Oqaluuserisassani immikkoortoq 63-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut aqqaneq aappaat, tallimanngorneq 21. marts 2003, nal. 14:04.
Otto Jeremiassen, siunnersuuteqartoq, Atassut.
Ullumikkut Niaqornaarsummi napparsimaveeqqatut atuuttup nutaamik taarserneqarnissaa isumaqarpunga pisariaqartoq, makku pissutigalugit.
Siusinnerusoq Niaqornaarsummi illu sulliviliortoqarneranut atatillungu illu pingasoqiusamik aggorneqarsimavoq, tassalu Nuka a/s tunitsivia, aammalu innuttaasut katerisimaarfigisinnaasaat ini akkajaartoq, kiisalu nakorsiartarfik, aammalu errorsisarfik.
Illullu sananeqaataa eqqarsaatigalugu isumaq ajunngikkaluarpoq, kisiannili ullumikkut inuttussuseq eqqarsaatigalugu nakorsiartarfik mikisutut oqaatigisariaqarpoq, tassami ukiuni kingullerni Niaqornaarsuk inuttusiartorpoq malunnartumik.
Tamaattumik ullumikkut atuuttumik nakorsiartarfimmik pisariaqartitsinerat paasinarluni, tassami ullumikkut atugaat imatut mikitingingami allaat ajutoorsimasoqartillugu ajoraluartumik akiutit illumut nakorsiartarfimmut eqqunneqarsinnaanatik, tamatumanilu taamatut nalaataqartillutik inuk qanorluunniit anniaateqaraluarpat eqqunniarneranni kisianni akiutiniit aqqarteqqaarlugu, aammalu nakorsiartarfiup inip mikivallaarneranit inunnik ajutoortoqartillungu, imaluunniit toqusoqarsimatillugu nakorsiartarfimmilu nakorsanit allanilluunniit takuneqartussaatillugu nakorsiallu ataatsimoortinneqalersarlutik tamannalu malunnartarpoq nakorsianut inuttut eqqorneqaatigisaraat sakkortuumik.
Tamaattumik isumaqarpunga tamanna ajornartorsiut arlaatigut aaqqiiviginiarlugu iliuuseqartoqartariaqartoq, neriuppungalu manna saqqummiussaq tunngavingalungu paasineqarluni qanoq iliuuseqartoqarumaartoq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tamatumunnga akissuteqassaaq Ilaqutariinnermut Peqqissutsimullu Naalakkersuisoq.
Ruth Heilmann, Ilaqutariinninnermut Peqqissutsimullu Naalakkersuisoq, Siumut.
Qujanaq.
Niaqornaarsummi pissutsit akuerineqarsinnaanngitsut aaqqiissuteqarfigineqartariaqarnerannik siunnersuuteqartoq Naalakkersuisunit isumaqatigineqarpoq.
Nunaqarfimmi nakorsiartarfeeraq 1996-imi sananeqarmat nunaqarfinni nakorsiartarfeeraliornissamut najoqqutassat taamanikkut atuuttut malillugit sananeqarpoq.
Nunaqarfimmi nakorsiartarfeeraq illumut sullivimmut uiggiussatut inissisimavoq. Pingasunik initaqarpoq, utaqqisarfik, ini nakorsiartarfik peqqumaasivillu. Inimut nakorsiasrtitsiviusumut isaariaq aqqutigalugu torsuusaaqqakkut talerpiup tungaanut 90 gradimik teqeqqulikkut sangulluni isertariaavoq. Inimullu nakorsisartarfiusumut torsuusaq nerukingaarmat akiut sangutinneqarsinnaanngilaq taamaattumillu napparsimasut nammineerlutik inimut nakorsiartariusumut pisullutik isertariaqartarlutik.
Nakorsiartarfeeqqami innanngaveqaranilu siniffeqanngilaq napparsimasut misissorneqarnerminni naalaffigisinnaasaannik. Taamaattumik napparsimasut unitsinneqarnissaminnik pisariaqartitsisut peqqissaasup najugaani uninngatinneqartarput Aasiannut angallanneqarsinnaalernissamik tungaanut.
Peqqissaasup najugaani kigutilerisoqartarpoq, ini ataaseq kigutileriffissatut aaqqissuussaammat inilu alla kigutit nakorsaata (allallu) unnuiffigisinnaasaattut aaqqissuussaalluni.
Nunaqarfiup
nakorsiartarfeeraa 45 m?-iuvoq. Tassunga ilanngunneqassaaq kigutileriffik 20
m?-iusoq. Taamaasilluni katillugu 65
m?-iulluni.
Najoqqutassat nutaat naapertorlugit
nunaqarfimmi innuttaasut amerlassusiat naapertorlugu nakorsiartarfeeraq
angissuseqartussaavoq. Niaqornaarsummi innuttaasut amerlassusiat ukiut qulit
kingulliit ingerlaneranni taamaaginnangajassimavoq 340-t missaanniillutik.
Innuttaasut amerlassusiat aallaavigalugu type 1 (typet annersaat) 72 m?-isut
angissusilik ullumikkut nunaqarfimmi napparsimmaveerassatut
kaammattuutigineqarsimassagaluarpoq, taassumalu initarisarpai utaqqisarfik, ini
nakorsiartitsisarfik, ineeraq kigutileriffillu. Angissusaa eqqarsaatigalugu
inissamut ullumikkut atorneqartumut sanilliullugu assigiinngissusaa 7
m?-iinnaavoq.
Napparsimasut uninngatinneqarnissaminnik
pisariaqartitsisut peqqissaasup najugaani uninngatinneqartarnerannik
maannakkumut aaqqissuussinerup allanngortinneqarnissaa toqqissisimasoqarnissaa
siunertaralugu Naalakkersuisunit kissaatigineqanngilaq, peqqissaasup
najugaqarfia nakorsiartarfeeqqamit 300 meterisut ungasitsigisumi
inissisimammat.
Taamaattumik nunaqarfimmi
nakorsiartarfeeqqamik nutaamik 2,2 mio. kr.-limmik pilersitsinani isaarissap
maannakkut ajornartorsiutaasup aaqqiiffigineqarnissaa Naalakkersuisut
siunnersuutigissavaat.
Taamatut oqaaseqarlunga neriuutigaara
isaarissap allanngortinnissaanut suliassamut siunnersuusiortoqarnissaa pillugu
2003-mi ukiakkut siunnersuutip aappassaaneerneqarnissaannut Inatsisartut
aalajangiisinnaassasut.
Qujanaq.
Jonathan Motzfeldt, ataatsimiinnermi aqutsisoq, Inatsisartut
Siulittaasuat, Siumut.
Partiit oqaaseqartuinut Ole Thorleifsen,
Siumut.
Ole Thorleifsen, Siumup oqaaseqartua.
Siunnersuuteqartup Inatsisartunut
ilaasortap Otto Jeremiassenip aaliangiiffigisassatut siunnersuuteqarnermini
Niaqornaarsunni nakorsisartarfeeqqap pissutsinut naleqqutinnginneranik erseqqissaanera
Siumumiit paasinnilluarluta imatut oqaaseqarfigissavarput:
Naalakkersuisut akissutaani
oqaatigineqarpoq Niaqornaarsunni illup nakorsiartarfeeqqap pioreersup
allanngortinnissaata pilersaarusiornissaa aallartinneqassasoq, taamaattumik
Siumumiit naleqquttuusoraarput siunnersuutip taamatut isikkoqartillugu
itigartinnissaa, kisiannili Siumumiit Naalakkersuisut kaammattussavagut
pilersaarusiornissamut aningaasartuutissat Inatsisartut aningaasanut
inatsisisaannut ukiumut tulliuttumut ilanngunneqarnissaanut
innersuussuteqassasut.
Qujanaq.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Tulliulluni oqaaseqassaaq Josef
Motzfeldt Inuit Ataqatigiit.
Josef Motzfeldt, Inuit Ataqatigiit oqaaseqartuat.
Inatsisartuni ilaasortap Otto
Jeremiassenip Niaqornaarsummi nakorsiartarfeqarnermi pissutsit pillugit
saqqummiussai Inuit Ataqatigiit qujassutigaat. Siunnersuummi nunaqarfik
aalajangersimasoq pineqaraluartoq, taamaattoq pissutsit eqqartorneqartut
nunaqarfippassuarni atugassarititaasunut ilisarnaataapput.
Niaqornaarsummi illumik
kifffartuussivittut taaneqarsinnaasumik 90-ikkut qiteqqunneranni
sananiartoqalermat Inatsisartuni tulluussimaarutigineqarpoq, pissutsinut
nunatsinni atuuttunut naleqqussaanertut isikkoqarmat.
Soorunami siunnersuuteqartup
nammineq ilisimasani tunngavilersuutai tusaannarlugit eqqarsarnarpoq,
assersuutigalugu nunaqarfinni nakorsiartarfinnut/napparsimaveeqqanut,
pilersaarusiornermi sulisut/atuisut ilumut akuutinneqarsimanersut.
Naalakkersuisut akissuteqaataanni
naatsorsueqqissaarsimasut takuneqarsinnaavoq 45 m? + 20 m? 65
m?-iunerarneqarmat kukkunatik naatsorsuisimasut uppernarsarsinnaavarput. 72
m?-inngortinneqassappallu 7 m? Naalakkersuisut amigaataanerarmassuk aamma
tassani kukkusimanngitsut naatsorsuiniapiloreerluta ilumoornerarsinaavarput.
Aamma nakorsiat isaarissakkut
isertarsimassasut ilimagaarput torsuusaaqqakkooriarlutillu 90 gradimik
sangusariaqartarsimanerat salluiussallugu pissutissaqanngilagut.
Ajornartorsiut siunnersuuteqartup
aaqqinneqaqqusaa ilumut 2004-mut aningaasanut inatsissamut
utaqqinneqartariaqarnersoq Naalakkersuisunut isumaliutigeqquarput,
aningaasaliiffik 80.00.00, sanaartornermut atugassat agguaanneqanngitsut,
atorlugit aaqqinneqarsinnaanera periarfissaasorinarmat.
Nunaqarfippakuluunilu peqqinnissamik
sulisuusut atugaat eqqarsaatigalugit Inuit Ataqatigiit naatsorsuutigaat,
nunaqarfinni tamani pissutsinut tamanut Naalakkersuisut akissuteqaammi
takutitamisut ilisimasaqartigalutik aaqqissutissanik pilersaarusiussasut.
Tamanna pisinnaavoq Inatsisartuni ilaasortat ataasiakkaarluta
siunnersuuteqartarnissarput utaqqeqqaanngikkaluarlugu.
Taama naatsumik oqaasetalerlugu
nunaqarfinni peqqinnissaqarfimmi sulisut nakorsiartarfeqarnikkut
atugassarsisaasa pilersaarusiorfiginissaat naalakkersuisunit
isumannaarneqassasoq naatsorsuutigaarput.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Tulliuppoq Isak Davidsen Atassut.
Isak Davidsen, Atassutip oqaaseqartua.
Qujanaq.
Inatsisartunut ilaasortap Otto Jeremiassenip aalajangiiffigisassatut siunnersuutaanut ATASSUT-mit imaattumik oqaaseqaateqassaagut.
Otto Jeremiassenp piumasaraa nutaamik Niaqornarsummi napparsimmaveeqqamik sanasoqassasoq, Naalakkersuilli akissuteqaataanni erseqqilluinnartumik takuneqarsinnaavoq 1996-mi nakorsiartarfimmik nutaamik pineqartumi sanasoqarsimasoq.
ATASSUT-mit Naalakkersuisut akissuteqaataat taperserumavarput, nunaqarfimmi pineqartumi 2,2 mio.-limmik pilersitseqqinnani isaarissap ajornartorsiutaasarnerata aaqqissuteqarfigineqarnissaa siunnersuutigimmassuk.
ATASSUT-mit Naalakkersuisut akissuteqaataat taperserlutigu taamatut oqaaseqarpugut.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq Per Skaaning Demokraatit.
Per Skaaning, Demokraatit oqaaseqartuat.
Demokraatinit Naalakkersuisut akissutaannut isumaqataavugut, tassani siunnersuutaavoq nakorsiartarfik ilaneqassasoq, tassa isertarfiani maannakkorpiaq ajornartorsiutaasut aqqiissorlugit iluarsineqassasut.
Oqaaseqaatitsinnut ilanngutissavarput isumaqartugut, siunnersuutit taamatut imaqartut siunissami ingerlaannartumik Naalakkersuisunut apeqquteqaatigineqartarnissaat, imaluunniit partiit aningaasaqarnermut oqaaseqartartui aqqutigalugit, kissaatitut Aningaasaqarnermut Ataatsimiititaliamut oqaluuserisassanngortinneqartassasut, siunnersuutit taamatut imaqartut sanaartugassat tulleriiaarneqarnerannut aningaasanut inatsimmut tullermut ilanngunneqarsinnaammata.
Taakkua oqaaseralugit, siunnersuutip ataatsimiititaliami suliarineqarnissaa innersuussutigaarput.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq Anthon Frederiksen Kattusseqatigiit.
Anthon Frederiksen, Kattusseqatigiit.
Inatsiartuni ilaasortap Otto Jeremiassenip siunnersuutaa Kattusseqatigiit sinnerlugit imaattumik oqaaseqarfigissuara:
Siunnersuut ilisarnartoq aamma uanga siusinnerusukkut Qeqertarsuut Tunua immikkut qinersiviugallarmat Niaqornaarsummi innuttaasunik ataatsimiisitsisarninnut atatillugu ilisimasaqarfigilersimasara tamakkiisumik taperserniarpara, tassa minnerunngitsumik Niaqornaarsummi immikkut nakorsiartarfimmik pilersitsineq aamma allatigut innuttaasunut annertuumik iluaqusiisussaammat.
Isumaqarpunga Niaqornaarsummi peqqinnissaqarnikkut pissutsit iluarsineqartariaqartut aamma innuttaasunik pitsaasumik isumannaatsumillu sullissinissaq qulakkeerniarlugu. Tassami nunaqarfimmi taama inuttutigisumi peqqinnissakkut kiffartuussineq aamma ullumikkornit pitsaanerungaartariaqarmat. Isumaqarpungalu piffissaq ungasinnerusoq eqqarsaatigalugu isaarissap allanngortinnerinnaatigut ajornartorsiutit qaangerneqarsinnaanngitsut.
Soormi 2,2 mio.-it atornagit illorput 2000-ip assinganik katitiinnarissamik 500.000 kr.-nik nalilimmik sanasoqarsinnaanngila?
Tassami pissutsit taamaatsillugit tunitsivimmiluunniit, illu-sullivmmi nakorsiartarfimmut atasumi aalisakkat suliarineqasinnaanngillat, tassa tunitsivinnguaq piffikeruttormat, soorlu aamma nakorsiartarfik taama piffikitsigisoq siunnersuuteqartup ersersereeraa.
Nalunngikkaluarpara suliffeqarfiit ingerlatseqatigiiffiit imaaliallaannarlugit naalakkersuinikkut akuleruffigineqarsinnaanngitsut, kisianni suut tamangajammik Namminersornerullutik Oqartussanit pigineqartillugit ? pissutsinik assigiinngitsunik aamma ataqatigiissaarineq ingerlatallu assigiinngitsut iluatsitaarlugit aaqqissuussisarnissat soorluuna ajornartorujussuartut takorloortariaqanngikkaluartut.
Tassami Niaqornaarsummi napparsimaveeqqamik pilersitsinikkut nunaqarfimmi suliffissaqartitsinermik ammaassisoqarsinnaagaluarmat, taamaalilluni aalisarnermik inuutissarsiuteqarnerup pinngitsoorani siuariarneranik aamma kinguneqarsinnaalluni, tassa aaqqissuussilluarnikkut tunitsiviup aalisakkanut suliarinnittarfimmik pilersitsivigineqarsinnaanera periarfissinneqarsinnaagaluarmat.
Taamatut oqaaseqarlunga siunnersuut paasilluarlugu taperserpara, aappassaanneerneqanginneranilu Aningaasaqarnermut Ataatsimiititaliami suliarineqarnissaa inassutigalugu.
Per Rosing-Petersen, ataatsimiinnermi aqutsisoq, sinniisussat aappaat, Siumut.
Kattusseqatigiinniit Anthon Frederiksenimut qujanaq. Taava siunnersuuteqartoq Otto Jeremiassen Atassut. Takanna.
Otto Jeremiassen, siunnersuuteqartoq, Atassut.
Siullermik Naalakkersuisup akissuteqaataanut, aammalu Partiit oqaaseqartuinut tamavinnut qujavunga, paasinnillutik siunnersuutigisannut, taamatut oqariartuuteqarnerannut. Neriuppungalu aappassaaneerneqarnissaannut Naalakkersuisut ajornartorsiummut pineqartumut arlaatigut nutaamik iliuuseqarsinnaanermik qinertuinissaminnut saqqummiunneqartup atorumaaraat.
Qujanaq.
Per Rosing-Petersen, ataatsimiinnermi aqutsisoq, sinniisussat aappaat, Siumut.
Taavalu Ilaqutariinnermut Peqqissutsimullu Naalakkersuisoq Ruth Heilmann. Takanna.
Ruth Heilmann, Ilaqutariinninnermut Peqqissutsimullu Naalakkersuisoq, Siumut.
Qujanaq.
Uangattaaq akissuteqaatiga Partiinut tamanut, aammalu Demokraatinit paasineqarluarmat nuannaarutigaara, tapersersorneqarmallu. Aammalu uani Inuit Ataqatigiit siunnersuuteqarput Naalakkersuisunut isumaliuutigeqqullugu aningaasaateqarfik 80.00.00-miittoq atorlugu arlaatigut iliuuseqarsinnaannginnersut. Taanna misissussavarput. Ataatsimut isigalugu misissussavarput, aamma ukioq manna iliuuseqarsinnaannginnersugut, imaluunniit 2004-mut utaqqisissinnaaneripput.
Per Rosing-Petersen, ataatsimiinnermi aqutsisoq, sinniisussat aappaat, Siumut.
Ilaqutariinnermut Peqqissutsimullu Naalakkersuisumut qujavugut.
Taavalu allanik oqaaseqarumasoqaqqinngimmat, tassa immikkoortoq 63 tassuunga killippoq. Taavalu ukiamut aappassaanniigassanngorluni.