Oqaluuserisassani immikkoortoq 40-2 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut aqqaneq
sisamaat, pingasunngorneq 26. marts 2003 nal. 13:11.
Arkalo Abelsen, Kultureqarnermut,
Ilinniartitaanermut, Ilisimatusarnermut Ilageeqarnermullu Naalakkersuisoq, Atassut.
Naalakkersuisuniit Inatsisartut
Kultureqarnermut Ilinniartitaanermullu Ataatsimiititaliap isumaliutissiissutaanut
ersarissumut qujassuteqarpugut. Tassani politikkikkut suna isumaqatigiissutaaneersoq
aammalu partiit assigiinngitsut qanoq isummersimanerat ersarissumik takuneqarsinnaavoq.
Naalakkersuisut iluarisimaarlugu
maluginiarparput ataatsimiittialiamiittut Siumukkormiuusut
Atassutikkunneersullu amerlanersaat siunnersuut taamatut isikkoqartillugu
akuerisimagaat.
Demokraatit atuarfiit illutaasa
sananeqarnerinut taarsigassarsiinermut tunngassutilimmik allannguutissatut
siunnersuutissamik saqqummiussiniarlutik ilimasaarisimapput, taamaattoq
siunnersuut tunngaviusumik akueraat. Inuit Ataqatigiit nunatsinni atuarfiit
namminersortut pisortatigoortumik tapiiffigineqartarnissaat tunngaviusumik
akerleralugu nalunaarutigisimavaat. Demokraatit Inuit Ataqatigiillu
taamaalillutik marlunnik imminnut paarlattunik kissaateqarput. Tamanna
pissutigalugu Naalakkersuisuniit inatsisissamut siunnersuutip suliarineqarnerani
tunngaviusumik pingaartitat suusimanernersut naatsumik ilisaritissallugit
pingaartissimavarput, tassungalu aamma pisortatigoortumik
tapiiffigineqartariaqarneranut tunngavilersuutit ilanngutissavagut, aammalu
tamanna pisssasoq siunnersuummi annertussusiliunneqarsimasut naapertorlugit,
annerusumik minnerusumilluunniit pinnagit.
Inatsit Tunngaviusoq naapertorlugu
angajoqqaajusoq kinaluunniit meeqqaminik nalinginnaasumik atuarfiup
avataatigut atuartitaqarsinnaanermik pisinnaatitaaffeqarpoq, atuartitaanera
minnerpaamik nalinginnaasumik atuarfiup ingerlaneratut ingerlanneqarluni
qulakkeerneqarsinnaappat. Taamaammat siunnersuutip pingaarnertut siunertaraa
nalinginnaasumik atuarfiup avataani taamatut atuartitsisarnerup
isumannaatsuunissaa pillugu inatsisigut qulakkeerinissaq.
Tamatuma saniatigut Naalakkersuisut
aamma kissaatigisimavaat tunngaviusumik atuarfik namminersortoq pisinnaasaq
naapertorlugu inunnut amerlanerpaanut periarfissaassasoq. Aammattaaq
Naalakkersuisut isumaqarput suliassamik pisortat suliarisassarigaluannik suliarinnittoqarpat,
suliarinnittuusup suliassaata naammassineqarnissaa aqqutissiorniarlugu pisortatigoortumik
taperneqartarnissaa qulakkeerneqartassasoq. Tamanna atuuttariaqarpoq
isumaginnittoq kommuniugaluarpat, suliffeqarfiugaluarpat
peqatigiiffiugaluarpalluunniit. Taamaammat siunnersuummi aalajangerneqarsimavoq
atuartumut ataatsimut ukiumut tapiissutissat malinnaassasut, tassa ukiumoortumik
tapiissutissat kommunemiit atuarfimmut namminersortumut, atuartup atuarfigisaanut,
nuutinneqassasut.
Aammattaq Naalakkersuisut
pingaartitarisimavaat inatsisissatut siunnersuut pisortaqarfinnut sippuisumik
aningaasartuutaassanngitsoq. Ilaatigut tamanna pissutigalugu inatsisissatut
siunnersuummi atuarfiit namminersortut pisortatigoortumik aningaasanik
atorluni aningaasaliiffigineqarnissaannik periarfissiisoqanngilaq.
Pisortatigoortumik aningaasanik
atorluni aningaasaliiffigineqarnissamut pisinnaatitaaffeqartoqassagaluarpat
tamanna Aningaasanut Inatsisissamut piareersaanermi Naalakkersuisut Landskarsip
aningaasartuutaanik tamakkiisumik tulleriissaarisarneranut naapertuutissanngilaq.
Taamaattoqassagaluarpammi aallaqqaataaniilli atuarfiit namminersortut
sanaartornermut aningaasartuutigiumaagassaat sanaartornermut aningaasartuutissanut
allanut salliutinneqalissagaluarmata. Kommunit inatsisiliorneq aqqutigalugu
atuarfiit namminersortut sanaartornissaannut aningaasanik atukkerneqaqqullugit
pisussaaffilerneqaraluarpata, tamanna aamma kommunit namminersortuunerannut
akulerunnerussagaluarpoq. Tamatumunngattaaq tapertaliullugu Demokraatit
siunnersuutissamissut ilimasaarutaat pinasaarani malinniarneqasssagaluarpat
tamanna meeqqat atuarfianik tunulliussinerulernermik kinguneqassagaluarpoq, tassani
aningaasartuutissat ikilisaavigineqassagaluarpata, soorlu aningaasanik
atukkiisarnikkut, atuarfinni sanaartornermut nutarterinermullu aningaasat
atorneqartussat annikillissammata. Tamakku pissutigalugit Naalakkersuisut
pisortat aningaasartuutissanut matussutissanik atukkiinertalimmik aningaasalersuisinnaatitaanissamut
pisussaaffilerneqarnissaat tapersersorsinnaanngilaat.
Inuit Ataqatigiit tunngaviusumik
isummersimanerannut Naalakkersuisut oqaatigissavaat inatsisissatut siunnersuut
akuerineqanngippat, inuiaqatigiit iluanni aatsaat immikkoortiterisoqarnissaa
ilimanaateqarsinnaasoq. Soorlumi Inuit Ataqatigiit namminneq eqqaagaat,
angajoqqaat meeqqat atuarfiata avataatigut meeqqaminnik atuartoqarnissaa
kissaatigippassuk, sukkulluunniit tamanna Inatsit Tunngaviusoq aqqutigalugu
angajoqqaat pisinnaatitaaffigaat. Inuit Ataqatigiimmi allaat Nuummi atuarfiup
namminersortup pilersinnissaanut sulissutiginnittoqarnera tunngaviusumik
isumaqatigalugu eqqaasimavaat, taamaalillutik atuarfinnik namminersortunik
pilersitsisoqarnissaa tunngaviusumik akerlerissagaat ilimanaateqanngilaq.
Taamaalilluni inatsisissatut siunnersuut akuerineqassanngikkaluarpat suli
atuarfinnik namminersortunik pilersitsisoqarsinnaavoq,
ingerlanneqarnerali angajoqqaanit taamaallaat aningaasalersorneqartussanngussalluni.
Pisortaniit ingerlanneqarneranut annertuumik tapiiffigineqarneraniit tamanna
angajoqqaat annertunerusumik akiliisarnissaannik
kinguneqasssaaq.
Naalakkersuisuttaaq aamma
qularinngilluinnarpaat atuarfinnik namminersortunik pilersitsiniartut
atuarfiit ingerlanneqarnerinut aningaasartuutissanut matussutissat tamakkiisut
pissarsiarisinnaagaat, tamanna kommuneniit nammineq piumassuseq
naapertorlugu aningaasaliissutitigut atukkiisarnikkulluunniit pisinnaassaaq,
taamaattoqartillugu angajoqqaat atuisutut akiliutigisartagassaat ima
annikillisinnaatigaaq, allaat inuiaqatigiit iluanni arlalissuit meeqqat
atuarfiata saniatigut qinigassaq taanna atorsinnaalerlugu.
Naalakkersuisuniit naggasiutitut aammaarlugu
uteqqissavarput atuarfiit namminersortut pilersinneqarnissaannut
tapiissutaasartussat siunnersuut naapertorlugu aalajangerneqarsimasut,
Atuarfitsialaap pilersinneqarnissaanut ilungersuuteqarnermut
akornusersuisussaanngimmata. Atuartitseriaatsilli marluiusut taakku imminnut
isumassarsiassamik aallerfigisarsinnaassapput taamatullu ataavartumik
pitsaassutsimikkut ineriartortuassallutik tamanut iluaqutaasussamik.
Oqaatsit taakku tunuliaqutaralugit
Naalakkersuitut inassutigaat siunnersuut taamatut isikkoqarluni
pingajussaaneerneqarnissaminut ingerlanneqassasoq.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Partiit oqaaseqartuinut. Doris Jakobsen,
Siumut.
Doris Jakobsen, Siumup oqaaseqartua.
Siumumiit tunngaviusumik atuarfiit
namminersortitat angerlarsimaffimmilu atuartitaaneq il. il. pillugit
Inatsisartut inatsisissaattut siunnersuut oqaluuserilluareerlugu,
siullermeerneqarneranilu oqaaserisimasat innersuutigalugit Ilinniartitaanermut ataatsimiititaliap nalilersuinera
naammagisimaarlugu suliap pingajussaaneerneqarnissaa inassutigaarput.
Jonathan Motzfeldt, ataatsimiinnermi aqutsisoq, Inatsisartut
Siulittaasuat, Siumut.
Tulliulluni oqaaseqassaaq Henriette
Rasmussen, Inuit Ataqatigiit.
Henriette Rasmussen, Inuit Ataqatigiit oqaaseqartuat.
Tunngaviusumik atuarfiit namminersortut
angerlarsimaffimmilu atuartitaaneq il.il. pillugit Inatsisartut
inatsisissaattut siunnersuutaata aappassaaneerneqarnerani imatut
saqqummiussissuunga:
Tassa soorlu siullermeerneqarnerani Inuit
Ataqatigiit-niit oqaatigereeripput angajoqqaat ilaasa meeqqamik
atuartinneqarnissaannut immikkut iliuuseqarniartut paasiluarlugit
akerliuffiginngilagut.
Naalakkersuisup akissuteqaataani
issuarneqarpoq Danmarkip Inatsisaa tunngaviusoq, tassanilu periarfissarititaasut
Kalaallit Nunatsinni atuarfik namminersortoq pilersissalugu illersuutaasut.
Tamatumani Inuit Ataqatigiit, Namminersornerullutik Oqartussaat namminneq
inatsisiliaat atuarfimmut tunngavigerusunneruaat, tassami tamatumani
erserilluarmat qanoq immikkut iliuuseqarnissamut periarfissaqarnersoq. Aamma
Naalagaaffeqatigiit Inatsisaat tunngaviusoq, aap soorunami
inatsisissaarsuaraarput. Kisianni nunatta iluani meeqqat qanoq isikkulimmik
atuarfeqarnermikkut atugassaat uagut nammineq ilusilersugassaraarput. Uagullu
Inuit Ataqatigiinni akerlerilluinnarparput kikkulluunniit
immikkoorniaqatigiinngorlutik inissitsitertalernissaat, pingaartumik meeqqat
peroriartornerannit aallartittumik. Annilaanngitigisarpullu tassaavoq inatsisip
nutaap atuutilerneratigut immikkoortiterineq ersarissoq pilissasoq, meeqqat
peroriartornerminni maluginngitsuugassarinngisaat, mannalu inatsit
akuersaarniarneqartoq pisortat aningaasalersueqataaffigisariaqagaat.
?..soorlumi Inuit Ataqatigiit namminneq
eqqaagaat, angajoqqaat meeqqat atuarfiata avataatigut meeqqaminnik
atuartoqarnissaa kissaatigippassuk, sukkulluunniit tamanna Inatsit Tunngaviusoq
aqqutigalugu angjoqqaat pisinnaatitaaffigaat.? Suu tamanna nalunngilarput,
siullermillu oqaaseqaratta erseqqissarlutigu.
Oqareernittuut Inuit Ataqatigiit
tunngavigersunneruaat Meeqqat Atuarfiannut Inatsit siorna maani inimi tamanit
neriuffigineqangaarluni akuersissutaasimasoq, aqqutissatut pitsaasutut
nunatsinni meeqqat tamarmik pitsaasumik atuartitaanissaannik siunertaqartoq,
ilaatigullu aamma nunanit allaniluunniit maligassiuisutut taaneqartartoq. Inatsisimuna taassuma
periarfissarititaat atorluartariaqarivut.
Tassani allassimavoq: ?Misiligutaasumik suliaqarnissaq siunertaralugu
Naalakkersuisut peqqussutip matuma kap.liisa 3anni amma 4-ni atuarfiup
ilusaanik, annertussusaanik, atuartitsinerup imarisaanik, atuartitsinerup
aaqqissorneqarneranik piareersarneqarneranillu aalajangersakkanik
sanioqqutsitsinissaq, Atuarfiup siunertaanik ataavartitsinissamut naleqquttoq,
akuerisinnaavaat, tak. ?2?. Taanna ilaatigut Kultureqarnermut
Ilinniartitaanermullu ataatsimiititaliap isumaliutissiissutaani issuarneqarpoq.
Isumarput malillugu
eqqummiiginalaanngitsuunngilaq naalakkersuisup nammineq inatsisiliavut
toqqammaviginagit Inatsit Tunngaviusoq maani nittarsaammassuk. Aammalu
erseqqilluinnartumik utertittariaqarpoq Naalakkersuisut pasinarsaarinerat
Atuarfiit namminersortut il.il. inatsisissaq akuersaarneqanngippat, taakku
immikkut? ?atuarfiliarniartunnguakkuluit? immikkoortitaalissasut.
Immikkoortitaanavianngillat siunertaat inatsit pioreersut
periarfissaqartereermassuk.
Maannakkut amerlanerussuteqartut
siunertaat pivisusunngussappat atuarfimmi namminesortumi atuartussat
eqqarsaatigalugit, Inuit Ataqatigiimmiit erseqqissassavarput pisortaniit aningaasalersorneqarluni
atuarfik sananeqassappat, taava atuarfiup taassuma pinngitsoorani
qulakkeertariaqassagaa inuiaqatigiinni oqaatsitigut piumasaqaataasut ataqqineqarnissaat. Tassa imaaleqqunagu
allamiutut oqaluttut kalaaliaqqallu immikkoortitaasutut misigilernissaat.
Allatorluinnarmi siunertaqarpugut, allamiut maanga tikikkaangamik uatsinnut
akuleruttassasut, uagut aamma ilisarerusuppagut, ilinniarfigalugit
ikinngutigerusullugillu.
Ataatsimiititaliami
ujartorsimavarput Atuarfiup namminersortup manna tikillugu
aningaasalersorneqarsimanerani
aningaasalersuineq qanoq issimanersoq. Angajoqqaat aningaasaqassusiat
tunngavigalugu immikkoortitsineq perusunngilarput, inuiaqatigiit
eqqarsaatigalugit tamanna navianarpoq kissaatiginannguillarluni. Ilami allaat
suliffiutillit immikkut 50.000 kr-neerlutik inniminneereertarsinnaanerat sumik
siunertaqarnersoq erseqqinngilaq.
Namminersorneruleqqaarnitsinni
akisussaaffiit tigusatta siullerpaat ilagisimavaat atuarfiit. Atuarfiillu tassa
ukiorpanngortuni pimoorunneqarsimannginerat ajuusaarnaqaaq, allaallu
meerartatta nalinginnaasumik angusakippallaarnerannik kinguneqartarsimammat
assorsuaq ajusaarnarpoq, aamma taamatut isigisariaqarpoq atuarfiit amerlaqisut
aserfallappallaarsimanerat, ilinniartitsisunullu qanga inuiaqatigiinni
nuannaartunarlutik inissisimasimasunut akissarsiat annikilliartorsimaneratigut
ilinniartitaanerullu pingaartinneerukkiartorsimaneratigut
nukillaartitaangajattunut pissutsit illuanut saatinniartariaqarput.
Meeqqat atuarfiata nunatsinni
ajornartorsiutai avatitsinniaasiit tusaamasaapput, taamaattumik malik taanna
soorunami nammineq atuarfiliorniartut sarfarissaarutigaat, tamatumanilu
ajorsartoq tassaavoq Namminersornerullutik Oqartussat.
Aningaasartassaanut Demokratit
siunnersuutaanni ersereerpoq, pilersaarut taanna soorunami angajoqqaanut kisimi
akiligassanngortitaanavianngitsoq, pisortalli aningaasaleeqataanissaat qanoq
pisariaqartinneqartigisoq. Illutassarsuinut piinnarani, aammalu atortussanut
aningaasanik atorniarsinnaaneq periarfissinniarpaat. Aamma illuliortiternermut
tapeeriaaseq, tassa nammineq akilissaq 10- kommunit 40- Namminersornerullutik
Oqartussat 50-imik agguaqatigiisitsinissaq, atuarfimmut namminersortumut
atorniarneqarpoq. Taamatut ammaassinerup tapiissuteqarfigisartakkanut sunut sunniuteqarnissaa
Naalakkersuisut kingunerissagaa ilimaginerpaat?
Tamanna piinnanngilaq aammali
nunaminertanik sanaartorfissanik immikkoortitsinissaq kommalbestyrelsinit
soorunami aamma isumagineqartariaqarpoq. Tamatumani suna tunngaviussava,
atuarfiit nalinginnaasumik eqqaanni imalunniit meeqqat atuarfiannit
ungasissumi? Bussimmi immaqa aamma isumagisariaqassaapput.
Inuit Ataqatigiit kissaatigaarput
meeqqat atuarfiat pitsaanerujussuaq tamanoortoq, meerartatta qanorluunniit
oqalukkaluartut ataatsimoorfigisaat, kissaatigaarput Kalaallit Nunaanni
inuiaqatigiit immikkortiteriffiunngitsut, attaqqeqatigiinnermik qaammaasaqartut
sivikikkaluamilluunniit nunatsinniissimagaluarunik.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Tulliulluni oqaaseqassaaq Isak
Davidsen, Atassut.
Isak Davidsen, Atassutip oqaaseqartua.
Tunngaviusumik atuarfiit namminersortut angerlarsimaffimmilu atuartitaaneq il.il. pillugit Inatsisartut inatsisissaattut siunnersuut Atassut-mit oqaatigissavarput amerlanerussuteqartut, kiisalu Naalakkersuisut isummiussaat aalajangiussimagatsigu. Taamatullu isikkoqarluni pingajussaaneerneqarnissaannut ingerlaqqinnissaa akuersaarlugu taasigumaaratta.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq Per Berthelsen, Demokraatit.
Per Berthelsen, Demokraatit oqaaseqartuat.
Qujanaq.
Inatsisartut Kultur-imut Ilinniartitaanermulu Ataatsimiititaliaata aappassaaneerinnissamut isumaliutissiissutaani nunannaarutigalugu Demokraatinit maluginiarparput, ataatsimiititaliami amerlanerussuteqavissut siunnersuut akueralugu inassuteqartut.
Sulili aporfissamik anigorniagassamik ataatsimik peqarpoq, inatsisissaq atuarfiit namminersortitaasut pilersinneqarnissaannut ammaassisussaasoq kinguneqartitsisinnaassappat.
Oqaluuserisap siullermeerneqarnerani Demokraatit erseqqissaateqarput, tassani nalunaarutigalugu nunatsinni inatsisisikkut ammaassinissaq qularnanngitsumik aatsaat timitalerneqarsinnaassasoq saniatigut taarsigassarsisinnaanermik naleqquttumik, atuarfiit sanatissinnaajumallugit ikorfartuutaasinnaasumik, pilersitsisoqarpat.
Taamaattumillu Demokraatit nalunaaruteqarput aappassaanerinninnissamut inatsisissatut siunnersuutaasumut allannguutissamik saqqummiussaqarniarlutik. Ilami inatsisiliorneq sumut iluaqutaassava piviusunngortitsisinnaanissamut pisariaqartunik allanik tikkuussinertaqanngikkuni.
Kisiannili allannguutissatut siunnersuut erseqqissaatigitinnagu, Siumukkut IA-kkullu qinersivimmi siuliusumi naalakkersuisooqatigiineranni pisut kingumut qiviaqqaalaarusuppakka.
Taaneqartummi naalakkersuisooqatigiinneranni saqqummiunneqarpoq suliangaatsiarsuaq taaneqartoq: ?Siunissamut takorluukkat? ? Inuiaqatigiit aaqqissugaanerat pillugu iliuusissatut pilersaarutissatut siunnersuut aamma maanna naalakkersuisooqatigiiissut iigarsimaarfigisamittut taakkartullattaagarisaat.
Pilersaarutissatut siunnersuummi ? suliatsialassuartut nalilertariaqartumi ? ilaatigut takuneqarsinnaapput ?Atuarfiit namminersortitaasut? pillugit isummersuuterpaaluit oqallittoqaleqqitsinnagu tusartissallugit piukkunnartuusut.
Tassanngalu titarnerit sisamat issuaavigilaarusuppakka:
?Naalakkersuisut isumaqarput,
atuarfiit namminersortitaasut tunngaviusumik atuarfimmut taartissaasinnaasutut
ingerlanneqartraiqartut, taamatullu suliniutit soqutigisaqatigiiffinnit
inuinnarnillu ingerlanneqartariaqartut ?
?Kiisalu PIAARNERPAAMIK atuarfiit
namminersortitaasut misilinneqarnissaannut pisariaqartunik
sinaakkusiisoqartariaqarpoq?
?Pilersinniakkat ilaat
akisoorujussuussapput?
?Oqaatsit pingasut tunngavigalugit
atuartitsisinnaaneq ammaanneqartariaqarpoq?
Isuaaffigisakka tamakkiisumik
atuarneqarsinnaapput ?Siunissamik
takorluukkami? quppernerni 47, 55 aamma 58-imi.
Demokraatit 10-30-10-50-imik
tunngaveqartumik
taarsigassarsisitsisinnaaneq periarfissatut tikkuuppaat, tassanimi
?iluanaarnerpaasussaq? tassaammat Namminersornerullutik Oqartussat,
taarsiullugu aningaasaliissaguni taamaallaat atuarfiliornermi nammineq 100%-imik
aningaasaliisussatut inissisimasuusoq.
Taamaammallu oqartariaqarpugut
Namminersortitaasumik atuarfiit annertuumik oqalissaasussaassasut sumiffinni
piaarluinnartumik nutaamik atuarfiliorfigineqarnissamik pisariqartitsiviusuni,
soorlu nunatsinni illoqarfiit pingaarnersaanni.
Tassani namminersortitaalluni
atuarfissaq aallarteriaannaasoq sananeqariaannaalluni utaqqivoq
soqutigisaqaqatigiiffiit inuinnarpassuillu namminneq piumassutsiminnik
sulerulunnerisigut piareerluinnagaasoq
(soorluli tamanna ?Siunissamik takorluukkat?-mi inassutaasoq).
Tassanilu tunuliaqutaapput
angajoqqaat aappariit 200-jungajaasut, taakkunanngalu 80 %-it miss. nunatsinni
najugaqavissuusut - maanna pisariaqartunik sinaakkusianik ? tassa inatsisitigut
aningaasalersuinissakkullu ammaassivigineqarnissamik - naalaaginnarlutik
utaqqipput.
Sinaakkutassallu uagut
inatsisartuusugut maani inimi pilersitassaraagut.
Naggataatigut
anersaaruluuteqalaarusuppunga, isumaliutissiissusiamimi takusinnaagakku, maanna
naalakkersuisooqatigiit allannguutissatut siunnersuusiornissami
tunngaviusinnaasutut 10-40-50-imik taallugu taarsigassarsisiinnaaneq
taatsiagarput, tapersersorsimanngikkaat.
Tamassimi eqqaamassajunnarsivarsi
siusinnersukkut arlaleriarlugu taaneqarmat ajornakusuussangatinnartoq atuarfiit
namminersortitaasut timitalerneqarsinnaanissaat, naleqquttumik
taarsigassarsisitsisinnaaneq saniatigut periarfissiissutigineqanngippat.
Naalakkersuisoqatigiissunit
paaserusuppara, suut patsisilersuutigiumaneqarnersut allannguutissatut
siunnersuutaasumut taperseerusunnginnermi. Tapersiinikkummi aningaasarpassuit
pisortanut sipaarutigineqassapput, taarsiullugumi aningaasalersuinissaq alla
tassatuaammat tamakkiisumik, tassa 100%-imik aningaasalersuisariaqarnissaq.
Taamatut saqqummiussaqarlunga
allannguutissaq, siunnersuuteqarnerput innersuussutigalugu, inassutigissavara oqaluuserisap
pingajussaaneerneqartinnani taamallu naggataarutaasumik
oqallisigisassanngortinneqartinnani, Inatsisartut Kultur-eqarnermut Ilinniartitaanermullu
ataatsimiititaliaanut suliassanngorteqqinneqassasoq.
Oqareernittut
aamma oqaaseqartut naammassippata oqaaseqaqqilaarumaarpunga.
Qujanaq.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Tulliulluni oqaaseqassaaq Anthon Frederiksen,
Kattusseqatigiit.
Anthon Frederiksen, Kattusseqatigiit.
Suliap siullermeerneqarnerani
Kattusseqatigiit sinnerlugit oqaaseqaatikka innersuussutigalugit Inatsisartut
Kultureqarnermut Ilinniartitaanermullu Ataatsimiititaliaata isumaliutissiissutaa
Kattusseqatigiit sinnerlugit imaattumik oqaaseqaateqassuunga:
Siullermik isumaliutissiissut
atuarlugu tupigusuutiginngitsuunngilara; ataatsimiititaliami partiinit
assigiinngitsunit sisamaasunit partiit pingasut tamarmik assigiinngitsunik
inassuteqaateqarnerat. Soorunami Kattusseqatigiinni ataqqivagut inuit partiillu
qanoq isummersinnaaneri, kisianni suliami inuiaqatigiinnut taama
pingaaruteqartigisumi partiilersornerujussuaq pissutaalluni ataatsimiititaliami
ilaasortaasunit tallimaasunit partiilersorneq annerusumik pissutaasimagunarluni
ataatsimiitaliami partiit amerlanerussuteqartut isumaat
aalajangiusimaniaannarnagu ataatsimiititaliami apeqqutit assigiinngitsut
pillugit ilaasortat imminnut qanilleriarsinnaasimannginnerat assut pakatsinarpoq,
soorunami ataatsimiititaliami ilaasortat oqareernittuut kiffaanngissuseqarnerat
namminnerlu isummersinnaanerat ataqqivara aamma isumaqatigiissinnaannginneq
pineqartillugu soorunami ikinnerussuteqarluni immikkut allatsitsisinnaaneq
periarfissaasoq nalunngilluinnarpara.
Oqareernittuut
tupigusuutigiinnarpara; partiit sisamat akornanni ataatsimiititaliami
ilaasortat tallimat imminnut naaperiarsinnaasimannginnerat? Tassami
ataatsimiititaliani sulineq Kattusseqatigiinni paasinnitaaserput naapertorlugu
tassaaniartussaagaluarmat; partii apeqqutaatippallaarnagu isummanik
katiteriffiulluni naapitsiniaaffissaq, inatsisissanik peqqussutissanilluunniit
atuisussanut isumatuumik pitsaanerpaamillu malitassaqartinneqarnisaat
anguniarlugu.
Kisianni tassa tamanna Kultureqarnermut
Ilinniartitaanermullu Ataatsimiititaliami annerusumik
isumaqatigiiffigineqarsinnaasimanngilaq.
Taamaakkaluartoq inatsisartuni
tamatta atuarfiit namminersortut angerlarsimaffimmilu atuartitaanermut
tunngasut tunngaviatigut akerlerinngikkivut paasinarpoq, annerusumilli
isumaqatigiissutigineqarsinnaasimanngitsut tassaanerullutik atuarfiit
namminersortitat qanoq atorneqarnissaat aammalu sananeqarnerinut
aningaasalersueriaatsinut tunngasut ataatsimiititaliami isummatigut
naapeqatigiiffiusinnaasimannginnerat.
Taamaammat pissutsit taamaatsillugit
aammalu kommune-t sanaartornermut aningaasaleeqataasinnaanerannut tunngatillugu
assut eqqarsarnartoqartippakka, sooq Namminersornerullutik Oqartussat
sanaartornermut tapiissuteqarsinnaanermut ilaatinneqannginnersut?
Taamatut oqaaseqarlunga
inatsisissatut siunnersuut tunngaviatigut isumaqatigigaluarlugu ilaatigut
aamma, minnerunngitsumik sanaartornissamut aningaasaliisarnissamut
tunngatillugu Ataatsimiititaliami ilaasortat imminnut
qanilleriarnerusinnaasimannginnerat pissutigalugu taaseqataanissara
apeqqusersimagaluarpara, ilaatigut kommune-nut periarfissamik matuminnga
atuijumaarsinnaasunut pisortatut kommune-t kisimiillutik
taarsigassarsiaritinneqartussat ilaannik taarsigassarsisitsisinnaatitaanissaat
eqqarsaatigalugu, kisiannili Demokraatiniit allannguutissatut siunnersuut
tamatuminnga pitsanngoriaateqartitsisinnaasoq naatsorsuutigisinnaagakku;
allannguutissatut siunnersuut taperserlugu inatsisissatut siunnersuummut
akuerseqataallunga taaseqataassuunga.
Taamatut oqaaseqarlunga
Kultureqarnermut ataatsimiititaliap aammaarluni pingajussaannik apeqqutit
imaannaanngitsut pillugit naaperiaqqissinnaanerat inassutigerusuppara.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Atuartitaanermut Naalakkersuisoq.
Arkalo Abelsen, Kultureqarnermut,
Ilinniartitaanermut, Ilisimatusarnermut Ilageeqarnermullu Naalakkersuisoq,
Atassut.
Qujanaq.
Partiit akissuteqaataannut qujanaq.
Uanga uggorilaarpara uani apeqqummi sinaakkutissatut
inatsisissatut siunnersuut taasuma oqallisiginerani, ukua tigussaasumik
illutassai akulerullugit eqqartorneqarmata. Tassami massakkut atuuttumi peqqussummi meeqqat atuarfianni tunngasumi,
tassani piumasaqaataaginnarmat meeqqat atuartinneqarnissaat taanna
piumasaqaataasoq. Oqartoqanngilaq meeqqat atuarfianni atuartinneqassasut
folkeskole-mik taasartakkatsinni.
Uanili siunnersuummi nutaami tassa
atuarfiit namminersortut taakkua pilersinneqarnissaannut sinaakkutissamik
inatsimmik siunnersuuteqartoqarnikuuvoq.
Taannalu tassa paasisakka malillugit
partiit tamarmik isumaqatigigaluarpaat periarfissaq pitsaasuusoq. Uuma meeqqat
atuarfiata saniatigut.
Aamma taaneqareeraluartoq uanga
Naalakkersuisutut oqaatigerusuppara una paatsoorneruvoq isumaqaraanni
Atuarfitsialaap pilersikkiartuaarnissaannut nukiit ikilissasut taamannak
periarfissiigaluarutta atuarfiit namminersortulersutut
ingerlalersinnaanissaannut.
Uanga isumaga malillugu
pinngitsoorani Atuarfitsialaat ineriartortitat aammalu atuarfiit namminersortut,
taakkua ajunngilaq imminnut unammillilaaraluarunik. Pitsaasutsimikkut
qaffariartornerat tassani anneroriartuinnassammat.
Uani Naalakkersuisut meeqqamut
ataatsimut aningaasartuutaasut atuarfinnut namminersortunut
nuutsinneqartarnissaat saniatigut, atuarfiliornissamik periarfissamik taamannak
itigartitsinermi tassa tunngavigaarput aningaasartuutaasut
allassannginnatsigit.
Aalajangiussimavarput taanna
meeqqamut ataatsimut ingerlatsinermut aningaasartuutit taakkua
nuutsinneqarnissaat. Malinnaallutik.
Aammalu soorunami atuarfinni
namminersortuninngaanniit Atuarfitsialammut utertoqaruni, aamma taakku
malinnaaqqissasut.
Uanga isumaqarluinnarpunga tassa una
periarfissaq pitsassuusoq, aammalu Atuarfitsialaap aatsaaginnannguaq
akuersissuteriikkatta pilersinneqartussap, aammalu ilaatigut ingerlalereersup
taasuma unammillertigissagaa pitsaasoq, tamanna peqqinnarpoq.
Inuit Ataqatigiit uparuartugaat
soorunami paasivakka, aallaqqaataaninngaanniilli taakkua
uparuartuutigisimavasi. Aammalu tunngaviusumik isummassinni tulluulluinnarput. Taanna kialluunniit
assortorsinnaanngilaa.
Kisianni uanga isumaqatiginngilassi
ugguuna Atuarfitsialak sanngiillisinneqassasoq atuarfiit namminersortut
pilersinneqarpata aqqutissiunneqarpataluunniit.
Taamatut oqaaseqarallassuunga.
Qujanaq.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Tulliulluni oqaaseqassaaq Per Berthelsen, Demokraatit. Taannna pereerpat Jĝrgen Wĉver Johansen, Siumut.
Per Berthelsen, Demokraatit.
Qujanaq.
Tassa tamaasa oqaaseqarfigilaarniarpakka kisianni partiit marlussuit ulapitsitsinngeqaat. Suliaammi suliarisimasaat saqqummiussaallu sullunangaarmata oqaasissaaleqinermik.
Aallarniutigerusuppara nuannersortaa tassalu Ilinniartitaanermut Naalakkersuisup oqaatigimmagu ilumoorluinnartoq tassa sumilluunniit takorloorniarneqassanngitsoq atuarfiit namminersortitaasut maanna Atuarfitsialammik ingerlanniarneqartumi naalleraannissaat. Taakku immikkoortilluinnartariaqarput.
Kisiannili aamma oqartariaqarpunga taasuma kingorna nersualaarilaariarlunga. Ajuusaaraluarlunga oqartariaqarama Naalakkersuisup aammalu sulisuisa ilinniagassartik iluamik atuarsimanngimmassuk, tassa Demokraatit allannguutissatut siunnersuutaat aallaavigalugu.
Erserpormi tamanna assigiinngitsutigut.
Naalakkersuisuninngaanniit
saqqummiunneqarpoq pilersitsikkuminartoq atuarfik namminersortitaasoq
amerlanerpaanut nuannaarutaasinnaasoq. Aap taannarpiarmiuna Demokraatit
tamaviaarutigigaat.
Taamaattumik ilaatigut aamma ininik
pisariaqartunik sanasoqartariaqassappat, periarfissamik 10.30.10.50-mik
taasamik ammaassinissaq. Nej, siunnersuutinni 10.30.10.50-voq peqqutigalugu
Namminersornerullutik Oqartussat tassaammata iluanaaruteqartussaasut,
namminersortillugit atuarfinnik ammaanermi.
Oqareernittummi pisariaqartitsiviusuni
periarfissaq allatuaq tassaavoq 100 %-imik aningaasalersuilluni, nammineerluni
atuarfiliortitsinissaq.
Taamaattumik taanna tunngavissaqarpoq suli
iluamik atuarlugu paasinialaassallugu. Siunnerfiusoq taasumalu inuiaqatigiinnut
iluaqusiisinnaanera.
Taamaattumik aamma Naalakkersuisut uani
taamak siunnersuut imaaliallaannarlugu tigusinnaanngikkunikku taava
naatorsukkanik saqqummiussaqartariaqaraluarput. Sooruna tigujumanngikkaat
taanna?
Allanik periarfissanik pitsaanerusumik
peqarneramik?
Aammalu tusarusunnaraluarpoq sunaana
Naalakkersuisut tungaaninngaanniit aki tamani nammanneqarsinnaasoq
naammaginarnerpaaq, qanoq annertutigissanersoq takorloorneraat.
Ingerlariaqqeriarutta aamma
Naalakkersuisut oqaatigivaat namminersortitaasumik atuarfiliorneq pisortanut imatut qaavatigut
aningaasartuutaareersut qaavisigut aningaasartuutinut pilersitsissanngitsoq.
Tassanerpiarlu tassa aamma Demokraatit siunnersuusiaminni nalinginnaasumik
oqaaseqaatiminni ersersippaat.
Allaallumi tassani erserpoq namminersortitaasumi
atuarfiit pisortanit peqataaffigineqarlutik amerlanerpaanik nuannaarutaasumik
akeqartumit tunngavilerlugit ingerlanneqassappata, taava inuiaqatigiinni
atuarfiliornissat pisariaqartinneqartut ikilissasut.
Tassa tapertaassaaq tunngaviusumik atuarfimmut,
oqilisaataallunilu Namminersornerullutik Oqartussat aningaasalersuinissaannut.
Aamma maluginiartariaqarpoq siunnersuut
una aammalumi taanna amerlanerussutigiffigineqarpoq, tassalu atuarfiit
namminersortitaasut ammaassivigineqarnissaat. Taanna sumilluunniit
amerlanerpaat akerlilersunngilaat.
Kisianni maluginiarnartoq unaavoq
namminersortitaasunik atuarfiliorniarnerit tapersersorneqarmata, allaat
KANUKOKA-minngaanniit, IMAK-iminngaanniit nunatsinni sulisitsisuninngaanniit.
Taamaallaallu naallerarneqarluni politikkerinit ataasiakkaaninngaanniit.
Taanna aamma assorujussuaq eqqarsarnarpoq
uanga oqarusukkama politikkerit sulinermi suliassatta pingaarnersaat
tassaassasoq inuiaqatigiinni kiffartuussinissaq, sullissilluarnissaq.
Naalleraammut.
Ingerlaqqikkuttalu taava ilaatigut
taakkartorneqarpoq Naalakkersuisuminngaanniit kommunit namminersortitaallu
ingerlaneranni ilaanni akuliunnertut issasoq pisussaaffiliineq
taarsigassarsisitsi...
Demokraatininngaanniit anguniagarput
tassaavoq periarfissiisoqassasoq pisariaqartinneqassappat taamatut
iliorsinnaanissaq. Peqqutigalugu pisortat siunnerfigisariaqarmassuk atuarfiup
taasuma taamatut ittup, tassa namminersortitaasup amerlanerpaanut iluqutaasumik
ingerlasinnaanissaa.
Taamaattumik partiit ataasiakkaat oqaaseqarfigivakka
taanna ilassuteqarfigalugu oqaaseqaqqilaarumaarpunga.
Qassiitigut nunatsinni kommunit
nanertuutissanik nutaanik tuniorartarpagut? Annertoorujussuarnik
isumaginninnermut attuumassuteqartunik allatullu tunngaveqartumik.
Aamma uani qanoq takorlooratsigu atuarfiit
namminersortitaasut amerlatigisut nunatsinni pilersinneqassasut. Taava
merserissavarput. Uanga takorloorpara ukiut 10-15-nit ingerlaneranni immaqa
annerpaamik atuarfiit sisamat pilersinneqarumaartut.
Suliassarujussuuvormi. Taamaattumik aamma
inuppassuit peqataasariaqarput, taakkuli iluini piginnaaneqarluartut
piareersaanermi pisariaqartinneqarlutik.
Taamaattumik ernumassutissaqanngilaq,
uanimi ataasiinnaq pilersaarutaavoq, aallamik tusagaqarnikuunngilagut suli.
Kisianni KANUKOKA-minngaanniit taaneqarpoq ?Una isumassatsialak?
qularnanngitsumik illoqarfinnut annerusunut tuniluukkumaartoq.
Kisianni tassa
uanga takorloorpara ukiuni 10-ni 15-ni tulliuttuni eqqartorneqartut uaniipput
atuarfiit immaqa pingasut-sisamat taamatut ikiorneqarnissamik
ikorfartorneqarnissamik pisariaqartitsisinnaasut. Maanna Nuummi
atuarfiliussagutta minnerpaamik aningaasartuuteqassaagut 70-80 mio.kr.-inik,
taakkua qaqugu piviusunngortissavagut atuarfeqarnermik tunngatillugu
kinguartoornigut imak annertutigipput 70 mio.kr.-inik akeqassappat 21
mio.kr.-innguit pisortaninngaanniit ikiorsiissutit tunniunneqarpata
aallartisarnermut, taava tassa sipaaruteqassaaq nammineq nappaanissamut
sanilliullugu 49 mio.kr.-init.
Taava kommunit, tassanilu
tusaamavara maani illoqarfimmi kommuni ammasoq tassunga, taava
pisariaqartinneqartissaaq tassannga 7 mio.kr.-inik aningaasaliissuteqarnissaq,
kisianni atuarfiit qanoq ullumikkut inissat eqqarsaatigalugit
atuartitsiviusinnaasut qanoq amigartigisut eqqarsaatigigaanni isumaqarpunga
aamma kommunit ataasiakkaat soqutigissagaat, 10-30-10-lu tunngaviuvoq
10-40-50-inani, peqqutigalugu una inatsit nuna tamakkerlugu atuuttussaammat,
taammaattumik illoqarfiit aningaasaqarniarnikkut maanna nukittunerpaamik inissisimasut
kisiat eqqarsaatigalugu inatsisiliortoqassanngitsoq siunnerfigaarput kisiannili
aamma kommunit immaqa kommunit nukittunerpaat tulliilu inissisimasut kisiannili
20%-imik aningaasaliinissamut periarfissaqanngitsut taava 10%-imik
aningaasaliinerisigut pilersitsinissaq anguniarlugu. Sooq pisariaqassappat ? jo
? atuarfiup tamanut iluaqutaanerpaasumik atornissaa angujumallugu.
Taamaattumik
suli suliap uumap naammasinissaanut nalilersugassaqarpoq sukumiisumik
nalilersugassamik, tassami taakkua aningaasat 21 mio.kr.-init kuserninnguupput
asuliinnaq atortakkanut sanilliullugu. Namminersortitaasumik atuarfiit
tassaapput nunarsuarmi tunisassiap akisunerpaamik tunisassiortuusoq, tassalu
ilisimasanik. Tamanna soorlu maani illoqarfik eqqarsaatigalugu 70 mio.kr.-ineernani
21 mio.kr.-iinnannguanik aningaasaliiffigalugu sinneraniillu
aningaasaliissuteqaqqissanani pilersissinnaagaanni akikinaarivoq tamanit
tikilluaqqulluartariaqaraluartoq. Kisianni tassa pingajussaaneernerani
neriuppunga siunnersuutit tamakku assigiinngitsut aallaavigalugit nalilersuineq
nutaamik ingerlaqqikkumaartoq.
Taava partiit
ataasiakkaat.
Siumut
oqaaseqartua kiisalumi asuli oqalunneruvoq, sumilluunniit nalilersuinermik
imaqanngitsumik oqaannassaluni siunnersuut taamak isikkoqarluni ingerlateqqinneqaannassaaq.
Parteeqatissinnut siunnersuisoqarpoq nalilersugassamik soorluli taanna aamma
oqaaseqarnermi nalilersulaarneqarsinnaagaluartoq, siunnerfimmi taanna
aqqutigalugu ammaassissammat angujumaneqartumut, tassalu atuarfiup
namminersortitaasup amerlanerpaanut nuannaarutaasumik atorsinnaanissaa, allamik
siunnerfeqanngilaq.
Inuit
Ataqatigiit oqaatsinilluunniit maanna atuiffigissallugit
kajungernangaanngillat, kinami paasinnikkumanngitsoq
paasitinneqarsinnaanngilaq, taamaattumik uani kingumut qiviarlunga kalaallit
nunaannik taanna takorluugaq Inuit Ataqatigiit aamma annertuumik
pilersissimasaa innersuussutigiinnassavara. Tassa kiisalimi Inuit Ataqatigiit
tungaanninngaanniit piviusunngortinneqarpoq upperiumanngisara TV-kut
siulittaasumit oqaatigineqartoq ? aa naatsorsuutigineqarsinnaanngilaq qanoq
qinersinermut oqartoqartarnera, kingornatigut allarujussuarmik pisoqartarmat.
Tassa taamatut
massakkut ingerlasoqarpoq siunnerfigisatut oqaluusereriarlugu aatsaat atuarfik
atorneqarsinnaagaluarpat amerlanerusunit, taamaalilluni akissarsiakkaanerpaat
kisimik atuarfiginngisaannik pilersitsinissaq, taava soorlu Inuit Ataqatigiit
tungaanninngaanniit aamma tapersersorneqarsinnaassagaluartoq. Inuiaqatigiit
karsianninngaanniit ikinnerusumik aningaasaliilluni ilivitsumik
pilersitsisinneranit.
Isak Davidsen
Atassumminngaanniit oqaannarlanga oqaaseqanngilaq, imaluunniit immaqa oqarluni
oqaluttartup nuutaa Siumumit pigineqartoq kigarsimasoq uteqattaartinneqarpoq,
ajuusaarnaqaaq. Nutaalerisutut imminnut aamma taaniartartut taamatut
annikitsigisumik siunnerfimmik taamatut inuiaqatigiinnut
pingaaruteqarsinnaatigisumik ikkatsigisumik oqaaseqartoqarsinnaammat
imaluunniit annikitsigisumik oqaaseqartoqarsinnaammat.
Naggataatigullu
oqaatigiinnassavar Hr. Anthon Frederiksen Kattusseqatigiinninngaanniit
paasilluarakku, aamma paasigaanga paasivara. Tassanimi oqaatigisaa ugguuna
ilalissavara ? aap ? paasiuminaaqaaq partiit pingasut, taavalu tassa
Kattusseqatigiit massakkut aamma peqatigilerlugit, akornanni siunnerfik taamatut
erseqqitsigisoq ataatsimoorluni angujumaneqartoq, tassalu pilersitsinissaq
atuarfimmik namminersortumik amerlanerpaanit nuannaarutaasumik ilumut
aqqutissamik nassaartoqarsinnaanngimmat tamatuminnga ammaassisussamik
Demokraatininngaanniit innersuussutigeqqissavagut oqaatigisagut, aammalu
nalilersueqqinnissamut 10.30.10.50 matematik-imi suliassatut eqqaamasassatut
matumuuna milorujupparput, taanna aamma soorunami 10.40.50.-iusinnaavoq,
kisianni isumaqarpugut piviusorsiorpalaarnerusoq inuiaqatigiit atituumik
isigigaanni 10.30.10.50 tunngavigissagaanni.
Qujanaq.
Jonathan
Motzfeldt,
ataatsimiinnermi aqutsisoq, Inatsisartuni Siulittaasoq, Siumut.
Tulliuppoq Jĝrgen Wĉver Johansen, taanna pereerpat Henriette Rasmussen.
Jĝrgen Wĉver Johansen, Siumut.
Takisoorsuarmik oqaaseqassanngilanga, kisianni siullermik qujarusuppunga oqaluttuarisaanermik ilinniartinneqarnitsinnut tunngatillugu, tassani ukiut marluk matuma siornatigut struktur politisk handlingsplan-imi tunngatillugu saqqummiunneqartumut qujarusuppunga. Kisianni siunnersuut manna struktur politisk handlingsplan sioqqullugu saqqummiunneqarpoq. Eqqaamaneqartariaqarsorinarpoq inatsisissatut siunnersuut manna aallaaveqarmat Otto Steenholdt-ip 1999-imi ukiakkut siunnersuuteqarneranit.
Taamani Otto Steenholdt Atassutaavoq, taamanilu aamma uagut partiitsinni ilaasortagut soorunami allaapput. Taamani aamma uagut partiitsinni annertuumik siunnersuut eqqartorparput, kisianni taamani partiitsinniit kisiartaallunga tapersiillunga oqaluttarfimmiit oqaaseqarpunga.
Taamaammat ullumikkut killifffipput qiviarutsigu qujanarpoq isummat nikissinnaanerat matumani aamma uppernarsineqarmat, qujanaqaarlu maanna siunnersuut Naalakkersuisut siunnersuutaat amerlanerussuteqartunit akuerineqarnissaa malunnarmat. Sulinitsinnimi tunngavigisartakkagut assigiinngeqaat, aamma ilungersornissamut patsisigisartakkagut aamma taamatut assigiinngitsigisarput, kisianni matumani aamma suleqatigiilluarnikkut allat oqaaseqaataannik nikassaanngikkaluarluni angusaqarluarsinnaanerput uanga upperaara. Tamannami aamma tamatta kissaatiginnguatsiarparput.
Neruutiginarporlu matumani ilungersorluni suliniuteqarneq isummallu nikissinnaanerannik uppernarsaaneq aamma ilisimatusarfeqarfissamut tuniluukkumaartoq. Taamaammat nikassaaneq pinnagu suleqatigiinneq toqqartigu.
Qujanaq.
Jonathan Motzfeldt, ataatsimiinnermi aqutsisoq, Inatsisartuni Siulittaasoq, Siumut.
Tulliulluni oqaaseqassaaq Henritte Rasmusssen, Inuit Ataqatigiit. Taannalu pereerpat Ilinniartitaanermut Naalakkersuisoq.
Henritte Rasmusssen, Inuit Ataqatigiit oqaaseqartuat.
Qujanaq. Tassa assigiinngitsut oqaaseqarfigisariaqarpagut. Siullermik una erseqqissarusuppara Inuit Ataqatigiit atuarfiup namminersortup maani Inatsisartuni oqaluuserineqartarnerani tamatigut akerliusarsimammata immikkut inatsisiliornissamut, naak atuarfiup perorsaanermi siunertarisai, atuarfiup namminersortup perorsaanikkut, atuartitsinikkullu siunertarisai akornutissaqartinngikkaluarlutigit aamma soorlu oqareersunga angajoqqaat taamatut iliuuseqarniartut akerlerinngilagut, paasivagut. Pissutigalugu atuarfik ajormat massakkut.
Kisianni aamma Inuit Ataqatigiit tungaanninngaanniit erseqqissaarusuppugut qanoq iliuuseqarusuppugut mattusserusunngilagut atuarfitsialaap iluani taakkua siunertaasa qanoq aaqqissuunneqarnissaanut peqataarusuppugut. Immikkut inatsisiliornermi immaqa inuiaqatigiit immaqalu aamma Inatsisartut eqqaamajunnarsivarsi Mathias Storch-ip atuakkiaa soorlu ?Sinnatugaq?, tassani atuartut nunaqarfimmiut atuarfimmut illoqarfimmut pigaangamik akerartorneqartartut ?asimiukasiit? taasa imaappoq narrunartoqarpoq, narrunartoqanngilaq ? ilaa imminnut ilai anginerusumik imminnut isigipput ilai mikinerusumik imminnut isigipput, taamaattut pissutsit aamma namminersornerulernitsinni qaangerniarlugit inissikkiartuaarpagut, suli iluatsinngilarput kisianni Inuit Ataqatigiinni isumaqarpugut uagut iluatsissaqqaartoq tamanna.
Maani inatsisilioraangatta taava siumut takorloortariaqarparput suna inatsit inuiaqatigiinnut qanoq sunniuteqassava, qanoq ukiut soorlu Per Berthelsen oqarneratuut ukiut 10-15-it massakkuminngaanniit inatsisip uuma akuersissutiginerani, inuiaqatigiit takorlooriartigit ikittuarannguuvugut suni tamani illoqarfinni. Taava imaattoqalissooq atuarfik-una ? aa taannaana atuarfik nalinginnaasoq, aajuna atuarfik namminersortoq, taava taamaalilluniuna immikkoortitsineqalernissaanik periarfissiineq uagut iluarinngikkipput, naak oqareernittuut suleqatiginnikkusukkaluarluta angajoqqaanik taakkunannga immikkut atuarfiliorniarlutik sinnatoqartunik, atuarfimmik pitsaasumik pilersitserusunnerat pillugu, taakku suleqatigerusunnaraluarput atuarfimmiit nalinginnaasuminngaanniit.
Per Berthelsen oqarneratuut kikkorparujussuit atuarfik namminersortoq tapersersugarigaat, soorunalimi sulisitsisut kattuffiat ilimanarluinnaqqissaarpoq tassunga tapersersuisuussasoq, taakkuugamik aamma aningaasalersueqataasut atuarfimmut namminersortumut manna tikillugu. Aammalu siunissami taakku meeraat qularnanngitsumik aamma atuarfimmi namminersortumiikkumaarput.
Qularnanngitsumik immaqa massakkut Inatsisartuusut ilaasa meeraat aamma tassani atuarfimmiikkumaarput. Taamatut immikkoortiterilernissaq tassa uagut Inuit Ataqatigiinni akerlerisarput.
Aningaasartassai eqqarsaatigalugit oqaaseqarusuppunga imatut, aningaasartassai maani pineqanngillat. Inatsinguna tunngaviusoq pineqartoq, aningaasartassai soorunalimi inatsit akuersissutigineqaruni pinngitsoorani aamma pisortat pituttorput imminnut aningaasaliinissamut taamak ittumut.
Jonathan Motzfeldt, ataatsimiinnermi aqutsisoq, Inatsisartuni Siulittaasoq, Siumut.
Ilinniartitaanermut Naalakkersuisoq.
Arkalo Abelsen, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq, Atassut.
Demokraatit oqaluttuata Per Berthelsen-ip aatsaaginnaq paasisinnaannginnerarpaa sooq Naalakkersuisut tunngaviusumik inatsisissamik isumaqataasinnarlutik, taamannak aningaasaleeqataanissamut aqqutissiuussinianngimmata.
Ilumoorpoq Naalakkersuisut isumaqatigaat atuarfiit namminersortut taakku periarfissinneqarnissaat, aammalu naatsorsuutigalugu Inatsisartut amerlanerussuteqarluartut taanna akuersaarumaaraat.
Massakkut killiffitsinni Naalakkersuisuninngaanniit taamannak aningaasaliinissaq akuersaarnagu oqaatigaarput pissutigalugu, nunatsinni atuarfipparujorujussuit imannak ajortigaat nutaanik atuarfiliortariaqartut aammalu annertoorujussuarnik iluarsaassassat. Ullumikkut Nuummi imaassinnaavoq atuartut tattoqisaatilaartut, kisianni atuarfissaqarput tamarmik.
Taamaattumik Naalakkersuisut nalilersuinerminni ullumikkut nunatta aningaasaqarniarnikkut inissisimanera aammalu atuarfiit nunatsinni sinerissami ajussusiat ilisimaaralugu, taamaattumik tassanngaanniit aningaasanik ikililerinissaq aqqutissiuukkumanngilaat uani killiffimmi. Isumaqarpunga ataatsimilluunniit assortuuttoqanngitsoq tassani Naalakkersuisut immerneranni.
Aamma Henriette Rasmussen-ip Inuit Ataqatigiinninngaanniit taasaa taanna avissaartuunnissamik meeqqat akornanni annilaanganeq aamma siuliini taaneqareersoq, siullermeernerani uanga isumaqanngilanga meeqqat akornanni avissaartuunnermik imaluunniit inuit akornanni avissaartuunnermik tamanna pilersitsinissaa, taanna naatsorsuutiginngilluinnarpara.
Qujanaq.
Jonathan Motzfeldt, ataatsimiinnermi aqutsisoq, Inatsisartuni Siulittaasoq, Siumut.
Oqallinneq aappassaaneerinermik tunngaveqarpoq, aammalu eqqaasitsissutigissavara isumaliutissiissut agguaatereerneqarsimasoq tunngavigalugu taasinissarput sioqqullugu maanna oqallinneqarmat eqqaasitsissutigissavara, ataatsimiisitaliami ilaasortat amerlanerussuteqartut Siumumeersut, Atassummeersut aamma Demokraatineersut tunngaviatigut inatsisissaq una akuerimmassuk, akuersissutiginiarmassuk. Taamaallaat Demokraatit immikkut siunnersuutaat maannakkut tunniunneqareersoq taanna, sanaartornissamut tunngatillugu immikkut siunnersuutaavoq ataatsimiisitaliami ikinnerussuteqartut Inuit Ataqatigiit akerliupput. Taanna eqqaasitsissutigaara.
Tulliulluni oqaaseqassaaq Doris Jakobsen, Siumut. Taanna pereerpat Isak Davidsen, Atassut.
Doris Jakobsen, Siumup oqaaseqartua.
Siullermik nuannaarutigaara Ilinniartitaanermut Ataatsimiititaliap isumaliutissiissutaa partiinit tamanit ersarissumik isummersorfigineqarsimalluni oqaaseqarfigineqarmat.
Tamatuma takutimmagu qanoq inuiaqatigit akornanni eqqortumik aalajangiiffiginissaa pingaaruteqartigisoq. Uanga partiit ataasiakkaarlugit saassuttaqattaarnianngilakka aamma ataasiakkaarlugit tamaasa isummersorfigerusunngilakka, kisianni Kattusseqatigiinnut erseqqissaatigerusuppara Ilinniartitaanermi Ataatsimiititaliami isumaliutissiissut suliarigatsigu tamattaalluta sunnguamilluunniit assortuussuteqarnata Siumumit, Atassummit, Inuit Ataqatigiinnit, Demokraatinillu atsioqataaffigigatsigu.
Taamatut oqaaseqarlunga oqaatigissavara aamma una illutassarsua piinnarnagu aamma eqqarsaatigisariaqaratsigu soorunami ilinniartitsisussaleqinerup taassuma aamma aaqqiiviginiarnissaa soorunami aamma sulissutigiumaarlutigu.
Taamatut naatsumik oqaaseqarlunga qujavunga tamassi akissuteqaatissinnut.
Jonathan Motzfeldt, ataatsimiinnermi aqutsisoq, Inatsisartuni Siulittaasoq, Siumut.
Tulliulluni oqaaseqassaaq Isak Davidsen, Atassut. Tulliutissaaq Palle Christiansen Demokraatit.
Isak Davidsen, Atassutip oqaaseqartua.
Suiullermeernerani oqaaserisagut Per Berthelsen-imut innersuussutigerusuppakka. Oqaluttartup nuutaanut kigarnikumut assersuummatigut oqaatigiinnassavara isumaqarpunga illit oqaluttartup nuutaa kigartornikorujorujussuaq atorlugu maani utikattaarisutit.
Aamma isumaqarpunga amerlanerussuteqartut isummiussaat aamma illit tusariikkat qujassutigalugu aamma tigusariaqarit. Nikassaaneq tassaavoq inuunermi ajornerpaaq, taamaattumik uanga isumaqarpunga aamma immaqa tamarmik Inatsisartut isumaqatigiipput maani inimi nikassaanata anguniakkagut anguniartariaqarigut.
Qujanaq.
Jonathan Motzfeldt, ataatsimiinnermi aqutsisoq, Inatsisartuni Siulittaasoq, Siumut.
Palle Christiansen, Demokraatit.
Palle Christiansen, Demokraatit.
Qujanaq. Ataaseq erseqqissaatigilaariartigu inatsisiliaq una qanoq naleqassava piviusunngortissinnaanngikkutsigu. Partiit tamarmik kusanartumik isummersorsinnaapput, kisiannili piviusunngortissinnaanngikkutsigu taava asuli mikrofonimi oqaluinnassaagut. Assersuummik ataatsimik takkussilaariarlanga. Atuarfiliussagutta immaqa 100 mio.kr.-inik akilimmik pisariaqartitsineq matussuserniassagutsigu taava ullumikkut Namminersornerullutik Oqartussat tamaasa isumagisussaassavai, aammalu ingerlatsinermut aningaasartuutit akilertussaassallugit. Taavali pisariaqartitsineq taanna aamma matussuserniarlugu taava 30 mio.kr.-niinnalimmik sananeqarsinnaassagaluarpoq, taavalu 70 mio.kr.-inik Namminersornerullutik Oqartussat sipaaruteqarlutik.
Oqartoqarsinnaavoq atuarfiit namminersortut amerliartorpata, taava soorlu sipaarutigisinnaasat suli amerlinerussapput, tamatuma saniatigut taava aningaasarpassuit aamma ingerlatsinermut atugassat sipaarutigineqassapput, aamma tamakkua eqqarsaatigineqartariaqarput. Tassami aningaasat taakkua maannakkut piginnginnatsigit, taamaattumik eqqarsaatigeqqugaluarpara paaseqqullugulu uagut allannguutissatut siunnersuuterput tassaagami ajornartorsiummik qaangiissutaasinnaasoq.
Qujanaq.
Jonathan Motzfeldt, ataatsimiinnermi aqutsisoq, Inatsisartuni Siulittaasoq, Siumut.
Josef Motzfeldt, Inuit Ataqatigiit. Tulliuppoq Per Berthelsen.
Josef Motzfeldt, Inuit Ataqatigiit.
Oqallinnermi inuttut nammineq ataasiakkaarluta soqutigisagut qanoq akuutitsigissanerlugit nammineq soorunami ataasiakkaarluta nalilersortussaavarput. Oqallinnermi uani inuiaqatigiit aaqqissugaanerannik allanngortinnissaannik 2000-imi ukiakkut Naalakkersuisut atuagaaqqianngorlugu saqqummiussaat ilaatigut tikillattaarneqarpoq, taanna immikkut Inatsisartuni oqaluuserisassatut immikkut oqaluuserisassanngortinneqarsimanngisaannarpoq.
2000-imi ukiakkut Inatsisartut ataatsimiinnerat ammarlugu Naalakkersuisut Siulittaasorisaata taamanikkut ammaalluni oqalugiaataani toqqammaviuginnarpoq.
Taamaattumik Inuit Ataqatigiit taamanikkut oqaaseqarnitsinni oqaaseqartorisatta oqaasii eqqaamaneqartariaqartut maakkuupput. Una siunissami takorluugaq tamakkivilluni akuerineqartussatut taamani saqqummiunneqanngilaq, ungasinnerusoq eqqarsaatigalugu naleqqat suusinnaaneranik saqqummiineruvoq. Taamanikkullu Inuit Ataqatigiit oqaaseqartutta oqaatigisai imaappoq; ?Piviusunngortinniagassatut saqqummiunneqartut ataasiakkaarlugit timitaliiviginiarnerini, oqaluusereqqittarnissaat nalilersuilluarnissaq tamatumani najoqqutassaapput, najoqqutaasussaajumaarput?. Taamatut oqatigineqarpoq.
Taamaattumik atuartitaanermi tunngatillugu namminersortunik atuarfinnik taamanikkut takorluugaasimasoq eqqarsaatigigaanni atuarfitsialammi apeqqut aatsaat aallarteruttortoq, kingornalu aatsaat tamatuma kingorna Inatsisartunit akuersissutigineqartoq tunngavigissagaanni Inuit Ataqatigiit nalilersuilluarnermikkut massakkut nalilerpaat atuarfitsialammut nukigut tamaasa atortariaqarigut.
Aamma taamanikkut oqaluuserineqarmat Demokraatit soorunami taamani piunngillat, taamaattumik ilisimanngilarput qanoq isumaqarnersut. Kisiannili ilisimatusarnertigut misissueqqissaarnertigut ilisimatuussutsikkullu nunatta nammineq inuussutissarsiornermut ilisimatusarnermullu suleqatigiinnissamik isumaannik naleqquttumik timitaliiniartoqarpoq, ilaatigut Ilimmarfimmik pilersitsiniarnermik tunngatillugu.
Imaappoq tamannalu Demokraatit akerlerigaat nalunngilarput, imaappoq siunissami takorluugaq immikkoortitaarlugu timitaliiviginiarneranut isummersorfigisussaavarput maanngaanniillu tamakkiisumik Inuit Ataqatigiit taamanikkut Naalakkersuisooqataasut saqqummiummassuk akerartuutitut atorneqartussatut isigineqartariaqanngilluinnarpoq.
Jonathan Motzfeldt, ataatsimiinnermi aqutsisoq, Inatsisartuni Siulittaasoq, Siumut.
Tulliulluni oqaaseqassaaq Per Berthelsen, pingajussaaniilerami naatsumik. Tulliuppoq Anthon Frederiksen.
Per Berthelsen, Demokraatit oqaaseqartuat.
Ja immaqa ukua siulliit Siumuminngaanniit Jĝrgen Wĉver Johansen-ip oqaatigisaanut aammalu ilaatigut Isak Davidsen-ip qisuariaataanut atasinnaavoq.
Uani siunnerfiginngilara nikassaanissaq, kisianni oqariartartuuvunga ilaanni toqqaannartorujussuarmik taanna nalunngilara. Kisianni tusaatissatut tiguara suleqatigiinneq siunnerfigalugu angusaq pitsaanerpaaq anguniarnissaa, taanna peqataaffigissavara.
Kisianni Isak Davidsen-imut oqaatigiinnassavara isumaqarpunga aamma politikeritut sulissagutta mamiatsajaneq taanna piginaveersaartariaqaripput. Ilaatigut sakkortoorujorujussuarnik oqaaseqarsinnaasarpugut, kisianni aamma inuttut nukittuujulluta pisariaqarpugut. Uani tunnginninngaanniit oqaatigisanni Demokraatit sinnerlugit alla anguniarneqanngilaq, periarfissanik nutaanik ammaassiniarnissaq, inuiaqatigiit aningaasaataannik atuilluarnerpaanissaq, pitsaanerpaasumik kinguneqartitsiniarnissaq. Allanik siunnerfeqanngilaq, taamaattumik naluara uani suna eqqarsaatigineqarnersoq inuit ataasiakkaat soqutigisaat assigiinngitsut, kisianni tassa Demokraatit sinnerlugit taakkua saqqummiuppakka aammalu Isak Davidsen-imut naggasiullugu oqaatigiinnassavara qujavunga amerlanerussuteqartut ammaassiniarnermi Friskolet ammaanneqarnissaannik isumaqataallutik saqqummiussaqarnerat, taanna marloriarlunga oqaatsimik ataatsimik atuivunga minnerpaamik qujallunga, taanna anguneqarmat.
Taamaattumik imatut qujaavaatsutut pissusilersornianngilanga kisianni aamma mamiatsajaneq taanna sumilluunniit sakkutut oqaluttarfimminngaanniit atorneqarnissaa tulluutsinngilara.
Qujanaq.
Jonathan Motzfeldt, ataatsimiinnermi aqutsisoq, Inatsisartuni Siulittaasoq, Siumut.
Tassa taasinialissagatta eqqaasitsissutigissavara aamma manna tikillugu allannguutissamik siunnersuuteqartoq ataasiinnaavoq, tassa partiit Demokraatininngaanniit.
Tulliuppoq Anthon Frederiksen, Kattusseqatigiit.
Anthon Frederiksen, Kattusseqatigiit.
Tassaana Ataatsimiititaliap siulittaasuata Doris Jakobsen-ip uani saqqummiussannut tunngatillugu ataatsimiititaliami annerusumik katersuuffiusinnaasimannginnera taanna uparuaanera eqqaammagu ilaatigut oqarluni, ataatsimiititaliami ilaasortat sunnguamilluunniit assortuunneqaratik isumaliutissiissut atsiorsimagaat.
Aap tassami atsiornissamut minnerpaamilluunniit assortuunnissaq pisariaqanngilaq, atsiussagaanni. Kisianni ataatsimiititaliap isumaliutissiissutaa arfinilinnik quppernilik misissorluaraanni takuneqarsinnaavoq tassani Inuit Ataqatigiit aammalu Demokraatit apeqqutini assigiinngitsuni ikinnerussuteqarlutik, amerlanerussuteqartunut isumaqataanatik atsioqataasimasut, taamaattumik sunnguamilluunniit assortuunnertaqanngitsumik ataatsimiititaliap isumaliutissiissutaa tamanik isumaqatigineqarluni naammassineqarsimasuuppat, massakkut aappassaaneerinnermi taamak annertutigisumik oqallinneq pinngitsoorneqarsimassagaluarpoq.
Tassa ataatsimiititaliami katersuuffiusumik imminnullu paaseqatigiiffiusumik suliaq ingerlanneqarsimappat immaqa siullermeerinninnermituulli annertutigisumik oqallinneq pinngitsoorneqarsimassagaluarmat, taanna eqqaasitsissutigiinnarpara.
Jonathan Motzfeldt, ataatsimiinnermi aqutsisoq, Inatsisartuni Siulittaasoq, Siumut.
Tulliuppoq Jensigne Berthelsen, Atassut.
Jensigne Berthelsen, Atassut.
Naatsukullannguamik Demokraatit oqariartuutaannut assut tupigutsunnarmat sooq inatsisiliussaagut tunngaviusumillu atorsinnaanagu, naamik inatsisit taakkua periarfissiipput namminersortunik atuarfiliornissamut, sanaartornermut tunngasortaa unittoorfigissallugu pissutissaqanngilluinnarpoq. Demokraatit aamma namminneerlutik takusinnaavaat sanaartornerup tungaatigut nunatta inissisimanera qanoq innersoq, aamma kommunit soqutiginnissagunik aamma kiffaanngissuseqarlutik isumaqatigiinniarsinnaapput qanoq namminersortunik atuarfiliortoqarniarneranut tunngatillugu inissisimarusunnerlutik.
Taamaattumik aamma eqqarsarnartoqarpoq nutaalerisutut Atassut taallugu Demokraatikkormiut nunatta karsianut aningaasanik aallerniarmata, taamaattumik taanna aamma Demokraatinut utertinneqartariaqartutut maanngaanniit oqaatigissavarput.
Jonathan Motzfeldt, ataatsimiinnermi aqutsisoq, Inatsisartuni Siulittaasoq, Siumut.
Tulliuppoq Henriette Rasmussen, Inuit Ataqatigiit, pingajussaaniilerami naatsumik.
Henriette Rasmussen, Inuit Ataqatigiit oqaaseqartuat.
Aap naatsunnguamik. Tassa Inuit Ataqatigiit tungaanninngaanniit erseqqissaatigiuassavara uani eqqartukkatta perorsaanermut tunngasortaa, atuartitsinermut tunngasortaa, pĉdagog-ikkertaa taanna akerliuffiginngilarput. Atuarfik namminersortoq pilersinneqarsinnaavoq Nuummi soorlu ASK-ip ilaani imaluunniit Sisimiuni Nalunnguarfiup ilaani. Taamaattumik aammalu ilaatigut Demokraatit sinnerlugit Per Berthelsen-ip oqarnera ilumoorniarneqartariaqarpoq, maani Inatsisartut inatsisiliussagunik namminersortoq atuarfik akueralugu aningaasassaalu naaggaarlugit, taava tamanna sumut atorneqarsinnaagami.
Taamaattumik taasilernitsinni erseqqissaatigiinnassavara Inuit Ataqatigiit tungaanninngaanniit Per Berthelsen-ip allannguutissatut siunnersuutaa naaggaasagatsigu, kisiannili inatsit maani siunnersuutigineqartoq eqqartugarput akerliuffiginagulu taaseqataaffigissannginnatsigu. Pissutigalugu una inatsit ajunngitsoq atorsinnaasutut isigigatsigu.
Jonathan Motzfeldt, ataatsimiinnermi aqutsisoq, Inatsisartuni Siulittaasoq, Siumut.
Tulliuppoq Palle Christiansen, Demokraatit.
Palle Christiansen, Demokraatit.
Tassa Josef Motzfeldt-i oqarputit Demokraatit Ilimmarfimmik akerliusut, uagununa tulleriiaarinitsinni taamatut isummersugut, tassami Ilimmarfiliortinnata meeqqat atuarfiat ingerlalluartoq pigerusupparput, kisianni Ilisimatusarfissarsuaq taanna aamma ingerlalluarsinnaanera angorusuttorujussuuarput, taamaalillutalu pilersitsiartornitsinni taava aamma pitsaassutsit appariartortarnerat aamma takusinnaavarput. Ilimmarfimmik tunngatillugu tassa 75.000 kr.-inaat katersorneqarsimapput, kisiannili aningaasat naammaginartumik amerlassusillit katersorneqareerpata pilerumaarparput.
Jonathan Motzfeldt, ataatsimiinnermi aqutsisoq, Inatsisartuni Siulittaasoq, Siumut.
Maannakkut Ilinniartitaanermut Naalakkersuisoq.
Arkalo Abelsen, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq, Atassut.
Tassa uuma oqallisigineqarnera naammassilinnguatsiarmat. Isumaqarpunga pingaartorujussuusoq maani Inatsisartut atuarfinnik namminersortunik pilersitsinnaanermut sinaakkutsissamik inatsimmik akuersippata, aamma taamatut pisoqassooq.
Taava oqartoqaraluarpoq Demokraatit tungaanninngaanniit aamma Henriette Rasmussen Inuit Ataqatigiinniit oqarpoq, taamannak periarfissiineq inatsisiliuukkutsigu aningaasassaqartinnagulu sumut iluaqutaava? Naamik, uanga isumaga malillugu una inatsit, inatsisissatut siunnersuut taanna akuerineqarpat taava taassuma kingornatigut qaquguussagaluarnersoq misissuilluarnikkut qanoq pilersitsisoqarsinnaanera taanna tullinnguutissooq. Kisiannili inatsimmik tunuliaqutassaqareerluni. Isumaqarpunga taanna alloriarneq angisuujussasoq, soorunami uggornarpoq killiffitsinni imaaliallaannaq taasaqarsinnaannginnatta, qanoq ililluni aningaasalersornissaanut aalajangersimaqqissaartumik tikkuaalluta.
Kisianni soorlu oqareersugut Naalakkersuisuninngaanniit aningaasat tulleriissaartariaqarpagut, killiffimmilu piareersimanngilagut allanut atugassaagaluartunut taamannak inissinnissaannut.
Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Maannakkut taasissaagut.
Isumaliutissiissut tunngaviusumik atuarfiit namminersortut angerlarsimaffimmilu atuartitaaneq il.il. pillugit siunnersuutip aappassaaneerneqarnerani taasissutissat.
Tassa amerlanerussuteqartut ikinnerussuteqartullu oqaaseqaateqarput, taassumap saniatigut ikinnerussuteqarluni Demokraatit saqqummiussipput, tassanilu oqaatigalugu Demokraatit 10.30.10.50-imik tunngaveqartumik taarsersuisinnaaneq periarfissatut tikkuuppaat, tassanimi issuarpara; Iluanaarnerpaasussaq tassaammat Namminersornerullutik Oqartussat.
Demokraatit siunnersuutaannik isumaqataasut qinnuvigissavakka nikueqqullugit:
6
Tamatumunnga akerliusut qinnuvigissavakka nikueqqullugit:
24-it
akerliupput.
Taasinngitsoortoqarpa?
1
Taava
maannakkut taasissutigissavarput Ataatsimiititaliami ilaasortat amerlanerussuteqartut
Siumut-meersut, Atassut-meersut, Demokraatit-neersut aammalu allaninngaanniit
tapersiillutik oqaaseqartut, tassa isumaliutissiissut taamak isikkoqarluni
akuersissutigineqassasoq.
Qassit
tamatumunnga isumaqataappat?
22-it
isumaqataapput.
Akerliusut
qinnuvigissavakka nikueqqullugit:
akerliusoqanngilaq.
Taasinngitsoortut
qinnuvigissavakka nikueqqullugit:
8-it
taaseqataanngillat.
Taamaalilluni
siunnersuut amerlanerusunit aappassaaneerneqarnermini taamak isikkoqarluni akuerineqarpoq.
Pingajussaaneerneqarnissaminut ingerlateqqinneqassasoq.
Taamaalilluni
oqaluuserisassaq taanna naammassivoq.