Oqaluuserisassani immikkoortoq 42-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik
aqutsisoq, Inatsisartut Siulittaasuat Johan Lund Olsen:
Inatsisartut
ataatsimiinnerat tassa kinguartinneqareerluni maannakkut aallarteqqippoq. Tassa
ullaaq isumaqatigiissutigineqareersutut tassa siullermik immikkoortoq 42
siulliullugu oqaluuserissavarput. Tassalu Inatsisartut Landskarsip
Naatsorsuutaasa Kukkunersiorneqartarnerannut Ataatsimiititaliaata
isumaliutissiissutaa, tassa taanna ingerlateqqitaq.
Tassani Ataatsimiititaliaq
tassa Inatsisartut Landskarsip Naatsorsuutaasa Kukkunersiorneqartarnerannut
Ataatsimiititaliap ilassutitut isumaliutissiissutaa saqqummiunneqaqqaassaaq.
Tassanilu Ataatsimiititaliap siulittaasua Per Rosing Petersen (S)
qinnuigissavara isumaliutissiissummik saqqummiusseqqullugu.
Per Rosing Petersen
(S),
Inatsisartut Landskarsip Naatsorsuutaasa Kukkunersiorneqartarneranut
Ataatsimiititaliap siulittaasua:
1998-imi landskarsip
naatsorsuutai pillugit ilassutitut isumaliutissiissut, Inatsisartut Landskarsip
Naatsorsuutaasa Kukkunersiorneqartarneranut Ataatsimiititaliamit
saqqummiunneqarpoq. Inatsisartut Landskarsip Naatsorsuutaasa
Kukkunersiorneqartarneranut Ataatsimiititaliap suliarinninnermini ukuninnga
inuttaqarpoq:
Inatsisartunut Ilaasortaq
Per Rosing Petersen (S), siulittaasoq, Inatsisartunut Ilaasortaq Lars Sørensen
(IA), siulittaasup tuulia, Inatsisartunut Ilaasortaq Lars Karl Jensen (S),
Inatsisartunut Ilaasortaq Daniel Skifte (A) aamma Inatsisartunut Ilaasortaq
Mogens Kleist (K).
Ataasinngorneq 25.oktober
1999, Landskarsip 1998-imut naatsorsuutaa pillugit Kukkunersiuinermut
Ataatsimiititaliap isumaliutissiissutaa Inatsisartunit suliarineqarpoq.
Kukkunersiuinermut Ataatsimiititaliap
Aningaasanut Inatsimmi konto 30 13 10-mut innarluutilinnik Danmarkimiittunik
isumaginninneq, sakkortuumik isornartorsiorpaa. Kukkunersiuinermullu
Ataatsimiititaliap Isumaginninnermut Suliffeqarnermullu Pisortaqarfiup
ingerlatsivittut kukkunersiuiffigineqarneranik aallartitsisoqarnissaanik
piumasaqarnerat tunngavigalugit, Naa-lakkersuisut Naalakkersuisoqarfimmi
pissutsinik erseqqinnerusunik misissuititsillutik aallar-tipput.
Misissuineq
kukkunersiuisoqarfimmit Deliotte & Touche-imit aamma Namminersornerusut
iluminni kukkunersiuisunit ingerlanneqarpoq. Innarluutilinnik tunngasutigut
naatsorsuuserinerni aningaasaliissuteqarnermilu iluuserineqartut
misissuiffigineqarnissaannut suliakkiissutigineqar
tukkut, aningaasanut
inatsimmi kontoni 30.13.10.-mut, 30.13.12.-imut, 30.13.13-mut aamma
30.13.14-mut tunngasut qulaajaavigineqarnissaat kissaatigineqarpoq.
Immikkoortut pingasut
imaapput:
- Innarluutilinnut
tunngatillugu 1998-mi aningaasartuutissatut inaarutaasumik
pisariaqartinneqartoq qanga ilisimaneqalerpat ?
- Taamatut ilisimanninneq
inunnut kikkunnut ingerlateqqinneqarpa, tamannalu qanga piva?
- Aningaasanut inatsimmi
aningaasaliissutissanik ilassutillu aningaasasiliissutissanik
qinnuteqaateqarnissamut atatillugu tunngavissaq suna tunngavigineqarpa,
taassumalu ataani, ukiunut a-ningaasaliiffiusunut 1998-imi 1999-imilu
nuussinerit pillugit?
Misissuinissap siunertaraa
qanorpiaq pisoqarsimanerata qulaajaavigineqarnissaa, pineqaranilu inunnut
ataasiakkaanut akisussaatitsinissaq.
Inatsisartut aalajangernikuummata
ullormut oqaluuserisassani immikoortup 42-p, Landskarsip Naatsorsuutaasa
Kukkunersiorneqartarneranut Ataatsimiititaliap 1998-imut naatsorsuutit pillugit
isumaliutissiissutaata suliarineqarnera ulloq 1.november 1999-imi
nanginneqassasoq, ilassutitut isualiutissiissut una taamaalillugu
saqqummiunneqarpoq.
Misissuinerup inernera
sapaammi 31.oktober 1999 nal. 16.45 Kukkunersiuinermut Ataatsimiititaliamit
pissarsiarineqarpoq, taassumalu taanna tamatuma kingorna misissuataarpaa,
soorluttaaq Kukkunersiuinermut Ataatsimiititaliap Naalakkersuisut Siulittaasuat
isumasioqatigisimagaa.
Kukkunersiuinermut
Ataatsimiititaliaq imatut oqaaseqarumavoq:
Kukkunersiuinermut
Ataatsimiititaliap paasinninnera malillugu, Kukkunersiuinermut
Ataatsimiititaliap 12. oktober 1999-imi UKA99/42 pillugu isumaliutissiissummini
isornartorsiuinera misissuinikkut uppernarsarneqarpoq. Misissuineruttaaq
takutippaa ilisimasat pissusiviusunik aallaavillit Naalakkersuisunut
ilaasortamit naluneqanngikkaluarlutik ingerlateqqinneqarsiman-ngitsut.
Taamaammat
Kukkunersiuinermut Ataatsimiititaliap paasinninnera malillugu Naalakkersuisunut
ilaasortap paasissutissat ilisimasani, innarluutilinnut Danmarkimiittunut
aningaasaliissuteqarnissamik pisariaqartitsisoqarneranik Inatsisartut naliliinissaannut
pingaarutillit nipangiutiinnarsimavai. Taamatut oqaaseqarluni
Ataatsimiititaliap isumaqatigiittup suliassaq Inatsisartunut
naliliiffigisassanngortippaa.
Jonathan Motzfeldt
(S),
Naalakkersuisut Siulittaasuat oqaaseqaleraluartoq
Jørgen Wæver Johansen (S) oqaaseqassaaq:
Tassa immikkoortup taassuma ingerlaqqinnginnerani Siumup Naalakkersuinikkut oqaaseqartartuatut kissaatigissavara ataatsimiinnerup ingerlateqqinnginnerani unikaallatsinneqarnissaa.
Johan Lund Olsen (IA), Inatsisartut Siulittaasuat, ataatsimiinnermik aqutsisoq:
Tassa taanna siunnersuutigineqarpoq, tamanna ajorineqanngippat taava unikaallannissaq siunnersuutigissavara; nal. 13.45 ajornanngippat naapeqqinnissarput taanna anguniarlugu.
Nal. 13.45 tungaanut ataatsimiinneq unikkallarpoq.
.........................................
Johan Lund Olsen (IA), Inatsisartut Siulittaasuat, ataatsimiinnermik aqutsisoq:
Tassa ataatsimiinneq uninngareerluni maannakkut aallarteqqipparput, tassalu ataatsimiinneq unitsinneqanngillatsiarmalli, tassa Inatsisartut Landskarsip Naatsorsuutaasa Kukkunersiorneqartarnerannut Ataatsimiititaliap isumaliutissiissutaa saqqummiunneqareerpoq. Maannakkullu saqqummiussisussaq, tassa akissuteqarluni - utaqqigallalaassavarput, tassa Naalakkersuisut siulittaasuat saqqummiussissaaq.
Jonathan Motzfeldt
(S),
Naalakkersuisut Siulittaasuat:
Oktoberip ulluisa 12-ianni
1999 Kukkunersiuisarnermut Ataatsimiititaliap 1998-imut landskarsip
naatsorsuutai pillugit saqqummiussaqarpoq. Taavalu tamatta nalunngisatsitut
Isumaginninnermut Suliffeqarnermullu Naalakkersuisoq tamatumani pineqartoq
tassa Mikael Petersen (S). Tamanna suliassaminik tunulliussisimasutut
oqaatigineqarpoq, aammalu tassunga ilanngullugu kukkunersiuisoqarfiup
misissuisoqarnissaa noqqaassutigisimavaa, taavalu aamma ajornanngippat
malittarisassat atuuttut malillugit tamatumani akisussaassuseqartoqassanersoq.
Maani saqqummiussassaq
Inatsisartunit tamarmi atuarneqareersimammat, naggataatigut oqaatiginiarpara
imaalillugu:
Maanna Naalakkersuisunut
ilaasortap majip 19-ianni 1999-imi, Aningaasaqarnermut Ataatsimiititaliamit
isumasioqateqarnera tikipparput. Aningaasaqarnermut Ataatsimiititaliap konto-p
pineqartup pingaarnerup 30.13.10-ip Danmarkimi innarluutilininnik
isumaginninneq, erseqqinnerusumik nassuiarneqarnissaa kissaatigaa.
Naalakkersuisunut
ilaasortap Ataatsimiititaliap ilaasortaanut apeqqutigineqartut assigiinngitsut
akissuteqarfigai, Aningaasaqarnermut Ataatsimiititaliaq ataatsimiinnermit
tassannga imaqarniliorsimavoq, tassuuna takuneqarsinnaanngilaq Ataatsimiititaliaq
apeqqutiminik akineqarsi-manngitsunik amingaateqarsimanersoq.
Naalakkersuisunut
ilaasortaq isumasioqatigiinnermi Naalakkersuisoqarfiup allaffissornikkut
aqutsisoqarfiata allakkiarisimasaanik najoqqutaqarpoq, tamatumanilu
najoqqutassiaq oqalugiaatissarluunniit pineqanngilaq Kukkunersiuisarnermut
Ataatsimiititaliamit allaaserineqartutut.
Oqaatigineqassaaq
Aningaasaqarnermut Ataatsimiititaliaq paaserusutaminik tamanik
apeqquteqassalluni periarfissaqarluarsimammat. Kisiannili Naalakkersuisunut ilaasortaq
apeqqutigine-qartut sinnerlugit akissuteqarnissaanik
piumaffigineqarsinnaanngilaq, tamatumalu kingorna Naalakkersuisunut ilaasortap
Aningaasaqarnermut Ataatsimiititaliaq eqqunngitsunik paasissutississimagaa,
paasissutissanilluunniit nipangiussisimasoq oqaatigissallu Naalakkersuisunut
ilaasortamut assut kusanaatsuliorneruvoq.
1999-imi juuliuliinnartoq
Naalakkersuisunut ilaasortaq Kukkunersiuinermut Ataatsimiititaliamut
allakkatigut nalunaaruteqarpoq. Nassuiaat Kukkunersiuinermut Ataatsimiititaliap
naammagisimagunanngilaa. Aamma tamatumani apeqqutigineqarsinnaavoq, sooq
Ataatsimiititaliap juulimili nassuiaat tigoreerlugu Naalakkersuisunut
ilaasortamut apeqquteqarsinnaanini atorsimanngikkaa.
Akissuteqarfigineqarsimanngitsutut isumaqarfigisaminik sukumiinerusumik
erseqqinnerusumil-lu apeqquteqarluni.
Taamak oqaaseqarlutik
Naalakkersuisut neriuutigaat suliaq manna, naammaginartumik
qulaa-jarneqarsimasoq, aamma Inatsisartunut nassuiaat takkajaaq maani
tusaatissatut tigussagaat. Tamaasa annertunerusumik pinngikkaluarlugit
paasissutissaammata erseqqissut atuarneqareersimasullu taamaalillugit
saqqummiuppakka.
Mikael Petersen
(S), Isumaginninnermut
Suliffeqarnermullu Naalakkersuisoq, oqaaseqarumavoq:
Qujanaq- tamanit
inuiaqatigiinnit ilisimaneqarpoq, aamma Inatsisartunit ilaasortanit tamanna
ilisimaneqarpoq. Upernaarli maj-imi, konto 30.13.10 pillugu, tassa Danmarkimi
nunatsinneersut innarluutillit pillugu Aningaasaqarnermut Ataatsimiititaliamit,
isumasiorneqarsimasunga. Aam-malu tamanna isumasiuineq aallaavigalugu
Kukkunersiuinermut Ataatsimiititaliamut inner-suussutigineqarsimasoq,
naammaginartumik akissuteqarsimanngitsutut.
Kukkunersiuinermut
Ataatsimiititaliap tamanna suliassaq soorunami tiguaa, aammalu
ingerlassimallugu. Taassumap suliap ingerlanneqarnerani aammalu apeqqutit
aaliangersimasut pillugit apersuinermi uanga nammineerlunga Kukkunersiuinermut
Ataatsimiititaliamut aggersarneqar-simanngilanga, allakkatigulli
akissuteqarnissara kissaatigineqarsimalluni. Taamaaliorsimavu- gut uanga
Naalakkersuisoqarfigalu, apeqqutit apeqqutigineqartut allakkatigut
akissuteqarfigi-simallugit.
Paasinarsivorli tamakku
akissuteqaatit Kukkunersiuinermut Ataatsimiitaliamit taamanikkut, ilami
issatsiaannannguaq naammagineqarsimanngitsut. Tamannna tupiginngilara, tassami
u- anga nammineerlunga aggersarneqarsimannginnama, apersorneqarlungalu.
Taassuma saniati- gut pinngitsoorusunngilanga erseqqissaatigissallugu
kukkunersiuisut avataaninngaaneersut siullermik misissuitinneqarmata, tassani
misissuititsinermi uangaluunniit aamma aperineqar-simannginnama.
Naalakkersuisoqarfinniilli paasissutissat pissarsiarineqarsimasut siullermik
misissuinermi, aamma paasinarput taakkua kukkunersiuinermi
ilanngunneqarsimanngitsut ersarissumillu allaaserineqarsimanngitsut.
Tamakku pereermata taava
Kukkunersiuinermut Ataatsimiititaliap isumaliutissiissutaa
saq-qummersinneqarpoq, uagut uangaluunniit Naalakkersuisunut ilaasortatut
takusimanngisara, Naalakkersuisulluunniit takusimanngisaat. Tupannarpoq tamanna
siullerpaamik Kalaallit Nunatsinni aviisit ilaanni AG-mi siullermeerlugu
takoqqaarlugu.
Taava suliaq ingerlaqqippoq
Inatsisartuni isumaliutissiissut saqqummiunneqarpoq, suli Naa-lakkersuisunit
oqaaseqarfigineqanngitsoq, uangaluunniit qinnuigineqanngilanga immikkut
oqaaseqarfigeqqullugu. Inatsisartunit oqallisigineqareermat Naalakkersuisunit
aatsaat suliarineqarpoq. Naalakkersuisuni suliarineqarnissaa sioqqullugu uanga
nammineerlunga piumaffigineqarsimanngikkaluarlunga, nassuiaaqqullunga
Inatsisartut Siulittaasoqarfiannut Inatsisartunullu nassuiaaammik
ingerlatitsivunga, tamannalu Naalakkersuisunut paasissutissatut ingerlatillugu.
Massakkullu taamaalilluni
manna killiffik anguneqarpoq, aatsaallu misissueqqissaarnissaq Naalakkersuisut
piumasarimmassuk Kukkunersiuinermut Ataatsimiititaliamit akuerineqarpoq,
massakkullu taanna naammassineqarluni.
Oqaatigisariaqarpara
kukkunersiuinikkut misissuisitsineq kukkunersiuisut avataaneersut aammalu
Namminersornerullutik Oqartussat kukkunersiuinikkut immikkoortortaqarfiat
ataatsimoorlutik misissueqqissaarnerminni, tassani ilanngullugu aamma
taakkartormassuk, taamatut aningaasatigut pilersaarusiornermi konto 30.13.10
pillugu Naalakkersuinikkut tulleriiaarineq tunngavigineqarsimasoq.
Aammalu tamanna
Naalakkersuisut akissuteqaatiminni ersarilluinnartumik oqaatigaat, tamanna
uannut nuannaarutissaavoq. Tassuunakkut ersersinneqarpoq, aamma taamanikkut
Naalakkersuisuusut tassa Siumut Atassullu politikkerisaa aammalu Inatsisartut
politikkerisaa, tassa nunatsin-ni innarluutillit annertunerusumik
ineriartortitsiviussasut. Tamanna aallaavigalugu Naaakker-suinikkut
tunngavigisimasara aamma Inatsisartunit tamanit akuersaarneqareersimasoq,
tamanna kikkulluunniit nalunngilaat.
Ilanngulluguttaaq
oqaatigisariaqarpara kukkunersiuinermut tunngaviusut, tamarmik akineqar-mata kingullermi
misissuinermi takuneqarsinnaasutut pissusiviusut aallaavigalugit suut
tun-ngavigineqarsimanersut. Soorunami tamakku pillugit inatsisilerituut
avataaninngaanneersut, Inatsisartut inatsisileritoorinngisaat
Namminersornerullutik Oqartussat inatsisileritoorinngisaat,
naliliisissimavakka. Aammalu tamanna pillugu Naalakkersuisut aamma
nassuiaaffigineqarsimallutik, inatsisilerituumit avataaneersumit.
Tamatumani
uppernarsarneqarpoq, uanga tassani Naalakkersuisutut sulininni, inatsisinik
uni-oqqutitsisimanngitsunga. Uparuarneqarsinnaasorlu tassa soorlu
Naalakkersuisut akissuteqaamminni eqqaasaat, aningaasatigut pilersaarusiornermi
killiffiusimasut aammalu naatsorsuutigisatut, Finanslovimut Aningaasanut
Inatsisissamut innersuussutaasimasut naammaginanngitsut.
Tamakku tamarmik
Inatsisartunit ilisimaneqarput, soorlu aamma uanga nassuiaatinni
taakkartorikka, tamakku tamarmik tunngaveqartut nunatsinni innarluutillit
ineriartortinneqarnissaat, Naalakkersuinikkut salliutinneqarmat.
Aamma
eqqaamaneqartariaqarpoq, taamanikkut aningaasatigut ingerlatsineq Siumup
Atassutil- lu ingerlataat, aammalu Atassummiit Naalakkersuisuuffigineqartoq
annertuunik piumasaqar- mat aamma Inatsisartunit tamanit
isumaqataaffigineqartumik, tassa sukangasuumik ingerlat-sisoqassasoq. Tassa
ingerlatsinermut sanaartugassanullu tunngatillugu kontot pineqartut
ataatsimoorfianni ataatsimoortumik aningaasaliissutitigut
qaangiisoqartassanngitsoq.
Tamanna malissimavara
aammalu tamanna eqqortissimallugu. Tassuunakkuinnarluunniit qiviarutsigu, inatsisinik
tunngaviusunik unioqqutitsinnginnermik uppernarsaasoqarnerata saniatigut
Naalakkersuinikkut piumasarineqartut malissimavakka; aningaasatigut
ingerlatsinikkut piumasarineqartut politikkerineqartut aallavigalugu
malissimavakka. Naatsumik oqaatigalugu unioqqutitsisoqarsimanngilaq.
Taakkununnga ilanngullugu
taasariaqarpoq, qanoq iliuutsit tamarmik Inatsisartunit, Aningaasaqarnermut
Ataatsimiititaliamit, Naalakkersuisunit ullumikkut killiffipput qiviarutsigu
akuerisaapput appernarsaatissaqarlutillu. Aningaasanut Inatsisissat
tassuunakkut atuarneqaannarsinnaapput, aamma ullumikkut Inatsisiusoq.
Taanna pillugu pisut uannut
avaanngunarsimapput, nuanniissimaqaat ilaquttannut, ikinngutinnut, ilami
ilisarisimasannut allaat annernartumik tuttarsimapput. Tamakku uannit
sakkortuumik eqqarsartitsisimapput, inatsisinik unioqqutitsinani
Naalakkersuinikkut suliassat ataqqeqalugit ingerlatsigaluarluni
misigisimanngitsoorfiunngilaq uanni - oqaatigisariaqarpara soorlulusooq
malersorneqarluni.
Tamanna miserratiginngilara
aamma ilissinnut oqaatigerusuppara, tamakku tamaasa eqqarsaatigalugit
malugisinnaagakku una pineqartoq ima sakkortutigisumik allaat
kinguneqarsinnaalersoq allaat qinersinermik kinguneqarsinnaatinneqarluni
Inatsisartuni. Tamakku takusakka malugisakkalu pinngitsoorterusuppakka,
isumaqarpunga una pineqartoq aningaasanik inatsisinilluunniit arlaannik
ingerlatsinikkut unioqqutitsiviunngitsoq. Isumaqarpunga pissutissaqanngitsoq
tunngavississallugu qinersinermik - kinguneqartissallugulu qinersinermik.
Taamaattumik
aaliangersimavunga pitsaanerussasoq Naalakkersuisutut inissisimaninni
tunuarniuteqaruma, soorunami tamanna uannut oqimaappoq. Suliat annertuut
tassani aallarteruttorput, isumaginninnikkut iluarsaaqqinneq
ersarissiartuinnarpoq, sumut sammivilik takuneqarsinnaalereerpoq.
Isumaginninnikkut
anguniakkat Inatsisartunut agguaanneqartarput, nassuiaatit susoqarniarneranik
aammalu ullumikkut killiffik tikkuussivoq, sumut ingerlasoqassanersoq.
Suliffeqarnikkut iluarsaaqqinneq aallartippara 1997-imi, annertuut pisarsimapput,
suliffeqarnikkut iluarsaaqqinnikkut inunnik isumaginninnikkut pissutsinik
annertuumik iluarsiisoqassaaq. Suliffeqarnikkut iluarsaaqqinnermi anguniakkat
ersarilluinnartut Inatsisartut akuersaareerpaat, taakkualu kommunenit -
Namminersornerullutik Oqartussanit annertuumik suliarineqarlutik
aallarteruttorput.
Neriuutigilluinnarpara
taakkua suliat annertoorsuit, Naalakkersuisuniluunniit tunuaraluaruma
Intsisartunut ilaasortatut suleqataaffigiumaarlugit, nuannaarlunga qiimallunga
pisarnittut aammalu anguniakkat tassani suleqataaffigalugit.
Qanortoq
eqqaamasaannartigu, manna ini nunatsinni ataatsimiittarfiit
pingaarnersarimmassuk, una oqaluttarfik oqaluttarfiit nunatsinni
pingaarnersarimmassuk, aammali sulinitsinni puigunngisaannassavarput una oqaluttarfik
eqqartuussiviunngimmat, ilami nunatsinni init sakkortunersaat tassaammat
eqqartuussivik.
Nunatsinni
ataatsimiittarfiit pingaarnersaanni, ataqqeqatigiissumik torersumillu
piviusorsiortumik qiimasumillu ingerlasariaqarpugut. Eqqortoq aallaavigalugu oqaluttariaqarpugut,
eqqortoq sunaanersoq paaseqqaartinnagu eqqartuusserpalaartumik Inatsisartunut
ilaasortaqativut pisaqinatigit. Aammalu taamatut pisoqartannginnissaa tamatta
sulissutiginiartigu, Inatsisartuni ilaasortaqatikka suleqatikka allallu tamassi
avataaniittut Naalakkersuisunut ilaasortatut suleqatigisimasakka, aammalu
suleqatigisakka qamannga pisumik qutsavigaassi ukiuni marlunni, massakkut
Naalakkersuinikkut sulininni Naalakkersuisutut inissisimaninni
suleqatigilluarsimagassi.
Neriuutigilluinnarpara
immitsinnut isigaluta naligiimmik kimilittut inuttut isigaluta, suliassagut
ingerlateqqikkumaarigut. Nalunngilara inoqartarmat inuttut naleqarnerusutut
imminnut isigisartunik, taamaattoqartaraagat eqqarsartarpunga, tamanna
kukkuneruvoq. Aamma eqqaamajuaannartigu Inatsisartutut qinikkatut
inissisimanitsinni, qinersisit qanorluunniit amerlatigigaluarpata,
qanorluunniit assigiinngitsigigaluarpata qinigaassuseq assigiimmik kimeqarmat
naleqarlunilu.
Tamanna tamanit
ataqqineqartariaqarpoq, oqaatigissavara naggataatigut Naalakkersuinikkut
sulininni, pingaartittuakkanni nikallujaallungalu peqataaffigisanni sulinera
ingerlateqqissagakku, kajumiffigalugu pingaartillugu nuannaralugulu. Aamma
neriuppunga qinnuteqaatiga tunuarniutiga Naalakkersuisut Siulittaasuata akueriumaaraa,
aammalu neriuutigaara Inatsisartunut ilaasortaqatikka maani
suminngaanneeraluarnersut, partiinit assigiinngitsuninngaanneersut
Kattusseqati-giinninngaanneersullu aamma suleqatigilluarumaarlugit, qujanaq.
Lars Karl Jensen, Siumup oqaaseqatua:
Isumaginninnermut Suliffeqarnermullu Naalakkersuisup Mikael Petersen-ip Naalakkersuisup nalunaarutaa tunngavigalugu, Naalakkersuisutut sulinerminik tunuarniarluni nalunaarutaa, Siumumiit ataqqivarput. Taamaattumillu suliassap matuma inimi maani, oqallisigineqarnissaa pisariaaruttutut isigalutigu. Siumumiit Mikael Petersen ataqqivarput, nammineq taamatut aalajangermat, namminerlu namminerminut ilaquttaminullu pineqarnerannut tujorminartumik peqqutissaqartoqannginneranut tamanna ersarissaatigisaattut isigiumavarput.
Inatsisartunili suleqatiginissaa qilanaaraarput. Taamatut naatsunnguamik oqaaseqarluta tunuarniutaa tasaatissatut tiguarput Siumuminngaaniit.
Daniel Skifte, Atassutip aqaaseqartua:
Qujanaq - siullermik kukkunersiuisut aamma unnuaq sulilluarsimanerat, isumaqatigiillutillu tamarmiullutik nalunaaruteqarnerat qujassutigissavara. Kisianni aamma isertussanngilara ippinnartoqartilaarakku. Maannakkut kukkunersiuisut isumaliutissiissutaat, Naalakkersuisut Siulittaasuata akissuteqaataa, suli partiinit oqaaseqarfigineqanngitsoq, Isumaginninnermut Naalakkersuisoq nassuiaatinik assigiinngitsunik nipeqartunik oqaaseqarmat, tassami allaat oqaasiisa ilaat aamma politikkikkut oqaaseqarfigineqarsinnaagaluarmata.
Kisanni taanna pingaarnerunngilaq, Atassutip uunga pisimasumut oqaaseqaatini agguaatereerpaa. Taamaattumik taanna innersuussutigissavara, oqassallungali suli pissutissaqarnerulersorivugut Atassumminngaaniti, sapaatip akunnera matuma siornatigut oqaatsitta oqaatigineqartut alliangiusimanissaannut.
Taamaattumik Naalakkersuisunut Ilaasortap Mikael Petersenip tunuarniarluni oqarnera Atassutip tusaatissatut tigussavaa, neriuppugullu Naalakkersuisut Siulittaasuata tamanna ajunngitsu- mik inerumaaraa.
Taava aamma uani oqaluttarfimminngaanniit eqqaaneqarmat oqaaseq ataaseq Atassummin-ngaaniit pingaartorujussuartut isumaqarfigalugu oqaatigilaassavara. Atassutip oqaatsit marluk atorneqartut, tassalu : Tatiginninneq aammalu oqaaseq alla tassa: Inatsisinik unioqqutitsisimaneq imaluunniit Naalakkersuisut oqaaseqaataanni oqaaseq: Pinerluttutut oqaatsit taakkua atorneqarnerat, taanna Atassumminngaaniit ilisarinnginnatsigu. Uagut taakku atunngilagut, atugarput tassaavoq: Pineqartumik tatiginninneq.
Oqaatsit taakkua immikkorluinnaq isigineqarneri paasineqarnissaallu pingaatsippagut. Naggataatigut soorunami pissusissamisoorpoq, Naalakkersuisunut ilaasortaasimasoq, aammalu uanga inuttut suleqatigisimasara Mikael Petersen qujassuteqarfigissallugu. Tunuarniutaa akuerineqarpat ukiumi qaangiuttumi, taamatut anguniagaqarluni sulisimanera pillugu, taanna oqaatigerusuppara Atassumminngaanniit.
Lars Sørensen, Inuit Ataqatigiit oqaaseqartuat:
Qujanaq - tassa Inuit Ataqatigiinninngaanniit oqaatigiinnassavarput, oqaaseqaatissagut ilaa- tigut agguaanneqareersimasut taakkua oqaaseqarfiginagit, kisiannili Isumaginninnermut Naa-lakkersuisup Mikael Petersen-ip nassuiaateqarnera tusaatissatut tigorusukkatsigit. Taamatut naatsumik oqarluta, oqareernittuut Mikael Petersen-ip nassuiaateqarnera tusaatissatut tiguarput.
Mogens Kleist, Kattusseqatigiit oqaaseqartuat:
Uagut tungitsinninngaanniit
Naalakkersuisuusimasup Mikael Petersenip taamatut tunuarniuteqarnera, aamma
uagut tungitsinninngaanniit ataqqillugu aamma tigussavarput, aammalu piffissami
kingullermi taamatut suleqatigisarsimanera, Naalakkersuisutut aamma
tungitsinninngaanniit qujassutigissagatsigu. Taakkartugassat ilagivaat
uanngaanniit eqqartuussisuusussaanngilagut. Aap, qanorluunniit ajortigisumik
iliorsimagaluarutta uagut maani eqqartuussisuusussaanngilagut. Kisiannili
Naalakkersuisunut tatiginninnginneq pigigutsigu uanngaanniit
oqaluttarfimminngaanniit annissinnaavarput eqqartuussinerunngikkaluartumik.
Taamaattumik aamma
oqaaseqaatigisimasagut toqqammavigalugit, innersuutigalugillu oqas-saagut
taamatut Kukkunersiuinermut Ataatsimiititaliap innersuussutigisimasaat
uagutsinnin-ngaanniit aamma oqaatigissagatsigit. Aammalu Mikael Petersen
taamatut suleqatiginissaa siunissami tungitsinninngaanniit aamma
neriuutigaarput qangatut ingerlaannarumaartoq.
Jonathan Motzfeldt
(S), Naalakkersuisut
Siulittaasuat:
Isumaqarpunga
hurraartuutissaqanngitsugut, Naalakkersuisoq pikkorissoq Mikael Petersen maanna
tunuarniarnissaminut ilisimatereersimallunga aamma akuerisimavara utaqqimmagu
Naalakkersuisut uani misissuinermi qanoq oqarumaarnerat.
Taamaattumik Mia-p
Naalakkersuisut misissuinerat tusaatissatut pisussaq paasineqarmat, taamatut
tunuarniarnerminik aalajangiussisimanini, maannakkut kusanartumik inerneqartoq,
aammalu nassuiaatit pissarsiarineqartut oqaatigineqartutut tunngavigalugit
inatsisitigut tun-ngavissaqarsorineqanngitsut aammalu politikkikkut
oqallisigineqarsinnaasut.
Politikkikkut oqallinneq
taanna maannakkut ingerlasoq inernavianngilaq. Aamma inerallarna-vianngilaq.
Qinersinissap tulliata tungaanut aamma ingerlanneqassaaq. Mikael Petersen-ip
qinnuteqaataa akuerissavara, ullumi ataatsimiinneq naatinnagu Isumaginninnermut
Naalakkersuisussamik nutaamik maani inimi siunnersuuteqassaanga. Taamaalilluta
ataatsimiinneq manna qimatsinnagu aamma taakku naammassereersimaniassammata.
Oqaatigereerpara maani
inatsisitigut, tunngavissaqarsorinanngimmat Mikael Pétersen-imut
assuarliuteqarnissaq. Kisianni poliitikkerit poliitikkeqatimik qanoq
ingerlanissaannik naliliineraat. Taamatut naliliineq aamma uagut
poliitikkeritut immitsinnut piumaffiginitsinnut an-nertuumik aamma imaqarpoq.
Suliassagut nakkutigiinnarnagit peqqissaaruttussavagut, unneqqarissaarluta
aammalu suliassat peqquneqarnigut najoqqutaralugit ingerlasassalluta.
Mikael Petersen taamatorpiaq
ingerlasimavoq, kisianni ippinnartortai oqaatigineqareersutut aamma
Kukkunersiuisut Ataatsimiititaliaanninngaanniit uparuaaffigineqarsimanerat
aamma ataqqivarput. Taama oqaaseqarlunga naggataatigut oqaatigissavara
Naalakkersuisut taamatut innersuussuteqarnerat atammat, aammalu qanorluunniit
oqallinnermi ittumi tamatumani, aamma Naalakkersuisut peqataassammata
oqalliseqataassallutillu.
Mikael Petersen,
qujanarujussuaq aamma suleqatigiinnitsinni maani inimi avataanilu. Aamma
pinngitsoorumanngilanga ajuusaarutigissallugu assut!! Ajuusaarutigissallugu -
aamma Naa-lakkersuisuni ilagiunnaassagatsigit. Nalunngilara suliassannut
ilumoorlutit tamaviaarlutit aammalu piumassuseqarluarlutit sulisimasutit.
Taamaattumik aamma qularinngilara inimi maani Inatsisartoqativit akornaniit,
suliassat pingaatsitatit pisarnittut eqeersimaarlutit, tatiginarlutit kiisalu
aamma suleqatigiinnissamik pingaatsitsillutit ingerlateqqikkumaaritit,
qujanarsuaq.
Josef Motzfeldt
(IA),
Aningaasaqarnermut Niuernermullu Naalakkersuisoq:
Kukkussuteqartarneq
inuinnaassutsitsinniippoq, kukkusutut nalilerneqarneq ilaatigut isikkivik
aallaavigalugu, allanngorartuusinnaavoq. Mia tunuarniarlutit aaliangernerit
ajornaatsuinnaasimanavianngitsoq Inuit Ataqatigiit qularinngilarput,
taammaattorli killiffik maluginiarlugu iliuuseraat isumatusaarnerusoq.
Naalakkersuinikkut
innutaasut qinigaraatsit, tamannalu suleqqinnissanni tunngavigissavat, illit
nammineq oqarnittut: Iliuuseqarani issiaannaraanni navialinissaq
ilimagisariaqanngilaq, suliniuteqarnerli sapiiserfissap killinga tikillugu,
navialiffissanik ilimasuffigisariaqarpoq.
Naalakkersuisunit
tunuarniarputit, kisianni Inatsisartuniiginnarputit, tassuuna siunnerfigisatit
naalakkersuinikkut siunnerfigisatit, ingerlateqqissallugit periarfissaqarputit.
Naalakkersuisuni Inatsisartunillu ataatsikkoortillugit, taamak periarfissanik
arsaarneqarneq ajornerungaarpoq. Uanga tamanna nalunngilara,
naalakkersuisoqatigisimasattut qutsavigalutit, ajunngitsunik kissaappagit,
Inatsisartummi tassaapput Naalakkersuisut qanoq sulinissaannut naleqqersuisut,
tamannalu inissisimaffik ajornerpaajunngeqaaq.
Anthon Frederiksen, Kattusseqatigiit oqaaseqartuat :
Suliassaq oqimaatsoq
aammalu ilungersunartoq tamatsinnut maanna naammassisoq, takusinnaavarput
paasillugulu. Taamaattumik Kattusseqatigiinniit aamma uagut
pinngitsoorusunngilagut, Naalakkersuisuugallartup suli Mikael Petersen-ip
suleqatigisimaneranut qujassuteqarfigissallugu. Isumaqarpugut aaliangerneq
eqqortuusoq, naak soorunami oqimaallunilu ilungersunarsimagaluartoq, taanna
suliassaq.
Neriuutigissavarput
taamatut pisartut ikinnerulissasut, imaluunniit taamatut
pisoqaqqinngilluinnassasoq. Tassami inatsiseqarpugut, Inatsisartut
Naalakkersuisullu akisussaatinneqarsinnanerat pillugu.
Tassanilu Inatsimmi
paragraf-imi aaliangersimasumi allassimasoq, nalunngilarput aamma tamatta,
tassalu Naalakkersuisut akisussaasut aammalu paasissutissiisarnermut
tunngatillugu Inatsisartunut kukkusumik paasissutissiisimaguni,
akisussaatinneqarsinnaasut kisianni tassa nuannaraarput, tamanna Inatsit
maannakkut atorniarneqanngimmat.
Aammalu
neriuutiginngilarput Naalakkersuisut arlaannaannulluunniit
atuutsinneqarumaartoq, kisianni tassa massakkut aaqqiiniarneq iluaralugu
tusaatissatut tiguarput.
Johan Lund Olsen
(IA),
Inatsisartut Siulittaasuat:
Qujanaq- taavalu tassa
paasisinnaasakka malillugit allamik oqaaseqartussaqanngilaq, taamaammat
uangattaaq Mikael Petersen qutsavigisinnarlugu, maani Naalakkersuisut
kusanartumik aamma suliaqarsimanerannik.
Ilisimatitsissutigissavara Inatsisartut
suleriaasissatsinni, paragraf 16 immikkoortoq siullermi imatut
allassimasoqarmat: Inatsisartunut imaluunniit Naalakkersuisunut Ilaasortaq
tunuarumalluni qinnuteqaateqarpat, Inatsisartut aaliangissavaat qinnuteqaat
akuerineqarsinnaanersoq. Tassa maannamut paasisagut malillugit, tamanna aamma
ataqqiumaneqarpoq, aammalu Naalakkersuisut Siulittaasuata kingullermik
oqaaseqarnermini, tassa ilisimatitsissutigivaa, ullup ingerlanerani
Naalakkersuisumik nutaamik tassa Isumaginninnermut Suliffeqarnermullu
Naalakkersuisutut aamma inassuteqassamaarluni.
Taamaammat Immikkoortoq 42
taamatut naammassisinnarlutigu, ualimut naatsorsuutigissavarput Naalakkersuisut
Siulittaasuat aamma maani inassuteqaateqarumaarmat, aammalu maani Inatsisartuni
aamma saqqummiunneqartussani.
Tassalu taamaalilluta
immikkoortoq 42 naammassivarput.