Oqaluuserisassani immikkoortoq 10-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut aqqaneq-aappaat, ataasinngorneq 29. april 2002, nal. 12:00
Ataatsimiinnermik
aqutsisoq: Daniel Skifte, Inatsisartut Siulittaasuat, Atassut.
Augusta
Salling, Aningaasaqarnermut naalakkersuisoq, Atassut.
Kalaallit
Nunaanni Namminersornerullutik Oqartussani kommuninilu
aningaasarsiaqartitsinerup atorfeqartitsinerullu iluini
isumaqatigiinniartarnerit isumagineqarnerat pillugu Inatsisartut inatsisissattut
siunnersuut, matumuuna Naalakkersuisut sinnerlugit saqqummiutissavara.
Namminersornerullutik
Oqartussat qitiusumik aqutsisoqarfiisa avataaniittumik akissarsiat pillugit
ataatsimiititaliap pilersinneqarnissaa 1999-imi KANUKOKA-p Naalakkersuisunut
siunnersuutigaa.
Namminersornerullutik
Oqartussani kommuninilu sulisorisat aningaasarsiaasa atorfeqartitaanermilu
atugassarisaasa isumaqatigiinniuteqarneranni, pisortat sulisitsisuisa aqqutissat
soqutigisaat ataatsimiititaliap isumagisassarissavai. KANUKOKA malillugu
Namminersornerullutik Oqartussat Kattuffiullu suleqatigiinnissamik
isumaqatigiissutaat atuuttoq kommunini atorfeqarlutik sulisorisat
aningaasarsiassaasa atorfeqartitaanermilu atugassarisaasa
isumaqatigiinniutigineqartarinni kommunit naammaginartumik
sunniuteqarsinnaannginnerat siunnersuummut pissutaavoq.
Taamaattumik
Namminersornerullutik Oqartussat KANUKOKA-llu allafeqarfiisa sinniisuutitaanik
inuttalerneqartoq suleqatigiissitaq Naalakkersuisut pilersippaat, KANUKOKA-ip
kissaatai naammasisinnaajumallugit aningaasat inatsisiliornerlu
eqqarsaatigalugit suni suliniuteqarsinnaanera taassuma paasiniaaffigissavaa.
Kisiannili
paasinarsisimavoq akissarsiat pillugit ataatsimiititaliap pilersinneqarnissaa
amerlanerusunik aningaasartuutaanerulissasoq immikkut sullissiviup taamaattup
pilersinneqarneratigut pitsaaqutissanut naapertuutinngitsumik.
Taamaattumik
sunniuteqarnerusumik kommunit kissaataat naammassisinnaajumallugit
periarfissat assigiinngitsut suleqatigiissitap misissuiffigai. Tamatumap
kingorna Naalakkersuisut allaffiata Inatsisartut inatsisissaanut siunnersuut
una suliarisimavaa.
Siunnersuummi
pingaarneq tassaavoq isumaqatigiinniarnermut isumaqatigiissuteqarnernullu
siunnersuusiosooqatigiit isumaqatigiissutissat, isumaqatigiinniutigineqarnerat
pillugu apeqqutinik allanut tunngaviulersinnaasunik suliaqartussap
pilersinneqarnissaa isumaqatigiinniuteqarnerit ingerlanneqarneri aqutsinikkut
toqqaannartumik akisussaaneq Namminersornerullutik Oqartussat
allaffeqarfianiiginnarluni.
Siunnersuusooqatigiit
Namminersornerullutik Oqartussat isumaqatigiinniartarnernut
immikkoortoqarrfinni sulinermut siulersuisutut ilusilittut isigineqarsinnaavoq,
siulersuisulli taakku isumaqatigiinniartarnernut immikkoortoqarfiup
suliffittut ingerlanneqarneranni aqutsinermut aningaasanut
akisussaaffeqasanngilaq.
Isumaqatigiinniarnermut
isumaqatigiissuteqarnernullu siunnersooqatigiit katitigaanissaat
eqqarsaatigalugu siunnersuutigineqarpoq taanna Namminersornerullutik
Oqartussat kommunillu sinniissuutitaanik amerlaqatigiinnik katitigaassasoq,
siulittaasutulli suliassat KANUKOKA-ip sinniisuutaatitaanit ataavartumik
isumagineqassasut.
Tassuuna
naligiissitsisoqassaaq, tassami suliassaqarfiup allaffissornikkut
aqunneqarnera Namminersornerullutik Oqartussanit isumagineqarmat.
Siulersuisutut ingerlatsisut suliarisartagaat
assigalugit isumaqatigiinniarnermut isumaqatigiissuteqarnernullu
siunnersuisooqatigiit suliassaraat Namminersornerullutik Oqartussani
kommuninilu sulisut aningaasarsiaqartitaanermi atorfeqartitaanermilu
atugassarisaasa isumaqatigiinniutigineqarneranni
isumaqatigiissutigineqarnerannilu apeqqutitut allanut tunngaviulersimasut,
taamaattumik siunnersuisooqatigiit suliassaqarfiup iluani ineriartornermut
malinnaasinnaaqqullugit -llutillu Naalakkersuisut allaffeqarfiani suliassat
suliarineqartut pillugit tamakkiisumik paasitsinneqartassapput.
Isumaqatigiinniarnernut
isumaqatigiissuteqarnernullu siunnersuisooqatigiinnut tunngatillugu
pingaarutilinni allani erseqqissarusuppara sulinermi tunngavissat pillugit
aammalu isumaqatigiinniarnernut isumaqatigiissuteqarnernullu tunngatillugu
illuatungeriit Namminersornerullutik Oqartussat kommunillu illuatungaaniillu
sulisartut kattuffiisa isumaqatigiinniarnissaanut piginnaatitsissutit pillugit
siunnersuisooqatigiit inassuteqartassammata.
Apeqqutit
allanut tunngaviulersinnaasut Naalakkersuisut allaffeqarfiata aamma
isumaqatigiinniarnermut isumaqatigiissuteqarnernullu siunnersuisooqatigiinnut
saqqummiuttassavari, apeqqutit taamaattut assersuutigalugu tassaasinnaapput
aningaasarsiat pillugit ingerlatsinermut tunngasut, isumaqatigiissutit
isumaqatigiissutigineqarsinnaasut isumaqartinneqarnissaat pillugu apeqqutit
allanut tunngaviulersinnaasut, imaluunniit isumaqatigiinniarnerup
ingerlanerani piginnaatitsissut pillugu apeqqutit.
Isumaqatigiinniarnerni
tunngavissat kommunini sulisunut tunngasut suliarineqarnerat eqqarsaatigalugu
taanna pisassaaq KANUKOKA-ip aamma Namminersornerullutik Oqartussat
suleqatigiinnerisigut. Tamatuma saniatigut kommunini sulisunut tunngasut
isumaqatigiinniutigineqarneranni ikiuuttussamik KANUKOKA sinniisoqarsinnaavoq.
Naggataatungaatigut
erseqqissassavara Naalakkersuisut isumaqatigiinniarnermut
immikkoortortaqarfinni pisortatut atorfiit eqqarsaatigalugit
siunnersuisooqatigiit inassuteqarsinnaatitaassasut tamatuma saniatigut
isumaqatigiinniarnernut immikkoortortap allaffissornikkut aqunneqarnera
Naalakkersuisut akisussaaffigaat.
Ataatsimut
isigalugu oqaatigineqarsinnaavoq maannamut siunnersuisooqatigiittarnermut
naleqqiullugu isumaqatigiinniarnermut isumaqatigiissuteqartarnernullu
siunnersuisooqatigiissitigut kommunit pitsaanerusumik inissisimalissasut.
Tassunga
atatillugu pingaartumik erseqqissaruppara sullivik ataavartoq
pilersinneqassammat Namminersornerullutik Oqartussani kommuninilu sulisut
aningaasarsiaqartitaanermi atorfeqartitaanermilu atugassarisaat pillugit
apeqqutit saqqummiunneqarfigisinnaasaat.
Isumaqatigiinniarnerit
ingerlanneqalerneranni piginnaatitsissutit isumaqatigiinniarnernut
tunngavissiat il.il. imarisassaannut aamma kommunit pigaarnerusumik
sunniuteqarsinnaalissapput.
Siunnersuutip
oqaluuserineqarnerata ingerlanerani KANUKOKA-ip tikkuarsimavaa
isumaqatigiinniarnernut immikkoortortaqarfimmik suleqateqarnermini
paasisimallugu Aningaasaqarnermut Pisortaqarfiup isumaqatigiinniarnernut
immikkoortortaqarfiani sulisut amerlassusiligaanerat sullissisinnaanerallu
ajornartorsiutaajartortoq. Ilaatigut Kattuffiit isumaqatigiissutillu
amerliartornerisa kingunerisaanik.
Taamaattumik
aaqqissuussineq nutaaq ingerlalluassappat ajornartorsiutit tamakku
isumaqatigiinniarnermut immikkoortortami sulisorisat amerlanerisigut
qaangerneqartariaqartutut KANUKOKA isumaqarpoq.
Tamatuminnga
aningaasalersuisutissat 2003-imut ataatsimoortumik tapiissutissat
isumaqatigiinniutigineqarnerannut atatillugu pissarsiarineqarsinnaapput.
Inatsisissatut
siunnersuut KANUKOKA-p siulersuisuinit oqaluuserineqarsimavoq, kommuninilu
ataasiakkaani nalilersuiffigineqarsimalluni. Tamatuma kingunerisimavaa
inatsisissatut siunnersuutip ataasiakkaanit oqaaseqarfigineqarsimanera.
Tamakkulu kommunit sinnerlugit KANUKOKA-mit saqqummiunneqarsimapput.
Oqaaseqaatit
tamakku ataatsimut isigalugit oqaasertalersugaaneranut tunngammata imaluunniit
pissutsinut isumaqatigiinniarnermut isumaqatigiissuteqarnernullu
siunnersuisooqatigiit pilersinneqareernermikkut suliarisinnaasaannut
tunngammata inatsisissatut siunnersuutip saqqummiunneqartup
allanngortitsivigineqarnissaa Naalakkersuisut pissutissaqartissimanngilaat.
Taamaattumik
Naalakkersuisut isumaqarput isumaqatigiinniarnernut
isumaqatigiissuteqarnernullu siunnersuisooqatigiit siunnersuutigineqartartutut
ittup suleqataaffigineratigut isumaqatigiinniarnernut kommunit
sunniuteqarnerulernissaminnik kissaataat naammassineqassasut.
Matumanilu
Namminersornerullutik Oqartussat qitiusumik aqutsisoqarfiisa avataaniittumik
pisortat suliffiutaanik nutaamik pilersitsinikkut
aningaasartuuteqarneruffiunngitsumik.
Taamatut
oqaaseqarlunga inatsisissatut siunnersuut Inatsisartunut akuersortumik
oqaluuserisassanngortippara, siunnersuutigissallugulu Inatsiseqarnermut
Atatsimiititaliami oqaluuserisassanngortinneqassasoq.
Qujanaq.
Daniel
Skifte, Inatsisartut Siulittaasuat, Atassut.
Qujanaq.
Maannalu oartiit, Kattusseqatigiit attaviitsullu oqaaseqartussaat
oqaaseqassapput. Siulliullunilu oqaaseqassaaq
Mikael
Petersen, Siumup oqaaseqartua.
Kalaallit
Nunaanni Namminersornerullutik Oqartussani kommuninilu
aningaasarsiaqartitsinerup atorfeqartitsinerullu iluini
isumaqatigiinniartarnerit isumagineqarnerat pillugu Inatsisartut
inatsisissattut siunnersuut Aningaasaqarnermut Naalakkersuisumit
saqqummiunneqartoq Siumumiit ilassilluarparput.
Ilumoorpoq
pisortani sulisorisat aningaasarsiaat pillugit isumaqatigiinniartarnerni
taamanili Namminersornerullutik Oqartussat tamakkiisumik pisussaaffimmik
tigusinerisa kingorna kommuniniit kissaatigineqartarsimammat
isumaqatigiinniartarnerni ersarinnerusumik pitsaanerusumillu kommunit
sunniuteqaqataanissaminnut periarfissaqartinnissaat.
Siumumiit
paasilluarparput 1999-imiit massakkumut periarfissat assigiinngitsut
misissoqqissaarneqarsimanerat aammalu allaffissornikkut sapinngisamik
akikinnerpaamik ingerlatsinissaq pingaartillugu periarfissarsiortoqarsimasoq,
taamaalilluni pisariinnerpaamik akikinnerpaamillu periuseqarluni kommunit
Namminersornerullutillu Oqartussat ikorfartoqatigiinnermikkut
isumaqatigiinniartarnernik ingerlatsisarsinnaanissaat
periarfissinneqarsinnaaqqullugu.
Siumumiit
iluarisimaarparput massakkut Naalakkersuisut inatsisissaq saqqummiummassuk
Isumaqatigiinniartarnernut Isumaqatigiissuteqartarnernullu
siunnersuisooqatigiit Naaminersornerullutik Oqartussat toqqagaannik,
kommunillu KANUKOKA aqqutigalugu toqqagaannik inuttaqartussaq kommuninillu
siulittaasuuffigineqartussaq pilersinneqartussanngorlug, taamaalilluni
isumaqatigiinniutissat tunngavissaannut isumaqatigiinniartarnissanullu
piumasaqaatitut killissarititaasussanut kommunit aallaqqaataaniik
sunniuteqaqataatittarnissaat qulakkeerneqarsinnaaqqullugu.
Taamannak
oqaaseqarluta inatsisissatut siunnersuut tamakkiisumik taperserparput
taamatullu iluseqarluni aappassaaneerneqarnissaminut ingerlateqqinneqarnissaa
inassutigissallutigu.
Jakob
Sivertsen, Atassutip oqaaseqartua.
Kalallit
Nunaanni Namminersornerullutik Oqartussat kommuninilu
aningaasarsiaqartitsinerup atorfeqartitsinerullu iluini
isumaqatigiinniartarnerit isumagineqarnerat pillugu Inatsisartut
inatsisissaattut siunnersuut, Atassummit imatut oqaaseqarfiginiarparput.
Inatsisissamut
siunnersuutip siunertaraa, Namminersornerullutik Oqartussani kiisalu kommunini
sulisuusut aningaasarsiaqartitaanerat atorfeqartitaanermullu tunngasutigut
atugassarititaasut ataqatigiissaarneqarnissaat ataatsimoortumillu
aaqqissuunneqartarnissaat isumannaallisarniarlugu naleqqussaasariaqalersimaneq.
Inatsisissamut
siunnersuut ataatsimut isigalugu Atassummit pingaartutut isigaarput Kalaallit
Nunaanni Namminersornerullutik Oqartussat kommuninilu sulisut tjnestemanditut
atorfeqartitaanngitsut aningaasarsiaqartitaaneranni atorfeqartitaanerannilu
atugassarititaasut ataatsimoortumik isumaqatigiissutitigut
aalajangersarneqartarnissaat, inatsisissami isumannaarniarneqarmat Atassummit
assut isumaqatigigatsigu matumuuna oqaatigaarput.
Kiisalu
Kalaallit Nunaanni Namminersornerullutik Oqartussani kommuninilu
tjenestemandit pillugit inatsimmi §49 naapertorlugu, Kalaallit Nunaanni
Namminersornerullutik Oqartussani kommuninilu tjenestemandit allallu
sulisorisat atorfillit peqatigiiffissuannut isumaqatigiissummi ilaasut
aningaasarsiaqartitaanermi atorfeqartitaanermilu atugassarititaasut pillugit
isumaqatigiinniarnerit isumaqatigissuteqarfigineqarnissaallu inatsisissami
qulakkeerniarneqarnerat Atassummit tamakkiisumik taperseratsigit matumuuna
oqaatigaarput.
Ukiuni
kingullerni Namminersornerullutik Oqartussani kommuninilu atorfillit akornanni
isumaqatigiinnginnerit ingerlanneqartarsimapput, pingaartumik
atorfeqartitaanermut atugassarititaasut ilaatigut assigiinngissinnaasarnerat
tamatumani eqqarsaatigalugit.
Inatsisissamut
siunnersuummi ajornartorsiutaasartut illuatungeriit akornanni
aaqqiiffiginiarneqalernat Atassummit pissusissamisoortutut isigaarput,
pingaartumik Kommunini sulisussat pikkorissut ilaatigut
pissarsiariniartarnerat ajornakusoorsinnaasarmat atorfeqartitaanikkut
atugassarititaasut Namminersornerullutik Oqartussani pitsaanerusarnerat
tamatumani eqqarsaatigalugit.
Soorlu
isumaqatigiinniarnermi tunngavissat kommunini sulisunut tunngassuteqartut
suliarineqartarneranni KANUKOKA aamma Namminersornerullutik Oqartussat
suleqatigiinnerisigut pisartussatut oqaatigineqarmat, tamanna
alloriarnerussaaq pingaaruteqartoq, kommunimmi nammineeriartorneranni
sulisoqarnikkut taakkulu aningaasarsiaqartitaaneranni
ajunngitsorsiassaqartitaanerannilu ullutsinnut naleqqussaanissaq
pinngitsoorneqarsinnaajunnaarmat.
Taamaatullu
aamma isumaqatigiinniarnernut isumaqatigiissuteqarnernullu
siunnersuisoqatigiinngortussat katitigaanissaat eqqarsaatigalugit,
Namminersornerullutik Oqartussat kommunillu sinniisuutitassaasa
amerlaqatigiinnissaannik, kiisalu siulittaasutut suliassat KANUKOKA-p
sinniisuutitaanit ataavartumik isumagineqarnissaannik siunnerfeqarneq
nammaqatigiilluinnarluni siunnersuisarnissamik siunertaqartoq Atassummit
iluarisimaaratsigu matumuuna oqaatigaarput.
Atassummittaaq
maluginiarparput inatsisissamut siunnersuummut tunngatillugu KANUKOKA-p
Aningaasaqarnermut Pisortaqarfiup isumaqatiginninniarnermut
immikkoortortaqarfiani sulisuusut amerlassusiligaanerat sullissisinnaanerallu
ajornartorsiutaasoq uparuarsimammagu, ilaatigut kattuffiit
isumaqatigiissutillu amerliartornerannik tamanna kinguneqartoq
oqaatigineqarmat paasilluarsinnaagatsigu, suliassat isumaqatigiinniarnermut
tunngasut peqqissaartumik suliarineqartarnissaannut sulisussat pikkorissut
naammattullu sulisorineqartariaqartut Atassummit isumaqarfigigatsigu.
Atassummittaaq
isumaqarpugut aaqqissuussineq nutaaq Namminersornerullutik Oqartussani
kommuninilu sulisoqarnermut taakkununngalu atugasarititaasunut tunngasut
isumaqatigiinniutigineqartarnissaat taamak pingaaruteqartigisut, pikkorissunik
naammattunillu sulisoqarnissaq Atassummit assut pingaartikkipput, tamannalu
anguneqassappat aamma aningaasanik naleqartussaasoq takusinnaavarput.
Taamaattumik aningaasartuutissat 2003-mut ataatsimoortumik tapiissutissat
isumaqatigiinniutigineqarnissaannut qulakkeerneqarnissaat Atassummit
piumasaraarput.
Inatsisissamut
siunnersuut suliarilluagaasutut Atassummit nalilerlugu annertunerusumik
oqaaseqarfiginagu tamakkiisumik taperserparput, aappassaaneerneqartinnaguli
inatsiseqarnermut ataatsimiititaliami nalilersoqqissaarneqarnissaanut
suleqataassaagut. Qujanaq.
Paninnguaq
Olsen, Inuit Ataqatigiit oqaaseqartuat.
Inuit
Ataqatigiit nuannaarutigaarput 1999-imi KANUKOKA-p Naalakkersuisunut Kalaallit
Nunaanni Namminersornerullutik Oqartussani kommuninilu
aningaasarsiaqartitsinerup atorfeqartitsinerullu iluini
isumaqatigiinniartarnerit pillugit Inatsisartut inatsisissaattut
siunnersuuteqarnissaannik kissaateqarsimanerat, naammassillugu ersarissumik
paasinartumillu Naalakkersuisut saqqummiussaqarnerat.
Inatsisissakkut
siunertarineqartup kommunit annertunerusumik isumaqatigiinniartarnernut
sunniuteqaqataatinneqarnerulernissaasa anguneqarnissaat qularnaarneqassammat
pitsaasutut Inuit Ataqatigiit isigaarput.
Siunnersuullu
tamakkiisumik tapersersoratsigu matumuuna nalunaarutigissavarput. Inuit
Ataqatigiinnilli qulakkeerusupparput paaserullutigulu
aningaasarsiaqartitsinikkut atorfeqartitsinikkullu atugassarititaasut
eqqarsaatigalugit, kommuninut akissaatikinnerusunut tamanna qanoq
kinguneqassanersoq.
Taamak
naatsumik oqaaseqarluta Inatsisissatut siunnersuut aappassaaneerneqartigani
Ataatsimiititaliami susassaqartumit sukumiisumik suliarineqarnissaa
inassutigaarput.
Mogens
Kleist, Kattusseqatigiit oqaaseqartuat.
Aningaasaqarnermut
Naalakkersuisup saqqummiussaa ukiorpassuarni kommuniniit
aakkartorneqartarsimasoq kiisami aaqqiivigineqarnialernera Kattuseqatigiinniit
nuaannaarutigaarput.
Ullumikkummi
atorfinitsitsiniarnermi najoqqutaasartut ersarissumik immikkoortitsinerit
takusinnaagatsigu. Tassalu kommunini sulisussarsiornermi najoqqutassat
malillugit akissarsiatigut assigiinngitsut annertoreeqimmata.
Namminersornerullutik
Oqartussani sulisut kommunini sulisunut sanilliullugit akissarsiaaat
nikingaqaat, aammattaaq Namminersornerullutik Oqartussat suliffeqarfissuanni
sulisunut akissarsiaritinneqartartut taamatuttaaq illutik.
Ullumikkummi
oqartariaqarpugut ilaatigut kommunini ilinniartutut inissisimasut
naammassereeraangamik Namminersornerullutik Oqartussanut nuullutik
suliffittaartarmata. Tassanilu toqqammaviit annerpaat ilagaat akissarsiat
annertussusiat.
Kommuninit
ullumikkut annertunerusumik akissarsiaqartitsinerup tungaatigut
unammillersinnaanngillat Namminersornerullutik Oqartussanut sanilliullugit.
Taamaammat
Kattusseqatigiinniit nuannaarutigaarput ullumikkut inatsisissamut siunnersuut
saqqummiunneqarmat. Aammattaaq KANUKOKA-ip isumaqatigiinniartarnerni
periarfissarilissagaat pissangalluta Kattusseqatigiinniit oqaatigerusupparput.
Siunissarlu
ungasinnerusoq isigalugu oqaatigissallutigu naligiinenrusumik
akissarsiaqartitsinikkut taassumalu malitsigisaasa aaqqiiviginiarneqarneri
nuannaarutigigatsigit.
Aammattaaq
kommuninut ataasiakkaanut nukittorsaasinnaaneri sulisoqarnikkut
naatsorsuutigigatsigu, taamasilluni sulisorpassuit ullumikkut kommuniniit
Namminersornerullutik Oqartussanut nuuttartut annertunerusumik
pakkersimaarneqarnissaat anguniarneqalissammat.
Ullumikkummi
kommunit akissarsiatigut nalimmaaffiginerisigut sulisut patajaatsut
pigineqalersinnaanissaat naatsorsuutigilluinnaratsigu.
Namminersornerullutik
Oqartussat suliffeqarfiutaasa aammattaaq sulisunik tigooraasarnerat
annertunerusumik pakkersimaartinneqalernissaat inatsisiliornikkut
nuannaarutigaarput.
Sulisussarsiornermi
assigiiaamik akissarsiaqartitsikkut sulisunut neqeroorutaasinnaasut saniatigut
piumasaqaatit sulisullu pitsaaqutissaat tunngaviulersinnaanissaat
naatsorsuutigilluinnaratsigit toqqammaviulerumaartut.
Nuannaarutigaarput
Kommunit Kattuffiat annertunerusumik suleqatigilerneratigut
isumaqatigiinniartarnerit ingerlanneqalissammata kommuninut
attuumassuteqartuni, taamaalilluni oqartussaaqataaneq annertunerusoq
anguneqarsinnaassammat.
Taamatut
naatsumik oqaaseqarluta Kattusseqatigiinniit siunnersuut akuersaarlugu
oqaatigissavarput, suliassarlu ataatsimiititaliamut attuumassuteqartumut
aappasssaaniinnginnerani innersuussutigissallugu.
Qujanaq.
Otto Steenholdt, attaviitsoq.
Soorunami amigaatigineqarluinnarsimassappat tamanna inatsiliuullugu pisariaqassaaq, taamaattumik uanga taanna inatsisiliassaq tusaatissatut tiguara, aammali ingerlatsinermut aningaasartuutinik amerliartuinnartunik nuannarisaqannginnama oqaatigilluaannassavara, ajunngilaq ingerlatsinermut aningaasartuutit suli amerlissutissaat akuerissavarput.
Augusta Salling, Aningaasaqarnermut Naalakkersuisoq, Atassut.
Qujanaq. Naalakkersuisut sinnerlugit saqqummiussannut partiit, Kattusseqatigiit, attaviitsullu aappaata tapersiinerat qujassutigaara.
Taava Inuit Ataqatigiinninngaanniit apeqqutigineqartoq sumut tunngatillugu, tassa Inuit Ataqatigiit aperipput qulakkeerusullugu paaserusullugulu aningaasarsiaqartitsinikkut atorfeqartitsinikkullu atugassarititaasut eqqarsaatigalugit kommunit akissaatigikkinnerusut taakkununnga qanoq kinguneqassanersoq, tamanna aaqqissuussineq.
Tassani oqaatigisariaqarpara taamatut aningaasarsianik isumaqatigiinniarnermi soorunami kommuninut assigiimmik tuttussaavoq, immikkut kommunit mikinerusut atorfilittaanut immikkut isumaqatigiinniussisarnissaq taanna naatsorsuutigineqarsinnaanngilaq.
Taamaattorli ullumikkut aamma atuutereerpoq kommunit akornanni akileraarutitigut nalimmassaaqatigiittarneq, taamaalilluni taanna aqqutigalugu kommunit mikinerusut ikiorserneqartarlutik.
Oqaatigisariaqarpara una taamatut allanngortitsinissamik imaluunniit kommunit sunniuteqarnerulernissaminik kissaateqarnerat toqqammavigalugu inatsisissaq siunnersuutaammat. Tassa kommunit kissaatigisimavaat isumaqatigiinniarnissami ullummikkorninngaanniit annertunerusumik oqaasissaqartitaanissartik, tamannalu tunngavigerpiarlugu tassa isumaqatigiinniarnerit ingerlasimapput, unalu anguneqarsimasoq tassa aningaasatigut kingunerisassai annikinnerutinniarlugit, naapeqatigiiffigineqarsimasoq una maani akuersaarneqarmat assut qujassutigaara.
Qujanaq.
Anders Andreassen, Inatsisartut Siulittaasuata tullia, Siumut.
Qujanaq. Tulliulluni oqaaseqaqqinniarpoq Siumut oqaaseqartua Mikael Petersen.
Taannalu tikitsinnagu oqaatigissavara tassa tassuugunnguaq immikkoortumut tullermut ikaarsaartussaagatta, kisiannili maani isersimasut amigarmata.
Mikael
Petersen, Siumut.
Manna
saqqumiunneqartoq iluatsillugu Siumuminngaannit aamma pinngitsoorsunngilagut
soorunami aningaasarsiat pillugit isumaqatigiinniartarnissani tulliuttuni
minnerunngitsumik kommunini sulisorisat pillugit isumaqatigiinniartarnissani,
eqqaamaqqusassatsinnik saqqummiussilaassalluta.
Tassa
tamanna naluneqanngilaq aamma tusagassiuutitigut ilaatigut
ungaserujussuanngitsukkut saqqumilaartinneqarpoq, nunatsinni Pisortani
sulisorisat qallunaat kalaallillu, tassa danskit maannga suliartorsimasut
aammalu kalallit akornanni naak suliat assigiikkaluartut, ilaatigut
akissaasersorneqarnikkut assigiinngitsumik pinnittoqartoq.
Tamannalu
tassa eqqartuussiveqarfinni sulisut aallaavigalugit saqqummiunneqarpoq, aamma
qularutiginngilluinnarpara assigiinngitsuni suliffeqarfinni aamma tamanna
pinngitsoorani atuutinneqassasoq. Taamaattumik naalakkersuisunut
kaammattuutigerusunnarpoq taamatut inissisimasoqarfiit assigiinngitsut
nalunaarsorneqartariaqartut, aamma paasiniaqqissaartariaqartut, tassami
ukiorpassuanngorput suliat assigiit akissarsiat assigiit taamatut
anguniagaqarneq ingerlalermat. Soorunami una allaavoq nunatsinni
pissaqanngikkaangatta sulisorisassanik, sulianut aalajangersimasunut taava
immikkut akilerlugit avataanniit tikisitsisarnerput, taanna allarluinnaavoq.
Kisianni nunatsinni sulisussaqaraluartilluni avataaniit tikisitsisarsimagaanni
taava soorunami assigiimmik sulianut assigiimmik akilersuinissaq taanna
avaqqunneqarsinnaanngilaq anguniartuassallugu.
Aamma
taamaagunaroq kommunit assigiinngitsut akornanni, tassa kommunit mikinerit
anginerillu, kommunit inuttussusaat naapertorlugit sulianut assigiinngitsunut
tapilersuisarneq ingerlanneqarpoq, naak suliat assigiikkaluartut kommunimi
mikinermi suligaanni anginermiluunniit suligaanni. Kisiannili inuttussuseq
aallaavigalugu tapit annertussusilersorneqartarlutik, tamanna
nalilersoqqittariaqarpoq, tassami suliat assigiit assigiimmik
akilerneqarnissaannik anguniagaqaraanni aamma tamanna atuutsittariaqarmat
kommunini assigiinngitsuni.
Aamma
nalunngilarput kommunit anginerugaangata taava aamma suliamut pineqartumut
sulisut sulisorineqartut amerlisarneqartarmata. Soorlu Isumaginninnikkut
Allattoqarffimmi pisortaq, kommunimi angisuumi sulisorpassuaqartarpoq
ikiortiminik, taavalu kommunimi mikinerusumi Isumaginninnikkut Pisortaq
ikinnerusunik ikiorteqartaluni inuttussuseq naapertorlugu. Tassa imaappoq
akisussaaffik assigiippoq isumaginninnikkut pisortaagaanni kommuni
mikinerusumi anginerusumiluunniit, suliassalli naammassiniarneqartarnerat
sulisut amerlassusaasigut aamma naammassiniarneqartarluni. Taamaattumik
taassuma ilanngullugu tapilersuisarnerup misissuiffigineqarnissaa Siumumiit
kaammattuutigissavarput.
Mogens
Kleist, Kattusseqatigiit.
Naalakkersuisup
oqaaseqaataanut qujassaagut. Una eqqumaffigissassatta ilagisussaassavaat tassa
KANUKOKA piumasaqaateqarsimavoq taamatut ullumikkut ajornartorsiutaasut
aaqqiivigineqarnissaannut, taamatut saqqummiinermi.
Namminersornerullutik
Oqartussaninngaanniit aamma eqqumaffigineqartussaassooq Kattuffiit
isumaqatigiinniartarnerannut tunngatillugu, tassa Namminersornerullutik
Oqartussat sinnerlugit isumaqatigiinniartartoqartuummat. Taavalu taassuma
tungaatigut kommunillu aammalu kattuffiit isumaqatigiinniarnissaannut qanoq
angusaqartoqarsinnaanissaa taanna tungitsinninngaanniit pissanngatigalugu
oqaatigissavarput. Ullumikkummi nalunngilarput aamma Mikael Petersen-ip
Siumumeersup taavaa kommunit anginerit massakkut periarfissaqareermata
aningaasaqarnertik toqqammavigalugu akissarsiatigut sulisuminnik pitsaasunik
Namminersornerullutik Oqartussanut unammillersinnaanertik tassuuna atormassuk.
Assersuutigisinnaavarput immaqa Nuup Kommunea, kommuni angisoorujussuuvoq.
Kisiannili
kommunit mikinerit sinerissamiittut taakku aamma Paninnguaq Olsen, Inuit
Ataqatigiinninngaanneersup taakkartugai, taakku aamma eqqumaffigisariaqarput
qanoq taassuma tungaatigut isumaqatigiinniartarnernut nalimmassaasinnaanerit
siunissaq ungasinnerusoq eqqarsaatigalugu ammaffigisariaqaratsigit.
Otto
Steenholdt-ip oqaatigisaa tassa aningaasartuutit imatut immaqa
qaffakkiartornissaanut taakkartuinera uanga taanna takusinnaanngilara, una
uani ersarimmat nalimmassaasinnaaneq taamatut sulisutigut sulisut taamatut
akissarsiaqarnerup tungaatigut aammalu sulliviup iluani pissutsit
assigiinngitsut toqqammavigalugit aaqqiivigineqarsinnaassammata.
Tassa
akissarsiatigut taanna annertuumik sunniuteqartuussaassooq immaqa siunissami
aggertumi, kisianni qanoq aaqqiisoqarsinnaanissaa taanna
eqqumaffigisariaqassavarput maani Namminersornerullutik Oqartussat
sinnerlugit isumaqatigiinniartartunut tunngatillugu.
Nammineq
uanga 1990-ikkut ingerlalaarnerani kommunini mikinerusuni
atorfeqarnikuusimavunga, Isumaginninnermi Pisortatut, taamatorluinnaq maani
Namminersornerullutik Oqartussat siunnersortitut sulisui konsulentit
uattorluinnaq akissarsiaqarsimapput, uffali akisussaaffik allaanerujussuusoq.
Taamaattumik tamakku assigiinngitsut aamma maannakkuminngaanniit
eqqumaffigisariaqarpagut akisussaaffiit assigiinngitsut toqqammavigalugit
nalimmassaasinnaanissat. Neriuutigaaralu isumaqatigiinniarnissani aammalu
Aningaasaqarnermut Naalakkersuisup oqaatigisaa toqqammavigalugu siunissami
taamatut aaqqiiniarsinnaanerit qanillattuisinnaanerat aammalu kommunit
ataasiakkaat oqartussaaffeqarnerminni annertunerusumik tigusiartornerat
eqqarsaatigissagutsigu natsorsuutigisinnaassagatsigu isumaqatigiinniartarnerit
ukiuni aggersuni immaqa aporfinnik assigiinngitsunik
saqqummertitsisinnaassammata, tassami kommunit eqqarsaatigissagutsigit taakkua
sulisui Namminersornerullutik Oqartussanut akissarsianut nalimmassassappata
taava pinngitsoorani pilliuteqartoqartussaassooq arlaatigut.
Qujanaq.
Paninnguaq
Olsen, Inuit Ataqatigiit.
Siullermik
Naalakkersuisup apeqquteqaatinnut akissuteqaataanut qujavunga.
Inuit
Ataqatigiinni uagut aamma pingaaruteqarluinnartutut isigivarput kommunini
ataasiakkaanut immaqa "kommunini peqarluartuni" sanilliullutik
aningaasaqarnikkut killeqarnerusumik ingerlatsisunut pingaaruteqartoq, taakkua
aamma inuussutissarsiornikkut ineriartortitsinerat eqqarsaatigalugu taakkua
anguniagaannut naapertuuttumik atorfinitsitsisarnissaq eqqarsaatigalugu
naligiikannersumik akissaateqarnerusunut pinnittarnissaq. Uani pigatsigu
inatsimmi uani atuutilersussami aamma pitsaasoq periarfissaareertussaammat
kommunit ataasiakkaat, imaluunniit ingerlatsisut ataasiakkaat namminneerlutik
inunnut ataasiakkaanut isumaqatigiinniarsinnaanissaat. Tassaniippoq kommuninut
minnernut unammillerneq annertooq kingumut pisinnaatitaaffeqarnerata
ersinnerat, taannalu uagut sillimaffigineqarnissaa pingaartikkatsigu taamatut
apeqquteqarpugut.
Isumaqarpugut
kommunit aamma minnerusut aningaasaatikinnerugaluarlutik
ineriartortitsinissaminnut periarfissaqartitaanertik pitsaanerusumik
illersorneqarsinnaaqqullugu atorfinnik pitsaasunik akissaatinik pitsaasunik
angusaqarnissartik aamma ilungersuutigisaraat. Taamaammat taakkua aamma
eqqumaffigeqqissaarneqartariaqarput.
Anders
Andreassen, Inatsisartut Siulittaasuata tullia, Siumut.
Tulliullunilu
akissuteqaqqissaaq Aningaasaqarnernut Naalakkersuisoq.
Tassa
eqqaassutigeqqissavara Inatsisartunut ilaasortanut maani inersuarmiinngitsunut,
tassa suli amigaratta, oqaluuserisassamut tullermut ikaarsaariarnissamut
tassuugunnguaq taanna pissaaq.
Augusta
Salling, Aningaasaqarnermut Naalakkersuisoq, Atassut.
Oqaaseqartunut
kingullernut oqaasiinut qujassuunga, aamma erseqqissaassutigissavara una
KANUKOKA-p nammineerluni kissaatigisaraa taamatut isumaqatigiinniartarnermi
nammineq sunniuteqarsinnanini allisarneqassasoq. Tamatumuunalu
aningaasartuutaanerusussat soorunami KANOKOKA-mut isumaqatigiinniarnermi
aaqqinneqartussaapput.
Taavalu
aamma taamatut KANUKOKA-p isumaqatigiinniartarnermi nammineq aallaavissanik
annertuumik sunniuteqalernermigut, qanoq annertutigisumik
isumaqatigiinniarnerit aningaasartalerneqarnissaanut aallaavissanik naammineq
siunnersuuteqaqataasalernermigut, taava soorunami nammineq soqutigisassaraa
aamma ilaasortami kommunit mikinerusut aamma atugassarisassaat mianeralugit,
sinaakkutissanik saqqummiussisarnissani.
Taamaattumik
uanga isumaqarpunga ernumagisariaqanngitsoq naatsorsuutigisariaqaratsigu
KANUKOKA-p nammineerluni soorunami tamanna eqqummaariffigissagaa.
Qujanaq.
Anders
Andreassen, Inatsisartut Siulittaasuata tullia, Siumut.
Qujanaq.
Tassa
taamaalilluni ullumikkut oqaluuserisassaq immikkoortoq 10, tassalu Kalaallit
Nunaanni Namminersornerullutik Oqartussani kommuninilu
aningaasarsiaqartitsinerup atorfeqartitsinerullu iluini
isumaqatigiinniartarnerit isumagineqarnerat pillugu Inatsisartut
inatsisissaattut siunnersuut,