Oqaluuserisassani immikkoortoq 55-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut
ataatsimiiffiusut qulingiluaat, ataasinngorneq 17. marts 2003, nal. 13:45.
Otto
Jeremiassen, siunnersuuteqartoq,
Atassut.
Kangaatsiap
illoqarfiata oqaluffia manna innuttaminut angissutsimigut tulluarunnaarsimasup
nutaamik sanaartorfigineqarnissaa 2004-mi aningaasanut inatsisissatut
siunnersuummik suliarinninnissaq sioqqullugu siunnersuutigaara.
Kangaatsiammi
oqaluffia 1960-sip ingerlanerani sanaajuvoq kingusinnerusukkullu
allilerneqarsimagaluarluni, aammalu illup pisoqaanera pissutaagunarluni silap
nillertinnerani oqaluffik qiianartarluni.
Ullumikkummi
Kangaatsiap illoqarfia 700 missaanut inoqarpoq, oqaluffiullu inuit 200 missaat
tamaallaat isersimasorisinnaasaatut isikkoqarpoq, tamaalillutillu ulluni
pingaartuni naalagiarniartoqartillugu inuit ilaat allaat salami naalagiat
malinnaavigalugit tusarnaartariaqartarput, ilaallu allatut ajornartumik
angerlaannartariaqartarlutik sila nillertillugu salami naalagianit
tusarnaartarneq ilaanni imaannaaneq ajormat.
Tamaattumik
Kangaatsiap illoqarfiata oqaluffik inuttussutsiminut naleqquttoq assut
pisariaqartippaa, neriuppungalu tamanna paasillugu Naalakkersuisut
nutaaliornissamut aningaasaliissuteqarnissaq anguniarumaaraat.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut.
Ilageeqarnermut
Naalakkersuisoq.
Arkalo
Abelsen, Kultureqarnermut,
Ilinniartitaanermut, Ilisimatusarnermut Ilageeqarnermullu Naalakkersuisoq,
Atassut.
Qujanaq.
Inatsisartuni
ilaasortap Otto Jeremiassenip siunnersuutigaa Kangaatsiap illoqarfiani nutaamik
oqaluffiliortoqarnissaa. Siunnersuuteqartup siunnersuumminut
tunngavilersuutigai massakkut oqaluffiusup nalliuttuni innuttaasunit
mikigisoorneqartarnera, kiisalu oqaluffiup kiassaruminaatsuusarnera.
Kangaatsiap
oqaluffia 1921-mi sanaajuvoq, piffissallu ingerlanerani allineqartarsimavoq
pitsanngorsaavigineqartarsimallunilu, kingullermik 1989-imi, taamanikkut
palasip ineeraa oqaloqatiginnittarfissarlu allissutigitinneqarsimallutik.
Kangaatsiap illoqarfiata
inui 1989-imiit 2002-mut 150-it missaannik amerleriaateqarsimapput, tassa
530-it 673-inut.
Nalliuttuni
allatigullu nalliuttorsiuornerni, soorlu apersortittuni, oqlauffiit
mikigisoorneqartarneri Naalakkersuisunit ilisimaneqarpoq. Taamaattorli naalagiaqatgiinnerni
nalliuttorsiorfiunngitsuni oqaluffigut tamatsinnut inissaqartarput. Kalaallit
Nunaanni palasit ilagiillu sinniisaasa ajornartorsiut tamanna eqqumaffigaat,
kisiannili ilagiit, ilagiit sinniisaasa palaseqarfinnilu sulsut akornanni siunertalimmik
isumaqatigiissusiortarnertigut nalliuttuni inissaaleqisarnerit tamanut
naammaginartumik aaqqiivigineqarajuttarput.
Oqaluffeqarnerup
tungaatigut illuuteqarnikkut pisariaqartitsinerit ataatsimut isigalugu
nalilersorneqarnissaat eqqarsaatigalugu Inatsisartunut ilisimatitsissutitut
saqqummiunneqassasumik Naalakkersuisut misissuisitsilersaarput.
Hr. Otto
Jeremiassenip siunnersuummini eqqaavaa Kangaatsiami oqaluffik nillertutut
kiassaruminaatsullu oqaatiginiarneqartartoq. Taamaattumik Kangaatsiami ilagiit
sinniisaat peqatigalugit pissutsit taamaannerat naalakkersuisunit
misissussavarput konto-lu 92.45.01 siunertanut tamakkununnga atugassanik
immikkoortitsiffiusoq atorlugu aserfallatsaaliinissamut siunnersuusiorluta
oqaluffiup oqortutut isersimaffigissalugulu najoruminartutut
misigisaqarfiunissaa anguneqarsinnaaqqullugu.
Naalakkersuisut
innersuussutigaat nutaamik oqaluffiliornissamik kissaat ilagiit sinniisaat
peqatigalugit sukumiisumik nalilerneqassasoq.
Taamatut
siunnersuut taamatut isikkoqartillugu Naalakkersuisut inassutigisinnaanngilaat.
Qujanaq.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut.
Partiit
oqaaseqartuinut, Kalistat Lund Siumut
Kalistat
Lund, Siumup
oqaaseqartua.
Kangaatsiami
nutaamik oqaluffiliornissaq pillugu Inatsisartunut ilaasortap, Otto
Jeremiassenip Atassut, siunnersuutaa Siumumiit ima oqaaseqarfiginiarparput.
Nunatasinni
oqaluffeqarnikkut atugassaititaasut misissorneqarnissaannik, Naalakkersuisut
pilersaaruteqarnerat pitsaasuuvoq. Nalilersuinerup inerneriumaagassaat
aallaavigiugumaassapput, oqaluffeqarnikkut atugassarititaassut
pitsaanngiffigisaassa siunissami iluarsiartuaarneqarnissaannut.
Kangaatsiami
oqaluffeqarnikkut ajornartorsiutaasut aaqqqiissuteqarfiginiarlugit,
Naalakkersuisut iliuuseqalersaarnerat tapersersorparput. Isumaqarpugut
ilagiinnik sullissisuusut suleqatigalugit ajornartorsiutinik aaqqiiniarnerit
isumalluarnartut.
Taama
oqaaseqarluta, Naalakkersuisut siunnersuummut inassutiginninnginnerat
taperserparput.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut.
Tulliulluni
oqaaseqassaaq Josef Motzfeldt Inuit Ataqatigiit.
Josef
Motzfeldt, Inuit
Ataqatigiit oqaaseqartuat.
Inatsisartunut
ilaasortap Otto Jeremiassenip siunnersuutaa kommunip pineqartup sanaartugassatut
aningaasaliiffigineqartussatut kissaatigisimappagu, ukiup tullianut
inatsisissatut Naalakkersuisut siunnersuutigiumagaanni tulleriaarinnissami
nalilerneqareerluni Inatsisartut aningaasaqarnermut ataatsimiititaliaata
sulinerminut ilanngutissagaa eqqortuliornerusoq Inuit Ataqatigiit isumaqarput.
Sanaartugassatut
aningaasaliiffigineqartussatut siunnersuutit kommunalbestyrelsinit
naalakkersuisunut saqqummiunneqartussaanerat nalinginnaq
suleriaatsitsinniippoq.
Jonathan
Motzfeldt, ataatsimiinnermi
aqutsisoq, Inatsisartut Sulittaasuat, Siumut.
Tulliulluni
oqaaseqassaaq Isak Davidsen Atassut.
Isak Davidsen, Atassutip oqaaseqartua.
Inatsisartuni ilaasortap Otto Jeremiassenip aalajangiiffigisassatut siunnersuutaanut Atassut -mit imaattumik oqaaseqaateqassaagut.
Atassut -mit nalunngilarput nunarput tamakkerlugu oqaluffiit pingaartumik nalliuttorsuarni inissakilliorfiusarmata, aammattaaq Inatsisartunut ilaasortap Otto Jeremiassennip siunnersuummini tamanna taasimavaa.
Naalakkersuisulli akissuteqaataatigut erserpoq Kangaatsiaq inuttusiartorsimasoq, erseqqissarumallutigulu Kangaatsiap oqaluffia taamaallaat inunnit 175-it missaannaanit isersimaffigineqarnissaminut issiavilersugaammat, taamaattumik pisariaqartitsineq Kangaatsiami annertuvoq.
Nunatsinni oqaluffiit taamatut inissakilliorfiusarnerat innuttaasunit ilagiinnilu sulisuusunit arajutsisimaneqannginnerat Atassut -mit ilisimaarilluarparput, nutaanillu oqaluffiliortitsinissat nalunngilluinnarlutigu tulleriiaarinertigut tulleriinnilersorneqartartut.
Maluginiarparput oqaloqateqarnerlu toqqammavigalugu Kangaatsiap oqaluffianik allileriniarnissaq ajornakusuussasoq, oqaluffik 1921-mili sanaajuvoq, 1989-milu allilerneqarnera inimut naalagiartarfiusumut tunngassuteqanngilaq, allileqqissallugulu nunaminertamik atuinissamut inissaqarsinnaanngilaq.
Atassut -mit paasilluarparput Kangaatsiap oqaluffiata innuttaasunit mikigisoorneqartarnera aammalu kiassaruminaannera naammagittaalliutaasarmat, paasilluarparpullu oqaluffimmik nutaamik piumasaqaateqarnerat isumaqarlutalu tunngavissaqartoq.
Atassut -mit Naalakkersuisut inakkumavagut Nunatsinni oqaluffiit nutaat sanaassat kiisalu iluarsagassat tulleriiaarinermut ilanngussuunneqarsimasut sukumiisumik misissorneqaqqullugit.
Atassut-mit paasivarput Naalakkersuisut akissuteqaamminni Kangaatsiami oqaluffiup kiassaruminaannera pissutigalugu Kangaatsiami ilagiit sinniisaat peqatigilluinnarlugit nalilersuiniartut, tamannalu Atassut -mit iluarigaluarlutigu erseqqissassavarput kiassaruminaannera ajornartorsiummut aallaaviunngimmat, oqaluffiulli mikivallaarnera ajornartorsiummut aallaaviulluni.
Atassut-mit erseqqissassavarput Nunatsinni ilagiinnii suliaqartut kiisalu ilagiit sinniisaasa ajornartorsiutit tamakkua eqqumaffigimmatigit, nalunnginnatsigulu amerlaqisuni illoqarfinni nunaqarfinnilu ajornartorsiutit siunnersuuteqartup Otto Jeremiassenip eqqartugai aammattaaq ilisimaneqarlutillu iluarsaassinissamut noqqaasoqartuartoq.
Naalakkersuisullu piumaffigiumallugit Nunatsinni oqaluffitsigut iluarsaassinermi annertuumik ilagiinni suliaqartut kiisalu ilagiit sinniisaat peqatigilluinnarlugit siunissami ingerlassisoqartassasoq suliniutigeqqullugu, ajornartorsiornerusullu salliutitaanissaat misissuilluarnikkut anguniaqquuugu.
Atassut -mit taamatut oqaaseqarluta Naalakkersuisut aalajangiiffigisassatut siunnersuut taamatut isikkoqarluni itigartinneqarnissaa piumasarimmassuk paasilluarparput. Naggataagullu piumasarissavarput piaartumik misissuinissaq Naalakkersuisut naammassisariaqaraat. Aappassaaneerneqartinnagulu Ataatsimiititaliamut ingerlanissaa piumasaraarput.
Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.
Tullliullutik oqaaseqartussat Demokratit oqaaseqareerput. Taavalu maannakkut oqaaseqassaaq Anthon Frederiksen Kattusseqatigiit.
Anthon Frederiksen, Kattusseqatigiit.
Inatsisartunut ilaasortap Otto Jeremiassen-ip siunnersuutaa Kattusseqatigiit sinnerlugit imaattumik oqaaseqarfigissavara.
Siunnersuut aamma Naalakkersuisut akissuteqaataat paasilluarpakka, tassami Nunatsinni oqaluuffiit pillugit iluarsisaassassat amerlaqimmata, aammalu iluarsiiniarnermi suut periuserineqassanersut pillugit naalakkersuisut iliuuserinialersaagaat tamakkiisumik
aamma taperserumavakka.
Taamaammat Kattusseqatigiit sinnerlugit qilanaarpunga; Naalakkersuisut misissuisitsinerup inerneranik ilisimatitsissuteqarnissaannut.
Naggataatigut Kattusseqatigiinniit Naalakkersuisunut kaammattuutigissavara; pala-sissaaleqinermut aamma ajornartorsiutaaqisup aaqqiivigineqarnissaa pimoorullugu sulissutigineqartariaqartoq, maanna illoqarfiit ilaanni soorlu Qasigiannguani allanilu aamma aalaakkaasumik palaseqanngimmalluunniit taamaammallu aamma ilagiinni sullinneqarneq nassuerutigalugu oqaatigisariaqarparput annertuumik kinguariiaataammat anersaakkut sullissinermi. Tassami oqaluffik pigigaluaraanni palaseqanngippat ajoqeqaranilu taava aamma oqaluffiup atorneqarsinnaanera killeqaqaaq.
Taamatut oqaaseqarlunga Naalakkersuisut akissuteqaataat taperserpara.
Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.
Siunnersuuteqartoq Otto Jeremiassen, taanna pereerpat Kultureqarnermut Ilinniartitaanermut Ilisimatusarnermut Ilageeqarnermullu Naalakkersuisoq.
Otto
Jeremiassen,,
siunnersuuteqartoq, Atassut.
Siullermik partiinut
oqaaseqartunut qujajumavunga minnerunngitsumik tapersiisunut. Uanilu
erseqqissaassutigeqqiinnarniarpara Atassummiit oqaaseqartup tunngavilersutai
neriuppunga aamma partiinit aappassaaneerneqarnissaminut
eqqarsaatigilluarneqareerlutik taperserneqarlutik
saqqummiuteqqqinneqarumaartut. Qujanaq.
Arkalo
Abelsen, Kultureqarnermut
Ilinniartitaanermut Ilisimatusarnermut Ilageeqarnermullu Naalakkersuisoq,
Atassut.
Qujanaq
partiininngaaniit Kattusseqatigiinninngaaniillu oqaatsinut tunniunneqartunut.
Atassummit
uparuarneqarpoq oqaluffiup kiassarneqarluarsinnaannginnera qitiunngitsoq.
Kisianni taanna saqqummiunneqartuni marloqiusaagami tunngavilersuutit
mikigineqalertarnera nalliuttuni aammalu kiassaruminaannera. Taamaattumik
taakkua marloqiusat tunngavigalugit taanna, taakku akissutit tunniuneqarput.
Soorlu
nunatsinni atuarfippassuit nunaqarfinni illoqarfinnilu nalilersueqqissaarluni
tulleriiaarneqartussaasut. Aamma nunatsinni oqaluffiit taamatoqqissaaq
iliussavagut.
Taava
Kattusseqatigiinninngaaniit ilanngullugu taaneqartoq ilagiinni sullissisut
ajornartorsiutsaanerat tassa amigaatigineqarnerat taanna aamma ilanngullugu
Naalakkersuisunut ilanngullugu qanoq iliuuseqarfigillaqqullugu.
Soorunami
taamaaliorpugut naluneqanngitsutuut ajoqissat maannakkut ilinniartitaanerat
ingerlanneqarpoq. Aammalu maannakkut teologip iluani uppersarsiornerup iluani
diplom uddannelsemik aallartitsinissaq taanna pilersaarutaareerluni.
Neriuppugullu tamakkua suliniutit assigiinngitsut kinguneqarumaartut ilagiinni
sullissisutigut ullumikkut ajornartorsiornerput minnerulerumaartoq.
Tassa ukiuni
aggersuni neriunartoqarpoq maannakkullu allatut ajornartumik provsteqarfinni
assigiinngitsuni provstit piumaffiginikuuvagut nukiit provsteqarfiup
iluaniittut taakkua agguataarnerisigut immaqalu nikeralaartumik
sullinneqarnerisigut ilagiit naammaginartumik sullinneqarsinnaajumaartut.
Nalunngilarput
nalliuttorsuit pingaarnerit ilaat uaneralaannguamiittut tassalu påske, aammalu
tamakkua eqqarsaatigilluinnarlugit provstit qinnuiginikuuvagut piffiit
assigiinngitsut ilageeqarnikkut sullinneqarnissaat naammaginartumik
aaqqiiviginiassagaat. Qujanaq.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut.
Allanik
oqaasissaqartoqarumanngilaq. Taamaattumik taanna oqaluuserisassaq naammassivoq.