Oqaluuserisassani immikkoortoq 53-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut
ataatsimiiffiusut qulingiluaat, ataasinngorneq 17. marts 2003, nal. 13:07.
Otto
Jeremiassen, siunnersuuteqartoq,
Atassut.
Kangaatsiami
siusinnerusukkut finanslov-mi aningaasaliisoqarsimagaluarpoq talittarfitta
allilerneqarnissaanut kisiannili peerneqarsimalluni.
Ullumikkut
talittarfipput angallannermut kiisalu tunisassianik tulaassuinermut annertuumik
qitiuvoq, qangalilu ajornartorsiutaasartoq ilisimaneqassasoq naatsorsuutigaara,
tassami ilaasortaatit tallisat
talissinnaaneq ajorput talittarfiup mikivallaarnera aammalu ikkappallaarnera
pissutigalugit, tamatumallu tunngavianit sissarsuarnut ikaartaataa
talinniartillugu sissarsuarniittut umiatsiaaqqat piaarneqartariaqartarlutik.
Kiisalu
nioqqutissanik pajuttoqartillugu angallatit talittarfimmi taleqqasut
avalatsinneqartariaqartarput umiarsuaq usigiarsinnaaqqullugu, angallatinillu
avalatsitsisarneq nalunaaqutaq apeqqutaatinnagu pisinnaasarpoq ilaatigut
angallataatilinnut kusanaangunartaqisumik, aammalu nioqqutissanik pajunnerat
naalakkajunneqartarpoq aalisakkanik tuniniaasullu aammalu aalisakkanik
assartuisut nalerorlugit tamaalilluni talittarfik ataatsikkut sulliviulersillugu
tattoqisaaffiulersarluni, tamakkuinnaalluunniit eqqarsaatigalugit isumaqarpunga
Kangaatsiap talittarfiata allilerneqarnissaa pisariaqartoq.
Qujanaq.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut.
Attaveqaqatigiinnermut
Naalakkersuisoq.
Mikael
Petersen,
Attaveqaqatigiinnermut, Avatangiisinut Ineqarnermullu Naalakkersuisoq, Siumut.
Naalakkersuisut
naluneqanngitsutut Kalaallit Nunaanni umiarsualivinnik allilerinissamut
pilersaarut Inatsisartut 2002-mi upernaakkut ataatsimiinneranni Inatsisartunut
ilaasortanut ilisimatitsissutitut tunniunneqartoq suliaritissimavaat.
Naalakkersuisut
tamatuma kingornagut aalajangerput allilerinissamut pilersaarut inuiaqatigiit
aningaasaqarnerannut kingunerisassat pilersaarummi siunnersuutigineqartut
pillugit misissueqqissaarnermik tapertaqartinneqassasoq. Tamatumani ukiuni
aggersuni sanaartugassanut aningaasaliinissat annertuut pineqarput,
Naalakkersuisullu pingaartuusoraat aningaasaliinissat sapinngisamik
pitsaanerpaamik tunngaveqarluni pilersaarusiorneqassasut.
Inuiaqatigiit
aningaasaqarnerannut kingunerisassanik misissueqqissaarneq 2003-mi marsip
ingerlanerani naammassissangatinneqarpoq, taamaalillunilu Inatsisartut 2003-mi
ukiakkut ataatsimiinneranni aningaasanut inatsisip oqaluuserinerani pigineqalersinnaassalluni.
Naalakkersuisut
umiarsualivinni pissutsit ajornartorsiutaasinnaanerannut
alaatsinaakkaluarpataluunniit Kangaatsiami nutaamik talittarfiliornissaq
umiarsualivinnik allilerinissamut pilersaarummi pingaarnersiuilluni tulleriiaarinermut
ilaanngilaq. Tamanna tungavilersorneqarpoq nunatsinni allani umiarsualiviit
allilerneqarnissaannik pisariaqarnissaannik pisariaqartitsinerit
nukinginnarnerunerannik.
Siunnersuuteqartup
ilaatigut tikkuarpaa umiatsiaaqqat
umiarsuaq sinersortaat nioqqutissanilluunniit pajuttoq
umiarsualivissikkaangat ullup unnuallu ingerlanerani sukkulluunniit
nuunneqartarnerat ajornartorsiutaasoq. Naalakkersuisut isumaqarput
umiatsiaaqqanut immikkut uninngatitsisarfik sananeqartariaqartoq. Tamanna
naluneqanngitsutut kommunip suliassaraa.
Taamaattumik
Inatsisartunut ilaasortap Otto Jeremiassenip siunnersuutaata
akuersaarneqarnissaa Naalakkersuisut kaammattuutigisinnaanngilaat.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut
Partiip
oqaaseqartui tikippagut, aamma tikilluaqqussavarput Kalistat Lund, maannakkut
ataatsimeeqataalluni aamma peqataalersoq.
Kalistat
Lund, Siumup
oqaaseqartua.
Kangaatsiami
talittarfiliornissamik, Inatsisartunut ilaasortap Otto Jeremiassenip Atassummeersup,
siunnersutaa Siumumiit ima isummerfigaarput.
Nunatsinni
umiarsualivinnik allilerinissanut pilersaarut, Naalakkersuisut
suliaritissimasaat maanna pigineqarpoq. Pilersaarummi nalilersuisoqarsimavoq
tulleriiaarisoqarsimallunilu sumiiffinni sorlerni pisariaqartitsinerit
annerunersut, taannalu aallaavigalugu siunissami umiarsualiorfilerinerit
ingerlanneqassasut.
Naalakkersuisut periaaserisaat Siumumiit isumaqatigaarput.
Isumaqarpugut nalilersuilluni pisariaqartitsinerusunik siulliutitsisarneq
siunissami aamma atorneqaannartariaqartoq.
Inatsisartunut ilaasortat ataasiakkaarluta ilisimanngilarput,
illoqarfinni nunaqarfinnilu tamaginni, umiarsualiveqarnikkut qanoq
inissisimasoqarnersoq. Nalaatsortumik ilisimasagut tulleriiaarissutigilissagaluarutsigit,
aaqqissuussaanngitsumik ineriartortitsisoqalissaaq.
Siumumiit
pingaartipparput umiarsualiveqarnikkut ineriartortitsinerit ingerlajuarnissaat
aammalu ingerlaavartumik nalilersuijuartoqarneragut, pissusissamisoortumik
tulleriiaarinerit ingerlanneqarnissaat.
Siumumiit
taama oqaaseqarluta nalunaarutigissavarput, siunnersuut
akuerseqataaffigissanngikkipput.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut.
Tulliuppoq
Josef Motzfeldt Inuit Ataqatigiit.
Josef
Motzfeldt, Inuit
Ataqatigiit oqaaseqartuat.
Inatsisartuni
ilaasortap Otto Jeremiassenip siunnersuutaa kommunip pineqartup
sanaartugassatut aningaasaliiffigineqartussatut kissaatigisimappagu ukiup
tullianut aningaasanut inatsisissatut Naalakkersuisut siunnersuutigiumaagaanni
tulleriiaarinissami nalilerneqareerluni Inatsisartut aningaasaqarnermut
ataatsimiititaliaata sulinerminut ilanngutissagaa eqqortuliornerusoq Inuit
Ataqatigiit isumaqarput.
Sanaartugassatut
aningaasaliiffigineqartussatut siunneruutit kommunalbestyrelsinit Naalakkersuisunut
saqqummiunneqartussaanerat nalininnaq suleriaatsimiippoq.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut
Tulliulluni
oqaaseqassaaq Jakob Sivertsen Atassut.
Jakob
Sivertsen,
Atassutip oqaaseqartua.
Qujanaq.
Inatsisartunut
ilaasortap Otto Jeremiassenip siunnersuutaanut Atassut -mit imatut
oqaaseqassaagut.
Siunnersuummik
saqqummiussaqartup tunngavilersuutai Atassut -mit paasilluarparput, aammalu
siunnersuuteqartup siornatigut Kangaatsiami talittarfiliornissamik
pilersaaruteqartoqarsimagaluarneranik saqqummiussaqarnermininut tunngatillugu
oqaatigisaa ilumoornerassavarput.
Naalakkersuisut
siunnersuummut akissuteqaamminni Kalaallit Nunaanni umiarsualivinnik
allilerinissamut pingaarnersiuilluni tulleriiaarinermut ilaanngitsoq oqaatigaa,
erseqqissarluguli nunatsinni piffinni assigiinngitsuni umiarsualivinnik
allilerinissamut pisariaqartitsinerit nukingernarnerunerarlugit. Soorunami
tamanna Atassut -mit paasilluarsinnaavarput, pingaarnersiuilluni tulleriiaarinissaq
pisariaqarmat.
Kangaatsiami
pisariaqartitsineq tunngavigalugu talittarfiup pitsanngorsarneqarnissaanik
2000-mut Inatsisartut aningaasanut inatsisissaannut aningaasaliinissamut
missingersuutinut ilanngusisoqarsimagaluarpoq.
Taamaattumik
Atassut -mit Naalakkersuisunut piumasarissavarput talittarfinnik
nalilersuinerit misissueqqissaarnerillu ukioq manna naammassineqarpata Kangaatsiami talittarfiup allilerneqarnissaa
tulleriiaarinermut ilannguneqassasoq.
Taamatut
oqaaseqarluta siunnersuut maannakkuugallartoq akuersaanngilarput
misissuilluarneq pilersaarusiorluarnerlu eqqortumik aningaasaliinissamut
Atassut -mit pingaartikkatsigu.
Qujanaq.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut
Tulliulluni oqaaseqassaaq Per Skaaning Demokraatit.
Per Skaaning, Demokraatit oqaaseqartuat.
Inatsisartup Otto Jeremiassenip siunnersuutaanut Demokraatit tungaaninngaanniit tulliuttut pingasut ataatsimoortillugit suliarerusuppagut, tassa Kangaatsiami talittarfiliornissaq taavalu immikkoortoq 54, tassa oqaluffiit iluarsaanneqartarneri kommuninut tunniunneqarnissaat. Taavalu immikkoortoq 55 Kangaatsiami oqaluffiliornissamut siunnersuut ataatsimoortillugit suliarineqartartussaasoraagut.
Uagut isumarput naapertorlugu siunnersuutit Naalakkersuisunut apeqqutitut saqqummiunneqartariaqarput, KANOKOKA-luunniit aqqutigalugu. Uagummi Inatsisartuuvugut taamaattumillu pingaarnersiuilluta oqaaseqartariaqarluta. Taamaattumik siunnersuut akuerineqannginnissaa siunnersuutigaarput.
Anthon Frederiksen, Kattusseqatigiit.
Inatsisartunut ilaasortap Otto Jeremiassenip siunnersuutaata assinga siusinnerusukkut aamma uanga siunnersuutigisimavara, kisiannili amma ajoraluartumik taamanikkut itigartitsissutigineqarluni.
Siunnersuut aamma uanga inatsisartunut ilaasortatut ataasiarnanga Kangaatsiamiittarninni ilisimasaqarfigilersimasara; ilumut Nunatsinni talittarfippassuit iluarsaanneqarnissaannut pisariaqartitsisunut ilaalluinnarpoq, kisianni-aasiit soorunami tulleriiaarinissaq aningaasassaqartitsinnginnerlu suliassap naammassiniarneqarsinnaaneranut apeqqutaalluinnartut aamma Naalakkersuisut akissuteqaamminni ersersippaat.
Taamaammat isumaqarpunga Naalakkersuinikkut isumatuumik nutaamillu eqqarsartaaseqarluni maanna Naalakkersuisuusut ingerlatsinissaat pisariaqarluinnartoq.
Siunnersuummut attuumassuteqanngikkaluartoq aamma oqallissaarutiginiaannarnagu eqqaasitsissutigiinnarusuppakka; Naalakkersuinikkut kukkussutaasartut, ilaatigut assersuutigalugu maanna siunnersuutigeqqinneqartumut aningaasat ilaat atorneqarsinnaasimagaluartut silaannarmullusooq iginneqarsimapput.
PUISI A/S-ikkut Disko-kut allarpassuillu nalunngereeqigatsigit eqqartoqqissanngilakka, kisianni aningaasarpassuit assigiinngitsunut iluarsaatassarpassuarnut pisariaqartippavut, minnerunngitsumik atuarfiit oqaluffiillu aamma iluarsaanneqarnissaannut atorfissaqartingaarpavut, taamaattumik Inatsisartut Naalakkersuisullu uatsinnut salliutinnginnissarput aamma eqqarsaatigilluartariaqarparput.
Nalunngikkaluarlugu umiattaanut immikkut tulattarfeqarnissaq kommune-t isumagisassarigaat, taamaattoq uani suliassat inuiaqatigiinnut tamanut ilaatigut aamma atuisut kommune-mut tunniutiinnassallugit ajornannginaarineruvallaartoq, tassami tamatta nalunngereerparput Kangaatsiap kommune-a aamma aningaasatigut ajornartorsiuteqartoq.
Takusinnaasakka paasisinnaasakkalu naapertorlugit iluarsisariaqartut siunnersuummi eqqartorneqartut Kangaatsiap kommune-ata kisimiilluni iluarsisinnaanngilai, taamaammat isumaqarpunga siunnersuut Nunatsinni talittarfiliornissanut allilerinissanullu pilersaarummut tulleriiaarinermi ilanngunneqartariaqartoq.
Taamaamma siunnersuut paasilluarlugu taperserpara suliallu aappassaanneerneqannginnerani Attaveqaqatigiinnermut Ataatsimiititaliami suliarineqarnissaa inassutigalugu.
Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut
Otto
Jeremiassen, siunnersuuteqartoq.
Otto
Jeremiassen, siunnersuuteqartoq,
Atassut.
Siullermik
Partiinut akissuteqartunut qujavunga, minnerunngitsumillu Attaviitsut
Kattusseqatigiit taamatut siunnersuuteqarnitsinnut tapersiinerannut.
Soorunalimi
ajuusaarnarpoq kingumut taamatut tulleriiaarinermik nalilersueqqinnissamik
tunngavilimmik Kangaatsiap qangali talittarfitigut piorsaavigineqarnissaannut
siunnersuuteqartoqartaraluarsimanerannik, taamaattorli peerneqartarsimasumik
kinguneqartumik aamma matumani paasinarmat tamanna kingumut
aallaavigineqaqqissasoq.
Tassalu
oqareernitsituut taaneqareertutullu siusinnerusukkut 10 mio.-ninik
aningaasartalerneqaraluarsimasoq peerneqarsimasorlu, ukiorlu kingulleq aamma
normu 7-tut inissisimasutut oqaatigineqarsimagaluartoq, kingumut massakkut takussinnaasakka toqqammivigalugit
malugisinnaagakku
tulleriiarinermulluunniit
lanngunneqartussatut innersuunneqanngitsoq.
Taamaattorli
neriullunga aappassaaneerneqarnissaannut innersuunneqassappat tamanna
sukumiisumik nalileersuuffigineqarumaartoq.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut
Taamaalilluni oqaluuserisassaq
tassani naammassivoq. Oqaaseqartut amerlanerit apeqqutip taasuma
tulleriiaarinermi inissinneqarnissaa siunnersuutigaat. Taamaalilluni
sanaartugassat, umiarsualivinnik sanaartugassat tulleriiaarneqarneranni
Kangaatsiap umiarsualiviata allineqarnissaa aamma nalilerneqarnissa
kissaatigineqarluni.