Kalaallit Nunaanni Inatsisartut

Oqaluuserisassani immikkoortoq 54-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ullut ataatsimiiffiusut qulingiluaat, ataasinngorneq 17. marts 2003, nal. 13:26.

 

 

Oqaluuserisassani immikkoortoq 54

 

 

Oqaluffinnik aserfallatsaaliinermik akisussaaffiup kommuninut nuunneqarnissaata sulissutiginissaanik Naalakkersuisut peqquneqarnissaat pillugu Inatsisartut aalajangiiffigisassaattut siunnersuut.

(Otto Jeremiassen)

(Siullermeernera)

 

Otto Jeremiassen, siunnersuuteqartoq, Atassut.

Soorlu ullumikkut oqaluffiit aserfallatsaaliornerat Namminersornerullutik Oqartussanik akisussaaffigineqarpoq, tamatumalu allanngortinnissaa assut kissaatiginaraluarpoq qanimut atuisunut tassalu Kommunenut akisussaaffik tunniukkaanni, soorunalimi nalunngilarput aningaasanik nassataqassasoq tamannalu imatut isumaga malillugu aaqqinneqarsinnaasorivara tassalu bloktilskud-nut ilanngullugit Kommune-nut akisussaaffigitilersinnaapput taakkulu oqaluffiit aserfallassimasut teknisk-mi atorfilittatik peqatigalugit suliaritittarsinnaavaat.

 

Taamaallunilu qitiusumut tamatuma ingerlanneqarnera siammarlugu tunniunneqassagaluarpoq Kommunenut susassaqartunut. Aammalu ullumikkut oqaluffiit ilaat aserfallassimaqisut sukkanerusumik iluarsaanneqarsinnaanerat aqqutissiuunneqarsinnaagaluarmat.

 

Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.

Siullermik akissuteqassaaq Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq.

 

Arkalo Abelsen, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq, Atassut.

Qujnaq.

 

Inatsisartunut ilaasortap Otto Jeremiassenip ataatsimiinnermut matumunnga siunnersuutigaa oqaluffiit aserfallatsaalineqarnerisa kommuuninut nuunneqarnissaat.

 

Naalakkersuisut sinnerlugit oqaluffiit aserfallatsaalineqarneri iluarsaanneqartarnerilu pillugit malittarisassat maannamut atuuttut naatsumik nassuiaateqarfigilaassavakka. Ilagiit Sinniisaasa oqaluffimminnik aserfallatsaaliiniarlutik isumassarsineranniit suliassap naammassinissaata tungaanut ingerlaaseq Oqaluffik pillugu Inatsisartut Peqqussutaanni nr. 15-imi, 28. oktober 1993-imeersumiit § 21, 22 aamma 29-mi nassuiarneqarsimavoq.

 

Paragraffit taakku naapertorlugit Naalakkersuisut aalajangiineratigut nutaamik oqaluffittaarnissamut, aserfallatsaaliinissamut iluarsartuussinissamullu oqaluffiup qinikkatut sinniisai kissaateqarsinnaapput. Naalakkersuisut sinnerlugit aalajangersakkat tassunga tunngasut provstiudvalgimut ilagiillu sinniisaannut atorneqarsinnaasunngorlugit ineriartorteqqinnissaat aallarnerusuppara, taamaalilluta suliap ingerlanerani ersarinnerusumik malinnaasinnaanissaq qulakkeerniarlugu aammalu tamanut pilertornerusumik eqaannerusumillu ingerlaaseqalertoqarnissaa anguniarlugu.

 

Naalakkersuisut tunngaviusumik suliamut attuumassuteqartut tamaasa peqataatinneqarnissaat qulakkeerniarsimavaat, tassa sumiiffinni tamani, nunap immikkoortuani nunalu tamakkerlugu oqartussat aalajangiisartullu tamakkerlugit. Taamaammat kommunemiit tunuliaqutaqartumik ilanngussiwoqassagaluarpat tamanna suliassamut sivitsorsaaginnartussaassaaq.

 

Naak Naalakkersuisut siunnersuut maannakkuugallartoq oqaasertalerneqarsimanera naapertorlugu akuerisinnaanngikkaluaraat Naalakkersuisuniit ajornartussaqartinneqanngilaq ilagiit sinniisaannut qinikkanut atuagassiaq ilitsersuut paasiuminartoq suliarissallugu aallartinneqarsinnaasoq, taamaalillutik allaffissornikkut malittarisassat sammisamut attuumassuteqartut qinikkanut ingerlateqqinneqarsinnaanngussammata, soorlu provsteqarfinni pisortaqarfinnilu illussamik sanaartortitsisinermut tunngassutilinni allaffeqarfimmiunut taamaattoqarsimasoq.

 

Naalakkersuisut illut oqaluffinnut attuumassuteqartut sanaartorneqarnerannut aserfallatsaalineqarnerannullu nalinginnaasumik akisussaaffigineqarnerisa qitiusumut inissinneqarnissaannut pissusissamisoortutut isiginninnerannut pissutaavoq, isumaqartoqarmat oqaluffiit amerlangaatsiartut napatittuarnissaat isumannaartariaqarsorineqartoq allanngutsaaliinissamullu aalajangersakkat ataani tamakku inissisimasuusarmata, akisussaaffillu tamanna aamma Naalakkersuisuniimmat.

 

Iluarsartuussisarnissamut atortussat qitiusumiit aqunneqarmata tamanna pingaarnersiuisarnerup tulleriissaariffigineqartarnera tamanit malinnaaffigineqarsinnaaneranik periarfissiivoq suliassanullu aningaasartuutissat immikkoortereersimasat taamaalillutik oqartussaaffigineqarsinnaallutik, tamatumalu kingunerissavaa Nunatsinni sumiiffiit tamarmik naligiimmik pisassaqartitaanissamut periarfissaqalissasut aningaasartuutitigut namminneq qanoq nammataqartigisinnaanerat apeqqutaatinnagu.

 

Tamanna tunuliaqutaralugu Naalakkersuisut siunnersuutip akuerineqarnissaa innersuussutigisinnaanngilaat.

 

Qujanaq.

 

Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.

Partiit oqaaseqartuinut tassa ingerlavugut, taavalu Kalistat Lund Siumut.

 

Kalistat Lund, Siumup oqaaseqartua.

Inatsisartunut ilaasortap Otto Jeremiassenip Atassut, siunneruutaa Siumumiit ima oqaaseqarfiginiarparput.

 

Siumumiit isumaqarpugut, oqaluffiit aserfallatsaalineqartarnerisa qitiusumiit akisussaaffigineqarnerat pissusissamisoortoq. Upperisarsiornermut attuumassuteqartut, inuiaqatigiinniit susassarinniffiusut, ataatsimit aallaaveqarlutik qitiusumiit ingerlanneqarunik naleqqunnerpaajusoq.

 

Oqaluffiit aserfallatsaalineqartarnerisa kommuninut nuunneqarsinnaannerat, kommuninit saaffiginnissutigineqarnikuunngimmat piviusunngortinniarsinnaannissaa pissusissamisuussanngilaq.

Isumaqarpugut aserfallatsaaliisarnerup kommuninut nuunneqanissaa kissaatigineqarsimappat, kommunit saaffiginnittuusariaqartut.

 

Ullumikkut ingerlatsinermi, Provsteqarfiit ilagiillu sinniisoqarfii suleqatigalugit, aserfallatsaalinerit ingerlanneqartarnerat pissusissamisoornerpaatut isigaarput.

 

Taama oqaaseqarluta, Naalakkersuisut akissuteqaatiminni taakkartugaat taperserpavut, akuerineqarnissaannillu innersuussinnginnerat taperserlugu.

 

Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.

Tulliulluni oqaaseqassaaq Ane Hansen Inuit Ataqatigiit.

 

Ane Hansen, Inuit Ataqatigiit oqaaseqartuat.

Inatsisartuni ilaasortap Otto Jeremiassenip oqaluffiit aserfallatsaalineqarnerisa kommuninit akisussaaffigineqalernissaanik siunnersuutaa, Inuit Ataqatigiinniit soqutigalugu sinerissami ilagiit pillugit sulinermik soqutigisalittagut peqatigalugit nalilersuiffigisimavarput.

 

Inuit Ataqatigiit isumaqarput piffissami qanittumi Namminersornerullutik Oqartussat Kommunillu ingerlatsinermi pisussaaffiinik pisariinnerusumik, akikinnerusumik inuiaqatigiinnullu naleqqunnerusumik aaqqissuusseqqinnissaq nalilersuiffigeqqissallugu pisariaqartoq, tamatumani aamma oqartussaaffinnik siammaanissaq eqqarsaatigalugu.

 

Siunnersuut una nalilersueqqinnissami taamaatumi kommunit akisussaaffigiligassaattut ilanngullugit, kommunillu peqatigalugit nalilersugassaqqippoq. Ullumikkulli pissusiulersimasut ingerlatiinnarneqassanngippata Inuit Ataqatigiinniit pisariaqartutut isigaarput, nunatsinni oqaluffiit amerlaqisut aserfallatsaaliorneqarnerat aningaasaliissutit annikinneri pissutigalugit ukiut tamaasa kinguarsarneqartartut naammaginartumik aaqqiivigineqaqqaartariaqartut.

 

Piffiffissaq manna iluatsillugu Inuit Ataqatigiinnit inassutigerusupparput sinerissami oqaluffiit tamarmik aserfallatsaalineqarnissamik, oqaluffiliorfigineqarnissamillu pisariaqartitsisut nutaamik misissuiffigineqassasut, siunissami aserfallatsaaliinermi sanaartornermilu tulleriiaarinissami najoqqutassat ersarinneruleqqullugit.

 

Inuit Ataqatigiinniit isumaqarpugut oqaluffiit aserfallatsaalineqarnissaannik pisussaaffiup kommunimut nuuginnarneqarneratigut ajornartorsiut qaangerneqarnavianngitsoq, tassami kommunit aamma sanaartugassanik aserfallatsaaligassanillu tulleriiaarinerminni aningaasakilliornertik pissutigalugu kinguartitseriuarsinnaasarmata.

 

Inuit Ataqatigiinni isumaqarpugut ilageeqarnermut tunngatillugu aningaasalersueriaatsit ileqquliunneqarsimasut, pisariaqartitanullu naleqqukkunnaarsimasut ilanngullugit nalilersuiffigineqarnissaat pisariaqalersimasoq.

 

Siunnersuummi ajornartorsiut aaqqiivigineqassappat, Inuit Ataqatigiinniit pisariaqartutut isigaarput siunnersuut itigartiinnavinnagu KANOKOKA-mut nunallu immikkortortaanni provstiudvalginut isummersorfigeqqullugu ingerlateqqinneqarnissaa, tamannalu inassutigaarput.

 

Qujanaq.

 

Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.

Tulliuppoq Isak Davidsen Atassut.

 

Isak Davidsen, Atassutip oqaaseqartua.

Inatsisartunut Ilaasortap Otto Jeremiassenp aaliangiiffigisassatut siunnersuutaanut Atassut -mit imaattumik oqaaseqaateqassaagut.

 

Atassut -mit Inatsisartunut ilaasortap Otto Jererimiassenp oqaluffinnik aserfallatsaaliinerup kommunenit tiguneqarnissaanik siunnersuutaa ilalersorsinnaagaluarlutigu taamaattoq nangaanartoqartikkatsigu Atassut -mit oqaatigiumavarput manna pillugu.

 

Ukiuni makkunani kommunet aningaasakilliortut tusarsaajualernikuupput, ilimaginngilarpullu aserfallatsaaliineq kommunet tigussappassuk pitsaanerusumik oqaluffiit isumagineqalernissaat.

ilimanarpormi  ilaanni pitsanngoriartoqarluni, ilaanni tassalu kommuneni pissakinnerusuni ajorseriartoqarsinnaasoq

 

Atassut -miit eqqarsaatigeqquarput Naalakkersuisunut, kommunet aserfallatsaalinermut nakkutilliisunngortinneqarsinnaanerat ammaffigeqqullugu misissoqqullugulu. Tapiissutitigut iluarsagassanut kommunet nakkutiginnittunngorsinnaanerannuttaaq aningaasalersuisoqarsinnaanera eqqarsaatigeqqullutigu.

 

Atassut -mit nalunngilluinnarparput Provsteqarfikkaartumik aningaasanik agguaassisarnermi sanaartugassanut iluarsagassanullu ilanngussisoqartanngitsoq, KIIP-p iluarsagassat nutaanillu sanaartugassat aqutarimmagit, tulleriiaarinerlu aqqutigalugu sanaartugassat kiisalu iluarsagassat ingerlanneqartarmata.

 

Atassut -mit taamatut oqaaseqarluta Naalakkersuisut akissumminni piumasaqaatip taamatut isikkoqarluni itigartinneqarnissaanut kissaatigisaat taperserparput, piumasaraluguli Ilageeqarneq pillugu ataatsimiititaliami nalilersorluarneqassasoq aappassaaneerneqartinnani.

 

Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.

Demokraatit oqaaseqareerput. Taavalu tulliulluni oqaaseqassaaq Anthon Frederiksen Kattusseqatigiit.

 

Anthon Frederiksen, Kattusseqatigiit.

Inatsisartunut ilaasortap Otto Jeremiassenip siunnersuutaa Kattusseqatigiit sinnerlugit imaattumik oqaaseqaateqarfigissuara:

 

Siullermik erseqqissaatigissuara Kattusseqatigiinni anguniakkatta ilagimmassuk qeqqaniit aqutsinerup annikillisikkiartortinneqarnissaanut aammalu akisussaaffiit pisussaaffiillu siammarterneqarnissaannut suleqataassalluta.

 

Taamaammat siunnersuuteqartup siunnersuutaa paasilluarlugu Kattusseqatigiit sinnerlugit tamakkiisumik taperserpara.

 

Nalunngilarpummi sinerissami ilaatigut oqaluffiit assut aserfallassimasut pingaartumik aamma nunaqarfinni. Naak Naalakkersuisut pingaartutut oqaatigigaluaraat; oqaluffiit amerlangaatsiartut napatittuarnissaat isumannaartariaqarsorinarmat aammalu allannguutsaaliinissamut aalajangersakkat peqqutigalugit akisussaaffik naalakkersuisuniimmat pissusissamisoortutut isigimmassuk siunnersuutip akuerineqarnissaa innersuussutigisinnaanngikkaat.

 

Naalakkersuisut taamatut oqaaseqarnerat Kattusseqatigiit sinnerlugit imaattumik illua?tungilerniarpara; siullermik isumaqarpunga Naalakkersuisooqatigiit anguniagaannut aamma ilaammat; naatsumik oqaatigalugu qitiusumiit aqutsinerup qimakkiartuaarneqarnissaa.

 

Aappaattut; isumaqarpunga Oqaluffik pillugu peqqussut 1993-imeersoq nutartertariaqalersoq aammalu ilagiit sinniisaat nutaamik tusarniaavigineqartariaqartut, soorunami aamma kommuneqarfiit ilanngullugit. Tassami Naalakkersuisut akissuteqaamminni tunngavilersuutaat kommuneqarfiit ilagiillu sinniisaat qanimut suleqatigalugit suliassat assigiinngitsut pilertornerusumik eqaannerusumillu ingerlanneqalersinnaanerat anguneqassammat.

 

Taamatut oqaaseqarlunga suliap aappassaanneerneqannginnerani susassaqartut tamaasa tusarniaaffigineqarnissaat inassutigaara.

 

Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.

Ilageeqarnermut Naalakkersuisoq.

 

Arkalo Abelsen, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq, Atassut.

Partiinut aammalu Kattusseqatigiinnut qujanaq.

 

Una saqqummiunneqartoq uani killiffimmi Naalakkersuisuninngaanniit taama isummerfigisimavarput, kisianni isumaqarpunga Inuit Ataqatigiinninngaanniit ilaatigut saqqummiunneqartut aammalu Kattusseqatigiinninngaanniit saqqummiunneqartut taakku eqqarsaatigalugit, pissusissamisuussasoq ataatsimiititaliami oqallisigineqarnissaa.

 

Naalakkersuisut siunniussimalluinnarparput soorunami marloqiusamik aqutsisoqannginnissaa. Taamaattumik suulluunniit peqqissaartumik pilersaarusiorluarlugit kommuninut oqartussaaffigineqalernissaat, Naalakkersuisuninngaanniit ammaffigilluinnarparput.

 

Taamatut oqaaseqarlunga, uani ilagiinnut aaqqiiniutaasut assigiinngitsut aamma eqqarsaatigalugit, aappassaaneerneqarnissaannut ingerlateqqinneqarnissaa taanna akuersaakuttoorsinnaavara.

 

Qujanaq.

 

Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.

Naalakkersuisut aamma tamatumangit misissuisoqarnissaa isumaqatigimmassuk, aamma partiit oqaaseqartut ilaasa tamanna kissaatigimmassuk ataatsimiititaliami Kultureqarnermut, Ilageeqarnermullu Ataatsimiititaliami aamma apeqqutip misissorneqarsinnaanera innersuussutigineqarpoq.

 

Jens Napaatoq Siumut.

 

Jens Napaatoq, Siumut.

Aap qujanaq.

 

Naatsuararsuarmik Kattusseqatigiinninngaanniit oqariartuutigineqartoq Naalakkersuisooqatigiit anguniarmassuk kommunit oqartussaaffik tunniukkiartorneqarnissaat eqqaassutigiinnarniarlugu.

 

Taamaaliinnarlugu maannakkut maani aalajangertuugutta, tassa kommunit qulaatiinnarlugit tunniussissagaluarpugut. Taamaattumik isumaqarpugut uagut Siumuminngaanniit taamaaliortoqassappat kommunit qanimut suleqatigeqqissaarlugit, minnerunngitsumik Postudvalgi oqartussaanerat innarlernerat suleqataaffigalugit aaqqiissagaluaratta.

 

Maannakkut Postudvalgimut immikkoortukkaartumik kujataani, avannaani tunumilu atuarneqarlutik sumiiffinni oqartussaaneq tigummineqareermat, aamma taanna erseqqissaatissutigalugulu oqartussaaneq qanimut peqataaffigineqartoq erseqqissalaappara.

 

Qujanaq.

 

Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.

Oqaluuserisassaq naammassereertutut nalunaarutigineqareerpoq, taamaattumik oqaluuserisassamut tassuunga tunngassuteqartunik oqartoqassaguni naatsumik ilasisoqarsinnaavoq.

 

Anthon Frederiksen, Kattusseqatigiit.

Tassaana oqaluttumut kingullermut saqqummiussara tusarnaarluarsimaguniuk paasisinnaassagaluarpaa kommunit qulaatiinnarlugit aalajangiinissaq minnerpaamilluunniit uani eqqaanngikkiga. Aammalu ilagiit sinniisaat kommuneqarfiillu qanimut suleqatigalugit, aammalu susassaqartut tamaasa tusarniaaffigalugit suliap aappassaaneerneqannginnerani ingerlanneqarnissaa oqaatigivara.