffeqarfiutaasa namminersortitat naatsorsuuseriveqarnerat il.il. pillugit
nalunaarut nutaaq naapertorlugu suliffeqarfiit saqqummiussaat.
Taamaakkaluartoq tassunga
atatillugu ilaasortanut tamarmiusunut oqaatiginngitsoorumanngilara
nalunaarutikkut nutaakkut suliffeqarfiit namminersortitat aningaasaqarnikkut
piginnaassusiat, tunngavigisaallu taamaaliinnarlugit allanngortinneqanngimmata.
Nalunaarutikkut taamaallaat siunertarineqarpoq, suliffeqarfiit ingerlatsinikkut
angusaasa, aningaasaqarnerisalu suliffeqarfinnut allanut taamatut ittunut
naleqqiullugu takussaasunngortinneqarnissaat. Taamatuttaaq suliffeqarfimmi
aningaasaleeqqinnissamik pisariaqartitat atuuttuaannartut
takussaasunngortinniarlugit.
Ataatsimiititaliap
sakkortoorujussuarmik uparuarpaa, annertoqisumillu eqqarsarnartoqartillugu
Naalakkersuisut Atorfillit Siulersuisunut Ilaasortaanersiaat pillugit ukiakkut
1998-mi Ataatsimiititaliami Isumaliutissiissutaani Inassuteqaat
saqqummiunneqartoq suli malissimanngimmassuk. Taamanikkut Naalakkersuisut
neriorsuipput aalajangiinertik eqqarsaatigeqqikkumallugu,
sulissutigittuinnarumallugulu atorfilittat siulersuisinut ilaasortassatut
toqqagaasartut ikilisikkiartortinneqarnissaat.
Taamaammat Naalakkersuisut
aammattaaq suliaq taanna suliarisimavaat ukioq mannalu septemberip ulluisa
pingajuanni ingerlatseqatigiiffinnut Namminersornerullutik Oqartussanut
pigineqarunut ataatsimut isigalugu akissarsiaqartitsisarnermut tunngatillugu,
ingerlatseriaasissaq akuersissutigalugu. Siulersuisunut Ilaasortanut tamanut
atuuttussaq.
Taamatut ingerlatsinissami
aalajangiineq naatsumik oqaatigalugu siunertaqarpoq, akissarsiat suliamut
suliarineqarsimasumut akiliutitut isigineqassasut, aamma ilaatigut ilaasortat
akisussaassusermut suliassanullu tigusannut taarsiissutitut atorneqarnissasut.
Tamakku saniatigut
akissarsiat siulersuisunut ilaasortassanik piginnaanilinnik
pilerinarsilersitsiniarnermut pingaruteqarlutik atorneqartassapput.
Namminersornerullutik Oqartussani atorfillit akissarsiaat Landskarsimut
nakkartinneqartassanersut Kukkunersiuinermut Ataatsimiititaliap,
Aningaasaqarnermut Ataatsimiititaliap siunnersuutigisaattut, eqqarsaatigalugu
pissutsit amerlaqaat taamaattoqartariaqarneranut,
taamaattoqartariaqannginneranullu pissutiginiarneqarsinnaasut.
Naalakkersuisut soorlumi
Aningaasami Inatsisissap aappassaanneerneqarnerani neriorsuisut,
oqaluuserisassaq taanna ukioq 2000-mi Aningaasanut Inatsisissap
pingajussaaneerneqarneranut atatillugu oqaaseqarfiginiarpaat.
Kukkunersiuinermut Ataatsimiititaliap
oqaatsit sakkortuut atorlugit ajunngitsorsiassat akileraarusigassaatitaasut
akileraartarnikkut nalunaarutigineqartarnerannik manna tikillugu
nalunaarutigineqartarnerannik Naalakkersuisut sumiginnaasimanerarlugit
uparuaavigai.
Kukkunersiuisarnemut
Ataatsimiititaliamut ilisimatitsissutigissavara Naalakkersuisut nammineerlutik
tamakkununnga tunngasunik malinnaaviginneqqissaarmata, siunissamissaarlu
taamaaliorniarlutik. Tassami Kukkunersiusarmi Ataatsimiititaliaq
isumaqatigaarput oqarmat, soorunalimi akileraartarnermi oqartussaasunut
pissusissaattut nalunaaruteqartoqartassasoq.
Tamakkununnga
tunngassuteqartunut allaffisornikkut paasiuminarsaasoqarnissaannik
Kukkunersiusarnermut Ataatsimiititaliap kaammattuuteqarnera, taamatuttaaq
Naalakkersuisunit isumaqataaffigaarput, taamatullu Inatsisartut
aningaasarsianik akileraarutit pillugit Inatsimmik suliarinninnerat ingerlasoq
innersuussutigissallugu.
Tamakku saniatigut
atorfimmut atasumik biilit pillugit Namminersornerullutik Oqartussat nalinginnaasumik
malittarissaannut tunngatillugu Kukkunersiuisarnermut Ataatsimiititaliap
oqaaserisai, Naalakkersuisut tusaatissatut tiguaat, kaajallaasitamilu
aalajangersakkat erseqqissaaviginiarlugit. Taamaattoq Naalakkersuisut tassunga
atatillugu oqaatigissavaat, Naalakkersuisut aktie-teqarluni
ingerlatseqatigiiffiit Namminersornerullutik Oqartussanit pigineqartut
atorfimmut atasumik biilinut maleruagassanik aalajangersaanissamut
piginnaatitaaffeqanngimmata, taakkumi aningaasaqarnikkut nammineerluinnarlutik
ingerlasuummata.
Danmarkimi Innarluutilinnik
Isumaginninnermut tunngatillugu, Isumaginninnermut, Suliffeqarnermullu
Naalakkersuisup nassuiaat il.il. Aningaasaqarnermut Ataatsimmititaliamut,
Kukkunersiuinermillu Ataatsimiititaliamut saqqummiussimasai pillugit, Kukkunersiuisarnermut
Ataatsimiititaliap oqaaseqaataanut tunngatillugu, Naalakkersuisut
Kukkunersiuisarnermut Ataatsimiititaliap kissaatigisaatut misissuinermik
aallartitsereerput, maannakkut Naalakkersuisut misissuinikkut paasisat
utaqqimaarallasavaat.
Kukkunersiuisarnermut
Ataatsimiititaliap ingerlatseqatigiifiit Namminersornerullutik Oqartussanit
pigineqartut nassuiaateqarfigineqaqquvai, Naalakkersuisunut oqaatigissavarput
maannakkut ingerlatseqatigiiffiit aningaasaqarnikkut inissisimanerat pillugu
nassuiaat suliarineqarmat. Nassuiaat taanna ataatsimiinneq manna naatinnagu
Inatsisartunut saqqummiunneqassaaq.
Tamakku saniatigut
Naalakkersuisut kiffartuunneqarnissamik isumaqatigiissutit, tassa selskab-inik
isumaqatigiissutit, Namminersornerullutik Oqartussat ingerlatseqatigiiffiinut
il.il. isumaqatigiisutigisimasaat pillugit ataatsimut takussutissiortitsipput,
taamaaliortoqarpoq Landskarsip pisussaafigiunnagaasa il.il. tamakkiisumik
paasisimalernissaat siunertaralugu.
Tamatuma malitsigisaanik
siunertarineqarpoq assigiissaakkanik malitassaliortoqassasoq, taamatut ittumik
isumaqatigiissuteqarnermik atatillugu pitsaassusissaq il.il.
qulakkeersinnaajumallugit.
Ataatsimut takussutissiaq
taanna Aningaasaqarnermut Ataatsimiititaliamut taamatullu Kukkunersiuisarnermut
Ataatsimiititaliamut nassiunneqareerpoq. Kukkunersiuisarnermut
Ataatsimiititaliap Isumaliutissiissunni naggaserpaa, Peqqinnisaqarfimmi 8,5
mio.kr.-ninik aningaasartuutaasimasut apeqquserlugit, tassa siornalittat.
Tassunga atatillugu Naalakkersuisut oqaatigissavaat, soorunalimi ajuusaarnarmat
aningaasartuutit taakku 1998-mi naatsorsuutinut ilanngunneqarsimannginnerat,
kisiannili aatsaat 1999-mut ilanngunneqarsimallutik.
Soorlu aallaqqaasiininni
aallartittunga, tassa Inatsisartut Kukkunersiuinermik suliaqartitaata,
naatsorsuutit oqaaseqaatissaqarfigisimanngilai, taamatullumi
kukkunersiuisarnermut Ataatsimiititaliap naammagisimaarpaa naatsorsuutit
maleruagassat atuuttu naapertorlugit saqqummiunneqarmata, eqqortumillu
takutitsillutik.
Taamaammat Naalakkersuisut
ajuusaarnartoqartippaat, aammattaaq avataaniittunik nalornilersitsisinnaanermut
tunngatillugu, taamatuttaaq Namminersornerullutik Oqartussanut
Ingerlatseqatigiiffinnullu taarsigassarsitsisimasut eqqarsaatigalugit,
maannakkut naatsorsuutit Inatsisartunut akuersissutigineqartussanngormata
apeqqutitalerlugit.
Eqqorpoq
Peqqinnissaqarfimmut tunngatillugu naatsorsuutit naammasineqareersut 8,5
mio.kr.-ninik aningaasartuutaasimasut paasineqarsimammata. Taakku
Peqqinnisaqarfimmut ataatsimut aningaasartuutit 1,3 % missigaat. Taakku
Namminersornerullutik Oqartussat ataatsimut ingerlatsinermut aningaasartuutaasa
3.698 mio.kr.-niusut 0%-nik annertussuseqarput (8,5 mio.kr. taakku), tassami
ingerlatsinermut aningaasartuutit 3.706 mio.kr.-niusussaasimagaluarmata 8,5
mio.kr. ilanngunneqarsimagaluarpata.
1998-mut Landskarsip
naatsorsuutai pissutsinut taakkununnga iluarsiivigineqarsinnaapput, kisiannili
arlaannaatigulluunniit pissusissamisoortuunavianngilaq naatsorsuutit
naammassineqareerneranniit, pissutsinut paasineqartunut matumani pisimasumi
qaammatit arfinillit qaangiutereersut, allanilu suli sivisunerusumik
ingerlatsisoqareersoq iluarsineqassappata.
Tamakku tunngavigalugit
Naalakkersuisunit inassutigissavarput 1998-mut Landskarsip naatsorsuutai
Inatsisartut apeqqusinernagit akuersissutigissagaat, peqatigitillugu
maluginiassallugu naatsorsuutit naammassineqareerneranni 8,5 mio.kr.-ninik
aningaasartuuteqartoqarsimasoq paasineqarsimasoq.
Tamakkiisumik
paasineqareersunik 1999-milu naatsorsuutinut aningaasartuutitut ilanngunneqartunik.
Johan Lund Olsen, ataatsimiinermik aqutsisoq,
Inatsisartut Siulittaasuat:
Taavalu maannakkut partiit
oqaaseqartussaannut ingerlassaagut, tassalu siullermik Siumut oqaaseqartuanut
Per Rosing Petersen.
Per Rosing
Petersen,
Siumup oqaaseqartua:
Landskarsip 1998-mi
naatsorsuutaanut Inatsisartut Landskarsip naatsorsuutaasa
kukkunersiorneqarneranut Ataatsimiititaliamiit isumaliutissiissut imatut
Siumumiit oqaaseqarfiginiarparput.
Siumumiit tapersersorparput
Kukkunersiuinermut Ataatsimiititaliap kissaatigimmagu naatsorsuutit
kalaallisut, qallunaatullu oqaasertalerlugit nassiunneqartarnissaat, tassani
suliniarnermi kinguarsaataasinnaasut pinaveersaartariaqarmata.
Aammattaaq Siumumiit
maluginiarparput iluarisimaarlugulu suliaq, Kukkunersiuinermut
Ataatsimiititaliap sukumiisumik suliarisinnarlugu, Inatsisartunut
aalajangigassanngortillugu ingerlateqqissimammassuk. Tamannalu tunngavigalugu
Siumumiit Isumaliutissiissut tunngaviatigut akuereriarlugu, imatut ataani
immikkut taasariaqartutut isigisagut saqqummiutissavagut.
Siunnersuisoqarfinnit
avataaneersunit sullissutsinik atuineq pillugu Kukkunersiuinermut
Ataatsimiititaliap piumasaqaataa, avataaneersunit atuinermi Naalakkersuisut
maleruagassanik ersarissunik atugassanngortitsisariaqarnera tamakkiisumik
Siumumiit taperserparput. Taamaaliornikkummi aamma tamanut
ersarilersinneqassammat avataaneersut siunnersortinik atuinermi suna
siunertarineqarnersoq anguniarneqarnersorlu.
Isumaginninnermut,
Suliffeqarnermut Pisortallu suliassaataannut Pisortaqarfinnik
Kukkunersiuinermut Ataatsimiititaliap kontumut pingaarnermut 30.13.10-mut
Innarluutilinnik Danmarkimi Isumaginninneq tunngatillugu qinnutigisimavaa,
kontumi tassani aningaasaliissutigineqarsimasut pillugit erseqqinnerusumik
nassuiaateqarfigineqarnissani.
Tamannalu tunngavigalugu
Kukkunersiuinermi Ataatsimiititaliap ilaatigut kukkunersiuisunit
avataaneersunik suleqateqareerluni inernilerpaa Aningaasanik Inatsimmut
atatillugu piaaraluni tulleriiaarinermi pingaannginnertut inissiisoqarsimammat.
Kukkunersiuinermut Ataatsimiititaliap akuersaarneqarsinnaanngilluinnartutut
isiginninnini tunngavigalugu aammalu taamaasilluni suliap imaannaanngitsuunera
pissutigalugu Isumaginninnermi Suliffeqarnermullu Pisortaqarfiup
allaffeqarfittut misissuiffigineqarnissaa tamakkiisumik Siumumiit
taperserparput, nuannaarutigalugu Naalakkersuisut saqqummiussinissaq
sioqqullugu suliaq taanna aalajangiutereersimammassuk.
Siumuminngaanniit
kissaatiginartipparput suliap torersumik Inatsisartut ataatsimiinnerata nalaani
naammasisinnaassappat, tamannalu tamanut orniginarnerpaajussasoq.
Inuiaqatigiinnummi Kalaallinut aammalu inunnut ataasiakkaanut
toqqisisimarnartuunngilluinnarpoq sivisuumik paasisaqarani utaqqisoqassappat.
Aalisarnerup,
Ppiniarnermut, Nunalerinermullu Pisortaqarfimmut tunngatillugu
Kukkunersiuinermut Ataatsimiititaliap inassutaa, tassalu ESU-mit
taarsigassarsiat pillugit aqutsineq siumut isiginerusoq atorumallugu
eqqarsartoqartariaqarnera Siumumiit taperserluinnarparput.
Peqqinnissamut,
Ilisimasaqarnermullu Pisortaqarfimmut tunngatillugu Siumumiit
innersuussutigissavarput qulartumik akuersiisoqaqqunagu, aningaasat 8,5
mio.kr.-ninik amerlassusillit piinnarlugit. Allanngorlugulu nalorninaatsumik
akuerineqassasut. Taamatut isikkoqarsinnaasut Inatsisartunut siusinnerusukkut
ilimasaarutaareersimammata.
Namminersornerulutik
Oqartussat, Atorfinniillu Siulersuisuni ilaasortaanersiat pillugu,
Kukkunersiuinermi Ataatsimiititaliaq sakkortuumik upariaanera Siumumiit
paasinartutut isigaarput, Inatsisartunimi tamanna aalajangiiffeqareernikuummat.
Kisiannnili taassuma aalajangiiffigineqarnissaa Siumumiit
innersuussutigissavarput, 2000-mut Inatsisartut Aningaasanut Inatsisaata
pingajussaaneerneqarnissaanut.
Atorfimmut atuasumik biilerisap,
oqarasuaatip, najurisap, angalasanerit, akileraartarnermut
nalunaaruteqartussaanerat, aamma ajunngitsorsiat allallu
akileraarisigassaatitaasut pillugit Kukkunersiuinermut Ataatsimiititaliap
Naalakkersuisut periuuserisimasaat, imaluunniit periuuserinngisimasaat,
oqaatsit sakkortuut atorlugit uparuaavigai, tamannalu Siumumiit uvagut
tapersersornartilluinnarpparput. Aammalu tassunga atatillugu Kukkunersiuinermut
Ataatsimiititaliaq, Naalakkersuisut kaammattuutaa maleruagassatut 18. februar
1998-meersut, aammattaaq Namminersornerullutik Oqartussat
ingerlatseqatigiiffiutaani atuuttuulernissaanut nakkutigeqqussutaat, Siumumiit
tapersersornarluinnartutut isigigatsigu.
Soorluttaaq aamma
Kukkunersiuisunermut Ataatsimiititaliap peqatigitillugu, sakkortuumik
kaammattuutaa, aningaasat 200.000 kr. bilinik, atortussanillu pisinermi
atugassatut aalajangernera, aalajangersimalluinnartuunissaa, pinngitsooratillu
qaangerneqartussaanngitsuunissaa Siumumiit tapersersoripput.
Kukkunersiuinermi
Ataatsimiititaliaq nangillugu tassunga tunngasumik erseqqilluinnartumik
najuqqutassiortoqarnissaanik Naalakkersuisunut innersuussinera tamakkiisumik
Siumumiit taperserparput.
Ajunngitsorsianullu
atatillugu Naalakkersuisut akileraarusigassaatitaanik
nalunaaruteqarsimannginnerit Siumumiit isorinartutut isigaarput, aammalu
siunissami taamatut pisoqaqqittariaqannginneranik Kukkunersiuinermi
Ataatsimiititaliap innersuussinera tamakkiisumik Siumumiit taperserlugu.
Naggataatigut Siumumiit
Kukkunersiuinermi Ataatsimiititaliap piffisami angersumi suliassarisassani
ingerlatsilereernissamik qilanaarnera Siumumiit nuannaarutigalugu
tapersernartipparput, aammattaaq Kukkunersiuinermi Ataatsimiititaliap,
kukkunersiuinermi avataaneersunik kukkunersiuititsinermut
aningaasaliissutigineqartartut Inatsisartut ataannut inissinneqarnissaata
suliniuteqarnissaa tapersersorluinnartutut Siumumiit isigigatsigu.
Siumuminngaaniillu
Ataatsimiititaliap, Naalakkersuisunut aningaasatigut sukannersumik
ingerlatsiinnarnissaanik kaammattuutaa tamakkiisumik taperserluinnaratsigu.
Taamatut oqaaseqarluta Siumumiit innersuussutivut tunngavigalugit,
Kukkunersiuinermi Ataatsimiititaliap isumaliutissiissutaa Inatsisartunut
akuerisassanngortipparput.
Daniel Skifte, Atassutip oqaaseqartua:
Atassuminngaannit,
Kukkunersiuinermut Ataatsimiititaliap isumaqatigiissut isumaliutissiissutaa
tamakkiisumik isumaqatigaarput.
Nuannaarutigaarput
Ataatsimiititaliap Inatsisartunut akisussaaffeqarnini aallaavigalugu
annertuumik suliaqareerluni, taama imalimmik saqqummiisinnaammat.
Aamma aallaqqaataaniilli
Atassummiit oqaatigissavarput, ulluni qaangiuttuni ilaatigut tusagassiuutit
aqqutigalugit, Ataatsimiititaliap isumaliutissiissutaani tikkuartukkat ilaat,
pingaartumik Isumaginninnermut, Suliffeqarnermullu Naalakkersuisup
akisussaaffiisa iluaniittut, annertuumillu oqallisigineqartut inaarutaasumik
naammassineqartariaqarneri kisaatigigatsigu.Tamanna kingusinnerusukkut
uterfigiumaarpara.
Isumaliutissiissummi
immikkoortut ataasiakkat, Naalakkersuisullu akissuteqaataanni immikkoortunut
ataatsiakkaanut tunngasut itisilerfigalugit maannakkut imatut Atassummiit
oqaaseqarniarpugut.
Aallaqqaasiullugu
Ataatsimiititaliap tikkuarpaa isoralugulu, kukkunersiugassat ilaat
qallunaatuinnaq suliarineqarsimasut tigusimagamikkik, tamannalu siunissami
aaqqiivigeqqullugu kissaatigaa.
Aningaasaqarnermut,
Niuernermullu Naalakkersuisup akissuteqaammini sooq taamaaliortariaqarnerlutik
oqaluttuaraa, ajoraluartumilli ujartorneqartup qeqqa - tassalu siunissami
tamatuma aaqqiiviginissaa - akissuteqarfiginagu.
Atassutip
ataatsimiititaliaq isumaqatigigamiuk kissaatigaa ujartorneqartoq
oqaluttarfimmiit neriorsuinertalimmik nipeqartumik akissuteqarfigeqqullugu.
Naalakkersuisut
Ataatsimiititaliap saqqummiussinermini ujartugaanut tunngasunik
akissutwqarnerminni ujartorneqartut arlaqaqisut Atassummiit
nuannaarutissaasumik naammaginartumillu akissuteqarfigaat, soorlu:
Siullertut:
Qarasasiat ukioq 2000-imut
atasumik atasumik aaqqissuunneqarnissaannut tunngasoq. Novemberip
aallartilluarnerani nalunaarusiaq nasiukkumaneqartoq qilanaarluta
utaqqissavarput.
Aapaattut:
Namminersornerullutik
Oqartussani atorfillit pingaartumik qulliunerusut, ulluinnarni akissaatimik
saniatigut siulersuisoqarfinnik assigiinngitsuni siulersuisooqaataasutut
inissitaasarnermikkut immikkut akissarsiarisarrtagaat ukiumut
aningaasanngorlugit katillugit kr. 800.000-t sinneqartunik annertussusillit
ukiaq manna, tassa, ukiumut 2000-imut aningaasat inatsisissaannut atasumik
aaqqiiviginiarneqarput, nunatta karsianut nakkartartussanngorlugit.
Apeqqummi tassani
Inatsisartut 1998-imi ukiakkut ataatsimiinnerminni tamanna pillugu isummiutaat
tamanit, aamma Naalakkersuisunit, malinneqartariaqarmat Atassummiit
erseqqissassavarput.
Pingajuattut:
Nallakeersuisuni ilaasortat
kiisalu atorfillit ilaat ajunngitsorsiarissartakkaminnik akileraarutaasussanut,
soorlu biileqartitaanermut telefoneqartitaanermullu allanullu tunngasunut
unneqarinnissaq tunngavigalugu malinnaaffigeqqissaarniarneqarput, kiisalu
Sisamaattut:
Suliffeqarfiit selskab-illu
Namminersornerullutik Oqartussanit pigineqartut anignaasatigut
tapiiffigineqartartut aningaasatigut qanoq ingerlanerisa inissisimanerisalu
nalunaarusiorfigineqarnissaat.
Atassummiit
naatsorsuutigaarput tamanna siunissami aamma ataavartumik pisarumaartoq.
Kukkunersiuinermi Ataatsimiititaliap
Naalakkersuisunut isornartorsiutigisaasa ilagaat Naatsorsuusiortarnermi
ilitsersuutit suli tamakkiisumik naammaginartumik susassaqartunit tamanit
atugaalersimanngimmata, soorlu Isumaginninnermut Suliqornermullu
Suliffeqarfimmullu Pisortaqarfimmi. Taama isornartorsiuineq Atassutip
sakkortuumik taperserusuppaa.
Suliassamik ajunngitsumik
naammassinnissimasutut oqaatigissavarput assersuutigalugu Kultureqarnermut,
Ilinniartitaanermut Ilisimatusarnermullu pisortaqarfik.
Naluneqanngitsutuut
Pisortaqarfik taanna sinerissami aamma ikinngeqisunik ingerlataqarfeqarpoq.
Suliassami pineqartumi allanut maligassiuillunilusooq pitsaasunik
Naatsorsuusiortarnermut ilitsersuusiortarsimavoq. Tamanna paasissutissani
Kukkunersiuinermut Ataatsimiititaliamut nassiunneqartuni takuneqarsinnaavoq.
Atasut isumaqarpoq
pissusissamisoortoq periarfissaq manna iluatsillugu tamatumunnga
akisussaasimasoq Naalakkersuisunullu Ilaasortaasimasoq Konrad Sreenholdt
taassumalu pisortaqarfia soorlu aamma naluneqanngitsutuut "Atuarfitsialak"-mik
sulissuteqaleqqaartoq immikkut qujassuteqarfigissallugu.
Ineqarnermut akiitsut
ukiuni kingullerni qaffakkaluttuinnarnerinut tunngatillugu Atassummiit
erseqqissartariaqarparput siorna Inatsisartuni inatsisiliuunneqartup suli ullumikkut
anginerusumik paasisitsiniutigisariaqarnera. Tassani pineqarput innuttaasut
boligstøttemik aaqqiissuussineq aqqutigalugu illutaarsimasut
taarsigassarsiaminnillu allatut aaqqiivigitinniarlutik kissaateqarsinnaasut.
Atassutip naammaginngilaa
paasisitsiniaanermi Ineqarnermut pisortaqarfik imaluunniit INI A/S-jip aviisia
kisiisa atorlugit paasisitsiniaasoqarnissaa. KNR-ip TV-a, Tusarliivik,
Nunatsinnilu aviisit saqqummersartut aamma atorneqartariaqarput.
Konsulentit
avataaninngaanneersut Namminersornerullutik Oqartussani annertuumik
atugaajartuinnarneri pingaartumik ukioq kingulleq pisimapput. 1998-iinnarmi 79
mio.kr.-nit missaat tamatumani atorneqarsimapput.
Taakkua aningaasarpassuit
suli atorluarneqarsinnaassagaluarput sulisinneqartut nalunaarusiaat aamma
plitikkikkut malinneqarnerusaleraluarpata. Assersuutitut taaneqarsinnaavoq
OECD-p nalunaarusiaa Nunaata anignaasaqarniarneranut tunngasoq aammalu
naalakkersuisut siulittaasuannit suliassiissutaasimasoq.
OECD-o Nalunaarusiaa
ersarissunik siunnersuuteqaqattaraluarpoq, maannakkut nalunaarusiat allat
assigalugit atuagaasivinni pujoralatsiinnartut ilagilersimagunarpaat, tamannalu
Atassummiit akueriuminaatsutut isigaarput.
Kukkunersiuinermi
Ataatsimiititaliap inassuteqaataa, soorlu Naalakkersuisut tamakkuninnga
atuinissaminni erseqqinnerusunik nalunaarusiortarnissaat Naalakkersuisunit
akuersaarneqarmat, tamanna Atassummiit alloriarnertut pitsaasutut
nalilerumavarput. Aningaasarpassuimmi atorluarniarnerusariaqarput.
Aallaqqaataani
oqaaseqarnittuut Kukkuneriuinermi Ataatsimiititaliap isumaqatigiissup
sakkortuuliorluni Isumaginninnermut Sulisoqarnermullu Naalakkersuisumut
isornartorsiuivoq.
Ajuusaarnaqaaq
eqquumeqalunilu Naalakkersuisunut ilaasortamut tunngasoq, taamaallaat
Naalakkersuisut akissuteqaamminni titarnernik tallimanik suliarimmassuk.
Taakkulu titarnerit tallimat taamaallaat oqaaseqarlutik: "Naalakkersuisut
misissuiniarlutik...".
Misissuinissaq taanna
Kukkunersiunermi Ataatsimiititaliap inassuteqaatigisaa pisariaqanngilaq
Naalakkersuisunut ilaasortarp apeqqummi maani pineqartumi qanoq
iliorsimanerinut allanut paasiniaassutigissallugu. Naammattumik saqqummiussani
ersarissarneqareerpoq. Ingerlatsivimmi kukkunersiuinerup atorfeqarfiup
apeqqummi pineqartumi qanoq annertutigisumik peqataasimanera misissortussaavaa.
Inatsisartunut paatsuunganartumik paasissutissiineq imaannaanngitsuuvoq. Aamma
imaannaanngitsuuvoq paasissutissanik paatsuungartunik sanarfineq.
Oqaluttarfimmiik
maanngaanniit pineqartumi avaanngunartumi qanoq pisoqarsimanera erseqqissartariaqarsoraara:
Siullertut:
1998-imi julip naalernerani
Naalakkersuisunut ilaasortap aningaasaqarnermut ataatsimiititaliaq
qinnuteqarfigaa Danmarkimi Innarluutillit isumaginnittarfiannit Kalaallit
Nunaanni innarluutillit isumaginnittariannut aningaasanik 2 mio.kr.-ningajannik
nuussisoqassasoq.
Qinnuteqaammi allassimavoq
Danmarkimi kontomi annikinnerusmik atuinissaq naatsorsuutigineqartoq
ikinnerusut Danmarkimukartinneqarnissaat pillugu aamma misissueqqissaarnerit
tamakkiisumik inummut ataatsimut aningaasartuutissat naatsorsuutigisaraluamik
annikkinnerusumik aningaasartuutigineqarnissaat.
Naalakkersuisunut
ilaasortap tunngavigilersuutini uppernarsarsimanngilai, aammalu taakku
kukkunersiuisunit akuerineqanngillat. Aningaasaqarnermut Ataatsimiititaliaq
taamaalilluni kukkusumik ilisimatitsivoq.
Aappaattut:
Aningaasaqarnermut
Ataatsimiititaliap qinnuteqaammut akuersinissaminut piumasaqaatigaa
Danmarkimukartinneqartartut akileriarnerannut sumik patsiseqarsimanersut.
Danmarkimi
Namminersornerullutik Oqartussat alleffeqarfiannit Isumaginninnermut
Pisortaqarfimmut naatsorsuutit nassiunneqarput Danmarkimi innarluutillit
isumaginniffianni konto-mut 3,8 mio.kr.-ninik atuinerusimanermik
takussutissartalik.
Naalakkersuisunut
ilaasortap ilisimatitsissut taanna Aningaasaqarnermut Ataatsimiititaliamut
ingerlateqqinngilaa, kisiannili 4. september 1998-imi ilisimatitsilluni
innarluutillit amerlisimagaluartut, taamaattoq naatsorsuutigineqartoq suli
Danmarkimukartinneqartussat ikileriarnissaat.
Paasissutissat taakku
aallaavigalugit Danmarkimilu innarluutillit isumagineqarfianni aningaasartuutit
3,8 mio.kr.-ninik qaangiiffigineqartussaanerat natsorsuutigineqartoq paasinagu,
Aningaasaqarnermut Ataatsimiititaliap akueraa aningaasat 1.792 mio.kr.
Danmarkimi innarluutillit isumaginniffiannit Kalaallit Nunaanni innarluutillit
isumaginniffiannut nuunneqassasut. Aningaasaqarnermut Ataatsimiititaliaq
kukkusumik ilisimatinneqarpoq paasissutissanillu pingaarutilinnik
isertuussivigineqarluni.
Pingajuattut:
1999-mi Aningaasaqarnermut
Inatsimmut siunnersuummi (juli, august 1998-mi suliarineqartoq)
Isumaginninnermut Pisortaqarfimmit missingersuutinut allanneqarpoq Danmarkimi
innarluutilinut tunngatillugu, inuit katillugit 125-t annertuumik
innarluutillit Damarkimiittut, taakku naatsorsuutigineqanngitsumik annertuumik
aningaasanut missingersuutip iluani, tassa 1999-miit 2002-mut allanngornissaat
(tassa taakkua allangornissaat naatsorsuutigineqanngilaq). Qinnutigineqarput
78.950 mio.kr., naak naatsorsuutit takutikkaluaraat 1998-imi atuisimaneq 84.400
mio.kr. kinguneqartussaasoq.
Sisamaattut:
1999-ip upernaavani
Naalakkersuisuni ilaasortarp Danmarkimi innarluutillit isumaginniffiannut
qinnuteqaatigai 9 mio.kr. Qinnuteqaatini tunngavilersorpaa regningit
kingusinaartumik nassiunneqarsimanerinik aammalu naatsorsuutaasimanngitsumik
Vestsjællands Amt-imi, Isumaginninnermut Pisortaqarfiup
sunniuteqarfigisinnaanngisaani, akitigut qaffariarujussuarsimanermik.
Tunngavilersuutit taakku
piviusuunngillat. Kukkunersiuisut Vestsjællands Amt-imut isumaqatigiissut
suliaatsillu misissoqissaarsimavai. Akit taamaallaat 161.000 kr.-ninik
qaffariarsimapput, aamma isumaqatigiissut suleriaatsillu naammaginarput
pitsaasuullutillu. Tassani Inatsisartut kukkusumik ilisimatinneqarput.
Tallimaattut:
Aningaasaqarnermut
Ataatsimiititaliaq isumaqatigalugu, Naalakkersuisunut Ilaasortap regninginik
kinginaartunik naatsorsuutigisimanngisaraluanillu akitigut qaffariarnermik
imartillugit tunngavile5rsuutini uppernarsaatitaqanngitsut uteqqippai.
Aningaasaqarnermut Ataatsimiititaliaq kukkusumik ilisimatinneqarpoq.
Arferngat:
Kingusinnerusukkut
Kukkunersiuinermut Ataatsimiititaliaq isumaqatigalugu Naalakkersuisunut
Ilaasortap regninginik kingunaartunik naatsorsuutigisimanngisaraluanillu
akitigut qaffariarnermik imaqartillugit tunngavilersuutini
uppernarsarneqarsimanngitsut uteqqippai. Kukkunersiunermut Ataatsimiititaliaq
kukkusumik ilisimatinneqarpoq.
Kiisalu arfineq-aappaat:
Aatsaat Kukkunersiuinermut
Ataatsimiititaliap kukkunersiuiarfik avataaneersoq suliamut tunngatillugu misissuisimmagu,
aatsaallu kukkunersiuisoq avataaneersoq Danmarkimi Namminersornerullutik
Oqartussat allaffeqarfiannut misissuiartormat qanorpiaq matumani
pisoqarsimanersoq iluamik paasineqarpoq, tassalu Kukkunersiuinermut
Ataatsimiititaliap kukkunersiuinermi nalunaarusiaani ilanngussaa ilassutaatut
(bilagiatut) takuneqarsinnaalluni.
Pisumi maani suna
Naalakkersuisut, minnerunngitsumik Naalakkersuisut siulittaasuata,
sukumiinerusumik misissuiffiginiaraat, Naalakkersuisunut ilaasortatut
allaqquttussaanngitsumik atorfimminit tunuarnissaanut aaljangiisariaqarneq
angutinnagu.
Kukkunersiuinermut
Ataatsimiititaliap isumaliutissiissutaanik suliarinnineq sapaatip akunneranik
ataatsimik kinguartinneqarpoq Naalakkersuisunut Siulittaasoq
periarfissinniarlugu inimi maani oqallinnissaq tujorminartoq
pinngitsoortinniassammagu. Taamatulli pisoqanngilaq, tamannalu uagut
Atassummiit sakkortuumik ajuusaarutigissavarput.
Naalakkersuisunut
siulittaasup tunngavilersuutigineqartut aallaavigalugit pineqartup qanoq
ajorluinnartiginera paasisimanngikkuniuk, taava siullermeerutaasumik
Naalakkersuisunut tatigininnginnermik taasisoqartissavarput, pisimasoq manna
aallaavigalugu. Qularinngilluinnarparput inimi maani arlalissuit
taperserumaaraatigut. Partiimut pituttorsimaneq ilaasortanut ima
amerlatigisunut ima sakkortutigisimassanerpa, allaat ileqqorissaarnissaq
nalinginnaasoq Inatsisartullu unneqqarissaartutut inissisimanerannik
tunulliussilluni taasisoqassappat Naalakkersuisunut ilaasortap
attatiinnarneqarnissaa aaljangiusimallugu, taava piumasaraarput ingerlatsivimmi
kukkunersiuinerup naammassiaarneqarnissaa ima siusitsigissasoq, suliaq manna
ataatsimiinnerup matuma naannginnerani inaareersimassalluni.
Taamaaliortoqanngippat
allatut periarfissaq tulliinnguuttoq tassaasariaqassaaq Inatsisartut immikkut
ittumik ataatsimiigiaqquneqarnissaat novemberip qeqqata missaani, imaluunniit
Isumaginninnermi Pisortaqarfik Inatsisartut tullissaanik ataatsimiinissaanut
politikkerimik aqunneqarani ingerlanissaa.
Taamak oqaaseqarluta
Inatsisartut Kukkunersiuinermi Ataatsimiititaliaata isumaliutissiisummini
inassuteqaatai Inatsisartunit akuerineqallaquvavut.
Lars Sørensen, Inuit Ataqatigiit oqaaseqartuat:
Inuit Ataqatigiinnit
upernaaq maana Landskarsip 1998-mut naatsorsuutai Naalakkersuisunut saqqummiunneqarmata,
naatsorsuutit saqqummiunneqartut ataatsimut isigalugit oqaaseqarfigaavut.
Landskarsip 1998-mut
naatsorsuutai naatsorsuutai, naatsorsuutigineqarsimagaluarput 175 mio.kr.
amigartooruteqassasut. Naatsorsuutillu saqqummiunneqartut naammasineqarmata 62
mio.kr. amigartoorfiupput, taamaattumik oqartoqarsinnaavoq naatsorsuutit
naatsorsuutigisamiit 113 mio.kr.-nimik pitsaanerumik angusaqarfiusut.
Taamatuttaaq Inuit
Ataqatigiinniit maluginiarparput upernaaq naatsorsuutit saqqummiunneqartut,
Namminersornerullutik Oqartussat kukkunersiuisuinit avataaneersunit
uparuagassartinneqarsimannginnerat, taamaalillunilu naatsorsuutit kukkunernik
amigaatinilluunniit pingaarutilinnik nassaartoqarsimanani.
Taamaakkaluartoq ukioq
manna ataatsimiinnitta nalaani Peqqinnisaqarfimmut tunngatillugu 8,5
mio.kr.-ninik Aningaasaqarnermut Ataatsimiititaliamut qinnuteqartoqarpoq
akilerneqartariaqartutut. Taakku tassaapput 1998-imut aningaasartuutit,
Landskarsip 1998-mut aningaasartuutaanut ilaanngitsut.
Inuit Ataqatigiinniit Inatsisartut
Kukkunersiuinermut Ataatsimiititaliaani naatsorsuutit sukumiisumik
misissuiffigineqarneranni minnerunngitsumillu pisortaqarfiit ataasiakkaarlugit
1998-mi aningaasatigut ingerlatitsisimanerat misissuiffigeqataaffigaarput.
Pisortaqarfiillu ataatsiakkaarlugit
1998-mut aningaasatigut ingerlatitsisimanerat oqaaseqarfigitinnagu siullermik
Inuit Ataqatigiinniit oqaatigissavarput, ajuusaarnartuummat
akuersaarneqarsinnaananilu Inatsisartut Kukkunersiuinermut Ataatsimiititaliaani
sulinitsinni pappiaqqat najoqqutassagut atorneqartut, isumarput naapertorlugu
ataatsimiititaliamit ilaasortanit taamaallaat ilisimaneqartussat atuagassiat
ilaannit avammut saqqummiunneqarsimanerat, ataatsimiititaliap
isumaliutissiissutaa suliluunniit ilaasortanit atsiorneqanngitsoq.
Taamatut iliortoqarsimanera
ataatsimiititaliami ilaasortanut ataasiakkaanut, tassa uvagutsinnut
tatiginninnermik apeqqusiivoq, immitsinnullu pasilleqattaannermik ilaqartoq.
Tamanna tupinnanngilaq Inatsisartummi Landskarsip naatsorsuutaasa kukkunersiorneqartarneranut
ataatsimiititaliaq tassaavoq ataatsimiititaliaq Inatsisit naapertorlugit
pilersinneqartussaq. Tamanna pisussaaffiliivoq tatiginartumik sulinissamut.
Neriuutigaarput pisimasoq taanna siunissami uteqqinneqasanngitsoq.
Landskarsip naatsorsuutaasa
kukkunersiortarneranut ataatsimiititaliap inaarutaasumik isumaliutissiissummini
paasissutissat nassiunneqartut tunngavigalugit, inassuteqaatai pingaarnerit
oqaaseqarfigissavagut.
Inuit Ataqatigiit
Kukkunersiuinermut Ataatsimiititaliaq isumaqatigaarput uparuaammat
naatsorsuutit atortussat ataatsimiititaliamut tunniunneqartussat, kalallisut
qallunaatullu oqaasertalerlugit tunniunneqartarnissaannik piumasaqaateqarmat.
Assersuutigalugumi KNR-p 1998-mut naatsorsuutaasa saqqummiunneqarnerat
taamaallaat qallunaatuuvi nassiunneqarsimapput, tamanna isornartutut
isigaarput, taakku siunissami aaqqinneqartariaqarput.
Ukioq 2000-mut atasumik
Namminersornerullutik Oqartussat qarasaasiatigut ajornartorsiutit
aaqqiivigineqarnissaanut Inatsisartut Kukkunersiuinermut Ataatsimiititaliap
1998-mili najoqqutassanik erseqqilluinnartunik peqartariaqarnerannik
piumasaqaataa qujanartumik Naalakkersuisut aasap ingerlaneranni
pimoorussillutik sulissutigilersimagaat. Tamanna nuannaarutissaavoq.
Pingaaruteqarluinnarpormi
inuiaqatigiinni immikkut pingaarutilinni ingerlatatta qularnaarneqarnissaat,
taakku tassaasinnaaput Peqqinnissaqarfimmut, Nukissiuuteqarnermut,
Nioqqutissanullu pilersuinermut tunngasut. Tamanna aamma atuuttariaqarpoq
Namminersornerullutik Oqartussat suliffiutaanit namminersortitanut aammalu
aktieselskab-iutaanut.
Naalakkersuisut novemberip
ingerlanerani Inatsisartunut ilaasortanut tamanut suleqatigiissitap sulinera
pillugu allakkatigut nassuiaammik nassiussaqarnissaat isumatusaarnertut
oqaatigisariaqarpoq.
Inuit Ataqatigiit
uparuartarsimavarput Isumaginninnermi Suliffeqarnermullu Pisortaqarfiup
kukkunersioriaatsimut ilitsersuusianik atasumik aallaavissatut
suliaqarsimannginnerat. Tamanna ukioq manna naammassineqarsimannginnera
sakkortuumik uparuaqqissavarput, piaarnerpaamillu suliassap taassuma
naammassineqarnissaa piumasaqaatigissallugu. Kingusinnerpaamillu ukioq manna
taanna naatinnagu naammasineqassasoq.
Inuit Ataqatigiit
iluarisimaarparput Naalakkersuisup naatsorsuuserinermut ilitsersuusiatut
pissarsiarineqartut pillugit atortumik ataatsimiititaliap inassuteqaataanik
naammassinninniarlutik suliniuteqarniarmata, tamatumani eqqarsaatigalugit
ingerlaavartumik nutarterneqarnissaat, taamaaliornikkut pissusiviusut
sukkulluunniit takussutissinnaaqqullugit. Pingaartumik immikkoortuni
ataasiakkaani aaqqissuussaaneq, suliassat oqartuussaafiit, akisussaaffiillu
pillugit naleqqussarneqassasut.
Inuit Ataqatigiit
maluginiarparput INI A/S ineqartunik sullissinerata paasissutissiisarneratalu
suli pitsanngoriartortup, Naalakkersuisunit qanimut malinnaaffiginiarneqarmat,
taamaattumik Ataatsimiititaliap boligstøtte-mut ukiorpassuarni akiligassatigut
kinguaattoorutit annertoorujussuarmik qaffakkiartornerata mumittuanut
saatinnissaanut suliniutaat taperserpagut, kaammattuutigissallugulu
akiligassanut pisoqalisunut INI A/S-p sullissinerata eqaallisarneqarnissaanut
suliniuteqaqqullugit. Pingaartumik INI A/S 1995-imi pilersinneqarnerata
sioqqullugu akiligassanut pisoqalisunut isumaqarpugut eqaannerusumik
akiligassatoqqanik isumakkeerinninnikkut sullissineq pitsanngorsartariaqartoq,
pingaartumik innarluuteqalersimasut, utoqqalinersiaqalersimasullu
eqqarsaatigalugit. Taamatuttaaq aamma ineqartut naapertuunnerusumik
kiassarnermut akiliutigigallartagaat piviusorsiornerusumik aaqqiivigineqarnissaanik
suliniuteqartoqarnissaanik ataatsimiititaliap inassuteqaataanut tapersiivugut.
Inuit Ataqatigiit
ataatsimiititaliap siunnersortinik avataaneersunik atuinermut atatillugu,
maleruagassanik ersarissunik atugassaqartitsinissamik piumasaqaataa taperserparput.
Siunnersortinik isumaqatigiissutit minnerpaamik piffissamut killilikkamut
atuuttariaqarput. Suliassallu suunerinik ersarilluinnartumik
tunngavilersukkanillu imaqartinneqartariaqarlutik.
Inuit Ataqatigiit
maluginiarparput pisortaqarfiit ataasiakkaat eqqarsaatigalugit aningaasatigut
aqutsinerat ataatsimut isigalugu ukiunut siuliinut sanilliullugu suli
pitsanngoriartortut. Akiliititsiniarnermut, taarsigassarsitsiniarnermullu
akiliisitsiniartarnerit eqqaassanngikkaanni. Taamaattumik Naalakkersuisunut kaammattuutigissavarput,
taakkununnga tunngasunik immikkut pingaartillugit suliniuteqaqqullugit.
Namminersornerullutik
oqartussat suliffiutaat nammineertitat, tassaasut Great Greenland,
Nukissiorfiit, Amutsiviiit, Mittarfiit aningaasatigut ingerlanerat qanimut
Naalakkersuisuniit malinnaaffigineqartariaqartoq, amigartoorutaasullu
sapinngisaq naapertorlugu minnerpaaffilerneqarnissaanik
suliniuteqartuartariaqarput.
Inuit Ataqatigiit
isumaqarpugut ingerlatitseqatigiiffiit Namminersornerullutik Oqartussanit pigineqartut
atorfillit siulersuisuni ilaasortaanerminnut ajunngitsorsiaqartinneqartarnerata
piaarnerpaamik malittarisassiuunneqarnissaat pisariaqartoq.
Inuit Ataqatigiinni
isumaqarpugut siulersuisuni toqqakkat ajunngitsorsiaat ilaatigut tassaasut,
atorfillip ataatsimiittarnermini akissarsiamigut annaasaqartarnermigut
matussutissai. Paasitinneqarnerput naapertorlugu atorfillit
Namminersornerullutik Oqartussanit pigineqartunit siulersuisunut ilaasortat,
sulisitsisuminnit akissarsiamikkut ilanngaanneqarneq ajorput, taamaalillunilu
sulinerminut atasumik marloriaammik ajunngitsorsiaqartinneqartarlutik.
Taamaattumik
Naalakkersuisut piaarnerpaamik piviusunngortissagaat Inuit Ataqatigiinniit
isumaqarpugut tassalu atorfimmut atatillugu ingerlatitseqatigiiffiit siulersuisuinut
ilaasortaasut ajunngitsorsiaasa Landskarsimut nakkartinneqartarnisssanut
ataatsimiititaliamit inassutigineqaqqittup piviusunngortinneqarnissaa
sulissutigisariaqarpaat. Tamannalu Nunani allani sanilliuttakkatsinni
atorneqareersoq, aamma upernaaq pikkorissartinneqarniitsinni kingumut
erseqqissarneqaqqippoq, taamaattumik Inuit Ataqatigiit qilanaaraarput
Naalakkkersuisut neriorsuimmata Inatsisartut aningaasanut inatsisaata
pingajussaaneerneqarnerani siulersuisunut toqqakkat pillugit malittarisassani saqqummiussinissaat.
Inuit Ataqatigiit
ataatsimiititaliaq isumaqatigaat suliffimmut atasumik biilimik pisinermi
atugassat 200.000 kr.-ninut killilerneqarsimasutut aalajangerneqarsimasut
qaangerneqartassanngitsut, aamma biilit taarserneqartussanngorlugit nalingisa
pisinermut atatillugu ilaatinneqartarnerisigut. Taamaalillutillu 200.000 kr.
biilit tunineqartut nalinginut qalliuteriarlugit biilinik 200.000 kr.
sinnerujussuarlugit nalilinnik pisisarnermikkut nammineerlutik maleruagassiatik
sanioqquttarmatigit, tamanna unittinneqartariaqarpoq.
1999-mut Inatsisartut
ilassutitut aningaasaliissutinut ilassutissaata siulliannut siunnersuutip
aappassaaneerneqarnissaanut atatillugu Aningaasaqarnermut Ataatsimiititaliap kissaatigaa
konto pingaarneq 30.13.10 Innarluutilinnik Danmark-imiittunik Isumaginninneq
Kukkunersiuinermut Ataatsimiititaliap misissuiffigissagaa.
Nalunaarusiallu
inerniliilluni oqaatigineqarpoq tassunga tunngasunik Aningaasaqarnikkut
aqutsineqarnera naammaginartuusoq.
Kontomi aningaasartuutit
allassimasut eqqortuusut aamma isumaqatigiissuteqarnermut tunngaviusoq. Allanut
isumaqatigiissuteqartarnermut sanilliullugu Namminersornerullutik Oqartussanit
ajornerusumik inissisimalersitsimanngitsoq.
Tamatuma saniatigut
nalunaarusiakkut naqissuserneqarpoq Pisortaqarfik Danmarkskontorip
Isumaginninnermut Immikkoortortaani 1998-mi august-ip 31-aniilli
ilisimatinneqarsimasoq 1998-imut 3,8 mio. kr.-nik ilassutitut
aningaasaliisoqarnissaanik pisaqariaqartitsisoqartoq.
Inatsisartut
Kukkunersiuinermut Ataatsimiititaliaata suliamut tunngatillugu sakkortuumik
uparuaanerata kingunerisaanik Naalakkersuisut kissaatigaat konto-mut
pingaanermut 30.13.10-mut tunngasut sukumiisumik qulaajarneqarnissaat.
Tamanna Inuit Ataqatigiinniit
taperserparput Inatsisartullu Ataatsimiititaliaannut kaammattuutigissavarput
suliamut tunngatillugu sukumiisumik qulaajaasoqarnissaa piaartumik
naammassiniarneqarnissaa aqqutissiuuteqqullugu, ajornanngippallu november-i
aallartitsinnagu suliap naammassineqarsinnaanissaa sulissutigeqqullugu.
Naggataatigut Inuit
Ataqatigiinniit oqaatigissavarput isumarput malillugu Landskasse-p
naatsorsuutai 1998-imut apeqquserneqartariaqanngitsunik akuerineqartariaqarmata
oqareernitsituut kukkunersiuinermut avataaneersunik kukkunernik
amigaatinilluunniit uparuaatinik ilaqartinneqarsimanngimmata.
Taamatut oqaaseqarluta
Inatsisartut Kukkunersiuinermut Ataatsimiititaliaanit inassuteqaatit
kaammattuutillu sinneri oqaaseqarfiginngisagut tamakkiisumik taperseratsigit
isumaliutissiissut oqaaseqarfigaarput.
Mogens Kleist, Kattusseqatigiit oqaaseqartuat:
Inatsisartut Landskarsip
naatsorsuutaasa Kukkunersiorneqarneranut Ataatsimiititaliaata
isumaliutissiissutaasa saqqummiunneqarnerannut tunngatillugit
Kattusseqatigiinniit imatut oqaaseqassaagut.
Landskarsip Kukkunersiuisuisa
saqqummiussaannut tunngatillugu Kattusseqatigiinniit saqqummiussat imarisaanut
tapersersuinerput oqaatigissavarput, tassalu Ataatsimiititaliap Siulittaasuata
saqqummiussaanut.
Taakkartukkat ataasiakkaarlugit
oqaaseqarfigissanngilagut. Pingaarutilittulli makkua Kattusseqatigiinniit
oqaatigerusuppagut.
Ukioq 2000 ajornartorsiutitut
taakkartukkamut tunngatillugu Naalakkersuisut oqaaseqarsimanerat tassalu
qarasaasiaqarnermut tunngasut aaqqiivigineqarnissaat ukioq manna naatinnagu
nuannaarutigaarput Naalakkersuisuniit ajornartorsiut ammaffigineqarmat
aaqqiiviginiarneqarneralu tamaviarunneqarmat.
Naatsorsuinermut ilitsersuutit
Namminersornerullutik Oqartussat Isumaginninnermut Pisortaqarfiani ukiuni
arlalinngortuni suli aaqqiivigineqarsimanngitsut Naalakkersuisut Siulittaasuata
piaarnerpaamik aaqqiivigineqarnissaannut iliuuseqartariaqarnera
Kattusseqatigiinniit oqaatigissavarput.
1995-imili aaqqiiniarnerit
ingerlanneqarsimapput maannali piffissanngorpoq pissutsinut taakkartukkatsinnut
aaqqiisoqartariaqalerneranut.
INI A/S-imut tunngatillugu,
kiassarnermut akiliutaavallaarsimasut 12,7 mio kr.-nit ineqartut akiitsuannut
nakkartinneqarsimaneri akuersaarneqarsinnaanngilaq, tassami INI A/S-ip
aningaasaqarneranut iluaqutitut taakkartorneqarsinnaammata aammalu kiassarnerup
ineqarnerullu akiliutaasa ataatsimoortumik akuliunneqarsimanerinut
aaqqinneqartariaqarnerat Kattusseqatigiinniit oqaatigerusukkatsigit.
Siunnersorteqarnerup sukumiisumik
aaqqiivigineqarnissaa Kattusseqatigiinniit tapersersorparput, tassami
siunnersortit iluamik atorniaraanni suliassaat aamma qanoq sivisutigisumik
atorneqarnissaat aaqqissuunneqartariaqarmata.
Aningaasat pitsaanerpaamik
atorniaraanni maleruagassaqartariaqarpoq tutsuvigineqartunik, ilami ukiumut
atorneqartartut assersuutitut 79 mio aningaasarpassuupput, taakkualu iluamik
atorluarniaraanni ersarissumik maleruagassaqartariaqarpoq, illua'tungaatigullu
aningaasat atorneqartartut ikilisinneqarsinnaaneri taakkartorsinnaavagut,
maleruagassanik peqalernikkut atorluaanikkullu.
Isumaginninnikkut Pisortaqarfimmi
Innarluutilinnut aningaasanik qinnuteqartoqarsimaneranut tunngatillugu
Kattusseqatigiinniit oqaatigissavarput suliap piaarnerpaamik
inaarsarneqarnissaa kissaatigigatsigu aammalu oqaatigerusupparput Inatsisartut
Kukkunersiuisartuisa suliartik naammassillugu Naalakkersuisunut
Inatsisartunullu tunniummassuk.
Naalakkersuisut immikkut
misissuisitsiniarunik piaarnerpaamik naammassinissaa kissaatigaarput.
Oqaatigissavarpullu Inatsisartut
ataatsimiinnerata naammassinnginnerani suliaq naammasseqqullugu. Suliamut
tunngatillugu Aningaasaqarnermut Naalakkersuisoq innersuuteqaraluarpoq oqarluni
15. november killilerlugu, tassunga siunnersuummut Kattusseqatigiinniit
akerliorusuppugut.
Taamatummi aaqqiisoqassappat
aningaasartuutit annertoqisut atorneqassammata ilaasortat aggersaqqinnerasigut.
Namminersornerullutik Oqartussat
Pisortaasa bestyrelseshonorar-eqarnerannut tunngasut Kukkunersiuisuniik
innersuutigineqartut Kattusseqatigiinniit taperserlugit oqaatigissavagut.
Naalakkersuisullu piaarnerpaamik
aaqqiinissaat innersuutigalugu.
Biilinut pisisarnermut
tunngatillugu oqaatigissavarput Naalakkersuisut-aasiit maleruagassatik
avaqqullugit iliuuseqartalereermata, tassami aalajangiunneqarsimammat biilitaarnermi
akigititaq qaangerneqassanngitsoq.
Taamaattorlu biilip atorunnaakkap
nalinga biilisiamut qallinngorlugu ilannguttalersimavaat. Tamanna
akuersaarneqarsinnaanngitsutut Kattusseqatigiinniit oqaatigissavarput.
Piffissamilu kingullermi
oqaluuserineqartoq konto 30.13.10-mut tunngatillugu Kattusseqatigiinniit
oqaatigissavarput Kukkunersiuisut suliarisimasaat Naalakkersuisuniit
apeqquserneqarpata misissuisitsiniarlik Kattusseqatigiinniit oqaatigissavarput
Kukkunersiuisut suliaat tatigigatsigit aammalu suliartik naammassereermassuk,
Naalakkersuisut apeqquserniarunikku Kukkunersiuisunut Kukkunersiuinermullu
Ataatsimiititaliamut tatiginninnermik takutitsissammata taamatut
misissuisitsinikkut.
Namminersornerullutik Oqartussat
suliffeqarfiinut isumaqatigiissutaasut, tassa servicekontrakt-it ersarissumik
aaqqiivigineqarnissaat Kattusseqatigiinniit innersuutigerusupparput.
Akiliutigineqartartut eqqortumik atorneqarnersut pillugit.
Suliffeqarfissuit ilaasa
aningaasatigut inissisimanerat nutarterinisaannut tunngatillugu siunissami
piaartumik aaqqiivigineqarnissaa aamma Kattusseqatigiinniit
innersuutigissavarput sakkortuumik.
Tassami aningaasatigut
amigaateqarneq ersarimmat suliffiit arlallit eqqarsaatigalugit, taasinnaasatta
ilagivaat Nukissiorfinnut tunngasut.
Peqqinnissaqarfimmi 8,5 mio
tunngasut Kukkunersiuisuniit taakkartorneqartut 1998-imut ilaanngitsunut
naatsorsuutigineqartunut ilaannginneri maluginiaqqissavagut oqaatigissalluguli
Naalakkersuisut aningaasatigut aqutsinerminni suliaat akiligassanik ikerinnakkut
nassaartarnerat unitsinneqartariaqarmat piaarnerpaamik taakkartorusupparput.
Taamatut oqaaseqarluta 1998-imut
Kukkunersiuisarsimasut saqqummiussaat tusaatissatut Kattusseqatigiinniit
tapersersorlugillu tigussavagut, neriullutalu taakkartukkagut Naallakkersuisuniit
tusarniarneqarumaartut.
Josef Motzfeldt, Aningaasaqarnermut Niuernermullu
Naalakkersuisoq:
Siullermik
amerlanerussuteqartuninngaanniit paasivara Landskarsip 98-imut naatsorsuutai
apeqqutitaqanngitsumik akuerineqarsaat amerlanerusunit tunuliaqutitaqarluni
naammassineqarsinnaasoq.
Tassa uani 8.5 mio
Peqqinnissaqarfimmut siornalitsat ukioq mannamut naatsorsuutit
ilaatinneqartariaqarnerat tunngavigiinnarlugu taamatut apeqqusiiniaraluarneq
paasivara amerlanerusunit aporfiginiarneqanngitsoq, tamannalu qujassutigaara.
Taavalu oqaaseqartut ataasiakkaat
tamaasa ataasiakkaarlugit tikitsinnagit, naatsorsuutigaara Naalakkersuisuni
Siulittaasut konto 30-nut tunngasut tassa immikkut Innarluutillit Danmarkimi
sulissunneqarneranut aningaasanik aqutsisimaneq oqaaseqarfigineqassasoq.
Erseqqissaatigerusupparali
Naalakkeruisut sinnerlugit uagut piumasarinnginnatsigu immikkut
ingerlatsisimanermi misissuisoqarnissaa, kisiannili Naalakkersuisut malipparput
Kukkunersiuinermut Ataatsimiititaliap kissaatigimmagu forvaltningsrevision-imik
taallugu, tassa imaappoq suliap taassuma ingerlanneqarsimanerata qanoq
ingerlasimanera Kukkunersiuinermut Ataatsimiititaliap inassutigimmagu, taanna
naammassiniarparput piffissaliunneqarsimagaluartoq Naalakkersuisuninngaanniit
november-ip qeqqata tungaanut pissuteqarpoq, sukumiisunik misissuinissaq
illua'tungeriinnillu oqaaseqaqqaarfigineqarnissaa taamatut
piffissalersinnaasorisimagatsigu, kisianni Naalakkeruisut
piareersimalluinnarput maani oqaatigineqartut naapertorlugit suliallu qanoq
annertutiginera najoqqutaralugu november-ip aallaqqaataanut piareereernissaa
naammassiniassallugu.
Ilaatigut oqaaseqarfigineqarpoq
aamma selskab-inik kiffartuusseqatigiinnissamik isumaqatigiissutit
ersarissarneqartariaqarnerat Inatsisartunit ilisimaneqassooq upernaaq
Naalakkersuisunngortitsinerup kingorna kiffartuussinissamik isumaqatigiissutit
tamaviisa Aningaasaqarnermut Niuernermullu Naalakkersuisoqarfimmut
tamakkiisumik pernartumik katersorneqarsimammata.
Taannalu aallaavigalugu
sanileriissikkuminarnerulersimapput ukioq tulleq isumaqatiginninniutissat
kiffartuusseqatigiinnissamut tunngasut nutarterniarnerini assigiissaarineq
piumasarisaasinnaasut aamma maani pingasunngornikkut apeqquteqaatini aamma
saqqummiunneqartut ilaatigullu oqaluuserisassanut massakkut ingerlatatsitut
ittunut oqaaserineqartut soorunami najoqqutaralugit Naalakkersuisut
selskab-inut ataasiakkaanut isumaqatiginninniarnerput ingerlatissavarput.
Tamakkiisumik uparuartorneqartoq
aamma Kukkunersiuinermut Ataatsimiititaliap uparuagaa tassaavoq siunnersortinik
avataaneersunik atuineq. Siusinnerusukkut Naalakkersuisuni taassuma
oqaluuserinerini, ataatsimiinnerup uumap ingerlanerani tassaavoq massakkut
missingersuusiortarnermut inatsit akuerineqaraluttuartup, akuerineqarpat
taassuma malitsigisaanik najoqqutassiornermi siunnersortit avataaneersut qanoq
atorneqarnissaat, qanoq akissaaserneqarnissaat atornerini piffissaliunneqartoq
qanoq killilerneqarsinnaanera ilanngullugu erseqqissarneqartussaammat.
Taammaammat pissutsit
uninngaannannginnerat isumaqarpunga aamma takussutissartaqartoq.
Siumup oqaluttuanit
eqqaamanngilara allanit oqaatigineqarnersoq, ksianni Kukkunersiuisarnermik
Ataatsimiititaliap sulinerminut aningaasat atugassaasa Inatsisartut
Allattoqarfianut nuunneqarsinnaanerat tikkuarneqarpoq.
Tamanna soorunami
pissusissamisoorsimasinnaavoq, kisiannili maannakkut pisariillisaanitsinni
tamanna piviusunngortissagutsigu peqqissaaffaarilluta ikaarsaariarneq taanna
ingerlattariaqarparput.
Naalakkersuisut ulluinnarni
ingerlatsinerminni illup iluani kukkunersiuisunik allisitsiuserluni
misissuisunik peqartariaqarpugut, taassuma saniatigut Inatsisartut
Allattoqarfiata ataani Kukkunersiuinermut Immikkoortortaqarlernissaa qanorlu
taassuma savik ipittoq atorlugu qanoq avissaartinneqarsinnaanera mianerilluinnaqqissaarlugu
pisariaqarmat Naalakkersuisuninngaanniit arajutsisimassanngilarput, kisianni
tukermersornavianngilagut tassani Inatsisartut Siulittaasoqarfiat
Naalakkersuisullu pisariinnerusumik nassaarsinnaappata tamanna Naalakkersuisut
piareersimaffigaat.
Taavalu selskab-ini siulersuisuni
ilaasortaatitat atorfillit akissarsiaasa qanoq inissinneqarnissaat
Naalakkersuisuni iliuuserisimasagut naammagineqanngitsut Kukkunersiuinermik
Ataatsimiititaminngaanniit malugivarput, taamaammat siusinnerusukkut
neriorsuereernitsigut ukiumut tullermut aningaasanut inatsisissap
pingajussaaneerneranni tamakkiisumik Naalakkersuisut akissuteqartussaapput
taanna neriorsuutaareerpoq.
Kisianni eqqarsaatiginarsinnaasoq
tassaavoq ilaatigut Kukkunersiuinermik Ataatsimiititap nalinginnaasumik
Landskarsip naatsorsuutaannai kukkunersiorunnaarlugit ingerlatsinermili
torersumik ingerlatsineqarnissaa eqqarsaatigalugu pisariaqarpasippoq
Kukkunersiuinermik Ataatsimiititap sulinermini tunngavigisai
annertusarneqarnissaat taanna siusinnerusukkut Inatsisartunit
oqaatigineqartareerpoq.
Tamatumalu Siulittaasoqarfik
peqatigalugu misissuiffigineqarsinnaanera isumaqarpunga pisariaqartoq soorlu
Folketing-imi Statsrevisor-it Naalakkersuisut ataasiakkaat ingerlatsinerat
aningaasanuinnaanngitsoq kisianni torersumik ingerlatsinersut
misissuiffigigasuarsinnaanerannut pisinnaatitaaffeqartut isumaqarpunga
orniginarsinnaasoq aniguiniarfigissallugu.
Taavalu
Kattusseqatigiinninngaanniit misissueqqissaarneq ataatsimiinneq manna
naatinnagu pisussaq tassa oqaaseqarfigereerpara tamanna Naalakkersuisut
ammaffigaarput.
Kiffartuusseqatigiinnissamut
selskab-inut isumaqatigiissutaasimasut tassa oqareernittut
missingersuusiortarnermi inatsit akuerineqariarpat taakkua
nakkutigiuminarnerujussuanngussapput najoqqutassaqarnerulissaagut sukumiisumik
najoqqutarinissaannut.
Tassungalu uiggiullugu
Kattusseqatigiinngaanniit oqaatigineqartoq ilaatigut nutarterinissanut atortut
pisoqalisut nutarternissaannut aningaasartuutissanik
isumannaarinninniartariaqartugut Naalakkersuisut tikkuaavigineqarpugut
assersuutitut Nukissiorfiit taaneqarlutik.
Nukissiorfiit pigisaat ullumikkut
1.4 mia missaani atortut nalilerneqarput nalinginnaasumilli ukiuni 15-ini
taakkua nalinginik taarsersuineq tassa malinnaasumik taarsersuineq ingerlanneqassappat
pinngitsoornani 100 mio angullugit atorneqartariaqarput.
Tamannalu Naalakkkersuisut
eqqumaffigaat ilaatigut atuisut akiliutaasa qaffaminernerisut aningaasat
naammattut pissarsiarineqarsinnaasut Naalakkersuisut eqqarsaatigaat, taassumalu
saniatigut iluarsaasseqqinnissarsuarmi aningaasaliunneqartut 341 mio
missaanniittut taakkununnga tutsinneqartussaasut Naalakkersuisut
pingajussaarinninnissamut saqqummiuttussaavaat.
Taamaammat tassani
Kattusseqatigiit Nukissiorfiit atortuutaannut 1.4 mia-nik nalilinnut
nutarteriniarnermut peqataanissaat Naalakkersuisuninngaanniit paasivarput
ammaffigineqartoq, tamannalu qujassutigaara.
Inuit Ataqatigiinninngaanniit
aallaqqaammut anersaaruluutigineqartoq tassaavoq Kukkunersiuinermut
Ataatsimiititaliap isumaliutissiissutaa atsiorneqanngitsoq, Naalakkersuisunut
apuunneqanngitsoq, illup avataanut tusagassiorfinnut imaluunniit aviisit
ilaannut ataatsimut tunniunneqareerluni naqinneqarmat.
Inatsisartuni sulinermi tamanna
annilaarutaasariaqartumik nakkarsaanermik Naalakkersuisut isumaqarfigaat.
Inatsisartut taanna susassaqarfigaat tatigeqatigiilluni sulinermi
toqqammaveqarluni isertuaatsumik imminnut periuseqarfiginissamut
tunngaveqarnermut ulorianartorsiortitsisuuvoq annertuumik, Naalakkersuisut
tamanna aamma eqqissiunnaarutigimmassuk miserratigissanngilara.
Naatsorsuutinngooq
qallunaatuinnaq oqaasillit akuerineqarsinnaanngillat Atassutikkut aamma Inuit
Ataqatigiinninngaanniit uparuarneqarpoq.
Tassunga tunngatillugu
akissuteqaammi Naalakkersuisuninngaanniit oqaatigeriigaq matumani pineqartoq
tassaavoq Kalaallit Nunaata Radioata naatsorsuutai qallunaatuinnaq
nassiunneqarsimaneri. Aappaattullu Ammeriuviup naatsorsuutai qallunaatuinnaq
nassiunneqaqqaarlutik Kukkunersiuinermut Ataatsimiititap sulinerata ingerlanerani
kalaallisut apuunneqarsimavoq.
Kisianni Atassutikkut
ajorinngippassut KNR-ip nammineersinnaatitaanerata innimigineqartarnera
oqalugiartarneri innersuussutigalugit Naalakkersuisut naalliuutissarinngilaat
KNR piumaffigissallugu naatsorsuutitik soorunami kalaallisut aamma
nassiuttassagaat.
Taavalu Inuit
Ataqatigiinninngaanniit alla tassaavoq BSU-mi illut utoqqalisunut aamma
innarluuteqalersimasunut tunngatillugu isumakkeerinninnissamik akiitsut
oqilisaassivigineqalernissamik.
Tassa akiitsunik annikillisaaneq
Inatsisartut tigummiarpaat. Inatsisartut akuersinermikkut
siunnersuuteqarnermikkut akiitsut qanoq amerlatigisut, Pisortanut
akiitsorineqartut, appartinneqarnissaat Inatsisartut aalajangersinnaavaat.
Tamanna takkuppat Naalakkersuisut uagut malitassaraarput.
Taavalu naggasiullugu Atassutip
oqaaseqartuanut. Ukua akileraarutit eqqaamassavarput ullumikkut
oqaluuserisarput tassaammat naatsorsuutit, Landskarsip naatsorsuutai
1998-iminngaanneersut. Akileraarutinut, ajunngitsorsianik
akileraartussaatitaanermik atuuttut 98-imut tunngasuupput.
Neriuppugut, uagut massakkut
Naalakkersuisooqatigiit 99-mi 98-ip naalernerani kaajallaasitaq
ingerlanneqarsimasoq malillugu soorunami ingerlatsisussat, allatulli uagut
inatsisit toqqammavigalugit pisussaaffigut naammassiniartussaavagut.
Atassutip oqaluttuanut
eqqaassutigissavara, taamanikkut Akileraartarnermut Naalakkersuisuunerma
nalaani pisimasut maani eqqartorneqarmata. Aammalu ilaatigut Daniel Skifte
maani ataatsimiinnermi annertuumik peqataasimannginneranut
patsiseqarsimagunartunik - aktieselskab-inut tunngasut aningaasatigut
ingerlatsinermikkut, aningaasatigut ingerlatsinermi killiffiinut tunngasut
massakkut ukiup tullerminngaanniit upernaakkut ukiakkullu
naatsorsuutigineqassammat, taakkua killiffiinut tunngasut Inatsisartunit
nassuiaatigineqartussaanerat.
Taanna missingersuusiortarnermi
inatsimmi pisussaaffitut ilanngullugu ukiakkut nassuiaateqartarnissaq maani
inimi oqaatigereerparput.
Kiisalu Atassutip oqaluttua
ilaatigut aamma oqarpoq INI ullumikkumulluunniit
paasissutissiisimanngimmalluunniit. Daniel Skifte sivisoorujussuarmik New
York-imiissimagaluarpoq, kisianni uagut Tv-mik isiginnaartartut nalunngilarput
ilaqutariit Petersen-ikkut INI-aasiit aggerpumi nukappiaraassuat suaallarmat, tassuunakkut
aammalu ineqartut matuminnga pisinnaatitaaffiannik ineqartut tamavimmik
immikkut allaffigineqareerput.
Naalakkersuisunut
akissuteqaatitsinni oqaatigereerparput junip naaneranut 850-it ineqartut
akiitsuminnik taarsigassarsiap allanngortitsisimaneq malereersimavaat.
Taamaammat INI A/S-ip aviisiliaa
kisiat matumani atorneqanngilluaasarpoq, kikkut tamarmik allagarsisimapput,
periarfissat nutaat suunerinik. Ilaatigut BSU-mit akiitsorilersimasat
imaluunniit akilinngitsuukkat annertuut taarsiassarsiarineratigut imaluunniit
sinneruttut akiligassat sinneri taarsigassarsianut nuunnerini illu pigisaq
ukiut 33-it utaqqeqqaanngikkaluarluni ineqartuminit pigineqalivissutut
oqartussaaffigineqavissutut pigineqalersinnaammat, INI A/S-ip aamma tamanna
tamanut paasisitsiniutigilereerpaa.
79 mio avataannit siunnersortunit
atorneqarsimanerat aamma Daniel Skift-ip eqqaavaa. Tassa 98-imi taamatut
atuisoqarsimavoq, aap, massakkullu siusinnerusukkut oqareernertut avataaniit
siunnersortit qanoq atorneqartariaqarnerannut, qanoq
akissarsiaqartariaqarnerannut qanoq sivisutigisumik atorneqartariaqarnerannut
assigiinngerusumik malittarisassat Naalakkersuisut suliariniarpaat.
Taavalu nalunaarusiaq
OECD-minngaanneersoq Daniel Skift-ip aamma annertuumik oqaatigaa ajuusaarutigalugu
Atassumminngaanniit ilisimagamikku nalunaarusiaq taanna pujoralatsiinnarluni
ilisivimmiitinneqartoq.
Aningaasaqarnermut
Naalakkersuisoqarfik iserfigigakkut, aap, nalunaarusiat arlalissuit
pujoralaajartariaqarsimagakkit, taanna nassuerutigissavara.
Kisianni Naalakkersuisuni
massakkut OECD-minngaanniit nalunaarusiaq pujoralatsiinnarlugu
uninngatinneqanngimmat Daniel Skiftep arajutsisimasariaqanngikkaluarpaa.
Massakkut
missingersuusiortarnermut inatsit pingajussaaneertussaavarput inimi maani aamma
Atassutikkunnit qujarunneqartoq. Tassanilu ilaatigut OECD-minngaanniit, aap
inassutigineqartut tassani toqqammaviupput.
Assartuinermi assigiimmik
akeqartitsinerup apparterititeriffigineqarsinnaaneranik OECD-miut
inassuteqaataat Naalakkersuisut isumatuutut isigigamikku massakkut matumani,
ataatsimiinnerup matuma naannginnerani nalunaarusiaq suliaritittussaavaa
Inatsisartuni, tassunga atatillugu aamma aningaasanut inatsisissaq
pingajussaaneerneqarnissaanut assigiimmik akeaqartitsinerup %-iata
appartinneqarnissaa Naalakkersuisut siunnersuuteqalersaarput. Neriuutigaara
Atassutikkut tamanna tapersersorsinnaassagaat.
Naalakkersuisut, ilaatigut
ilinniartitaanerup siuarsartariaqarneranut OECDmi nalunaarusiap inassuteqaatai
malillugit teknik-ikkut ilinniartitsiniarnerit, HTX-imik pilersitsiniarnerit
malillugit ingerlatsivugut. OECD-mi nalunaarusiami ilaatigut tikkuarneqarpoq
inuussutissarsiutinut tapiissutigisartakkavut 600 mio missaaniittut taakkua
annikillisarneqartariaqartut, Aningaasanut Inatsisissami 2000-imi Naalakkersuisut
tamanna malippaat.
Daniel Skifte aamma tassani
partiimini ilaasortaatitaqarpoq Aningaasaqarnermi Ataatsimiititami.
Kiisalu ineqarnermut
akiliutaasartut, inissialiortitsinermi aningaasalersueriaatsit
nutarterneqartariaqarmata OECD-mi nalunaarusiami ilaatigut oqaatigineqartut
malillugit ukioq 2000-imi upernaakkut ataatsimiinnissami Naalakkersuisut
iluarsiissutissamik siunnersuuteqalersaarput, piareersaateqarpugut.
Taavalu aamma
Namminersornerullutik Oqartussat pigisaani selskab-ini namminersortunut
piginneqataasinnaalernissaq ammaallugu massakkut pimoorullugu Naalakkersuisut
oqaasiinnaanngitsumik ingerlappaat.
Eqqaamasariaqartarpoq kisianni
tassaavoq nalunaarusiarujussuit taama ittut sutut upperisassatut
aallaqqaataaniit naggataanut upperineqartussatut Naalakkersuisut isiginngilaat,
isumassarsiorfissatut isigaat aammma inassutigineqartut, quppernerni 99-ini
inassutigineqartut, ukiumiit ukiumut aqaguinnarlugit naammassisinnaanngilagut.
Taamaa iliorsimassagutta uppertikkuminarpallaarsimassaqaagut.
Pissutsit Nunatsinni maani
atuuttut aningaasaannavinnit toqqammaveqarluni iluarsaanneqarsinnaanngimmata
Naalakkersuisut arajutsisimanngilaat.
OECD-kormiut isiginneriaasiat
aningaasaannavik qiteritillugu ingerlatseriaatsimik aallaaveqarpoq.
Iluatinnartortaali atorsinnaagatsigit, tamanna atorluarniarsarivarput.
Kiisalu tatiginninnginnermik
Daniel Skiftep taasisitsinissami oqaaseqarnera, Naalakkersuisut piareersimapput
Inatsisartut Kukkunersiuinermut Ataatsimiititaliaata misissuisitsisimanera
naammassippat, taassuma innersuussutai malissallugit.
Siusinnerusukkut KNR-imut
tunngasut, Daniel Skiftep aamma eqqaamassavaa aamma Atassutikkut eqqaamassavai,
siusinnerusukkut KNR-imut tunngasut ingerlatsinermi inatsisit atuuttut pingasut
unioqqutissimasutut uppernarsarneqarmat Inatsisilerituunit
nassuiaatigineqartutigut, tatiginninnginnermik taasisitseriartoqaraluarmat
maanngaanniit Atassutikkut tamanna ilassiumasimanngimmassuk taanna
eqqaasitsissutigilaaginnassavara.
Kisianni qujanaq, kusanartumik
oqaloqatigiinneq. Kukkunersiuinermut Ataatsimiititap isumaliutissiissutaa
aallaavigalugu sulinerup torersumik aallariarnera isumqarpunga ukiunut
tullinnguuttunut suleqatigiinnissamut tunngavigissallugit pitsaasuusut.
Lars Karl Jensen, ataatsimiititaliap siulittaasua, Siumut:
Siullermik Landskarsip
Naatsorsuutaasa Kukkunersiorneqartarneranut Ataatsimiititaliaq sinnerlugu
pinngitsoorusunngilanga akissuteqaatigineqartunut Partiit ataasiakkaat aamma
Kattusseqatigiit kiisalu Naalakkersuisut maani saqqummiussatsinnut akissuteqaataannut
qujassuteqassallunga.
Aammali
oqaatiginngitsoorusunngilara Naalakkersuisut akissuteqaataatigut ersermat
siornersortinik avataaneersunik atuinermi tunaartarisassanik atuinissaq taanna
qularutiginngilluinnarpara Kukkunersiuinermik Ataatsimiititaliami sulinermi
atugassatut qilanaarineqarumaartoq.
Kukkunersiuinermik
Ataatsimiititaliami sulinermi tunngavissatigut ersernerluttunik peqartillugu
aamma kipiluttunartarmat misissuinerillu annertuut suliamik atasumik nammineq
ilutsinni aallartinneqartarlutik.
Una Ataatsimiititaliat marluusut
tassani Kukkunersiuinermi aamma Aningaasaqarnermut Ataatsimiititaliat
innersuussutigisaat siorna maani inimi Kukkunersiuinermut Ataatsimiititaliaq
saqqummiimmat Siulersuisunut ilaasortat aningaasarsiaannut tunngasumik aaqqiissuteqarnissamik
inassuteqaat.
Qanoq iliuusissatut
saqqummiunneqartoq uani Naalakkersuisuninngaannit oqaatigisinnaavakka uanga
ersarissutut isigigakkit aammalu qularnanngitsumik pissutsinik taama ittuni
siunissami immitsinnut pilertortumik ilisimatitseqatigiinnissat
aqqutigisinnaagutsigit tamakkua mikisualuit annertoorsuanngorlugit maani
oqallisigineqartassanngikkaluarput.
Uani konto 30.13.10 tassunga
suliakkiinitsinnut Naalakkersuisunut saaffiginnilluta Ataatsimiititaliamiit.
Naalakkersuisut qanoq iliuusissatut saqqummiussaat Kukkunersiuinermut
Ataatsimiititaliami tamarmik ilaasortaasut tunngaviisigut tapersernikuuaat.
Kisianni uani partiini
oqaaseqartuninngaanniit malugisinnaavara aamma ulluliunneqartoq taamatut
misissuinissami 15. novemberimi naammassineqarnissaa tulluartinneqanngitsoq
uanilu Ataatsimiititaliaq sinnerlugu isummernernik oqaatigisaqarnanga
Siumuminngaanniit tassunga tunngasut innersuussutigiinnassavakka aamma
takusinnaavara akerlerineqanngitsoq suliassap piaartumik naammassineqarnisaa
tamanna qilanaarineqarmat.
Assigiinngitsualuit
oqaaseqarfigiuminassagaluartut tulluarsorinngilara Ataatsimiititaliap
Siulittaasuattut malaatiinnarlugu oqaatigissagukkit saqqummiunneqartut tamarmik
Ataatsimiititaliami torersumik suliarineqarumaarput.
Taamatut oqaaseqarlunga naatsumik
eqqaaginnassavara oqareernittuut maani Partiit ataasiakkaat Kattusseqatigiit
aamma Naalakkersuisut isumaliutissiissutitsinnut oqaseqaataat
qujassutigigakkit.
Jonathan Motzfeldt, Naalakkersuisut Siulittaasuat:
Naalakkersuisuninngaanniit
oqaatigineqareersutut erseqqissaatigiinnarlugu ilassutigalugu oqaatigissavara
Kukkunersiuisut nalunaarutaat Siulittaasuata atuagaatulli aamma
Aningasaqarnermut Naalakkersuisup atuagaatulli taama uanga paasisimagiga.
Tassani kalaallisuuani innersuunneqartoq,
tassa timimikkut innarluutillit pillugit 30.13.10-mi oqaatigineqartuni, taanna
atuarpaa Siulittaasup aamma erseqqissumik Kukkunersiuinermut Ataatsimiititaliap
suliamut tunngatillugu naggataatigut oqaatigissavaa suliap imaannaanngitsuunera
pillugu .......... taanna Siulittaasoq Isumaginninnermut Suliffeqarnermullu
Pisortaqarfik allaffeqarfittut misissuiffigineqassasoq. Tassunga atatillugu
sukumiisumik misissorlugu konto 30.13.10 konto-llu sinneranut tunngatillugu
Pisortaqarfimmi pissusiviusut Naalakkeruisunut ilaasortamit
ilisimaneqarsimanersut, taassumalu malitsigisaanik maleruagassatut atuuttut
malillugit akisussaatitsisoqarsinnaanersoq Kukkunersiuinermut
Ataatsimiititaliap isumaa malillugu Inatsisartut Kukkunersiunermut
Ataatsimititaliaq Aningaasaqarnermullu Ataatsimiititaliaq kukkusumip
paasitinneqarsimammata imaluunniit paasissutissanik atunngeriikkanik
pisariaqartunillu isertuunneqarsimammata.
Qassiiliornerujussuaq
pinngikkaluarlugu suliassaq tassaniittoq Naalakkersuisut suliariniarpaat.
Taamaattumik ulluni kingullerni
oqaaserineqartut allarpassuit oqaaseqarfigissanngilakka suliaq manna
ingerlammat Kukkunersiuisut kikkuuneri suliallu qanoq ingerlassimaneri
misissussapput aamma uagut nammineq sulisutta misissortariaqagaat
misissussavagut.
Isumaginninnermi
Direktorat-eqarfimmi suliamik ingerlatsisimasut misissorneqarput, tassani
apeqqutit annertuut tamarluinnaqqissaamik misissorneqarnerat naammassiniarlugu
sulisinnaasut tamarmik maannakkut sulisitaapput.
Taamaattumik Aningaasaqarnermut Naalakkersuisup
oqaaserisaa ilumoorpoq november-ip aallaqqaataa tikitsinnagu sapinngisamik
paasissutissat naammattutut isigisariaqartut Naalakkersuisunut
pissarsiariniarneqarput.
Ataatsimilluunniit uani
isumaqartoqassanngilaq Naalakkersuisut sumilluunniit kinguarsaasut,
taamaattoqanngilaq.
Uagut ilissitulli suliassatta
aamma pitsaasumik ingerlanissaat aamma siunertaraarput, kukkuneqanngitsumik
ingerlanissaa siunertaraarput, kisianni takujuarparput ingerlatsivitsinni
suleriaatsivut ilaatigut oqimaatsorujussuusut.
Innarluutilinnut tunngatillugu
isumaqarpunga 1986-ikkunnilu Socialminister-eqarfik suleqatigalugu tappavani
suliassat ingerlanneqarneri, soorunami akiligassat tamarmik
nakkutiginiarneqarput aamma.
Regionalkontor-it Kujataani
Avannaanilu pilersinneqarnerinut atatillugu suleriaatsit malugisinnaavakka suli
iluarsartariaqartunik aamma ingerlatsiviusut, Regionalkontorit ilaatigut
toqqaannartumik Avannaaniit Kujataaniillu innarluutilinnik
aallartitsisinnaanerat aamma ingerlanneqartoq ilaatigut misissugassanut
ilaatinneqarpoq.
Taamaattumik aamma suleriaatsip
erseqqissaavigineqarnissaa noqqaaneq patsisissaqarluinnartutut aamma uanga
isumaqarfigaara, taamaattumillu tassani suliassat neriuppunga
paaseqatigiiffigineqartut.
Aamma nuannaraara amerlanerit
isumaqarmata taamatut suliassap piaartumik naammassiniarnissaa anguneqassasoq.
Aamma uanga kissaatigeqaara piaarnerpaamik suliassaq taanna naammassissasoq.
Nalorninerillu uaniittut aamma peerneqassallutik.
Paasigakku
Bestyrelse-qartitsinermut tunngatillugu apeqqut aningaasaqarnermut
pingajussaanerinninnermi suliarineqarumaartoq, taanna naammagisimaarpara, massa
aalajangerneq taama ittoq aamma maannakkut oqallisiginianngikkaluarlugu
oqaatigerusullugu.
1992-iminngaannit atorfillit
Hjemmestyre-mi atorfeqartut ikkunneqartut akissarsiaqaratik sulisimapput
aallaqqaammut. Aatsaat 90-ikkut qiteqqunneranni atorfillit
akissarsiaqartitaanerat atulersitaasimavoq.
Taannalu kingornussarsiaq uagut
aamma ingerlassimavarput Naalakkersuisuunitsinni maannakkullu siorna aalajangerneqartoq
tunngavigalugu sukaammiinerit aallartissimavagut aamma suli sukaterinissarput
tassani aamma siunertaralugu.
Kisianni aamma oqassaanga
suliassat suulluunniit imaaligaanga apeqqutigisassavarput aaqqissuussineq
tassani atorfimmi atuisinnaanermi atorfillit atorfiinit mattussigutta
qinigassagut qumartitaarujussuassannginnersut uagut inuit akornatsinni
suliatsinni ilisimaarinnittunut atuinissatsinnut, aamma maakkut atugarisagut
atorfinitsitaanerminnut atatillugu ilisimatitaasimanngillat suliassaannut ilaassasoq
Siulersuisunut ilaasortaanissaq akeqanngitsumik.
Kisianni maannakkut
akilerneqarsimanerat taanna atulersimammat 90-ikkut qiteqqunneraninngaanniit
taamaattumillu atorfilittami soorunami ilisimanngilaat akeqanngitsumik aamma
tamakkununnga sulisinneqarnissaminnik qinnuigineqarnissartik.
Kisianni pissanganassaaq
taamaattunik atorfilinnik akeqanngitsumik aamma sulinissamut nassaarniarnissaq
naammassiniassallugu.
Taakkua pingajussaarinninnermi
annertunerusumik oqalliffiujumaarmata tassinga killiinnassavara. Kisianni
oqaatigissavara naammagisimaaratsigu taamatut suliassat ingerlasimaneri aammalu
misissugassanik taamaattunik suliassiinermi kisinnerusukkut Naalakkersuisunut
apuussisarnissaq aamma pissusiusimavoq ileqqoq ajunngitsoq.
Maannakkut saqqummiunneqartoq
ilaatigut Naalakkersuisunut apuunnatik avataaninngaanniit siulliusumik
saqqummiunneqarneri aamma Inatsisartut paasisinnaassavaat uagutsinnut aamma
erloqinarsimammata kingornginnaatigut paasissutissanik assigiinngitsunik
paasiniaanissarput aallartittariaqarsimammat.
Kisianni oqaatigereerpara
maannakkut november-ip aallaqqaata tikitsinnagu tassaniittut
naammassiniagassartai anguniarneqarumaartut.
Daniel Skifte, Atassut:
Suleriusissatut maleruagassap § 44-a
malillugu ullormi oqaluuserisassap immikkoortuata 42-p
isumaqatigiissutiginiarneranut atatillugu siunnersuut.
Matumuuna Inatsisartunut
Ilaasortat ataatigut atsiortut tassa Atassutip Landstingsgruppe-a.
Ataatsimiinnerup minutsit 10-t missaanni unitsinneqarnissaa siunnersuutigaat
ullormut oqaluuserisassat nangeqqinneqannginnerineri .
Tamanna tunngavilerneqarpoq
Isumaginninnermut Suliffeqarnermullu Naalakkersuisumut tatiginnikkunnaarnermik.
Siunnersuut naatsumik ima
tunngavilerneqarpoq, Naalakkersuisunit naammaginartumik akissummik
saqqummiussisoqanngilaq.
Qinnuteqaatigissavarput
siunnersuut, unitsitsiareernerup kingorna taatissutigineqassasoq, immikkoortoq
42-p isumaqatigiissutiginiarnerani, siunnersuullu manna ataatsimiinnermi
aqutsisumut tunniuppara.
Mikael Petersen, Isumaginninnermut Suliffeqarnermullu
Naalakkersuisoq:
Atassutip oqaluttuata kingulliup
oqaasii uanga oqaaseqarfigissanngilakka.
Kisiannili Kukkunersiuinermut
Ataatsimiititaliap isumaliutissiissutaanut tunngatillugu ilaatigut taaneqartoq
tassa Inunnik Isumaginninnerup Pisortaqarfiup Naatsorsuusioriaatsit pillugit
maleruagassat atugai aammalu taakku nutartertariaqartut.
Taanna eqqaneqartoq pillugu
erseqqissaatigissavara Isumaginninnermut aammalu Sulisoqarnermut Pisortaqarfiup
siornali 98-imi august-imi maleruagassat nutaat atorlugit
ingerlalereersimammat.
Tassani suna
paatsuungassutaasimanersoq soorunami aaqqiivigineqassaaq aamma soorlu
Aningaasaqarnermut Ataatsimiititaliap ilaatigut aamma ujartugaa
naammassisinnaajumallugu.
Aningaasaqarnermut
Naalakkersuisup akissuteqarnermini erseqqissumik oqaatigereerpaa taakkua
ingerlateqqinneqarumaartut.
Kisianni tassa siornali
tunngaviit maleruagassallu taakku atuutsinneqarput aammalu tassunga
ilanngullugu oqaatigisariaqarpara ulloq unnuarlu paaqqinnittarfiit
naatsorsueriaatsit ingerlanneqarneri pillugit suliat ingerlammata.
Aamma Inatsisartut eqqaamassavaat
Inunnik Isumaginninnermut Sulisoqarnermullu Pisortaqarfimmi mia-it angullugit
aningaasat ingerlanneqarput, taamaattumik suliarujussuuvoq inunnut
ikittuinnarut suliakkiissutigineqartartoq, kisianni tassa
naammassiniaqquneqartut Pisortaqarfiup naammassiniassavaat.
Konto 30.13.10 pillugu uannut
tunngassuteqartut imaannaanngitsorsuupput allaat inuttut uanga pineqarlunga
tassani tamassi nalunngilarsi aamma innuttaasut tamanna nalunngilaat
Naalakkersuisulluunniit akissuteqarnissaminnut periarfissaqanngitsut
taamaaliorsimanngitsullu innuttaasut tamaavimmik Kalaallit Nunaanni paasivaat
avataanilu.
Taamaattumik annertunerusumik
oqaaseqarnanga uunga suliamut tunngatillugu erseqqissaatigissavara uanga
nammineerlunga ataasinnguamilluunniit isertuussaqannginnama aamma
ataasiarlungaluunniit paasissutissanik kukkusunik piaaralunga
tunniussaqarsimanngisaannarama.
Oqaaseq piaaraluni
imaannaanngitsuuvoq, uanga Naalakkersuinikkut akisussaaffinni, ukiuni marlunni
massakkut ingerlasimasuni, suliarparujussuit ingerlassimavagut, soorunami
mianernartorpassuupput aamma sapinngisamik pisinnaanerput naapertorlugu
peqqissaartumik ingerlanniarsimavagut.
Kisitsisitit ataasiakkaat
paatsuungassutigineqassappata tupinnanngilaq, tassami kisitsiserpassuit
ingerlanneqarmata.
Kisianni Inatsisartunut
erseqqissaatigissavara Aningaasaqarnermut Ataatsimititaliamut aammalu
Kukkunersiuinermut Ataatsimititaliamut Inatsisartunullu kisitsisit taasat
allalluunniit paasissutissat uanga Pisortaqarfimma tunniussaat aallaavigalugit
ingerlasarmata.
Erseqqissaatigeqqilaassavara
Danmark-imi Pisortaqarfiup, uagut immikkortortaqarfitta, kisitsisaatai uagullu
Pisortaqarfimmi tunngavigisagut kisitsisit taakkua imminnut
assortuussinnaasarmata, kisiannili Naalakkersuisoqarfimmi naalakkersuinikkut
akisussaasut ingerlaqqeriarfii taakkua uanga akisussaaffigaakka.
Taamaattumik kissaatigaara
kukkusumik tunngaveqarani aamma paasinerlunneqarsinnaasumik tunngaveqarani
suliassap matuma ingerlanneqarnissaa.
Taamaattumik nuannaarutigaara
Inuit Ataqatigiit, Siumukkut Kattusseqatigiilluta suliassap
misissueqqissaarnissap Naalakkersuisunit ingerlanneqartussap piaartumik
naammassineqarnissaa inassutigimmassuk.
Naggataatigut
erseqqissaatigiinnassavara naalakkersuinikkut tamatta uani inimi anguniaratsigu
Danmark-imiittuutitta innarluutillit Nunatsinnut nutserneqarnissaat.
Tamannalu pillugu sulivugut
tamatta, nalunngilarsi.
Danmark-imut nassiuttakkatta
amerliartornissaat anguniagarinngilarput anguniagaraarput Nunatsinnut
angerlartinneqarnissaat, angerlarsinnnaasut.
Taamaattumik konto taassuma
ilaartuinnarlugu pinissaa anguniagaanngilaq, kisianni taamaakkaluartoq
tappavani sullitatta naleqarneruleriartornerat aallaavigalugu uanga
Naalakkersuisuunerma nalaani konto taanna naak innarluutillit
amerlanerulinngikkaluartut 10 mio sinnerlugit qaffaaffigineqarsimammata
Taamaattumik inernivia
siunertarlu assilissamik takutitsinngillat, konto taanna piaaraluni
millisarneqarsimasoq.
Daniel Skifte, Atassut:
Inatsisartut Kukkunersiuinermut
Ataatsimiititaliaata isumaqatigiissutaa 12. oktober 1999-meersoq
innersuussutigalugu Ataatsimititaliap ataatigut titarlugu isumaqatigiittup ima
allannera, issuaaneq.
Kukkunersiuinermut Ataatsimiititaliap
isumaa malillugu Inatsisartut Kukkunersiuinermut Ataatsmititaliaq
Aningaasaqarnermullu Ataatsimiititaliaq kukkusumik paasitinneqarsimammata
imaluunniit paasissutissanik nalunngeriikkanik pisariaqartunillu
isertuunneqarsimammata, issuaanera naavoq.
Matumuuna suleriusissatut
maleruagassap § 5 immikkoortoq 2 innersuussutigalugu inassutigissavarput
Isumaginninnermut Sulisoqarnermullu Naalakkeruisoq qinigaaffiup matuma
sinnerani suliaminit tunuartinneqarnissaa.
Taannalu Landstingsgruppe sinnerlugu
atsiorpara.
Anders Andreassen, Siumut:
Tamatumuuna saqqummiutissavara
Siumup Inatsisartuni ilaasortai sinnerlugit aammalu Inuit Ataqatigiit
Inatsisartuni ilaasortai sinnerlugit allannguutissatut siunnersuut.
Inatsisartut suleriaasiat § 43
naapertorlugu ullormut oqaluuserisassatut siunnersuut.
Inatsisartut Nalakkersuisut
siunnersuutaannut tassa konto pingaarneq
30.13.10 erseqqinnerusumik
misissuiffigineqassasoq pisutsit akisussaassuserlu paasiniarlugit pingaartumik
Isumaginninnermut Naalakkersuisup tamatumuuna inissisimanera Inatsisartut
taperserpaat ullormut oqaluuserisassanut tullermut ingerlanissaq.
Mogens Kleist, Kattusseqatigiit:
Kattusseqatigiinniit
oqaatigissavarput suliaq Kukkunersiuisuninngaanniit tunniunneqarpoq
Naalakkeruisunut suliaq suli naammassitinnagu Atassumminngaanniit
siunnersuutaasoq uagut tungitsinninngaanniit akuersaarusunngilarput una
pissutigalugu, suliaq suli naammassinngilaq aamma Naalakkersuisuninngaanniit
neriorsuutigineqarpoq Inatsisartut ataatsimiinnerata iluani suliaq
naammassineqassasoq.
Taamaattumik suliaq taamaattoq
naammassisimatinnagu Atassutikkunninngaanniit taamatut siunnersuuteqartoqarnera
uagut tungitsinninngaanniit taamatut akuersaarusunngilarput. Suliaq
takoqqaarniartigu naammassillugu qanoq inerneqassanersoq taava taamanikkussamut
naliliissaagut Inatsisartuni maani.
Josef Motzfeldt, Aningaasaqarnermut Naalakkersuisoq:
Suliassaq una Atassutikkut
massakkut suliassanngortitaat pillugu Kukkunersiuinermut Ataatsimiititap
aammalu avataaniit kukkunersiuisut oqaaseqaataat innersuussutigissavagut
Naalakkersuisuninngaanniit naatsorsuutit namminneq isorineqanngillat.
Taamaattumik
Naalakkersuisuninngaanniit akissuteqaatitsinni oqaatigisarput Siulittaasunut
maluginiaqqusarput tassaavoq. Kukkunersiuinermut Ataatsimiititap inassuteqaataa
kingullerpaaq taanna atuarneqartoq Landskarsip Naatsorsuutaasa
kukkunersiorneqartarnerannut Ataatsimiititaliami isumaqatigiillutik Landskarsip
1998-imut naatsorsuutaasa taava kukkunersiugassatut sillimaffigisassartaat
sillimaffigineqartussanngorlugu, taakkuukua oqaaseqatigiit uagut
peeqqugaluarigut.
Taamaattumik imaalillugu.
Landskarsip naatsorsuutaata kukkunersiorneqartarnerani Ataatsimiititaliami
ilaasortaasa isumaqatigiillutik landskarsi 98-it naatsorsuutaasa Inatsisartunit
akuersissutigineqarnissaat inassutigissavaat taamaaliinnarlugu.
Allannguutissatut tassa taanna Naalakkersuisut siunnersuutaat aamma paasivara
isumaqatigineqartoq.
Jonathan Motzfeldt, Naalakkersuisut Siulittaasuat:
Taasissutigineqartinnagu
Atassutikkut siunnersuutaat taanna immikkut taasissutigineqartussaammat
oqaatigissavara isumaqarlunga Naalakkersuisuninngaanniit naaperiarfipput
annertusimasoq, soorlu aamma Kattusseqatigiinni oqaaseqartoq Mogens
Kleist-itorluinnaq aamma Partiinit allanit paasineqarmat aamma Atassutip
nammineq oqaaseqartuata erseqqivissumik oqaatigimmagu Inatsisartut
unneqqarissaartutut inissisimanerannik tunulliussilluni taasisoqassappat.
Naalakkersuisunut ilaasortat
atatiinnarneqarnissaa aalajangiusimallutigu taava piumasaraarput ingerlatsivimmi
kukkunersiuinerup naammassiaarneqarnissaa ima siusitsigissasoq suliaq manna
ataatsimiinnerup matuma naannginnerani inaarsarneqarsinnaatillugu.
Naalakkersuisut neriorsuipput ataatsimiinneq naatinnagu suliassaq taanna
naammassiniarlugu.
Taamaattumik taanna
neriorsuuterput Atassutip oqaasii uani oqaluttarfimmi upperalugit aamma
naaperiarnissaat taama kisaatigaarput. Aamma Inatsisartut unneqqarinnerannut
ilaavoq illuata tungaatigut misissugassanik amigaateqarsorisanik
paasisaqarniarluni noqqaanerit naammassiniassallugit.
Aamma tamanna inuttut
unneqqarissutut iliornermut aamma ilaavoq. Inatsisartullu aamma unneqqarissumik
aalajangiinerattut isigisariaqartoq illuata tungaatigut misissugassat
amigarineqartut naammattumik misissorniarneqarmata.
Oqaluuserisaq naammassivoq.