Oqaluuserisassani immikkoortoq 17-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Sisamanngorneq 29. maj 1997 nal. 14.15
Ataatsimiinnermik
aqutsisoq: Inatsisartut Siulittaasuat Jonathan Motzfeldt.
Lars Karl Jensen, siunnersuuteqartoq, Siumut:
Siunnersuutiga naqitaariarmat siullermik
siulittaasoq piumaffigissavara uuma naalisarnissaa akuerissagaat. Aap.
Siunnersuutigivara imaani oliasiortunut
pilersuisut umiarsualivissaannik misissuinissami Paamiut ilanngullugit
misissuiffigineqarnissaat. Una aallaaveqarpoq nalunnginnakku maannakkut
nunatta imartaani oliasiortoqalersinnaaneranik sukumiinerusumik
misissuisoqalersoq. Taavalu oliamik qalluisoqalissappat oliasiortunut
pajuttartussat umiarsuit, tassa pilersuisuusut aamma umiarsualiveqarnissaat
Nunatsinni pinngitsoorneqartussaassagunanngimmat. Paamiunut oliasiortunut
pilersuisunut umiarsualivissatut piukkunneranut ilaatigut tunngavilersuutima
ilagivaat imarsiornermut ilinniarfiup taqqavaniinnera, taavalu aamma tassani
ilinniartitsinermi tamakkunani inuttaasartussat pikkorissartinneqartarnissaat
ingerlanneqartartussaammat. Taamaattumik oliasiortunut pilersuisuusut
umiarsuit inuttaasa illoqarfeqatiginissaat pingaaruteqarsinnaasoq atortutigut
pikkorissarnermi atorneqartussani siuarsaanikkut.
Oqareernertuut taanna naqitaq tamakkerlugu
ilanngunneqartussaammat uani naalisarlugu taamatut siunnersuutiga
saqqummiutiinnarpara, tassa Paamiuni umiarsualiviliortoqarsinnaanera
oliasiortunut pilersuinermi umiarsualiviusussamik. Qujanaq.
Justus Ignatiussen, Anders Andreassen-ip siunnersuuteqartup
sinniisussaa, Siumut:
Kommunini isorlerni
inissialiortitsisarnermi ukiuni kingullerni landskassep aningaasaliissueqataassutigisarsimavai
4 %-it, naak nalinginnaasumik 60 %-iugaluartut. 1997-imi aningaasanut inatsimmi
kommuninut taakkununnga iluaqutissaq taanna peerneqarpoq. Taamaakkaluartoq
kommunit taakku aningaasat tungaatigut pisinnaasanik assigiinngitsunik suli
immikkut atugaqarput, taamaattumillu kommunit taakku inissaqartitsinikkut
nunarpullu tamakkerlugu inissat pitsaassusissaat anguniarlugu
naammassinnissinnaanerat killeqarluni. Taamaattumik siunnersuutigissavara
kommuninut isorlernut inissialiortitsinermut utertinneqartartut siunissami 80
%-iuleqqissasut.
Anthon Frederiksen, siunnersuuteqartoq, Kattusseqatigiit:
Naalisaassuunga. Tassa siullertut
siunnersuutigisimavara Qeqertarsuarmi aammalu Kangaatsiami aqquserngit ajoqisut
immikkut ittumik aningaasaliininnut aaqqissuunneqarnissaat.
Aappaattullu nammineerluni
illuliarineqartartut nunaqarfinni sananeqartartut illoqarfinni
sananeqartalersinnaanissaat. Tassa naatsumik ersarissumillu taakkua taamatut
oqaatigaakka.
Mikael Petersen, Aningaasaqarnermut ataatsimiititaliap
siulittaasua, Siumut:
1997-imut Inatsisartut ilassutitut
aningaasaliissutinut inatsisissaannut siullermut Aningaasaqarnermut
ataatsimiititaliap isumaliutissiissutaa Inatsisartut aappassaanerinninnerannut
saqqummiutissavara.
Isumaliutissiissutip imarai:
1) aallaqqaasiut,
2) nalinginnaasumik oqaatigiumasat,
3) Aningaasaqarnermut ataatsimiititaliap
oqaatigiumasai allat,
4) 1997-imut Inatsiartut ilassutitut
aningaasaliissutinut inatsisissaanni siullermi akuersissutissat
siunnersuutinut Naalakkersuisut allannguutissatut siunnersuutaat,
5) 1997-imut Inatsisartut ilassutitut
aningaasaliissutinut inatsisissaanni siullermi oqaasertaliussassatut
siunnersuutinut Naalakkersuisut allannguutissatut siunnersuutaat, 6) 1997-imut
Inatsisartut ilassutitut aningaasaliissutinut inatsisissaanni siullermi
tjenestemandinut atorfiit amerlassusiligaanissaannut siunnersuutinut
Naalakkersuisut allannguutissatut siunnersuutaat,
7) Inatsisartunut ilaasortat
siunnersuutaat 1997-imut Inatsiartut ilassutinut aningaasaliissutitut
inatsisissaannut siullermut siunnersuummut atatillugu suliarineqartussatut
innersuunneqarsimasut,
8) Aningaasaqarnermut ataatsimiititaliamik
kaammattuutit 17-it,
9) landskassep aningaasaqarneranut takussutissiaq
iluarsisaq,
10) ilanngussat 1, 2 aamma 3.
Isumaliutissiissut ullut sisamat matuma
siornatigulli agguaanneqareernikuummat kiisalu aam- ma Inatsisartunit
ilaasornanit tamanit misissuataarneqarnissaminut piffissaqarluarsimammat
inassutigerusuppara qinnutigerusullugulu annertungaatsiartumik naalisaanissara
isumaliutissiissut takeqimmat. Qinnutigissallugulu isumaliutissiissummi
immikkoortut 1, 2, 3 kiisalu kingulliit marluk 1 10-ilu taakkua
saqqummiukkumallugit, sinnerilu tassalu 4, 5, 6, 7 aamma 8 taakkua
innersuussutigalugit. Qujanaq.
Ataasinngornermi majip tallimaani
1997-imut Inatsisartut ilassutitut aningaasaliissutinut inatsisissaannut
siullermut siunnersuut Inatsisartuni Naalakkersuisut saqqummiuppaat. Aningaasaqarnermut
ataatsimiititaliap katillugit ataatsimiinnerni 14-inini inatsisissatut
siunnersuut misissuataarpaa. Tamatumunngalu atatillugu Aningaasaqarnermut
Ineqarnermullu Naalakkersuisoq, Kultureqarnermut, Ilinniartitaanermut
Ilageeqarnermut Naalakkersuisoq, Aalisarnermut, Piniarnermut Nunalerinermullu
Naalakkersuisoq kiisalu Inuussutissarsiornermut, Angallannermut
Pilersuinermullu Naalakkersuisoq isumasioqatigisimallugit.
Inatsisissatut siunnersuutip
siullermeerneqarnerata kingorna Naalakkersuisut allanngutissatut
siunnersuutinik 112-inik 20. Maj 1997 saqqummiussaqarput. Taamatullu aamma suli
ataatsimik 21. Maj 1997, tassa katillugit 113-inik allannguutissatut
siunnersuuteqarlutik.
Naalakkersuisut allannguutissatut siunnersuutaannut
ataatsimiititaliap inassuteqaatai isumaliutissiissutip immikkoortuini 4-mi,
5-mi 6-imilu takuneqarsinnaapput. Tamatuma saniatigut Aningaasaqarnermut
Ataatsimiititaliap Inatsisartunut ilaasortap Anthon Frederiksen-ip,
Kattusseqatigiit, siunnersuutaanut marlunnut, kiisalu Anders Andreassen-ip,
Siumut, siunnersuutaanut ataatsimut aammalu Lars Karl Jensen-ip, Siumut,
siunnersuutaanut ataatsimut inassuteqaatai immikkoortoq 7-mi
takuneqarsinnaapput. Taakkununnga siunnersuutinut ataatsimiititaliap
inassuteqaatai matumuuna saqqummiuttussaannginnakkit
innersuussutigiinnarakkillu erseqqissaatigissavara ataatsimiititaliap
inassutigimmagu siunnersuutit pineqartut tamarmik matumuuna inatsisissakkut
akuersissutigiqassanngitsut.
Suliassaqarfimmut 01-mut Inatsisartut siulittaasuat siulittaasoqarfiannut siunnersuutit Inatsisartut namminneq isummerfigisassaraat. Suleriaatsimut Ataatsimiititaliap taakku akuersissutigineqarnissat Inatsisartunut inassutigisimammagu. Siunnersuutit suliarinerini Aningaasaqarnermut Ataatsimiititaliap Inatsisartut siulittaasoqarfiat oqaloqatigisarsimavaa Inatsisartut suleriaasissaata 3. Juni 1993-meersup 13. Maj 1996-imi 1. November 1996-imilu ilassuteqaateqarfigineqarsimasup ' 6-iata 46-uatalu piviusunngortinneqarnissaat eqqarsaatigalugu.
Aningaasaqarnermut Ataatsimiititaliaq isumaqarpoq siunissami aningaasanut inatsisissanut ilassutitulluunniit aningaasaliissutinut inatsisissanut atatillugu aningaasaliissutissat pillugit aalajangernerit kiisalu aningaasaqarniarnermut ataatsimut isigalugu apeqquteqaataajunnartut akissutit isumaliutissiissutitut nassiuttarniarlugit siulittaasoqarfiup inassuteqaatai Inatsisartut aalajangertarnissaannut tunngavissaasut pitsaasut.
Allannguutissatut siunnersuutinut Aningaasaqarnermut Ataatsimiititaliap inassuteqaataasa aningaasatigut sunniutissaat ilanngussaq 1-imi takuneqarsinnaapput. Ilanngussani 2-mi 3-milu oqaasetaliussanut tjenestemandisullu atorfiit amerlassusigaanerinut allannguutissatut siunnersuutit takuneqarsinnaapput.
1997-imut ilassutitut aningaasaliissutinut inatsissamut siullermut Naalakkersuisut siunnersuutaata Inatsisartuni aappassaaneerneqarnissaanut allannguutissatut siunnersuutinut Aningaasaqarnermut Ataatsimiititaliap inassuteqaatai ataatsimut isigalugu kinguneqassapput ingerlatsinermut, sanaartornermut taarsigassarsisitsisarnermullu missigersuutini 1997-imi 105.703.000 kr.-inik amingartooruteqarnernik ukiuni missigersuusiorfiusuni EST-mi sinneqartoorutissat ima annertussuseqarput 1998-imut 1,1 mio.-it 1999-imut 8,3 mio.-it 2000-imullu 37,5 mio. kr.-it.
Aningaasaqarnermut Ataatsimiititaliap nalinginnaasumik oqaatigiumasai.
1997-imut Inatsisartut aningaasaliissutinut inatsisissaanut siullermut siunnersuummik matumani Inatsisartut aappassaaneerinninnissaannut Aningaasaqarnermut Ataatsimiititaliaq ataatsimut isiginnilluni arlalinnik oqaaseqaateqarniarpoq.
1997-mut ilassutitut aningaasaliissutitut inatsisissamut siullermut tunngatillugu aningaasaliissutaareersimasut aningaasaliissutigeqqinnissaannut pisariaqartitsineq 1996-imut ilassutitut aningaasaliissutinut inatsimmut siullermut sanilliullugu 25% missiliorlugu qaffasinneruvoq. Aningaasaqarnermut Ataatsimiititaliap paasivaa aningaasaliissutaareersimasut aningaasaliissutigeqqinnissaat sinerissami sumiiffinni assigiinngitsuni mittarfiliornerit annertusarnissaannut tunngassuteqarnerusoq. Inatsisartut 1997-imut ilassutitut aningaasaliissutinut inatsimmut siullermut tunngatillugu Aningaasaqarnermut Ataatsimiititaliap malugaa Naalakkersuisut pingaarnerutitatut siunertaat tassaasoq; siullermik sanaartugassat tungaannut aningaasaliissuteqaqqinnissat, aappassaanik aningaasaliissutit allanngortinnissaat siusinnerusukkut Aningaasaqarnermut Ataatsimiititaliamit Suleriaatsimullu Ataatsimiititaliamit akuerineqareersimasut, pingajussaanik aningaasaliissutissat nutaat tuaviuuttariallit, sisamassaanillu aningaasaliissutissatut allannguutissat periaatsinut tunnganerusutut taasariaqarnerusut.
Aningaasaliissutissatut siunnersuutit amerlasuut suliffissaqartitsiniarnermut tunngasuupput, tamatumani ilaallutik illuliortiternissanut illuutinillu pioreersunik nutarterinissanut aningaasaliissutissat. Siunnersuummittaaq ilaapput nutaamik mittarfiliornissamut aningaasaliissutit assersuutigalugu Qaanaami, Upernavimmi Paamiunilu aammalu tamatuma saniatigut mittarfiliortiternernut aningaasaliissutigeqqitassat, tamatumani ilaallutik immikkoortumi siullermi Maniitsumi, Sisimiuni, Aasianni Qaarsunilu Uummannap pigisaani mittarfiliornerit. Inatsississami aamma ilaavoq Royal Greenland A/S-ip nunami suliffissuaataasa naammassisaqarsinnaassutsimut naleqqussarneqarnissaannut aningaasaliinissaq.
Tamakkua saniatigut ilassutitut aningaasaliissutitut inatsisissamut ilaapput aningaasaliissutissat pingaaruteqartut ilinniartitaanermut, ilisimatusarnermut, peqqinnissaqarfimmut kiisalu aalisarnermut, piniarnermut nunalerinermullu tunngasut.
Aningaasaqarnermut Ataatsimiititaliap naammagisimaarpaa ataatsimiititaliap innersuussutai, kajumissaarutai, inassutai oqaaseqaataalu ataatsimiititaliap 1997-imut aningaasanut inatsimmut tunngatillugu saqqummiussorsimasai ilassutitut aningaasaliissutitut inatsisissaq manna aqqutigalugu Naalakkersuisut malissimammatigit. Assersuutigalugu taaneqarsinnaapput nunaqarfinni allaffissornikkut ataatsimoortumik aaqqissuussinissamik innersuussutit maanna Naalakkersuisut kommunit suleqatigalugit misissorlugit ingerlallualeriigaat. Tamatuma saniatigut taaneqarsinnaavoq misiligutigalugu Qaqortumi eqqakkanut ikuallaasarfissamik pilersitsinissaq aammalu eqqagassanik eqqaasarneq pillugu kommunit Namminersornerullutillu Oqartussat akornanni aningaasalersuinikkut nammagassat isumagisassallu allat eqqagassalerinermut tunngasut pillugit suliniutaalersimasut.
Ataatsimut isigalugu Aningaasaqarnermut Ataatsimiititaliap 1997-imut ilassutitut aningaasaliissutitut inatsimmut siullermut Naalakkersuisut siunnersuutaat tapersersornartippaa, tamatumani pineqarmata sanaartornermut, ilinniartitaanermut ilisimatusarnermullu, peqqinnissaqarfimmut kiisalu ataatsimut isigalugu suliffissaqartitsiniarnermut tunngasut immikkut pisariaqartitsiviusut.
Ukiuni kingullerni aningaasanut ilassutitullu aningaasaliissutinut inatsisitigut misilittagaalersimasut sunniutaat paasereersimalerlugit Aningaasaqarnermut Ataatsimiititaliaq isumaqarpoq nunatsinni aningaasaqarnikkut ineriartorneq toqqissisimanartutut isigissallugu patsisissaqarluartoq. Aningaasaqarnermut Ataatsimiititaliaq isumaqarpoq aningaasaqarnermut inatsisiliornikkut nunanut allanut akiitsut akilersornerisigut siunissaq ungasinnerusoq inuussutissarsiornikkut aaqqissuussaanertigullu isumannaatsumik ingerlatsineq aqqutigalugu ineriartortitsinissaq siunertaralugit suliniuteqarnissaq kiisalu nammaqatigiiffiusumik atugarissaarnikkut suliffissaqartitsiniarnikkullu politikkeqarnissaq pillugit Naalakkersuisut aningaasaqarniarnermut tunngatillugu anguniagarisaat inuiaqatigiit aningaasaqarnerata pitsanngortariartorneranut sunniuteqarluinnarsimasut.
Pitsaasumik ingerlanermut takussutissat ilagaat agguaqatigiisillugu aningaasarsiat qaffakkiartuaarnerat, akileraarutitigut akitsuutitigullu isertittakkat qaffakkiartuaarnerat, aningaasat naleerukkiartornerata appasissusia, nunanut allanut akiitsut qaffakkiartunnginnerat kiisalu kommunit aningaasaqarnerisa pitsanngoriartornera. Tamakkua saniatigut suliffeqarfissuit anginerpaat ukiut qassissuit matuma siornatigut ajornartorsiorsimagaluartut iluatsissimavaat ineriartornerup ilorraap tungaanut saatinnissaa. Aningaasaqarnerup aaqqissuussaanerullu aalajangersimasumik siunnerfilimmik suliniuteqarnermikkut.
Aningaasaqarnermut Ataatsimiititaliap aningaasaqarniarnikkut ineriartorneq ataatsimut isigalugu toqqissisimanartikkaluarlugu maannarpiaq tunngavissat tunngavigalugit nunatsinni ingerlatseqatigiiffiit pisortallu suliffeqarfiisa ilaanni ineriartorneq toqqissisimanartinngilaat. Aningaasaqarnermut Ataatsimiititaliap isertuunnagu oqaatigissavaa pisortat suliffeqarfiutaasa Namminer-sornerullutik Oqartussanik pigineqartut ilaanni pisortat aningaasaataannik aqutsineq paaqqin-ninnerlu ajorpallaartutut isigigamiuk. Tamatumani assersuutigalugit taaneqarsinnaapput Amutsiviit aamma KNR.
Tamatumunnga atatillugu Aningaasaqarnermut Ataatsimiititaliap Naalakkersuisut inattorumavai suliffeqarfinni taakkunani aningaasatigut aqutsinerup pitsaanerulernissaa siuuttuuffigeqqullugu, tamatumuunakkut landskarsip aningaasaataasa aqunneqarnerata isumannaattuunissaa ikiorser-niarlugu. Anguniagaasariaqarpoq suliffeqarfiit akilersinnaasumik ingerlanissaata aalajangersaaffigineqarnissaat.
Aningaasaqarnermut Ataatsimiititaliap malugaa kommunit akiitsoqarnerat annertusiartunngitsoq landskarsimullu akiitsut ikiliartorlutik. Ukioq kingulleq Ilulissat kommuniata landskarsimut akiitsuminik tamakkerlugit siusinaarluni akiliinera patajaatsutut isigineqarpoq. Kommunit landskarsimut akiitsui kommunit aningaasaqarnikkut ingerlanerannut uuttuutitut atorneqarsinnaapput. Ataatsimut isigalugu kommunit aningaasaqarnikkut ingerlalluarnerulersimasutut oqaatigineqarsinnaapput.
Aningaasaqarnermut Ataatsimiititaliap 1997-imut aningaasanut inatsimmi Kangaatsiap kommuniata landskarsimut akiitsuisa ulorianartumik ineriartornerat tikkuarpaa. Taamanikkut Kangaatsiap kommuniata akiitsui 6 mio. kr.-iupput piffissap ingerlanerani taakku 10 mio. kr.-inut amerlisimapput, ukiumut 1,3 mio. kr.-inik kommuni akiliuteqartaraluartoq. Aningaasaqarnermut Ataatsimiititaliap paasivaa Naalakkersuisut maanna Kangaatsiap aningaasatigut ajornartorsi-ornera maluginialersimagaat, allaffissornikkut Kangaatsiap kommuniata ajornartorsiutai aningaasaqarniarnikkut siunnersortimik sulisitaqarnikkut qaangerneqarsimasutut Aningaasaqarnermut Ataatsimiititaliap isigai. Inuussutissarsiutilli aningaasarsiornerullu tungaasigut suliniuteqarluni malinnaatitsinissaq tulliuppoq.
Aningaasaqarnermut Ataatsimiititaliap kaammattuutaani kommuninut akiitsulinnut aalajangersimasumik siunnerfilimmik sulinissaq pilersaarusiorneqartariaqarpoq, sulissuteqarnermut pilersaarusiornermi eqqaamaneqartariaqarpoq kommunit ullumikkut akiitsuerussimasut qanoq iliorlutik landskarsimut akiligassatik akilersimaneraat Maniitsumi Ilulissanilu akiitsut akilersorneqarnerat ingerlanneqarsimavoq inuussutissarsiornikkut sanaartornertigullu ingerlatsinerup sakkortusarluarneqarnerisigut aammalu ilaatigut KNI Pilersuisoq A/S-ip siammasinnerusumik aaqqissuineratigut. Aningaasaqarnermut Ataatsimiititaliap pissusissamisoortutut isigaa kommunitut napasinnaanngoqqinnissaq siunertaralugu aaqqissuusseqqinnikkut Maniitsumi Ilulissanilu misilittagaalersimasut ilinniarfigineqarsinnaasut illuatungaatigulli isumaqarluni Kangaatsiami pissutsit allanit allaanerusut.
Aningaasaqarnermut Ataatsimiititaliap malugaa isumaqatigalugulu Naalakkersuisut isumaqarmata suliffissaaleqinerup suli annertunerusumik apparsarnissaa atugarissaarneq akissarsiorlunilu isertitaqartarneq pillugu ajornartorsiutit aaqqittariaqartut sallersaasa ilagiuaraat. Aningaasaqarnermut Ataatsimiititaliap tamatumunnga tunngatillugu Royal Greenland A/S-ip nunami suliffissuarni naammassisaqarsinnaassutsimut naleqqussaaneranut kommunit ilaat annertuumik suliffissaaleqiffiusinnaammata, tassa tamanna pinngitsoorniarlugu immikkut ittumik iliuuseqartoqanngippat. Tamatumunnga tunngatillugu Aningaasaqarnermut Ataatsimiititaliap kaammattuutigissavaa Naalakkersuisut 1998-imut aningaasanut inatsisissap suliarineranut atatillugu tamanna eqqumaffigissagaat.
Aningaasaqarnermut Ataatsimiititaliap Naalakkersuisut kommunillu inattorpai nutaamik eqqarsaqqullugit pisuussutillu atorneqarsinnaasut atorluaqqullugit sumiiffinni eqqorneqartuni sivisuumik suliffissaarusimanissap annertusinissaa pinngitsoorniarlugu. Tamatumani ilaasariaqarpoq illoqarnerup tungaatigut iliuuseqarnissaq pingaartumik inissianik pioreersunik nutarterineq eqqarsaatigalugu.
Aningaasaqarnermut Ataatsimiititaliap 1997-imut aningaasaqarniarnikkut ingerlatsineq pillugu nassuiaammi maluginiarpaa nunanik allanik niueqateqarnermi amingartooruteqarnerup annikil-lineqaqqinnissaanik ilimasunneq. Nunanik allanik niueqateqarnermi sinneqartooruteqarnissa- mik anguniagaq nioqqutissanik eqqussuinerup qanoq ingerlaneranik tunngaveqassaaq. Aningaasaqarniarnikkut ingerlatsineq pillugu nassuiaammi taaneqarpoq nioqqutissanik eqqussuineq 1995-imi qaffariarsimasoq, pingaartumik sanaartortitsinermi atortussanik eqqussuinerup anner-tuseriarujussuarneranik pissuteqartumik. Tamanna tunngavigalugu Aningaasaqarnermut Ataatsimiititaliap tunngavissaqarsoraa ilimagissallugu nunatsinni, assersuutigalugu illuliornermi atortussanik sanaartornermik suliniutit ineriartortinnissaannut atorneqarnissaannullu immikkut periarfissiisoqarnissaa, minnerunngitsumik nunani allamiut atortussiaasaasa nunatsinni atortus-sianut unammillersinnaanerat naatsorsuutigineqarsinnaanngikkaagat.
Assersuutissaalluarpoq nioqqutissiaq Siko Block-i Aningaasaqarnermut Ataatsimiititaliap kajumissaarineratigut 1996-imut Inatsisartut ilassutitut aningaasaliissutinut inassutissaannut siullermut siunnersuutikkut siullermeertumik aningaasaliissutigineqartoq. Aningaasaqarnermut Ataatsimiititaliap pingaartutut uniffigaa Aningaasaqarnermut Ineqarnermullu Naalakkersuisup Aningaasaqarnermut Ataatsimiititaliamik isumasioqateqarnermini nioqqutissiaq atorluarsin-naasutut aammalu qangaaniilli atorneqarsinnaasunut illut iigassaannut ullumikkut sanaartornermi atorneqartunut taartissaalluartutut taammagu.
Aningaasaqarnermut Ataatsimiititaliaq aammattaaq Naalakkersuisoqarfik isumaqatigaa Siko Block-imik misilittakkat takutikkaat nioqqutissiaq ilimagisanut angeqisunut tamakkiisumik naapertuutissaguni suli pitsanngoriaateqartariaqartoq. Tassunga atatillugu Aningaasaqarnermut Ataatsimiititaliap siunnersuutigissavaa nunatsinni siunissami nioqqutissanik ineriartortitsiner- mi ilisimasaqarnermik pitsaanerpaamik pigisaqartariaqartoq nunatsinni nioqqutissianik Siko Block-itut ittunik imaluunniit nioqqutissianik nunatsinnut naleqquttunik ineriartortitsinermi naliliinissaq ikiuunnissarlu pillugit.
Assersuutigalugu Aningaasaqarnermut Ataatsimiititaliap takorloorpaa sanaartortitsinermut aqutsisoqarfiup nunani qanitatsinni teknikkikkut suliffeqarfinnik pisortatigoortumik teknikkimut tunngasutigut suleqateqalernissaa. Tamatuma saniatigut Aningaasaqarnermut Ataatsimiititaliap kaammattuutigaa nioqqutissiatigut sullissinikkullu suliniutit sapinngisamik annertunerpaamik siuarsarneqassasut naammassisinnaasat pitsaasut neqeroorutigineqarnerisigut. Taamaattumik Aningaasaqarnermut Ataatsimiititaliap Siko Block-it atorlugit suliniuteqarneq tapersersortariaqartut ilaattut isigaa.
Aningaasaqarnermut Ataatsimiititaliap Nanortalimmi Upernavimmilu peqqissutsikkut pissutsit pillugit nalunaarusiat arajutsisimanngilai, aamma 1996-97-imut peqqinneq pillugu nassuiaammi pinaveersaartitsinissa peqqinnerulernissarlu pillugit Naalakkersuisut anguniagaat maluginiarsimavai. Anguniakkat ilagaat nunaqarfinni peqqinnerulernissaq sulissutigineqartariaqartoq, tamatumunnga atatillugu Aningaasaqarnermut Ataatsimiititaliaq isumaqarpoq nunaqarfinni illoqarneq anguniakkap tamatuma anguneqarnissaanut uuttuutissaasoq pingaarutilik. Tamanna paasilluarlugu taamatullu Inatsisartuni Naalakkersuisunillu naalakkersuinikkut anguniakkat isigimallugit Aningaasaqarnermut Ataatsimiititaliap kaammattuutigissavaa nammineerluni illuliortarnermi tunngaviliisoqassasoq kommuninut immikkut nunaqarfinni pisariaqartitsisunut naapertuussakkanik eqaatsumillu atorneqarsinnaasunik.
Peqqinnissamut tunngatillugu Aningaasaqarnermut Ataatsimiititaliap malugaattaaq naammassisaqarsinnaanermut tunngasutigut ajornartorsiuteqaraluartoq Naalakkersuisut sullissinerit pitsaanerulernissaat sulissutigissallugu piumassuseqartut. Kisiannili Aningaasaqarnermut Ataatsimiititaliap isumaqatigaa napparsimasut passunneqartarnerata isumannaallisarnissaannik kissaatigi- sap naammassiniarneranni arlalitsigut ajornartorsiuteqartoq. Tamatuma saniatigut Peqqinnissaqarfiup aningaasartuutini appartissinnaasariaqarpai sullissineq katsorsagassanullu neqeroorutit qumartinngikkaluarlugit. Tamatumani Aningaasaqarnermut Ataatsimiititaliap ilaatigut eqqarsaatigaa nunani allani nunatsinnilu napparsimasunik nakorsaasarnermut aningaasartuutinut konto-t ataasinngorlugit katinneqarneratigut pisariaqartitsineq tunngaviginerullugu ingerlasoqalersinnaannginnersoq aningaasaliissutit ataasiakkaat tamakkiisumik atorneqarnissaat kisiat tunngavi-ginagu. Aningaasaqarnermut Ataatsimiititaliap kaammattuutigissavaattaaq napparsimasut inissaqartinneqarnerata amigaataanerata pitsanngorsaaffiginissaa, imaannguatsiarmammi illoqarfinni amerlasuuni tamanna ataatsimut isigissagaanni ajornartorsiutaasoq.
Kulturimut tunngasutigut Aningaasaqarnermut Ataatsimiititaliaq isumaqarpoq ataavartumik atuuttussanut tapiisarnernik neqerooruteqarnerit, assersuutigalugu atuakkanut kalaallisut oqaa-sertalinnut atuakkanillu saqqummersitsivinnut tapiissuteqartarnerit qulaajarneqartariaqartut pisariaqarpallu nutartertariaqarlutik. Tamakkua saniatigut Aningaasaqarnermut Ataatsimiititaliap pingaartippaa annertuumik nalingiinnillu innuttaasut paasissutissanik inuiaqatigiinnut tunnga-sunik pissarsinissaannut allanullu ingelatsitseqqinnissamut periarfissinneqassasut.
Aningaasaqarnermut Ataatsimiititaliap paasivaa imermik pilersuineq eqqarsaatigalugu suli Naalakkersuisut annertuunik naammassiniagassaqartut ilaatigut patsisaalluni imeqarfiit amer-lasuut 1950-ikkunni 60-ikkunnilu sanaajusimasut arlalitsigut nungullavissimammata. Naalak-kersuisut taagorpaat Qaanaami, Uummannami, Kangaatsiami, Aasianni Maniitsumilu imeqarfiit pitsanngorsartariaqartut nutaanilluunniit taarserneqartariaqarlutik. Aningaasaqarnermut Ataatsimiititaliap taakkununnga ilanngussinnaavaa Nanortalik, aamma tassani imeqarniarnerup pitsan-ngorsarnissaa pisariaqaqimmat.
Sumiiffiit taagorneqartut tamarmik pisariaqartitseqimmata Aningaasaqarnermut Ataatsimiitita-liap Naalakkersuisut kajumissaassavai allatut periaaseqarluni aaqqiinissamut periarfissat sulis-sutigineqarnerat nangeqqeqqullugu, soorlu immap tarajuiarneqarneratigut imermik pissarsi-sinnaaneq, tassa omvendt Osmose atorlugu, imaluunniit akuleriissumik aaqqiisinnaanerit taamaalilluni Nanortalimmi ajornartorsiutit piaarnerpaamik aaqqinneqarniassammata.
Aningaasaqarnermut Ataatsimiititaliap oqaatigiumasai allat. Naalakkersuisut siulittaasuat, suliffissaqarfiit 10-miit 19-imut.
Aningaasaqarnermut Ataatsimiititaliap konto pingaarnermut 10.01.20, Qarasaasiaqarnermut immikkoortortaqarfik, aningaasaliissutit oqaluuserisimavai. Assaannarmik suliarisartakkat qarasaasiatigut atortunik taarsersorneqarnerisigut suliassat assigiinnerusumik ingerlanneqartalernissaannik tamanillu takuneqartarsinnaalernissaannik nassataqartumik, aammalu qarasaasiat atorlugit suliarinnittarnerup suliassaqarfinni allani ileqqaaruteqarnikkut isumalluutinik atugassanngortitsisinnaaneranik allaaserinninnerit Aningaasaqarnermut Ataatsimiititaliap isumaqatigisorujussuai.
Taamaakkaluartoq teknikkikkut atortulersuutit pillugit nassuiaami oqaatigineqartoq, tassalu paasissutissiisarnermi teknikkikkut atortulersuutitigut piorsaanerup nunatsinnut iluaqutaalluarsinnaanera, aammali annertoorujussuarmik kukkulluni aningaasalersuinermik nassataqarsinnaasoq tunngavigalugu qarasaasiat atorlugit inatsisinik ujarlerfiusinnaasumut nalunaarutit A,B,C,D 1979 utimut killiffigalugu imaqartussamut aningaasalersuinissaq akikinnerpaanersoq aammalu internet atorlugu aaqqiinissamut naleqqiullugu atorluarneqarsinnaanersoq misissuiffigisariaqartoq Aningaasaqarnermut Ataatsimiititaliaq isumaqarpoq.
Aningaasaqarnermut Ineqarnermullu Naalakkersuisoq. Suliassaqarfiit 20-imiit 29-imut.
Aningaasaqarnermut Ataatsimiititaliap iluarisimaarlugu paasivaa sanaartugassatut pilersaarutit ataasiakkaat pissusissamisoornerusumik aqunneqalernissaat qularnaarniarlugu sanaartornermut aningaasalersuinermut isumaqatigiissutitut siunertatut isumaqatigiissuteqartarnissamut suliniuteqartoqalersimasoq.
Konto-mut pingaarnermut kommuninut taarsigassarsiarititat atatillugu kaammattuut nr. 2-mi takuneqarsinnaasutut Aningaasaqarnermut Ataatsimiititaliap Naalakkersuisut piumaffigissavai aaqqissuusseqqinnissamut piorsaanissamullu pilersaarut ukiuni tallimani atuuttussaq suliareqqullugu. Kajumissaarutigineqarpoq KANUKOKA aamma Kangaatsiap kommunia suleqatigalugit suliarineqassasoq, taassumalu qulakkeerniartariaqarlugu Kangaatsiap kommuniata inuussutissarsiornikkut suliffissaqartitsiniarnikkullu siuariarfiunissaa aammalu piffissami ungasinngitsumi aningaasaqarnikkut ingerlallualernissaa. Aningaasaqarnermut Ataatsimiititaliap Naalakkersuisunut kajumissaarutigissavaa iliuusissanut pilersaarutikkut tassuuna ernianut akilersuinissamullu tunngasut artorsiivallaanngitsut. Assersuutigalugu siunnersuutigineqarsinnaavoq landsakarsi- mit taarsigassarsiat piffissami aalajangersimasumi erniqartinneqaratillu akilersugassaassan-ngitsut, taamaalillutik aningaasat atorneqarsinnaalersussat taakkuluunniit ilaannaat inuussutissarsiornikkut piorsaanissamut suliniutinut atorneqarsinnaalissallutik.
Kiisalu Aningaasaqarnermut Ataatsimiititaliap Inatsisartut 1996-imi ilassutitut aningaasaliissutinut inatsisissaannut siullermut siunnersuummut atatillugu inuussutissarsiutit pillugit ataatsimiittartoqatigiinnik pilersitsinissamik kajumissaarut uteqqissavaa.
Nalinginnaasumik oqaaseqaatini taaneqartut aallaavigalugit nammineq illuliornissamik qinnuteqaateqarnermi periutsit pillugit paasissutissat piffissami sivisuumi Aningaasaqarnermut Ataatsimiititaliamut ingerlatinneqartarsimapput. Suliassaq Naalakkersuisunut ilaasortamit isumasioqatigiissutigineqarsimavoq Aningaasaqarnermut Ataatsimiititaliap paasivaa inatsisit maleruaqqusallu Inatsisartunit Naalakkersuisunillu aalajangersarneqarsimasut unioqqutinneqartarsimasorinartut. Taamaattumik kommunini ataasiakkaani nammineq illuliassat pisariaqartitsinermut naapertuuttut siunissami kommuninut neqeroorutigineqarsinnaaqqullugit Aningaasaqarnermut Ataatsimiititaliap kaammattuutigissavaa nammineq illuliornissamik qinnuteqaateqarnissami periusissat pillugit suliffeqarfiutinut kommuninullu Naalakkersuisut paasissutissiisarnertik pitsaanerulersissagaat.
Upernavimmi Uummannamilu umiarsualiviit annertusaavigineqarnissaat pillugu ataatsimiititaliaq isumaqarpoq ileqqaarutissatut Naalakkersuisut siunnersuutaat 1997-imut aningaasanut inatsimmi 1997-imi akuersissutigineqartut illoqarfinnut taakkununnga marlunnut pilersaarutit kingusinnerusukkut kinguartinneqartut, tassaasut Aningaasaqarnermut Ataatsimiititaliap ujartorsimasai. Assersuutigalugu Aningaasaqarnermut Ataatsimiititaliap paasivaa Uummannami umiarsualivimmi sanaartornermut aningaasartuutissat tamarmiusut aningaasanut inatsit 1997 aalisartunut umiarsuarnullu talittarfiliornissanut naleqqiullugu 37 mio. kr.-ingajannik akikillisaanermut naapertuuttut. Upernavik eqqarsaatigalugu ataatsimiititaliap ilanngullugu oqaatigissavaa mittarfiliorluni umiarsualiviliorlunilu suliassat piffissaq eqqarsaatigalugu ataatsimoortikannerneqarsinnaappata mittarfiliornermit ujaqqanik qaartitikkanik sinneruttunik pilersuinikkut sipaaruteqartoqarsinnaammat. Upernavimmi umiarsuarnut talittarfimmik Uummannamilu aalisartunut talittarfimmik pisariaqartitsinerit siulianilu oqaaserineqartut tunngavigalugit ataatsimiititaliap kaammattuutigaa sanaartornissat sapinngisamik Naalakkersuisunit aallartinneqassasut ataatsimiititaliallu paasivaa tamanna pissasoq 1998-imi.
Umiarsualiveqarnermi sanaartugassatut pilersaarutini taakkunani ileqqaaruteqarnissap nassataraa eqqarsarluartariaqarneq. Ataatsimiititaliap ilaatigut isumaliutersuutigisimavai usingiaanermi teknikkikkut atortut pitsaanerulersinneqarnerisigut pisariillisaanermi iluanaarutigineqarsinnaa-sunut tunngasut. Ataatsimiititaliap pissutissaqartippaa suliassaqarfiup tamatuma paasiniaaffigineqaqqissaarnissaa Naalakkersuisut kajumissaassallugit ilisimalikkatillu umiarsualiveqarnermi sanaartugassanut pilersarusiaalerumaartunut ilanngussuullugit.
Siunertamut konto-mut 20.90 aktiaateqarluni ingerlatseqatigiiffiit.
Oqaasertaliussamut nr. 2-mut atatillugu Aningaasaqarnermut Ataatsimiititaliap siunniuppaa Royal Greenland A/S-ip nunami suliffiutaani naleqqussaanissami ukiuni tallimani pilersaarutip aningaasalersuinissamut tunngasortai imminnut akilersinnaasusiata nutaamillu tunisassiorsin-naanerup iluani suliassaqartitsinerup ingerlaneranut ingerlaqatigiittariaqartut. Ineriartorneq Aningaasaqarnermut Ataatsimiititaliamit malinnaaffigeqqissaarneqarniarpoq.
Kont-mi tassani oqaasertaliussaq nr. 3 eqqarsaatigalugu Aningaasaqarnermut Ataatsimiititaliaq akuersissuteqarnermini naatsorsuutigaa KNI Pilersuisoq A/S-ip landskarsimit tigusisinnaatitaanera taamaaqataanik appartinneqassasoq.
1997-imi ilassutitut aningaasaliissutissatut inatsimmut siullermut 1997-imi siunnersuummut allannguutissatut siunnersuummi konto-mut pingaarnermut 20.10.13-imut suliffissaqartitsiniarnermik siuarsaaneq, aningaasaliissutit 6,8 mio. kr.-inik appartinneqarnissaat qinnutigineqarpoq. Tassunga atatillugu ataatsimiititaliap oqaatigissavaa ukiup taamaasinerani suliffissaqartitsiniarnermik siuarsaanissamut tapiissuteqaqqinnissamik pisariaqartitsisoqarnissaa naatsorsuutigine-qarsinnaasoq isumakulunnartoqartillugu. Ilanngullugu ataatsimiititaliap malugeqqussavaa 1997-imut aningaasanut inatsimmi konto-mut aningaasaliissutit aalisakkanik suliffissuarnuinnaq sammitinneqanngimmata.
Inuussutissarsiutinik siuarsaanermut pilersaarutit piviusunngortinneqarnissaannik 1996-imi ukiakkut atatsimiinnermi Aningaasaqarnermut Ataatsimiititaliap nalinginnaasumik kaammat-tuuteqarnermini 1997-imi paasisimalikkat 1998-imut siunissamullu siunnersuusiornermi Naalakkersuisunit arajutsisimaneqassanngitsut naatsorsuutigaa. Taamaattumik inaarutaasumik pingaarnersiuinerup aningaasaqarnermut inatsisip suliarineqarnerani pisarnissaa ataatsimiititali-ap pingaartippaa. Neriuutigisanut naleqqiullugu 1997-imi takornariartitsinerup ineriartornerata aammalu inuussutissarsiutinik siuarsaanermik tapiissutit nunap iluani agguaanneqartarnerat atorluarneqarsinnaanersoq imaluunniit taamatut pisussanngortinneqarluni tunngaviusunut ilaatinneqassasoq kajumissaarutigineqarpoq.
Sanaartugassanut sillimmatit iluarsiivigineqarnissaat Aningaasaqarnermut Ataatsimiititaliap ataatsimut isigalugu akuersaarsinnaavaa. Suliami pineqartumi tunngavissaatitaasut tunngavigalugit. Sanaartugassanut sillimmatit konto pingaarneq 20.11.60 ilassutitut aningaasanut inatsisissami 1997-imi allannguutissatut siunnersuummi iluarsiivigineqarnissaannut pissutaatitaasut ujartorneqarput, tassa Naalakkersuisut oqaatigimmassuk sanaartugassanut sillimmatit Nuummi aningaaseriviup illutaata atorneruuttup pisiarineqarnissaanut iluarsaanneqarnissaanullu atatillugu atorneqassasut naatsorsuutigineqartoq. Taamaattumik Aningaasaqarnermut Ataatsimiititaliap kaammattutigissvaa atuinissamut siunnersuut Naalakkersuisunit isumaliutigineqaqqissasoq. Tassunga ilanngullugu isumaliutitik pingajussaaneerinninnissaq sioqqullugu Aningaasaqarnermut Ataatsimiititaliamut ilisimatitsissutigissagaat.
Isumaginninnermut Suliffeqarnermullu Naalakkersuisoqarfik, suliassaqarfiit 30-imiit 39-imut.
Paamiuni suliffissaaleqineq ikiorsiiffiginiarlugu piffissamut ungasinnerusumut Naalakkersuisut sunik isumaliuuteqarnersut Aningaasaqarnermut Ataatsimiititaliap arlaleriarluni ujartortarsimavaa. 1997-imut aningaasanut inatsisissamut atatillugu Paamiuni inuussutissarsiutitigut ingerlatsineq annertunerulersinniarlugu immikkut suliniutissat Aningaasaqarnermut Ataatsimiititaliamit ujartorneqarsimapput, tassami Paamiuni Narsamilumi suliffissaaleqisut nunatsinni amerlanerpaammata. Taamaattumik kommunini taakkunani suliffissaaleqinermik ajornartorsiutip qaangerniarneqarnissaannut iliuusissanut pilersaarusiortoqarnissaata kaammattuutigineqarnissaa Aningaasaqarnermut Ataatsimiititaliap pissutissaqartippaa. Iliuusissanut pilersaarusiortoqarnissaanut atatillugu innersuussutigineqassaaq Royal Greenland A/S-ip nunami suliffiutaani naleqqussaanissaq pillugu nalinginnaasumik oqaaseqaatini kajumissaarutit.
Kultureqarnermut, Ilinniartitaanermut Ilageeqarnermullu Naalakkersuisoqarfik, suliassaqarfiit 40-miit 49-mut.
Konto-mi pingaarnermi 40.10.20-mi kommunini atuarfiit Alluitsup Paani atuarfiup iluarsaanneqarnissaanut allanngortiterneqarnissaanullu atugassanik aningaasaliissutit amerlineqarnissaat Aningaasaqarnermut Ataatsimiititaliami oqaluuserineqarsimavoq, tassa aningaasaliissuteqartoqarnissaannik pisariaqartitsineq takussutissaammat 22. April 1996-imi atuarfiit qanoq issusiannut nalunaarsuineq malillugu iluarsaassinissamik pisariaqartitsinerup tamarmiusup aningaasartassaanut eqqoriaalluni missigiinermut. Aningaasaqarnermut Ataatsimiititaliap kaammattuutigaa artuarfiit qanoq issusiannut nalunaarsuinermut atatillugu naatsorsuinerliuinerusinnaasut 1998-imut aningaasanut inatsisissamut siunnersuummut atatillugu Naalakkersuisunit arajutsinaveersaarneqassasut.
Konto-mut pingaarnermut 40.14.18-imut Kalaallit Nunaata Radiua, aningaasaliissutit amerlineqarnissaannik Naalakkersuisut siunnersuutaat Aningaasaqarnermut Ataatsimiititaliami aamma KNR-ip naatsorsuutaanik kukkunersiuisullu nalunaarutaannik takusaqarnissaannik periarfissaqarsimasumit sukumiisumik oqaluuserineqarsimavoq.
Tunngavissarititaasut tunngavigalugit aningaasaliissutit 7,3 mio. kr.-inik amerlineqarnissaannik qinnuteqaat Aningaasaqarnermut Ataatsimiititaliamit akuersaarneqarsinnaanngilaq. Tamatumunnga tunuliaqutaapput KNR-ip akiitsui nammineq aningaasaaatitigut amingartoorutit aamma akissarsiassanut aningaasartuutinik annertuumik sippuisimanerit aningaasaqarnikkut aqutsinerup ingasattumik sanngiiffigineqarsimaneranik takussutissaasut. Taakku saniatigut Aningaasaqarnermut Ataatsimiititaliap isumakulunnartoqartippaa, tassa KNR pisortat suliffiutigimmassuk imminut ingerlattoq, siammarterinermut Tele-mut akileraarutissani atuinikinnerusimanermut atatillugu Namminersornerullutik Oqartussat pissarsiassaat 1,3 mio. kr.-it Kalaallit Nunaata Radiuata kontoanit pingaarnermi 40.14.18 allanneqarsimammata, allanneqarsimanatik konto pingaarnermi 40.14.19 Kalaallit Nunaanni TV-kut Radiukkullu siammarterineq.
Aningaasaqarnermut Ataatsimiititaliap piumasaqaatigissavaa tamatuma erseqqinnerusumik nassuiaatitaanik tunineqarnissamik. Tamanna tunuliaqutaralugu Aningaasaqarnermut Ataatsimiititaliap kaammattuugaa KNR-imi ingerlatsinerup aningaasanillu aqutsinerup iluarsineqarnissaat Naalakkersuisunit sulissutigineqassasoq, tassunga ilanngullugu pissutsit taamaattut siunissami qanoq ililluni pinngitsoortinneqarsinnaanerat nalilersorneqassasoq. Pingajussaaneerinissaq sioqqullugu KNR pillugu apeqqutit akisariaqartut ataasiakkaat Naalakkersuisunut ilaasortanit susassaqartunit isumasioqateqarnermi uterfigineqarnissaat Aningaasaqarnermut Ataatsimiititaliap kissaatigaa.
Nalinginnaasumik oqaaseqaatini ataatsimiititaliap oqaatigaa radiukkut fjernsynikkullu innuttaasunut qaammarsaanermut ingerlatsisoqarnissaa pisariaqartinneqartoq; assersuutigalugulu ilinniarfiit innuttaasunut paasissutissanik aallakaatitsinissaminnut periarfissaqartinneqarsinnaanerat, KNR-ip ussassaarinermik ingerlatsinera pillugu inatsisilerinermut tunngasutigut inatsisinik eqquivallaarani allagartatigut ussassaarineq Naalakkersuisunit uppernarsarneqarpoq. Paasissutissat Aningaasaqarnermut Ataatsimiititaliap tigusimavai Aningaasaqarnermut Ataatsimiititaliap kaammattuutigaa pissutsit tamakku aamma naqqa tikillugu misissorneqassasut iluarsineqassallutillu.
1997-imut aningaasanut inatsimmut atatillugu katersortarfiit illunut sullivinnut siunissami atatinneqalernissaannik Aningaasaqarnermut Ataatsimiititaliap kaammattutigisani matumuuna oqaatigeqqissavaa. Naalakkersuisoqarfimmik isumasioqateqarnermi Aningaasaqarnermut Ataatsimiititaliap paasivaa 1998-imut aningaasanut inatsimmi matumunnga aningaasanik immikkoortitsisoqassappat Naalakkersuisoqarfiup kommunit tamaasa nutaamik qinnuteqaateqartinniarai. Suliniut Aningaasaqarnermut Ataatsimiititaliamit akuersaarneqarpoq, aammalu Aningaasaqarnermut Ataatsimiititaliap naatsorsuutigaa siunertamut tassunga taperserneqarnissamik qinnuteqaateqarnissamut periarfissat pillugit kommunit tamarmik sukumiisumik ilisimatinneqarumaartut.
Aalisarnermut, Piniarnermut Nunalerinermullu Naalakkersuisoqarfik, suliassaqarfiit 50-imiit 59-imut.
Ajutuulernermi kalerrisaarinermik atortussanik siammarterinikkut inuussutissarsiutigalugu aalisartut umiatsiaararsortullu akornanni isumannaallisaanerup annertusineqarnissaannik Naalakkersuisut kissaateqarnerat Aningaasaqarnermut Ataatsimiititaliamit akuersaarneqarsinnaavoq. Ilassutitut aningaasaliissutitut inatsimmi matumamni konto-mi pingaarnermi 50.01.03-mi aalisarneq, piniarneq nunalerinerlu siunertamut tassunga VHF-radiunik siammarterinissamut aningaasanik atugassanik immikkoortitsisoqarpoq.
Tunngavissaatitaasut tunngavigalugit Aningaasaqarnermut Ataatsimiititaliaq isumaqarpoq siunertaq aningaasanut inatsimmi siunertanut inuussutissarsiutit aalisarneq, piniarneq nunalerinerinerlu iluini misissuinissanut piorsaanissanullu pilersaarutit naapertuuppianngitsoq, tassani Naalakkersuisut kajumissaarneqarput pingajussaarinninnissaq sioqqullugu tamanna pillugu erseqqinnerusumik Aningaasaqarnermut Ataatsimiititaliamut ilisimatitseqqullugit. VHF-radiorpiaat atorneqarnissaat aamma oqaluuserineqarsimavoq Aningaasaqarnermullu Ataatsimiititaliap Naalakkersuisunut kaammattutigaa aaqqeeriutissat qinerneqarsinnaasut allat, soorlu kalerrisaaraluni aallakaatitsissutit isumaliutigeqqullugit.
Aningaasaqarnermut Ataatsimiititaliap nuannaarutigalugu paasivaa nunaqarfinni aqusinniornis-sat pillugit 1997-imut aningaasanut inatsisissap isumaqatiginniutigineqarnerani Aningaasaqar-nermut Ataatsimiititaliap kaammattuutai malinneqarsimammata kinguneqartinneqarlutillu Nanortallip, Narsap Qaqortullu kommuniini savaateqarfinni aqqusinniortoqarnissaa pillugu allannguutissanik siunnersuutinik. Aningaasaqarnermut Ataatsimiititaliamit kaammattuutigineqarsinnaavoq nunaqarfinni aqqusinniornissat aallartinneqarnissaannik ataatsimiititaliap kaammatttuutai ingerlanneqassasut, tassunga atatillugu atortorissaarpallaarani aaqqeeriutissat isumaliutigineqarnissaat.
1996-imi ukiakkut ataatsimiinnermi ilanngullugu ataatsimiititaliap kaammattuutigaa nunaqarfinnut suliartortinneqartartussat pilersinneqassasut nunaqarfinni aqqusinniornerni suliaqartareersut immikkullu ilisimasaqalersimasut angalaqattaarlutik suliassaqarfimmi tassanik suliassanik aallartitsisartuullutillu siunnersuisartuunissaat. Aningaasaqarnermut Ataatsimiititaliaq isumaqarpoq isumassarsiap taassuma misissuiffigineqarnissaa ingerlaqqittariaqartoq.
Konto-mi pingaarnermi 50.06.14-imi tunisassiassanik ineriartortitsineq, aalisarneq, saattussanut pullatinut aningaasalersuinissamut tapiissuteqartarnissamik suliniut Aningaasaqarnermut Ataatsimiititaliap tapersersornartippaa. Ataatsimiititaliap malinnaaffiginiarpaa ukiup ingerlanerani qinnuteqaatinik tigooqqarneqartunik Naalakkersuisut pingaarnersiuinerat. Ukiakkut ataatsimiinnerup nalaani aaqqissuussineq uterfigineqassaaq.
Peqqinnissamut, Avatangiisinut Ilisimatusarnermullu Naalakkersuisoqarfik, suliassaqarfiit 60-imiit 61-imut.
Konto pingaarneq 60.01.95 akinut akissarsianullu iluarsiissutit, siunertamullu konto 60.10 nuna tamakkerlugu peqqinnissakkut siunertat eqqarsaatigalugit Aningaasaqarnermut Ataatsimiititaliap pissutissaqartippaa erseqqissassallugu Aningaasaqarnermut Ataatsimiititaliap naatsorsuutigigaa Naalakkersuisoqarfimmi tassani Naalakkersisoqarfinnilu allani konto pingaarnerni akinut akissarsianullu iluarsiisarnerit siunissami pisalissasut aningaasanut inatsisikkoortumik, maannakut pisutut ilassutitut aningaasaliissutinut inatsit aqqutiginagu.
Avatangiisinut tunngasunik Aningaasaqarnermut Ataatsimiititaliap 1997-imut aningaasanut inatsisissamut siunnersuummi Aningaasaqarnermut Ataatsimiititaliap kajumissaarutigaa nammagassat suliassallu agguataarneqarnissaat pillugu isumaqatigiissutissat Naalakkersuisut KANUKOKA-mut isumaqatiginniutigissagaat. Aningaasaqarnermut Ataatsimiititaliap paasivaa isumaqatigiinniarnerit taakku atorfilitsigoortumik aallartinneqarsimasut.
Aningaasaqarnermut Ataatsimiititaliap nuannaarutigalugu paasivaa Qaqortumi misiliilluni ingerlatsinissamik eqqaanikkut ikuallaavimmik pilersitsineq Aningaasaqarnermut Ataatsimiititaliap ataatsimiititaliallu allat kajumissaarinerat malillugu siunnersuutigineqarsimasoq 1997-imi aningaasaliisoqassasoq akuersaarsinnaallugillu aningaasaliissutit taakku siunertaat atorneqarnissaallu.
Naalakkersuisut siunnersuutigaat Paarisa aallarteqqinneqassasoq Peqqinnissamut Ilisimatusarnermullu Pisortaqarfiup ataani immikkut allaffittut. Aningaasaqarnermut Ataatsimiititaliap ilisimavaa Paarisap ilaatigut siunertarigai pitsaaliuinermi anguniakkat piviusunngortinneqarnissaat qulakkeerneqarnissaallu. Pitsaaliuinermi suliniutit qitiusumi najukkamilu ataqatigiissaarneqarnissaat aammalu pitsaaliuinermi suliassat innuttaasunit suleqataaffigineqarnissaasa qulakkeerneqarnissaat.
Ataatsimiititaliap anguniakkat tapersersornartorujussuartut isumaqarfigai, taamaattoq Aningaasaqarnermut Ataatsimiititaliaq isumaqarpoq siunertaq tamanut tunngassuteqarpallaartoq taamaat-tumillu ataatsimiititaliap Naalakkersuisunut Paarisap siunissami ilusiligaanissaanut siunnersuummik Inatsisartut ukiakkut ataatsimiinnissaannut Inatsisartunut saqqummiusseqqullugit.
Konto-mut pingaarnermut 60.10.12-imut Peqqissaanermik Ilinniarfik, tassunga atatillugu Aningaasaqarnermut Ataatsimiititaliap kaammattuutiginiarpaa isumaliutigeqqullugu siunissami pikkorissartitsisarnerni ungasissumut atuartitsineq akikilliliissutaasinnaassannginnersoq, as-sersuutigalugu pikkorissartitsinerit atuagarsornermut tunngasortaasa ungasissumut atuartitsinertut neqeroorutigineqartarnerisigut.
Inuussutissarsiornermut, Angallannermut Pilersuinermullu Naalakkersuisoqarfik, suliassaqarfiit 70-imiit 79-imut.
Aningaasaqarnermut Ataatsimiititaliap malugisimavaa tamanut tunngatillugu akigitittakkat taakkununngalu ilaatillugu innaallagissamut imermullu atuisut tamarmik akiliutigisartagaat appartinneqarnissaat Naalakkersuisoqarfiup pingaarnerutillugu anguniagarigaa. Tamanna Aningaasaqarnermut Ataatsimiititaliap tapersersorsinnaavaa.
Aningaasaqarnermut Ataatsimiititaliap akutsunngitsumik takusarpaa erngup aqqutaanik ator-tussanillu taarsersuisarneq ataatsimut isigalugu landskarsimut annertuumik aningaasartuutaa-sartoq. Tassunga atatillugu ataatsimiititaliap nuannaarutigalugu malugisimavaa Aasianni imermik pilersuinermut pilersaarusiaq atortussanik allanik toqqaanikkut neqerooruteqartitsinermilu iluatsitsinerup kingunerisaanik suliassaq 2,4 mio. kr.-inik akikinnerulersinneqarsimasoq. Aningaasaqarnermut Ataatsimiititaliap Nukissiorfinnut allanullu kajumissaarutigaa atugarisartagatoqqanit allaasunit atortussarsiorluni akikinnerulersitsissutaasinnaasorsiornikkut iluanaarutaasinnaasut arajutsinaveersaaqqullugit.
Sulisa-mi ulluinnarni ingerlatsinermut matussutissanik 2 mio. kr.-inik ilassutitut aningaasaliis-suteqartoqarnissaanik Naalakkersuisut siunnersuutaat pillugu Aningaasaqarnermut Ataatsimiititaliap Naalakkersuisunut kaammattuutigissavaa siunnersuummik pingajussaarisoqarnissaanut tamanna itisiliivigineqassasoq. Aningaasaqarnermut Ataatsimiititaliap kajumissaarutigissavaa itisileerinermi missigersuusianut siunnersuummi allaaserineqartut iluini aningaasat atorneqarnissaannut sukumiisumik nassuiaatit ilaatinneqassasut.
Kiisalu Naalakkersuisoqarfimmut tunngatillugu Aningaasaqarnermut Ataatsimiititaliap uteqqissavaa 1997-imut aningaasanut inatsimmi nunaqarfinni illunik sullivinnik pilersitsinerit pillugit kaammattuutini nr. 19 Aningaasaqarnermut Ataatsimiititaliaq isumaqarpoq illunut sullivinnut nalinginnaasumik ilusiliineq allanngortinneqartariaqartoq taamaasilluni katersortarfittut atorneqarsinnaanera ilanngunneqarluni tamanna pisariaqartinneqaraagat.
Landskarsip aningaasaqarniarneranut takussutissiaq iluarsisaq.
Isumaliutissiissummi matumani inassutigineqartut Inatsisartunit akuersissutigineqassappata 1997-imi ilanngaatissat ilanngaatigereerlugit angusassaq Naalakkersuisut siunnersuutaannut majip tallimaani 1997-imi saqqummiunneqartumut sanilliullugu 43.212.000 kr-inik pitsanngoriaateqassaaq. Tamanna isumaqarpoq matuma kingorna EST-imi 105.730.000 kr-inik amingartooruteqarnissaq missangersuutigineqartoq.
Ukiut missingersuusiorfiusut 1998, 1999 2000-ilu eqqarsaatigalugit Aningaasaqarnermut Ataatsimiititaliap inassuteqaatai kinguneqassapput EST-imi sinneqartoorutissatut missingersuutigineqartut ima annertussuseqassasut 1998 1,1 mio. kr.-it, 1999-imi 8,3 mio. kr.-it 2000-imi 37,5 mio. kr.-it.
1997-imut Inatsisartut ilassutitut aningaasaliissutinut inatsisissaannut siullermut siunnersuut Inatsisartut aappassaaneerinninneranni akuerisassanngorlugu Aningaasaqarnermut Ataatsimiiti-taliamit isumaqatigiissumit inassutigineqartutut ilanngussani 1-imi 2-mi aamma 3-mi ilan-ngunneqartuni takuneqarsinnaavoq.
Taamatut oqaaseqarluni Aningaasaqarnermut Ataatsimiititaliap inassutigaa inatsissatut siun-nersuut pingajussaaneerneqarnissaminut ingerlateqqinneqassasoq.
Daniel Skifte, Aningaasaqarnermut Ineqarnermullu Naalakkersuisoq:
Naalakkersuisut 1997-imut Inatsisartut ilassutitut aningaasaliissutinut inatsissaannut siullermut siunnersuutip aappassaaneerneqarnissaanut Inatsisartut Aningaasaqarnermut Ataatsimiititaliata isumaliutissiissutaa tiguaat. Naalakkersuisut naammagisimaarlugu paasivaat Naalakkersuisut siunnersuutaat ataatsimut isigalugu Aningaasaqarnermut Ataatsimiititaliamit tapersersorneqartut.
Naalakkersuisut malugaat ukiuni kingullerni aningaasaliissutaasartut sunniutaat tunngavigalugit nunatsinni aningaasaqarnikkut ineriartorneq ataatsimiititaliamit toqqissisimanartinneqartoq. Aningaasaqarnermut Ataatsimiititaliap paasivaa nunanut allanut akiitsut akilersorneri siunissaq ungasinnerusoq eqqarsaatigalugu inuussutissarsiornikkut aaqqiisussaanertigullu isumannaatsumik ingerlatsineq aqqutigalugu ineriartortitsineq siunertaralugit suliniuteqarnissaq kiisalu nammaqatigiissumik atugarissaarnissamut suliffissaqartitsiniarnermullu ingerlatsineq oqimaaqatigiissinneqartut. Ilanngullugu oqaatigineqarpoq akileraarutitigut akiitsuutitigullu isertittakkat qaffakkiartuaartut. Tamakkulu ilaatigut takussutaasut nunatsinni aningaasat sulisinneqalernerulernerannut.
Naalakkersuisut malugaat Amutsiviit KNR-ilu pillugit Aningaasaqarnermut Ataatsimiititaliap oqaaseqaatai soorunalumi malitseqartissallugit. Naalakkersuisut arajutsisimanngilaat suliffissaqartitsiniarnikkut periarfissat pitsaanerulersinniarlugit immikkut iliuuseqartoqartariaqartoq pisariaqartinneqarmat tassungalu atatillugu Royal Greenland naammassisaqarsinnaassutsimut naleqqussaanerup siunertaat malitseqartinneqartariaqartut. Aammattaaq Naalakkersuisut malugaat nunatsinni tunissassiaasinnaasut ilaatigut avataaniit eqqussorneqartartunut taartaasinnaasut pillugit Aningaasaqarnermut Ataatsimiititaliap oqaaseqaatai.
Suliniutit tamatumunnga sammivillit tapersersorneqarnissaat pingaarpoq. Aamma pingaarpoq nalilersuinermi Sulisa A/S-ip peqataatinneqarnissaa taamaalilluni ingerlatseqatigiiffiup immikkut ilisimasai eqqortumik atorneqarsinnaassammata, aammalu piffissaq ungasinnerusoq eqqarsaatigalugu pilersaarutit pisortat aningaasatigut tapersersugaat imminnut napatissinnaanissaat qulakkeerneqarniassammat.
Kiisalu Naalakkersuisut malugaat peqqinnissaqarfik, kulturimut tunngasut aamma illoqarfinnut imermik pilersuineq pillugit Aningaasaqarnermut Ataatsimiititaliap oqaaseqaatai. Oqaaseqaatit taakku Naalakkersuisut tusaatissatut tiguaat.
Nammineq illuliat pillugit Aningaasaqarnermut Ataatsimiititaliap oqaaseqaatai eqqarsaatigalugit Naalakkersuisut isumaqatiginngilaat Aningaasaqarnermut Ataatsimiititaliap oqaaseqaataa imaattoq: Ainatsisit maleruaqqusallu Inatsisartunit Naalakkersuisunillu aalajangersarneqarsimasut unioqqutinneqartarsimasorinartut.@ Naalakkersuisut Aningaasaqarnermut Ataatsimiititaliamut tamatumani pissusiusut allakkatigut aammaarlutik nassuiaateqarfigeqqammerpaat, tamannalu tunngavigalugu neriuutigalugu attaveqatigiinneq siunissami ingerlanneqalissasoq paasissutissat uppernarsarneqarsinnaasut tunngavigalugit.
Kiisalu Naalakkersuisut malugaat aningaasaliissutissanut siunnersuutit arfinillit aamma tjenestemanditut atorfimmik pilersitsinissamik siunnersuutip ataatsip aalajangiiffigineqarnissat Aningaasaqarnermut Ataatsimiititaliap pingajussaaneerinissamut kinguartissimagai. Taakku ilaannut tunngaviulluni paasissutissanik amerlanerusunik tunineqarnissamik kissaateqarneq. Paasissutissat kissaatigineqartut Naalakkersuisut ataatsimiititaliamut ingerlateqqikkumaarpaat.
Kinguartitsinerit taakku kingunerisaannik 1997-imut ukiunullu missingersuusiorfiusunut EST-mi angusat Naalakkersuisut allannguutissatut siunnersuutaannut naleqqiullugu allannguuteqarput. Naalakkersuisut paasisinnaavaat allannguutissatut siunnersuutinut 36-inut tunngatillugu ukiut missingersuusiorfiusut eqqarsaatigalugit Naalakkersuisut allannguutissatut siunnersuutaat pillugit inassuteqaatinik Aningaasaqarnermut Ataatsimiititaliap isumaliutissiissutaani ilanngussaqarsimanngitsoq. Taamaattumillu piumasaqaatigissallugu taakkununnga inassuteqaatit pingajussaaneerinninnermut ilanngunneqarnissaat taamaasillutik siunnersuutit taakku aamma Inatsisartuni oqaluuserineqarsinnaaniassammata.
Inassuteqaatit amingaatigineqarnerisa ilaatigut kinguneraat isumaliutissiissutip immikkoortuani 9-mi oqaaseqaatinut ukununnga Aukiut missingersuusiorfiusut 1998, 1999 2000-ilu eqqarsaatigalugit Aningaasaqarnermut Ataatsimiititaliap inassuteqaatai kinguneqassapput EST-mi sinneqartoorutissatut missingersuutigineqartut ima angissuseqassasut 1998-imi 1,1 mio. kr.-it, 1999-imi 8,3 mio. kr.-it kiisalu 2000-imi 37,5 mio. kr.-it isaasalerlugu ataqatigiittoqannginnera@.
Ilassutitut aningaasaliissutitut inatsisissamut siullermut siunnersuummut atatillugu Inatsisartuni ilaasortat ilaannut sisamanut ilanngunneqarsimasunut Aningaasaqarnermut Ataatsimiititaliaq oqaaseqaateqarlunilu kaammattuuteqarpoq. Siunnersuutinut taakkununnga sisamanut Aningaasaqarnermut Ataatsimiititaliap oqaaseqaatai pingaarnerusutigut Naalakkersuisut isumaqatigaat. Kisianni oqaatigissallugu oqaatsit: Ainassutigaa@ aamma Akaammattuutigaa@ atugaanermikkut immikkoortinneqarsimanngitsut.
Naggataatigut Naalakkersuisut paasivaat isumaliutissiissutip immikkoortuani 8-mi kaammattuutit 17-it Aningaasaqarnermut Ataatsimiititaliamit ilanngunneqarsimasut. Tamanna tunngavigalugu Naalakkersuisut nalunaarutigissavaat suliap ingerlaqqinnerani kaammattuutit taakku arajutsisimaneqassanngimmata aammalu paasissutissat amerlanerusut piaarnerpaamik Naalakkersuisunit ataatsimiititaliamut ingerlateqqinneqassammata, Inatsisartut inatsisissatut siunnersuutip pingajussaaneerneqarnissaa siunertaralugu.
Lars Karl Jensen, Siumup oqaaseqartua:
Siullermik qinnuteqaatigeqqaassavara uanga oqaluuserisassanngortitsininnut tunngatillugu akissuteqalaarnissara.
Uani ataatsimiititaliap akissuteqaataani uanga siunnersuutigisannut nunatta imartaani uuliasiortoqalissagaluarpat Paamiut pilersuivittut umiarsualiviusinnaaneranut tunngasumut akissuteqaataasut naammagisimaarpakka aammalu paasillugit. Uanili oqaatigineqartutut uuliamik ujaasisussat atortutik nassataralugit suliassatik ingerlattussaagaat ersarissarneqarpoq. Taanna nalunngilara uanilu pisara tassaavoq uuliamik qalluisoqalerpat aamma avatitsinni uuliasiortoqalerpat uninngasunik taava umiarsuit taakkununnga pilersuisuusut umiarsualiveqartariaqassapput atortunullu ilitsiveqarlutik.
Taamaattumik taanna takisuuliuutiginagu oqaatigiinnassavara illoqarfinnut allanut umiarsivili-orfissatut piukkunneqarsinnaanermut tunngatillugu misissuinissami siunnersuutiga taaneqarmat, tassa Paamiut ilanngunneqarnissaat, taanna naammagisimaarakku.
Qujanaq.
Inatsisartut ilassutitut aningaasaliissutaannut inatsisissamut siullermut Aningaasaqarnermut Ataatsimiititaliap isumaliutissiissutaa Siumumit misissoreerlugu pingaarnerutitagut imatut oqaaseqarfigissavagut.
Siumumiit maluginiakkatta ilagaat ataatsimiititaliamit oqaatigineqartoq aningaasaliissummut inatsisissaq ukiup siuliani taamatut suliaqarnermut sanilliullugu 25% missiliorlugu qaffasinnerusoq, tamannali naatsorsuutigereernikuuarput, tamatumani pineqarmata sanaartornermut, ilinniartitaanermut ilisimatusarnermut, peqqinnissaqarnermut kiisalu minnerunngitsumik suliffissaqartitsiniarnermut pitsanngoriatissanut tunngasut.
Nuannaarutigaarpullu takusinnaagatsigu suliassat pingaarnerutitat nutaanullu taviuuttarialin- nut aningaasaliissutissat Naalakkersuisut salliutissimagaat kiisalu nunatsinni aningaasaqarnikkut ineriartorneq toqqissisimanartutut isigissallugu patsisissaqartoq uani oqaatigineqarmat nuannaarutigivarput.
Siulittaasoqarfiup siunnersuutigisaa malillugu - aningaasaliissutissanut aalajangernerit aningaasaqarnermullu apeqqutit tamakkununngalu akissuteqaatit takussutissartaannik - Aningaasaqarnermut Ataatsimiititaliamit Inatsisartunut paasissutissanik ingerlatitsisalernissaq pissusissami-soortutut isigalugu Siumumit taperserparput.
Naalakkersuisut allattoqarfiata Namminersornerullutik oqartussat inatsisitigut malittarisassa- nik innuttaasunut pitsaasumik saqqummiisarnissaa pingaartikkatsigu allaffissornikkut sulia-qartussamik atorfinitsitsinissaq taperserparput.
Nuannaarutigaarpullu takusinnaagatsigu Nuuk Imeq A/S aammalu Grĝnlands Baseselskab A/S immikkut ittumik iluanaaruteqarsimasut 3,711 mio. kr.-inik annertussusilimmik, iluanaarutit ilaasa Atuakkiorfik A/S-ip aningaasaliiffigineqarneranut qaffaatissatut atorneqarnissaat akuersaarparput.
Siumumit pingaartillugu taperserparput nunat tamalaat akornanni suliniaqatigiiffinnut ICC-mut, nunallu inoqqaavisa suliniarfigineqarnerannut atorneqartussanik aningaasarpassuungikkaluartunik tapissuteqarneq, nunattami namminersornerulersimanera nunani uagutsitut allanik naalagaaffeqateqartuni soqutigineqartuuvoq tamakkunuunalu avammut nittarsaattarnerput avammut kiinnertarnermi matuersaatitut pitsaasutut taajumavarput.
Landskarsip aningaasaataasa ilimagisamit annertunerunerat tunngavigalugu Mittarfeqarfinni, Amutsivinni, Nukissiorfinnilu ingerlatsinermi tigoriaannarnik sillimmateqarnissamut, tamatumallu unnuisarfiit hotel-it amerlineqarnissaannut AUnnuisa@ aqqqutigalugu pilersaarutinut, timmisartunut suluusalinnut mittarfiliortiternermi ingerlatsinerup suliassallu ilaannik siuartsi-tsinernut atasumik Naalakkersuisut aningaasaliissutisaanik inassuteqarnerat akuersissutigaar- put tamanna suliffissanik amerlanerusunik sanaartukkallu ingerlaannarnissaannik qulakkeerisussaammat.
Siumumit nuannaarutigaarput aningaasaqarnikkut nassuiaammi takusinaagatsigu nunanik allanik niueqateqarnermi amigartoorutit ikiliartortut, tamatumunngalu atatillugu maluginiarparput ukiuni tulliuttuni illoqarfinni nunaqarfinnilu peqqinnissamut naleqqunnerusunik innuttaasut illussaqartitaanissaat sulissutiginiarneqartoq, kiisalu nunatsinni illulioriaaseq nutaaq Siku Block atorlugu misiligummik ingerlanneqarsimasoq mautssuserniarlugu aningaasaliiffigineqarnera Siumumit iluarisimaaparput neriulluta periuseq tamanna nunatsinni illussaqarniarnerup tungaatigut pitsaasumik siunniuteqaqataassasoq.
Siumumiili akuersaarumanngilarput ingerlatsiffiit Namminersornerullutik Oqartussanit pigineqartut ilaasa siulersuisunit nunatta karsianik isumalluuteqarlunilusooq ingerlatsinermi aningaasaruutinik sippuisarnerat, taamaattumillu arlaatigut nakkutigineqartumik aaqqiivigineqarnissaat Siumumit Naalakkersuisunut inassutigaarput.
Meeqqanut inuusuttunullu immikkut ittumik suliniuteqarnermut atatillugu 1992-imi meeqqat inuusuttullu atugarisaannik misissuinermit saqqummiussaq takutippaat meeqqat inuusuttullu atugarisaat pitsanngorsaaviginiarlugit sulisuliassaqaqisoq tamakkualu pitsaasumik ineriartortinneqarnissaat anguniarlugu allaffissornermi, siunnersuinermi, suliffissaaleqinerullu akiorniarneranut atugassanik Isumaginninnermut Suliffissaqarnermullu Pisortaqarfiup aningaasatigut qaf-faanissaanut tapiissutigineqartussat ilalernartuutippavut.
Siumumiit nuannaarutigalugu oqaatigissavarput takusinnaagatsigu meeqqat atuarfiini nutaamik aaqqissuussinermi atuarfinni aqutsisunngortussat suleriaasisssaannut tunngasumik pikkorissartinneqarnissannut, kiisalu Nuup kommuniani Nuussuarmi meeqqat atuarfiliornissaq, Ilulissani Perorsaanermik Ilinniarfimmi isumaginninnermik peqqissaanermullu ilinniartut amerlineqarnissaat, Aasianni Ilinniarnertuunngorniarfimmi ilinniartut najugaqarfissaannut, Palasinngorniat atuarfissaattut atorneqartussamik illusinissamut, sunngiffimmi sammisassaqartitsinermut ataatsimiititaliat siulittaasuisa pikkorissartinnissaannut allanullu ullutsinni atorfissaqarteqisat-sinnut atugassanik siuliani taasanut aningaaslaeeqqinnerit isumaqatigaavut.
Pingaartillugulu inassutigieriissavarput 1998-imut ukiunullu tulliuttunut aningaasaliissutissanik suliaqarnissami meeqqat atuarfiini iluarsaassinermut sanaartornernullu aningaasaliissutissanik missingersuinerit Naalakkersuisut sukumiisumik pilersaarusiorfigissagaat illoqarfinni nunaqarfinnilu atuarfeqarfinni illuutit aserfallassimaqisut tattorliuuffiusullu pitsaasumik aaqqiissuteqarfigineqarnissaat siunertaralugu.
Ilassutitut aningaasalissutissat siullermeerneranni aalisarnermut tunisassiornermullu tunngasu-nik oqaaseqarfitta saniatigut makkua taanngitsoorusunngilagut, aalisarnerup iluani paasititsiniaanikkut, aalisarnerullu ineriartorsimanerata oqaluttuarisaanikkut atuakkiarineqarnissaanut atugassanik Naalakkersuisut aningaasaliissuteqarnerat Siumumit pingaartillugu taperserparput, atuakkallu saqqummernissaa qilanaaralugu, ukiunimi kingullerni amerlaqisuni aalisarneq nunat-ta aningaasarsiornikkut aallaavigivaa tamatumalu ineriartorsimanera atuaganngorpat oqaluttuarisaanerput pisuunnguallassaaq, tamannalu kingulisatsinnut tunissutaassaaq pitsaasoq.
Ilanngullugulu taajumavarput amernikpisiortornermi tapiissutinut aaqqiissutissat nunaqarfinni tunitsiviit suliassaqartinniarnerannut atasumik ilaatigullu Arsuk Fishing ApS-imi suliassaqartitsinermi atorneqartussanik taamatullu savaateqarfiit aqquserniorfigineqarnissaannut, angallateerarsortullu VHF-radiunik pisinissaannut, allanillu aalisarnerup piniarnerullu iluani tapiissutit aningaasaliissutissat isumaqatigigatsigit.
Peqqinnissamut avatangiisinullu tunngasunut ilassutitut aningaasaliissutit immikoortunut assigiinngitsorpassuarnut tunngassuteqartut maluginiarpavut ilaatigut takuneqarsinnaavoq suliaritinnissamut utaqqisut ikilisinneqarnissaannut, maannakkut ajornartorsiutitut taaneqarsinnaasut annikillisinneqarnissaannut, meeqqanut akiuussutissiilluni kapuuinernut, napparsimaveqarfinni sulisut sulinngiffeqarneranni taartaallutik sulisussanut aningaasarsiaqartitsinissanut allanullu atorneqartussaasut. Siumumillu inassutigissavarput pinaveersaartitsinermi suliniarfiup Paarisap pilerseqqinneqarnissaannut aningaasaliissutissatut qinnutigineqartut TB I-ip pingajussaaneernissaanut aaqqiiffigeqqullugit.
Maluginiarparputtaaq nappaassuarmik katsorsarneqarsinnaanngitsutut taasartakkatsinnik eqqor-neqarsimasut, inuit HIV-eqartut AIDS-imillu nappaateqartut, katsorsaariaatsimik nutaamik periuseqarluni katsorsarneqarnissaat Peqqinnissaqarfiup sulissutiginiaraa.
Nunatsinni umiarsuartigut timmisartukkullu ilaasunik angallassinermut, suluusalinnillu mittar-filiornissami illoqarfiit sanaartorfissat pingasunik ilanerinut atugassanik aningaasaliissutit nikisiternerqarnerat qaffaaavigineqarnissaallu taperserpavut tamanna nunatsinni angallannerup pitsanngoriaatigisussaammagu.
Sanaartonerulli iluani piaarnertumik aaqqittarialittut inassutigiumavaput Nanortalimmi imeqarnerup aningaasassaqartinnissaa 1998-imut aningaasanik inatsisissamik suliaqarnissami Naalakkersuisut ilanngutissagaat.
Oqaatigeriikkatta saniatigut sanartugassanik aningaasanillu ukiuni tullerni Naalakkersuisut tulleriiaaralutik suliaqarnerminni eqqarsaatigisassaattut makkua Siumumit taajumavagut.
Nunaqarfinni aqqusernit piaarnerusumik aaqqivigineqarnissaat siunertaralugu 1997-imut aningaasanut inatsisip suliarineqarneranut atatillugu siunniunneqartup, tassa 1998-imi aallartittumik nunaqarfinni aqquserniassani immikkut aningaasaliissuteqartoqartalernissaa Naalakkersui-sunit piviusunngortinneqarnissaa inassutigaarput.
Suliffissaqarfissuarnik allanngortiterinerup tamakkiisumik iluatsinnissaata tungaanut sillimani-arluni suliffissaqartitsiniutinut aningaasaliissuteqartoqarnissaa Naalakkersuisunut eqqumaffi-geqquarput illoqarfinni eqqorneqartuni suliffissaaleqinerup annikillisinnissaa isumannaarumallugu.
Kommunit ilaasa Namminersornerullutik Oqartussanut akiligassallit akiitsuminnik akilersuiniarnerminni ingerlalluarnissaat siunertaralugu kommunini pineqartuni suliffissanik nutaanik pilersitsisoqarnissaa anguniartariaqarpoq tamatumanilu kommunit pineqartut nammineerlutik annerunerusumik qanoq-iliuuseqaqataanissaat Siumumit kaammattuutigaarput.
Sulisa A/S-ip aningaasaliiffigineqaqqinnissaanut qinnutigineqartut soqutiginartutut isigaavut taakkualu pingajussaaneerinninnissami akuersissutigineqarnissaat naatsorsuutigalutigu.
Sanaartornermi sillimmatit 31 mio. kr.-it sinnerlugit qaffaavigineqarnissaannik qinnuteqaatit Aningaasaqarnermut Ataatsimiititalimit sukumiisumik misissuataarneqarnissaat pingaartipparput TB I-illu pingajussaaneerneqarnissaani isummerfigineqarnissaat naatsorsuutigalutigu.
Siumumit naatsorsuutigaarput KNR-imut aningaasaleeqqissutissatut qinnutigineqartut Aningaasaqarnermut Ataatsimiititaliap misissuilluareerneratigut pingajussaaneerinninnissami naammaginartumik aaqqivigineqassasut.
Inatsisartunut ilaasortat tassaasut Lars Karl Jensen, Siumut, Anders Andreassen, Siumut, Anthon Frederiksen-illu, Kattusseqatigiinnersup oqaluuserisassanngorlugit siunnersuutaannut atatillugu Aningaasaqarnermut Ataatsimiititaliap siunnersuutinut akissutigisai Siumumit iluarinartippavut.
Naggataatigullu taanngitsoorusunngilarput Aningaasaqarnermut Ataatsimiititaliap aningaasaliissutissat ilaasa naalakkersuisoqarfinnut aalajangersimasunut tusarniaassutigereerlugit allannguutissatutu suliassat peqqissaarullugit isumaqatigiiffiusumillu aalajangiiffiginiarsimagaat takusinnaagatsigu.
Siumuit taamatut oqaaseqarluta Inatsisartut 1997-imut ilassutissatut aningaasaliissutissaannut inatsisissaannut Aningaasaqarnermut Ataatsimiititaliap isumaliutissiissutaa, saqqummiunneqartoq, akuersissutigaarput pingajussaaneerneqarnissaanullu ingerlateqqinneqarnissaa qilanaaralugu.
Anders Nielsson, Atassutip oqaaseqartua:
Inatsisartut 1997-imut ilassutitut aningaasaliissutinut inatsisissamut I-imut siunnersuut Atassutup maani saqqummiunneqartut akuersaarpai.
Siunnersuutip siullermeerneqarneraniilli Naalakkersuisunit allannguutissatut siunnersuutit 113-it nassiunneqarsimapput. Siunnersuutit taakkuupput upernaaq manna katersuunnermi 1997-imut ilassutitut aningaasaliissutinut inatsisissamut II-mut siunnersuutissatut saqqummiunneqassamaarsimasut.
Siunnersuutitut saqqummiunneqartumut Atassummit makku itisilissavagut:
Konto 10.01.20 Namminersornerullutik Oqartussat qarasaasiaqarfiat. Aningaasaliissutinut qinuteqaat suliassat nalunaarsorneqartarnerannut tunngavoq, inatsisit atuuttut tamarmik nalunaarsorneqartarnerat taakkununngalu ilanngullugu inatsisit atuuttut katiternerat. Pilersaarusiat taakku taakkuinnaalluni isumaqatigiissutaapput namminersornerusut EDB-qarfianni taamaallaat ator-sinnaallutik.
Inatsisit atuuttuusut nalunaarsorneqartarnerat aamma Internetsimi atorfissaqartipparput, nunatsinni atorfissaqartitsisunit kikkunnilluunniit atorneqarsinnaaqqullugu - aamma ataatsimiinnerit avataanni Inatsisartunut ilaasortanit.
Taamaalilluni minnerpaamik koruunit millionit ileqqarneqarsinnaassapput suliassat ikiliallat-tussaassammata Internet atorluaraanni.
Konto 10.13.10 Pissarsianiit akiliuteqartarneq, namminersornerusut suliffeqarfiutaanni.
Allanik suli taamaaliortoqannginnguatsiarmat Atassummit uparuarusupparput namminersornerusunit piginneqataaffiusut selskabit marluk landskarsimut nakkartitaqarsimammata. Ukuupput Nuuk Imeq 2,7 mio. kr-inik kiisalu Grĝnlands Baseselskab 4,5 mio. kr.-inik. Tassa aningaasanut inatsimmut pilersaarusiat 3,7 mio. kr.-inik sinnerlugit.
Konto 10.13.13 Aktienut ilassutit.
Atuakkiorfik 2,5 mio. kr.-inik tapiiffigineqartarpoq. 1998-imiillu ukiut tamaasa tapiiffigineqartalissaaq kalaallisut naqillugit saqqummersitassanut atugassanik.
KNR-TV ukiumut 50 mio. kr. missaannik tapiiffigineqartartoq sanilliukkaanni, naqitikkanut tapiissutissatut pilersaarutit amerlagisassanngeqaat.
Atuakkat piujuartarput.
Radiumili TV-milu aallakaatitat tutsiutillatsiaannaq/takkutillatsiaannaq tammartarput.
Atassut isumaqarpoq kulturimut tunngasunut tapiissutaasartut ataatsimoortillugit isiginiarnerusariaqalersut nalinginnaasumik agguataalerniassammata. Tapiissutit ilaat KNR-TV-mit atuakkiornermut, atuakkiortumut, taalliortumut atuakkanullu assiliortartunut nuunneqarsinnaalluartut.
Konto 20.11.60 Sanaartugassanut
sillimmatit.
Grĝnlandsbankiusimasup illuutaa 25 mio.
kr.-it atorlugit Naalakkersuisut pisiarissamaarpaat allanngortiterlugulu.
Atassutip maluginiarpaa aningaaserivimmut
tassunga ukiunik 18-inik pisoqaassusilimmut pisinermut allanngortiterinermullu
m2-imut akiusoq 16.700 kr.-iusoq. Ukiuni nutaajunerusuni makkunani
tamanna naapertuunnerpa, sanaartornermimi m2-imut aki maani Nuummi
10.000 kr.-iusoq takusarparput?
Konto 22.11.13
Paamiuni inissiat inoqanngitsorpassuit
iluaqutiginiarnissaat pilersaarusiorneqareerpoq. Inissiat 80 sinnillit
inoqanngillat.
Tassaapput ilagisariit 80-it ukiuni kingullerni
Paamiunit aallarsimasut. Amerlanerit Qaqortumut Nuummullu nuussimagunarput.
Ilagisariit taakku Qaqortumi Nuummilu
inissaqartikkumallugit, meeraallu meeqqerivinni aturfinnilu
inissaqartikkumallugit aningaasat 100 mio. kr.-it sinneqalugit akuersissutigisariaqarput.
Suliffissat Paamiuni pigiinnarniarlugit
nutsertitsinaveersaarluta suliniuteqarsimagaluarutta qanormitaava
aningaasartuuteqartigissagaluarpugut? - Taamaattumik aningaasaliissutit 100
mio. kr.-it angullugit amerlassusillit atulussinnarneqarsimanngitsut
oqarsinnaagunarpugut.
Konto 30.16.11 Suliffissaaleqinerup
akiorniarneqarnera.
Suliffissaaleqineq akiorniarlugu
aningaasartuuteqartarnerput eqqumiiginarsinnaagaluarpoq allanik taama
suliassaqartiginerput eqqaallugu.
Sineriassuatsinni atuarfippassuit
meeqqerivippassuillu allallu illuutigisat aserfallatsaalineqartariaqaqaat.
Nunaqarfinni savaateqarfinnilu aqqusinniortiternissaq inuillu aqqutaannik
sanaartornissaq iluarsartuussinissarlu pisariaqaqaaq.
Atassutip kissaatigaa
misissuiffigeqqisaariarlugit pisariaqartumik aningaasaliissoqassasoq
suliffissaqartistsiniarnermut, suliffissaaleqinerup akiorneqarnissaanut il.il.
iluaqutissanut assigiinngitsunut atortitassanik.
Konto 40.14.18 Kalaallit Nunaata
Radiua.
Atassutip 7,3 mio. kr.-inik qinnuteqaat
isummerfigitinnagu utaqqeqqaarumavaa Naalakkersuisut qanoq qisuariassanersut
Aningaasaqarnermut Ataatsimiititaliap KNR pillugu Naalakkersuisunut
inassutaannut.
KNR-TV-mi 1 mio. kr.-it sapaatip
akunneranut atorneqartarput ataasiinnannguamik aallakaatitassiornermut.
Atassutip isimi illua qamiinnarlugu takusinnaavaa aningaasat amerlavallaarujussuartut
naammassisamut suunngitsigisumut atorneqartartut.
Taaneqareersutut Atassut isumaqarpoq
aningaasat ilaat kulturikkut sivisunerusumik pisussanut atorneqartariaqartut.
Konto 60.01.01 Peqqinnissamut
Ilisimatusarnermullu Qullersaqarfik.
Paarisa pilerseqqinniarlugu
allaffimmi kontorchef-issatut atorfinitsitsinissaq qinnuteqaataavoq. Atassutip
paaserusuppaa suliffiit qassit atorunnaarsinniarneqarsimanersut, aningaasallu
qanoq amerlatigisut utertinniarneqarsimanersut Paarisa unitsinneqarmat?
Paarisap atulerqqinnissaa Atassutip
tapersersorpaa, Aningaasaqarnermulli Ataatsimiititaliaq isumaqatigalugu suliap qanoq ingerlanneqarnissaanik
pilersaarusioqqaartariaqarnermik, Inatsisartullu isummertinnani aningaasanik
ingerlatsinissamik pilersaarummik takusassaqartariaqarpoq. Suliassap
ingerlanneqarnissaa pilersaarusiortariaqarpoq Isumaginninnermut Pisortaqarfik
allallu susassaqartut suleqatigalugit.
Taama oqaaseqarluta Atassummit
oqaatigeqqissavarput ilassutitut akuersissutigeqarnissamut siunnersuut I 1997
akuersaarluaratsigu.
Atassut isumaqarpoq 1997-imi
aningaasatigut ingerlatsinissamik ukiarmi inimi maani akuerisarput
piareersarluagaasimasoq.
Josef Motzfeldt, Inuit Ataqatigiit oqaaseqartuat:
Majip tallimaani
siullermeerinninnermi oqaaseqarnitsinni ujartukkatta iluarsineqaqqusattalu
annertuumik Aningaasaqarnermut Ataatsimiititaliami aaqqinniarneqarsimanerat
maluginiarparput.
Siullermeerinninnerulli kingorna
ilimasaarutaareersutut Naalakkersuisut allannguutissanik 113-inik
saqqummiussaqarput, tamatuma ilaatigut kingunerigallartussaallugu 1997-imi
landskarsi ingerlatsinermigut sanaartugassatigut taarsigassarsitsinermugullu
150 mio. kr.-it pallillugit amigartoortussanngornera.
Tamatuma nunanut allanut
taarsigassarsianut taarsersuinermut sunniutissai Inuit Ataqatigiit sukumiisumik
nassuiarneqassasut piumasaraat. Inatsisartut aningaasaliissutigisartagaasa
nakkutigineqarnerunissaannik Aningaasaqarnermut Ataatsimiititaliap ujartuinera
pissusissamisoortoq ilaatigut Inatsisartut kukkunersiuinermut
Ataatsimiititaliaata ukiup ataatsimiiffiusup ingerlanerani
misissuisalerneratigut iluaqutaasinnaasutut Inuit Ataqatigiit tikkuarusuppaat.
Aningaasaliiffiit
Namminersornerullutillu Oqartussat ingerlassivii sukkulluunniit kukkunersiuinermut
ataatsimiititaliamit misissuiffigineqarsinnaanerat ukioq mannamiit
ingerlanneqalertariaqartoq Inuit Ataqatigiit isumaqarpugut.
Siullermeerinermi Inuit Ataqatigiit
tikkuakkatta ilagaat Kangaatsiap kommuniata landskarsimut akiligassaasa
aaqqivigineqarnissaat siunertaralugu Naalakkersuisut qanoq
iliuuseqartariaqarnerat. Aningaasaqarnermut Ataatsimiititaliap isumaliutissiissummigut
matumuuna Kangaatsiap kommuniata taarsigassaasa ukiuni tallimaniluunniit
ernialersornagit taarsersugassaajunnaarsikkallarnissaanik kaammattuuteqarpoq.
Taamaasiornissaq Inuit Ataqatigiit
pisariaqarluinnartutut tapersersorparput, ukiummi tamaasa ukiuni tulliuttuni
2000-ip ingerlarujussuarneranut kommuni pineqartoq 1,3 mio. kr.-inik taarsersuigaluartoq
taamaattoq taakkunannga ukiut tamaasa 1 mio. kr.-it missaat erniaannarnut
matusissutissaammata, takorloorneqarsinnaavoq Kangaatsiap kommuniata nammineq
inuussutissarsiutinut siuarsaaniarnermut peqataasinnaanera qanoq
killeqartigissasoq.
Taamaattumik kommunip taarsigassami
erniaanut taarsersuinernullu atugassaralui taarsiullugu inussutissarsiutitigut
Namminersornerulluni Oqartussat peqatigalugit siuarsaaniarnermut atussagai
isumaqatigiissutaasariaqartoq Inuit Ataqatigiit tapersersorluinnarparput.
Siullermeerinermi oqaaseqarfigisatta
ilagaat innuttaasut radiukkut naalaagassatigut, TV-kkut isiginnaagassatigut
naqitanillu atuagassatigut periarfissaasa ataatsimoortumik naliliiffigisariaqarnerata
pisariaqarsorineranik isumaqarnerput. Tamatumani KNR-imut ukiumut
aningaasaliunneqartartunut 50 mio. kr.-it sinneqartunut Atuakkiorfiup
aningaasaqarniarnera sanilliussassaqqippoq. Apeqqummut tassunga Aningaasaqarnermut
Ataatsimiititaliap isummersorsimanera
ilas-silluarumavarput.
Nammineq illuliassanik qinnuteqaatit
maleruaqqusat atuuttut malillugit suliarineqartarnissaa- nik siullermeerinermi uparuaanerput
sakkortusiallallugu Aningaasaqarnermut Ataatsimiititaliap Naalakkersuisut
susassaqartunut, soorlu INI A/S-imut, paaseqatiginnissuteqarnissaannik inassutaat
pisariaqavissoq soorunami tamakkiisumik tapersersorparput. Tamatumani
nunaqarfinni illoqarniarnerup innuttaasut peqqissusaannut pingaaruteqassusia
agguaassisarnerni nalilersuinerni ilaatinneqarluinnartariaqartut Inuit
Ataqatigiit isumaqarput.
Nanortalimmi imeqarniarnerup
ilungersunarluinnarnera illoqarfiup ineriartorteqqinnissaanut aporfiuvoq, taamaakkaluartoq
aaqqiissuteqarnissamut ukiuni tullerni pingasuni-sisamani Naalakkersuisut
aningaasaliiumanngittuarsinnarput. Naak Aningaasaqarnermut Ataatsimiititaliap
isumaqatigiilluni tamatuma aaqqiivigineqarnissaa siornali arlaleriarluni
inassuteqaatigisareeraluaraa.
Aningaasaqarnermut
Ataatsimiititaliap aammaarluni Nanortalimmi aaqqiissuteqarnissap nukinginnarsilluinnarneranik
eqqaasitsissutaa Naalakkersuisunut maluginiaqquaat. GTO-p nalaanili
aaqqiissutaasinnaasut taamannarujussuaq aatsaat akeqartut atorniarneqartarnerat
nangittumik ingerlatiinnarniartariaqanngilaq. Ullumikkut periarfissat arlallit
imminnut tapertariisillugit atorneqarsinnaalersimapput, soorlumi aamma
suliassat akikinnerusumik naammassineqarsinnaanerat periarfissaammat Aasianni
imermut aqqusersuinermut atortussat naleqquttut akikinnerusulli atornerisigut
suliassaq 2,4 mio. kr.-inik akikinnerusumik naammassineqarsinnaasimanera
tamtumunnga takussutissaalluartoq.
Grĝnlandsfly-mut tapiissutit 20 mio.
kr.-inik qaffanneqartariaqarnerat ukiarmi 1997-imut aningasanut inatsisissap
suliarineranili Aningaasaqarnermut Ataatsimiititaliap inassuteqaralu-arneranut
timitaliinerupput Inuit Ataqatigiit isumaat malillugu taamanili
aaqqereerneqarsimasinnaangaluartoq.
Taateraap Tuuliullu ukioq manna
atuinnarallarnissaannut aningaasat 6,5 mio. kr.-it Naalakkersuisunit
qinnutigineqartut ukiakkut ataatsimiinnermili
aaqqereerneqarsimasinnaagaluarputtaaq. Angallatilli pineqartut taartissaanik
pissarsiniarneq Naalakkersuisut isumannaartariaqaraat Inuit Ataqatigiit
kaammattuutigaat.
Royal Greenland A/S-ip
tunisassiassaqassutsimut naleqqussarnissaanut ukiuni tallimani tulliut-tuni 260
mio. kr.-it angullugit aningaasaliinissamut atatillugu Inuit Ataqatigiit
pingaartippaat tunisassioriaatsit pilersinneqartut ukiut tallimat
qaangiutereerneratigut imminnut napatissin-naalersimanissaat
naatsorsuutigineqartariaqartoq.
Aningaasaliinissamullu atatillugu
sulisut 267-inik amerlinissaannik neriorsuuteqarnermi suli nalorninarallartutut
inissisimasut tassaapput Maniitsumi Paamiunilu katillugit inuit 80-100-inik
suliffissaqartitsisinnaasuni saattussanik tunisassiorsinnaanermut
pilersaarutit. Aammalu aningaasat taama amerlatigisut
atugassanngortinneqaraluartut Qeqertarsuaq Nanortalillu isumannaatsumik suli
aaqqiivigineqanngillat. Illoqarfiit pineqartut pappialaannartigut
aaqqiivigineqanngin-nissaat innuttaasorpassuarnut kommuninullu pineqartunut
pingaaruteqarmat tamakku isumannaatsumik aaqqiivigineqarnissaat
Naalakkersuisut ilungersuuttuassagaat inussiarnersumik Inuit Ataqatigiit
kaammattuutigaarput.
Pitsaaliuinerup annertusarnissaanut
atatillugu Paarisap taamatullu suliaqarnerup ingerlateqqinnissaa Inuit
Ataqatigiit isornartoqartinngilarput. Taamaattorli Aningaasaqarnermut Ataatsimiititaliap
kontorchef-imik atorfinitsitsereernissamut ilassutitut aningaasaliissutinut
inatsissakkut qinnuteqartoqarneranik ilalersuinnginnera
isumaqatigilluinnarparput. Suliassaq pitsaaliuinermut tunngasoq
pingaaruteqartorujussuuvoq, taamaattumik Inatsisartut ukiamut
ataatsimiinnissaanut Pisortaqarfiup oqallisissiamik suliaqarnissaa
kontorchef-iunngikkaluartulluunniit pilersaarusiorsinnaagaa isumaqarpugut.
Tunngaviusumik Inatsisartut isummersoreernerat aallaavigalugu
immikkoortortaqarfik qanoq ittoq, qanoq inuttalik sunillu suliassaqarnersoq
aalajangersaavigineqarumaarput.
KNR-imut aningaasaliissutissatut qinnuteqaatigineqarsimasut 7,3 mio. kr.-it pingajussaaneerinninnissamut sukumiisumik nassuiaateqarfigineqarnissaat isumaqatigaarput. Tassungali atatillugu aningaasat atugassiissutigineqartartut 50 mio. kr.-it sinneqartut nalinginik naalaartartut isiginnaartartullu ilumut pissarsisarnersugut apeqquserneqartariaqarpoq. Qujanartumik ulluni makkunanerpiaq Sisimiut Tusaataat periarfissamik nutaarluinnarmik saqqummiussaqarpoq, tamanna annertunerusumik isummersorfiginngikkallassavarput. Kisianni periarfissaasinnaasutut takorloorsinnaasarput tassaavoq KNR-imut aningaasaliissutigineqartartut nutaarluinnarmik isummerfigisariaqalersinnaanerat.
KNR-ip ullumikkutut imminut pigisutut ingerlanera namminerlu siulersuisoqarnera inniminarpoq, Amutsivinnut, Nukissiorfinnut Mittarfeqarfinnullu imaasiallaannaq sanilliunneqarsinnaan-ngilaq. Ilumut KNR-ip siulersuisuisa sulisussaminik atorfinitsitsisarnermini Sulisoqarnermut Pisortaqarfit apereqqaartortariaqarpaat. Ullumikkumummi suliffeqarfimmut toqqammavigitiginneqartut marloqiusaasutut oqaatigineqartariaqarput, kiffaanngissuseqarnerarlugillu killilersuiffigineqarput. Arlaat tamakkiisumik atorneqartariaqarpoq, peqqussutip maleruaqqusallu nutarternissaannut tamanna nalilersugassat ilagisariaqaraat Inuit Ataqatigiit isumaqarput.
Tamannali ima paasineqartariaqanngilaq aningaasaliissutinik aqutsisoqassanngitsoq.
Naggataatigut Inatsisartunut ilaasortap Anders Andreassen-ip siunnersuutaa isorliunerusuni illuliortiternernut inissialiortitsinernullu tunngasoq oqaaseqarfigissavarput. Inuit Ataqatigiit siornali oqaatigereerparput inissialiortiternermi aningaasalersuinermi periusoq 80-20 orniginartinnerugatsigu, tamannalu ilaatigut aallaavigalugu Ineqarnermut Naalakkersuisoq kommunit kattuffiannut isumaqatiginninniarsimasoq Inuit Ataqatigiit arajutsisimanngilaat. Isumaqatigiissutaasimasorli tassaavoq 60-40. Tamannalu isumaqatigiissutigineqarsimammat qanorluunnit ippinnartoqartikkaluarutsigu tusaatissatut akueriinnarallartariaqarparput, kommunilli isumaqatigiissutaasimasoq iluarisimanngikkunikku apeqqut tamanna kattuffitsik aqqutigalugu isumaqatigiisutiginiaqqittariaqaraat isumaqarluta.
Taamatut naatsumik oqaaseqarluta inatsisissatut siunnersuutip pingajussaaneerneqannginnermini Aningaasaqarnermut Ataatsimiititaliami nangillugu oqaluuserineqaqqinnissaa inassutigaarput.
Bjarne Kreutzmann, Akulliit Partiiat:
Annerusukkut nuannaarutigalugu atuarsimavakka
Aningaasaqarnermut Ataatsimiititaliap isumaliutissiissutaa aamma
Naalakkersuisut tunuliaquttatut allannguutissatut siunnersuutaat.
Ukiunut siuliinut naleqqiullugu
malunnavissumik sukannernerusumik periaaseqartoqalersimavoq, tassa ilassutitut
aningaasaliissutit aningaasanut unioqqutitsisumik, tassa qaangiuttoorisarnernut,
atorneqarsimasunut matussutissatut siornatigut isigisartariaqarsimatsinnut
tunngatillugu taamatut oqaatigalugu.
Aamma nuannaarutigaara malunnarmat Isumaginninnermut
Suliffeqarnermullu Pisortaqarfiup tungaanit anguniarneqalersoq
aqutsilluarnerunissaq - qanortormi atuulli aamma aningaasanut tunngasutigut.
Taama amerlatigisunik ilassutitut aningaasaliissutissanik qinuteqartoqarneranik
tamatuma kinguneqarnera uagut Inatsisartut tungaanniit akuersaartariqarparput,
uagummi isornartorsiuisuusimagatta.
Siullermeerlugu oqaluuserinerani
inussiarnersumik kissaatigisimavara Atuakkiorfik A/S-imut aamma Nunatta
Naqiterivia A/S-imut tunngatillugu paarlattuanut namminersortunngorsaaneq
erseqqinnersumik nassuiaateqarfigeqqullugu, aamma ajornanngippat
allaganngorlugu nassui-aasoqarnissaa kissaatigalugu. Siullermeerininnermi
nassuiaasoqartoqanngilaq, aamma Ani-ngaasaqarnermut Ataatsimiititaliap
isumaliutissiissutaani pappiaqqaniluunniit allani tigusatsi- ni nassuiaammik takusassaqanngilaq. Tamanna
assut naammanginanngitsutut isigaara aam-maarlungalu kissaatigalugu tamatuma
nassuiaavigineqarnissaa!
Aamma annikitsualunnut tunngasutut
naatsorsuuttariaqartut sumut killelertariaqarnerata oqallisigineqarnissaanik
siunnersuutiga oqaaseqarfigineqarsimanngilaq.
Sinneri isumaqatigisagut immikkut
taagornagit oqaaseqarfiginagillu, aammami annertussagalu-arpoq tamaasa
oqaaseqarfigissagutsigit, inatsisissamut siunnersuut pingajussaaneerneqarnissa-minut
taama isikkoqarluni ingerlanissaa inassutigaara.
Anthon Frederiksen, Kattusseqatigiit:
Inatsisartut ilassutitut
aningaasaliissutinut inatsisissaata siulliup siullermeerneqarnerani
Kattus-seqatigiit oqaaseqaatigisagut innersuussutigalugit, Aningaasaqarnermut
Ataatsimiititaliap isumaliutissiissutaa imatut oqaaseqarfigissuarput.
Inatsisissatut siunnersuutip
siullermeerneqarnerata kingorna Naalakkersuisut allannguutissatut
siunnersuutinik 113-inik Aningaasaqarnermut Ataatsimiititaliamut saqqummiussaqarsimapput,
soorlumi aamma tamanna suliap siullermeerneqarnerani ilimasaatugineqareersoq,
ilaatigut upernaakkut ataatsimiinnerup aallartinnerliornera pisooqataalluni.
Kattusseqatigiit Aningaasaqarnermut
Ataatsimiititaliamut, Naalakkersuisunullu aammaarluta piumasarissavarput
ukiunut tulliuttunut missingersuusiortarnerni sapinngisamik naatsorsuutigineqarsinnaasunik
aammalu minnerunngitsumik sanaartungassanut pilersaarutit tamakkiineru-sumik
malitsinneqartarnissaat nakkutigilluaqqullugit.
Tassami aningaasaliissutaareersimasunik
aningaasaliissuteqaqqittarnerit amerlavallaaqaat.
Suliassat Inatsisartuni
oqaluuserineqarlutik akuersissutigineqarsimasut soorunami aningaasaliiffigeneqarnissaat
Kattusseqatigiinnit tapersersorpavut, minnerunngitsumik suliffissaqartitsiniarnermut
tunngasut, illuliortitsinissanut, inissianillu nutarterinissanut
aningaasaliissutissat, taamaattumik Naalakkersuisut siunnersuutaat immikkut
aningaasaliissuteqarnissanik pisariaqartitsiviusut paasilluarlugit
taperserpavut.
Kattuseqatigiinniit
pingaartilluinnarparput; inuussutissarsiutinik ineriartortitsinerup isumannaatsumik
aaqqissuulluakkamillu suliniutigineqarnissaa, taamaattumik Aningaasaqarnermut Ataatsimiititaliap
taamatut piumasaqarnera taperserparput.
Nunatta aningaasaqarnikkut
inissisimaneranut tunngatillugu - ippassaq naalakkersuinikkut
aningaasarsiornikkullu ingerlatsineq pillugu nassuiaatip saqqummiunneqarerani
oqaaseqaatigut innersuussutigiinnassavagut.
Aningaasaqarnermut Ataatsimiititaliap
ingerlatseqatigiiffiit inuiaqatigiinnit pigineqartut ilaanni aammalu pisortallu
suliffeqarfiisa ilaanni aningaasaqarnikkut ingerlatsinerup toqqissisimanartinngimmagu
Kattusseqatigiinniit paasisinnaalluarsinnaavarput, tassami tamatsinnut
toqqissisimananngilaq tusagassiuutitigut tusarlugu soorlu KNR-imi pissutsit
ajorluinnartut eqqartorneqartut.
Pissutsit taama ajortigisut
matuuinnartariaqanngillat - akisussaasut akisussaatinneqartariaqar- put, aamma aningaasat
taama amerlatigisut atornerlunneqarsimasut akisussaasunit utertitsillugit
akilerneqartariaqarput. Amerlanertigut tamatta iliuutsigut ilisimasarpavut,
aamma akisussaasut nalunngittariaqarpaat suna ajortuusoq, sunalu
ajunngitsuusoq, minnerunngitsumik aqutsinermi malittarisassat, aammalu
peqqussutit inatsisillu naapertorlugit pisussaaffeqarneq tunngavigalu-gu,
taamaattumi Kattusseqatigiinniit sakkortuumik piumasarissavarput KNR-imut
tunngasut matuuinnarnagit suliarineqarnissaat, inatsisillu naapertorlugit
akisussaasut akisussaatinneqarnissaat naammassiniartariaqarpoq.
Taamaattumik Aningaasaqarnermut
Ataatsimiititaliaq Kattusseqatigiinniit isumaqatigaarput aningaasaliissutit 7,3
mio. kr.-inik amerlineqarnissaannik qinnuteqaat itigartinneqarmat, KNR-ip
akiitsui, namminerlu aningaasaatitigut amigartoorutai, akissarsiassanut
aningaasartuutissat annertuumik sipporlugit atuisimaneq pissutigalugit.
Naatsumik oqaatigalugu aningaasanik aqutsinerliorsimaneq akisussaaffilimmik
toqqammavilerneqaqqaartariaqarpoq.
Kommuninut landskarsimi akiligassalinnut
tunngatillugu oqaatigisariaqarpoq pingaaruteqarlu-innarmat kommunit pineqartut
Namminersornerullutik Oqartussat qanimut suleqtigiilluinnarnissaat, tassami
assersuutigalugu Ilulissat kommuniat 1993 naammat 9 mio.-it sinnerlugit
amigar-tooruteqarpoq, aammalu 1994-ip ingerlanerani allaat Nukissiorfinnut
akiligassat 6 mio.-ingajaat akilersinnaajunnaarmagit Namminersornerullutik
Oqartussat piaarnerpaamik suleqatigilerneri-sigut aammalu Namminersornerullutik
Oqartussat ikiuunnerisigut, soorlu sanaartugassanut tunngasut
aaqqiisivigneqarisigut ajornartorsiutit qaangerneqarput, soorunalumi aamma
innuttaasut sulilluarnermikkut aningaasat kommunimut isertinneqartut
amerleriarujussuarnerisigut tamanna anguneqarluni, tassa naatsumik oqaatigalugu
kommunini ajornartorsiutit annertusivallaannginnerini Namminersornerullutik
Oqartussat piaarnerpaamik ikiuunnissaat pisariaqarluinnarpoq,
minnerunngitsumik suliffissaqartitsineq eqqarsaatigalugu, tassami kommunit
aningaasaqarniarnikkut ajornartorsiutinik qaangiiniarneq tamatigut
kisimiillutik aningorniarsinnaasan-ngimmassuk, soorlu tamanna Kangaatsiap
kommuniani maannakkut ajornartorsiorfioqisumi annertuumik
pisariaqartinneqartoq, taamaattumik Kattusseqatigiinniit Naalakkersuisunut
kaammattuutigissavarput Kangaatsiap kommuniani aningaasaqarnikkut
ajornartorsiutit qaangerniarlugit immikkut ittumik iliuuseqarnissamik
suliniuteqaqqullugit.
Royal Greenland A/S-ip ingerlatsinermini
naleqqussarneqarnissaanut atatillugu Aningaasaqarnermut Ataatsimiititaliap
Naalakkersuisunut kaammattuutaa Kattusseqatigiinnit taperserniarparput,
kommunit eqqungaasussat aningaaasatigut ajornartorsiulinnginnissaat
siunertaralugu Naalakkersuisut 1998-imut aningaasanut inatsisissap suliarineqareranut
atatillugu immikkut aningaasaliissuteqartoqartariaqarnerata pisariaqarnera
eqqumaffigisariaqarmat.
Alluitsup Paani, Qaqortumi, Qasigiannguani
Qeqertarsuarmilu suliffissaqartitsiniutit ingerlanneqarnisssaannut 22.347,000
kr.-init Aningaasaqarnermut Ataatsimiititaliap januarimi, martsimi- lu 1997-imi
ataatsimiinnermini akuerisimasai - Naalakkersuisut 835.000 kr.-inngortillugit
akuersissutigineqartussatut inassutigineqarsimanera naammanginanngilaq,
taamaattumik 1998-imut inatsisissap suliarineqarnissaani tamatuma
eqqumaffigisriaqarnera erseqqissartariaqarpoq.
Aningaasaqarnermut Ataatsimiititaliaq
ilumoorluinnarpoq kommunini pisuussutit ullumikkut tamakkiisumik
atorneqanngitsut atorluarneqarnissaannik kommuninut inassuteqarmat
suliffis-saaleqinerup annertusinissaa pinngitsoorniarlugu, kisianni
pisuussutit, soorlu puisit, timmissat, aalisssakkat il.il.
atorluarneqarnerulissappata - pisariaqarpoq tamakkununnga tunitisveqarnissaq,
taamaattumik-una kalaalimerngit tunisassiarineqartarnerat pillugu Kattusseqatigiit
ilaatigut nunaqarfinni tunisassiorfiit atorluarneqarnerulernissaat
ujartoripput.
Siku-Block ukioq februarimi
pisortatigoortumik ilinniartisitsisup Narsarsuarmi illussanik atoqqaartitsimmat
paasissutissat pitsaasut nunatsinnilu atorluarneqarsinnaasut ilaatigut Ineqarmermut
Naalakkersuisumut tunniunneqarput, taamaattumik nunatta pissarititaanik
tamakkiinerusumik atorluaassagutta pisariaarluinnarpoq suliniutit ajunngitsut
soorlu Siku-Block-itut ittut naalakkersuinikkut tapersersorneissaat, tamatumani
aamma aningaasatigut piorsaaqataanissaq pinngitsorneqarsinnaanngilaq.
Nunaqarfinni peqqinnerulernissamik
anguniagaqarneq tapersersortariaqarpoq, taamatullu anguniakkat
piviusunngortinneqassappata, minnerunngitsumik nunaqarfinni imeqarnikkut,
aqqusineqarnikkut, eqqagassalerinikkut, minnerunngitsumillu inissaqarnikkut
atungassarititaa-sut pitsanngorsarnissaat pisariaqarluinnarpoq.
Assersuutigalugu Iginniarfimmiut
imeqarniarnikkut annertuumik ajornartorsiuteqarput, tassami arlalitsigut
ukiukkut apummik aatsitseqqaarlutik imiliortariaqartarput, taamaalillunilu
aammalu atuarfeqarfiup peqqinnissaqarfimmut atasut imeqarniarnera annertuumik
ajornartorsiutaalluni. Taamaattumik manna iluatsillugu apeqqutiginiarpara
Iginniarfimmi imeqanermut tunngasut iluarsiivigineqarnissaat qanoq
pilersaarutigineqarnersut?
Kulturimut tunngasutigut
Aningaasaqarnermut Ataatsimiititaliap - atuakkanut kalaallisut oqaasertalinnut,
atuakkanillu saqqummersitsivinnut tapiissuteqartarnerit qulaajarneqartariaqarnerannut,
pisariaqarpallu nutarterneqartariaqarnerannik piumasaqarnera
pissusissamisoorpoq - tassami assersuutigalugu utoqqarnik, innarluutilinnillu
isumassuinermut, sammisassaqartitsini-arnermullu tunngatillugu ullumikkut
amingaatigineqartut; soorlu isingiarsuttunut bċndit atorlu-git
tusarnaagassiortarnermi aningaasaliissutaasartut amerlineqartariaqarnerannut
tunngasut il.il..
Nunaqarfinni aqqusinniornissanut
tunngatillugu, soorunami siunnersorneqarsinnaaneq pisariaqarpoq, kisianni
nunaqarfimmiut nammineerlutik peqatatinneqarnissaat pisariaqarluinnarpoq,
soorlu nunaqarfiit ilaanni aqqusinniornernut tunngatillugu nammineerlutik
aqqusinniarisartagaat ajunngilluinnartut mandetimiinnaallu atorlugit
ingerlattarsimasaat takusutissiisut ajunngitsut, taamaattumik siunnersortit,
aqqusinniornernilu aallartitsisussat angalaqattaarnissaasa - qularnanngitsumik
akisussaqisup sipaarutigineqarsinnaanera ilanngullugu
eqqarsaatigisariaqarpoq, nunaqarfimmiut
namminneq sapinngillat. Ikiorneqarnissamullu pisariaqartitsisoqassappat
kommunit piareersimatinneqartariqarput.
Aalisarnermut piniarnermullu tunngatillugu
paaserusunnarpoq, siorna aalisarnermut piniarnermut, nunalerinermullu
tunngatillugu Inatsisartuni oqallinnermut atasumik - qaleralinniarnermi
qassusersorluni aalisarnerup annikillisikkiartortinneqarnissaanut
tunngatillugu, ningittangar-sornermut atortussat, neqitassat il.il.
akikillineqarnissaannik neriorsuuteqarneq qaqugu atuuti-lissanersoq?
Aningaasaqarnermut Ataatsimiititaliap
isumaliutissiissummini siunnersuutima marluusut akuersissutigineqannginnissaat
inassutigaa, taamaakkaluartoq malunginiarpara Aningaasaqarnermut
Ataatsimiititaliap Naalakkersuisunut inaasutigeqqinniaraa; illoqarfiit
nammineerluni illutaarnissamut tunngavissat piaartumik sulissutigineqarnissaat.
Aammalu paasivara maannakkut kommunini
aqquserngit pillugit misissuineq ingerlanneqaler-simasoq, taamaattumik
siunnersuuteqarnikkut paasisama malinnaavigeqqinnissaat ingerlateq-qissavara.
Taamatut oqaaseqarlunga Inatsisartut
ilassutitut aningaasaliissutinut inatisissaannut siunnersuutip
pingajussaaneerneqarnissaminut ingerlaqqinnissaa akuerseqataafigissuara.
Daniel Skifte, Aningaasaqarnermut Ineqarnermullu
Naalakkersuisoq:
Siullermik partiit oqaaseqartuinut
qujavunga. Ataatsimut isigalugu Aningaasaqarnermut Ataatsimiititaliap
saqqummiussaa partiinit tamanit isumaqatigineqarpoq, tamannalu nuannerpoq
soorluli aamma Naalakkersuisut inassuteqaamminni tamanna siunertarisimagaat.
Maannakkut pingajussaaneerneqarnissaanut oqallisissat assigiinngitsut
misissoqqitassallu eqqaassanngikkaanni, taamaattumik siunnerfik assigiippoq,
tamanna iluarinartutut oqaatigissavara.
Maannakkut partiit ataasiakkaat
oqaaseqaataat, ilaatigut uannut tunngasortaat, oqaaseqarfigissavakka
naatsorsuutigalugu naalakkersuisoqarfiit allat iluminni apeqqutigineqartut
akissuteqarfigiumaraat, taamaattarattami.
Siumup oqariartuutaasa ilagaat
innuttaasunut paasisitsiniaanissaq, tamanna aningaasanut inatsimmut
tunngatillugu pimoorunneqassasoq, uaguttaaq Naalakkersuisuni apeqqut taanna
pingaartikkatsigut, tamanna assut iluarinarpoq. Kisianni iluarinarnerata
saniatigut oqaatigissavara isumaqarama pingaaruteqartoq aviisit pioreersut
atorlugit inatsisit Inatsisartut akuersissutigi- saat aamma saqqummiunneqartassammata, tamanna innuttaasunut
paasisitsiniaanermut pingaaruteqarmat qaffatsinneqarmallu iluaraara assut.
Aamma oqaatigineqarpoq soorlu Namminersornerullutik Oqartussat
pigisaasa ilaasa annertoorujussuarmik sippuisarnerat, aningaasanut atuisillutik
assersuutigineqarput Amutsiviit aammalu KNR-i, tassani oqaatigineqareersutut
qularinngilara Naalakkersuisoqarfinninngaannit akissutigineqassasut. Kisianni
tassa uagut Naalakkersuisuni ataatsimut isigalugu tamakkua malinnaaffigeqqissaarnissaat
pingaartipparput.
Aamma Siumup kissaataasa ilagaa
assigiinngitsut immikkoortut arfinillit, soorlu nunaqarfinni aqquserngit,
suliffissaqartitsiniarneq, kommunit akiitsullit, Sulisa A/S-imut tunngasut,
sanaartornermi sillimmatit, soorlu 31 mio. kr.-it, kiisalu KNR-imut tunngasut.
Taakkua tusaatissatut tigussavagut
aammalu qanoq ilioriuseqarfigissamaarlugit Naalakkersuisunit ingerlateqqissavagut.
Taamatut Siumup oqaaseqaataanut oqaaseqarpunga, ilassutissaqassappat
qularnanngitsumik allaninngaannit.
Atassummut tunngatillugu oqaatigissavara
Atassutip oqaaseqartuanut nuannaarutigigakku maluginiarlugulu
atortorissaarutit, soorlu Internetsi EDB-mullu tunngasut, innuttanit aammalu
suliffeqarfinnit atorluarneqarnissaannut kaammattuinera ajunngitsutut
tusaatissatutu tigujumagakkut. Kisiannili illua´tungaatigut aningaaaseriviup
aappaata Grĝnlandsbankip pisiarineqar-nissaanut tunngasumik Atassutip oqaasi
uani annertunerusumik qaqileriffigissanngilakka. Kisiannili imatut
oqaatigissallugu taanna pingajussaaneernissaanut paasissutissat erseqqinnerusut,
soorlumi aamma Aningaasaqarnermut Ataatsimiititaliap taanna kissaatigigaa
saqqummiussinermini. Taakkua erseqqinnerusumik qaffatsinneqarumaarmata
pingajussaaneerneqarnissaani.
Unali taanngitsoorusunngilara, soorlu
ippassaq Naalakkersuisut Siulittaasuata maanngaanniit oqaatigigaa,
ukiorparujussuarni aatsitassanut tunngasumik apeqqut inuiaqatigiinnut
pingaar- toq oqallisigineqarsimavoq, periarfissaqalersimanitsinnut
apeqqut taanna tunngalluinnaqqis-saarmat taamaattumik assut pingaartutut
isigaara taassuma isumaqatigiissutit aallaavigalugit niueqatigiiffittut
naammassineqarnissaa.
Taamatut Atassutip oqaaseqarnera
periarlugu Inuit Ataqatigiit kissaataat, soorlu nunanut allanut akiitsutta
sukumiisumik nassuiarneqarnissaanut piumasaqaataat, taanna
ajornanngitsunnguamik neriorsuutigissavara, aamma taanna nunanut allanut
akiitsukkatta qanoq akilersornera, aamma qanoq annertutiginera ukiunullu aggersunut
Naalakkersuisut pilersaarutaat ataasiarani ilisimatitsissutigineqartarput
aammalu imaaliallaannaq Inuit Ataqatigiinnut ilisimatitsissutigineqassallutik,
soorlu aamma Aningaasaqarnermut Ataatsimiititaliamut aammalu atuagassiatigut
saqqummiunneqareersimapput taakkua. Kisianni neriorsuut taanna kissaataat
naammassineqassaaq.
Ilaatigut Kangaatsiamut tunngasumik Inuit
Ataqatigiit oqaasii aamma oqaaseqarfigilaarusuppara, tassa Kangaatsiap
aningaasat tungaasigut ajornartorsiornera atukkaminillu taarsersuinera
qularnaatsumik oqaatigineqassaaq Kangaatsiap aamma ullumikkut akilersugassani
isumaqatigiissut malillugu akilersormagit, pisussaaffini naammassisarpaa
aammalu piumasaqaatit Nammi-nersornerullutik Oqartussat aningaasanut
aqutsinermut, assersuutigalugu, piumasaqaatigisar-tagaat taakkua malippaat.
Qujanartumik taassuma tungaa aaqqissimavoq. Taamaakkaluartoq
itigartitserpalaartumik Inuit Ataqatigiit oqaasiat nipeqartissanngilara,
tassami pingaarpoq Kangaatsiap ineriartornermini inuussutissarsiutitigut
siuarsaanermi qanoq iliorfigineqarnissaa.
Taanna imatut inerneqarnissaa uanga neriunartuutinngilara, tassa
Inuit Ataqatigiit siunnersuutaattut taamaalilluni akiitsumikkut erniatigullu
isumakkeerfigineqarluni taamaaliorfigineqar-nissaa. Isumaqarpunga taanna
apeqqut nalilersorluartariaqartoq assersuutissat, soorlu imaalisut akiitsut
isumakkeerfigalugit taavalu nutaamik aallartilluni, taanna periuseq
assersuutigalug BSU-mi akiitsulipparpassuit ilaat akiliisinnaanngikkaluartut
ilaallu akiliisinnaalluaraluartut assigiin-ngisitsinermik pissaagut, aamma
kommunit assigiinngisitsitsinermik pissaagut taamaaliussagaluarutta. Taassuma
nalilersorluarneqarnissaa isumaqarpunga naalakkersuinikkut pingaaruteqartorujussuusoq.
Una oqariartuutitut tigujumavara Kangaatsiap immikkut qanoq
iliorfigineqarnissaanut suliniutissat, taakkumi soorlu aamma Aningaasaqarnermut
Ataatsimiititaliap kaammattuutigisarsimagai.
Aamma uanga atinniinngikkaluaq immikkut
ilisimasaqarfigigakku Grĝnlandsfly-mut tunngasumik 20 mio.-it Inuit
Ataqatigiinninngaanniit oqaatigineqarmata maannakkorpiarlu Naalakker-suisoq
susassaqartoq maaniinngimmat isumaqarpunga pisariaqartoq una Inuit Ataqatigiit
oqariartuutaat akissuteqarfigissallugu, tassaasoq Inuit Ataqatigiit isumaat
malillugu ukiarmili taamanili aaqqiivigineqareersimasariaqaraluartoq. Ukiarmi
Inatsisartut ataatsimiimmata Grĝnlandsfly qinnuteqarpoq taamanikkut qinnutai
tunngavilersukkat amingaataapput, taamaattumik Naalakkersuisut
piumasarisimavaat tunngavilersukkanik saqqummiissasut.
Taamaattumik taakkua amigaataasimammata,
aammalu karsi nateqanngitsuusaaq aallerfiinnassatut aqutsissagutta taava
siunissaq apeqqusertariaqassammat. Taamaattumik aqutsilluassagutta aningaasat
qinnuteqaatit naammassisariaqarpagut. Taamaattumik taamatut oqarneq
isumaqarpu-nga pissutsit piviusut aallaaviginagit oqarnerusoq.
Naggataatigut inissialiornermi 80-20
imaluunniit 60-40, taanna apeqqut oqaluttuassartaa eqqarsaatigissagaanni
1991-imi eqqunneqartoq, taava siorna aningaasanut pilersaarusiornermi
allanngortinneqarpoq ilaatigut kommunit borgmesterit peqataatillugillusooq
Ineqarneq pillugu Ataatsimeersuartoqarmat majimi 1996-imi. Taamanikkut kommunit
namminneerlutik kissaati-gaat siunissami inissialiornermi aamma nammineq
aalajangeeqataasiariaqarlutik. Namminneq akissussaaqataajumapput,
inissialiorneq ima ittoq uagut aqutseqataaffigerusupparput, taamaattumik
ilaasa 80-20 ilaasa allaat 100 %, tamakkuninnga eqqartuigaluarnerit kommunit
kissaataat aallaavigalugu uannga siunertaqartoq; uagut inissialiorneq aamma
akisussaaqataaffigiumavar-put, aningaasaliisarluta aammalu inissiat illullu
qanoq isikkoqarnissaat uaguttaaq akisussaaqataaffigiumagatsigu. Taanna
eqqarsartaaseq aallaavigalugu taava 60-40 aallaavigineqarpoq, taamanikkut
ineqarneq pillugu ataatsimeersuarnermi siunnersuutigineqartut aalaavigalugit.
Taamatut Inuit Ataqatigiit
oqaaseqarfigissavakka. Akulliit Partiiat naalakkersuisoqarfimmit
allaminngaannit akissuteqarfigineqarnissaa naatsorsuutigaara. Kattusseqatigiinnut tunngasumik
eqqunngitsumik paatsoorneqarsinnaasumillu saqqummiimmata. Oqaaseqatigiit
ataatsit iluanni ilaatigut imaatigut oqarmat: AAlluitsup Paani, Qaqortumi, Qasigiannguani
Qeqertarsuarmilu suliffissaqartitsinerit ingerlanneqarnissaannut 22.347.000 kr.-it
Aningaasaqarnermut Ataatsimiititaliap januarimi martsimilu 1997-imi
ataatsimiinnermini akuerisimasai Naalakkersuisunit 835.000
kr.-iinnanngortillugit akuersissutigineqartussatut inaasutigineqarsimanera
naammaginngilara@ tassa
taanna eqqunngilaq, paatsuuisoqaqqunagulu oqaatigissavara taakku aningaasat
pineqartut aalajangersimalluinnaqqissaartumut nunaqarfimmut angisuumut
atortinneqarmata.
Taava taamannak oqariarlunga
kaammattuutigissavara partiit imaluunniit Inatsisartut ataatsi-miititaliaat
kisimik pinnatik aamma Naalakkersuisunit Kattusseqatigiit qaaqqusisinnaasut
tusarniaallutik; una apeqqut sumut-una tunngasoq? Taamaalilluta immaqa
paaseqatigiinnerit erseqqinnerusut pisassagatsigit. Tassa tusarniaasinnaanerup
ammanera erseqqissaatigeqqilaassavara taamaalilluta aamma tusarnaartunut
kisitsisinik eqqornerusunik paasisitsisarsinnaaniassa-gatta
puussaarutaanngitsunik.
Konrad Steenholdt, Kultureqarnermut, Atuartitaanermut
Ilageeqarnermullu Naalakkersuisoq:
Siullermik aallaqqaatigalugu qujassaanga,
suulluunniit uani ilinniartitaanermut immikkut aningaasaliiffiginissaat pillugu
qinnuteqaatigisimasagut paasigakku oqaaseqartunit tamanit ilassilluarneqartut
taperserneqarlutillu. Uanili partiit
assigiinngitsut oqaaseqartui tamakkersinnaannginnakkit pingaarnerusut
samminerussavakka.
Una siulliullugu oqaatigilaarlara
arlalinnik paatsuugasoqaleqqunagu paasigakku oqaaseqartut arlallit
iluarisimaaraat 1,5 mio. kr.-inik qinnuteqartugut atuarfinni
aqutsisunngorumaartussat suliassaannik ilitsersuunnerannut paasitinniarnerannullu
aningaasanik atugassanik. Kisianni tassunga tunngatillugu una
ilisimatitsissutigissavara pisariaqartitsisuartussaassaagut aningaasanik ukiuni
tulliuttuni taamatut pilersaaruteqarnerput iluatsittumik ingerlassappat.
Nalunngilara apeqqut taanna siullermeerlugu suliarereerparput,
aappassaaneerlugulu pingajussaaneertussaavarput, taannalu soorunalimi
akuerineqarpat kingunerisinnaasaanik sillimareernissaq anguniarlu- gu paasisitsiniaanissamut aningaasanik
qinnuteqarsimavugut. Taannalu assut qujanarpoq paasillugu oqaaseqartunit
tamanit tapersersorneqarmat.
Pingaarnerutillugit tikikkumasakka
tassaapput ilaatigut Aningaasaqarnermut Ataatsimiititaliap eqqartorsimasai,
tassa illut atuartitsiviusut aserfallassimanerisa nalunaarsorneqarnerat piareer-poq.
Taakku massakkut pigaagut apeqqutaaginnarporlu ukiumit ukiumut aningaasat qanoq
amerlatigisut iluarsaassinernut qanoq amerlatigisut atugassanngorlugit
illikartinneqartassanersut.
Ilumoorpoq ataatsimiititaliap taasimasaa uani
soorunami illu aaqqissuutassaq, silataaninngaan-niit misissorlugu
allaaserineqarsimavoq qanoq aserfallatsigisimanersoq. Maannamulli
misilit-takkat tunngavigalugit una isertuutissanngilara; igai silarliit
ammaraangatsigit ilaatigut ilua´tungaani soorlu illup saarngi qanoq
asiusimatiginersut aatsaat takusinnaalersaratsigit. Tassalu una erseqqissumik
oqaatigerusuppara; qularnanngilaq aningaasanik siullermik qinnuteqarner- mi tunngaviugaluartut sinnerlugit aningaasanik
atuisariaqalerneq, taanna takkuttuartartussaavoq. Soorlu aamma Aasianni
Gammeqarfiup aaqqissuunneranut tunngatillugu aningaasaliissutit
annertoorujussuit pereersimapput. Tassalu taanna ilisimatitsissutigissavara
taamatut aserfallas-simanermik nalunaarsuineq 100%-imik upperineqarsinnaanngimmat,
tassa aningaasat killissaat uaniittut, kisianni qaangiilaartarnissaq
qularnanngilluinnarpoq. Tassa uani Alluitsup Paani pisimasoq taasimammassuk
taamaasillugu erseqqissaaffigissavara.
Taava aamma apeqqut tulleq, tassa TV-mut
tunngatillugu oqaatigilaarlara, ilumoorpoq aningaasat immikkoortinneqartarmata
TV-kkut aallakaatitassiat radiukkullu aallakaatitassiat sinerissamut
siammarneqarnissaat isumannaarniarlugu. Aningaasat taakkua qitiusumik
naatsorsueqqissaartarfimminngaanniit qaammatikkaartumik KNR-imut
akileraarneqartarpoq. Tassa ullumikkut aaqqissuussineq taamaappoq. Taavalu
ukiup naanerani qaammatikkaartumik taakku tunnius-suinerit imaassimasinnaavoq
atorfissaqartitaninngaanniit annertunerusumit tunniussisoqarsi-masoq KNR-imut.
Kisiannili soorlu naatsorsuutit allat pisarneri malillugit
tunniussisoqarpal-laarsimappat taava taassuma suliffiup pisussaaffigaa
aningaasat sinneruttut taakkua landskarsimut uterteqqissallugit. Taakkuli
ilaatigut aaqqinneqartarput imannak tunniussinnaanngippatigit taava ukiumi
tulliuttumi aningaasaliissutininngaanniit ilanngaassutigineqartarlutik -
qinnuteqaataasimasuninngaanniit. Taanna tamanit ilisimaneqarmat
annertunerusumik nassuiartariaqanngilara.
Kalaallit Nunaata Radiua annertuumik
ilaatigut aamma oqaatsit sakkortuut atorlugit maani oqaluttunit
tikkuarneqarpoq. Taanna aamma uanga tupiginngilara, aningaasanik taama
annertutigisumik aqutsinerluisoqarsimappat, soorunami aaqqiiniarneq
aallartittariaqarpoq, aammalu aaqqittariaqarpoq taanna. Ulluni kingullerni
assigiinngitsunik pisoqarsimavoq. Tassa Kalaallit Nunaata Radiuata siulersuisui
assigiinngitsunik aalajangersaasimapput, taakkulu maani uanga
uteqqissanngilakka ilisimaneqareermata.
Kisianni aajuna isumaqatigiissupput,
aammalu oqaaseqartut tamaasa isumaqatigilluinnarpakka oqarmata, aningaasanik
atugassiissutinik aqutsineq pitsanngorsartariaqarpoq. Taanna ilumoorluinnarpoq.
Paatsuungasoqaqqunagu una uteqqissavara;
KNR-ip siulersuisui tassaapput atorfinitsitsillutillu soraarsitsisinnaasut
atorfilittaminnik. Aammalu aningaasanik aqutsineq taakku aamma akisussaaffigaat.
Uagut Naalakkersuisuninngaanniit toqqaannartumik aningaasat qanoq
ingerlanne-qarnerannik periarfigisinnaasagut ullumikkut killilerujussuupput,
tamannalu inimi maani peqqussutitigut aalajangersarneqarsimavoq KNR-ip
politikkikkut aqunneqanngitsumik inger-lanneqarsinnaanissaa qularnaarumallugu.
Aap, aningaasat ima amerlatigisut
aqutsinerluinermik kinguneqartumik ullumikkut takkorliut- tut
aaqqiiffigissagutsigit inatsisiliagut allanngortitertariaqarpagut. Qaammatini
kingullerni ukioq manna piffissarujussuaq aammalu sulisut nukipparujussui
atorlugit suliassaq ingerlassimavarput. Uanilu pingaarnerpaatillugu
aaqqiiniutigut uaniipput, pissutsit taakkua iluamik aaqqittariaqar- put nutaamik
aallariarumalluta. Nukippassuit uani atorneqarsimapput, tullianullu alloriarneq
tassaasussaassaaq, oqaluttut uparuaagaat una; taakkua aalajangersakkagut
ullutsinnut naleqqukkunnaarsimappata taava naatsersuutigissavarsi ukiamut
ataatsimiinnissatsinnut pisortaqarfinnin-ngaanniit siunnersuuteqassaagut
allannguutissanik assigiinngitsunik. Aamma uani oqaluttut assigiinngitsut
uparuartugaat tunngavigalugit.
Taavalu aamma ataatsimiititaliap
uparuagaasa ilagivaat fjernsynikkut reklaminik takutitsisar-nermut tunngatillugu
ingerlatsineq inatsisinik ullumikkut unioqqutitsinerusoq, taannalu unitsinneqartariaqartoq.
Taassuma tungaatigut arlalinnik iliuuseqarsimavugut, uani tunngatillugu
oqaatigisinnaavara KNR-ip siulersuisuisa siulittaasortaavat
erseqqilluinnartumik isumaqatigiissuteqarfigereersimagakku taassuma
aaqqiiffiginiarneqarnissaa piaartumik sulissutigineqassa- soq, tassa KNR-imi
siulersuisut suleqatigalugit. Taamaattumik naatsersuutigilluinnarpara ukiamut
utaqqeqqinngikkaluarluta taassuma tungaatigut ulluni qanittuni qanoq
iliuuseqarfigi-neqarsinnaanissaa.
KNR taamasillugu qimalaariarlugu uani
oqaatigineqartut ilagaat katersortarfeqarneq ullumikkut annertuumik
ajornartorsiutaavoq. Aamma nutaanik katersortarfiliornissamut massakkorpiaq
Naalakkersuisuni pilersaaruteqanngilagut, taanna aamma siusinnerusukkulli
ataatsimiititaliamut ukiormanna aningaasat immikkoortinniarneranni
inatsisissamut suliarinerani erseqqilluinnartumik nalunaarutigereersimavarput.
Kisianni eqqarsaatersuutit ukua; illut suliffiit nunaqarfinni
pilersiortornerannut atasumik katersortarfeqarneq aamma
aaqqiiffigineqarsinnaanersoq, taanna suliaraarput. Nalunngilarpulli illut
sulliviit pilersinniarneranni uanga Naalakkersuisoqarfiga kisimi
oqartussaanngitsoq, kisiannili aamma naalakkersuisoqarfinnik allanik
suleqateqartariaqartugut, soorlu ilaatigut nakorsiartarfiusinnaanera,
ilaatigut sukisaarsaarfittut atorsinnaanera allallu ataatsimuussappata
pisariaqarpoq pilersaarusiornissaq.
Tassalu 1998-imut aningaasanut inatsimmi
taanna ilanngunneqassappat illunut sullivinnut ilanngullugu katersortarfittut
atorneqarsinnaaneranik aningaasanik immikkoortitsinissaq, taanna
sulissutigissaqqaarparput kommuninut piffissaagallartillugu paasissutissatuut
ingerlatissallutigu.
Ullumikkut katersortarfittaarniarlutik
qinnuteqarsimasut qinnuteqaataat pisoqalisimapput, kingulliit pigisagut ukiunik
tallimanik ullumikkut pisoqaassuseqarlutik. Taannalu uani pilersaarut
malillugu nunaqarfimmiunut akuersaarneqassappat qinnuteqartoqassappallu, taava
pisariaqarpoq kommunit allaffigissallutigit qinnuteqarsinnaanermut taanna
tunngavigalugu qinnuteqaatini massakkut uagutsinnut nassiussaqaqqullugit.
Taavalu naggasiullugu oqaatigilaarlara
assorsuaq isumaqataagama, aamma Naalakkersuisuni oqallisigisimasatta ilagimmassuk
Atuakkiorfiup uatsinnut apississutaa tassaasoq atuakkiaminnik, atuakkanik
naqiteriikkanik pigisaminnik tuniniaanerup ajornarnerujussua. Ilumut ilumoorpoq
aningaasarliorput, ingerlaniarnerminni ajornartorsiuteqarput, Atuakkiorfiup
aammalu Kujataata Naqiteriviata ingerlanniarneqarneranut tunngatillugu
ajornartorsiutaat maannakkut ilungersor-tumik aaqqiffiginiarsaraagut.
Taannalu aaqqissinnarlugu suliassaq
tullinnguuttoq unaavoq ilumoortoq uani oqaatigineqar- toq; atuakkat naqitat sumorsuarmut pigineqarsinnaapput, aamma
tamaarneq ajorput. Tassanilu uagut oqaatsigut tunngavigalugit naqitat ilumut
tapersersorluinnartariaqarpagut. Soorlu ullumikkut sumut iluaqutaava
atuakkiortugut atuakkanik saqqummersitsigaangata Atuakkiorfimmi takussallugit
200-250 kr.-inut akillit. Naak periarfissat tamaasa atorlugit
akikillisarniarlugit tapiiffigisuaraluarlugit kultureqarnermut aningaasanik
tapiiffigisimasatsinnik pissarsiarisima-atsinninngaanniit. Taakku
atoraluarlugilluunniit ullumikkut niuertarfinni atuagannguaq kalaal-isooq
pisiarissagutsigu 200 kr. sinnerlugu akeqarpoq.
Ilumut taamatut neqeroorfigissavagut?
Taamaattumik taanna apeqqut oqaaseqartuninngaannit erseqqissumik nalileqqullugu
oqaluttunut assorujussuaq qujavunga. Taanna tullinnguullugu
nalilersortariaqarparput Atuakkiorfiup aamma ingerlalluarnissaanut
pingaaruteqarluinnartuummat. Ilaatigut Naalakkersuisuninngaannit
eqqartorsimavarput Katuap ammarsimatsiarsimanera- ta kingornatigut
aallaalluunniit igalaaminernik ilitsiviusinnaasunik taakunga
pilersitsisinnaan-nginnersugut tassunga iliorarlugit kalaallit atuakkiaat
assigiinngitsut ukiuni kingullerni saqqummerarsimasut
takuneqarsinnaaniassammata tuniniagaasut qanorlu akeqartut. Eqqarsaatit taakkua
takornartaanngillat taamaattumik uani tassannga tunngaveqarlutik saqqummiisut
qujaruppakka isumaqatigilluinnarlugillu.
Taamatut naakkaluamik
nassuiaateqarfigilaarpakka, naak ilaatigut tikissallugit, oqaaseqartullu ilaasa
oqaaseqaataat, assut pilerinaraluartut, kisianni una puigornagu
ataatsimiititaliap aamma uani oqaatigimmagu apeqqutit assigiinngitsut uuma
inatsisissap pingajussaaniinnginnerani erseqqinnerusumik paasiniaajumallutik
piumasaqarnerat. Taanna aamma sillimaffigissavarput sukulluunniit
itisilerinissatsinnut qaaqquneqarnissatsinnut.
Marianne Jensen, Peqqinnissamut Avatangiisinullu Naalakkersuisoq:
Uanga aamma qujassutigerusuppara
peqqinnissakkut avatangiinullu tunngasutigut Naalakker-suisuninngaannit
matumuuna siunnersuutigut Inatsisartunit tapersersorneqarluarmata.
Kiisalu aamma maluginiarpara Siumup
oqaluttuaninngaannit inassutigigaa pinaveersartitsinermut suliniarfiup
Paarisa-p pilerseqqinneqarnissaanut aningaasaliissutissatut qinnutigineqartut
TB-I-ip pingajussaaneerneqarnissaanut aaqqiivigineqarnissaat. Tamanna
qujassutigivara aammalu maluginiarlugu Atassutip Inuit Ataqatigiillu
oqaluttuanit tamatumunngarpiaq tunngasunik paasissutissanik amerlanerusunik
perusuttoqartoq apeqqutip taassuma erseqqaarinnerusumik
aalajangiiffigineqannginnerani.
Soorunalimi Inatsisartut isumaqarunik
suliassat ima nukinginnartiginngitsut maannakkut aalajangiiviusariaqarlutik
imaluunniit isumaqarunik aallartitseriarnissamut toqqammavissat
amigarpallaarujussuartut taava soorunami Inatsisartut Paarisa-p
pilerseqqinneqarnissaata kinguarteqqinnissaa aalajangersinnaavaat.
Uangali matumuuna erseqqissarusuppara
uanga nammineq, aammalumi Naalakkersuisut matumuuna siunnersuuteqarnermikkut,
suliassat Paarisa-mi suliarineqartussat annertuujusut, pingaartuusut
sapinngisamillu pingaartumik aallartittariaqartutut isigigatsigit.
Taamatuttaaq pitsaaliuinermut
siunnersuisoqatigiit komuninit tamanit aallartitaqartoq suliniu-taasariaqartut
qanimut ilisimaaralugit Parisa-p piaartumik pilerseqqinneqarnissaa sakkortuumik
kaammattuutiginikuuaat. Soorlulu aamma taamatut ippassaani peqqissusermut
nassuiaat oqalli-sigineqarmat Inatsisartuni oqaluttut tamarmik
utaqqikatattutullusooq allaat nipeqarlutik pitsaaliuinikkut suliniarnermi
annertusaanissamut tapersersuinertik saqqummiussoraat.
Taamaattumik qilanaaraara
Aningaasaqarnermut Ataatsimiititaliap uannik tamanna pillugu
isumasioqatiginnikkusunnera pereerpat Inatsisartut apeqqummut tassunga qanoq
aalajangerumaarnissaasa erseqqarinnerulersimanissaa.
Paaviaaraq Heilmann, Piniarnermut, Aalisarnermut
Nunalerinermullu Naalakkersuisoq:
Oqaaseqartunut eqqumiitsunik oqaaseqartut
naqqiivigineqangikkaangata oqaaserineqartut ilumoortutut isigineqalersarmata
naatsunnguamik naqqiissuteqalaassaanga. Tassa Kattusseqatigiinniit Anthon
Frederiksen-ip oqaatigimmagu: A ningittagarsornermut atortussat neqitassat il.il. akikillineqarnissaannik
neriorsuuteqarneq qaqugu atuutilissanersoq@ innersuussutigivaa ukiarmi Inatsisartuni
Aalisarneq, Piniarnermullu tunngatillugu oqallinnermi saqqummiussorneqartut.
Tassunga tunngatillugu Naalakkersuisunit
oqaatigissavara neriorsuuteqarsimanngimmat akikilliisoqarnissaanik, kisianni
periarfissanik pitsanngorsaanissat, ningittagarsornerup annertunerusumik
aallunneqalernissaanut aammalu qassutit atorunnaariartuaarnissaanut atatillugu
ningittagarsornermi periarfissat oqilisaanneqarnissaanut
periarfissarsiuussinissaq Naalakkersuisunit neriorsuutigisimavarput. Aammalu
suliaq taanna suli ingerlavoq, aammalu naatsersuutigaarput aasap ingerlanerani
kinguneqartumik pisoqarumaartoq.
Taamatut Kattusseqatigiinnut
naqqiuteqalaarpunga.
Peter Grĝnvold Samuelsen, Angallannermut, Suliffissuaqarnermut Pisortallu
Suliassaqarfiutaannut Naalakkersuisoq:
Uanga pingasut naatsunnguamik oqaaseqarfigilaassavakka.
Siullermik Inuit Ataqatigiit oqaaseqaatiminni immikkoortut marluk ukiarmili
iluarsereersimasariaqaraluartutut uparuarpaat. Taateraaq Tuullillu
oqaatigineqarput, naggataatigullu kaammattuutigineqarluni Naalakkersuisut
isumaginiassagaat angallateeqqat taakku siunissami taartissaannik
isumaginninniaqqullugit.
Tassunga atatillugu
nalunaarutigisinnaavara Sĝfartsstyrelsen-iminngaannit KNI angallateeqqat taakku
pillugit ukioq manna angalasinnaanerannut akuersissuteqarsimammat, taakkua namminneerlutik
oqarnerattut; kingullerpaamik, tassa pisoqalisoornerat pissutigalugu. Aamma
taanna najoqqutaralugu angallatit taakkua atortussaajunnaarnissaat
pilersaarutaareersimagaluarpoq.
Taamaattumillu aamma Naalakkersuisut ukioq
ujaasisimapput, qinerlersimapput angallatinut taakkununnga taartaasinnaasunik,
aamma piukkunnartunik naapitsisimagaluarpugut kisiannili tassa angallatit
atornikut, imaluunniit ilaasunik angallassissutit, soorlu Scandinavia-mi
Star-ikkut ikuallannerisa kingoqqullugit sananeqarsimasut, nutaamik
nalunaarsorneqassappata piumasaqaatit ullumikkut atuuttut ima
sakkortutigisimapput atornikunik pisinissaq immini akilersinnaanani.
Taamaattumillu nutaanik nalilersuinerit pisariaqarput.
Innersuussutigeqqiinnassavara kujataani
aasaq manna misiliutigineqartussaq, tassa ilaasut angallanneqarnerat usinik
angallassinerminngaannit immikkoortillugu nutaamik aaqqissuussi-neq tassungalu
atatillugu siunissamut, ukiunut tulliuttunut, atuuttusamut imaatigut ilaasunik
angallassinerup pilersaarusiorneqarnera tassunga tunngatillugu angallatinik
taartissanik pisariaqartitsineq najoqqutaralugu sukumiisumik
nalilersorneqassasoq.
Grĝnlandsfly-mut tapiissutit 7 mio. kr.-it
taakkua Aningaasaqarnermut Naalakkersuisup oqaaseqarfigereeraluarai una
erseqqissaatigiinnarusuppara, soorunami ukiarmili aamma taanna taamatut
naammassiinnarneqarsimasinnaagaluarpoq, kisianni qaammatini kingullerni
sukumiisumik Namminersornerullutik Oqartussat Grĝnlandsfly-llu akornanni
oqaloqatigiissimaneq pisimana-vianngikkaluarpoq, taamatut Naalakkersuisut
sakkortuumik piumasaqarsimanngikkaluarpata.
Tassami aningaasaliissutissanut aallaaviit
ima assigiinngitsigippata, taava aningaasat taama amerlatigisut
tunniutiinnarnissaat tunngavissaaleqinarpoq, taamaattumillu oqaloqatigiinnerit,
isumaqatigiinniarnerit ingerlasimapput. Tamatumunngalu aallaaviusimavoq
Naalakkersuisunin-ngaanniit kissaatigisagut, tassa ilaanermut billetsit akii,
nassiussinermut akit taakkua qaffariar-tinneqassanngitsut sullissinerullu
allannguutigissanngikkaa.
Tamannattaaq aamma annertugaatsiartumik
alloriartitsisimavoq, uunga oqaloqatigiinnermut sullissinerit pisortanit
Grĝnlandsfly-mut imissutigineqartut isumaqatigiissutit erseqqarissut
najoqqutaralugit isumaqatigiissutigineqartassasut 1998 aallarnerfigalugu.
Tamatumunngalu atatillugu aamma Grĝnlandsfly nammineq ingerlaarfinni
akilersinnaasutut taaneqartartuni periarfissagissaarnerulersitsineqassasoq,
taamaasilluni akilersinnaasut, ingerlaarfiit eqqarsaatigalugit,
unammilleqatigiinnermik ammaassiartorneq, tassunga tunngatillugu
unammillersinnaassuseqarnera pitsaanerusumik inissinneqassammat.
Uggorinngilarput Naalakkersuisut
tungaaninngaannit taamatut piumasaqarsimagatta, tamannali assigiinngitsutigut
qanilleriarnermut aqqutaasimavoq aammalu nutaamik aaqqissuussinissamut
alloriarnermut aqqutissiueqataasimalluni.
Naggataatigut AIginniarfik qaqugu imeqarfittaassavara?@ Tassa ukiarmi Naalakkersuisut saqqummiuppaat
aningaasaqarnermut inatsisissamut siunnersuutip quppernernik 1032-inik quppernillit,
taakkunaniipporlu Iginniarfiup imeqarnerata aaqqiivigineqarnissaanut
tunngassuteqartoq. Tassanilu atuarneqarsinnaavoq 1999-imi Iginniarfik
imeqarfiliuunneqassasoq. Imeqarfippassuit allat assigalugit ukioq mannaannaq
nunaqarfiit arlallit imeqarnikkut aaqqiivigineqassapput, soorlu aamma
kiassarnikkut, innaallagissiornikkut allarpassuartigullu aaqqiivigineqassasut.
Anthon Frederiksenimut
oqaatigiinnarusuppara paasissutissatut Nukissiorfinninngaannit pilersaarutigineqarmat
Kangaatsiap kommunia peqatigalugu junip qulingata aqqaneq aappaatalu akornanni
Iginniarfik tikeraassallugu, tassani imeqarnikkut aaqqiinissamut pilersaarutit
aallartissallugit. Tassa Iginniarfiup nunataa imeqarfeqanngilaq, taamaattumik
omvendt Osmose maannakkut siunniunneqarsimavoq, tamaasillunilu taassuma
aningaasaliiffigineqarnissaa maannakkut pilersaarutini ersereerpoq,
pilersaarutinullu ikkunneqassalluni naatsorsuutigineqarlunilu 1999-imi 3 mio.
kr.-it nalinganut tassani imeqarfimmik pilersitsisoqassalluni.
Mikael Petersen, Aningaasaqarnermut Ataatsimiititaliap
siulittaasua:
Siullermik qujassutigerusuppara
isumaliutissiissut annertooq partiinit tamanit ilassilluarneqarmat, aammalu
Aningaasaqarnermut Ataatsimiititaliaminngaannit inassutigineqartut maluginiarpara
partiinit tamanit akuersaarneqartut. Tassa inassutigineqartut
ataatsimilluunniit isumaqatiginagit oqaaseqartoqanngilaq, aammalu
piumasaqaatigut assigiinngitsut ilassilluarneqarlutik.
Taamaalilluni immaqa oqartoqarsinnaavoq
pingajussaaneerinninnissamut sulinissatsinni oqiliallaqaagut, isumaqarpunga
ajornarpallaanngitsumik suliassagut tulliuttut naammassisinnaajumaarlutigit.
Aammattaaq Aningaasaqarnermut
Naalakkersuisup akissuteqaammini akuersaartumik nipe-qarnera maluginiarpara.
Kisiannili marlussui oqaaseqarfigilaarusuppakka paaserusunnguatsiarmagit;
siullermik nammineq illulianut qinnuteqariaaseq aammalu qinnuteqartunut
agguaasseriaaseq pillugu unioqqutitsineqartarsorinartumik Aningaasaqarnermut
Ataatsimiititaliap isumaliutissiissutikkut oqarnerput matuminnga
tunngaveqartoq nassuialaassavara naatsunnguamik.
Sineriak tamakkerlugu
nunaqarfinninngaannit aammalu isorliunerusuninngaannit qinnuteqaa-terpassuit
ingerlanneqartarput, aammalu akuersissagaanni qitiusuminngaannit tunngavissat
aalajangersimasuullutik. Aningaasaqarnermut Ataatsimiititaliami malugisarput
aajuna qinnuteqaatit ilaat akuerineqarsinnaagaluartut
akuerineqarsinnaanngitsutut akissuteqarfigineqartarsimasut. Tassa taanna
aallaaviuvoq taamannak oqarnermut; malittarisassat tunngavissat malillugit
akuerineqarsinnaagaluit akuerineqarsinnaanngitsutut
akissuteqarfigineqartarsimammata. Immaqa pissutsit arlallit tassaniissinnaapput
agguaassassat ikippallaarnerat pisuugaluartoq immaqalu akineqartussat allatut
akineqartussaagaluartut taamatut akineqartarsimapput.
Taamaattumik oqarpugut agguaasseriaatsimut
tunngaviusut maleruaqqusat misissoqqinneqar-tariaqarput. Imaanngilaq
unioqqutitsisutut Naalakkersuisoq tassani pigatsigu, kisianni agguaasseriaatsimi
immaqa ilaatigut kukkusumik nalilersuinerit ingerlanneqartarsimapput. Tamanna
aaqqippat qinnuteqartarumaartussanut unneqqarissumik akisarnissaq
tunngavilerneqarumaarpoq.
Aningaasaqarnermut Naalakkersuisup
ilanngullugu uparuarpaa allannguutissatut siunnersuuti- ni 36-iusuni aningaasalersuinissamut
ukiunut tulliuttunut missingersuusiorfiusunut Aningaasaqarnermut
Ataatsimiititaliap ilanngussaqarsimannginnera. Taanna ilumoorpoq, tamanna
aaqqinneqarumaarpoq pingajussaarinninnissamut. Kisianni oqaatigissavara
ilanngussami 1-imi takuneqarsinnaammata tamarmik ukiunut tulliuttunut
missingersuusiorfiusunut aningaasaliissutit. Aamma taakku Inatsisartunut
ilaasortat tamarmik pigivaat, tassani takuneqarsinnaapput.
Partiit oqaaseqartuinut tunngatillugu
Naalakkersuisut akissuteqaataat tamatta paasilluarpagut. Kisiannili Akullit
Partiiannut tunngatillugu Atuakkiorfimmut kiisalu Nunatta Naqiterivianut
tunngatillugu Kultureqarnermut Naalakkersuisoq isumasioqatigisimavarput,
aammalu tassunga tunngatillugu paasissutissat erseqqilluinnaqqissaartut pisimallutigit.
Neriuppungalu Kultureqarnermut Naalakkersuisup taakkua Akulliit Partiiannut
qanoq ilillugit apuussinnaajumaarai.
Aamma tassani Aningaasaqarnermut
Ataatsimiititaliaq assortuutinngilluinnarpoq, aamma Naalakkersuisup siunnerfii
assigiinngitsut pillugit oqaloqatigiinneq pitsaasumik ingerlanneqarsimavoq.
Atassutip oqaaseqartuata ilanngullugu
taavaa suliffissaqartitsiniarnermut aningaasaliissuteqar-toqarnissaanut qanoq
iliuuseqartoqartariaqartoq massakkut, soorunami taanna Aningaasaqarnermut Ataatsimiititaliami
oqallisigissavarput aammalu Naalakkersuisunut qanoq isikkulimmik
ingerlatitsinissarput isummerfigiumaarlutigu. Kiisalu aamma Atassummit
ilanngullugu taane-qartoq, kontop sanaartugassanut sillimmatip
qaffanneqarnissaanut tunngatillugu Grĝnlands-bankiusimasup illup, imaluunnit
massakkut suli Grĝnlandsbankiusup, pisiarineqarnissaanut tunngatillugu
oqaaseqatai ataatsimiititaliami nalilersorneqarumaarput. Aammalu
naatsorsuutigilluinnarpara Aningaasaqarnermut Naalakkersuisoq tamanna pillugu
aamma isumasiorumaarlutigu.
Naggataatigut oqaatigissavara majip 5-ni
inatsisissatut siunnersuutip saqqummiunneqarnerata kingorna Naalakkersuisunut
allannguutissatut siunnersuutinut 113-iusunut saqqummiunneqartunut taamaallaat
arfinilli pingajussaaneerinninnissatsinnut utaqqikkatsigit. Isumaqarpunga
tamanna suliaq annertooq ingerlareeraluartoq ersiutaasoq
naammassinninniarsaraluta sulisima-nitsinnut. Ukuali arfinilliusut taakkua
aamma partiininngaannit oqaaseqaqattaarfigineqarput, tamakkerlugit,
oqarsinnaavungalu isumaqarlunga oqaatsit aninneqartut najoqqutaralugit taakkua
ajornaqutissaqanngitsumik aamma isummerfigisinnaajumaarlutigit.
Taamatut oqaaseqarlunga isumaliutissiissut
ilassilluarneqarmat qujassutigaara.
Jonathan Motzfeldt, Inatsisartut Siulittaasuat:
Grĝnlandsfly-mut tunngasut taaneqarmata,
naak tassaniikkunnaareeraluarlunga, nalinni pisuummata
erseqqissaatigilaassavakka, aamma Aningaasaqarnermut Naalakkersuisoq
paatsuungassu-teqaqqunagu.
Aningaasat taakku 7 mio. kr.-it pineqartut
naluneqanngillat, Grĝnlandsfly-p kissaatiginngisaannarpaa 7 mio.-inik
akiliisoqarnissaa, taanna Pisortaqarfimminngaanniit arlaatigut kukkusumik
allanneqarsimavoq paatsuugatitsinermullu pisuulluni. Taamaattumik oqallinneq
ilaatigut ingerlanneqarsimavoq Grĝnlandsfly-p qullersaqarfianinnganniit
allanillu. Kisianni maannakkut taanna qaangerlugu aaqqiinissaq anguneqartoq
nuannaarutissaavoq.
Aamma taassuma kinguneranik Angallannermut
Naalakkersuisup oqaatigeriigaatut kiffartuus-sinermut isumaqatigiissutissap
maannakkut suliaralugit ingerlanneqartut, erseqqinnerujussuar-mik maanngaanniit
tapiissutissat saqqummersippaat, aammalu tapiissuteqarnissami nalorni-naatsumik
tapiissutissap suliarineqartarnera anguneqartussaalluni.
Taamaattumik tulliuttoq unaagunarpoq
Grĝnlandsfly maannakkut akitigut ilaasut aki akiliutissaat erseqqissoq
tunngavigalugu akiliuteqartarnerit atulersinnarnerat sorsuutigissagaa, taanna
aamma taamaareerpoq. Taavalu suut tapiiffigineqassanersut, ungasinnerusut,
isorliunerusut allallu inuiaqatigiinninngaanniit tapiiffigisassat
erseqqinnerusumik suliarineqartassapput.
Maannakkut aaqqiinissaq pilersoq pillugu
Grĝnlandsfly-p qularnanngilaq nuannaarutigissaqaa maannakkut 7 mio.-it
najoqqutaralugit sulineq ingerlanniarsinnaanngussagamiuk naammassil-lugu,
ajunaarutissat tassaniittut aamma qiviallattaarneqarmata, soorunami
naatsorsuutigineqa-reeraluarlutik siornali pilersaarusiat aallartinneqarmata.
Anthon Frederiksen, Kattusseqatigiit:
Oqaaseqarninni Alluitsup Paani, Qaqortumi,
Qasigiannguani Qeqertarsuarnilu suliffissaqartitsiniutit
ingerlanneqarnissaannut 22 mio. kr.-it eqqaagakkit ajuusaarutigissavara
ilanngutinngitsoorsimagakku siullermeerneqarnerani taakkua eqqartorneqarmata.
Siullermeerneqarnerani konto-mi 50.06.16-imi imatut allaqqasoqarpoq: Alluitsup
Paani, Qaqortumi, Qasigiannguani Qeqertarsuarmilu suliffissaqartitsiniutit
ingerlanneqarnissaanut konto-mut pineqartumut 22.347.000 kr.-inik
aningaasaliisoqarnissaa qinnuteqaatigineqarpoq. Illua tungaatigut taakkua
amerlaqataannik konto 20.10.13 suliffeqarnerup siuarsarneqarnissaanut atugassat
ilanngarlugit. Pilersaarutip imara Alluitsup Paani suliffissat ukiumut 72-it,
Qaqortumi ukiumut 66-it, Qasigiannguani suliffissat ukiumut 10-it Qeqertarsuarnilu
suliffissat ukiumut 1,76-it@
tassa taakku qassiusimanerput, Asiuliini taaneqartut Aningaasaqarnermut Ataatsimiititaliami 1997-imi
januarimi martsimilu akuerai@. Tassani taakku pineqarput, taamaattumik taakkununnga tunngatillugu
ersarinnerusumik nassuiaasoqarnissaa kissaatiginassaaq.
Taavalu aalisarnermut tunngatillugu
ningittagarsornermi atortussat neqitassallu akikillineqar-nissaanut tunngasoq
neriorsuutigineqartoq aamma Aalisarnermut Naalakkersuisumit
akissute-qarfigineqartumut tunngatillugu qujasinnarlunga oqaatigissavara
aalisartut tamanna erinitsaammassuk piaarnerusumik taakkua
atortulerneqarsinnaanissaat Aningaasaqarnermut Ataatsimiititaliami
ilanngullugu eqqarsaatigeqquara.
Josef Motzfeldt, Inuit Ataqatigiit oqaaseqartuat:
Atassutip oqaluttuata oqaatigisaa
nunatsinni suliffissaaleqisoqartorujussuugaluartoq taamaattoq suliassarpassuarnik naammassineqanngitsunik
nunatsinniittoqartoq, tamanna ilumoorpoq aamma tamanna siusinnerusukkut
eqqartorneqartaqaaq. Taamaattumik suliffissaaleqinerup akiorniarnerani
tamatuma eqqumaffigineqarnissaa Atassutip oqaaseqarneranut atatillugu Inuit
Ataqatigiit tapersersorusuppaat.
Siumup oqaluttuata oqaasiinut atatillugu
Parisa-mut pingajussaaneerinninnissamut utaqqeru-sunneq paasivarput. Uagulli
Inuit Ataqatigiinninngaanniit aamma Peqqinnissamut Naalakkersuisup
akissuteqareerneratigut aalajangiusimavarput pitsaaliuinermut tunngatillugu
tunngaviusu-mik Inatsisartut oqallittariaqarnerput pisariaqarmat, suliassaq
annertoorujussuuvoq pitsaaliu-gassat annertoqaat, amerlaqaat. Taamaattumik
tulleriiaarisariaqarnissaq pisariaqassaaq. Ukiamullu tamatuma
oqallisiginissaanut kaammattuuterput uteqqilaaginnassavara. Aamma Peqqinnissamut
Naalakkersuisup oqarneratut iliussagaluarutta Inuit Ataqtigiinninngaanniit isumaqartuarat-
ta lluliortoqarsinnaanngitsoq pujoorfiup nuuanit aallartillugu. Taamaattumik
qanoq immik-koortortaqarfik taanna angitigiumaarnersoq sunillu
suliaqarumaarnersoq oqaluuserinnereerut-
ta inuttalersullarumaarparput taamanikkussamut.
Kattusseqatigiinniit Kangaatsiamut
tunngatillugu Naalakkersuisut qanoq iliuuseqartariaqarnerannik
inuussutissarsiutinik ingerlatsineq eqqarsaatigalugu, taanna Aningaasaqarnermut
Ataatsimiititaliaminngaanniit arlaleriarluta pisarsimavarput. Aningaasatigut
aqutsinermut ingerlatsinikkullu ikiuineq aallartinneqarsimavoq, kisiannili
inuussutisarsiutitigut annertunerusumik qanoq iliuuseqartoqanngikkallarpoq.
Taamaattumik una aamma Aningaasaqarnermut Naalakkersuisup oqaasiinut
akissutitut atussavarput. Oqanngilagut Kangaatsiap kommuniata akiitsui
isumakkeerneqassasut isumakkiivillugit, oqaannarpugut ukiuni tallimaniluunniit
anersaartorfissaqartinniarli 1,3 mio.-it ukiut tamaasa naammattusaarlugit
akilertarsimagaluarai 1996-iinnarmi oqaatigineqartutut kommunip akiitsui 6
mio.-init 10 mio.-ngajannut qaffanneqareerput.
Taamaattumik pisussaaffini kommunip
isumagigaluarai tamatuma kingunerisimavaa kommuni nammineerluni
kiffaanngissuseqanngilluinnagajannera qanoq iliuuserineqarsinnaasunut; taannaana
siunertarigipput.
Kisianni isorliunerusuni Anders
Andreassen-ip illulioriaatsimut aningaasalersuisarnerup
allan-ngortinneqarnissaanut siunnersuutaanut atatillugu neriuppunga
Aningaasaqarnermut Ineqarnermullu Naalakkersuisup oqaatsivut paatsoorsimassanngikkai.
Uagut ataqqivarput Inissaqarnermut Pisortaqarfiup kommunit kattuffiannut
isumaqatigiissuteqarsimanerat, taamaammat-una taanna oqaatigiinnaripput
Inatsiartunut ilaasortap Anders Andreassen-ip siunnersuuteqarneranut.
Isumaqatigiissutigineqarsimammat tamanna ataqqivarput, kisiannili kommunit
nutaamik katiterneqarnerat KANUKOKA-p qularnanngilaq qanittukkut nutaanik
siulersuisoqalernissaa- nut atatillugu pisariaqartissagunikku kommunit apeqqut
taanna isumaqatiginniutissatut saq-qummiuteqqissinnaagaat.
Kiisalu Kultureqarnermut Naalakkersuisup
akissuteqarnermini kikkorpiat akigaluarnerai paasineqarsinnaanngitsoq
uparualaassavarput. Tassa pissusissamisoortarpoq oqaaseqartoq sorleq akineqarnersoq
taalaartaraluaraanni. Kisianni Kultureqarnermut Naalakkersuisup akissuteqarnermini
maleruaqqusat ullumikkumut atuuttut Inatsisartut aalajangersagarimmatigit
eqqaatitsissutigaa. Uagullu pisimassappatigut arajutsisimanngilarput Inuit
Ataqatigiinnit Kultureqarnermut Naalakkersuisoq ilimasaarereersimammat nunatta
radiuanut tunngasut maleruaqqusat ukiamut allannguutaasinnaasunik
saqqummiussaqarfiginiarlugit. Taamaattumilluuna ilaatigut sutigut
aaqqiiniuteqarsinnaaneq tikkuartuiffigiinnaripput. Soorunami ullumikkut
maleruaqqusat malil-lugit, Inatsisartut aalajangersagaat, ingerlasariaqarpugut.
Kiisalu Angallannermut Naalakkersuisumut
Taateraamut Tuullimmullu atatillugu akissuteqaataanut qujavunga. Unali
Naalakkersuisut Taateraap Tuulliullu taartigisinnaasaanik ujarlersimaneranik
oqarneq ilaatigut Angallannermut aammalu Aningaasaqarnermut
Ataatsimiititaliamit ilisimasaqarnerput najoqqutaralugu KNI-p tamanna
pisussaaffimmisut naammassiniarsimagaa ilisimatinneqarsimavugut. Taassuma
saniatigut Naalakkersuisut immikkut ujarlersimassappata tamanna tupinnalaarpoq.
Eqqaasitsissutigiinnassavarpulli
novemberip 16.-anili 1996-imi Angallannermut Naalakkersuisoq ammasunik
allaffigisimagatsigu, taamanikkut tusagassiutitigut tutsiummat Taateraaq
Tuullillu atorunnaarsinneqartut. Sulisut, inuttat, ilaatigut
allaffigiortorneqareerlutik soraarsinneqarnerminnik aqaguani
allagarsisinneqartarput soraarsinneqanngitsut. Oqartussaajumasorpassuit
taamanikkut arlaqarsimaqaat umiarsuaaqqani taakkunani inuttaasunut
puullaaqititsisimasut. KNI-p siulersuisuini siulittaasut arlariit,
Naalakkersuisut. Isumaqarpunga angallatitigut isumannaariniarneq ilaatigut
namminersortunik isumaqateqarnikkut naammasiniarneqartoq qujaasutigisariaqartoq.
Kisiannili ataavartumik, minnerunngitsumik aasakkut angallannerit
pilersinnagit, angalatitsivinnit naatsorsuutigineqarsinnaasumik aaqqiinissat
tamatumani pingaartinneqartariqartut. Angalasarnerujussuit nallilivitsillugit
aatsaat pisoqaraagat takornarissat, innuttaasut angalaniartut
saaffiginnikkaluarlutik billetseerniarfinnut erseqqissumik akineqarsinnaaneq
ajormata.
Bjarne Kreutzmann, Akulliit Partiat:
Paaserusutaqartarnermut tunngasunik.
Ilungersornaqaaq, oqaatigilluaannarlugu nuanneeqqaaq, paasissutissanik
piniarluni apeqquteqartarnerigaluit qinersiviup uuma siuliani, uanilumi, ajornakusoortorujussuusarmata.
Aatsaat nammineerluni amoorlugillusooq saqqummersinneqartarneri
naammaginanngillat.
Tamanna pigajunneruvoq kisitsisinik
erseqqinngitsunik pisartakkatsinnik paaserusutatsinnik apeqquteqaraagatta.
Naalakkersuisoqarfiit assigiinngitsut uani tamaasa pivakka. Aamma apeqqutigisimasaraluatsinnik
arlalinnik suli akisoqanngitsoqarpoq, kisianni aarlerissanngilasi, suli
malersussaqqaarpakka.
Kisianni taanna naatsumik nuanniitsutut
oqaatigiinnarniarpara, qutsaviginiarparali Aningaasaqarnermut
Ataatsimiititaliap siulittaasua, Mikael Petersen, uani appassaaneerinninnermi
apeqqutigisannut, tassa siullermeerinninnermi apeqqutigisannut
akineqanngitsunut, akissutaa pillugu. Tassa oqaloqatigiissutigisimavaat aammalu
Kultureqarnermut Ilinniartitaanermullu Naalakkersuisumit akineqartussaassaaq,
qujanaq. Kisianni apeqquserneqarpoq qanoq ilillugu akineqassanersoq.
Uani oqaaseqaatima siullermeerinninnermi
aappassaaneerinninnermilu ilaannit taaneqartutut Atamannalu pisinnaavoq allakkatigut@ taanna innersuussutigiinnarpara
pingajussaaneerinermi attorumaneqanngikkuni soqutaanngilaq. Taamaallaat
akineqarnissaa qinnutigiinnarpara, qujanassaqaaq.
Ataatsimiinnermik aqutsisoq, Inatsisartut Siulittaasuat: Jonathan
Motzfeldt, Siumut:
Taava taasinialissagatta apeqqutigissavara
allanik oqaasissaqartoqarnersoq..
Lars Emil Johansen, Naalakkersuisut Siulittaasuat:
Taasilersinnata Naalakkersuisunut
ilaasortaninngaannit assigiinngitsuninngaannit oqaaseqarfigineqareersut
qalleqqissarnagit oqaatigiinnassavara Aningaasaqarnermut Ataatsimiititaliap
allannguutissatut siunnersuuterpassuit sukumiisumik suliarisimammagit
Naalakkersuisunit qujassutigigipput. Ajuusaarpugut kisitsisit ersinngitsut
Akulliit Partiiata ujartugai tunniussin-naasarsimanngikkutsigit,
nassaarisarsimanngikkutsigit.
Kisianni aamma periarfissaq una
iluatsillugu oqaatigerusuppara ajornartorsiutit ersarivissorsuit
sulissutigalugit aallartinnissaanut, isumaqarpunga nangaasoorpallaarnaveersaassasugut.
Neriuppunga nangaasoorpallaarnaveersaassasugut. Soorlu Inuit Ataqatigiit
oqaluttuat oqartoq tulleriissaarinissaq ukiamut utaqqitilaaqqaarlugu Paarisa
immaqa isummerfigineqarumaartoq. Neriuutigissavara pingajussaaneernissaata
tungaanut Paarisa-mut aningaasaliissutit pimoorussamik Inatsisartuni partiinit
isummerfiginiarneqassasut. Nutaarsiassaanngilaq oqassaguma ikiaroornartoq
imigassarlu nunatsinni ima ersaritsigisumik ajornartorsiutaapput sekund-imik
ataatsimilluunniit nangaajallattoqarani Inatsisartuni taakkua akiorniarlugit
suliniutit tapersersorneqartariaqaraluarlutik. Ajornartorsiutipiluunersuit
isiginngitsuusaarsinnaannginnatsigit.
Taamaattumik Naalakkersuisuni neriuppugut pingajussaaneerineq
atorlugu Paarisa-mut aningaasaliissutit aaqqiiffigineqarsinnaajumaartut.
Ataatsimiinnermik aqutsisoq, Jonathan Motzfeldt, Siumut:
Taava taasinialissaagut. Inatsisartunut ilaasortat
qinnuigissavakka inissaminnut peqqullugit. Tassani oqaatigissavara
siunnersuutit Naalakkersuisut 113-it ilaat 107-it Aningaasaqarnermut
Ataatsimiititaliamit suliarineqarsimammata, sinneri arfinillit taakku
pingajussaaneerneqarnissaata tungaanut suliarineqartussaallutik.
Ilaasortanillu siunnersuutit sisamat ilaatinneqarput.
Aningaasaqarnermut Ataatsimiititaliap
siunnersuutit ilaat 107-it suliarisimasani aappassaaneerneqarnerani
tamarmiullutik innersuussutigaat, taakku akuerineqassasut. Tamanna akuersaarneqartutut
malugineqareerpoq. Taavalu ataatsimoorluni taasisoqarnissamut taamaasilluni
ilanngutissaaq.
Siunnersuutit sisamat maannakkut
aalajangiiffigineqassanngitsut innersuussutigineqarsimavoq, siunnersuuteqartup
ilaata Lars Karl Jensen-ip siunnersuummi ilassineqarnera oqaaseqarfigireerpai,
allallu siunnersuuteqartut ilaatigut Anthon Frederiksen-ip siunnersuutai
Qeqertarsuarmut tunngasut, taakku bloktilskud-it isumaqatiginniutigineqarnerani
ilanngunneqartarnissaat innersuussutigineqarsimalluni. Imaappoq suliassat
tassaniittut itigartivinngikkaluarlugit suliassap ingerlaqqinnissaanut
innersuussutigineqarput.
Taamaalilluni akuerineqartussat 107-it
taama isikkoqarlutik aappassaaneerneqarnerani akuerineqarneranut isumaqataasut
qinnuigissavakka nikueqqullugit: 26.
Akerliusoqarpa? Naamik.
Taasinngitsoortoqanngilaq.
Taamaalilluni immikkoortoq taanna taama isikkoqarluni pingajussaaneerneqarnissaminut ingerlanneqartussanngorpoq. Aap, aatsaannguaq taasakka ilanngullugit, imaappoq ilaasortat siunnersuutaat suliassap ingerlateqqinnissaanut innersuussutigineqartut, taakku aamma ilanngullugit. Tamatumunnga isumaqataasut qinnuigissavakka nikueqqullugit, tamarmiusumik taama isikkoqarluni akuerineqarnissaanut pingajussaaneerneqarnissaanut: 26.
Taama isikkoqarluni pingajussaaneerneqarnissaminut ingerlasussaanngorpoq.
Oqaluuserisassatut immikkoortoq naammassivoq.