Ullut ataatsimiiffiusut aqqaneq sisamaat, tallimanngorneq majip 3-at 2002

Oqaluuserisassani immikkoortoq 37

Ilinniarfinni assigiinngitsuni ilinniartut ilinniarnerminnit taamaatiinnartartut amerliartuinnarnerisa ikinnerpaaffimmiitinniarneqarnissaa pillugu § 35 naapertorlugu apeqquteqaat aallaavigalugu oqallinnissamik siunnersuut.

(Jakob Siverthsen)

Ataatsimiinnermik aqutsisoq: Anders Andreassen, Inatsisartut Siulittaasuata tullia, Atassut

Jakob Sivertsen, Atassut.

Qujanaq. Kalaallit Nunaanni Inatsisartut suleriaasianni §35 naapertorlugu apeqquteqaat aallaavigalugu oqallinnissamik imaattumik saqqummiussaqarpunga.

 

Ilinniarfinni assigiinngitsuni ilinniartut ilinniarnerminni taamaatitsiinnartartut amerliartornerisa, qanoq iliornikkut minnerpaaffimmiitinneqarsinnaanerat pillugu apeqquteqaat aallaavigalugu oqallinneq.

 

Nunatsinni atuartitaanerup ilinniartitaanerullu piorsagaanera, sumillu imaqartitaanera tunngaviliisuussapput.

 

Inuiaqatigiinni kalaallini namminersornerulersimasuni sulilu nammineeriartuinnartuni suliassat amerlanerujartuinnartut, uagut nammineerluta ilinniarluarsimanerput sakkugalugu ingerlatsilernissarput.

 

Tamatumalu kingunerissavaa suliniutissanik ullumikkutuut taama amerlatigisunik avataaniit tikisitsisariaarulluta.

 

Tamaannalu aatsaat ilinniarluarnitsigut angusinnaavarput. Aamma inuusuttortatta tamanna sapinngikkaat ullumikkut takusinnaalersimavarput. Tassa ilinniarfinni qaffasinnerusuni inuusuttut ilinniarnerminni angusaqartartut amerliartormata, tamanna assut tulluusimaarutissaavoq nuannersoq.

 

Ukiuni nutaani angallannikkut teknikkikkut aningaasarsiornikkut tusagassiuuteqarnikkut niuernikkut minnerunngitsumillu ilinniartitaanikkut ineriartornerujussuup nassataanik nunarsuarmi innuttaaqataalersimavugut.

 

Qaammataasat aqqutigalugit nunarsuarmi sumiluunniit pisut ingerlaannartumik malinnaaffigisinnaalersimavagut.

Taamaattumik ukiunut 2000-inut ikaarsaarnitsinni, inuusuttagut ilinniartitaanikkut naleqqussartuartariaqarpagut. Nunarsuarmi inooqataasutut nunat allamiut oqaasiinik ilinniartilluartariaqarpagut. Pingaartumik tuluit oqaasiinik piginnaanngorsartuartariaqarpagut.

Nunarsuarmi ineriartorneq malinnaaffigalugu periarfissanik malinnaalluarsinnaatikkumallugit.

 

Taamaattumik nunatsinni inuusuttut ilinniartitaaneranni atortut ilinniartitseriaatsit ilinniakkallu qaffasinnerujartortillugit, periarfissarititaasut ullutsinnut naleqqussartuartariaqarpagut. Siunissap taamaaliornissaaq assut pisariaqartilersimammagu.

 

Inuusuttut ilinniartitaaneranni ilinniarluarnerinnaq angusaqarniarnerlu kisimik naammanngillat. Aamma ilinniartitaanermut atatillugu akissussaaffimmik pisussaaffimmillu ilinniarneq pingaarnertut ilaatinneqartariaqarpoq. Inuusuttut suliffeqalernissaannut suliffimmut aalajaallutik akisussaaffimmillu pigisaqarlutik siunissamik nunatsinni ineriartortitsisinnaaqqullugit.

 

Apeqqummik saqqummiussaqartutut nunatsinni ilinniartitaaneq pingaartitarigatsigu, ilinniarfinni qaffasinnerusuni soorlu, GU-mi ilinniartut 1995-imiit 1996-imut 1999-imiillu 2000-imut ilinniartut taamaatiinnartartut siunnersuuteqartutut taama amerlatigimmata erngumanartoqartippakka.

 

Nunatsinnimi GU-mi ilinniarneq tassaammat qaffasinnerusumik ilinniartunngornissamut aqqusaagassat pingaarnersaat.

 

Taamaattumik siunnersuuteqartutut GU-mi ilinniarfinnilu allani ilinniartuusartut taamaatiinnartartut amerlasuujunerat eqqarsaatigissagaanni ajornartorsiutip qiterisaata aaqqiiffiginiarneqarnissaa asssut pingaartippara.

 

Inatsisartummi ilinniartut qanoq amerlatiginissaat aallaavigalugit aningaasaliisaratta, taamaattumik aningaasat ilinniarnermut atugassat eqqortumik atorneqartassappata, ilinniartut amerlanerpaartaasa naammatsillutik ilinniakkaminnik naammassinnittarnissaat assut pisariaqarmat.

 

Nunatsinni ilinniarfinni assigiinngitsuni ilinniartuusartut taamaatiinnartarnerannut peqqutaasartut qulaarlugit oqaluuserineqartariaqarput. Soorlu ilinniarfinnut qaffasinnerusunut ilinniarnissamut piumasaqaataasartut naammattarsimanngippata, taava sanngiiffiit allallu aaqqiiffiginiarneqartariaqarput.