Oqaluuserisassani immikkoortoq 31-3 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut arfersaneq pingajuat, pingasunngorneq 2. april 2003 nal. 13:25.
Johan
Lund Olsen, Inuit
Ataqatigiit.
Ja,
qujanaq.
Tassa
peqqussutissatut siunnersuutip pingajussaaneerneqarnissaannut atatillugu,
Inatsisartut oqaatigineqareersutuut Inatsisartut Attaveqaqatigiinnermut
Ineqarnermullu Ataatsimiititaliaat Inatsisartuni martsip 26-ani
qinnuigineqarsimanertik malillugu ullumi ilassummik isumaliutissiissuteqarput.
Inuit
Ataqatigiit ataatsimiititaliami Demokraatit ilaasortaatitaat peqatigalugu,
tassani ikinnerussuteqarluta oqaaseqaateqarpugut. Ilutigalugulu ullumikkut
pingajussaaneerinninnissamut atasumik siunnersuutip § 4, immikkoortoq arferngannut,
kiisalu § 5-imut aamma allannguutissamik siunnersuuteqarluta.
Inuit
Ataqatigiit soorunami neriuutigivarput allannguutissatut siunnersuut
agguaanneqareersimasoq Inatsisartuni amerlanerussuteqartunit
tunuliaqusersorneqarumaartoq.
Taamaaliortoqanngippammi
inatsisiliortutuut kattuffiit sulisitsisullu akornanni ukiorpassuanngortuni
isumaqatigiinniutigisartagaannut aamma akuleruttunngortussaassaagut.
Kattuffiit
Peqqissaasut Kattuffiat, Atorfillit Kattuffiat, PIP tassa Perorsaasut kiisalu
IMAK tassa Ilinniartitsisut Kattuffiat, martsip 28-ani Attaveqaqatigiinnermut
Ineqarnermullu Naalakkersuisumut kiisalu Inatsisartut Attaveqaqatigiinnermut
Ineqarnermullu Ataatsimiititaliaannut saaffiginnissuteqarput.
Saaffiginnissummi
erseqqissarneqarpoq peqqussutissatut siunnersuummi aalajangersagassat ilaat
sulisitsisut sulisullu akornanni ukiorpanngortuni
isumaqatigiinniutigineqartarsimammata, tamanna peqqussusiorniarnermi
sillimaffigeqqullugu. Ajornanngippallu taakku siunnersuummik aamma
peerneqaqqullugit.
Allatut
ajornavitsinnagu Inuit Ataqatigiit sulisitsisut sulisullu kattuffiisa akornanni
atugassarititaasut pillugit isumaqatigiinninniartarnerannut inatsisiliornikkut
akulerukkusuttanngilagut.
Peqqussutissatut
siunnersuummi § 4, immikkoortoq arfernganni kiisalu § 5-imi aalajangersakkat
maanna inatsisinngorlugit ilusilerneqartussanngorput. Tamannalu
akuersaaruminaatsipparput oqaatigeriikkatsituummi isumaqatiginninniutaasartut
ataqqerusuttarpagut.
Kattuffiit
taaneqareersut saniatigut ippassaq ilinniagartuut kattuffiat, tassa
Akademikernes Sammenslutning i Grønland, inatsisiliuussinissaq tamanna
akerlilerlugu Naalakkersuisumut kiisalu Ataatsimiititaliamut aamma
saaffiginnissuteqarput.
Taamaattumik
ilungersortumik kajumissaarutigissavarput Inuit Ataqatigiit, Demokraatillu
allannguutissatut matumani siunnersuutigisaannut taasilernissami ilaasortat
allat aamma akuerseqataaqqullugit. Tassami Naalakkersuisup ataatsimiititaliamut
martsip 28-ani allagarisaani ullumikkullu saqqummiussassaani aamma
nassuerutigineqareerpoq, apeqqutit matumani pineqartut tassaammata aamma
isumaqatiginninniutigineqartartussaagaluit.
Attaveqaqatigiinnermut,
Avatangiisinut Ineqarnermullu Naalakkersuisoq martsip 28-ani ilaatigut ima
allappoq.
Issuaaneq
aallartippoq:
Kattuffiit
taakku sisamat oqaaseqaatitut nassiussaata sukumiisumik
naliliivigineqareerneratigut peqqussutissatut siunnersuutip
pingajussaaneerneqarnissaata kinguartinneqarnissaa pissutissaqarsorinngilara.
Naliliivunga oqaaseqaatit tamarmik sulisitsisut sulisullu akornanni
nalinginnaasumik isumaqatigiinninniutigineqartartut ilagigaat.
Issuaaneq
naavoq.
Ullumi
tamanna uppernarsaqqillugu tassa Naalakkersuisup oqaaseqaqqinnissamini taava
aamma taanna uppernarseqqillugu imaattunik oqaaseqarfivaa.
Taanna
issuarpara:
Oqaaseqaatit
tiguneqartut tamarmik sulisitsisut sulisullu akornanni nalinginnaasumik
isumaqatiginninniutigineqartartunut tunngapput.
Issuaaneq
naavoq.
Tassa
paatsuugassaanngitsut. Inuit Ataqatigiit soorunami aamma uagut kissaatigaarput
utaqqiisaagallartumik ineqartitsisarnermut aningaasartuutit
appartittariaqarigut.
Kisiannili
isumaqanngilagut aningaasartuutit taamaallaat ikilisarneqarsinnaasut
periarfissaq siulleq atorlugu sulisut kattuffiillu
pisinnaatitaaffiiarnerisigut.
Amerlanernik
inissialiortitsisariaqarpugut, sanaartornermut iluarsaassinermullu
aningaasaateqarfik asuli aningaasanik atugassaraluanik immiinnaqinagu, aammalu
inissianik privatimik attartortitsisartut eqqarsaatigalugit, peqqussusiornikkut
ineqartitsisarnerinut akiliutit qaffasinnerpaaffissalerneqarnerisigut.
Periarfissat
taakku aqqutigineqarsinnaasut misilinneqaqqaartariaqarput sulisitsisut
sulisullu akornanni isumaqatigiinninniutissaagaluit maannakkutut
inatsisinngorlugit ilusilerneqalertinnagit.
Taamatullu
oqaaseqareerluta nalunaarutigissavara allannguutissatut siunnersuut
akuersortumik Inuit Ataqatigiit taaseqataaffigissagatsigu, kingornalu tassa
kingusinnerusukkut peqqussutissatut siunnersuut ataatsimut tamaat
taasissutigilerutsigu taanna akuerseqataaffigiinnassagatsigu.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni
oqaaseqassaaq Palle Christiansen, Demokraatit. Taanna oqaaseqareerpat
Ineqarnermut Naalakkersuisoq.
Palle Christiansen, Demokraatit.
Demokraatit tungaaninngaanniit makkuninnga oqaasissaqarpugut.
Ataatsimiititaliap isumaliuutissiissutaanut. Ataatsimiititaliap imaluunniit qularnaveeqqusiissutip akilersorneqartarneranut akissaataajaasartut pillugit ataatsimiititaliami amerlanerussuteqartut isumaqarput, tamanna akissaajaatigineqartinneqartariaqanngitsoq.
Demokraatit taamatut isumaqanngillat, aningaasanik taarsigassarsisarneq akeqarpoq. Tamanna tamanit akuerisaavoq. Taarsigassarsinissamut periarfissanut assersuuserneqarsinnavoq.
Tassa bankimut taarsigassarsinertut, tamatumalu kingornatigut akiliutigitittakkanik ernianillu akilersuinissatut. Allannguutissatut siullermi siullermik Naalakkersuisut Demokraatitut isumaqarsimagaluarput, massakkulli isummaminnik allanngortitsisimallutik.
Isummamik allanngortitsinermut tunngavilersuutit inissaminiitittariaqarput. Tamannarpiaavorlumi suliamut uani Naalakkersuisut tungaannit pisimanngitsutut Demokraatit isumaqarfigisaat. Naalakkersuisut tunngavilersuutigaat pissaqarnerusut nammataqarnerusariaqartut.
Tamatuma saniatigut Naalakkersuisut akissuteqaamminni oqarput, inuit isertitaqqortuut qularnaveeqqusiisut ingerlatiinnarlugu tamakkerlugu akilersinnaasariaqaraat. Aammalu nammagassaq attartortumut allamut pissakinnerusumullu tunniutiinnartariaqanngikkaat.
Tunngavilersuutini taakkunani sunarpiaq-una isumaqatigineqartoq? Isertitat qaffasissut Naalakkersuisut isumaat naapertorlugu qanoq qaffasitsigigamik? Akissakinnerusut akiliutigitinneqartartunik ernianillu akiliisinneqartassanngippata, taava imaattariaqassaaq allaffissornermut aningaasartuutaanerusartut allatut iliorluni aaneqarsinnaalertariaqassallutik.
Tamatumanilu kisimi pisinnaavoq attartortut tamakkerlugit aallerfigineqarnerisigut, tassa ininik attartornerit akiliutillu qaffanneqarnerisigut. Aningaasanik amigaataasartussani tamatumuuna Naalakkersuisut tunngavilersuutaa imaluunniit aaqqissuutiginiagaa tassaavoq, isertitaqqortuut tamakkiisumik ingerlaannaq akiliisarnissaat.
Ilisimasakka naapertorlugit tamakkiisumik ingerlaannaq akiliisarneq immikkut akissaajaatissaqarfiusanngilaq. Tassa taamaaliornikkut akiligassaq tamakkerluni akilerneqartarmat taamaattumillu akilersugassaasarani taarsigassarsiviusussaasaraniluunniit.
Kingulliit taaneqartut Naalakkersuisut akissuteqaataani aammattaaq akilersuisinnaanissamut periarfissanik piaaffigineqartussanngortinneqarsimapput. Taamaalillutillu Naalakkersuisut ilimaniorsimavai inuk isertitaqqortooq aammattaaq aningaasaaterpassuaqartussaassasoq, tamatigullu taamaattanngilaq.
Taamaattumik inuit taakkua aamma allatuulli aammalu allatut atugassaqartitaallutik naligiimmik akilersuisarsinnaanissaminut periarfissitaasariaqarput. Naatsumik oqaatigalugu kikkut tamarmik nioqqutissaq ataaseq assigiimmik akilertariaqartarpaat.
Demokraatit maluginiarpaat oqaluuserisaq matuma oqaluuserineqarnissaanik inatsimmut attumassuteqartumut piffissaagallartillugu tusarniaavigineqarsimanngitsut.
Tusarniarneqaramilli tamakkiisumik akissuteqarnissaminnut naammattumik piffissaqartitaasimanngillat, attuumassuteqartut tassaasut sulisartut 3000-inut sinniisuusut Naalakkersuisut eqqumaffigeqqusimavaat allannguutissanut siunnersuutip siusinnerusukkut pisinnaatitaaffiinut angusimasatik ajorsajallaateqartissagaat.
Malugalugu pisinnaatitaaffiit taakkua anguneqarsimapput Namminersornerullutik Oqartussat akissarsiat isumaqatiginninniutigineqarneranut atatillugu.
Demokraatit Naalakkersuisunut tamarmiusunut tikkuarusuppaat sulisartut inatsisitigut ajorsiallaatigitinneqartussat taamaallaat matussiivigineqarsinnaammata tulliani akissarsiat isumaqatiginninniutigineqassappata, taamatut annertuumik pitsanngoriaateqartitsinikkut.
Allatut oqaatigalugu massakkut qinigassatta arlaat tassaalerpoq pitsaasumik inatsisiliussanersugut imaluunniit akisuumik isumaqatigiissusiorumaarnersugut.
Inatsisiliortut allatut Demokraatinit isumaqarpugut toqqagassarput tassaasariaqartoq pitsaasumik inatsisiliornissaq. Attuumassuteqartoq tusarniaavigineqartutut kingulliit tikkuaavigisaat pissarsiniartarneq tigummiaannarniartarnerlu allannguutissatut siunnersuutip ajorsiallatsissagai.
Demokraatini isumaqarpugut taama mianersoqqussutaalluinnartariaqartoq, atorfiutitsinnik ilinniarluarsimasunik pissarsiniartarneq ajornartorsiutigereerparput, taamaattumillu allannguutissatut siunnersuut ajornerulersitsinissamut ilapittuutaasariaqanngikkaluarluni.
Marlunngornermi aprilip aallaqqaataani 2001-imi Attaveqatigiinnermi Ineqarmut Ataatsimiititalimut ilaasortat aammattaaq tusartinneqarput Kalaallit Nunaanniit ilinniagartuut Kattuffiat aamma tusarniaavigineqarsimanngitsoq. Tusarniaavigineqartussatut attuumassuteqartup taassuma Demokraatit isumaat naapertorlugu tusarniaavigineqarluarsimagaluartup sinniisuuffigisai ilaasortat 600-t
Mikael Petersen, Attaveqarnermut, Avatangiisinut Ineqarnermullu Naalakkersuisoq, Siumut.
Qujanaq.
Oqallinnermut peqqussutissatullu siunnersuutip aappassaaneerneqarneranut oqaaseqaatinut, inatsisartunut ilaasortat Naalakkersuisut sinnerlugit qutsavigaakka.
Aappassaaneerinninnermi neriorsuutigaara sulianut atatillugu kattuffiit sisamat tassalu Peqqissaasut Kattuffiat, Atorfillit Kattuffiat, PIP, aammalu IMAK nalunaarutigineqartut malillugit attartortunut 3000-t missaaniittunut sinniisuusut, tallimanngornermi martsip ulluisa 28-anni tassa ukioq manna nalunaaqutaq 16, tassa sisamanut nallertinnagu allaganngorlugu oqaaseqaatiminnik tunniussisimassappata, taakku Naalakkersuisunit oqaluuserineqassasut.
Oqaatigissavara peqqussutissatut siunnersuut SIK-mut attartortunut 9000-t sinneqartunut sinniisuusumut siusinnerusukkut tusarniaassutigineqareersimammat.
Tallimanngornermi martsip ulluisa 28-anni ukioq manna Naalakkersuisut tiguaat kattuffiit sisamat takku allaganngorlugu oqaaseqaataat. Aamma inatsisartut Attaveqaqatigiinnermut Ineqarnermullu Ataatsimiititaliaannut nassiunneqarsimasup, oqaaseqaatit tiguneqartut tamarmik sulisitsisut sulisullu akornanni nalinginnaasumik isumaqatigiinniutigineqartartunut tunngapput.
Kattuffiit sisamat akissummini ilaatigut oqaatigaat, inissiamik angissutsimigut pitsaassutsimigullu naatsorsuutigisanik eqquutsitsinngitsumik tigusiumanngissinnaatitaanertik annaassallugu. Aammalu atugassarisatik annertuumik ajorteriaateqassasut inoqutigiit amerlassusaannut naleqqiullugu, inimik ataatsimik sinniilluni ineqarsinnaatitaanerup atuukkunnaarneratigut.
Naalakkersuisut erseqqissassavaat inatsisartut arlaleriarlutik Naalakkersuisunut peqqussutigisarsimammassuk sulisunut inissamik innersuunneqarsinnaatitaasunut pingaartumik ineqartitsinermut aningaasartuutit, amerlavallaarujussuartut apparteqqullugit.
Aningaasartuutit tamatumunnga 2002-mi 26 million kr-nit missaaniipput. Peqqussutissatut siunnersuutip uuma sulisorisat pingaartumik inigitittakkani sivisuallaamik najugaqartitaasimannginnissaat, imaluunniit najugaqartitaasannginnissaat pilertornerusumilli sulisutut namminerisamik initaartinneqartalernissaat, nalinginnaasumillu inuuneqalernissaat ilaatigut qularnaassavaa.
Kattuffiit taakku sisamat ilaasortamik inigisaasa immikkut pitsaassuseqarlutillu angissuseqarnissaannik, tamatumanittaaq sumiiffia qanoq ittuunissaalu pillugit piumasaqaateqarsinnaanerat Naalakkersuisut tupigusuutigaat.
Kattuffiit taakku sisamat ilaasortamik attartortunit allanik pitsaanerusumik ineqarnermi atugassaqartitaanissaminnik inatsisikkut aalajangersakkamik piumasaqaateqarsinnaanissaannik kissaateqarnerat isorisariaqartoq Naalakkersuisut isumaqarput.
Tassami inuit 300-t missaat inissamik innersuunneqarsinnaatitaasut inissamik piumasarisinnaasamittut ittuunngitsumik neqeroorfigineqarnertik pissutigalugu, assersuutigalugu inissiamik sisamanik initalimmi qaammammi ataatsimi sivisunerusumik pingaartumik najugarnerat, pigallartumik najugaqarnerat qaammammut 5 million kr-noortumik nunatta karsianut aningaasartuutaasassaaq.
Taamaattumik inuiaqatigiit aningaasaqarnerat eqqarsaatigalugu pigallartumik najugaqartitsisarnerit sapinngisamik sivikinnerpaanngorlugit killiliiffigineqartariaqarput.
Tapiliullugu oqaatigineqarsinnaavoq pigallartumik inigitittakkanut tunngasut imaluunniit sulisunik pigallartumik inissiisarnerit attartorneq pillugu peqqussummi maleruagassani pineqartunut ilaatinneqarsinnaasarsimammata, ilaatinneqanngisaannarsimammata.
Naalakkersuisut inatsisartunut ilaasortanut inassutigissavaat, akisussaassuseqarnertik takutissagaat siunnersuullu saqqummiunneqartoq isumaqatigiillutik akuersissutigissagaat, taamaaliornermikkullu kattuffinnut taakkununnga sisamanut nalunaarlugu inissiamik innersuussinermi kikkut tamarmik naligiimmik pineqartussaasut. Tamatumani pineqarlutittaaq utaqqisutut allattorsimaffittut qulaatiinnarlugit sulisunut inigititassamik tunineqarsinnaasut.
Naggasiullugu oqallinnermut aammaarlunga qujallunga taamatut oqaaseqarluta matumuuna Naalakkersuisut inassutigaarput, inissianik attartorneq pillugu inatsisartut peqqussutissaata allanngortinneqarneranik inatsisartut peqqussutissaattut siunnersuut, maannakkut saqqummiunneqarnermisut iluseqarluni akuersissutigineqassasoq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Taasitinnata aamma oqaaseqarumasoqarpoq allamik, Anthon Frederiksen, Kattusseqatigiit.
Anthon Frederiksen, Kattusseqatigiit.
Inissianik attartorneq pillugu Inatsisartut peqqussutaata allanngortinneqarnissannik siunnersuutip siullermeerneqarnerani Kattusseqatigiinniit oqaaseqaatigisakka innersuussutigalugit, inatsisartut Attaveqaqatigiinnermut Ineqarnermullu Ataatsimiititaliaata isumaliuutissiissutaa imaattumik oqaaseqarfissavara.
Siullermik Kattusseqatigiinniit pingaartitatta ilagivaat, atuisunik innuttaasunillu tusarniaasarnissat aammalu atuisut isumaasa aalajangiinnginnerni aamma nalilersorneqarluartillu aalajangigassanut assigiinngitsunut ilanngunneqartarnissaat.
Taamaattumik Kattusseqatigiinni pingaartilluinnarparput innuttaasut, tusaaniarlugit aalajangerniartarnerup aamma timitalimmik ingerlanneqartarnissaa pisassasoq.
Taamaammallu ataatsimiititaliami ikinnerussuteqarlutik oqaaseqaateqartut tassalu Inuit Ataqatigiit aammalu Demokraatineersut, matumani aalajangernissami isumaqatigalugit allannguutissatut siunnersuutaat akuersaarlugu taaseqataaffigissagakku nalunaarutigivara.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq Palle Christiansen, Demokraatit.
Palle Christiansen, Demokraatit.
Tassa Naalakkersuisut oqaatigaat tusarniarneqartut sisamat suli, allakkanik akissuteqarsimasut, taanna iluamik immaqa akissuteqarnerunngilaq. Tassami taakkua 48 timinnarnik piffissalerneqaramik. Sinneri sapaatip akunnerinik sisamanik piffissalerneqartut. Tamanna, taamaalillunilu aamma eqqarsaatigilluagaasumik akissutisinissaminnut piffissaqartinneqaratik.
Tassanilu utaqqiisaagallartumik inissiigallartarneq allaannginnami taakkua malersorneqaannassasut allamut nuuinnarneqartassasut. Demokratillu tungaaninngaaniit allamik siunnersuutissaqarpugut. Tassa inissianik amerlanerusunik sananiaritsi taava ajornartorsiutit ajunnginnerussagaluarput. Qanittukkut inissiat 71-t sananeqartussaagaluit tunuartiinnarneqarput.
Taamaalillutik tamakkua vagantboligini inissiaagallartuni najugaqartut ajornartorsiutigineqarnerat qaangerneqassagaluarpoq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tullinnguuppoq Mikael Petersen, Attaveqaqatigiinnermut Ineqarnermullu Naalakkersuisoq.
Mikael Petersen, Attaveqaqatigiinnermut Ineqarnermullu Naalakkersuisoq, Siumut.
Isumaqarpunga Demokratit oqaaseqartuanut erseqqissaatigilaartariaqartoq uani siunnersuummi allannguutissatut siunnersuummi Demokratit Inuit Ataqatigiillu allannguutissatut siunnersuutaanni Ataatsimiititaliami ilaasortat siunnersuutaanni siunnersuutigineqartoq akuersissutigineqassappat Inatsisartuni tamanna inuiaqatigiit ataatsimoortumik soqutigisaannut annertoorujussuarmik allanngortitsisussaammat. Tassa kattuffinnut ilaasortat aalajangersimalluinnaqqissaartut imminut pineqarnissaminnut tassani aqqutissiuunneqartussaapput landskarsimut akisoorujussuarmik kinguneqartussamik.
Tamanna akerliulluinnarpoq siusinnerusukkut Inatsisartunut Ilaasortaasimasut piumasaqaataannut. Allaat siorna naatsorsuutit pillugit oqallinnermi kukkunersiuinermut ataatsimiititaliaq ersarilluinnaqqissaartumik taamanikkut Naalakkersuisuusunut piumasaqaatigaat aningaasartuuterparujussuit inissianik inissiigallartarnermut aningaasartuutaasut apparseqqullugit. Aammalu tamakkua sulissutigeqqullugit peqqussutit aqqutigalugit.
Isumaqarpunga tamakkua siusinnerusukkut piumasaqaataasarsimasut aammalu uumap inatsisissap imaluunniit peqqussutissap suliarineqarnerani tunngaviusimasut isiginngitsuusaaginnarlugit oqallinneq ingerlasariaqanngitsoq.
Aamma erseqqissaatigissavara ilami tulluartuunavianngilaq inissamik innersuunneqartoq oqarsinnaappat taanna inissaq tigunianngilara isikkivia ajormat. Taanna inissaq tigunianngilara sanilersassakka najorsinnaannginnakkit sanilerisinnaannginnakkit. Taanna inissiaq tigunianngilara uannut nalequtinngimmat arlaa tungaatigut.
Taamatut inuiaqatigiinnut peqqussusiortoqarsinnaanngilaq. Inuiaqatigiit ataatsimut isigalugit peqqussutit suliarineqassapput. Aamma immikkut pineqassagaanni kattuffiit ilaasortaaffiit aqqutigalugit sulinermut tunngatillugu atugassarititaasut pillugit isumaqatigiinniassagaanni soorunami tamakkua tupinnassanngilaq ilanngunneqartassappata.
Kisianni Inatsisartut uagut akisussaaffigaarput. Naalakkersuisut Inatsisartut akisussaaffigaarput inuiaqatigiit ataatsimut isigalugit peqqussutit suliarineqarnissaat.
Soqutigisat immikkuualuttumik tamaasa
peqqussusiuussinnaanngilagut. Tamanna
paatsiveerunnersuarmik kinguneqartussaammat. Aamma Demokratit oqaaseqaatiminni
oqaatigisaannut tunngatillugu oqaatigilaarusuppara nassuiaatit Naalakkersuisut
saqqummiunneqartut inatsisit peqqussutissatut siunnersuummi nassuiaataasut
soorlu atuarluaqqullugit.
Ila
avataaninngaaniit tusatsiakkat assigiinngitsut imaluunniit soqutigisaqaqatigiit
assigiinngitsut saaffiginnissutaat ataasiakkaarlugit tigullugit Inatsisartunut
peqqussusiornernut atulissagutsigit aamma ulorianarpoq. Soorunami
tusarniaasarnerit taakkua pingaartilluinnarpagut aamma nalilersuinermi taakkua
atortarpagut aamma atortassavagut. Aamma taamaattumik ukua kattuffiit
pineqartut tassa peqqissaasut kattuffiat atorfillit kattuffiat, PIP aammalu
IMAK Naalakkersuisut aalajangerput taakkua siunissami ineqarnikkut
inatsisiliornerni peqqussutiliornerni ilanngullugit
tusarniaaffigineqartalissasut.
Tassa aamma
aappassaaneerinninnermut erseqqissaatigereerpara tusarniaaffissat taakkua
Inatsisartuni piumasarineqartut naapertorlugit ingerlanneqarsimasut. Tassa
kinguarsaajuaannarsinnaanngilagut. Uani massakkut aalajangernissarput
pisariaqalerpoq aamma peqqussutissatut allannguutit ajunngitsortai ajunngitsorujussuupput
inuiaqatigiinni. Tassa huslejemut ineqarnermut akiliutitigut ilaatigut
qaffasissorujussuarmik akilersuisarnerit killilersorneqalissapput. Privatit
nammineq pigisatut attartortittakatit inissiat inunnut attartortinneqartut
qaffasissorujussuanngorlugit akilersortillugit attartortinneqartut maani Nuummi
immaqalu illoqarfinni allani anginerni aamma taakkua killilerneqassapput.
Agguaasseriaaseq
eqaallisarneqassaaq. Tassa pitsaaqutit assigiinngitsut uani anguneqalersut angunngitsoortissinnaangilagut
soqutigisat ataasiakkaanut sammisut piinnarlugit.
Taamannak
oqaaseqarlunga inassutigeqqissavara peqqussutissatut siunnersuut taamannak
isikkoqarluni akuersissutigineqassasoq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Pingajussaaneerinninnerummat
suleriaatsitsinni paragraf 31 takoqqussavara tassani paragraf 31-mi
immikkoortoq 2 malugeqqussallugu allannguutissatut siunnersuutit
isummerfigineqareeraangata Inatsisartut inaarutaasumik ilusilik naatsumik
oqaluuserisinnaassavaat tamatuma kingorna siunnersuut inaarutaasumik ilusilik
taasissutigineqassalluni. Tassa taamaaliussaagut erniinnaq.
Kisianni
taasitinnata Johan Lund Olsen aamma oqaaseqassaaq.
Johan Lund
Olsen, Inuit Ataqatigiit
oqaaseqartuat.
Qujanaq. tassa
Inatsisartut siulittaasut ilumoorluinnarpoq tassa Inatsisartut suleriaasiat
malillugu malittarisassaqarpugut erseqqilluinnartumik. Tassa
pingajussaaneerinnermi allannguutissamik siunnersuuteqartoqaraangat partiip
oqaaseqartua siullermik 15-minutsit iluanni oqaaseqaqqaarnissaminut
periarfissinneqartussaavoq aappassaaneerlunilu naggataarutaasumik 5 minutsit
aamma atorlugit oqaaseqaqqissinnaatitaalluni. Taanna kingulleq tassa taanna
maannakkut atussavara taava tassa naatsorsuutigaara taava taasiumaartugut.
Unaana
oqaaseqarfigilaarusukkiga Naalakkersuisup tassa attaveqaqatigiinnermut
ineqarnermut avatangiisinullu Naalakkersuisup Inatsisartut kukkunersiuinermut
ataatsimiititaliaata siornali uparuaasimanera innersuussutigimmagu una oqaatigerusukkiga
oqaaseqarnitsinni erseqqissarluinnaqqissaarparput uagut aamma kissaatigigipput
utaqqiisaagallartumik inissaqartitsisarnermut aningaasartuutit taakkua
appartinneqartariaqartut.
Tassami
ilumoorpoq Naalakkersuisup aamma saqqummiusseqqaaramik oqaatigimmagu
aningaasartuutivut taakkununnga annertuvallaarujussuarput ukioq 2002-mut 26
million kr-nit missaanniittut tassa utaqqiisaagallartumik ineqartitsisarnernut
atorneqarput. Taanna soorunami
isumaqatigaarput aningaasartuutit ikilisarnissaat soorunami taanna
akerlisorusunngilarput aningaasartuutit ikilisarnissaat soorunami taanna
akerlilersorusunngilarput aammalu peqataaffigerusupparput.
Kisiannili taava
apeqqutinngorpoq taavami aqqutit suut atorlugit taava taamaaliorniarsinnaavugut
Inuit Ataqatigiinninngaaniit uagut tikkuakkagut, takkuartukkagut marluupput
aamma Demokratit saqqummiussinerminni aamma periarfissap aappaat erseqqissumik
oqaaseqarfigivaat.
Aningaarsartuutivut
annikillisarsinnaavagut amerlanernik inissialiortitsinikkut ukiut kingulliit
inissialiortitsinerput unikaallassimavoq. Maannakkut inissialiorneq 200
millionit nalingannik taamaallaat annertussuseqarput. Ukiut siuliini 400
millionit qaangertarnikuugaluaraat.
Taamaammat
massakkut sanaartornermut iluarsaassinermullu aningaasaateqarfik asuli
aningaasanik atugassaraluanik immerneqaannarpoq maannakkullu kikkunnit tamanit
naluneqanngilaq tassani aningaasaateqarfimmiimmata ukiup nikinnerani 542
millionit tassa halv milliardit sinnerlugit inissialiornissanik
iluarsagassanillu aamma atorneqartussagaluit.
Taamaammat tassa
amerlanerniguna inissialiortariaqartugut kisianni taassumap saniatigut aamma
inissianik tassa privatinik attartortitsisartut peqqussut aqqutigalugu
ineqartitsisarnerannut qaammammut akiliutigisartagaat akiliutigitsittagaat
taanna qaffasinnerpaaffilerneqarsinnaavoq peqqussut aqqutigalugu. Tassa
taakkuukua periarfissat uagut Inuit Ataqatigiinninngaaniit
aqqutigineqarsinnaasutut innersuussutigeqqaarusukkaluarigut.
Maannakkut
kattuffiit sulisitsisullu akornanni pisinnaatitaaffit taakkua siullermik
aalluteqqaarnagit. Tassami pisinnaatitaaffiit ukua ataqqisariaqarpagut.
Taamaammanuna aamma Demokratit peqatigalugit allannguutissamik
siunnersuuteqartugut pisinaatitaaffiit inatsisiliornikkut
atorunnaarsinneqaannartarnerat taanna ileqqoq pitsaasuunngimmat. Taamaamma nuannaarutigaara aamma
Kattusseqatigiit oqaaseqartuata Anthon Frederiksenip maanna nalunaarutigimmagu
allannguutissatut siunnersuummut aamma akuerseqataaniarluni.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Attaveqaqatigiinnermut
Ineqarnermullu Naalakkersuisoq.
Mikael
Petersen,
Attaveqaqatigiinnermut Ineqarnermullu Naalakkersuisoq, Siumut.
Tassa
isumaqarpunga erseqqissaatigeqqilaartariaqarlugu allannguutissatut siunnersuut Inuit
Ataqatigiinninngaaniit Demokratinit saqqummiunneqartoq taanna
siunnersuutaasunut inatsisissatut aappassaaneerinninermi saqqummiuneqartumut
aammalu taamatut isikkoqartillugu pingajussaaneerneqarnissanik Inatsisartut
aalajangernerannut naleqqiullugu tassa sakkukilleriaataammat. Taanna tamatta nalunngilarput.
Kisianni
tassa taamatut piumasaqaatitigut sakkukilleriartitsinermik siunnersuuteqarnerup
kinguissai taakku taareerpakka qanoq annertutigisumik aningaasanngorlugit
naleqarsinnaasut. Aammalu inuit pineqartut assigiinngitsumik
sullinneqarnissaanut qanoq aqqutissiuussissasoq.
Taakkua
tunngavigisussussaavagut aalangernissami. Inatsisartut aalajangernissaminnut
aamma taakku tunngavigisussaavaat taakku nalilerlugit.
Taamaattumik
allanik peqqutissarsiorlunilu tunngavissarsiorusaarneq taanna tulluanngilaq.
Tassa Naalakkersuisunit akissuteqaat innersuussutigeqqissavara suut
patsisaanersut tassani taamaattumillu peqqussutissatut siunnersuut taamatut
isikkoqarluni naammssineqarnissaa uagut inassutigigipput.
Sanaartornermut tunngatillugu erseqqissaatigissavarput Naalakkersuisuninngaaniit ilaatigut Demokratit oqaaseqartuata aamma oqaatigimmagu 71 boliger tassa inissiat 71-sit Sanamut tunngatissat tassa taakku soorunami uninngatinneqarsimasut tamatta nalunngilarput aamma sananeqarnissaat noqqaassutaajuartoq. Erseqqissaatigissavara tamanna arajutsisimannguatsiarmassuk. Aamma finansudvalgimi ilaasortaatitaqarput Demokratit.
Nalunngilluinnaqqissaarpaat suliap taassumap ingerlanera. Massakkut saqqummiunneqareerput. Aviisini atuarneqarsinnaapput neqeroorfigineqarsinnaallutik sananissaat. Taavalu licetationi tassa suliariumannittussarsiuussineq aprilip 28-ani pissaaq. Soorunami apeqqutaapput sanaartornermi ingerlataqartut taakkua neqeroorutissaat qanoq ikkumaarnersut. Taava akuerineqarsinnaappata soorunami sanallutik aallartittussaassapput.
Aamma pissutsit assigiinngitsut tamatta nalunngilarput nalilersorneqartussaasut nutaamik tassunga tunngatillugu finansudvalgip aamma nalunngilluinnaqqissaarpai taakkua. Taamaattumik uunga peqqussutissamut tunngatillugu oqallinnermut pullanneqarnera eqqumiigilaarpara.
Soorunami sanaartorneq ingerlaqqittussaavoq aamma Naalakkersuisuni inissiani sanaartorneq pillugu oqaatigeerparput ukiuni tulliuttuni annertuumik qanoq iliuuseqarniarluta. Aamma Siumut Atassullu Naalakkersuisooqatigiinnissaminnut isumaqatigiissutiminni erseqqilluinnartumik isumaqatigiissutigaat sanaartornermi inissilialiortiterneq pingaartinneqassasoq. Tamanna tunngavigalugu politikkerput ingerlatissavarput. Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Jens Napaattooq
Siumut.
Jens
Napaattooq, Siumut.
Uani ilaatigut
uani nipeqaqqajaasoqarsinnaavoq inissaaleqineq qanoq anigorniassaneripput
oqaluuserigipput soorlu. Kisianni ininik attartortitsisarneq pillugu
peqqussutip allanngortinneqarnissaa eqqartorneqarpoq tassungalu ilutigalugu
ilaatigut uani eqqartorneqartuni inuit susassaqartut eqqartorneqarmata
tupinnartuunngilaq.
Assersuutigiinnarlugu
assersuut ataaseq taaneqarsinnaavoq sulisoq atorfininnini ilutigalugu
Qernertunnguani najugaqarnissaminut noqqaassuteqarsimavoq. Taannalu ukiut
marlunngortuni utaqqivoq. Peqqutigalugu atorfininnerminut ilanngullugu
ilaatigut piumasarisinnaagamiuk ini qanoq ittoq sumilu najugaqarnissani.
Imaassinnaavoq
ukiuni pingasuni taamaalilluni vagantimik attartorluni ingerlasoqartariaqartoq.
Tamakkulu Namminersornerullutik Oqartussat annertuumik aningaasartorfigivaat.
Taamaattumik politikkikkut siunnerfeqartoqarmat aningaasartuutit taakkua apparsarniarneqartariaqartut
tassa ilaatigut taamatut toqaannartumik qinnuteqarsinnaaneq
mattunneqartussaavoq. Assigiinngitsutigut peqqussutip uumap
aalajangiiffigineqarnerani.
Taamaattumik
aningaaasartuutit apparsaannarnagit aamma eqaallisaanikkut taamatut aaqqiisoqartussaavoq.
Taava aamma eqqaanngitsoorusunngilara Demokratit saqqummiussinerminni uani
qularnaveeqqusiinerup akilersorneqartarneranik pissakinnerusut
pissakinnerusunut tunngasut, tunngasumik akiliuteqarnatik
inissinneqartarnissaat aappassaaneerneqarnerani isumaliutissiissummik
isumaqataanatik oqariartuuteqarmata.
Kisiannili uani
inimi ataatsimiittarfimmi taasissutigigatsigit taperserlugu taasimmata. Taanna
isumaqarpunga erseqqissartariaqartoq. Taavalu ilaatigut avataaninngaaniit
puullaaqissutigineqartutullusooq illuni uagut tungitsinnut taaseqataanngitsutut
inissinneqarluni tusagassiuutitigut puullaaqissutigineqangaatsiarpoq.
Isumaqarpunga aamma taanna erseqqissalaartariaqartoq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Maannakkut
taasinialissaagut. Tassa siullermik agguaanneqareersoq Inuit Ataqatigiit
Demokratillu siunnersuutip pingajussaaneerneqarneranut atatillugu
allannguutissatut siunnersuutaat innersuussutigalugu siulliullugu
ikinnerussuteqartut siunnersuutaat taasissutigissavarput.
Maani
ataatsimiititaliami ikinnerussutillit allannguutissatut siunnersuutaannut
isumaqataasut qinnuigissavakka nikueqqullugit. 14-t. tamatumunnga akerliusut
qinnuigissavakka nikueqqullugit. 17-t akerliupput. Taamaalilluni
ikinnerussuteqartut siunnersuutaat akuerineqanngilaq.
Maannakkut
ataatsimiititaliami amerlanerussuteqartut siunnersuutaat taasissutigissavarput.
Amerlanerussuteqartut tassa Siumukkut Atassummeersullu, taamak ilusilimmik
saqqummiussaq ilusilimmik akuersissuteqartoqarnissaa inassutigaat. Tamatumunnga
isumaqataasut qinnuigissavakka nikueqqullugit. 17-t isumaqataapput.
Akerliusoqarpa? 13-t akerliupput. Taasinngitsoortoqarpa? Ataaseq. Taamaalilluni
normu 31 amerlanerussuteqartunit akuerineqarluni akuersissutigineqarpoq.