Oqaluuserisassani immikkoortoq 91 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut
ataatsimiiffiusut arfersaneq sisamaat, sisamanngorneq 3. april 2003 nal. 13:15.
Johan Lund Olsen, apeqquteqartoq, Inuit Ataqatigiit.
Ja, qujanaq. Tassa apeqqutiginiara naatsunnguuvoq.
Meeqqat atuarfiat pillugu peqqussummi atuarfiup siulersuisuinik pilersitsinissaq pillugu aalajangersagaqartoqarpoq, soorluttaaq atuarfinni siulersuisut taakku kikkunnit ilaassortaaffigineqarnissaat pillugu aalajangersagaqartoqartoq (? 40). Angajoqqaat ilaasortaatitaat tassaassapput inuit, meeqqanut atuarfimmi atuartussatut allatsinneqarsimasunut angajoqqaatut oqartussaassuseqartut imaluunniit meeqqanut paaqqinnittussatut akuerisaasimasut.
Apeqqutigineqartarpoq sooq meeqqap aanakkui aatakkuiluunniit aamma atuarfiup siulersuisuiniissinnaannginnersut, taakkumi angajoqqaatut oqartussaassuseqartutuulli ernuttat atuartinneqarnerat aamma sunniuteqaqataaffigerusuttarpaat.
Naalakkersuisut angajoqqaat ilaasortaatitaannik atuarfiup siulersuisuinut qinersisarneq pillugu peqqussut malillugu aalajangersagaliorsinnaatitaammata erseqqissumik paatsoorneqarsinnaanngitsumillu malittarisassaqaqqullugu apeqquteqaat Naalakkersuisunit taamaammat akillaqquara.
Ole Dorph, ataatsimiinnermi aqutisoq, sinniisussat aappaanut sinniisussaq, Siumut.
Maannakkut akissuteqassooq Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq.
Arkalo Abelsen, Kultureqarnermut, Ilinniartitaanermut, Ilisimatusarnermut
Ilageeqarnermullu Naalakkersuisoq, Atassut.
Qujanaq.
Naalakkersuisut apeqqummut imaattumik akissuteqassapput:
Atuarfik pillugu Inatsisartut peqqussutaanni nr. 8, 21. maj 2002-meersumi § 40 imm. 1 naapertorlugu angajoqqaat sinniisaat qinerneqartassapput atuarfiup siulersuisuinut qinersisinnaasut qinigaasinnaassuseqartullu akornannit taakkulu akunnerminni inuit arlaliullutik ataasiakkaarlutilluunniit qinigassanngortissimasaat aamma qinerneqartassapput.
Aalajangersagaq nutaajuvoq atulersinneqassallunilu augustip aallaqqaataani 2003-mi. Tamatuma kingunerisaanik atuarfiup siulersuisuinut inuit angajoqqaat sinniisaattut qinigaasinnaasut amerlisinneqarput. Taamaaliornikkut atuarfeqarneq pillugu iluarsaaqqinnermi siunertatut, tassa nunaqqatigiit atuarfeqarfiup ingerlanneqarneranut peqataanerulernissaannik anguniagaq, malinneqarpoq aammalu atuarfiup siulersuisuini suleqataanissamut kajumissuseqarlutillu piffissaqartut periarfissinneqarlutik, soorlu meeqqamut ilaqutaasut, atuartuutaarutereersimagaluarlutik siulersuisuni suleqataasareersimasut allallu nunaqqatigiit akornanni peqataanissamut periarfissaqartut.
Inuit tamakku atuarfiup siulersuisuinut qinigaagunik angajoqqaat sinniisaattut allatulli naatsorsuunneqalissapput.
Tassalu augustip aallaqqaataa 2003 aallarnerfigalugu aanaq aatarluunniit atuarfiup siulersuisuinut ilaasortassatut qinigassanngortinneqarunik qinerneqarsinnaalissapput.
Tamatuma akerlianik inuit angajoqqaatut oqartussaassuseqartut imaluunniit meeqqanut paaqqinnittussatut akuerisaasut atuarfimmilu atuartuuteqartut kisimik atuarfiup siulersuisuinut qinersinermi taasisinnaatitaassapput.
Atuarfiit siulersuisuinut qinersinermi kingullermi 2001-imi pisumi aalajangersakkat nutaat suli atuutilersimanngillat. Aalajangersakkat nutaat augustip aallaqqaataa 2003 atuutilissapput.
Atuarfiup siulersuisuinut qinersineq tulleq 2005-imi pissaaq, taamanikkullu aanaq aatarluunniit ilaasortassatut qinigaasinnaanngorsimassaaq. 2003-imi augustip aallaqqaataaniit 2005-imilu qinersinissap tulliuttup tungaanut pisariaqartitsisoqarpat qinerseqqittoqarsinnaavoq, tassanilu aanaq aatarluunniit qinerneqarsinnaalluni. Aamma taamatut pisoqassaaq kommunip 2003-imi augustip aallaqqaataata kingorna nikerartumik qinersisoqarnissaa aalajangerpagu.
Meeqqat atuarfianni atuarfiup siulersuisuini angajoqqaat ilaasortaatitassaannik qinersisarneq pillugu Namminersornerullutik Oqartussat nalunaarutaat nr. 16, 20. august 1997-imeersoq Inatsisartut peqqussutaannut nr. 8-mut 21. maj 2002-meersunut naapertuuttunngorlugu tulliani qinersinissaq sioqqutingaatsiarlugu iluarsiiffigineqassaaq.
Qujanaq.
Ole Dorph, ataatsimiinnermi aqutisoq, sinniisussat aappaanut sinniisussaq, Siumut.
Maannakkut Johan Lund Olsen Inuit Ataqatigiit apeqquteqartoq, takanna.
Johan Lund Olsen, apeqquteqartoq, Inuit Ataqatigiit.
Ja, Naalakkersuisup akissutaanut erseqqissumut qujanaq.
Tassa soorlu Naalakkersuisup akissuteqarnermini erseqqissaraa, tassa atuarfik pillugu Inatsisartut peqqussutaa una, tassa nutaajuvoq. Tassami ilumoorpoq taanna ukioq kingulleq aatsaat Inatsisartuni maani akuersissutigineqarpoq, ?Atuarfitsialak?-p augustip aallaqqaataaninngaanniit ukioq manna aallartivinnissaannut aamma atasumik.
Kisianni tassa malitarisassaq nutaajuvoq, taamaammallu tassa apeqquteqarfigineqartarpugut sineriammiit. Ilaatigullu tassa apeqqutigineqartartut ilagivaat maannakkut aamma uani apeqqutigisara.
Tassa taanna nalornisigineqartarsimavoq, taamaammat aamma pisariaqavikkunarpoq suli annertunerusumik paasisitsiniaasoqartariaqarnera. Tassami maani Inatsisartuni inatsisiliarpassuiavut peqqussusiarisartagullu ima amerlatigipput inoqarfinni tamanut anngussinnaaneq ajorlutik, taamaammallu aamma inuit pisinnaatitaaffitsik erseqqissumik aamma taamaallillutik aamma nalornilertarpaat.
Kisianni tassa paasinarpoq atuarfiup siulersuisuinut tulliani 2005-imi pisussami qularnaatsumik meeqqap aanaa aataaluunniit ilaasortassatut tassa qinigaasinnaassasut, imaluunniit tamanna sioqqullugu immikkut qinersisoqartussaatillugu ajornarunnaassasoq.
Taanna soorunami qujarunnarunneqassaqisoq qularnanngilluinnarpoq, kisiannili aamma apeqqutini allani taava aamma pilersitsivoq.
Qanormi assersuutigalugu meerarpassuit ulloq unnuarlu angerlarsimaffinni sineriatsinni aamma ineqartinneqartut taakkumi angajoqqaatik qimallugit aamma illoqarfinni allaniitinneqartarput.
Taakkumi meeqqat atuarfianni atuartinneqarunik taava angajoqqaat tamatumani qanoq inissisimappat? Taanna apeqqutigerusunnarpoq aamma.
Ole Dorph, ataatsimiinnermi aqutisoq, sinniisussat aappaanut sinniisussaq, Siumut.
Maannakkut akissuteqaqqissooq Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq, naatsoralaanguamik.
Arkalo Abelsen, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq, Atassut.
Tassa qujavunga Johan Lund Olsen taanna qaqimmagu apeqqut, tassami ?Atuarfitsialak?-p pilersinniarneqarneranut pingaartorujussuuvoq, nunaqqatigiit oqartussaaqataanerata allisarnissaa. Aamma taamaalilluni tassani apeqquteqaaterpianni allassimasoq taanna akivara aanat aatallu aamma taakku qinigaasinnaanngussapput. Allalluunniit ilaquttat, imaluunniit ilaqutaanngikkaluarunik.
Taamaattumik aamma naatsorsuutigilluinnarpara allat meeqqanik isumaginnittuusut taakkua meeqqat ulloq unnuarlu angerlarsimaffiini paarineqartut, taakkunaniittut aamma taakkua qinersisinnaatitaapput, aammalu qinigaassinnaatitaassallutik.
Tassa angajoqqaat akisussaaffiinik tigummiaqartut, taakkua qinersisinnaatitaagamik.
Soorunami aamma taakkua iluanni kikkulluunniit qinersisinnaatitaasut qinigaasinnaatitaasullu iluanniimmat.
Taamaallaat uani erseqqissarneqarpoq meeqqat atuartuuteqanngitsut taakku taasisinnaatitaanngillat. Ila?
Tassami meeqqanik atuartuuteqanngitsut, taakkua taaseqataasinnaanngillat, kisianni qinigassanngortinneqarsinnaallutik nunaqqatigiit iluanni.
Ole Dorph, ataatsimiinnermi aqutisoq, sinniisussat aappaanut sinniisussaq, Siumut.
Taamaasilluta apeqqut immikkoortoq normu 91 naammassivarput.