Oqaluuserisassani immikkoortoq 122 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ulloq
ataatsimiiffiusut aqqarnat, sisamanngorneq 20. marts 2003 nal. 14:12.
Anthon
Frederiksen,
apeqquteqartoq, Kattusseqatigiit.
Qujanaq.
Naluneqanngitsutut
Ilulissat avannaani Paakitsumi erngup nukinganik nukissiuuteqalersinnaaneq
1970-ikkunili misissuiffigineqarpoq.
Paaserusuppara
tamaani erngup nukinganik nukissiuummik pilersitsinissamut periarfissat ullumikkut
qanoq naliliivigineqarnersut, ullumikkut tamatumunnga naalakkersuinikkut qanoq
isumaqartoqarnersoq.
Isak Davidsen, ataatsimiinnermi aqutsisoq,
sinniisussaq siulleq, Atassut.
Inuussutissarsiornermut
Naalakkersuisoq.
Finn
Karlsen, Inuussutissarsiornermut
Naalakkersuisoq, Atassut.
Qujanaq.
Nukissiorfinnit
90-ikkut qiteqqunneranni nunatsinni erngup nukinganit
innaallagissiorfiliorfiusinnaasut pillugit nalunaarusiat marluk
suliarineqarput. Erngup nukinganit innaallagissiorfiliorfiusinnaasut immikkoortut
marlunngorlugit avinneqarput, aningaasatigut pitsaanerpaamik
pissarsiviusinnaasut immikkoortumi 1-imi, allallu immikkoortumi 2-mi
katersorneqarlutik.
Paakitsumi
erngup nukinganit innaallagissiorfiliorfiusinnaasoq nalunaarusiani immikkoortoq
1-imiissussatut nalilerneqarpoq.
1986-imi
Paakitsumi erngup nukinganit innaallagissiorfissaq ima annertutigisumik
uppernarsaavigalugu nalilerneqarpoq allaat tamanna 1987-ip ingerlanerani
suliarinnittussarsiornissamut tunngaviusinnaasimagaluarluni. Pilersaarut taanna
1987-imi ukiakkut ataatsimiinnermi, 1988-imi upernaakkut ataatsimiinnermi
kiisalu 1988-imi ukiakkut ataatsimiinnermi kinguartinneqartarpoq.
Taamatut
kinguartitsisaqattaarnerit siullermeersumik aaqqissutaagallartutullu
innaallagissiorfiup pilersuisinnaassusiata annertusineqarnera kinguneraat,
aammalu erngup nukinganit innaallagissiorfiliornissap sananeqarnissaanik
aalajangernissap kinguarteqqinneqarnera innaallagissiorfimmik dieselitortumik
nutaamik 1992-imi atulersumik sanasoqarneranik kinguneqarluni, tamatumanilu
erngup nukinganit innaallagissiorfiliornissamik pilersaarummi inuiaqatigiinni
aningaasaqarnerup iluaquserneqarnissaa peerneqarluni.
Paakitsumi
erngup nukinganit innaallagissiorfimmik sanasoqarnissaa massakkut inuiaqatigiit
aningaasaqarneranni imminut akilersinnaassutsimik takutitsisinnaassanersoq
taamaallaat nutaamik misissueqqissaartoqarneratigut uppernarsarneqarsinnaavoq.
Aalajangernissamut nutaamik tunngavissap suliarinissaa ukiut marluk
missiliorlugit sivisussuseqassaaq.
Naalakkersuisut
erngup nukinganit innaallagissiorfiit tulliuttut nutaamik
tulleriiaarnilersoqqinneqarnissaannut periarfissaqarnissartik kissaatigaat.
Tamanna pillugu nalunaarusiortoqarnissaa suliniutigineqarpoq. 2003-p
ingerlanerani erngup nukinganit innaallagissiorfiliorfiusinnaasut pillugit
paasissutissat ullutsinnut naleqqussarneqassapput imaalillugit 1995-imiit
tunngaviatigut aalajangernerit pingaarnerit misissorneqarsinnaallutik
suliassaqarfimmi tassani pilersaarusiornerup patajaallisarneqarnissaanut
iluaqutaasussamik.
Naliliinissamut
tunngavissat tunngaveqartinneqassapput nunap assiliornerinik, ingeniørit nunap
sananeqaataanik misissuinerinik, imermik uuttortaanernik kiisalu erngup
nukinganit innaallagissiorfinnut ataasiakkaanut inuiaqatigiit
aningaasaqarneranni naatsorsuinernik, tamatumanilu aammattaaq
innaallagissiorfinni dieselitortuni pioreersuni pisariaqartunik
aningaasaliisarnissat eqqarsaatigineqarlutik. Paakitsumi erngup nukinganit
innaallagissiorfiusinnaasup Ilulissanut pilersuinissaa pilersaarusiornermi
pinngitsoorani ilaassaaq.
Isak Davidsen, ataatsimiinnermi aqutsisoq,
sinniisussaq siulleq, Atassut.
Apeqquteqartoq
Anthon Frederiksen.
Anthon
Frederiksen,
apeqquteqartoq, Kattusseqatigiit.
Naalakkersuisup
akissuteqaataanut qujavunga, aamma tassani ersersinneqarmat ilumut
misissuinerit assigiinngitsut upernarsereersimagaat imminut akilersinnaasumik.
Aammalu pinngortitamut mingutsitsisuunngitsumik aamma taanna Naalakkersuisut
siunertarimmassuk
1987-imili
taamatut erngup nukinganik nukissiorfiliorfimmik Paakitsumi
pilersitsisoqarsinnnaasimagaluarnera.
Assut
uggornarpoq taamanikkut taasuma pilersinniarneqarsimannginnera
Naalakkersuisuusimasut taamanikkut sooq sunalu tunngavigalugu
taamaatiinnarsimaneraat paasiuminaappoq.
Kisianni
nuannaarutigivara massakkut Naalakkersuisut siunissaq eqqarsaatigalugu
Paakitsumi erngup nukinganik nukissiuuteqalersinnaanermik tunngasut
ammaffigimmatigit, tassami siunissami isumalluutit nukissiornermut annerit
aamma ilagimmassuk erngup nukinganik nukissiuuteqalernissaq. Taamaattumik
qujavunga akissuteqaammut.
Isak Davidsen, ataatsimiinnermi aqutsisoq,
sinniisussaq siulleq, Atassut.
Taamaalilluni
Naalakkersuisunut apeqquteqaat 122 naammassivarput.