Oqaluuserisassani immikkoortoq 78 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ulloq
ataatsimiiffiusut aqqarnat, sisamanngorneq 20. marts 2003 nal. 14:10.
Asii Chemnitz
Narup, apeqquteqartoq,
Inuit Ataqatigiit.
Piginnaanngorsaaqqinnissamut
ikiorsiisarneq pillugu Inatsisartut peqqussutaat maanna ukioq ilivitsoq
atortinneqalereersimalerpoq.
Innuttaasut
piginnaanitik sulisinnaassusertillu aallaavigalugit suliffeqartitaanermikkut
inuiaqatigiinni piorsaaqataanissamut periarfissinneqarnissaat siusinaartumillu
pensionisiaqartitsisarnerup annikillisinneqarnissaa peqqussusiornermi
pingaatinneqartut ilagaat.
Piginnaanngorsaaqqinnissamut
peqqussut naapertorlugu kommunit pisussaapput Naalakkersuisunut kisitsisitigut
paasissutissiissallutik, takuuk § 18, imm. 2.
Naalakkersuisunut
apeqqutigineqassaaq:
1. Naalakkersuisut kommunenit sunik
paasissutissinneqarumallutik piumasaqarsimappat?
2. Piginnaanngorsaaqqinnissamut periarfissat
2002-mi qanoq misilittagaqarfigineqarpat?
3. Piginnaanngorsaaqqiinniarnermi suut
aporfiusimappat?
Apeqqut
oqaasiinnarmik Inatsisartunut saqqummiunneqarnissaa kissaatigaara, § 36, imm. 2
tunngavigalugu.
Isak Davidsen, ataatsimiinnermi aqutsisoq, sinniisussaq siulleq,
Atassut.
Ilaqutariinnermut
Naalakkersuisoq.
Ruth
Heilmann, Ilaqutariinnut
Peqqissutsimullu Naalakkersuisoq, Siumut.
Qujanaq.
Apeqqummut
matumani piginnaanngorsaaqinnissamut tunngasut pingaaruteqartut
saqqummiunneqarmata Naalakkersuisunit qujavugut aamma matumani Naalakkersuisut
piginnaanngorsaaqqinnissamut suliniutinik nalileeqqinnissamut
periarfissinneqarput.
Piginnaanngorsaaqqinnissaq
pillugu Inatsisartut peqqussutaanni 2002-mi januaarip ulluisa aallaqqaataanni
atortuulersumi siunertarineqarpoq inuit sapinngisamik amerlasuut
suliinnarnissaannik imaluunniit sulileqqinnissaannik periarfissiinissaq.
Siunertarineqarportaaq
kommunit siusinaartumik pensionisiaqalersitsinikkut piumasaqaatitaqanngitsumik
pilersuinerannut sanilliullugu piginnaanngorsaaqqinnermi suliniutinik
aallartitsinissamut kajumissuseqalersinnissai.
Asii Chemnitz
Narup-ip oqarneratut piginnaanngorsaaqqinnissaq pillugu peqqussummi § 18, imm.
2 naapertorlugu kommunit Naalakkersuisunut kisitsisitigut
paasissutissiinissamik pisussaaffeqarput.
Peqqussut
tunngavigalugu aaqqissuussinernik neqeroorfigineqarsimasut tamaasa kommunip
allaffitsigut aqutsinermut atatillugu kisitsisitigut nalunaarsuusiortussavai.
Kommunini inatsisinik
aqutsinissamut atugassamik ilitsersuusiortoqarsimavoq, tassani ilaatigut
erseqqissarneqarluni kisitsisitigut paasissutissat makkuninnga imaqarsinnaasut:
C Piginnaanngorsagaasup aqqa inuttullu normua,
C pineqarnersoq piginnaanngorsaaqqinneq, suliffeqarfimmi
piginnaanngorsaaqqinneq imaluunniit eqaannerusumik suliffeqarneq
C aaqqissuussinerup qanga aallartinnera,
sivisussusissaatut pilersaarutaasoq sivisussuserpiarlu
C aaqqissuussinermi sapaatip akunneranut tiimit
qassit ingerlanneqartarnersut
C pineqarnersoq piginnaanngorsaaqqinnermi
ikiuutit, akissarsianut tapiissutit imaluunniit tapiissutit immikkut ittut.
2002-mi kommunit
marluinnaat peqqussut malillugu piginnaanngorsaaqqinnermik
Namminersornerullutik Oqartussanit aningaasanik utertitsinertalimmik
ingerlatsisimapput. Kommunit allat piginnaaanngorsaaqqinnissamut
aalajangersakkat malillugit piginnaanngorsaaqqinnginnermi qulaajaanermik
ingerlatsisimanersut immikkut misissorneqarsimanngilaq.
Kommunini
Ilaqutariinnermut Pisortaqarfimmit nakkutilliivigineqarsimasuni aammalu suli
piginnaanngorsaaqqinnermik ingerlatsilersimanngitsuni oqaatigineqarpoq
piginnaanngorsaaqqinnissamik aaqqissuussineq isumaginninnermi sullitat
suliffeqarnermut utertinniarlugit suliniuteqarnermi periaasissatut periarfissaalluartutut
isumaqarfigineqartoq, kisiannili sulinermi periaatsimik nutaamik
sungiussiniarnissaq apeqqutaasoq. Ilisimaneqarpoq 2003-mi qaammatit siulliit
ingerlaneranni piginnaanngorsaaqqinneq pillugu aaqqissuussap atornreqarnissaa
kajumigineqarleriartortoq, taamaattumillu Naalakkersuisut isumaqarput piffissap
sivitsoriartornerani aaqqissuussineq periarfissallu tassaniittut kommunit
isumaginninnermi aammalu suliffeqarnermut tunngasunik sulinerminni
pissusissamisoortutut isigiartuaalersimagaat.
Aaqqissuussinerup
sapinngisamik tamakkiisumik atorneqarnissaanut suut aporfiusimanersut
oqaatigissallugit suli siusippallaalaarpoq, tassami peqqussut ukioq ataaseq
sinnilaaginnarlugu atuussimammat.
Taamaattumik
ukiumoortumik isumaginnittoqarfinni pisortat naapinneranni aprilimi pisussami
piginnaanngorsaaqqinnissamut tunngasunik eqqartueqatigiinnissaq KANUKOKA-mut
Naalakkersuisut innersuussutigilersaarpaat.
Qujanaq.
Isak Davidsen, ataatsimiinnermi aqutsisoq, sinniisussaq siulleq,
Atassut.
Asii Chemnitz
Narup apeqquteqartoq.
Asii Chemnitz
Narup, apeqquteqartoq,
Inuit Ataqatigiit.
Naalakkersuisup
akissuteqaataanut qujavunga, taamaallaat marlussuit oqaaseqarfigilaassavakka.
Tassa uani
ilisimalaarutigilaassavara kisitsisitigut nalunaarsuinermi paasissutissat uterfigiumaaratsigit,
minnerunngitsumik una piginnanngorsagaasup aqqa inuttullu normua, tassani
paasissutissat tamakkua mianernartut nalunaarsuisinnaanermut malittarisassanut
naapertuunnersut, tassa registerlov-imut naapertuunnersut uterfigineqartariaqartutut
Inuit Ataqatigiinni isumaqarfigivagut.
Taava
eqqaamaneqassooq piginnaangorsaaqqinnissamut tunngatillugu peqqussutissatut
siunnersuut suliarinerani annertuumik isumalluarfigineqarmat, maani
Inatsisartuni. Taamaattumik soqutiginarpoq aamma malittarissallugu peqqussutip
atortinneqarnera, minnerunngitsumik ippassaq Ane Hansenip
oqaluuserisassanngortitaani eqqartukkavut eqqarsaatigalugit nunatsinni
suliffissaaleqisut ukiuni arlalissuarni aamma suliffissaarussimasut taakkua
tassuungakkut sulileqqissinnaanissaannut periarfissat iluatinnartut
tunngavissinneqarnikuummata.
Isak Davidsen, ataatsimiinnermi aqutsisoq, sinniisussaq siulleq,
Atassut.
Ilaqutariinnermut Naalakkersuisoq.
Ruth
Heilmann, Ilaqutariinnut
Peqqissutsimullu Naalakkersuisoq, Siumut.
Qujavunga akissuterput
naammagineqarmat, uanilu oqaatigineqartoq soorunami nalunngilarput inuttut
normup tamanut saqqummisumik saqqummiutinnginneqarnissaa. Taanna aamma
soorunami pisortaqarfitta ilisimaarilluinnarmagu oqaatigisariaqarpoq.
Aammalu uani
piginnaanngorsaaqqinnissami inatsit pilersinneqarneranni aamma tunngaviuvoq
siusinaarluni suliunnaarnersiutissallit, taakkua aamma imatut
periarfissinniarneqarnerat tassannga aallaaveqarmat. Tassami suli pisinnaasut
aammalu sulisinnaasut aamma periarfissinniarlugit
Taamaattumik
tamatta soqutigaarput soorunami piginnaanngorsaaqqinnermut inatsisip aamma
amerlanerusunut atortinneqarnissaa. Tassani nalunnginnatsigu aamma ullumikkut
siusinaarlutik pisartagaqartut immaqa taamatut sulisinnaajunnaarnersiutillit
amerlaginarsinnaammata. Taamaalillunilu aamma piginnaanngorsaaqqinneq
aqqutigalugu soorunami sulisinnaanissamik periarfissinneqarnissaq, taanna aamma
Inatsisartunit aammalu Naalakkersuisunit pingaartutut isigineqarluni.
Qujanaq.
Isak Davidsen, ataatsimiinnermi aqutsisoq, sinniisussaq siulleq,
Atassut.
Taamaalilluni
ullormut oqaluuserisassaq Naalakkersuisunut apeqquteqaat normu 78
naammassivarput.