Oqaluuserisassani immikkoortoq 77 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ulloq
ataatsimiiffiusut aqqarnat, sisamanngorneq 20. marts 2003 nal. 13:14.
Asii Chemnitz
Narup, apeqquteqartoq,
Inuit Ataqatigiit.
Qujanaq.
KANUKOKA 2002-p
upernaagaa kommuninut paasiniaavoq meeqqat inuusuttuaqqallu immikkut
ikiorserneqarnissamik pisariaqartitsisut qassiunerannik. Ilanngullugu
paasiniarneqarpoq ikiorserneqartariaqalernermut suut patsisaasarnersut.
Paasiniaasimanerup
inernerisa KANUKOKA-mit pisortatigoortumik nalunaarutigineqarnerat
naapertussagaanni, meeqqat inuusuttuaqqallu 150-it 200-ullu akornanniittut ima
imaannaanngitsigisunik ajornartorsiortinneqartigipput, allaat
angerlarsimaffimmik avataanut inissinneqartariaqarlutik.
Misissuinerup
siunertaa paasiniaanermilu periuserineqarsimasut saqqummiunneqanngikkaluartut,
taamaattoq kisitsisit saqqummiunneqartut Inuit Ataqatigiinni
tusaanngitsuusaarusussimanngilagut meeqqat inuusuttuaqqallu ullutsinni qanoq
annertutigisumik atugarliortitaanerannik tikkuussisuusut nalileratsigit.
Ajornartorsiutillu pinartutut isumaqarfigigatsigit upernaariarsuaq taamani
Isumaginninnermut Naalakkersuisuusoq kaammattortuarsimavarput qanoq
iliuuseqaqqullugu.
Eqqarsarnartoqaqisumilli
suallaatiginngisatsinnik.
Maanna
Naalakkersuisunut apeqqutigineqassaaq:
1. Misissuinerup kingorna Isumaginninnermut
Naalakkersuisoqarfimmit qanoq iliuuseqartoqarsimanersoq ? pineqartorpiaat
pillugit?
2. KANUKOKA qanoq suleqatigineqarpa?
Isumaginninnermi
malittarisassanik kommunit ingerlatsinerannik nakkutiginninnissamut Naalakkersuisut
pisussaaffeqarput, takuuk Isumaginnittoqarfiup aqunneqarnera
aaqqissuussaaneralu pillugit Inatsisartut peqqussutaanni nr. 11, 12. november
2001-imeersumi, ?1.
Naalakkersuisunut
apeqqutigineqassaaq:
3. Meeqqat inuusuttuaqqallu pineqartut pillugit,
nakkutilliisussaatitaanermik pisussaaffik qanoq qangalu
naammassineqarsimanersoq? Kiisalu apeqqutigineqassaaq:
4. Naalakkersuisut nakkutilliisussaatitaanermik
pisussaaffitsik naapertorlugu suliassanik suliarinninnerminnut atatillugu
paasissutissanik pisariaqartunik kommunalbestyrelsinut piumasaqarnerminni
paasissutissanik pilertortumik pissarsisarpat? Paasissutissallu
sukumiisuusarpat?
5. Naalakkersuisut qanoq iliuuseqalersaarnersut,
meeqqat inuusuttuaqqallu sumigiinnakkat pillugit?
Apeqqut oqaasiinnarmik
Inatsisartut saqqummiunneqarnissaat kissaatigaara § 36, imm. 2 tunngavigalugu.
Qujanaq.
Jonathan Motzfeldt, ataatsimiinnermi aqutsisoq, Inatsisartut
Siulittaasuat, Siumut.
Tamatumuunga
akissuteqassaaq Ilaqutariinnut Naalakkersuisoq.
Ruth Heilmann, Ilaqutariinnut Peqqissutsimullu
Naalakkersuisoq, Siumut.
Qujanaq.
Meeqqanut
inuusuttuaqqanullu inissiffissaaleqisitsineq pillugu misissuinermit inernerit
toqqissisimananngillat akuerineqarsinnaanatillu. Tamanna peqatigalugu
nassuerutigiuminaappoq meeqqat inuusuttuaqqallu sumiginnakkat suli amerlanerit
pisariaqartitaminnik ikiorserneqartannginnerat.
2001-imi
aasakkut ataatsimiititaliaq pilersinneqarpoq KANUKOKA-mit Ilaqutariinnermullu Pisortaqarfimmit
inuttaqartoq. Suleqatigiissitamut suliakkiissutit ulloq unnuarlu meeqqanut
inuusuttuaqqanullu paaqqinniffinnut attuumassuteqartut tassaapput:
- Ulloq unnuarlu meeqqanut inuusuttuaqqanullu
paaqqinniffiit ingerlanneqarnerannut ineriartortinneqarneranullu KANUKOKA-p
Ilaqutariinnermullu pisortaqarfiup akornanni suleqatigiinnerup
nukittorsarnissaa.
- Paaqqinniffiit pillugit
ilisimatinneqartarneq suliassaqarfiullu annertusarnissaanut
ineriartortinnissaanullu Naalakkersuisunut inassuteqaateqartarnissaq.
- Paaqqinniffiit assigiinngitsut
ingerlanneqarnerinut aningaasalersueriaatsinik saqqummiussineq.
- Meeqqanut inuusuttuaqqanullu
suliassaqarfiup iluani sullinniakkanut aalajangersimasunut paaqqinniffiit
neqeroorutigineqarsinnaasut pisariaqartinneqartut paasiniarnissaat, tassunga
ilanngullugu paaqqinniffinnut utaqqisut pillugit ilisimatitsissuteqartarnissaq.
- Angerlarsimaffiup avataanut inissiinissaq
pisariaqartillugu ilaqutariinnut, meeqqanut inuusuttuaqqanullu tunngasut
iluanni qanoq pisoqarneranik ilisimatitseqatigiittarneq.
Suleqatigiissitaliami
oqaluuserineqartarput ulloq unnuarlu paaqqinniffiit perorsaariaasiat,
ulluinnarni sulinerat ingerlanneqarnerallu, paaqqinniffinni inissanik
pisariaqartitsinerup misissorneqarnera, ilanngullugu KANUKOKA-mit misissugaq
uani apeqqummi pineqartoq kiisalu paaqqinniffiit aningaasaqarnikkut
inissisimanerat qulaaajarneqarluni.
Inuusuttuaqqanut
paaqqinniffinni inissat amerlineqarsinnaanerat siunertaralugu Sisimiuni ulloq
unnuarlu paaqqinniffinni immikkoortortaqarfinni inissinneqartartut
eqqarsaatigalugit allanngortitsisinnaaneq pillugu siunissami qaninnerpaami
suleqatigiissitaliaq isummertussaavoq. Tamanna peqatigalugu
naatsorsuutigineqarpoq suleqatigiissitaliaq piffissami qaninnermi ulloq
unnuarlu paaqqinnittarfiit siunissami ineriartortinnissaannut Naalakkersuisunut
siunnersuuteqassasoq.
Ukiuni
arlalinngortuni ulloq unnuarlu paaqqinniffinnik piorsaanissaq tulleriiaarinermi
salliutinniarneqarsimanngilaq, taamaattumik ulloq unnuarlu paaqqinniffinnut
pioreersunut immikkoortortanik pisortaqarfik pilersitsiortorsimavoq,
tamatumuuna inissiivissanik pisariaqartitsineq allanngoriartortoq
annertusiartortorli ikorfartorniarlugu. Inissat nutaat takku KANUKOKA-mut
isumaqatiginninniarnermi inissanik amerliliissutitut akuerineqartarput.
Taamatut iliornikkut suliassaqarfimmi tassani piorsaaninarneq
attanniaannarneqarsinnaanngimmat siunissami ulloq unnuarlu paaqqinniffinnik
ineriartortitsinissamik suleqatigiissitaliap siunnersuuteqarnera tunngavigalugu
Naalakkersuisut siunissaq ungasinnerusoq eqqarsaatigalugu piorsaanissamik
pilersaarusiussamaarput.
Sisimiuni
paaqqinniffimmik katsorsaaffiusumik sanaartortitsinissamut
aningaasaliisoqarnissaanik 2003-imut Aningaasanut Inatsisissatut siunnersuummi
Naalakkersuisut siunnersuuteqarput. Taamatuttaaq Ammassalimmi Prinsesse
Margrethep meeqqanut angerlarsimaffiutaanut nutaamut aammalu Qaqortumi
Ivaaqqamut nutaamut pilersaarusiornissamut aningaasaliinissamik
siunnersuuteqartoqarpoq.
Meeqqanik
inuusuttuaqqanillu ikiorsiisarneq pillugu peqqussutissatut siunnersuummi
kommunit arlallit ingerlatseqatigiiffigisinnaasaannik kommunini ulloq unnuarlu
paaqqinniffimmik pilersitsinissamut periarfissaqassaaq. Siunnersuummi aamma
kommunit ilaqutariinnik inuussutissarsiutigalugu paarsisartussanik pilersitsinissaat
periarfissinneqarpoq. Namminersornerullutik Oqartussanit ingerlanneqartunit
ulloq unnuarlu paaqqinniffinnitulli Naalakkersuisut aamma Kommuninit
ingerlanneqartunut ulloq unnuarlu paaqqinniffinnut
nakkutiginnittussaatitaassapput.
Misissuinerup inerneri
Naalakkersuisunit soorunalimi qisuariarfigineqarpoq, misissuineli aamma
nangaanartoqalaarsinnaavoq sinerissami Kommunalbestyrelsini meeqqat
inuusuttuaqqallu pillugit suliassat tamarmik suliarineqarsimanerinik kisitsisit
takutitsinngimmata. Kisitsisit soorunalimi mianersuutassaapput taamaattorli
ilungersunartutut isigineqassallutik.
Naalakkersuisutsinnerlugit
Ilaqutariinnermut Pisortaqarfik isumaginninnermut tunngasunik, ilanngullugu
meeqqanut inuusuttunullu suliassaqarfik kommuninut nakkutilliiartortarpoq.
Isumaginnittoqarfiup aqunneqarnera aaqqissuussaaneralu pillugit maleruagassat
naapertorlugit nakkutilliineq kommunalbestyrelsimut qinigaaffiup iluani
minnerpaamik ataasiarluni pisartussaavoq. Meeqqanut inuusuttunullu
suliassaqarfimmi aammalu annertuumik innarluutilinnut suliassaqarfimmi
nakkutilliineq kommunalbestyrelsimut qinigaaffiup iluani ataasiaannarani
ingerlanneqartarpoq.
Ilaqutariinnermut
Pisortaqarfimmi isumaginninnermut tunngasunik nakkutilliinermi suliffiup iluani
atugassatut malittarisassialiortoqarsimavoq suliassaqarfinni ataasiakkaani suut
misissorneqassanersut allattorsimaffittalimmik, ilanngullugu meeqqanut
inuusuttunullu suliassaqarfik. Ilaatigut siunertaavoq nakkutilliinerup
assigiiaarnerusumik ingerlanneqartarnissaa, taamaalilluni ilaatigut nuna
tamakkerlugu inerniliinissaq ajornannginnerulissalluni ilaatigullu
nakkutilliinermi paasisanik sanilliussinissaq ajornannginnerulissalluni.
Tamatuma
malitsigisussaavaa meeqqanut inuusuttunullu suliassaqarfimmi nakkutilliineq
ajornannginnerusumik sakkortusarneqarsinnaammat kiisalu nakkutilliineq
kommunimik siunnersuinermit ilitsersuinermillu
immikkoortikkuminarnerulissalluni.
Nakkutilliinermi
meeqqat inuusuttuaqqallu kommunit inissiffissaarutaat soorunalimi nakkutigineqassapput.
Inissiigallarnissamik kommunit qanoq tulleriissaarisarneranni ataasiakkaatigut
pissutsit apeqqutaapput.
Kommuninit
ataasiakkaanit paasissutissat nakkutilliinermi atugassat Ilaqutariinnermut
Pisortaqarfimmit piumasarineqartarput, nakkutilliinissamullu
pisariaqartinneqartut paasissutissat Pisortaqarfimmit pissarsiarineqartarput.
Inissiinissamik
ajornartorsiutip inuiaqatigiinni ilungersunartutut ajornartorsiutaanera
Naalakkersuisunit ilisimaneqarpoq, siunertaavorlu soorunalimi ajornartorsiutip
sapinngisamik annikillisinneqarnissaa. Naalakkersuisullu tamanna qanoq
iliuuseqarfiginiarpaat ilaatigut periarfissanik misissuinermikkut, nuna
tamakkerlugu paaqqinnittarfimmik pilersitseqqinnermikkut kiisalu meeqqanut
inuusuttuaqqanullu ikiorsiisarneq pillugu peqqussutissatut siunnersuummi
sinerissami kommunini paaqqinnittarfinnik pilersitsinissamut ilaqutariinnillu
inuussutissarsiutigalugu paarsisartunik periarfissiinikkut.
Qujanaq.
Isak Davidsen, ataatsimiinnermi aqutsisoq, sinniisussaq siulleq,
Atassut.
Apeqquteqartoq
Asii Chemnitz Narup.
Asii Chemnitz
Narup, apeqquteqartoq,
Inuit Ataqatigiit.
Qujanaq.
Naalakkersuisup
akissutaanut qujavunga.
Taamaattoq
oqaatigissavara siorna upernaap ingerlanerani tutsiummata meeqqat taama ikitsigisut/amerlatigisut
angerlarsimaffiup avataanut inissinneqartariaqartut qisuariarsimavugut
sakkortuumik, isumakuluutigigatsigit taakkua.
Taamaattumik
apeqqutinni taakkorpiaat meeqqat taamanikkut pineqartut, apeqqutikka
taakkununnga sammitikkaluarpakka. Taamaattoq Naalakkersuisup akissutaa
tamakkiisuuneruvoq, taamaalillunga oqartariaqarpunga meeqqanut taakkorpianut
pissutsit ullumikkut qanoq ittuuneri, qanorlu pisortaninngaanniit
suleriaaseqartoqarsimanersoq suli ersernerluppoq.
Taamaakkaluartoq
paasissutissat arlallit soqutiginarput, aatsaat taama erseqqitsigisumik
Naalakkersuisup tungaaninngaanniit oqaatigineqarmat misissuinerup inerneri
aamma nangaanartoqarsinnaammata. Taamaattumik asuliinnaanngitsoq
apeqqutigisarsimavarput KANUKOKA-p misissuititsisimanerata siunertarpiaa
sunaanersoq.
Kisianni
taamaakkaluartoq ilumoorpoq suli ilungersunartuuvoq meerartavut taama
amerlatigisut ulluinnarni paarineqarnera ima pitsaanngitsigisoq allaat
angerlarsimaffiup avataani inissinneqartariaqarlutik.
Taava eqqarsarnartortaqarpoq
assigiinngitsutigut minnerunngitsumik soorunami uani annerusumik ulloq unnuarlu
angerlarsimaffinni tunngatippaa Naalakkersuisup akissuteqaatini.
Taamaakkaluartoq ilaqutariinni tamakkiisumik sullissinissaq aamma
pingaartinneqartarmat, ersernerluppoq taannartaa. Kisianni periarfissaqassuugut
upernaamut aamma kingusinnerusukkut meeqqanut inuusuttunullu ikiorsiisarnermut
peqqussutip aappaassaaneerneranni eqqartueqqinnissatsinnut.
Isak Davidsen, ataatsimiinnermi aqutsisoq, sinniisussaq siulleq,
Atassut.
Taava Anthon
Frederiksen naatsumik.
Anthon
Frederiksen, Kattusseqatigiit.
Uanga
uggorilaariga Naalakkersuisup akissuteqarnermini ilaqutariinnut katsorsaanermut
tunngasunik annerusumik attugaqanngimmata, naak akissuteqaammi Sisimiuni paaqqinniffimmik
katsorsaaviusumik sanaartortitsinissamik oqartoqaraluartoq.
Kisianni tassa
nalunngisatsituut meeqqat inuusuttuaqqallu taama amerlatigisut
ikiorserneqartariaqarnerat pisariaqartinneqartoq tamatta takusinnaareerlutigut.
Ilaqutariinnermut katsorsaaviliornissamut tunngasut, taakkua aamma
minnerunngitsumik apeqquteqartup oqarneratuut ilaqutariinnut annerusumik
ersarinnerusumillu siunniussisorsaqarpalaannginnera uani assorujuk
ajuusaarnarpoq.
Taamaattumik
kaammattuutigerusuppara suliap massakkut ingerlasup ingerlanneqarnerani aamma
ilaqutariinni katsorsaanissamut, ajornartorsiortuni taasuma
eqqarsaatigineqarnissaa Naalakkersuisuni uterfigineqaqqullugu.
Isak Davidsen, ataatsimiinnermi aqutsisoq, sinniisussaq siulleq,
Atassut.
Tullinnguuppoq
Ilaqutariinnermut Naalakkersuisoq.
Ruth
Heilmann, Ilaqutariinnut
Peqqissutsimullu Naalakkersuisoq, Siumut.
Qujanaq.
Tassa
apeqquteqartoq qaqeqqinnermini oqaatigivaa ilungersunartuusoq meeraq
angerlarsimaffiup avataanut taamatut inissittariaqartut amerlatiginerat uani
KANUKOKA-p misissuisimanermini nalunaarutaa eqqarsaatigalugu taanna
qisuariarfigineqarsimasoq aamma Inuit Ataqatigiit tungaaninngaanniit.
Tamanna aamma
Naalakkersuisut ilungersunartutut tigusimagamikku, taamaattumik ukioq kingulleq
annertuumik ulloq unnuarlu inissiisarfiit ilaatigut allilerniarlugit, aammalu
nutaamik pilersitsiniarluni iliuutsit ingerlanneqarsimapput. Kisianni aamma
soorunami tamarmik inissinneqarsinnaanerat taanna periarfissatut kisimi
isigineqanngilaq. Aamma Anthon Frederiksenip apeqquteqaataanut tunngatillugu
ilaqutariinnut siunnersuineq, aammalu katsorsaaneq annerusumik
ingerlanneqassasoq aamma Naalakkersuisut taanna siunnerfigivaat. Aammalu
tassuunga tunngatillugu suleqatigiissitaliamik aamma pilersitsinikuupput,
ilaqutariinnut katsorsaasarnerup qanoq ittumik ingerlanneqarsinnaanera, qanorlu
pisariaqartitsineq annertutigisoq tassuunakkut aamma misissussallugu.
Uani pineqarmata
aamma ajornartorsiuvissut immikkoortinneqartariaqartut aamma
katsorsarneqartariaqartut, kiisalu aamma immikkut inissinneqartariaqartut.
Taakkulu aamma
inissinneqarsinnaaneq pitinnagu iliuuseqarnissaq pinaveersaartitsinissaq aamma
annertuumik iliuuseqarfigalugu KANUKOKA peqatigalugu, kiisalu kommunini
pisussaasut isumaginnittoqarfik atuarfik, aammalu soorunami Peqqinnissaqarfik
eqqarsaatigalugu suleqatigiissutigineqarsinnaanera pinaveersaartitsinerup.
Tassuunakkut annertunerusumik iliuuseqarnissaq tassani siunertarineqarpoq.
Taamaattumik ukua
inissiisarfiit piinnarnagit aamma ilaqutariinnut qanoq iliuuseqarnissamik
eqqarsartoqarnera uani erseqqissaatigerusuppara aamma Anthon Frederiksen
apeqqutaa.
Qujanaq.
Isak Davidsen, ataatsimiinnermi aqutsisoq, sinniisussaq siulleq,
Atassut.
Taamaalilluni ullormut oqaluuserisassaq
normu 77, Naalakkersuisunut apeqquteqaat naammassivoq.