Oqaluuserisassani immikkoortoq 124-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut sisamaat,
tallimanngorneq 7. marts 2003, nal. ?.
Jonathan Motzfeldt, Inatsisartut Siulittaasuat,
Siumut.
2002-mi ukiakkut ataatsimiinnermik
taamani siulittaasoqarfiusup inatsisartut suleriaasisanni allanngutaasinnaasut
pillugit oqallisissiaat inatsisartut oqaluuseraat.
Siulittaaasoqarfiup inassutiga
sapaatip akunneranut ataasiarluni nalunaaquttap akunnerani ataatsimik
sivisussusilimmik, allallugu piareersagaanngitsumik apeqquteqarfissamik
periarfissiisoqassasoq. Kiisalu siunnersuutinik saqqummiussinissamut ulloq
piffissaliussaq sapaatip akunneranik ataatsimik sivitsorneqassasoq.
Taamaalilluni tunniussivissatut killilissaq sapaatip akunnerinik tallimanik
sivisussuseqassasoq.
Taamani siulittaasoqarfiup
inassuteqaatai inatsisarut isumaqatigaat. Maannakkullu siunnersuut tamatumunnga
naapertuuttumik saqqummiunneqarpoq.
Oqaaseqarnerili piffissaliussanik
inatsisartut ammaanermi oqallinnerinut atuuttunik allanngortitsinissamik
ilallugu.
Taamatut suleriaatsimik
allanngortitsinermi inatsisartut siulittaasoqarfiat saapaatip akunneranut
ataasiarluni, nalunaaquttaq akunneranik ataatsimik sivisussusilimmik
apeqquteqarfissamik periarfisiisinnaalissaaq.
Inatsisartunik ilaasortat
siulittaasoqarfimmut naalakkersuisunulluunniit siumoortumik
nalunaaruteqaqqaanngikkaluarlutik naalakkersuisunut oqaatigalugu apeqqutinik
saqqummiussivigisinnaasaannik.
Apeqqut malitsigitillugu
oqallisiginninnertaqanngitsumik ingerlatiinarlugu akineqassaaq.
Naalakkersuisulli nalunaarsinnaapput
apeqqummut naalakkersuisut akissuteqarsinnaanngitsut. Apeqqummik
oqaluuserinninnermut atatillugu aalajangiisoqarsinnaanngilaq.
Inatsisartut ataatsimiinnissaanut
siunnersuutinik tunniussivissatut killiliussaq sapaatip akunneranik ataatsimik
sivitsorneqassaaq. Taamaalilluni inatsisartut ataatsimiinnerat aallartittussaq
sapaatip akunnerinik tallimanik sioqqullugu tunniussisoqassalluni.
Sivitsuinerup siunertaraa
inatsisartut inatsisartullu allattoqarfiata ataatsimiinnissamik
piareersaanissamut periarfissaasa pitsaanerulersinneqarnissaat.
Siunnersuutikkut inatsisartut
ammaanermi oqallinneranni piffissaliussani naqinnerliugaq naqqinneqarpoq.
Tamatuma peqatigisaanik oqaaseqartut siullermik oqaaseqarsinnaanerat 30
minutsinut killilerneqarpoq.
Isak Davidsen, ataatsimiinnermik aqutsisoq,
sinniisussa siulleq, Atassut.
Partiit oqaaseqartuinut nuuppugut.
Per Rosing Petersen, Siumut.
Per Rosing Petersen, Siumup oqaaseqartua.
Qujanaq.
Siumumit pingaatipparput
inuiaqatigiit ineriatornerat ilutigalugu aamma inatsisartut suleriaasiata
ineriartornermut, malinnaalluni nutartertuarnissaa.
Taamaapporlu uku allannguutissatut
siunnersuutit pingasut, imatut tamakkiisumik taperserlugit Siumumiit
oqaaseqarfigiumasagut.
Allannguutissatut siunnersuut silleq
§ 36-mut tunngassuteqartoq, inatsisartut ulluinnarni ataatsimiinnerminni
eqaallisaanertut isigineqartariaqartoq. Tassalu isaasalerlugu torrutiinnarlugu
ataatsimiittarfimmi inatsisartuniit naalakkersuisunut aperisinnaanermut
periarfissiineq.
Tamanna nunani allani
misilittagaqarfiulluartoq ilisimaneqalereerpoq. Aammalu Kalaallit Nunaanni
inatsisartut ataatsimiittarnerannut tulluuttoq, tassami ataatsimiinerup
ingerlanerani pisariaqarluinnartumik apeqquteqarsinnaaneq ammaanneqassammat.
Aappaatut. §39-mut tunngatillugu,
siunnersuutigineqarpoq siunnersuutinik tunniussereernissaq maannamiit qaammat
ataasiujunnaarluni sapaatit akunneri tallimanut allanngortinneqarnissaa.
Allannguut taamaattoq
annertunerusumik kinguneqassanngilaq. Tassami allaassutaa ullunik ikittuaqqanik
isumaqartussaammat. Taamaattumik aamma tamanna Siumumit taperserparput.
Pingajuallu. Inatsisartut
suleriaasiaannut ilanngussatut ilaatinneqarput oqaaseqarnissamut
piffissarititaasut taakkulu siulittaasoqarsimmiit allanngortinniarneqarput,
ammaanermi oqallinnermi imaalersillugit.
Partiit oqaaseqartui siullermeernermi
30 minutsit, aappassaaneernermi 15 minutsit. Ilaasortat allat siullermeernermi
aappassaaneernermilu minutsit tallimat.
Taakkualu allannguutissat aappaat
malillugu, inatsisartut akuersineratigut atuuttussanngortinnissai aamma
Siumumit taperserlugu oqaatigissavarput.
Taamatullu oqaaseqarluta Siumumiit
siulittaasoqarfiup siunnersuutai tamakkiisumik taperserpagut.
Isak Davidsen, ataatsimiinnermik aqutsisoq,
sinniisussa siulleq, Atassut.
Tullinnguuppoq Aqqaluk Lynge, Inuit
Ataqatigiit.
Aqqaluk Lynge, Inuit Ataqatigiit oqaaseqartuat.
Inatsisartut suleriaasiata
allanngortinneqarnissaa pillugu siunnersuutit matumani pineqarput tassaapput,
inatsisartut uagut siulitta suliarisimasaat allannguuteqartinnagu
saqqummiussaq.
Pineqartut apeqqutit Inuit
Ataqatigiit akuersaarumavaat annertunerusumik oqaaseqarfiginngikkaluarlugit.
Uanilu saqqummiussinermi
innersuussutigissavara Inuit Ataqatigiit sinnerlugit taamani inatsisartuni
ilaasortaasup Ole Lyngep, junip 28 2002-mi, Kalaallit Nunaanni inatsisartut siulittaasoqarfianut
allagarisimasaa. Uani oqaaseqarnitsinnut ilanngussaq.
Inuit Ataqatigiit tassani
pingaartillugu erseqqissarpaat suli isumaqaratta Kalaallit Nunaanni
inatsisartut suleriaasiat, pisariaqartutigut nutartertuarnissaa.
Ole Lyngep siorna allagarisaa
erserpoq allagarisaani erserpoq folketingemi ileqqorineqalersimasoq, tassalu
tamanut ammasumik isumasioqatigiittarnerit apeqqarissaartarnerilluunniit.
Kalaallit Nunaani atorneqalersinnaasariaqartoq.
Taamatut eqqarsaateqarnerup
tunngavigaa Inuit Ataqatigiinni pingaartinneqarmat inuit tamat
oqartussaaqataanerannut periuseq taamaattoq naleqqummat. Kiisalu Inuit
Ataqatigiit kissaatigimmassuk innuttaasut tusarnaartuinnaanatik kisiannili
aamma inatsisartut sulineranni sinnersaasutut inissinneqartalernissaat.
Taamaattumik sapaatit
akunnikkaartumik naalakkersuisunut ilaasortanik ataasiakkaanik inatsisartut
ataatsimiittarfianniik, inatsisartuni ilaasortat apersuisinnaanerat
alloriarnertut isigalutigut. Suli pisariaqartipparput suleriaatsip
naleqqussaqqinneqarnissaa.
Soorlu Inuit Ataqatigiit
siunnersuutaat nalileqqinneqarumaartoq.
Taamatut oqaaseqarlunga
siunnersuutit pineqartut saqqummiunneqartut tamaasa akuersissutigaagut.
Isak Davidsen, ataatsimiinnermik aqutsisoq,
sinniisussa siulleq, Atassut.
Taavalu Atassummiik Jakob Sivertsen.
Jakob Sivertsen, Atassutip oqaaseqartua.
Allannguuteqartitsiniarnermi pineqartoq §
36 immikkoortoq 7-itut ilanngunneqartussaq, tassa inatsisartut
siulittaasoqarfiat sapaatit akunneranut ataasiarluni nalunaaquttap akunneranik
ataatsimik, apeqquteqartarfittut aalajangersaasinnaanera Atassummit
aalajangersaasinnaaneranut, Atassummit isumaqarpugut apeqquteqaat pillugu
naalakkersuisoq aperineqartoq tunngavissaqarluartumik akisarnissaminut
periarfissaqarnissaa siunertaralugu, piffissaliisoqarsinnaanera
misissorneqartariaqartoq.
Taamatuttaaq inatsisartunut ilaasortaq
aperisoq naammaginartumik akineqarsinnaaqqullugu.
Kiisalu § 39, inatsisartut ullormut
oqaluuserisassaattut ilanngunniakkat kingusinnerpaamik ataatsimiinnerup aallartinnissaanut,
sapaatit akunnerinik tallimanik sioqqullugu inatsisartut siulittaasoqarfiannut
apuutereersimanissaannik siunnersuut Atassumit akuersaarparput.
Oqaaseqarsinnaanermut tunngatillugu
siulittaasoqarfiup inatsisartut aammarneqarneranni oqaaseqarsinnaatitaaffiit
killiliussai, inatsiseqarnermi ataatsimiititaliamut
aappassaaneerneqannginnerminni ingerlaqqinnissaat Atassummit inassutigaarput.
Taamatut oqaaseqarluta inatsisartut
siulittaasoqarfiata allanngortitsinissamik siunnersuutaa Atassummit akuersaarparput.
Isak Davidsen, ataatsimiinnermik aqutsisoq, sinniisussa
siulleq, Atassut.
Taavalu massakkut Per Berthelsen, Demokraatit.
Per Berthelsen, Demokraatit oqaaseqartuat.
Demokraatit inatsisartuni gruppeanni oqaluuserisassaq sukumiisumik oqaloqatigiissutigereerlugu, aaliangerpugut inatsisartut suleriaasiata allannguutissaatut siunnersuutigineqartut tamaasa taperserniarlugit.
Isak Davidsen, ataatsimiinnermik aqutsisoq, sinniisussa siulleq, Atassut.
Maannakkullu Anthon Frederiksen, Kattusseqatigiit.
Anthon Frederiksen, Kattusseqatigiit.
Inatsisartut suleriaasiata allanngortinneqarnissaanut siunnersuut Kattusseqatigiit gruppeanni, taperserlugu inatsisartut 2002-mi ukiakkut ataatsimiinneranni isumaqatigiissutigineqartut innersuussutigaluguit, akuersaarpara.
Isak Davidsen, ataatsimiinnermik aqutsisoq, sinniisussa siulleq, Atassut.
Inatsisartut siulittaasuat.
Jonathan Motzfeldt, Inatsisartut Siulittaasuat, Siumut.
Qujassutigaakka taakkua saqqummiussat marluk taama ilassilluarneqarlutik taperserluarneqarmata.
Taava taamaalillutik akuerineqarnerat tunngavigalugu suliassat ingerlateqqissavagut.
Taavalu Inuit Ataqatigiit oqaaseqartuanut Aqqaluk Lyngemut, allakkiarineqarsimasut Ole Lyngep allakkiarisai, taakkua aamma soorunami maannakkut suliassat ingerlaqqittarnerani aamma qissimillattaakkatsinnut aamma ilaapput. Suliassat pitsanngorsarneqarnissaanik siunnersuutit suulluunniit, saqqummiunneqartut aamma taakkua ilagaat Ole Lyngep allagarisai. Aamma taakkua naatsorsuutigineqassapput qissimillattaarneqarnissaat.
Qujavunga taamatut
taperserluarneqarnermut pillugu.