Kalaallit Nunaanni Inatsisartut

Oqaluuserisassani immikkoortoq 14-3

Ataatsimiinnerit Tilbage Op Nęste
Siullermeerneqarnera Aappassaanneerneqarnera Pingajussaaneerneqarnera

Ullut ataatsimiiffiusut arfersaneq pingajuat, ataasinngorneq majip 13-iat 2002, nal. 13.00

Oqaluuserisassaq immikkoortoq 14

Umiarsualivimmiinnermut akileraarutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut.

(Aningaasaqarnermut Naalakkersuisoq)

(Pingajussaaneernera)

 

Tassani Aningaasaqarnermut Naalakkersuisoq saqqummiissaaq.

 

Augusta Salling, Aningaasaqarnermut Naalakkersuisoq, Atassut.

Qujanaq. Siunnersuut aappassaannerlugu oqaluuserineqarnerni Inatsisartunit tamanit isumaqatigineqarluni taperserneqarpoq. Tamanna tunngavigalugu Naalakkersuisut sinnerlugit inassutigissavara siunnersuut isikkumisut iluseqarluni akuerineqassasoq. Qujanaq.

 

Daniel Skifte, ataatsimiinnermik aqutsisoq, Inatsisartut siulittaasuat, Atassut.

Apeqqutigissavara oqaaseqarumasoqarnersoq. Naamik. Taavalu taamaalilluni taasineqassaaq.

 

Inatsisartut isumaqatigiissut aappassaaneerneqarnerani siunnersuummut tapersiipput. Naalakkersuisut taanna tunngavigalugu aamma taamatut isikkoqarluni inatsisissap akuerinissaa inassutigaat. Allannguutissanik siunnersuuteqartoqanngilaq. Taamaattumik taamatut isikkoqarluni iluseqarluni akuersissutigineqarnissaa taasissutigineqassaaq.

 

Maannakkut apeqqutigissavara kikkut siunnersuummut isumaqataanersut. Taakkulu qinnuigissavakka nikueqqullugit. 29.

 

Taavalu apeqqutigissavara siunnersuummut akerliusut nikueqqullugit. Soqanngilaq. Imaluunniit isumaqataanatilluunniit imaluunniit isumaqataasut siunnersuummut. Soqanngilaq. Taamaalilluni Inatsisartut inatsisissaat umiarsualivimmiinnermut tunngasoq akuersissutigineqarpoq.