Oqaluuserisassani immikkoortoq 03 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq, Inatsisartut Siulittaasuat Anders Andreassen:
Tullianik katersuunnissap qaqugu pinissaata aalajangerneqarnera. Taannalu oqaatigilaassavara uanga. 1997-imi inatsisartut ukiakkut katersuunnerata naammassilernerani inatsisartut aalaja-ngerpaat inatsisartut qaqugu 1998-imi katersuunnissaasa pinissaat. Inatsisartut aalajangernerat naapertorlugu ukiakkut katersuunnissaq aallartissaaq tallimanngornermi septemberip 18-ani 1998-imi. Naatsorsuutigineqarporlu oktoberip naanerani naammassineqarumaartoq.
Taamaattorli
misilittakkat aallaavigalugit Siulittaasoqarfiup ilisimatitsissutigissavaa
1998-mi qaammatip novemberip ulluisa siulliit ataatsimiinnermut
ilanngunneqarsinnaammata. Tamanna pisinnaavoq katersuunnerup naammassilernerani
suliassarparujussuit qaleriiaaginnalernissaat pinngitsoortinniarlugu. Tassunga
oqaasissaqartoqarnerluni? Imaluunniit akuerineqarsinnaava 18-ani septemberip
ukiaru ataatsimiinnissap aallartinnissaa. Anngaasoqarpoq, taamaalillunilu
akuerineqartutut oqaatigisariaqarpoq. Tassa aallartiffissarput ukiaru tallimanngorneq septemberip 18-at.
Qujanaq. Oqaatigissavaralu immikkoortoq 4 kingullerpaanngorlugu, tassa matoqqasoq
eqqartorneqassammat.
Maanna tassa upernaakkut katersuunneq naammassivoq. Katersuunnermi oqaluuserisassat immikkoortut amerlangaatsiarsimaqaat assigiinngitsorpassuusimallutillu. Ullullu ilaat takisarsimaqalutik. Inatsisartunut ilaasortat siunnersuutinik inersuarmi oqaluuseritinniakkaminnik tunniussuilluarsimapput. Tamannalu uagut tungitsinniit tapersersuinnarsinnaavaput.
Tamatumunnga atatillugu eqqaasissutigilaassavara, tassa ilaasortat siunnersuutiginiakkaminnik imaluunniit siunnersuutiginiakkatik pillugit inatsisartut allattoqarfiani atorfillit siunnersortigalugillu ilusilersuinissaminnut ikiortigisinnaammatigit, siunnersuutiminnik saqqummiussinissaat sioqqullugu. Ilaasortat arlallit periaaseq taanna atorlualereersimavaat.
Inatsisartunut ilaasortat angerlamut apuulluarnissassinnik kissaappassi, kissaallusilu ilaquttasi ilagalugit aasarsiorluarnissassinnik. Aammattaaq inatsisartut allattoqarfiini sulisut kiisalu nutserisut katersuunnermi matumani sulilluarsimanerat pillugu qamannga pisumik qutsavigaakka.
Ilangullugu eqqaasitsissutigissavara isumasioqatigiinnissamut aggeqqusissut tamanna pissaaq septemberip 14-ani aamma 15-ani allatut oqaatigalu ukiakkut katersuunnissaq sioqqutilaarlugu. Erseqqinnerusumik tulleriinnilersuineq inatsisartunut ilaasortanut nassiunneqassaaq julip aallartilaarnerani. Inatsisartuni oqallinnerput pillugu qujavunga neriullungalu angerlamut apuulluarumaartusi.
Oqaluuserisassagut tamakkerpagut.
Taavalu ataatsimiinneq naavitsinnagu sianertinnanga Naalakkersuisut Siulittaasuat oqaaseqalaassaaq.
Jonathan Motzfeldt, Naalakkersuisut Siulittaasuat:
Qujanarujussuaq taamak periarfissinneqarama. Uaguttaaq aamma Naalakkersuisuninngaaniit inatsisartut qutsavigerusuppagut maani ataatsimiinnermi aamma suleqatigiilluarsimanerput pillugu. Nalunngilara suliassagut naggataatigut ulapinnarsimasut. Kisianni aamma inatsisartunut ilaasortaaneq tupinnaqaaq. Aamma sulineq gruppini assigiinngitsuni ulapiffiusimaqaaq tamarmik suliassatik maannakkut killiffigisatik angerlarunik namminneq eqqarsaatigisassamittut aamma ilagitikkumaarpaat.
Tamaasa tusagassiortullu nutserisut aamma qutsavigaavut. Aammalu Naalakkesuisoqarfinni inatsisartullu aamma allaffeqarfiani sulisut. Tamassi aasarsiorluarniarisi, taamatut kissaallusi aamma angalalluarnissassinnik kissaappassi. Taavalu pisaqartuartarama neqitoriartoqqugaluarpassi pisinnaasut naammasseriarutta.
Anders Andreassen, Inatsisartut Siulittaasuat, ataatsimiinnermik aqutsisoq:
Taamaalilluni ullumikkut ataatsimiinneq naammassivoq. Aammalu upernaakkut ataatsimiinnermik taasarput tamaanga killeqarluni.
Oqaluuserisaq naammassivoq.