Oqaluuserisassani immikkoortoq 35-2 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut arfersaneq sisamaat, marlunngorneq 14. maj 2002, nal. 13:03
Jonathan
Motzfeldt, Naalakkersuisut Siulittaasuat, Siumut.
Innersuussutigissavara
Naalakkersuisut akissutigisimasaat maani aappassaaneerneqarnerani
saqqummiunneqartoq, Inatsisartunut ilaasortaq Maliinannguaq Markussen Mølgaardip
siunnersuuteqarneratigut 2001-imi ukiakkut ataatsimiinnermi illersornissamik
isumaqatigiissutip 1951-imeersup allanngortinneqarnissaanik
aalajangiiffigisassatut siunnersuut.
Taamani
nunarput isumaqatigiinniarnermi peqataasalerluni isumaqatigiissummi
ilaalersinniarlugu illersornissaq pillugu, isumaqatigiissutip
isumaqatigiinniutigeqqinneqarnerata aallarnerneqarnissaa pillugu danskit
naalakkersuisui uagullu Naalakkersuisut 1997-imiilli
isumaqatigiinnialersimanerput pillugu taamanikkut ilisimatitsissuteqarpunga.
Danskit
naalakkersuisui 1997-imiilli siunnersuut taanna itigartivissortarpaat,
isumaqarnerarput illersornissamut isumaqatigiissut Kalaallit Nunaata
illersorneqarnerani toqqammaviusoq pitsaallunilu eqaatsoq, danskillu
naalakkersuisui aamma isumaqarput USA-p isumaqatigiinniaqqinnissaa
pisariaqartutut isiginngikkitsik.
Tamatumunnga
taarsiullugu danskit naalakkersuisui illersornissamut isumaqatigiissutip
ilassutissaanik isumaqatigiinniarnermut peqataajumapput. 2001-imi ukiakkut
ataatsimiinnermi oqallinnerup takutippaa oqaaseqartut tamarmik
illersornissamut isumaqatigiissutip isumaqatigiinniutigineqaqqannissaa
kissaatigigaat.
Suliami
tassami Inatsisartut aalleqqutaanik Naalakkersuisut paasinnilluarput,
taamaammallu 2001-imi novemberimi, taamani nunanut allanut ministeriusumut
Mogens Lykketoftimut isumaqatigiinniaqqinnissamik piumasaqaat
saqqummiuteqqippara.
Danskit
naalakkersuisui nikinnerat pissutigalugu nunanut allanut ministerinngorlaaq,
Per Stig Møller, 11. januar 2002-mi ataatsimeeqatigaara, naalakkersuisunit
saaffiginnissutitsinnut akissuteqarpoq.
Taanna
siulimisulli isumaqarpoq danskit naalakkersuisoriligaasa illersornissami
isumaqatigiissutip isumaqatigiinniutigeqqinneqarnissaa aamma
kissaatiginngikkaat. Pissutsinik aalajangersimasunik USA-mut
saqqummiussinissartik piareersimaffiginerarpaat, taavalu illersornissamut
isumaqatigiissut ilassuserneqarsinnaalersinniarlugu.
Itigartitsineq
taanna ministeriuneq Anders Fogh Rasmussenimut saqqummiuppara 30., 31. januar
2002-mi nunatsinni tikeraarmat. Danskit naalakkersuisui USA-mi
isumaqatigiinniaqqinnissamik piumasaqarumannginnerat 30., 31. januar 2002-mi
oqallinnitsinni, statsministerip aalajangiusimaannarpaa, danskimmigooq
naalakkersuisui isumaqatigiissut USA-p Danmarkip Kalaallit Nunaatalu
toqqammavissatut pitsaasutut patajaatsutullu isumaqarfigimmassuk.
Taarsiullugu
ajornartorsiutaasinnaasut aalajangersimasut isumaqatigiissummut
ilassusiornikkut aaqqinneqarnissaanut danskit naalakkersuisui peqataanissaat
neriorsuutigaa.
Tamatuma
kingorna isumaqatigiissutigineqarpoq, danskit kalaallillu naalakkersuisui
illersornissamut isumaqatigiissutip ajornartorsiutitai suunersut
ataatsimoorlutik paasiniassagaat, isumaqatigiissutigalugulu ajornartorsiutit
taakku USA-mut saqqummiunneqassasut, isumaqatigiissutip ilassuserneqarnissaa
pillugu isumaqatigiinniarnissaq siunertaralugu.
Tassalu
ministeriuneq Anders Fogh Rasmussen saqqummiussaa, danskit siusinnerusukkut
naalakkersuisorisimasaasa saqqummiuttagaasa assigaat, kisiannili
ajornartorsiutit aalajangersimasut misissuataarneqarnissaat suusullu
paasilluarneqarnissaat samminerullugit, taamalu aalajangersimasumik
aaqqinniarneqalernissaat aamma samminerullugu imaqarput.
Isumaqatigiissutit
taamatut ittut illersornissamut isumaqatigiissut tunngavigalugu
isumaqatigiissutaasutut suliarineqartarput, tassa illuatungaani amerikamiut
naalakkersuisui, illuatungaanilu danskit naalakkersuisui aammalu kalaallit
naalakkersuisui isumaqatigiinniaqatigiittussaallutik.
Uagut
naalakkersuisuniit akileraartitsisarneq, avatangiisit amerikamiut nunatsinni
angalaartartnerat pillugu periaasissatut isumaqatigiissutit kiisalu Pituffimmi
Namminersornerullutik Oqartussat sakkutuumik attaveqaateqarnerat,
sukumiinerusumik misissugassatut tikkuarpagut.
Danskit
kalaallillu isumannaallisaanermut nunanullu allanut tunngasut pillugit
atorfilittatigut ataatsimiititaliaata ataani suleqatigiissitaq aqqutigalugu
illersornissamut isumaqatigiissutip misissuataalerneqarnissaa
Naalakkersuisuniit sulissutigisimavarput.
Suleqatigiissitaq
22. maj 2002 ataatsimiititaliap tullissaani ataatsimiinnerani
pilersinneqariissaaq. Illersornissamut isumaqatigiissut aammalu
ilassuserneqarnissaa pillugu amerikamiunut tulliullugu isumaqatigiinniarnerit
soorunami tassaanngikkaluarput isumaqatigiissutip nutaamik
isumaqatigiinniutigeqqinneqarnera.
Nassuerutigisariaqarparpulli
isumaqatigiinniaqqinnissat maanna danskit naalakkersuisorisaasa siuliisalu
itigartilluinnarsimammatigit. Taamaammallu Naalakkersuisut makku
qinigassarisimavaat.
Siullermik,
danskit naalakkersuisuisa akuersinissaanik ilimasuffiunngitsumik, imaluunniit
danskit folketingianni amerlanerussutilinnik tapersersorneqalernissamik
ilimanaateqanngitsumik, danskit naalakkersuisui sivisoqisumik artornaqisumillu
akiorneqarnissaat.
Aappassaanik,
ajornartorsiutit aalajangersimasut aaqqinneqarfigisinnaasaannik,
illersornissamut isumaqatigiissutip misissuataarneqarnerani angusaqarnerput
siunissami anguniakkat annaanngikkaluarlugit.
Kingulleq
toqqarsimavarput, taamaalillutalu ajornartorsiutinik illersornissami
isumaqatigiissummiittunik aalajangersimasunik danskit naalakkersuisui
misissuataareqatigiinnissaanut pinngitsaalisimallugit.
Ingerlariaqqissaguttami
danskit naalakkersuisui kingornalu amerikamiut paaseqatiginiarlugit
oqaloqatigeqqaartariaqarpagut.
Ameriakmiut
qaartartorsuarnik igeriuttakkanut illersuusiorniarnerat pillugu
oqallittoqalermat siunnersuutigineqarsimavoq Kalaallit Nunaata Pituffimmi
radarip illersuummut atorneqarnissaa akuerissaguniuk illersornissamut
isumaqatigiissutip isumaqatigiinniutigeqqinneqarnissaa piumasarissagaa.
Tamatumani
paatsuugassaajunnaarlugu oqaatigiumavara, Pituffimmi radarip qaartartorsuarnut
illersuutitut atorniarlugu USA-p kissaatigippagu, nunatta
isumaqatigiinniaqataanissaa Naalakkersuisut angusimammassuk.
Tamatumani
isumannaallisaaneq, avatangiisit, nuna tamalaat illersornissakkut
isumaqiissutaasigut killiliussat, allallu eqqarsaatigalugit,
pisariaqarsorisatsinnik piumasaqaateqassaagut, ameriakmiullu Pituffik
qaartartorsuarnut illersuummut atorumallugu kissaateqarnerat
isumaqatigiinniaqqinnissamik piumasaqarnissatsinnut pitsaanerusumik
periarfissiissagaluarpat, soorunami tamanna atorluarniassavarput.
Kisiannili
qaartartorsuarnut illersuutip, aammalu illersornissamut isumaqatigiissutip
niuerutigineqarnissaa naleqquttuunngilaq, aammami naluarput amerikamiut
saaffiginnissuteqassanersut.
Taamaammt
Naalakkersuisuni isumaatsuliornertut isigissavarput, siumut
allariarfigisinnaasut ersarissut annaassagutsigit upperiinnarlugu pisussaq,
ilumut pisussaanersoq nalusarput atorluarlugu taamaaliorsinnaasugut.
Taama
nassuiaateqarlunga inassutigaara suliami tassani iliuuserineqarsimasut
Inatsisartuni tusaatissatut tiguneqassasut.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Naalakkersuisut
Siulittaasuannut qujavugut, taava maannakkut partiit, Kattusseqatigiit
attaviitsullu oqaaseqartuinut nuuppugut, siulliullunilu oqaaseqassaaq Mikael
Petersen, Siumut.
Mikael
Petersen, Siumup oqaaseqartua.
Inatsisartunut
ilaasortap Maliinannguaq Markussen Mølgaardip 1951-imi illersornissaq pillugu
danskit amerikarmiullu isumaqatigiissutaata nutarterneqarnissaa pillugu,
pimoorussisumik sulissutiginnittoqarnissaa ukiarmi Inatsisarut
ataatsimiinnitsinni aalajangiiffigisassatut siunnersuutigaa.
Taamanikkut
siunnersuut siullermeerneqarmat Siumumiit oqaaserisagut allannguuteqanngimmata,
matumuuna innersuussutigissavagut, makkuli erseqqissaassutigissallugit.
Illersornissaq
pillugu isumaqatigiissutip 1951-imeersup ullumikkut pissutsinut atugaasunut
naleqqukkunnaavissimasup nutarterneqarnissaanik Siumup qangaaniilli
piumasaqaanni allanngortinngilaa, aalajangiusimallugulu.
Soorlu aamma
1990-ikkunnili Inatsisartut tamarmiullutik tamanna
isumaqatigiissutigereersimagaat, massakkumullumi aamma tamanna
aalajangiusimaneqarluni.
Aamma
Inatsisartut tamatta nalunngilluinnarparput, nunatsinni
naalakkersuisuusartunit piffissap ingerlanerani allannguuteqartarsimasunit
tamanna piumasaqaat pimoorullugu sulissutigalugulu, danskit
naalakkersuisorisartagaannut aammalumi massakkut naalakkersuisorisaannut
saqqummiunneqartarsimasoq, kisiannili soorlu Naalakkersuisut
akissuteqaataatigut ersersinneqartoq, taamaaliornissaq massakkumut danskit
naalakkersuisuisa isumaqatiginngilluinnarpaat, taamaalillutik 1951-imi
amerikarmiunut isumaqatigiissutertik allanngortikkusunngilluinnarlugu,
kisianni Siumumiit nuannaarutigalugu iluarisimaarparput, ukioq manna
nunatsinni Naalakkersuisut Siulittaasuata danskillu ministeriunerata
isumaqatigiissutigisimammassuk, Kalaallit danskillu ataatsimoorlutik 1951-imi
isumaqatigiissut misissoqqissaalissagaat. Sukkut qanorlu
nutarteriffigineqarsinnaanera nalilersorlugu, tamannalu pereerpat periarfissat
alloriarfiusinnaasut pillugit nunatsinni Naalakkersuisut Inatsisartunut
nassuiaateqarnissaat Siumumiit naatsorsuutigilluinnarparput. Soorunalumi aamma
taamaaliortoqarnissaa kissaatigalutigu.
Aammalu
Siumumiit kissaatigissavarput, danskit uagullu kalaallit ataatsimoorluta
misissuinigut pillugit nunanut allanut Sillimaniarnermullu Ataatsimiititaliaq
qanittumik Naalakkersuisuniit suleqatigeqqullugu.
Tamatuma
saniatigut Siumumiit kaammattuutigissavarput, anguniakkap tamatuma
pimoorullugu sulissutiginerani naalakkersuisugut kisiisa isumalluutiginagit,
aamma uagut Inatsisartutigoortumik ikinngutigut folketingimut ilaasortat
tamaasa naapittakkagut, ataatsimeeqatigisartakkagullu tamanna pillugu
oqaloqatigalugillu isumasioqatigisassagigut, soorlu Nunanut Allanut
Sillimaniarnermut tunngasunik Ataatsimiititaliaq, Folketingip Udenrigspolitisk
Nævnianik ataatsimeeqateqartarnermini taamaaliortartoq.
Siumumi
isumaqarpugut tamakku periarfissat tamaasa atorlugit, aammalu uagut kalaallit
Folketingimi ilaasortaatitagut atorluarlugit, suliniutitigut pimoorissisumik
ingerlassinnaagigut, taamaaliortuarattami.
Siumumiit
ilanngullugu erseqqissaatigissavarput piffissami qaninnerusumi 1951-imi
isumaqatigiissutip nutarterneqarsinnaanera periarfissiissutaassanngikkaluarpat,
soorunami periarfissap pitsaanerup tullia atortariaqarmat, tassa apeqqutit
makku pillugit isumaqatigiissummut ilassuteqarnikkut nunarput amerikarmiunut
isumaqatigiissuteqarsinnaatillugu.
Avatangiisitigut
apeqqutini, akileraartitsisarnikkut apeqqutini, amerikarmiut nunatsinnik
atuisinnaanerannut apeqqutini aammalu Thuletoqqap nunatsinnut
tiguneqarnissaanut tunngatillugu apeqqummi, kiisalu nalunaarasuartaatitigut
attaveqaateqarnermut aamma tunngasuni.
Siumumi
isumaqarpugut tamakku apeqqutit, qulaani taasagut piaartumik periarfissallu
siullerpaat atorlugit aaqqinniarneqartariaqartut, 1951-imi isumaqatigiissutip
tamakkiisumik nutarterneqarnissaanut qallunaat nammineerlutik
piareersimalernissaat utaqqiinnarnagu. Qanittukkummi taamaaliorumalernissaat
ilimanaateqanngimmat.
Siumumiit
taamannak oqaaseqarluta, danskit amerikarmiullu illersornissaq pillugu
isumaqatigiissutaata 1951-imeersup nutarterneqarnissaa pillugu suliat
pimoorunneqarlutik ingerlanneqareernerat ilisimaarigatsigu, Inatsisartunut
ilaasortap Maliinannguaq Markussen Mølgaardip
aalajangiiffigisassatut siunnersuutaa nutaarsiassaqanngikkallarmat
akuersaanngilarput, Naalakkersuisullu akissuteqaataa tusaatissatut tigullugu.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Mikael
Petersen qutsavigaarput, tulliulluni oqaaseqassaaq Finn Karlsen, Atassut.
Finn
Karlsen, Atassutip oqaaseqartua.
Inatsisartunut
ilaasortap Maliinannguaq Markussen Mølgaardip 1951-imi illersornissaq pillugu
danskit amerikamiullu isumaqatigiissutaata nutarterneqarnissaat pillugu
pimoorussisumik suliniuteqartoqarnissaa ukiarmi Inatsisartut
ataatsimiinnitsinni aalajangiiffigisassatut siunnersuutigaa.
Ukiakkat
ataatsimiinnermi oqaluuseralugu siullermeeratsigu Atassummiit oqaatigisagut,
oqaatigissavarput taamanikkut oqaaserisagut allanngortinnissaanut
tunngavissaqannginnatta.
Atassummiit
illersornissaq pillugu isumaqatigiissut 1951-imeersoq erseqqissumik
oqaatigereerparput ullutsinnut naleqqukkunnaavissimasoq. Tamanna aamma
uppernarsarneqarsinnaavoq siusinnerusukkulli Inatsisartut tamanna
isumaqatigiissutigineqareermat nutartertariaqarnera.
Naalakkersuisut
akissuteqarnerminni erseqqissumik oqaatigaat, allanngortitsinissaq danskit
naalakkersuisuisa amerikarmiullu isumaqatigiissutigisimasartik
allanngortinnissaanik peqqutissaqaratik.
Nalunngilarpulli
nunatsinni Naalakkersuisutta Siulittaasuata, danskillu naalakkersuisa
siulittaasuat isumaqatigiissutigimmassuk ataatsimoortumik 1951-imi
isumaqatigiissut misissoqqissaarlugu sutigut nutarteriffigineqarsinnaanera
misissornissaa nalilersuiffigiumammassuk.
Atassummiit
nuannaarutigaluguttaaq oqaatigissavarput, danskit naalakkersuisuisa nutaat
amerikamiunik nunatsinnut tunngasunik oqallittoqartillugu kalaallit
naalakkersuisui peqataasarnissaat akuersaarmassuk.
Soorlu
oqaatigineqareersoq danskit naalakkersuisui piumassuseqanngitsut
isumaqatigiissutit nutarternissaanut, tamaammat periarfissaq tamanna
pisinnaannginnatsigut, taava periarfissamik allamik
periarfissarsiortariaqarpugut, tamatumani eqqarsaatigaarput,
isumaqatigiissutip ilassutinik danskit naalakkersuisa piumassuseqarfigigaat
paasinarmat.
Periarfissaq
taanna atorluarniartariaqarpoq, taamaalilluni ullutsinnut naleqqussarnissaa
ajornannginnerusumik angusinnaagipput isumaqaratta, soorlu aamma taanna
siullermeeratsigu oqaatigigipput.
Una
oqaluuserisaq illersornissamut tunngagaluartoq, taamaattoq
pinngitsoorumanngilagut Atassummiit Naalakkersuisut piumaffigissallugit
danskilluunniit peqatigalugit ameriakamiut ullumikkornit pitsaanerusumik,
ammanerusumillu assigiinngitsutigut nunatsinni iluaqutaasinnaasunik
sulissuteqarniaqqullugit, soorlu niuernikkut, takornariaqarnikkut allatigullu
assigiinngitsorpassuusinnaapput nunatsinnut iluaqutaasinnaasut.
Taamatut
Atassummiit oqaaseqarluta Naalakkersuisut piumaffigissavagut danskit
amerikamiullu illersornissaq pillugu isumaqatigiissutaata 1951-imeersup
nutarternissaa pillugu, suliniarnertik pimoorullugu ingerlatartik
ingerlatiinnaqqullugu.
Atassummiillu
oqaatigissavarput Inatsisartunut ilaasortaq Maliinannguaq Mølgaardip Mølgaardip
siunnersuutaa taamatut isikkoqartillugu akuersaarsinnaannginnatsigu,
Naalakkersuisullu akissuteqaataat akuersaaratsigu oqaatigissavarput.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Finn Karlsen
qutsavigaarput, tulliulluni oqaaseqassaaq Josef Motzfeldt, Inuit Ataqatigiit.
Josef
Motzfeldt, Inuit Ataqatigiit oqaaseqartuat.
Inatsisartuni
ilaasortap Maliinannguaq Mmarkussen Mølgaardip aalajangiiffigisassatut
siunnersuutaa Inatsisartuni persuarsiutaalluni ukiut 15-it tungaannut
oqaluuserineqartoq, Inatsisartunilu tunngaviatigut
isummerfigineqareeraluarluni suli sumi oqaluuserineqarnera apeqqutaatillugu
Naalakkersuisut Siulittaasuannit, aammami Inatsisartuni partiinit
oqaluuserineqartoq, ullumikkut nunatsinniinnaanngitsoq, nunarsuulli sinneranit
tusaaneqartussamik Inatsisartuni aalajangiiffigisussanngorparput.
Soorunami
Maliinannguaq Markussen Mølgaardip illersornissamut 1951-imi
isumaqatigiissutip allanngortinneqarnissaanik siunnersuutaa Inuit Ataqatigiit
tapersersorpaat.
Aammami
illersornissamut isumaqatigiissummut apeqqut, allallu amerikamiut
nunatsinniinnerata nassatarisai allarpassuarnik kalluagaqarput,
isumaqatigiissummut tunngavimmikkut atavinngikkaluartunut.
Isumaqatigiissutip
pineqartup initussusaa ilaatigut inuiattut immikkuullarissutut inatsisitigut
illersorneqartumik akuerineqarsimannginnitsinnit pissuteqarpoq. Aammami
1953-imi inatsisip tunngaviusup allanngortinneqaraluarneratigut, 1978-imilu
namminersornerunik pillugu inatsit Folketingimi akuerineqaraluarneratigut
nunasiatut inissisimanitta malunnaatilimmik allannguuteqannginneranik
pissuteqarpoq. Tamannarpiaavorlu apeqqutip matuma qeqqa.
Nunamut
piginnittussaanermut apeqqut taamatorpiaq inissisimavoq, tamannaavormi aamma
Danmarkip nunatsinnut aalajangiisuusumik oqartussaajuarneranut uppernarsaat.
Danmarkip
naalagaaffeqatigiinnerup qanoq iluseqarnissaanut piumasarisai, Danmarkillu
nunatsinnut ukiut tamaasa aningaasaliuttagai tunngaviusumik
aalajangiisuulluinnarallarput, nunanut allanut illersornissamut, nunamullu
piginnittussaanermut apeqqutit isumaqartinneqarnerinut.
Inuit
Ataqatigiit periarfissat arlalissuit atorlugit ukiorpanngortuni
kaammattuillutalu suliniartuarsimavugut, Danmarki peqatigalugu
nunasiaasimanerup sinnikuisa tujorminartut atorunnaarsinneqarnissaannut.
Isumaqartuarpugut
tamakkorpiaasut naalagaaffeqatigiinnerup siunnerfeqarluartumik
ineriartorteqqinnissaraluanut kiaalaqutaaginnaratik kanngiffiusut.
Illersornissamut isumaqatigiissut sanngiissutsimut, tatigeqatigiinnginnermut
ataqqeqatgiinnginnermullu naalagaaffeqatigiinnerup iluani
ilisarnaatinngorsimavoq.
Inuit
Ataqatigiit illersornissamut isumaqatigiissummut isummersornitsinnut
aalajangiisuulluinnarpoq, isumaqaratta isumaqatigiissutikkut Danmarkip USA
aalajangiisuusumik akueralugu nunatsinni sumiluunniit qaqugukkulluunniit
akornusersorneqannguarani qanorsuaq iliorsinnaaneranik piginnaatitsissummik
tunisimagaa.
Nunartatsinni,
imartatsinni nunattalu silaannartaani tamanna atuuppoq, aammami
illersornissami isumaqatigiissutikkut USA tunngaviusumik piginnaatinneqarpoq
nunatsinni sumiluunniit, qaqugukkulluunniit pisariaqartikkuniuk nunatsinnik
atuilluni sanaartorsinnaanermut.
Isumaqatigiissut
ABM 1972-imeersoq USA-p kisimi aalajangerlugu qaammat ataaseq qaangiuppat,
tassa 13. juni 2002, atorunnaarsilerpaa. Isumaqatigiissut ABM atomitalinnik
sakkussiornerup killilersorneqartariaqarneranut oqimaaqatigiissitsisutut nunat
tamat akornanni isumaqatigiissutit pingaarnersaatut taassallugu
ingasattajaarnerunngilaq.
Aammami
taannarpiaavoq USA-p missilit atorlugit illersuusiorniarneranut pingaarnertut
killiliisuusoq. Pituffimmi sakkutooqarfik missilit atorlugit
illersuusiorniarnermut pilersaarummut maannamut ilaatinneqarmat,
qularnanngitsoq mannaavoq, isumaqatigiissut ABM, illersornissamut
isumaqatigiissut 1951-imeersoq, Pituffimmilu sakkutooqarfik
avissaartinneqarsinnaanatik imminnut atalluinnartuusut.
USA-p præsidentia
Folketingimilu amerlanerit isumaqarpata, isumaqatigiissut ABM pisoqalilluni
ullutsinnut naleqqukkunnaarsimasoq, atorunnaarsinneqartariaqartorlu,
imaluunniit allamik taarteqartinneqartariaqartoq, taama isummernerup
pissusissamisoortumik malitsigisariaqagaa allaqqussinnaanngitsoq tassa,
illersornissamut isumaqatigiissutip 1951-imeersup
atorunnaarsinneqartariaqarnera, imaluunniit ullutsinnut naleqquttumik nutaamik
taarteqartinneqartariaqarnera.
Taassumalu
ilusilerneqarnerani nunarput aalajangeeqataasutut peqataasariaqarpoq
najuutiinnarani.
Nammineq
nunagisamut oqartussaatitaannginneq nikassarneqaataavoq, taamaattoq ullumikkut
uagut inuiattut inissisimanerput taamaappoq. Allaammi Danmarkip uagut
nunarpullu pillugit allanut isumaqatigiissutigisimasai sunik imaqarnersut
tamakkerlugit ilisimanngilagut.
Suunuku
isumaqatigiissutit taamak navianartigisut, imaluunniit erloqinartigisut,
nunatsinniluunniit Naalakkersuisut Siulittaasuannut
ilisimatitsissutigineqarsinnaanngitsut.
Isumaqatigiissutit
tamarmik imarisaannik tamakkiisumik ilisimatinneqarumalluta piumasaqarnissamut
sinnartuuleqaagut. Danmarkip EU-mut ilaasortaanerata annertunerujartuinnarmik
kinguneraa Danmarkip naalagaaffittut namminiusutut imminut
oqartussaaffiginerata annikilligaluttuinnarnera.
Ullumikkumut
Danmarkip EU-p ilaasortanut nunanut allanut illersornissamullu apeqqutinut
piumasarisaannut tukernersimaaraluarnini sakkortunerujartuinnartumik
tatineqarput, imaluunniit piumasarisanut tukernersimaaraluarneri
sakkortunerujartuinnartumik tatineqarput.
Ullumikkut
Danmark-imi saamerliit akerliunerpaasimagaluartut,
akuersaarnerugaluttuinnarput, allaat Danmarkip ullumikkumut
tukernersimaarfiisa atorunnaarsinneqarnissaannik oqaloqataalernerannik
kinguneqartumik.
Taama EU-p
ilusinikkiartornerata kingunerinngitsoortussanngilai nunat ilaasortaasut
immikkuullarissutut isummertarnerisa politikkikkullu namminiusutut
inissisimanerisa suli annertunerusumik assigiissarneruneqarnerat,
qularutissaagunanngivipporlu ukiualunnguit ingerlanerani EU-mi ilaasortat
ataatsimoortumik nunanut allanut illersornissamullu apeqqutini
ingerlatseriaaseqalersimassasut.
Tamannalu
piviusunngorpat nunanut allanut, illersornissamullu apeqqutini
annertunerusumik sunniuteqarumalluta Danmarki kisiat pinnagu pissaanilissuaq
EU isumaqatiginiartalersimassavarput.
Taamaattumik
illersornissamut isumaqatigiissutip nutaamik isumaqatigiinniutigeqqinnissaata
aalajangiusimanissaannaa pingaaruteqanngilaq, aammali nukingiuttariaqarpoq.
Illersornissamut
isumaqatigiissutip nassataannut Uummannamut apeqqut assersuutissaqqissut
ilagaat, Uummannap amerikamiunit iperarneqarluni nunatsinnut
ilannguteqqinnissaanut apeqqut ukiorpanngortuni isumaqatigiinniutaagaluarpoq,
suli kinguneqanngitsumik.
Amerikamiut
pissutissaqaratik isumaqatigiinniaraluarnerit nassuiaatissaqanngitsumik
kinguarsartuarpaat, taamaattumik apeqqut taanna isumaqatigiinniaqqinnissap
nukinginnassusianik tunngavissanut ilaaginnarpoq.
Oqaluuserisami
matumani Hingitaq 53-ip danskit naalagaaffiannik eqqartuussiviit qullersaannut
suliassanngortitsisimanera eqqartussanngilarput, Amerikamiulli
illersornissamut isumaqatigiissut tunngaviliullugu nunatsinniinnerisa
kingunerisa ilaattut taanngitsoorneqarsinnaanngitsoq Inuit Ataqatigiit
isumaqarput.
Ilassutitut
isumaqatigiissuteqaannarnerup ullumikkutut oqartussaassuseqannginnerput
Amerika-miulluunniit nunatsinni piumasaattaamminnik qanoq iliorsinnaanerat
allanngortissinnaanngilai.
Siuliani
pissutsit piviusut taagukkagut innersuussutigalugit Inuit Ataqatigiit
naggasiullugu Inatsisartuni ilaasortat tamaasa kaammattorusuppagut,
oqaaseqaateqarnikkut Naalakkersuisut piumaffigineqassasut danskit
naalakkersuisuinut piumasareqqullugu taakku USA-mut saaffiginnissuteqassasut,
illersornissamut isumaqatigiissutip isumaqatigiinniutigeqqinnissaa
piumasaralugu. Tamannali iluatsissanngippat Kalaallit Nunaata isumaqatigiissut
atorunnaarsissagaa.
Matumanili
ilisimasassarput aana, aallaqqaataani aamma erseqqissaatigisarput,
atorunnaarsitsinissamut periarfissaq aatsaat atorsinnaavarput inuiattut
akuerineqarutta, imaluunniit inatsisitigut illersorneqartumik namminiulluta
inuiaassuserput akuerereerutsigu.
Taamatut
oqaaseqarluta oqaluuserisap pingaaruteqartup ukiorpanngortuni
oqaluuserineqarnerata taama inernilerneqarluni ingerlateqqinnissaa nunatsinnut
tamakkiisumik oqartussaarusunnermik kissaateqarnerup
timitaliivigineqarnissaanik ilallugu naammassineqassasoq siunnersuutigaarput.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Josef
Motzfeldt qutsavigaarput, tulliulluni oqaaseqassaaq Mogens Kleist,
Kattusseqatigiit.
Mogens
Kleist, Kattusseqatigiit oqaaseqartuat.
Illersornissaq
pillugu 1951-imi danskit Amerikamiullu isumaqatigiissutaasa
allanngortinneqarnissaa pillugut aalajangiiffigisassatut Maliinannguaq
Markussen. Mølgaardip siunnersuutaanut Kattusseqatigiinniit imatut
oqaaseqaateqassaagut.
Ukioq
kingulleq oqaaseqaatigisimasagut innersuussutigalugit Naalakkersuisut
Siulittaasuata akissuteqaataa tusaatissatut tigussavarput.
Ilanngullugu
oqaatigissavarput ullumikkut amerikamiut russillu isumaqatigiissutip ABM-ip
atorunnaarsinneratigut pissutsit allanngussammata. Taamaammat
Kattusseqatigiinniit oqaatigissavarput MD pillugu isumaqagiinniarnerit
aallartisarneqalersut eqqarsaatigalugit nunatta inissisimanera nutaamik
naliliiffigisariaqartutut Kattusseqatigiinniit oqaatigerusukkatsigu.
Tassami
illersornissamut isumaqatigiissutip nutarterneqarnissaanut periarfissagut
allaanerulersimammata siornatigumut sanilliullugit.
Amerikamiut
russillu ersarissumik isumaqatigiissuteqassappata, uagut nunatta
inissisimanera tunngavigalugu atorluaasinnaanissarput ujartortariaqarparput.
Nalunngilarpummi 1951-imi illersornissamut isumaqatigiissutip
allanngortinneqarsinnaanissaanut periuserisinnaasagut killeqareeqisut
qallunaat naalagaaffiata oqariartuuteqarnera tunngavigalugu.
Taamaammat
Kattusseqatigiinniit oqaatigerusupparput, illersornissamut isumaqatigiissutip
saniatigut tillægsaftalemik aaqqiisoqarsinnaanissaa sukumiisumik
ujartortariaqaratsigu, qanoq aaqqiisoqarsinnaassanersoq.
Pingaaruteqarpormi
ullumikkut MD pillugu isumaqatigiinniarnermi kalaallit qanimut
ilaatinneqarnissaat sukumiisumik qulaajarneqartariaqartoq, nalunngilarpummi
qallunaat naaalakkersuisuisa siuttuat, aammalu nunanut allanut ministeri
piffissami kingullermi angalasaqattaarsimasut Amerikamut aammalu Ruslandimut,
taamaattorli ataatsimiititaliat taamaallaat paasiniaagaangata
ilaatinneqartarnerput nalunngilarput, tassa Udenrigspolitisk Nævni.
Tamaammat
pingaaruteqarluinnarpoq qallunaat statsministeriata angalanerani nunatsinni
Naakkersuisut Siulittaasuata ilaatinneqartarsinnaanissaa pingaartutut
Kattusseqatigiinniit oqaatigerukkatsigu.
Maannakkumiit
piffissaq aggersumi Naalakkersuisut Siulittaasuata qanimut
ilaatinneqartalernissaa Kattusseqatigiinniit aammattaaq
kaammattuutigerusupparput.
1951-imi
isumaqatigiissutip allanngortinneqarnissaa Kattusseqatigiinniit ullumikkut
takorlooruminaatsipparput, tassami tamatta nalunngilarput isumaqatigiissutip
NATO-mut attuumalluinnarnera eqqarsaatigalugu.
Taamaammat
ullumikkumiit ersarissumik aammalu sukumiisumik qanoq tillægsaftaleliortoqarsinnaanissaanut
ajortortariaqarparput qanorlu atorluaasinnaanerput aammattaaq
qulakkeerniartariaqarparput, qanoq piumasaqaateqarsinnaasanerluta sukumiisumik
aammattaaq naliliiffigisariaqarparput.
Taamatut
naatsumik oqaaseqarluta oqallinnissamut ilaanissarput Kattusseqatigiinniit
oqaatigissavarput.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Mogens
Kleist qutsavigaarput, tulliulluni oqaaseqassaaq Otto Steenholdt, attaviitsoq.
Otto Steenholdt, attaviitsoq.
Siullermik Naalakkersuisut Siulittaasuata akissuteqaammini oqaaserisai ilisarnarluinnarput. Tassa qallunaat nunaanninngaanniit oqarfigineqarpugut, piumasaqarnissatsinnut qallunaat kajumissuseqanngitsut, oqarta ikiuukkumanngitsut. Taamaallaalli sumininnguanik ilaartuiniassagutta neriorsumisaarluta, kisianni iluatinnartoq aajuna akissuteqaammi, tassa Inatsisartut tungaanninngaanniit tikkuarneqarmat, akileraarutitigut, avatangiisitigut allallu aamma isumaqatigiissuteqarniartarnerni amerikamiunut saaffiginnissuteqassasoq taakku tunngavigalugit. Aamma forbindelsesofficereqarsinnaanera isumaqarpunga soqutiginarsinnaasoq. Akissuteqaammi soqutiginarsinnaasut taakkutuaapput.
Siunnersuuteqartoq paasilluarpara, pingaartumik illersornissaq sillimaniarnissarlu pillugit ataatsimiititaliami ilaasortaqatigigallarakkuli, aamma taamani qujanartumik Naalakkersuisut Inatsisartullu isumaqatigiilluinnartut tunuliaqutaralugit ataatsimiititaliami sassarsinnaasarsimagatta.
Isumaqarsimagaluarpunga suliaq imaannaanngitsoq, taamanimiilli aqiliortinneqalersimassagaluartoq, tassami taamani ilaatigut amerikamiut tungaanniit naapinniarneqamisaartugut paasisorilersimagaluaratsigut.
Ilami allaat oqartalersimagaluarluta, amerikarmiut tungaanniit, tassa Danmarki avaqqutiinnarlugu allaat amerikamiunik oqaloqateqarsinnaanerput taakkunannga ajornartutut isigineqanngikkaluartoq.
Isumaqarluinnarpunga tamatuma kingorna nipi allanngoriartorsimasoq, uangalu pasitsaattarpara Danmarkimi naalakkersuisuusartut, tassa nikittaallutik naalakkersuisuusartut, isummaminnik allanngortitsiumannginnertik aamma Amerikamut apuussimagaat, tassami ullumi akissuteqaammi Naalakkersuisut Siulittaasuata oqaatigimmagu Danmarkimi naalakkersuisut oqaatigisimagaat, aamma amerikarmiut isumaqartut, isumaqatigiissutip nutaamik isumaqatigiinniutigineqarnissaa pisariaqanngitsoq.
Piffissami ingerlasumi qallunaat naalakkersuisui ulapaarsimannguatsiaqaat, nunarput pillugu ukiorpanngortunik kisimiillutik aalajangiusimasartik aamma Amerikamit tapersersorneqaqqullugu, angusimannguatsiarlugulumi.
Tassamiaasiit asanerusaq pisinnaanngikkaanni, tullia naammagiinnartariaqarpoq. Uangali taamanernit silarsuarmi pissutsit uterlugit eqqarsaatigileraangakkit, taamanikkut Ruslandimi pisimasut aalajangiisuulluinnartutut tikkuarumasalerpakka.
Qularnanngilaq Thulemik piorsaanissaq kinguartiterneqanngikkuni qatangiinnaratarsinnaasoq. Ukiuni makkunani Amerika silarsuaq tamakkerlugu pissaanilissuartut kisiartanngormat. Nakkutigineqarnerulerunarput nunat piitsunik taaneqartartut pimoorullugu sakkussiariligaat, tassalu atomimik sakkussiarsuit atornagit akikitsumik parteriat atorlugit nunanik pissaanilissuarnik ajunaarnersuaqartitsiniarsarineq.
Killiffik qaangeruminaatsoq uninngavigisariaqarparput, qanoq iliuuseqarniarsaraluta. Tassalu isumaqatigiissut allanngortinneqarsinnaanngitsoq ilassuserniartaraluassallugu, uangali nunatsinnit ilassutiginiarlugit siunnersuutit tamatigut akuersaarneqartarnissaat qularilluinnarpara.
Maani kujasinnerusumik nunatsinni najugaqartutsinnut naammaginakanneraluartoq, Avanersuarmiunut naammaginanngittuarpoq, piniarfiit pitsassuit Avanersuarmiunut qangaaniilli Avanersuarmiut piniarfitoqqaminnik naalagarsiortitaanatik qangatut piniarfiginneqqilersinnaanissaat.
Taama naatsunnguamik aammali Damarkimi naalakkersuisuutartunik pisuutitserpalaartumik, immaqali tunngavissaqarluartumik, oqaaseqatsiarlunga akissuteqaat naamagigallarlugu tiguara., kisianni Folketingimi ilaasortaatitagut suli annerusumik Thule pillugu qanoq iliuuseqartuartariaqartutut maanngaanniit inattorumallugit.
Daniel Skifte, ataatsimiinnermik aqutsisoq, Inatsisartut Siulittaasuat, Atassut.
Otto Steenholdt qutsavigaarput, tulliulluni oqaaseqassaaq siunnersuuteqartoq Maliinannguaq Markussen-Mølgaard, Inuit Ataqagitigiit.
Maliinagguaq Markussen-Mølgaard, siunnersuuteqartoq, Inuit Ataqatigiit.
Ukioq manna 27. april danskit amerikamiullu illersornissakkut isumaqatigiissutaat 1951-imeersoq 51-iliivoq.
Isumaqatigiissut nunasiaanerup nalaani suliaasimasoq kalaallinit akuersaarsimaneqanngisaannartoq, kalaallinullu apeqqutigineqarsimanngisaannartoq atuuppoq.
Siunnersuuteqarnitsinnut patsisaanerpaavoq ukiuni arlalinngulersuni Inatsisartut tamarmiusut isumaqatigiissutip allanngortinneqarnissaa kissaatigimmassuk. Siunnersuullu manna aqqutigalugu tamatumap oqaluuserineqaannarani, pimoorullugu allanngortinniarnissaa sulissutigalugu aallartittariaqartoq isumaqaratta.
Oqartussaaqataanngilluinnarnerpummi arajutsisassaanngitsoq ersersinneqarpoq 1951-imi amerikamiut danskillu isumaqatigiissutaanni kalaallisuunngortinneqarsimanngisaannartumi.
Isumaqatigiissutip artikel 2-ani, 3b-mi ilaatigut ima allassimavoq: "Kalaallit Nunaata silaannaani imartaanilu sumiluunniit qallunaat naalagaaffianut akiliutitaqanngitsumik piumasaqaatitaqanngitsumilluunniit amerikamiut angalasinnaatitaapput, sumiluunniit sakkutooqarnikkut piorsaasinnaapput, sakkutooqarfiliorsinnaallutillu".
Artikel 5, 3-milu tamanna naqissuseqqinneqarpoq, sumiluunniit angalanerminni misissuivigineqaratik tulannissaminnillu akileraarutitaqanngitsumik angalasinnaasut, kiisalu artikel 6-mi qallunaat naalakkersuisuisa kissaatiginngippassuk, amerikamiut kalaallillu attaveqatigiinnissaat tamanna pinaveersaartariaqartoq.
Artikel 7-mi allassimavoq, amerikamiut sukkulluunniit sakkutooqarnermut tunngatillugu, nunatsinnut isertut akileraarnikkut ilanngaaserisutigut, atuinikkullu akitsuutinik akiliisinneqassanngitsut, piumasaqaateqarfigineqassanngitsullu, eqqussinerminnilu sunilluunniit sakkussianut tunngasutigut akileraarusersorneqassanngitsut.
Artikel 11-mi allaat allassimavoq, amerikamiut sakkutooqarfigisimasaminni, imaluunniit sumiiffigisimasaminni qimatsilerunik saliisariaqanngitsulluunniit.
Isumaqatigiissummi aalajangersakkat taama inuiannik kalaallinik oqartussaatitsinngitsigalutillu suusupaginnitsigisut kiap inuiattut imminut tatigisup, tatigerusuttullu ullumikkut 2002-mi akuersaaginnarsinnaavai. Allaallu allanngortinnagit ilassutitut isumaqatigiissusiorfigiinnarniarlugit.
Ajuusaarnaqaaq Naalakkersuisut Siulittaasuata akissuteqarnermigut ilassutaannarnillu akuersaarniarnermigut takutimmagu allannguinissaq naalakkersuisooqatigiinnit pimoorunneqanngitsoq, Naalakkersuisullu inuiaat kalaallit sinnerlugit tamatuminnga piumasaqarnissamut danskit naalakkersuisuinut tunniutiinnarsimasut.
Siunnersuuteqartutut akuersaarsinnaanngilluinnarparput isumaqatigiissut allanngortinnguarnagu saammarsaasiinnarluta ilassutaannarnik isumaqatigiissuteqartoqarniarmat.
Tamanna Inatsisartuni inuiaqatigiinnilumi piumasaqaatinut tunutsineruvoq, tunniutiinnarnerullunilu.
Naalakkersuisut angusatuarisimasaat tassaavoq, missilinik nutarterinissamut isumaqatigiinninniartoqalissappat nerrivimmi issiaqataanissaq, issiaqataaginnarnerulli suna imaraa, missilinik illersuusiornissamut naaggaarsinnaatitaaneq. Issiaqataanissaq sunik pisinnaatitaaffiliiva, ilami issiaannarneq tusarnaarnerlu naammanngillat.
Naalakkersuisut akissuteqarnerani oqaatigineqarpoq issiaqataanermi isumannaallisaaneq, avatangiisit, nunat tamalaat, illersornissakkut isumaqatigiissutaasutigut killiliussat allallu eqqarsaatigalugit pisariaqarsorisatsinnik piumasaqaateqarsinnaassasugut.
Ima paasisariaqarnerpoq, missilinik qaartartunik illersornissamut nutarterinissaq akuerisinnaavarput, isumaqatigiissummut tapiliussanik akuersisinnaagussi.
Tassa taamak oqarneq taama isumaqarsimappat, tassaavoq niueqatigiinngissuteqarneq, Naalakkersuisup akissummini taamaattoqassannginneranik oqaatigisaa. Taava sumiippugut.
Ippassaq TV-avisikkut ersarissumik nalunaarutigineqarpoq russit amerikamiullu missilinik illersuusiornissamut nutarterinissaq isumaqatigiissutigisimagaat. Taamaattumik Avanersuarmi radar-eqarfiup tamatumani qitiulluinnarnera erseqqissumik oqaatigineqartartoq pillugu, piffissaavoq, minnerunngitsumik 1951-imi isumaqatigiissutip taamatut iluseqarneranik akuersaannginnerput erseqqissassallugu.
Maannakkut 1951-imi isumaqatigiissutip allanngortinnissaa inimi maani ersarissumik naqissusinngikkutsigu avammut kiinnernitsinni sakkukissaqaagut inuiattullu imminut suli akuerisimassanata.
Tassami taamaaliornikkut nunami maani nunalittut amerikamiut danskillu qulaatiinnarluta qanorluunniit iliorsinnaanissaat suli akuersaassavarput, isumaqatigiissummut ilassutaannarnik akuersisoqassappat.
Tupinnaqaaq Inatsisartunut kingullermi qineqqusaarnermi,
ukiarmilu Folketingimut qineqqusaarnermi, partiit Kattusseqatigiillu tamarmik
qineqqusaarutaat tununneqaannassappat. Taava tatiginassuseq sumiippa. Oqaannaq piviusunngortitsinertaqanngitsoq
naammalerpoq.
Taamaattumik
maani inatsisartoqatigut kaammattorusuppakka, qineqqusaarutit tamakku
ilumoorussimagunikkit partiilersoratik siunnersuutitsinnut akuerseqqullugit,
Naalakkersuisullu inassutaanut itigartitseqqullugit.
Namminiilivinnissarpummi
pimoorukkutsigu, apeqqummi matumani tunniutiinnartariaqanngilagut.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Maliinannguaq
Markussen-Mølgaard qutsavigaarput, taava maannakkut oqaaseqassaaq
Naalakkersuisut Siulittaasuat.
Jonathan
Motzfeldt, Naalakkersuisut Siulittaasuat, Siumut.
Partiit
oqaaseqartuinut qujavunga, aammalu erseqqissumik oqariartuutilinnut,
Kattusseqatigiinninngaanniit, taamatullu aamma attaviitsumit.
Tassa
tapiliussanik isumaqatigiissuteqarsinnaanermut periarfissat Naalakkersuisut
saqqummiussaat aqqutigalugit aamma suliap matuma ilusilerneqarnissaa
suliaralugu ingerlaneq Naalakkersuisunut tapersiillutik oqaaseqarfigimmassuk.
Aamma
Siumup oqaaseqartuanut Mikael Petersenimut oqaatigisaanut tunngatillugu
neriorsuutigerusussavara Nunanut Allanut Sillimaniarnermullu
Ataatsimiititaliaq qanittumik Naalakkersuisunit suleqatigineqassasoq,
maannakkut danskit peqatigalugit misissuinissat ingerlanneqarnerannik suliaq
qanoq ittuunerannik ilisimateqatigiittarnissamik.
Taannalu
aamma maani inimi partiinut tamanut Kattusseqatigiinnullu oqaatigerusuppara.
Atassutip
oqaaseqartuanit taaneqartut, tapersiinerup saniatigut maluginiakkakka USA-mik
illersorneqarnissamut Thulemut tunngasut kisiisa pinnagit, aamma USA-mit
niueqatigiinnissinnaanermi, suleqatiginnissinnaanermik annertunerusumik
niuernikkut, takornariaqarnikkut allatigullu.
Aamma
Naalakkersuisunit ammaffigineqarnissaanik oqaatsit isumaqatigilluinnarakkit
oqaatigissavara, isumaqarama taamaalilluni periarfissat pissusiviusunut
atuuttunut naleqquttuusut.
Amerika
avannarleq sanileraarput, niuerfissattullu aamma ammanera ilisimavarput, aamma
illersornissap tungaatigut, tassani inissisimanerput najoqqutaralugu NATO-mi
ilaasortaavugut, tassanilu illersorneqarnissatta nunarujussuatta nammineq
illersorsinnaanngisatta, kisianni tassani iligisagut
isumaqatigiissuteqarfigisagut pisussaaffigisaat najoqqutaralugit tatigaagut
upperalugillu.
Nunatta
allanik tiguarneqarnani, uagutsinni maani najugaqartuni inuuffigineqarnissaa
aamma illersortuassagaat. Illersoqatigiinni NATO-mut ilaasortaanermut
aqqutigalugu. Tamakkuupput aamma tamatumani oqaatigissallugit
pinngitsoorneqarsinnaanngitsut.
Inuit
Ataqatigiit oqaatigisaanut aamma ilisarnarpoq, siornatigut
oqaatigisarsimasagut aamma tassaniittut oqaatigineqarmata. Uanilu Inuit
Ataqatigiinnut oqaatigissavara, maannamut Amerikamut isumaqatigiinniarnerit,
ilumoorpoq unittoorsimasutut pissuseqarnerat, aamma taanna siusinnerusukkut
oqaatigisarparput.
USA
11. septemberilli kingorna suli sorsuppoq, taamaattumillu sorsunnermi nalaani
apeqqutit nunani eqqissisimaffiusuni, soorlu nunatsinni, naammassiniakkat
ajoraluartumik kinguartissimagai malunnarpoq, tassa septemberimi siorna
inaarniarlugit isumaqatigiissutissat aamma naammassiniagassarigaluagut manna
tikillugu ingerlaqqissinnaasimanngillat, isumaqarpugullu tamatumani
pissutaasoq USA ulluni makkunani Afghanistanimi sorsummat, aammalu silarsuarmi
terroristinut sorsunnermik ingerlatsilluni.
Kiisalu
aamma Kattusseqatigiinninngaanniit oqaatigineqartoq, maluginiagara ataaseq
uaniittoq aamma nuannaarutigaara, aamma Mogens Kleist nammineq Nunanut Allanut
Sillimaniarnermullu ilaasortaasutut naliliineratut taanna tiguara.
Tassa
tapertaliussanik isumaqatigiissutit, taakku aqqutissatut aamma tikkuarniagai,
maluginiakkanni tassaniimmata.
Taamatullu
aamma attaviitsup oqaaserisami naggataatigut Avanersuarmiut
piniartoqarfimminnut naalagarsiortitaallutik qangatut piniarfeqaqqinnissaannik,
tassa nunatoqqaminnik kingumut piniariarfigisinnaasaat ammarneqarnissaanik
oqaasii.
Tassaapput
ilumut september-imili ukiarmi naammassisassatut neriuutigisimasarigaluagut,
kisiannili maannakkut kinguarsarneqartutut misigisimasagut.
Oqaatigissavara
aamma naggataatigut, Naalakkersuisut Avanersuaq pillugu nutaarsiassaqanngillat,
tassa pissutsit Avanersuup sakkutooqarfianut tunngasut, maannakkut sumi
tamarmi uninngasutut pissuseqarpoq.
Aammalu
Inuit Ataqatigiit oqaaseqartuata eqqorunarpaa, silarsuarmi isumaqatigiissutit
ilaat ABM-imik taaneqartartoq, maannakkut atorunnaartussaq, tassunga
taarsiullugu russit amerikamiullu isumaqatigiissuteqarnissaat, tassa atomimik
sakkussakillisaanissamik siunertaqartoq, taanna qularnanngitsumik
inissinniarneqarpoq, taamatullu aamma Kinamut oqaloqatiginninnissamik
ilaqartitsinissaa danskit aamma kissaatigisimavaat.
Tassuunakkut
qularnanngilaq isumaqatigiissutip nutaap, ABM atorunnaaraluartoq atominik
sakkukillisarnissamut siunertaqartumik aaqqissuussinissat suli
ingerlanneqarput, taannalu aamma Naalakkersuisuninngaannit nuannaarutigalugu
oqaatigissavara.
Naggaterpiaatigut
oqaatigilara una, statsministeri maaniimmat isumaqatigiissut isumaqarpunga
Naalakkersuisut manna tikillugu apeqqummi tassani suliarisartagaanni angusanit
pitsaanerpaasoq.
Ukiut
30-t kingulliit ingerlaneranni uagut oqallinnermi peqataasimasugut, aamma
taamak nalilerusupparput. Danskit nikeriarsinnaanngilluinnarnerat uani
oqaatigereerpara, erseqqissarlugulu.
Kisiannili
aatsaat januarimi danskit qisuariarnerat, soorlu aamma Siumup oqaaseqartuata
taanna Mikael Petersenip erseqqissaatiminik aamma taagaa, qisuariarnerat
taanna aamma angusaavoq annertooq, namminneq peqataallutik, peqatigiilluta
isumaqatigiissut maannakkut misissussagatsigu, taavalu iluarsisariaqartut
tikkuakkagut.
Aamma
oqaatigerusuppara tamakkununnga ilaassapput aamma amerikamiut
killeqanngitsumik nunatsinni iliorsinnaanerannut, suut pineqartut
erseqqissumik aamma ilanngunneqarnissaanik apeqqutit, siusinnerusukkulli aamma
taaneqartareersut, tikinneqanngitsoornavianngimmata.
Taamaattumik
aqqutissaq taanna amerlanerusunik taperserneqarmat, qujassutigaara. Tillægsaftale
aqqutigalugit suliassap ingerlanneqarnissaa, tassani danskit naalakkersuisui
peqatigalugit misissueqqissaarnerup kingornatigut.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Naalakkersuisut
Siulittaasuat qutsavigaarput, tulliulluni oqaaseqassaaq Mikael Petersen,
Siumut.
Mikael
Petersen, Siumup oqaaseqartua.
Siullermik
Naalakkersuisut Siulittaasuata oqaaseqaqqinnermini oqaatigisai soorunami
qujassutigissavakka. Soorunami Siumuminngaanniit
tulluusimaarutiginngitsuunngilarput nunatsinni massakkut Naalakkersuisut,
aamma taamaalilluni Inatsisarut piumasaat timitalerniarlugit ilungersorluni
naalakkersuinikkut sulinerminni alloriarmata.
Soorunami
partiikkaarlugu, inuttullu ataasiakkaarluni nalilersorneqarsinnaammat angusaq
qanoq pitsaatiginersoq, taanna ataasiakkaarluta partiitullu naliligassaraarput.
Naalakkersuisut Siulittaasuata ilungersorluni, allaat oqaaseq una atormagu,
allatut ajornartumik allaat pinngitsaaleerpalaartumik iliuuseqarluni
statsministeri isumaqatigisimammagu, 1951-imi isumaqatigiissutip
nutarterneqarnissaa siunertara.
Misissueqqissaarneq
kalaallit qallunaallu sanileriillutik, issiaqatigiillutik misissoqqissaarlugu
aallartissagaat. Siornatigut taamatut angusaqartoqarnikuunngilaq, massakkut
taanna angusaq imaannaanngitsuuvoq, taamaalilluni tunngavissat ersarissut
aallaavigalugit oqallinneq ingerlanneqarsinnaaleqqullugu, misissuineq
naammassippat.
Isumaqarpunga
taanna isiginngitsuusaarneqarluinnartoq, taamaattumik tupigaara
siunnersuuteqartup matumani oqaaseqarnermini oqaatigimmagu
naalakkersuisooqatigiit massakkut suliaminnik pimoorussinngilluinnarlutik
ingerlatsisut.
Ila
tupinnassusia, massa Naalakkersuisut Siulittaasuata akissuteqaammini
erseqqissaraa, misissueqqissaarneq aallartinniartoq, aammalu taanna
naammassippat Inatsisartut ilisimatinneqassasut oqaaseqaqqinnermini
oqaatigalugu.
Allaallu
tamatumani misissuinermi aamma Inatsisartut nunanut allanut
ataatsimiititaliaata qanimut suleqatigineqarnissaa aamma neriorsuutigalugu
oqaatigalugu.
Taannaannarluunnit
qiviaraanni taallugulu ila angusaavoq alloriarneq pitsaanerpaaq ullumikkumut
angusaasoq 1951-imi isimaqatigiissutip nutarterneqarnissaa pillugu, nutaamik
isumaqatigiinniuteqarnissaa pillugu 1990-ikkunni Inatsisartut piumasaqarmata,
aamma tamanna piumasaqaat allanngunngilaq.
Siumukkunnit
erseqqilluinnartumik oqaatigaarput isumarput allanngunngitsoq.
Atassutikkuniit
aamma tamanna piumasarineqarpoq, Kattusseqatigiinni aamma.
Taamaattumik
Inuit Ataqatigiit tungaanninngaanniit partiit allat oqallaatigaluni
tamatumuuna tunniutiinnarsimasutut nipilimmik oqalunnerat
akuerineqarsinnaanngilluinnarpoq.
Taamaattoqanngilaq,
suliaq ingerlavoq imaannaanngitsuuvoq aamma Kattusseqatigiit oqaaseqartuata
oqaaserisai ilumoornerartariaqarpara uangattaaq tassa 1951-imi danskit
Amerikarmiunik isumaqatigiissutaat, paasereeratsigu NATO-mi ataatsimoortumik
tunngaviusumik isumaqatigiissummik atalluinnartuusoq.
Aamma
tamanna siunnersuuteqartup taamanikkut nunanut allanut sillimaniarnermut
ataatsimiititaliami siulittaasuugami, Bruxellesimi angalanitsinni aamma
paasivaa.
Taamaattumik
nuerterinissamik piumasaqarnermi nalunngilarput nukippassuit atussallutigit.
Aamma sivitsuloorsinnaasoq naatsorsuutigereersinnaavarput.
Taamaattumik
piumasaqaat taanna allanngortinngikkaluarlugu sulissutigiuarlugu
utaqqiinnarnagulu naammassinissaa, qallunaat aamma siusinnerusukkulli allatut
ajornartumik ilassutitigut nutarterisarmata, aamma isumaqatigiissummi
periarfissaareermat isumaqatigiissummi tunngaviit allanngortarneri
naapertorlugit, ilassutitigut allannguisoqartarsinnaasoq.
Tassa
isumaqatigiissummi taanna periarfissaatitaavoq.
Bekendtgørelse
isumaqatigiissut pillugu nalunaarut Folketingip nalunaarutaat, taanna aamma
pigisarput taamatut periarfissamut tikkuussisimasoq arajutsisimanngilarput.
Taamaattumik
isumaqarpunga tamanna periarfissaq soorunami pitsaanerpaap tullia uagut
tungitsinniik isigalugu, Siumumiit isigalugu pitsaanerpaat tulleraa taanna
ilassuteqartitsinissaq.
Taanna
pitsaanerpaajuassaaq tamakkiisumik nutarterineq.
Misissuineq
naammassippat Naalakkersuisut siulittaasuara oqarneratut misissueqqissaarneq
naammassippat, taava nalilerneqassaaq ilassutitigut
isumaqatigiissusiornissamut tunngavissat erseqqissarneqassasut. Imaassinnaavoq
misissuinerup inernerigaa, ila imminut akilernerpaassasoq aamma qallunaat
imaassinnaavoq isumaqatigileriataarsinnaagaat, 1951-imi isumaqatigiissut
nutarterneqarnissaa pitsaanerussasoq.
Tassa
pissutsit allanngoriartorput nunarsuarmi. Taamaattumik massakkuugallartoq
killiffigisami, ilassutitut isumaqatigiissusiorsinnaanermut periarfissat
taakkartukkagut Siumuminngaanniit, ilanngullugit inussiarnersumik
tiguneqarnerat aamma nuannaarutigerusuppara.
Tassa
tassani taasagut erseqqissalaarusuppakka. Tassa avatangiisitigut apeqqutit
imaannaanngitsut massakkut ilungersuutigaagut amerikarmiut Pituffimmi
radareqarfiannut tunngassuteqartoq. Aamma minnerunngitsumik
sakkutooqarfiugallarmalli avatangiisitigut suliassarpassuit taakku massakkut
ingerlanneqartut, saliinerujussuit aamma siunissami avatangiisitigut
eqqanaarsarnissarput pitsaanerpaamik inissisimanissarput eqqarsaatigalugu,
isumaqatigiissusiortariaqarpugut.
Kiisalu
aamma akileraaruteqartitsinikkut apeqqutini amerikarmiut tappavani
atuinerminni, nunamik atuinerminni nunatsinni akileraarutitigut
akileraartarnikkullu qanoq aaqqiivigineqarsinnaanerat pillugu aamma
oqaloqatigineqartariaqarput.
Amerikarmiut
nunatsinni sumiluunniit atuisinnaanerat sorsunnerup eqqissisimanerullu
nalaani, aamma taanna apeqqut pillugu uagut nammineq amerikarmiunik
isumaqatigiissusiortariaqarpugut. Ullumikkumut aamma 1990-ikkunnili
piumasaqaaterput - Thuletoqqap nunatsinnut utertillugu tiguneqarnissa
angusariaqarparput. Aamma taanna immikkut
isumaqatigiissusiorfigineqarsinnaavoq.
Kiisalu
aamma minnerunngitsumik nalunaarasuartaateqarnikkut Amerikamut attaveqarnerup
pitsaanerulersinneqarnissaanut Thulemi radareqarfik aqqutigalugu, teknikkikkut
periarfissat atorluarlugit, aamma civilimik atuisinnaaneq aammalu
sakkutooqarnikkut, tassa sakkutooqarnermut nasiffeqarnermut immaqa taama
taagaanni, radareqarnermut tunngasut immikkoortillugit
ingerlanneqalersinnaaneri tamakku ilanngullugit isumaqatigiissutaasariaqarput.
Siumumilli
isumaqarpugut tamakku pillugit ilami angusinnaasuugutsigu nunatta
nammineerluni Amerikarmiunut toqqaannartumik isumaqatigiissuteqarsinnaanera
ila qanoq nuannertigissagaluarpa.
Soorlu
aamma massakkut Ef-minngaanniit taamanikkut anigatta massakkut EU-jusup
nunatsinniik toqqaannartumik isumaqatigiinniarfigineqarsinnaanera,
Danmarkimiinngaannik akuersissutaareersoq, aamma tamanna ingerlapparput.
Sooq
amerikamut aamma taamaaliorsinnaassanngilagut?
Tamakkuupput
periarfissat pitsassuit anillariarfigisinnaasagut, taamaattumik qanoq
susoqanngitsumillu nalilersuineq atorsinnaanngilluinnaqqissaarpoq.
Naggataatigut
Inuit Ataqatigiinninngaanniit oqaaseqartup oqaatigisaa una Inatsisartut
ataatsimoorlutik oqariartuuteqartariaqartut, Naalakkersuisunut
piumasaqarlutik. Tassa USA-mut saaffiginninnissamik illersuissummut
isumaqatigiissutip nutarterneqarnissaa piumasaralugu.
Soorunami
taanna pillugu USA-mut saaffiginninnissamut tunngassuteqartillugu
Naalakkersuisut oqaloqatigiuarpagut. Aamma massakkut Naalakkersuisut
siulittaasuata isumaqatigiissutaa, qallunaat peqatigalugit isumaqatigiissutip
misissoqqissaarneqarnera taakkua naammassippatta isumaqarpunga
alloriarnissamut isummernissamut tunngavissaqalersimassasugut.
Taamaannak
oqaaseqarlunga Naalakkersuisut akissuteqaataanut qujaqqippunga.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Aappassaanik
oqaaseqarpoq Mikael Petersen, qutsavigarput. Tulliulluni Josef
Motzfeldt, aappassaanik oqaaseqassaaq.
Tassa
erseqqissaatigissavara oqaluttarfimmukarnerani aappassaaneernermi 5 minutit
oqaaseqartussaammat.
Josef
Motzfeldt, Inuit Ataqatigiit oqaaseqartuat.
Matumuuna
Inatsisartunut eqqaasitsissutigissavara isumaqatiigiissutip oqaluuserisatta
taaguutaa malugeqqullugu.
Imatut
qulequtaqarpoq Kalaallit Nunaata illersorneqarnissaa pillugu 1951-imi
isumaqatigiissut.
Kalaallit
Nunatta illersorneqarnissaa pillugu isumaqatigiissut kalaallit inuiaqatigiit
naalakkersuisaluunniit ilisimangilaat qanoq imaqarnersoq.
1968-imi
ilassutitut isumaqatigiissut qanoq imaqarnersoq uagutsinnut
takutikkumaneqanngilaq. Massakkut naak sakissatik tillullugit piumasaqaatinik
sakkortuunik oqaaseqarlutik nutarterisariaqarnermik allamik
taarsiisariaqarnermik oqaaseqartartut.
Ullumikkut
Anders Fogh Rasmussen maani landshøvdinginngorsimavoq, Inatsisartullu
Namminersornerullutik Oqartussat inatsisiliortuusut isumaqarfiisut Landsrådetoqqatut
killeqartigisumik piginnaatitaaffeqartutut isigipput.
Allaanngilaq
nunarsuarmi pissutsit ukiut 51-it ingerlaneranni allanngoriartorsimanngitsut.
Allaanngilaq ippassaq FN-ip ataani Permanent Forum, nunanap inoqqaavinik
illersuiffik, atulersimanngitsoq.
Allaanngilagut
1951-imi pissutsini uninngasimasugut uagut uninngaannarusuttugullu. Tamanna
pakatsinarpoq assut.
Naalakkersuisut
siulittaasuat oqarpoq, Amerika sanileraarput aamma niuernikkut attavigaarput.
Naalakkersuisut siulittaasuat isumaqarnerpa inuiaat kalaallit,
isumaqatigiissummik nunamik illersorneqarnissaanik isumaqatigiissummik
allanngortitsiumanerata USA-p niueqatigineqarnera kipitissasoq?
Tassaqa.
Taamaassimasappat oqartarnerattut USA tassaasimassooq naalagaaffik
tatigineqarsinnaanngitsoq, naalagaaffipajuk.
Soorlu USA
tamakkununnga oqaaseqartartoq aamma USA-mik niueqateqarnermut
annaassagaluarutsigu sullugisassaqarpugut? Tassaqa.
Puisit
puisit puisit puisit puisinut tunngasunik nioqqutissiaminernik sunilluunniit
pisiumanngitsoq eqqussiumanngitsoq inerteqquteqartoq inatsiseqarnermigut.
Tassa niueqatigilluagarput?
Aalisagarsilaartarunnarsivoq
kisiat killeqartorujussuarmik.
Siumut
oqaaseqartuata oqaatigaa Anders Fogh Rasmussen Naalakkersuisut siulittaasuat
isumaqatigiissuteqarsimasoq isumaqatigiissummut qulaajaasussamik. 1998-imi
1999-imilu annoraaqudvalgimik taallugu qulaajaasitsivugut, Inatsisartut
Naalakkersuisullu sukumiisumik suliaat atuagakullassuanngorluni
saqqummereerpoq. Taamaallaat naalakkersuinikkut isummerfissat tikinneqarmata,
ataatsimiititaliap susassaqarfiginnginnamigit Naalakkersuisunut
naalakkersuinikut isummersorfissatut killikkami suliani iperarpaa.
Taava suna
massakkut qulaajaqqinniarneqarpa?
Sivitsorsaaneq
tassa kisimi.
Ajoraluaqaaq
danskit naalakkersuisuni naalagaqarnerup akuersaarneqartuarnera ullumikkut
uppernarsaqinneqarmat.
Atassutikkormiut
oqaaseqartuata qujaniutigilluinnaqqissaarpaa danskit naalakkersuisagooq,
najuunnissarput isumaqatigiinniarnissani akuerisimammagu.
Ila
qujamasuutiginiagaq sulluginaraluassusia.
Qunoriarneq
annertooq ullumikkut takutinneqartoq ajuusaarnarpoq. Inatsisartut kingullermik
oqaluuserinninneranni 1997-imioqqooqaaq, piginnaatitsissut Naalakkersuisut
Siulittaasuannut tunniunneqartoq malinnagu ingerlasoqarsimavoq. Anders Fogh
Rasmussen oqarmat, taassuma oqaasii naalaganngortinneqarput.
1968-imi
isumaqatigiissutit suunuku imarisimagai? Aqqartartut atominik sakkullit
imartatsinniippat? Timmisartumik atominik sakkussanik usisunik silaannarput
ingerlavigineqarpa?
Tamakku
ilisimanngilagut, aali taaguuteqartoq "Kalaallit Nunaata
Illersorneqarnissaanut Isumaqatigiissut".
Nunarsuarmi
qaqqarsuarni narsaannarsuarni sinerissamilu inuiaat piitsuugaluartut
amerikamiut naalaganngortillutik imminnut nunaminnik atuinerannik,
akerliullutik oqartarnerat yankees go home, taanna nalunngilarput. Nammineq
uagut aamma atortarnikuuarput.
Ullumikkut
pissutissaqangilagut taama oqassalluta pissutissaqanngikaluarpugut.
Isumaqatigiinniarnissamik
nutaamik nutarterinissamik piumasaqarnissarput taamaallaat saqqummiukkutsigu.
Danmarkip
EU-mi ikkukkaluttuinnarnerani annilaangassuterput Naalakkersuisut
isummerfigissallugu piareersimasimanngitsut paasivagut.
Isumaqatigiissut
ullumikkut oqallinneq aalaavigalugu isiginnaarusaassavarput
attoqquneqanngimmat attorsinnaanagu.
Taavalu
aamma Siumup oqaaseqartuata aappassaanik oqaaseqarnerani isumalluarsaarutigaa
USA toqqaannartumik isumaqatiginiarsinnaagipput. Uummannaq pillugu
ukiorpassuit pigaluarparput nikeriarfeqanngitsoq.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Josef
Motzfeldt qutsavigaarput. Tulliulluni oqaaseqassaaq Mogens Kleist aappassaanik
sivisunerpaamik 5 minutsit.
Mogens
Kleist, Kattusseqatigiit oqaaseqartuat.
Qujanaq.
Oqaaseqarnitsinni tassa erseqqissaassutigivarput aamma inatsisit tassa
qallunaat grundloveat taanna allanngortinngikkutsigu, qallunaat naalagaaffiata
nunanut allanut tunngasut illersornissamullu tunngasut oqartussaaffigivai.
1951-imilu
isumaqatigiissut toqqammavigalugu nunasiaatitaanitta nalaani taanna
isumaqatigiissut sananeqarsimavoq.
1968-imi
Folketingemi oqallittqarmat, timmisartorsuut nakkarnerata kingorna, 1968-imi
taamanikkut Folketingemi ilaasortaatitarisarput Nikolaj Rosingi,
timmisartorsuup nakkarnerata kingorna Folketingemi oqallinnerminni
ersarissumik oqaatigivaa, 1951-imi isumaqatigiissutip nutaamik
naliliiffigineqarnissaa. Taamanikkullu naliliiffigineqartussatut
oqaatigineqarsimavoq.
Aammalu
1968-imi oqallinnermi ersarissorujussuarmik oqaatigineqarpoq, aatsaat taamatut
isumaqatigiissut unitsinneqarsinnaasoq NATO-minngaanniit anigaanni.
Imaluunniit
isumaqatigiissuteqartut ilaannit aninikkut marluullutik isumaqatigiissimasut
aappaat aniniarpat, taava aatsaat taanna isumaqatigiissut atorunnaartussaasoq.
Soorunami
maani oqallissinnaavugut annertungaatsiartumik nutarterisinnaanermut
isumaqatigiissummut tunngatillugu, kisianni killeqarpoq, uagut
iliuuseqarsinnaanerput tamatta nalunngilarput.
Tassalu
uagut nunanut allanut attuumassuteqartut oqartussaaffiginnginnatsigit,
Grundlove tunngavigalugu, kisianni periarfissat ujartortariaqarpagut taanna
allanngortissinnaanngikkutsigu uagut oqarpugut taavami pitsaanerunngila tillægsaftalemik
sanasinnaaguttaa?
Periarfissarisinnaasagut
tassuuna ujartortariaqarpagut. Imaanngilaq tunniutiinnartugut Maliinannguaq
Markussen Mølgårdi oqarnermini, aa tassa tunniutiinnartutut uagut
taakkartorluta pivaatigut, taamaattoqanngilaq ilissituulli taassuma
isumaqatigiissutip nutarterneqarnissaa uagut aamma piumasaqaatigaarput,
kisianni periarfissaqanngikkutta periarfissatta tullia ajartortariaqarparput.
Tassalu tillægsaftale.
Tillægsaftalemi
taamatut sananitta isumaqatigiissuteqarnitsinni periarfissarisinnaasagut
assigiinngitsut ujartortariaqarpagut. Massakkut russit amerikarmiullu ABM-imut
isumaqatigiissummut tunngatillugu atorunnaarsitsinerata kinguneranik, nunatta
inissisimanera allaanerulerpoq.
Taava uagut
qanoq atorluaasinnaavugut? Taanna ujartortariaqarparput.
Tillægsaftaleliortoqassappat
periarfissarisinnaasagut ujartortariaqarpagut qallunaat naalagaaffiat
suleqatigalugu, ataatsimut suleqatigalugu.
Maannakkut
taamatut amerikarmiut russillu isumaqatigiinniarnerminni qallunaat
tungaaninngaannit oqaatigineqarpoq, nunatsinni Inatsisartut aamma
tusarniarneqartassasut, kisiat ajoraluartumik piffissami tassa kingullermi,
qallunaat nunanut allanut ministeriat ukioq kingulleq septemberimi
udenrigsministerinngunngikkallarmat, Washingtonimeeqatigisarput,
arlaleriarluni Washingtoniliarpoq Moskvaliarpoq taavalu qallunaat
statsministeriat Amerikaliarluni.
Taamaattorli
paaserusunnarpoq Naalakkersuisut siulittaasuat, tassunga sooq aamma
ilaatinneqarsimanngimmat aaligooq qanimut ilaatinneqarniartugut. Taamaattoq
taamaallaat ataatsimiititaliaq tusarniaanernut tunngatillugu angalagaangat
ilaatinneqartarpoq, allamik naamik.
Taannaana
uagut tungitsinninngaaniik Kattusseqatigiinniit oqaatigigipput
oqariartuutigerusukkipput, Naalakkersuisut Siulittaasuat qallunaat
statsministeriat aammalu udenrigsministeriat ilagalugit
isumaqatigiinniarnernut taamaattunut oqaloqatiginnerni ilaasinnaanissaat
ujartoripput.
Taavami
qanoq ilaa illua tungaatigut
kinguneqassava ataatsimiititaliami ilaasortaannaat taamatut ilaatinneqarlutik
imaattorpata. Taanna ajunngitsorujuugaluarpoq, kisianni nunarput sinnerlugu
Naalakkersuisut siulittaasuat taamatut ilaasinnaanissaa uagut tungitsinniit
pingaartipparput.
Taamaammat
periarfissarisinnaasagut ullumikkut suuppat, tassa taakku ujartugassagut.
Aamma Mikael
Petersenip ersarissumik oqarpoq aamma uagut oqaatiginikuuarput
isumaqatigiissut NATO-mut attuumassuteqarluinnartuummat taanna
allanngortikkuminaatsorujussuuvoq. Taamaattumik pingaaruteqarpoq
ujartuissalluta pitsaanerpaamik nunatsinnut iluaqutaasinnaasumik. Qujanaq.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Mogens
Kleist qutsavigaarput, tulliullunilu oqaaseqassaaq partiini oqaaseqartartut
avataatigut Lars- Karl Jensen.
Lars-Karl
Jensen, Siulittaasoqarfimmi ilaasortaq, Siumut.
Aap, uanga
Siumumit oqaluttorput akornusernianngikkaluarlugu isumaqatigiissutip
nutarterneqarnissaanut isumaqatigiinniarnermi Naalakkersuisut
issiaqataanissaat pingaartittorujussuuara.
Misissugassaqaqaaq
suli aamma una Uummannap imaluunniit Dundasip utertinnissaannaluunniit
eqqarsaatigalugu avanersuarmiut taanna noqqaassutiigisaat
saneqqunneqarsinnaanngilaq, kisianni aamma misissugassaqaqisumik oqarninni
pivara avanersuarmiut piniariartarfitoqartik Uummannaq nunakortik
utertissagunikku, aamma tassani qulakkiigassaqarput imaannaanngitsumik. Tassa
oqaluttut ilaata taallatsiarpaa 1968-imi timmisartorsuaq nakkarnikuuvoq,
qaartartorsuit atortui usigisaasa ilaat nassaarineqanngillat immaqaluunniit
tamarmik mingutsitsineq taavani misissuiffigineqanngilaq naammattumik.
Tamakkuupput aamma nunap attartukkap mingutsinneqarneranik
utertinneqarnissaanillu oqalunnermi qulakkeerniaqqaagassat.
Isumaqarpungalu
ataatsimiititaliaq aamma tassunga attuumassuteqartoq pinngitsoorani
tamakkuninnga assaasariaqartoq, Avanersuarmiut isumallualussinnarteriarlugit
utertitsisinnaaneq angugutsigu aamma pakatsissutissaqarnissaat
minnerutinniarlugu.
Tassami
nalunngisatsitut 1968-imi timmisartosuup taavani siku putuinnarlugu imaanut
nakkarluni kivineratigut, taassuma kingunerisaanik inuit ataasiakkat
taarsiiffigineqarput inuk ataaseq 50.000,-kronemik. Pequtigalugu
mingutsitsinermik sunnerneqarsimasinnaanerat aarleqqutigineqarmat.
Taavani
piniakkat qanoq sunnigaanerat annertunerusumik misissuiffigineqarnersoq
oqaatigisinnaanngilara, isumaqapunga misissuineq annikeqisoq.
Taavalu
aamma umiartortutut angalanitsinni ilisimasaqarpugut, aamma immaqa
ataatsimiititalimi soqutiginarsinnaasumik, Loranstationeqarfimmi immaqa
taasinnaasarput Narsarsuarmi tassa Dundasip kujataani aqquserniorneqarmat,
sioqqat amerikaminngaaneersut nunatta siorarinngisai qallersuutigineqarput
assartorpagut. Tamakkua suuppat? Sooq nunatta siorai atorneqanngillat?
Isumaqarpunga ataatsimiititaliami aamma paasiniassallugit peqqutissaqartoq.
Saliisoqanngilaq
annertunerusumik taamaattumik Thulemiut piniariartarfimminni
utertitsisinnaanerat, taanna sulissutigineqassappat aamma ilanngullu
qulakkeerniartariaqarpoq mingutsitsinermik taajissuma piniarfigineqarsinnaasup
sunnigaanera ullumikkut qanoq inissisimava? Aammalu atugassanik
nerisassarsiorfigineqassappat inunnut qanoq sunniussinnaappat. Tamakkua
tamarmik qulakkeerneqarnissaat neriuppunga Naalakkersuisut issiaqataanermikkut
aamma oqallissutigisarumaaraat.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Lars-Karl
Jensen qutsavigaarput. Tulliulluni oqaaseqassaaq Malinnannguaq Markussen-Mølgaard.
Aappassaanik
oqaaseqassagami.
Maliinannguaq
Markussen-Mølgaard, Inuit Ataqatigiit oqaaseqartuat.
Qujanaq.
Tassa Otto Steenholdtimut oqaatigissavara oqaaseqarnermini oqaatigimmagu
ilaatigut Inatsisartuni ilaasortaanerup uuma ingerlanerani, nunanut allanut
sillimaniarnermullu ataatsimiititaliami ilumoormat amerikamiunut
oqaloqateqartarnitsinni erseqqissumik oqaatigineqarnikuummat
Pentagonimiinnitsinni, taavalu aamma amerikamiut maanga maanngarlutik
ataatsimeeqatigiinninnerani oqaatigineqarnikuummat, ammaffigalugu taassumap
allannguuteqarfiginissaa.
Taamaattumik
asuli massakkut inissisimanerput aallaavigalugu, tukimmersortut tassaapput
qallunaat. Qallunaat Naalakkersuisui.
Aammalu
kingullermik siorna qallunaat nunanut allanut sillimaniarnermullu
ataatsimiititaliaata maaniinnerani, ukiarmi ataatsimeeqatiginerani aamma
tassani oqaatigineqarpoq maani peqataasunit suna kissaatiginerissi
erseqqissumik paaserusupparput.
Tassa
imaappoq ammarsimapput tassani suna kissaatigineripput aammalu erseqqissumik
oqaatigereeraluaripput isumaqatigiissut allanngortikkusukkipput,
tunngaviusumik isumaqatigiissut. Taava massakkut inissisimaneq aallaavigalugu
tassa paasivarput qallunaat Naalakkersuisuisa tamanna kissaatiginngikkaat.
Siumut
oqaaseqartuata qaqeqqinnermini oqaatigimmagu tulluusimaartariaqartugut
massakkut Naalakkersuisut angusarisimasaat pillugu.
Suna
tulluusimaarutigissagatsigu? Ukiuni arlalinni ilassutitut isumaqatigiissutit
taakkua suliarineqarsimapput, taakkuinnaallu akuerineqarumallutik.
Suliluunniit sunik imaqarnersut takusimatsinnagit isumaqarpunga
pissutissaqanngitsugut tulluusimaarnissatsinnut.
Taamaattumik
takoqqaartariaqarpagut suut isumaqatigiissutiginiarneraat.
Isumaqarpunga
aamma angusaq kisanartutut taanissaa apeqqusertariaqartoq, oqareernittuut
isumaqatigiissulluunniit ilassutitulluunniit isumaqatigiissutaanialersaartut
suunersut takusimatinnagit.
Aamma
siunnersuuteqarninni ilaatigut oqaatigisama ilavigaat, taamanikkut nunarput
EF-imut naaggaarmat, tassani kalaallit immikkut pisinnaatitaaffilerneqarput.
Isumaqatigiinninniarsinnaanermut
uffa massa nunanut allanut tunngasut, qallunaat naalagaaffiata inatsisit
malillugut tigummigaluaraa. Sooq uani apeqqummi taamatut ilusilimmik
iliuuseqarsinnaanngilagut? Aamma siunnersuutinni erseqqissumik allassimavoq.
Taamaattumik
uani siunnersuutima itigartinniarneqarnera uanga paasisinnaanngilara. Illua
tungaanillu oqaluttoqarluni allanngortittariaqarpoq, illua tungaanillu
itigartinniarneqarluni allanngortinnissaanut siunnersuuteqarnera. Taavalu
ilassutitut taakku isumaqatigiissutit kisimik akueriniarneqarlutik.
Uanga
taamatut siunnersuuteqarninni aamma Inuit Ataqatigiit saqqummiussinerminni
taamatut oqaaseqarnerminni tunngavigerpiarpaat, ilassutitut isumaqatigiissutit
taakku isumaqatigiissuteqaannarnissaq sullugigatsigu. Sullugaarput
pissutigalugu illersornissamut isumaqatigiissuut qulaatiinnarluta
suliaasimammat.
Aammalu
taamatut allassimasut qulaatiinnarluta suliaasimasut, akueriinnassagatsigit
ilassutaannarnik akuersaarnitsigut.
Uanga
isumaqataluarama siunnersuutip uumap akuerineratigut tunngaviusumik
tunngaviusumik suliap pimoorullugu ingerlateqqinnissaa,
ilassutaannaanngitsunik taanna akuerineqassasoq inatsisartuninngaanniit.
Taamaattumik
aammaarlungakaammattorusuppakka Inatsisartuni ilaasortaqatikka siunnersuutiga
akuereqqullugu, tassami taannaammat ukiuni arlalinni inuiaqatigiinni aamma
partiini tamanik kissaatigineqarluni oqaatigineqartuartartoq.
Qujanaq.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Malinnannguaq
Markussen-Mølgård qutsavigaarput, taava maannakkut oqaaseqassaaq
Naalakkersuisut siulittaasuat.
Jonathan
Motzfeldt, Naalakkersuisut Siulittaasuat, Siumut.
Siullermik
oqaaseqarama Inuit Ataqatigiit oqaaseqartuata Josef Motzfeldip oqaatigisaani
muluginiagara ataaseq oqaaseqarfigilaassavara imaluunniit marluk
pingasulluunniit.
Isertortunik
isumaqatigiissutissanik Naalakkersuisut siulittaasuataluunniit
ilisimatitaasannginneranik oqaaseqarneq, taanna uanga soorunami suut
ilisimatutaassutigisisarsimannginnersut uannut ilisimanngilakka, kisianni
manna tikillugu Thulemmut tunngatillugu Naalakkersuisut siulittaasuunera
tamaat aqqutigisimasanni, qanoq pisoqartillugu tamatigorluinnaqqissaaq
ilisimatinniarneqartarnigut danskit Naalakkersuisuninngaanniit nalornisagullu
apeqqutigineqartut akineqarsinnaasarput.
Soorunami
aamma ilaqarput soorunami imaaliinnaarlugit qularnanngitsumik politikerinut
vammullu apuutissallugit killiliiffigineqarsimasunik, taanna
pinngitsoorneqarsinnaanngilaq aamma.
Aamma
Kalaallit Nunaata uagut kisimiilluta atorunnaarsissinnaanngilarput una
isumaqatigiissut.
Tamanna
pisinnaanngilaq.
Taavalu
oqaatigissavara statsministeri isumaqatiginiuteqarfigineqarmat januarimi,
politikkikkut oqaloqatigiinnerup annertoorujussuarmik, kisianni aamma
politikkiinnaanngitsoq aamma jura inatsisitigut aamma tunngavissat aamma
tikkuarneqarsimapput.
Tassanilu
Naalakkersuisut tikkuarsimasaasa ilagivaat isumaqatigiissut artikel 13,
immikkoortoq 3, tassani oqaatigineqarpoq uani nikuiinnarluni nutsissagaanni
kalaallisut nutserneqanngilaq oqaasertaqanngimmat, soorunami taakkua
isumaqatigiissutaat qallunaat nunaatalu amerikamiullu oqaatigineqarput uani
Naalakkersuisut taakku marluk isumaqatigiippata taavalu saaffiginnissut
sunaluunniit arlaasa saqqummiussaat, uumap saqqummiussap atulereernerata
kingorna, piffissamilu aamma atuuffigisimasaani pisariaqartunik maanga
isumaqatigiissummut allannguutaasinnaasunik pisariaqartitsinerit
kissaatigineqarpata, taakkulu aamma misilittakkat tunngavigalugit
paasineqarpata imaluunnit NATo-p pilersaarutaani allannguineruppata taanna
aamma ilaavoq.
Taamaattut
saqqummiunneqarsinnaapput.
Artikel 13,
immikkoortoq 3 aamma taanna atorsimavarput statsministerimut
eqqaasissutigalugu, isumaqatigiissummi taama ittoq aamma oqaasertaq
atorneqarsinnaasutut isumaqarfigigatsigu, paaseqatigiinniarnermullu
atorsimagatsigu taanna.
Soorunami
uanga aamma nammineq Mikael Petersenitut allallu aamma oqarnerisut
tulluusimaarutigaara uani tukernersuinnaratik danskit maannakkut silarsuup
allanngoriartortup ataani, akuersaarmassut isumaqatigiissut taama ittoq aamma
artikel 13, immikkoortoq 3 tunngavigalugu uagut tikkuartorsimasagut maannakkut
periarfissarsiuunniarmatigik, kisianni tassa suli aana ataaseq
amigaataasussaq, uagut danskillu taama ilioreerutta saqqummiussagut aamma
saqqummiussassatigut taavalu aamma amerikamiut aamma tassuunakkut
paaseqatiginissaat isumaqatiginissaat aamma tunngavissaassammat, ima ittumik
allannguuteqarniarnissamik.
Taamaattumik
taanna anguniarneqassaaq.
Kingullermik
oqallinnerminngaanniik annertunerusumik assortuussutissaqanngilagut. Aamma
aunga takusinnaasakka najoqqutaralugit partiit tamarmik Kattusseqatigiiuppata
imaluunniit illua= tungiliuttuuppata, uani isumaqatigiiniarnermut
tunngatillugu oqaaserineqartut killiffiat atussagaanni Naalakkersuisut
alloriarneq atorsimasaat amerlanerusut tapersersorluarmassuk. Taanna
maluginiarpara, taannalu aamma tunngavigalugu suleqqissaagut.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Naalakkersuisut
siulittaasuannut qujavugut. Inatsisartunut ilimasaarutigissavara
ungasinngitsunnuakkut taasinissarput naatsersuutigigakku. Taavalu tulliulluni
oqaaseqassaaq Otto Steenholdt.
Otto Steenholdt, attaviitsoq.
Kingulliulluni oqaluttoq tassalu Naalakkersuisut siulittaasuat isumaqatigaara. Aap, kingullermik oqallinnitsinnut naleqqiullugu massakkut oqallinnerup ingerlanera assersuunneqarsinnaasutut uanga naatsersuuppara, kisiannili taakkua ilassutigineqarsinnaasut maani qujasutitut maani tiguneqarmata aamma paasillugu.
Tassa soorlu uanga oqareersunga pitsaaginerusaq pisinnaanngikkaanni allatut ajornartumik tullia tigummisariaqartoq.
Isumaqarpunga annertoorujussuarmik isumaqatigiinngissuteqanngitsugut.
Uparuaaniapallaanngikkaluarlunga Inuit Ataqatigiinninngaaneersoq ilisarimisaarpara, tassa oqallinnermi naalakkersuisooqatigiinut pisuutitsiniarsarineq, kisianni uatsinninngaaniit akineqarsinnaasoq imatut: ukiuni taakkunani naalakkersuisooqatigiiffiusimasuni qinersinermi kingullerminngaaniik, manna tikillugu annertunersaa Inuit Ataqatigiit naalakkersuisooqataasimapput.
Allaat sillimaniarnermut ataatsimiititaliami siulittaasuutitaqarsimallutik.
Taamaattumik tassani qanoq namminneq qanoq iliorsimanertik isigigunikku massakkut ajorinninniarnerat isorinninniarnerat isumaqarpunga annerungaartoq. Imminnut utertoorutigissagaat. Tassa taanna ilisariinnarpara, suulluunniit illua tungiliuffiginiakkat tamarmik ataatsimiinnermi maani taamatut akisariaqalersarmata. Pisuutitsiniarnerit namminerlu assamminnik errortuinerit ersarissumik maanngaannit oqaatigineqartarmata.
Aamma Naalakkersuisunut ilaasortaasimasoq Josef Motzfeldt aamma taamatorluinnaq oqarfigisariaqarsoraara, piffissaagallartillugu pissutsinut maniguussimaqaaq illua tungiliukkami nipi allarluinnaq sakkortooq annittalermagu, aamma paasigaluarlugu.
Tassa oqaaseqaatissinni Inuit Ataqatigiit oqaaseqaatigisaanni aamma Naalakkersuisut siulittaasuata qujanaqaaq akimmagu. assut uanga aamma tassani qeerrassimaaleraluarpunga oqaatigineqarmat nunatsinniluunniit Naalakkersuisut siulittaasuannut ilisimatitsissutigineqartarsimanngitsut.
Sorsuusimaguluarnersut tassa tassani uanga ilimatsassutigisimagaluarpakka, kisiannili massakkut ersarissumik akineqarpoq. Taakkua taamaattoqanngitsoq.
Aap Danmark aamma EU qulequtsiullugu allakkassinni aamma takuara nuannaajallaatigissanerlugu quujatsaatigissanerluguluunniit tassa saamerliit EU-mut akerliunerpaasimagaluartut akuersaarnerugaluttuinnarmata. Taanna SF-iniippoq, massakkut ippassaaninnguaq SF-it taamaalerpallapput maani oqallinnermi immaqa imannarsuaq akuliuffigisassaanngitsoq, kisianni ilissi qaninnerugassiuk ajunngilaq naalagiartilaaraluarussigit. Taamaaliortariaqanngissimagaluarmata immaqa.
Taavalu eqikkaanermi aamma takusara danskit Naalakkersuisuinut piumasareqqullugu inassutigisaq, taakku USA-mut saaffiginnissuteqassasut illersornissamut isumaqatigiissutip isumaqatigiinniutigeqqinnissaa piumasaralugu.
Isumaqarpunga akissuteqaammi ersarissumik akissut tusareeripput. Taanna imatut akineqartoq, danskit amerikarmiullu isumaqatigiilluta oqarfigigaatigut, taanna isumaqatiginagu. Isumaqarpunga tassa taanna aporfiusoq imaannaanngitsoq.
Kisianni nuannarilluinnarlugu qungujussutigisara aana tamannali iluatsissanngippat Kalaallit Nunatta isumaqatigiissut atorunnaarsissagaa. Kakkaak immaqaluunniit annerusumik oqaaseqarfigisariaqanngilaq.
Taanna oqarniutaavoq, nalunngiivillugu Kalaallit Nunaat kisimiilluni taamaaliorsinnaanngitsoq.
Inuiattut akuerineqarnissarput utaqqissagutsigu immaqa suli aamma sivisuallaassaaq, kisiannimi neriuutit ingerlallugit ajorneq ajorpoq.
Tassa maani taasisoqassaaq, uangattaaq massakkut oqaatigissavara, killiffipput Naalakkersuisut siulittaasuata ersarissumik oqaatigaa, amerikamut qanoq iliuuseqarusukkaluaqaagut kisiannili aajuna nalunngisarput, Amerikap massakkut sorsunnini ingerlakkaa ersarissumillu oqaatigisimallugu, tamakkua ingerlakkallartillugit soorlu uagut suliaritinniagarput sukkasuumik suliarineqarnissaa ilimageqqunagu. Tassa aamma tusartariaqartoq ilumoortutullu uanga naliligara.
Daniel Skifte, ataatsimiinnermik aqutsisoq, Inatsisartut Siulittaasuat, Atassut.
Otto Steenholdt qutsavigaarput, tulliulluni oqaaseqassaq Josef Motzfeldt pingajussaaniilerami naatsunnguamik.
Josef Motzfeldt, Inuit Ataqatigiit oqaaseqartuat.
Qujanaq. Tassa naalakkersuisut siulittaasuata kingullermik oqaaseqarnermini oqaatigisaa, qularnanngilaq isumaqatigiissutit ilaqarsinnaasut politikerinut takutinneqarsinnaanngitsunik.
Isumaqatigiissutit politikerit atsiugaat politikerit ilaanut takoqqusaanngitsut suusimassappat?
Sakkutuut atsiugarinngilaat Naalakkersuisut-uku inissisimasut qaffasinnerpaat atsiugaraat isumaqatigiillutik isumaqatigiissutit makku pineqartut.
Tassa tamakku akuersaaginnagassagut? Uagut
taama isumaqanngilagut.
Aamma Otto
Steenholdtimut naalakkersuisooqatigiinnut pisuutitsiniarnera
nalaatsornerinnakkut naalakkersuisooqatigiit ullumikkut uani isummaminnik
allanngortitsipput, illit allanngortitsinerpaanut isummannik
sakkortunerpavutit.
Kingullermik
oqaluuserinninnermi piumasaqartut sakkortunerpaat ilagaatsit, taanna
isumaqatigiissutipalaaq allanngortinneqartariaqartoq oqalukkavit.
Toqqammavilersukkanik
oqaluppugut ajunngilaq illaruaatissanngortinniarsarigukku saamerliit taanna
nalunngilarput upattussagit. Apeqqummi tassani saamerlerit Danmarkimi allamik
isummeriartornerat qitiunngilaq. Uggorisarput tassaavoq kingunerisassai
isumaqatiginiartaligassarput Danmarkiujunnaassaaq EU-p maskiinarujussua
isumaqatiginiartalissavarput. Apeqqutit ukua imaaliallaannaq
naammassisinnaasutut isikkoqartut isumannaarniarlugit eqiagigutsigu massakkut.
Taamaattumik
uani tuppallersaatiginiarneqartoq nerrivimmi issiaqataanissaq, apeqqutaavoq
qanoq piginnaatitaaffeqassanersugut. Ullumikkutut Inatsisartuni amerlanerit
isummernerat toqqammavigissagaanni nukittuallaartutut inissisimanissarput
ilimagisariaqanngilaq.
Taamaatumik-una
uggorigipput illersornissamut isumaqatigiissut allanngortinneqarsinnaasutut
isikkulik, ullumikkut naalagaaffeqatigiinnerup siunnerfeqarluartumik
ingerlanniarsarigaluarnerani massakkut aporfinngorsimammat erloqinartoq.
Taamaattumik
allanngortinneqarsinnaanera taanna pingaartikkipput.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Josef
Motzfeldt qutsavigaarput. Taavalu aamma naatsuararsuarmik oqaaseqassaaq Mikael
Petersen.
Mikael
Petersen, Siumup oqaaseqartua.
Tassa
naatsunnguamik. Tassa siunnersuuteqartumut Maliinannguaq Markussen-Mølgårdimut
erseqqissaatigilaaginnassavara, uani aaliangiiffigisassatut siunnersuut tassa
nipeqarpoq, danskit amerikarmiullu amerikamiullu 1951-imi illersornissaq
pillugu isumaqatigiissutaata pimoorullugu allanngortinniarlugu pimoorullugu
sulissutigineqarnissaa pillugu aaliangiiffigisassatut siunnersuut.
Siumuminngaanniik
uagut isumaqaratta pimoorullugu sulissutigineqartoq. Taassuma
allanngortinneqarnissaa. Pimoorutivillugu ingerlanneqartoq, taamaattumik
suliassaq ingerlareermat aamma siunnersuut 1990-ikkunnili Inatsisartut
aaliangiinnerannut aaliangiisimanerannut allannguutissamik imaqanngimmat.
Taamaattumik
siunnersuut akuersaanngilarput. Taama paasiuminartigaaq. Allamik
oqaasissaqanngilagut.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Mikael
Petersen qutsavigaarput. Taava partiimi oqaaseqartup avataatigut Johan
Lund-Olsen oqaaseqarniarpoq. Tulliuttoq aamma taamatut Anthon Frederiksen,
taakkua oqaaseqareerpata Inatsisartut amerlanerussuteqartorujussuit isumaat
erseqqereermat taasiinnalissaagut. Takanna Johan Lund-Olsen.
Johan
Lund-Olsen, Inuit Ataqatigiit.
Qujanaq.
Tassaana tupigusuutigilaagata una oqaaseqarfigilaarniarlugu, tassalu
ilassutitut isumaqatigiisuteqarsinnaanissaq tassa maannakkut
amerlanerussuteqarluinnartut maani tassa katersuuffiginiarpaat.
Tassungaana
tunngatillugu una eqqumiigilaagara saqqummiutilaarusukkiga, tassa
ilisimaneqartutut Naalakkersuisut pilersitaannik ukiuni makkunani, tassa
namminersorneq pillugu isumalioqatigiissitat sulisinneqarput
Naalakkersuisuniit aammalu Inatsisartunit suliakkerneqarsimallutik.
Tassanilu
namminersorneq pillugu isumalioqatigiissitat sulinerannut aamma
ilaatinneqarpoq ullumikut tassa immikkoortoq 35-mi uani eqqartugarput. Tassa
illersornissaq pillugu 1951-imi danskit amerikamiullu isumaqatigiissutaata
allanngortinneqarnissaa pillugu aamma nalilersuitinneqarlutik.
Tassa
soqutiginartua maannakkut unaavoq tassa namminersorneq pillugu
isumalioqatigiissitat ukiut marluk maannamut sulereerlutik tassa
isumaqatigiissutigisimavaat, ilassutitut isumaqatigiissuteqarnissaq taanna
aqqutissaanngitsoq. Tamannalu ukiut kingulliit marluk tassa
aallartinnitsinniilli namminersorneq pillugu isumalioqatigiissitani, taanna
sukumiilluinnaqqeqqinnaartumik misissuiffigineqarsimavoq. Aammalu
eqqartorneqaqartaarluarluni uteqattaarneqartuarluni. Taannalu
uteqattaarneqartareeqimmat aamma tassa namminersorneq pillugu
isumalioqatigiissitani kingullermik ataatsimiittoqarmat, tassa ukioq
aallartilaaginnartoq isumaqatigiittoqarsimavoq aap ilassutitut
isumaqatigiissuteqarnissaq taanna aqqutigineqarsinnaanngilaq. Taamaammat
illersornissaq pillugu isumaqatigiissummi danskit amerikarmiullu
isumaqatigiissutaata, tamakkiisumik allanngortinneqarnissaa tassa
namminersorneq pillugu isumalioqatigiissitap inassutigilersaarpaa. Aamma
isumaqatigiissutigereerpaat.
Soqutiginartua
manna uaniilerpoq maannakkut naalakkersuisuutitaqartut sinniisuutitaat tassani
sulisinneqartut, tassa namminersorneq pillugu isumalioqatigiissitani
sulisinneqartut isumartik isumartik matuma kingorna taava
allanngorteriasaassaneraat.
Tassa taanna
apeqquterujussuuvoq. Pissanganassaarlu namminersorneq pillugu
isumalioqatigiissitat junimi ataatsimiinnissaanni, ungaserujussuanngitsukkut
taanna pilerpat tassani isumartik allanngortissimallugu taava qanoq
iliulersaassanersut paasissallugu.
Taassuma
saniatigut aamma una oqaatiginngitsuulaarnianngilara, naak partiimi
siulittaasutta aamma tupigusuutigalugu oqaatigereeraluaraa, tassa Otto
Steenholdtip ukiaminngaanniit maannamut mumerisaarsimanera.
Ila
tamannamitaa sumimmitaavana patsiseqartoq? Paaserusunnassagaluaqaaq. Ottop
nammineq tamanna sorunami akissuteqarfigisinnaassavaa. Otto Steenholdtip
taamaattumik apererusunnarpoq aamma kikkunnik-una imaluunniit Siumukkunni
imaluunniit allanik isumaqatigiissuteqarsimavit? Taamaalillutillu aamma
pisiarineqarlulisooq imaluunniit pisiarineqarsimallutittullusooq isummat
maannakkut allanngorteriasaarsimallugu.
Ukiarmi
aaliangiiffigisassatut siunnersuut siullermeerneqarmat ilungersungaarlutit
ilungersungaarlutit allaat taamani taasisitsisoqarnissaanik noqqaavutit.
Ilungersungaarlutik illersornissaq pillugu isumaqatigiissutipalaaq taanna,
qanga Inatsisartut ´90-ikkut aallartilaaginnartulli nutaamik
isumaqatigiinniutigineqaqqinnissaa aaliangiusimaneqaannassasoq, taanna
naqissuserneqaqqullugu, kisiannili tassa massakkut isummatit
mumeriasaarsimapput. Ila tamatumunngamitaavaana suna patsisaasoq?
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Johan
Lund-Olsen qutsavigaarput. Taavalu mannakkut oqaaseqassaaq Anthon Frederiksen.
Anthon
Frederiksen, Siulittaasoqarfimmi ilaasortaq, Kattusseqatigiit.
Qujanaq.
Siullermik erseqqissaassutigissavara uagut Kattusseqatigiinni pituttorsimaneq
ajoratta suniluunniit taasissagaangatta. Tassa kiffaanngissuserput namminerlu
nalunngissuserput malillugu taasisinnaasarpugut.
Taamaattumik
uanga nammineq inuttut isummertaasera malillugu isummertussaavunga, aammalu
Naalakkersuisut akissuteqaataanut taaseqataaniarnanga aaliangersimavinga.
Tassa
ukiarmili oqallinnermi matumani aamma Kattusseqatigiinniit uagut
isumaqataalluarsimagatta taassumap isumaqatigiissutip 1951-imeersup
ilassuteqarfigiinnarnagu allanngortinneqarnissaa anguniarneqartariaqartoq
sulissutigineqartariaqartoq tamakkiisumik tapersersoreersimagatsigu.
Taamaattumik
uanga isumaqarpunga pissusissamisoorluinnartuussagaluartoq inatsisit
tunngaviusut sioqqullugilli tassa nunasiaagallarnerup nalaani, taanna
isumaqatigiissut uagut kalaallit periarfissaqarfigisimanngisarput
nammineerluta peqataaffigissallugu.
Taassumap
atorunnaarsinneqavilluni allamik nutaamik taarserneqarpat taanna
tupinnangitsumik kikkulluunniit kalaallit soqutigisassarivaat.
Pisariaqarporlu
taamatut aamma nunatsinnik inuinillu illersuinissaq, taamaattumik
siunnersuuteqartoq uanga isumaqatigalugu taaseqataaffigissavara. Qujanaq.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Anhon Frederiksenimut qutsavigaara. Taavalu partiineersut allat pingajussaanik oqaaseqartikkakkit immikkut akueraara Otto Steenholdt.
Pingajussaanik naatsuaraararsuamik oqaaseqaqqullugu.
Otto Steenholdt, attaviitsoq.
Aap, tassami ilumoorluinnarpoq uanga kisimiissimavunga. Taanna aaliangiutigeqqullugu landstingemut siunnersuutigigakku Inuit Ataqatigiit itigartimmannga. Aaliangiusimasara taamanikkut kiserluinnarma taasivunga taanna aaliangiusimaneqassasoq, kisiannili taamanikkut itigartippassinga.
Pisiarineqanngilluaasarpunga. Oqarluaannassaanga Jonathan Motzfeldtip oqaatigivaa suliassaq ima ajornartigisoq, Amerika massakkut sorsulluni iliuusiata anguniarsarisaraluarput sanimut iligallaraa.
Qanorluunniit ilioraluarutta taanna uanga angusaqarfigisinnaanngikkallarparput ullumi imaluunniit siunissami.
Oqaloqatiginnissinnasoq suliaminik taama pingaaruteqartitsigisumik naammassinnippat isumaqarpunga taanna ingerlaqqissinnaasoq.
Neriulluinnarpunga taamanikkut siunnersuutigisara aaliangiuteqqullugu itigartitarsi ilissi aamma illua tungaanut saassasusi. Paasisarniarsigit tamakkua.
Daniel Skifte, ataatsimiinnermik aqutsisoq, Inatsisartut Siulittaasuat, Atassut.
Otto Steenholdt qutsavigaarput. Taavalu maannakkut oqaaseqassaaq Maliinannguaq Markussen- Mølgård, pingajussaaniilerami naatsuararsuarmik. Tulliupporlu naggataarutaasumik oqaaseqartussaq Naalakkersuisut siulittaasuat.
Maliinannguaq Markussen-Mølgård, Inuit Ataqatigiit oqaaseqartuat.
Aap, Otto Steenholdtimut oqaatigipallaannassavara tassa Inuit Ataqatigiinniit taamanikkut Ottop siunnersuutaanut itigartitsinitsinnut pissutigigatsigu, malugisinnaagatsigu maani inimi allanngortitsinissamik kissaateqanngitsut. Taavalu aappassaaneernissaa kinguartinneratigut piareersarlugu suliarineqarsinnaasoq. Taanna siunnersuut upernaaq manna Inatsisartuni aamma nunanut allanut sillimaniarnermullu ataatsimiititaliap Naalakkersuisut siulittaasuatalu suleqatigiinnermigut-mikkut saqqummiussiumaartut, kisiat tassa taamanikkut ajoraluartumik Naalakkersuisooqatigiinneq kipinikuuvoq aammalu isikkivik allanngornikuulluni taamaalilluni.
Aamma Otto Steenholdti oqassanngilaq uanga siulittaasuusimallunga sumiissimanersunga taamanikkut.
Ilaasortaaqataanikuugavit nalunngilluinnarpat, taamanikkut siulittaasutut nunanut allamiunik naapitsinigut tamaasa, Bruxellesimiinnitsinni USA-miinnitsinni qallunaanik naapitsinitsinni tamatigut taassuma allanngortinnissaanik Inatsisartut kissaateqarnerat saqqummiuttarsimagiga.
Taamaattumik oqassanngilatit sumiissimanersunga.
Taava naggasiullugu apeqqutigilaarusuppara Naalakkersuisut siulittaasuanut tillægsaftalet suliarineqareerpata naammassippata Inatsisartunut akuerisassanngorlugit saqqummiunneqalersaarnersut.
Taavalu aappaattut apeqqutigerusullugu una apeqqutiga akineqanngimmat, taamatut isumaqatigiinninniarnissami missilinut tunngatillugu isumaqatigiinninniarnissami issiaqataanissamut akuerineqarneq sunik piginnaatitaaffiliiva? Naaggaarsinnaatitaassaagut tassani? Tassa taanna apeqqutigerusutara.
Taava uani naggasiullugu oqaatigiinnassavara, Inuit Ataqatigiinninngaanniit matumap suliaq manna unitsinnera ingerlaqqinniissaa ilimasaarutigeriissagatsigu, maani itigartinneqaraluarpat.
Daniel Skifte, ataatsimiinnermik aqutsisoq, Inatsisartut Siulittaasuat, Atassut.
Maliinannguaq Markussen-Mølgård qutsavigaarput, erngiinnannguaq taasissaagut, naggataarutaasumik Naalakkersuisut Siulittaasuat.
Jonathan Motzfeldt, Naalakkersuisut Siulittaasuat, Siumut.
Naatsorsuutigaara una ataatsimoorluni isumaqatigiissummik misissuinissaq, tassalu taanna artikel 13 najoqqutaralugu oqallinnermi oqaatigereeriga saqqummiussutissani statsministerimut atorsimasatsinni.
Taakkua ingerlanneqassapput tamaat isumaqatigiissut qimerloorlugu.
Tassani ataaserluunniit oqaatigineqariinngilaq una misissussanngilarsi, kisianni tassa maannakkut suleriarnissaq majip uuma naalernerani nalunaarutigaara oqaloqatigiissutigineqassasoq. Aallarnisaataasumik maannakkut oqaloqatigiinnerit ingerlammata.
Kisianni aamma eqqaasississutigissavara soorlu oqartunga
Amerika maanna sorsuppoq, taavali suliassat siornali inertussatut
isikkoqaraluartut tassa pinngitsooratik tillægsaftaleqarfiusussat. Tassaapput
ilaatigut avatangiisinut tunngasut. Mingutsitsinermut tunngasut, taakkuupput
danskit Naalakkersuisuisa akuereriigaat tillægsaftaleqarnissamik
periarfissaqartitsisut. Tassani suli Thulemi mingutsitsinermut tunngasut aamma
ilaatigut taaneqartut eqqaaveqarnermut apeqqutit, tassani uagut
aningaasartuutiginngisatsinnik danskinit imaluunniit amerikamiut
aningaasartuutigisaannik saliinissat, misissuinissat allallu
aningaasalersorneri isumaqatigiinniutinut aamma ilaapput.
Taavalu
aamma Maliinannguaq Markussen-Mølgårdip apeqqutaanut tunngatillugu
nerrivimmi issialerutta naaggarsinnaanitsinnik apeqqutit, ila ila
naaggaarsinnaagutta naaggaassaagut aamma naammaginngisatsinnik takusaqarutta.
Nerrivimmi
issianermi aamma taanna pisussaaffigaarput. Naaggaagassagut naaggaarumaarpagut
angersinnaasullu angerlugit, aammalu suut akissussaaqataaffigiumanerlugit
ilusilerneqarnissaanut sunniuteqarnissaq tassani atussallugu.
Kisianni
tassa maannamut suli qaqugu saaffiginnissummik USA saqqummiussaqarumaartoq,
taanna arlaannattaluunniit suli naluaa.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Naalakkersuisut
Siulittaasuannut qujavugut. Taavalu maannakkut aalajangiiffigisassatut
siunnersuut inaarutaasumik taasissutigissavarput.
Aalajangiiffigisassatut
siunnersuummut isumaqataasut qinnuigissavakka nikueqqullugit.
11.
Aalangiiffigisassatut
siunnersuummut akerliusut qinnuigissavakka nikueqqullugit.
16.
Aalajangiiffigisassatut
siunnersuummut isumaqataanatillu akerliunngitsut qinnuigissavakka
nikueqqullugit.
Soqanngilaq.
Taamaalilluni
aalajangiiffigisassatut siunnersuut itigartinneqarpoq.