Kalaallit Nunaanni Inatsisartut

Oqaluuserisassani immikkoortoq 71		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunngorneq 20. oktober 1999 nal. 20:30

Pingasunngornikkut apeqquteqaatit.

Oqaluuserisassani immikkoortoq 71

(Lars Karl Jensen)

Ataatsimiinnermi aqutsisoq: Johan Lund Olsen, Inatsisartuni Siulittaasoq, Inuit Ataqatigiit.

Lars Karl Jensen, Siumut:

Apeqquteqaatissara naalisarujussuarlugu, tassa kingullermik Inatsisartuni Immikkut Ikiorsiisarnermi Aningaasaateqarfik aalajangiiffigineqarmat, Naalakkersuisunik ingerlanneqartunngorlugu aaqqinneqarpoq maannamullu ilaatigut ujartuiffigineqartarluni qinnuteqaatitik tassunga tunngasut sumut ingerlatinneqartarnersut, taanna nalornissutigineqartarsimammat apeqquteqaatinni ersarissumik allannikuuvara paasissutissinneqarnissaq kissaatigalugu.

Simon Olsen, Inuussutissarsiornermut Naalakkersuisoq:

Inatsisartuni ilaasortap Lars Karl Jensen-ip Immikkut Ikiorsiisarnermut Aningaasateqarfimmut allaffissornikkut aqunneqarneranut atatillugu qanoq suleriaaseqartoqarnersoq Naalakkersuisunut apeqqutigaa. Tassunga tunngatillugu oqaatigisinnaavara aaqqissuussineq taanna tunngaviusumik allaffissornikkut aqunneqarmat tunaartarisassat siusinnerusukkut Immikkut Ikiorsiisarnermut Aningaasaateqarfiup siulersuisuinut atuuttut malillugit, qinnuteqaatit siusinnerusukkutuulli nassiussuunneqartarput. Manna tikillugu Naalakkersuisoqarfimmi qinnuteqaatit 161-it suliarereerneqarsimalerput, 157.000 koruuninillu tapiissuteqarfigalugit.

Qinnuteqaatini 161-iusunit qinnuteqaatit 14-it paasissutissat amigaatigineqarmata suliat ingerlateqqinneqarput, kingusinnerusukkut taakkua aalajangiiffigineqassapput, maannakkumullu qinnuteqaatit 28-it tiguneqareersimapput, maannakkut piareersarneqarput.

Naalakkersuisoqarfiup Immikkut Ikiorsiisarnermut Aningaasaateqarfiup allaffissornikkut aqunneqarneranik tigusinerata kingornatigut maannakkumut malunnarsereerpqo tunaartarisassat taamanikkut taamatut aaqqissuussinermut atugassanngorlugit suliarineqarsimasut malillugit ikiorserneqassagaanni piumasaqaataasut qinnuteqartut amerlaqisut naammassisimanngikkaat.

Isumaqarluinnarpunga Inatsisartut taamatut aaqqissuussinerup Inuussutissarsiornermut Naalakkersuisumit allaffissornikkut aqunneqarnissaanik aalajangiisimanerat eqqortuusoq, tamatumami kingunerimmagu aaqqissuussinermik sukaterisinnaanngorsimanerput. Siunissami taamaallaat ikiorsiissuteqartoqartassaaq umiatsiaaqqanik piniarnermulluunniit atortunik pineqartunik nalinginnaasumik akisussaassusilimmillu paarsisoqarneratigut aserfallatsaaliisoqarneratigullu. Pinngitssorneqarsinnaanngitsumik immikkut ittumik annaasaqartoqarnerata nalaani imaluunniit annaasaqartoqartillugu taamatuttaaq pangaartinniarparput annaasanut nalinginnaasumik sillimmasiinikkut taarserneqarsinnaasimagaluartunik tassa qinnuteqaateqartoq sillimmasiisimatillugu, matusissutissanik tapiissuteqartoqartannginnissaa, tassani pissutaavoq pineqartunik 170-ingajalluinnarninngaanniit taamaallaat pingasut sillimmasertissimammata malittarisassanilu taanna noqitsisuuvoq.

Lars Karl Jensen, Siumut:

Taamak ersaritsigisumik akissuteqaataanut qujavunga uanilu aamma aalajangiisinnaannginnata ingerlaqqissalluta immaqa naammagittaalliorfissamik pilersitsisoqarsinnaanera taamaallaat eqqarsaatigineqarsinnaavoq.