Oqaluuserisassani immikkoortoq 17 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut arfineq aappaat, pingasunngorneq 12. marts 2003,
Augusta Salling, Aningaasarsiornermut Naalakkersuisoq, Atassut.
Qujanaq. Nunatta aningaasaqarnera 2002-mi 90-ikkut naalernerannut sanilliullugu annikinnerusumik qaffakkiartorsimavoq. Ukiunilu qaninnerusuni tullerni aningaasaqarnerup qaffakkiartornera annikinnerulersinnaavoq. Tamatumunnga pissutaasut ilagaat nunarsuarmi akit allanngoriartornerat. Pissutaasulli allat nunatsinni nassaassaapput.
Aningaasarsiornerup appariartornerata kingunerisaanik nunatta Karsiata aningaasaqarnera ukiuni makkunani sukaterivigineqarsimavoq. Tamatuma peqatigisaanik aningaasaqarniarnikkut imminut napatinnerulernissarput kissaatigigatsigu pisortat aningaasartuutaasa qaffakkiartornerat noqisimaartariaqarparput.
2003-mut aningaasanut inatsisissatut siunnersuut Naalakkersuisunit saqqummiuteqqammigarput tamatuma tungaanut sammivoq. Nunatsinnili atugarissaarneq attatiinnarneqassappat aningaasanut tunngasutigut naalakkersuinikkut ingerlatsinikkuinnaq tunuarsimaartoqassanngilaq. Piffissami aggersumi isumaqatigiissutit arlallit isumaqatigiinniutigineqaqqittussaapput.
Ukiunut tulliuttunut isumaqatigiissuteqarnissani Naalakkersuisut pisariaqartutut isigaat sulisitsisut sulisartullu akisussaassuqarneq tunuarsimaarnerlu takutissagaat. Akissarsiat annertuumik qaffanneqassappata pisortat aningaasaqarnerat nukillaangalersinneruneqassaaq, suliffeqarfiillu unammillersinnaanerat annikinnerulissalluni. Tamannalu aningaasaqarnerup annikitsumik qaffakkiartoreersup navianartorsiortinneqarneranik kinguneqassaaq.
Pisortat allaffissornerannut tunngatillugu Naalakkersuisut aningaasartuutit qaffakkiartornerat unitsinniarpaat annikillisaanikkut naammassisaqarnerulersinnaanikkullu.
Nunatta inuussutissarsiutaa pingaarnerpaaq aalisarneq aamma immikkut isiginiarneqartariaqarpoq. Sinerissap qanittuani aalisarnermut tunngatillugu malugineqarsimavoq aaqqissugaaneq allanngortittariaqartoq. Aalajangiunneqarsimavoq sinerissap qanittuani aalisarnermi raajat 10.000 tonsit nunamut tulaanneqartaraluartut angallammi nioqqutissiassanngortinneqassasut.
Sinerissap qanittuani raajarniarnerup aaqqissugaanera eqqarsaatigalugu suliniutaasuni ingerlasuni angallatittaaq immikkut sammineqarput. Naammasisaqarsinnaassuseq annertusarumallugu angallatit naammassisaqarluarsinnaanngitsut akilersinnaanngitsullu aalisarunnaarsikkiartuaarneqassapput. Maannamut angallatit 65-iusimagaluartut 20-t missaannik ikilineqarsimapput, naatsorsuutigineqarporlu siunissami angallatit 25-ininngaanniit 30-iussasut.
Sinerissap qanittuani aalisarnerup aaqqissugaanerata naleqqussarnerata assigaa 1990-ikkut aallartinneranni avataasiorluni aalisariuteqassutsimik naleqqussaaneq angallatit ikilinerannik kinguneqartoq. Ilaatigut tamanna aqqutigalugu angallatit avataasiutit ullumikkut isertitat apparnissaannut piareersimanerulersimapput. Aalisarnerup immikkoortuini tamani aningaasaqarniarnikkut pissutsit tamarmik imatut qaffasissuseqassapput nunarsuarmi akit appasikkaluarpataluunniit inuussutissarsiut nunatsinni suliffeqarnermut aningaasanillu isaatitsinermut ajunngitsumik peqataasinnaassalluni.
Naalakkersuisut kissaatigaat nammineernerulernissaq, tamatumanilu pisariaqarpoq aningaasaqarnikkut periarfissaqarnissaq. Taamaattumik inuiaqatigiit aaqqissugaanerat eqqarsaatigalugu naalakkersuinikkut ingerlatsinermi allanngortitsinissat pisariaqarput inuiaqatigiinni aningaasatigut qaffakkiartorneq qulakkeerumallugu.
Naalakkersuisut kissaatigaat nunatsinni inuiaqatigiit aaqqissugaanerat eqqarsaatigalugu naalakkersuinikkut ingerlatsinerup nutaamik oqallisigineqarnissaa. Inuiaqatigiit aaqqissugaanerat eqqarsaatigalugu naalakkersuinikkut ingerlatsinermi pineqarpoq inuiaqatigiittut aaqqissugaanitta naleqqussagaanera. Inuiaqatigiit allanngoriartortuarput, tamannalu inuiaqatigiit aaqqissugaanerata ingerlaavartumik naleqqussarneqartarnissaanik piumasaqarpoq. Tassalu inuussutissarsiutinik ingerlatsinerup nunattalu siuariartornissaata tunngavissai atugassaalu pitsanngorsartuartariaqarpagut qaffakkiartorneq, suliffissaqartitsineq aningaasanillu isaatitaqartarneq aqqutigalugit.
Taamaattumik Naalakkersuisut pingaartippaat ungasinnerusoq isigalugu anguniakkap inuiaqatigiit aaqqissugaanerat pillugu iliuusissatut pilersaarummi 2000-mi ukiakkut saqqummiunneqartup aalajangiusimaneqarnissaa. Anguniakkami oqaasertaliunneqarsimavoq nunatta naalakkersuinikkut nammineernerulerneq anguniassagaa aningaasarsiornikkut namminneersinnaanerulerneq, niuerfinnut samminerulerneq oqimaaqatigiissilluakkamillu agguaassisarneq pillugu naalakkersuinikkut ingerlatsineq tunngavigalugit.
Inuiaqatigiit aqqissugaanerat pillugu iliuusissatut pilersaarut pingasunik qiteqarpoq. Ilaat tassaavoq inuiaqatigiit aaqqissugaanerata allanngortiternissaa, tassani ilaallutik tapiissuteqartarnermut tunngasut, suliffeqarfiit Namminersornerullutik Oqartussanit pigineqartut namminersortunut pigisassanngortinneqarnissaat aamma inuiaqatigiinni attaveqaqatigiinnermut pilersuinermullu tunngasut.
Qiteritinneqartoq alla tassaavoq namminersorluni inuussutissarsiutinik ingerlatsinermi tunngavissat pitsaanerulernissaat. Tassani ilaallutik inuussutissarsiutit siuarsarniarlugit aaqqissuussinerit kiisalu inatsisiliornikkut pitsanngorsaatit. Qiteritinneqartut pingajuat pineqarpoq piginnaasat ineriartortinnissaat. Tassani sammisassat ilinniartitaanermut, suliffeqarnermut ilaqutariinnermullu tunngasut sammineqarlutik.
Iliuusissatut pilersaarummi suliniutit ilai naammassineqareersimapput. Assersuutigalugu tamatumani pineqarput KNI Pisiffik A/S-ip namminersortunut pigisassanngortinneqarnera.
Inuussutissarsiutinut tunngatillugu inatsisit pisariillisarneqarnerat, imaatigut usinik angallassinermik iluarsaaqqinneq aamma ineqarnermut akiliutinik iluarsaaqqinneq. Iluarsaaqqinnerni tamakkunani misilittakkat suliap ingerlaqqinnerani ilaassapput, siunertaanngikkaluanillu kinguneqarsimappata Naalakkersuisut piareersimapput tamakku malersoqqissallugit. Soorlu Naalakkersuisut Royal Arctic Line A/S-illu maannakkut oqallisigigaat imaatigut usinik angallassinermik iluarsaaqqinnerup sunniutai usillu amerlinerat qanoq ililluni atuisunut akinik appartitsinikkut iluaqutaasinnaanersoq.
Inoqutigiinnut 100.000 kronit inorlugit isertitaqartunut tunngatillugu paasineqarsimavoq ineqarnermut akiliutinik iluarsaaqqinneq maannakkutut isikkoqarluni siunertaanngitsunik kinguneqarsimavoq. Taamattumik Naalakkersuisut anguniarumavaat ineqarnermut tapiissutit qaammammut 100-niit 400 kronenut qaffanneqarnissaat inoqutigiinnut 100.000 kronit inorlugit isertitaqartartunut tunngatillugu.
Inuiaqatigiit aaqqissugaanerat eqqarsaatigalugu ukiuni aggersuni naalakkersuinikkut suliniarfissat pingaarnerit ilagaat inuussutissarsiornermut tunngasut inuiaqatigiinni suliffeqarnermut aningaasatigullu isaatitsinermut tunngaviusut.
Naalakkersuisut akisussaaffimmittut isigaat inuussutissarsiutit pioreersut ineriartortinnissaannut nutaallu aallartinnissaannut tunngavissat pitsanngorsarnissaasa qulakkeerneqarnissaat. Taamaattumik Naalakkersuisut qinersivimmi matumani inuiaqatigiit aaqqissugaanerat eqqarsaatigalugu naalakkersuinikkut ingerlatsinermi suliniuteqarfissat makku salliutinniarpaat naalakkersuisoqarfinnut agguataarlugit.
Naalakkersuisut siulittaasuata suliassaqarfii eqqarsaatigalugit ingerlatseqatigiiffiit Namminersornerullutik Oqartussanit pigineqartut namminersortunut pigisassanngortinneqarnissaat pillugu suliniutit qulaajarneqassapput.
Inuussutissarsiornermut aatsitassanullu Naalakkersuisoqarfimmi Naalakkersuisut qulaajarumavaat nunatsinni tunisassianik angallassinermut immikkut tapiissuteqartarnerup annikillisinneqarsinnaaneranut periarfissat kiisalu innaallagissamut, imermut kiassarnermullu akiliutit allanngortissinnaaneqarnerat.
Tamatuma saniatigut inuussutissarsiornermut siunnersuisarnerup pitsanngorsarsinnaaneqarneranut periarfissat qulaajarneqassapput, aammalu inatsisitigut tunngavissat pitsanngorsarneqassallutik.
Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmi sammineqarnerussapput Atuarfitsialaap piviusunngortinnissaa ataatsimullu isigalugu ilinniartitaanerit qaffasissusiisa pitsaassusiisalu qaffassarneqarnissaat.
Aningaasarsiornermut Naalakkersuisoqarfimmi Namminersornerullutik Oqartussat tapiissutigisartagaat nalunaarsorneqassapput siunnersuusiortoqassallunilu nammineerluni sipaagaqartarnermik siuarsaasuusinnaasunik.
Suliniutit ilaannut akisussaaneq pisortaqarfinnut arlalinnut agguataarneqarpoq. Inuussutissarsiornermut aatsitassanullu Naalakkersuisoqarfimmi aamma Attaveqaqatigiinnermut ineqarnermullu Naalakkersuisoqarfimmi sulisut aaqqissugaalluartumik nuttarsinnaanerat sulissutigineqassaaq. Inuussutissarsiornermut aatsitassanullu Naalakkersuisoqarfimmi aamma Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmi inuussutissarsiornermut tunngasutigut naalakkersuinikkut ingerlatsineq aamma ilisimatusarneq eqqarsaatigalugu naalakkersuinikkut ingerlatsineq inuussutissarsiornermut sammisoq sammineqassapput.
Upernaaq manna namminersorneq pillugu isumalioqatigiissitat isumaliutissiissusertik saqqummiutissavaat ukiamullu ataatsimiinnermi Inatsisartuni oqallisigineqassalluni. Naalakkersuisut naatsorsuutigaat isumaliutissiissutip kingornatigut innuttaasut oqallinnerata kingunerissagaa inuiaqatigiit aaqqissugaanerat eqqarsaatigalugu naalakkersuinikkut ingerlatsinermi nutaamik suliniuteqalerneq.
Naalakkersuisut aalajangiusimavaat namminersulernissamut peqataajumallutik nunatta aningaasaqarnikkut imminut napatissinnaaleriartuaarnissaa aqqutigalugu.
Ukiumut aggersumut 2004-mut aningaasanut inatsisissamut siunnersuummik suliaqarneq Namminersornerullutik Oqartussani aallartereerpoq. Suliassaqarfinni aalajangersimasuni arfineq-pingasuni misissueqqissaartoqassaaq naalakkersuinikkut aalajangernissanut tunngavissiat suliarineqassallutik. Tamatumani pineqarput:
- Allaffissornermut aningaasartuutit annikillinissaat. Pisortanit soraarnerussutisiat ullumikkut pisariaqartitanut naleqqussarnissaat.
- Peqqinnissamut tunngasuni aningaasartuutitigut tatisimaneqarnerup qulaajarneqarnissaa.
- Innarluutilinnut tunngasuni aningaasaliisarnermut oqartussaanerup kommunenut tunniunneqarsinnaanerata nalilerneqarnera.
- Meeqqanut tapiissuteqartarnermit aaqqissuussinermut aningaasalersuisinnaanermut periarfissat misissornissaat.
- Alisarnermut aningaasaliissutinik pisariaqartitsinerup nalilernissaa.
- Ukiuni qaninnerni inuussutissarsiornermut tunngasuni tapiissuteqartarnermut aaqqissuussinernut kiffartuunneqarnissamillu isumaqatigiissutinut pingaarnersiuisarnissamut tunngavissanik pilersitsineq.
- Iluarsartuussiniarluni aserfallatsaaliuiniarlunilu suliniarnerup qularnaarneqarnissaa amigaateqarnerullu annertussusiata qulaajarneqarnissaa.
Suliassat tamakkua suliarineqarnerat tunngaviussaaq naalakkersuisooqatigiinnissamik isumaqatigiissummi takorluukkat piviusunngortinnissaat pillugu Naalakkersuisut aalajangernissaannut.
Misissueqqissaarluni sulineq aallartinneqartoq annertuvoq, arlalitsigullu naatsorsuutigineqarsinnaanani 2004-mi aningaasanut inatsisissatut siunnersuutip saqqummiunneqarnissaanut naammassineqarsimassasoq. Naalakkersuisulli naalakkersuinikkut anguniagaasa piviusunngortiternerat aallartereerpoq ingerlaqqissallunilu misissueqqissaarluni sulinerit naammassineqartarnerat ilutigalugu.
Nunattat ukiuni aggersuni aningaasaqarniarnikkut ineriartornerata sumut samminissaa aalajangerniarneqarnialerpat inerisitaqarfiusumik oqallinnissaq Naalakkersuisut qilanaaraat.
Taamatut oqaaseqarlunga Naalakkersuisut 2003-mut aningaasaqarniarnikkut ingerlatsineq pillugu nalunaarutaat Inatsisartunut oqaluuserisassanngortippara.
Qujanaq.
Per Rosing-Petersen, ataatsimiinnermi aqutsisoq, sinnisussat aappaat, Siumut.
Aningaasarsiornermut Naalakkersuisumut qujanaq. Tullinnguupput partiit oqaaseqartui.
Siulliussaaq Siumuminngaanniit Ole Thorleifsen. Takanna.
Ole
Thorleifsen, Siumup
oqaaseqartua.
Qujanaq.
Ukiut kingulliit nunatta aningaasarsiornerata qaffakkiartorsinnarluni qaffakkiartornera
unikaallakkiartortoq Naalakkersuisuniit oqariartuutigineqarpoq. Nunatta
isertitaasa qaffakkiartorunnaarnerat tunngaveqarpoq avammut tunisat
amerliallakkaluarlutik akitigut appariarfiginerat.
Siumumiit
Naalakkersuisut aningaasartuutinik unikaallatitsinissamik oqariartornerat
taperserparput. Tunngavigalugu aningaasartuutit aalaakkaasut aqutsinermut
annikillisaavigineqarsinnaaneri piviusorsiornerummat isertikkumaagassat
annertunissaasa naatsorsuutigineqarneriniit.
Aningaasartuutikillisaaniarneq
inuiaqatigiinnik sullissinermut ajortitseriannginnissaa pingaartipparput.
Taamaattumik Siumumiit nuannaarutigaarput Naalakkersuisut allaffissornemut
tunngatillugu Sukaq aqqutigalugu sulissutigimmassuk imminut akilersinnaasumik
ingerlatsinissaq.
Nunaqavissut
Namminersornerullutik Oqartussani allaffiini salliutinneqarnissaat
pingaarnerutillugu atorfinitsitsisarnissaq siunerfigeqquarput.
Naalakkersuisuniit
nalunaarutigineqarpoq suliffissaaleqineq annikilliartortoq. Kisiannili
Siumumiit malugeqquarput isorliunerusuni suliffissaaleqinerup
annertusiartorsimanera. Tamatuma kinguneraa nunatsinnut akileraarutit
isertittakkat annertuseriarsimaneri, kisiannili maluginianngitsooqunngilarput
kommuneni ataasiakkaani akileraarutinut isertittakkat ukiuni kingullerni
annikilliallassimaneri. Tamannalu kinguneqarpoq kommunet ataasiakkaat
aningaasatigut ajornartorsioriartornerannik. Ajornartorsiut tassaniittoq
Naalakkersuisunut alaatsinaaqquarput aaqqissuusseqqinnissarlu taassuma
tungaatigut pisariaqarpoq.
Pissutsinut
tamakkununnga aaqqiissutaasinnaapput inuussutissarsiornikkut nunatta iluani
nutaamik aaqqissuusseqqinnerit allanngortinnissaat. Inuussutissarsiornermut
pisortanit sullinneqarneq nakkutigineqarnerlu nunami immikkoortukkuutaarlugit
regioninngorlugit aaqqissuuttariaqartutut Siumumiit Naalakkersuisunut nutaamik
alloriarfissatut innersuussutigerusupparput.
Tassunga
atatillugu kommunet imminnut qanittut akileraarnertigut, aningaasarsiornertigut
teknikkitigullu suliassaqarfinni imminnut suleqatigiittarsinnaanissaat
inatsisut aqqutissiuunneqarnissaat ilanngullugu Naalakkersuisunit
sulissutigeqquarput. Taamaalilluta kommunet aaqqissuutissagutsigit qanimut
suliffeqarfiit assigiinngitsut suleqatigiiffigisinnaanissaat taamaalillutillu
aningaasartuutiminnik annikillisaatigisinnaanissaat aqqutissiuunneqassammat.
Ilanngullugulu
Naalakkersuisunut inassutigiumavarput kommunet kattussinnaanerisa KANUKOKA
Namminersornerusullu suleqatigiillutik tamanna siunnersuusiussagaat. Taamatut
saqqummiuteqarnitsinnut tunngavigaarput kommunenut Namminersornerullutik
Oqartussat tapiissutaat qaffakkiartuinnarmata, 2002-mi 706,8 mio.
kr.-iusinnarlutik 2003-mi 744 mio. kr.-inngorlutik, taamaalillutik 37,2 mio.
kr.-nik qaffapput.
Siumumiit
maluginiarparput suliffeqarfinni Namminersornerullutik Oqartussanit
tapiissuteqarfigineqartuartuni allaffissornerit inerisaavigineqartuarneri.
Siumumiit Naalakkersuisunut kaammattuutigissavarput paasiniaqqullugu
tapiissutit siunertanut atorneqarnersut. Tassami umiarsuartigut
angallassinermut assartuinermullu kiffartuussinernut tapiissutit 123,7 mio.
kr.-nik annertussuseqarput.
Inuiaqatigiinni
aningaasartuutikillisaanerit tapiissutillu siunnerfeqarnerusumik atornerisigut
inuiaqatigiinnut Namminersornerullutillu Oqartussanut aningaasaqarnertigut
pitsanngorsaataasussaavoq.
Naalakkersuisunut
Siumumiit suliassatut inassutigerusupparput ilaqutariit meerartallit
aningaasartuutaasa aaqqissuteqarfiginissaat. Maannamut ineqarnermut akit
pisiassallu akiisa qaffariartuinnarnerisa kingunerisaanik aningaasat pisissutigisinnaasat
annikillisarneqartuarmata.
Maannamut
ineqarnermut iliuuserineqartut Siumumiit naammagisimaarpagut. Inuit
periarfissinneqarput namminerisaminnik initaarsinnaanissaminnik imaluunniit
illutaarsinnaanissaminnik nammineq pigisamik akilersuinerup kingunerissavaa
piffissap ingerlanerani illumik nammineq akilereerlugu pigisap
annertusiartornera. Tamatumunngalu atatillugu inuiaqatigiit ileqqaagaat
annertusiartussapput.
Naalakkersuisunut
aaqqitassatut inassutiginiarparputtaaq BSU-mit illut iluarsaatassat
sukkanerusumik iluarsaanneqarsinnaasarnissaat illullu inuerunnikut
aserunnginnerini allanik iserterfigineqarsinnaasarnissaat.
Inuiaqatigiit
aaqqissugaanerat eqqarsaatigalugu naalakkersuinikkut ingerlatsinerup allanngortitsiniarnerullu
peqqissaartumik piviusorsiortumillu ingerlanneqarnissaa Siumumiit
kaammattuutigissavarput. Tassami aningaasarsiorneq tunngavigalugu
naalakkersuinikkut ingerlatsiniarnermi pingaarluinnartutut isigigatsigu
innuttaasut kissaataasa malinneqarnissaat.
Nunap
immikkoortuinut inuussutissarsiornikkut agguaanermi pingaarluinnarpoq
angallannertigut eqiteriffiit tunisassianillu inuussutissarsiutitigut
ineriartorluarfiit siuarsagassatut pimoorunneqarnissaat.
Suliffeqarfinnik
ineriartortitsinissami pingaarluinnartutut isigaarput, amminersornerusut
suliffiutaat suleqatigalugit sulliviit pioreersut patajaallisarnissaat.
Tamatumani selskabet siulersuisui peqatigalugit ingerlaqqinnissaq Siumumit
periarfissaqarsoraarput.
Tamatumalu
saniatigut nunaqarfiit illoqarfiillu ingerlanngitsunik tunisassiorfillit
sukkanerpaamik
periarfissiuunneqarnissaat sulissutigineqartariaqartutut isigaarput.
Innuttaasut piginneqatigiiffilioreerlutik aallartitsinissamik piareersimasut
ukiorpassuarni mattusimaneqartutut misigisimanatik suleqatigineqarlutilli
periarfissaminnik suleqatiserineqaqqullugit.
Aalisarnermi
angallatitigut naleqqussaanerit ingerlanneqarput. Nunaateqarnermi pissutsinut
naleqqussaanerit ingerlanneqartuarput. Aalisarnikkut naleqqussaanerit
naalakkersuisut aallarteriigaat ingerlateqqinneqarnissaat Siumumit
kaammattuutigaarput, taamaaliornikkut periarfissat isumaqatigiissutaareersut
iluini tamakkiisumik iluaqutiginiarneqaqqullugit, aalisartut piniartullu
kattuffiat KNAPK suleqatigalugu, taamatullu avataasiortut kattuffiat APK.
Takornariaqarnerup
nalinginnaasumillu nunatsinnut nunatsinniillu angalanerup piffissami aggersumi
eqaannerusumik aaqqissuussiviginissaa Siumumit soqutigiuarparput. Air Greenland
piginneqataaffigaarput, tassuunalu sunniuteqarluta ingerlanissarput
aqqutigalugu periarfissat akikinnerusumik aqqutissiuisut
peqataaffigisariaqarpavut. Ilami Air Greenland kisiat pinnagu aammali selskabet
allat soorlu Tele Greenland aamma aningaasartuutit inuiaqatigiinni
peqataaffigisaat pillugit aaqqissuusseqatigisariaqarpavut, ingerlatsinermi
akikinnerusumik pilertornerusumillu kiffartuussinissat anguniarlugit.
Atuarfitsialaap
ukioq-manna inatsisitigut atulersussap pitsaasumik aallarteriarnissaa,
ingerlanissaalu Siumumiit pingaartipparput taamaattumillu ineriartornerata
atuarfimmiit atuarfimmut naligiissumik ingerlanissaa isumannaarniarlugu
atuarfeqarfimmi ilinniartitsisut atuartullu kiisalu atuarfinni siulersuisut
suleqatigalugit ingerlanneqartut Siumumit isumalluarfigaavut. Tassami
ilinniarluarsimaneq piffissamik sipaarfiuinnarani ingerlatsinermittaaq
eqaannerusumik sukkanerusumillu kinguneqartarmat.
Ilanngullugu
naalakkersuisunut alaatsinaaqquvarput, inuussutissarsiornermut
ilinniartitaanerup pissutsinut naleqqussaavigineqarnissaa. Siammasissumik
Tunngaviusumik Ilinniartitaanerup (STI) iluatsilluarnissaa pisariaqarpoq.
Tamatumani praktikkerfissaqartitsinissaq inuusuttunut pisariaqarluinnartoq
aaqqissuussamik tunngaveqarluartumillu ingerlasariaqartoq, Siumumit
isumaqarpugut.
Naggataatigut
Naalakkersuisunut inassutigissavarput namminiilivinnissamut siunertaqarnermi
inuussutissarsiornikkut piorsaanissaq pilersaarutaasutut annertuumik
iliuuseqarfigeqqullugu. Tamatumani aamma danskit suleqataajumanerat
Statsministerip tikeraarnermini neqeroorutaa Siumumit puigoqqunngilarput.
Aalisarnerinnaq
piorsarsimavarput patsisissaqarluartumik. Maannalu aamma nunami sulliviit
sullivissallu pimoorutamik piorsarlugit sammisariaqalerpavut. Tamatumani aamma
aatsitassat iluaqutigineqarnissaat isumalluutaasoq suli annertunerusumik iliuuseqarfigisariaqartoq,
Siumumit isumaqarpugut.
Minnerunngitsumillu
nunatsinni erngup avammut nioqqusiarineqarluni periarfissai tamakkiisumik
suleqatigiinnerit assigiinngitsut aqqutigalugit naammassisaqarfiulersut
tapersersortariaqarluinnarput. Aningaasarsiornermut suliffissaqarnissamullu
aqqutissiuisussaapput annertuut. Naalakkersuisut saqqummiussaminni oqaatigaat
tamakku tungaasigut aamma inatsisiliornikkut periarfissat tikkuarmatigik
isumaqatigaavut.
Ataatsimut
isigalugu Naalakkersuisut saqqummiussaat manna siunissami inuiaqatigiit
aaqqissuunneqarnissatsinnut
annertuumik tikkuagaqarpoq, soorlumi tamanna siusinnerusukkut aamma
oqallisigalugu aallartissimagipput, tamannalu nangeqqittariaqarpoq piffissami
aggersumi
aammalu oqaluuserisassanut
allanut atatillugu.
Qujanaq.
Per
Rosing-Petersen,
ataatsimiinnermi aqutsisoq, sinniisussat aappaat, Siumut.
Siumuninngaanniit
Ole Thorleifsen-imut qujavugut. Tullinnguuppoq Josef Motzfeldt, Inuit
Ataqatigiit, takanna.
Josef
Motzfeldt, Inuit
Ataqatigiit oqaaseqartuat.
?Silarput unigani ingerlagami Malersorlugu
pinianngitsuni
Nukillaarutaalerumaarpoq?
Hendrik Lundip
taalliaani oqaatsit inuiannut tamanut qaquguluunniit qanganitsinngisaannartussaq
oqaluuserisamut matumunnga aamma attuumassuteqarpoq.
Nunatsinni
aningaasarsiorneq naliliiffiginiaraanni ukiut kingulliit qulit sanaartornikkut
attaveqaatitigullu nutarterisoqarluni ineriartortitsisoqarsimagaluartoq, inuiaqatigiittut
ataatsimut aningaasaqarnerulersimanngilagut, tamannalu Inatsisartut
susassaqarfigilluinnarpaat.
Landskarsip
isertitaasa amerlanerpaartaat suli Danmarkip nunatsinnut aningaasaliuttagaannit
EU-millu aalisarnikkut isumaqatigiissummeersuupput, inuiaqatigiit nalilinnik
pilersitsineruneranneersuunatik.
Sanaartornermimi
nunatsinnilu niuernermi aningaasat kaaviiaartinneqarnermikkut akileraarutitigut
isertitsissutaasut amerlanersaat aningaasanit taakkunannga aallaaveqarput.
Qujanartumik
nunarput uumassusilinnik pisoorsuuvoq, ullumikkut avammut
nioqqutigineqarnerisigut nunatsinni nammineq pilersitatsitut
aningaasannassutigisakkatsinnik
Aatsitassanik
peqarpugut. Ullumikkorpiaq piiaasoqanngikkaluarpoq, misissuinerilli
isumalluarnartoqartut ingerlanneqarput.
Taakku
iluaqutaalillarumaarput, uumassusilinnik pisuussutitsitut silaannap qanoq
issusia najoqqutaralugu tammakariataartanngillat.
Sermersuarmit
kuuttuartumik imiuteqarpugut nungukkallanngisaannartussamik. Taanna
iluaqutiginiarlugu aallartisarniartoqarpoq, imermik pingaarnertut
tunngaveqartumik tunisassiornermi atorneqartussatut. Taamaattoq ullumikkut
inuussutissarsiornermut naalakkersuisoqarfeqalernermi, naalakkersuisoqarfimmut
tassunga brintip ikummatissatut angusa-qarfiulluareersumik ineriartortinneqarnerani
nunatta akuutinneqarnissaa suliassaqqissutut aallunneqalissasoq Inuit
Ataqatigiit kaammattuutigaat.
Naalakkersuisut
nalunaarusiaminni oqarnerattut ileqqorsiaannanngortunit pituttorneqarsimasutut
nikinnaveeqqaneq qimallugu nutaanik aqqutissarsiorneq
periarfissittariaqarparput. Taamali eqqarsarnissamut pituttuisut annersaat
tassa aallaqqaammut oqaatigisarput, avataanit aningaasaliissutinik
isumalluuteqartuarneq, nunatsinni aningaasatigut immitsinnut napatilernissamik
anguniagaqarluni oqalukkaluarnermi nutaanik isumassarsiornissamut aporfiit
annersaat.
Misilillugu
eqqarsaatigeriartigu aningaasanut inatsit 2 mia tunngavigalugit suliaq.
Immaqami aatsaat tamanna eqqarsaatigiinnarnagu misilikkutsigu paasilissavarput,
inuussutissarsiutitigut siuarsaasariaqarnerup qanoq pingaartigissusia
pisariaqartigissusialu.
Taama maani
ilungersuuteqalerutta ilungersortariaqassuseq kommuninut inuiaqtigiinnullu,
nalilinnillu pilersitsisarnikkut aannertusaarisariaqarneq, paasineqavilluni
atuutsinneqalissagaluarpoq.
Nalunaarusiamimi
naalakkersuisut oqarnerattut kommunit mikisut kisimik aningaasaqarniarnermikkut
najummassimanartorsiunngillat. Kommunit ineriartorfiusutut
oqaatiginiarneqartartut ilanngullutik ajornartorsiorput. Taamaattuminguna
naalakkersuisut ilimasaarutigaat ukiuni tulliuttuni kommuninut
Namminersornerunni Oqartussat tapiissutigisartagaat
qaffakkiartulissangatinneqartariaqartut, suliffissaaleqinermit aallaaveqartumik
aningaasartuutit annertusiartussangatinneqarmata.
Kommunit
tassaaniartussaapput namminiilerniarnermi annertunerpaamik imminnut
napatissinnaalernermikkut nunatta aningaasarsiorneranut ikorfassat
pingaarnerpaat.
Ukiuni
kingullerni kommunit aningaasartuutaasa qaffakkiartorsimanerannut isertittagaat
malinnaasinnaasimanngillat.
Taamaattumik
kommunit suleqatigiinnerinnaat naammaginagu kommunit qanitariikkuutaat
kattussinnaanerat sapinngisaq tamaat kommunit kattuffiannut
isumaqatigiinniutaasariaqalerpoq. Tassungalu uiggiullugu kommunit aamma Namminersornerulluni
Oqartussat akornanni nammagassanik akisussaaffinnillu agguaasimaneq
ilanngullugu.
Tamatuma
pilerinarsarnissaanut aqqutaasinnaasut arlaqartut Inuit Ataqatigiit
isumaqarput.
Siullermik
kommuninut ukiumoortumik Inatsisartut tapiissutigisagaannik kommunit ataasiakkaarlugit
agguaavigisarunnaarlugit nunap immikkoortukkaarlugit
agguaanneqartalernerisigut. Taamaalilluni kommunit qanitariit suleqatigiinnerulernissaannut
kaammattorneqarsinnaapput.
Aappaattut
nunatsinni kommunit akileraarutigisagaat assigiissunngortinneqarsinnaavoq.
Amerlasuutigummi paasinarmat kommunit sanileriikkaluartut nikingavallaamik
akileraarusersuinerata tamatumunnga aporfiunera.
Kommunit
ingerlatsinerannut naalakkersuisut siulittaasuat, nunatsinni pissutsinut
oqartussaavoq. Taamaattumik kommunit kattuffiata saniatigut kommunit
ataasiakkaat tikillugit kattussorsinnaanermi imaluunniit aallaqqaammut suleqatigiinnerup
annertusineqarsinnaanerinut kigaalaqutit suuneri paasineqartariaqarput.
Kommunini iluarsaaqqinnermut isumalioqatigiissitaliarsuup
isumaliutissiissutaata akuerineqarnerminit ukiunik qulinnguinnginnerani
nikeriartoqartariaqarsorilersoq Inuit Ataqatigiit isumaqarput.
Soorunami
suliassami tassani piumassuseq illuatungeriit pigisariaqarpaat,
minnerunngitsumik kommunit ataasiakkaat taakkulu kattuffiata.
Suliffissaaleqinerup annertuseriarnissaanik ilimasunneq pasitsaatiinnarlugu
kommuninut tapiissutinik qaffaalersaarnermik isummereernerup kommunit
namminneq iluarseerusussusaat annertunerulersinnavianngimmagu nammatassat
suliassallu agguataarneqarsimanerisa naliliivigeqqinnissaat tamatuma
nukinginnarsitippaa.
Meeqqanut
inuussuttuaqqanullu tunngasumik ukiuni arlaqalersuni kommunit kattuffiannik
isumaqatigiinniarnerit ingerlanneqareersut, kommuninut
tapiissutigineqartartutigut aaqqiisoqarsimanerarlugu naalakkersuisut
nalunaaruteqaraluartut, kommunit kattuffianit piffissaq kingulleq
oqaatigineqarpoq kommunit ilaat meeqqanut inuusuttuaqqanullu isumannaatsumik
atugassaqartitsinissaminnut akissaqanngitsut. Tamanna qanoq paasisariaqarnersoq
naalakkersuisunit paasitinneqartariaqarpugut.
Aningaasarsiornerup
qanoq inissisimaneranut suliffeqarfiit inuussutissarsiornermillu
ingerlataqartut annertuumik pisussaaffeqarput.
Inuussutissarsiornermik
ingerlataqartut nunatta nammineq pilersulernissaanut piumassuseqarnerat
annikippallaaqaaq. Qularnanngitsut annertunertigut pisortanit
aningaasalersorneqartuinnaat aallunneqarput. Tamatuma kinguneranik suut
tamarmik piareeriikkatut eqqussorneqarnerat annertusiartuinnarpoq. Tamatumani
nunatsinni inuussutissalerineq ineriartortitsiviunngingajalluinnarpoq. Tamanna
tupinnaqaaq. Inuussutissanimmi nammineq pilersornerulersinnaanitsinnut
naammattunik uumassusilinnik pisuussuteqarpugut. Taamaattoq inuussutissat
amerlanerpaartaat suli avataanit eqqussortuarpagut, naak siusinnerusukkut NuKa
A/S-ip nunatsinni inuussutissat pisiniarfinni pisiarineqartartut 70 %-ii
angullugit pilersitsisinnaalluni nalunaareeraluartoq.
Pisuussutinik
uumassusilinnik iluaquteqarniarnermi Royal Greenland A/S aamma NuKa A/S
annertuumik ingerlataqarput, immikkoorlutik. Selskabit, minnerunngitsumik
Namminersornerulluni Oqartussanit pigineqartut, atorneqartariaqarput
inuiaqatigiit inuuniarnikkut atugaasigut oqilisaassiniarnermi. Taamaammat
ullumikkumut assersuutigalugu rejet qalerallillu NuKa A/S-imit
attorneqartussaajunnaarlugit killiliisimaneq atorunnaarsinneqassasoq
eqqarsaatigineqartariaqarpoq. Selskabit ataasiakkaat ingerlalluarnissaannut
kisermaassinermik toqqammaveqarneq illersuutaanani ingerlatsilluarsinnaaneq
toqqammaviusariaqarmat.
Selskabit
Namminersornerulluni Oqartussanit pigineqartut atorfinitsitsisarnermikkut
piginnaaneqassuseq tamakkiisumik toqqammavigisariaqaraat, naalakkersuisut
uitsatiginerusariaqarpaat. Piginnaasamikkut naleqqutinngitsunik atorfinitsitsisarneq
annertuutigut misillerfigereerparput. Taama atorfinitsinneqartut
ingerlatsinermut iluaqutaanngillat akerlianilli soraarsinneqarnermikkut
aningaasartuutaaginnarlutik.
Aamma taamaappoq
selskabit siulersuisuinik naalakkersuisut toqqaasarnerannut tunngatillugu.
Naalakkersuisut nalunaarutaanni atuarneqarsinnaavoq NuKa A/S.-ip
ajornartorsiutaanik qulaajaasussanik naalakkersuisut suleqatigiissitaliorsimasut.
Soormi akissarsialerlugit siulersuisoqartitsisoqassava, suliassavimminnik
naammassinnissinnaanngippata?
Ukiunut killilikkanut
selskabinut akiliilluni isumaqatigiissuteqartarnerup
naliliiffigineqartariaqarneranut Royal Greenland A/S-imut 269 mio kr-nik
akiliilluni ukiunut tallimanut isumaqatigiissuteqarsimanerup naaqqammersup
uppernarsarpaa.
Suliffissuit
minnerpaamik sisamat ingerlaannarnissaat, ataavartunik suliffissanik
pilersitsinissaq siunnerfigalugu, isumallualussinnartitsisimavoq.
Selskabit
Namminersornerulluni Oqartussanit pigineqartut 20-t missaaniittut
pigineqarnerisa allanngortinneqarnissaannik eqqarsarnermi sulisut allatigullu
suliffinnut pineqartunut attuumassuteqartut piginneqataasinnaalernissaata
pisariaqarpat inatsisiliornikkut aqqutissiuunneqarnissaa
anguniarneqartariaqartoq Inuit Ataqatigiit kaammattuutigaat. Taassumalu
saniatigut nalilerneqartariaqarsoraarput selskabit pineqartut 20 missaaniittut
ataatsimut aqunneqarsinnaanerannik isuma.
Ullumikkummi
selskabit ataatsimit piginnitseqartut immikkut silarsuaaralersorlutik
ingerlatsiniarnerat innuttaasunut iluaqutaanerpaamik tamatigut kinguneqarneq ajorpoq.
Immikkut tamarmik siulersuisoqarput, ulluinnarni ingerlatsisoqarput tamarmik
immikkut allaffeqarfissualersorlutik nunatsinnilu inoqarfinni amerlanerpaani
immikkoortortaqarfeqartiterlutik ingerlatsipput.
Ineqarnermut apeqqummi
BSU-mik illuliat inissiarsuarnilu inigisat ineqartunit pigineqalerlutik
nalilittut iluaqutaanerulernissaat Inatsisartunit isumannaarneqartariaqartoq
ilanngullugu inassutigaarput.
Angallannermi
pissutsit eqqartornerini naalakkersuisut nalunaarusiaanni atuarneqarsinnaavoq
billetsit akisuallaarnerat ilaasinnaasut ikippallaarnerannik
pissuteqarnerarneqartoq. Ilaatigummi tamanna ilumoorpoq, kisianni taama
oqaluutigaluni ilisimallugu Air Greenlandip timmisartupiluunersuarmik,
Airbus-imik, sooq pisisariaqarsimanera paasiuminaatsorujussuuvoq.
Ilaasunik
assartuinermi umiarsuaateqarfik Arctic Umiaq Line A/S siusinnerusukkut
takornarissanik angallassissutinik ingerlatsilersinnaalluni tutsiuppoq. Tamanna
aningaasaqarnerminut iluaqutigissaguniuk nalinginnaq ilaasunik angallassisutimi
umiarsuit saniatigut pigisaqalernissaq imaluunniit attartornissaq
siunnerfigineragaa sumut killinnersoq naalakkersuisunit oqaaseqarfigeqquarput.
Innaallagissamut,
imermut kiassarnermullu akit assigiittussaanerannik periuseq
allanngortiteriffiginiarneqalersaartoq naalakkersuisut oqaatigaat. Tamatuma
piviusunngortinneqartigani innuttaasunit, suliffeqarfinnit minnerunngitsumillu
Nukissiorfiit sulisuinit qulaajaavigineqarluaqqaarnissaa pisariaqarpoq.
Ilaatigummi tamatuma kingunerisinnaasaattut annilaangatigineqarsinnaammat
innaallagissiorfiit illoqarfinni nunaqarfinnilu avissaartuullutik
ingerlanne-qalersinnaanerat, imaluunniit suliffeqarfiit angisuut
immikkuutaarlutik nammineq pigisaminnik pisaartulersinnaanerat ilimagineqarsinnaalluni.
Taamaammat suliassaq peqqissaartumik pilersaarusiuunneqaqqaartariaqarpoq.
Suliffeqarnermut
tunngasutigut iluarsartuusseqqinneq sumut killiffeqarnersoq qanorlu
iluaqutaasumik kinguneqassangatinneqarnersoq, minnerunngitsumik Inatsisartuni
nutaani, ilisimatitsissutaanerusariaqartoq, Inuit Ataqatigiit ujartuiffigaarput.
Suliffissaqartitsinermut
atatillugu sanaartornermut akikillisaataajutigalutik suliffissaqartitsinermut
iluaqutaasinnaasut ilaat tassaasussaaniaraluarpoq sanaartornermi atugassanik,
soorlu elementinik sanaartorsinnaaneq. Namminersorlutik inuussutissarsiutinik,
soorlu sanaartornermi, ingerlatsisut tamanna piumassuseqarfiginngippassuk
pisortat tamatuminnga ingerlatsisunngorsinnaanerat naalakkersuisunut
isumaliutigeqqussavarput.
Sanaartornermut
iluarsartuussinermullu aningaasaateqarfik 500 mio kr missaannik imaqarpoq.
Taakkulu ukiut tamaasa 700 mio kr angullugit ilaneqartuartussaapput.
Suliffissatsiarpassuarnik nalillit iluaqutiginiarnerusariaqarput.
Ilinniartitaanermut
tunngatillugu ilinniartuunersiutitigut iluarsartuusseqqinniarneq ukiuni
arlaqalersuni pilersaarusiorneqartoq, sooruna taama paamaarunneqartigisoq.
Misissuinerit annertuut ingerlanneqareerput, taamaattoq iliuuseqarnissamut
toqqammavigineqartussaq aatsaat ukiamut ataatsimiinnissamut
kinguartinneqaqqissimavoq.
Attaveqatigiinnermut
pilersuinermullu nalunaarusiap immikkoortuani suliffeqarfiit pilersuinermik
ingerlatsisut namminersortunut pigisassanngortinneqarsinnaanerat imaluunniit
namminersortunngorsarneqarnerat pillugu misissornerat nanginneqartussaq
naalakkersuisut oqaatigaat.
Silaannakkut
nunatsinni angallannermi misilittagarilikkat tamatumani
ilinniarfigisimasariaqarpagut.
Nunatsinni
timmisartuussisartut unamminerakkat atuutinneqaleraluarmata tamanna
kiffartuussinermut iluarseriaataananilu akikinnerulersinngilluinnarmat
innuttaasut misillerfigisaat, naalakkersuisut arajutsisimanavianngilaat.
Ullunilu
kingullerpiani angallannermut naalakkersuisup Air Greenlandimi naalagaaffiup
aamma SAS-ip piginneqataassutaannik pisinialersaarnermik oqaaseqarneranut
tunngatillugu, piginneqataassutit tamatumani pineqartut qanoq
akeqassangatinneqarnerat naalakkersuisut ilisimareerneraat tusarusunnarpoq.
Meeqqanut
tapiissutinik aaqqissuusseqqinniarnermik isuma naalakkersuisut suli aalajangiusimagaat
nalunaarusiami erserpoq. Inuit Ataqatigiinni isumaqarpugut pilersaarut
angajoqqaat pisussaaffiinik arsaarinninniarnertut allaat
nalilerneqartariaqartoq.
Aningaasarsiornerup
kinguariartorfiani Inatsisartut tamatumuuna pituttorneqarnissaannut piffissaanngilaq.
Akerlianik innutaasut atugarisaat suliffissaqartitsinikkut, taamalu nammineq
napatissinnaalernikkut, aaqqinneqartariaqarput.
Meeqqanut
checkimik agguaassiinnarneq naalakkersuinikkut isumassaaleqinermut
ersiutaaginnarpoq, pilersaarut oqaatigineqartareersutut ukiumut 70 mio kr
pallillugit nunap karsianut imassaaleqisumut aningaasartuutaassangatinneqartoq.
Iliuuseriniagaq inatsisiliornikkut tunngavissinneqaruni, landskarsip
akissaaruttoorneratigut atorunnaarsikkuminaatsuussaaq.
2004-mut
aningaasanut inatsisiliornissami pigisatsinnik atorluaaneq immitsinnullu
pilersornerulernissaq tunngaviusumik siunnerfiusariaqartut kaammattuutigalugu
Naalakkersuisunut nalunaarusiaat taamatut oqaaseqarfigaarput.
Per
Rosing-Petersen,
ataatsimiinnermi aqutsisoq, sinniisussat aappaat, Siumut.
Inuit
Ataqatigiit sinnerlugit Josef Motzfeldt-imut qujanaq. Tullinnguuppoq
Atassummiit Jakob Sivertsen, takanna.
Jakob
Sivertsen, Atassutip
oqaaseqartua.
Qujanaq.
2003-mi
aningaasaqarniarnikkut ingerlatsineq pillugu nassuiaat.
Nalakkersuisut
2003-mut aningaasaqarnikkut ingerlatsineq pillugu nassuiaataat soqutiginartoq
ATASSUT-mit imatut oqqaseqarfigissavarput.
ATASSUT-mit
nuannaarutigaarput nunatsinni aningaasaqarnikkut ingerlatsineq pillugu
nassuiaat Naalakkersuisut aningaasaqarnitta killiffia isertuaatsumik
sukumiilluinnartumillu Inatsisartunut isummersorfigisassanngorlugu
saqqummiummassuk, partiit, attaviitsut Kattusseqatigiillu
oqaaseqarfiginissaannut siunnersuieqataanissaannullu periarfissillugit.
Taamaaliornissaq ATASSUT-mit assut pisariaqartipparput. Partiinit
assigiinngitsunit isummat anguniakkallu assigiinnginnerat ataqqivarput
oqaluuserisarpullu siunissatsinnik aalajangiisuulluinnartussaq pineqartillugu
ataatsimoorfigisinnaasatsinnik suleqatigiiffigisinnaasatsinnillu
nassaarniarnissarput ATASSUT-mit assut pingaartipparput.
Soorlumi
nunatsinni inuiaqatigiit aningaasarsiornikkut ukiuni kingullerni tunngavigissaariartorsimagaluartut
piffissami matumani siunissamilu aningaasaqarnikkut ingerlatsilluartoqanngippat
aningaasarliorfiuleratarsinnaasumi inissisimasoqarnissaa ATASSUT-mit
ilisimaarilluinnarparput.
Nunatsinni
aningaasarliorfiuleratarsinnaanissaa Naalakkersuisut sillimaffigineqarnissaanik
nassuiaammi erseqqissaateqarnerat ATASSUT-mit paasilluarparput. Nunatsinni
aningaasaqarnerput avatitsinnit pisunit sunnertiassuusoq nalunngilarput, soorlu
raajanik, qaleralinnik assigisaannillu avammut tunisassiagut akimikkut
appariarpata aningaasarqarnerput kalluarneqartarpoq, tamannalu uagut qanoq
iliuuseqarfigisinnaaneq ajorparput.
Kiisalu nunani
allani aningaasat nalingat appariaateqarpata avammut tunisassiatta akiinut
ingerlaannaq sunniuteqartarput, aamma nunatta aningaasaqarneranut ingerlaannaq
malunniuttarluni. Tamakkuupput uagut politikkikkut qanoq iliuuseqarfigisinnaanngisagut.
Avataaniit
nioqqutissat eqqussukkagut avammullu niuerutigisartakkagut nakkutigeqqissaartariaqarpagut,
pimoorullugulu anguniartariaqarparput avammut tunisassiornitta avataaniit
pilersorneqarnitsinnit annerujuarnissaa, nioqqutissiornermullu isumassarsiullaqqissut
inatsisiliornikkut akim-misaartinnagit tapersersortuartariaqarpagut.
Namminersorlutik
inuussutissarsiuteqartunut inuussutissarsiuteqalerusuttunullu politikkikkut
tapersersornerusariaqarpugut, avataaniit aningaasaleerusussuseqarneq
annertusartuartariaqarparput, taamatuttaaq nunanut tamalaanut
niuillaqqinnerulertariaqarpugut aningaasat nunatta avataaniit
pissarsiarisartakkagut amerlisarumallugit. Nunarput sutigut tamatigut
inuuffigiuminarsartariaqarparput, sulisussat ilinniarluarsimasut
pigiinnarumallugit amerlisarumallugillu.
Taamatut
ATASSUT-mit oqaaseqareerluta, nunatsinni aningaasarsiornikkut uagut nammineq
qanoq iliuuseqarfigisinnaasagut maannangaaq
Naalakkersuisunit qulaajarneqarnissaannik siunnerfeqarlutik
pimoorussamik suliniuteqalernerannut ATASSUT-mit suleqataanissarput
qularutigineqassanngimmat oqaatigaarput.
Nunatsinni
inuiaqatigiit aningaasarsiornikkut ingerlatitaaneranni nutaamik
aaqqissuussiffigineqarnissaannik ilusilersuiffigineqarnissaannillu
Naalakkersuisut inuiaqatigiit aaqqissugaanitta sutigut alloriarnerit siulliit
aqqutigalugit ingerlatsisoqarniarnersoq inuiaqatigiinni takulertoruminarnissaat
suleqataaffigiuminarnissaallu eqqarsaatigalugit suleqatigiissitaliamit
pilersitsinneqarsimasumit suliat inaarlugit saqqummiunneqarnissaannut
ATASSUT-mit suleqataanissarput qularutigineqassanngilaq.
Kalaallit
Nunatsinni nammineeriartuinnarnissap pimoorutamik anguniarneqalernera
ATASSUT-mit suleqataaffigaarput, aammalu namminersorneq pillugu
suleqatigiissitaliat suliaat Inatsisartuni sammineqalerpata apeqqutinik
nalilersueqataanissatsinnut suleqataanissatsinnulu piareersarsimagatta
matumuuna oqaatigaarput.
Nunatsinni
pisortat inuuttaasunut sullissineranni allaffisornermut aningaasartuutit
sukaterivigineqarnissaat Naalakkersuisut pimoorullugu aallartimmasuk
ATASSUT-mit tikilluaqquarput.
Taamaattumik
ATASSUT-mit pisortat ingerlatsivii inussiarnersumik kaammattusavagut
sipaarniarnerup aningaasanillu atortuaanissap pimoorullugu
anguniarneqalernerani pilersaarusiornerlunnaveersaaqqullugit,
pilersaarusiornerlunnikkut aningaasaliissutit qaavisigut
aningaasaleeqqittarnerit pinaveersaartuinnartariaqarmata,
eqaallisaasoqarneratigut sipaarniutinik innuttaasut iluaqutissaannik
nassaartoqarsinnaasoq qularutissaanngimmat.
Tamannalu Naalakkersuisut
ukioq mannamut ukiunullu missingersuusiorfiusunut tulliuttunut pingasunut 37
milioner kronenik allaffissornikkut sipaarniarnissamut pilersaarutaat
illersorneqarsinnaasutut nalilerparput. Tamanna takussutissaavoq
naalakkersuisooqatigiit Namminersornerullutik Oqartussani allaffissornikkut
annikillisaaniarnerat oqaasiinnaanngitsumik aallartinneqartoq ATASSUT-mit
tamakkiisumik taperserparput.
Taamatullu
oqareerluta naalakkersuisoqarfiit kommuneqarfinnullu kaammattuutigisavarput
ALLAFFISSORNIKKUT suleqatigiissutaasinnaasut pimoorullugu nassaariniaqqullugit.
Sutigut tamatigut immikkut ingerlatsiniarsarinerit inuiaqatigiit siunissami
akissaqartinngilaat. Soqutigisatigut illuatungeriissinnaagaluaraanniluunniit
ukiuni aningaasarsiornikkut eqqanaarniarfiusuni soqutigisat
innarlinngikkaluarlugit qanimut suleqatigiissinnaaneq anguneqarsinnaasoq
ATASSUT-mit upperigatsigu.
Nunatsinni
aningaasarsiornerput siunissami ikorfartorneqassappat nunatta
aningaasarsiorneranut pingaaruteqarnerpaaq aalisarnermik inuussutissarsiuteqarneq
pingaarnertut Naalakkersuisunit immikkut isiginiarneqartariaqartoq
oqaatigineqarmat ATASSUT-mit pissusissamisoortutut isigaarput.
Aalisarnermik
inuussutissarsiuteqartut nunatsinni aningaasatigut isaatitsinitsinni avammullu
niuernitsinni annertuumik sunniuteqarnerat Naalakkersuisunit pingaartineqartoq
takusinnaagatsigu pitsanngorsartuarneqarnissannut malinnaaffigilluarlugu
suleqataaffigissagatsigu ATASSUT-mit oqaatigaarput, soorlumi sinerissap
qanittuani aalisartunit rajat 10.000 tonsit siornatigut nunamut
tulaanneqartaraluartut angallammi nioqqutissiassaanngortinneqarnissaannik
Naalakkersuisunit periarfissiissutigineqarsimanerat aalisartut
aningaasarsiornerannut annertuumik pitsanngoriaataasussaasut ATASSUT-mit
qularutiginngilluinnaratsigu.
Sinerissap
qanittuani raajarniarnermi akilersinnaasumik ingerlatsinissaq anguniarlugu
naleqqussaanerit ATASSUT-mit peqataaffigisatta iluatsikkiartornera paasillugu
suleqataanerput ingerlateqqissavarput. ATASSUT-mittaaq isumaqarpugut
naleqqussaaneq iluatsissappat nunami suliffissuit tunitsiviillu aamma tulaassat
annertussusiannut naleqqusaaffigineqartariaqartut, imaani pissussutitta
aalisartunit tulaanneqartut tamarmik suliffissaqartitsinikkut
iluaqutigineqarnissaat siunertaralugu.
Nunatsinni
inuiaqatigiit aaqqissugaanissaat pillugu Naalakkersuisunit iliuusissatut
pilersaarutit ikaarsaariarnermi pingasunik tunngaveqarnissaq oqaatigaat, soorlu
inuiaqatigiit aqqissugaanerata allanngortinneqarnissaa, tassani
ilaatinneqarlutik ullumikkut tapiissuteqariaatsip allanngortinneqarnissaa,
suliffeqarfiit Namminersornerullutik Oqartussanit pigineqartut namminersortunut
pigisassanngortinneqarnissaat, kiisalu inuiaqatigiinni attaveqaqatigiinnermut
pilersuinermullu tunngasut iluarsartuussiffigineqarnissaannik siunnerfeqarneq
ATASSUT-mit taperserparput suleqataaffigissallugulu.
Naalakkersuisut
namminersorlutik inuussutissarsiuteqartut toqqammaviisa
pitsanngorsarneqarnissaannik tunngaviit inatsisiliornerillu
naleqqusaaffigineqarnissaannik pimoorussillutik suliniuteqarnerat ATASSUT-mit
ilassilluarparput. Ullumikkut pisortanit ingerlatat, soorlu Royal Greenland
A/S, Nuka A/S, Tele Greenland A/S namminersortunngorsarneqarnissaat
pimoorullugu aallartittariaqarput namminersorlutik ingerlataqartut qanimut
suleqatigalugit.
Naalakkersuisut
saqqummiussaminni Royal Arctic Line A/S ukioq 2002 90 mio. kr.-t angullugit
sinneqartooruteqarneranut atatillugu nunatsinni imaatigut usinik
angallassinermi qanoq iliorluni nunatsinni atuisunut akinik appartitsinikkut
iluaqutaasinnaanersoq aaqqiiffiginiarlugu Naalakkersuisut suliniarnertik
aallartissimammassuk ATASSUT-mit peqataaffigissavarput.
Nunatta
aningaasameeriartornerani uagullu nammineq aningaasatigut
nammineernerulernissatta pimoorullugu anguniarneqalernerani Nunatsinniit
nunattalu avataanut imaatigut usinik assartuinermi kisermaassinerup
unammilleqatigiinnikkut ingerlanneqalernissaa ammaanneqartariaqalerpoq.
ATASSUT-mit
isumaqarpugut ullumikkut nunatsinni nioqqutissanik pilersuineq silap
allanngornera sikuniaaluusaartarneralu eqqarsaatigalugu sumiiffinni
assigiinngitsuni Royal Arctic Line A/S-ip kiffartuussinera
pitsaanerusinnaagaluartoq takuneqarsinnaavoq, pi-ngaartumik tunisassiatta
sapinngisamik nutaatillugit assartorneqartarnissaat tamatumani
eqqarsaatigalugit.
Kiisalu Nunatta Avannaani
Tunumilu ukiuni kingullerni sikussaarnikuuvoq, silallu allan-ngornera
iluatsillugu nioqqutissanik pilersuineq pitsaanerusinnaalluaraluartoq inimi
maani arlaleriarluni oqallisigineqartartoq ullumimut naammaginartumik
tigussaasumillu angusaqarfigineqarneq ajortoq siunissami
aaqqiiffiginiarneqartariqarmat ATASSUT-mit erseqqissaatigaarput.
Ullumikkut
nunatsinni aningaasat inuiaqatigiit ingerlatitaaneranni atortakkatta 2/3-lii
naalagaaffiup ataatsimoortumik tapiissutaannik EU-llu aalisagartassinneqartarnerannik
pissarsiarisarpagut. Ataatsimut oqaatigalugu aningaasarpassuupput, taamaattumik
Naalakkersuisut nunatta naaminersoriartuinnarnissaanik siunnerfeqarnermut
peqatigitillugu uagut nammineq aningaasatigut nammineersinnaalernissatsinnik
siunnerfissanik assigiin-ngitsunik saqqummiussaqarnerannik peqatigiilluta
suleqataasariaqarnerput pingaaruteqarmat ATAASUT-mit oqaatigaarput.
ATASSUT-mit
2004-mut Inatsisartut aningaasanut inatsisissaannut siunnersuutip
saaqqummiunneqarnissaanut Naalakkersuisut innuttaasut aaqqisugaanerisa
allanngortinneqarnissaannik alloriarnerit siulliit aningaasatigut
kingunerisassaat suleqatigiisitamit aallartinneqarsimasut sunik
kinguneqartinneqassanersut paasissutissartaat pissarsiarineqarpata ATASSUT-mit
suleqataaffigissavagut.
Inuiattut
nammineernerulernissatsinnik aqqutissiuussinitsinni aningaasatigut immitsinnut
artukkissanngikkuta ullumikkut pisut kisiisa aallaaviginagit
pilersaarusioqatigiittariaqarpugut.
Suliassaq Inatsisartut,
Naalakkersuisut kommunellu kisimik kivissinnaanngilaat, suliffeqarfiit
Nammninersornerullutik Oqartussat pigisaat namminersortut
inuussutissarsiornermik ingerlataqartut, Katuffiit soqutigisaqaqatigiiffiit,
minnerunngitsumillu innuttaasut tamavitta peqataasariaqarpugut, inuiaqatigiit
ulluinnarni atukkamikkut ajornerusumik atugaqalinnginnissaat qulakkeerumallugu.
Ukiut 24-it
namminersornerulluta ingerlasimanitsinni ilinniarsimasagut aallaavigalugit
ingerlaqqittariaqarpugut. Eqqaamasariaqarparput oqaluttuarisaanermi
ullumikkullu pisut kisiisa aallaavigisinnaannginnatsigit, kingulissatsinnulli
nunamik taassumalu ingerlanneqarneranik tunniussisussaagatta, taakkulumi aamma
kingulissaminnut tunniussisussaammata puigussanngilarput, taamaammat nukanganerup
ukiui qaangertariaqalerpagut. Inersimasutut akisussaassusilittut tamatta
pisussaanerput takutillugu nunarput asasarput ingerlateqqittariaqarparput.
Taamatut
oqaaseqarluta nunatsinni aningaasarsiornikkut ingerlatsineq pillugu nassuiaat
imartooq akuersaarparput, ATASSUT-millu neriorsuutigissavarput nunatta
aningaasarsiornikkut pitsanngorsaaffigineqarnissaanut suleqataanissarput
qularutigineqassanngimmat.
Qujanaq.
Per
Rosing-Petersen,
ataatsimiinnermi aqutsisoq, sinniisussat aappaat, Siumut.
Atassummiit Jakob Sivertsen-imut qujanaq. Tullinnguuppoq Demokraatit sinnerlugit Per Skaaning. Per Skaaning-imut ilisimatitsissutigilaassavara nutserisut ilaatigut angummassinnaajunnaartarmata arriilaartumik oqaaseqaqqullugu. Takanna.
Per Skaaning, Demokraatit oqaaseqartuat.
Matumuuna aningaasaqarnikkut ingerlatsineq pillugu nassuiaat 2003 Demokraatit oqaaseqaatigisaat saqqummiutissavara.
KNI misiliilluni ingerlatsereersimavoq ? iluatsittumik Royal Greenland misiligummik ingerlatsivoq ? neriuppungalu aamma iluatsitsiumaartoq. Piffissanngorpoq, uagut nammineq piviusorsiortumik misiliisariaqalersugut peqatigiillutalu iluatsittumik pilersitsilluta.
Misilittaaneq pitsaasoq atorneqartussaq ingerlatsivinni aamma inuiaqatigiinni, ingerlatsinerliornermik nalaanneqartuni, ingerlatsinerliornermi kinguneqartarpoq, aningaasat isertitat ikiliartornerannik, ineriartortitsinissamut illuartitat annikinaagaanerannik pissuteqartumik, taakku tassaasussaagaluarmata siunissami iluanaarutaaniartussanik pilersitsisussaagaluartut. Taakku illuatungaaniipput aningaasartuutit annertusiartortut, tassaasut ernianut aningaasartuutit annertusiartortut (KNI aamma Royal Greenland), imaluunniit ingerlatsinermut aningaasartuutit annertusiartortut (Namminersornerullutik Oqartussat). Tamanna nassuiarneqarsinnaavoq imatut, isertitat apparnerat ? allamik isumaqanngitsoq ? isumaqartorli suliffissaaruttut amerlinerinik, tamannalu kinguneqaqqissaaq inuit amerlanerusut tapiissutinik aningaasalersorneqalernerannik. Allatut oqaatigalugu: Tassaavoq ingerlanerliorneq uniffeeruttoq.
Namminersornerullutik Oqartussanut una piviusuulersimasoq tassaavoq, ukiuni aggersuni ilimagisariaqassagipput nunatsinni isertitarineqartartut appariartornissaat. Isertittakkat annikillinissaasa saniatigut, tassa Naalakkersuisut naatsorsuutigisaasa 200 mio. Kr.-it saniatigut, ilimagisariaqarpoq aamma aalisakkat akiisa appasissuunissaat. Maannalu takussutissaqanngilaq, ineriartornerup pitsaanngitsup pitsammut sangujartorneranik.
Aningaasartuutit qimerloorutsigit, pissutissaqanngilagut nuannaassalluta. Naalakkersuisut missinngersuusiorput aningaasartuutit qaffattussanngorlugit, qaffaatissat ingerlatsinermi aningaasartuutissatigut missingersuusianut arlalinnut agguataarneqarsimapput. Aamma siunissaq aningaasartuutissat annikillinissannik tunniussassaqanngilaq ? akerlianilli. Taakku qaffariartuinnassapput.
Ingerlatsinerliorneq taava qanoq pitsammut saatsissavarput.
Ingerlatsilluarneq
Naalakkersuisuusimasut aqqutissaq takutinnikuugaluarpaat 2002-mi Inuiaqatigiit aaqqissugaanerat pillugu iliuusissatut pilersaarut sanagamikku, tassa qanoq iliorluta ingerlatsinerliorneq pitsammut saatsissagipput ? Kisianni pisariaqarluinnarpoq, taassuma maleqqissaarneqarnissaa. Assersuutigilara Iliuusissatut Pilersaarummi aqqutaasinnaasutut takutinneqartoq, tassa qanoq aningaasartuutit annertuut inuutissarsiornermut tunngasunut aamma kiffartuunneqarnissamik isumaqartigiissutinut tapiiissutaasartut annertuumik annikillisarneqarsinnaasut. Taama iliortoqarpat, taava amerlanerusunik aningaasaliissuteqartoqarsinnaalissaaq ineriartortitsinermut aalajangiullugit illuartinneqartunik.
Naalakkersuisut Aningaasarsiornikkut Ingerlatsineq pillugu nalunaarutaanni killiffiit eqqartorneqarput, tassa Iliuusissatut Pilersaarummi anguniakkatigut sumut killittoqarnersoq.
Demokraatinit iliuusaasimasut nuannaarutigaavut, tassa maannamut naammassineqarsimasut. Iliuuserineqarsimasulli annertunersaannut tunngasut tassaapput allannguuutit, pissusioreersut inissisimaffiinut malunnaateqartumik allannguutaanngitsut. Tamaattumik piffissanngorpoq, peqatigiilluta tullianut alloriarnissamik aallartitsinissarput.
Tulliullugu alloriarnissaq imaqassaaq inutissarsiutinut tunngasunik tapiissutaasartut annertoqisut ilanngarterneqarnissaannik, minnerunngitsumillu ilanngarterneqassapput aningaasartuutit annertoqisut, kiffartuussinissamik isumaqatigiissutinut assigiinngitsunut illuartinneqartartut. Nalunaarummi allanneqarsimavoq, Namminersornerullutik Oqartussat ukiukkaartumik 580 mio. Kr.-it missaannik annertussusillit illuartittaraat. Tassunga ilanngunneqassapput ingerlatsinermut tapiissutit, Mittarfeqarfiit aamma Nukissiorfiit pisartagaat kiisalu nukissiornerup immikkoortoqarfiisa iluini assigiimmik akeqartitsiniarnerup sunniutigisartagai. Taakku katillugit aningaasartaqarput 600 mio. Kr.-it sinnerlugit, Namminersornerullutik Oqartussat ingerlatsinermut tamarmut aningaasartutaasa 15 %-iinik naleqarlutik.
Ajornartorsiutip pingaarnersarisaa inuutissarsiutinut tunngasunut tapiissutit annertunerannut pissutaasoq tassaavoq, tapiissutit annertunersaasa inuussutissarsiutinut ataasiakkaanut ingerlatsinermut piginnittuaannarnissamullu aningaasartuutinut atorneqartarnerat ? inuussutissarsiutit ineriartortinneqarnissaannut artornagit. Taama periaaseqartoqartillugu ingerlaqqinngisaannartussaavugut, tassa aningaasarpassuit aqqutissiuutinngikkutsigit inuiaqatigiit nalinginnaasumik ineriartortinneqarnissaannut aamma inuutissariutit pingaarnerutilluinnarlugit ineriartortinneqarnissaannut ikaarsaartillugit.
Inuiaqatigiit immikkoortutigut ineriartortinneqarnissaat pillugu salliutillugit eqqarsaatigaakka inuit atugarisaasigut kiffartuussisoqarfiit aamma ilinniartitaanermut immikkoortoqarfiit. Sunaluunniit iliuuseralugu pitsanngorsaagaluarutta, immikkoortoqarfiit sinnerinut tunngatitanik, iliuuserisagut naleqassanngillat, piaarnerpaamik inuit atugarisaasigut ajornartorsiutit annertoqisut piviusumik sammilinngikkutsigit, taakku uagut inuiaqatigiinnitsinni inissisimammata. Inuk naammaginarluartumik suliffimmini ingerlasinnaanngilaq, sulinermi nalaani eqqarsaateqartuassaguni, meeqqami aapparisamilu inuunerminni atugarissaannginnerannut tunngasunik. Qulliit mianersoqqusillutik ikittaqattaartut ukiuni arlaqalersuni ikumareerput, maannakkut piffissanngorpoq, iliuuseqarnissamut ? kingusinaarneq nallerneqartinnagu. Oqaatsit allat atorlugit taanna isumaqarpoq, immikkoortoqarfiit pineqartut amerlanerusunik aningaasaliiffigineqarnissaannik.
Uteqattaarneqartuartumik tamanna oqaatigineqartarpoq. Akulikinnerusumillu oqaatigineqarsinnaanani. Uagut tamatta atuarfiutivut aningaasaliissutissanik amigaateqarput, naammassineqartussatut siunniunneqarsimasut annertuut piviusunngortinneqarnissaanut pisariaqartinneqaraluartunik. Augustip aallaqqaataaniit atulersussaavoq atuarfeqarnermi pilersaarut annertooq ?Atuarfitsialak?, maannakkorpiarlu aallartissutissaqanngivippugut suliassarsuarmut taama angitigisumut kivitsissutissatsinnik. Piffissami qanittumi nunatta aviisiisa ilaanni atuarparput, atuarfiit arlallit ilinniartitsisuisa affaat sinnerlugit ilinniartitsisutut ilinniagaqarsimanngitsut. Tassa ilinniartitsisut amerlanersaat ilinniartitsisorineqarput ilinniarfinni pingaaruteqartuni naammassisaqarsimanngikkarlutut. Tamanna toqqissisimananngilaq, tassa ilinniagaqarsimassuseq ilinniartitsisutut atorfillit piginnaasaqarfigisassaat naammaginarluartumik qaffasissuseqanngippat, uffa ?Atuarfitsialak? pilersinniarneqartoq anguniarlugu atuartut ilisimasariaqartutigut piginnaasaqarnerat qaffassarniarlugu. Taassuma saniatigut nunatsinni atuarfiit amerlasuut ima aserfallassimatigipput, allaat ilinniartitsivigineqarfissatut atorsinnaanatik.
Atuarfeqarnermut aningaasaliissuteqarnissaq itigartitsissutigitinnagu, oqaaserineqarsimasut silatuut ukua eqqaamaneqartariaqarput: ?Ilinniagaqarneq akisugalugu isumaqartut taakku, misilittariaqaraluarpaat ilisimasaqannginneq qanoq akisutigisoq?.
Meerartatta aamma inuusuttatta ilaat amerlavallaartut atortussaminnik eqqortunik pissarsinngitsoorsimasarput, meeqqat atuarfiat naammassillugu qimakkaangamikku. Nalunaarusiat tulleriiaaginnavissut arlalissuit takutippaat assiliaq ernumanaqisoq una: Meerartavut aamma inuusuttavut naammattunik ilikkagaqartanngillat. Inuusuttut meeqqat atuarfiat naammasisassanngippassuk taamaallaat nassataqrlutik pissarsianik, sequmiillutik sipisoortussanik, piffissanngorpoq, allanngortitsinissamut ? aamma siunissami inuussutissarsiornerup ineriartortinneqarnissaa pissutigalugu.
Tamakku pillugit pingaaruteqarluinnarpoq, aallaqqaasiutigalugu nunatsinni atuarfiit pisariaqartitaannik aningaasaliissuteqarnissarput, nalunaarutit siulliit malillugit iluarsaanissamut atuarfinnillu allisaanissanut atorneqartussatut taakku pisariaqartinneqarmata. Taama iliortoqarpat meeqqat atuarfiini annertuumik iluarsiisoqarnavianngikkaluarpoq, kisianni pitsaasumik aallarnersaasoqassaaq.
Inuit atugarisaasigut aamma ilinniagaqarfiit immikkoortoqarfiini siumut missingersuusiortoqartillugu, pingaartuuvoq, immikkoortoqarfinni taakkunani annikinaarisoqartannginnissaa, tassa taakku aningaasaliissutinik tunillugit, sinneruttunik, immikkoortoqarfiit allat naammattunik pissarsisinneqareeraangata. Pingaarnerutinneqartariaqarput ? siuliani eqqartukkannik aningaasaliissutinik pissarsisunit salliutillugit.
Oqaluuserineqartumut uunga naggasiullugu Amerikami præsidentiusimasup oqaasii uku issuarlakka:?Qatanngutigiittut peqatigiilluta inuusariaqarput ? imaluunniit ilisimaatsutut suujunnaarluta?.
Immikkoortoqarfinni eqqartorneqartuni taakkunani marlunni piaarnerpaamik iliuuseqartoqanngippat, annilaanngatigaara, oqaasiisa taakku affaat kingulliit piviusunngorumaartut.
Inuutissarsiutinik siuarsaaneq
Aningaasaqarnikkut ingerlatsineq pillugu nalunaarummi taaneqarpoq ukioq manna inuutissarsiutinut tapiissutigineqartussaasut 210,4 mio. Kr.-it, taakku 10%-ii siuarsaanissamut immikkut atorneqartussanngorlugit.
Tassunga ilanngullugu nalunaarummi taaneqarpoq, tapiissutit annertunersaat atorneqartussaasut suliffinnik pilersitsiortornermut, taakku sinneqartooruteqarnissamut piumasarisanut ikorfartuutaasinnaanngikkaluartut, ilaatigut aalisarnerup piniarnerullu inuussutissarsiutigineranut atorneqartussanik.
Suliassaqartitsiniarneq pissutigalugu aningaasaliissutinik ikaarsaartisineq attatiinnassagutsigu, piitsunngoriartussaagut ? tamannalu aallartilluareersimavarput. Tamaattumik piffissanngorpoq, inuutissarsiutit iluanni aningaasaliissuteqarnissaq amerlanerusunik, siuarsaanerup iluani. Eqqaamasariaqarparput, siuarsaanermut aningaasaliissutit siunissamut aningaasaliissutaasut.
Oqartuarpugut aalisarneq kisiat inuussutissarsiornitsinni tunngavigisinnaanngikkipput: Aningaasaqarniarneq inuussutissarsiutinik amerlanerusunik tunngaveqartariaqarpoq. Taamaattumik pisariaqarluinnarpoq, piaarnerpaamik iliuuseqarnissaq.
Inuussutissariutit taaqqilaariartigit, pisortanit tapiissuteqarfigineqaratik ingerlasinnaanngitsut, taakkua misissuiffigisariaqarpavut sutigut periarfissaqarnersoq, aningaasarsionikkut imminnut akilersinnaalernissaat anguniarlugu.
Tapiissutinik pissarsisartut anginerit ilagaat Nuka A/S, ukiumut millionerpassuarnik Nunatta Karsianit pisartoq tunisassiorfinnut arlalinnut ingerlatsissutitut atorneqartussanik. Aamma ukiup naatsorsuiffiusup iluani taakkua pitsaanngitsumik angusaqarsimapput. Apeqqutaalerporlu, ilumut Namminersornerullutik Oqartussat suliffearfiutaanni aaqqissuusinikkut tunngavigineqartut ajuvissuunersut.
Tassunga atatillugu soqutiginarpoq pilersuisut apeqqummut tassunga tunngasutigut isumasiussallugit. Taakkua allannguutissanik sunik pingaarnerutitsinersut, aallarnisarneqartussanik. Naluneqanngilarmi, Nuka A/S-ip tunisassiai unammillikkaminnut nallersuussinnaanngitsut. Nioqqutissiat taakku mamaraluaqalutik tassa ajoraluartumik imminut akilersinnaanngillat. Immaqa akilersinnaannginnerannut nassuiaatigineqarsinnaasut ilagaat, Nuka A/S inissisimasoq nioqqutissanut akitsorsaatitut, pisisartunut aamma tunisassiortunut akornutaalluni. Ilisimatinneqarpunga savaatilik Nuka A/S-mit savaaqqap neqaanik kg.-mut 35 kr.-nik pissarsisartoq, neqi taanna pisiniarfinni kl.-mut 80 kr.-nit missaannik akeqartinneqartarpoq. Allatut iliorluni nioqqutissiat tamakku tuniniarneqarsinnaasariaqarput, tunisassiortunut pisisartunullu iluaqutaasumik. Ungasinngitsukkut nunap aviisiisa ilaanni atuarsinnaavarput, savaatili ataaseq Nuka A/S avaqqullugu Islandimut savaaqqat neqaannik nassitsisimasoq. Qanoq taama iliortoqarsinnaasimava?
Siusinnerusukkut eqqarsaatigineqartarsimavoq tunisassiorfiit tunisassiassanik pilersuisunit ingerlanneqarsinnaalerlugit tunniunneqarsinnaanerat. Misiligutitut soorlu assersuutigalugu Neqi A/S savaatilinnut tunniunneqarsinnaavoq, taama ilionikkut savaatillit piginneqataassuseqarsinnaalissapput. Nalornissutiginngilara, taama iliorneq iluaqutaasinnaasoq. Iluanaaruteqarnissaq soqutigalugu imminut akilersinnaasumik ingerlatsinissaq savatillit soqutiginartittussaavaat, nammineq aningaasaqarnisarnertik attupillanneqartussaammat taama aaqqiisoqarpat.
Aningaasaliissutinik annertuunik ilaatigut siuarsaanissamut atorneqartussanik illuartitsisoqassagaangat, taakku sinnassaatigineqassanngillat, tassami imaassanngikkaluarmat aningaasaliisoqartuassasoq pitsaasunik angusaqarneq tunngaviginagu. Assersuutigalugu taalara ukiut tamaasa misigisartagarput, tassa takornariat amerliartunngitsut, uffa Greenland Tourism-imut millionerpassuarnik tapiisaraluarluta, takornariat amerliartornissaannik siunertamut atugassanik. Pisarnermit misissuilluarnerusariaqarpugut akuersiniaannarnatalu, assigiinngitsunut atugassanik aningaasaliissuteqassagaangatta. Aningaasaliissuteqarneq isumannaannerusinnaavoq, assersuutigalugu Greenland Tourism iluanaaruteqarnissaq siunertaralugu ingerlatsivittut inissinneqarsinnaavoq kiffartuunneqarnissamik isumaqatigiissutit atorunnaarsillugit. Isumaqatigiissutit oqaasertaannik naammassisaqarsinnaanngippata, Inatsisartut nalilersortariaqarpaat, qanoq iliuuseqartoqarsinnaasoq!
Eqqartukkat taakkua saniatigut inuussutissarsiutitigut killigititat siuarsarneqarnissaat isumagisariaqarparput, taama ilioreerutta inuussutissariortut nammineq taasuma iluani periarfissatigut immersuisinnaaqqullugit. Tassunga atasumik aningaasaliissuteqartariaqarpugut inuussutissarsiutinut atugassanik illoqarfinni, inuiaqatigiinnermut tunngasutigut annertunerusumik iluaqutigineqarsinnaasunut. Inuiaqatigiinnut iluaqutigineqarluarsinnaasut assersuutigisinnaasatta ilagaat Sisimiut Kangerlussuullu akornatigut aqqusiniliornissamut aningaasaliissuteqarnissaq. Nalunanngitsumik taassuma malitsigisaanik namminersortut annertunerusumik aningaasaliiffigisassaqalissapput, tassa aqqusinniartoqassappat. Takornariartitsineq kisiat eqqarsaatigalugu Sisimiuni tassuuna inuussutissarsiuteqarneq aningaasarsiornikkut annertuumik siuarsarneqartussaavoq.
Kiffartuunneqarnissamik isumaqagtiigiissut
Nalunaarusiami taaneqarportaaq ukiumut 300 mio. Kr.-it inulaarlugit kiffartuunneqarnissamik isumaqatigiissutinut illuartitsisoqartassasoq, akit illoqarfinni mikinerusuni nunaqarfinnilu atorneqartut qaffasippallaannginnissaat eqqanaarniarlugu. Taakku aningaasarpassuupput anguniakkanut aalajangersarneqarluarsimasunut atorneqarsinnaagaluartut. Demokraatit isumaqarput piffissap ingerlanerani aningaasaliissutit taakku annikilliartuaartinneqartariaqartut, siunertanut qulaani taaneqartunut nuunneqartussanngorlugit, aningaasaliissutit inuiaqatigiinnut iluaqutaanissaat annertunerusoq tassaniimmat.
Naalakkersuisut namminneq assigiimmik akeqartitsinerup ajornartorsiutitartai nassuerutigaat.
Aningaasaqarnikkut ingerlatsineq pillugu nalunaarutip kalaallisuup quppernerisa 15-anni erseqqissaanerminni: (issuarpara)
?Assigiimmik akeqartitsinerup pitsaanngequtaasa annersaraat namminersortut pisortallu aningaasaliissutaat aningaasartuuterpiaat tunngavigalugit pineq ajormata. Assigiimmik akeqartitsinerup kingunerisarpaa suliffeqarfinni, illoqatigiinni ataasiakkaani pisortanilu aningaasaqarnikkut eqqarsartaatsit pingaarnersiuillunilu tulleriiaarinerit aningaasartuutiviit tunngavigalugit ingerlanneqarneq ajormata?. (issuaaneq naavoq)
Naatsumik oqaatigalugu assigiimmik akeqartitsineq aningaasaqarniarnikkut kukkusumik inissiisoqartarneranut arlaqalersunut ilapertuutaavoq, siunissamilu inuiaqatigiit aningaasaqarniarnikkut ingerlanerannut annaasaqarnermik kinguneqartussaalluni, aamma siuarsaaniarluni iliuutsinut kigaallisaataasussaalluni.
Ajornartorsiutit taakkartorneqartut naatsorsorneqarnerannut ilanngunneqanngillat aningaasartuutinut annertusaatit innaallagissap aamma erngup atorneqarneranut tunngasut, illoqarfinnut anginernut tutsinneqartartut. Taakku kinguneqartarput sunniuteqartunik, tassa sulliviit unammillersinnaassusikkut iluaqutigisinnaasaat ajortittarneqarmat nunani allani sullivinnut naleqqiullugit, aningaasartuutit qaffasippallaarnerat pissutigalugu. Uffa aningaasartuutit inissisimaffii qaffasippallaareeraluartut nunatsinni tamakkunatigut atugassarititaasut immikkut ittut pissutigalugit.
Inuussutissarsiutinut tapiissutit aamma kiffartuunneqarnissamik isumaqatigiissutit pilluti sunniuteqarnerusinnaasumik iliuuseqartariaqarpugut, ingerlatsilluarnissaq iserfigissagutsigu tamanna pisariaqarmat. Kikkut tamarmik ajornartorsiutaasoq paasereerpaat, kisianni tamanna iliuuseqarfigineqanngilaq qinersisartut isummerumaarnissaat siooragineqarmat.
Taamatut iliornermut pissutaagunarpoq, ataasiakkaanut pitsanngorsaatissanik tunniussinissap isumagineqartarnera, ataatsimut tamanut pitsanngorsaatigineqarsinnaasut isumagineqannginneranni.
Allatut oqaatigalugu tassa inuiaqatigiit tamaasa
naammagisaannik ataatsikkut tunisinnaanngikkutsigit, taava sussa
iliuuseanngiinnarta. Taamatut
isummersimaartoqarpoq Inatsisartuni politikerit amerlanerit tungaaniit.
Taamatut
eqqarsartaaseqartoqartillugu Kalaallit Nunaat pitsaanerusumik
inissisimalersussaq sivisuumik utaqqisariaqassavarput. Kisianni
utaqqinissatsinnut piffissaqarnerpugut? Nunatta allannguutissat qulaani
taakkartorneqartut ornikkusullugit
nilliaatigivai, aqutsisoqarusupporlu siunissamut takorluuisinnaasunik.
Naalakkersuisut
saqqummiussissutaanni uku taakkartorneqarput: (issuarpara)
?Misissueqqissaarluni
sulineq aallartinneqartoq annertuvoq arlalitsigullu
naatsorsuutigineqarsinnaanani 2004-mut aningaasanut inatsisissatut
siunnersuutip saqqummiunneqarnissaanut naammassineqarsimassasoq?. (issuaaneq naavoq)
paasitinneqarusukkaluarpunga,
immikkoortut sorliit naammassillugit
aappaagu Aningaasanut Inatsimmut ilanngunneqarsinnaannginnersut.
Neriuutiginngilara , takku kiffartuussinerit pillugit isumaqatigiissutinut
aamma inuussutissarsiutinut tapiissutinut attuumassuteqartuusut.
FFL 2003
siullermeerutaasumik suliarineqarmat Namminersornerullutik Oqartussat
suliffeqarfiutaasa arlallit kattunneqarnissaat kissaatigereersimagakku,
oqaluuserisap uuma iluani tamanna saqqummiuteqqinnianngilara.
Aningaasaqarnikkut
Ingerlatsineq pillugu nalunaarummut tunngasutigut Demokraatit tassa
saqqummiunniagaat.
Per
Rosing-Petersen,
ataatsimiinnermi aqutsisoq, sinniisussat aappaat, Siumut.
Anthon
Frederiksen Kattusseqatigiinninngaanniit, takanna.
Anthon
Frederiksen, Kattusseqatigiit.
Qujanaq.
Aningaasaqarniarnikkut
ingerlatsineq pillugu nassuiaat Kattusseqatigiit sinnerlugit imaattumik
oqaaseqarfigissuara:
Nassuiaaammi
aallaqqaasiineq qularnanngitsumik arlalitsigut ilumoortortaqarpoq, tassa
nassuiaammi oqaatsit makku aallaqqaasiunneqarmata:
?Piffissami
aggersumi Inatsisartut ilungersuutissanik imaannaanngitsunik naalakkersuinikkut
ornigaqarput?
soorunami
paasissutissat taamaattut tusarlugit nakeriallannarsinnaagaluartut, taamaattoq Kattusseqatigiit
tungaanniit inatsisartunut kaammattuutigissuara, ukiunut tulliuttunut
Nunatsinni aningaasaqarnikkut ingerlatsinerup sapinngisamik
pitsanngortinniaqqinnerani parti apeqqutaatinnagu tamatta ikioqatigiilluta
iluarsiiniarnermi suleqatigiittariaqartugut. Tassami nalunngilarput Nunatsinni
aningaasarsiorneq 1993-imiit ukioq 2001 ilanngullugu qummuinnaq
ingerlasinnarluni manna ajoraluartumik illua?tungaanut saakkiartulerpoq,
tamannalu pakkersimaarniassagutsigu tamatta ikioqatigiinnissarput avaqqunneqarsinnaanngilaq.
Soorunami
kissaatigisatta anguniakkattalu pingaarnerit aamma ilagaat; Nunatta
aningaasaqarnikkut imminut napatikkiartuinnarnissaa aammalu
nammineernerulernissarput, taamaammat inuutissarsiutinik uummarissaanissap
assorujussuaq inuiaqatigiinnut pingaaruteqarnera Kattusseqatigiit sinnerlugit
inatsisartuni, pingaartumillu Naalakkersuisuni paasilluarneqarnissaata
ingerlalluarnissaannut assut pingaaruteqarnera paasilluaqqoqaara.
Tassami
inuutissarsiutit pingaarnersaat matumani nassuiaammi aamma oqaatigineqartutut
niuernermi atugassarititaasut malillugit ingerlatsisariaqarnermik
nalunaaruteqarneq assortorneqarsinnaanngikkaluartoq, taamaattoq isumaqarpunga
sinerissat qanittuani aalisarnerup sutigut tamatigut naleqqussarneqarneranut
atatillugu arajutsineqarsinnaanngitsoq aalisariutit, umiatsiaaqqallu
taarsersorneqarnissaannut aningaasaliissuteqarnissat
qulakkeerinniffigissallugit, tassami sinerissamut qanittumi angallatinik
taarsersuinermut aningaasat ikinnerpaamik 200 mio.-it amigaatigineqarput.
Taamaattumik
inuutissarsiutinik siuarsaanermi aammalu ungasinnerusoq isigalugu
ilinniartitaanerup suli pitsanngorsarneqarnissaat pisariaqarluinnarpoq,
minnerunngitsumik aningaasat inuiaqatigiinni pisariaqartinneqartut qanoq
ilillugit qulakkeerneqarsinnaanerat inuutissarsiutinik ingerlataqartut
peqatigaglugit nassaariniarnissaat pisariaqarluinnarpoq. Taamaammat
periarfissat assigiinngitsut Naalakkersuisunit misissorneqarnissaat
isumaqarpunga avaqqunneqarsinnaanngitsoq.
Siusinnerusukkut
ilaatigut aalisariutinik nutarterinissamut taarsersuinissanullu tunngatillugu
Naalakkersuisuniit eqqaaneqartaraluarpoq Danmarkimi Fiskeribanki aningaasanik
atorniarfigineqarsinnaasoq. Tassuunga atatillugu apeqqutiginiarpara;
periarfissaq taanna Naalakkersuisutigoorlugu qanoq suliarineqarsimanersoq?
Aalisarneq
inuutissarsiutit pingaarnersarigaluaraat, taamaattoq aamma Nunami
inuutissariutit siuarsarneqarnissaat, minnerunngitsumik aamma
takornariaqarnerup suli annerusumik siuarsarneqarnissaa annerusumillu
Nunatsinnut aningaasaqarniarnermut iluaqutigineqarnerulernissaa
Kattusseqatigiit sinnerlugit assut kaammattuutigaara.
Allaffissornikkut
aqutsinerup pitsanngorsartariaqarneranik Naalakkersuisut nalunaaruteqarnerat
Kattusseqatigiit sinnerlugit tamakkiisumik taperserpara, minnerunngitsumik
allaffissornermut aningaasartuutaasartut Nunatput tamaat isigalugu,
kommune-nilu annertuallaarnerujussui eqqarsaatigalugit, taamaattumik
Kattusseqatigiit sinnerlugit kaammattuutigissuara Naalakkersuisut
kommune-qarfiit Kattuffiat suleqatigalugu Namminersornerullutik Oqartussat
kommune-llu ingerlatsiviini
allaffissornerujussuup annikillisinneqarnissaa anguniarlugu suliniutinik
aallartitseqqullugit, tassami maannakkut atortorissaarutit atorlugit sutigut tamatigut
pisariillisaaneq ingerlanneqarsinnaalernikuummat.
Aamma
allaffissornikkut ingerlatsinermullu aningaasartuutit appartinneqarnissaat
anguniarlugit naalakkersuinikkut siunniunneqartut Kattusseqatigiit sinnerlugit
tamakkiisumik akuersaarpakka, taamaammallu ingerlatsinermut aningaasartuutit appartinneqarnissaannut
suliniutit tamaasa inatsisartuni tamarmiulluta tapersersornissaat
piviusunngortinneqarnissallu anguniartariaqaripput isumaqarpunga
pingaaruteqarluinnartoq, taamaammat aamma isumaqarpunga inatsisartut aamma
uatsinnut qiviartariaqartugut, minnerunngitsumik inatsisartuni
Naalakkersuisunilu ilaasortat akissarsiaasa qaffarujussuarneqarnissaat,
ingerlatsinermut aningaasartuutikillisaanissamut siunertamut
naapertuutinngilluinnarmat neriuppunga inatsisartut tamanna pillugu isumatuumik
imminullu assortuutinngitsumik aalajangiisoqarnissaa maannangaaq
kaammattuutigaara.
Isumaqarpunga
aamma inatsisartuni ilaasortat 31-iusariaqarnersut apeqquserneqartariaqartoq,
tassami Nunatsinni aningaasarsiornerup ajorseriarneratigut
sipaarniutaasinnaasut maannangaaq aamma eqqarsaasersuutigineqartariaqartut,
eqqortuliornerussinnaanngilarmi inuiaqatigiinni sipaarniutit assigiinngitsut
piumasaqaatigisinnarlugit inatsisartuni naalakkersuisunilu ilaasortat
akissarsiaasa imannaannaq qaffanneqarnissaat aalajangiusimaannarneqarnissaat
pissusissamisuunngimmat.
Aningaasasiornerup
qanoq iliartorneranut aamma takussutissaalluartut ilagisarpaat
suliffissaaleqinerup imaluunniit suliffissaqarnerup qanoq iliartornea,
taamaattumik Nunatsinni ajoraluartumik takussutissat saqqummiunneqartut aamma
takutippaat suliffissaaleqisut ukiuni kingullerni ikiliartoraluarsinnarlutik
2001-ip ingerlanerani amerliartoqqilersimasut, taamaammat
pissutissaqarluarpugut suliffissaaruttarnerup akiorniarneqarneranut suli
annerusumik aaqqiiniutinik suliaqarnissatsinnut.
Tassami
sipaarniarneq killup tungaanut ingerlatilissagutsigu aamma tamatuma
kingunipilugisinnaasai sillimaffigineqartariaqassammata, nalunngilarpummi
ajornartorsiutit suulluunniit oqimaassereertillugit aaqqiiniartarnerit
tamatigut oqimaannerusartut, taamaattumik Kattusseqatigiit sinnerlugit
kaammattuutigissuara; suliffissaqartitsiniarnermut suliniutit assigiinngitsut
aamma unittuunnginnissaat eqqumaffigeqqullugit.
Tassami Nunatta
kasse-ata naatsorsuutai qiviaraanni takuneqarsinnaavoq 2002-imi Nunatta
kasse-anut aningaasat isertinneqartut 2001-imi isertinneqartunut naleqqiullugit
87 mio.-inik ikileriarsimammata.
Kommune-t
naatsorsuutaat qiviarutsigit 2001-imi kommune-t ataatsimut katillugit 69
mio.-nik amigartooruteqarmata. Aamma Nunatsinni commune-t ataatsimut katillugit
ukioq-mannamut missingersuutaat qiviaraanni takuneqarsinnaavoq; kommune-t
ataatsimut katillugit 105 mio.-it sinnerlugit 2003-imi
amigartooruteqarnissartik naatsorsuutigigaat, taamaattumik Nunatsinni
aningaasaqarnikkut ingerlatsineq ataatsimut tamaat isigalugu oqartariaqarpunga;
Naalakkersuisut ilumoorput nassuiaammi aallaqqaasiullugu imatut oqarnerat;
?Piffissami
aggersumi Inatsisartut ilungersuutissanik imaannaanngitsunik naalakkersuinikkut
ornigaqarput?
Taamaammat Kattusseqatigiit sinnerlugit
kaammattuutigeqqissuara; Nunatsinni erngup Nunarsuarnut allanut
siuerutigineqarnissaa pimoorullugu sulissutigineqartariaqartoq, tasami Nunatta
avataaniit aningaasanik isaatitassanik annertuumik amigaateqarpugut, taamaammat
aningaasanut inatsisip siullermeerlugu saqqummiunneqarneranut atatillugu
Nunatsinni erngup pimoorunnerullugu tunisassiarineqalernissaanut
naalakkersuinikkut sulissutigineqartariaqartoq isumaqarpunga.
Taamatut
naatsumik oqaaseqarlunga nassuiaat tusaatissaannartut tigunagu,
Naalakkersuisunut kaammattuutiginiarpara aningaasaqarnikkut pissutsit ilorraap
tungaanut saatinniarlugit suliniutit pimoorullugit ingerlanneqartariaqartut.
Qujanaq.
Per
Rosing-Petersen,
ataatsimiinnermi aqutsisoq, sinniisussat aappaat, Siumut.
Kattusseqatigiit
sinnerlugit Anthon Frederiksen-imut qujavugut. Taava taamaasilluta partiit
Kattusseqatigiillu oqaaseqaatai pereeratsigit Aningaasarsiornermut
Naalakkersuisoq akissuteqassooq. Takanna.
Augusta
Salling, Aningaasarsiornermut
Naalakkersuisoq, Atassut.
Qujanaq.
Naalakkersuisut
sinnerlugit Partiit Kattusseqatigiillu oqaaseqaataannut qujavunga.
Tassa
Naalakkersuisuninngaanniit kissaatigigatsigu nunatsinni inuuiaqatigiit
aaqqissugaanerat eqqarsaatigalugu naalakkersuinikkut ingerlatsinerup nutaamik
oqallisigineqarnissaa. Maani Partiit Kattusseqatigiillu oqaaseqarnerminni
immaqa imannak nalilerpara. Naalakkersuisut siunniussaat annertuumik
isumaqatigigaat, taamaattumillu ukiuni tulliuttuni sisamani sulinissatsinni
toqqammavissatut siunniussimasavut taperserneqartutut paasivakka.
Uani
pingaaruteqarluinnarpoq erseqqissaatigissavara aamma paasigakku amerlasuunik
oqaatigineqartoq, taanna nunatsinni aningaasarsiornikkut ukiuni
?90-ikkunninngaanniit qaffakkiartuinnarsimagaluarnerup massakkut qaffakkiartornerup
annikillisimanerata kingunerisaanik massakkut suli mianersornissamut
pisussaanerput annertunerulerpoq.
Tassalu
aningaasanik atuinerup aaqqissuussiffigineqarnissaa pisariaqarluinnartoq,
aammalu inuiaqatigiinni aaqqissuussaanitsinni sungiusimasagut
allanngortiterisariaqalersimagigut. Tamanna ukiuni arlaqalersuni ilumoorpoq,
oqallisigisarsimavarput tassami aaqqissuussaanermut naalakkersuinerup
ingerlatsinerup aaqqissuussaanerup suliarinissaannut ukiuni arlaqartuni
oqalliseqartuarsimavugut.
Kisianni aamma
una qularutissaanngilaq ullormiit ullormut allanngortiterinerit annertuut
ingerlanneqarsinnaasimanngillat. Kisianni massakkut nuannaarutigaara
malunnarmat massakkut aamma Inatsisartuni ilaasortat partiini
assigiinngitsuninngaanneersut aammalu Kattusseqatigiinninngaanniit
allanngortitsinissamut piareersimalluinnartutut nalunaaruteqarmata. Tamannalu
tunngavigalugu tassa ukiuni tullernut sulinissatsinnut toqqammavissagut
piareertutut oqaatigisinnaavagut.
Eqqartorneqartut
annertuuut ilagivaat soorunami aningaasatigut imminut napatilersinnaanitta
taanna pingaaruteqassusia aningaasat amerlanerpaat massakkut
pissarsiarisartakkagut Danmarkiminngaanniit EU-minngaanniillu
pissariarisarpavut.
Taamaattumillu
immitsunnut aningaasatigut napatinnerusinnaanerput angussagutsigut
ilinniartitaanikkut, aammalu inuussutissarsiornikkut ineriartortitsineq taanna
annertunerusumik isiginiartariaqarparput, nunatsinni tapiissutit
toqqammavigalugit ingerlatsineq taanna qimakkiartuaartariaqarparput.
Taamaalilluni aamma tamanit isumaqataaffigineqartoq tusaasinnaagakku
nuannaarutigaara, tassami ukiuni aamma arlaqartuni tamanna
eqqartortareerparput. Pisiusunngortinneqartariaqalerporlu tamanna suliassaq,
taannalu Naalakkersuisut suliassatut pimoorussatut tiguaat, aammalu
ineriartortitsinissami tamanna alaatsinaaqqissaarneqartussaavoq.
Aamma
oqaseqartut arlaqartut tikippaat Namminersornerullutik Oqartussaniit kisimi
nalimmassaaneq aammalu aaqqissuussineq, imminut akilersinnaasunngortitsiniarneq
pissanngitsoq. Kisianni aamma tamanna kommune-nut, kommune-nilu aamma
attuumassuteqartoq. Taamaalluinnarpoq, aamma Naalakkersuisut tamanna
suliassatut aamma soorunami ilaatippaat, tamannalu suliassaq ingerlanneqassaaq
kommune-t peqatigeqqinnaarlugit, minnerunngitsumik kommune-t kattuffiata suleqatiginera imaluunniit
kommunini tikeraarneqartarnitsinni aamma tamanna oqallisigineqartarnissaat
pisariaqalernikuuvoq.
Uani
Naalakkersuisut saqqummiussinitsinni eqqaavarput aningaasartuutinik
apparsaaniarnitsinni aamma soorunami aningaasarsianik aningaasat
qaffakkaluttuinnarnissaannik killilersimaarinninnissaq taanna pingaaruteqartoq.
Aamma tassani soorunami ilaavoq aningaasartuutit aamma
qaffatsaaliorneqarnissaat soorunami tassani aamma nipilersoqataasussaavoq.
Tassalu
kallerup innerata erngullu akiisa aamma qanoq ilillutik
qaffakkiartunnginnissaannut aamma tassani, imaluunniit ukiuni aggersuni qanoq
ililluta imminut pilersornerusinnaanerput kallerup inneranut,
avataaninngaanniit orsussamik pisariaqartitsinngikkaluarluta erngup nukingata
atornerusinnaanera taanna aamma kallerup inniliorfiit
taarsersugassanngortarnerat tunngavigalugu tamanna ingerlanneqassasoq
naatsorsuutigaarput.
Demokraatininngaanniit
maluginiarpara annertuumik aaqqissugaanermi iliuutissatut siunniunneqarsimasut piviusunngortinneqarnissaat,
massakkut pingaatinneqartoq aammalu utaqqikatassimaartoqartoq tassani
malugisinnaavara. Erseqqissaatigissavara siuniussani, massakkut
Naalakkersuinikkut siunniussani suliassat aamma inuuiaqatigiit
aaqqissugaaneranni allanngortitsingaatsiartussat ukiuni tulliuttuni sisamani
ingerlanneqarnissaat taanna siunniunneqarmat. Tassanilu aamma ippassaanikkunni
aamma ukiumut tullermut, imaluunniit ukiumut 2003-mut aningaasartuutissanut
saqqummiussinitsinni aamma eqqaavarput pisariaqartoq aningaasat imminut
ataqatigiilernissaannut aamma allanngortitsinissamut massakkut
suliaqalereernissarput.
Tassami
ukiunut aggersunut aningaasat isaatitassagut qaffakkiartuinnartussaanngitsutut
isikkoqarallarput, taamaattumillu mianersortumik aaqqissuussinissarput aammalu
aningaasartuutaavallaartut, imaluunniit tapiissutit annertuut
ineriartortitsinermut atuunngitsut, kisiannili suliffiit ingerlaannarnissaannut
atorneqarnerusut, taakku allanngortitsinikkut imminut akilersinnaasumik,
imaluunniit aningaasanik annertunerusunik isaatitsinissami,
inuussutissariornermullu ineriartortitsinermut kinguneqartumik atorneqarnissaat
taanna pingaartinneqarpoq.
Ilaatigut
Demokraatininngaanniit aamma eqqaaneqartoq, una soorlu assersuutigalugu Nuka
A/S-imi, Neqi A/S-ip ingerlanneqartup savaatilinnut
ingerlatassanngortinneqarsinnaanerannut tunngasoq, Naalakkersuisuninngaanniit
soqutigaarput. Namminersornerullutik Oqartussani Aktieselskabit ingerlataasa
namminersortunngorsarneqarnissaanni tiguserusussinnaasut oqaloqatiginissaat taamaalilluni
siunissami namminersornerullutik Oqartussat tapiiffigineqarlutik ingerlataasa
imminut akilersinnaasumik ingerlanneqalernissaat taanna
siunniunneqartariaqarmat. Aammalu maluginiarparput ukiuni kingullerni,
minnerunngitsumik massakkut Naalakkersuisunngornitta kingornani, aamma
namminersortut saaffiginnittartut amerliartuinnartut namminneq
ingerlatsinissaminni soqutiginnillutik saaffiginnittartut. Taamaattumik
isumaqarpunga aamma inuiaqatigiit piareersimasut alloriassallutik, tapiissutit
tunngavigalugit ingerlatat namminersortunngorsarnerisigut tapiissutit
qimallugit ingerlariarnissamut.
Tassa
oqaatigisariaqarpara assigiipput, imaluunniit imarisaat partiit oqaatigisaasa
imarisaat, aamma Naalakkersuisut saqqummiussaannut attuumassuteqartut annertupput,
taamaattumillu suleriarnissatsinnut tunngavissinneqaratta qujavunga. Aamma
Naalakkersuisut ataasiakkaat, uanimi partiit oqaaseqarnerminni annertuumik
naalakkersuisoqarfinnut assigiinngitsunut attuumasunik apeqqutinut ilaatigut
saqqummiussaqarput. Taamaattumik Naalakkersuisut ataasiakkaat
periarfissaqassapput akissuteqarnissaminnut.
Qujanaq.
Per
Rosing-Petersen,
ataatsimiinnermi aqutsisoq, sinniisussat aappaat, Siumut.
Aningaasarsiornermut
Naalakkersuisoq qujanaq. Taava oqaaseqarumavoq Attaveqaqatigiinnermut,
Avatangiisinut ineqarnermullu Naalakkersuisoq Mikael Petersen, takanna.
Mikael
Petersen, Attaveqaqatigiinnermut,
Avatangiisinut ineqarnermullu Naalakkersuisoq, Siumut.
Qujanaq.
Tassa
angallannermut tunngatillugu, ilaatigullu aamma ineqarnermut tunngatillugu
taatsiarneqartut assigiinngitsut Aningaasaqarnermut Naalakkersuisup
akissuteqaataasa saniatigut oqaaseqarfigilaassavakka.
Tassa
siullermik ineqarnermut tunngatillugu ilaatigut Siumut oqaluttuininngaanniit,
aamma BSU-mut tunngasut taatsiarneqartut, aamma Inuit Ataqatigiit
oqaluttuaninngaanniit taatsiarneqartut taakkua imaattumik
akissuteqarfigerusuppakka.
Tassa
naluneqanngilluinnarpoq ineqarnikkut aaqqissuusseqqinneq 2000-mili
Inatsisartuni aallartinneqartoq annertuunik assigiinngitsunik sammiveqarmat.
Tassa ineqarnikkut ingerlatsineq piinnarnagu, aamma sanaartorneq
eqqarsaatigalugu.
Tamatumani
Boligstøt-imut tunngassuteqartortai nalunngilarput ukiuni, tassa Ž90-ikkut
naajartorneranni, taamanikkut Siumut-kut aamma Atassut-ikkullu naalakkersuisooqatigiinnerata
nalaani ilaatigut aaqqissuutigiffigineqarput inatsisitigut tunngaviussutigut.
Massakkullu ukiut arlalissuunngikkaluartut qaangiunneranni takusinnaavarput
pisariaqartoq Boligstøt-imik ingerlatsinerup nutaamik aamma
naliliiffiginissaannut. Taamaattumik naalakkersuineq siusinnerusukkut aamma
oqaatigereerparput ineqarnikkut pissutsit nunatsinni inuuiaqatiginnullu
naleqqussarneqarneranut tunngatillugu Boligstøt-imik aaqqissuussineq aamma
ilaasariaqartoq. Taamaattumik naatsorsuutigaara taasuma tungaatigut
qulaajarnerput massakkut uagut pisortaqarfitsinni ingerlatarput, taava
Naalakkersuisut isummernissaannut tunngavissat ersarissut
saqqummiussinnaajumaarlutigit. Taamaattumik taasuma tungaatigut, Boligstøt-i
tungaatigut ingerlanneqartut pillugit Naalakkersuisoqarfitsinni
misissueqqissaarnivut ingerlappagut, aamma A/S Ini aamma tamatumani
peqatigalugu.
Aamma
tamatumani soorunami kommunit saaffiginnittarput, KANOKOKA
oqaloqatigineqareerpoq. Aammalu kommunit saaffiginnittarnerat naapertorlugit
isumaqarpunga paasissutissat annertungaatsiartorsuit piffissami
sivikitsunnguaannarmi ingerlareersumi pissarsiareersimallutigit. Kisianni
piffissaq ingerlalaarallassasoq, taasuma anguneqassappata.
Soorunami
inatsisartunut naalakkersuisut saqqummiiumaarput, tassuunga aaqqiissutissanik
assigiinngitsunik aamma Inatsisartut isummerfigisassaannik
aalajangiiffigisassaannillu.
Ilaatigut
angallannermut tunngatillugu, ilaasunit umiarsuartigut angallassineq pillugu
Inuit Ataqatigiit oqaaseqartuata oqaaseqaataa aammalu oqaaseqarfigeqqusaa.
Tassa
Arctic Umiaq Linep ilaasunut angallassinikkut sullissinermini aamma
takornariaqarnikku annertunerusumik sullissinissaminnut tunngatillugu,
kissaateqarnerminullu tunngatillugu pilersaarutai sumut sammiveqarnersoq
apeqqutigineqarpoq.
Tassa
umiarsuarnik annertusaasoqassanersoq imaluunniit attartornikkut tamakku
ingerlanniarneqarnersut.
Tassa
unneqqarissumik inatsisartunut oqaatigissavara Arctic Umiaq Line
ataatsimeeqatigereersimagakku, aammalu pilersaarutai suunersut paasiumallugit.
Aammalu uagut naalakkersuinikikkut sualummik naalakkersuisooqatigiinninnissamut
isumaqatigiissummi tunngavigisatsinni, naapertuuttunik anguniagaqarnissaq aamma
siunertaralugu.
Tamatumani
ilaatigut Arctic Umiaq Lineminngaanniit saqqummiunneqarpoq ullumikkut
umiarsuartigut pigisat ilaasuni angallassinermi, inuiaqatigiit
pisariaqartitaannut naapertukkunnaarsimasut.
Tassa
imaappoq umiarsuarnik anginerusunik ilaasoqarsinnaanerusunik pisariaqartitsineq
erseqqissaatigineqarpoq. Kalallit Nunaat tamaat ataatsimut isigalugu aammalu
takornariaqarnikkut suli annertunerusumik inerisaasoqassappat, soorunami
tamanna aamma avaqqunneqarsinnaanngitsoq. Taamaattumik Arctic Umiaq Line
nammineerluni misissuivoq umiarsuarnit anginerusunik nunatsinni ilaasunik
angallassinikkut sinersortussanik pilersitsinissaminut.
Tamanna
pissanngatigaarput aamma Naalakkersuisuninngaanniit aamma uanga suliap taassuma
ingerlanera aamma sammiveqarnera pissanganartuummat. Tassa Norgemiut ilaatigut
suleqatigalugit umiarsuartigut nutaaliorsinnaaneq tamatumani eqqarsaatigigaat
paasinarmat.
Kisianni
pissutsit tassunga tunngasut suliallu tassunga tunngasut ersarinnerulerpata,
aammalu qularutiginngilara ukiamut angallanneq pillugu Naalakkersuisut
inatsisartunut nassuiaatissaat saqqummiunneqarpat, tamakku ersarinnerusumik
ilaatinneqarsinnaajumaassapput.
Kisianni
ukioq manna tassa aasaaneerani kiffartuussinissat eqqarsaatigalugit, tassani
pissutsit massakkut nalunngeriikkagut taakkua atuukkallartussaassapput.
Taassuma
saniatigut Inuit Ataqatigiit oqaaseqartuata ilanngullu taasaqarfigaa aamma
Siumup oqaaseqartuata, tassa silaannakkut angallassinermi Air Greenlandip
nunatsinnut sunniutilerujussuup, aamma attuumassuteqarnera soorunami.
Tassami
nalunngilarput Air Greenlandi allaat naalakkersuinikkut siunniussanut
inatsisartunut siunniunneqarsimasunut aammalu Naalakkersuisunut
siunniunneqartartunut annertoorujussuarmik sunniuteqartartoq.
Tassa Air
Greenlandi immaqa oqaatigisinnaavarput nunarput tamaat ataatsimut isigalugu
kisermaassisutut nunarput tamakkerlugu angallassinermi inissisimanermini,
aammalu massakkut Københavnip tungaanut Kangerlussuarminngaanniit tassami
nunatsinniik, Atlantikoq qulaallugu timmisartuussusarnermini
kisermaassilersutut nakuarujussuarmik inissisisimavoq aammalu
sunniutilerujussuulluni.
Taamaattumik
naalakkersuinikkut annertunerusumik sunniuteqarsinnaanissarput tassunga
ingerlatseqatigiiffimmut Naalakkersuisuni arajutsisimanngilarput.
Soorunami
piginneqataassutit Air Greenlandimi nalunngilagut taakkua uagut
Namminersornerullutik Oqartussat 37,5 %-i ingerlatseqatigiinni pigaarput. SAS-p
37,5 %-i pigivaata, taavalu 25 %-i Naalagaaffiup pigalugu.
Tassunga
tunngatillugu oqarsinnaasoraanga immaqa Naalagaaffiup Namminersornerullutik
Oqartussallu ataatsimoortumik piginneqatigeeriaasianni, ingerlatsivimmi tassani
aligortuaqarpoq.
Tassami
Namminersornerullutik Oqartussat Naalagaaffimmiit akisussaaffinnik
tigooqqaaneranut atatillugu, soorlu tunisassiorfiit tigunerannut
Naalagaaffimmiit, KGHp aggulunneranut atatillugu ingerlatseqatigiiffiit tamavimmik
assigiinngitsut selskabenngortinneranni, Namminersornerullutik Oqartussanut
tamanut pigisassanngortinneqarsimammata. Naalagaaffik %-innguamilluunniit
piginneqataassutaarutsillugu.
Tamakkua soorunami
ineriartornerup nassatarai, kisianni Air Greenlandimut taamanikkut
Grønlandsflymut aaqqissuussisimaneq, taanna ullumikkut pissutsinut immaqa
naleqquppallaanngitsutut taaneqarsinnaavoq.
Oqaluttuarisaanermi
qanganitsertoorsimavoq. Namminersornerullutik Oqartussat Naalagaaffillu tassani
piginneqatigiittorsuuvugut. Immaqa uagut tamakkiisumik Naalagaaffiup pigisaat
tigummisinnaagaluartillugit.
Tassami
naalakkersuinikkut soqutisat tassani aamma apeqqutaapput.
Kisianni
nuannissagaluarpoq soorunami suleqatigiinneq tassani piginneqatigiinnerlu
ilumut inuiaqatigiinnut ineriartuutaasumik eqaatsumik isummerfiusumik
isummersorfiusumik ingerlanneqarsinnaassappat.
Kisianni
tassa taamaanngilaq tusagarput. Air Greelandip bestyrelseaninngaanniit uagut
aamma siulersuini ilaasortaatitatsinninngaanniik, ukiuni kingullerni
arlaqalersuni aamma inatsisartunit tamanit arajutsisimaneqanngilaq, tassani
ingerlatsineq ilaatigut suna tamarmi eqaatsumik ingerlasutut taaneqarneq
ajorpoq, allaat siulersuisuit sulineranni.
Taamaattumik
tamakku apeqqutit qulaajaaffiginiarlugit aammalu Naalakkersuisut
suleriaqqinnissatsinnut tunngavissagut ersarissinnerulerniarlugit, apeqqut
tassunga tunngassuteqartoq Danmarkimi trafikministerimut ilanngullugu
naapeqatigeeqqaarnitsinni oqaloqatiginnissutigivara.
Imaanngitsoq
Naalakkersuisut tassa suliaq aallartikkaat, taamaanngilaq. Kisianni pissutsit
tassani inissisimasut qulaajarneqartariaqartut qulaajarneqassapput. Taavalu
Naalakkersuisut isummernissaannut tunngavissat taakkua Angallannermut Pisortaqarfimmiit,
aammalu soorunami Danmarkimi arajutsisitsinata Danmarkimi Naalakkersuisut
isumaqatigalugit, suliassat taamaattut qanoq ingerlanneqarsinnaaneri
tunngavissiussavarput.
Tassa
imaanngilaq ingerlaannartumik aktienik pisinissaq siunnerfiusoq, kisianni qanoq
iliornikkut taamatut inissisimanerup eqaannerusumik aaqqissinnaanera,
Naalagaaffiup uagullu tassani perinaataassutitta aaqqivigisinnaanerat
oqallisigineqartariaqarpoq.
Suli
naluarput soorunami qanoq akeqarsinnaassanersoq. Tamakkualuunniit suli
qulaajarneqanngillat. Tassa Naalagaaffiup taakkua piginneqataassutaat 25 %-t
uagut tigussagutsigit qanoq nalilimmik tigusinnaanerigut, taanna
qulaajarneqartariaqarpoq.
Ilaatigut
tassa tunngavissagut arlaqarput.
Naalagaaffiup
pigisani nalillit taamanikkut aningaasaliissutiminut tunngavigisimasai
nalunngilakka. Tassa imaappoq tamakkiisumik kontantimik aningaasanngorlugu
aningaasaliissutinik Air Greenlandi piginneqataallutalu Nalagaaffiup
tunngaveqanngitsut paasivarput.
Tamakkuupput
qulaajarneqartussat taamaattumik Naalagaaffiup piginneqataassutaasa nunatsinnit
tiguneqassagaluarpata, aningaasanngorlugu imaluunniit toqqaannartumik
aningaasanik akiliuteqarluni pisiarineqarsinnaanera, taanna
akisinnaanngikkallarparput.
Imaassinnaavoq
isumaqatigiissuteqarneq tunngavigalugu aammalu pissutsit qanoq inneri
tunngavigalugit, Naalagaaffiup nunattalu Naalakkersuisut akornanni
naammaginarluinnartumik aaqqiisoqarsinnaasoq.
Tassa
tamakku qulaajarnissaat pisariaqarpoq aamma Air Greenlandip nammineerluni
nunatsinni inuiaqatigiinni sunniuteqarnerusumik suleqataalernissaa
tamakkiisumik qulakkiissagaanni.
Kisianni
tamakku tunngavissat pereerpata taava Naalakkersuisut tamakkiisumik
isummernissaannut tunngavissat aatsaat pilersinnaavoq.
Taamaalillunilu
aamma taama siuariartoqassappat inatsisartut aalajangiivinnissaat
tikinneqarsinnaalluni. Piffissaq sivisussaaq tassunga tunngassuteqartut
ingerlanneqarnera.
Tassa
naatsumik oqaatigalugu Inuit Ataqatigiit oqaaseqartuanut oqaatigisariaqarpara,
taamatut pisoqarnissaa tamakkiisumik
soorunami inatsisartut aalajangigassaraat. Kisianni
pitsaanerulersitsinissaq aammalu ersarinnerulersitsinissaq siunertaralugu
nalilersuinigut ingerlakkallartariaqassavagut.
Kiisalu
angallannermut tunngatillugu nunatsinni ingerlatsinermi aaqqissuusseqqinnerup
aatsaat kingunerisinnaagunarpaa, angallannikkut akikinnerusumik
eqaannerusumillu ingerlatsisinnaalernissaq angussagutsigu.
Tassa
aatsaat aaqqissuusseqqinnikkut tamanna piviusunngorsinnaassasoq.
Akitigut
inissisimanerit ilaatigut ingerlatseqatigiiffinnut aningaasarparujussuarnik
millionerpassuarnik tapiissuteqarluni ingerlatsinerit, tamakkua ullumikkut
nunatta equngasumik aamma angallannikkut aaqqissuussivigineqarneqarsimaneranik
imaqarput.
Taamaattumik
Naalakkersuisuni avaqqunneqarsinnaanngilaq soorlu aamma Aningaasaqarnermut
Naalakkersuisup erseqqissaraa, ingerlatseqatigiiffiit assigiinngitsut
soqutigisamikkut qaleriaattumik ingerlatsisut nalilersuiffigineqartariaqarput,
aamma angallannermi.
Tamannalu
pereerpat soorunami namminersortunit ingerlanneqarsinnaasut namminersortuni
ingerlanneqarsinnaasariaqassapput, kisianni Naalagaaffimmit imaluunniit tassami
pisortanit uagutsinni ingerlanneqarsinnaasut allatut ajornartumik
ingerlanneqartariaqassapput.
Tamakku
nalilersuinerit pereerpata ersarissiumaarpoq aamma namminersortut periarfissaat
qanoq annertutiginersut angallassinikkut, inuiaqatigiinni Kalaallit Nunatsinni
aamma kiffartuussinissamut. Imminut akilersinnaassuseq aamma aallaavigalugu.
Aamma
puigussanngilarput aningaasanut inatsisissap oqaluuserineqarnerani ilaatigut
aamma Inuit Ataqatigiinninngaanniit aamma Demokraatininngaanniit
oqaatigineqareermat, ingerlatseqatigiiffiit soorlu angallannermi
pilersuinermillu ingerlataqartut allaat tamarmik kattuttariaqartut.
Soorunami
tamakkua oqariartuutit imaannaanngillat aamma piviusorsiortumik tamaasa
tiguvagut. Taamaattumik nalilersuinermi tamakku ilanngullugit
nalilersuutigineqartussaassapput.
Taava
Siumup oqaaseqartuanut uteqqilaarusuppunga tassani ilaatigut
akikillisaanissamut tunngatillugu, Air Greenlandikkut ingerlatseqatigiiffiup
soorlu Telekkut peqataatinnerunissaat atorluarneqarnerunissaat ilaatigut
kaammattuutigineqarmat.
Matumani
isumaqarpunga pisariaqartoq erseqqissassallugu soorunami aamma selskabet
tunngaviusumik aamma, siunertarisunnguakkuluugaluarmassuk inuiaqatigiinnut
taamatut kiffartuussilluarnissaq.
Kisianni
ilaatigut pissutaagunarpoq naalakkersuinikkut uagut killiliussatigut
piumasaqaatigut ersarluppallaartarmata.
Taamaattumik
selskabenut piumasaqaatigut ersarissuusariaqarput taavalu nalorninaatsumik
selskabet ingerlanissaminnut tunngavissaat taamaalillugit sinaakkusersorlugit.
Tamakkua
ilanngullugit soorunami Naalakkersuisuni eqqumaffiginiartussaavagut aamma
eqqumaffigaagut. Sinaakkusiussat piumasaqaatit ersarinnerusut selskabenut
ingerlattarnissaat siunertaralugu.
Sanaartornermut
tunngatillugu Inuit Ataqatigiit oqaaseqartuata aamma taakkartugai taakkua
qujarukkumavakka. Tassani sanaartornikkut atugassanik aammalu pisariillisaassutinik
nammineerluta uagut, eqquissuiinnaqinata avataaninngaanniit
suliaqarsinnaanerput annertusariaqarparput aamma tamanna Naalakkersuisunit
pingaartipparput.
Taamaattumik
sanaartornikkut aamma sanaartortitsiviup Sanaartornermut Pisortaqarfiup aaqqissuuteqqinneranut
atatillugu aammalu ineriartorteqqinneranut atatillugu, naalakkersuinikkut
sanaartornerup tungaatigut piumasaqaatissat aamma nalilersugassaraagut.
Isumaqarpunga
massakkumut piaarpallaassasoq oqassalluni namminersorlutik ingerlatsisut soorlu
elementenik, sanaartornermut pisariillisaatinik ineriikannerlugit
ikkussoriaannanngorlugit sanaartoriaatsit pisortat ingerlatissappatigit.
Isumaqarpunga
namminersortut piumassusilerujussuusut aamma elementenik sanaartornissaminnut.
Aamma tamanna pillugu Sulisitsisut Peqatigiiffiat GA, ataatsimeeqatisarlugu
aallartereerpugut. Taamaaliornikkut aamma sanaartornermi suna tamaat
inereerlugu eqquussuinnaqinagu, aamma nunatsinni namminerluta sanaartornikkut
sunniuteqarnerunissarput naammassisaqarnerunissarput siunertaralugu aamma
suliniuteqarumalluta.
Kisianni
Naalakkersuisuninngaanniik sanaartornermik ingerlataqartut soorunami
attaveqarfigiuartussaassavagut. Aammalu tassuuna oqaloqateqartanigut
ingerlattussaassallugit.
Taamaalilluni
aamma sanaartornermi akikillisaanerit pisariillisaanerit aamma nunatta
pissarititaanik atorluaanerit taamaalillugit aamma
ineriartortitsiffiusussaassammata.
Tassuuna
Inuussutissarsiornermut Pisortaqarfik aammalu sanaartornermut uagut
pisortaqarfipput qanimut suleqatigiinnissaat pisariaqarpoq. Aamma tamanna
Naalakkersuisuni ilanngullugu aamma eqqartoreerlugu siunnerfigereerparput.
Qujanaq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Tassalu
Attaveqaqatigiinnermut, Avatangiisinut Ineqarnermullu Naalakkersuisoq.
Tulliulluni
qaqissaaq Ilaqutariinnermut Peqqissutsimullu Naalakkersuisoq.
Takanna.
Ruth
Heilmann,
Ilaqutariinnermut Peqqissutsimullu Naalakkersuisoq, Siumut.
Qujanaq.
Uangattaaq
qujassutigaara partiit oqaaseqartut aammalu Demokraatit, Kattusseqatigiillu
partiit Demokraatiupput aamma.
Annerusumik
taanna kukkoqqajaagakku utoqqatserpunga Demokraatinut, tassa Demokraatit aamma
partiiupput.
Neriuppunga
taanna eqqaamassallugu.
Uani annerusumik
Peqqissutsimut Naalakkersuisumut aamma Ilaqutariinnermut Naalakkersuisumut
apeqquteqartoqanngimmat, kisiannilu Inuit Ataqatigiinni qaqinneqarmat meeqqanut
inuusuttuaqqanullu ukiunut arlaqarluni kommunet kattuffiini
isumaqatigiinniarneq ingerlanneqarsimasut, taanna Naalakkersuisut taamatut
aaqqiisoqarsimasoq oqaatigisaat ilumoorpoq.
Tassami
taamatut isumaqatigiinniartoqarsimasoq aamma taanna uanga nammineq ataqqivara.
Kisiannilu uani oqaatigineqarluni aamma kommunet kattuffianni piffissaq kingulleq
oqaatigineqarsimasoq, kommunet ilaat meeqqanik inuusuttuaqqanullu
isumannaatsumik atugassaqartitsinissaannut akissaqanngitsut, tamanna Inuit
Ataqatigiit paaserusuppaat.
Taanna
apeqqutigineqartoq eqqarsaatigalugu naatsorsuutigaara aamma isumaqatiigiissuteqarfigereerakku
KANUKOKA-p siulittaasua, taanna pillugu oqaloqatigiumaarpara taamatut
neriorsuuteqaannarusuppunga maannakkut tassunga tunngatillugu.
Taavalu
Siumuminngaanniit oqaatigineqartoq aamma suliassatut inassutigineqarusuppoq
tassa ilaqutariit meerartallit aningaasartuutaasa aaqqissuuteqqinneqarnissaat
imaluunniit aaqqiissuteqarfigineqarnissaat. Tassani aamma eqqarsaatigalugu
ineqarnermut akit aammalu pisiassat akiisa qaffakkiartuaarnerisa
kingunerisaanik, aningaasat pissutigineqarsinnaasut annikilliartornerat taanna
uani uparuarneqarluni.
Tassa
soorunami sulissutigaarput Naalakkersuisut aamma sulissutigerusuppaat
ilaqutariit meerartallit, tassani aamma iluaqusersorneqarnissaat allaallu aamma
Inuit Ataqatigiinninngaanniit naggataa tungaatigut oqaatigineqartoq.
Tassa
meeqqanut tapiissutinik aaqqissuusseqqinneq taanna suliniutissatut ilumut
pimoorunneraat aamma uani apeqqutigineqarmat, aningaasarpassuarnik
malitseqartussaq.
Taanna
oqaatigissavara naalakkersuisoqatigiinni ilumoorupparput, aamma suliaqartussanik
tassunga misissuisussanik imaluunniit ataatsimiititaliamik pilersitsivugut,
naatsorsuutigalugu 2004-mut tassunga tunngatillugu aamma
saqqummiussaqarumaarluta inatsisartunut.
Soorunami
uani ilaqutariit amerlanerpaat aamma nammaqataanissaat pingaaruteqarpoq.
Tassani ilaqutariit nammaqataassagunik aamma pisortatigut ikiorsiissutit
eqqarsaatiginagit imaluunniit taakku isumalluutigiinnarnagit, suliffeqarnissaat
aammalu ilinniartitaanikkut qaffassaanissaq pingaaruteqarpoq. Taakkuuppuullu
aamma Naalakkersuisut saqqummiussaminni suliniutigissallugit aamma
saqqummiutaat.
Isumaqarpunga
pingaaruteqartoq inuiaqatigiinni ilinniartitaanikkut qaffassaanissaq
atugarissaarnissaq ilaqutariinni aamma siunissami eqqarsaatigineqassappat.
Tassuunakkut aamma ilinniartitaanerup aaqqissuunnerata, maannakkumut
killiffiusup aamma ingerlateqqinneqarnissaa soorunami aamma suliassaraarput.
Kiisalu
uani isumaginninnikkut aamma kiffartuussinerup aammalu isumaginninnerup iluani
sullissinerup aamma tassuunakkut aaqqissuussaanerusumik, aamma KANUKOKA peqatigalugu suliaqarnissarput aamma
oqaloqatiissutigisussaavarput.
Taamatut
naatsumik nassuiaateqalaarpunga.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Ilaqutariinnermut
Peqqissutsimullu Naalakkersuisumut qujavugut.
Tulliullunilu
oqaaseqassaaq Inuussutissarsiornermut Naalakkersuisoq.
Takanna.
Finn
Karlsen,
Inuussutissarsiornermut Naalakkersuisoq, Atassut.
Qujanaq.
Tassa
aningaasaqarniarnikkut ingerlatsineq pillugu nassuiaatip oqallisigineqarnerani
tupinnanngitsumik inuussutissarsiutinut tunngasut annertuumik sammineqarput.
Tassa
inuussutissarsiutinut siuarsaaneq erseqqissumik annikigineqarpoq aamma
aningaasaliissutit ikigineqarput, taanna assortorsinnaanngilara uanga. Tassa
aamma soorunami neriorsuutigissavarput aappaagumut aningaasaliissutit,
qaffasinnerusut anguniarlugit sulissagama naalakkersuisuni.
Kisianni
tassa inuussutissarsiutit siuarsarnissaanut aamma aningaasarpiaannaviit
utaqqinngikkaluarlugit siuarsaasinnaasugut takusinnaavarput. Tassa massakkut
ilaatigut aningaasarpassuit tapiiffigisartakkagut millionerpaalukasinnik
tapiiffigisartakkagut ilai, 1 kronennguamilluunniit tapiiffiginagit,
namminersortunik ingerlanneqarsinnaalersut takuarput.
Taamaattumik
oqaluttut arlallit partiit arlallit oqaasii isumaqatigisorujussuuakka
tapiissutit ilumut siunertavimminnut atorneqartarnersut misissortariaqartut.
Tassami assersuutigalug NUKA A/S-imi 65 millionit missaannik tapiisarutta
ukiumut, ilumut eqqortumik oorit atorneqartarnersut pisariaqartivinneqarnersut.
Tassani ilaatigut isumaqaqqajaanarpoq pisariaqavinngitsumik immaqa
tapiisarsimasugut.
Kisianni
tassa tamakku misissoqqissaartariaqarput, ilaatigut paasereeratsigu tassa
namminersortunik ingerlanneqarsinnaasut tapiissuteqanngiivissumik. Sulisut
amerlanerullutik.
Aamma
nunaqarfinnut tunngatillugu ilaatigut oqaatigineqarmat nunaqarfiit
suliffissaqarniarnikkut tunitsiviit matooraannarneqartut massakkut. Massakkut
malunnarpoq tassa namminersortut soqutigisaqaleriartuinnarput namminersorlutik
ingerlatsinissaminnik, ilaatigut NUKA aamma peqatigalugu.
Taamaammat
assortunngilara aningaasanik ikippallaanik aningaasaliisimagatta ukiaq manna.
Kisianni aamma aningaasaannaviit pinngikkaluarlugit namminersorluni
ingerlassinnaasumik, takutitsinerit tamakku aamma assorujussuaq iluaqutaasut
suliffissanut siuarsaanissamut.
Taava
arlallit aamma oqaatigaat nunatta ernga avammut tunisassiarineqarnera
tuniniarneqarnissaa pimoorullugu ingerlanneqartariaqartoq. Uanga isumaqarpunga
taanna pimoorunneqartoq maannakkut. Imannak taakkua pimoorussisut arlallit
maannakkut oqaloqatigisarpagut aamma aningaasanik piumasaqanngillat
uagutsinnut.
Kisianni
ingerlanissaminni pimoorussillutik aamma tutsuviginartumik saqqummiussisarput uagutsinnut.
Taamaammat sunartarpiaatigut pimoorutigissaneripput uagut erngup
tuniniarneqarnissaa tassa soorunami tapersersuinerput pimoorupparput
taakkununnga oqaloqatigisartakkatsinnut.
Taamaammat
isumalluarpugut Naalakkersuisuninngaanniit erngup aamma sermip avammut
tuniniarnissaa aallartittussaassaaq ungasippallaanngitsukkut. Taakkualu aamma
naatsorsuutigaarput suliffippaalussuusunik kinguneqartussaasut, aamma soorunami
isaatitsissapput nunatsinnut annertoorujussuarmik.
Ilaatigut
arlallit NUKA A/S-p eqqaavaat, NUKA A/S-imut soorlu ilaatigut NUKA-p ingerlataa
NEQI, apeqquserneqarpoq ilumut ingerlaannartariaqarnersoq. Aamma taanna pillugu
massakkut oqaloqatiinnerit ingerlaniarput, savaatillit massakkut
saaffiginnereernikkuupput NEQI-mut tigusisinnaaneq eqqarsaatigalugu. Kisianni
soorunami qanorpiaq periaaseqartoqassanersoq suli naluarput.
Taakku
oqaloqatigiissutigisussaavarput savaatillillu qanittukkut aprilip
ingerlalaalernerani.
Tassani
akilersinnaanerusumik savaatillit ingerlassinnaappassuk soorunami
ajorineqarsinnaanngilaq. Aamma taanna pillugu NUKA oqaloqatigineqareerpoq.
Taamaammat
tassunga tunngatillugu oqallinnerit aallartereernikuupput.
Suliffeqarnermut
iluarsaaqqiineq pillugu ukiamut Josefip, Inuit Ataqatigiit taanna
apeqqutigisaat ukiamut taanna saqqummiunneqassaaq. Maannakkut
neriorsuutigineqarpoq Suliffeqarnermut Pisortaqarfimmiinngaanniit, ukiamut
saqqummiunneqarnissaa piariissasoq.
Taanna
annerusumik taanngikkaluarlugu inatsisartunut ilaasortaninngaanniit
saqqumiussisoqartussaavoq tassunga tunngasumik, tassunga taanna pineqalerpat
tassunga tunngasunik oqaaseqartussaagami taanna maannakkut
tikippallaanngikkaluarlugu.
Taava
tassa ilaatigut aamma takornariaqarnermut tunngasunik tupinnanngitsumik aamma
uparuartorneqarpoq takornariaqarnerup taamannak aningaasarpassuarnik
tapiiffigisartakkatta takornarissat ikiliartornerat uparuartorneqarpoq.
Soorunami
aamma taanna paasilluarsinnaavarput. Aningaasat taakkua atortakkagut taama
amerlatigisut takornarissanut, takornarissallu ikiliartorlutik. Kisianni tassa
aningaasanik tapiigaangatta takanunga isumaqatigiissuteqartarpugut
anguniagassalerlugu, aningaasat taakkua atorlugit. Aamma taakkua sapinngisamik
takornariqarnermi sulisut aningaasat atorlugit anguniakkat sapinngisaq tamaat
anguniartarpaat.
Kisianni
aamma takornariaqarnerup ikiliartorneranut peqqutaaqataalluinnarpoq angallaneq,
imminnut attuumalluinnaqqissaarput taakkua.
Taamaammat
takornariaqarnerup siuariartorpallaannginneranut aamma angallannikkut
pilersaarusiortarnerit pisooqataapput.
Taamammat
aamma aatsaaginnaq Angallannermut Naalakkersuisup oqaasii tunngavigalugit tassa
oqaloqatigiissutigisussaavarput, angallannermut aamma nammineerluni
suliniuteqareerpoq angallannerup qanoq isillugu akikillisarneqarnissaa
eqqarsaatigalugu suliniuteqarniarluni.
Taava
aamma takornariaqarnermut tunngatillugu massakkut nunat immikkoortuini,
takornariaqarnermut siuarsaanissaq pillugu, suliniutit aallartereernikuupput.
Taamaammat neriuutigivarput takornariaqarnerup siuariartornissaa massakkut
piviusorsiortumik ingerlanneqassasoq.
Aamma
takornariaqarnermut tunngasut qangaanerusoq ingerlanneqartartoq massakkut
utertinniaqqinneqalerput, tassa imaanngitsoq hoteliinnarnut hotelimut
unnuiartortuinnaat eqqarsaatigalugit massakkut aallarteqqinneqarput suliassat, takornarissat
angalaarnerusut nunamut.
Soorlu
assersuutigalugu piniartoqarfinnut, savaateqarfinnut nunaqarfinnut
angalaartitsisarnerit tamakkua massakkut aallarteqqinniarneqarput.
Pilersaarusiorneqarput taamatut ingerlateqqinnissai.
Aktieselskabet
assigiinngitsorpaalussuasiupput soorunami Namminersorullutik Oqartussat
pigisaat. Taanna aamma naalakkersuisooqatigiinni isumaqatigiissutigaarput
ilaatigut misissortariaqaripput, akitieselskabe ilumut imminut qanikkaluartut
tamarmik immikkut, immikkoorlutik ingerlassanersut.
Isumaqatigaakka
partiit ilaasa oqaaserisaat misissortariaqartut tamakkua
kattussuuttariaqarneri. Tassami siulilersuisoqarneri direktørilersorlugit
tamarmik immikkut immaqa ilaatigut pisariaqanngikkaluarlutik, ataatsimoorlutik
ingerlasinnaagaluartut akikillisaataangaatsiarsinnaasunik.
Taanna
isumaqatigisorujussuuarput aamma naalakkersuisunut oqaatigereernikuugatsigu.
Tassa
Suliffeqarnermut, a Inuussutissarsiornermut tunngasut tassa
assortunngilluaasarpakka ukioq manna tassa aamma oqaatigaara, 2003-mut
aningaasanik qaffaariarsinnaanissatsinnut periarfissarput
annikippallaaluatsiarsimavoq, tassa sapaatit akunneri marluk ingerlanerinnaani
imaasiallaannaq qaffaanissatsinnut periarfissaqarsimanngilagut.
Kisianni
tassa naatsorsuutigineqassaaq ukiamut saqqummiussassami 2004-mut aningaasanut
inatsisissamut tunngatillugu, inuussutissarsiornermut siuarsaanissamut
atugassat pinngitsoornatik annerusariaqarneri, taanna neriorsuutigissavarput
neriorsuutigissavara anguniassallugu.
Ilaatigut
aamma soorlu Inuit Ataqatigiinninngaanniit Josefip oqaaserisaanut
tunngatillugu, immaqa ima isumalimmik oqaatigineqarsinnaavoq, nunatta
pissaritaanik atorluaanerunissaq imaluunniit inereerlugit suut tamaasa
tikisittanngikkaluarlugit, maani suliarineqarsinnaaneri eqqarsaatit taamatut
eqqarsaatersorneq ajunngitsorujussuvoq, uanga isumaga malillugu.
Soorlu
elementeliorsinnaaneq. Aamma tassani eqqaanngitsoorneqarsinnaanngilaq SIKU
BLOCK-i nunatsinni atoriaannaalluni massakkut piareersimalluni,
atorumaneqanngitsutut pissusilersorfigineqartoq, isumaqarpugut politikkikkut
illersortariaqaripput. Piareersimaannarpoq.
Taamaammat
nunatta pissarititaanik atorluaanissamik aamma taanna
atorluarniartariaqarparput.
Aamma
Royal Greenlandimut tunngatillugu taanna Josefip, Inuit Ataqatigiinninngaanniit
aamma oqaatigisaa tassa 200 qassit millionimmaa taakku ukiut 260-70 millionit
missaani tapiissutiginikuusagut.
Soorunami
aamma taakku suliffissaqartitsipput, kisianni isumarput malillugu immaqa
inatsisartuni ilaasortaasugut tamangajatta isumarput naapertuuppallaanngitsumik
atorneqartut taakkua.
Ilaatigut
suli massakkut qanoq oqassaanga, immaqa nukatsitsinertulluunniit
oqaatigineqarsinnaasunik tapiisarnerput eqqarsaatigilluaqqissaartariaqarparput.
Ilaatigut immaqa pisariaqavinngitsut soorlu Royal Greenlandi eqqarsaatigalugu.
Aamma
misissoqqissaartariaqarparput ilumut taama amerlatigisunik
tapiiginnarsinnaanersugut. Immaqa nammineerlutik saperunnaaraluartut ilaatigut
massakkut suli tapertarparput.
Taamaammat
misissoqqissaartariaqarparput taakku siusinnerusukkut taamannarsuaq
aningaasanik tapiinerput eqqarsaatigalugu, aamma siunissami
taamaattuaannassanersugut.
Kisianni
tassa uanga isumaqarpunga taamaattuaannarnavianngitsugut ingerlasinnaasoqarpoq
aningaasanik taamarsuaq tapiiffigineqanngikkaluarlutik namminersortut
eqqarsaatigalugit.
Namminersortunik
tiguneqarsinnaaneq aamma nammineq uagut suliffeqarfiuterput saperunanngilaq,
taamatut aningaasarpassuarnik tapiiffigineqanngikkaluarluni ingerlanissaminut.
Taamaakkallarpoq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Tassalu
Inuussutissarsiornermut Naalakkersuisoq.
Tulliulluni
oqaaseqassaaq Aalisarnermut, Piniarnermut Nunalerinermullu Naalakkersuisoq.
Takanna.
Simon
Olsen,
Aalisarnermut, Piniarnermut Nunalerinermullu Naalakkersuisoq, Siumut.
Partiit
tamarmik Kattusseqatiillu aalisarneq pillugu inuussutissarsiornerlumi
pimoorunneqarnerunissaa, Naalakkersuisunit sukataarutigineqassasoq tamanit
inassutigineqarpoq.
Tamanna soorunami
isumalluarnissamik pilersitsivoq.
Siullermik
miserratigineqassanngilaq ukiut marlussunni maannakkumut akit
tupinnaannartumik, pingaartumik rejet eqqarsaatigalugit aappariartuinnarlutik
apparujussuarsimammata.
Allatut
ajornartumik aalisarneq imminut akilersinnaasumik ingerlassappat naleqqussaaneq
akisooq allatut ajornartumik atorfissaqartipparput.
Siumuminngaanniit
oqaatigineqartut malillugit naleqqussaanermik ingerlatsineq
iluarisimaarneqarmat, Naalakkersuisuniit soorunami miserratigissanngilarput
ilumoorluinnartumik oqariartuutaammat.
Inuit
Ataqatigiinninngaanniit oqaaseq atorneqartoq issuaaffigilaassavara.
Inuussutissarsiornermik
ingerlataqartut nunatta nammineq pilersulernissaanut piumassuseqarnerat
annikippallaaqaaq.
Tamanna assortussallugu
pissutissaqanngilagut.
Taamaakkaluartoq
ineriartortitsineq pitsaanerusoq sammiveqarfigilissagutsigu,
assigiinngitsutigut pilerinarsaasinnaasariaqarpugut.
Assersuutigalugu
akileraarutitigut aammattaarlu aningaasatigut sapinngisamik isumannaarsuinissamik
periarfissanik pitsaasunik nassaarniarnerusinnaasariaqarpugut.
Taamaaliornitsigut taava aatsaat isumannaatsumik killiffeqartitsisarnissaq
angusinnaassavarput.
Tassami
assersuutissaqqipput kilisaatit maannakkumut naammaginartumik sillimmasersorluarsimanerat,
naalakkersuinikkut ukiualussuarni takuneqarluni ingerlaffigineqarsimasoq.
Tassani
erseqqilluinnaqqissaartumik miserratigineqarsinnaanngitsumillu
takunnissinnaalersitsivoq, taamaaliorsimaneq immaqa isaasalerlugu
ajortuliaanngitsoq, pissusissamisoortuusorlu.
Taassuma
saniatigut Atassummiit aamma eqqaaneqarpoq tunitsiviit
naleqqussarneqarnissaannut pisariaqartitsilluinnartugut. Tamanna
ilumoorluinnarpoq. Tassami aalisartut ilaanni aasaanerani pingaartumik,
ilaatigut aamma sulisussat soorunami amigaataasarnerat pissutaalluni
tunitsivissanik amigaateqalertarput.
Taamaalillunilu
tunitsiviit naleqqussarsimannginnerat ilaatigut pissutaaqatalluni
ajornartorsiutinik aamma imminut akilersinnaannginnernik
pilersitsisitsiartortuartarput.
Taamatut aalisarnerup
ineriartortinnerata suli pitsaanerusunngortikkiartornissaa angussagutsigu
allatut ajornartumik aalisariutit soqutiginartut, imaluunniit qanoq oqassaagut,
inuttaaffigissallugit pilerinartut pilerinarsartariaqarpagut.
Taassumalu
saniatigut aamma aalisartut annertunerusumik ilinniarnerunissaannik aamma
aqqutissiuunnerusariaqarpagut. Taamaalilluta aalisarneq uneqattaanngitsoq
atasuinnaanerusumik ingerlasinnaasoq atulerneratigut, angallatit aammalu suut
tamarmik naammaginartumik akit inissisimatillugit, taava pitsaanerpaamik
ingerlasinnaaniassammata.
Taamatuttaaq
Demokraatit inuussutissarsiutit siuarsarneqarnissaat ilaatigullu aalisarneq
aamma pimoorulluinnarlugu eqqartoraat tusaasinnaavarput, imaluunniit
takusinnaavarput.
Kattusseqatigiinninngaanniit
aningaasat mitaatilluni oqartoqarpoq, tassa aalisarneq eqqarsaatigalugu
angallatinik ikinnerpaamik 200 million kr-nit amigaatigineqartutut
oqaatigineqarnerat assortussallugu ajornakusoortorujussuuvoq.
Taanna
imaannaanngingaatsiartuuvoq. Kisianni maannakkut Naalakkersuisut aqqutissanik
assigiinngitsunik misissuinermi aammalu atuisut aalisartut, piniartut
taamaaqataallu peqatigalugit, ingerlatsinerup aaqqissuukkiartuaarnerani
sapinngisamik oqaaseq tapiissutit atornagit kisianni piorsaaneq, soorlu bankitigoorlugu
anlægimik taallugu ingerlatsilernissamik siunnerfeqarneq, taanna
saneqqunneqarsinnaanngitsoq eqqarsaatigisassaavoq imaluunniit
akuerisariaqarpoq.
Tassami
ullumikkut aalisarneq inuussutissarsiuutitta suli pingaarnersarivaat.
Ullumikkumullu naammaginarnerusumut inissikkuminaatsipparput oqareernittut akit
ima appasitsigipput, ukiuni kingullerni marlussunni
nappatigineqarsinnaanngitsutupajaaq allaat inissisimallutik.
Taamaammat
angallatit akikitsut nutaanngitsut aallarsinnaanissaminnut akornuteqarlutik
uneqattaartartut, inuttassaaleqisartut ilaatigut pissutaallutik
ajornartorsiortitsisunut ilaapput. Taava aamma angallatit anginerusut
taamatuttaarlu aamma atasuinnaanerusumik aalisarsinnaasut pinngitsoornagit
atorfissaqartipparput. Taamatuttaarlu ukioq manna rejet pingaartumik rejet
85.000 tonsiminngaanniit 100.000 tonsimut qaffannerat, taanna qujanartumik
ingerlanerup isumannaannerulersinnaanissaanik, aqqutissiuussissasoq soorunami
naatsorsuutigaarput.
Aalisarneq
maannakkut rejerniarneq, taavalu saattussat isumaliutissiissutaat imaluunniit
ataatsimiititaliaq naammassilluinnartoq, naammasseriarpat qaleralinniarneq
saanneqartussaavoq.
Taamaalippallu
taava aamma tassani naleqqussaaneq naammaginarnerusoq aamma kommunenut
qularnanngitsumik attuiumaartussaq, immaqaluunniit allaat pitsaanerusussamik
siunnerfeqalersitsisussaq tikittussaassavarput.
Taassuma
saniatigut naalakkersuisooqatigiit isumaqatigiissutitsinni aalisarnerup
silittumik tamakkiisumillu oqallisigeqqissaarneqarnissaa,
isumasioqatigiissutigeqqissaarneqarnissaa siunnerfigaarput.
Taannalu
neriuppunga ukiumi tullermi tassa 2004-mi tassani aningaasalerneqarnissaanut
aamma periarfissaqarsinnaajumaartugut, taamaalilluta pitsaanerpaamik
killiffipput aammalu isumannaatsumik siumut ingerlariarnissatsinnut
aqqutissatsinnut nassaarsiorsinnaaniassagatta.
Taamaakkallartumik
oqaaseqarpunga.
Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni
oqaaseqassaaq Kultureqarnermut Ilinniartitaanermullu Naalakkersuisoq.
Arkalu
Abelsen, Kultureqarnermut
Ilinniartitaanermullu Naalakkersuisoq, Atassut.
Qujanaq.
Partiininngaanniit
saqqummiussat ataatsimut oqaaseqarfigilaassavakka.
Siullermik
oqaatigisinnaavara ilinniartuunersiuteqarnerup nutarternissaa, taanna ukiamut
saqqummiunneqassammat.
Aammalu
tassa januarip aallaqqaataaninngaannit 2004-mut atuutilersussatut, tassunga
pissutaavoq Naalakkersuisunngoratta KIK-mi siulittaasoq, aammalu DKIK-mi
siulittaasoq aammalu atorfilitsitagut ataatsimiinnitsinni paasisimagatsigu,
taassuma siunnersuutissap tusarniutigineqarsimanera taakkua pineqartut
atuisuusut feriernerata nalaani pisimasoq. Taamaattumillu iluamik
periarfissaqarsimanatik sunniuteqarfiginissaa taassuma.
Pingaartipparput
atuisut peqatigalugit taakkua atugaat aallaavigalugit taanna peqqissaartumik
saqqummiunneqassasoq. Aammalu taassuma atuutilernissaanut nutaassap
ilinniartuunersiuteqarfiup qanoq piareersimatiginera taanna aamma peqqutaaqataavoq.
Kisiat tassa ukiaru saqqummiunneqassaaq, naatsorsuutigalutigu januarip
aallaqqaataaninngaaniit atuutilersussatut.
Maannakuut
meeqqat atuarfiat partiinit assigiinngitsuninngaanniit sammineqarpoq. Ilumut meeqqat
atuarfiat massakkut inatsisissaq / peqqussutissaq tassa siullermeerneqareerpoq,
aammalu naatsorsuutigilluinnarparput tassa 1. august akuerineqarluni
atuutilissasoq.
Piareersaatit
assigiinngitsut ingerlasimapput, soorunami illutaasut taakkua annertuumik aamma
uparuartorneqarlutillu pineqarput. Ippassaanngikkuni ippassaani nunaqarfinni
atuarfiit pillugit nalunaarusiaq taanna tiguara, suliluunniit
piffissaqarnikuunngilanga misissornissaanut. Pigereerparput illoqarfinni
atuarfiit qanoq issusaanut nalunaarusiaq.
Tassalu
taakkua ataatsimoortillugit nalilersoqqissaartussaavarput, atuarfiit ajussusiat
imaluunniit pitsaassusiat, kisiannili aamma meeqqat amerliartornerat
imaluunniit ikiliartornerat tammakua aamma pissutaaqataassapput
nalilersuinermi. Nalilersueqqissaartoqassiooq, taavalu qanoq
tulleriinneqarlutik, iluarsartuunneqarnissaat aammalu naleqqussarneqarnissaat.
Isumaqarpunga
tassani uani pissusissamisoortoq inatsisartunut oqaatigissallugu una;
maannakkut atuarfiit pigineqartut avatangiisaasut, taakkua pituttuipput
suleriusissanullu assigiinngitsunut aamma killiliillutik. Taamaattumik
pingaartorujussuuvoq, uani iluarsartuussinissami, iluarsartuutiinnarnagit
pissusitoqaannut kisiannili aamma periarfissat atorlugit naleqqussarnissaat
atuarfitsialammut atorneqarsinnaasutut, taanna pingaartorujussuuvoq
eqqumaffissallugu.
Taavalu
ilinniartitaanerit Siumut-minngaanniit tikkuarneqarput, soorunami
ilinniartitaanerit pissutsinut naleqqussartuarneqassapput aammalu
oqaatigisinnaavara tassa piffissani Inatsisartut ataatsimiikkunnaarniariarpata
tamakkiisumik ilinniartitaanerit nalilersorneqassapput, nutarteriniutillu
assigiinngitsut nalilersoqqissaarneqarlutik aamma pisariaqarluinnarpoq isumaga
malillugu nalilersoqqissaarnissaat, suunukua ilinniartitaanerit nunatsinni
pimoorutivillugit annertuumik piorsaaffigisariaqartut, inuiaqatigiit
anguniakkatsinnut tulluussarlugit. Aammaaku suut ilinniartitaanerit immaqa
akisuallaartut nunatsinni ingerlatiinnarnissaat.
Tamakku
assigiinngitsorpassuit nalilersoqqissaarlugit siunnersuutinut
saqqummiussisarumaarpugut qaammatini aggersuni.
Ukiorpassuarni
ajornartorsiutaasimasoq, tassa ilinniarsimasunik ilinniartitsisussaaleqineq.
Naluneqanngitsutuut kommunit nammineerlutik mannakkut
ilinniartitsisussarsiortarput, kisianni aamma qullersaqarfitsinninngaanniit
aamma soorunami ikiortariallit ikiorniartarpavut assigiinngitsutigut. Kisianni
taassuma ajornartorsiutip qaangerniarnerani sinnittorineqartarsimagaluarput
ukiorpassuarni ilinniarfissuarmi ilinniartitsinikkut uagut pisariaqartitagut
ilinniarsimasut anguneqarsinnaasut. Kisianne taanna ukiorpassuarni
anguniartuaraluarlugu assigiinngitsutigut angusinnaanngilarput.
Taamaattumik
naatsorsuutigisariaqarparput suli ukiorpassuarni ilinniartitaaneq
pitsaanerpaamik ingerlassappat meeqqat atuarfiini, taava pisariaqarpoq
avataaninngaannit tassa uani qallunaat nunaanninngaanniit ilinniartitsisunik
suli tikisitsiuarnissarput.
Kommuunillu
assigiinngitsunik periuseqarlutik ilaat iluatsinnerusumik ilaallu
iluatsinnginnerusumik angusaqarfigisarpaat. Meeqqat atuarfiat taamannak
piorsaavigereerlugu tulliinnguuttutut oqaatigisariaqarpoq aamma meeqqat
atualinnginneranni qanoq piareersarneqarsinnaanera taassuma
sammineqarnerulernissaa. Naalakkersuisoqatigalu Ruthi taanna
oqaloqatigissutigukkutsoortussaavarput, tassami ullumikkut aaqqissuussaasumik
ulluunerani paaqqinnittarfinni anguniagalimmik meeqqat sullinneqanngillat,
paarsinerinnaanerullunilu. Taamaatumik pingaartorujussuuvoq meeqqat atuarfianni
meeqqat aallartilluartut amerlanerpaat pilersissagutsigit, taava angajoqqaanut
tapertaasumik meeqqerivinnut ulluunerani paaqqinnittarfinni piorsaanissaq
aammalu anguniagalersuinissaq taanna pisariaqarluinnarpoq.
Isumaqarpunga
taanna annertuumik aamma atuarfitsialaap iluatsittumik ingerlanissaanut aqqutissiuussisinnaasoq.
Taamannak
naatsumik oqaaseqarlunga uani tunngasortaat oqaaseqarfigilaarpakka.
Qujanaq.
Anthon
Frederiksen, Kattusseqatigiit.
Tassa
ilaatigut Atassut-ip oqaluttuata aamma soqutiginarluinnartoq saqqummiussaa
aammalu qaangiinnagassaanngitsoq, isumaqarpunga ilanngullugu aamma
tapersertariaqarlugu, tassaasorlu ilaatigut angalassinermut tunngasoq
umiarsuakkut aamma Diskobugtimi massakkut misilittagaqarfigilaaleriigarput,
minnerunngitsumik tunisassasiat qeritsitsivinni uninngatiinnarneqartarnerisa
sivisuumik naleerukkiartorsinnaasarnerat aamma tassani
pinngitsoortinneqarsinnaammat.
Taannalu
ilaatigut Ilulissat kommunianiit siornaanni Royal Arctic Line
attaveqarfigisarlugu umiarsuakkut angallasinermi, qujanartumik
piviusunngortikkiartuaarneqartoq ukiarmi imaluunniit ukiaq siullermeerluni
atuutilerneqarnera inuutissarsiortuni assorujussuaq iluarineqarpoq. Tassa
naluneqanngitsutut kitaata sikui annertuumik apeqqutaapput, tassalu ukiuni
kingullerni Diskobugtimi pingaartumik ilisimasatigut naapertorlugit kitaata
sikui Attup eqqaanut tulattalernikuupput februarip aallartisimalernerani
aatsaat, siusinerusumi naleqqiullugu kingusinnerujussuullutik.
Taamaattumillu
periarfissaq taanna aamma atorluarneqarnissaa taassuma umiarsuarmi angallasinermi
assartuinermi, minnerunngitsumillu aamma ilaasunik angallassineq
eqqarsaatigalugu. Ukioq manna takusinnaasagut naapertorlugit ajoraluartumik
Diskobugtimut umiarsuaqartarneq, ilaasunik angallassineq eqqarsaatigalugu
kingusittorujussuuvoq Diskobugtip ilua tikinneqartarnera. Aammalu tassani
takornarissanik angallasineq aammalu nalinginnaasumik innuttasunik
angallassinermi equsoortitsisarluni. Taamaattumik tamakkua aamma
aningaasaqarnermut attuumassuteqartut annertuumik eqqumaffigineqarnissaat assorujussuaq
pingaaruteqarpoq.
Kiisalu
aningaasaqarneq pillugu nassuiaammi aammalu ippassaq nassuiaat, Inatsisartunut
saqqummiunneqartoq eqqartorneqarmat maqaasisara tassaavoq suliniutit ukiuni
makkunani immikkorluinnaq ittut, aammalu qularnanngitsumik 2004-imi
atuutilersussaq, tassalu nunarsuarmi nunat eqqissisimatitatut eriagisatut
allattorsimaffimmi allattuiffimmi Kalaallit Nunaata nunartaata ilaa, 1. februar
ukioq manna inassutigineqarluni Unisco-mut nassiunneqartoq. Isumaqarpunga
pingaaruteqartorujussuaq aamma nunatsinni aningaasarsiorneq
takornariartitsinerlu eqqarsaatigalugit eqqumaffigissallugu. Tassami
naatsoruutigineqarmat taanna piviusunngortinneqassappat takornariaqarneq 40%
angullugu allaat qaffariarsinnaasoq. Tassanilu tassa pineqarpoq Ilulissat
kangerluata nunarsuarmi eqqissisimatitanut ilanngutsinneqarnissaa.
Taassuma
sillimaffigineqarnissaa soorunami kommunini marlunni pingaartumik
Qasigiannguani Ilulissanilu sillimaffigalugu eqqarsaatersorfigineqarpoq
annertuumik, aamma qularnanngilaq nuna tamakkerlugu taassuma tungaata
piareersimaffigineqarnissaa pinngitsoorani pisariaqassasoq.
Tapiissutit
assigiinngitsutigut atorneqarnerani oqaatigineqartut tamakkiisumik, aammalu
Naalakkersuisup oqaatigisaattuut taakkua nakkutigineqarnerusumik pitsaanerusumillu
atorneqarnissaat soorunami aamma uanga soqutigilluinnarpara. Kiisalu
Naalakkersuisut tamarmik assigiinngitsut akissuteqarnerannut aamma
qujarusuppunga paasissutissat aamma arlallit soqutiginaateqartut
saqqummiummatigit.
Inuutissarsiornermut
Naalakkersuisup erngup tunisassiarineqarneranut pimoorunneqarnerunissaanut
tunngatillugu akissuteqaataa ajunngikkaluaqisoq, kisianni taamaattoq
eqqarsaatersersuutikkut uanga naapertorlugit pimoorussinerunissamik oqalunnermi
tunngavigivara suli annerusumik maannakkut ingerlanneqartut saniatigut
aallussilernissaq, ilaatigummi assersuutigalugu Aningaasanut inatsit
siullermeerneqarneranut atatillugu oqaatigivara erngup tunisassiarineqarnerata
olie-mik olie-siorniarnermik ingerlatsiniarnermut taarsiullugu saatinniartariaqartoq.
Tassa nalunnginnatsigu maannamut ukiuni arlaqalersuni
olie-siorniartuaraluarluta iluatsitsinnginnatta suli, taamatut
oqarluaannartariaqarpugut.
Taamaattumik
aningaasarpassuit atorneqartut tassani olie-mik ujarlernermi ilaannaaluunniit
erngup annerusumik imermut tunisassiornermut atorneqarsinnaanerat
qularnanngimmat tassuuna aamma sukkanerusumik aningaasanik
isaatitsiniarsinnaanerput nunatsinnut pilersinneqarsinnaasoq.
Tassami
maannakkut nalunaarummi aammalu paasissutissat kisitsisillu assigiinngitsut
saqqummiussuunneqartut qiviarutsigit pissutissaqarpugut aarlerinissatsinnut.
Naak ilaatigut Aningaasaqarnermut Naalakkersuisup saqqummiussinermini soorunami
aarlerineq tamanna tamakkiisumik erserpianngitsumik oqaatigigaluaraa,
taamaattoq isumaqarpunga pissutissaqavittugut sillimmaartarnissatsinnut.
Taamaattumillu
periarfissat aningaasanik isaatitsissutaasinnaasut sapinngisamik tamaasa
amerlanerpaat sillimaffigisariaqarigut isumaqarpunga.
Imaannaanngilaq
ukiuni kingullerni qulit missaani taamatut nunarput aningaasarissaarsinnarluni
2002 aallarnerfigalugu ammut aallartutut oqaatigineqarsinnaanera
takusinnaagatsigu. Taamaattumik oqareernittuut uatsinnut sorsuukkunnaarluta
immaqa aammalu parti aporfiuallaarnagu apeqqutaatippallaarnagulu suleqatigiinniartariaqartugut
taanna avaqqukkuminaassooq.
Qujanaq.
Josef
Motzfeldt, Inuit
Ataqatigiit oqaaseqartuat.
Naalakkersuisunut
ilaasortat ataasiakkaat akissuteqaataanut qujariarlunga partiit
oqaaseqartuinut, oqaaseqartui ataasiakkaat oqaaseqarfigilaassavakka.
Siullermik
Atassut-ip oqaaseqartuanut, Atassut-ip oqaaseqartua imaanngilaq oqaraangamik
pineri tamaasa ilumoortunik oqartartoq. Allaffissornerup sukateriffiginissaa
annikillileriffiginissaa qujarullugu Atassut-ip oqaaseqartuata oqaatigaa.
Taanna pilersaarutigineqarfigereerpoq, kisiannili pilersaarutaasut massakkut
allanngortiterneqassappata isumaqarpugut tamatumani Inatsisartut aamma
susassaqartut. Pilersaarummik ulluinnarlugu nikussutiinnarlugu inuit
ataasiakkaat aalajangigaannik toqqammavigineqarsinnaanngitsoq
allanngortiterineq.
Pingaaruteqarpoq
sulisut peqasiullugit tamatuma aaqqissuussiffiginissaa, taamaattumik ilaatigut
upernaaq manna ataatsimiinnermi Inuit Ataqatigiinninngaanniit Asii Chemnitz
Narup-ip apeqquteqaat tunngavigalugu oqallisissiaa, tassalu nunatsinni
allaffisornikkut, Namminersornerulluni Oqartussani naleqqussaanermi tunngasoq,
taanna pissangalluta peqataaffigiumaarparput, aammalu tassuunakkut
Naalakkersuisut isummersuutigereersimasamittut saqqummiukkumasinnaasaat
pissangagivagut.
Taavalu
suut tamarmik immaqa isornartorsiutitaqanngivissumik
namminersortunngorsarnissaannik Atassut-ip oqarnera aamma arlalitsigut
oqaatigeqattaarneqartoq, namminersortunngorsaaneq namminersortunngorsaat.
Isumaqarpugut Inuit Ataqatigiinninngaanniit ullumikkut ingerlassiviit
Namminersornerullutik Oqartussani selskab-itut pigineqarnerat
allanngortiterneqassappata, oqareernitsitut innuttaasut, sulisut imaluunniit
selskabinut tamakkununnga arlaatigut attuumassuteqartut peqataatinneqarnissaat
pingaarnerutittariaqartoq, aappaattullu kiffartuussinerup pitsaanerulernissaa
qulequttat pingaarnerit ilagisariaqaraat.
Piginneqatigeeriaatsit
nutaat allaanerusut tamakkua eqqartornerini Demokraatit oqaaseqartuata oqaasia Neqi-mut
tunngasoq, taanna isumaqarpugut tulluartuusoq, tassa susassaqavissut matumani
akisussaassuseqarlutik akisussaaqataallutik imaluunniit tamakkiisumik
akisussaasuullutik ingerlatsissappata , tamanna alloriarnerussasoq ilorraap
tungaanut taaneqarsinnaasoq.
Massakkut
inuiaqatigiit aaqqissuussaanerat allanngortiterneqarnissaanut oqallinnermi
aamma pilersaarutit ukiunut tulliuttunut Naalakkersuisut eqqarsaataat, tassa
2000-imi pilersaarutit saqqummiunneqarnera kingorna timitalersuinerit
ingerlanneqarneranut ilapittaasussat, aallartivinnginnerani
eqqaasitsissutigerusunnarpoq maannakkumut allanngortiterinerit
akuerineqareersut paamaarunneqarneri, matumani pingaartutut eqqarsaatigivarput
sinerissap qanittuani aalisarnerup naleqqussarneqarneranut 2001-imili ingerlanneqartoq
suli naammassineqanngitsoq.
Taamaammat
aamma tassunga ilanngullug Inuit Ataqatigiit oqaaseqarnitsinni erseqqivissumi
immaqa oqaatiginngisarput tassaavoq, kommunit Namminersornerullutik Oqartussat
akornanni susassaqarfinnik nammagassanillu agguaassisimaneq taanna
naliliivigeqqullugu aammalu inuiaqatigiit aaqqissugaanerata
allanngortikkiartornerani ilanngullugu ukiuni tulliuttuni suliassatut
nukinginnartutut ilannguteqqullugu.
Inuutissarsiornermut
Naalakkersuisup oqarnermini aningaasaliinissaq 2004-imi annertusineqassasut
qujasaatigai, immaqa aamma nammineq oqarneratut aningaasat imatorujussuaq uagut
ujartunngikkaluarpavut, kisiannili isummat suunukua inuutissarsiutini
siuarsaanissamut - isummat suut pigineqarpat? isumassarsiornermi inuutissarsiutinut
ingerlataqartut isumassarsisinnaasullu allat peqatigalugit ujartuinissat
pingaaruteqartorujussuuvoq.
Taavalu
qarasaasiaara uuma oqaaseqarnissatsinnut oqaaserisassanni sulininni
nappaatipiluunersuup suunerpoq aqqusaarmagu, oqaatsit pingaartorujussuit
tammarsimapput. Tassalu piniartuunermut tunngasuupput. Piniartutut
inuussutissarsiuteqarneq qanoq oqassuugut Naalakkersuisup nalunaarusiaani
siunnerfeqanngitsumik aningaasalersorneqaannartutut oqaatigineqarpoq, tamannami
aamma ilumoortoqarsinnaavoq. Taamaattumik isummersorfigineqannginnera
maqaasivarput, isumaqarpugut piniartutut inuussutissarsiorneq minnerunngitsumik
ajornartorsioreersut, minnerunngitsumik ukiut kingulliit silaannaap
allanngoriartorneranut annertoorujussuarmik kalluarneqartoq tujorminartumik.
Ungasissoq eqqarsaatigalugu pilersaarusiuunneqartariaqarpoq Kattuffik KNAP
aammalu piniarnermut siunnersuisooqatigiit peqatigalugit. Tassungalu atatillugu
tapertaasinnaasut piniartuunermut puisip neqaanik avammut nioqquteqarsinnaaneq
Danmarkimi Inuutissalerinermut Ministereqarfimminngaanniit akuersissummik
Sisimiut Food-iusimasup siornaassuakkunnili pissarsereeraluarpoq ?
iluatinnartigisutsiarsuaq ? puisi nutaaq immaqa annernakujukkaluartoq, kisianni
puisi nutaaq isumaqarnarpoq aqqutissatsialaasoq piniartuunerup
siuarsarneqarnissaanut napassutaasunngortinniarnissaa.
Tassungalu
aamma ilanngullugu tapertaasinnasutut sanalukkanik nioqqusiorneq aammalu
takornariaqarneq. Sanalukkanik inuutissaqarniarsinnaanermut siunnersorti
ukiorpanngortuni, ikumut 1,5 mio.kr. aningaasalertarparput. Inerititai suuppat,
siunnerfii suuppat tamakku pillugit Naalakkersuisut ukiakkut
ataatsimiinnissamut nassuiaateqarnissaat pisariaqarsorinartorujussuuvoq.
Taavalu
Aalisarnermut, Piniarnermullu Naalakkersuisup oqaasiinnut atatillugu
aalisariutit pilerinartut pilerinarsarniarpai, tamanna soorunami
assortorneqarsinnaanngilaq, qanoq pilerinartigissappat.
Qujanaq.
Ole
Thorleifsen, Siumup
oqaaseqartua.
Siullermik
Naalakkersuisut taamannak oqaaseqaatitsinnut taamak tapersersuinerat
qujassutigaarput.
Taavalu
aamma qangarsuarli ukiut 20-it niuernikkut ingerlatsinissaq
oqallisigineqartuartoq maanna aatsaat tassa piviusunngortinniarneqalerpoq.
Taavalu taanna siunnerfik malinnarpoq partiinit tamanit tapersersorneqartoq.
Kisiannili taamannak inuiaqatigiinnik allanngortitsiniarnermi
pisariaqarluinnarpoq naammagittarsinnaaneq, tassami maani Naalakkersuisut
suliakkerpagut annertoorujussuarmik suliassamik, taavalu sunamininnguaq
allanngortikkaangatsigu inuiaqatigiinnut kinguneqartartussaavoq,
inuiaqatigiinnut ersarilluinnartumik, tamakkua eqqumaffigisariaqarpavut aamma
Inatsisartuni suleqataaffigisariaqarpagut.
Taamaatumik
maanna aningaasarsiornitsigut siunnerfiit ataatsimoorullugit isummerfigineri
pingaarluinnartutut isigaarput Siumut-minngaanniit.
Aamma
maluginiakkattut Inuit Ataqatigiit oqaaseqartuanit Aningaasaqarnermut
Ataatsimiititaliami ilaasortamit, Demokraatillu oqaaseqartuanit aamma
Aningaasaqarnermut Ataatsimiititaliamit ilaasortamit oqaatigineqarput,
oqaatigineqartut inuutissarsiornermut angallannermut nunallu immikkoortuini
agguataarinissamut atatillugu aamma tapiissuteqartarnermut tunngasut
qujaruttorujussuuagut, tassami Aningaasaqarnermi Ataatsimiititaliami aamma
taakku eqqartortaratsigit, taavalu isummersueqataallutalu Siumuminngaannit,
taakkulu taamaalilluni saqqummiuttarsinnaammassuk qujasorujussuuvugut.
Neriullutalu Aningaasaqarnermut Ataatsimiititaliami aamma
eqqartorluartarumaarivut annertunerusumillu inerisarlugit.
Qujanaq.
Jakob
Sivertse, Atassutip
oqaaseqartua.
Qujanaq
naatsunnguamik. Tassaana nammineersinnaaneq pingaaruteqarmat
erseqqissaaffigilaarniarlugu, tupinnanngilaq uagut nammineersinnaaneq
pingaartikkatsigu. Namminersortut nammineerlutik inuussutissarsiummik
aallartitsigaangamik unittussaanatik allartittartut amerlaqaat ? qujanartumik.
Taamaattumik tamakkuupput tassa annertunerpaamik sulisoqarnermikkut pisortanut
akileraarutitigut isaatitsisut, pisortanillu tapiiffigineqaratik, taakkua
amerlisinneqarpata taava nunatsinni aningaasat ullumikkut tapiissutitut
tunniunneqartartut allanut pisariaqartitsinerusunut atortalissavagut.
Silaannakkut
angallannikkut tunngatillugu Attaveqarnermut Naalakkersuisup saqqummiussaa
soqutigigakku oqaaseqarfigilaarniarpara.
Aningaasanut
Inatsisissami 2003-imut Royal Greenland 107 mio.kr.-ninik
tapiiffigineqartussaavoq. Kisianni ullumimut naleqquttuusorinngilara uanga
pingaartumik avalliunerusuni sermersuaq itivikkutsigu 14.000 kr.-inik
akiliisarpugut bilitsimut. Issaannannguaq radiuukkut tusalerparput
Danmarkimunngooq 5.000 kr.-nilerlugu bilitsit akeqasapput, tamakkua nunatsinnut
kiffartuussinermut naleqqutinngillat, taamaattumik ukiamut Attaveqarnermut
Naalakkersuisup ullumikkut tapiissutit taakkua tunniuttakkavut innuttaasunut
pissarsissutaanerannut ujartuinissaa assut pissanganassaaq.
Aamma
ungasinngitsukkut Grønlandsfly atini allanngortippaa, qalipatsiterlugit
timmisartuutini immikkut mærkilersorlugit, tamakku aamma pinngitsooratik
aningaasanik naleqarput. Aningaasameernitsinni tamakku aamma ilanngulugit
nalilersoqqissaartariaqarpagut pisariaqanngikkaluarpoq atimik allannguinissaq,
tamatigut taamaaliorneq innuttaasut aningaasaataannik aamma
atorluaanerunngimmat.
Taavalu
Attaveqaqatigiinnermut tunngasunik immikkut Naalakkersuisut nalilersueqqinnissamik
saqqummiussaa soqutigivarput Atassut-mit. Assersuutigalugu uagut politikkikkut
suliaqartugut innuttaasut peqatigalugit aamma sunik kissaateqarnersut qanimut
tikillugit ataatsimeeqatigisarnerini soqutigisaqarpugut. Ungasinngitsukkut Alluitsup-Paaniikkatta
telefoni tigumiaraluartillugu attaveqarsinnaanngilagut nunatsinnut,
ilaquttatsinnulluunniit, tassagooq 500-it sinnilaarlugit inoqarmat
Tele-minngaanniit kiffartuunniarneqanngilaq. Kangamiuni 600-it angullugit
inullit tikikkutta arlaannut atorniaqattaanngikkutta, arlannut
attaveqarsinnaanngilagut politikkikkut suliatsinnut tunngasumik, uffa
nalunngikkaluarlugu aamma illorsualiornikuuvugut taamannak millioninik
akilimmik. Isumaqarpugut sapinngisamik innuttaasut pisariaqartitaat tunngavigalugit
ineriartornermut aamma innuttaasut amerlanerpaat peqataatinneqarnissaat aamma
sulinermi iluarsaaqqinnissami ilanngullugit nalilersuiffigineqartariaqartut.
Tassaana
aalisarnermut tunngasumik Naalakkersuisup angallatinik iluarsaaqqinnermut
ilanngullugu saqqummiussarput tunitsivinnut aamma iluarsaaqqinnermik
tapeqartinneqarnissaanut oqaasiat qujarupparput, sumummi iluaqutaassava
kattussuukkutsigit taakkulu pisaat tamakkiisumik tulaanneqarsinnaanatik.
Taamaattumik aamma aningaasat kattussuunnermut tunniussukkagut taamaalillutik
aamma tamakkiisumik iluaqutigineqarsinnaanngimmata.
Taava
umiarsuaatilissuit angallassinerannut tunngasumik oqaatigisagut aamma avannaani
nunatta allanngoriartornera uppernarsineqarmat qujaruppara. Ullumikkut
angallasinikkut atortorissaarutit imak pitsaatigilerput, sikut qaqugukkut ulloq
suna nunap avannaanut takkutissanersut, siku qanoq issutiginersoq ullut tamaasa
1-tiimikkaarlugu piumagaanni malinnaaffigineqarsinnaavoq. Taamaattumik aamma
Inuit Ataqatigiit oqarnerattut aallaqqaasiinermi silarput unigani ingerlagami,
malersorlugu pinianngitsunut nukillaarutaalerumaarpoq. Isumaqarpunga aamma
taanna eqqortuusoq ullumikkut ilaatigut nunatsinni kiffartuussinermut silamik
ilaatigut aamma malinnaavallaannginnerup kinguneranik innuttaasut
pissaqarniarnerat, nioqqutissanik pingaartumik aamma nioqqutissat akimikkut
pitsaasut piumavagut, taakkulu aamma nutaajutillugit assartorneqartarnissaat
pisariaqarmat.
Taavalu
naggataatigut Tele Greenlandip kiffartuussinera eqqarsaatigalugu pitsaalluinnartutut
ullumikkut nalilerlugu taamaallaat mobilit eqqarsaatigalugit, tassa
nunaqarfinni atoqqusaanngitsutut nalilerneqarnerat ingerlatseqqinneqarnissaa
taassuma isumagisussaagakku oqaatigissavara.
Taavalu
aamma ullumikkut timmisartunik marlunnik peqarpoq ilaatigut eqqarsaatigisarpara
ullumikkut timmisartuuteqarpugut nammineq uagut piginneqataaffigisatsinnik,
aamma 100%-imik Tele Greenland pigivarput. Ilumut pisariaqarpa sanileriillutik
arlaat ilaasunik ulikkaarani, lastialu ulikkaarani aappaa allakkanik usilluni
sanileriillutik ingerlaartut. Tamakku aamma nalilersoqqissaartariaqarparput
marlunnik timmisartut ingerlanneqarnerat, olie, pilot assigisaallu aamma
aningaasanik naleqarmata. Taamaattumik soqutiginarpoq attaveqarnermut tunngasut
nalilersoqqissaarneqartussaammata. Minnerunngitsumillu aamma silaannakkut
allakkanik ilaasunillu angallassinerup tamakkiisumik nalilersorneqarnissaanut
pissangalluta maani peqataanissarput utaqqissavarput.
Qujanaq.
Jonathan
Motzfelt,
ataatsimiinnermi aqutsisoq, Inatsisartuni Siulittaasoq, Siumut.
Oqallinneq
naammanialissavarput aamma Naalakkersuisut oqaaseqaqqinniarlutik aamma
aallartipput. Oqaatigissavara saqqummiussineq taamak ittuni soorunami tamatigut
silittumik oqallisigineqartarput, kisianni aamma saqqummiussineq Naalakkersuisup
akissuteqarnissaa taanna naatsorsuutigineqartarpoq.
Maannakkut
oqaaseqassaaq Aalisarnermut Naalakkersuisoq.
Simon
Olsen, Aalisarnermut
Naalakkersuisoq, Siumut.
Aap
tassaana Inuit Ataqatigiit oqaaseqartuata toqqarlunga aperimmanga qanoq aalisariutit
pilerinarsarniarnerikka. Tassa imaappoq ullumikkut ukiuni kingullerni
inuusuttut aalisartut angallatinut nutaanngitsunut atortorissaanngitsunut
inuttaatinniarnerat assut ajornakusoorpoq. Taanaavorlu aamma
aningaasarsiornitsinni ilinniarnitsinni ilaatigut nanertuutinut ilaasoq.
Taamaammat angallatit nutaanngorsarnerisigut, pitsaanerusumik
atortoqalernerisigut aammalu najoruminarsarneqarnerisigut taava inuusuttagut
pitsaasumik atugassaqartillugillu , peqqissaq aamma isigalugu
ingerlanneqarsinnaanngussammata. Tassaniippoq vitamini pitsassuaq,
vitamiinipalaajunngitsoq.
Piniarnermut
tunngatillugu aamma ilumoorpoq imaannaanngilaartuuvoq. Piniarneq tassa
massakkut ilisimalikkagut tassaapput arferup neqaa Japan-imi kuultimilluunniit
akisuneruvoq, kisianni periarfissaqanngilagut inatsisit niuernermullu tunngasut
atuuttut assigiinngitsorpassuartigut mattusimammatigut. Tamakku
aqqutissarsiorsinnaanerisigut sapinngisamik pikkoriffeqarlutalu
putusiuisinnaasariaqarpugut.
Qujanaq.
Finn
Karlsen, Inuussutissarsiornermi
Naalakkersuisoq, Atassut.
Qujanaq.
Naatsunnguamik.
Tassa
aatsitassarsiornermut tunngatillugu aamma soorunami inuutissarsiornermut
annertuumik attuumassuteqarmat, taanna massakkut aatsitassarsiorneq
eqqarsaatigalugu aamma nunatta avataaninnganniit soqutigineqaleriartuinnarpoq
annertunerusumik suli soqutigineqarnera alliartorpoq. Taamaammat
aatsitassarsiorneq eqqarsaatigalugu aamma inuutissarsiutinut
siuarsarneqarnissaanut periarfissanik tunisisinnaanera eqqarsaatigalugu assut
isumalluarnartutut oqaatigineqarsinnaavoq.
Aamma
olie-siornermut tunngatillugu massakkut soqutigisaarukkunnarluarpoq, kisianni
massakkut soqutiginartorujussuarmik saaffiginittoqarpoq olie-mik
qillerinissamut tunngatillugu maani, taavalu tassunga tunngatillugu Anthon
Frederiksen-ip oqaatigisaanut oliesiornermut aningaasat atortakkavut
ilaaluunniit imermut tunisassiornermut atortuugaluarutsigit, tassunga
tunngatillugu tassa landskarsiminngaannit akilertaraluarutsigit immaqa
taamaasiussagaluarpugut. Qillerineq ataaseq millionerparpassuarnik
akeqartarmat, uagut akilerneq ajoratsigu, akilertaraluarutsigu immaqa
olieqanngippat nalunngikkutsigu imermik immaqa tunisassiornermut nammineq
akilertartuugutsigu tassunga immaqa atorsinnaassagaluarparput.
Kisianni
tassa nammineq akilerneq ajoratsigu oliesiorneq annertoorujussuarmik akeqarami.
Una
oqaatigilaassavara namminersortunngorsaaniaannarluta
namminersortunngorsaanianngilagut, soorunami kiffartuussinerit
pitsaanerusunissaa anguniarlugu aamma nammineq ingerlatsisinnaasut massakkut
ujartorparput, aamma arlariinnik piumassuseqartunik massakkut ? malunnarami
massakkut pingaartumik nunaqarfimmiut tamakkununnga soqutiginnikkiartornerat
saqqummeriartortoq, taamaammat aamma periarfissinneqarnissaat uanga
isumaqarpunga Naalakkersuisooqatigiinninngaanniit pitsaasuusoq, aamma tassani
Nuka aamma tassani peqataavoq arlalippaalukasinni nunaqarfinni, aamma ilaatigut
illoqarfinni peqataavoq.
Taamaammat
namminersortuiit tassani pineqanngillat, Nuka aamma tassani peqataavoq.
Una
Neqi-mut tunngatillugu tassa Demokraatimi taamak oqarput, kisianni tassa
Demokraatit suli maani oqanngitsulli uagut taanna suliarivarput, tassa
oqareerpunga isumaqatigiissuteqarpugut april aallartilaarnerani savaatillit
oqaloqatissagigut.
Aamma
inuutissarsiornermut attuumassuteqartorujussuaq maannakkut avannaani sikusartut
eqqarsaatigalugit ukiuni kingullerni killeqartarami umiarsuarnik assartuineq,
taava aamma massakkut Royal Arctic Line oqaloqatigineqareerpoq pitsaanerusumik,
massakkut sikusarnera kinguariartuinnarmat imaluunniit sikussaarput ilaatigut
illoqarfiit, taamaammat aamma tunisassianik assortuineq massakkut
pitsaanersumik ingerlannissaa anguniarlugu oqaloqatigineqarpoq.
Aamma una
oqaatigisaa, tassami taamatut aamma paasineqarsinnaavoq immaqa qujasaatigigaa
aningaasat amerlanerusut inuussutissarsiornermut immikkoortinneqassasut,
kisianni uanga oqarpunga Naalakkersuisutut taanna anguniassavara,
Naalakkersuisut apeqqutaapput qanoq oqassanersut ? uanga nammineerlunga
soorunami naalakkersuisutut sulissutigissavara, kisianni tassa uanga
kisimiinnginnama.
Qujasaatigiinnarlugu
taamatut paasineqassaguni taamatut paasineqarniarli ? ajunngilaq, kisianni
aamma puisip neqaanut tunngatillugu tassa ilumut iluatsinnartorujussuaq
piniartuinnaat eqqarsaatigalugit massakut sikusarnera annikilliartuinnarmat,
aamma soorunami ilungersunartorujussuuvoq piniartut eqqarsaatigalugit
aningaasarsiornerat. Kisianni aamma tassunga tunngatillugu massakkut
eqqarsaateqarnerulertariaqarpugut piniartoqarfiit eqqarsaatigalugit, soorlu piniarnerinnavimmik
inuutissarsiuteqarfiusut Avanersuakkut, Illoqqoortoormiukkut eqqarsaatigalugit
aamma aalisarnermut ikaarsaariarnissamut massakkut pimoorussinerullutik
misissuisariaqarpugut. Isumaqarpunga akilersinnaannerulluartumik
ingerlanneqarsinnaasoq taamaasiorutta.
Taava
sanalukkanut tunngatillugu aamma taanna eqqaaneqarmat Josef
Motzfeldt-iminnganniit, aamma taanna oqaloqatigereerpara massakkut
pilersaarusiortussaavugut, Josef Motzfeldt-ip oqarneratuut ukiamut
saqqummiisariaqartugut, taanna soorunami naammassiniartariaqassavarput
oqaloqatigereernikuugakku sanaluttarnermut siunnersorterput.
Una aamma
puiguleraluarpara, tassa Atassut-ip oqaatigisaa avammut niuernerput
eqqarsaatigalugu, avammut niuernitsinni avataaninngaanniit isaatitagut
amerlanerusariaqartut avammut niuernermut. Kisianni tassa imaasiallaannaq
pisinnaanngitsoq oqaatigissavara. Massakkut tunisassiat avammut
annikutsuaraannaammata avataaninngaanniillu eqqussukkagut
annertoorujussuummata, kisianni tassa siunissami soorunami angujartuaarneqartariaqarpoq
tamanna.
Jonathan
Motzfelt,
ataatsimiinnermi aqutsisoq, Inatsisartuni Siulittaasoq, Siumut.
Allanik
oqaaseqarumasoqanngilaq. Taamaasilluni oqaluuserisassaq taanna naammassivoq.