Oqaluuserisassani immikkoortoq 95-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq aappaat, ataasinngorneq 31. marts 2003, nat.
13:20.
Henriette
Rasmussen,
siunnersuuteqartoq, Inuit Ataqatigiit.
Inuit
Ataqatigiit isumaqarput piffissanngortoq nunatsinni atorfigalugu
isiginnaartitsisartoqatigiit pilersinneqarnissaat.
Taakku
nunatta iluinnaaniunngitsoq aammali nunatta kulturittalu avatitsinniit
ilisarisimaneqarnerulernissaa suleqataaffigissavaat. Tamatuma
pilersinneqarnissaani aallaavigineqarsinnaalluarput Silamiut
ukiorpassuanngortuni aliikkutassaqartitsisuusimasut pitsaasunillu
isiginnaagassiortarsimasut.
Kalaallit
Nunanni Isiginnaartitsisartoqatigiit silarsuarmi angalaarneranni
peqataasinnaasut tassaapput nunatsinni inuutissarsiutitigut ingerlatsisut
tunisassassiatta siammarnerunissaat siunertaralugu. Aallaqqaammut Kulturikkut
Siunnersusoqatigiit tamatuma qanoq aningaasalersorneqarnissaannut
isummersortinneqarnissaat aammattaaq siunnersuutigissavara.
Tunngavilersuut.
Nunatsinni
isiginnaartitsinermi suliallit ilaqarput aamma isiginnaartitsisartunik
ilinniarsimasunik. Taakkuli piginnaassusaat atorneqanngitsutut ipput, sulinissaminnut
periarfissaasa annikippallaarnerat pisuulluni. Silarsuarmi
aliikkutassaqartitsineq ukiuni kingullerni ineriartupiloortoq
suliffissuarqarfittulli isaatitsiffiusarpoq. Taamatullu oqaatigineqarsinnaapput
takornariaqarneq kulturikkullu ingerlatsiviit.
Taakkulu
tamaasa eqqarsaatigalugit Kalaallit Nunaat pilliutissaqarluarpoq aamma nunat
tamalaat akornanni. Takornariat nunatsinnukaasarput pinngortitaq
qimerloorniarlugu, kulturilu aamma misigisaqarfigisinnaagunikku, tamanna
iluaqutaanngitsoortussanngilaq. Inuit Ataqatigiini isumaqarpugut
isiginnaartitsineq kulturilu uniffigalugit immikkut isiginiartariaqartut,
kulturikkullu kingornussarsiavut ingerlatsinikkut isertitsissutaasinaasutut
aamma inerisikkiartortariaqarivut.
Taamatut
siunnersuuteqarlunga Naalakkersuisunut oqaluuserisassanngortippara.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Taava
tamatumunnga Kultureqarnermut Ilinniartitaanermut Ilisimatusarnermut
Ilageeqarnermullu Naalakkersuisoq akissuteqassaaq.
Arkalo
Abelsen,
Kultureqarnermut Ilinniartitaanermut Ilisimatusarnermut Ilageeqarnermullu
Naalakkersuisoq, Siumut.
Soorlu
naalakkersuisooqatigiinnissamik isumaqatigiissummi allassimasoq ilaatigut
isiginnaartitsisarfeqarnerup annertusaavigineqarnissaa Naalakkersuisut
tapersersorumavaat, tassa namminersuleriartornermi pingaartuummat kalaallit
eqqumiitsuliaasa kulturiatalu saqquminerulersinneqarlutillu
ineriartortinneqarnissaat.
Tassunga
atatillugu Naalakkersuisut aammattaaq sulissutigerusutaat tassaavoq Nunatta
Namminerisaminik Isiginnaartitsiveqalernissaa, aammalu suliami tassani
Kulturimut siunnersuisoqatigiit pissusissamisuuginnartumik
sunniuteqaqataanissaat Naalakkersuisunit naatsorsuutigineqarpoq.
1996-imi ukiakkut
katersuussimanermi Naalakkersuisut saqqummiussimavaat ?Isiginnaartitsiviup
Siunissaa pillugu Nassuiaat?. Nassuiaasiaq suliarineqarsimavoq Naalakkersuisut
suleqatigiissitaliarisirnasaasa ilaannit kulturimut tunngassuteqartunik
inuttalersugaasumit.
Nassuiaasiaq
Inatsisartunit ilassilluarneqarsimavoq. Nassuiaasiami allaaserineqarsimapput
suliassaqarfi up taassuma iluani annertunerpaatut kissaatigineqarsinnaasut
suunersut. Taamaattoq kissaatigisat taakku maannamut suli
piviusunngortinneqarsimanngillat.
Tamatuma
kingornagut allannguutissat pisariaqavissut suliarineqarsimapput. Inatsisitigut
tunngavissat kulturimik sunngiffimmillu ingerlatsinerit pillugit Inatsisartut
peqqussutaata nr. l0-p 21. maj 2002-meersup akuersissutigineqarneratigut
nutaanngorsimapput.
Taassumalu
qulequtaani malunnartumik ersereerpoq peqqussummi tassani kulturi aammattaaq
pineqartoq, taaguullu ?ingerlalarivillugu? suliaqarneq kulturimik inunnillu
paasisitsiniaanermik suliaqarnerup iluani nutaamik massakkut
ikkunneqarsimalerpoq.
Tassanissaaq
aamma takuneqarsinnaavoq Naalakkersuisut tapiissutaat pingaartumik nuna
tamakkerlugu suliffeqarfinnut ingerlatarivillugulu suliffeqarfiusunut
tunniunneqartassasut.
Tassunga
uiggiutitut Kulturimut siunnersuisoqatigiit kaammattuutigisimavaat kulturimut
tunngassuteqartut iluanni tapiissutaasartut allanngortitsivigineqassasut.
Aningaasaliissutaasartullumi
nutaamik agguataarneqartalernissaat 2003-mut Aningaasanut inatsisissatut
siunnersuummi ilanngunneqarsimasoq takuneqarsinnaavoq, kulturimullu
tapiissutissanik qinnuteqaateqarnissamut piumasaqaatit nutaat
tusagassiuutitigut atuagassiani massakkorpiaq saqqummiunneqarsimapput. Tassalu
taamaalilluni Namminersornerullutik Oqartussat kulturimut
tapiissutigisartagassaasa eqqumiitsuliornikkut ingerlatarivillugu
ingerlatsinerit siunissami immikkut isiginiartalersussaassavaat.
?Isiginnaartitsiviup
Siunissaa pillugu Nassuiaat?-mi taaneqartumi takorloorneqarsimavoq
Nunatsinni
isiginnaartitsisarfiup tamarmiulluni ilaannaataluunniit taamanikkut suli
inaarsarneqarsimanngitsumi Kulturimut illorsuarmi inissinneqarsinnaanissaa.
Kulturimulli illorsuassap sorpianik imaqarnissaa pillugu takorluukkat
neriulluarneruallaarsimapput, taamaattumillu Nunatsinni
isiginnaartitsisarfissamik pilersaarusiornerup ullumikkut nutaamik
isumaliutigilluaqqinnissaa pisariaqalersimavoq, ilaatigut illutassaa
eqqarsaatigalugu.
Tassunga
atatillugu pingaartuuvoq ?Nunatsinni isiginnaartitsivik? suliatut ingerlatatut
isigalugu, tassa illorsuartassaa aalajangersimasoq pinnagu.
Tassunga
atatillugu nutaamik sanaartortoqarnissaa piviusorsiorpalaartuunavianngilaq,
taamaattumik suliatut ingerlatassatut pigineqareersumut pulatinniarneqarnissaa
pisariaqartuussaaq.
?Isiginnaartitsiviup
Siunissaa pillugu Nassuiaat?-mi kaammattuutigalugu kissaatigineqarsimavoq
Nunatsinni isiginnaartitsiveqalissasoq aammalu Nuttartumik
isiginnaartitsiveqalissasoq, tassa isiginnaartitsiviit marluk pitsaassuseq
ineriartortitsinerlu eqqarsaatigalugit pitsaasumik
unammilleqatigiiffiussussatut takorloorneqarmata, taakkulu aqqutigalugit
sammisaqartitsiviit amerliniassammata.
Nunalli
isorartussusia nukissaqassusialu eqqarsaatigalugit ataasiinnarmik
isiginnaartitsiveqarnissaa piviusorsiorpalaarnerusussatut nalilerneqarsimavoq.
Taamaattumik
isumaqartoqarpoq pingaartuussasoq isiginnaartitsisarnerup iluani
nutarterinissaq isumannaallisaavigineqartariaqartoq isiginnaartitsisarfissap
isiginnaartitsinikkut pisortassaata immaqalu aalajangersimasumik
isiginnaartitsisartussaasa ukiut tallimakkaartumik
isumaqatigiissuteqarfigineqarlutik atorfinitsinneqartarnerisigut.
Tassalu
pitsaassuseq, inerisaaneq nutarterinerlu Kulturimut siunnersuisoqatigiit
apeqqummik taassumannga eqqartuineranni aammattaaq tunngavigineqarsimapput,
tamannalu aamma tapiisarneq pillugu nutaamik politikkerineqalersumi
takuneqarsinnaavoq.
Nunatsinni
isiginnaartitsiviup nunatsiimi isiginnaartitsisarneq suliassarissavaa,
kulturikkullu saqqummertarnerup tamatumap inerisaavigineqaqqinnissaa
isumagissavaa ilinniartitsinerlu aallutarissallugu. Tamatuma saniatigut, soorlu
aalajangiinissamik siunnersuummi aamma taaneqartoq, pissusissamisuussaaq
nunanut allanut Kalaallit Nunaat sinnerlugu takornariaqarnermut
inuussutissarsiutinullu iluaqutaasussamik Nunatsinni isiginnaartitsivik
sinniisuusassappat.
Kulturi
pigisaavoq inerisarsinnaasarput, nukittorsarfigisinnaasarput,
nuannaaruteqarfigisinnaasarput aammalu aningaasarsiorfigisinnaasarput.
Nunatsinni
isiginnaartitsivimmi suliassamut tunngatillugu isumaliutersuuteqarnerminni
Naalakkersuisut aammattaaq ilinniartitaanermut tunngasut ilanngunneqarnissaat
kissaatiginartippaat: Isiginnaartitsiviup suliaanut ilanngullugu
isiginnaartitsisartunngorniarneq ingerlatarilissavarput, imaluunniit
suliassaqarfiup taassuma iluani ilinniartitaanerit allaanerusut
atorfissaqartippavut?
Aningaasanut
tunngatillugu pingaartuuvoq, Nunatsinni isiginnaartitsivimmut tunngatillugu
toqqaannartumik siunnersuusiassat nunap aningaasatigut massakkut
inissisimaneranik isiginiaanissaat, tassa pilersitsinissamut
ingerlatsinissamullu aningaasartuutissat eqqarsaatigalugit, aammalu
isiginnaartitsinermik ingerlatsinermi allani kiisalu kulturimut
tunngassuteqartut tamaasa eqqarsaatigalugit, aningaasatigut
pisariaqartitsinermut taakkua ataqatigiissaarneqarnissaat.
Periuserineqarsinnaasunik
assigiinngitsunik piviusunngortinneqarsinnaasunik Kulturimut
siunnersuisoqatigiinnut
oqaaseqarfigisassanngorlugit saqqummiunneqarumaartussanik Naalakkersuisut
siunnersuusiorniarput, taakkulu naggataagut anguniagassatut
isumaqatigiissusiorfigineqarnissaat eqqarsaatigineqarsinnaassalluni.
Periusissat
suliarineqassapput maannamut misilittagaasimasut isiginiarlugit aammalu
suliamik ingerlataqartut peqataatillugit. Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni
oqaaseqassaaq partiit oqaaseqartuinit Doris Jakobsen, Siumut.
Doris
Jakobsen, Siumup
oqaaseqartua.
Inatsisartuni
ilaasortap Henriette Rasmussen-ip Kalaallit Nunaanni
Isiginnaartitsisartoqatigiit pilersinneqarnissaannik suliniuteqaqqullugit
Naalakkersuisut peqquneqarnissaannik Inatsisartut aalajangiiffigisassaattut
siunnersuutaa Siumumiit misissorluareerlugu imatut oqaaseqarfigissavarput.
Siumumi
pingaartilluinnarparput nunatsinni kulturikkut siuarsaajuarnissaq;
isiginnaartitsisartoqarnikkut, nipilersornikkut, erinarsornikkut,
atuakkiornikkut eqqumiitsuliomikkullu. Siuarsaanissami ilaatigut
Naalakkersuisooqatigiit iluanni anguniagaavoq, kulturikkut
sammisassaqartitsineq siuarsarniarlugu ilinniarfimmik pilersitsinissaq.
Soorunami
aamma piorsaanissami inatsisitigut tunngavissiilluarnissaq anguniagaavoq.
Tamanna anguneqarpat Siumumi qularinngilluinnarparput kalaallit kulturitta
nunarsuarmi ilisarisimaneqarnerulernissaa.
Taamaattumik
Naalakkersuisooqatigiit kulturikkut siuarsaaniarlutik anguniagaat
isumalluarnartutut oqaatigisariaqarput.
Nunatsinni
inuussutissarsiutigalugu Isiginnaartitsisartoqatigiit pilersinneqarpata
malitsigalugulu ilinniarfik pilersinneqarpat, Siumumi isumaqarpugut
inuiaqatigiinnut nunatsinnullu annertuumik sunniuteqartussaasoq. Siumumi
isumaqarpugut siunnersuut Naalakkersuisooqatigiit anguniagaannut tulluartuusoq,
nunatsinni kulturisiornikkullu
inerisaanissatsinnut
avaqqunneqarsinnaanngimmat.
Ukiuni
kingullerni kulturikkut siuarsaaniamermi suliniutigineqartut maannakkut
ingerlareersut Siumumi iluarisimaarpagut, politikkillu iluani
suliniuteqarnikkut piviusunngortinneqarnissaat pingaartillugu.
Taamaalilluta
siunnersuuteqartup tunngavilersuutaa Naalakkersuisullu akissuteqaataat
sukumiisumik tamaasa oqaluuserilluareerlugit Siumumit oqaatigissavarput siunnersuut
maannamut ingerlareersoq Naalakkersuisullu akissuteqaataat
naammagisimaaratsigit.
Suliallu
piviusunngortinneqarnissaanut Siumumi Naalakkersuisooqatigiit Kulturimut
siunnersuisooqatigiinnut siunnersuusiornissaat qilanaaraarput, naatsorsuutigalugu
aningaasaqarnissaa qulaajarneqassasoq, inatsisitigullu
toqqammavilersorneqarluni.
Taama
Siumumiit oqaaseqarluta aalajangiiffigisassatut siunnersuut, tunngaviusumik
isumaa isumaqatigigaluarlugu, siunnersuut maannakkumuugallartoq
itigartikkallassavarput, qulaani oqaatigineqartut innersuussutigalugit.
Kissaatigaluguli ataatsimiititaliaq susassaqartoq
malinnaateqqissaarneqarneqassasoq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni
oqaaseqassaaq Ane Hansen, Inuit Ataqatigiit.
Ane Hansen, Inuit Ataqatigiit oqaaseqartuat.
Inuiaat kalallit kulturiat naggueqatigiit Inuit kulturiannik aallaavilik, ukiullu 300-ngulersut Europamiup kulturiannik sunnerneqarsimasoq kimittoqaluni ulluinnarni inuusaatsitsinni assigiinngitsorpassuartigut saqqummertarpoq.
Kulturitta sunniutai anersaakkut inuunitsinni pingaaruteqartut tassaapput: erinarsorneq, nipilersorneq, taalliomeq, erinniorneq, atuakkiorneq, assilialiorneq, qiperuineq kiisalu isiginnaartitsisarneq.
Tamakkua assigiinngittorpassuit piginnaaneqarfiupput ataatsimut kalaallit kulturiannik anersaakkullu nukittussutsitsinnik saqqummersittuartakkagut.
Taamaattumik Inuit Ataqatigiinni isumaqarput kulturikkut erseqqissumik politikkeqarneq inuaqatigiinni ingerlatani anguniakkanilu pingaarnerit ilagigaat.
Soorlu Inatsisartuni ilaasortap Henriette Rasmussenip siunnersuuteqarnermini oqaatigigaa, Inuit Ataqatigiinni isumaqarpugut piffissangortoq nunatsinni atorfigalugu isiginnaartitsisartoqatigiit pilersinnissaannut.
Ukiut aggerput namminersuleriartorfigut, inuiannullu allanut kiinnernissatsinnut kulturikkut anersaakkullu nukittoqutigut sakkussatta pingaarnerit ilagaat. Inuit Ataqatigiinniit Naalakkersut qinnuigaagut kulturikkut ersarissumik politikkeqalernissarput sulissutigeqqullugu.
Inuit Ataqatigiinni isumaqarpugut atorfigalugu isiginnaartitsisartoqatigeeqarneq aqqutigalugu inuiattut ilisarnaatigut immikkuullarissutsigullu ersarinrierulersinneqarsinnaasut, aamma
Isumaqarpugut atorfigalugu isiginnaartitsisartoqatigeeqarneq nunatta pisuussutaanik
kinaassutsitsinnillu avammut nittarsaassinermi aqqutissat sunniuteqarluarsinnaasut ilagigaat.
Inuit Ataqatigiinni ilisimalluarparput isiginnaartitsisartoqatigiit Silamiut tinnersaajuarsimaneratigut suleqatigiissitaliortoqarsimasoq tamatumalu kingorna 1996-mili Nalakkersuisut saqqummiussimagaat ?Isiginnaartitsisarnerup Siunissaa pillugu Nassuiaat? Ilisimavarput nassuiatip inassuteqaatai Inatsisartunit tamarmiusunit ilassilluarneqarsimasut, taamaakkaluartorli uggornartutut isigaarput ulloq manna tikillugu inassuteqaatit timitaliivigineqamissaat annerusumik pimoorunneqaranilu iliuuseqarfigineqarsimanngimmata.
Akerlianik isumaqarpugut atorfigalugu isiginnartitsisartoqarsinnaanermik periarfissat maannamut akuerineqarsinnaangittumik annikillisarneqarsimasut. Siornatigut isiginnartitisartoqatigiinnut Silamiunut tapiissutigineqartartut annerusumik ilanagit maanna aamma sinerissami tamanit qinnuteqarfiusinnaasutut ammaaffigineqarsimapput, taamaalilluni aningaasaliissutigineqartartut siammarnerisigut isiginnaartitsisartut ilinniarsimasut atorfigalugulu isiginnaartitsisartut qularnaattumik tunngaveqarlutik sulisinnaanerat qulakkerneqarsinnaajunnarsimalluni.
Piffissaq sivisooq atorneqartalersimavoq isiginnaagassiat ingerlanneqarnissaannut aningaasaliisussarsiornermut tamatigut qularnartunut.
Inuit Ataqatigiinni isumaqarpugut nunatsini Isiginnartitsisartoqatigiit Silamiut qanimut suleqatigalugit Nunatsinni Atorfigalugu Isiginnaartitsisartoqatigiit pilersinnissaat tunngavilerneqartariaqartoq. Tamatuma piaartumik aallartinneqarnissaa Naalakkersuisunut sulissutigeqqullugu Inuit Ataqatigiinnit inassutigaarput.
Ullumikkut isiginnaartitsinermik ilinniarsimasortagut arlalissuit nunani allani suliffissarsiortariaqartarput nunatsinni sulinissamut periarfissalunneq pissutigalugu. Inuit
Ataqatigiinni isumaqarpugut isiginnaartitsisartortagut ilinniarsimasut nunatsinni
atorfissaqarluartutut misigitinneqartuartariaqartut atorfissaqaqaammi, soorlu meerartatta piginnaanerminnik saqqummiilluarsinnaalernissaannut isiginnartitsinermik ilinniarsimasortagut pingaarutilimmik sakkussiisinnaasutut piginnaaneqarluarnerat atorluartariaqarpoq.
Kingumut qiviaraanni Aasivissiortarsimanerit nalaat tassaapput sutigut tamatigut kulturikkut eqeersimaarfiunerpaatut nutarteriffiunerpaatullu taaneqarsinnaasut, oqartoqarsinnaagunarpoq Aasiviit aqqutigalugit kulturikkut ilisarnaatigut tammariartulersimagaluartut
Uummarissaqqinneqarsimasut ullumikkullu pingaartitatut inissinneqarsimallutik.
Aasiveqartitsisarsimanerit kulturikkut isumasioqatigiinnerit pingaamersaattut
oqaatigineqarsinnaasut uummarissaqqinneqartariaqarput. Piffissarlu iluatsillu kaammattuutigerusupparput Aasiviit ingerlaqqissinnaanerinut aningaasaliissutitigut tapersersuisinnaanerit uterfigeqqinneqarnissaa eqqarsaatigeqqeqqullugu, Aasiveqartitsisarnermi tassaammat nunatsinni kulturikkut piorsaanermi kikkut tamat oqartussaaqataanerat ammaffigilluinnarlugu kulturikkut isumasioqatigiiffiit annersaattut taaneqarsinnaasut.
Oqarsinnaagunarpugut kulturimik pingaartitsineq tamatta isumaqatigiissutigalugu
ataatsimoorfigisaripput, taamaattumik nuannaarutigaarput Kalaallit Nunaanni
Isiginnaartitsisartoqatigiinnik pilersitsinissamik Henriette Rasmussen-p siunnersuuteqarnera
Naalakkersuisunit ilassilluarneqarmat.
Naggataatigut inassutigissavarput 1996-imi ?Isiginnaartitsisarnerup siunissaa pillugu Nassuiammi? inassutigineqarsimasoq timitaliiviginiarlugu, Isiginnaartitsisartoqarneq pillugu inatsisissamik Naalakkersuisut ukiamut saqqummeeqqullugit.
Taamatut oqaaseqarluta nalunaarutigissavarput Isiginnartitisartoqatigiinnik pilersitsinissamik Naalakkersuisunut suliniuteqaqqusilluni Henriette Rasmussenip siunnersuutaa tamakkiisumik taperseratsigu. Siunnersuutillu timitaliivigineqarnissaa siunertaralugu Kultureqamermut, Ilinniartitaanermut, Ilisimatusarnermut Ilageeqarnermullu ataatsimiisitaliami suliarineqarnissaa inassutigalugu.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Isak Davidsen, Atassut.
Isak Davidsen, Atassutip oqaaseqartua.
Inuit Ataqatigiit sinnerlugit Inatsisartuni ilaasortap Henriette Rasmussenip siunnersuutaa soqutigalugu ATASSUT-mit misissuataarparput oqaluuseralugulu.
Siunnersuuteqartup qallunaatut siunnersuummini ?nationalteater?-imik, ATASSUT-mi paasinninnerput malillugu kalaallisuunngorlugu ?nuna tamakkerlugu isiginnaartitsivis suarmik? pilersitsisoqarnissaanik Naalakkersuisut peqquneqarnissaannik Inatsisartut aalajangeeqquai, siunnersuutillu kalaallisuuani Kalaallit Nunaanni isiginnaartitsisartoqatigiit? pilersinneqarnissaannik Naalakkersuisut peqquneqarnissaannik Inatsisartut aalajangeeqquai.
ATASSUT-mit paaserusunnarpoq siunnersuuteqartup sunarpiaq pineraa. Paasinninnerpummi naapertorlugu ?Nationalteater? aamma ?Isiginnaartitsisartoqatigiit? imminnut atasinnaagaluarlutik siunertat assigiinngitsut marluupput.
Taamatut siunnersuuteqartumut erseqqissaateqarnissamik ujartuereerluta ATASSUT-mit oqaatigissavarput pingaartikkatsigu namminiussutsitta pigiinnarnissaanut kulturikkut pigisatta naleqartut eriaginissaat, taamaammallu kulturimut tapersersuineq pingaaruteqarluinnartutut ATASSUT-mit aalajangiusimagatsigu.
Naalakkersuisooqatigiinnermilu isumaqatigiissummi isiginnaartitsinikkut, nipilersornikkut, erinarsornikkut, atuakkiornikkut eqqumiitsuliornerullu piorsarneqarnerisa tapersersorneqarnissaat qulakkeerniagaavoq, taamaammallu inatsisitigut tunngavissilluarnissaat suliniutinut ilaavoq, tamatumalu saniatigut kulturimut tunngatillugu ilinniarfimmik tamatigoor tumik pilersitsisoqarnissaa naalakkersuisooqatigiit anguniarpaat.
ATASSUT-millu isumaqarpugut kulturikkut suliniutit maannamut inatsisitigut toqqammavissinneqarsimanngitsut inatsisitigut toqqammavissinnissaat suliassanut sallernut ilaasoq, matumani isiginnaartitsisarnermut inatsisiliortoqarnissaa eqqarsaatigaarput.
Inatsisitigummi toqqammavissat, taamaalillunilu aningaasatigut qulakkeerinninnissaq isumageqqaarlugit ilinniartitsinermik neqeroorutitalimmik isiginnaartitsisarfiliortoqarsinnaanera aningaasatigut piginnaasaqarneq naapertorlugu piviusunngortikkiartuaarneqarpat inuiaqatigiinnut iluaqutaanerpaamik aqqutissiuussisoqassasoq ATASSUT-mit isumaqarpugut.
ATASSUT-millu naammagisimaarparput Naalakkersuisut siunniussimammassuk periuserineqarsinnaasunik assigiinngitsunik piviusunngortinneqarsinnaasunik kulturimut siunnersuisoqatigiinnut oqaaseqarfigisassanngorlugit Naalakkersuisut siunnersuusiorniarmata.
Taamatut oqaaseqarluta isumalluarfigalugu isiginnaartitsisartoqarnerup tungaatigut Naalakkersuisut suliniuteqarniarnerat, Inatsisartuni Ilaasortap Inuit Ataqatigiinneersup Henriette Rasmussenip siunnersuutaa taamak iluseqarluni itigartinneqassasoq ATASSUT-mit inassutigaarput.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Marie Fleischer, Demokratit oqaaseqartuat.
Marie Fleischer, Demokratit oqaaseqartuat.
Kalaallit Nunaanni kulturimut tunngasut ineriartortinneqarnissaat Demokraatit tapersersugaraat. Taamaattumik pissusissamisoortutut isigiinnarparput kulturimut atugassarititaasut pitsaanerpaamik tunngavissaqartitaanissaat.
Soorunami uggornartuuvoq 1996-imi ukiakkut ataatsimiinnermut ?Isiginnaartitsiviup Siunissaa pillugu Nassuiaat?-ip ilaata piviusunngortinneqarsinnaasimannginnera.
Taamaattumik kissaatiginarpoq nassuiaatip kulturimut siunnersuisoqatigiinnit nalilersuiffigineqaqqinnissaa.
Kisiannili soorlu aamma Naalakkersuisut akissuteqaataanni oqaatigineqareersoq nutaamik sanaartornissaq piviusorsiortuunavianngitsoq, pingaartumik Nunatsinni aningaasaqarniarnerput qiviassagaanni, taamaattumik Demokraatinit Naalakkersuisut isumaqatigaavut oqarmata pioreersut iluini pitsanngorsaaniarnerit ingerlanniarneqartariaqartut.
Naggataatigut oqaatigiinnassavarput nuannaarutigigipput anguniakkanik piviusorsiorpalaartunik aallarniinissartik Naalakkersuisut siunnerfigisimammasuk.
Taamatut oqaaseqarluta siunnersuut maannakkuugallartoq itigartinneqarnissaa siunnersuutigissavarput.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Anthon Frederiksen, Kattusseqatigiit oqaaseqartuat.
Anthon Frederiksen, Kattusseqatigiit.
Inatsisartunut ilaasortap Henriette Rasmussen-ip siunnersuutaa soqutiginartoq Kattusseqatigiit sinnerlugit imaattumik oqaaseqarfigissavara:
Siullermik oqaatigissavara siunnersuut soqutiginartoq, aammalu qangarsuanngulersorli ilaatigut annertuumik oqaluuserineqartareersoq kalaallinut inuiannguanut annertuumik timikkut anersaakkullu pingaaruteqartussaammat Kattusseqatigiit sinnerlugit tamakkiisumik taperserakku.
Aap immaqa oqartoqarsinnaavoq apeqquserneqarlunilu - ukiuni makkunani ingerlatsinermut allaffissornermullu sipaarniaruttulernerup nalaani, siunnersuut naapertorlugu akuersinikkut aamma ingerlatsinermut aningaasartuutinik suli annerusunik kinguneqartussamik pilersitseqqiinnassannginnersugut?
Isumaqarpunga taamatut apeqqusiiniartoqassappat erseqqissartariaqartoq; uagut kalaallit inuiattut timikkut anersaakkullu nukittuutut aammalu Nunatta nutaaliaasutut ineriartoqqinnissaanut Isiginnaartitsisartoqatigiinnik peqarnissarput assorujussuaq tamatsinnut pingaaruteqarlunilu pisariaqarpoq.
Tassami Nunatsinni piorsarsimassutsikkut suliniarneq aamma timikkut anersaakkullu pingaaruteqaannarani, kisianni aamma taakkununnga tapiliullugu pinaveersaartitsinermik aamma sutigut tamatigut paasitsitsiniaanermut annertuumik sunniuteqarsinnaasoq Kattusseqatigiinni eqqartortarlugulu annertuumik soqutigisaraarput.
Taamaammat aamma illoqarfiit ilaanni piorsarsimassutsikkut pingaartitsilluni politikkikkut suliniarnerit innuttaasunit assut nuannarineqartut aammalu innuttaasunut aamma sunngiffimmi sammisassaqartitsinerit innuttaasunik assut ulluinnarni inuunermut pingaaruteqarlutillu qiimmassaataasut arlalitsigut uppernarsaatissaqarlutillu takussutissaqaleriartorput, soorlu assersuutigalugu Ilulissani piorsarsimassutsikkut illorsuarmi pisortamik atorfinitsitsinermi maanna ukioq ataasinngulersumi, atorfeqartitaasup Sulilluarneratigut aammalu susassaqartut assigiinngitsut suleqatigiilluarnerisigut; suliniutit assigiinngitsut innuttaasunut annertuumik nuannaarutaallutik ingerlanneqarput.
Soorunami illoqarfinni allani aamma kusanartunik assersuutissaqartoq nalunngilara, kisianni-ukua aamma nammineerluni peqataaffigisat nalunngisallu assersuutigissallugit pilerinarnerusartut. Tamanna pissutsinik piviusunik soorunami tunngaveqaannarpoq.
Kisianni tassa uani ersersinniakkama aamma ilagaat piorsarsimassutsikkut suliniutit aamma ilaatigut suliniutinut assigiinngitsumik kaputartuunneqarsinnaanngikkaluarlutik aamma sulianut allanut iluaqutaallutillu assigiinngitsutigut kusanartumik ajunngitsumillu sunniuteqartarmata.
Taamaattumik suliniutit maanna Naalakkersuisooqatigiinnit aamma ingerlanniarneqartut tapersersornarput, suliniarnermilu matumani soorunami kommune-qarfiit KANUKOKA-llu suleqatigineqarnissaat inassutigerusunnarpoq, tassami sutigut tamatigut innuttaasut tikillugit suliniarneq pitsaanerpaajusartoq arlalitsigut aamma takussutissaqarmat, minnerunngitsumik aamma pioreersut atorluarneqarnerulernissaat eqqarsaatigalugu.
Naggataatigut assut uggoralugu oqaatigissavara; Isiginnaartitsiviup Siunissaa pillugu Nassuiaat 1996-imili inatsisartunit isumaqatigineqarluni akuersaarneqarsimasup, Naalakkersuisunit annerusumik timitalerniarneqarsimanngimmat Katlusseqatigiit tungaanniit assut pakatsissutigingakku.
Taamatut oqaaseqarlunga siunnersuutip aappassaaneerneqannginnermini Inatsisartut Kultureqarnermut Ataatsimiititaliaani suliarineqarnissaa inassutigaara.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq siunnersuuteqartoq Henriette Rasmussen.
Henriette Rasmussen, siunnersuuteqartoq, Inuit Ataqatigiit.
Qujavunga Naalakkersuisut saqqummiussaannut aammalu partiit oqaaseqartuinut. Soorlu siuliini oqaatigereeripput Inuit Ataqatigiit kulturikkut politikki inuiaqatigiinni pingaarluinnartutut isigaat. Soorlu aamma namminersorneruleratta tigusatta siulliit ilagisimagaat.
Kalaallit uagut attuumatinneqartarpugut inuiattut kulturimikkut nukittuutut qalipaatigissaartutut erinarsuuterpassualittut nipilersortartorpassualittut aammalu eqqumiitsuliornikkut qiperuisarnikkut assilialiornikkullu piginnaanilittut. Minnerunngitsumilli oqaluttuaaterpassualittut.
Taavalu immitsinnut qiviarutta aamma uagut nammineq nalunngilarput nuannarisagut tassaammata inuit oqaluttuallaqqissut inuit aqaasersortut, inuit aqartut inuk oqaluttuallaqqissoq akornannitsinni qitiulersittarparput. Erinarsorajuttuuvugut nuannarilluinnaratsigu. Inuppassuit allattarput taalliortarlutik aamma qitinneq nuannarilluinnarparput unnuaannarmut kamiit pussortut tusarnartarinngilagut sineriammi. Aammalu 1960-kkunni ukioq naagujoq revyqartarallarmat inuit piginnaaneqarluartut suliaat sineriammiuusugut isiginnaanngikkaluarlutigit nuannarisarsimaqaagut maqaasisaralugillu.
Tamakkualu taakkartukkakka tamarmik isiginnaartitsinermut
attuumassuteqarput. Partiit oqaaseqaatai uterfigissagukkit tassani Siumut
oqaaseqarnermini maannamut kulturikkut ingerlatsineq naammagisimaarpaa. Aammalu siunnersuutiga akuersaarumanagu.
Atassutip pissutsit ulloq manna tikillugu ingerlatsineq naammagisimaarpaat
siunnersuutigalugu itigartikkusullugu.
Demokratit
saqqummiussaqanngillat takorluugaqaratillugu kulturikkut politikkiat
takussaanngilaq suunersoq. Qujavunga Kattusseqatigiit paasinnillutik
tapersiimmata.
Taamatut
siunnersuuteqarpunga ilaatigut kulturikkut piginnaanerit ilaatigut taasakka
sapanginnagit nukittoqutigalugilli Namminersornerullutik Oqartussat kulturikkut
politikkiannit piorsaanermut atortariaqarmata.
Soorlu aamma
eqqaaneqareersoq kalaallit isiginnaartitsisartut ilinniarsimasut nunatta
avataaniipput tusaamasaallutik. Taakku ilaat angerlarusukkaluarput nunatsinni
sulinissaminnut piareeqqallutik. Ilinniarsimasaminnik ilikkakkaminnillu
tunniussaqarusullutik. Kisianni suliffissaqartinngilagut. Uffalu ukiut tamaasa
immikkut ilisimasalippassuit pisatarpassuilu nunatsinnut tikisittarlutigit.
Tamanna
isumaqarpugut eqqortuliornerunngitsoq. Aamma isumaliortoqarsinnaagaluarpoq
isiginnaartitsisartoqatigiit ulluni taamak aningaasameerfiutigisuni aamma
sussagatsigit. Isiginnaartitsineq inuiqatigiinni pisariaqavissutut isigisariaqarpoq. Amigaatiginera
takuneqarsinnaavoq meeqqat aperigaluarlugit asuki naluara taamatut
akiinnartartut assersuutigalugit imaluunniit uagut oqaatsinik atuisuusugut
politikkerit ilaatigut tusagassiortut aamma oqaatsitsinnik
pitsaavallaanngitsumik atuisarnerput eqqarsaatigalugu. Ittoorneq
akimmiffinngorsimappat imaluunniit tarnikkut uninngasuuteqarpallaalersimasuni
isiginnaartitsineq ammaassissutitut ittarmat inunnik isumaginnittunik
ilinniartitsisunillu ilisimaneqarluarpoq.
Retorik
oqallorissusermik ilinniarneq meeqqat atuarfianni aallunneqartariaqarpoq.
Tamatumanilu isiginnaartitsineq atortussaavoq pitsaasoq. Isiginnaartitsinermi
oqaluttuat alanngaarneqartariaqartarput. Oqaluttuap qitia ersarissoq
saqqummersinniarneqartarpoq. Meeqqat suleqatigiinnissaq tamatumani aamma
ilinniarsinnaavaat.
Kalaallit
oqaluttuaat oqalualaavilu unnuani 1001-nut sinneqartut pigaavut
aallaavigineqarsinnaasut kinguaariinnit peroriartortunit puigorneqaannarnatik.
Katerisimaartitsisarneq Inatsisartunut Ilaasortap Ane Hansenip eqqaasaatuut
kalaallit kinguaariit aasittut ittuni katersuuttarnerat
pingaarutilerujussuuvoq.
Kulturikkut
politikkitta nunatsinnut takornariartunut kulturitsinnut naapitsiniartunut
periarfissiinissaa eqqumaffiginerusariaqarparput. Atassutip oqaluttuata
paatsuungassutigisimavaa immaqa tamatumuuna qallunaatut nutsernera
atuaqqaarsimagamiuk suna pineriga paatsiveerussutigisimavaa. Kisianni
isumaqarpunga tassa isumarput saqqummiussinitsinni tassaavoq kalaallit nunaata
isiginnaartitsisartoqatigiivi pilersinneqassasut. Tamanna nunani allani
tupinnangitsumik qallunaatut nutserneqarsimavoq nationalteateritut. Unali
pinngilara illorsuaq 100 millionilik sananeqassasoq. Soorunami
sanarusunnaraluaqaaq akissaqarutta. Pissutigalugu sulinissamut periarfissat
pitsaasut avatangiiseqarnissaallu isiginnaartitsisartut avatangiineqarnissaat
pitsaasunik aamma pilerinartorujussuuvoq pisariaqarlunilu.
Aamma uani
eqqaalaarusuppara taamatut siunnersuuteqarnitsinnut Inuit Ataqatigiit
tungaanniit patsisigivarput ukiuni kingullerni kulturikkut ingerlatsinermi
kultur politikkip Namminersornerullutik Oqartussaninngaaniit
nungukkiartuaarsimanera. Silamiut aningaasanut inatsimmiissimagaluarput
isiginnaartitsisartut Inuit Ataqatigiit 1980-kkunni siunnersuuteqarsimanerput
tunngavigalugu.
Kisianni taakkua
aningaasanut inatsimmiit peerneqarput. Soorlu aamma Inatsisartunut Ilaasortaq Ane
Hansenip Inuit Ataqatigiit sinnerlugit saqqummiussinermini eqqaagaa
aningaasartuutit tamanut siammarneqarsimapput. Taamaalillutik sineriammi aamma
isiginnartitsisartut assigiinngitsut tapiiffigineqarnissaat tassani
ammaanneqarsimalluni. Taamaalilluni nukiit eqiteruffiujunnaarput tamanullu
siammarlutik.
Aamma kulturimik
siunnersuisoqatigiiffiit pilersinneqarsimapput Naalakkersuisut siuliini.
Aammali atorunnaarsinneqarlutik. Atorunnaarsinneqaqqillutik. Taamaalilluni
kulturikkut ingerlatsineq, politikki ersarissoq piujunnaarasimavoq
Namminersornerullutik Oqartussani. Tamanna ilaatigut pissutigalugu imatut
siunnersuuteqarpugut.
Eqqartuisut
ilaasa maani partiit oqaaseqartuisa ilaasa arlariit eqqaasaat Kalaallit Nunaata
igisinnaartitsisartoqatigiivi pilersinneqarniarpata taava
inatsisiliortariaqarneq pisariaqartoq eqqaaneqarpoq. Tamanna isumaqarpunga
alloriarneq pitsaasuussasoq. Aammalu soorlu Naalakkersuisup aamma eqqaareeraa
misissuisoqareersimavoq siunnersuuteqarlunilu. Qallunaatuuinnaagaluarpoq. Kisianni
immikkut ilisimasallit sulisinneqareersimapput. Tassalu aalajangernissaq
tullinnguupparput Inatsisartutta tikkuussinissaat kulturikkut politikki
qanoruna ittoq pilersinniaripput? Sumununa ingerlaniartugut? Tassa
aalajangernissarput uagut tullinnguuppoq.
Taamaattumik
Siumup Atassutillu Naalakkersuisunut soorlu saqqummiussaanni
illuatungiliutipajaartutut saqqummiussinerat pakatsissutigaara tassani.
Neriuppunga ataatsimoorfissalimmik inatsimmik Naalakkersuisut
piareersaasinnaappata tassani ataatsimoorfissaqarumaartugut. Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni
oqaaseqassaaq Kultureqarnermut Ilinniartitaanermut Ilisimatusarnermut
Ilageeqarnermullu Naalakkersuisoq.
Arkalo
Abelsen, Kultureqarnermut
Ilinniartitaanermut Ilisimatusarnermut Ilageeqarnermullu Naalakkersuisoq,
Atassut.
Qujanaq.
siullermik nuannaarutigaara partiit tamarmik aammalu Kattusseqatigiit
nunatsinni kultureqarnerup iluani siuarsaanissaq taanna tapersersormassuk.
Aammalu qujanarpoq siunnersuuteqartup Henriette Rasmussenip Inuit
Ataqatigiinneersup siunnersuutaata oqallisigineqarnerani ersersinneqarmat
partiit tamarmik kultureqarnerup iluani taanna nukittorsaanissaq
isiginnaartitsineruppat erinarsorneruppat il.il. kulturip iluani taagorneqarsinnasut,
tassuuna ineriartorneq tapersersormassuk.
Uani
ataatsimoorfeqarpugut. Taamaallaat isumaqatigiinngissutigaarput qanoruna
killiffimmik ingerlariaqqissasugut. Isumaqarpunga nuannersuusoq uani Demokratit
taamaassorineqanngikkaluartoq kisianni saqqummiussaa atuarlugu ersarippoq
suliniutaasut taakkua tapersersorneqartut. Aammalu suliap taamannak
isiginnaartitsisartoqarnerup aammalu kulturikkut suliuniutit siuarsarnissaat
aamma isumaqataaffigigaat. Taamaattumik uagut Naalakkersuisuninngaaniit suliap
taasumap ingerlasup tassa kultureqarnerup iluani siuarsaanissaq
ataqatigiissumik isiginnaartitsisartoqatigiit kisiisa eqqarsaatiginagit. Taanna
suliassaq ingerlanniarparput.
Aammalu tassani
kultureqarnermut siunnersuisoqatigiit taamaatinneqarsimagaluartut kisiannili
aamma aningaasaliiffigineqaqqillugit ingerlaqqittussaasut. Taakkua tassa
suliakkinneqassapput ilaanarujussuaq.
Siuliani
qinersisoqanngikkallarmat suliartik ingerlateqqissavaat. Isumaqarpunga tassani
siunnersuisoqatigiit suliaminni ersarilluinnartumik nunatta kulturip iluani
sutigut assigiinngitsutigut ineriartortinneqarnissaat tikkuartuiffigigaat.
Qujanartumik
ullumikkut aamma takusinnaavarput inuussuttuararpassuit akornanni aamma
isiginnaartitsineq taanna ingerlanneqarpoq siuarsarneqartuarlunilu. Uanga
neriorsuutigisinnaasara aajuna kultureqarnerup iluani politikkissamik
tamatigoortumik ataatsimoortumik taamaattumik siunnersuisoqatigiit
suliakkinneqassammata. Aammalu suliaq taanna naammasseriarpat soorunami
Inatsisartunut aammalu Inatsisartut Kultureqarnermut Ilinniartitaanermut
Ilisimatusarnermut Ilageeqarnermullu Ataatsimiititaliaanut
saqqummiunneqakutsoorumaarpoq.
Ullumikkut isiginnaartitsisartut peqatigiiffiat KAISKA taanna aamma siunnersuisoqatigiinni ilaasortaatitaqareerpoq. Taakualu suliaq ingerlanniarlissuk. Aammalu saqqummiussaqarlutik ataatsimoortumik iluitsumik kulturip iluani iluarsaanissamut aqqutissaasinnaasunik.
Taamatut oqaaseqarlunga kissaatigissavara uuma oqaluuserisassap aappaassaaneerneqarnissaanut ingerlatinneqarnissaa. Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Palle Christiansen, Demokratit.
Palle Christiansen, Demokratit oqaaseqartuat.
Tassa paatsuunganerit iluarsilaarniarlugit tassa Inatsisartunut Ilaasortamit Henriette Rasmusseniminngaaneersut. Tassa Demokratinit saqqummiunneqarput Demokratit kulturimut politikkeqanngitsut. Taanna tassa 3 gange w-mut Demokratinut iseruni Henriette Rasmussenittaaq takusinnaavaa kalaallisut qallunaatullu kulturimut politikkerput. Taava oqaaseqaatitsinni saqqummiussarput tassa qallunaatuua tunngavigalugu tassa Inuit Ataqatigiinneersoq tunngavigalugu allanneqarnikuuvoq. Taava ilissi erseqqissatigivarsi kalaallisuuaniit qallunaatuaanut nutserneqarnera kukkuneqarluni assigiinngissuteqartoq. Taanna ajuusaarutigissavarput. Kisianni tassa uagut maani Inatsisartuni saqqummiilinnginnitsinni suliarereertaratsigit taavalu ataatsimoorussamik isiginnaartitsisartoqarnermut tunngatillugu taava soorlu nationalteateriliornissaq, illorsualiornissaq tunngavigalugu akissaqannginnatta taamaattuminguna siunnersuut itigartitsissutigigipput.
Taavalu kalaallisuua uani igisinnaartitisoqarnermut peqatigiiffiit pineqarpata taava allarluinnaq pineqarsimassooq. Tassunga tunngatillugu uagut aamma kulturerput ingerlatiinnarsinnaavarput. Taava oqaatigineqarpugut uagut takorluugaqanngitsugut. Asuliinnarsuaq oqalunneruvoq.
Tassa uagut takorluukkagut saqqummiussagullu siunnersuutivut Demokratininngaaneersut tassa piviusorsiortumik tunngavilinneersuugamik. Taamaalillutik tunngavissaqanngilatit maani oqassallutit uagut takorluugaqanngitsugut. Taava aamma ajuusaarnaraluartumik kulturi isumaginninnerlu Henriette Rasmussenip imminnut attuumassuteqanngitsut akulerussuuppai. Taavalu aamma sulisut maannartinneqartartut, taava aamma oqaatigivai Kalaallit Nunaanni sullissineq taamak qaffasitsigissappat tassani uani allarluinnaq isigineqarpoq. Ataatsimoortumik Kalaallit Nunaanni isiginnaartitsisarnermut tunngassuteqanngitsoq. Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tullinnguuppoq Henriette Rasmussen, siunnersuuteqartoq.
Henriette Rasmussen, siunnersuuteqartoq, Inuit Ataqatigiit.
Tassa uterfigissavara taanna siusinnerusukkut ajuusaarutigisara tassa imaappoq Siumup Atassutillu amerlanerussuteqarluarlutik maani siunnersuutiga tunuartinniarpaat akerleralugulu. Oqaatsit tusarnersut ilissi aamma saqqummiussorpasi kultur politikkimut tunngassuteqartut. Kisianni aalajangiiumanasi. Qaqugu aalajangiiniarpisi.
Siunnersuut ima ittoq tunuartereerussiuk itigartillugu taava suna qaqugu kiap saqqummiussaa akuerisiniarassiuk. Isumaqarpunga Inatsisartunut saqqummiussineq tunngavigalugu oqallinneq ingerlattariaqartoq. Aammalu illorsuarmik eqqarsarneq illorsuaqareerpugut isiginnartitsisarfissuaqarpugut Katuamiippoq isiginnaartitsisarfissuaq scenerujussuaq angisooq, allaat marluk. Angisooq mikisorlu. Taamaattumik ilaatigut aamma tamakku atorluarneqarsinnaapput. Taamaattumik soorlu soqanngivissutut immitsinnut eqqartortariaqanngilagut.
Taava Palle Christiansenip oqarneranut eqqaginnassavara immaqa tassami eqqortuusorinngilarsi taamatut taaneqarnersi. Kisianni uani saqqummiussaq pivara. Saqqummiussami ersinngilaq Demokratit suna kulturikkut politikkerineraat. Uaniuna Inatsisartut Inatsisartuni saqqummiussinitsinni tunngavilersuutigigigut. Taannaana eqqartoripput. Taamaattumik kulturimut ingerlatsinissatsinnut politikkeqarussi eqqulluarsinnaavasi maanga erseqqissaatigalugit. Qujarutissaqaarput tamanna.
Aammalu eqqaasatta taakkua Inatsisartunut Ilaasortap Palle Christiansenip akulerussuukkikka unnermagit taakku assersuutigigakkit atorfilippassuit tikisittakkagut kiffartuunneqarnermik qaffasissumik tunisarmatigut taakku akuleruteqqunagit. Aap ajunngilaq tassa pisariaqartippagut. Pisariaqartikkatsigit taakku tikisittarpagut. Unitsinnianngilakka. Kisianni aamma kulturikkut sulisut aamma taamatut isigisinnaavagut tikisitassatsitut immikkut piginnaaneqarnerat pissutigalugu immikkut uagutsinnut neqeroorutissaqarnerat tunngavigalugu. Qujanaq.
Isak Davidsen, ataatsimiinnermi aqutsisoq, sinniisussaq siulleq, Atassut.
Tullinnguuppoq Jakob Sivertsen, Atassut.
Jakob Sivertsen, Atassutip oqaaseqartua.
Qujanaq. Tassaana siunnersuuteqartup Atassutip tapesersuerusunnginneranik oqarnera akuerisinnaannginnakku naqqiissuteqarfigilaarniariga.
Atassummit oqaluttarfik manna siunnersuutinik oqaluuserisaqartilluta arlaleriarluta erseqissarparput pilersaarusiorluarneq tamatigut pingaartittarlutigu tamatigut pilersaarusiorluarsimagaanni aningaasatigut eqqortumik aamma tunngaviliinissaq anguneqartarmat. Taamaattumik uani tikkuutiinnarlugu aningaasanik qanoq naleqartussaq nalullugulu akuersaarsinnaanngilagut. Maani innuttaasut aningaasaataat aqunneqarmata. Taamaattumik imatut paasineqassanngilaq tapersersuinngitsoq. Peqataarusuppugut, kisiannili inatsisitigut tunngavissai aningaasatigullu aamma kingunissai qulakkeeqqarlugit aatsaat tunngaviusumik aalajangeerusukkatta.
Aamma Inatsisartunut Ilaasortap Henriette Rasmussenip oqaatigimmagu nunatsinni kulturikkut ingerlatsineq nungukkiartortoq. Uanga taamatut maluginngilara pingaartumik uagut nunatsinni Tunumi. Erinarsortartoqarpugut nunatsinni tusaamasarsuarnik. Taakkua aningaasannguamik qinnuuloorneq ajorput nammineq kulturi inuup piumassutsiminik pilersikkaangagu tassaasarput kulturi minguinnerpaaq nunatsinni pikersinneqartoq.
Tivasartoqarpugut aamma inuusuttuarannguanik meeqqanillu taakku nammineq aamma kajumissutsimik ingerlappaat. Taavalu aamma utoqqarnik tivasartoqarpugut. Naak ilaat nungukkaluartut taartissai ernumanartoqanngillat. Piumassuseqarput. Taavalu isiginnaartitisartoqarpugut tupinnaannartumik pikkorissunik meerannguanik. Taakkua aamma qujanartumik tunumiuinnaanngitsut taava aamma avataaninngaaniit maluginiartarpaat. Allaat ilaatigut aamma kulturimut tunngasunik qangatut tivasartut nersornaasernissaannik allaat siunnersuuteqartoqarnikuuvoq.
Tamakkuupput aamma maanngaaniit nuannaarutissagut. Ilaatigut immaqa aamma ajortuinnarnik eqqartuileraangatta suut tamarmik ajortutut isumaqarfigineqalersarmata. Taamaattumik aamma isumaqarpunga nuannersortai ilanngullugit maani nunatsinni uagut nammineq pilersitagut aamma eqqarsaatigalugit oqaluttarfik manna atortassagigut. Qujanaq.
Isak Davidsen, ataatsimiinnermi aqutsisoq, sinniisussaq siulleq, Atassut.
Tullinnguuppoq Jensine Berthelsen, Atassut.
Jensine Berthelsen, Atassut.
Atassummioqatiga Jakob Sivertsen, Jakob Sivertsenip oqaatigereerai uteqqinngikkaluarlugit kisianni tupigusuutigaarput siutit taamak milinngatigisinnaasimmata kulturikkut tapersersuinissamik suliniuteqartoqarnera naalakkersuinikkut ingerlanneqartoq taperserlutigu aammalu kulturrådemut suliassat ingerlateqqinneqarnissaat innersuussutigalugit Jakob Sivertsenip oqaatigeriigaattut inatsisitigut aningaasatigullu toqqammavissat iluarsartuunneqarnissaannut tunngassuteqartut ujartukkagut tunngavigalugit itigartitsinerput taamak mamiasuutigineqarsinnaatigimmat. Tupinnaqaaq.
Kisianni innuttaasut nammineerlutik tusaasatik nalunngilaat suut oqariartuutigineqarnersut qujanartumik. Oqaatigineqarpugut naqissuserniarneqarpugut siunnersuuteqartuminngaaniit Atassutikkunngooq kulturikkut pisut naammagisimaaramikkit iliuuseqaqqikkusunngillat. Taamaattoqanngilaq inerisarneqartuassaaq aamma Atassutikkunninngaaniit sulinerput tamakkerlugu Inatsisartutigut sulinerput tamakkerlugu aamma taassuunakkut siuarsaasoqarnissaa sulissutiginiarparput. Aqqutissalli eqqortut atorneqartariaqarput. Taamaattuminguna Atassumminngaaniit siunnersuut taamak iluseqarluni itigartinneqassasoq oqaatigigipput. Aamma siunnersuuteqartup aningaasatigut kingunissaasut minnerpaamilluunniit eqqartorsimanngilluinnarpai nunarsuarmigooq angalaaqattaartassapput taakkua Silamiunngooq aallaaviussaaq.
Ajunngilaq ajunngitsunik aamma siunnersuut imaqarpoq. Kisianni tamakkiisuunngilaq. Taanna aamma tunngavigalugu itigartitsisoqartariaqartarnera aamma ilisimaneqartariaqarpoq.
Isak Davidsen, ataatsimiinnermi aqutsisoq, sinniisussaq siulleq, Atassut.
Tullinnguulluni oqaaseqassaaq Doris Jakobsen, Siumut.
Doris Jakobsen, Siumup oqaaseqartua.
Siullermik isumaqarpunga taamatut pingaarteqigunikku Inuit
Ataqatigiit una sammineqartoq taava aamma oqaaseqartut tamaani allat
ataqqillugit tusarnaarsinnaasariaqaraat. Siullermik oqaatigivarput soorlu
Siumumi oqaatigigipput pingaartilluinnaripput nunatsinni kulturikkut
siuarsaajuarnissaq. Isiginnaartitsisartoqarnikkut nipilersortoqarnikkut
erinarsornikkut atuakkiornikkut eqqumiitsuliortoqarnikkullu. Taamatut siuarsaaniarnerput oqaatigivarput.
Taava imaanngilaq naammagiinnaripput suna tamaat illillu siunnersuutigisat
itigartiinnarlugu. Taamaattoqanngilaq.
Tassani
tunngavilersorparput soorlu aamma Atassutikkut oqaatigereeraat Naalakkersuisut
kulturimut siunnersuisooqatigiinnut siunersuusiorniartut taannalu
qilanaarivarput naammassineqarnissaa. Taavalu aamma naatsorsuutigalutigu
aningasaqarnikkut toqqammavissilluarneqassasoq taavalu aamma inatsisikkut aamma
inatsisigut qulaajaaffigineqarluni.
Isumaqarpugut
taakkua aatsaat naammassineqareerpata taava aatsaat suliaq
ingerlalluarsinnaagipput. Siunnersuut tunngaviatigut isumaqatigivarput.
Kisianni isumaqarluta taakkua naammassiniagassat naammassineqaqqaartariaqartut.
Taamaattumik tusarnaarluarsimasuuguit isumaqarpunga asuli taamatut tamaani
tusaaqqusaaginnarluni oqalunnissaq pissutissaqarsimanavianngikkaluartoq.
Ilumoorpoq
oqaatigimmassuk aamma Atassutikkut qulequtaa paatsuunganartoq qallunaatuaani
nationalteateri, taamaammat ersarissumik nutserneqarsimasariaqaraluarpoq qallunaatut
nutserneqarnerani. Taavalu aamma eqqaasitsissugigiinnassavara sunngiffimmi
sammisassaqartitsinermi inatsisit taakku nutaat taakkua aamma
periarfissaalluarmata aamma eqqaamasariaqartut.
Taamaattumik
oqaatigeqqissavarput naak Inuit Ataqatigiit tamaani oqaatigisaqattaaraluaraat
uagut tamaani itigartitsiinnartugut. Kisianni tunngavilersuutigu
tusarnaarluartariaqarpatit. Taamatut asuli tamaani tusaaqqusaavinnarlutik
oqalunnginninni.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tullinnguuppoq
Ane Hansen, Inuit Ataqatigiit.
Ane
Hansen, Inuit
Ataqatigiit oqaaseqartuat.
Anguniagassamik
siunnersuuteqarneq siunnersuuteqarnerit suulluunniit
tusaaqqusaarnerinnaanngillat. Tassa pissutsit isigisagut tunngavigalugit
tamatta naatsorsuutigigakku oqaluuserisassangortitsisarpugut. Aamma assut
ajuusaarnartuutippara Inuit Ataqatigiinni uagut Inatsisartut
oqaluuserisassaattut siunnersuutigut kalaallisut allalugit nassiunnikuugatsigit
aammalu taakku aallaavigalugit maani siunnersuutit aamma naatsorsuutigatsigu
kalaallisut allanneqarsimasut kalaallisuua tunngavigalugu sulilluta.
Kisianni
ajuusaarnarpoq maani illorsuarmi nutserisut nutserinerliornerisigut qallunaatut
paatsuunganartunngortinneqarsimassappat siunnersuut. Uani tassa Inuit
Ataqatigiinni ukiut ukiorpassuanngortuni massakkut kulturimik
pitsanngorsaatinik assigiinngitsunik siunnersuuteqartuarsimavugut manna
Inatsisartuni sulineq aqqutigalugu. Uanilu aamma ukiut 20-t matuma siornangajat
Inatsisartunut Ilaasortaasoq taamani Henriette Rasmussenip
siunnersuuteqarneratigut Silamiut aningaasanik inatsimmi
aningaasaliiffigineqarnerat anguneqarsimagaluartoq taanna massakkut
peerneqarsimammat assut uggornartutut isigaarput. Taamanikkut 1996-mili una
isiginnaartitsinermut inatsisissaq isiginnaartitsisartut aningaasatigut
atugassaat assigiinngitsorpassuillu ersareqqeqqissaartumik
suliarineqarsimapput. Kisianni tassa ajuusaarnarpoq ulloq manna tikillugu suli
annertunerusumik alloriartoqarsimanngimmat.
Isumaqarpunga
patsisigineqarsinnaanngitsoq uani siunnersuummut itigartsinermut
pilersaarusiorluarnissamik pingaartitsineq. Taamanersuarli 1996-mi
pilersaarusiorluaqqissaaroqarsimavoq. Uagut Inuit Ataqatigiinni
takusinnaasarput malillugu. Taamaattumik assut paasiuminaappoq
itigartitsinissamut patsigineqarmat pilersaarusiorluaqqissaartoqarnissaa.
Taamanikkulli piuvoq.
Tassa
Inuit Ataqatigiinni uagut pingaartitsinerput ingerlattuassavarput. Aamma
neriuppunga Naalakkersuisup uuma oqaluuserisassanngortitap aappassaaneerneqarnissaani
innersuutai maani malinneqassasut.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Tullinnguuppoq
Kultureqarnermut Ilinniartitaanermut Ilisimatusarnermut Ilageeqarnermullu
Naalakkersuisoq.
Arkalo
Abelsen,
Kultureqarnermut Ilinniartitaanermut Ilisimatusarnermut Ilageeqarnermullu
Naalakkersuisoq, Atassut.
Qujanaq.
maannakkut killiffitsinni paasereerunarparput siunnersuuteqartup sunarpiaq
siunnersuutigigaa. Taamaattumik taanna nassuiaataa malillugu oqallinneq
soorunami ingerlaqqissooq. Aamma uparualaarniarpara siunnersuuteqartup
kingullermik oqaaseqarnermini una taasaa kiap siunnersuutaa akueriniarassiuk.
Isumaqarpunga Henriette Rasmussenip siunnersuutigimmagu taanna
pissutaanngitsoq. Taamanna itigartitsinermut. Kisiannili uani
Naalakkersuisuninngaaniit aana ersersinniagarput. Kultureqarneq ataatsimut
isigalugu, inuit ilaasa oqartarnerattuut atituumik isigalugu taanna
ingerlanniarparput. Aammali pilersaarusiorlugu imminnut ataqatigiimmik.
Taamaattuminguna
oqartugut ajunngilaq kultureqarnermut siunnersuisoqatigiit taakkua
ataqatigiissumik kulturikkut ineriartortitsinerat ataatsimut isigalugu
siunnersuusiorniarlik. Taavalu massakkut taakkua kulturimik ingerlatassamik
ilamininnguat kisiat pinnagu kisiannili ataatsimoortumik nalilesorluarlugit
taakkua siunissami kulturikkut ineriartortitsinissarput taanna
tikkuartariaqarparput.
Kulturi
eqqartoraangatsigu soorunami kulturitoqqatsinni iluatinnartut taakkua aamma
tammatsaaliornissaat ineriartortinnissaallu taanna eqqartortarparput. Kisianni
aamma soorlu oqaluttup ilaata taareeraa. Ullumikkut aamma killiffitsinni
inuussuttorpassuaqarpoq mutiusunik assigiinngitsunik kulturikkut
suliniuteqartunik. Taakkulu takussutissat assigiinngitsorpassuit
takusareerpagut ippassaaninnguakkunni Katuami soorlu igisinnaartitsisoqarpoq
inuusuttunnguaninngaaniit.
Tassa
pisoqqat aammalu nutaaliat tamakkua tamarmik kulturimut ilaalluinnarput.
Uninnganngilagut ineriartortittuassallugilli. Taamaattumik killiffitsinni
ullumikkut kulturi eqqarsaatigalugu ataatsimut nalilersuisoqartariaqarpoq
alloriarnissallu ataatsimoortut imminnut ataqatigiissut taakkua
siunniuttariaqarlutigit. Aatsaat taamaaliornitsigut ullumikkut
aningaasalersugassatsinnik tulleriiaarinitsinni pitsaanerusumik tulleriaarisinnaanngussuugut.
Ataasiakkaannguit
massakkut aningaasalipallassinnarlugit imaluunniit pilersaarusiorsinnarlugit
taava immaqa sinneri allat kingulliullugit eqqartorneqartut taakkualu
aningaasassaarullugit. Isumaqarpunga ataatsimoortumik taamannak kulturikkut
siuarsaarniarnermi suliniuteqarnissaq taanna pissusissamisoortuusoq. Uunga
siunnersuummut assortuinngilaq. Kisianniliuna tamakkiinerusumik kulturip
iluatigut piorsaanissaq tassa siunniunneqartoq. Qujanaq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tullinnguulluni
oqaaseqassaaq Henriette Rasmussen, siunnersuuteqartoq, naatsumik.
Henriette
Rasmussen,
siunnersuuteqartoq, Inuit Ataqatigiit.
Manna
tikillugu oqaatigineqartunut akissuteqarlunga imatut oqaatigerusuppara tassa
Inatsisartut maani naalakkersuinikkut siunniutaasut toqqammaviussapput. Aamma
kulturikkut siunnersuisoqatigiit sulinissaanni politikki maani Inatsisartut
ataatsimiittarfiani pilersinneqartarpoq. Inatsisiliassagut maani tunngavilerneqartarput.
Taamaattumik maanngaaniit inimiit annissilluni kikkunnut tikkuartaaneq
politikkikkut kulturikkut siunnersuisoqatigiinnut assersuutigalugu imaluunniit
Atassutip oqaaseqartua toqqammavigalugu aningaasaqalerutta taava qanorpiaq
piliussanerluta aalajangerumaarparput. Tamanna Inuit Ataqatigiinniit uagut
naalakkersuinikkut isummersornermik tunngaviusorinngilarput.
Naalakkersuinikkut
anguniakkat ilusillu maani oqallisigalugit ilusilersortariaqarpagut.
Aningaasartassai taakkua aningaasanut inatsimmi assigisaanilu suliaqarnermi
nassaarineqallarumaarput. Aammalu kulturimut ilinniaritaanermullu
Ataatsimiititaliap siulittaasuata asuli maani tusaqqusaaginnarlunga
oqalunninnut eqqartugaanut oqaaseqarusuppunga toqqammavigigakkit Doris
Jakobsenip Siumut sinnerlugu saqqummiussai, tassalu Naalakkersuisut
Siumuminngaaniit oqaatiginerarmagu. Siunnersuut maannamut ingerlareersoq
Naalakkersuisullu akissuteqaataat naammagisimaaramikkit. Taamaattumik
siunnersuutiga massakkut akuersaarsinnaanagu.
Qilanaaraara
siulittaasup Kultureqarnermut Ilinniartitaanermut Ilisimatusarnermut
Ilageeqarnermullu ataatsimiititaliami siulittaasup una apeqqut
Ataatsimiititaliami sammilerpagu ilaatigut immaqa ammanerusumik
tusaqqusaarnerunngitsumik oqaloqatigiissinnaanissarput tassani tigussaasumik
Naalakkersuinikkut siunniussaqarumalluta. Aamma isiginnaartitsisartoqatigiinnik
pilersitsisinnaaneq eqqarsaatigalugu.
Neriuppunga
sinerissami aamma kulturikkut suliallit suleqataanerisigut inuiaqatigiinnilu
isummersueqataanerisigut makkua naalakkersuinikkut isummat ineriartortut aamma
tapesersorneqarumaartut. Aammalu Inatsisartuni piffissat pitsaanerulerumaartut.
Kulturikkut..
Isak
Davidsen,
ataatsimiinnermi aqutsisoq, sinniisussaq siulleq, Atassut.
Qinnuigissavakkit
oqaaseqarnerit tassunga unitseqqullugu.
Henriette
Rasmussen,
siunnersuuteqartoq, Inuit Ataqatigiit.
angusarissaarnerunissatsinnut
suleqataanissamut.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Tullinnguulluni
oqaaseqassaaq Jensine Berthelsen, Atassut.
Jensine
Berthelsen,
Atassut.
Doris
Jakobsen, uanga taperserluinnaqqissaarpara akissuteqaativut suunngitsutut
isigalugit tusaaqqusaartumik kulturimik politikkeqanngitsut allaat
pasinarsarluta pisoqarnera tunngavigalugu aamma uanga taamatut oqaatigerusukkakku.
Una assortuunninngorpoq tujorminartumik uffa kulturikkut siuarsaanissaq
eqqartoripput. Silamiut aallaavigalugit siunnersuutigineqarpoq.
Atassumminngaaniit aalajangiusimavarput ujartorlugulu aningaasatigut
kingunissaa inatsisitigut toqqammavissai. Tamakkua aamma
qulaajarneqartariaqartut. Imaaliinnarluta aalajangiigutta kingunissai
nalullugit aamma nalunngilarput inuiaqatigiinnut qanoq
akisoorujussuanngortitsisoqarsinnaatiginersoq.
Silamiukkut
nersunarlutik ukiorpassuit ingerlaniarsaripput. Kisianni nunatta
avataaninngaaniit isiginnaartitsisartut angerlartut ilaasortanngortissavagut
pinngitsaalillugit aaqqissuussineq Henriette Rasmussenip siunnersuutaatut
isikkoqassappat? Apeqquteqarpassuit qulaajaqqaagassaapput.
Taamaattumik
minnerpaamilluunniit pituttuereerluta Silamiukkunnut allanullu
pissusilersorluta taamatut aalajangiisitsiniartariaqanngilagut. Aamma
erseqqissareerparput kingumut oqaatigeqqissavara Naalakkersuisut kulturråde
suleqatigalugu aqqutissiuussiniarnerat suliatut aamma maanga Inatsisartunut
suliaasa inerneri Inatsisartunut apuunnissaanut suleqataanissarput
qularutigineqassanngilaq. Oqatsiaannarluni erseqqissuliunngilluaasarluni
taamatut siunnersuutit soorunami aamma itigartarput. Kisianni oqallinnissamut
tunngaviliisarput. Aamma tamanna eqqarsaatigineqartariaqarpoq.
Inuit
Ataqatigiit kulturikkut suliuniutinut allanullu igarsuarmut ataatsimut
ikillugillusooq Aasiviinngooq aningaasaliiffigitigit,
nationalteateritaartagooq, tamakkua tamaasa ataatsikkut oqaluuseritinniarpaat.
Uani qulequtaq Inuit Ataqatigiit nammineerlutik eqqaamasariaqarpaat
sunaanersoq.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Tullinnguuppoq
Doris Jakobsen, Siumut naatsumik.
Doris
Jakobsen, Siumup
oqaaseqartua.
Siullermik
oqaatigissavara kultureqarnermut ilinniartitaanermut ataatsimiititaliami
nuannaarutigigakku tamarmik tamanit partiit taavalu aamma Kattusseqatigiit
kulturikkut siuarsaaniarneq tamarmik sulissutigerusummassuk. Tamarmillu taanna
pingaartillugu anguniagassatut aalajangiusimammassuk.
Taanna
erseqqissaatigilaassavara. Kisianni tamaakkaluartoq ajuusaarutigalugu Siumumi
Atassummilu maannakkut suna tunngavilersuutigalugu itigartitsinerput Inuit
Ataqatigiinninngaaniit paasisimaneqanngimmat. Tassani erseqqissatigeqqilaassavara
Ane Hansenimut, Ane Hansen oqarmat uagut itigartitsisugut
pilersaarusiorluarnissaq taanna kissaatigalugu. Erseqqissumik
oqaatigereerparput Siumumit Atassummilu Naalakkersuisut imaluunniit
Naalakkersuisooqatigiit kulturimut siunnersuisooqatigiinni
siunnersuusiornissaat pingaartikkatsigu.
Taannalu
nammineerlutik aamma Naalakkersuisooqatigiit eqqaareerpaat. Taanna siullermik
pingaartipparput. Aappassaattut aningaasaqarnissaat qulaajarneqassasoq.
Pingajussaattut inatsisitigut toqqammavissinneqassasoq. Tassa taakkua
tunngavilersuutigalugit maannakkut itigartikkallarparput taakkua
naammassereerpata ilaana akuersaakutsoorumaarpugut. Taamaattumik massakkut
isumaqarpunga mianersuuttariaqartoq asuli oqaluinassalluni.
Itigartitsiniaannarluta itigartitsisugut. Itigartitsiniaannarluta
itigartitsinngilagut. Isumaqaratta ukua pingaarutillit taakkua taakkartukkagut
naammassineqaqqartariaqartut.
Aamma
eqqaasitsissutigisariaqarpoq oqarassi, kulturikkut qanoq
tapersersuinngitsigisugut. Eqqarsaatigilaariarsiuk ukiuni kingullerni
annertoorujorujussuarmik kulturikkut siuarsaanitsinni angusarput, Arctic Winter
Games allaat pilersissimavarput. Namminersornerullutik Oqartussani aamma
annertuumik aningaasatigut tapersersugarput, taamaattumik asuli tamaani oqaluinnarneq
pissusissamisuunngilaq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tullinnguulluni
oqaaseqassaaq Aqqaluk Lynge, Inuit Ataqatigiit.
Aqqaluk Lynge, Inuit Ataqatigiit.
Inatsisartut maani oqallinneranni unalu oqaluuserisaq tamaannga killinneranut oqaatigilaassavara, tassa oqaatsit kusartorpassuit partiinit allaninngaanniit tusareerpavut, aammalu taakkua tassa siutitta tunuanut allakkumaarpagut (qallunaatut oqariaaseq atuinnarlugu).
Suleriaatsimi uani eqqaamasariaqarpoq pissutsit imaammata, Inatsisartut manna oqaluuserinninnerivaat aammalu isumaqatigiinniarnerivaat. Suliassiissut itigartitsissutigineqareersoq taava udvalgimut ingerlatiinnarneqarsinnaanngilaq. Itigartitsissutigineqareersoq nalilersoqqinniarneqaruni taava allatut oqaaseqaateqartoqartariaqassooq. Taamaattumik Inuit Ataqatigiinniit imatut paasivarput oqaluuserisap maani killinnerani tunngaviusumik akerlerineqanngilaq, taamatut nunatsinnut nunatta tamarmiusup tapersersugaanik isiginnaartitsivimmik pilersitsinissaq, tassalu taanna illorsuartaqanngilaq, aningaasaqartariaqassooq taavalu inuttaqarluni assigiinngitsutigut. Taamatut pilersitsinissaq massakkut naaggaarneqarpoq.
Tassalu taamaappat taava uterfigineqartariaqassooq qangali nalunaarusiaasimasoq, massakkullu KIIP-iittoq tassunga tunngassuteqartoq, taannalu toqqammavigalugu taava oqaloqatigiittoqassooq. Unalu taava aappassaaneerneqassaaq ukiamut. Isumaqarpunga taamatut suleriaaseqarnermi ilaannikkut paatsuungassutigineqartartoq Naalakkersuisooqatigiit naaggaaraangamik, taava naaggaarnerat uagut naaggaarfigineqartut, taava paasisaratsigu tassa naaggaarnertut.
Tassalu aamma suleriaatsimi Inatsisartut sumiluunniit silarsuarmi sulineranni taamatut aamma suleriaaseqarpoq parlamentit suleriaasiat malillugu. Taamaattumillu illersugaq ingerlateqqinniaraanni taava allatut oqaaseqaateqartariaqarpoq. Tassalu taanna uagut aallaavigisarput, qinnuvigissavagullu partiit Naalakkersuisuutitaqartut erseqqissumik taanna oqaatigisaqqullugu, asuli isumalluartitsineq piunnaarlugut, tassami suliassiissutigineqartut ukua tamarmik erseqqereerput qanoq kinguneqartussaassasut. Taanna qinnutigaarput unneqqarissumik taamatut anngunneqartarnissaa.
Ukiup ingerlanerani uanga nammineq assigiinngitsorpassuartigut kulturimut suliaqarnermi akuusimallunga uniffigisarsimasagut annertunerpaapput siunnersuuteqareerlutik kikkorpassuit assigiinngitsut, soorlu atuakkiortut aningaasanik toqqammaveqarlutik misissuereerlutik allatigullu siunnersuuteqareerlutik taakani unitsiinnarneqartarsimasut uninngasut amerlaqaat.
Doris Jakobsen-i Siumut sinnerlugu Inatsisartut Kulturimut Ataatsimiititaliaanni siulittaasutut taamaallaat qinnuvigiinnassavarput Inuit Ataqatigiinninngaanniit, taakani nalunaaruterpassuit misissulaarniarisigit ? annertussaqaat, nalilersugassat amerlaqaat. Aamma taakani aamma immaqa misissuiguvit aamma paasissavat Arctic Winter Games? nunatsinni pilersinneqarnikuunngitsoq allaninngaanninguna pilersinneqartoq, maanili taamaallaat aaqqissuunneqarsimalluni. Taamaattumik kulturitta angusarsuisa ilaattut taanna oqaatigisinnaanngilat.
Kisianni kulturikkut angusagut ilumoorpoq annertoqaat, kisianni aamma annaasagut eqqarsaatigalugit isumaqarpunga maani udvalgi massakkut suliaqartussaq ukiamullu ilaatigut una siunnersuut toqqammavigalugu nalilersuiniartussaq, taamaallaat Inuit Ataqatigiinninngaanniit oqarfiginnassavassi sulilluarisi, taakaniittorpassuillu uninngaannartut nalunaaruterpassuit aamma ilanngullugit neriuppunga Inatsisartunut qaqeqqikkumaarisi ukiamut.
Isak Davidsen, ataatsimiinnermi aqutsisoq, sinniisussaq siulleq, Atassut.
Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq Arqalo Abelsen, Atassut.
Arkalo Abelsen, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq, Atassut.
Qujanaq. Aqqaluk Lynge-ip aatsaaginnannguaq oqaluttarfimminngaanniit maanngaanniit oqaatigisaa paatsuunganartoqartoq. Uagut Naalakkersuisuninngaanniit ersarissumik aammalu taperserneqarluta Siumumit, Demokraatinit Atassummillu uunga siunnersuutip itigartinneqarluni aappassaaneerneqarnissaanut ingerlatinneqarnissaa taanna oqaatigaarput.
Naalakkersuisut imannak oqarput, uagut suliniuteqareeratta Naalakkersuisunik ataqatigiissumik kultureqarnerup iluani ineriartortitsinissamik, taannalu tassa kultureqarnermi siunnersuisooqatigiinni aamma suliarineqassooq aammalu ataatsimiisitaliaq soorunami Inatsisartullu taakkua malinnaatinneqassapput, tigussaasunillu imminnut ataqatigiissunik saqqummiussissaqqaarpugut. Maannakkut nalunarallarpoq qaqugu, kisianni suliaq ingerlavoq.
Isumaqarpunga taanna erseqqissaatigilaartariaqarlugu. Taamaattumik killiffitsinnik tunngaviusumik isumaqatigiinngissuteqanngilagut kinguarsaanissamik, aammalu isiginnaartitsisartoqalernissaa siunissaq eqqarsaatigalugu. Kisianniuna ataqatigiissumik kulturikkut suliniutit taakkua ataatsimut saqqummiunneqarnissaat, taanna uagut Naalakkersuisuninngaanniit suliniutigereeratsigu taanna innersuullugu uuma itigartinneqarnissaa siunniukkipput.
Qujanaq.
Isak Davidsen, ataatsimiinnermi aqutsisoq, sinniisussaq siulleq, Atassut.
Aqqaluk Lynge, Inuit Ataqatigiit.
Aqqaluk Lynge, Inuit Ataqatigiit.
Kultureqarnermut Naalakkersuisoq qinnuvigigaluarpara suliniutisi taava maani Inatsisartuni saqqummiuteqqullugit, massakkut uagut ilisimanngilagut. Taamaattumillu soorlu tusarusunnassagaluartoq sorpiaat suliniutigigisi. Inatsisartunit akuersaarneqanngitsunik Naalakkersuisut sulineq ajormata, Inatsisartut pilersaarutinik takusussaapput, taakkulu pilersaarutit ulloq manna tikillugu takusimanngilagut.
Isak Davidsen, ataatsimiinnermi aqutsisoq, sinniisussaq siulleq, Atassut.
Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq Arqalo Abelsen, Atassut.
Arkalo Abelsen, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq, Atassut.
Inatsisartuni Ilaasortaq Aqqaluk Lynge-ip nalunngeqqissaarpaa Naalakkersuisut qanga atuutilersut, aammalu nalunngilaa suliassat suut annertuumik sammineqarsimasut, taamaattumik massakkut killiffimmi oqaatigiinnarsinnaavara Naalakkersuisoqatigiit isumaqatigiissumminni anguniarumallugu taanna isumaqatigiissutigisimasartik. Kultureqarnerup siuarsarneqarnissaa taanna suliniutigaarput.
Uaniuna kultureqarnerup iluani ataasinnguaq immikkuullarissoq saqqummiunneqartoq oqaaseqarfigigipput taamaattillugu immikkuullaritsillugu taanna massakkut isumaqataaffiginngilarput taamannak pineqarnissaa, kisiannili ataqatigiissumik kultureqarnerup iluani suliniutit taakkua saqqummiussissaqqaarpugut.
Qujanaq.
Isak Davidsen, ataatsimiinnermi aqutsisoq, sinniisussaq siulleq, Atassut.
Aqqaluk Lynge, Inuit Ataqatigiit pingajussaaniileravit naatsumik.
Aqqaluk Lynge, Inuit Ataqatigiit.
Naalakkersuisut pilersaaruteqarunik piffissaqarsimapput januar, februar, marts massakkut apriilinngulerpoq qanoq sivisutigisumik utaqqiniaratta?
Isak Davidsen, ataatsimiinnermi aqutsisoq, sinniisussaq siulleq, Atassut.
Naalakkersuisut Siulittaasuat.
Hans Enoksen, Naalakkersuisut Siulittaasuat, Siumut.
Tassa una eqqaasitsissutigilaassavara Aqqaluk Lynge oqariartornermini oqaatigimmagu kinguarsaasoqartoq, taamaattoqarsimassappat assut ajuusaarnartutut isigaara. Kisianni qularinngilara taamaattoqanngitsoq, aamma piffissaq qinigaaffik kingulleq qiviaraanni piffissap anginerpaarpaartaa Inuit Ataqatigiit Kulturimi Ataatsimiititaliami Siulittaasuutitaqarput.
Qujanaq.
Isak Davidsen, ataatsimiinnermi aqutsisoq, sinniisussaq siulleq, Atassut.
Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq Arqalo Abelsen, naatsumik.
Arkalo Abelsen, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq, Atassut.
Aqqaluk Lynge ilumuussagaluarami ? qujanassagaluaqaaq januari naallugu Naalakkersuisuusimagaluarutta, kisianni naluneqanngitsutuut aatsaat 20. januar Inatsisartut akuerivaatigut Naalakkersuisooqatigiit, tassa Atassut Siumullu. Kisianni tassa isumaqarpunga massakkut sangutinneqartoq soqutaanngitsunut ? asuli akeqattaannermut. Suliassaq taanna siunnerfipput suliarikkutsuussavarput aammalu ataqatigiissunik kulturip iluani ineriartortitsinissamut saqqummiussiumaarpugut.
Qujanaq.
Isak Davidsen, ataatsimiinnermi aqutsisoq, sinniisussaq siulleq, Atassut.
Ane Hansen, Inuit Ataqatigiit.
Ane Hansen, Inuit Ataqatigiit oqaaseqartuat.
Tassa paatsuunganartut amerliartorusaartarput uani ataatsimiinnermi suleriaaseq, ingammik avataaninngaanniit nalunagu qanoq ittuusoq. Tassa uanga naatsorsuutigilluinnarpara suli Inatsisartut Naalakkersuisunut sulisitsisuusut, taamaattumillu anguniagaqartoqassappat Inatsisartut ataatsimoorlutik suliakkiisariaqartut Naalakkersuisut suna anguniassaneraat.
Uani Naalakkersuisut Siulittaasuata Hans Enoksen-ip oqaatigivaa piffissami kingullermi qinigaaffimmi kingullermi Inuit Ataqatigiit, Kultureqarnermut, Ilinniartitaanermut ataatsimiisitaliami siulittaasuutitaqarsimasut. Tamanna ilumoorpoq aamma aamakkua nalunaarusiat Inuit Ataqatigiit Kultureqarnermut, Ilinniartitaanermullu ataatsimiisitaliami siulittaasuutitaqarnerisa nalaanni sukumiisumik qulaajakkat, misissukkat, aningaasatigut kingunissaa ilanngullugit misissukkat. Ukiorpassuanngortuni massakkut uninngaannalersimasut, tamakkuukua aallarteqqinnissaat siunertaralugu Inuit Ataqatigiinninngaanniit Henriette Rasmussen-ip siunnersuutaa tapersersoripput, aammalu isumaqaraluarama partiit saqqummiinermini siunertat tamakku assigiinngitsut tapersersoqimmatigit imatut inerneqassasoq, suliassap timitalerneqarnissaa siunertaralugu ataatsimiisitaliami ingerlaqqissasoq Naalakkersuisunut suliukkiutaalluni.
Kisianni tassa paatsuunganerit suli annertusiartorput.
Isak Davidsen, ataatsimiinnermi aqutsisoq, sinniisussaq siulleq, Atassut.
Jensigne Berthelsen, Atassut naatsumik.
Jensigne Berthelsen, Atassut.
Naatsorsuutiginngilara ukiut arfineq-marluk ingerlanerini nunarsuaq uninngalluni nalunaarusiap taassuma atorsinnaassusianik qulakkeerinnissimassasoq. Taamaattumik Naalakkersuisut kingumut oqaatigiinnassavarput, Naalakkersuisunut mitaartuigaluarussiluunniit Naalakkersuisut suliniutaat ataqqillutigit aammalu qilanaarluta utaqqillutigit oqaatigereerparput, danskit isiginnaartitsisartoqarnermut inatsisaat misissuataarlugit imaannaanngitsorujussuuvoq. Henriette Rasmussen-ip siunnersuutaa aalajangiussimalaariartigu.
?Silamiut? tassani qitiusutut takorloorpaat, kisianni aamma allanik isiginnaartitsisartoqarpoq, tamakkua qanoq pineqassappat ? pinngitsaalisaallutik ?Silamiut?-nut ilaasortanngortinneqassapat ? imaluunniit qanoq ataqatigiissaarisoqassava ? danskit isiginnaartitsisarnermut inatsisaat naapertorlugit nuna tamakkerlugu, Danmarkimi nuna tamakkerlugu ataqatigiissaarisoqarpoq isiginnaartitsisarnermut inatsisit taanna tunngavigalugu, Kongelig Teater aamma ilusilersorneqarnikuuvoq aalajangersimasunut inunnut atugassiaajunnaarlugu inuiaqatigiilli ataatsimut pigisaannut atugassianngorlugu.
Taamaattumik aamma tamakkua aamma qulaajarneqaqqaartariaqarput. Aningaasartai aamma eqqarsaatigiinnarlugit soorunami Danmarkimut immitsinnut sanilliunniarsinnaannngilluaasaraluarpugut, kisianni danskit nationalteatereqarnerminnut 100 mio.kr.-ngajaat atortarpaat. Nunatsinni tamakkua qanoq inissisimafigissavagut ? soorunami taamak amerlatigisut atornavianngilagut. Tamakkua qulaajarneqaqqaarniarlik aamma neriorsorneqareerpugut Kulturråd aqqutigalugu Naalakkersuisut saqqummiussissasut.
Isak Davidsen, ataatsimiinnermi aqutsisoq, sinniisussaq siulleq, Atassut.
Tassa oqallinneq manna naammassisariaqangajalerparput. Naalakkersuisup Siulittaasuat massakkut oqaaseqassaaq, tullinnguutissaaq Kultureqarnermut Naalakkersuisoq taanna pereerpat neriuppunga naammassissasugut.
Hans Enoksen, Inatsisartut Siulitaasuat, Siumut.
Aap qujanaq. Tassa siunnersuuteqartoq Naalakkersuisullu isumaat ungasinngillat. Taamaammat tupigaara maani assortuussutigissagutsigu ataasiukkaarlutalu qaqisaqattaarluta uku ? ukulu pisuuppumik oqariartoqattaarluta, taanna isumaqarpunga uniffiginagu siunnersuut Naalakkersuisunit tunngaviatigut isumaqatigineqarluni suleriaqqinnissami aqqutissiuussinissamik oqariartortoq ataatsimoorfigisariaqaripput.
Soorunami pisuutitserusuttoqarpat aamma uagut pisuusinnaavugut aamma qimaanianngilagut pisuutinneqassagutta, kisianni akisussaassuseqartumik ingerlatsinissaq tamatta peqataaffigisariaqarparput.
Qujanaq.
Isak Davidsen, ataatsimiinnermi aqutsisoq, sinniisussaq siulleq, Atassut.
Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq Arqalo Abelsen, naatsumik.
Arkalo Abelsen, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq, Atassut.
Paatsoorusuttuni imaluunniit paatsoortuusaarusuttuni ila periarfissaqarnaqaaq. Inatsisartut Naalakkersuisunut naalagaapput ? ilaana ? taanna assortorneqassanngilaq, aamma assortorneqarunnanngilaq. Taamaattumik-una Inatsisartuni amerlanerussuteqartut inassutigigaat, innersuussutigigaat ataatsimiititaliamut ingerlanani kisianni aappassaaneernissamut ingerlaannarnissaa, taannalu aamma Inuit Ataqatigiinninngaanniit ataqqineqartariaqarpoq.
Qujanaq.
Isak Davidsen, ataatsimiinnermi aqutsisoq, sinniisussaq siulleq, Atassut.
Jens Napaattoq,
Siumut.
Jens
Napaattoq, Siumut.
Qujanaq. Uani
Arctic Winter Games?imi aaqqissuisimasut pillugit nunat allamiorsuunerat
ilaatigut oqariartuutigineqarmat, isumaqarpunga uani paatsoorniaarnarluni aamma
paatsoorniarneqarlunilusooq immat oqartariaqartoq, Siumuminngaanniit
oqannginnatta aaqqissuisut pillugit, kisianni nunatta
aningaasaleeqataaneratigut soqutiginnilluta aamma peqataagatta. Aamma minnerunngitsumik
Arctic Winter Games maannakkut ingerlanneqartoq ukiuni arlaqalersuni
nunatsinnut annertuumik iluaqutaasumik ingerlanneqartartoq qiviarutsigu,
sulisorpassuit Sisimiormiut, inuit pikkorilluinnaqqeqqissaarlutik
suliniuteqartut nersualaartariaqartut allamiukasinnik aaqqissugaasumik taanagu,
isumaqarpunga inuiaqatigiinni Kalaallit avammut kiinnertarnitsinnut
takornariaqarnikkut siuarsaanitsinnut aamma annertuumik iluaqutaasoq maani
oqaluttarfiit pingaarnersaanni taasakkatsinni, isumaqarpunga aamma mianersuullugu
oqaasertalersortassagipput.
Aamma nunat
allamiut eqqartorneqarmata ungasinngitsukkut Katuaq-mi isiginnaartitsisut
takusinnaavagut, Kalaallit Nunaata kangianinngaanniit inuusuttuarannguit
meeqqallu isiginnaartitsipput. Tassuunatigut tyskit, kalaallit kulturiat
aallaavigilluinnarlugu soqutigisaralugu allamiut kulturianik akoorlugit
soqutigineqaqisunik, meeqqanut nuanneqisunik nittarsaassutigineqarput.
Taamaattumik isiginnaartitsisarnerit aamma assigiinngitsut nunatsinni
ingerlanneqartut nuna allamiuusinnaasunit aamma ingerlanneqartarput, tamannalu
tunissutaavoq annertooq meerartatsinnut uagutsinnullu.
Taamaattumik
aamma nuna allamiut taamatut oqaasertalersorneqarnissaat ingasappallaarpoq.
Uani 1996-imili suliap uninngasimanerannik Ane Hansen Inuit
Ataqatigiinninngaanniit ilaatigut oqariartuutigimmagu, Kulturimut
siulittaasuusimallutik. Taamaattoqanngilaq sunngiffimmi kulturikkut
sammisassaqartitsisarneq peqqussutit nutarterneqarnikuupput, aamma ilaatigut
Naalakkersuisup saqqummiinermini allaat peqqussut nr. 10 2002-imeersoq
innersuullugu toqqammavilersuinermini oqariartuutigivaa sooq ilaatigut
itigartitsinermut inassuteqarnissaminut toqqammavilersuinermini innersuussummi
tassani soorlu tusaasinnaagissi.
Imaassinnaavoq
taakku tusarnaarneqarsimanngitsut, taamaattumik ilaatigut tupiginngilara
maannakkut uani oqaluttarfimmi tulleriaallutik qaqeqattaarnitsinni ilaatigut
oqarniartoqaraluarmat aallaqqaammut Siumukkut, Inuit Ataqatigiillu
minnerunngitsumik Demokraatit aamma kulturikkut ilaatigut politikikkut
anguniagaqanngitsutut taakkartorneqarlutik. Taanna aallaavigalugu oqallinneq
sanguvoq ajoraluartumik, kisiannili toqqammavilersuutip
paatsoorneqarsinnaanngitsoq isumaqarpunga saqqummiunneqareersut.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tullinnguuppoq
naggataarutaallunilu Josef Motzfeldt, Inuit Ataqatigiit.
Josef
Motzfeldt, Inuit
Ataqatigiit.
Ikinngutit
ilaasortaqatit oqaluuserisaq manna ajunngitsumik siunnerfeqarluni
oqaluuserineqarpoq, ajuusaarnartumilli oqallinnerup maani killinnerani
pisuutitsiniutinik sakkortuunik ilaartorneqalermat ajuusaarutigaarput.
Pisuutitsiniutit
ilagaat soorooq Inuit Ataqatigiit qinigaaffimmi siullermi annertunerpaami
Kulturikkut, Atuartitaanermullu ataatsimiititaliami siulittaasuusimagamik sooq
taamanili qanoq iliuuseqarsimanngillat. Naalakkersuisut Siulittaasuanit taanna
tusarparput, taavalu nammineq oqarluni pisuutitserusuttoqarpat
qimaanianngilagut. Oqallinnerit taamaattut silaannarmit isummanik nissiaanani
ingerlanneqassappata pilersaarutinik, takorluukkanik Naalakkersuisut
Siulittaasuata siunissami takorluugaanik Naalakkersuisut siuttutut
tusarusuppugut, pisuutitsiniarnerit qimaaffissarsiornerit maannamut taamaallaat
annertunerpaamik oqaluttarfimmi maanngaanniit Naalakkersuisut Siulittaasuanit
tusarpagut.
Tamaannga
killittariaqarpoq oqallinneq. Oqallinneq kusanartumik siunnerfeqarluni
ingerlasoq, Issittormiut unammiuaartarnerannik kulturikkut
suliniuterujussuarnik namminneq nassaarisimasaminnik maanngaanniit
oqaluttoqassappat, oqaluttarfik taamatut atorneqassanngilaq. Kulturikkut
suliniarnerit ?Silamiut?-iisimappata, kisianni nammineq isiginnaartitsisartunik
nunarsuarmut takkorliuuttassatsinnik peqarnissarput matumani pingaarnertut
siunnersuutitta qiterimmagu qimannaveersaartariaqarparput.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Naalakkersuisut
Siulittaasuat.
Hans Enoksen, Naalakkersuisut Siulittaasuat, Siumut.
Aap taanna
oqariartuutigaarput Aqqaluk Lynge oqaaseqarnermini kinguarsagarpassuit attorneqarneq
ajortut uninngaannarnerarmagit, taavalu taanna tikkuarparput. Soormi
taamaattoqarsimappat taamanikkut taakku ingerlatsitseqqinniarsimanngillat,
aamma maanngaanniit Inuit Ataqatigiit kisimik naqqissuiniaannarlutik,
kukkunngitsutut oqariartortarnerat taanna aamma nalilertariaqarparput uagut.
Tassa
akisussaaffik aamma ilissi tigummikuuvarsi, taanna miserratiginagu aamma
oqaatigisinnaasariaqarparsi.
Qujanaq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Naggataarutaasumik
tassa massakkut Jens Napaattoq, Siumut.
Jens
Napaattoq, Siumut.
Ja siullermik
utoqqatsissutigilaassavara maannakut Sisimiuni ingerlanneqartoq Arctic Winter
Games?mik taasooraluarakku, kisiannili Arctic Circle Raceusoq. Uani aamma Aqqaluk
Lynge-ip oqariartuutigisaa aatsaannguaq oqaasertalinngitsuugara, tassalu
ataatsimiititaliamik ingerlanneqarnissaa kaammattuutigineqartumik nipeqarmat,
uagut Siumuminngaanniit ersarilluinnartumik suliap ilaatigut ingerlanneqartut
siunnerfigineqartut assigiinngitsut maannakkut ingerlasut aallaavigalugit
kissaatigigatsigu uani siunnersuutip qulequtaa toqqammaviatigut
paasilluarneqartutut, toqqammaviatigut tapersernera ilutigalugu suliap
ingerlasut eqqarsaatigalugit ataatsimiititaliami susassaqart malinnaatinneqarnissaat
kaammattuutigigatsigu, taanna ersarissaqqilaarparput.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Taamaalilluni
ullormut oqaluuserisassaq 95 aappassaaneerneqarnissaminut taamatut
isikkoqarluni ingerlaqqissasoq aalajangerneqarpoq.