Oqaluuserisassani immikkoortoq 72-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut aqqaneq
aappaat, tallimanngorneq 21. marts 2003, nal. 17:16.
Aqqaluk Lynge, siunnersuuteqartoq, Inuit Ataqatigiit.
Qujanaq.
Inatsisartut ataatsimiinnissaannut oqaluuserisassatut siunnersuut §32 najoqqutaralugu imaattoq nassiussimavara.
Aamaruutissarsiorfikup Qullissat takujuminarsarneqarnissaanik Naalakkersuisut suliniuteqaqqullugit peqquneqarnissaannik Inatsisartut aalajangiiffigisassaattut siunnersuut.
Tunngavilersuutaalu unaavoq.
Qullissat ukiut 30-t matuma siorna naalagaaffiup illuutai artortullu tamaasa namminersorluni sulliviutilimmut tunineqarput, atortut illullu piiarneqarnissai siunertaralugit.
Taamaakkaluartorli ulloq manna tikillugu qanoq iliuuseqartoqarsimanngilaq, sulilu qanoq pisoqarianngitsoq 2001-imi malissuit piliaannik Killerpaat Kangilliillu illutai sissamiittut Qullissallu niuertoqarfitoqaa sequmivillutik malissuarnik amuneqarput.
Qullissarmiutoqqanut aasat tamaasa orniguttartunut ullumikkut ajoraluartumik eqqaassutis-sanngorsimavoq kusanarpallaanngitsoq.
Aasaq nammineerlunga najuuppunga Qullissat matuneraniit ukiut 30-nngortorsiorluni eqqaanianermut atatillugu. Tassanilu inuit oqaluuserivaat qanoq iliuuseqartoqartariaqaraluar-nerarlugu.
Taamaattumik siunnersuutigissavara sinerissami Qullissat Ikinngutai suleqatigalugit Namminersornerullutik Oqartussat aamma Qeqertarsuup kommunea pilersaarusiussasut, Qullissani illukut atorneqanngitsut piiarneqassasut, illulli aasarsiorfiusartut ullumikkullu atuutereersut taakkua immikkut eriagisassatut innimigineqassasut. Pisortatigoortumillu Qullissat eqqaamaneqarnerat kusanartumik aaqqissuussaasumillu qanoq iliuuseqarfigineqas-sasoq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq partiit oqaaseqartuinit, a utoqqatserpunga, akissuteqassaaq aap Naalakkersuisoq Attaveqatigiinnermut Ineqarnermullu Naalakkersuisoq.
Mikael Petersen, Attaveqarnermut, Avatangiisinut Ineqarnermullu Naalakkersuisoq, Siumut.
Qujanaq.
Qullissani malissuup aserortigaasa illut aseqqukuisa torersarnissaat kommunep akisussaaffi-gaa, tassa Qeqertarsuup kommuneata.
Naalakkersuisut taamaattoq eqqumaffigaat oqaluttuarisaanitsinni nutaanerusumi Qullissat immikkut inissisimammat.
Avatangiisinut aqutsisoqarfik Aatsitassut Ikummatissanullu Pisortaqarfik aamma Avatangiisi-nut Pinngortitamullu Pisortaqarfik peqatigalugit, asimi eqqakkanik nalunaarsuinermik aallar-titsisimavoq.
Qullissat tassani aamma ilaatinneqarpoq. Suliniutip killiffia tassaavoq nalunaarusiorneq qitiusumik allagaqaateqarfiit ikiortigalugit pisoq. Kommunenut maanna tusarniaatigineqarmat tassani najukkani ilisimasat pigineqarmata.
Maannakkumut kommunet affaannaat akissuteqarsimapput.
Suliniummi arloriarnerat aappaat tassaassaaq nalunaarusiornerit ataasiakkaat nalinersorneqar-nissaat kiisalu piginnittut nassaarinissaat.
Qullissat taamaasilluni nuna tamakkerlugu nalunaarusiornermi ilaavoq.
Aalajangiiffigisassatut siunnersuummi erserpoq illuutit ilaat tammatsaaliorneqartariaqartut aammalu allat aasarsiortarfittut atorneqartartut. Ukiakkut ataatsimiinnrmi siunnersuutip aappassaaneerneqannginnerani Naalakkersuisut misissussavaat, illut kikkunnit pigineqarner-sut aammalu naliliigallartoqassalluni illut sorliit tammatsaaliugassatut illut sorliit iluatinnaa-teqarnersut.
Taamatuttaaq Naalakkersuisut aningaasartuutinut, aalajangiiffigisassatut siunnersuutip malit-sigisassaannut missingersuusiussapput. Tamanna soorunami pissaaq Qullissat Ikinngutai aammalu Qeqertarsuup kommunea suleqatigalugit.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Partiit oqaaseqartuinut Ole Thorleifsen, Siumut.
Ole Thorleifsen, Siumup oqaaseqartua.
Aamaarutiteriffikumi Qullissani
malissuit illut aserortigaasa aseqqukuisa Naalakkersuisunit
misissuiffiginiarneqarnerat Siumumiit tapersersorparput.
Naalakkersuisut innersuussutigaat
ukiamut ataatsimiinnissami siunnersuutip aappassaaneerne-qannginnerani, illut
kikkunnit pigineqarnersut nalunaarsorneqarneqassasut. Aammalu illut sorliit
tammaatsiliugassatut iluatinnaateqarnersut nalilerneqarallarnissaat
isumagineqassasoq.
Nalunaarsuinissaq Naalakkersuisunit
siunniunneqartoq Siumumiit tapersersorparput. Taamaa-lilluta
isumannaassagutsigu aningaasartuutit siunertap malitsigiumaagassai
missingersuusior-ne-qarsinnaassammata.
Siumumiit kaammattuutigissavarput
nalunaarusiornissami aammalu saliinissamut tunngatillu-gu Naalakkersuisunit
danskit naalakkeruisuisa suleqataatinneqarnissaat suliniutigeqqullugu.
Qujanaq.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Tulliuppoq Kuupik Kleist, Inuit
Ataqatigiit.
Kuupik Kleist, Inuit Ataqatigiit oqaaseqartuat.
Aqqaluk Lyngep Inuit Ataqatigiit
sinnerlugit siunnersuutaa tamakkiisumik tapersersorparput.
Naalakkersuisut
akissuteqaateqarnerminni saliinissamik suliniuteqartoqarnerarlugu oqaatigi-saat
soorunami qujassutigaarput.
Inuit Ataqatigiinniit
paasiniaanitsigut paasivarput Qullissat nunataanut tunngasut Qeqertar-suup
kommuneata isumagigai, illunullu tunngasut Ilulissat kommuneanit
isumagineqarlutik. Taamaattumik Qullissat Ikinngutaasa Qeqertarsuup
kommuneatalu saniatigut Ilulissat kommuneat suliassami matumani
akulerunneqartariaqassaaq.
Naak aasat tamaasa Qullissat inugisimasaminit
taakkualu kinguaavinit najorneqartaraluartoq aamma Qullissat nunatsinni
naalakkersuinikkut annertuumik aalassassutaasumik pisoqarsima-neranut
takussutissaallunilu eqqaassutissaavoq.
Qullissat taamatut
eqqaassutissaanerat Qullissarmiunuinnaq pinnani nunatsinni inunnut tamanut suli
ullumikkut sunniuteqarpoq.
Aamma isumaqarpunga Qullissat
Qullissarmiullu taamani qanoq pineqarnerat nunatsinni Naalakkersuinikkut
eqeeriartulernermut annertuumik pissutaaqataasimasoq.
Taamaattumik Qullissat taamani
matuneqarnerat Qullissarmiullu tamatuma kingorna illoqarfi-gisaminnik
eqqaaniaasarnerat qanorluunniit isumaqarfigigaluaraanni, taava eqqaassutissap
kusanartuuteqarnissaa innuttaasalu ataqqineqarnissaat pingaaruteqarpoq.
Qullissani malissuup aserortigaasa
salinneqarnerat Qullissat nunatta oqaluttuarisaaneranut pingaaruteqarneranik,
Qullissarmiullu ataqqineqarnerannik takutitsinerussaaq.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Tulliuppoq Otto Jeremiassen, Atassut.
Otto Jeremiassen, Atassutip oqaaseqartua.
Atassummiit inatsisartunut
ilaasortap Aqqaluk Lyngep siunnersuutaanut imaattumik oqaase-qassaagut.
Naalakkersuisut akissuteqaataat
tunngavigalugu paasinarpoq suliamut pineqartumut tunngatil-lugu Avatangiisinut
Aqutsisoqarfiup Aatsitassanut Ikummatissanullu Pisortaqarfik aammalu
Avatangiisinut Pinngortitamullu Pisortaqarfik peqatigalugit, asimi eqqakkanik
nalunaarsui-nermi aallartitsisimasoq. Qullissallu tassani aamma ilaatinneqartut.
Aalajangiiffigisassatut siunnersuummi
erserpoq illuutit ilaat tammatsaaliorneqartariartut, aammalu allat
aasarsiortarfittut atorneqartartut. Naalakkersuisullu ukiamut
ataatsimiinnissaan-nut siunnersuutip aappassaaneerneqannginnerani
misissussagaat oqaatigineqarput, illut kikkunnit pigineqarnersut aammalu
naliliigallartoqasalluni illut sorliit tammatsaaliugassatut
iluatinnaateqarnersut.
Taamatut oqaaseqarluta Atassummiit
Naalakkersuisut akissuteqaataat tusaatissatut tiguarput.
Qujanaq.
Jonathan Motzfeldt, ataatsimiinnermi aqutsisoq, Inatsisartut
Siulittaasuat, Siumut.
Tulliulluni oqaaseqassaaq Astrid Fleischer
Rex, Demokraatit.
Astrid Fleischer Rex, Demokraatit oqaaseqartuat.
Siullermik Demokraatininngaanniit Aqqaluk Lynge
qutsavigerusupparput, inatsisartut aalaja-ngiiffigisassaannik Qullissat
takujuminarsarneqarnissaat pillugu siunnersuuteqarsimammat.
Naluneqanngitsutut nunatsinni inuppassuit
ukiorsuaq qilanaartarput aasamut Qullissani naapi-simaarnissaminnut. Inuppassuit
aasaaneerani ukiussamut nukissaminnut aallertarfigigamikku. Kalaallit ilaat
nunanut kiattunut aasami kajungertut ilaat toqqissisimaartarfeqarput
Qullissani.
Kiisamilimi nunatsinnut immikkut
aningaasartuutaanngitsumik nunatta inuinik nukittorsarfiu-sarpoq.
Demokraatinit taamatut oqaaseqareerluta
Naalakkersuisup akissutaa tikerusupparput.
Tassani paasivarput asimi eqqakkanik
nalunaarsuinerit aallartereersimasut maannamulli kommunet affaannaat
akissuteqarsimasut.
Qullissat Qeqertarsuup kommuneanut ilaalernikuummat,
illutaalu Ilulissat kommuneannut ilaanerarneqartarlutik Demokraatinit
kommunenut akissuteqareersimasunut taakku ilaasimassasut.
Taamaanngippallu
tinnersarneqaqqulaarpagut.
Naalakkersuisut akissutaanni ersermat
siunnersuummik paasinnilluarlutik illunik nalilersuillu-tillu
aningaasartuutissanik missingersuusiorniartut, suliarlu kommunet Qullissallu
Ikinngutaat suleqatigialugit ingerlanneqassasoq Demokraatinit ernumassuteqarata
siunnersuutip aappassa-neerneqarnissamut ingerlateqqinneqarnissaa
inassutigaarput.
Qujanaq.
Jonathan Motzfeldt, ataatsimiinnermi aqutsisoq, Inatsisartut
Siulittaasuat, Siumut.
Tulliulluni oqaaseqassaaq Anthon
Frederiksen, Kattusseqatigiit.
Anthon Frederiksen, Kattusseqatigiit.
Inatsisartunut ilaasortap Aqqaluk Lyngep
siunnersuutaa Kattusseqatigiit sinnerlugit imaattu-mik oqaaseqarfigissavara.
Siullermik erseqqissaatigissavara
Kattusseqatigiinni soqutigilluinnakkatta pingaartitattalu ilagimmassuk
pinngortitap mingutsinneqannginnissaanik saligaatsuutinneqarnissaanillu,
suliniutinut suliniarnernullu suleqataanissarput pingaartikkatsigu.
Taammaattumik Qullissat ukiut marlussuit
matuma siornatigut malerujussuarnit eqqorneqar-lutik illorpassuit
piuneerussaanerannik kinguneqartumik, illoqarfiusimasut ilaa aamma
alianaatsorsuaq ilaatigut takujuminaallisinneqarsimammat.
Taamaammallu siunnersuut Naalakkersuisullu
akissuteqaataat paasilluarlugit Naalakkersui-suniit susassaqartut peqatigalugit
iliuuseriniarneqartut akuersaarpakka.
Taamatut oqaaseqarlunga suliassap suliap
taamatut isikkoqarluni aappassaaneerneqarnissa-minut ingerlanneqarnissaa
akuersaarpara.
Jonathan Motzfeldt, ataatsimiinnermi aqutsisoq, Inatsisartut
Siulittaasuat, Siumut.
Siunnersuuteqartoq Aqqaluk Lynge.
Aqqaluk Lynge, siunnersuuteqatoq, Inuit Ataqatigiit.
Isumaqarpunga siunnersuutip taamatut
ilassilluarneqarnera qujassutigissallugu.
Taamaattumillu tassa ukiamut
Naalakkersuisut saqqummiusseqqinnissaat utaqqissavarput. Taakkua illut
pineqartut paasisakka malillugit siusinnerusukkut Ilulissat kommuneannut
oqartussaaffigitinneqarsimagaluarlutik, paasivara Qullissat Ikinngutaannit
massakkut tunniunneqarsimasut.
Taamaattumik taannartaa Naalakkersuisunut
qinnutigissavara iluamik paasilluaqqullugu, taamaasilluta suna
periarfissaanersoq paasisinnaaniassagatsigu.
Qujanaq kiisami siunnersuummik
taperserneqarama tamanit partiinit killitsingaarlunga arfininngorneq sapaallu
nuannaarlunga suliartoqqinnissannut pilerisukkumaarpunga.
Jonathan Motzfeldt, ataatsimiinnermi aqutsisoq, Inatsisartut
Siulittaasuat, Siumut.
Attaveqatigiinnermut Naalakkersuisoq.
Mikael Petersen, Attaveqarnermut, Avatangiisinut Ineqarnermullu
Naalakkersuisoq, Siumut.
Qujanaq.
Tassa uangattaaq partiinut tamanut soorunami
aamma siunnersuuteqartumut qujarusuppunga.
Tassami suliassaq taanna tamatta
nuannaarutigissavarput assortuussutaanngitsumik siunnerfi-littut uani
oqaluuserineqarmata.
Aamma nuannaarutigaara Siumup
oqaaseqartuata ilanngullugu Naalakkersuisut kaammattor-matigut tamatumani aamma
danskit Naalakkersuisuisa suleqataasinnaanerat misissoqqullugu.
Isumaqarpunga tamanna aamma
pissusissamisuussasoq, tassami taamanikkut Qullissat inuerunneqarmata
nalunngilarput qallunaat naalakkersuisuisa aalajangernerat tunngavigalugu aamma
pisimasoq.
Erseqqissaatigissavara inatsisartunullu
oqaatigalugu tassa Danmarkimi Avatangiisinut Ministeri Hans Christian Schmidti
aasamut augustusip aallartilaarnerani nunatsinnut tikeraar-tussaammat, aamma
naatsorsuutigigakku periarfissaqassagutta tikeraarnerata nalaani Qullissa-nut
alakkerternissaanut.
Taassuma saniatigut oqaatigineqartut ilaat
tassa Inuit Ataqatigiit oqaaseqartuata ilanngullug erseqqissaatigaa, illut
Qullissani illut Ilulissat kommuneannut isumagisassanngorlugit tunni-unneqarsimasut.
Kiisalu aamma qularnanngilaq kommunet assigiinngitsut aamma illunik
ataasiakkaanik ilaatigut piginnittutut aamma nalunaarfigineqarsimassasut
naatsorsuutigisin-naagakku.
Tassa tamakku ilanngullugit
nalilersorneqassapput, paasisinnaasallu tamarmik qaqilerneqas-sallutik.
Taamaalilluta siunissami aamma kommuneqarfiit iluini killeqarfiisa iluini
avatangii-sinut pisussaaffiit akisussaaffiillu nutaamik nalilersorneqarnerini,
aammalu illoqarfiit imaluunnit inoqarfiit killeqarfiisa avatannut tunngatillugu
akisussaaffiit aamma tamakkua tamarmik ilanngullugit nalilersuinermi
tunngavigineqarumaarput. Siunissami Qullissat pillugit qanoq
aaqqiisoqarsinnaanissaanik.
Kisianni tamatta
isumaqatigiissutigigunarparput saliisoqartariaqartoq, aammalu Qullissanut
tunngatillugu akisussaaffiit ersarinnerusut pilersinneqartariaqartut.
Tamatumani soorunami kommunet attuumassuteqartut tassa Qeqertarsuup kommunea
Ilulissat kommuneat minnerun-ngitsumillu Qullissat Ikinngutai peqatigiiffik,
tamatumani aamma suleqatigiumaarpagut.
Qujanaq.
Jonathan Motzfeldt, ataatsimiinnermi aqutsisoq, Inatsisartut
Siulittaasuat, Siumut.
Taamaalilluni oqaluuserisassaq
naammassivoq, Naalakkersuisut misissussavaat illut kikkunnit pigineqarnersut.
Aammalu tammatsaaliugassat iluatinnaateqartut naliliigallartoqassalluni,
aammalu aningaasartuutissanut missingersuusiortoqassalluni.