Oqaluuserisassani immikkoortoq 16-2 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut aqqaneq tallimaat, ataasinngorneq 6. maj, nal. 13.35
Hans Enoksen,
Aalisarnermut, Piniarnermut Nunaqarfinnullu Naalakkersuisoq, Siumut.
Inatsisartut
aalisarneq pillugu inatsisaannut allannguutissatut Inatsisartut inatsisissaattut
siunnersuut pillugu saqqummiineq aammalu Aalisarnermut, Piniarnermut
Nunalerinermullu Ataatsimiititaliat isumaliutissiissutaanut akissuteqaat.
Inatsisartut
aalisarneq inatsisaannut allannguutissaannut Inatsisartut inatsisissaattut
siunnersuut Naalakkersuisut sinnerlugit saqqummiutissavara.
Siunnersuutip
siullermeerneqarnerani kalaallisuuata kukuneqarneranik allannguutissatut
siunnersuuteqarneq pissuteqarpoq. Kukkunerit taakku iluarsiniarluarlugit
inatsisissatut siunnersuutip misissornerani oqaatsit atorneqartut ilai
iluarsineqarput. Inatsisissatut siunnersuutip 12. April 2002-mik
ullulerneqarsimasup qallunaatuua allanngortinneqanngilaq.
Inatsisartut
Aalisarnermut, Piniarnermut Nunalerinermullu Ataatsimiititaliaata
isumaliutissiissutaa Naalakkersuisut tiguvaat, taannalu ataatsimiititaliap
sukumiisumik sulereernerata kingorna saqqummiunneqarpoq, tamassuma ataani uanga
naalakkersuisoqarfinnut apeqquteqartoqarsimalluni.
Aalisarneq
pillugu inatsisip §5 imm. 3-anut allannguut pillugu, ataatsimiititaliap
apeqqutaanut akissuteqarnera tunngavigalugu ataatsimiititaliap isumaqataanera
Naalakkersuisut iluarisimaalugu malugaat.
Aalisarneq
pillugu inatsimmi §10a-mut allannguut pillugu Naalakkeruisut aamma
iluarisimaarlugu malugaat ataatsimiititaliaq isumaqartoq ilaatigut
kapisilinniarnermik toqqissisimanartumik aaqqiisarnissanik aalajangersakkap
Naalakkersuisut periarfissaqartilissagaat.
Aalisarneq
pillugu inatsimmi 22a-mut allannguut eqqarsaatigalugu Naalakkersuisut malugaat
siunnersuutip qulliunerusumik siunertaa ataatsimiititaliap isumaqatigigaa.
Kisiannili
ataatsimiititaliaq isumaqarpoq siunnersuut ajornartorsiutinik tunngaviusunik
pilersitsisoq, tamannalu tunngavigalugu uannut apeqquteqarnikkuulluni.
Akissutikka
ataatsimiititaliap tusaatissatut tiguai, kisiannili isumaqarluni
tunisassiorfiit pioreersut matuneqarneranni namminersortut tigusisinnaanerisa
pinngitsoortissinnaanerannut aalajangersakkap atorneqannginnissaata
qulakkeernissaa pingaaruteqartoq.
Ataatsimiititaliaq
aammattaaq isumaqarpoq nunami tunisassiorfinnik pilersitsiniarnermi
imaluunniit tunisassiorfiit allangortinniarneranni suliamut tunngassuteqartut
tusarniaavigineqartarnissaat pingaaruteqartoq. Ataatsimiititaliap tikkuarpaa
tassani minnerunngitsumik nunap immmikkoortuani kommunit, sulisartut
sulisitsisullu kattuffii aammalu Unammilleqatigiinnermut Siunnersuisoqatigiit
tusarniaavigineqartassasut.
Tamanna
tunngavigalugu ataatsimiititaliap Naalakkersuisut kajumissaapai
allannguutissatut siunnersuummik saqqummeeqqullugit.
Soorlu
siunnersuutip siullermeerneqarnerani saqqummiininni oqaatigigiga, aalisarnerup,
tunitsivinnik periarfissat aammalu sulisoqarniarnerup ataqatigiissarnerisigut
aalisarneq pillugu politikkip imminut ataqatigiissumik ingerlannissaata
qulakkeerneqarnissaa aalajangersakkami siunertarineqarpoq, taamaalilluni
inuussutissarsiornermi atugassaat pitsaanerpaanissaat siunertarineqarluni.
Tunisassiorfinnik
matuneqartunik namminersortut tigusisinnaanissaasa pinngitsoortinnissaat
imaluunniit unammilleqatigiissinnaanerup allatigut killilersimaarneqarnissaa
siunertarineqanngilaq.
Naalakkersuisut
ataatsimiititaliatulli isumaqarput tunisassiiorfinnik pilersitsiniarnermi
imaluunniit allanngortiteriniarnermi akuersissuteqarnissamut atatillugu
suliamut attuumassuteqartut tusarniaavigineqartarnissaat pingaaruteqartoq.
Aalajangersakkap
siunnertaata imaluunniit kikkut tusarniaavigineqartassanersut inatsimmut
allassimanissaat Naalakkersuisut pissusissamisoortutut isiginngilaat,
tassungalu taarsiullugu siunnersuutigalugu siunertap aammalu
tusarniaavigineqarsinnaasut siunnersuummut oqaaseqaatinutilanngunneqarnissaat,
soorlu tamanna oqaaseqaatinut ilanngussani takuneqarsinnaasoq.
Naggataatigut
oqaatigineqassaaq siunnersuummi §22a imm. 2 malillugu tunitsivinnik
tunisassiorfinnillu nutaanik pilersitsiniarnerit aammalu pioreersunik
allannguiniarnerit pillugit annertunerusumik malittarisassiornissamut
pisinnaatitsisoqartussaasoq. Tamanna nalunaarusiornikkut Naalakkersuisut
piviusunngortinniarpaat, taannalu tassaavoq assersuutigalugu
tusarniaavigineqartartussanik annertunerusumik aalajangersaaviusinnaasoq.
Aalisarneq
pillugu inatsisip § 32-anut allannguut eqqarsaatigalugu aamma Naalakkersuisut
iluarisimaarlugu malugaat pisortaqarfiup Aalisarnermut Siunnersuisoqatigiinnut
ilaasortaajunnaarnissaa ataatsimiititaliap isumaqatigigaa.
Kisiannili §
32 imm. 3-mi allassimasoq Aalisarnermut Siunnersuisoqatigiit ataatsimut
Naalakkersuisunit tusarniaavigineqarsinnaanerisa saniatigut ilaasortat
ataasiakkaarlugit tusarniaavigineqartarsinnaaneri pillugu ataatsimiititaliaq
oqaaseqaateqarpoq. Ataatsimiititaliap pingaartippaa Aalisarnermut
Siunnersuisoqatigiit tamarmik tusarniaavigineqartarnissaat imaalinagulu
ilaasortat ataasiakkaaginnaat tusarniaavigineqarlutik allallu
tusarniaavineqaratik.
Tamanna
tunngavigalugu allannguutissatut siunnersuummik saqqummiinissamik
ataatimiititaliap Naalakkersuisut kajumissaarpai.
Inatsisartut
siunnersuummut oqaaseqaatini allassimavoq imm. 3-mi siunnersuutigineqartoq
Aalisarnermut Siunnersuisoqatigiinnut tusarniaaneq ilaasortanut ataasiakkaanut
tusarniaanikkut aamma pisinnaasoq. Aalisarnermut Siunnersuisoqatigiinni
ilaasortat ataasiakkaat tusarniaavigineqartarissaat allallu tusarniaaviginagit
Naalakkersuisut siunnertarinngilaat, kisiannili pisuni ataasiakkaani
ilaasortat tamaasa ataasiakkaarlugit tusarniaavigineqarsinnaaneri uani
pineqarpoq.
Nalunarnissuteqartoqarsinnaanera
pinngitsoorniarlugu tamanna siunnersuummut oqaaseqaatinnut ilanngunneqarpoq,
soorlu oqaaseqaatinnut ilassutini saqqummiunneqartuni takuneqarsinnaasoq.
Tamassuma
kinguneranik inatsisissamut siunnersuummut allannguutissanik siunnersuutinik
saqqummiisoqarnissaa Naalakkersuisut pisariaqartutut isiginngilaat.
Taamatut
oqaaseqarlunga siunnersuutip aappassaaneerneqarnissaa Inatsisartunut
suliassanngortippara. Qujanaq.
Daniel
Skifte, ataatsimiinnermik aqutsisoq, Atassut.
Naalakkersuisut
ilaasortamut qujavugut. Taava maanna partiit Kattusseqatigiit Attaviitsullu
oqaaseqartuinullu nuuppugut. Siulliulluni oqaaseqassaaq Lars-Karl Jensen
Siumut.
Lars-Karl
Jensen, Siulittaasup tulliata pingajuat, Siumut.
Uumap suliap
12. april 2002-mi oqaaluuserineqarnerata kingornatigut Inatsisartut
Aalisarnermut, Piniarnermut Nunalerinermullu ataatsimiititaliaata
isumaliutissiissummik suliaqarneranik ataatsimiititaliap isumaqatigiissuk § 32
imm. 3-mi tusarniaasussaanermut tunngasumi uperuaanermini pingaartillugu
tikkuarpaa aalajangersakkami pineqartumi tunngasunik sulianik
tusarniaasasoqartillugu Aalisarnermut Siunnersuisoqatigiit tamarmiusup
tusarniaaffigineqartarnissaat.
Naalakkersuisup
akissuteqaataani taaneqarpoq pisuni ataasiakkaani ilaasortat tamaasa
ataasiakkaarlugit allakkatigut oqarasuaatikkulluunniit
tusarniaaffigineqarsinnaaneri uani pineqartut.
Siumumiit
paasilluarsinnaavarput suliassani ataasiakkaani susassaqartunut tamanut
tusarniaaneri allakkatigut ingerlanneqartarpata. Siumumiilli isumaqarpugut
aalajanersakkamut attumasunik sulianut allannguutissanik
suliassaqartuartillugu tusarniaanerit Aalisarnermut Siunnersuisoqatigiinnut
tamarmiusunut ingerlanneqartariaqartut.
Siumumiit
taamatut oqaaseqarluta Inatsisartut Aalisarnermut Piniarnermullu
ataatsimiititaliaata inassutigisaattut ilusilerlugu akuersissutiliornissaat
taaseqataaffigissavarput.
Daniel
Skifte, ataatsimiinnermik aqutsisoq, Atassut.
Lars-Karl
Jensen qutsavigaarput. Tulliulluni oqaaseqassaaaq Finn Karlsen Atassut.
Finn
Karlsen, Atassutip oqaaseqartua.
Qujanaq.
Aalisartut
pillugit Inatsisartut inatsisaattut allannguutissatut siunnersuut
siullermeeratsigut Atassumiit tamakkiisumik akuersaaratsigut annertunerusumik
oqaaseqarnata siullermeerinninnermi ataatsimiititaliami
suliassiisutigineqarnerani eqqarsaatigeqqullugu innersuusuterput
ataatsimiititaliami ilassilluarneqarsimammat tungitsinniit nuannaarutigalugu
oqaatigissavarput.
Tassami
nunami suliffissuit siunertanut allanngortinneqartillugit imaluunniit nutaanik
pilersitsiniartoqartillugu Naalakkersuisut kisimik akuerseqqaartarnissaannut
piumasaqarnerit.
Susassaqartut
kisimik soorlu kommunit namminerlu aallartitsiniartut
paasiniaaffigeqqaartarnissaannut tunngasut. Tamanna ataatsimiititaliap
soqutigalugu oqaluusereerlugit Naalakkersuisut pingajussaaneerinninnissamut
allannguutissamik siunnersuusioqqullugit piumaffigimmassuk, Atassummiit
iluarisimaarparput.
Aammalu
aappaattut tassalu tusarniaasarnermut tunngasoq ataatsimiititaliap
oqaluuserinnereerluni Naalakkersuisunut kaammattsuuteqarput
pingajussaaneerinninnissamut allannguutissami siunnersuusioqqullugit,
Siunnersuisooqatigiit ataatsimoortillugit tusarniarneqartarnissaaannut
imalimmik.
Ataatsimiititaliap
taamatut Naalakkersuisunut inassuteqarnerat Atassummiit taperserparput.
Naggataatigut
ataatsimiititaliaq qutsavigissavarput Inatsisartut inatsisissamut
tunngatillugu Inatsisartut suliassiissutaat pitsaasumik suliarisimammassuk.
Taamatut
naatsumik oqaaseqarluta Ataatsimiititaliap isumaliutissiissutaa tamakkiisumik
isumaqatigalugu Atassumiit taaseqataaffigissavarput.
Pingajussaaneerneqartinnagulu Ataatsimiititaliami suleqataaffigeqqissallugu.
Daniel
Skifte, ataatsimiinnermik aqutsisoq, Atassut.
Finn Karlsen
qutsavigaarput. Tulliulluni oqaaseqassaaq Lars Sørensen Inuit Ataqatigiit.
Lars Sørensen,
Inuit Ataqatigiit oqaaseqartuat.
Qujanaq.
Inuit Ataqatigiit Inatsisartut Aalisarnermut, Piniarnermut Nunalerinermullu
Ataatsimiititaliaata isumaliutissiissutaata manna tamakkiisumik
tapersersorparput. Tassanngiillu inatsisissatut siunnersuummut atatillugu
allannguutigeqqullugit kaammattuutigineqartut tunuliaqqutsersussallugit.
Naalakkersuisut
inatsimmut allannguutissatut siunnersuutaanni §22a-mi nutaamik
aalajangersagaliorniarneq ataatsimiititaliami ilaatigut sussaqartunut
assigiinngitsunik tusarniaareerluta ippinnartoqartinneqarpoq.
Aalajanersagassatummi siunnersuutaasoq kommunit namminersortut aalisartut,
sulisartut allallu tunisassiorfinnik pioreersunik
ingerlatsilerusussinnaanerannut killiuliuallaartut Inuit Ataqatigiit
naliliiffigisimavarput unammilleqatigiilluni ingerlatitsinissamut aamma
akornutaasinnaasoralutigut.
Tamanna
kikkulluunniit soqutigisinnaanngilaat tassami Inatsisartuni pisortat
kisimiillutik isumalluutigineqartuarnissaat qasseriarlutamita
pisariaqanngitsoq eqqartortarsimavarput, aamma aalisakkeriveqarnerup
tungaatigut.
Tassami
Inuit Ataqatigiit upperivarput Royal Greenland kisimi tamakkununnga
ingerlatsiuaannarsinnaanngitsoq, kisimilu ingerlatsiuarsinnaasariaqanngitsoq.
Taamaattumik Inuit Ataqatigiit naatsorsuutigivarput Naalakkersuisut tassunga
naapertuuttumik kingusinnerpaamik pingajussaaneerisoqartinnagu
allannguutissamik siunnersuuteqarumaartut, ataatsimiititaliap
kaammattuuteqarnera aamma malillugu.
Taamatuttaaq
aalisarnermut siunnersuisooqatigiit pillugit Naalakkersuisut allannguutissamik
saqqummiuusseqqullugit ataatsimiititaliamiit kaammattorneqarmata, Inuit
Ataqatigiit tamanna pissusissamisoortutut isumaqarfigaarput, tassami
Aalisarnermut Siunnersuisooqatigiinni ilaasortat ataasiakkaarlugit
tusarniaavigilerneqartarnissaat aqqutissiuunneqassappat tamanna
eqqarsarnartoqartipparput aaliangersakkap atornerlunneqaratarsinnaanera aamma
aarlerinarsinnaammat. Taamaattumik tamanna pinngitsoortinniarumallugu
ataatsimiititaliap kaammattuutigisaa tamakkiisumik tapersersorparput.
Taamatullu
oqaaseqarluta Aalisarnermut, Piniarnermut Nunalerinermullu Ataatsimiititaliap
isumaliutissiissutaa taamatullu kaammattuutigisai tamaasa aamma ilanngullugit
Inuit Ataqatigiit akuersaarpagut, tamannalu najoqqutaralugu taasissalluta.
Daniel
Skifte, ataatsimiinnermik aqutsisoq, Atassut.
Lars Sørensen
qutsavigaarput. Tulliulluni oqaaseqassaaq Mads Peter Grønvold
Kattusseqatigiit.
Mads Peter Grønvold, Kattusseqatigiit oqaaseqartuat.
Kattusseqatigiinniit siullermeerneqarneranut oqaaseqaatigut unnersuussutigalugit imatut aappassaaneerneqarnerani oqaaseqassuugut.
Aalisarnermut Ataatsimiititaliap susassaqartunut tusarniaanermini paasisai Kattusseqatigiinniit iluarisimaarpagut. Taamatut tusarniaasarnerit takutippaat qanoq pingaaruteqartigisoq susassaqartut tamarmik tusarniarneqartarnissaat.
Kattusseqatigiinniit isumaqarpugut sinerissap avataani aammalu sinerissap qanittuani pisassiissutit iluanni aalisarfiit allanngortinneqaraangata aatsaat inatsisiliornikkut pineqartut iluarsineqartarnissaat. Kattusseqatigiinniit isumaqaratta Naalakkersuisut nalunaarusiornerinnaatigut periarfissiisoqartassanngitsoq. Qaammatini kingullerni avataasiorlutik kattuffiata ilaatigut piumasaraa sinerissap qanittuani aalisarfiit ilaannut ammaanneqarnissartik, taamatullu periarfiissiisoqassappat Kattusseqatigiinniit akuersaarsinnaanngilarput. Tassami Kattusseqatigiinniit isumaqaratta maannakkut sinerissap avataani aalisarfiit ajunngilluinnartut.
Manna iluatsillugu Kattusseqatigiinniit Naalakkersuisunut apeqqutigerusupparput sinerissap qanittuani raajarniarnerup akilersinnaanerusumik ingerlanneqalernissaannut tunngatillugu, angallatit anginerusut maannakku aalisarfioreersumi aalisarnermik ingerlatsisiniarneqarnersut?
Assersuutigalugu Qeqertarsuup tunuani raajarniarnermi ilaatigut illoqarfiit saanni raajarniarneq ingerlanneqartarmat Kattusseqatiigiinniit Naalakkersuisunut apeqqutigerusupparput qanoq iliorlutik piujuaannartitsinissaq illersorniarneqarnersoq, Naalakkersuinikkut illersorniarneqarnersoq.
Tassami maannakkut suli eqqartorneqanngimmat sinerissap qanittuani angallatit anginerusut ilaat atorneqalerpata sumi raajarniartalernissaat.
§ 22 imm. 1-mut tunngatillugu Kattusseqatigiinniit isumaqarpugut namminersortut tunisassiorfinnik pilersitsiniartut periarfissinneqartarnissaat pinngitsoorneqarsinnaanngitsoq. Soorlumi inatsisitigut suliffissanik nutaanik pilersitsiniartut killilersorneqarsinnaanngitsut.
Tusarniaanermi Royal Greenland A/S-imi aammalu Polar Seafood-imi oqaatigineqarpoq immikkut Naalakkersuisut akuersissuteqaqqaartarnissaat naleqquttuunngitsoq, taamaattumik immikkut Naalakkersuisut akuersissuteqartarnissaannut piumasaqaat Kattusseqatigiinniit tunuarteqquarput.
§ 32 imm. 3-mut tunngatillugu Kattusseqatigiinniit isumaqarpugut susassaqartut tamarmik tusarniaavigineqartarnissaat piumasaaqaatigineqartariaqartoq, tassami pingaaruteqarmat susassaqartut naammattumik tusarniaavigineqartarnissaasa qulakkeerneqarnissaat.
Taamaattumik Kattusseqatigiinniit Naalakkersuisunut kaammattuutigissavarput tusarniaanermut tunngatillugu susassaqartut tamarmik tusarniarneqartarnissaannik inatsit piumasaqaateqartariaqartoq.
Naggataatigut Kattusseqatigiinniit eqqarsarnartoqartipparput nunami suliffissuit ukiuni kingullerni matoorarneqarnerisigut sinerissap qanittuanut raajarniarnermik pisassat tamakkerneqanngitsoornissaat. Piffissami kingullermi sinerissap qanittuani raajarniarlutik aalisartut tunitsivitsigut annertuumik ajornartorsiortinneqarput. Taamatullu tunitsivitsigut aalisatut ajornartorsiortinneqarnerat aatsaat eqqartorneqalinngilaq, tassami Naalakkersuisunit naluneqanngimmat aasaanerit tamaasat aalisartut tunitsivitsigut ajornartorsiortinneqartartut.
Kattusseqatigiinniit isumaqarpugut aalisartut tunitsivitsigut ajornartorsiutaat iluarsiivigineqassappata nunami suliffissuit pineqartut ilaannut najummassarneqartariartut. Aatsaammi taamaaliornikkut aalisartut tunitsivitsigut ajornartorsiuteqarnerat unitsinneqarsinnaammat.
Illuatigut Kattusseqatigiinniit isumaqarpugut nunami suliffissuarnik matusinermi Naalakkersuisut ilaatigut puigortaraat aalisartut tunitsivitsigut ajornartorsiuteqalersinnaanerat. Soorlumi ulluni kingullerni taamatut aalisartut tunitsivitsigut annertuumik ajornartorsiortinneqartut.
Taamatut oqaaseqarluta naak oqaatigineqartut tamarmik pineqartumut tunngassuteqanngikkaluartut, periarfissat maanna iluatsillugu Kattusseqatigiinniit taamatut oqaaseqarluta suliassap pingajussaaneerneqannginnerani pineqartumut attumassuteqartut iluarsineqarnissaannut piumasaqaatigaarput.
Daniel Skifte, ataatsimiinnermi aqutsisoq, Atassut.
Mads Peter Grønvold qutsavigaarput. Taavalu Aalisarnermut Naalakkersuisoq maannakkut akissuteqassaaq.
Hans Enoksen, Aalisarnermut, Piniarnermut Nunaqarfinnullu Naalakkersuisoq, Siumut.
Qujanaq. Naalakkersuisut innersuussutaat malugaara Aalisarnermut Ataatsimiititaliami ilaatigut tamakkiisumik tapersersorneqanngitsoq, kisianni isumaqarpunga taamatut illua tungereersumi saqqummiineq paatsooqatigiinnermik tunngaveqartoq taannalu aaqqinneqartariaqartoq.
Tassa tusarniaasarnermut tunngatillugu siunertarinertarineqanngilluinnarpoq ilaasortat ataasiakkaat aammalu ilaannai tusarniaaffigineqartarnissai, kisiannili assersuutigiinnarlugu angalaniarnerit pissutsit imaaliallaannaq aaqqinneqarsinnaannginnerini tusarniaasarnerit taakku atorniarneqarput, tassa ilaasortat ataasiakkaarlugit attavigisarlugit taavalu taakku tusarniaanerit ataatsimoorteriarlugit aamma soorunami nalilersuinerit tassani inerneqartartussaapput.
Isumaqarpunga tassuunga paatsooqatigiinneq aaqqinneqartariaqartoq, tassa siunertarineqanngilluinnarpoq Naalakkersuisut kisermaassillutik allatigulluunniit tassani isertuussiniarnermi tunngaveqartoq. Taanna taamaanngilluinnarpoq tassa paatsooqatigiilaarnermi pissuteqannguatsiarpoq Ataatsimiititaliap Naalakkersuisullu akornanni.
Tassa una inatsisissaq saqqumiunneqartussanngormat sioqqullugu Aalisarnermut Ataatsimiititaliaq attavigivara inatsisissat saqqummiunneqarnissaanut arlaannik paasiumasaqarunik, paatsuungasaqarunik isumasioqatigiinnissamut tunngasumik neqeroorfigalugu, ajoraluartumilli taamatut neqerooruteqarnerput Naalakkersuisoqatigiiffimminngaanniit ataatsimiititalimit akineqanngitsoorpoq massakkumut.
Taamaalilluni taakkua paatsuungassutigineqartut aamma pinngitsoorneqarsimasinnaagaluarput.
Tassa Naalakkersuisut siunnersuuteqalersaanngilagut allannguutissami uani, massakkut atuuttoq. Tassa imaappoq atuuttussatut siunnersuutigisarput tusarniaanermi pissutsit ilaasortat ataasiakkaarlugit, imaaliallaannaq tikissinnaannginneri attavigineqartarnissaat, taavalu tusarniaanermi ataatsimoorteqqissaarlugit taakku aallaavigineqartassasut. Tassa siunertarineqarpoq ataatsimoortilluinnarlugit taakku naammassineqartassasut. Aamma tusarniagassa tamarmik tusarniarneqartassapput.
Taavalu nunami suliffissuarnik tunngatillugu aamma ilaatigut assigiinngitsumik isumaqarpugut Ataatsimiititaliarlu aamma Naalakkersuisut siunertarinngilluinnarpaat unammilleqatigiinnermut allanulluunniit akuliunnissartik. Uani Naalakkersuisunit pingaartinneqarpoq aalisarnermut politikkip ilusilersornerani ataqatigiissaakkamik massakkut inerniliisoqartariaqartoq. Tassami naammattoortakkagut ukiuni siuliini soorlu tunisassiorfiit kommunit ilaanni amerlavallaalertartut ataqatigiissaarisoqannginnera pissutigalu. Taakkua sillimmartaarfiginiarneqarput siunissami taamatut pisoqaqqinnginnissaa qulakkeerniarlugu.
Tassalu massakkut taamatut aqutsilertoqanngippat ilaatigullu qaleralittassat sipporlugit pisarineqartartut aallaavigiunnaarlugit kommunini assigiinngitsuni ilaatigut piumasaqartoqarsinnaavoq assersuutigiinnarlugu immaqa Ilulissani aamma qalerallivimmik pilersitsisoqassasoq, taava taamaattoqassappat namminiiginnarlutik aaliangertalissappassuk taava pisassat aqussinnaagunnaassavagut, naggataatigullu isumalluutigut ajoraluartumik sippulimmik atuinitta kingunerisaanik annertuumik inarlerujussuarsinnaallugit. Aamma taamatorluinnaq raajartassat aamma taamaalineqaratarsinnaanerat siunissami tassami kommunit tamarmik sunngiffimminni suliffissaqartitsinissartik soqutigivaat aamma kommunit saaffigineqarunik inerterinavianngillat suliffissualiorniartunik. Uagullu
Naalakkersuisuni pingaartipparput pisassat aallaavigalugit siunissami ilusilersuinerit ingerlanneqassasut. Taasuma saniatigut aamma alisariuteqassasoq eqqarsaatigissagaanni massakkut pisarisinnaasaat imatut annertutigipput, ajoraluartumik fabrikkit massakkut suliarisinnaasaat sinnerujussuarlugit aammalu pisassiissutigineqartartut sinnerujussuarlugit pisarineqarsinnaallutik. Taamatut ingerlaannassagutta siunissami navianartumut killissinnaanerput taanna isumaqarpunga ikioqatigeeqqissaarluta pinngitsoortinniatariaqaripput.
Tassa pisassat isumannaatsumik aqunneqartariaqarput, aalisarnermik politikki isumannaatsumik ataqatigiissaarneqassappat. Saneqqunneqarsinnaanngilaq tunisassiorfinnik pisassanillu pitsaasumik aqutsinissaq.
Partiit oqaaseqartui eqqarsaatigissagaanni isumaqarpunga pingajussaaneerneqarnissaannut taanna neqerooruterput uagut Naalakkersuisoqarfitsinninngaanniit Ataatsimiititaliamut arlaannut paasiumasaqarpata saqqummiussinissamut tunngasoq atorluarneqartariaqartoq taamaalilluni paatsuungatigineqartut ilaatigut pinngitsoortinneqartissinnaammata. Aamma minnerpaarpaamilluunniit kisermaasiniarneq aamma Royal Greenland eqqarsaatigalugu taanna kisimi illersorneqarnissa ilaatigut uani taallatsiarneqarpoq partiit ilaanninngaanniit taanna siunertarineqanngilluinnaqqissaarpoq, kisiannili pisassat ataqatigiissaarinerillu pitsaasumik aaqqinneqarnissaat uani siunnerfigineqarpoq.
Taava Kattusseqatigiinninngaanniit aamma ilaatigut apeqqutigineqarpoq sinerissap qanittuani raajarniarnerup akilersinnaanerusumik ingerlanneqalernissaannut tunngatillugu angallatit anginerusut sumi aalisartinniarneqarnersut. Tassa massakkut tusarniaanerit ingerlanneqarput Aalisarnermut Pisortaqarfik, KNAPK, APK-lu peqatigeqqissaarlugit tamarmik ilusilersorneqarput taakkulu naammassineqariarpata Pisortaqarfimmut utertinneqarpata aamma taakku Naalakkersuisunukartussaapput, taannalu sioqqullugu aamma Aalisarnermut Pisortaqarfimminngaanniit piareersimavugut aamma pinngitsoorata Aalisarnermut Ataatsimiititaliaq ilisimatinneqassaaq suut siunnerfigineqarnersut, taannalu aamma naammassissavarput.
Tusarniaanerit naammassitinnagit oqaatigisinnaanngilara sumi aalisassanersut, taakkulu kingusinnerusukkut uterfigineqarumaarput qanoq aaqqiissutissamik siunnersuuteqartoqarniarnersoq, kattuffiit taakku peqatigalugit.
Tassa naatsorsuutigaara massakkut Ataatsimiititaliarlu Naalakkersuisullu uani partiit saqqummiussaat tunngavigalugit isumaqatigiinngimmata innersuussutigissavara Naalakkersuisut siunnersuutaat, taanna akuersissutigineqassasoq, tassa tassani paatsooqatigiinnerit tamaallaat tunngavigineqannguatsiarmata tusarniaasarnissamut tunngasut. Siullermeerneranilu annertuumik taakku isumaqatigiissimaneri tassani innersuussutigissavakka.
Taava tassa taamatut naatsumik oqaaseqarlunga innersuussutigivara Naalakkersuisut inassuteqaataat akuersissutigineqassasoq, kisiannili aamma pisariaqartinneqassappat pingajussaaneernissaanik piareersimavugut ataatsimiititaliamut nassuiaateqarnissatsinnut.
Daniel Skifte, ataatsimiinnermik aqutsisoq, Atassut.
Aalisarnermut Naalakkersuisumut qujavugut.
Ilisimasissutigissavara ingerlariaqqitsinnata erniinnannguaq taasissagatta,
maani inimi. Maannakkut oqaaseqaqqissaaq Lars-Karl Jensen Siumut. Tulliuppoq
Finn Karlsen.
Lars-Karl
Jensen, Siulittaasup tulliata pingajuat, Siumut.
Naalakkersuisut
aalajangissiussimassappassuk namminneq siunnersuutertik malillugu
taasissasugut. Uani eqqaasissutigissavara Naalakkersuisut ataqqisariaqagaat
saneqquneqarsinnaanngitsoq. Ataatsimiititaliamiittut tamarmik
isumaliutissiisa isumaqatigiillutik sanavaat, maani partiimi oqaaseqartut
tamarmik Siumut, Atassut, Inuit Ataqatigiit Kattusseqatigiillu oqareerput
isumaliussiissutit aallavigalugit taasisoqassasoq. Taamaattumik
Naalakkersuisut allannguutissamik suliaqarnissaat uumap suliap
pingajussaaneerneqannginnerani taasissutigissavarput, uagut Siumuminngaanniit
taanna aalajangiusimavarput.
Taavalu
minnerpaamik aamma piumasaqassagutta Naalakkersuisoqarfiup
nassuiaateqarnissaanik taarsiullugu uumap pingajussaaneerneqannginnerani
suliap Inatsisartut inatsisinik atortinneqartinneranik Ataatsimiititaliamut
ingerlanneqarnissaa naaperiaassutigalutigut.
Daniel
Skifte, ataatsimiinnermik aqutsisoq, Atassut.
Lars-Karl
Jensen qutsavigaarput. Maannakkut oqaseqassaaq Finn Karlsen.
Finn
Karlsen, Atassutip oqaaseqartua.
Ataatsimiititaliami
isumaqatigiilluinnaqqissaarsimavugut uani paatsunganartunik uagut
tungitsinninngaanniit isumaqarpunga tusarniaanermut tunngasut
paatsuunngassutigisimanngikkipput, kisiannilu uagut Ataatsimiititaliami
susassaqartut attumassuteqartut paasiniaavigisimagigut tamaasa, periarfissallu
tamaasa KNAPK, Royal Greenland, Polar Seafood, APK taavalu taakku saniatigut
aningaaseriviit immikkoortut marluk maani.
Taakku aamma
tusarniaaviginerani aamma taanna tusarniaasarneq aamma eqqartorneqarpoq, tassa
ataatsimoortillugit tusarniarneqartarnissaat uani uagut isumaqaratta
paatsuunganata kisianni tassa imaassinnaavoq
paatsuungalaaqatigiissimasinnaasugut taava aamma paatsuungasutut
isumaqarsimasuugaluarutta soorunami Naalakkersuisoq aggeqqusimassagaluarparput
nassuiaatilaarlugu, kisianni ataatsimiititaliami paatsuungasutut
isumaqannginnatta aggeqqunngilarput.
Uani aamma
ataatsimiititaliami isumaqanngilagut suliffissuarnik aallartitsiniartut
imaluunniit suliffinnik nutaanik aallartitsiniartut imaluunniit siunertamut
allamut aallartitsiniartunut kommuninut oqartussaaneq tamaat tunniunnissaa
isumaqanngilagut taamatut, kisianniukku aamma avaqqunnagit Naalakkersuisut
kisimiillutik aalajangiisarnissaat pinaveersaarniarlugu taamatut oqartunga.
Tamaammat
Lars Karl Jensen-itulli oqassuunga uanga ilissi isumaqatigilluinnaqqissaarassi
ataatsimiititaliami assortuunnata ataatsimiititaliap isumaliutissiissutaa
taaseqataaffigissallugu isumaqatigiippugut.
Aamma
oqarpugut soorunami pisariaqarpat ataatsimiititalimi suliareqqinnissaannut
Naalakkersuisoq aggersaqqinneqarsinnaavoq taanna
isumaqatigiissutigisinnaassavarput ataatsimiititaliami, taanna
ajornarsinnaanngilaq nassuiaatinnissaa. Taanna Ataatsimiititaliap
ataatsimiinnerminni aalajangertariaqassavaa.
Daniel
Skifte, ataatsimiinnermik aqutsisoq, Atassut.
Finn Karlsen
qutsavigaarput. Tulliulluni oqaaseqassaaq Lars Sørensen.
Lars Sørensen,
Inuit Ataqatigiit oqaaseqartuat.
Uaguttaaq
Siumukkutut Atassutikkutullu aamma isumaqarpugut tassa ataatsimiititaliap
isumaqatigiissup uunga tunngatillugu isumaliutissutaata
taasissutigineqarnissaa aamma Inuit Ataqatigiinninngaanniit kissaatigivarput,
aammali isumaqarpugut tamanna Naalakkersuisuusut naalattariaqaraat.
Daniel
Skifte, ataatsimiinnermik aqutsisoq, Atassut.
Lars Sørensen
qutsavigaarput. Tulliulluni oqaaseqassaaq Otto Steenholdt.
Otto
Steenholdt, Attaviitsup oqaaseqartua.
Isumaqarpunga
Naalakkersuinikkut ingerlaaseq malissiortitaalersoq. Naalakkersuisut namminneq
siunnersuutaat Inatsisartunit amerlanerusunit itigartinneqassappat
Naalakkersuisut ataannarnissaannik qanoq kinguneqassanersoq navianartumik
nalilerpara. Neriuppunga kukkusimassallunga. Naalakkersuisut siunnersuutit
aalajangissiussimassappassuk amerlanerussuteqartullu itigartitsillutik imaqa
taanna inatsisini paasisimasallit nalileqqaartariaqassavaat.
Eqqortuusinnaanngilaq Naalakkersuisut piumasaat Inatsisartut
itigartilluinnassappassuk.
Daniel
Skifte, ataatsimiinnermik aqutsisoq, Atassut.
Otto Steenholdt qutsavigaarput. Tulliulluni oqaaseqassaaq Mads Peter Grønvold.
Mads Peter Grønvold, Kattusseqatigiit oqaaseqartuat.
Uagut Kattusseqatigiinniit Otto-tulli isumaqanngilagut, kisianni pingajussaaneerneqartussaavoq suli una inatsisissaq. Periarfissaqarpoq allannguinissamut taamaattumik ataatsimiititaliamut isumaqatigiilluinnarluta taanna aalajangersimanerput uagut aamma taaseqataaffigissavarput Kattusseqatigiinniit.
Daniel Skifte, ataatsimiinnermik aqutsisoq, Atassut.
Mads Peter Grønvold qutsavigaarput. Tulliulluni oqaaseqarumavoq Anthon Frederiksen.
Anthon Frederiksen, Siulittaasup tulliata sisamaat, Kattusseqatigiit.
Aalisarnermut, Piniarnermut Nunalerinermullu Naalakkersuisup oqaaseqarnermini pingaartippaa, aamma pingaartinneqartuaannarpoq soorunami pisassiissutit sipporneqartannginnissaat imaluunniit pisassiissutit siunnersuutigineqartut.
Assersuutissaqarpugut massakkut ersarilluinnartunik, soorlu qaleralinniarneq eqqartorneqarpoq tassa taavaannannguaq taakkuallu qalerallit pingaartumik Ilulissat eqqaani ukiut tamaqqilluinnaasa pisarineqartussat sipporneqartuarput.
Kisianni Naalakkersuisut ukioq manna qanoq iliorpat?
Qassusersorneq ukiup tamaat ammaakkaluarpaat, taasuma kingorna ukioq mannamiit angallassuit nutaat sisamat atortussanngortillugit akuersissutigivaat, nalunngereerlugu piffimmi pineqartumi pisarineqartartut sipporneqartuartut.
Taamaattumik nuannaarutigaara uanga Aalisarnermut Ataatsimiititaliap pissutsinik paasinnilluarluni massakkut isumaliutississuummini ajunngilluinnartumik saqqummiussinera, tassami akuersaaruminaappoq, assut akuersaaruminaappoq illua tungaatigut oqalunniarluni pisassat pisassiissutigineqartut piujuarnissaat eqqarsaatigalugu ataqqineqartariaqartoq pisarisinnaasat amerlavallaanngitsut pisarinissaat.
Taamannak oqariarluni illua tungaatigut killeqanngitsumik aalisartitsineq qassusersorluni, aammalu taasuma saniatigut sumiiffinni angallatit pingaartumik umiatsiaaqqat mattuteriarlugit, taava angallassuit nutaat avataaneersut imannaannaq pisaqarsinnaasut ammaanneqarpata taava peqassuseq ulorianartorsiortinneqarsinnaasoq uloriarnartorsiortinneqarsinnaasorlu kialluunniit takunngittoosinnaanngilaa.
Taamaattumik kommunit namminneq pissutsinik ilisimaarinnilluartoq piffinni assigiinngitsunik killilersuinissamik tunngasut pillugit uagut Kattuseqatigiinniit aamma oqariartuuterput tassaasoq kommunit aalajangiisinnaatitaanerat tassani annertunerusoq pisariaqarpoq.
Taannalu paasisinnaasakka malillugit aamma Ataatsimiitaliami ataqqineqarpoq ilumoorpoq Ataatsimiititaliap Siulittaasua oqarmat kommunit minnerpaamilluunniit soqutigisarinngilaat fabrikkersuarnik ammaasoqarnissaannut aalajangiinissartik taanna Naalakkersuisut pisinnaatitaaffigereerpaat, aamma tassaniittuassooq.
Kisianni pisassat mianeralugit peqassuseq mianeralugu aalajangiinissaq taakku isumaqarpunga kommuninut susassaqartunut annertunerusumik pisussaaffik tutsinneqassappat tulluarnerpaajussasoq.
Daniel Skifte, ataatsimiinnermik aqutsisoq, Atassut.
Anthon Frederiksen qutsavigaarput. Maannakkut oqaaseqassaaq Aalisarnermut Naalakkersuisoq.
Hans Enoksen, Aalisarnermut, Piniarnermut Nunaqarfinnullu naalakkersuisoq, Siumut.
Ataatsimiititaliap inatsisissaq taanna saqqummiunneqarmat siullermeernerani isumaqatigeeqqissaarlutik Naalakkersuisut siunnersuutaat tamakkiisumik tapersersorpaat. Tupigaara massakkut taamatut paatsooqatigiiallanneq pissutigalugu allarluinnarmik isummersimanerat aamma neqeroorutiginikuusara taanna sioqqulluarlugu Ataatsimiititaliaq paasiumasaqassappat nalornissappat piareersimasugut nassuiaajartornissannik aamma atorneqanngitsoornera taanna uggornartorujussuuvoq taamaalilluni taava maani paatsooqatigiinnerit taakku pinngitsoorneqarsimasinnaagaluarput.
Tassa Naalakkersuisut minnerpaamilluunniit siunertarinngilaat, aamma uanga inuttut siunertarinngilara Inatsisartut akerlilissussallugit.Kisianniliuna uani atsioqatigiinneq taanna uggoriinnariga, akerlerissutaanngeriarluni massakkut paatsooqatigiiallanneq pissutaalluni taamatut inissittoqarnera. Qujanq.
Daniel Skifte, ataatsimiinnermik aqutsisoq, Atassut.
Aalisarnermut Naalakkersuisumut qujavugut. Mikael
Petersen partiimi oqaaseqartuat avataatigut.
Mikael
Petersen, partiimi oqaaseqartuat avataatigut, Siumut
Uani
pineqartoq tassa § 32 imm. 3-p oqaasertaasa qanoq paasineqartariaqarnerat
tamanik takuneqarsinnaasutut partiit tamarmik piumasaraat Naalakkersuisut
allannguutissamik siunnersuuteqassasut. Tamanna aamma Siumumi oqaaseqartutta
oqaatigereerpaa.
Uani
Naalakkersuisut Inatsisartullu tamaatta paaseqatigiilluinnarnissarput
siunertaralugu piumasarigaluarpara 5 minutsit unilaassasugut, gruppimi
naapilaarnissarput pisariaqartikkatsigut.
Daniel Skifte,
ataatsimiinnermik aqutsisoq, Atassut.