Oqaluuserisassani immikkoortoq 88 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut
ataatsimiiffiusut arfineq pingajuat, 13. marts 2003
Astrid
Fleischer Rex, apeqquteqartoq,
Demokraatit.
Naalakkersuisunut
apeqqutiginiarpara inuusuttut ataani taaneqartut 14-leereernerini immikkut
ilinniarsimasunit ikiorneqartuarnissaat anguniarlugu suut suliniutissatut
eqqarsaatigineqarpat?
Tunngavilersuutigaara
nunatsinni ulloq unnuarlu paaqqinniffinnut utaqqisutut allatsissimasut qanoq amerlatigineri
tamatta nalunngilagut. Utaqqisutulli allatsissimasut utaqqisunulluunniit,
paaqqinniffimmik pisariaqartinneqartumik peqartoqannginnera pissutigalugu,
allatsinneqarsinnaangitsunut sanilliullugit iluatsitsinerupput. Tassani
eqqartorpakka meeqqat 14-leereernermikkut immikkut paaqqinnittarfimmit Meeqqat
Illuannit anisussanngortut. (Tassunga meeqqat 4-nit 14-nut ukiullit
inissinneqartarput.)
Ajoraluartumik
taakku katsorsarneqarnerisa nanginneqarnissaannut periarfissanik
peqartoqanngilaq. Taamaattumik taakku angajoqqaaminnut tiguseqqinnissaminnut
nukissaqanngitsunut imaluunniit paaqqinniffimmut allamut, katsorsarnissaannut
pisariaqartitaannut naammassinnissinnaanngitsumut,
nuutsiinnarneqartariaqartarput. Ataasiakkaatigullu aamma nalaanneqartarpoq pineqartut
Danmarkimi Eferskolenut iluatsinngitsumik atuariartortinneqartarneri.
Fatuma Alip
Amalie Petersenillu (tamarmik Sanami A1-mi sulisut) Sermitsiaq nr. 5-imi ulloq
31. januar 2003-mi allagaat ?Inuusuttut unammilligassat? atuareerlugu,
uppernarsivara ukioqatigiit pineqartut katsorsarneqarnissamik
pisariaqartitsisut immikkut ilinniarsimasunik ikiorserneqarsinnaaqqullugit
nunatsinni suliniutit amigaatigineqartut.
Qujanaq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Akissuteqassaaq
Ilaqutariinnermut Naalakkesuisoq.
Ruth
Heilmann, Ilaqutariinnut
Peqqissutimullu Naalakkersuisoq, Siumut.
Qujanaq.
Paaqqinniffiup
Meeqqat Illuata sullitai tassaapput meeqqat inuusuttullu sisamanit 14-inut
ukiullit, annertuumik sumiginnagaasimanertik pissutigalugu
katsorsarneqarnissaat siunertaralugu
misissortinneqartussatut/malinnaaffigineqartussatut inissinneqarsimasut
imaluunniit perorsaanikkut sukumiisumik katsorsarneqarnissaat pillugu
inissinneqarsimasut.
Meeqqat Illuat
tassaavoq paaqqinniffik immikkut ittoq immikkut perorsaanikkut ilisimasalik,
paaqqinniffiup anisussanngortitsinissamut atatillugu kommunimik
angerlarsimaffigisamik suleqateqarnissaq pilersaarusioqateqarnissarlu
pingaartitaraa. Malitseqartinneqanngitsumik imaaliallaannaq anisussanngortitsinnginnissaq
paaqqinniffiup qulakkeertarpaa, soorlu tamanna meeqqanik inuusuttunillu
ikiorsiisarneq pillugu Inatsisartut peqqussutaanni tapersersuinermik suliniutit
pillugit aalajangersakkani piumasaqaataasoq.
Angerlartitsinermut
atatillugu pilersaarusiortarnermik angerlartitsereernermilu malinnaanermik
paaqqinniffik maligassiuvisuuvoq, tamannalu peqqussutissatut siunnersuut
inatsisartut ataatsimiinneranni matumani immikkoortoq 26-itut suliarineqartoq
akuerineqarpat pinngitsoorani atortussanngortinneqassaaq.
Meeqqat
Illuaniit ingerlariaqqittussatut anisussat suli angerlarsimaffiup avataanut
inissisimanissaminnik pisariqartitsisut paaqqinnifinnut aallanut
inissinneqartarput soorlu AJA-mut MATU-mut, Qasapermiunut, Inuusuttut Inaannut
Qaqortumiittumut, Uummannami Meeqqat angerlarsimaffiannut assigisaanulluunniit.
Kisiannili paaqqinniffinni inissat amigaataaneri pissutaalluni naleqquttumik
inissiivissaaleqisoqarsinnaasarpoq, pingaartumik inuusuttuaqqat immikkut
katsorsarneqarnissaminnik suli pisariaqartitsisut eqqarsaatigalugit.
Meeqqanik
inuusuttunillu ikiorsiisarneq pillugu peqqussutissatut siunnersuummut
atatillugu paaqqinnittarfimmit aninissaq pillugu aalajangersakkat
sukannernerulersinniarneqarput, kommunip angerlarsimaffigisap suliniummik malinnaanissaanik
aammalu angerlartitsinermi malitseqartitsinissamut pilersaaruteqarnissaanik
piumasaqaatitalerlugu. Aammattaaq peqqussutissatut siunnersuummiippoq
paaqqinniffimmit aninissaq pillugu kommunalbestyrelsip aalajangigaanut
naammagittaalliuuteqarsinnaanermut aalajangersagaq.
Meeqqanut
inuusuttunullu suliassaqarfimmi inatsisinik kommunit atuutsitsinerannik
nakkutilliineq isumaginnittoqarfiup aqunneqarnera aaqqissuussaaneralu pillugu
inatsit malillugu ingerlanneqarpoq, isumaginninnermut tunngasunik nakkutilliineq
pillugu Naalakkersuisut erseqqinnerusunik aalajangersaanissamik
piginnaatitaanerat Namminersornerullutik Oqartussat nalunaarutaat nr. 43, 18.
december 2001-imeersukkut naammassineqarsimalluni.
Inatsitigut
aalajngersakkat malillugit kommunini ataasiakkaani suliassaqarfimmi tamatumani
nakkutilliineq ingerlanneqarpoq, taamaalilluni kommunit inatsimmi
siunertarisaasunik sapinngisamik pitsaanerpaamik malinninnissaat
qulakkeerniarneqarluni, aammalu meeqqat inuusuttulluunniit ataasiakkaat
pitsaanerpaamik atugassaqarnissat qulakkeerniarneqarluni.
Qujanaq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Apeqquteqartoq
Astrid Fleischer Rex.
Astrid
Fleischer Rex, apeqquteqartoq,
Demokraatit.
Naalakkersuisup oqaasiinut
qujavunga.
Akissutaanut
qujasinnaannginnama akissutitut kusanartutut isiginnginnakku.
Nalunngilarput
tamatta Meeqqat Illuat qanoq issuagassiulluartigisoq ullutsinni. Taamaammallu
uggornarpoq meeqqat 14-ileereeraangamik takananiissinnaajunnaarlutik
saaffissaarutsinneqartartut.
Naalakkersuisup
akissutiminni eqqartorpaa AJA-mukarsinnaapput, Qasapermiunukarsinnaapput,
MATU-mukarsinnaapput, Børnehjem-imukarsinnaapput allanut.
Sumut
iluaqutaava sulinerat allaagunik meqqat Meeqqat Illuaninngaanniit
14-leereerlutik anisussat allatut suliassaapput.
Taamaattumik
neriuppunga, inissiinnarnagit allanut Naalakkersuisut eqqarsaatigilluassagaat
pilersitsinissaq meeqqat taakkua ikiugassat, aamma 14-ileereerneratigut
kusanartumik ikiuiffissamik.
Qujanaq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Ilaqutariinnermut
Naalakkersuisoq.
Ruth
Heilmann, Ilaqutariinnut
Peqqissutimullu Naalakkersuisoq, Siumut.
Astrid
isumaqatigisorujussuuvakkit.
Soorunami
ikiorniartariaqarput taamatut 14-nik ukiullit aamma allamut inissiinnarnagit.
Aammalu tamanna pisussaaffigaarput Inatsisartuni. Taanna ukiualunni
anguniarneqarpoq meeqqap 14-ileereersup soorunami aamma 20-inik ukioqalernissaa
allaat immikkut iliuuseqarfigineqarluni pisariaqartitai naapertorlugit
20-ileereeraluaruniluunniit aamma taamatut immikkut ikiorserneqarsinnaasoq.
Taamaattumik
isumaqarpunga massakkut suliniutaasup killiffipput eqqarsaatigalugu,
ingerlariaqqinnissarlu taanna oqaatigisara innersuuteqqiinnassallugu, meeqqanut
inuusuttunullu ikiorsiisarnermut peqqussutissap massakkut suliarineqartup
naammassineqarnissaa.
Taanna soorunami
utaqqiinnarnagu, aamma massakkut assigiinngissutigut kommunini aamma
pitsarujussuarnik allat iliuuseqartarput. Taamaattumik kommunit aamma tassani
akisussaaqataapput annertoorujussuarmik.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tassa
eqqaasissutigilaassavara Naalakkersuisunut apeqquteqaatit oqalliffiuneq ajorput
annertuumik. Taamaattumik Aaggaati naatsunnguamik.
Agathe
Fontain, Inuit
Ataqatigiit.
Ippassaani
meeqqanik inuusuttuaqqanillu peqqussutissat eqqartorneqarnerani Inuit
Ataqatigiinninngaanniit tikkuartukkatta, ajornartorsiut tikkuartugarput
tassuunakkut aamma uani oqallinnermi ilaavoq.
Kommunit
aaqqiiniarnermini qanoq iliornermini, tamarmik akissaqarneq ajormata, taavalu
oqinnerpaaq ujartarlugu. Taamaammat eqqarsaatersuutigut tunniutarput uani
oqallinnermi aamma saneqqunneqaannarsinnaanngilaq, tassa eqqarsaatigeqqugatsigu
Inuit Ataqatigiinninngaanniit Naalakkersuisunut, Namminersornerullutik
Oqartussat akiliutaat 75%-inngorluni 25%-it kommuninut
akiligassanngortinnissat, taanna siunissami sulinissami eqqarsaatigeqqullugu.
Meeqqat taamatut katsorsarneqarnissaminnut pisariaqartitsisut
aningaasassaaleqineq pissutigiinnarlugu unitsinnginneqartarnissaat
eqqarsaatigalugu.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Astrid Fleischer
Rex naatsumik.
Astrid
Fleischer Rex, apeqquteqartoq,
Demokraatit.
Qanorsuarluunniit
26 kusanartigigaluarpat, meeqqat inissaqanngippata, allassimasuinnaat
kusanassapput.
Qulequttat
kusanartut, imai aamma kusanartariaqaramik. Taavalu akissaa eqqaaneqariarmat
ilumullimi akikinnerpaassaaq nunatsinnut, meeqqat ikiorluaqqaarutsigit.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Jensine
Berthelsen naatsumik.
Jensine
Berthelsen, Atassut.
Inuit
Ataqatigiikkormiunut erseqqissaatigineqartariaqarsorigakku
ataqqineqartariaqarmat kommunit Namminersornerullutillu Oqartussat nammagassat
agguagassallu pillugit isumaqatigiinniartarmata, maani isumaqatigiinniarnerit
qulaatiinnarlugit qanoq aningaasaliisoqassanersoq eqqartussannginnatsigu.
Aamma tamatumani
Astrid Fleischer Rex-imut, aamma ataqqisariaqarparput kommunit
Namminersornerullutillu Oqartussat asuli pinngillat meeqqat inuusuttuaqqallu
ajornartorsiuteqartut ikiorniarlugit suliniutaat maani taperserlugit
oqaaseqarfigereernikuusagut nakkutigissavagut iluamik suliarineqarnersut
assortuussutiginagit.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Taamaalilluta
Naalakkersuisunut apeqquteqaat immikkoortoq 88 naammassivarput.