Oqaluuserisassani immikkoortoq 121 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ulloq
ataatsimiiffiusut aqqarnat, sisamanngorneq 20. marts 2003 nal. 14:00.
Doris
Jakobsen, apeqquteqartoq,
Siumut.
Naluneqanngitsutut
Inatsisartut siornatigut ataatsimiinneranni aalajangerneqarnikuuvoq umiatsiaararsorlutik
aalisartut Q-23-nik pisimasut taarsiivigineqassasut, umiatsiaaqqat Q-23-it
sannarlutaanerat tunngavigalugu.
2.-3. februar
2003 Ilulissat nunaqarfiisa ilaani Oqaatsuni innuttaasunik tusarniaallunga
angalaninni, paasivara Q-23-nik pisisimasut suli maannamut
taarsiivigineqarsimanngitsut.
Tamanna
tunngavigalugu Naalakkersuisumut apeqquteqaatigissavara taarsiivigitinnissamut
suliaq tamanna sumut killinnersoq.
Taama naatsumik
apeqquteqaateqarlunga Naalakkersuisumut apeqquteqaatip akineqarnissaa
kissaatigaara.
Isak Davidsen, ataatsimiinnermi aqutsisoq, sinniisussaq siulleq,
Atassut.
Aalisarnermut,
Piniarnermut Nunalerinermullu Naalakkersuisoq akissuteqassaaq.
Simon Olsen, Aalisarnermut, Piniarnermut
Nunalerinermullu Naalakkersuisoq, Siumut.
Qulaani
pineqartoq pillugu Naalakkersuisunut apeqquteqaateqarput, taannalu allakkatigut
akineqartussatut innersuunneqarpoq.
2001-imut
aningaasanut inatsisikkut aalisariutinik Q-23-nik Q-30-nillu piginnittut
ataasiakkaat taarsiivigineqassasut Inatsisartut aalajangiipput. Taarsiissutit
angallatinut Q-23-nut 200.000,- kr.-iupput angallatinullu Q-30 type I-nut
240.000,- kr.-iullutik. Taarsiissutit pingaarnerutillugu taarsigassarsiat
nalinginnaasumik sinnerinit ilanngaatigineqarput, taarsiissutillu sinneqarpata
taakku akiitsut ikilisinneqarnissaannut atorneqarlutik.
Taarsiissuteqartoqarpoq
piumasaqaatigalugu angallatinik piginnittut akuerissagaat taarsiissutit
angallatit tunniunneqarneranni kuukkunerit amigaatillu pillugit Amutsivinnut
Namminersornerullutik Oqartussanulluunniit piumasaqataajunnaartunut
suugaluartunulluunniit taarsiissutaasut.
Angallammik
piginnittut siulliit piginnittumut nutaamut tunisisimasut
taarsiivigitinngillat.
Angallammik
arlariiullugu pisisoqarsimatillugu, piginnittullu ilaat ataaseq arlallilluunniit
piginneqataajunnaarlutik tunuarsimappata, piginnittumut kiserngoruttumut
imaluunniit piginnittunut kinguleruttunut taarsiivigitinnissamut
neqerooruteqartoqarpoq.
Angallatit tunniunneqarnerminni
isumaqatigiissutinut teknikikkullu piumasaqaatinut naapertuutinngimmata
taarsiisoqarpoq.
Taarsiissutit
erniaqartillugit ulloq 1.1-2001-mi tunniunneqarput.?
Isak Davidsen, ataatsimiinnermi aqutsisoq, sinniisussaq siulleq,
Atassut.
Apeqquteqartoq
Doris Jakobsen.
Doris
Jakobsen, apeqquteqartoq,
Siumut.
Siullermik
nuannaarutigalugu qujavunga Naalakkersuisunut ilaasortap Simon Olsenip
taarsiivigitinnissamut suliap sumut killissimaneranik nassuiaalluni
akissuteqaataanut.
Akissuteqaammi
ersarippoq suut tunngavigalugit Q-23-inik Q-30-nillu
taarsiissuteqartoqarsimanersoq, taarsiivigineqartunut suut
piumasaqaataasimanersut, kiisalu taarsiinermut suut periuutsit
atorneqarsimanersut.
Naalakkersuisunut
ilaasortap Simon Olseni akissuteqaataani ersarissumik akissuteqaammini
allassimavoq taarsiissutit erniaqartillugit ulloq 1.1-2001-mi
tunniunneqarsimasut. Ajoraluartumilli suliani, imaluunniit siulianittut uanga
oqareernittut 2.-3. februar 2003, Ilulissat nunaqarfiisa ilaanni Oqaatsuni
innuttaasunut tusarniaallunga paasivara Q-23-inik pisisimasut ilaat suli
maannamut taarsiivigineqarsimanngitsut.
Taamaattumik
isumaqarpunga suliaq suli taarsiivigineqarsimanngitsut arlaqarsimappata,
nalornissuteqartoqarsimappallu pineqartunut ilisimasitsissutigineqartariaqartoq.
Taamatullu aamma
taarsiivigineqarsimanngitsut aamma uterfigineqaqqittariaqartut.
Qujanaq.
Isak Davidsen, ataatsimiinnermi aqutsisoq, sinniisussaq siulleq,
Atassut.
Aalisarnermut,
Piniarnermut Nunalerinermullu Naalakkersuisoq.
Simon Olsen, Aalisarnermut, Piniarnermut
Nunalerinermullu Naalakkersuisoq, Siumut.
Maani soorunami
oqaatigisinnaanngilakka kikkut taarsiivigineqanngitsoorsimanersut, imaluunniit
amigartumik iliorfigineqarsimanersut.
Taamaammat kissaatigissavara
taarsiivigineqanngitsoorsimasut saaffiginnissuteqarnissaat piaartumik
isumagineqassasoq, taamaalilluta misissueqqissaarsinnaaniassagatta.
Qujanaq.
Isak Davidsen, ataatsimiinnermi aqutsisoq, sinniisussaq siulleq,
Atassut.
Taamaalilluni ullormut
oqaluuserisassaq Naalakkersuisunut apeqquteqarneq 121 naammassivarput.