Oqaluuserisassani immikkoortoq 05 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Anders Andreassen, Inatsisartut Siulittaasuat.
Jonathan Motzfeldt, Naalakkersuisut Siulittaasuat:
Matumuuna Naalakkersuisut sinnerlugit Aningaasaqarniarnikkut ingerlatsineq pillugu nassuiaat 1998 saqqummiutissavara. Aammalu innersuullugu nalunaarusiaq annertooq tassaniittoq.
Taanna tunngavigalugu oqassaanga Nunatta aningaasaqarniarnera tunngavimmigut ingerlalluarpoq, 1996-imulli sanilliullugu 1997-imi suliat ikiliartorput. Taamaammat aarlerinissamut isumalluapiluppallaarnissamulluunniit pissutissaqanngilagut.
1995-imiit 1996-imut isertitat ajunngitsumik ineriartoreersullu 1996-miit 1997-imut isertitat annertuallaanngitsumik, immaqaluunniimmi pitsaasumik, ineriartornissaat ilimagisariaqarpoq. Taama ilimasunneq tunngaveqartinneqarpoq 1996-imiit 1997-imut akileraarutitigut isertitat 0,6 %-iinarmik amerleriarsimanerannik, 1995-imiit 1996-imut akileraarutitigut isertitat 7 %-imik amerleriarsimasut.
Avammut tunisat nalingi 1996-imiit 1997-imut ikileriarsimapput raajat akii appariarlutillu tunisat amerlassusaat ikiliartorsimammata.
Suliffissaarusimaneq annikilliartortuarsinnarpoq inuiaqatigiit iluanni suliassaqarluartoqarmat Namminersornerullutik Oqartussat aningaasaliissutaasa amerlinerannik annermik aallartinneqartumik.
Naalakkersuisut suliffissaarusimanerup annikilliartortinneqarnera anguniakkatut pingaarnertut isigiuarpaat, ullunilu aggersuni suliffissaarusimanerup suli annikillisinneqarnerunissaa sulissutigissallugu.
Aningaasat nalikilliartornerat suli tassa annikippoq. 1997-imi nioqqutissat akii 0,9 %-imik qaffapput. Tassa taamaalilluni aningaasat n alikilliartornerat Danmarkimi nalikilliartornerannit annikinneruvoq.
Aningaasaat nalikilliartorpiannginnerat Naalakkersuisut aningaasartuutikillisaanermik ingerltasisimanerannik, kiisalu akileraarutit akitsuutillu pillugit ingerlatsinermik atorneqarsimasumik annermik pissuteqartinneqarsinnaavoq.
Aningaasat nalikilliartornerata annikinnera sulinermik inuussutissarsiuteqarut aningaasarsiaasa pisissutaasinnaanerata pitsannguallassimaneranut pissutaaqataavoq.
Kommunini ineriartorneq ilorraap tungaanut ingerlavoq. Kommunit Namminersornerullutik Oqartussanut akiitsuminnik akilersuinerujartuinnarnerat Naalakkersuisut nuannaarutigalugu paasivaat.
Pisortat aningaasaqarnerat ajunngitsumik ingerlajuarsinnapoq. Naalakkersuisut nuannaarutigilluinnarpaat Landskarsip naatsorsuutai 1997-imi 89 mio. kr.-inik sinneqartooruteqarfiummata. Tamatumuuna Naalakkersuisut aningaasaqarnikkut sukangasuumik ingerlatsinerat nanginneqarpoq, sukangasuumillu ingerlatsinikkut nunanut allanut akiitsunik pilersaarutigineqartutut akilersuisinnaanerput qularnaassavarput.
1997-ip naanerani Namminersornerullutik Oqartussat nunanut allanut akiitsui 881 mio. kr.-niupput. Nunanut allanut akiitsunit 186 mio. kr.-it 1997-imi akilerneqarput. Namminersornerullutik Oqartussat akiitsuminnik ikilisitsinerat ilutigalugu Namminersornerullutik Oqartussat ingerlatseqatigiiffiutaasa akiitsui amerlipput.
Tamanna tunngavigalugu Naalakkersuisut isumaqarput Namminersornerullutik Oqartussat akiitsuminnik ikilisaanissaat suli pisariaqartinneqartoq taamaalilluni inuiaqatigiit akiitsui tamarmiusut akuerineqarsinnaasumik amerlassuseqartinneqarsinnaaniassammata.
Namminersornerullutik Oqartussat ingerlatsiqatigiiffiutaasa 1997-imi angusaat iluanngitsortaqarlutillu ajunngitsortaqarput.
Royal Greenland 1997-imi naammaginanngitsumik angusaqarpoq, silarsuarmili raajat akiisa apparsimanerannik tunisallu ikileriarsimanerannik patsiseqartunik. Tassa patsisaasut Royal Greenlandip Namminersornerullutilluunniit Oqartussat sunniuteqarfigisinnaanngisaat.
Royal Greenland suliffeqarfiuvoq nunatsinni inuiaqatigiinnut pingaaruteqartorujussuaq, taamaammallu ingerlatseqatigiiffiup patajaallisarneqarnissaa Naalakkersuisut pingaartippaat. Naalakkersuisut qularinngilaat ingerlatseqatigiiffik iliuuserineqartussatut siunnersuutigineqartut atorlugit, soorlu iliuusissatut pilersaarutit nutaat, aningaasaqarnerminik iluarsiisinnaassasoq. Royal Greenlandimut isumaqatigiissutigineqarpoq ingerlatseqatigiiffiup ingerlarnganik malinnaajuarnissaminnut Naalakkersuisut periarfissinneqassasut.
KNI Pilersuisoq A/S amma KNI Pisiffik A/S ataatsimoorlutik 1997-imi 65 mio. kr.-inik sinneqartooruteqarput 1996-imi 14,4 mio. kr.-inik sinneqartooruteqarnermut sanilliullugu. Angusaq tamanna naammaginarluinnartutut Naalakkersuisut isigaat, pilluaqqorusullugillu aqutsisut sulisullu angusarissaarnerannik.
KNI-mi ingerlatseqatigiiffiit niuernikkut tunngavigisaasa isummerfigeqqinneqarnissaannik Inatsisartut aalajangerneratigut ingerlatseqatigiiffiit ingerlanneqarnerisa pisariillisarneqarnissaanik 1997-imi pingaarutilinnik iliuuseqartoqarpoq, pisariillisaanerillu taakku ilaatigut nioqqutissanik pilersuinerup pitsanngorsarneqarnissaannut atorneqarnissaat naatsorsuutigineqarpoq.
Royal Arctic Line A/S amma Tele Greenland 1997-imi aalaakkaasunik sinneqartooruteqarnerminnik takutitsipput 1996-imisungajak amerlatigisunik. Naalakkersuisut naammagisimaarlugu maluginiarpaat suliffeqarfiit taakku marluk ajnngitsumik ingerlasut.
Paasineqarpoq Namminersornerullutik Oqartussat ingerlatseqatigiiffiutaasa annerit aningaasatigut iusmagisassat pinnginnerini aammalu inuiaqatigiit suliassiissutaasa kilerneqannginnerini angusat 1993-imiit 1996-imut pitsanngoriarsimasut. Angusat pitsanngoriaataat anguneqarsimapput assartuinermut, oqarasuaateqarnermut, kiisalu innaallagissamut imermullu akit oqalisaavigineqarnerat ilutigalugu. Taamaalillunilu tassa Namminersornerullutik Oqartussat ingerlatseqatigiiffiutaasa annerit ingerlanneqarnerisa pisariillisarneqarnerat iluatsinneqarsimavoq.
Naalakkersuisut isumaqarput pisariillisaanerit tamakku siunissami ingerlateqqinneqartariaqartut. Tassunga atatillugu angallanneq immikkut tikkuarneqassaaq. Naalakkersuisut isumaqarput nunap immikkoortuini suluusalinnut mittarfiliortiternikkut angallanneq tamaat ataatsimut isigalugu aningaasartuutitigut ileqqaartoqarsinnaasoq.
Suliassaqarfinni teknikkikkut pissutsit pissutigalugit kisermaassiffiusuni suliariumannittussarsiuussisoqarnerani unammillertunngortussat ilanngullugit aggersarneqartarnerisigut siammasinnerusumik unammilleqatigiittoqalernissaa Naalakkersuisut kissaatigaat. Taamaaliornikkut suliassat pioreersut akikinnerusumik suliarineqarsinnaanersut misilinneqarsinnaalissaaq.
Naalakkersuisut isumaqarput pingaartumik atuarfinnik, inissianik nukissamillu pilersuivinnik nutarterinerit pingaartinnearluinnartariaqartut. Nutarterisoqarnissaanik pisariaqartitsisoqarnera tunngavigalugu qanittoq isigalugu akinik appartitsinerit pinnagit nukissamik pilersuinerup pitsaasup salliutinneqarnissaa Naalakkersuisut pingaatippaat.
Aalisarnermut tunngatillugu Naalakkersuisut anguniarpaat pisuussutit ingerlaavartumik pissarsiaqarfigineqarnissaata pitsaanerpaat qularnaarneqarnissaa. Tamanna tunngavigalugu raajat pisarineqarsinnaasut amerlanerpaaffissaat ikilineqarput taamalu 1998-imi pisarineqarsinnaasut 1994-imi pisarineqarsinnaasut 85 %-erilerlugit.
Aalisakkat allat aalisarneqarsinnaanngorlugit aalisarnrup annertusineqarnissaanik ilungersuutit ingerlateqqinneqartariaqartutut Naalakkersuisut isigaat suliffissat amerlanerulersinneqarniassammata avammullu tunioraanermi isertitat amerlanerulerniassammata.
Aatsitassaqarneranik ikummatissiassaqarneranillu misissuiqqissaarnerit 1997-imi aatsaat taama amerlatigipput. Ataatsimut isigalugu 1995-imiit 1997-imut aatsitassaqarneranik ikummatissiassaqaneranillu misissueqqissaarnermut 325 mio. kr.-it atorneqarsimapput. Nuummi laboratorialiortoqarsimanera nutaartaavoq, tassalu aatsitassanik misiligutit Kalaallit Nunaanni misissorneqarsinnaalerput.
Aatsitassaqarneranik ikummatissiassaqarneranillu misissueqqissaarnerni suliffissaqartitsinerup annertusiartorsimanera aamma paasinarsivoq. Nalunaarusiami "Kalaallit Nunaanni inuussutissarsiutitigut ineriartortitsinermi anguniakkat periusissallu" oqaatigineqarpoq nunatsinni aatsitassaqarneranik misissueqqissaartoqarnerani suliassaqartitsineq marloriaatinngortoq naak tamanna suli annertugisassanngikkaluartoq.
Naalakkersuisut kissaatigaat aatsitassat ikummatissiassallu pillugit suliniutit ingerlatiinnarneqarnissaat tamatumani ingerlalluarneq attatiinnarumallugu.
Inuussutissarsiutit ineriartortinneqarnerini takornariaqarneq tunngavittut pingaarnerut Naalakkersuisut suli isigaat, ullumikkutulli atugassaqartoqartillugu ukioq 2005-imi ukiumut 60.000-inik takornariartoqartarnissaanik anguniagaq angujuminaatsussatut isumaqarfigineqarpoq. Atlantikoq qulaallugu timmisartuussinerup unammiffiulernerat aatsaat qnittukkut pilersup siunissami takornarianik amerlisitsinissaa ilimagineqarpoq.
Naalakkersuisut kissaatigaat takornariaqarnerup ineriartornera najukkanit aallaaveqarnerulissasoq. Taamaammat najukkani takornariartitsisartunik takornariartitseqatigiiffinnillu suleqateqarnerup annertusarneqarnissaa Naalakkersuisut kissaatigaat.
Ullumikkorpiaq inissat pisariaqartinneqarnerat tunngavigalugu Naalakkersuisut inissialiortiternerup annertusineqarnissaa anguniarpaat. Taamaattorli inissialiortiterneq Namminersornerullutik Oqartussat kisimik akisussaaffiginngilaat, inuiaqatigiilli tamarmiullutik akisussaaffigalugu.
Tamatumunnga atatillugu kommunit suliffeqarfiillu aningaasarissaartut inissialiortiternermut aningaasalersuiqataanerulernissaannik Naalakkersuisut soqutiginnipput.
Inissiani sanaartorneqartuni ineqarnerup akisuallaalinnginnissaa pingaaruteqarpoq. Paasineqarpoq kommunit ilaanni siusinnerusukkut inissialiortarneq atorlugu inissialiortoqarsinnaasimanngitsoq kvadratmeterimut akit qaffasippallaarmata. Taamaammat 1998-imut Aningaasanut Inatsimmi inissiat akikinnerusut, soorlu nammineerluni illuliassat kommuninilu nammineerluni illuliat salliutinneqarput.
Nunatsinni ilinniartitaanerup pitsaassutsimigut nunatsinni inuussutissarsiornikkut atortorissaarutitigullu naammassiniartariaqagaannut naleqquttuunissaa Naalakkersuisut pingaaruteqartutut isigaat. Inuusuttut amerlanerulernerat ilinniakkaminnillu unitsitsiinnartartut ikinnerulernerat ilinniartut amerlatsinnerannik kinguneqarpoq. Atuartut amerlissutaasa ilaat atuarfinni pioreersuni tiguneqarsinnaapput, ilaatigulli atuartitsiviit amerlineqarnissaat pisariaqarsinnaavoq.
Nuannaarutigalugu paasineqarpoq ilinniartut ilinniakkaminnik unitsitsiinnartartut ikileriarsimasut. Naalakkersuisut neriupput unitsitsiinnartartut suli ikiliartuinnassasut.
Paasissutissiisarnermi teknologiip ilinniartitaanermut ilanngunneqarnissaa Naalakkersuisut suli sulissutigissavaat. Tamatuma iliuutsitut nutaatut taaneqarsinnaavoq 1998-imi aningaasanik ukiuni pingasuni ungasissumit ilinniartitsinermik misileraanermut atugassanik immikkoortitsisoqarsimammat. Aamma 1998-imi ilinniartitaanermi qarasaasiatigut iliuusissanut 5 mio. kr.-inik immikkoortitsisoqarpoq.
Peqqinnissamut tunngasutigut patajaallisaajuartoqarnissaanik Naalakkersuisut kissaateqarput. Maanna suliassaq pingaarnerpaaq tassaalerpoq atorfiit akuersissutigineqartut inuttalerneqarnissaat. Kiissalu nunatsinni peqqinnissaqarfik nunani uatsinnut sanilliuttakkatsinni peqqinnissaqarfittut suli pitsaassuseqaqqullugu atortorissaarutit nappaatit suussusersiniarnerini katsorsarneqarnerinilu atorneqartartut ineriartornerat Naalakkersuisut malinnaavigissavaat, nalunaarasuaatit atorlugit ungasissumit nakorsiartitsisarnermut atortut atorneqarnerat ilanngullugu.
Naalakkersuisut isumaqarput aningaasat peqqinnissaqarfimmut atugassiissutigineqartut innuttaasut ataasiakkaat annerpaamik iluaqutissinniarlugit atorneqarnissaat pingaaruteqartoq. Tamanna tunngavigalugu Naalakkersuisut katersuunnermi matumani peqqinnissaqarfinni suliat assigiinngitsut nunap immikkoortuinut eqiterneqarnissaat pillugu siunnersuummik saqqummiussaqassapput. Anguniagaasorlu tassa peqqinnissaqarfiup naammassinnissinnaassusianik tamarmiusumik atorluaaneruneq.
Isumaginninnermut tunngasuni suliassat tassaapput Isumaginninnermik Iluarsaaqqinnissamut Ataatsimiititaliarsuup kaammattuutaasa malitseqartinnissaat. Tamatumunnga atatillugu meeqqanut tapiissutitigut pitsannguallatsitsisoqarpoq innarluutilinnullu tunngasutigut pitsannguallatsitsisoqarluni.
Utoqqalinersiat innarluutilinnullu pensionisiat 1991-imiilli iluarsiivigineqarsimannginnerat tunngavigalugu tunngaviusumik aningaasartaat 7,2 %-imik qaffanneqarnissaannik Naalakkersuisut 1998-imut Ilassutitut Aningaasaliissutinut Inatsisissakkut siullikkut qinnuteqarput pensionisiat akit allanngoriartornerannut nalinginnaasumut malinnaatinneqaqqullugit.
Naalakkersuisut assgiimmik akeqartitsinerup iluarsaateqqinneqarneranik sulianik aallartinneqarsimasunik ingerlatitseqqilersaarput. Naalakkersuisut 18. december 1997 suleqatigiissitaliorput assigiimmik akeqartitsinerup iluarsaateqqinneqarnissaanik ilusissamik saqqummiunneqareersumik itisilerisussamik, misissueqqissaartussamik uppernarsaasiortussamillu. Piffissami tassani assigiimmik akeqartitsinerup suliaqarfinnut ataasiakkaanut sunniutai itinerusumik naatsorsorneqarput. Naalakkersuisut isumaqarput assigiimmik akeqartitsinerup iluarsaateqqinneqarsinnaanerata isummerfigineqarnissaa aatsaat 1999-imi qinersisoqareerneratigut pissasoq.
Ukiuni aggersuni landskarsip aningaasaqarnerata patajaallisartuarneqarnissaata qularnaarneqarnissaa anguniagaassaaq. Tamanna tunngavigalugu nassuerutigineqartariaqarpoq ukiuni aggersuni tapiisarnernik aaqqissuussinerni tamani pitsannguallatsitsinissaq ajornassasoq, Naalakkersuisulli isumaqarluinnarput aningaasat taakkorpiaat atorlugit innuttaasut inuuniarnerminni atugaat suliffeqarfiillu suliaminnik amerliartortitsinissaminnut atugaat suli pitsanngorsarneqarsinnaasut.
Taama oqaaseqarlunga Aningaasaqarniarnikkut ingerlatsineq pillugu nassuiaat 1998 Inatsisartunut oqaluuserisassanngortippara.
Ruth Heilmann, Siumup oqaaseqartua:
Naalakkersuisut aningaasaqarnikkut ingerlatsineq
pillugu nassuiaateqarnerat qujassutigalugu Siumumit imatut
oqaaseqarfigissavarput.
Siullermik oqaatigissavarput Siumumi
pingaartilluinnaratsigu aningaasaqarnitta kikkunnit tamanit
malinnaavigineqartuarnissaa, taamaattumik taamatut akuttunngitsumik
aningaasaqarnitsigut Naalakkersuisut nassuiaateqartarnerat
iluarisimaarnarlunilu pissusissamisoortuuvoq.
Naalakkersuisut nassuiaateqarnerminni
ukiunut siuliinut naleqqiullugu annikitsuinnarmik tassa 0,6 %-iinnarmik
akileraarutitigut isertitat qaffariaateqarnerat oqaatigaat.
Inuutissarsiutitigut ineriartornerput
aalisarnikkut suli annertunerpaajusumik tunngaveqarnera mianernartuuneralu
nassuiaatigineqartumi erseqqarissumik paasinartumillu misigisaasoq
oqaatigineqarpoq.
Aalisarnerup avammut niuerutigineqarnera
iluatitsiffiunngitsumik aallarunneqartillugu nunatta aningaasaqarneranut
ingerlaannaq pitsaanngitsumik sunniuteqartarnera tamatta ilisimaarillualereerparput,
soorlu saarulliit peerunnerisigut annertunerusumik isumalluutaajunnaarnerisa
takutimmagu taamanikkut kommunit aalisarfiunerusuniittut ullumikkut
kingunerluuteqartitsisumik atugaqartut, naak aalisagaqarluarnerat nalaani
nunatsinnut aningaasarsiornikkut angisuumik iluaqusersuutaasumik Landskassemut
tapertaalluarsimagaluartuu.
Ullumikkut ajoraluartumik
iluaqusersuutaasumik Landskassemut tapertaalluarsimagaluartut ullumikkut
ajoraluartumik atugarliuutigilikkaminnik allaat kinguneqartitaasumik
atugaqarlernertik assut ilungersunartorsiutigalugu.
Tamanna tamatta oqartussaasut
nammaqataaffigaarput Inatsisartuni Naalakkersuisuni kommunini KANUKOKA-milu
akisussaaqataaffigalugulu qanoq iliuuseqartarnissatsinnut eqaamasassinneqarlutalu
iluarseeqataaniartussaagatta.
Taamaattumik massakkut killiffigisatsinni
Royal Greenland-ip aalisakkanik avammut niuernermigut
iluatsisimaarfiuallanngitsumik angusaqarnera aningaasaqarnitsigut qanoq
sunniuteqapallassinnaanera kingumut takutinneqarpoq.
Tassanilu nunarsuarmi aalisarnikkut Royal
Greenland-ip unammillerneqarnerata annertusineratigut akit aamma
appasinnerulersimanerannik angusaasut amigartooruteqarfiusumik allaat
kinguneqarsimasoq nassuiaatigineqarpoq.
Suli pitsaannginnerusumut apparnerunissaq
pinngitsoortinniarlugu Royal Greenland-ip silatusaartumik iliuuseqarluni
imminut akilersinnaasunngortitsisumik niuernikkut ingerlatsinialernera Siumumit
tapersersorluinnaripput oqaatigissavara.
Taassumunnga atasumik
suliffissaaleqinermut annikilleriaateqartinneqartussamik Naalakkersuisut
anguniagaqarnerat Siumumit pisariaqarluinnartutut isigalugu tamakkiisumik
tapersersorparput, iluatitsiffiulluarnissaalu kissaatigalugu.
Massakkummi aalisakkat, tassani raajat
aamma eqqarsaatigalugit pisassat ikiliartuaartinneqartuarneranni atorluaanerup
annertunerpaamik suliniutigineqarnissaa Siumumit kaammattuutigerusupparput,
atorluaaneq annerpaaq imatut paasillugu tunisanik suliareqqiinerit
tunisassiornikkut suli ullumikkornit annertunerungaartumik innuttaasunik
nunatsinnilu ingerlanneqartumik suliffissaqartitsilernissaat sakkortunerpaamik
anguniarneqartariaqarmat aamma qaleraleqarallartillugu pisareriikkanik
eqqaanaveersaarlunilu tunisassiornissaq taammalu aalisakkat allat saniatigut
pisarineqartartut iluaqutigineqartumik tunisassiarineqalernissaat isumagalugu
nunaqarfiit suliffissaaleqiffiusullu tamatumani Siumumit
eqqarsaatigineqarnissaat kaammattuutigaarput.
Taamatut isertitatigut suli
qularnartigisumik angusarisinnaasatsigut angusaqartartilluta Siumumiit
Naalakkersuisut aningaasartuutikillisaanermik siunertaqartumik iliuuseqarniartuarnerat
iluarisimaarparput, aningaasaqarnitsigullu qularnaatsumik inissinnissarput
ilimanaateqaleraluarpalluunnit taamatut aningaasartuutikillisaanerup
ingerlanneqarnissaanik naliliiuarnissap pisariaqartuunera Siumumiit
piumasarissavarput, kisiannilu eqqaamaqqullugu suliniutit isertitassanik
annertusaanermik kinguneqartumik siunertaqartut
eqqumaffiginiarneqartuaannarneqarnissaat Siumumit piumasarissallugu.
Kiisalu aningaasartuutikillisaanikkut suliniutaasut
Namminersortut pisortallu suliffiutaanni aamma angusaqaataalersumik
ingerlanneqartut nangittumik ingerlanneqartuarnissaat Siumumit
kaammattuutigeqqissavarput.
Namminersornerullutik
ingerlatseqatigiiffiutaasa pingaartumillu KNI-ip ilorraap tungaanut saattumik
angusaqarnera Siumumit pitsaasutut isumaqarfigaarput. Royal Arctic Line aamma
Telep sinneqartooruteqarnermik takutitaqarnerat eqqarsaatigalugu innuttaasut
angallannermut oqarasuaatinullu annertuumik akissaajaateqarnerisa
isumalluarnartumik akilersuutaasartut annikillisarneqarnissaannik Siumumit
takorloorinnippugut allaat soorlu imermut innaallagissalluunniit
akilersuutinut annikillisitsisinnaasumik Naalakkersuisut iliuuseqarnissaannik
kaammattorusullutigit.
Kisiannili soorunami suliffeqarfinni
namminermi nutarterinermut nutaaliornermilu ineriartortitsinerup
ingerlanneqartuarnissaa siuariarfiusumik siunertaqartut Siumumit aamma
eqqumaffigallaqqussavagut.
Aningaasat nalikilliartornerat
annertunngitsutut Naalakkersuisunit oqaatigineqartoq iluarisimaarnartuuvoq
aammalu pisiassat akii 0,9 %-imik qaffaateqarnerat annikitsutut
oqaatigineqarsinnaagaluaq taamaattoq inuuniarnikkut atukkavut
pitsanngorsartuarneqassappata aningaasat pisissutigineqartussat
annertusarneqartuartariaqarnerannik kinguneqarsinnaasutut isumaqarfigaarput.
Nalunngilarput kommuninit kommuninut
inuuniarnikkut atukkat assut assigiinngissitaarmata. Kommunit ilaat
akileraarutitigut qaffasitsitsisut allallu appasitsitsiniartuullutik.
Kommunit aningaasaqarnermikkut
ingerlatsillualeriartornerat oqaatigineqartoq Siumumit iluarisimaarparput,
tassuunakkut KANUKOKA-p Namminersornerusullu sulisunut politekerinullu
pikkorissartitsisarnerisa sunniuteqalernerat malunniuttoq assut Siumumit
iluarinartuutipparput, tassanilu mininneqartariaqarani nunaqarfiit
eqqarsaatigalugit ineriartortitsivimmik immikkut misiligaasoqarlunilu
suliniartoqarnera ilorraap tungaanut saattumik malunniuteqalernera neriulluarnartoqarluni.
Maannakkut mittarfiliornerit
naammassiartuaarnerat ilutigalugu angallannikkut pisariillisaanissaq
eqaallisaanissaq taamatullu angalanerup akikilliaartorneranik
kinguneqartinneqartumik Naalakkersuisut anguniagaqarnerat Siumumit pitsaasutut
isumaqarfigigipput oqaatigissavarput.
Takornariaqarnikkut annertunerpaamik
innuttaasut peqataatillugit aningaasarsiutitut pingaarutilittut isigalugu
sineriak tamaat eqqarsaatigalugu sutigut tamatigut angallannikkut eqaatsumik
pilersaarusiorneqarluartumillu Naalakkersuisut anguniagaqarnissaat matumuuna
Siumumit ilungersuutigeqqugipput ilanngullugu oqaatigissavarput.
Uanilu aamma oqaatigerusullugu inuit
ataasiakkaat peqatigiiffiit kommunini nunaqarfiinilu namminneq peqataanissaat
pingaartuummat, allat siulliunnissaat utaqqiinnarnagu nammineerlutik
takornariaqarnikkut ineriartortitsinissaminnik piumassuseqarlutik
takutitsinissaat pingaarutilerujussuartut Siumumit isumaqarfigilluinnarparput.
Inissialiortítsinermi akigititaasut
appariartortinneqartuarnissaat eqqarsaatigalugu Naalakkersuisut
aalajangersimasumik periuseqartumik akikinneqqusaatitsinermi kvadratmererimut
akigitinneqartumut killilersimaarinninnerat Siumumit iluarinarteqaarput,
tassami nalunnginnatsigu inissianik atuiumaartussanut akikinnerusumik
akilersuuteqarnissamik kinguneqartussamik taamaaliorneq siunertaasoq, aammalu
sapinngisamik aningaasat nunatsinni kaaviaartinneqarnissaannik anguniagaqartumik
iliuutsit Siumumit pissusissamisoortutut isigilluinnarpavut.
Siumumit aalajangiusimavarput INI A/S
peqatigalugu inissialiortitsernerup ingerlanneqarnissaa pisariaqartoq.
Selskabet namminersortullu inissianik amigaateqarnerup annikillisarneqarnissaanik
suliniaqataanissaat annertuumik maanna Siumumit aamma kaamattuutigissavarput.
Siumumit oqaatigisarparput atuartitaanikkut pitsaanerpaamik anguniagaqartoqartariaqartoq
siunissami amerlanerpaat ilinniarfinnut annguttarnissaat siunertaralugu.
Ilinniartoqarnitsigut ilinniartunillu
ingerlatsisut amerlasiartornerat Naalakkersuisunit oqaatigineqartoq Siumumit
isumalluarnartuutillugu isumaqarfigaarput nuannaarutigaarpullu Naalakkersuisunit
nalunaarutigineqarmat ilinniarnerminnik unitsitsiinnartut aamma ikiliartortut
taannalu malitsigalugu ilinniarfinnik amerlisaanissaq Naalakkersuisut
isumaqarfigimassuk Siumumt tapersersornarteqaarput, anguniagaqartumillu
iliuuseqartoqarnissaa kaammattuutigissallugu.
Meeqqat atuarfiata ingerlanneqarnerat
sakkortunerpaamik nukittorsarneqarnissaa Siumumit pisariaqaruinnartutut
isumaqarfigaarput. Suliassallu piaarnerpaamik aallartinneqarnissaa ilungersortumik
Naalakkersuisunut Siumumit piumasarissavarput.
Peqqinnissaqarnermut tunngasut Siumumit
ilungersunartutut isumaqarfigaavut, peqqissuunissarput nammineq annertuumik
akisussaaffigaarput. Taamaattumik nakorsassaaleqingaarnerup aqqani
annertunerpaamik pinaveersaartitsinikkut pitsaaliuinikkullu
qaammarsaaniartoqarlunilu paasisitsiniaanermik suliaqarnissat
sulissutigisariaqarpavut, taakkuami iluatsippata aamma nakorsaqarnitsigut
pisariaqartitsinerit annikillisussaammata.
Taamaakkaluartoq Naalakkersuisut Peqqinnissaqarfimmi
sulisussanik pissarsiniarlutik ilungersuuteqarnertik nangittumik
ingerlattuassagaat Siumumit kaammattuutigissavarput.
Aqqutissat suulluunniit tamaasa atorlugit
sulisussat naammattut pissarsiariniartariaqarput aammalu sulisussanik
ilinniartitsinerit annertusarlugillu pimoorunneqarnissaat pingaartingaarlugu
Siumumit suliniutigillaqquarput.
Isumaginninnermut tunngasut
eqqarsaatigalugit Isumaginninnermi Ataatsimiititaliarsuup suliaqarneranut
atatillugu annertuumik oqalliserineqarlutillu eqaallisaatissanik
piareersartoqareersimanera Naalakkersuisunut ingerlatinneqareersut Siumumit
pingaartippavut pingaarnersiuilluni piviusunngortitsillattaarnerit
aallartittut maannakkut utoqqalinersiat innarluutilillu pensionisiaat
nalimmassaataasumik 7,2 %-imik qaffaavigineqarnissaannik
aallartissutigineqartoq.
Siumumit naatsorsuutigaarput
assigiinngitsutigut pitsanngoriaataasunik ukiamut Inatsisartut
aataatsimiinnissaanut saqqummiisoqaqqinnissaanik manna
malitseqartinneqartussaammat qilanaarilluinnarparput.
Inuutissarsiutit Aalisarnerup
Takornariatitsinerup saniatigut Aatsitassarsiornikkut annertusiartuinnartumik
soqutigineqarluartumillu aallussinerit suliffissaqartitsinikkut marloriaammik
siuariarfiusimanera isumalluarnartutut Siumumit isumaqarfigaarput,
tassuunakkullu Naalakkersuisut pimoorussillutik suliniuteqartuarnerat
iluarisimaarnartuuvoq.
Isumaqarnarporlu suli paasisitsiniaaneq
ammasumik sulisussanillu pikkorissaanerittaaq peqataaffigilluinnarneqarnissaat
anguniarlugu iliuuseqarnerit annertusartariaqartut.
Naalakkersuisut assgiimmik
akeqartitsinerup iluarsaateqqinneqarnissaannik isumatuumik iliorlutik
suleqatigiissitaliamik misissuititsinerata eqqissilluni piffissaqarluarlunilu
piareersarneqarnissaanik sulisinneqarnissaannik oqariartuutaat Siumumit
isumaqataaffigaarput.
Naalakkersuisut suliffissanik
amerlanrusunik pilersitsinissamik isumaqarlutik aningaasanik atuinissamik
tassuunakkut pingaartitsinerunerat Siumumit tapersersornartuutipparput.
Innuttaasut amerlanerpaartaat suliffeqarnissaat
pingaartuuvoq suliffeqarneq tassaammat inummut peqinnarnerpaaq nammineq
inuuniarnermik akisussaaffeqarneq ingerlatsisinnaanerlu pigineqaraangat
inummut pilluarnarnerpaamik isumaqarluartumillu atugaqartitsillunilu tuttarmat
taamatut amerlanerpaat atugaqarnissaat Siumumit anguniarlugu
peqataaffigiuassavarput.
Taamatut Siumumit oqaaseqarluta
Naalakkersuisut qutsavigerusuppavut aningaasaqarnitta ingerlaneranik
nassuiaataannut imartuumut paasinartumullu.
Peter Ostermann, Atassutip oqaaseqartua:
Ukiutarlaqartut matuma siorna Atassut-miit
siunnersuutigaarput, aningaasaqarnikkut ingerlatsineq pillugu upernaakkut
ataatsimiinnermi Naalakkersuisut nassuiaammik saqqummiussaqartassasut. Atassut
marlunnik ersarissunik siunertaqarpoq.
Siullermik, Inatsisartut oqallinnermikkut
aningaasaqarneq pillugu politikkimut ingerlanneqartumut summiuteqarnissaat.
Aappassaanik, siunissami
inuutissarsiutitigut tunngaviusinnaasunik oqallittoqartassasoq,
aningaasaqarniarnerput ataasiinnarmik tunngaveqarani arlaqartunilli
tunngavissaqaqqullugu, taamaalilluni aningaasarsiornikkut
nammineernerulersinnaanerput isumannaattuuniassammat.
Ukiuni qaangiuttuni aningaasaqarnikkut
ingerlatsineq pillugu inimi maani pitsaasunik oqallilluartarsimavugut,
inuutissarsiutitigut piorsaanissanik tikkuussisarsimalluta, pingaartumillu
siunissami aningaasarsiornikkut ineriartortitsinissaq eqqarsaatigalugu.
Taama ingerlatsinermut Naalakkersuisut
inuutissarsiutinik ineriartortitsinissamut politikkiannut, naluneqanngittumik
pingasunik tunngaveqartumut Inatsisartunilu tamanit isumaqatigineqartumut
ilanngukkaanni, taava takuneqarsinnaavoq Maliinannguaq Markussen Mĝlgaard-ip
siunnersuutaani isumagineqartoq qangali ingerlareerluni
naammassineqareersimasoq.
Nunatta aningaasaqarnera pillugu
pisarnertut Naalakkersuisut nassuiaammik imartuumik saqqummiussaqarput,
aningaasaqarnitta qanoq issusianik ersarissumik saqqummiussuisumik.
Naalakkersuisut aningaasarsiornermut
politikkiat Atassut-miit tamakkiisumik taperseratsigu oqaatigissavarput taama
politikkeqarnerup aalajangiusimanissaanut iliuutsit assigiinngitsut aamma
isumaqatigigatsigik, taamaattumik nassuiaammi eqikkaanerit assigiinngitsut
isumaqatigisagut uteqqissanngilavut, oqaatigisariaqarluguli nassuiaammi ersarissumik
oqaatigineqarmat, patajaattumik aningaasaqarnerput aalajangiusimaneqassappat,
taava arlaatigut sukatsisariaqartugut.
Aningaasaqarnitta patajaattumik
inissisimanerata aalajangiusimanissaa Atassut-mi assut pingaartikkatsigu
makkuninnga Naalakkersuisunut inassuteqassaagut.
Aatsitassarsiornermi uuliasiornermi,
aalisarnermi, takornariartitsinermi, ilinniartitaanermi kiisalu
inissialiornermi suliniutit aalajangiusimaneqassapput, sanaartugassanilli
pilersaarutaasut allat sukannersumik nalilersoqqinneqassapput.
Sanaartugassanut pilersaarutit
ingerlatsinermi aningaasartuutit qaffannissaannik kinguneqartussat
nalilersoqqissaarneqassapput inguartinneqarsinnaaneri eqqarsaatigalugit.
Aningaasat nalilersuiqqinnermi
sipaarneqartut amerlanersaat iluarsagassanut inuutissarsiutinillu
siuarsaanissamut atorneqassapput.
Taama iliuuseqarnikkut suliffissat
amerlanerit pilersinneqassapput inuutissarsiutinillu nutaanik
pilersitsisinnaaneq aqqutissiuutissallugu.
Atassut-miit allanik makkuninnga aamma
oqaasissaqarpugut.
Inuussutissarsiutinik siuarsaaneq.
Nassuiaatikkut ersarissumik
oqaatigineqarpoq aningaasaqarnerput patajaattumik inissisimagaluartoq
naatsorsuutigisariaqaripput suliassat ikiliartulerumaartut
isertitakinnerulernitsinnik kinguneqartumik. Tamannalu paasereerlugu taava
aningaasaatitta sapinngisamik amerlanersaasa inuiaqatigiinni
kaaviiaartinneqarnerunissaat sulissutigisariaqarparput.
Tamanna tunngavigalugu Atassut-miit
inassutigissavarput erhvervstĝttimut amerlanerusunik aningaasaliissuteqartoqassasoq.
Inuutissarsiutinik tapiisarneq pillugu inatsisip allannguutissaanik
Naalakkersuisut ukiumut saqqummiussassaat Atassut-miit assut
isumalluarfigaarput, allannguutissatummi saqqummiunneqartussami sulifinnik
nunami pilersitsiniarneq ilaatinneqalersussaammat.
Taama aaqqiisoqarnissaanik Atassut-miit
ukiorpanni kissaateqartuarsimalluta qularinngilluinnarparput
aaqqiissuteqarnikkut namminersortut suliffinnik pilersitsisinnaanerannut
pitsaasumik periarfissinneqassasut, pingaartumik nunatsinni nioqqutissanik
nioqqutissiorfiit nioqqutissiorfiillu ineriikkanik tikiorartitsivallaarnermut
killiliisinnaasut eqqarsaatigalugit.
Aningaasat nalikilliartornerata
annikissusiata takutippaa aningaasartuutinik qaffattaaliuilluni Naalakkersuisut
politikkeqarnerat iluatsilluarsimasoq. Taama iluatsitsineq inuutissarsiutinut
amerlanerusunut sunniuteqartariaqarpoq.
Atassut-miit Naalakkersuisunut
inassutigissvarput aalisakkerivinnut allanullu kallerup inneranut imermullu
immikkut akeqartitsineq nioqqutissiorfinnut ineriikkanik
tikerartsitsivallaarnermut killiliiffiusunut aamma atortinneqarsinnaanera
misissoqqullugu, taama iliuuseqarneq suliffissaqartitsiniarnermut aamma
iluaqutaasussaammat.
Nunap immikkoortortaani mittarfiliat
immikkoortortani piorsaanermut qularnanngitsumik mikinngitsumik
sunniuteqarluartussaapput, Atassut-miillu ajuusaarutigeqqissavarput Aasianni
mittarfilaip tallineqarsinnaaneranik aalajangernissaq kingurtinneqarmat.
Qularinngilarpummi maannakkut tallineqarneratigut Avannaani takornariartitsineq
mikinngitsumik maannakkumiit iluaquserneqaleriissagaluartoq.
Iluarsaassinerit.
Atassut-ip Naalakkersuisut isumaqatigai
oqarmata atuarfinni, inissiani nukissiorfinnilu iluarsagassat annertoqisut
pingaarnersiuinermi sallerpaanut ilaatinneqassasut inassutigissallugulu,
misissorneqassasoq iluarsagassat ilaasa suliffissaqartitsiniarnermi
suliniutinut ilanngunneqarsinnaannginnersut.
Ikiorsiisarneq.
Isumaginninnermi Ataatsimiititaliarsuup
inassutigisai piviusunngortinniarlugit alloriarneq siullq pereerpoq, Suliap
ingerlaqqinnissaani Atassut-miit assut pingaartissavarput innuttaasut
pisortanit ikiorsertariaqalernerminni naligiissumik pineqassasut.
Assigiinngisitsineq ullumikkut ingerlanneqartoq piffissaq siulleq atorlugu
atorunnaarsittariaqarparput.
Atassut-mi aalajangiusimasarput tassa,
pisariaqartitsineq naapertorlugu ikiorserneqarsinnaaneq, tunngavissat allat
pinnagit.
Meeqqat inuusuttuaqqallu.
Inuussutissarsiorfissanik nutaanik
pilersitsiniarnitsinni ulloq manna tikillugu aningaasarpassuit atorsimavagut
ataasiinnavimmik tunngaveqarnerput
qimakkusullugu. Tamatuma kingunerisarpaa allanut naammattumik
aningaasaliinissaq ajornarsisarluni - pingaartumik meeqqat inuusuttuaqqallu
eqqarsaatigalugit.
Maannakkut arlalippassuarni meeqqanik
inuusuttuaqqanillu sullissinermi atugassarisaasut akuersaarneqarsinnaanngillat.
Naak kommunit ilaat ilungersoraluartut, aningaasalersueriaatsit allat
pisariaqarluinnalerput. Nutaanik allanillu eqqarsarluta meeqqat inuusuttuaqqallu
sunngiffimminni allatigullu sullinneqarnerat aqqutissiuuttariaqalerparput,
ulluinnarni inuunerat oqilisaaffigineqassappat.
Atassut-miit Naalakkersuisunut
inassutigissavarput peqqussummik nutaamik ukiamut saqqummiussinissaminni
tamanna saqqummiussivigeqqullugu, soorlu kommuunit, suliffeqarfiit ilinniarfiillu
assigiinngitsut aningaasaleeqatigiissinnaanerat eqqarsaatigalugu.
Josef Motzfeldt, Inuit Ataqatigiit oqaaseqartuat:
Nalunaarusiaq matumuuna Naalakkersuisunit
saqqummiunneqartoq, siusinnerusukkut saqqummiunneqartartunut
sanilliutissagutsigu siunnerfissatut tikkuussinertaqangaarani, pissutsinik
Inatsisartut aalajangerneri toqqammavigalugit ingerlanneqareersunik
annertunerpaatigut eqikkaaneruvoq.
Assersuutigalugu aningaasaqarnermut, inuutissarsiutinut,
ilinniartitaanernut, nunanik allanik niueqateqarnermut, angallaseriaatsinut
innuttaasullu atugarisaannut tunngasunik Inatsisartuni oqallittarnertigut,
pissutsit ullumikkut atuuttut soorunami Inatsisartuni tamatta sunniuteqaqataaffigaagut.
Minnerpaamillu Inuit Ataqatigiinni
ilimagalugu isumalluarfigerusussimagaluarparput tamakkuluunniit
aallaavigalugit, Naalakkersuisut oqareernitsitut siunissami anguniakkanik
nutaanik aammalu qiimaallannartunik nassuiaat manna imaqartissimassagaat.
Kisianni isumallualussinnartutut misigisimavugut. Nassuiaat
isumassaaleqinermik annertunerpaatigut ersersitsiinnarpoq.
Naak sukannersumik aningaasatigut
aqutsinermik taaneqartartoq aqqutigalugu, nunatta karsiata nammineq nunanut
allanut akiitsui piffissaliussat eqqorlugit ingerlanneqaraluartut, taamaattoq
tamatuma peqatigisaanik selskabit Namminersornerulluni Oqartussanit
pigineqartut nunanut allanut akiitsui malunnaatilimmik annertuseriarsimanerat
isiginngitsuusaagassanngilluinnarpoq. Selskabimmi pineqartut qanoq ilisukkut
ajutuussagaluarpata, tamakku pisussaaffiisa isumannarnissaat nunatta karsianit
isumagineqartussaapput.
Suliffissaaleqineq nunatta
aningaasaqarnerinnaanut annertuumik artukkiiginnanngilaq aammali innuttaasunut
eqqorneqartunut ataasiakkaanut ilaqutariinnullu annertuumik nanertuutaavoq.
Taamaattumik qanittukkut tamatuma
isumasioqatigiiffiunissaata iluaqutaasumik angusaqarfiunissaa
kissaatiginaqaaq.
Tamattami, pisortat, namminersortut
innuttaasutullu ataasiakkaatut tamatuma aaqqiiffiginissaa susassaqarfigigipput
Inuit Ataqatigiit isumaqarpugut.
Nunatsinnilu aningaasat
pisissutaasinnaanerisa iluatsisimaarfiunerat tamatuminnga iluaqutiginiartariaqarpoq.
Aqqutissat ilaattut tikkuarumasarput
tassaavoq, Nukissiorfiit Landskarsimut akilersugaasa malunnaateqartumik
appartinneqarujussuanngikkunik tamakkerlutik isumakkeerneqarsinnaanerata
nassatarisinnaasaasa misissorneqarnissaat.
Ukiumummi Nukissiorfiit Landskarsimut
taarsertagai taarsersukkallu erniaannut akiliutit miliuunerpassuugaluartut,
illuatungaatigut nalilerneqartariaqartoq tassaavoq, taarsersuinermut
akiliutissaagaluit ilaannaasaluunniit innaallagissap suliffeqarfinnut
pioreersunut nutaatullu aallartinniartunut akikillineranut
matusissutigineqarpata, suliffissat qanoq amerlatigisut tamatumuuna
pilersinneqarsinnaagaluarnersut. Tamatuma misissuiffiginissaata
suliffissaqartitsinermut isumaliornermi ilanngunneqarnissaa Inuit Ataqatigiit
kaammattuutigaat.
Ullumikkumummi ukiuni kingullerni
innaallagissap erngullu akiinik qaffatsaaliusimanerit qujanaraluaqalutik
taamaallaat sunniutigisimavaat, tamakkunatigut atortulersuutinik aserfallatsaaliinermut
aningaasanik atorfissaqartinneqaqisunik Nukissiorfiit
amikkisaartinneqarnerujussuat.
Taamaattumik Naalakkersuisut
siulittaasuata saqqummiinermini oqaasiisa ilaat iluaralugit maluginiarpavut,
ima oqarmat:
"Nutarterisoqarnissaanik
pisariaqartitsisoqarnera tunngavigalugu qanittoq isigalugu akinik
appartitsinerit pinnagit nukissamik pilersuinerup pitsaasup
salliutinneqarnissaa Naalakkersuisut pingaartippaat."
1997-imi ukiakkut ataatsimiinnermi Inuit
Ataqatigiit tamatumunnga oqariartuutaannut taama siunnerfeqalersimaneq
naaperiaanertut ajunngitsutut nalilerumavarput.
Naalakkersuisut ingerlatsinermi
pisariillisaanikkut innuttaasut inuuniarnermut aningaasartuutaannik
annikillileriarnermik taasaat tamakkiisumik tapersersornarpoq. Tassungali
atatillugu suluusalinnut mittarfiliat siulliit qaammatit sisamaannaat
qaangiuppata atulersussat eqqarsaatigalugit, taakkununnga
aningaasaliissutaasimasut 1 mia. kr.-nit sinneqartut eqqarsaatigalugit
silaannakkut angallannermi akiusut appartinneqarnissaat eqqarsaatigalugu
unammeqatigiinnikkut akinik appartitsinissaq Inatsisartuni
naatsorsuutigineqartoq isumalluarfigerusunnaraluaqaaq.
Unammillertussatullu aallartikkusuttunik
piukkoortoqaraluartoq, timmisartortitseqatigiittut aallartikkusukkaluartut
periarfissarsiuunneqanngippata tamanna piviusunngortussaanngitsutut
isikkoqarpoq.
Suluusalinnummi mittarfiliat angallannikkut
akikillissutaanissaannik Naalakkersuisut isumalluaraluartut aammalu
unammeqatigiinnermik anguniagaqarlutikoqalukkaluartut, tamakku manna tikillugu
oqaasiinnaanerusut malunnarpoq.
Imaappoq unammillernikkut akinik
apparsaasoqarsinnaanngippat, taava timmisartortitseqatigiinnut pioreersunut
ullumikkut tapiissutaasartut nangittumik atorneqaannarniarnerat Naalakkersuisut
akuersaarpasippaat. Uffa unammisinnaasumik pilersitsinermut aningaasat
ikinniararsuit akuersissutiginerisigut, kipisuitsumik tapiissuteqartarneq
kipitinneqanngikkuni annikillisarneqarsinnaagaluarpoq.
Takornariaqarnerup siuarsarneqarneranut
atatillugu Naalakkersuisut oqarput, innuttaasut akornanni takornariaqarnermut
ingerlatsisunik peqatigiiffinnillu suleqateqarusullutik. Tamanna soorunami
pisariaqarlunilu pissusissamisooraluartoq, takornariaqarnermut ingerlatsiviup,
Greenland Tourisme, piumassuseqarnerulluni ingerlatsiniartunik
suleqateqarlunilu tapersersuinerunissaa pingaaruteqarnerusutut
isumaqarfigaarput. Taamaattumik Naalakkersuisunut kaammattuutigissavarput GT-p
tamatuminnga paasinnilluni aallussinerulernissaa isumannaaqqullugu.
Ullumikkumummi ingerlatassatut
piukkunnarnerusut GT-p Inatsisartunit aningaasaliunneqartartut ilaatigut
atorlugit, takornariaqarnermik nammineerlutik ingerlatsiniartut ingiarlugit,
nammineq ingerlakkumanerusaraat pissusissamisuunngilaq.
Peqqinnissaqarfimmi aningaasarpassuit
pisariaqartinneqartut aammalumi aningaasaliunneqartartut, ullumikkornit
isumatusaarnerusumik atorneqarnissaat Naalakkersuisut isumannarniarlugit
aallussinerusariaqarput.
Tamatumanilu siunnerfeqarluartumik
uiguleriiaraluni ingerlatsisariaqarneq pisariaqarpoq. Ullumikkut ingerlatsineq
ullormiit ullormut iliuuseqarnertut peqinani. Peqqinnissaqarnermi taartaagallartunut
aningaasarparujussuit ukiumut atorneqartuarput. Taamalu aningaasarpassuit
nuntsinnit annissorneqaannaratik peqqinnissaqarfiup kiffartuussinerisa
ajornerulernerannik kinguneqarput, tamatumalu peqqinnissaqarfiup suliffissatut
ornigineerukkiartornera nassataraa.
Aalisarnerup killiffia eqqarsaatigalugu,
issittup imartaani nunat aalisartoqarfiit tuniniaanikkut
suleqatigiinnerusinnaanerata aalisagaarniarfinnut maaniittunut
kaassmattuutiginissaa siusinnerusukkut Naalakkersuisut kaammattuutigisariigarput
eqqaasitsissutigissavarput. Tamatumuuna akit ajunnginnerusut aalisartunullu
iluaqutaasussat anguneqarsinnaanerat isumaqarfigigatsigu.
Piffissami kingullermi
aningaasarsiornikkut inuussutissarsiutitigullu siuarsaaniarneq eqqartorneqaraangata
assigiimmik akeqartitsinermut tunngasut aporfituatut, taamalu
suliniutaasinnaagaluartunut tamanut kinguarsaavittut naggasiunneqaannartarput.
Soorlu aamma taama pisoqarsimasoq inunnik isumaginninnermut apeqqutini
Ataatsimiitsitaliarsuup suliaqareernera taalutsiullugu.
Ukiuni aggersuni aningaasanut
inatsisiliarineqartartussani innuttaasuni atukkatigut assigiinngissutsip suli
angivallaarujussuartup aaqqiiviginissaa siunnerfinnut pingaarnerpaanut
ilaasariaqarpoq.
Tamannalu ilaatigut anguneqarsinnaavoq
aaqqissuussinerit pisariaqartitsineq najoqqutaralugu unneqqarinnerusumik
aaqqiiviginerisigut, imaappoq aningaasat amerlanerusut atugassanngortinngikkaluarlugit.
Aningaasalli innuttaasut toqqaannartumik
atugarisaannut pitsanngorsaatissatut atorfissaqartinneqartut annertoqimmata,
allaffissornikkut ingerlatsinerup pisariillisaaffiginissaa aningaasanik
sipaarfiusinnaasut ilagilluinnarmassuk arajutsinaveersaarneqartariaqarpoq,
soorlu aalajangiutereerlugu ukiut tallimat ingerlanerini 10-15 %-imik
annikillilerinissaq anguniakkanut siunnerfigineqartoq.
Aningaasaqarnittali aaqqiiviginissaa
nunatsinniinnaq aaqqissuussinitsigut iluarsisinnaanngilarput. Nunani allani
aalajangersakkat aamma nunatsinni ingerlatsiniarnitsinnnut annertuumik
sunniuteqarput. Taamaammat nunanik allanik suleqateqarneq
isumaqatigiissuteqartarnerillu pisariaqartuassapput.
Nunatta nunanut allanut tuniniartagaasa
nunatsinnullu eqqussukkatta suli miliaartit affaat sinnerlugit equnganerat
aningaasaqarnermut annertuumik sunniuteqarpoq. Taamaattumik
aalisagaannaanngitsunik avammut tunisassiarisinnaasatsinnik suliniutit
siuarsarneqarnissaat aqqutissat ilagaat
pisariaqarluinnartoq. Puisit neqaannik tunisassiulersinnaaneq, tunisassiulernissaq
isumalluartigeqaarput. Angallatit
issittumi atugassatut naleqqussakkat periartissaapput nutaat suli
annertunerusumik aallunneqanngitsut.
Illua'tungaatigut suut tamavimmik
piareereerlugit nunatsinnut eqqunneqartarnerat isiginiagassatta ilagaat. Atortussat
maani piginngisagut atorfissaqartitavulli amerlaqaat, nunatsinni inaagassanngorlugit
eqqussorneqarsinnaasut. Tamannami nunanik allanik niueqateqarnikkut annaasakkatsinnut
annikillisaataaginnarani aamma suliffissaqartitsiniarmut iluaqutaasussaavoq.
Aningaasarsiornikkut ingerlariaqqinnissami siunissaq
ungasinnerusoq eqqarsaatigalugu
atuartitaanermi ilinniartitaanermilu pissutsit pisariaqavissumik
iluarsaaqqiffiunissaat tuliinnguuttariaqartoq Inuit Ataqatigut isumaqarpugut.
Nunap piinik aallussinermik tamakku tunulliusimaarneqarnerat tamaanga
killeqartariaqarpoq. Tassa meeqqat atuarfiinik sumiginnaaneq tamaanga
killeqartariaqarpoq. Tamatumuuna nunanit allanit sulisussarsiortarneq
tamakkivillugu pisariaarutsinngikkaluarlugu, aamma tamakkunatigut imminut
pilersornerulernissaq aningaasat amerlanerusut nunatsinni
kaaviiaartinneqariarnissaannik kinguneqartussaammat.
Taamatut nalunaarusiaq,
nalinginnamerusunik atuutereersunillu eqqartuiffiunerummat, naatsumik
oqaaseqarfigaarput.
Bjarne Kreutzmann, Akulliit Partiiat:
Aallaqqaammut ajuusaarutigalugu paasivara,
Aningaasaqarniarnikkut Ingerlatsineq Pillugu Nassuiaat assut imaasattoq
isumassarsiartaqangaarnanilu. Eqikkaaneq, taanna kisimi politikkikkut
oqariartuuteqarpoq, kisianni ajoraluartumik eqikkaaneq nassuiaatip nammineq
imaanut takussutissaanngilaq. Nassuiaat pissanganaateqanngilaq,
avaangunaannangajalluni. Taamaakkaluartoq nassuiaammi ataasiakkaat
assigiinngitsut uniffigisimavakka oqaaseqarfigerusullugillu.
Aningaasanut inatsit
naapertuuttunngorsartariaqarpoq, nunatta nunanut allanut akiitsuinut
naleqqutunngorlugu. Tassa Namminersornerullutik Oqartussaanngitsut nunattali.
Taanna tabel 1‑imut, tassa aktieselskabit aamma Namminersornerullutik
Oqartussat akiitsuinut tamarmiusunut, taava takuneqarsinnaavoq ilaatigut
aningaasaliissutit pillugit inatsisinut, ilassutitut aningaasaliissutit
pillugit inatsisinut assigiinngitsunut minnerunngitsumillu Landskarsip
naatsorsuutaanut atatillugu ukiuni amerlasuuni ujartortuarsimasara. Nunatta
aningaasaqarnera peqqissuunngilaq. Akiitsut amerliartorput! Taamaattoq
qutsatigaara nalunaarsuut
arlaleriarlunga toqqaannartumik qinnutigisarsimasara maanna
saqqummiunneqarmat.
Inuiaqatigiit aningaasaqarniarnikkut
peqqissusiat nalilissagaanni naammanngilaq IST‑p (ingerlatsineq,
sanaartorneq taarsigassarsiarititallu) inernera kisiat isiginiassallugu,
tassami Royal Greenland akiliisinnaajunnaarluni unittuussagaluarpat kiap
akiligassat akilertussaavai? Akiliisussat tassaapput piginnittut, tassalu
Namminersomerullutik Oqartussat. Aamma toqqaannartumik imaluunniit
"qularnaveeqqusiinermut assingusut" atorlugit
qularnaveeqqusiisarsimanerit pissutigalugit selskabip aqqanut
ilanngunneqarsimasoq A/S assiaqutsiullugu toqqorterniarsinnaanngilagut.
Nassuiaammi allassimavoq, akissarsiat
kisitsisunngorlugu qaffattarnerat Danmarkimi qaffasissusermit
appasinnerutikkaanni, taava tamanna unammillersinnaanermut iluaqutaassasoq.
Danmarkimi akissarsiat nunatsinni akissarsianit qaffasinnerummata, taava
regnestokkera naapertorlugu tamanna isumaqassaaq, Danmarkimut naleqqiullugu
nunatsinni akissarsiat piviusumik qaffariarnerunissaannut periarfissiisoqartoq,
tamannalu unammillersinnaanermut nukillaarsaataassaaq. Soorlu oqarsinnaavugut
Danmarkimi akissarsiat tiimimut 80‑isut nunatsinnilu tiimimut 70‑iullutik.
Taava Danmarkimi qaffariarneqassaaq 10 kruuninik nunatsinnili taamaallaat 9,75
kruunimik. Tamatuma naligaa Danmarkimi 12,5%‑imik qaffariarneq nunatsinnili
qaffariarneq 13,9%‑iussalluni.
Aamma sunaava "akit tutsuiginartut
tunngavigalugit akikillisaanerit"? (qallunaatuuani allassimasoq
najoqqutaralugu "kostĉgte
prislettelser") Oqariartaaseq taanna nassuiaqqugaluarpara.
Peqqinnissaqarfimmi aningaasaliissutit
eqqortinniarnerisa ajornartorsiutaaneqarnera isumaqatigaara, tamannalu
arlaleriaqalunga uparuartarsimavara. Aamma arlaleriaqalunga ujartortarsimavara
peqqinnissaqarfimmi pisariaqartitsineq eqqortoq piviusorlu, taamaalilluta
inuiaqatigiit aningaasaanik atuinerup ataatsimoortumik tulleriinnilersornissaa
inersuarmi maani oqallisigisinnaaniassagatsigu, peqqinnissaqarfiup
ukiumoortumik aningaasaliissutisiani oktoberimi nu-nguppagit ukiakkut
ataatsimiinnitsinni pinngitsaalineqartutut misigisimalluta aalajangiisariaqarnerput
pinngitsoorniarlugu.
Taamaattumik nuannaajallannarpoq aamma
nassuiaammi allassimammat "Peqqinnissaqarfiup akisussaaffia pisussaaffiilu
nalileqqinneqassapput kigutigissaaneq ilanngullugu, tamatumani
aallaavigineqassallutik pisariillisaaneq, aningaasartuutikillisaaneq
sullissinerullu pitsanngorsarnissaa." Taava aperisariaqarpugut: Sooq
tamanna siusinnerusukkut pisimanngila?
Nassuiaammi erseqqissumik allassimammat
aalisarneq ajunngisaartumik oqaatigissagaanni siuariartorunnaarsimasoq, aamma
takornariaqarnermi anguniakkatut aalajangiussat imaannaan-ngeqisut suli
utaqqerusaarneqartut, taava imaassimassaaq sukat pingajuat ‑ tassa
aatsitassarsiorneq ‑ taanna pisuussutinik suliffissanillu
pissarsiffigisussaassagipput. Sukat sisamaannik taasaq pillugu piffissami kingullermi
nalunaarusiaasartut eqqaassagaanni isumaqarnaraluarpoq nassuiaat tassunga
tunngasumik imaqarnerussasoq, immaqaluunniimmi uanga takkuitsuuginnarsimavara.
Nuannaarutigalugu paasivara kommunit
aningaasaqarniarnerat pitsaanerulersimasoq. Taamaattoq tabel 4‑mi
amigaatigaara agguaqatigiissitsinerup naatsorsornerani kommunit ataasiakkaat
qanoq oqimaalutarneqarsimanerat.
Sanaartukkanut aningaasaliissutaagallartut
ingerlatsinermi ataavartumik aningaasartuutinut nuunneqarnerat siornatigut
mianersoqqussutigisimavara. Maanna ajornartorsiut taanna procentilerneqarsimavoq.
Isertitat amerliartorunnaarnissaat naatsorsuutigineqarpat taavalu ingerlatsinermut
aningaasartuutit ukiumut 2% missiliorlugit amerleriartassallutik, taava
iluarnavianngilaq. Akulliit Partiianniit arlaleriaqaluta isummanik
isumassarsianillu aninagasarsiornermut pitsan-ngoriaataasinnaasunik
saqqummiussisarsimavugut, pingaartumik aningaasartuutinut aamma ikiuutitut
aningaasaliissutaasartunut ikilisaataasinnaasunik, kissalu allaffissornermi
suleriaatsit allannguutissaannik. Ajoraluartumilli tamakku aatsaat ukiut
arlallit qaangiukkaangata paasineqartarput taavalu piviusunngortinneqarlutik.
Sanaartukkanut aningaasaliissutissat
ingerlatsinermut aningaasaliissutinngortittarniannguarlugit naassuiaammi
oqaatigineqarmat inissaaleqineq ajornartorsiutaasoq annertooq, taava tamanna
imminut akerlilernertut isigaara. Ajornartorsiut ikiorsiiviginiarlugu
naalakkersuisut qanoq iliuuseqarniarnerat amigaataalluinnarpoq. Immaqa
tamatumani aatsitassarsiorneq isumalluutigineqarami.
Aamma maluginiarpara imminut nersualaarneq
assut atoqqajaaneqartoq. Assartornermi akit annertunmik
oqilisaavigineqarsimapput ‑ kisiannimi isumaqarnertut
annertussuseqarsimaneramik tamatumunngalu aninagasartuutit qanoq annertutigisimappat?
Tassunga tunngatillugu Landskarsi sunik aningaasaliissuteqarsimava?
Inuiaqatigiit aningaasarsiorneranni qanoq annertutigisumik
erniaqartitsisoqarsimava?
Innaallagissamut akip appariaatimininngua
9 oori iluaqutaangaarnavianngilaq, aamma aningaasaliissutissanik qanoq
annertutigisunik pisariaqartitsillutik Nukissiorfiit oqaatigimmassuk, taava
akip apparialaarnera taanna pinngitsuuinnarsimagaanni imaluunniit
inuussutissarsiornermut atorneqarsimasuuppata immaqa pitsaaneruinnassagaluarpoq
‑ tassa Royal Greenlandimut tunineqartuartumut atornagit allanulli
atorlugit taava suliffissanik amerlanerusunik immaqa
pilersitsisinnaassagaluarput. Kisianni tassa aamma taanna sukat sisamaat.
Kisianni Tele‑mi akit
nersualaartariaqarput, taakku appariarsimapput tamarmik malugisinnaasaannik
(tassa telefoneqaraanni).
Pisortat suliassaataannut akiliutit
paasiuminartuusariaqarnerat illua‑tungaatigut eqqartortuarlugu ‑
tamatumunnga ilaatigut ajoqutaasarluni imminut tapiiffigeqattaarneq ‑
illua‑tungaatigut oqaatigineqarpoq KNI‑mi piginneqatigiiffiit
allanngortiterneqarnerannut patsisaasoq tassaasoq KNI Pilersuisoq A/S‑imut
suliassiissutinut inuiaqatigiinnut tunngassutilinnut tapiissutit tatineqarnerisa
apparsarnissaat. Taanna paasinanngilaq. Imminut atanngilaq, imminut
akerlilerpoq.
Ajuusaarnarpoq akit qaffasippallaarnerat
pissutigalugu illuliortiternissamik pilersaarutit kinguartittariaqarsimammata,
tassami inissaaleqineqaqimmat, aamma kommuneni ataasiakkaani sanaartornerup
suliffissaqarniarnikkut isumaginnininnikkullu sunniutigisartagai
pissutigalugit. Misissorneqarsimanerluni kvadratmeterimut akit taama
qaffasitsiginerannut suna pissutaanersoq?
Taama oqaaseqarlunga nassuiaat
tusaatissatut tiguara.
Anthon Frederiksen, Kattusseqatigiit:
Aningaasaqarnikkut ingerlatsineq pillugu nassuiaat soqutigalugu Kattusseqatiinniit misissorsimavara.
Nalunaarusiamili matumani ilaatigut
allattorsimasut makkuusut anquniarneqarnissat siunniunneqarsimasut
isumaqatigilluinnarpakka, tassalu: aningaasartuutit annikillisarnissaat,
suliffissaqartitsineq, suliffissanillu
pilersitsiortorneq,
atuarfiit ilinniartitaanerillu
piorsaaffiginissaat, nunaqarfiit
ineriartortittuarnissaat, peqqinnissaq pinaveersaartitsinerlu il.il.
‑ qulequttat soqutiginartut.
Isumaqatigiissutigineqarsimasut immikkut
tamaasa
taajunngikkaluarlugit,
ingerlatsineq pillugu nassuiaaniartoqarmat soorunami
Kattusseqatiit sinnerlugit qulequttat
ataasiakkaat oqaaseqarfigissuakka.
Aningaasartuutinik annikillisaanissamut
tunngatillugu oqaatigisariaqarpoq; naalakkersuisoqatigiit pisortaqarfinni
allaffissornikkut
aningaasartuutikillisaanissaq
annerusumik iliuuseqarfigisimanngikkaat, tassami
Namminersornerullutik Oqartussat allaffeqarfiini allaffissornikkut
aningaasartuutit annikillisinneqarsimanngimmata.
Taamatuttaaq suliffissaqartitsiniarneq
annerusumik angusaqarfigineqarsimanngitsoq oqaatigisariaqarpoq ‑
tassami suliffissaqanngitsut
taamaallaat 0,3 %‑imik 1997‑imiit 1998‑imut naleqqiullugu ikilerialaarsimammata.
Atuarfiit, ilinniartitsisussaqarniarneq il.il.
hurrartuutissaanngil-luinnarput.
Nunaqarfiit
ineriartortinneqarnerat sutigut tamatigut ajorseriarsimasutut
amerlanertigut
oqaatigisariqarpoq.
Peqqinnissaqarfimmi pissutsit
ajorluinnarput, taamaattumik naalakkersuisoqatigiit
isumaqatigiissutigisimasaat,
immaqa ilorraap tungaanut
aaqqiiniarnermik siunertaqaraluartoq
Kattusseqatiginniit
Naalakkersuisoqatigiinnut
nersualaarutigissallugu
pissutissaqarsorinngilanga.
Tassami Nunatta nunanut allanut akiitsui
pissusissaq eqqorlugu akilersorneqaraluartut, Ingerlatseqatigiiffiit
Namminersornerullutik oqartussanit pigineqartut akiitsui amerligaluttuinnarput,
atuarfeqarfinni,
Peqqinnissaqarfinni,
Nukissiorfinni allanilu pissutsit pitsaasutut oqaatigineqarsinnaanngilluinnarput.
Aammalu innuttaasut akornanni,
pingaartumik aningaasarsiakinnerusut, ‑ politikkerinut, Namminersornerullutik
Oqartussat suliffeqarfiutaanni atorfillit ilaannut il. il. akissarsiaqartitaanikkut imminnut ungasinnerulersimanerat
malunnarsisimavoq. Tassami malunnartumik nunatta ilaani pisuut
pisuujunerulersimapput, pissakinnerusullu pissakinnerulersimallutik. Naatsumik
oqaatigalugu atungarissaarnerusut, atungarliortullu imminnut
ungasinnerulersimapput.
Akissarsiat, nioqqutissallu akiisa
qaffakkiartunnginnissaanik siunertaqarneq, aningaasat naleerukkiartunnginnissaannut pakkersimaarinnikkaluartoq, taamaattoq nakorsassaaleqineq, juumuussaaleqineq, kigutit
nakorsassaaleqineq, ilinniartitsisussaaleqinerillu eqqarsaatigalugit ‑
peqqinnissaqarfimmi kiffartuussinerit,
ilinniartitaanerillu suli ajornerusumik kingunipiloqarsinnaanerat
Kattusseqatigiinniit aarleqqutigisariqartutut oqaatigisariaqarsoraara.
Tassami koruunip naleerukkiartunnginnissaa
arlalitsigut iluaqusiigaluartoq, kisianni avataaniik sulisussanik
tikisitsisarnermut pinngitsoorani sunniuteqarnera aamma maannakkut
malunniutilersoq arlalitsigut takussutissaqalereerpoq, taamaattumik
unaannannguaq isigalugu iliuuseqartarnerit aamma illuatungeqartarmata
ilisimasariaqarput.
Qularnanngitsumik Nunatsinni tamatta kissaatigaarput ajornanngippat piffissami qaninnerpaami atorfiit
tikisitanik inuttaqartinneqartut, imaluunniit innuttassaaleqissunneqartut,
kalaallinik nunaqavissunik inuttalersorneqarnissaat.
Kisiannili erseqqissumik tamanna
nassuerutigisariaqarpoq; suli tamanna ajornarmat, aammalu inuit
ilinniarluarsimasut, ukiunilu makkunani pinngitsorsinnaanngikkallakkavut tikisissagutsigit
pitsaasunik neqeroorfigineqartariaqarnerat aamma ilisimasariaqarmat, tassami
kialluunniit sulisup akissarsiamigut appariarnissani kissaatiginngisaannarmagu.
Kattusseqatigiinniit pingaartillugu
naalakkersuisunut aammaarluta kaammattuutigerusupparput, nunatsinni
ilinniartitsisoqarnikkut pissutsit ajorsilluinnarsimasut suli
pimoorunnnerullugit sulissutigeqqullugit. Tassami ilinniartitaanikkut
ingerlatsineq inuussutissarsiornikkut ingerlatsinerup annerpaamik
sunniuteqalernissaanut qitiulluinnarmat.
Isumaginninnermik Iluarsaaqqinnissamut
Ataatsimiititaliarsuup sulinerata malitseqartinneqarluni utoqqarnut,
innarluutilinnut sulisinnaajunnaarnersiutilinnullu aammalu allanut
ikiortariaqartunut pitsaanerusumik aaqqiisoqarnissaata naalakkersuisuniit
kinguarsarneqartuarnera Kattusseqatigiinniit akuersaarneqarsinnaanngitsutut
nalilerparput.
Inissaqarniarneq
tassaaginnartariaqanngilaq pisortat kisimiillutik qaqugorsuarmut isumagiuagassaat.
Aningaasanik ileqqaarsinnaanerup meeqqat aalartiffigalugit naalakkersuinikkut
iliuuseqarfigineqartariaqartoq Kattusseqatigiinniit aamma ilanngullugu
kaammattuutigissavarput.
Peqqinnissaqarfiup ullumikkut ingerlaasia
ajorluinnarpoq, suliartinniarlutik utaqqisut ikiliartortinneqanngillat,
Peqqinnissaqarfimmi sulisussanik amigaateqarneq naalakkersuinikkut - peqqinnissaqarmmi
sulisunut atugassarititaasullu aaqqiiviginiarnerisigut iluarsiniartariaqartut
Kattusseqatigiinniit aamma kaammattuutigissavarput.
Aningaasaqarnikkut ingerlatsineq
tutsuiginartorlu - tassalu siullermik Nunatsinni aningaasaqassutsip
naapertuuttumik ingasattajaanngitsumillu
- inuiaqatigiit nammassinnaasaat aallaavigalugit ingerlatsineq
anguniartariaqartoq aamma Kattusseqatigiinniit eqqaasitsissutigerusupparput.
Innuttaasunik naammaginartumik sutigut tamatigut kiffartuussineq, siuliini
taaneqartut aallaavigalugit Kattusseqatigiinniit aamma
kaammattuutigerusupparput.
Naggataatigullu Nunatsinni sutigut
tamatigut pilianik, atortussanik soorlu sanaartornermi SIKU-blok-ikkutut ittunik,
allanillu ilaatigut avataaniik tikisitsiinnannginnissaq, aammalu annerusumik
suliffissaqaritsinissaq eqqarsaatigalugu atuinissaq atorluaanerlu annerusumik
aallunneqartariaqartoq Kattusseqatgiiinniit ilanngullugu
kaammatuutigissavarput. Matumani aamma kalaallinik annerusumik sulisoqarnikkut
atorluaaneq eqqarsaatigalugit.
Taamatut oqaaseqarlunga aningaasaqarnikkut
ingerlatsineq pillugu annikitsunnguamik isummersorfigilaarpara.
Jonathan Motzfeldt, Naalakkersuisut Siulittaasuat:
Partiit oqaaseqartuinut qujallunga partiit
qutsavigerusutakka qutsavigissavakka. Aamma qujaffigerusunngisakka
qujaffiginianngilakka. Siumup oqaaseqartuata oqaatigisai nuannaarutigalugit -
Ruth Heilmann-ip - ilaatigut patsisissaqarluinnartumik Naalakkersuisunut
kaammattuutigisai maannaminngaanniit oqaaseqarfigisinnaavakka.
Oqaaseqarfigerusutakkalu taasaqarfigilaarusuppakka. Tassa ilaatigut
suliffeqarfissuit maaniittut Namminersornerullutik Oqartussanit pigineqartut
eqqarsaatigalugit, siunnersuutigineqarmat Ruth Heilmann tungaaninngaanniit
Royal Arctic Line-p aamma Tele-p sinneqartoorutaat - takutitaqarnerat
eqqarsaatigalugit - innuttaasunit amerlanerusunit taava kingunissalimmik
iliuusaasinnaasunik tassani Naalakkersuisut iliuuseqarniaqqullugit. Soorlu
ilaatigut EDB atorlugu avammut attaveqaatit atorlugit immitsinnut ilisimateqatigiittarnitta
annertusarneqarnissaat. Tamakkua eqqarsaatigalugit siusinnerusukkulli oqaatigereerpara
Tele Greenland-ip kapacitet-it atunngisarujussui oqaloqatigiissutiginiarivut,
Naalakkersuisuninngaanniillu iliuuseqarfiginiarlugit, tamatumani innuttaasut
imminnut ilisimateqatigiittarnerisa saniatigut aamma peqqinnissaqarnikkut
atuinerni, maannamut aaqqiinermit naammaginarnerusumik aaqqiiniarfiginissaat
siunnerfigalugu. Apeqqutit taamaattut nuannaarutigalugu suliareqqitassatut
kajuminnarput Siumup oqaaseqartuata nalunaarutigisai.
Aamma Siumuminngaanniit taaneqartoq
ilumoorpoq manna tikillugu sivisoorujussuarmik - aamma uagut ilaatigut
pisooqataalluta - sanaartugassarparujussuarnik amerlaqisunik pisarnitsigut,
taava sanaartornermut aamma akit kvadratmiiterimut akitsortoorujussuartakkavut
najoqqutaralugit, tassuunakkut noqisimaarnerusumik, piviusorsiornerusumik
aamma sulisussallu aamma naammassinnissinnaasut qissimittarnerisigut suliassat
ingerlanniassagivut pingaaruteqarpoq.
Aamma Peqqinnissaqarneq pillugu
oqaaserisaasuni isumaqarpunga pinaveersaartitsinikkut allatigullu
napparsimanaveersaarnermut suliassanut tunngasut, Biibilimi allassimasoq
ilaatigut ilumoortortalerujussuuvoq allassimammat: peqqissut nakorsamik
pisariaqanngillat, napparsimasut kisimik. Tassa nakorsat peqqinnissamillu
isumassuisut napparsimasunut taakkunalu peqqissinissaanut atugassanik
suliaqartussaapput. Taamaattumik qularnanngilaq pinaveersaartitsinerit
napparsimanaveersaarnermullu tunngasut nalinginnaasumik inuit
qaammarsagaanerannut tunniullugit, aammalu Peqqinnissaqarfimmut
piffissaajaataatinnagit aaqqiiniarnissat eqqarsaatigineqarsinnaapput. Nakorsat
peqqissaasullu suliassarpiaat napparsimasup piaartumik ajorunnaarnissaa,
innanngavik tigullugu angerlarsinnaanera anguneqarsinnaasoq sapinngisamik
suliarineqassammat. Taamaattumillu tamakku qaammarsaaniarnermut tunngasut,
pinaveersaartitsinermut napparsimanaveersaarnisamullu tunngasutigut.
Ulluinnarni inuit qaammarsaanikkut suliffeqarfigineqarnerannut ilanngullugit
aamma sakkortusarneqarsinnaanerat eqqarsaatigisassatut tassuuna oqaatigaara.
Taanna oqaatigineqartarmat pinaveersaartitsinikkut sulinerit aamma annertusarneqarnissaat
isumagineqassasoq. Tamakkua ikioqatigiiffigineqarsinnaapput, allat
tamakkuninnga suliaqavissussat ulluinnarnilu naammassinninniartussat
suleqatigalugit.
Aamma Siumut oqaluttuata taasaa aamma
oqaaseqarfiginngitsoornianngilara assigiimmik akeqartitsinermik
iluarsaasseqqinnissamut tunngasoq. Qujassutigalugu aamma Siumup tassani
tapersersortuarmagu taanna assigiimmik akeqartitsinerup allaanerusumik,
nammaqatigiinnermik allaanerusumik ilusilerlugu, aningaasarsiornikkullu
eqaallisaanermut ilanngullugu. Kommunillu ineriartorfissamikkut
ineriartorfissaqartut taamaalillugit aamma periarfissillugit. Isumaqarpunga
taamatut iliuuseqarniarnerit mannakkut oqaloqatigiinnissanut tulliuttunut
qiimmassaataapput, aamma kajuminnarnerusumik. Tassalu taanna oqaatigaara
ukiamut saqqummiussassat kingornatigut, ilimagigakku aatsaat Inatsisartut
nutaat kingornatigut tamanna suliassaq naammassineqarumaartoq.
Atassutip oqaaseqartua aamma
qutsaviginiarpara isumaqarama Peter Ostermann-ip oqaaseqarnermini aamma
assigiinngitsut, Naalakkersuisut iliuuseriniarsimasaat, manna tikillugu
erseqqissumik taperserai. Aammalu tassunga sanilliullugu aamma
inuussutissarsiutitigut siuarsaanerup, isumaqarpunga aamma taanna maannakkut
oqaatigineqartoq, inuussutissarsiutitigut siuarsaanerup annertunerusumik -
aalisarnerinnaanngitsumik - aammali kisianni nunami suliffissanik
aallartitsiniarnermut periarfissaanik noqqaasarnerit, taanna ukiaru
inatsisissap nutaap suliarineqarneratigut periarfissat ammaanniarneqassaaq.
Aalisarnerinnaanngitsumut sammisumik nunamili aamma suliffissaqartitsiniarnermut
suliffinnillu pilersitsiniarnermi annertunerusumik iliuuseqarsinnaaneq.
Kisianni taanna nalunngilarput oqallinneq siornatigut atoreernikuugipput,
ilaatigut bankit pilersinniagaalermata. Taava bankinit attartorsinnaanerit
nammineq innersuuttarsimagatsigit. Kisiannili maannakkut paasivarput aamma
tamakkunani suliassat suli annertunerusumik pisortaninngaanniit
ikiuunniarfigisinnaagivut.
Aamma Peter Ostermann-ip oqaaserisamini, oqaaserisai
inuusuttunut tunngasut aammalu taakkunani oqilisaassinissanut atugarisaasigut,
oqaatigineqartut siunissami aaqqissuussinissamut aamma innersuussutaasut
maluginiarsimavakka, isumaqatigalugillu.
Taama nuannersumik tapersersorneqarnera
oqaatigereerlugu Inuit Ataqatigiinnut oqaatigissavara, Inuit Ataqatigiit
saqqummiussanni nutaarsiassaqartitsinatik oqaaseqarnerat aamma tullii taakkua
partiit mikisut allat, oqaaserisaat maluginiarpakka naammagivallaarnagu maani
nassuiaat oqaaseqarfigigaat, taamaammat aamma Inuit Ataqatigiit. Kisianni
nuannaarutigaara Inuit Ataqatigiit oqaatigisaat taanna, 1997-imut
Naalakkersuisunit oqariartuupput, nuannersumik tigummagu, tassa Nukissiorfiit
eqqarsaatigalugit akinik appartitsinerit pinnagit, kisiannili pilersuinerup
pitsaasup isumannaarneqarnissaanut tunngavilimmik iliuuseqarneq. Tassuunakkut
Inuit Ataqatigiit oqaaseqarnerat assorujussuaq nuannaarutigaara, isumaqarama
naaperiarnerusoq annertooq. Ilaatigut suut akikillilerinerinnakkut isumaqaratta
pitsaasunik angusaqarfigissallugit. Kisiannili aamma inuit kissaatigaat
nukissiorfitik aalajaatsumik, pitsaasumik ajutoortaratillu ingerlassasut.
Taamaattumillu akilerusullugu aamma taanna aningaasartuut tassaniittoq. Taamaattumik
tassuunakkut aamma qularnaatsumik ingerlatsisoqarnissaanik angusaqarnissaq
pingaartorujussuuvoq. Isumaqarpunga tassani Inuit Ataqatigiit oqaatigisaat
nuannersuusoq.
Kiisalu aamma Peqqinnissaqarfimmi
maannakkut pissusiusut partiit tamarmik oqaaseqarfigigaluaraat Inuit Ataqatigiit
oqaaseqarfigisaanni aamma ugguunakkut ilumoornerarsinnaavara ullormiit ullormut
iliornertut ilillugu Peqqinnissaqarfik aaqqinniarneqarnera taanna, taama
pissuseqarnera qaangertariaqartutut aamma uanga isumaqarfigaara. Isumaqarpunga
maannakkut Inatsisartut allanit siulliullutik ilisimagaat qanoq
sulisussarsiorniarneq ajornartigisoq, nakorsanik aammalu napparsimasunik
paarsisunik. Allaat suliassat tassaniittut Nunat Avannarliillu suleqatigalugit
pissarsiniarnerit ingerlanneqarsimammata. Danmark-imilu attaveqarfigineqarsinnaasut
allat tamarmik. Kisiannili oqaatigissavara maannakkut Peqqinnissaqarfimmut
tunngatillugu aamma Peqqinnissaqarfimmut Naalakkersuisup
saaffiginnissutigereersimammagu, Peqqinnissaqarfimmi sulisut pillugit
aaqqissuussunissami Naalakkersuisut iliuuseqarnissaat maannakkut suliniutini
Naalakkersuisunut tapersersorneqarluni ingerlanneqarnissaanik
naatsorsuutigisani saqqummiunneqarnissaa ulluni tulliuttuni aamma
ingerlakkumaarini, qaammatinilu qaninnerpaani.
Taava aamma Inuit Ataqatigiit oqaatigisaat
una alla, taalaassavara - immikkut taasaqarfiginnginnakkumi, taama
oqaatigalugu - tassa nunanik allanik suleqateqarnitsinni pingaartumik aamma
nunat qanigisavut suleqatigineranni maannakkut North West Territory-mit
tikeraartivut, aammallu siusinnerusukkut >89-ikkunninngaanniit suleqatiginissaannut
periarfissiortarpugut. Nunavut namminersornerulissaaq aappaagu
apriilimi taakkua aamma qanittumik
suleqatigilernissaat aamma periarfissaqasssaq.
Maannakkut kulturikkut suleqatigiinnerit
annertuut ingerlanniarneqareermata, Inuit Ataqatigiit ujartugaat
suleqatigiinnerit, niuernikkut aamma allanik suleqateqarnerit,
illuliornertigullu neqeroorutit maannakkut saqqummiunneqartut. Taakku maannamut
Naalakkersuisut tungaanninngaanniit annertuunerusumik itinerusumillu
misissuiffigereernerisigut tusarfigineqarnissaat maani inimi
naatsorsuutigissavarput. Taamaattumik taanna pisariaqartutut isigalugu
uterfigeqqinneqarnissaa kissaatigissavarput.
Aamma ataatsimut partiit tungaannut iluarsaassanissamik
allanillu toqqaanerit eqqarsaatigalugit
oqaatigissavara, ilumoorluinnarpoq inuit namminneq pigisamittut
akisussaaffigalugit illut - boligstĝtte-miillu aamma pigisatik - taanna
taamaalilluni inunnut nammineq pigisassanngortinnerisigut, taassumalu
saniatigut aningaasaateqarfimmik - iluarsaassinissamut aningaasaateqarfiusinnaasumik
- eqqarsaatit piviusunngornissaat qanilliartormat. Ukiarulu Finanslov-imut
qularinngilara taamatut aningaasaateqarfimmik pilersitsisinnaaneq
qanilliartortoq. Illullu nammineq iluarsagassat, inuit namminneq pigisamittut
pigalugit ingerlatissagaat naatsorsuutigissavarput. Taamaalilluta aamma
pisortaninngaanniit iluarsagassat - atuarfiit, napparsimmaviit inissiarsuillu
maannamut pigineqartut -piffissaqarfigineqarneri aamma annertusisinnaammata.
Akulliit Partiiat annertunerusumik
oqaaseqarfiginianngilara, aallaanngilaq suna nipi ilivermut ilisaareernikoq,
uumilasoq, Partiip taassuma ullumikkut oqariartuutigigaa. Oqariartuut nutaarsiassaqarfiginngilara,
allaanngivippoq qanga KGH-p nalaani ingerlatsinnerit, GTO-kkullu nalaani
ingerlatsinerit atuukkallarmata, uparuartuineq. Taamanikkullu
tusartuartagarput: nutaarsiassaqarani uumilalluni oqariartuut. Taamaattumik
ajoraluartumik taanna nutaarsiassaqarfiginngilara ullumikkut.
Kattusseqatigiinnut tunngatillugu
oqaatigissavara aamma oqariartuutissarpassuaqanngikkaluarluni, pisarnermisut,
kisianni ataaseq oqariartuutaa aamma maluginiarsimavara ullumikkut oqarnermini,
tassa Kattusseqatigiit nakorsassaaleqineq, juumuussaaleqineq kigutillu
nakorsassaaleqineq pillugit aarleqquteqarnermigut oqariartuutaa, isumaqarama
partiit ullumikkut oqariartuutaasa saniatigut aamma oqariartuutaasoq, immikkut
isigisariaqartoq imaalillugu: Kattusseqatigiit eqqarsartaasiat malissagaanni -
aamma taamaaliorusuppugut - iluarsiivissallu taakkua aamma
Peqqininnissaqarfimmiittut iluarsiniassagutsigit. Nalunanngilluinnaqqissaarpoq
aamma tassani aningaasartuuterparujussuit atorneqartut -
naammagittaalliutiginngikkaluarlugit - kisianni pitsaanerusumik
aaqqissuussinissamik oqariartuutaasut.
Kattusseqatigiit taama oqariartuuteqarpata
aningaasarpassuit maannakkut pigineqartut, pitsaanerusumik inuttassassat
tungaannut aaqqissuussinermut atorniarsigit. Taanna isumaqatigaara aammalu paasivara Kattusseqatigiinneersoq aamma
sikisartoq, taamatut paasinninnera kukkusimannginnama. Isumaqarpunga maannakkut
aningaasarparujussuit ilumut 700 mill peqqinnissamut ukiumut atorneqartarput.
Taakkualu iluani sulisutta aalaakkaanerusumik piginissaannut aammalu
sivisunerusumik ataavartumillu kiffartortutut maanni inissinneqarnissaannut
periarfissat partiit tamarmik maannakkut oqaatigisaat, aamma inimi maani,
taakku tunngavigalugit isumaqarpunga maannakkut suliniarnivut malugisinnaavavut
tunilequtaqarluta iliuusissat - aningaasat taakkua iluanni - nammineq patajaallisaanermut
aamma sivisunerusumik sulisoqarnissanut. Taamaallilluni aamma sulisut
pikkorissarnissaannut atorneqarsinnaaneri.
Napparsimasoq piaartumik
peqqissisinnaanersoq, peqqissinissaanullu ikiorlugu, taavalu makkua aamma
pinaveersaartitsinerit allallu, nakorsaqarfimmut kipiluttunartumik
suliassersuutiginngikkaluarlugit, allat qaammarsaanermik suliaqartut allallu
aamma tamakkua tungaatigut ussassaarinermut suliaqartut suliarisinnaammatigit.
Taavalu napparsimasunut kiffartorneq annerusumik taanna aallaavigalugu
suliassaq aaqqinniarlugu.
Daniel Skifte, Aningaasaqarnermut Ineqarnermullu
Naalakkersuisoq:
Uangattaaq qaqilaartariaqarsorivunga tassa
siulittaasutta Jonathan Motzfeldt-ip oqaasii uteqqissanngilakka, kisiannili
ataasiakkaat ilamerni ilaatigut taaneqanngitsut taallatsiaannassallugit.
Siullermik oqaatigissavara
annertunerusumik Siumup Atassutillu oqaaseqartui oqaaseqarfigissannginnakkit.
Oqariartuut una erseqqissoq tassa nassuiaat quppernernik 47-nik quppernilik
atuarluarsimagaat erseqqimmat aammalu nunatta pissarititai periarfissarititaalu
aallaavigalugit politikkeqartariaqarneq paasilluarmassuk. Tamanna isumaqarpunga
tulluusimanarlunilu erseqqissoq, nunamut tummarlutillusooq oqariartuuteqartut
erseqqimmat.
Illuatungaatigut taakkua partiit
taariarlugit aallaqqaatiginiarpara Akulliit Partiiat. Akulliit Partiiat
ilaaatigut isumassaaleqisoqarpalulluni avaanngunartumik oqariartuuteqarmat - tassa
taakku oqaatsit atormagit. Isumaqarpunga naalakkersuisooqatigiit erseqqissumik
oqariartuutigigaat taannalu oqaasissara Akulliit Partiiannut aammalu Inuit
Ataqatigiinnut tunngatissavara.
Aningaasarsiornitta ullumikkut killiffia
allanik isumalluuteqassanngikkutta, taava qulleq aappaluttoq ikinneqarpoq.
Qulleq aappaluttoq ikinneqarpoq soorlulusooq tikeq napparneqartoq,
taamaattumillu kissaaterpassuit imaluunniit assigiinngitsorpassuit
qaffakaatittuassagaanni taava akisussaassuseqanngitsumik politikkeqarluni asuli
isumalluarsaarinermik kinguneqartussaammat. Taamaattumik Akulliit Partiiata
ilaatigut apeqqutai marluk akissuteqarfigilaarniarpakka. Soorlu
oqaaseqarnermini mikisuarsuit annertuumik pulaffigimmagit, ilaatigut
apeqqutigalugit issuaaneq: AAkit
tutsuiginartut tunngavigalugit akikillisaarinerit@. Taakkua apeqquserummatigit, tutsuiginartut
oqaatsimik >eqqortumik= taarserneqarpat immaqa Akulliit Partiiata
tamanna paasinerussagaluarpaa.
Aappassaanik oqaatigissavara apeqqutigimmagu
toqqartumik inissialiortiternermi kvadratmiiterimut akit taama
qaffasitsiginerat paasiniarneqarsimanersoq
- imaluunniit suna peqqutaanersoq - tassani innersuussutigissavara uanga
Naalakkersuisoqarfiga paasiniaaffigineqarsinnaavoq, matorput ammavoq aamma
taanna kingullermik ataatsimiikkatta innersuussutigaara. Aamma
innersuussutigeqqissavara, paasiniaasoqarsinnaavoq oqaluttuarisinnaavara, aap,
misissorneqarput, aamma tassani misissuinerup allagartaliornera
assersuutigalugu Finansudvalg-imut tunniunneqarnikuuvoq. Taamaattumik taanna
apeqqutit taamatut akerusuppara. Ilaatigut Kattusseqatigiit apeqqutaat
imaluunniit qaffatsitaat aamma allaffissornermut tunngammat allaffissornermut
annikillisaasoqannginnerarmagu, tassani ugguuna ilumoorpoq aningaasat
allaffissornermut atukkavut, taakkua amerliartorput, aap. Kisianni taakkua
peqqutaat eqqaasitsissutigeqqittariaqassavara. Asersuutit pingasut missaanni
taamaallaat taassavakka.
Allaffissornermut aningaasat atukkat
annikillisaavigineqarsimannginnerat eqqunngilaq, kisianni una eqqortuuvoq.
Nutaat pilersitat puigukkat ilaat soorlu: Nunamut piginnittussaanermut
allaffimmik pilersitsivugut, taannalu maannakkut tassa tigusussanngorparput.
Siorna akuersaarpugut jagtbetjentit taamanna miliuuninik nalillit aamma
eqqutissagigut aamma sprogskole aamma pilersissimavarput. Taamaalilluta
ingerlatsinermut atukkat allaffissornerinnarmut tunganngikkaluartut, tamakkua
pilersinnerannut peqqutaasut ilagaat, aningaasat atukkat amerlanerannut. Aamma
partiit amerlanerit eqqartugaat oqaaseqarfigilaassavara naggataatigut. Aningaasat
naleerukkiartornerat eqqartorneqartarmat, ilumoorpoq qanorluunniit
anguniarneqartigissagaluarpat Kalaallit Nunaat Kalaallit Nunaannilu akit
naleerukkiartornerata unerisimaartinneqarnera silarsuarmut allamut
naleqqiullugu annikinnerpaammat tamanna nuannaarutigissavarput.
Assersuutigallugu Kalaallit Nunaanni ukioq manna apriilimi 0,9 %-iuvoq,
Danmark-imik 1,5 %-iulluni, USA-mi Japanimilu - silarsuarmi niiverfiunerpaani
3,5 %-iminngaannit 4 %-imut annertussuseqarluni.
Tassalu taakkua 0,1-iinnarmilluunniit
nikingagaluarpata unammillersinnaanerup annertusiartornera tassaavoq
assorussuaq pingaaruteqartoq uagut nunatsinni pingaartumik aningaasassaaleqiffiusumi.
Aammalu pingaartumik akileraarutinik qaffassaaginnannginnermi. Taamaattumik
isumaqarpunga aamma taanna tulluusimaarutit ilagisariaqaraat. Qujanaq.
Mikael Petersen, Isumaginninnermut, Suliffeqarnermut Pisortalllu
Suliffeqarfiutaannut Naalakkersuisoq:
Pinngitsoorusunngilanga oqaaseqarfigissallugit
immikkoortut ataasiakkaannguit. Naalakkersuisut siulittaasuata oqaasii
uteqqissanngilakka, kisianni inunnik isumaginninnerup tungaatigut
Naalakkersuisut ingerlatsinerat politikkiallu pillugu oqaatsit aninneqartut
oqaaseqarfigilaarusuppakka. Minnerunngitsumik Kattusseqatigiinninngaanniik
aninneqartut pillugit. Kattusseqatigiinniik oqaaseqartup oqaatigaa
Naalakkersuisunngooq kinguarsartuaraat inunnik isumaginninnermi
ataatsimiititaliarsuup - iluarsaaqqinnissaq pillugu ataatsimiititaliarsuup -
suliaa. Ila taanna oqaaseq ukioq manna qasseriarlugu tusalernerpara. Aamma
Naalakkesuisuni tusalernerparput. Ilaatigut Inuit Ataqatigiinniit oqaaseq
taanna ersarissamik oqaatigineqartarpoq.
Erseqqissaatigilaarlara, ila immaqa
qulissaannik. Malinnaasitsiniarluni suliat Inunnik Isumaginninnikkut
iluarsaaqqinnermi, aammalu suliat ingerlanneqarnissaat pillugu Inatsisartut
akuerisaat naapertorlugu Naalakkersuisut sulimmata. Taanna oqaaseq immaqa
naammakkaluarpoq. Inatsisartut akuerisaat pilersaarutit naapertorlugit suliat
ingerlappavut. Aammalu taakkua partiit tamarmik nalunngilaat, Inatsisartunut
ilaasortat tamarmik nalunngilaat. Inunnut qinersisartunut qanorsuaq
tusaqqusaartoqarsinnaavoq uparuartuerusaarluni, Ataamaaliunngillat, taamaaliunngillat@. Taamaaliorpugut, Naalakkersuisut
sulisitaqaqaagut, suliavut annertoqaat malinnaatitsiniarluta malinnaallutalu
sulinitsinni. Utoqqalinersiutaannaat eqqarsaatigigutsigit tassani
aaqqiissutissatigut kingunerisassai, naatsorsoqqissaagassat, allarpassuit
kommunit suleqatigalugit, kattuffiit suleqatigalugit, isumannaagassat
annertoorujussuit suliarineqaqqaartussaapput.
Inunnik isumaginninnermi
iluarsaaqqinnermut ataatsimiitialiarsuup suliaa, aap annertuvoq, kisianni
tassaavoq qanoq iliuusissatigut kissaatigisanik imalik ersarissunik.
Aaqqissuusseqqinneq Naalakkersuisuni Inatsisartunilu ippoq, taannalu
suliassaalluni. Tassalu taanna aallartipparput, aatsaat iluarsaaqqinneq
aallartippoq, aallarteruttorpoq. Taamaattumik kisitassat, nalilersugassat,
isumannaagassat allarpassuillu tassani tamarmi qulaajarneqaqqaartussaapput.
Isumaqarpunga aallartilluartugut tassami massakkumut innarluutillit pillugit
Naalakkersuisut nalunaarutaat marluusimasut ataatsimoortillugit ukiorli
naammassillugit atuutsilereerpavut, pisariillisaanertalimmik innarluutillit
atugarisaannik pitsanngoriartitsisumik, paasiuminarnerulersitsisumik aammalu
sulisut eqqarsaatigalugit ersarinnerusumik tunngavissiilluta.
Taakkua saniatigut massakkut
utoqqalinersiutit aaqqiivigineqassapput ukiamullu - erseqqissaqqilaarlara -
utoqqalinersiutit aammalu utoqqalinersisartut utoqqaallu isumagineqarnerat
pillugu inatsisit qulaajarneqassapput nutaamillu siunnersuiffigineqarlutik.
Aammalu massakkut inunnik
isumaginninnikkut ingerlatsineq - aqutsineq - aammalu naammagittaalliorsinnaaneq
pillugu peqqussut siullermeerlugu maani suliarineqassaaq, uani ataatsimiinnermi,
ataatsimiinneq manna naatinnagu. Taamaattumik suliat annertuut ingerlasut
ilisimarigaluarlugit susoqanngitsumik oqalunneq taanna tunngavissaqanngilaq.
Bjarne Kreutzmann, Akulliit Partiiat:
Qujanaq. Naalakkersuisut siulittaasuata
Naalakkersuisullu akissutaannut qujanarujorujorujussuaq.
Naatsorsuutigisimavara sakkortulaartumik tigusimassagaat, kisianni taama
annersimarpasitsigisumik tigusinissaat naatsorsuutigisimanngikkaluarakku. Uani
siullermik Jonathan Motzfeldt-ip oqaasii sammilaalaassavakka. Tassani
oqaatigineqarpoq sammisassat sammigikka qangarsuarli ilisaareernikut. Tassani
erseqqissumik oqartoqanngilaq suna qangarsuarli ilisaareersoq sammineriga,
kisiannili taaneqarpoq KNI. Ilumoorpoq taanna KNI nammineq aamma
assigiinngitsutigut oqaaseqarfigisarsimagiga, qangarsuarli, taanna
qaangiutereerpoq. Kisianni KNI uani sammigakku pissutaaginnarpoq ingerlatsineq
pillugu nassuiaammi taarusutakka KNI-mut tunngasut imatut oqaatigigakkit:
Pisortat suliassaataannut akiliutit paasiuminartuusariaqarnerat illuatungaatigut
eqqartortuarlugu, tamatumunnga ilaatigut ajoqutaasarluni imminut
tapiiffigeqattaarneq. Illuatungaatigut oqaatigineqarpoq KNI-mik - tassa uani
oqaatigineqarpoq KNI - uanga siulliullunga KNI saqqummiutinngilara.
Oqaatigineqarpoq KNI-mi piginneqatigiiffiit allanngortiterneqarneranut
patsisaasoq tassaasoq KNI PILERSUISOQ A/S-imut suliassiissutinut
inuaqatigiinnut tunngassutilinnut tapiissutit tatineqarnerisa apparsarnissaat.
Tassani taanna uanga oqaatigiinnarpara taanna paasinanngitsoq, uannut.
Imaassinnaavoq allanut paasinartoq, kisianni uannut paasinanngimmat tassani
eqqaavara, taavara, pinngitsoornanga taasariaqarsorigakku. Tassani
isumaqanngilanga qangarsuarli ilisaareersut eqqartorlugit uani. Uani
oqaluuserisatsinni taaneqartut nalornisakka oqaaseqarfigaakka. Taannalu KNI
toqqartumik taaneqarmat taammatut oqaaseqarfigeqqilaaginnarpara.
Daniel Skifte-minngaanniit
oqaatigineqarpoq mikisuarsuit oqaluuserigikka, assersuutitullu taallugu akit
tutsuiginartut. Oqaluuserisassamik annerpaamik taasaqassaguma tassa akit
tutsuiginartut. Niuernermi ingerlatsinermi allanilu siumut ingerlaniarnermi
akit tutsuiginartut, tassa akit aamma tutsuiginartut,
aalajangiisuulluinnaqqissaarput. Taamaattumik mikisuarsunnik taaneqarsinnaanngillat.
Siunissatsinni aalajangiisuupput akit tutsuiginartut.
Aamma paasissutissat uani eqqartukkakka, tassa
apeqqutigigakku sooq una kvadratmiiterimut akit taama qaffasitsiginerannut,
suna pissutaanersoq. Tassunga akissummut aamma qujavunga. Kisianni tassa
oqaatigineqarpoq Finansudvalg-imut tunniunneqarsimasut. Tassa ajunngilaq,
kisianni aamma siornatigut eqqartornikuuarput - aamma taasarnikuuara -
paasissutissat soqutiginartut Inatsisartunut maani qitiusumik Inatsisartunut
aqutsisuusunut paasissutissat pisariaqartut, pisariaqartinneqarsorinartullu,
udvalginuinnaq pinnagit, Inatsisartunut tamanut paasissutigineqartariaqarput.
Taakku taamatut naatsumik
oqaaseqarfigiinnarpakka, erseqqissarumaannarlugu maani oqaluuserisassarinngisatsinnik
qangarsuarli ilisaareersunik oqaluuseqannginnama. Uani nassuiaammi
oqaaseqarfigisassinnut tunngasunik oqaaseqarama.
Jonathan Motzfeldt, Naalakkersuisut Siulittaasuat:
Oqaatigereerpara qujassutigalugit
oqaaserineqartut aamma paasivara Maliinannguaq Markussen-ip apeqquteqaataa
aamma, imaluunniit saqqummiiussaa aamma tikeqqinneqarpat qularnanngilaq apeqqutit
aamma aatsaannguaq qimanneqartut utaqqimaarneqarmata, paasivara
uterfigineqartutut aamma iserfigineqarumaartoq, ataatsimiinneq aallarteqqippat.
Kisianni oqaaserineqartut qujassutigaakka aammalu una saqqummiussarput
Akulliit Partiiata taagaluaraa nassuiaat sumik imaani takussutissaqanngilaq,
pissanganaateqanngilaq, avaanngunaannangajalluni. Sooruna taamatut ippat
oqaaserisaq annertunerusumik aamma piffissaajaatissaanngilaq uannit. Kisiannili
isumaqarama Naalakkersuisut saqqummiutaat annertungaatsiaqisoq aammalu taama
partiinit allanit oqaaseqarfigineqartoq, taamatut erseqqissumik
patsisissaqartumik, tunngavissaqartumillu Nalunaarut aallaavigalugu. Taakkua
qujassutigaakka aammalu neriullunga aamma tullia saqqummiunneqarnerani
Maliinannguup saqqummiussinerani aamma saqqummiussassat allat erseqqinnerusumik
aamma oqaaseqarfigineqarumaartut.
Maliinannguaq M. Mĝlgaard, Inuit Ataqatigiit:
Uaniuna naalakkersuisup saqqummiussaanut
tunngatillugu assut ussernartorsiorama oqaaseqalaarniartunga. Ilaatigut
oqaatigineqarmat kommunit aningaasaqarnerat ingerlalluarnerulersimasoq,
tassungalu tunngatillugu erseqqissaatigerusullugu aamma KANUKOKA´p
ataatsimeersuarnerani erseqqissumik KANUKOKA´p siulittaasuata oqaatigisaa
isumaqartoqassanngimmat kommunit tamarmik ingerlalluartut, tassa erseqqissumik
oqaatigineqarpoq kommunit ataasiakkaaginnaat iluanaaruteqarlutik aammalu
sinneqartooruteqarlutik ingerlasut.
Illuatungaaniilli aamma kommunit
arlaqaqisut ingerlalluanngitsut. Isumaqarpunga inuiaqatigiinni ingerlatsinermi
aamma aningaasarsiornikkut ingerlatsinermi tamakkua eqqumaffigineqartariaqartut
aammalu annertunerusumik nalimmassaanissat taakku tungaatigut
ingerlanneqartariaqartut eqiterinerujussuup kingunerisai ullumikkut
ajornartorsiuterpassuarnik nassataqartartut pinngitsoorniarlugit soorlu aamma
taakkartorneqartut inissaaleqinerit, suliffissaaleqinerit, meeqqanik
paaqqinnittarfisaaleqinerit, atuarfinni tattoqisaannerit, tamakkorpassuit
eqqarsaatigalugit.
Taava pinngitsoorusunngilanga
ajuusarutigigakku peqqinissamut ataatsimiititaliap isumaliutissiissutaa
ajoraluartumik kinguartinneqarmat, tassanimi oqariartuutigineqartut
imaannaanngeqimmata aammalu peqqinnissamut ataatsimiititaliami ulluni
kingullerni peqqinissaqarfimmi, tassa Sanami sulisunik pilattaasartunik aammalu
niviarsiat sygeplejerskit atugaannik tusarniaanitsinni aammalu
oqaloqateqartarnitsigut paasisagut imaannaanngeqimmata, tassa allaat, aap
Anthon Frederiksen ilumoorpoq oqarami utaqqisut amerligaluttuinnartut taanna
ilumoorpoq, kisianni aamma illuatungaanik peqqinnissaqarfimmi
sulisunnguakkuluit ilungersorput suliarisassatik suliarivaat.
Kisianni illuatungaani suliassatik
suliariuaraluaraat paasivarput aamma illuatungaatigut nutaarpassuit
takkussuuttartut suliarineqartussat taavalu utaqqisut amerligaluttuinnarlutik
angummannissarlu assut ilungersunarluni, tassanilu annertuumik
amigaatigineqartoq pilaasarfimmik peqalernissaq taakani atortussat imaluunniit
pilaasarfik ataasiinnaq amigarpoq taamatullu suliarinninniartut imminnut
utaqqisaqattaallutik pisarsimapput, taamaattumik tamakkua utaqqisut atsaat
taama Kalaallit Nunatsinni amerlatigilersimammata aamma oqaatigineqarpoq,
ikiliartunngillat amerligaluttuinnarput allaat 2.800 pallikkiartorpaat.
Taamaattumik tamakkua isiginngitsuusaaginnarneqarsinnaanngillat aammalu
taassuma saniatigut peqqissaasut anersaaruluutaat tassa aamma uani
ersersinneqartoq taartaagallartunik atorfinitsitsinarnerit taakkua
iluaqutaaginnaratik aamma annertuumik akornutaasut saqqummiunneqarmat.
Tassami peqqissaasut ulluanni
saqqummiussisoqarnerani oqaatigineqarpoq taamatut taartaagallartunut
aningaasaliissutaasartut ataatsimoorullugit kisissagaanni peqqissaasumut
ataatsimut ukiumut 50.000 koruuninik akissarsianut qaffaataasinnaasut allaat
oqaatigineqarpoq. Tassa imaappoq peqqissaasut atugarisaat akissaatitigullu
nalimmassaanerit ingerlanneqaraluarpata, aap nalunngikkaluarparput siorna
qaffanneqarsimasut, kisianni aamma malinnajunnaareersimapput, taamaattumik
taakkua ingerlanneqaraluarpata aningaasanik allaat peqqinnissaqarfik
sipaarsinnaagaluarpoq.
Tassa taartaagallartunik
tikisinneqartartut taama amerlatigaat aammalu aarleqqutigineqartoq, allaat
oqaatigineqarluni isasuulersutut peqqinnissaqarfik taaneqarluni
peqqissaasuninngaanniit oqaatigineqarpoq ukua atorfilitoqaasimasut taakani
aalajaatsut utoqqalisimapput ilaalu taamaatittussaallutik aammalu allaat
massakkut sulipilooruttoramik peqqissaasunngorlaat nutaat allaat
soraararniarlutik allaat ilaat suliunnaarniarlutik nalunaartalersimapput.
Taamaattumik pissutsit
aarlerinartorujuupput peqqinnissaqarfimmi aammalu allaat sulipiloornerit ima
annertutigisarsimapput pilaasarfinni sulisut ingerlatiinnarlugu 24 tiimit ilaat
sulisariaqartarsimallutik. Isumaqarpunga tamakku ajornartorsiutit piaartumik
oqallisigalugillu aaqqiiviginiarneqartariaqartut aamma ukiamut utaqqiniarutta
aappaatigooqarpoq pissutsit utaqqiniarutsigit ajorsigaluttuinnartussaammata.
Peter Ostermann, Atassut:
Oqaluuserisassap una nassuiaat ima
Atassut-miit uagut paasivarput ullumikkut aningaasaqarnitta killiffianik
nalunaartoq taavalu tassanngaanniit qanoq ilioriassuugut. Tassa imaa
peqqinnissaqarfimmi pissutsit uani oqaluuserinianngilagut allamiipput.
Soqutiginaraluarput kisianni allamiipput, kisianni tunngavia aana allarpassuit
aamma eqqarsaatigalugit. Peqqinnissaqarfimmi pissutsit aaqqiivigissagutsigit
taava aningaasaqarnerput tamaat isigalugu aaqqiiniartariaqarpugut. Oqallineq
tassaniittariaqarpoq.
Mikrofonip ammanera iluatillugu avammut
tusaqqusaarutiginagit tamakku. Oqaluuserisassarput allaavoq. Aamma nassuiaat
imaqannginnerarlugulu oqaluttut imatullu annerusumik tikkuussiniaratit, taava
qanoq iliussaagut aningaasaqarnerput aaqqinniarsaralugu. Oqallinneq
tassaniittariaqarpoq, tassa uumap oqallisissiap siunertaa naalakkersuisut
oqarfigissagigut, aningaasarsiornermi ingerlatsinissinni uagut aamakku
ilanngukkusutagut, siunissami suliffinnik amerlanerusunik pilersitsiniassagutta
aqqutissat ukua misissorsigit aqqutiginialaarsigit. Tassa siunertaa.
Allat avataaniitsilaartigit, allamiipput.
Allani suna tamaat tikillugu oqallissutigissavagut. Aamma una oqaatigilaarlara,
sulisorisat kikkulluunniit aningaasarsiaat qaffaannarlugit ajornartorsiut
qaangerneqarsinnaanngilaq. Allat aamma takkussulissapput, uku ima ipput, uagut
aamma taamak pissaagut. Ajornartorsiutit tamakku taama
aaqqinneqarsinnaanngillat naamik. Aningaasarsiornerput tamaat ataatsimut
isigalugu aaqqiiniartariaqarpugut. Tupigivara soorlulusooq ilisimaneqanngitsoq
aatsitassarsiornermi oliesiornermi takornariartitsinermi annertusaaniarnermi
suliniutaasut soorlu imaqannginnerarlutik oqaluttut nalugaat.
Tamakku suna siunertaraat. Suliffissat nutaat. Aningaasarsiorfissat nutaat pilersikkusukkatsigit, allat aaqqitassagut aaqqissinnaaniassagatsigit peqqinnissaqarfimmi, inissaqarniarneq allarpassuarnilu. Tamakkua soqutiginerusariaqarpagut. Soorlu una qallunaatut oqaaseq Akostĉgte priser@, tamakku pinnagit. Oqalinneq sangutinneqarujussuarpoq sammiffigisassarinngisaminut. Una Atassut-minngaanniit naggataarutaasumik oqaaseqarnitsinni oqaatigilaarlara soorlu aningaasaqarnermut naalakkersuisup aamma tikillatsiagaa.
Uagut
nassuiaat misissoratsigu nalilerlugulu aana takusarput. Aarlerisaarut
aappaluttoq ikillattaalerpoq aasanna. Isertitassagut aningaasatigut
ikiliartulersinnaanerat aarlerinarpoq. Aajuku saniani isumaginninnermi
allatigullu pisussaaffigut inatsisitigut annertusiartortut. Taava qanoq iliunngikkussi
arlaannik ajornartorsiulersinnaavusi. Tassa nassuiaatip tamaat isigalugu
oqariartuutaa. Taannalu uagut aallaavigaarput. Allarpassuit tikissinnaasaraluagut
ussernartorsiornaraluartut pinnagit. Taamaattumik tikkuussiniarsarivugut.
Aattisassarsiornikkut oliesiornikkut takornariartitsinikkut
ilinniartitaanikkut inissianik sanaartornikkut anguniagaasut
aalajangiusimaneqarlik, kisiannili sanaartugassat tamaasa ataatsimut
nalilersoqqitsigit.
Ulluinnarni ingerlatsinermi
aningaasartuutinik annerusumik qaffassaataasut taakkua unitsikkallarniartsigit
aningaasallu sipaakkavut inuutissarsiutinut qaffassaaniarnermut aammalu
iluarsagassarpassuarnut atorlugit. Tassa Atassut-minngaanniit oqariartuuterput
ersarissoq aammalu paasivara naalakkersuisut siulittaasuanniit ersarissumik
ajunngitsumillu paasineqartoq. Oqallisissiami uani oqalinneq
tassaniittussaagaluarpoq.
Jonathan Motzfeldt, Naalakkersuisut Siulittaasuat:
Naatsumik ataasiakkaanut
pulanianngikkaluarlunga soqutiginarmat Maliinannguaq oqaaseqarmat kommunit
pillugit nalunaarut uani nalunaarusiami kalaallisuuani quppernerit 47-t, tassa
atuarluarneqarsimasut tamarmik malugineqarsinnaapput. Kommunit tassani
pillugit nalunaarutigineqartuni erseqqilluinnartumik takuneqarsinnaavoq
kommunit aningaasatigut pitsanngoriartorsimasut. Kisitsisit
toqqammavigineqartut taakkua erseqqivissumik tamanna takutippaat.
Allaat kommunit ukiuni kingullerni
tamakkiisumik amigaartooruteqarsimasinnaanerigalui tamarmik
sinneqartoorutinngorlutik aaqqiivigineqarsimapput imaluunnit
aaqqinneqarsimapput. Imaappoq kommunit aningaasaqarnikkut pitsanngoriartornerat
tamanna takuneqarsinnaavoq. Taarsersuinerit
landskasse-mut pissusissamisut amerlanerpaartaatigut ingerlavoq. Taavalu
ataaseq immikkut soqutiginaateqartoq aammalu aqagu qularnanngilaq
bloktilskud-inik tikitsinermi taanna
itinerusumik aamma tikinneqarsinnaajumaartoq eqqarsaatigalugu inuit
aamma qassiussuserput qanorlu amerliartornerput nalunaarsorneqarsimanerput
soqutiginaateqarmat aamma taanna uniffigisimavarput Danmark-imi
isumaqatigiinniarnermi.
Takuneqarsinnaalerpoq maannakkut 1997-mi
kisitsisininngaanniit 1998-mut ikaarsaariarnermi aammalu siuliininngaanniit
Kalaallit Nunaanni meeqqat inunngortartut arfinillit tikillugit ukiullit
Kalaallit Nunaanni ikiliartornerat erseqqilluinnaqqissaarput. Tamarmi titarneq
ammut ingerlavoq, taamaasillunilu maannakkut taamatut ingerlaannassagutta
ukiut 2007 tungaanut taama kisitsisit tulleriiaarneri ingerlaannassappata.
Tamanna assorujussuaq malunnarpoq isiginiarneqartoq akerliarnilli aamma
utoqqaat amerlassusiat nunatsinni amerliartoqaluni aammalu taava timimikkut
nappaateqarlutik utoqqalisut aamma isumagineqarnissaanni aamma naatsorsuutigisagut
amerlissallutik.
Imaappoq tamakkunatigut nalunaarsuusiat
uaniittut aamma eqqarsalersitsipput annertuumik maannakkut inunni
isumaginninnerup tungaatigut aamma siuliini taallatsiarneqareerpoq aaqqissuusinissatta
ilusilernissaanut atuarfittalu meeqqanik isumaginniffiillu allallu
sanaartorfigineqarnerani tamarmik assiliaq peqataasussaammat. Aamma qujavunga
taakkua erseqqissaatigilaarsinnaagakkit.
Anthon Frederiksen, Kattusseqatigiit:
Aningaasaqarneq pillugu nassuiaat tassalu
massakkut eqqartorneqartoq pillugu aamma Atassut-minngaanniit oqaluttup Peter
Ostermann-ip ajoqersuunniarpaatigut suna oqaluuserissaneripput. Tassami
qularnanngitsumik maani inimi isersimasut amerlanerpaat ilisimavaat
aningaasaqarnermut suut attuumassuteqartut suullu pingaaruteqartutut
inuiaqatigiinni ingerlatsinermi aqqusaartukkavut.
Taamaattumik oqartoqaannarsinnaanngilaq
aningaasaqarneq aajuna una kisiat oqaluuserineqarpoq. Aningaasaqarnermut
attuumassuteqartut inuiaqatigiinni ingerlatsivinni assigiinngitsuni
suliffeqarfinni assigiinngitsuni annertoorujussuarmik aningaasaqarnitsinni
attuisuupput, taamaattumik naalakkersuinikkut ingerlatseriaaseq tamaat
ataatsimut isigalugu ilaatigut saqqummiinermi aamma uanga
Kattusseqatigiinninngaanniit aningaasaqarnermut attuisut tamaasa sapinngisamik
eqqartorniarsimavakka oqartariaqarpungalu Inuit Ataqatigiit-ningaannit
Maliinannguup eqqartugaa ungasinngitsukkut ilumoorluinnarmata aammalu
aningaasaqarnermut annertuumik aamma attuimmata.
Taamaattumik tamakkua tamaasa ataatsimut
isigalugit aningaasaqarnermut nassuiaat eqqartorneqartariaqartoq uanga aamma
isumaqarpunga. Kiisalu aamma qujavunga naalakkersuisup akissuteqaataannut
uanga oqaaseqaatigisakka ilaatigut annertunngikkarluartumik
akissuteqarfigimmatigit. Taavalu aamma isumaginninnermut naalakkersuisumut
oqaatigiinnassavara, taamatut kinguarsaanermik oqaaseqarnera ilaatigut
pissuteqarmat maannakkut ukioq ataaseq qaangiussimalermat
naalakkersuisuninngaanniit neriorsuutigineqareersimasoq, tassalu
isumaginninnermut tunngasut peqqussutit inatsisillu 1997-mi inatsisartut
ukiakkut ataatsimiinnissaanut saqqummiunneqariissasut taamanikkulli
ilimasaarutigineqareermat.
Taamaattumik apeqqusertariaqarpoq ilumut
taamanikkut naalakkersuisuusimasoq imaluunniit ullummikkut
naalakkersuisuusimasumik sullerinnerusimanerani taamatut neriorsuisimavoq,
imaluunniit massakkut naalakkersuisuusup suliassani
angummaffigisinnaasimanerpai. Tassa apeqqut. Qulliup aappaluttup ikittaalernera
isumaqarpunga aamma eqqaassallugu pissutissaqarluartoq, tassami inuiaqatigiit
ataatsimut isigigaanni ullumikkut avissimanerat ersarillisimavoq, soorlu aamma
saqqummiininni oqaatigigiga inuit pissakinnerusut pissaqarnerusullu imminnut
ungasinnerulersimaneri malunnarsisimapput ersarissisimavoq suliffissaaleqineq
pitsaanerulersimasutut oqaatigineqaraluartoq takussutissinneqarpugut
naatsorsueqqissaartarfimmingaanniit 1997-mi kvartal-imi siullermi aammalu
1998-mi kvartal-imi siullermi naleqqiullugu suliffissaaleqinermut
tunngatillugu taamaallaat 0,3-mik appariarsimasoq suliffissaaleqineq.
Taamaattumik tamakkua tamarmik
aningaasaqarnikkut ingerlanneqarneranut annertuumik sunniuteqarput
eqqartortariaqarlutillu.
Marianne Jensen, Peqqinnissamut Naalakkersuisoq:
Naalakkersuisut aningaasaqarnermi
ingerlatsinermi nassuiaataat oqallisigineqarpoq aammalu tassani soorunami
pissusissamisoorpoq eqqartussallugu qanoq siunissami iliorluta aningaasarsiorneq
pitsanngorsarsinnaavarput aammalu aappaatigut nunatta aningaasaatai qanoq
atorniarpagut.
Taamaattumik uanga aamma tupiginngilara
pingaartinneqarmat peqqinnissaqarfimmi ingerlatsinermut aningaasat qanoq
amerlatigisut inuiaqatigiinnut atortinneqarusunnersut aamma tikinneqartarmat
aammalu kiffartuussineq qanoq pitsaatigisoq nunatsinni pigineqarusuttoq uani
tikinneqarmat. Kisianni aamma oqaatigerusuppara soorluuna
pigiliutiinnarneqarsimagunartoq peqqinnissaq pillugu sutigut tamatigut
ajorinninniarnissaq. AG-mi ullumi saqqummersumi nakorsaanerit ilaat ilaatigut
oqarpoq, issuassavara: Isumaqarami peqqinnissaqarfiup kiffartuussinera
nakorsaqarfinni isumagineqartoq nunarsuarmi pitsaanersaasut. Issuaaneq naavoq.
Allat allatut isumaqarsinnaapput
nakorsaanerup isumaa tusarparput. Naalakkersuisuni aaqqittariallit soorunalimi
eqqumaffigivagut aamma isertuussinata iluarsisariallit equngasut tikkuartortarpagut
aamma peqqinnissaqarfiup tungatigut. Oqaatigisariaqarpara aamma ilanngullugu
ingerlatsinermi suliaatsinni sorpassuartsigut iluarsartuussisoqartuarmat
tamakkua qanimut ingammik malinnaasut nalunngilaat iluarisimaarlugillu.
Kisianni ilumoortoq unaavoq napparsimasunut sullitanut annertunerusumik
malunniussinnaanngillat pitsanngoriaatsit assigiinngitsut ingerlatsinermi
sulisutigut pissutsit aaqqiivigineqanngippata.
Tamanna aamma naalakkersuisuni
minnerunngitsumillu uanga pingaarteqalugu ilaatigut immaqa utikuluttutut
oqaatigineqarsinnaagaluartoq saqqummiuttuartarpara sulisutigut ajornartorsiutit
ilorraap tungaanut saatsinneqanngippata peqqinnissaqarfimmi sullissineq
innuttaasunut malunnaatilinnik annertunerusumik
pitsanngoriaateqarsinnaanngimmat, taamaattumik taassuma tungaa sulisoqarnermut
tunngasut aamma utikuluttuassavakka paaseqatigiinneq annertunerusoq tikitserlugu.
Kisianni nuannaarutigalugu oqaatigisariaqarpara aamma malugisinnaagakku
massakkut aamma inatsisartut akornanni napparsimaveqarfimmi sulisoqarnerup
tungaatigut aaqqiisariaqarneq iluarsartuussisariaqarnerlu tassuunakkut
paaseqatigiinneq annertunerujartuinnartoq malugisinnaagakku.
Neriuppunga tamanna kingusinnerusukkut
aamma timitalimmik malunniukkumaartoq. Kisianni kingusinnerusukkut ullumikkut
aamma peqqinnissaqarnermut tunngasut annertunerusumik oqallisiginissaanut
periarfissaqaratta naggataatigut oqaatigilaaginnassavara aamma aningaasaqarniarnermut
aningaasanik aqutsinermi tunngasut aamma eqqaaneqartuartarmata aamma pingaarpoq
aningaasarpassuit peqqinnissaqarfimmut atorneqartarmata
aningaasaliissutigineqartarlutillu. Kisiannili aamma oqaatigisariaqarpara
tassuunakkut aamma naalakkersuisut suliniuteqartuarmata pitsanngorsaaniarlutik.
Ukiorpassuarni aningaasiliissutaasartut nikerarsimaqaat ukiumiit ukiumut
aammalu ukiut ingerlanerani nikerartarsimaqalutik.
Pingaartissimavarput naalakkersuisuni
assigiikannernerusumik pilersaarusiornissamut periarfissarissaartitsinerulluni
aningaasaliisoqartarnissaa aammalu maluginiarparput tamanna orninneqartoq
tikikkiartuaarneqartoq. Aammalu oqaatigisariaqarlugu aningaasaqarnikkut
aqutsineq pitsanngoriartortutut uanga isumaqarfigigakku minnerunngitsumik
ukiuni kingullerni aamma tassani peqqutaaqataalluni aningaasaliissutaasartut
inatsisartuninngaanniit nalimmassimajartuaarneri. Ukiumiit ukiumut ukiullu
ingerlanerani annertoorujussuarmik nikerarpallaarneri qimakkiartuaarneqarlutik.
Otto Steenholdt, Atassut:
Aningaasaqarneq pillugu nassuiaat qulequtsiullugu tamanit oqallinneq tusarnaarlugu nuannerlunilu aamma eqqarsaammernartarmat. Qangali uanga eqqarsaatigisartagara tassaasarpoq kukkugaluaqinerlunga. Nunatta aningaasivia inuilu illumut ittuata ningiuataluunniit aqutaanut assersuuttarakku. Immaqa illunnguami aningaasivinngualimmi tassani oqallisigineqarnerusarpoq meqqat piumasaqarpallaaleraangata erseqqissumik oqarfigissallugit akissaqanngikkallarpugut utaqqilaarniarallaritsi.
Ilai
naalanngilersaraluartillu qiallutillu una piniarpara una piniarpara, kisianni
oqartarpoq anaana ataataluunniit, naamik akissaqanngilagut tulliani
peqalernissatsinnut utaqqiniaritsi. Taannarpiaq landskasse-mut assersuuttarpara. Taamaattussaavorlu,
aningaasanik paarsisut aamma ilaminut oqartariaqarpoq sakkortuumik,
akissaqanngilagut utaqqiniarallaritsi. Aamma siunnersuutit isiginnaarlugit ila
tupinnartaqaaq soorlu oqaannaraanni suut tamarmik pineqarsinnaasut. Maani
ilakka taavaat qineqqusaarnermik taallugu, nalunagu akissaqanngiivillutik
oqaannavillutik sunik tamanik piniarsarisut.
Pisariaqalersaraluarpoq immaqa maani
naalakkersuisut qullersaattut oqarfigissallugit, oqaannarluni pineq
ajornaqaaq. Taanna eqqaamallaqquara, aningaasiviit marluk assorlugu
inatsisartunut ilaasortaasimasup taalliaa maani atuassanngisara qulequtaa
kisiat oqaatigiinnarlara qanoq ilungersunartigisoq taalliamini allaatigimmagu
qulequtserlugu aningaasivik paqqarnikoq. Taanna nunatta ingerlanerani
pinaveersaartariaqarpoq, taamaattumik ilaanni oqarfigisariaqartarpoq
oqaannarluni pineq ajornaqaaq.
Akulliit Partiaata takisuuliuutaa
soqutigalugu assut atuarpara. Qallunaatua pingaartumik. Kusanartumik
qallunaatut allataq, kisianni mianersuutigisariaqartartoq politik-eriulluni
aajuna, partiini ikioqatigiinneq nuanneqaat kinaluunniit
suliassinneqarsinnaavoq una suliarilaaroq. Kisianni aana pingaartoq, allattup
allagaata isumaa atuartussap maani saqqummiussisussap
paasilluarsimasariaqarpaa. Siullermik saqqummiussigami kusanartumik
sakkortuumik pisoq aperineqarami suna qanoq isumagineraa
nassuiarsinnaanngimmagu oqaatigisariaqarpara imannak, allatut ajornaqaaq
politik-eritut saqqummissagaanni oqaluttarfik manna atorlugu, qanoq
oqartitaasimaneq ilinniarsimasariaqarpoq akisinnaanngorluni.
Aappassaaneerluni akigaluarmat
paasinngilluinarakku naggasiinnartariaqassavara imannak, allattoq
inuulluaqqutikkiuk oqarfigalugulu, tullianik oqaasissiorumma oqarfigissavakkit oqaloqatigiilluaqqaarluta
aatsaat taanna saqqummiukkumaarparput. Taamaanngippat oqaluttoq allattorlu
imminut paasisinaanngillat.
Josef Motzfeldt, Inuit Ataqatigiit:
Inuit Ataqatigiinninngaannit
erseqqissaatigissavarput soorunami uagut aamma nersualaagassat
nersualaagassaasorisagut nersualaartaratsigit uparuartariaqartullu
tikkuussivigisariaqartut tikkuussivigisarlugit aaqqiissutissanik ilallugit.
Soorlu aamma naalakkersuisut siulittaasuata oqaaseqarnermi siullermik
oqaatigigaa qujaffigerusutani qujaffigissallugit qujaffigerusunngisanilu
qujaffigissanagit. Tamanna isornartoqanngilaq.
Aamma ersiutaaginnarpoq
assigiinngisitaartunik nalunaarusiat isummersorfigineqarsinnaaneranik
mianerinninnertut taaneqarsinnaasumik tamatuma isumaqartinnissaa. Paasinnittarnigut
assigiinngillat aamma nalunaarusiaq qanoq atorneqarnissaa sunullu
tikkuussiviginissaa inatsisartuni ilaasortap imaluunniit Atassutip
oqaaseqartuata inatsisartuni ilaasortanut ajoqersuussutiginiassanngilaa imatut
paasissavarsi imatut paasissavarsi. Inuit assigiinngitsuuvugut aamma assigiinngitsunik
siunnerfeqarluta sulinerput ingerlanniartarparput.
Aamma inatsisartuni ilaasortat neriuppunga
tusaqqusaaginnarlutik oqaluttarfik manna atortarneraannik oqariartuuteqarneq
Atassut-minngaanniit eqqarsaatigilluagaanngitsutut nalilerneqartariaqartoq
allanit isumaqatigineqassasoq. Taamaattoqarsimassappat taamaassimassagunillu
tamanna isumaginiarlissuk immaqa imminnut qiviaqqaarlutik
taamaaliortariaqassaaput taamaassappat.
Taamatut aamma ippoq Otto Steenholdt-ip
qineqqusaarutaannartut akissaa puigorlugu oqaluttarfiup matuma innuttaasunut
pitsaanerusunik sullissiniarnermut tikkuussivittut atorneqartarnera.
Atassutikkut aqagu siunnersuutaanut oqaluuseqarnissarput piniartut minnerpaamik
akissarsiaqarnissaannut tunngasut uagut qineqqusaarutaannartut
nalilernianngilarput. Siunnersuutaavoq inatsisartunut siunnersuut
ataqqineqartariaqartoq taamatullu aamma suliarineqartariaqartoq. Immaqa
isumaginninnermi ataatsimiititaliarsuup sulinerat ilanngunneqarsimasuuguni tulluarsimassagaluarpoq,
taannami siorna akuersissutigigatsigu piniartukkormiunut annertussusileriikkamik
aningaasaqartitsisinnaaneq ilanngullugu akuersissutigivarput.
Sunaluunnit innuttaasunut
pitsannguallaataasinnaasumik saqqummiunneqartorlu paasinartunngortitsiniartarneq
inatsisartuni ilaasortaqatinut tulluanngilaq aamma akuerineqartariaqanngilaq.
Kiisalu peqqinnissamut naalakkersuisumut oqaatigissavarput, ilaana uagut aamma
Inuit Ataqatigiinninngaanniit arajutsisimanngeqaarput peqqinnissami sullissisut
napparsimavinne peqqisaanermit sinerissami sullissisut nersortariaqartumik
pikkorillutik ilungersorlutik sulipput. Aqutsinerliuna qitiusuminngaannit
aqutsinerup sunniutaanik massakkut ajornartorsiutaalersut ilaqaqimmata aqutsineq
inatsisartuninngaannit uparuartorneqartartoq. Uparuartuinngikkutta pissutsit
aaqqinnavianngillat.
Kisianni uparuartuinerit minnerpaamik
ilaqartinniartarpavut aaqqiissutissaasorisatsinnik tikkuussiniarnitsinnut.
Kiisalu nunap immikkoortuini annerusunik napparsimavilersorniarneq taavalu
aamma telemedicin ungasianiit nakorsaariaatsimik atuisinnaanerit imaluunniit
qanoq nakorsaanisamut ajoqersuussisinnaanerit atortariaqalernerat inatsisartut
nammineq nassaarinngilarput aamma naalakkersuisut nassaarinngilaat, kisianni
pisariaqalersimavoq nakorsat ilinniartitaanerata sulinerminnilu
qaffakkiartornerminni periuserisaasa allanngoriartorneranni nakorsat tamatigut
ilisimasallit sunut tamanut inissinneqarsinnaanerat ajornakusuuleriartorpoq,
taakku nassaassaajunnaalermata. Taamaattumik allatut ajornartumik pitsaanerup
tulliatut tamakkua ullumikkut killiffitsinni toqqortariaqalersimavagut.
Bjarne Kreutzmann, Akulliit Partiiat:
Qujavunga pingajussaaneersinnaatitaagama,
tassami kisimiilluni aappassaanereernerup kingornatigut oqaaseqartut
akerusunnartaraluarmata taamaattumik tamakku pinnagit akeriataapallaannassaanga.
Otto Steenholdt aappassaaneerninni oqaatsikka paasinagit oqarputit. Suunuku
paasinngikkitit. Erseqqissumik paaserusunnaraluarpoq putsup iluani oqalunnertut
oqaatigiinnarnarnagu ajornanngippallaaqimmat oqatigiinnarnagu paasinagit.
Uani aappassaaneerninni oqaatsikka
ukuuginnarput aappassaaneerlunga oqaaseqarninni ukuuginnarput
oqaatigineqartunut akissutit. Erseqqissaanerusut oqaatsinnut tunngasut, allamik
naamik. Tassanilu tassaaginnarput mikisuarsunnik taaneqartut akit
tutsuviginartut nassuiarakkit, taavalu KNI-mut tunngatillugu oqaatigineqartoq
KNI qangarsuarli ilisaareermat tamakkua pinnagit allanik
oqaluttariaqaraluartugut. Oqaatiginnarpara KNI uani taaneqarnera pillugu
oqaaseqarfigalugu. Uani oqaasigisassakka uannut oqinnerusoq tunngavigalugu
suliarisarpakka, tassa qallunaatut siullermik tassani oqinnerusumik
sulisinnaasorigama taamaalillugu. Nutserneralu aamma akuereqqaarlugu
naqitsittarlugu. Taamaattumik paaserusunnarpoq sunaana ajortoq.
Peter Ostermann, Atassut:
Takuuk ajoqersuinianngilagut aamma
oqallinnissami allamik tunngasumik imaattunngilagut. Una nassuiaat uagut
assorujussuaq iluatigigipput aningaasarsiornikkut ullumikkut inissisimanerput
qanoq ilillugu aaqqeriassavarput, siunissami qanoq suut aqqutigissavagut.
Allarparpassuit peqqinnissamut tunngasut inissaqarnermi ilinniartitaanermut
aaqqiivigerusullugit. Aamma tusaqqusaarneruvoq una sorpassuit oqaluuserisamut
tunnganngitsut saqqummiussorlugit oqaranilu qanoq ilillugit
aaqqeriarssavarput.
Ilumoorpoq peqqinnissaqarfimmi
ajornartorsiutit annertupput aamma allani. Aaqqinniassagutsigit qitiusoq suna
aaqqeqqaagassarput, aningaasaqarnerput. Tassa uagut oqariartuutigisarput.
Nipangersaanngilagut, allat peqqinnissamut tunngasut allanullu tunngasut allami
sukumiisumik pitsaasumik annertuumik oqallisigissavagut, uaniinngitsoq.
Hans Enoksen, Ataatsimiinnermik aqutsisoq:
Taamaalilluni aningaasaqarnikkut ingerlatsineq
pillugu nassuiaat sivisuumik oqallissutaareerluni naammassineqarpoq.
Neriuppugut siunissami aningaasarsiornikkut ingerlatsineq sukannersumik aamma
maani inimi aqunneqarumaartoq.
Oqaluuserisaq naammassivoq.