Oqaluuserisassani immikkoortoq 46-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut aqqaneq sisamaat, pingasunngorneq 26. marts 2002 nal. 15:45.
Per
Rosing-Petersen,
siunnersuuteqartoq, Siumut.
Qujanaq.
siullermeerneqarnerani naluneqanngitsutuut amerlanerussuteqartut ajoraluartumik
siunnersuutiga ingerlaqqittussaanngitsutut aalajangiiffiginikuuvaat.
Siunnersuuteqarninni tunngavilersuutikka uani innersuussutigiitigalugit ima
oqartariaqartutut misigisimavunga. Oqaq amigavippoq assaat sulissapput. Taanna
kukkunngikkuma Augustinus Lyngeugaluup taamatut oqarsimasutut
eqqaamaniarsoraara. Kukkussaguma utoqqatsissutigissavara.
Oqaq
amigavippoq assaat sulissapput. Taamannak oqarninnut tunngavilersuutigissavakka
ukua. Naalakkersuisunngortitsisarsimanerni arlalissuanngortuni masssakkut
partiit anguniagaanni Naalakkersuisunut ilaasortat ataasiakkaat
qineqqusaarnerni aammalu Naalakkersuisuunermikkut saqqummertarnerminni
Inatsisartunut Ilaasortaq arlalissuit ataasiinnaanngitsoq arlalissuit
qineqqusaarnermi aamma erfalasulersaarutigisartuaraluarlugu una siunnersuuteqallatuartoqaraangat
Siku Blockimut tunngassuteqartunik itigartitsissutigineqartarmat.
Taanna
eqqumiiginartorujussuuvoq itigartitsisoqartarput allamillu
siunnersuuteqartoqassanani Siku Blockimut tunngasuteqartumik. Taanna ajuusaarnartorujussuartut
uanga nammineq nalilerusuppara. Siornaakkunni qinersivik kingulleq kalaallit
tunisassiaanik pisigimik kampagniaqarpoq annertoorujussuarmik naluara qanoq
taanna nunatta karsianut naleqarsimanersoq. Manna tikillugu annertungaatsiartumik
suliarineqareerluni massakkut puigorneqarpoq malersorneqaqqinnanilu.
Tassunga
tunngassuteqarluinnaqqissaarpoq aamma Siku Blockimik tapersersuinissaq. Uagut
nunatsinni nammineq tunisassiatsinnik tunngassuteqartoraangat
sunnguamilluunniit arlaanilluunniit, uanga eqqarsartarpunga immaqaana
kanngugisaripput tamakkua nammineq tunisassiatut sanaartukkagut
illersussalluginuku immaqa kanngugisarigut.
Islandi
qiviarutsigu suna tamaat tikillugu nammineq tunisassiatik nammineq
sanasinnaasatik illersortarpaat. Uagut killormorluinnaq ittarpugut. Taanalu
kipiluttunartorujussuuvoq uannuinnaanngitsoq aamma kisiannili Siku Blockimik
ingerlatsiniartuusumut. Inuiaqatigiinnut taamanna
iluaqusiisinnaassuseqartigigaluartoq aamma una eqqarsaatigigaanni.
Tassami
massakkut ukiut tamarluinnaqqissaasa ukiumut 300 400 millionit minnerpaamik
angullugit nunatta avataaninngaaniit sanaartugassanik tikisitsisarpugut. Uffalu
namminersuaq taamatut peqartigigaluarluta periarfissagitsigigaluarluta arlaanik
utoqqatsissutissarsiulerutta assigiinngitsorpassuarnik tupinnartaqaaq avammut
nunanut allanut niueqateqarnitsinnut nammaqatigiinnerusumik inissisimanissarput
taamaalillugu annertoorujussuarmik equngasumik ajorarluartumik nunatsinnut
iluaqutaanngitsumik inissittarparput.
Taanna
ajuusaarnartorujussuartut isigaara. Aamma oqaqqissuunga oqaq amigavippoq assaat
sulissapput timitaliisoqarniartorlu itigartitsisarnissaq taanna
eqqarsaatigilluartariaqarparsi tamassi aamma Naalakkersuisut tamarmik.
Taamaattumik
aamma taakku tunngavigalugit aamma una immikkoortoq 86 ullumikkut aamma
oqaluuserisassarput aamma uunga immikkoortoq 46-mut tunngammat tassa taanna
oqaluuserisassarput immikkoortoq 86-si taamaasillunga aamma tunuartiinnartutut
nalunaarutigaara. Qujanaq.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Saqqummiussaqartup
nalunaarutaa 86 taava tunuartinneqarnissaa tusaatissatut tiguarput kisianni
taanna Attaveqaqatigiinnermut Ineqarnermullu Naalakkersuisoq maannakkut
oqaaseqassaaq.
Mikael
Petersen, Attaveqaqatigiinnermut
Ineqarnermullu Naalakkersuisoq, Siumut.
Qujanaq.
Annertunerusumik oqaaseqassanngilanga kisianni siunnersuuteqartup massakkut
oqaaseqarnermini Inatsisartut Naalakkersuisullu Siku Blocki pillugu qanoq
iliuuseqarusunngilluinnartutut eqqartuullugit oqalunnera ingasaginarmat
qaqivunga. Tassa siunnersuuteqartup eqqaamassavaa Inatsisartut
siullermeerinnimmata siunnersuummik matumani Naalakkersuisuninngaaniit aamma
Inatsisartuninngaaniit partiinit assigiinngitsuninngaaniit oqaatigineqartut ersarilluinnartuummata
tassa aaqqissuussaalluartumik Siku Blockip atorneqarnissaa pillugu suliuniutit
assigiinngitsut ingerlanneqartuarmata.
Aamma uani
siunnersuutip tunngavia unaammat aalajangiiffigisassaq tassa Siku Blockimik
qammasissiap inissialiornermik atorneqarsinnaaneranik Inatsisartut
peqqussutaanni nr. 1, 9. april 1992-imeersumi tapersiissuteqartarnermut
tunngasumik kapitalit tallimaannik periarfissiinissaq pillugu Naalakkersuisut
siunnersuusioqquneqarnissaannik Inatsisartut aalajangiiffigisassaattut
siunnersuut.
Tassa
taannarpiaruna Naalakkersuisut isumaqatiginngikkaat. Aammalu Inatsisartuni
tamakkiisumik tamanna aamma Naalakkersuisut isumaat tapersersorneqarluni. Siku
Blocki ataatsimilluunniit ajortutut imaluunniit atorsinnaanngitsutut
Naalakkersuisunit Inatsisartunilluunniit isigineqanngilaq. Kisianni
periarfissat allat atorlugit aammalu nalinginnaasumik unammilleqatigiinneq
aqqutigalugu Siku Blockip ingerlanneqarnissaa atorneqarnissaalu taanna
pingaartinneqarpoq.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Per
Rosing-Petersen, siunnersuuteqartoq.
Per
Rosing-Petersen,
siunnersuuteqartoq, Siumut.
Oqaaserpassuit
kusanartut Siku Blockimut nunatsinnut iluaqutaanavianngillat, isumasioqatigiinnerit
assigiinngitsorpassuit ataatsimiisitsinerit iluaqutaanavianngillat
sunnguamilluunniit. Uani taasinermi immikkoortoq 46-mut takutikkumaarparsi
qanoq tapersersuinersi.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Jakob
Sivertsen, Atassut.
Jakob
Sivertsen,
Atassutip oqaaseqartua.
Paatsuuisoqaqqunagu
erseqqissarniarpara Inatsit uani pineqartoq tassa Inatsisartut peqqussutaat nr.
1. 9. april 1992-imeersoq tassaammat nammineq illuliortarnermut tapiissuteqartarneq.
Per
Rosing-Petersenip siunnersuutaa akuerineqassappat nammineq illuliortarnermut
qammasissiaq atorneqalissappata qanoq akeqassanersoq naluarput aamma illorput
2000 najoqqutaralugu illut angitigissanersut. Qanoq akeqarnissaat naluarput.
Taavalu illut 2000 najoqqutaralugu qammasissiat atorneqalissappata
pinngitsoorani cementimik toqqammaveqartariaqarpoq. Iigaallu aamma
qammasissiaasariaqarlutik. Taamaattumik nunaqarfinnguami qammaasut
qassiunissaat nalorninartorujussuupput.
Tunngaviatigut
partiit tamarmik akerlerinngilaat, kisianni inatsimmut tassunga pituttoreerpat
taava kikkut nunaqarfinni qarmasissiat atorlugit illuliussanersut
apeqquterujussuanngussaaq. Taamaalilluni illoqarfinni periarfissaareersuni
taava qammasissiat atorlugit illuliorneq aamma annertusarneqaqqittussaavoq.
Soorunami taanna ajunngilluinnaraluarpoq kisianni aamma avallerni
inissaqarniarnikkut ajornartorsiutit eqqarsaatigissagaanni allatut ajornartumik
uagut tapersersimanngilarput ilaatigut oqaatigeriikkakka illup qarmakkamik
sananeqarnissaanut nunaqarfimmiut pisinnaasut ullumikkut uani
nalilerneqanngimmata. Qujanaq.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Tulliuppoq Jørgen Wæver Johansen Siumut.
Jørgen Wæver Johansen, Siumup oqaaseqartua.
Isumaqanngilanga siullermeerneqarnera aallarteqqissagipput. Kisianni oqaatigerusuppara manna oqarluartaarneq ilumut naammanngilaq kisianni aamma tamanna siunnersuuteqartumut atuuppoq. Aalajangiiffigisassatut siunnersuummik saqqummiussaqaraanni pinerit tamaasa oqaasertaliunneqarsimasut taakkorpiaat atorlugit akuerineqarnissaq taperserneqarnissarlu ilimagisariaqanngilaq. Kisianni aamma taanna pingaarnerunngilaq.
Pingaarneruvoq siunertaq soqutigisaq siunnersuuteqarfigisimasaq taassumap siuarsarneqarnissaanut tunngatillugu Naalakkersuisut inatsisartooqatillu qanoq isumaqarneri paasiniassallugu.
Matumani siunnersuuteqartoq pakatsinani nuannaaruteqartariaqarpoq aamma Inatsisartut Naalakkersuisullu siunnerfigissaarlutik Siku Blockimik inerisaanermi tapertaasinnaasut ikiuutaasinnaasut allat iluaqutaasinnaasut tikkuartorlugillu oqaaseqarfigimmatigit.
Taamaattumik pakatsissutissaqarnissaminut siunnersuuteqartoq tunngavissaqanngitsutut isumaqarfigaara. Isumaqarpunga Siku Blocki taperserlugu matumani aamma aalajangiiffigineqarumaarnera taamaalillugu Inatsisartut alloriarfigissagaat. Naak siunnersuuteqartup aalajangiiffigisassatut siunnersuuteqarnermini oqaasertaliussai taakkorpiaat isumaqatiginagit Inatsisartut taasigaluarunik. Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq Anthon Frederiksen Kattusseqatigiit.
Anthon Frederiksen, Kattusseqatigiit.
Tassa suliap siullermeerneqarnerani siunnersuuteqartoq tapersersimavara. Aammalu naluneqangitsutut uanga nammineerlunga Siku Blocki pillugu siusinnerusukkulli aamma siunnersuuteqartarsimagaluarpunga.
Kisianni ajoaraluartumik siunnersuutit maannamut Siku Blockimut tunngasut arlalinngortut tamatigorluinnaq itigartinneqartarput. Itigartitsiniarnernilu allat eqqartorneqarneq ajorput aporfissat, aporfissat inatsisitigut aporfissat assigiinngitsut. Taanna nukillalaarnarpoq.
Aamma uanga neriulluarsimagaluarpunga immikkoortoq 86 ullumikkut oqaluuserineqartussaq taanna isumerfigineqassasoq iluamik kisianni siunnersuuteqartup paasivara tunuartikkaa. Uggornarpoq aamma taanna.
Kisianni eqqarsarluarutta aammalu naalakkersuinikkut anguniakkatut eqqartorneqartartut tamanit tassa nunatta pissarititaanik atorluaanissaq eqqarsaatigigaanni oqartoqarsinnaagaluarpoq ila taamatut oqarluartaartarnerit sooruna timitalerneqarnianngitsut.
Ungasinngitsukkut Naalakkersuisunut ilaasortat ilaat oqarmat nunatsinni atorluaasariaqarpugut pissarititaasunik allaat neqit avataaninngaaneersut akitsuuserlugit. Immaqa illuatungaanulluunniit saappianngitsoq avataaninngaaniit avaarlugu anaaneqarpoq nilleqqikkuit, nillerteqqinngitsoorlugulu ilumut taamatut nunatsinni pissarititaasut atorluarneqarnissaat illersorneqarnissaat naalakkersuinikkut tapersersorneqartassanngippata taava takukuminaappoq qanoq ilillugit nunatsinni pissarititaasut tamakkiisumik tapersersorlugit suliniutiginiarneqassanersut.
Unami eqqartugarput ukiorpassuanngulerput massakkut naalakkersuinikkut qaqinneqartaraluarluni. Kisianni qaqinneqartorlu inatsit aajuna aajuna aporfissaq, aajukua akornutissat aajuku aallat taassumap suliap ingerlariaqqinnissaanut akornusiisussat. Taamatut taanna kaaviiaartinneqarnera isumaqarpunga qaangertariaqaleripput nutarterinikkut.
Nutarterisariaqarpugut uumap inatsisit maani eqqartorneqartut uagut allanngortitassarivagut. Nammineerluta allangortitassarivagut, allanik aperisassaqanngilagut.
Inatsisartut Naalakkersuisullu maani issiasut taakku kisimik aalajangiisussaapput. Isumaqarpunga immikkut ittumik isigineqartariaqartut inuit sapinngitsut nammineersinnaasut nunatta pissarititaanik atorluaarusullutik ilungersorlutik sulisut immikkut ittumik isigalugit aaqqiiffigineqarsinnaasariaqartut. Oqaannarsinnaanngilagut illit taamaalioruit taava aqaguagu allat takujumaarpagut 20-t aamma immikkut ittumik qinnuteqartut.
Inuit nammineersinnaasut pissarititaasunik nunatta pissarititaanik atorluaasinnaanermik siunertaqarlutik sulisut ikittuaraararsuupput. Tamakkununngalu ilaavoq Jakob Knudseni.
Taamaattumik immikkut illuinnartumik tunngaveqarluni suliat ilungersorluni ingerlanneqartut aamma immikkut ittumik isigineqartariaqartut uanga isumaqarpunga. Taamaattumik siunnersuuteqartup siunnersuutaa aappassaaneerneqarnerani taperserlugu taaseqataassuunga.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Oqallinneq ingerlaqqitsinnagu oqaatigissavara udvalgininngaaniit ilumoorpoq saqqummiussisoqarsimanngimmat siullermeerneqarnerani itigartinneqarnera aammalu suliaareersimasut innersuullugit suliassap tassa taanna killiffigaa.
Taamaattumik itigartitsinermut ilanngullugu ilaatigut partiit aamma Inuit Ataqatigiit allalaarnertigulluunniit akisimasariaqaraluartoq aamma innersuussutigisimavaat siullermeerneqarmat.
Taamaattumik uani ingerlateqqinneqarsimanngilaq udvalgimit taamaattumillu oqallisiginissaanut annertunerusumik tunngavissaaleqinarluni Inatsisartunut.
Taamaattumik oqaatigissavara siullermeerneratut suliassaq ingerlaqqissinnaanavianngilaq naatsumik oqaaseqartussat oqaaseqarnissaat kissaatigissavara. Tulliuppoq Ane Hansen, Inuit Ataqatigiit, tulliupporlu Jensine Berthelsen, Demokratit.
Ane Hansen, Inuit Ataqatigiit oqaaseqartuat.
Oqaq amigavimmat assaat sulisut utaqqivagut. Tassa Inuit Ataqatigiinninngaaniit oqaatigissavarput assorujussuaq uggorigatsigu maani taamatut sulisoqarnera. Tassami partiimut tunuliaqutaralugit qinigaagatta taava aamma naatsorsuutigilluinnaqqissaarparput oqaluuserisassanngortitagut partiitsinni aamma minnerpaamik illersorneqarlutik maani suliarineqartassasut.
Tassa uagut Inuit Ataqatigiinni tamanna suleriaaserigatsigu partiitut partiimi ilaasortatut qinigaagatta. Tassa assut ajuusaarnarpoq uggornarlunilu uani ataatsimiinnerup aallartinneraniilli oqaluuserisassanngortitat arlalissuit Atassutikkormiut Siumukkormiut uagut Demokratillu Kattusseqatigiillu oqaluuserisassanngortitagut amerlanerpaarpaat ingerlaqqinngitsoormata.
Taamaattumik kissaatiginarpoq siunissami oqaluuserisassanngortitsinermi minnerpaamik partiivisa aamma isummersorfigalugit pisimassagaat maani nukiit asuliinnaq atulussinnassanngikkutsigit. Tassa uanga uggorisorujussuuara immikkoortoq 86 uagut Inuit Ataqatigiinni sukumiisumik piareersarfiginikuusarput suliluunniit oqaaseqarfiginatigu maanngaaniit tunuartiinnarneqarmat. Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Jensine Berthelsen, tulliuppoq Kalistat Lund.
Jensine Berthelsen, Atassutip oqaaseqartua.
Inuit Ataqatigiit isorisassarsiorlutik uteqattaariinnalernerat qisuariarfigissanngilara aamma ippassaq taannarpiaq aamma qaqinnikuuvaat. Kisiannili siunnersuuteqartumut Anthon Frederiksenimullu apeqqutigerusuppara tapersersuineruna qanoq ittoq ujartorissi. Tapersersuinerunanerusorissagussiuk værsgo aajukua nunatta karsiata aningaasaatai namminersorsinnaassuseq tassani innarlerneqarujussuassaaq isumalluuteqarnermik suli annerusumik pilersitsiniarsarissaagut.
Tusareerparput Naalakkersuisut massakkut misissuipput qanoq ililluni Siku Blocki atorluarneqarnerpaajusinnaanersoq. Taanna isumaqarpunga tapersersuinerunngitsutut taassallugu aamma ingasappallaartoq. Allaanngilaq sosoqarsimanngitsoq. Naamik oqaluttuunneqareerpugut siullermeerneqarnerani siunnersuutip taassuma qaqinneqarnerani nunatsinni Siku Blocki atorlugu sanaat amerliartorput taanna isiginngitsuusaarsinnaanngilarput kisiannili aajuna ajornartorsiutip aamma qeqqa isigineqartariaqartoq. Tapersersuineq qanoq ittoq ujartorpisiuk taanna apeqquterujussuuvoq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq Kalistat Lund, Siumut taavalu tulliulluni Jørgen Wæver Johansen.
Kalistat Lund, Siumup oqaaseqartua.
Aap Ane Hansen suliaasissatsinnik oqaaqqissaariniarnera iserfigissanngilara. Tassa Siku Blockip una siunnersuuteqartoq paasivara aappaatigut soorunami taanna ukiorparujussuarni eqqartorneqarsimanerani soorlusooq arlaatigut uninngasoqartoq. Kisianni maannakkut siunnerfiit ersarissiartortutut aammalu taakua aallaavigalugit sulinerit ingerlanneqartariaqartut.
Maannakkut aamma Naalakkersuisut saqqummiinerat uanga isumalluarnartutut isigaara. Isumaqarpunga maannakkut siorngatigut aallaaviusarsimasut uninngatiinnarlugit misissuerusaarnerit allaffimminngaaniit misissuerusaarnerit tamakkua illuliassat imaluunniit illuliassat pitsaassusaannik nalilersuinermut atorneqarsinnaanngitsut nalunngilarput.
Suulluunniit atortussiat avataaninngaaniit tikisittarpagut annertunerusumik misilittarneqanngitsut. Maani nunatsinni uagut najugaqarfinni misilittaanerit ingerlagaangata aatsaat ukiut 50-sit qaangiukkaangata ilaanni aatsaat pitsanngoriartulertarput.
Tassa Siku Blocki maannakkut taamatut uninngatiinnarneqarnerani soorunami atulivinnissaa kinguariartortussaavoq. Taamaattumik atortussiap sananeratigut sanngiiffiusut sanngiiffiusut aatsaat taakkua nassaarineqarsinaammata maannakkut illut pingasut sananeqarsimasut pingasut takutereermassuk kaammattuutigiinnassavara sapinngisamik illuliarineqarsinnaasut atorlugit taakkua Siku Blockip pitsaassussaa sanngiiffiilu misissorneqaqqullugit.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Jørgen Wæver Johansen Siumut tulliuppoq Anthon Frederiksen, Kattusseqatigiit.
Kissaaatigissavara naatsumik oqaaseqartoqassasoq.
Jørgen Wæver Johansen, Siumut.
Aap qujanaq, tassa sallu qanermiorinnginnakku ersissuteqarnanga qaqeqqilaarpunga. Inatsisartunut Ilaasortamut Ane Hansenimut oqaatigerusuppara eqqoqqissaanngimmat suleriaaseq taanna eqqartugaa.
Siullermik oqaatigerusuppara Inatsisartunut ilaasortaq kinaluunniit pisinnaatitaammat nammineq siunnersuuteqarnissaminut kiffaanngissuseq tamanna Siumuminngaaniit ataaqisariaqarparput. Aamma kiffaanngissuseq tamanna grundlovemi ilaatigut illersugaavoq inuit qinigaannut tunngatillugu. Qularinngilara aamma Johan Lund Olsenip tamanna uppernarsarsinnaagaa.
Aamma oqaatigerusuppara ilumuunngimmat Inuit Ataqatigiit suleriaasiat taannaajuaannarsimammat. Inuit Ataqatigiit Naalakkersuisooqataanermik nalaani aamma namminneq ilaasortamik siunnersuutaasa ilaat itigartitsissutigisarpaat.
Taamaattumik taanna eqqumiigineqarsinnaanngilaq taamatut partiini gruppini ilaasortat ataasiakkaat pisinnaatitaaffitik atorluarlugit siunnersuutaasa ilaat sinneri tamaasa isumaqatigineqartannginneri. Aamma partiimi ilaasortaaqataanniit.
Ilaatigut innersuussutigineqartarmata Naalakkersuisut pineqartumut tunngatillugu suliarereersimasaat aammalu suliaat. Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Anthon Frederiksen Kattusseqatigiit.
Anthon Frederiksen, Kattusseqatigiit.
Tassa soorunami apeqqut aamma akineqartussaammat Atassutip oqaluttuata apeqqutigisaa tapersersuineq qanoq ittoq ujartorneripput. Uanga siunnersuuteqartoq sinnerlugu soorunami oqaaseqarsinnaanngilanga. Kisianni uanga nammineerlunga tapersersuineq ujartugara tassa Atassutip oqaaseqartuata paasisimanngippagu aammalu tusaasimanngippagit oqaaseqaatikka uani siusinnerusumi qinnuigissavara siutini ammarluaqqullugit paasilluarniassammagu tapersersuineq qanoq ittuusoq ujartorneriga.
Tassa tapersersuineq uani ujartugara tassaavoq uagut
Inatsisartuni maani oqartussaaffipput akisussaaffipput aammalu inatsisinik
allanngortitsisinnaanerput taanna atorlugu periarfissat Siku Blockimik
pitsanngorsarneqarnissaat. Oqaannarnata
una inatsit imaammat susinnaanngilagut. Inatsisit uagut nammineerluta
allanngortissinnaasavut tunngavigalugit periarfissiisoqarsinnaanera taanna
tassuuna tapersersuineq ujartorparput. Qujanaq.
Jonathan Motzfeldt, ataatsimiinnermi aqutsisoq, Inatsisartut
Siulittaasuat, Siumut.
Tassa
Naalakkersuisut innersuussutaat akuersaarneqarnersoq taasissutigissavarput.
Tamatumani Inatsisartunut Ilaasortaq Per Rosing-Petersen siunnersuutaa
akuersaarneqarnissaa maannakkuugallartoq Naalakkersuisut
kaammattuutigisinnaanngikkaat. Kisiannili tassunga ilanngullugu nalunaarutigisimallugu
illuliornermi nunap nammineq pissarititaanik atuinerulernissamik
siunnersuutikkut siunertaasut Naalakkersuisut tamakkiisumik tapersersoraat.
Aammalu 10/40/50
atorlugu aaqqissuussaannaangitsuni aammali piginneqartigiilluni illuliortarneq
qammassissiat Siku Blockip illuliornermut atorneqarnissaanut
periarfissaalluartut innersuussutigalugit ilanngullugulu Naalakkersuisut
nalunaarutigineqarsinnaavoq qammasissiap Siku Blockip APS-imeersup atorlugit
sanaartorsinnaanissap inuiaqatigiinnut aamma ingerlatsinermi aningaasartuutigut
kingunerisinnaasai misissuiffigineqarnissaat Naalakkersuisut siusinnerusukkut
oqaatigisimasaat 2003-mi upernaakkut naammassineqassasoq
naatsorsuutigineqarluni.
Tassa maannakkut
akuerineqarsinnaanngikkallarnerannut tunngatillugu Naalakkersuisut
oqariartuutaat. Tamatumunnga isumaqataasut qinnuigissavakka nikueqqullugit.
23-t isumaqataapput akerliusoqarpa? 1. Taasinngitsoortoqarpa 1. Taamaalilluni
Naalakkersuisut akissutaat akuerineqarpoq.