Oqaluuserisassani immikkoortoq 38-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfineq-pingajuat, tallimanngorneq 19. april 2002, nal.
12:00
Ataatsimiinnermik aqutsisoq: Anders Andreassen, Inatsisartut Siulittaasuata tullia, Siumut.
Mads-Peter Grønvold, Kattusseqatigiit.
Naalakkersuinermi suliaqarnermi aningaasaatigut tapissuteqartarnermi malittarisassatigut tunngaveqartumik allannguinissamik taamaalillunilu Inatsisartut, partiit, Kattusseqatigiit kisimiillutillu qinigaasut ilaasortaqqortussuseq apeqqutaatinnagu tapiissutinik assigiinnik annertussuseqartunik pissarsisalernissaannut Naalakkersuisut peqquneqarnissaanut pillugu Inatsisartut aalajangiiffigisassaattut siunnersuut.
Taamatut siunnersuuteqarninnut tunngavigaara Inatsisartuni sulinermi partiit avataatigullu qinerneqarsimasut sulinerat qiviaraanni takuneqarsinnaavoq partiit avataatigut qinerneqarnikut allaffissornikkut tapiiffigineqartarnerat pitsanngorsarneqartariaqartoq. Inatsisartuni sulinermi partiit aammalu avataasigut qinerneqarsimasut suliassat assigiit suliarineqartarput.
Taamaattumik pingaartuteqarluinnarpoq allaffissornikkut assigiimmik Inatsisartunut ilaasortat tapiiffigineqartarnissaat
Assersuutigalugu Inatsisartuni sulinermi partiit aammalu partiit avataatigut qinerneqarsimasut Kattusseqatigiillu suliassaat assigiipput piineqartut tamarmik Inatsisartut ataatsimiitititaliaani ataavartumik ilaasortaapput. Taamaattumik pineqartut assigiimmik allaffissornikkut aningaasalersorneqartariaqaraluarput.
Maannakkut Inatsisartuni sulinermi allaffissornikkut tapiiffigineqartarneq imatut ingerlanneqarpoq Inatsisartuni ilaasortaqarneq tunngavigalugu allaffissornikkut aningaasanik imatut partiit aammalu Kattusseqatigiit attaviitsullu tapiiffigineqartarput; Siumumi Inatsisartunut ilaasortat aqqanillit 1,5 millionit, Atassummi Inatsisartunut ilaasortat arfineq-marluk 700.000-it, Inuit Ataqatigiit Inatsisartunut ilaasortat arfineq marluk 700.000-it, Kattusseqatigiit Inatsisartunut ilaasortat sisamat 400.000-it, attaviitsutullu ilaasortat tamarmik 100.000-it.
Allaffissornikkut partiit aammalu avataatigut qinerneqarsimasut immikkut taamatut aningaasatigut tapiiffigineqartarnerat isumaqarpunga nalilersoqqinneqartariaqalersoq.
Inatsisartuni suliassat assigiipput, taamaattumik allaffissornikkut aningaasatigut tapiiffigineqartarneq siunissami assigiimmik ingerlanneqartariaqaraluarpoq.
Assersuutigalugu assigiinngitsumik allaffissornikkut partiinut aammalu partiit avataasigut qinernqarsimasunut tapiissuteqartarnikkut Inatsisartunut, Folketinngimut kommunalbestyrelsemut, nunaqarfinni aqutsisunut qineqqusaarnermi aningaasartuutit qineqqusaarnertut ilaannit nammanneqarsinnaaneq ajorput.
Inatsisartuni qineqqusaarnermi aningaartuutit qiviaraanni partiit avataatigut qinerneqarsimasunut qineqqusaarnermi aningaasartuutit nammanneqarsinnaanngillat, kisiannili partiit ilaasa ilaatigut allaffissornikkut annertuumik tapiissuteqarfigineqartarnemikkut qineqqusaarnermi radio aviisitigut TV-kkullu qineqqusaarneq ingerlanneqartarpoq ilaatigut pineqartut akissaqarluartarmata.
Isumaqarpunga innuttaasunik sullissiniarlutik qineqqusaartartut tamarmik assigiimmik pineqartarnissaat qulakkeerneqartariaqalersoq. Suliassat assigiit assigiimmik aningaasalersorneqartarnissaat pisariaqartoq isumaqarama.
Neriuutigalugu pineqartoq soqutigineqarluni aamma Inatsisartuni aammalu Naalakkersuisunit oqaluuserineqarumaartoq.
Daniel Skifte, Inatsisartut Siulittaasuat, Atassut.
Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaanni nr. 1, 31. maj 2001-imeersumi ilaatigut pineqarpoq Inatsisartuni sulinermut tapiissuteqartarneq. Taamatut tapiissuteqartarnermut malittarisassat Inatsisartut Siulittaasoqarfiannit aqunneqartarput. Inatsit paasineqarnissaminut qularutiginnilersitsissanngilaq aqunneqarneralu ajornartorsiortitsisuunani.
Aningaasat annertussusissaat agguaassisarnermi tunngaviusut atorneqarnissaannut siunertat imaluunniit inatsisit imarisai pillugit siulittaasoqarfiup nammineerluni siunnersuummik saqqummiussinissani oqaaseqartarnissaniluunnii suliassiissutut isiginngilaa.
Inatsisartunut ilaasortanit partiinit aamma Kattusseqatigiinniit suliassaq tamanna pissusissamisoortumik isumagineqartarpoq.
Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.
Qujanaq. Maannalu partiit, Kattusseqatigiit attaviitsullu oqaaseqartussaat oqaaseqassapput.
Mikael
Petersen, Siumup oqaaseqartua.
Naalakkersuinermik
suliaqarnermi aningaasatigut tapiissuteqartarnermi malittarisassatigut
allannguinissamik Inatsisartunut ilaasortap Mads-Peter Grønvoldip
siunnersuutaa Siumumiit massakkut siunnersuut taamatut iluseqartillugu
akuersaarsinnaanngilarput.
Tassami
inatsit pineqartoq siorna allanngortipparput, allannguullu taanna januarip
aallaqqaataani 2002 atuutilerluni. Inatsisartumut ilaasortamut ataatsimut
100.000 kronenik annertussuseqartillugu.
Taamatut
annertussusiliisimaneq Siumumiit eqqortuusutut isigaarput. Taamaalilluni
Inatsisartunut ilaasortat tamaasa immikkut isiginiarnagit immikkoortinnagillu
sullinneqarsinnaaqqullugit. Taamannak oqaaseqarluta siunnersuut Siumumiit
akuersaanngilarput.
Inatsisartullu
Siulittaasuata akissuteqaammini tunngavilersuutigisai tusaatissatut
tigullutigit.
Jakob
Sivertsen, Atassutip oqaaseqartua.
Qujanaq.
Siunnersuummik saqqummiussaqartup tunngavilersuummini partiit aammalu partiit
avataatigut qinerneqarsimasut allaffissornikkut asigiimmik
tapiiffigineqartarnissaat ujartorpaa.
Partiit
Kattusseqatigiillu Inatsisartuni ilaasortaatitaqartut kisimiillutillu
Inatsisartunut ilaasortaasut Inatsisartuni sulinerminni allaffissornikkut
ikiorserneqartarsinnaanerat pitsanngorsaaffiginiarlugu tapiissutaasartut
iluarsartuunneqarsimammata Inatsisartut inatsisaata nr. 1, 31. maj 2001-imi
allanngortinneratigut.
Ukiorluunniit
suli naanngitsoq qaffanneqaqqinnissaat piffissaanngitsoq Atassummit
isumaqarpugut. Partiit Kattusseqatigiillu kisiisa kiisalu ilaasortat partiit
avataanniittut immikkut allaffeqartinneqarnerat atortorissaaruteqartinneqarat
oqarasuaateqarnerallu pisortanit akilersorneqartartut eqqarsaatigissagaanni
minnerunngitsumillu immikkut allattoqarsinnaanerannut
tapiiffigineqartalernerat Inatsisartuni sullissinermi assut iluaqutigineqartoq
maannakkut naammagisariaqartoq Atassummit isumaqarpugut.
Aamma uagut
Inatsisartuni nammineq piumassuserput toqqammavigalugu qinigaasimanerput
aallaavigissagutsigu pisortat kisiisa isumalluutiginagit aamma uagut nammineq
pisortanit aningaasartuutaavallaanngitsumik qanoq iliuuseqarnissarput
pisussaaffigigatsigu eqqaamasariaqarparput.
Soorlu
partiit partiimut akiliuteqartarnitsigut namminerlu pilliuteqarsinnaanerput
tamatumani aamma eqqaamasariaqaratsigu.
Inatsisartunut
ilaasortat oqaluuserisassanngortitaasa ataatsimiititaliani
suliarineqartarneranni partiit Kattusseqatigiit partiillu avataanni maannakkut
inissisimasut oqaluuserisanut oqaaseqaataasa naqitanngorlugit Inatsisartunut
ilasortanut minnerunngitsumillu Naalakkersuisunut agguaanneqartarnissaat assut
pingaaruteqarmata matumuuna Atassummit oqaatigaarput.
Siunnersuutimmi
suliarineqarneranni partiit Kattusseqatigiit partiillu avataanni inissisimasut
siunnersuummut oqaluuserisanullu allanut oqaaseqaataat aalajangiiniarnermi
toqqammavigilluinnarneqartartut nalunnginnatsigit.
Atassummiit
ajuusaarutigaarput partiit avataanni inissisimasut oqaluuserisanut kiisalu
Inatsisartunut ilaasortat siunnersuutaannut oqaaseqaataat naqitanngorlugit
Inatsisartunut ilaasortanut minnerunngitsumillu Naalakkersuisunut
amerlanertigut agguaanneqarneq ajornerat ajuusaarnartuutikkatsigu matumuuna
Atassummit oqaatigaarput.
Partiimmi
avataanni Inatsisartunut ilaasortaasut aamma allaffissornikkut
ikiorteqarnissaminnik aningaasanik tapiiffigineqartarmata.
Taamatut
oqaaseqarluta siunnersuut Atassummit tapersinngilarput. Inatsisartullu
Siulittaasuata akissuteqaataa tusaatissatut tigullugu. Qujanaq.
Ole
Lynge, Inuit Ataqatigiit oqaaseqartuat.
Ullumikkut
Inatsisartunut ilaasortamut ataatsimut agguaqatigiissillugu allaffissornikkut
aningaasaliissutigineqartartut Inuit Ataqatigiit naapertuuttutut isigivaat.
Taamatuttaaq
qinersisoqassatillugu partiit Kattusseqatigiit Attaviitsullu
ilaasortaqassusaat naapertorlugu aningaasaliissuteqartarneq ullumikkutut
iluseqartillugu atuuttariaqartutut Inuit Ataqatigiit isumaqarpugut.
Paasilluarparput
Inatsisartunut ilaasortaq Attaviitsorluunniit kisimiikkuni Inatsisartutut
sulinermini qimungaatsiartariaqartarmat.
Ullumikkulli periarfissaavoq aamma partiimut Kattusseqatigiinnulluunniit
ilaasortaanngikkaluarluni allanik suleqatissarsiornissaq.
Tamanna
tunngavigalugu aalajangiiffigisassatut siunnersuut Mads-Peter Grønvoldip
Kattusseqatigiinneersup Inuit Ataqatigiit isumaqatiginngikkipput
nalunaarutigissavara.
Anthon
Frederiksen, Kattusseqatigiit oqaaseqartuat.
Inatsisartunut
ilaasortap Mads-Peter Grønvoldip siunnersuutaa Kattusseqatigiinniit
imaattumik oqaaseqarfigissavarput.
Kattusseqatigiinni
isumaqarpugut Naalakkersuinikkut sulinermi aningaasatigut tapersiuteqartarneq
Inatsisartuni siorna maji qaammat oqaluuserineqartoq allanngortinneqarluni
oqaluuserineqaqqittariaqartoq tamanut naammaginarnerusumik naligiinnerusumillu
aaqqiinissaq anguniarlugu.
Minnerunngitsumik
aamma allaffissornikkut pitsaanerusumik innuttaasunik sullissinissaq
anguniarlugu.
Tassami
maannakkut aaqqissuussinerup takutippaa Inatsisartunut ilaasortat ataasiakkaat
aammalu Kattusseqatigiit allaffissornikkut sullinneqarnissamut allaffimmiumik
tamakkiisumik atorfinitsitsinissamut nukissaqanngitsugut.
Illuatungaatigulli
partiinut anginernut aningaasatigut atugassarititaasut qiviaraanni taakkua
pitsaanerujussuarmik atugassaqartinneqarput. Taamaattumik Kattusseqatigiinniit
inassutigaarput Naalakkersuinikkut aningaasatigut tapiissuteqartartut
imaluunniit tapiissutigineqartartut amerlinngikkaluarlugit
nalimmassarnerunissaat sulissutigineqartariaqartoq. Soorlu oqareernitsituut
tamanut naammaginarnerusumik sullissisoqarnissaa anguniarlugu.
Taamatut
oqaaseqarluta suliap aappassaaneerneqannginnerani Inatsisartut Inatsit
Atortinneqarnerannut Ataatsimiititaliami suliarineqarnissaa inassutigaarput.
Per
Berthelsen, attaviitsoq.
Qujanaq.
Siunnersuutigineqartoq tusaannarlugu soorunami eqqarsarnaraluarpoq
iluatinnaateqarnera, kisianni tassa uani sassarninni aalajangiussarivara
nalunaarutigissallugu siunnersuutaasumut isumaqataannginnama. Makku
assigiinngitsut nassuiaatitut patsisilersuutigalugit:
Tassa
inuiaqatigiinnut uanga ilaatigut oqaluppunga naammagittarneq annertunerusoq
takutinneqassasoq. Aammalu annertuumik eqqartortuarpara tulleriiaarinerup
pingaaruteqarnera. Taamaattumik isumaqarpunga aningaasat piinnarlugit imminut
eqqarsaatiginertut nammineq imminut utertitsivigissallunga siunnersuutaasumut
akuersigaluaruma.
Isumaqarpunga
mianersuutigissagipput uparuartuijuarluta Namminersornerullutik Oqartussat
oqaluttuarisaanermi allaffissornikkut alliartuinnarnersuat tikkuartugaralugu
uagut aamma partiini suliaqarnitta iluani killorngusumik allaffissornikkut
annertusaaneq aamma peqataaffigileraluarutsigu.
Uanga
ataqqivara partiit alliartortillutik aamma oqartariaqartaratta tassani
alliartortillugit inuiaqatigiinninngaanniit tatigineqarnerat aamma
alliartortuusoq.
Taamaattumillu
nammataq qinersisartunullu innuttaasunut akisussaassuseqarneq aamma
qaffakkiartortartoq.
Taamaattumik
uani uanga ajorinngilara taamaatut akissarissaarnerullutik ingerlasinnaanerat.
Isumaqarpunga demokratip aqqani tamanna naapertuuttuusoq. Tassami politikkimi
suliaqarneq nammineerluni qinigaavoq. Taamaattumilu aunga nassuerutigissavara
tuppalliutigisarlugulu qujamasukkama 100.000-inut qaffanneqartumik
tapiiffigineqartalerama. Taassumap iluani nammineerlunga
tulleriiaarisariaqartarama pingaartitakka suut immikkoortilluinnarlugit
sapinngisannik allaffissornikkut ilaanni nammineerlunga ilaanni
ikiorteqalaarlunga aningaasat iluini taakkunani naammattusaarinissara.
Taamatut
ingerlaneq naammagisimaarpara. Qujamasullungalu maani ingerlatsitseriaatsinni
periarfisssaqartinneqarmat taamatut aamma uagut siornatigut gruppit iluini
sulilluta iluatattarsimasugut kisimiilernitsinni ilaatigut misillernartumik
misigisaqartaraluarluta aamma tapiiffigineqartarnerput taanna
nuannaarutigisussaassagatsigu.
Inuiaqatigiinni
oqaluppugut naammagittarneq tulleriiaarineq aallaavigalugu inuiaqatigiinni
maani aaqqissuineq ingerlanniassasoq. Aamma taanna uagutsinnut
atuuttariaqarpoq.
Taamaattumik
taamatut oqaaseqarlunga taalaarlugulu aamma nuannaarutigigakku uani
taaneqanngimmat tamatta Inatsisartuni sulinitsinni aamma saniatigut aamma
35.000 kronenik pissaqartitaagatta sinerissamut qinersisartutsinnut
angalasinnaanissatsinnut. Taamaattumik tassa uanga oqaatigissavara uani
siunnersuut tusarnerigaluarlugu piviusorsiortumik nalilersuininnut
peqataaffigisinnaanagu akuersaarsinnaannginnakku.
Anders
Andreassen, ataatsimiinnermik aqutsisoq, Inatsisartut Siulittaasuata tullia,
Siumut.
Qujanaq.
Oqaaseqartussat tullii tikitsinnagit eqqaasitsissutigilaassavara
oqaluuserisassamut tullermut ikaarsaarnissatsinni Inatsisartut maani issiasut
amigarmata. Taamaattumillu maani inersuarmiinngitsut qinnuigissavakka ilai
inissaminut ingeqqullugit.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Partiit
Kattusseqatigiillu oqaaseqartuinut qujanaq. Aamma soorunami taamatut
attaviitsut assigiinngitsunut ataasiakkaanut Siulittaasoqarfiimmiit
pulanianngilagut. Oqallinneq Inatsisartuniittussaammat Siulittaasoqarfiullu
Inatsisartut isumaat malillugu suliniartussaammat. Taamaattumik naatsumik
oqaaseqarninni taanna qitiuvoq. Aammalu qitiusariaqarluni tassa partiit
assigiinngitsut isumaat assigiinngitsut aammalu kissaataat aallaaavigalugit
suliniartussaalluta.
Taamaattumik
immikkut partiit ataasiakkaat oqaasii maanngaaniit maannakkugallartoq
oqaaseqarfiginagit imaattumik inerniliinnassavakka. Maluginiarpara partiit
arlallit kiissaatigigaat suliassaq una misissorluarneqaqqaassasoq
aappassaaniinnginnerani.
Tassalu
taanna apeqqut maluginiarakku naatsorsuutigaara tamanna ataatsimiinnerup
inernerani erseqqissiumaartoq, kisianni malunnarpoq aamma partiit
amerlanerussuteqarluartut kissaatigigaat siunnersuut
tapersersorneqassanngitsoq.
Kisianni
aappassaannernissaata tungaanut suleriaqqinnissaq erseqqinnerusariaqartoq
taamaannaq oqaatigigallarpara.
Mads-Peter Grønvold, Kattusseqatigiit.
Tassa aamma siunnersuuteqarninni angunianngilara allaffissornermut aningaasartuutit suli qaffassarneqarnissaat naak Per Berthelsenip taamatut isumalerlugu akissuteqarfigaluaraa.
Aningaasaliissutaareersut iluanni aningaasaliissutit nalimmassarneqarnerisigut allaffissornermut aningaasat tapiissutigineqartartut iluanni allaffissorneq nalimmassarneqassasoq oqaatigaara.
Aamma pingaaruteqarpoq qinersisartunut tusarniaasarnissamut angalanissamut aningaasaliissutit taakkua soorlu Perip eqqaagai aamma taakku aningaasaliissutaasartut taakku saniatigut atorluarneqartarnissaat uanga kaammattuutigiinnassavakka. Tassa maluginiartarakku angalagaangama Inatsisartuni ilaasortat annerusumik allat angalaneq ajortut.
Uani Siulittaasoqarfiup Inatsisartunut Siulittaasup akissutaa akuersaaruminaatsippara taamatut akuersaaruminaatinneranut tunngavigaara Inatsisartuni sulinermi suliat assigiit immikkut assigiinngitsumik akilersorneqartarnerat naleqqutinngitsoq isumaqarama.
Tassami tulluartuusinnaanngimmat Inatsisartuni sulinermi
allaffissornikkut tapiissutit allaat 1 million kronet tungaannut
nikingassuteqartarnerat. Naak
inatsisiliortutut sulinermi suliassat assigiit suliarineqartaraluartut.
Isumaqarpunga
Inatsisartut Siulittaasuani suliassaq soqutigineqarluni
ingerlanneqartariaqartoq. Tassami imatut oqaaseqaannarluni tulluartuunngimmat.
Siulittaasoqarfiup nammineerluni siunnersuummik saqqummiussisarnissani
oqaaseqaateqartarnissaniluunniit sulissamisut isiginngilaa.
Taamatut
Siulittaasoqarfiup oqaaseqarnera akuersaarneqarsinnaanngitsoq isumaqarpunga.
Tassami Siulittaasoqarfiup suliassarimmagu inatsisiliortutut inatsisiliortut
assigiimmik sullinneqarnissaat. Inatsisiliortullu assigiimmik
sullinneqassappata allaffissornikkut tapissutit assigiinnerusariaqartut
isumaqarlunga.
Inatsisartunut
ilaasortat immikkut aningaasarsialersorneqareerput. Taamaattumik
nammineerlunga isumaqarpunga immikkut Inatsisartuni ilaasortaatitat
tunngavigalugit allaffissornikkut tapiissuteqartarnerup
nalilersorneqartariaqarnera pinngitsoorneqarsinnaanngitsoq.
Maannakkut
Inatsisartuni sulinermi allaffissornikkut aningaasaliissutigineqartartut
annertusinngikkaluarlugit aningaasaliissutit iluanni nalimassaasoqarsinnaammat,
kisianni paasivara partiinit tapersersorneqanngitsoq taamartut
allaffissornikkut iluarsiisinnaaneq. Taannalu ataqqivara taamatut
isummertoqarnera.
Jakob
Sivertsen, Atassut.
Uangaana
naatsunnguamik. Tassaana una partiimik Atassumminnganiit pingaartikkatsigu
partiip avataani inissisimasut aamma tapiiffigineqartarmata oqaluuserisamut
aalajangersimasumut pappilianngorlugit oqaatsit tunniunneqartarnissaat
pingaartumik Naalakkersuisunut. Naalakkersuisoq suliat ingerlaqqinnissaannut
pappilissat pingaartumik aamma Inatsisartunut ilaasortat ataasiakkaat partiit
avataasigut qanoq oqaaseqarsimanerat suliniarnerminnu pinngitsoornatik aamma
ilannguttassammatigit.
Taava
aamma Per Berthelsenip una Inatsisartunut ilaasortat ataasiakkaat 35.000-inik
angalasinnaanerminnut atuisinaanerat taanna maannakkut tunngavissaqanngimmat.
Taamaallaat qaammat ataaseq akuersinermi taanna ilanngunneqartuugaluaq
atorunnaarsinneqarpoq. Taannalu maannakkut periarfissaanani. Qujanaq.
Otto Steenholdt, attaviitsoq.
Atassutip oqaaseqartuata uagut partiit avataaniittugut suli annerusumik piumaffigaatigut. Oqaatigisariaqarpara Atassutikkormiut ataasiakkaarlutilluunniit uagutsitut kisimiillutik sulissagaluarunik uagutsitut malinnaatiginavianngitsut. Agguaattarpasi tamaasa suliassat ilissinnut. Uagulli kisimiittugut kiserluinnatta tamarluinnaasa atuarlugillu allallugillu pivagut.
Taamak oqarpunga Atassutikkunninngaaniit ataaseq tigullugu taamatut sulisinniassagaanni nalunngilluinnara malinnaasinnaanngilluinnartoq. Aammalu suli suliassissortariaqanngitsoq soorlu oqaluttuata oqaatigigaluaraa.
Maani agguaassisarpusi imannaannaq ila pappialammita qassit tonsit atortarparput. Tamaaleriarlunga aperigaanni qassimmitaava atuartarpaat tamakku agguaanneqartut. Oqaaseqartuminnut innersuuttarpaat taassumunnga atuaqqullugit. Sinnersuisa atuarneq ajorpaat eqqarlugillu. Tassa tamassa aamma aningaasaajaassuit.
Uanga utoqqatsernanga oqassaanga ataatsimiittut anginerusut landstingep avataanit ilaaffigisaqaakka. Imminnut allaqattaatinngisannarput uagutsituut. Ilaasortaasup malinnaaffigisussaavaa oqaaseqartoq tusarnaassallugu. Aamma agguaaffigineqartarpugut pappialanik aqerluusamillu. Tamakkununnga malinnaarusuttup allattukkani najoqqutaralugit akissuteqarfigisussaavaa oqaaseqartoq.
Maani allaqattaanneq uanga imannak nalilersortarpara. Ajunnginnerussagaluarpoq tamakku allakkat nassiussuukkaannik oqaaseqartussamut sulilu taakku atuarneranni maani Inatsisartut aalisariarlutilluunniit pisinnaagaluarput taassumap atuareeruniuk aamma allakkatigut akiumaarmagu. Qujavunga allakkannut atuarakkit isumaqatigaakka. Ataatsimiittariaqanngikkaluarpugut taava taamaaliussagutta.
Tassa aningaasanik tunineqartarpugut takusinnaavasi 100.000-it ukiumut aammali Kattusseqatigiit isumaqatigilluinnarpakka taakkua uagutsinnit amerlanersuugaluarput sisamarsuullutik. Erseqqissumik oqarput aalajangersimasumik ikiortissaminnulluunniit amigarluinnarput. Uagulli ataasiinnaasugut taakkuninnga suli angummassinnaanngilagut ikiorteqarnissatsinnut.
Tassa taamaattumik Atassutip oqaluttua piumasaqarnerussaguni annertunerusumik tapersersorniarliuk una siunnersuutigineqartoq ataasiakkaat pitsaanerusumik suli pineqalerunik ilissitulli allakkiorlutik agguaassisinnaalissapput. Immaqalu aamma ilissinninngaaniit oqaaseqarneq ajortut ilaat uanga agguaassisorisarsinnaagaluarpara maani atorfissaqartissaqaara. Takkussinnaasuuppat agguaassissinnaasunnguatulluunniit. Ilami amerlavallaaqaat.
Oqartariaqarpugut Landstingimut ilaasortat amerlavallaaqaat politikkerillu ikippallaarlutik.
Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.
Qujanaq. Oqallinneq aasiit imminut saaqattaanermut sangulinnguatsisarpoq. Uani eqqaasitsissutigissavara tassa uani pineqartoq tassaammat Inatsisartuni sulinermut atatillugu Naalakkersuinermi suliaqarnermi aningaasatigut tapiissutigineqartartut pitsanngorsaavigineqarnissaat pillugu aalajangiiffigisassatut siunnersuut.
Maanili aamma massakkumut oqaluttut tassalu partiit amerlanerussuteqarluartut itigartereerpaat aammalu taanna siunnersuuteqartup paasillugu nalunaarutigivaa. Taava tulliulluni oqaaseqassaaq.
Daniel Skifte, Inatsisartut Siulittaasuat, Atassut.
Isumaga malillugu paatsuuallanneq peerusukkiga. Uani Inatsisartut Siulittaasuattut oqaaseqaateqarninni issuaalaarsinaasuuguma imatut oqaaseqarpunga, "Siulittaasoqarfiup nammineerluni siunnersuummik saqqummiussisarnissani oqaaseqaateqartarnissaniluunniit suliassamisut isiginngilaa".
Taanna
aamma issuarneqarpoq. Taanna ilumoorpoq taamaattumik suli maannamut
isumaqarpunga Kattusseqatigiit oqaaseqartuat paatsoortoq. Tassami
Siulittaasoqarfik nammineerluni siulliulluni suliasamik qaqitsisussaanngilaq.
Siulittaasoqarfiup suliassaraa Inatsisartut siunnersuutaat
immikkoortitsinngivilluni ingerlateqqissallugit Inatsisartullu isummernerat
aallaavigalugu suliassaq naammassiniassallugu. Tassa taanna tunngavigalugu
uagut siulliulluta suliariniarsinnaanngilarput Inatsisartuni tapiissutit
allalluunniit annertusilernissaat. Inatsisartulli oqallisigigalugu imatut
isummerpata taanna malissavarput. Tassa Siulittaasoqarfiup taanna suliassaata
qeqqa.
Per
Berthelsen, attaviitsoq.
Aap,
qassiiliussanngilanga. Aamma qassiiliortitsiniassanngilanga uani.
Taaginnassavara 35.000-itsiarsuit iluatigeruttorlugit sunaaffa piginagit,
kisianni taava tassa allatut tulleeriiaarisariaqassaanga.
Kisianni
taamaakkaluarpalluunniit uani nammineerluta tulleriaarineq
ingerlattariaqarparput. Ilaatigut uanga allaqqissaarlugit nutserlugillu
immikkut soqutigisakka pingaartitakka tamanut paasitinniassallugit
agguaattarpakka. Ilaatigut peqataanngitsoortariaqartarpunga, tulleriiaarinermi
inissaqartitsinnginneq peqqutigalugu, kisianni tassaani taalaarusuppara qanoq
pingartigisoq politikeritut Inatsisartunut ilaasortatut qinikkatullu avammut
qinersisartutsinnut tutsiunnissatta iluamik oqimaaqatigiissumik
tusagassiuutininngaanniit ingerlateqqinneqartarnissaat.
Taanna
pingaartorujorujussuuvoq tassani tusagassiuutit suleqataalluarnissaat. Jakob
Siverthsenimullu taalaassavara, tassa Atassumminngaanniit taanna eqqortumik
oqaatigineqarmat allaganngorlugit sutigut tamatigut tunniussuunneri
iluatinnaateqartarmata. Taanna ilumoorpoq,
kisianni
isumaqarpunga tassuuna aamma oqimaaqatigiissaariffigineqartugut. Tassami
ataatsimiinnigut tamarmik immiunneqartarput. Taavalu aamma
allaqqissaarneqarlutik, naak kingusinnerusukkut taamaalillutik tamanit
atuarneqarsinnaasunngortinneqartaraluartut.
Tassuuna
aamma assigiimmik pineqaratta nuannaarutigaara. Tassa uanga pingaartippara
taanna inuk ataaseq nalilerneqarpoq aalajangersimasumik. Amerlanerusut aamma
iluminni tulleriiaarissapput taakkua qanoq atussanerlugit. Soorluli aamma inuk
ataaseq nammineq tulleeriaarisariaqartoq tunniunneqartartut taakkua
atussallugit. Uanga qulequttamut uunga atatillugu oqaaseqaqqissannginnama
tassa uteqqiinnassavara uanga qujamasoqaanga periarfissaqartinneqarama
allatulli kisimiininni aamma tapiiffigineqartarlunga. Qujanaq.
Anders
Andreassen, ataatsimiinnermik aqutsisoq, Inatsisartut Siulittaasuat, Siumut.
Qujanaq.
Maannalu partiit oqaaseqartuisa avataatigut oqaaseqarniarpoq, Godmand
Rasmussen, Atassut.
Godmand
Rasmussen, Atassut.
Uanga
naatsuaraararsuarmik ilassuteqalaarniarpunga Jakob Sivertsenimut. Una
ersarilluinnaqqissaarpoq siullermik Otto Steenholdtip oqaasia aamma
nuannarinngilara. Uanga nammineq
Inatsisartutut qinikkatuut oqaluuserisassat atuanngivillugit
eqqaannartassagukkit taava pisussaaffiga sumiginnarsimassaqaara.
Soorunami
pingaartitagut pulaffiginiarsarisarpagut pingaartinnerusagut, kisianni uanga
partiitta aamma iluani taamannak eqqaaginnartunik takusaqarnikuunngilanga.
Pisinnaasarput tamaat taanna malinnaaffiginiartussaavarput. Taamak
qinigaanerup taanna isumagivaa.
Tupinnarpallaassaqaaq
oqaluuserisassanngortitat inuiaqatigiinnut attuumassuteqartut
eqqarneqartarsimassagunik atuarnagit. Taanna isumaqarpunga oqaluttarfikkut
maana oqaatigissallugu tulluartuunngitsoq. Nuanninngilaq aamma qinikkanut
taanna tunniutissallugu pissusissamisuunngilaq.
Una Inuit
Ataqatigiikkut oqaaseqarnerminni ujartugaat Atassutip oqaaseqartuata eqqaasaa
ilumoortortaqarpoq, una puigortariaqanngilarput partiit Kattusseqatigiit aamma
attaviitsut pingaartumik massakkut atugaavoq partiit oqaaseqartui aammalu
Kattusseqatigiit ataatsimiititaliamut ingerlatillugit isummersorniartarpugut
partiit oqaaseqaataat qanoq imaqarnersut. Aamma taamatulli pingaartigivoq
pisussaaffik assigiimmat. Aamma attaviitsuninngaaniit taamatut
tunineqartarsinnaasuugaluarutta assut aamma iluaqutaasagaluarpoq.
Pitsaasuusinnaanngilaq
ilumoortoq Atassutip oqaaseqartuata qaqitaa una nammineq ippassaaneq
atuineqarama tupigisuallappunga attaviitsuminngaaniit aatsaat pernarama.
Pappialannguamik oqaaseqaammik takuvunga.
Isummersorfiginiakkat
taamaattut ersarinninngortarput partiit aamma nammineq attaviitsullu
oqaaseqaataat atuarlugit isummerfigissagaanni.
Soorunami
periarfissarissaqaaq. Uanga aamma attaviitsutut kisermaajusuuguma immaqa
periarfissaq taanna atoriarsinnaassagaluarpara pappiaqqamik tunniussinanga
oqariartuutillit atuarsinnarlugit immikkut allattuinnarlugit avammut
suaarutigisassagukkit. Taava ataaninngaaniit nalilerneqaatigissagaluarakku
uumak una ulapittarsimavoq.
Periaatsit
taamaattut tulluanngillat naligiilluinnarmik tamatta pisussaaffigut
atortariaqarpagut. Allat imaaliorsinnaappata uagut aamma taamatut
iliuuseqartariaqarpugut.
Taanna
isumaqarpunga nuannersumik tiguneqaannartariaqartoq kusanartumik
suleqatiginnineruvoq. Suleqatiginnikkusunnermik isaassineruvoq.
Aalajangiiniarnermi allat aamma oqaaserisaat partii kisiat pinnagu aamma
tunngavilersuutigalugit nakooqusiisarmata.
Taanna
naatsuarannguamik taamaalillunga oqaaseqarfigivara. Qujanaq.
Anthon
Frederiksen, Kattusseqatigiit.
Siulittaasumuna
paarlaakkunarmatigut naqqiissuteqarfigilaarniarlugu. Kattusseqatigiit
sinnerlugit oqaaseqartutut Siulittaasoqarfiup akissuteqaataa
minnerpaamilluunniit uparuanngilara. Taanna naqqiissuteqarfigilaariarlugu
oqassuunga agguaassisarnermut tunngatillugu kisimiillunga Inatsisartunut
ilaasortaasimavunga 95-imiit 99-imut. Tassani taamanikkut Inatsisartunut
ilaasortat kisimiittut minnerpaamilluunniit aallaqqaammut aningaasatigut
taperserneqarneq ajorput.
Taamaakkaluartoq
taamanikkut uanga suliassat tamaasa soqutigisakka kisiisa aallaaviginagit
immikkoortut tamaaviisa oqaaseqarfigisarsimavakka tamaasalu nammineerlunga
naqiterlugit.
Ilaannikkut
nammineerlunga kaasarfinniit akiliisariaqartarsimavunga suliassat
angummaffiginiarlugit, taamaattumik misilittakkat taakkua
misilittagarereerlugit aamma taamatuinnaq ingerlaannrtoqarsinnaannginnera
takusinnaareerlugu ullumikkut minnerunngitsumik ataasiakkaat kisimiittut aamma
ingerlanissaat eqqarsaatigalugu Kattusseqatigiinni oqaaseqartutut oqaatigipput,
atagu nalimmassaaneq pitsaanersoq aningaasaliissutit amerlinngikkaluarlugit
aaqqiisoqarsinnaanera taanna misissorneqarli. Taamaaliornikkut aamma Atassutip
massakkut oqarnerattuut immaqa agguaassisarnerq oqaaseqaatissanik
tassuunaarlugu anguneqarsinnaalissagaluarmat.
Uannut
eqqaalaassaguma taamanikkut eqqaamalluinnarpara Inatsisartut ataatsimiinerisa
nalaanni ilaani 2 tiimit taamaallaat sinittarpunga suliassat tamaasa
angumererusullugit, kisianni massakkut sisamarsuanngoratta qujanaqaaq, 7 - 8
tiimit angullugit sinittalernikuuvunga, tamanna nuannerpoq, kisianni
eqqaqqilaarta; atagu ullumikkut tapiissutigineqartartut aningaasat
annertussusiat nikisinngikkaluarlugu partiit kisimiittullu nalimmassaanissaq
eqqarsaatigeqqilaarniartigu uagutsinnuinnaq eqqarsaatiginaversaarluta.
Anders
Andreassen, ataatsimiinnermik aqutsisoq, Inatsisartut Siulittaasuata tullia,
Siumut.
Eqqaasitsissutigeqqissavara
suli tusarneqarsimanngippat - tassa amerlanerussuteqarluartut suliaq
itigartippaat aammalu siunnersuuteqartup paasillugu ataqqiumallugulu tamanna
nalunaarutigereerpaa. Tulliuttut kissaateqarfigissavakka naatsunnguamik
oqaaseqaqqullugit.
Otto Steenholdt, attaviitsoq.
Tassa eqqaaneqatsiareeraluarpoq maani oqaatigut tamarmik
immiunneqartarput taavalu allaqqissaarneqartarlutik. Akerusulluinnaqqissaakkat
immiussami eqqortumik tusarnaarneq ajornanngillat, tassanngaanniillu oqaatsit
eqqortut aamma akineqarsinnaallutik. Suli aamma ornipparput computerersorneq.
Maani oqaaserineqartut qamani tuuginnarlugu atuarneqarsinnaalernissaat immaqa
ungasigunnaarpoq. Tamakkua piarersarfigissagaanni aamma maani pingaartumik
Atassutip oqaluttuata ilinniartariaqarpaa oqaaseqartumuna suna oqaaserigaa,
aqerluusarlu tigullugu oqaatsit taakku anitat allaganngorlugit
nassiussuinersuaq uanga kajumiginngilar aamma oqaannarta Folketingimiluunniit
tamakku atorneqanngillat. Soqutiginnikkaanni oqaaserineqartunut maani
issiasariaqassaaq kananiluunniit tusarnaarluni allattoriarlugillu. Tassa
pingaarneq politikkerip tassa suliassaa. Makkua inuulluarisimuanga
ajunngilanga ataatigullu atsiorlugit, tamakkua ataatsimiinnerup
ilassarinngilai.
Aamma
Godmand Rasmussenimut oqassaanga paasinerluisimavut. Uanga ukua siunnersuutit
eqqaannarnerartarlugit oqnngilanga, tassa taakku tunngavissagut siunnersuutit
allassimasut eqqarneqarnatit atuagassat. Uangaliuku oqaaseqaataasut maani
allatat uanga pigikka. Maani
tamakkua
atuarneqarpiarneq ajorput oqaaseqartup soqutigalugit takusinnaavai.
Isumaqatigisinnaavassa oqaaseqartunut taakkua tunniunneqarpata sisamat 31-nut
naqiterisariaqanngitsutut uanga isigigakku.
Tassa
uanga ileqqorisarpra maani Naalakkersuisumut pisussaasumut tunniutissallugu
allattoqarfimmullu, tassa pingaarnerit. Sinneri tusarnaartussaapput
soqutiginnikkunik aamma naligiilluinnartumik pineqarsimanerput
oqaatigineqartoq isumaqatiginnigilara aamma Kattusseqatigiit oqaatigereerpaat.
Anthon Frederiksenip qanoq ilungersunarluinnartigisoq oqaatigaa.
Uanga
massakkut atukkakka pillugit qinnguummerlunga oqarfigaassi -
ilissinninngaanniit oqaaseqarneq ajortut ilaat uannut agguaassisinnaappat
immaqa taakkua ilamininnguanik akilerlugu atortorisinnaaginga.
ilungersunartigaaq taama, suli misilinngisarsi, kisianni anisitsinissigut
taamaalisippatsigut, kisianni naatsorsuutigaara uanga oqaaserisartakkakka
Atassutip oqaasiininngaanniit ajorneruneqa ajortut. Iluarnianngikkaluarpunga
ataasiinnaagaluarlunga oqarpunga uannut nersulaarniarlunga.
Mikael
Petersen, Siumut.
Isumaqarpunga,
uani oqallinnermi naligiimmit pineqarnissaq atorneqartorujussuusoq.
Assigiinngitsumik paasisimagunarparput taanna naligiimmik pineqarnissamik
oqalunneq.
Uagut
oqaatigaarput Inatsisartunut ilaasortaq kinaluunniit sumulluunniit partiimut
atagaluaruni, attaviitsuugaluaruni Kattusseqatigiiugaluaruni
sullinneqarnissaminut aningaasanik tunineqartaraiqartoq
oqimaaqatigiissaakkamik, tassalu taamanikkut oqarpugut 100.000-it
Inatssairtunut ilaasortamut ataatsimut, tassa sullinneqarnissaminut taakkua
aningaasat atugassarai.
Taamaattumik
partiikkaartillugu imaluunniit Kattusseqatigiit immikkut, partiit immikkut
isiginiarlugit allaffeqarfilersussagutsigit, taava aquttoq allaavoq, allaavoq
taanna.
Massakkut
aaqqissuussineq ingerlatarput taavalu Mads-Peter Grønvoldip
siunnersuuteqarnermini siunnersuutigisai imminnut ungasipput, kisianni una
allaffeqarfimmik, allaffitsigut sullinneqarneq taanna pitsaanerusumik
ingerlassappat tamanut taava tassunga tunngatillugu
siunnersuuteqartoqartariaqarpoq. Taava siunnersuuteqartoqarpat taanna
oqallisigisinnaavarput.
Qularutiginngilluinnarpara
aamma attaviitsup Otto Steenholdtip erseqqissarmagu taamatut Inatsisartutut
suliniarnermi allaffissornikkut sulinissaq ilumoorpoq piumasaqaataavoq
annertoorujussuaq ulloq manna. Allaffissornikkut sullinneqarneq isumaqarpunga
immikkut siunnersuutigineqarpat nalilersoqqissaarlugu taanna
oqallisigineqarsinnaasoq. Uunga siunnersuummut tunngassuteqanngitsutut
isigaara allatut sammineqarmat.
Jaob
Sivertsen, Atassutip oqaaseqartua.
Qujanarujussuaq.
Tassaana Otto Steenholdtip toqqarlunga oqarfigimmanga misilissimanngikkinga
kisimiillunga.
Qinigaaqqaaratta
1979-imi unnuarsuarmut hotelimi skrivemaskiina sinittukassaat kasuttorlugit
unnuarsuaq tamaat ujaasisarpugut. Maannakkut attataasannguaq toorutsigu, aamma
immikkut angerlasimafitsinni EDB-qarpugut.
Taamaattumik
imannak ajornanngitsigaaq ilissi allaffissinni peqarpusi aamma allaat
ikiortissassinnut tunniussinnaavarsi aamma 100.000-inik tunineqarpusi
ikiorteqarnissamut, taamaattumik taanna tunineqartarnersi
qimarratiginiarsinnaanngilarsi, ikiortissassinnununa atugassanik tunigissi.
Qujanaq.
Anders
Andreassen, ataatsimiinnermik aqutsisoq, Inatsisartut Siulittaasuata tullia,
Siumut.
Maannalu
Inatsisartut Siulittaasuat naggasiissaq taavalu oqaatigilaassavara
Inatsisartuni ilaasortanut maaniinngitsunut tassa tullianut
ikaarsaarnissatsinnut suli amigarataa.
Daniel Skifte,
Inatsisartut Siulittaasuat, Atassut.
Naatsunnguamik
oqaaseqassaanga, naak Inatsisartunut ilaasortat ataasiakkaat oqaaseqartui
akissuteqarfigiuminaraluartut siusinnersukkut oqaatsikka aalajangiusimavakka
Inatsisartut
isummernerat aallaavigalugu ingerlariaqqissaagut. Equngasorlu ataasinnguaq
taamaallaat taaqqissavara; Anthon Frederiksenip naqqiuteqarnera Siulittaasumut
tusaatissatut tigussavara, esseqqissaatigissalluguli una Mads-Peter Grømvoldip
siunnersuutaa Kattusseqatigiit akuersaarmassuk, Mads-Peter Grønvoldillu
oqaaseqaatima ilaannaa issuarmagu uanga tamakkerlugu issuarpara.
Taamaalillunga utertipparalusooq, pingaaruteqarmat naqqiineq eqqortoq
naqqiutigisariaqartoq. Qujanaq.