Kalaallit Nunaanni Inatsisartut

Oqaluuserisassani immikkoortoq 113		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ullut ataatsimiiffiusut aqqaneq tallimaat, sisamanngorneq 27. marts 2003 nal. 13:54.

 

 

Oqaluuserisassani immikkoortoq 113

 

 

Meeqqat annertuumik innarluutillit angajoqqaamik arlaannit ulloq tamaat akissarsiaqaatigalugu paarineqartalernissaannik neqeroorfigineqarsinnaalernissaat pillugu apeqquteqaat allaavigalugu oqallinnissamik siunnersuut.

(Anthon Frederiksen)

 

Athon Frederiksen, apeqquteqartoq, Kattusseqatigiit.

Taamatut siunnersuuteqarninnut ilaatigut tunngavingaakka uanga nammineerlunga   angajoqqaat annertuumik innarluutillit ilaanniit saaffigineqartarnikka aammalu   naluneqanngitsutut Nunatsinni inunnik isumaginninnerup iluani sullissinermi   ilinniarsimasunik amingaateqarneq, minnerunngitsumik meeqqat annertuumik innarluutillit   sullinneqarnereat eqqarsaatigalugu, taamaattumik nalunngisakka naapertorlugit   angajoqqaat annertuumik innarluutilinnik meerallit ilaatigut suliniarlutillu   assigiinngitsutigut malinnaaniarnerat, minnerunngitsumillu meeqqaminnut   piffissaqarniarnerat ilaatigut ilungersunarsinnaasartoq, meeqqamut angajoqqaanullu annertuumik iluaqusiisinnaammat, angajoqqaat annertuumik innarluutilimmik meerartallit  arlaat, imaluunniit aamma kisimiittut eqqarsaatigalugit anaanaasoq, ataataasorluunniit   ulloq   naallugu akissarsiaqaatigalugu meeqqaminnik paassisinnaalersinnaanermik   neqeroorfigineqartalersinnaanerat  periarfissinneqartalissasoq siunnersuutigaara.

 

Tamanit ilisimaneqarpoq ullumikkut maani Nunatsinni inuuniarneq ilaatigut   imaannaajunnaarsimavoq, allaammi angajoqqaat innarluuteqanngikkaluartunilluunniit  meerartallit ima ulapitsigilersimavugut, allaat meerartatsinnut piffissaarutingajassimalluta,   tassami ullumikkut angajoqqaat marluullutik suliffeqanngikkunik akiligassanut  angummanniarnerat ilungersunarsisimavoq.

 

Sulilu ilungersunarnerusoq takorloorsinnaavarput angajoqqaat annertuumik innarluutilinnik   meerartallit, taamaattumik paasisinnaalluarpara angajoqqaat ilaat annertuumik innarluutilimmik meerartallit ilaatigut ilungersunarluinnartumik inissittarnerat.  Isumaqarpungalu angajoqqaat taamatut nalaataqarsimasut pisortanit pitsaanerpaamik   ikiorserneqassappata, angajoqqaat arlaat neqeroorfigineqarsinnaasariaqartut   aalajangersimasumik meeqqaminnik akissarsiaqaatigalugu paarsisinnaalersillugit, tassami  angajoqqaat meeqqaminnut asanninneq piviusoq ilumoortorlu ilisimanerpaajuvaat aammalu   meeraq nalunngilarput angajoqqaaminiilluni toqqisisimanerpaajusartoq.

Neriuppunga oqaluuserisassaq manna paasilluarneqarluni taperserneqarumaartoq.

 

Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.

Akissuteqassaaq Ilaqutariinnermut Naalakkersuisoq.

 

Ruth Heilmann, Ilaqutariinnut Peqqissutsimullu Naalakkersuisoq, Siumut.

Qujanaq.

 

Innarluutilinnik isumaginninnermi tunngavik pingaartoq tassaavoq innarluutillip nalinginnaasumik inuunermut sapinngisamik qanittumik inuuneqartinneqarnissaata qulakkeerneqarnissaa.

 

Innuttaasoq kinaluunniit inuuniarnikkut qanorluunniit nalaataqartoq assigiinngitsutigut ikiorse­rneqartussaatitaavoq. Inatsisit tamanut atuuttut soorunalimi aamma inunnut innarluuteqartunut atuupput.

 

Inatsisitigut allatigut ikiorsiisoqarsinnaatinnagu aatsaat innarluutillit pillugit malittarisassat atorneqarsinnaanerat tunngaviuvoq pingaaruteqartoq. Innarluutilinnut malittarisassat malillugit ikiorsiisoqartarpoq inuit ataasiakkaat naliliiffigineqarnerat tunngavigalugu, taamaallaallu ikiorsiisoqarsinnaalluni aningaasartuutinut innarluuteqanngitsut nalinginnaasumik atugassa­minnut, ulluinnarni inuuniarnerminni imaluunniit inigisamik aaqqissuunneqarnerannut atortagaasa nalinginnaasumik aningaasartuutigisartagaannit aningaasartuutit malunnartumik annertuneruppata. 

 

Innarluutillit pillugit peqqussummi anguniagaq pingaartoq tassaavoq annertuumik innarluutilik sapinngisamik sivisunerpaamik nammineq angerlarsimaffimmini najugaqarnissaa siunertaralugu ikiorserneqassasoq, tamanna pineqartup nammineq kissaatigippagu, inuiaqatigiillu isaannit isigalugu taamaaliorneq illersorneqarsinnaappat. Anguniagaq tamanna inersimasunut meeqqanullu atuuppoq.

 

Inunnut innarluutilinnut ulluinnarni tapersersuineq nalinginnaasumik tapersersortinit aam­malu angerlarsimaffimmi ikiortinit isumagineqartarpoq. Tapersersortitut ikiortip suliassaa tassaavoq innarluutilimmut perorsaanikkut tapersersuineq, innarluutillip nalinginnaasumik inuunermut sapinngisamik qanittumik inuuneqartinneqarnissaa siunertaralugu, angerlarsimaffimmilu ikiortip illup iluani suliassat suliarisarlugit. Tapersersortimut aningaasartuutit Nunatta karsianit akilerneqartarput angerlarsi­maffimmilu ikiorteqartitsinermut aningaasartuutit kommunimit akilerneqartarlutik.

 

Inatsisit atuuttut naapertorlugit nammineq meeqqamik innarluuteqartumik paarsinissaq periarfissaqareerpoq, ilaquttat ilaasa qaniginerusallu allat innarluutillip nammineq angerlarsimaffiani paarsinissaannut aningaasarsiaqartitsinissamut periarfissiisoqarsinnaalluni, nammineq angerlarsimaffimmi paarineqarneq illersorneqarsinnaappat aammalu inuk paarsisussaq innarluutillip qanimut attaveqarfigippagu.

 

Taamaasilluni assersuutigalugu ulloq unnuarlu paaqqinnittarfimmut inissiinissamut taarsiullugu nammineq angerlarsimaffimmi paarsisoqarsinnaavoq.

 

Angerlarsimaffimmi paarsinermut aningaasarsiaqartitsisoqarsinnaavoq SIK-ip isumaqatigiissutaat naapertorlugit akissarsiat minnerpaaffissaat sukkulluunniit atuuttut amerlaqataattut annertussusilikkanik. Taamaalillutik paarsisup siusinnerusukkut isertitarisartagai aningaasarsiat naatsorsorneqarnerannut sunniuteqartussaanngillat. Pisut amerlanersaanni paarsisuusoq tassaasartussaavoq meeqqamut innarluutilimmut angajoqqaaq, imaluunniit inooqataasoq aappaasorluunniit. Aamma taanna ilaqutaasinnaavoq alla, tassaasinnaalluni innarluutillip ikinngutigilluagaa imaluunniit inuk innarluutilimmut qanimut attaveqartuusoq.

 

Aningaasarsiaqartitsisoqassappat piumasaqaataavoq paarsisuusussap  paarsinini piffissami sivisunerusumi ingerlatissallugu naatsorsuutigigaa, paarsisup suliffigigaluaminit soraarneratigut imaluunniit suliffissarsiuussisarfik aqqutigalugu suliffissarsiornerminik unitsitsineratigut paarsineq akissarsiaqarluni sulinermut nalinginnaasumut taarsiunneqarsimasoq.

 

Angajoqqaat innarluutilinnik meeraqartut angajoqqaat innarluuteqanngitsunik meerallit assiga­lugit meeqqaminnut pilersuisussaatitaapput isumassuisussaatitaallutillu, meeraaq innarluuteqarnersoq innarluuteqannginnersorluunniit apeqqutaatinnagu. Meeqqap meeraaqqerivimmi, meeqqerivimmi imaluunniit angerlarsimaffimmi ulluunerani meeqqanik paarsiviusartumi paarineqarsinnaanera nalinginnaasumik periarfissaqartussaavoq.

 

Angajoqqaat meeqqaminnik paarsinertik aningaasarsissutigigajunngilaat. Meeqqap innarluutillip angerlarsimaffimmini paarineqarneranut aatsaat aningaasarsiaqartitsisoqarsinnaavoq meeqqap sapinngisamik pitsaanerpaamik ineriartornissaa peqqissuunissaalu allatut illersorneqarsinnaanerusumik qulakkeerneqarsinnaanngippat

 

Taamatut oqaaseqarlunga Inatsisartuni oqallinnissaq qilanaaraara.

 

Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.

Partiit oqaaseqartuinut, Enos Lyberth, Siumut.

 

Enos Lyberth, Siumup oqaaseqartua.

Inatsisartunut ilaasortaq Anthon Frederiksen Kattusseqatigiit meeqqat annertuumik innarluutillit oqallisissatut siunnersuutaanut Siumumiit imaattumik oqaaseqassaagut:

 

Siumup pilersinneqarneraniilli pingaartitatta politikkikkullu anguniartakkatta pingaartut ilagaat meeqqat, inuusuttut utoqqaallu inuunerminni pitsaanerpaamik atugassaqartitaanissaat suliniutigiuassallugu.

 

Taamaattumik aamma innarluutillit Inatsisartuni eqqartorneqartillugit tamatigut Siumumiit siunertalimmik peqataasarpugut taamaaliortuassallutalu.

 

Siunnersuuteqartup saqqummiussaa angajoqqaat arlaata nammineerluni innarluutilimmik meeqqaminik paarsisinnaanera pillugu Naalakkersuisup oqaaseqaataani periarfissat taanna atuutereermat eqqaasissutigisariaqartoq isumaqarfigaarput.

 

Angajoqqaat annertuumik innarluutilimmik meerallit pisortanit pitsaanerpaamik ikiorserneqassappata angajoqqajusut arlaat neqeroorfigisariqarsinnaanerat, akissarsiaqaatigalugulu meeqqaminnik paarsisinnaalersillugit Siumumiit isumaqatigaarput.

 

Siumumi sukkulluunniit aporfissaqartitsisoqarsinnaanera tamatumani takorloorneqarsinnaanngitsutut allaat oqaatigissavarput.

 

Taamaattumik Siumumiit oqallissaarut tamatumani paasilluarneqarluni tapersersorneqarnissaa kissaatigalugulu inassutigissavarput.

                                                                

Isak Davidsen, ataatsimiinnermi aqutsisoq, sinniisussaq siulleq, Atassut.

Tulliuppoq Ellen Christoffersen, Atassut.

 

Ellen Christoffersen, Atassutip oqaaseqartua.

Qujanaq.

 

Inatsisartuni ilaasortap Anthon Frederiksen-ip oqallinnissamik siunnersuutaa ATASSUT-miit ilalernartipparput ? taamaattumillu aamma ATASSUT-mmi oqallinnissap isummersuutinik assigiinngitsunik pissarsiaqarfiusinnaalluarnissaa qularutiginngilarput.

 

Ilaqutariinnermut Naalakkersuisup siunnersuuteqartumut akissuteqarnermini ilaatigut eqqartorpaa maannakkut inatsisit atuuttut naapertorlugit periarfissaareersoq siunnersuuteqartup saqqummiussaattut ittumik ikiorsiinissamut, tamanna ATASSUT-mmit tusaatissatut tingulluarparput.

 

Nunatsinni ilaqutariit qanimut ikioqatigiittarnerat inuiaasusitsinnut pingaaruteqarluinnartut ilagivaat ? tamannalu ATASSUT-ip inunninnik isumaginninnermut politikkianni pingaaruteqarluinnartutut aallaaviginiarneqartarpoq. Taamaakkaluartorli ATASSUT-mmi aamma pingaartipparput meeqqap qitiutinneqarluni illersorneqarsinnaasumik ikiorsiiffigineqartarnissaa.

 

Oqallinnissamut siunnersuuteqartup meeqqat annertuumik innarluutillit angajoqqaamik arlaannit ulloq tamaat akissarsiaqaatigalugu paarineqartalernissaannik neqeroorfigineqarsinnaalernissaat periarfissaareersoq Ilaqutariinnermut Naalakkersuisup erseqqissaatigereeraluaraa, pingaartillugu oqaatigisariaqarparput angajoqqaat pisariaqartitaasa kisimik salliutinneqannginnissaa aamma eqqumaffiginiarneqartariaqarmat. Meeqqap annertuumik innarluuteqartup allatulli aamma ineriartornissaanut aqqutissat ikiorsiissutissallu pitsaasut qulakkeerneqartariaqarput ? tamatigullu pisariaqartitat tamakkiisumik angajoqqaanik kisimi pissarsiarineqarsinnaanatik.

 

Angajoqqaat nalilersorluakkamik meeqqamut piukkunnarnerusumik ikiorsiissummik neqeroorfigineqarnissaat pisariaqarluinnarpoq, angajoqqaat annertuumik innarluutilimmik meerallit nukissaqartuarnissaat aamma puiorneqassanngilaq, tamattami nalunngilarput nukippassuit angajoqqaat annertuumik innarluutilimmik meerallit paarsinissaminnut atorfissaqartittaraat.

 

Taamatut ATASSUT-mit naatsumik oqaaseqarluta oqallinnissamut siunnersuut isummerfigaarput.

 

Qujanaq.

 

Isak Davidsen, ataatsimiinnermi aqutsisoq, sinniisussaq siulleq, Atassut.

Tulliuppoq Astrid Fleischer Rex, Demokraatit.

 

Astrid Fleischer Rex, Demokraatit oqaaseqartua.

Anthon Frederiksenip apeqquteqaataa Demokraatinit paasilluarparput.

 

Ilaqutariinnut aningaasatigut oqilisaataalluassagaluarpoq angajoqqaat arlaat meeqqaminik innarluutilimmik paarsilluni angerlarsimaannartalersinnaagaluarpat, taannalu paasivarput Ruth-ip akissutaanut taamaattoqarsinnaasoq.

 

Tamattami nalunngilarput annertuumik innarluutilimmik meeraqarneq qanoq artornartigisinnaasoq, aammalu innarluutillit nunatsinni qanoq atugarliortitaatigisut.

 

Angajoqqaat meeqqaminnik innarluutilimmik paarinniinnarnissaat aningaasatigut pisariaqartutigut tunngavissaqartinneqarpat meeqqap illoqarfimmut allamut nassiunneqarnissaminut taarsiullugu angerlarsimaffimmiiginnarnissaa pitsaanerungaartuuvoq.

 

Peqatigitillugu Demokraatinit ilisimagatsigu meeqqamik innarluutilimmik angerlarsimaffititsiinnarneq qanoq sakkortusinnaatigisinnaallunilu oqimaassinnaatigisoq, angajoqqaat oqilisaavigineqartarnissaat pisariaqartassaaq. Soorlu sapaatit akunnerisa naanerani meeraq immaqa aallamut inissilaarlugu toqqissisimasunut angajoqqaarsianut, taamaalilluni angajoqqaat kisiamik qasuersaartinneqaratik aamma meeraq immaqa qasuersaartinneqartassammat.

 

Kiisalu pikkorissarnernik ilitsersuunneqarnissanillu neqeroorfigineqartarnissaat, aammalu pisariaqartassalluni soorlu meqqanut inuusuttunullu ikiuineq pillugu Inatsisartut peqqussutaanni massakkut piungajalersumi ingerlataarivillugu angajoqqaarsianut eqqarsaatigineqartoq. Taakkua tassani aallassimasutuut inuussutissarsiutigalugu angajoqqaarsiat taakkua pikkorissarneqartassammata taavalu arlaatigut oqilisaanneqarlutik ajoqersuunneqarlutik nutaanik paasisanik. Taakkua aamma angajoqqaat innarluutilinnik meeqqallu taamaliorneqartarnissaat innersuussutigaarput.

 

Isuma kusagigatsigu Naalakkersuisut kajumissaarusuppagut isuma sulissutigilluaqqullugu.

 

Isak Davidsen, ataatsimiinnermi aqutsisoq, sinniisussaq siulleq, Atassut.

Anthon Frederiksen Kattusseqatigiit.

 

Athon Frederiksen, apeqquteqartoq, Kattusseqatigiit.

Naalakkersuisut akissutaannut aammalu partiit oqaaseqartitaasa oqaaserisaanut qujarusuppunga.

 

Tassa uani uppernarsineqarmat ersersinneqarlunilu angajoqqaat taamatut annertuumik innarluutilinnik qitornallit arlaat inatsisit massakkut atuutereersut naapertorlugit periarfissaqareersut tamatuminnga. Tamanna assut nuannaarutigivara, tassami nalunnginnakku angajoqqaat ilaasa nalornissutigisaraat qanoq periarfissamik tamatuminnga atuisinnaanermut tunngasut.

 

Akissuteqarnermili una Naalakkersuisup akissuteqaataani ersarissaqqulaarpara, tassa allaqqasoq imaattoq: Meeqqap innarluutillit angerlarsimaffimmini paarineqarneranut aatsaat aningaasarsiaqartitsisoqarsinnaavoq. Meeqqap sapinngisamik pitsaanerpaamik ineriartornissaa peqqissuunissaalu allatut illersorneqarsinnaasumik qulakkeerneqarsinnaanngippat.

 

Taanna ersarissartikkusulaarpara Naalakkersuisumut apeqqut.

 

Soorunami aamma partiit oqaaseqartuisa pingaartumik Atassutip oqaaseqartuisa aammalu Demokraatit oqaaseqartuisa oqaatigisaat taanna angajoqqaat taamannak atugaqartut aamma angerlarsimaffimminni taamatut najugaqaannarnerminni arlaatigut ikiorserneqartariaqartarnissaat. Taanna qularnanngitsumik pisariaqartussaavoq. Minnerunngitsumik pikkorissaasarnermut ilitsersuisarnermullu tunngatillugu taakku neqeroorfigineqartarnissaat aamma assorujussuaq iluatinnaateqassooq taakkunannga.

 

Tassa naatsumik oqaatigalugu oqaaseqartut tamarmik tapersiinerat aammalu Naalakkersuisut inatsisini atuutereersuni periarfissaqartitsinermi akissuteqaataat qujassuteqarfigaakka.

 

Isak Davidsen, ataatsimiinnermi aqutsisoq, sinniisussaq siulleq, Atassut.

Tulliulluni oqaaseqassaaq Ilaqutariinnermut Naalakkersuisoq.

 

Ruth Heilmann, Ilaqutariinnut Peqqissutsimullu Naalakkersuisoq, Siumut.   

Ja qujanaq.

 

Tassa uangattaaq taamatut apeqquteqaat aallaavigalugu oqallinnissami siunnersuuteqartoq Kattusseqatigiit Anthon Frederiksen aamma akissutinnut qujassuteqarnera aamma uanga nammineq qujassutigaara.

 

Aamma uanga utoqqatsissutigissavara uani naggataatungaani taanna atuakkat oqaaseq kingulleq ?qulakkeerneqarsinnaanngippat? taanna imaassagami ?qulakkeerneqarsinnaappat?. Taamaattumik uanga akissuteqarninni atuarpara taamatut. Tassa una killormut paasineqarsinnaasutut uani allaqqanera utoqqatsissutigissavara.

 

Taamaattumik uani tassani oqaaseqatigiit taakkua imarisaata nassuianeqarnissaat tassa imaattariaqassaaq una: Meeqqap sapinngisamik pitsaanerpaamik ineriartornissaa peqqissuunissaalu allatut illersorneqarsinnaanerusumik qulakkeerneqarsinnaappat.

 

Tassa taanna pingaaruteqartorujussuuvoq taamatut soorunami innarluuteqartumut paarinnittussaq sapinngisamik ilisimasaqassasoq, aamma ilitsersorneqassasoq soorunami aamma uani ilaatigut pikkorissaanernik oqariartuuteqartoqarpoq, soorlu Demokraatit tungaaninngaanniit.

 

Taamaattumik tassuunakkut qulakkeersimaneqartariaqarpoq ilumut innarluutilik taamatut paarineqartussaq angerlarsimaffimmi paarineqassaguni aamma ilisimannittumik innarluuteqarnera pillugu ilisimannittumik aammalu qanoq aaqqissuussaasumik paarineqarsinnaaneranut aamma illersorneqarsinnaasumik paarsisup aamma qulakkerneqarnissaa.

Taanna tassani taamatut paasisariaqarpoq.

 

Tassa soorunami innarluutillit assigiiaanngitsorujussuupput aamma pisariaqartitaat assigiiaanngitsorujussuullutik. Ilaaat innarluuteqartarput annertuumik ilaallu immaqa annikitsumik.

 

Taamaattumillu tassuunakkut meeqqat pisariaqartitai aallaavigalugit aammalu pikkoriffigineqarluni qanoq iliuusissat aamma eqqarsaatigalugit.

 

Tassani illersorneqarsinnaasumik meeqqap innarluutillit paarineqarnissaa uani naggataani oqaatigineqartumi pineqarneruvoq.

 

Uangattaaq oqaaserineqartut partiinit qujassutigaakka, aamma Siumut tassuuna paasinnilluartutut aamma Enos Lyberth tassani oqaaseqartoralugu, aamma tapersersuisutut taamatut nipeqarpoq. Ilumoorami pingaaruteqarpoq innarluutillit pingaartumillu aamma annertuumik innarluutillit angajoqqaaminnik aamma sivisunerusumik najorteqarlutik qanimullu najorneqarlutik taanna aaqqissuussaasumik aamma tapersersorteqarlutik toqqissisimasumillu aamma inuuneqarlutillu pingaartumik innarluutillit peroriartornissaat aamma eqqarsaatigalugu.

 

Soorunami siusinnerusukkut innarluutilli pingaartumillu annertuumik innarluutillit Qallunaat Nunaannut aallartittaratsigit nunatsinni innarluuteqartunik katsorsaaneq ilaatigullu aamma perorsaaneq immaqa suli pikkoriffigivallaanngilarput. Taamaattumik aamma ilumoorpoq imaannaanngitsumik nunatsinni innarluutillit atugaqartut, soorlu aamma Demokraatit tassani oqaaseqarnerminni taanna oqaatigivaat.

 

Kisianni pingaaruteqartorujussuuvoq soorlu tamarmik oqariartuutigivaat soorunami meeraq kinaluunniillu innarluuteqartoq nunatsinni najugaqarluni aamma allatuulli periarfissaqartitaanissaa. Taanna pingaartorujussuartut aamma isumaqarfigaarput. Taamaattumillu aamma atugassarititaasut allat meeqqat inuusuttullu aamma ikiorsiisarnermut peqqussutissami nutaami tassuunga aamma ilanngullugu soorunami allatuulli piginnaatitaaffeqarnerat taanna erseqqissartuartariaqarpoq innarluutillit eqqarsaatigalugit.

 

Aammalu Atassutip uani oqaaseqarnermini aamma oqaatigivaa angajoqqaat pisariaqartitaat kisimik aallaavigineqaratik innarluutilik taamatut paarineqarnissaminut taakku kisiisa eqqarsaatigineqassanngitsut. Soorunami meeqqap pisariaqartitai aallaavigalugit aamma innarluutilik pingaartumillu annertuumik innarluutilik paarineqarnissaa tassani tungaviulluinnaqqissaarmat.

 

Qujanaq.

 

Isak Davidsen, ataatsimiinnermi aqutsisoq, sinniisussaq siulleq, Atassut.

Taamaalilluta oqallinneq una naammassivarput.