Oqaluuserisassani immikkoortoq 06 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngornermi 19. maj 1998 nal.
17.10.
Anders Andreassen, Inatsisartut Siulittaasuat,
ataatsimiinnermik aqutsisoq:
Taavalu erseqqissaatigissavara
suli immikkoortut arfineq marluk suli suliassarigatsigit. Taamaattumik aamma
naalisaanissamut periarfissaq aamma eqqaasitsissutigissallugu.Tikissavarpullu
immikkoortoq 6 taavalu aamma 59 taakkua imminnut attuumalluinnarmata
apeqqutigissavara ataatsimoortumik taakkua oqaaseqartussat
oqaaseqarfigisinnaaneraat. Akuerineqarsinnaappallu taanna, tassa imminut
attuumalluinnarmata taakkua sulissat. Ajorineqanngilaq. Taavalu siulliutissavarput
immikkoortoq nr. 6 landskarsip 1997-mut naatsorsuutaasa saqqummiunneqarnerat.
Daniel Skifte, Aningaasaqarnermut Ineqarnermullu
Naalakkersuisoq:
Ukiumut aningaasanut
inatsiseqarfimmut 1997-mut landskarsip naatsorsuutai matumuuna Naalakkersuisut
sinnerlugit saqqummiutissavakka. Ingerlatsinermut sanaartornermut taarsigassarsisarnermullu
naatsorsuutit 1997-mi 89 mio. kr-ninik sinneqartooruteqarput. Taakku aningaasanut
inatsimmut kiisalu ilassutitut aningaasaliissutinut inatsisinut 241 mio. kr-nik
aningaasartalinnut sanilliullugit pitsanngoriaataapput.
Tassami 1997-mi ilassutitut
aningaasaliissutinut inatsisip aappaata akuersissutigineqarnerani 152 mio.
kr.-nik amigartooruteqarnissaq naatsorsuutigineqaraluarmat. Naatsorsuutit
inernerisa Namminersornerullutik Oqartussani pingaarnerusutigut aningaasanik
aqutsinerup naammaginartumik ingerlanera aammalu landskarsip taarsigassaanik
akilersuinitta ingerlatiinnarneqarsinnaanera takutinneqarput.
Ukiumi naatsorsuuseriffiusummi
landskarsip isertitai katillutik 4.148.000 mia. kr.-niupput. 1997-mi
aningaasanut inatsimmi ilassutitut aningaasaliissutinut (inatsisit)?
(ilassutit)? ilanngullugit 4.131.000 mia. kr.-nit aningaasaliissutigineqarput.
Taamaattumik 47 mio. kr.-nik isertitaqarnerusimavugut imaluunniit
assigiinngissut 1,1 %-usimalluni.
Isertitaqarnerunermut
pissutaapput naatsorsuutigisanit amerlanerusunik akileraarutitigut isertitaqartoqarsimaneq.
Aammalu ingerlatsinermi sanaartornermit taarsigassarsisitsisarnermilu sinneqartooruteqarnerup
malitsigisaanik erniatigut isertitaqarnerusimaneq.
Ukiumi
naatsorsuuteqarfiusumi landskarsip ingerlatsinermut aningaasartuutai katillugit
3.472.000 mia. kr.-upput. Aningaasanut inatsimmi ilassutitut
aningaasaliissutinut inatsisit ilanngullugit 3.500.000 mia. kr.-nit
aningaasaliissutigineqarmata. Taamaalilluni 8. mio kr.nik
atuisoqannginnerusimavoq. Tassa nikingassut 0,2 %-ulluni nikingassut
missingersuutinut sanilliullugu annikeqimmat tamanna takussutissaavoq 1997-mi
ingerlatsinermik qulliunerusumik aqutsinerup naammaginarsimanera.
1997-mi
sanaartornermi aningaasartuutit katillutik 637 mio. kr-upput 1997-mi
ilassutitut aningaasaliissutini inatsisip aappaata
akuersissutigineqareerneratigut sanaartornermut aningaasaliissutit 826
mio.kr-upput taamaattumik matumani atuinikinneruneq 188 mio kr.-uvoq.
Taakkunannga
ileqqaarneqavissut 16 mio. kr-niupput 162 mio.kr-nillu sanaartornermi kinguartoorutit
assigiinngitsut pisuusimallutik. Oqaatigineqarsinnaavoq nunap immikkoortuini
timmisartunut suluusalinnut mittarfiliortiternerit sukkassusiat
allannguuteqarmat 70 mio.kr.ninut naapertuuttumik. Aammalu pisortat
sanaartorfigisaaneranni 16 mio. kr.-nik atuinikinnerusoqarluni. Kiisalu
ineqarnermut ineqarnermut 55 mio. kr-ninik atuinikinnerusoqarpoq.
Inatsisartut
piginnaatitsinerisigut sanaartornerup sukkassusiata allanngorarneranik
pissuteqartumik sanaartornermut aningaasaliissutinit atornikinnerusat ukiup
tullianut atugassanngorlugit nuunneqartassapput. Tamatuma kinguneranik 1997-mi
sanaartornermut atornikinnerusat amerlanersaat 1998-mi
aningaasartuutigineqarumaarput. Taammaattumillu Naalakkersuisut 1998-mut
ilassutitut aningaasaliissutinut inatsissaannut siullermut siunnersuutaanni
1997-mi sanaartornermut aningaasaliissutitut atorneqanngitsut 167 mio-nit
aningaasaliissutigeqqittassatut ilanngunneqarput.
Suliassanik ataasiakkaanut
kinguartoortunilli aningaasaliissutit atorneqanngitsut 1998-mi atorneqassapput.
1998-mi aningaasanut inatsimmi sanaartornermut atugassat ukiuni siuliini
aningaasaliissutinut piviusorsiortunut sanilliullugit amerlaneroreeqaat. Ukiuni
kingullerni misilittakkat takutippaat illersorneqarsinnaasumik
piviusorsiortumillu 600 mio. kr.-nit 650 mio. kr.-nillu akornanni
sanaartornermut atorneqarsinnaasut taamaattumik ilassutitut aningaasaliisutinut
inatsimmut siullermut atatillugu Naalakkersuisunit siunnersuutigineqarpoq
1998-mi sanaartornermi aningaasaliissutit piviusorsiortumik
amerlassuseqassasut. Aammalu sanaartornermut missingersuutit
misissoqqissaarneqassasut.
Tamanna ima isumaqarpoq, suliat
ingerlasut pilersaarutaasullu attatiinnarneqassasut ukiunulli arlaqarnerusunut
siaruarlugit. Tamatuma suliassanut ataasiakkaanut qanorpiaq piviusunngortinneqarnissaa
ilassutitut aningaasaliissutinut inatsisissat aappaannut atatillugu
siunnersuutigineqarumaarpoq.
Ukiumi naatsorsuuteqarfiusumi
1997-mi ingerlatsinermut sanaartornermut taarsigassarsisitsisarnermullu
inernerit taarsigassarsisitsisarnermut tunngasortaani 40 mio.kr-nik
isertitsisoqarsimavoq. Aningaasanik ilassutitullu aningaasaliissutinut
inatsisini 42 mio.kr.ninik isertitaqartoqarnissaa
missingersuusiorneqarsimavoq. Taamaattumik tamatumani 2 mio. kr-ninik
isertitakinnerusoqarpoq.
1997-mi naatsorsuutit Namminersornerullutik
Oqartussat kukkunersiuisuinit avataaneersunit immikkut
oqaaseqarfigineqanngillat. Tamanna isumaqarpoq, kukkunernik amigaatinilluunniit
annertunerusunik siumuisoqarsimanngitsoq. Aammalu naatsorsuutit eqqortutut
isigineqartut.
Taamaattorli kukkunersiuinermut
ataatsimiititaliaq suleqatigilluarlugu Namminersornerullutik Oqartussat
naatsorsuusiortarnerata aningaasanillu aqutsinerata
pitsanngorsartuartoqarnissaa, patajaallisaajuartoqarnissarlu Naalakkersuisut
qilanaaraat. Ataatsimut isigalugu 1997-mut naatsorsuutit inernerat
naammaginartutut isigisariaqarpoq.
Landskarsip naatsorsuutaasa
kukkunersiuinermut ataatsimiititaliamit suliarineqaqqinnissaminnut
ingerlateqqitsinnagit ataatsimiititaliap suleriaatsiminik
allanngortitsinissamut 1997-mi ukiakkut ataatsimiinnermi isumaliutersuutai
oqaaseqarfigilaarusuppakka.
Landskarsip naatsorsuutai ullumi
Naalakkersuisut saqqummiuppaat inatsisartut innutaasullu landskarsip
aningaasatigut killiffianik piaartumik paaasitinneqarnissaat siunertaralugu. Landskarsip
naatsorsuutai saqqummiunneqanngillat siunertaralugu ullumikkut inatsisatunit
akuersissutigineqarnissaat. Suliassap nammineq qanoq issusia pissutigalugu
naatsorsuutit kukkunersiuisut kukkunersiuisimanerminnut uppernarsaataat aammalu
kukkunersiuisimanermut uppernarsaatini isornartorsiutaajumaartunut
Naalakkersuisut nassuiaataat kukkunersiuinermut ataatsimiititaliamit
misissorneqareerpata aatsaat akuersisoqarsinnaavoq.
Tamatumunnga atatillugu
kukkunersiunermut ataatsimiititaliami naatsorsuutinik kukkunersiusimanermullu
uppernarsaatinik suliaqartarnerup upernaakkut ataatsimiinnerup nalaani
pisarnissaa kissaatigineqarpoq. Ilisimatitsissutigissavara landskarsip
naatsorsuutai aatsaat suliarineqarsinnaammata kommunit suliffeqarfiillu
imminnut aquttut tamarmik landskarsimut sanilliullugu naatsorsuutiminnik
saqqummiussereeraangata, imaluunniit saqqummiussereersimalerpata.
Taamaattumik aatsaat aprilip 1-ata
missaani naatsorsuutit naammassineqarsinnaasarput. Tamatuma kingornatigut sapaatip
akunnera ataaseq marlulluunniit ingerlareerpata kukkunersiuisimarnermut
uppernarsaatit pissarsiarineqassapput. Tamatumalu kingorna
nassuiaatissaajumaartunik pissarsiniartoqassalluni. Taamaattumik naatsorsuutit
atortussallu taakkununnga tunngasut upernaakkut ataatsimiinermi
kukkunersiunermut ataatsimiititaliamut suliassanngorlugit saqqummiunneqartarnissaat
piffissaq eqqarsaatigalugu assut ajornakusoortussaavoq.
Aamma
ilisimatitsissutigisinnaavara kukkunersiuinermut ataatsimiititaliap
uppernarsaatitut pisortaqarfiit nassuiaataat Naalakkersuisunut
saqqummiunneqareerpata taakku inatsisatut kukkunersiuinermut
ataatsimiititaliaannut nassiunneqassammata. Taamaaliornikkut ataatsimiititaliap
aasap ingerlanerani suliarinnissinnaaqqullugu.
Taamatut oqaaseqarlunga
Naalakkersuisut sinnerlugit landskarsip naatsorsuutai kukkunersiuinermut
ataatsimiititaliamut suliassanngortippakka.
Marlunngornermi 19. maj 1998 nal.
17.18
Oqaluuserisassani immikkoortoq 59
Landskarsip naatsorsuutaasa kukkunersiorneqarnissaanut
atatsimiititaliap isumaliutissiissutaa.
(Kristine Raahauge,
Ataatsimiititaliap siulittaasua)
Kristine Raahauge, Ataatsimiititaliap siulittaasua
saqqummiussissaaq:
Landskarsip naatsorsuutaasa
kukkunersiorneqartarnerannut atatsimiititaliap landskarsip naatsorsuutai
pillugit isumaliutissiissutaa saqqummiutissavara. Qulinillu qupperneqarmat
inatsisartut siulittaasuata akuerissappanga naalisarusuppara.
Naalakkersuisut landskarsip
1997-mut naatsoruutaat inatsisartut allattoqarfianut 27. april 1998
tunniuppaat. Landskarsip naatsorsuutaasa kukkunersiorneqarnissaanut
atatsimiititaliamut ilaasortat, siulittaasoq Kritine Raahauge, Knud Sĝrensen,
Lars Sĝrensen aamma Finn Karlsen ullup taassuma kingorna naatsorsuutit
peqqissaartumik misissuataarsimavaat. Landskarsip naatsorsuutaasa
kukkunersiorneqartarneranut atatsimiititaliap nalinginnaasumik oqaaseqaatai.
Aallaqqaasiullugu landskarsip
naatsorsuutaasa kukkunersiorneqartarneranut ataatsimiitsitaliap oqaatigissavaa nukissiorfiit
aamma amutsiviit naatsorsuutaasa tamanut saqqummiunneqartut
atsiorneqanngikkaluartut ataatsimiititaliaq Naalakkersuisut pissutsinut
taakkununnga erseqqissaateqarnerata kingorna suliffeqarfiit marluullutik
naatsorsuutaannik kiisalu taakkununnga atasunik kukkunersiuisut oqaaseqaataanik
atsiukkanik tigusaqarmat.
Taamaasilluni inatsisartut
landskarsip naatsorsuutaasa pissusissat eqqorlugit suliarineqarsinnaalernerat
qulakkeerneqarsimammat landskarsip naatsorsuutaasa kukkunersiorneqartarnerannut
atatsimiititaliap nalinginnaasumik oqaaseqaataanut ingerlaqqisaagut.
Landskarsip naatsorsuutaasa
kukkunersiorneqartarnerannut atatsimiititaliap iluarisimaarlugu paasivaa
landskarsip naatsorsuutaanik kukkunersiuisut avataaneersut kukkunersiuisut
oqaaseqaataanit oqaaseqarsimannginnerat. Landskarsip naatsorsuutaasa
kukkunersiorneqartarnerannut atatsimiititaliap aammattaaq iluarisimaarpaa
ataatsimiitsitaliap 1997-mi ukiakkut katersuunnermi kissaatigalugu
kaammattuutaa malinneqarsimammata. Ataatsimiititaliallu ajuusaarutigaa
kaammattuutinut taakkununnga atatillugu suliat aallartinneqarsimagaluartut
suliassat taakku ulloq manna tikillugu inaarsarneqarsimanngimmata.
Tassunga atatillugu
naatsorsuusiornermut ilitsersuutinut aammalu qarasaasiaqarnermi suli
isumannaannerulersussamik kissaatigisat tikkuarneqarsinnavoq. Landskarsip
naatsorsuutai kukkunersiorneqartarneranut ataatsimiititaliap nuannaarutigaa
Namminersornerullutik Oqartussat akissarsialerinermik periaasiat
naleqqussarlugu aallartinneqarsimammat.
Oqaatigineqarpoq naleqqussaaneq
taanna 1998-p naanerani naammassineqarumaartoq. Ataatsimiititaliap tassunga
atatillugu kissaatiginartippaa kukkunersiueriaatsip taamaattup aammattaaq
suliffeqarfinnut namminersortitanut kukkunersiuinermi ilitsersuutinik
ilanngunneqarnissaa.
Ataatsimiititaliaq
Namminersornerullutik Oqartussat immikkoortortaanut ataasiakkaanut atatillugu
isumaqarpoq immikkoortortat taakkua isertitarisinnaasaasa annertunerusumik
immikkoortiterneqartalernissaat. Taamaalilluni ataatsimiititaliap ilimagaa
landskarsip naatsorsuutaasa ilusilersugaaneranni siunissami kissaatigisaq
taanna atorneqalerumaartoq. Ataatsimiititaliap naatsorsuutit tunniunneqartartut
ilusiligaanerannut Naalakkersuisunut inassutigissavaat siunissami ingerlatsinermut
aningaasartuutit naatsorsuutini tunniunneqartuni ukunani atorneqartumit
anginerusumik immikkoortiterneqartalernissaat.
Ataatsimiititaliap paasinninnera
tunngavigalugu ingerlatsinermut aningaasartuutinut peqqissaarnerusumik
naatsorsuisalernissaq pisortat aningaasaannik qanoq atuisarnerannik innuttaasut paasinninnerulernissaanut
aqqutissiuusseqataassaasoq taamaalilluni ingerlatsinikkut ammanerusumik
ilapittuutaalissalluni.
Landskarsip naatsorsuutaasa
kukkunersiorneqartarnerannut atatsimiititaliap pissuseq 1995-p kingorna
peqqissimasoq erngummatigaa. Sanaartornermi nikittoornerit ima
annertutigilersimapput kukkunersiuisut avataaneersut suliariniakkat
aqunnissaanut sakkussat piviusunngortinnissaanik kissaateqalersimammata,
saqqummiussinissamillu inallugit.
Kissaatigisaq taanna
ataatsimiititaliap tamakkiisumik taperserpaa. Taamaattumillu landskarsip
naatsorsuutaasa kukkunersiorneqartarnerannut atatsimiititaliap isumaqatigiissup
Naalakkersuisunut inassutigaa piaarnerpaamik suliariniakkap aqunneqarnissaanut
sakkussat piviusunngortinneqarnissaat. Taamaalilluni sanaartornermut atugassat
missingersuutit aammalu aningaasat atukkat sanaartornermut atukkat akornanni
nikittoornerit ukiup aningaasanut akuersissuteqarfiusup iluani malunnartumik
millisinneqaqqullugu.
Landskarsip naatsorsuutaasa
kukkunersiorneqartarnerannut atatsimiititaliap allanut tunngasut ukua
oqaaseqarfigisimavai tassalu Naalakkersuisoqarfinnut suliassaqarfik 10.19 aamma
Aningaasaqarnermut Ineqarnermullu Naalakkersuisoqarfimmi sulissaqarfik 20.29
Isumaginninnermut Sulisoqarnermut, Pisortallu suliffeqarfiutaannut
Naalakkersuisoqarfik suliassaqarfik 30-miit 39-mut. Kultureqarnermut
Ilageeqarnermut Ilinniartitaanermullu Naalakkersuisoqarfik suliassaqarfiit
40-nii 49-mut. Peqqinnissamut Avatangiisinut Ilisimatusarnermullu
Naalakkersuisoqarfik suliffeqarfiit 60-miit 69-mut aammalu Landskarsip
naatsorsuutaasa kukkunersiorneqartarnerannut atatsimiititaliap
suleqqinnissaminut tunngatillugu ukua suliarisimavai.
Ataatsimiititaliap tu..minut
atatillugu suliaqarfinni pingaarnerni ukunani Naalakkersuisunut
apeqquteqaateqarfigai. Naatsorsuusiornermut ilitsersuutip qarasaasianik
nakkutilliivik, suliffinnut atatillugu biilit taakkualu akileraarutitigut
nalikillillugit naatsorsuusiorneq Naalakkersuisut aamma aktiaateqarluni
ingerlatseqatigiiffiit aamma Namminersornerullutik Oqartussanit pigineqartut
akornanni kiffartuussinissamik isumaqatigiissutit. KNR-p
nalunaaruteqartarnerata nanginnissaa 1997-mi siunnersuutinik avataaneersuni
atuineq. Tassalu taakku amerlanersaat tigoreerismavagut suleqqinnissatsinnut
atortussagut.
Naggasiullugu Landskarsip
naatsorsuutaasa kukkunersiorneqartarnerannut atatsimiititaliap
isumaliutissiissutikkut ugguuna landskarsip naatsorsuutaanik saqqummiussilluni
oqaluuserinninnerup ataatsikkut pinissaanut siullermeerluni suliaqarpoq.
Landskarsip naatsorsuutaasa kukkunersiorneqartarnerannut atatsimiititaliap
inatsisartunut inassutigissavaa inatsisartut isumaliutissiissummut uunga
isumaqataanermikkut aammattaaq ataatsimiititaliap inassuteqaataanut tassa
landskarsip naatsorsuutaasa saqqummiunneqarnerat siunissami pisassasoq
katersuunneq Naalakkersuisut Landskarsip naatsorsuutaasa
saqqummiussiffissaatut kissaatigisaat ullunik 14-nik sioqqullugu. Taamaalilluni
Landskarsip naatsorsuutaasa kukkunersiorneqartarnerannut atatsimiititaliap
isumaliutissiissummik saqqummiussaqarnera uiggiutiinnarlugu pisalerluni.
Daniel Skifte, Aningaasaqarnermut Ineqarnermullu
Naalakkersuisoq, Akissuteqarpoq:
Aallaqqaamut siulittaasoq
qinnuigissavara naalisaanissannut akissuteqaatit agguaatereermata, taamaattumik
naalisaassaanga. Aatsaannguaq Landskarsip naatsorsuutaasa 1997-mut tunngasut
saqqummiuppakka. Taamaattumik naatsorsuutit inerneri uani oqaaseqarfigissanngilakka.
Inatsisartulli kukkunersiornermut
atatsimiititaliaat maanna isumaliutissiissumminnik ataatsimiititaliallu
maannamut sulisimaneranik
oqaaseqaataanik assigiinngitsunik saqqummiussaqarpoq. Aallaqqaasiullugu
oqaatigissavara nuannaarutigigakku paasillugulu suliniutit Naalakkersuisut
aallartissimasai arlallit ataatsimiititaliap iluarisimaarai.
Kukkunersiuinermut
ataatsimiititaliaq Grĝnlandsbankemi allaffissamik pisineq pillugu oqaaseqaateqarpoq.
Ilisimatitsissutigisinnaavara pisinerup qanoq ingerlasimanera pillugu
nassuiaammik aningaasaqarnermut ataatsimiititaliaq Naalakkersuisuninngaaniit
ilisimatitsissutinik nassinneqarsimammat. Taamaattumik nassuiaat taanna
apeqqutinik kukkunersiunermut ataatsimiititaliap saqqummiussaanik qulaajaasoq
innersuussutigissavara. Nassuiaat taanna aamma kukkunersiuinermut
ataatsimiititaliamut nassiunneqassaaq.
Boligstĝttemut ineqarnermullu
akiliutinut tunngatillugu akiitsut pillugit ataatsimiititaliap oqaaseqaatai
eqqarsaatigalugit Naalakkersuisut sinnerlugit ilisimatitsissutissavara
Bolitstĝttemut akiitsut illunut 2000-t missaannut agguataarsimammata.
Taamaattumillu ajornarluni peqatigisaanillu pissusissamisuussanani illunut
taamak amerlatigisunit anisitsiortussalluni pinngitsaaliilluniluunniit
arsaarinnissuteqassalluni.
Naalakkersuisut 1998-mi ukiakkut
ataatsimiinnermut inissialiornermut tapiissuteqartarnermut inatsisit
nutarterneqarnissaanut siunnersuuteqarniarput. Ilaatigullu
siunnesuutiginiarlugu Boligstĝtte pillugu peqqussummi atuuttumi
allanngortitsisoqarnissaa ilaatigut boligstĝttenut tunngasuni akiitsutigut
ajornartorsiutit atuuttut iluarsineqarnissaat siunertaralugu.
Ataatsimiititaliap uparuarpaa
1997-mut isumaginninnermut suliffeqarnermut pisortallu suliassaqarfiutaannut
pisortaqarfik naatsorsuutit pillugit nalunaarusiorsimanngimmat.
Ilisimatitsissutigineqarsinnaavoq nalunaarusiaq taanna maanna
suliarineqarsimalermat ataatsimiititaliamullu ingerlateqqinneqarsimalluni.
Kukkunersiunermut ataatsimiititaliap Naalakkersuisunut kaammattuutigaa
Kultureqarnermut, Ilageeqarnermut, Ilinniartitaanermut Naalakkersuisoqarfimmi
aningaasatigut aqutsinerup pitsaanerulernissaa sulissutigeqqullugu.
Tamatumunnga atatillugu
Naalakkersuisut malugeqqussavaat Naalakkersuisoqarfinni tamani aningaasatigut
aqutsinerup ineriartortinneqarlunilu pitsanngorsaavigineqartuarnissaa Naalakkersuisut
nalinginnaasumik ataavartumik Naalakkersuisut ingerlattuarmassuk.
Naalakkersuisulli immikkut maluginiarumaarpaat Kultureqarnermut,
Ilageeqarnermut, Ilinniartitaanermut Naalakkersuisoqarfimmi aningaasatigut
aqutsineq pitsanngorsarneqarnersoq.
Kukkunersiuinermut
ataatsimiititaliap isernartorsiorpaa suliffeqarfiit tamarmik suli naatsorsuuserinermut
ilitsersuusiorsimanngimmata. Naalakkersuisut majip 5-ni 1998 ataatsimiinnerminni
tamanna oqaluuseraat, suliniutissallu assigiinngitsut pillugit
aalajangiillutik. Taamaalillutik Naalakkersuisut naatsorsuutigivaat
ajornartorsiut maanna naammassiillugu iluarsineqassasoq.
Qitiusumik naatsorsuuserisoqarfik
Namminersornerullutillu Oqartussat kukkunersiuisui avataaneersut
ikiortigalugit. Suliffinnut atatillugu biilit taakkulu akileraarutitigut
nalingisa nalunaartutigineqartarnerat Naalakkersuisut aammalu aktiaateqarluni
ingerlatsiveqarfiit Namminersornerulluni oqartussanit pigineqartut akornanni
kiffartuussinissamik isumaqatigiissut KNR-p nalunaaruteqartarnerata
nanginnissaa. Kiisalu 1997-mi siunnersortinik avataaneersunik atuineq pillugu
ataatsimiititaliap Naalakkersuisut apeqqutigineqaatai eqqarsaatigalugit,
ilisimatitsissutigisinnaavara paasissutissiissutit kissatigineqartut Naalakkersuisunit kukkunersiunermut
ataatsimiititaliamut nassiunneqarsimammata.
Naggataatigut
oqaaseqarfiginiarpara ataatsimiititalip inassuteqaataa inatsisartut
ataatsimiititaliap isumaliutissiissutaanut isumaqataanermikkut inatsisartut
naatsorsuutaasa siunissami katersuunnissaq Naalakkersuisut landskarsip
naatsorsuutaasa saqqummiunneqarfissaattut tassa ullunik 14-nik sioqqullugu
saqqummiunneqartalernissaanik aammattaaq tapersiinissamik. Taamalu kukkunersiunermut
ataatsimiititaliap isumaliutissiissusiornera saqqummiussinermut
uiggiutiinnarlugu pisalerluni.
Naalakkersuisut isumaqarput
ukiakkut katersuunnissamut atatillugu saqqummiussinissaq tulluanngitsoq.
Tassami Naalakkersuisut isumaqartuarmata landskarsip naatsorsuutaasa inernerat
piaarnerpaamik saqqummiunneqartariaqartoq. Taamaalilluni inatsisartut
innuttaasullu nunatta aningaasaqarnikkut ingerlanneqarneranik
paasitinneqarnissaat piniassammata.
Aammalu inernera ilaassutitut
aningaasaliissutinut inatsimmut aammalu aningaasanut inatsisissatut
siunnersuutit suliarineqarnerinut atatillugu aningaasaqarniarnikkut
isumaliutinut ilanngunneqartarsinnaaniassammata. Naalakkersuisut naatsorsuutit
saqqummiunneqarnissaannut akisussaammata Naalakkersuisut
aalajangiusimaniarpaat naatsorsuutit suliarineqarnermik kingorna piaarnerpaamik
saqqummiunneqartarnissaat. Tamanna tunngavigalugu Naalakkersuisut kukkunersiunermut
ataatsimiititaliap landskarsip naatsorsuutaasa saqqummiunneqartarnissaat
pillugu inassuteqaataat isumaqatigalugu taasisiinnaanngillat.
Taarsiullugu Naalakkersuisut
siunnersuutigissavaatkingorna Naalakkersuisut landskarsip naatsorsuutai
Naalakkesuisut akuersiuinerisa kinguninngua kukkunersiunermut ataatsimiititaliamut
nassiuttassagaat. Tassalu imaappoq naatsorsuutit naqinneqarlutik
saqqummiunneqartinnagit kukkuneriuinermik nalunaarut tamatumunnga
akissuteqaatit ukioq maannatut piaarnerpaamik kukkunersiuinermut
ataatsimiititaliamut nassiunneqartassapput. Taamaalilluni ataatsimiititaliaq
upernaakkut kukkunersiuinermut atatillugu suliaminik aallartissinnaaniassammat.
Upernaakkut katersuunnissat
qaqugukkut inatsisartunit ukiut tamaasa allanngortinneqartarpoq. Taamaattumillu
upernaakkut katersuunnissamut atatillugu landskarsip naatsorsuutaasa qaqugukkut
saqqummiunneqartarnisaasa malittarisassaliornissaat assut ajornakusoorpoq.
Naalakkersuisut siunissami
anguniarpaat landskarsip naatsorsuutaanik saqqummiussisarnerup upernaakkut
katersuunnissaa ullunik 14-nik sioqqullugu pisarnissaa. Taamaattorli suliap
qanoq ittuussusia apeqqutaatillugu tamanna pillugu aalajangersimasumik
neriorsuuteqartinnani upernaakkut katersuunnissap ukiut tamaasa
allanngortinneqartarmat.
Naggataatigut oqaatigissavara
Naalakkersuisut sinnerlugit oqassaanga inassuteqaatit kaammattuutillu
kukkunersiunermut ataatsimiititaliap isumaliutissiissumminut ilanngullugit
saqqummiussai Naalakkersuisut tusaatissatut tigummatigit. Uangalu
Naalakkersuisut sinnerlugit kukkunersiunermut ataatsimiititaliaq suliaq pillug
qutsavigissavara. Suliassallu inatsisartunut oqaluuserisassanngortillugit.
Ruth
Heilmann, Partiip Siumup oqaaseqartua:
Qujanaq.
1997-mi landskarsip naatsorsuutaasa saqqummiunneqarnerinut tunngatillugu
Siumumii annertunerusumik uparuagassaqanngilagut. Naalakkersuisut sinnerlugit
Aningaasaqarnermut Ineqarnermullu Naalakkersuisup landskarsip naatsorsuutaanut
oqaaserisai tutsuiginartuutillugit iluarisimaarlugillu isumaqatigaavut.
Siumumiit maluginiarparput 1997-mi naatsorsuutit 89 mio. kr.-ninik
sinneqartoorfiusut. Uffa 1997-mi ilassutitut aningaasaliissutinut inatsisit
aappaata akuersissutigineqarnerani 152 mio. kr..ninik amigartooruteqarnissaq
naatsorsuutigineqaraluartoq.
Nuannaarutigaluguli
naatsorsuutit inernerisa Namminersornerullutik Oqartussanit pingaarnerusutigut
aningaasanik aqutsinerup naammaginartumik ingerlanera aammalu landskarsip
taarsigassaanik akilersuinitta ingerlatiinnarneqarsinnaanera takutinneqarmat.
Aammalu
Siumumiit maluginiarparput ukiumi naatsorsuuteqarfiusumi katillugit 4.178 mia.
kr.-niusut 1997-mut aningaasanut inatsimmi ilassutitut aningaasaliissutini
inatsisit 4.131 mia. kr-ninik aningaasaliisutigineqarsimallutik. Taamaattumik
47 mio. kr.-ninik isertitaqarnerusimalluta imaluunniit assigiinngissut
1,1-ulluni. 1996-mi naatsorsuutinut saqqummiunneqartuniit 0,2 %-nik
qaffalaarsimallutik.
Kiisalu
Siumumiit maluginiarparput sanaartugassanut pilersaarutaasut ilaannut 16 mio.
kr.-nit ileqqaarneqarsimasut. Taakkua saniatigut 1997-mittaaq 162. mio.
kr.-nillu sanaartugassatut assigiinngitsunut kinguartoornerit pissutaallutik
atunngitsoorneqarsimallutik. Siumumiillu 1997-mi sanaartornikkut
atunngitsuukkat nalilersorluariarlugit 1998-mi ingerlanneqarnissaat kissaatigaa.
Taamatut
oqaaseqarluta landskarsip 1997-mi naatsorsuutit naammaginartutut isigalugit
akuersaarpagut. Landskarsip kukkunersiunermut ataatsimiititaliaani
kukkunersiuinermut oqaaseqaatit aallaavigalugit Siumumiit nalilersorluarialugit
imatut naatsumik oqaaseqarfissavagut.
Siorna
ukiakkut landskarsip naatsorsuutai pillugit kukkunersiunermut
ataatsimiititaliap kissatigisaata inatsisartunit ilalerneqartup
malitsigisaanik Siumumiit nuannaarutigaarput landskarsip naatsorsuutaasa
saqqummiunneqarneranut atatillugu kukkunersiuinermut ataatsimiititaliap
inassuteqaatiminik saqqummiussaqarnissaa anguneqarsimammat.
Tamatuma
takutippaa Aningaasaqarnermut Naalakkersuisoqarfiup inatsisartullu
kukkunersiunermut ataatsimiititaliata suleqatigiillutik suliassamik
pingaartitsillutik sulilluarsimanerat. Landskarsip 1997-mut naatsorsuutai
pillugit kukkunersiunermut ataatsimiititaliap isumaliutissiissutaa aammalu
Naalakkersuisup akissutaanut tunngatillugu Siumumiit imatut oqaaseqassaagut.
Siumumiit
nuannaarutigaarput 1996-mi naatsorsuutit kukkunersiorneqarneranut atatillugu
uparuarneqarsimasut 1997-p naatsorsuutaasa kukkunersiorneqarneranut atatillugu
pitsanngoriaataasutut tikkuarneqartut arlaqaqisut aaqqiivigineqarsimammata,
ilaalu suli aaqqiiviginiarneqarlutik. Aammalu iluarisimaarlugu landskarsip
naatsorsuutaanik kukkunersiuisut avataaneersut kukkunersiuisut oqaaseqaataannit
uparuaallutik oqaaseqarsimannginnerat.
Inatsisartut
kukkunersiunermut ataatsimiititalianit Siumup suleqataanera tunngavigalugu
kukkunersiuinermik ataatsimiititaliap sulereerluni oqaaseqaatai
inassuteqaataalu tunngaviatigut tapeserpagut.
Knud Sĝrensen, Atassutip oqaaseqartua:
Oqaaseqajuippallaaqigama takinaalaassavakka.
Landskarsip 1997-mut naatsorsuutai 89mio. kr.-ninik sinneqartooruteqarsimasut
Aningaasaqarnermut Ineqarnermullu Naalakkersuisumit saqqummiunneqartut
Atassummiinngaaniit iluarisimaarpagut.
Ingerlatsinermut, sanaartornermut
taarsigassarsisitsisarnermullu aningaasartuutissat kiisalu 1997-mi landskarsip
aningaasanut inatsisaanut ilassutitut aningaasaliissutinut inatsisip aappaata
akuersissutigineqarnerani 152 mio. kr.-ninik amigartooruteqarnissaq
naatsorsuutigineqarsimagaluartoq 1997-mi landskarsip aningaasartuutissanut
isertitassaanullu naatsorsuutinut sanilliukkaanni 141 mio. kr.-ninik
pitsanngoriaateqarsimanera Atassummiinngaaniit tulluusimaarutigaarput.
Landskarsip 1997-mi isertitai
4.178 mia. kr.-ninik amerlassuseqarput, 47-nik pitsanngoriaateqarlutik.
Pitsanngoriaatit amerlanersaat akileraarutitigut isertinneqarsimapput.
Matumuuna Atassumminngaaniit oqaatigissavarput landskarsip isertitaasa 4.178
mia. kr.-niusut taakkunannga 2.512.mia. kr.-nit Qallunaat naalagaaffiata
Namminersornerullutik Oqartussanut tapiissutigisimammagit. Tassa landskarsip
isertitaasa tamarmiusut 60 %-tii.
Aamma Atassumminngaaniit
Namminersornerullutik Oqartussat nunanut allanut akiitsui suli 881mio.
kr.-ninik amerlassuseqarmata. Taakkulu pinngitsooratik akilersorneqartussaallutik.
Tassa landskarsip nunatsinni akileraarutitigut, nioqqutissat akitsuutaasigut
allatigullu isertittagaasa 1.666. mio kr.-usut 52 %-tii Qallunaat
naalagaaffianit ataatsimoortumik Namminersornerullutik Oqartussanut
tapiissutaat ilanngunnagit.
Tamakku aamma pisariaqalersippaat
aningaasatigut ingerlatsinermi paarsilluarnissaq. Qujanartumik ukiuni
kingullerni Namminersornerullutik Oqartussat aningaasatigut ingerlatsinerat
pitsanngoriartuinnarsimavoq. Soorlu landskarsip 1997-mi naatsorsuutaasa
saqqummiunneqartut tamanna aamma takutikkaat. Matumuuna Atassummiit
aningaasatigut ingerlatsilluarnerup nangittumik ingerlateqqinneqarnissaa
Naalakkersuisunit kaammattuutigissavarput.
Aamma Atassummiit
piumasarissavarput Namminersornerullutik Oqartussat allaffissornikkut
ingerlatsilluarnissaat pikkorissunillu sulisoqarnissaat eqqarsaatigalugit
pisortaqarfiit ukiut tamaasa sulisorisanik nalunaarsuusiortalernissaat
Atassummiit assut pingaartutut isigigatsigu. Tassa suliassat suulluunniit
pitsaasumik suliarineqartarnissaat naammassineqartarnissaallu tamatumani aamma
pingaartutut isigilluinnaratigu.
Tassalu Atassumminngaaniit
landskarsip 1997-mi naatsorsuutaanut oqaatigiumasagut.
Taavalu atagu
kukkunersioriartigit. Atassumiit Kukkunersiunermut Ataatsimiititaliap isumaliutissiissutaa
misissorluareerlugu oqaatigissavarput Kukkunersiunermut Ataatsimiititaliap
isumaliutissiissutaa annertuujummata malunnarluni peqqissaartumik
malittarinnilluarlunilu suliaasoq. Pissutsit assigiinngitsut
malittarilluarneqarlutik misikkarissumik uparuarneqartarsimapput, arlitsigullu
inassuteqaatit piumasaqaatillu ersarissut aammalu sanioqqukkuminaatsut
tikkuarneqarlutillu kissaatigineqartarsimallutik. Naatsumik oqaatigalugu
kukkunersiuineq eqqortoq.
Atassummit maluginiakkatta ilagaat
landskarsip naatsorsuutaasa pissusissat eqqorlugit suliarineqarsimanerannik
ataatsimiititaliaq qularuteqarani ersersitsinera. Tamanna suli pitsanngoriarnermik
ersersitsimmat minnerunngitsumillu naatsorsuutinik kukkunersiuisartut
avataaneersut kukkunersiuisutut oqaaseqaatiminni ippiginnillutik
oqaaseqaateqarsimannginnerat pissutsit ilorraap tungaanut saassimanerannik
ersersitsisuuvoq paatsoorneqarsinnaanngitsoq.
Tamakku pissutigalugit Atassummit
ataatsimiititaliap kukkunersiuisimanerminik isumaliutissiissummini
nalunaarsorsimasai immikkut oqaaseqarfigissanngilagut ataatsimulli
isiginninnerulluta uparuarnerqarsimasut iluarseqqusallu piaartumik
aaqqiivigineqarnissaat kissaatigissallutigu. Ilami qangamut naleqqiullugu
naatsorsuutit kukkunersiuisullu isumaliutissiissutaat oqaasissaalatsiffiulersimapput.
Atassummiilli
uniffigitsiarniagarput ataaseq tassaavoq, Grĝnlandsbankip illuutaanut
pisinermut atatillugu Naalakkersuisut oqaatigimmassuk Danmarkimi inatsiseqartoq
nakkutillliinermut nalunaarusiortoqartarnissaanik illu niuernermik pisisoq
tunisisorlu illersorniarlugit. Oqarlutillu inatsimmik taamaattumik
inatsiseqarneranik maani inatsisartut akuersissuteqarsimanngitsut.
Tamanna pissutigalugu Atassummiit Naalakkersuisut
piumaffigissavagut inatsit taanna Danmarkimi atuuttoq nunatsinnissaaq
atuutilernissaa piaartumik sulissutigeqqullugu. Taamaalilluni ajornartorsiut
pineqartoq siunissami piareersimaffigineqarsinnaaleqqullugu.
Atassummiit malugaarput Aningaasaqarnermut
Ineqarnermullu Naalakkersuisup Kukkunersiunermut Ataatsimiititaliap
isumaliutissiissutai assigiinngitsut ilaatigut Naalakkersuisoqarfinnut
ataasiakkaanut tunngasuni erseqqissunik akissuteqarfigisimagai. Aammali malugaarput allatigut inussiarniinnerulaartartoq.
Arlaqartutigut iluarsiissutissat aallartereersimanerat aammalu naammassiniagassat
iluarseqqusallu kaammattuutigineqarnerat naammaginartumik pisarsimavai.
Tamanna pillugu Atassummiit immikkuualuttut
tamaasa pullaviginagit akissummi pisariaqartinnerusagut
oqaaseqarfigilaassavagut. Atassumminngaaniit maluginiarparput suliffeqarfiit
ataasiunngitsut naatsorsuuserinermik suli ilitsersuusiorsimanngitsut. Kiisalu
marlussuit naatsorsuutinik atsiorsimanngitsunik
nassiussaqarsimagaluarmigillutik. Kingusinnerusukkut aatsaat iluarsiivigisimasaminnik.
Tamakkua kipiluttunarput taamaattumik Naalakkersuisut tamatumap iluarsineqarnissaanik
aalajangernerat kinguneqarluartussatut neriugaarput. Taamatummi ingerlaannartoqarsinnaanngilaq.
Atassummiit ajuusaarutigalugu
paasivarput ataatsimiititaliap kissaataa tassa ulluni 14-ni landskarsip
naatsorsuutaasa saqqummiunneqarnissaannik sioqqullugu atortussat
ataatsimiititaliamut saqqummiunneqartarnissaannik imaqartoq, tamanna
Naalakkersuisut akuersaanngikkaat. Atassummiit inassutigissavarput tamanna
ajornartinnagu naammassiniartaqqullugu.
Taamaakkaluartoq Naalakkersuisut
siunnersuutigisaat tassa landskarsip naatsorsuutaasa assilisaallutik
ataatsimiititaliamut Naalakkersuisut naatsorsuutinik naammassillugit
suliarereerneranni nassiussisarumallutik siunnersuutaat
naammagivinngikkaluarlugu Atassummiit akuerisinnaavarput.
Siorna Atassummiit
Kukkunersiunermut Ataatsimiititaliap isumaliutissiissutaanut atatillug
apeqquserparput ilumut tulluuttuunersoq Namminersornerullutik Oqartussat
ataanni suliffeqarfiit tamarmik kukkuneriuisoqafimit aalajangersimasumik
ataatsimik atuinerat ukiorpassuarni ingerlanneqartoq
taamaaginnartariaqarnersoq.
Assersuutigalugu oqaatigisinnaavarput nunatsinni kommuneqarfiit
assigiinngitsut immikkut nunatta aamma avataanit kukkunersiuisoqartitermata.
Atassummiit apeqqutigissavarput
Naalakkersuisut tassunga atatillugu qanoq iliulersaarnersut.
Mannarsi Berthelsen, Inuit Ataqatigiit oqaaseqartuat:
Inuit Ataqatigiinninngaaniit
immikkoortoq 6-at 59-sissaallu ataatsimoortillugit oqaaseqarfigissagatsigit.
Inuit Ataqatigiinniit maanna ataatsimiinnermi landskarsip ukiup siulianut
naatsorsuutai saqqummiunneqartut aammalu landskarsip naatsorsuutaasa
Kukkunersiorneqarnissaanut Ataatsimiititaliap isumaliutissiissutaa imatut
oqaaseqarfigissavagut.
Inuit Ataqatigiit
akuersaarsinnaanngilarput landskarsip naatsorsuutai inatsisartut
ataatsimiinnerat aallartereersoq aprilip 27-ani inatsisartunut ilaasortanut
aatsaat agguaanneqarsimanerat. Tamanna inatsisartut Kukkunersiunermut
Ataatsimiititaliani sukumiisumik suliniarnitsinnut annertuumik
kinguarsaataasimavoq. Naalakkersuisuniit tusagassiorfiit aqqutigalugit aprilip
24-ani landskarsip naatsorsuutai suliluunniit inatsisartut Kukkunersiunermut
Ataatsimiititaliaani takoqqusaanngitsut saqqummiunneqarnerat. Innuttaasut
inatsisartuni qinikkatik aqqutigalugit oqartussaaqataanerata
Naalakkersuisooqatigiinnit innarlerneqarsimasutut Inuit Ataqatigiinniit
isumaqarfigaarput.
Siunissami taamatut
pisoqaqqinnginnissaa qularnaarniarlugu inatsisartut Kukkunersiunermut
Ataatsimiititaliaata isumaliutissiissunni aqqutigalugu inassuteqaataanut Inuit
Ataqatigiinniit sakkortuumik tapersiivugut. Tassa landskarsip naatsorsuutaasa
saqqummiunneqarnerat siunissami pisassasoq upernaakkut inatsisartut
ataatsimiinnissaat ullunik 14-nik sioqqullugu.
Kukkunersiunermut
Ataatsimiititaliap piumasaqaataata Naalakkersuisunit malinneqarnissaa
ajornartutut isigisariaqarsorinanngilaq takusinnaasagummi malillugit
Aningaasaqarnermut Naalakkersuisup landskarsip naatsorsuutaasa
saqqummiunneqarnissaat siunertaralugu saqqummiusissut aprilip 7-ni suliaralugu
naammassereersimavaa.
Inuit Ataqatigiit landskarsip
naatsorsuutaat kusanartumik naqitikkat maluginiarsimavagut. Imarisaali ukiunut
siuliinut sanilliullugit paasiuminaatsunngortinneqarsimanerat akuersaarsinnaanngilarput.
Isumaqarpugut naatsorsuutit tamanut paasinartunngorlugit saqqummiunneqartariaqartut.
Naammanngilaq aningaasartuutit isertitallu ataatsimut kisitsisinngorlugit
saqqummiunneqarnerat.
Naalakkersuisut inatsisartunut
pisussaaffigaat landskarsip naatsorsuutai saqqummiutissallugit naatsorsuutit
immikkoortiternerat ilanngullugit tassa specifikationertai.
Naatsorsuutit
saqqummiunneqartut aningaasartuutaasut
immikkoortiternerat ilanngunneqarsimannginnerat ilaatigut makkuninnga
apeqqusiivoq. Sooq Naalakkersuisut ingerlatsinerminni aningaasartuutissatik 28
%-mik qaangersimavaat. Sooq inatsisartut ingerlatsinermut aningaasartuutissatik
41 %-tii atunngitsoorsimavaat. Tamakkuupput inatsisartuni Kukkunersiunermut
Ataatsimiititaliaq aqqutigalugu nassuiaqartariaqartut.'
Inuit Ataqatigiit
toqqissisimanartuutinngilaat Isumaginninnermut Suliffeqarnermut Pisortallu
suliffeqarfiutaannut Pisortaqarfiup naatsorsuutitigut nalunaarummik
ilanngussaqarsimannginnerat. Tamanna akuersaarneqarsinnaanngilaq.
Patsisiginiarneqarpoq maannakkut sulisuusunit 33-usunik taamaallaat aqqanillit
ukioq ataaseq sivisunerumilluunniit Pisortaqarfimmi sulisimanerat.
Tamanit ilisimaneqarpoq
Pisortaqarfik piffissami qaninnermi inatsisartunit annertuumik suliakkerneqarnikuummat
pingaartumik inunnik isumaginninnermut ataatsimiititaliarsuup isumaliutissiissutaata
malitseqartinneqarnissaa tamanit utaqqikatanneqartoq.
Taamaattumik Naalakkersuisut
Pisortaqarfimmi sulisoqarnikkut pissutsit piaartumik aaqqinniarlugit
iliuuseqarnissaat Inuit Ataqatigiinniit kaammattuutigissavarput. Sanaartugassat
ukioq aningaasaliiffiusumi atorneqartannginnerat landskarsip naatsorsuutaanut
taamatuttaaq landskarsip aningaasanut uninngasuutaanut eqqunngitsumik
takussutissiisarnerat ukiuni arlaqalersuni Kukkunersiuinermik
Ataatsimiititaliami uparuartorneqartuartoq Naalakkersuisut inatsisartut
Aningaasaqarnermut Ataatsimiititaliaat peqatigalugu piaarnerpaamik siunissami
suleriaasissamik nutaamik ujartueqatigisariaqaraa Inuit Ataqatigiit
isumaqarput.
Ataatsimiititaliami
suliniarnitsinni ajornartorsiutit tikkuakkagut suliarineqarnissaat naatsorsuutigalugu
landskarsip naatsorsuutai ataatsimut isigalugit oqaaseqarfigissavagut.
Ukioq manna landskarsip
naatsorsuutai kingumut naatsorsuutiginngisamik sinneqartoorfiupput.
Tamatumatumani kingumut takutinneqaqqippoq, aningaasanik aqutsinerup naammaginartumik
ingerlanneqannginneranik. Naatsorsuutinik 241 mio. kr.-ninik uniuineq
Aningaasaqarnermut Naalakkersuisup saqqummiinermini oqaasii tamatumani aningaasanik aqutsilluarnerup kingunerisaanik
patsiseqartitsiniarnera Inuit Ataqatigiit eqqunngitsumik naliliinertut isigaat.
Sinneqartoorutit taaneqartut ilaat
188 mio. kr.-niusut sanaartornermut atunngitsuukkaneersuupput.
Atunngitsuukkanillu inatsisartut ilassutitut aningaasaliissutinut
inatsisissaanut TB 1 98 aqqutigalugu ukioq manna aningaasartuutaasussaapput.
Naningittumik Inuit Ataqatigiit
aningaasaliissutit ukiumi atugassiissutigineqarfimminni atorneqartarnissaanik
isumannaarinninnissaq ilungersuullugu piviusunngortitsisoqarnissaanik kissaateqarnerput
uteqqissavarput. 1997-mut naatsorsuutit Namminersornerullutik Oqartussat
kukkunersiuisunit avataaneersunit immikkut oqaaseqarfigineqannginnerat
maluginiarparput. Taamaalilluni naatsorsuutit ataatsimut isigalugit eqqortutut
isigaagut.
Inuit Ataqatigiit landskarsip
naatsorsuutaasa kukkunersiorneqartarnerannut ataatsimiititaliap landskarsip
naatsorsuutai pillugit isumaliutissiissutaa imartooq qanimut annertuumik
suleqataaffigisimasarput annertunerusumik oqaaseqarfiginagu naggataatigut
Inuit Ataqatigiinninngaaniit oqaatigissavarput Kukkunersiuinermut
Ataatsimiititaliap isumaliutissiissutaani uparuartorneqarsimasut
Naalakkesuisunit aaqqinniarnissaat naatsorsuutigalugu isumaliutissiissut
tamakkiisumik taperserparput. Naammassineqanngitsulli ukiamut immikkut
isumaliutissiissumik saqqummiinikkut suliarineqarpata suleqataajumaarluta.
Bjarne
Kreutzmann, Akulliit Partiiata oqaaseqartua:
Landskarsip
naatsorsuutai pisarnittut assut soqutigalugit atuarsimavakka. Taavalu
naatsorsuutinut nassuiaatinut assigiinngitsuni pingaarnerutillugu maluginiarsimasara
tassaavoq sulisussaaleqinerujussuaq. Tassani pineqarput meeqqat atuarfiat
aamma peqqinnissaqarfik. Tassani pineqarput Isumaginninnermut, Sulisoqarnermut
Pisortallu suliffeqarfiinik Pisortaqarfik, aamma Sulisoqarnermik Pisortaqarfik,
Akileraartarnermik Pisortaqarfik aamma Peqqinnissamut Ilisimatusarnermullu
Pisortaqarfik. Imaassinnaavoq minitaqartunga taagukkannillu suli amerlanerugaluartut.
Tamatumunnga
suna pissutaava. Aamma ataatsimut isigalugit apeqqutissaqarpunga tassalu
tjenestemandinut tunngatillugu akissaatitigut aaqqiissuteqarnissaq tamatuma
isumaqatigiissutigineratigut akuersissutigineratigullu pisussaq tamanna pivoq
1998-mi januarimi (?) 1. april 97-mut kingumoortumik malunniuttussaalluni.
Akissaatinut aaqqiissut taanna 1997-mut naatsorsuutini kontomi sorlermiippa?
Immaqaluunniit aatsaat 1998-mi naatsorsuutini.
Tamanna
pingaaruteqarpoq ilisimassallugu tassa naatsorsuutini atuarlugu 1997-mi
sinneqartoorutit inatsisartut 1998-mi ilassutitut aningaasaliissutit
inatsissaannut siullermut atatillugu atorneqareersimasut. Tamatuma saniatigut
takusinnaavakka Aningaasaqarnermut Ataatsimiititaliap oqaaseqaatai aamma
Kukkunersiuinermut Ataatsimiititaliap oqaaseqaatai arlalitsigut imminnut
ataqatigiilluinnartut. Taamaattumik uteqattaaralunga asuli qasusaannarniarnasi
oqaannassaanga sanaartornermut tunngasuni ajortoqartoq taannalu qanoq
iliuuseqarfigisariaqartoq.
Tamaattoq
isumaqarpunga pilersaarutinik aqutsinermik sakkussatut Kukkunersiuinermut
Ataatsimiititaliamit siunnersuutigineqartut aaqqiissutissatut naammanngitsut.
Taamaassimasuuppat Pisortaqarfiup tamakku sanaartornermut
aningaasaliissutitigut pisiarereersimassagaluarpai. Isumaqarpunga
sakkortunerusumik allannguuteqartitsisoqartariaqartoq ilaatigut aningaasaliissuteqarnermi
periaaseq ataatsimut isigalugu. Piffissaliiisanermut tunngatillugu
kissaatiginartinneruara landskarsip naatsorsuutaasa kukkunersiorneqareerlutik
upernaakkut ataatsimiinnermi tunniunneqartarnissaat. Tassa maanna
kukkunertalinnit tunniunneqarsimasunut taarsiullugu.
Landskarsip
naatsorsuutai ataatsimik marlunnilluunniit kisitsinerliugartallit
misissuataarlugit eqqarsaqqajaananngitsuunngilaq kukkunerit taakkuinnaanersut
imaluunniit naatsorsuutit sinneri tutsuiginarnersut, tamannalu
naammaginanngilaq. Tassani eqqarsaatigaakka konto 40.11.30 kalaallisuuani
qupperneq 110-miittoq aammalu 60.10.30 qupperneq 155-miittoq.
Taavalu
massakkut kontot ataasiakkaat oqaaseqarfigissavakka. Konto 10.01.11 nunaqarfiit
pillugit ataatsimeersuarneq. Tassunga tunngatillugu apeqqutigissavara taamak
annertutigisumik atuineruneq sumik patsiseqarnersoq. Konto 10.10.10
Naalakkersuisut tassunga tunngatillugu apeqqutigissavar ingerlatsinermi
aningaasaliissutit taamak annertutigisut qaangerlugit atuisimanermut suna
pissutaanersoq. Konto 12.01.01 Danmarkimi allaffik, allaffissorneq, tassani
apeqqutigissavara taanna sumut tunngassuteqarnersoq.
Aamma
sooq 400.000-niiit 375-nik ingerlaannartumik nalikilliliisoqarsimanersoq. Konto
22.01.10 isumakkeerinninnerit aamma konto 22.06.33 isumakkeerinninnerit aamma
konto 22.10.12 inissianik attartortittakkanik ingerlatsineq.
Attartortitsinikkut annaasat aamma 22.10.20 til 22 taarsigassarsiarititatigut
akiitsut, ineqarnermut akiliutit taakkununnga tunngatillugu oqaatigissavara
aningaasarpassuummata isumakkiiginnarneqartartut, annaaneqarlutillu.
Tamanna
siornatigut oqallisigereersimavarput taamalu pisoqartarnera pinngitsoorniarlugu
suliniuteqartoqartariaqarpoq. Naammaginanngilaq taamak amerlatigisut akiliineq
ajormata iluattitsisarlutillu.
Tassunga
aamma tunngavoq konto 24.12.10 til 13 kinguppannut akileraarut.
Taarsigassarsiarititatigut akiitsut. Kontomut pingaarnermut 24.10-mut
tunngatillugu akuersaarneqarsinnaanngilaq aningaasaliissutit naatsorsuutillu
taamak nikinganeqartigimmata.
Konto
24.01.12 akileraarutini maani annaasat iluarinarpoq aningaasaliissutini
atuinissaq pisariaqarsimanngimmat. Konto 24.01.20 akileraartitsinermi
akiliisitsissutit tassani aamma iluarinarpoq isertitat naatsorsuutigisamit
ikinnerusimammata. Tassa naatsorsuutigigakku tamatumunnga patsisaasoq tassaasoq
akileraartitsinermi ikinnerusumik akiliisitsisoqarsimasoq.
Isumaginninnermut
Suliffeqarnermut, Pisortallu Suliassaqarfiutaannut Pisortaqarfiummut
tunngatillugu akuersaarneqarsinnaanngilaq naatsorsuutinut nassuiaatinik
tunniussisoqarsimanngimmat. Konto 40.01.01 Kultureqarnermut
Ilinniartitaanermut Ilageeqarnermullu Pisortaqarfik allaffissorneq tassani
akuersaarneqarsinnaanngila, taamak atuinerutigisoqarsimammat.
Konto
40.12.21 oqaatsinik pikkorissarfik tassunga tunngatillugu akuersaarsinnaavara
taamak atuinerutigisoqarsimammat tassa taamatut nutaajutiginera
eqqarsaatigalugu kisianni taamak pisoqaqqittariaqanngilaq. Ilageeqarnermut tunngatillugu atuinerunermut
tunngatillugu nassuiaat paasisinnaanngilara illuutinik pisoqaanersusunik
kinguartinneqarsinnaanngitsunillu iluarsagassaqarsimappat sanaartukkanut
aningaasaliissutini atuinerusoqartussaagaluarpoq. Kisianni naatsorsuutit
malillugit atuinikinnersusoqarsimavoq.
Peqqinnisamut
Avatangiisinullu Pisortaqarfimmut tunngatillugu kiisami iluarisimaarpara, tassa
aningaasaliissutit atuinerullu kisitsisaat imminnut naapertuutinnguatsiarmata.
Oqaluttuassartaa aningaasanillu atuineq pillugit tamakkiissumik
paasissutissiisoqarsimannguatsiarpoq.Ukiuni kingullerni arlaleriaqalunga
ujartortarsimavara peqqinnissaqarfimmi aningaasanik pisariaqartitsinerup
eqqortup nalunaarutigineqarnissaa, tassanilu allaffimmi atorfillit
Naalakkersuisunullu ilaasortaq uparuaavigisarsimavakka, tassa aningaasanut
inatsisissamut atatillugu pisariaqartitsinerup ilaannaa
nalunaarutigineqartarmat, taavalu ukiakkut ataatsimiinnitsinni ilassutinik
aningaasaliissoqartarluni, taamaalillini taakkunani marlunni katillugit 2
procent ataatitsiarlugu atuinerusoqartarluni.
Ajornartorsiut
paasequllugu oqaatsit sakkortuut atortariaqartarsimavakka, taamaattumillu
nuannaajallannarpoq maanna tamanna qaanngerneqarsimammat, taamaattumillu
allaffimmi atorfillit Naalakkersuisunullu ilaasortaq matumuuna
nersualaarusuppakka tamaat qulaarlugu saqqummiussimmata.
Konto
70.01.01 Takornariarnermut, Angallasinermut, Niuernermut, Attaveqaatinullu
Pisortaqarfik, tassunga tunngatillugu uparuassavara assut annertuumik
atuinerusoqarsimammat.
Taama
oqaaseqarlunga Landskarsip naatsoruutaasa kukkunersiorneqarnerannut
Ataatsimiititaliap Landskarsip naatsorsuutai pillugit isumaliutissiissutaa
akuersaarpara.
Taava
59-i pillugu naatsunnguamik, tassa immikkoortumut Landskarsip naatsorsuutai
oqaaseqaatigisimasakka innersuullugit
isertitat aningaasartuutillu sukumiinerusumik nalunaarsorneqarnissaannik
Kukkunersiunermi Ataatsimiititaliap kissaataa qujarullugu tiguinnassavara,
taamatullu aamma Kukkunersiuinermut Ataatsimiititaliap sunarpiaq
kissaatiginerlugu sukumiinerusumik allaaserinninnissaannik Naalakkersuisut
neriuuteqarnerat isumaqatigalugu.
Upernaakkut
katersuunnissap aallartinnissaa minnerpaamik ullunik 14-inik sioqqullugu Landskarsip
naatsorsuutaasa saqqummiunneqartarnissaasa anguniarnissaa aamma isumaqatigilluarpara,
paasigakku Kukkunersiuinermut Ataatsimiititaliap inassuteqaatai kaammattuutaalu
Naalakkersuisut tusaatissatut tigugai, uanga aamma isumaliutissiissut
tusaatissatut tiguara.
Anthon
Frederiksen, Kattusseqatigiit:
Landskarsip
1997-imut naatsorsuutai soqutigalugit
Kattusseqatigiit sinnerlugit misissorsimavakkat imatullu naatsumik
oqaaseqarfigissallugit:
Sanaartornermut
keermiaasit kinguaattoorutit eqqarsaatigissanngikkaanni, Landskarsi 1997-imi 89
mio-inik sinneqartoorpoq, kisianni sanaartornermut kinguaattoorutit l88
mio-inik amerlassuseqartut Landskarsip naatsorsuutai pinnernerulersippai,
tassami sanaartorneq pissutsinut piviusunut naapertuuttumik
ingerlanneqaraluarpat Landskarsip ataatsimut katinnerini 1997-imi 99
mio.-ininik amingartoorffiusumik naatsorsuutitigut
takussutissiissagaluarmat.Aammalu taarsigassarsititsisarneq ukiuni kingullerni
annikillisikkaluttuinnarneqartoq, taamaattorlu illuatungaatigut
ilinniagaqartunut taarsigassarsiaritinneqartartut amerlingaluttuinnartut
atuisartut tungaanniit qiviaraanni, oqartoqarsinnaavoq: Landskarsi
naammaginartumik naatsorsuutit tungaasigut ingerlavoq, kisianni inuiaqatigiinni
pissutsit ataatsimut isigalugit ilaatigut ajorluinnarput, soorlu nukissiorfinni,
atuarfeqarfinni, peqqinnissaqarfinni ilaallu ilanngullugit.
Taamaattumik
Kattusseqatigiinniit ilungersortumik
kaammattuutigeqqissuarput, inuiaqatigiinni ajornartorsiutit iluarsisariallit
milliardit tallimat arfinillit missaani nalillit iluarsineqarnissaat
pimoorunnerullugit suliniutigeqqullugit. Naammanngilarmi Landskarsip
naatsorsuutai kisimik naammaginakannersumik ingerlanneqassappata.
Taamatut
naatsumik oqaaseqarlunga Landskarsip 1997-imut naatsorsuutai Kukkunersiuinermut
Ataatsimiititaliami inaagassanngorlugit suliareqqinneqarnissaat inassutigaara.
Taavalu
Larskarsip naatsorsuutasa Kukkunersiorneqartarnerannut Ataatsimiititaliap
isumaliutissiissutaa aamma Kattusseqatigiinniit soqutigalugu misissorsimavara,
ataasiakkaallu imatut oqaaseqarfigissallugit:
Ataatsimiititaliap
Inatsisartut ukiakkut 1997-imi ataatsimiinneranni Naalakkersuisunut kaammattuutigisai
malinneqarsimagaluarlutik ulloq manna tikillugu naammassineqarsimanngitsut
paasillugu soorunami pakatsinarpoq, Kattusseqatigiinniillu Ataatsimiititaliaq
tapersertariaqarsoraara tassa ingerlatsinermut aningaasartuutinik
peqqissarnerusumik naatsorsuisalernissaq pisortat aningaasanik qanoq
atuisarnerannik innuttaasut paasinninnerulernissaannik aqqutissiuusseqataanissaq
eqqarsaatigalugu qularnanngitsumillu aamma aningaasartuutikillisaanissamut
taamaalillini iluaqutaasinnaanera anguneqarsinnaammat.
Sanaartornermi
nikingasoorutit ukiut tamarluinnaasa uparuartorneqartuarput aamma Inatsisartuniit.
Taamaatumik Naalakkersuisut aperisariaqalerput ilumut piumassuseqannginnersut
pissutsit iluarsiivigineqarnissaannut suliniuteqassallutik?
Grĝnlandsbankip
illuutaanik pisisimaneq aamma qularnanngitsumik oqaluttartut nuutaatut
kigarnikutut utikulunneqartussanngorpoq, pisisimanermi akisussaasut
isaassalerlugu Asinnartoorsimanerat@
pissutigalugu. Tassami kukkunermut akisussaasumik ujarlissagaanni periarfissat
arlaqanngillat. Taamaattumik Naalakkersuisup akissuteqaammini assamminik
errotuiniarsarinera tunngavissaqaranilu akuersaarneqarsinnaanngilaq.
Taamaammat
Kukkunersiuinermut Ataatsimiititaliap piumasaqaataa kukkunermik qulaajaanissamik
siunertalik tapersertariaqarpoq. Kattusseqatigiinniit akuersaarsinnaanngilarput
Isumaginninnermut, Suliffeqarnermut, Pisortallu Suliassaqarfiutaanni
Pisortaqarfummut naatsorsuutitigut nalunaarummik 1997-imi
suliaqartoqarsimannginera.
Kiisalu
Kultooreqarnermut, ilinniartitaanermut Ilaageqaarnermullu Naalakkersuisoqarfik
aningaasaaliissutinik immikkoortinneqartut sipporlugit atueqqinnginnissaanik
piumaffigineqartariaqartoq Kattusseqatigiinniit kaammattuutigissavarput.
Taamatut
naatsumik oqaaseqarlunga aammalu naggataatigut Naalakkersuisut naatsorsuutit
saqqummiunneqartarnerannut tunngatillugu utoqqatsissutaat paasillugu
akuersaarpara, Ataatsimiititaliallu isumaliutissiissutaa tusaatissatut
tigullugu.
Daniel
Skifte, Aningaasaqarnermut Ineqarnermullu Naalakkersuisoq:
Qujanaq,
siullermik partiit tamarmik akissutaannut qujavunga. Qujanarujussuaq.
Taava
partiit ataasiakkat oqaaseqaattinut oqaaseqalaasaanga, siullermik naatsorsuutit
pillugit.
Maluginiarpara
partiit anginerit marluk ilinniagassartik ilinniarluarsimagaat, taamaattumillu
imatut oqariartuuteqatut, soorlu Siumut Atassullu, annertunerusumik
uparuagassartaqanngimmata, taamaattumik tamakkua tusaatissatut tiguagut,
aammalu immikkut nuannaarutigaara qiimmaallaatigalugulu Siumup oqaatsit soorlu
tutsuiginartumik saqqummiinerit eqqartormagit.
Aamma
taamaappoq Landskarsip naatsorsuutai ataatsimut isigalugit akuersaarumammatigit.
Atassut aamma taamatut oqaaseqarfigissavara. Atassumminngaannit
iluarisimaarneqarnerat aamma ajunngitsutut aammalu tulluunnartutut
qujanartutullu tigugakku,taamatut naliliilluarsimammata. Aamma
isertussanngilara Atassut qaqutigoortumik, partiinillu allaanerusumik
oqariartuuteqarmat, tassami partiit qaqutigorujorujorussuaq aamma maannakkut
ullumikkut taammaappoq, eqqaartortarmatigit taamallaat aningaasartuutigut,
isertitagut aningaasarsuutissatsinnik illuatungiliisussat taakkua eqqaanneqanngisaannarput
imaluunniit eqaanneqanngisaannajangajapput.
Taamaattumik
isertituutitta suminngaanniit pinerinnaat pinnagit, aammali akiitsutsinnit
appartitsiartorneq allallu iserfigimmatigik isumaqarpunga tamanna
tulluusimanartoq taamatut iliuuseqarniarsimanerat Atassumminngaannit.
Ataatsimut
oqqaseqarfigineqassammata Siumut Atassullu oqqaseqarfigissavakka kukkunersiuinerit
assigiingitsut Ataatsimiititaliaminngaanniit pisut aamma uparuaatit
tusaatissatut tigussavavut, aammalu pitsanngorsaajuarusunneq siunertaralugu
kaammattuutigineqartut qanoq iliuuseqarfiginiassallugit.
Immikkut
Atassummut aamma oqaatigerusuppara taaneqartut arlallit eqqaammatigik, soorlu
apeqquteqaatigaat Atassumminngaanniit inatsimmik sanasariaqarnersugut
Grĝnlandsbankimut tunngasumik inatsiseqannginneq eqqortumik, pissutsillu
ullumikkut aallaavigalugit uagut akissuteqaratta. Taana apeqqutaa Atassutip,
Naalakkersuisuninngaannit neriorsuutigissagatsigu inatsisiliornissaq
aallartinniaratsigu, taannalu apeqqutip taassuma eqqartornetani Naalakkersuisuni
eqqartoratsigu oqarpugut, taaginnarnagu aamma timitalerlugu
saqqummiinniartariaqartugut. Taanna neriorsuut ujartorneqarmat
akissuteqaatigissavara Naalakkersuisuni eqqartoreerparput,
taamaaliorniarusuppugut.Tassa taamatut akissuteqarfigalugu Atassut qaangerpara.
Inuit
Ataqatigiit oqaaseqartuannut oqassaanga arlalinnik aamma oqariartuuteqarpoq
aammalu nuannaajallannartunik immaqa nipaasa ilaat nikallunartumik imaluunniit
allaanerusumik nalilersinnaagaluartut, kisianni tassa apeqqutit ilaat
qaffattinneqartut soorlu
kukkunersiuisut ullunik 14-inik sioqqutsillutik saqqummiisarnissaannut
periarfissiinermut tunngasut nassuiaammi akissuteqaammilu
oqaaseqarfigereerakkit annertunerusumik oqaaseqarfigissanngilakka, kisianni
tassa aamma tassani qanoq iliuuseqarniarnerput, soorlu partiit allat
eqqartoreermassuk akissutikka innersuussutigeqqissavakka, aap,
pitsanngortitsiniassaagut, kisianni una oqarneq paasilluanngilara, tassami
ilaatigut Inuit Ataqatigiit oqarmata maannakkut ukiunut siuliinnut
naleqqiullugu naatsorsuutit paassiuminaatsunngortinneqarsimasut.
Taanna
isumaqarpunga IA-lu oqaloqatigiissutigisariaqaripput
siunertarinngilluinnarparput paatsuugassaasinnaasunik saqqummiinissaq.
Oqareerpunga pitsanngorsaajuarusuppugut aammalu neriuutigissavara Inuit
Ataqattgiit taamaalillutik aamma sorpiaat ajornerunersut siunnersuuteqarlutik
eqqartueqatigiissagut, taamaalilluta suli pitsaanerusumik paasissutissanik
tunisiniassagatta. Aamma nassuiartariaqartut allat apeqqutigimmatigik taakkua
annertunerusumik nassuiaateqarfigissanngilakka maannakkut, soorlu 28
procentimik qaangiisimanerit imaluunniit Inatsisartut ingerlatsinermut
aningaasartuutitik 41 procetimik atunngitsoorsimagaannik oqalunnerit. Taakkua
tikittareermata annertunerusumik oqaaseqarfiginagit, kisianni oqassaannga
isumaqarpunga naatsorsuutit, Landskarsip naatsorsuutai, naak IA-p
naammaginanngitsumik ingerlanneqarneranik oqaaseqaateqarfigigaluarai, uanga
isumaqarpunga suli ammaa Naalakkersuisut sinnerlugit naammaginartumik
ingerlanneqartut.
Ilumoornerassavara
IA naatsorsuutiginngisaraluamik 241 mio. koruuninik pitsanngoriaateqarneq
taanna pissutsit assigiinngitsut pissutigalugit taamaattoqarsimanera
isertornagu unneqqarissumik oqaatigaarput, taanna annertunerusumik
oqaaseqarfigissanngilara, kisianni nuannaarutigaara Inuit Ataqatigiit oqarmata
ataatsimut isugalugu naatsorsuutit eqqortutut isigigaat. Taasaallu assigiinngitsut
tusaatissatut tigujumavakka, aammalu kissaataat naammassiniarsarissalugit.
Akulliit
Partiiata apeqqutigaa tjnestemandinut tunngatillugu assigiinngitsut, tassangalu
pisimasut assigiinngitsut eqqartorusummagit oqaatigissavara tassa
isumaqatigiissut ukioq manna 10. januar isumaqatigiissut atsiorneqarpoq.
Kisiannili aatsaat tamakkuninnga susassaqartut illuatungerisat martsip
ingerlaneqarani atsiorpaat. Naatsorsuutigineqarpoq aningaasatigut
ajunngitsorsiassat ilimanarpoq uumma qaammatip aggersup aallartinnerani
aaqqiissuteqarfigereersimassasut.Taanna neriuutigaara, tassa atsioreerneragut
kingornagu suliassaq pisortaqarfimmi susassaqartumi suliarineqartoq ilisimavara
taamaalillunga neriuutigalugu akissutiga Akulliit Partiianit naammagineqassasoq.
Kontualupparujussuit
assigiinngitsut eqqartugai taakkua ataasiakkaarlugit iserfiginissat naatsorsuutigingilara
maannakkut neriorsuutigissalluguli ilai akiuminartut ilai akiuminaatsut
allagan-ngorlugit akissuteqarfigissammata, assersuutigalugu apeqqutit ilaat
assersuutaannartut akiuminartutut taassavara soorlu nunaqarfimmi, nunaqarfiit
pillugit ataatsimeersuartitsinermi sooq taamannarujussuaq atuisoqarsimanersoq,
assersuutaannaavoq. Tamatumunnga peqqutit ilagaat Kalaallit Nunaanni
angalaniarneq, angalasut ilai ullut 14-it atorlugit
ingerlaniartariaqarsimapput, taamaattumillu aningaasartuutit pilersaarutinit
amerlanerujussuit atorneqartariaqarsimallutik. Aamma taanna soorlu
assersuutigalugu peqatigiiffinni partiinniluunniit ataatsimeersuartitsinermi
aamma malunnarluartarpoq, ilai ullut pingasut angalasussaagaluarlutik ilaanni
ullut qulit sinnerlugit angalasariaqartarmata, eqqorneqartunut
akitsorsaataaqisumik. Taanna assersuutitut taaginnarpara, neriuppunga Akulliit
Partiiata naammagissagaa, kontualuppassuit assigiinngitsut taasai qulit 15-it
akornanganniittut maannakkut pulaffiginianngilakka eqqoriaasaqartaarlunga
akissuteqarfigerusunnginnakkit kisiannili allaganngorlugit
akissuteqarfiginissaat naatsorsuutigaara neriorsuutigissallugulu.
Kisianni
tassunga tunngatillugu oqanngitsuusanngilanga paasigakku ilaatigut nalorngineq
oqaatsinik atuinikkut ersersinneqartartoq, oqaatsit issuakkat uku marluk
taaginnassavakka, tassa aningaasaliissutit atuinerullu kisitsisaat imminnut
naapertuutinnguatsiarput aammalu alla paasissutissiisoqarsimannginnguatsiarpoq,
tassa tamakkua eqqoriaanerit pinngitsoorniarlugit Akulliit Partiaata atugai,
taava pitsaanerutippara eqqortumik allakkatigut akigukku, nguatsiartumik
oqarusunnginnama. Kisianni nuannaraara naatsorsuutit akuersaarumammatigit.
Kattusseqatigiit
aamma qujanarpoq taamatut akuersiumammata, naak ilaatigut aallartinnermini
Landskarsip pitsaasumik ingerlanera eqqartoriarlugu kisianni pissutsit allat
iserfigigamigit, soorlu assersuutigalugu Nukissiorfinni, atuarfeqarfinni,
peqinnissaqarfimmilu pisut. Kisianni uani naatsorsuutit pisatsigit nuannerpoq
taamatut pissutsit ataatsimut isigalugit ajorinngimmagit.
Aamma
kukkunersiuinermut tunngasumik oqaasiini una uniffigilaarpara taamaallaat,
Naalakkersuisut apeqqusermagit ilumut piumassuseqarnersut aaqqiinniarnissamut,
suli pitsanngorsaatinik assigiingitsunik qaffatsitsinissaminnut. Aap,
Naalakkersuisut piumassuseqartupilussuupput apeqqutigigakku taamatut
akissavakkit. Soorlu erserinneqartoq TB 1-ip issakkunni pinerani
siullermeernerani qanoq iliorusulluta eqqartuigatta, tassa pitsanngorsaarusunneq
siunertariuaratsigu, aammalu taanna nipi ullumikkut aneqqikkusuppara.
Sinneri
annerusumik uniffiginagit paasivara naatsorsuutit ataatsimit oqaatigalugu
iluarineqartut, tamanna sooruna partiinut tamanut Kattusseqatigiinnullu
apuutissavara.
Kristine
Raahauge, Siumut:
Partiit
Kattusseqatigiillu oqaaseqaataannut qujavunga, kukkunersiuinitsinnilu
uparuakkagut pingaartillugit taakkartugaat aallaavigalugit suliarput
ingerlateqqissavarput, tassanilu Naalakkersuisut aamma aaqqiinissaminnik
akissuteqaataanik soorunami tunngavigalugit suleqatigalugillu
ingerlatissallugit.
Grĝnlandsbankimut
tunngatillugu qujanarpoq taanna aamma arlariinnik tapersersorneqarmat, tassami
siorna junip pingajuani Naalakkersuisunut
ilaasortamut Aningaasaqarnermut Naalakkersuisumut Daniel Skiftemut
pappilissamik tunisiseqarsimavoq, tassanilu allassimalluni illup qanoq issusianik immikkoortut pingasut, tassani
siullerpaatut taaneqarsimagami atortut
taasuma illup sananeqarnermini atortui pitsaasuusut, soorlu taakku
eqqarsaatigalugit pisariaqarpoq pitsaasumik aaqqiinissaq, tassa pissutsinik
ilisimmaarilluni naliliisoqartarnissaa aamma akisussaaffimmik.
Aammalu
uparuakkatsinni ukua isertitat aningaasartuutit sukumiinerusumik
nalunaarsorneqartarnissaanik tassunga atatillugu aamma tapersiisut
arlariimmata, tassanilu Naalakkersuisup akissuteqarnermini uagut qanoq
ilusilerlugit suliarineqartarnissaannik ujartuiffigimmatigut aamma soorunami
uagut taanna naammassiniassavarput, siunnersuusiorluta
Ataatsimiititaliaminngaannit.
Ullut
14-init sioqqullugit tunniussisarnermut atatillugu isumaqarpunga tassani
ajornartorsiuteqanngitsoq, tassa Naalakkersuisut oqarmata
naammasiniaassallutik, uanimi augut pigatsigu katsersuuneq Naalakkersuisut,
tassa Naalakkersuisut namminneq Landskarsip naatsorsuutaasa
saqqummiunneqarfissaattut kissaatigisaat, tassa imaappoq ilissi Naalakkersuisut
kissaatigisarsi aallaavigalugu, kisiannili uagut ullut 14-init sioqqullugit
saqqummiussinissaq kissaatigiinnaripput. Tassani isumaqarpunga
ajornartorsiutitaqanngitsoq.
Taavalu
sulinitsinni Kukkunersiuinermi Ataatsimiititaliami sulinitsinni
Naalakkersuisoqarfinnit assigiinngitsunit suleqatigiut tamaasa qutsavigaagut.
Konrad
Steenholdt, Kultooreqarnermut Ilinniartitaanermullu Naalakkersuisoq:
Qujanaq,
naaatsunnguamik oqaaseqarfiinnassavara, tassa ilaatigut oqaatsit sakkortuut
atorneqarmata, soorlu allaat uanga pisortaqarfinni aningaasanut tunngasut
ingerlaarnerat aqussinnaanngilluinnaripput. Tamaattoqanngilaq.
Malugeqqussavara
qaangiisimanerit annertunerpaat tasaammata ilinniartitaanermut tunngasut, aamma
isertuusimanngilarput 95-iminngaannit maannakkumut ilinniarniarlutik
nalunaartut amerlerujussuarsimanerat. Qaangiisimanerit uaniinninerupput tassa
kommunini atuarfeqarfinnut tunngasut, GU-mi Aasiaat, taavalu
aviisiliortunngorniat atuarfiat, taassumalu saniatigut ilinniartuunersiutit
allisimaneri. Taakkua sapinngisannguatsinnik massakkut aaqqiiniarfigaagut,
aammalu tappiffigalugit, kisianni soorunami kukkunersiuinermik ingerlataqartut
aammalu partiit oqaaseqartuisa taakkuninnga tappiffiginninnerat
qujassutigissavara, kisiannili imaalillugu oqaatigissallugu takku uani
taagukkakka illuartilaaraluarutsigit, taava pisortaqarfiga sinniisimanera halv
procentiinarmik annertussuseqarmat. Kisianni soorunami sapinngisannguatsinnik
aaqqinniarsaaragut.
Kisianni
journalisthĝjskole imaluunnit aviisiliortunngorniat atuarfiannut tunngatillugu
qaangiisimaneq annertoorujussuuvoq, tassanilu una oqaatigissavara Nuummi
ilinniartut inissaqarniarneq assut ilungersunarmat, ilaatigullu
utaqqiisaagallartumik inissiisarnerit pissutigalugit aningaasartuutit
taamarujussuaq qaffassimallutik. Taakkua sapinngisamik aaqqinniarnissaat
massakkut sulissutigalugu ingerlapparput, taamaattumik una
eqqarsaatigillaqquara soorlu Kattusseqatigiinniit oqaatigineqarmat
Kultureqarnermut, Ilinniartitaanermut Ilageeqarnermullu Naalakkersuisoqarfik
aningaasaliissutinik immikkoortinneqartut sipporlugit atueqqinnginnissaanik
piumaffigisariaqartoq.
Ilaatigut
ilinniartut eqqarsaatigalugit ajornakusoortorujussuuvoq taanna, tassa ilaatigut
inatsiseqaratta oqartumik kinaluunniit ilinniarfimmut tigutinnissaminut
qaqisisimasoq tigussavarput pinngitsoorata. Taamaattoqartillugulu una oqaatsit
tunngavigalugu imatut taama kinguneqaratarsinnaagani ilaa piumasaq taama
sakkortutigippat, ilinniartussaagaluit ilaat tigunngitsoortariaqassagigut.
Isumaqarpunga nalilersulaartariaqartut qanoq, sunik tassani eqqarsaatigalugit
oqartoqarnersoq. Kisianni qujavunga oqaaseqartunut, tapiffigaavut aamma aaqqinniarsariavagut
ukiumut tullermut naatsorsuutit
aningaasaliissutillu naligiissumik inerneqarnissaat anguniarlutigu.
Daniel
Skifte, Aningaasaqarnermut Ineqarnermullu Naalakkersuisoq:
Tassa
marlussuit oqaatiginiarpakka. Siullermik akissuteqaatissanni isumaqarama
apeqqut pingaartuusoq akissallugu, taanna qarsupittoorsimagakku. Atassut
apeqquteqarpoq, ilaatigut apeqquteqarluni ilumut tulluartuunersoq
Namminersorullutik Oqartussat kukkunersiusumik ataatsimik atuinerat
ukiorpassuarni ingerlanneqarsimasoq taamaaginnartariaqarnersoq. Isumaqarpunga
apeqqut taanna akissuteqarfigisariaqartoq, apeqqutigimmassummi naalakkersuisut
qanoq tassunga tunngatillugu iliornialersaarnersut, oqaatigisinnaavara
naalakkersuisut siorna aalaja-ngerput ullumikkut pissutsit taamaassasut,
kisianni naalakkersuisuni apeqqut ammaffigaarput nalilersoqqissallugu.
Isumaqarpunga aamma inatsit inatsimmillu tunngaveqarnera aallaavigalugu
peqqutissaqartoq misilittakkallu aallaavigalugit taassumap apeqqutip
nalilersoqqinnissaa misissuiffiginissaa. Uanngaanniit neriorsuummik
oqaaseqassanngilanga, kisianne apeqqut pingaaruteqarmat puigorakku
akeriissallugu utoqqatsiffigaassi.
Uanga
naggataatigut aamma pinngitsoorusunngilanga takusinnaasorigakku oqaasissat
amerlanerit maannamut aninneqareersimagallartut, Aningaasaqarnermut
Naalakkersuisoqarfinni sulisut qutsavigissallugit sulianik assigiinngitsunik
pitsaasunik ingerlatsisimammata, taamatut aamma DRC kukkunersiuisoqarfik,
taanna aamma suliarujussuarmik suliaqarsimammat soorunami tassani sulisut
qujassuteqarfiginiarpakka aamma
tupinnanngitsumik inuutissarsiutigalugu avataani kukkunersiuisut
ingerlassisut taakkua aamma puigussanngilakka. Kiisalu soorunami oqareernittuut
naggataatigut Inatsisartut Kukkunersiuillutik Ataatsimiititaliaata sulisimanera
erseqqissumik qutsatigeqqissallugu. Qujanaq.
Bjarne
Kreutzmann, Akulliit Partiiat:
Qujanaq.
Naalakkersuisup akissutaanut qujangaarpunga, aammalu taakkua apeqqutimma arlallit
akinissaat allaganngorlugit neriorsuutigimmagit aamma qutsatigalugu, taanna
ajunngivippoq taamaaliornissaq.
Taavalu
taasakka aamma tassa kukkunertut marlussuttut takusinnaasattut taasakka konto
40.11.30 aamma 60.10.30, tassunga tunngatillugu oqaatigilaaginnarusullugu
kukkunernut taama ittunik allanik aamma peqarsimappat immaqa malugineqartunik
immaassinnaavoq taamaattoqanngitsoq, taava pissusissamisuussaaq aamma uagut
tusassagutsigik, una liniat tamaasa akisussaaffigigatsigit aamma .uagut.
Kisiat
tassa qujavunga akissutinut aammali ilanngullugu taalaaginnarusullugu
Aningaasaqarnermut Naalakkersuisup aallarteqaarnermi Siumut Atassutillu
oqaasiinut aalaarteqaarnermi oqarmat taakkua ilinniagassatit
ilinniarluarsimagaat, uagut aamma ilinniagassagut ilinniarluarsimasukasaagatsigit,
taanna uparualaaginnarlugu, tassa imami ilinniarluarsimatigaavut akisassanik
arlalinnik uani oqaaserisani nassaassaqarluni, taamaattumik aamma uagut
ilinniarluartartukasaavugut. Qujanaq.
Anthon
Frederiksen, Kattusseqatigiit:
Naalakkersuisup
akissuteqaataanut qujanaq. Kisianni tassa Kultooreqarnermut Ilinniartitaanermut
Ilageeqarnermullu Naalakkersuisup atuisimanera sippuisimanermut tunngatillugu
oqaaseqaatinni ukua Inatsisartut Kukkunersiuinermut Ataatsimiititaliaata
isumaliutissiissummini allassimasai tunngaviupput, imatut allassimagamik:
Kontomi pingarnermi 40.12.18
Tusagassiornermik ilinniarfik, tassani 1997-imi atuineq akuersissutit
immikkoortinneqartunut naleqqiullugu 57 procentinik qaffasinnerummata
naalakkersuisoqarfimmi tassani nikingassutit annikigisassaanngitsut pillugit
uparuaasseqarniarsimapput, uparuaassuteqarnissamut tunngavissaqartoq. Tassa
taanna pissutigalugu taamatut uparuaanera erseqqissaassutigivara, asuli
uparuaniaannarlugu uparuaasimanngilanga.
Manasse
Berthelsen, Inuit Ataqatigiit:
Qujanaq,
naatsunnguamik. Aningaasaqarnermut Naalakkersuisup uuma naatsorsuutini konto
ataasiakkaat erseqqinnerusumik nassuiarneqarsimannginnerat ajuusaarutigalugu
oqaatigigatsigu, taamaalaat ukioq manna siorna naatsorsuutini tamaallaat
allanneqarsimapput akissarsiat, ingerlatsinermi aningaasartuut taavalu
isertitat, allamik naamik. Kisiannili soorlu 96-imi assersuutigalugu
naatsorsuutit erseqqinnerujussuarmik sananeqarsimapput, soorlu tusagassiornermut
ilinniarfimmut tunngatillugu akissarsiat, kiffartuussinermi pisiat,
ineqarnermut akiliutit, nutaanik pissarsinerit, iluarsaanernut, taavalu allanut
aningaasartuutit immikkoortitaarlugit allattorneqarsimapput, kisiannili uani
97-imi saqqummersumi taamaallaat paasisutissat annikitsuararsuit ilanngunneqarsimallutik. Neriuppugut Inuit
Ataqatigiinninngaannit taakkua 98-ip naatsorsuutai suliarineqarpata 96-imi
periusiusimasut uterfigeqqinneqarnissaa.
Otto Steenholdt, Atassut:
Ippigilluinnagaraana maana
oqaatigerusullugu, tassa Grĝnlandsbankip pisiarineqarnera, kingornatigut
paasineqarmat iluanngitsoq pisianeqarsimasoq, akissummi naammaginngisara
unaammat, inatsinngooq Danmarkimiittoq malillugu qanoq iliorneq
ajornartumik oqaasertaqarmat. Nunatsinni
aamma tuniniaasoq pisisorlu suugaluarpataluunniit akisussaaffeqarput
inatsiseqarpat inatsiseqanngippalluunniit. Tassani imminnut ataqqeqatigiinnerat
nunatsinni aamma atuuppoq. Maani illumik tuniniaasoqarsinnaavoq oqaluttuunnagu pisisoq illu taanna nalunngereerlugu suna
ajoqqutigigaa, oqaluttuunnagu tunisimaguniuk, nunatsinni aamma tunisisoq
eqqunngitsumik tunngaveqarluni
tunisisimasutuut unnerluussutigineqarsinnaavoq.
Tupigilluinnarpara
inatsiseqannginneranik, tassami, oqartoqarnera, tassa imaappoq uagut
pisisuusugut imannaannaq akiliisitaavugut tunisisup oqaluttuusimanngimmatigut
ajoqutaa una miannersuutigeqqullugu. Immaqa taama oqalussimasuupat pisiaq
akikinnerusumik akilerlugu, nammineerluni aamma akikinnerusumik aqqissuunneqarsinnaasimagaluarpoq.
Taanna pisisup tunisisullu imminnut ataqqeqatigiillutik pisinnaanerat
nunatsinniippoq, taamaattumik eqqumiigaara
tassani suna pissutaasumik oqarneq, qularnanngilaq Naalakkersuisup
taanna oqaaseqarfigilaarsinnaasagaat. Isumaqarluinnarpunga inatsiseqarpat
inatsiseqanngippalluunniit ataqqeqatigiinneq atorlugu pisineq tunisinerlu
nunatsinni aamma aaqqissuuneqarsinnaasut.
Daniel Skifte, Aningaasaqarnermut Ineqarnermullu
Naalakkersuisoq:
Oqareernittut taanna nassuiaat
Aningaasaqarnermut Ataatsimiititaliamut aammalu maannakkut neriorsuutaalluni
Kukkunersiuinermut Ataasimiititaliamut nassiunneqassaaq, Aningaasaqarnermut Ataatsimiititaliamut
nassiunneqarpoq.
Taanna tallisaangikkaluarlunga
oqaatigissavara, tassa ajornartorsiut taanna 80-ikkut aallartinneranni pivoq
Danmarkimi inatsisartut inatsisiliormata asbestimut tunngasut atorunnaassasut.
Taannarpiaq pigunarpoq 1989-90-imiugunartoq. Tamatuma kinguneraa Kalallit
Nunaannit kommunit, Kalaallit Nunaanni Namminersornerullutik Oqartussat saqqumisunik
asbestinik sanaanik piiaasariaqarnerat, kisiannili aamma Danmarkimi
inatsisartut inatsisiliorput, tamaattoqarpat saqqumiinnartumik qalipattuuppat
oliemalingimik, taava taanna ajornartsiotaassanngitsoq, tassalu taanna
ullumikkut aamma atuuppoq suli, suli
taanna atuuppoq, kisiannili allanngortiterilluni piiaanermi tamakkua
saqqummerpata, taava piiagassat tamakkua piiartariaqarput. Tassunga tunngasumik
taarsiisitsiniarnermut tunngasunik qaffatsitsineq aamma inatsisilerituunik
nalilerneqarmat Namminersornerullutik Oqartussat qanoq ilioriarnissaat
killeqarpoq, taava Naalakkersuisut oqareernittut oqarput, taava utoqqatsissut
inatsiseqannginnermik oqarneq naammanngilaq, inatsisit tunngavissat
suliarisariaqarpagut, tassalu taanna neriorsuutigaarput taamaaliortariaqartugut.
Annertunerusumik taanna iserfiginagu taamatut nassuiaateqarfigaara,
nassuiaateqarfigisassat nassuiaateqarfigaagut.
Hans Enoksen, ataatsdimiinnermik aqutsisoq,
Siulittaasoqarfimmi ilaasortaq:
Taamaalilluni immikkoortoq 6-i
Landskarsip 1997-mut naatsorsuutaasa saqqummiunneqarnerat aammalu immikkoortoq
Landskarsip naatsorsuutaasa kukkunersiorneqarnissaannut Ataatsimiititaliap
isumaliutissiissutaa oqaluuserineqarnerat naammassineqarput.
Neriuutigissavarpullu tikkuartorneqartut partiininngaanniit
aaqqinniarneqarumaartut.
Oqaluuserisat naammassipput.