Oqaluuserisassani immikkoortoq 44-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut aappaat, ataasinngorneq 8. april 2002, nal. 12:59
Mads-Peter Grønvold, siunnersuuteqartoq, Kattusseqatigiit.
Kommunit inuussutissarsiutini aningaasaleeqataasinnaassuseqarnerminni maleruagassatigut tunngavissaasa allanngortinneqarnerisigut taamaalillunilu kommunit inuussutissarsiutinut aningaasaliissutaasa inuussutissarsiutinik inerisaanermut ingerlateqatigiiffimmik Sulisa A/S-imit aqunneqarnerisigut kommunit inuussutissarsiutinut aningaasaliisinnaanerisa inuussutissarsiutinullu aningaasaliinissamut periarfissaasa nukittorsarneqarnissaannik Naalakkersuisut peqquneqassasut pillugu Inatsisartut aalajangiiffigisassaattut siunnersuut.
Inuussutissarsiutitigut inerisaanissaq Kalaallit Nunatta erseqqissumik soqutigisaraa.
Aallarnisaasartut eqeersimaartut isumassarsiullaqqissut piumassuseqartullu pisariaqartinneqarput. Aningaasaateqanngikkaannili inuussutissarsiutitigut suliniutit piviusunngortinneqarsinnaanngillat.
Kommunit arlaqartut piffissami kingullermi inuussutissarsiutitigut sullivinni aningaasaliinissamut annertunerusumik periarfissaqartitaalernissartik soqutigigitsik ersersittarpaat.
Inuussutissarsiutitigut suliffinni aningaasaliinissamut kommunit killilimmik periarfissaqareerput. Taamaaliornissamullu periarfissat assigiinngitsut killeqartinneqarput.
Taamaalilluni kommunit, kommunimi sullivimmut aningaasaliisinnaatitaapput, taarsigassarsinisssamulluunniit qularnaveequsiissinnaatitaallutik taamalilluni kommuni sulliviup pineqartup ingerlatitsivigineqarneranut nammineerluni aaliangiisumik sunniuteqarsinnaatitaanngilaq. Aammattaaq kommuni sullivimmut aningaasaleeqqusaanngilaq. Aningaasaliinikkut sullivinnut pioreersunut unammillernermik tamanna pilersitsissutaassappat taamatut killeqartitsinerit tunngavissaqarluarput.
Kommunimi ataasiinnarmik akunnittarfeqartoqarpat, kommunilu akunnittarfimmut allamut aningaasaliippat, akunnittarfioreersoq unammillernissamut naammattumik aningaasassaqannginneq pissutigalugu unammillersinnaanngitsoq illikartissinnaavaa.
Tamatumuunnga peqatigitillugu pingaartuuvoq aaliangiusimassallugu kommuni sullivinnut aningaasaliiffigisaminnut ingerlatsinikkut aaliangiisumik sunniuteqartinnginnissaat. Taasumap pissutaavoq kommunit minnerpaat kisimik ingerlatsivigineqarnerannut paasisimasaqarluartunik ilisimasaqarluartunillu sulisinnaasut ilimagisariaqarmata.
Sullivik annertunerpaamik inerisarneqarnissaminut periarfissinneqassappat, taamaalillunilu suliffissat ataavartut akileraarutitigullu kommunimut isertitaqarnermik pilersitsissapput.
Sullivik pineqartoq inunnik pikkorilluinnartunik siulersorneqartariaqarpoq, taasumalu inuussutissarsiutinik ingerlatsisunik pikkorissunik .
Piffinni kommunit inuussutissarsiutitigut suliniuteqarumanerat nersugassaavoq, inuussutissarsiutinik pitsaasunik atugassaqartikkumallugit kommunit piumassuseqarluarnerat tamatumunngalu ilanngullugu aningaasaleeqataajumasarnerat pitsaasutut isigineqartariaqarpoq.
Kommunilli sullivinnik siunissami imminut akilersinnaasunik ingerlatsisinnaanngitsut aallarnisaanermi inerisaanermiluunniit aningaasaliivigineqartannginnissaat soorunami
qulakkeerniagassaavoq.
Ingerlatap aningaasaliivigineqannginnermini qulakkeerneqartariaqarpoq aallaavissat pitsaasut pigineqarnissaat.
Sullivinni imminut napatissinnaanngitsuni kukkussutit aningaasaliisarnerit kommuninut akisoorujussuusinnaapput. Taamatullu annaasoqartillugu kingulliullutik akiliisussat tassaasarput kommunimi innuttaasut.
Taamaammat sumiiffinni inuussutissarsiutitigut aallartisaanissanut inerisaanissanullu kommunit aningaasaliisarnermut periarfissinneqarnissaannut periusissat nassaariniarneqartariaqarput. Taamaliornermili inuussutissarsiutit sumut ingerlatat pioreersut ajoqusiivigineqassanngillat. Aammalu inuussutissarsiutitigut suliniutit ingerlalluarsinnaasutut isigineqarsinnaasut kisiisa aningaasaliiffigisarnerisigut.
Ilisimasallit tamatuminnga qulakkeerisitsisinnaasut pigineqareerput, tassa taanna piuvoq inuussutissarsiutinik siuarsaanermut ingerlatsivik Sulisa A/S aqqutigalugu. Taasumalu siunertaraa nunatsinni nunami inuussutissarsiutit siunnersuinikkut aningaasaliissutinut ingerlatitseqqinnikkut, aammalu kommunini nunanilu immikkoortuini inuussutissarsiutitigut pilersaarusiukkanik suliaqarnikkut inerisaavigineqarnerata tapersersorneqarnissaa.
Ilaatigut nioqquteqarnermi ussassaarinikkut tunisassianik nioqquteqarnikkut siulersuinikkut aningaasaqarnermilu aqutsinikkut aallarnisaasunut sullivinnullu pereersunut Sulisa A/S akeqanngitsumik siunnersuinissamik neqerooruteqartarpoq. Sulisa A/S-ittaaq neqeroorutigisarpaa aningaasaleeriaaseq aningaasaliissutinullu ingerlatitseqqinnermut tunngasutigut siunnersuinissaq.
Sulisa A/S periarfissaqarpoq ingerlatsitsivinnut nammineerluni aningaasaliinissaminut. Tamatumalu saniatigut inuussutissarsiutitigut taarsigassarsisitsisarnerit assigiinngitsut aqqutigisimallugit taakkununnga ilaatigut ilanngullugit tunnisassianik inerisaanermut aningaasaliinikkut tapersiisarnerit.
Kommunit inuussutissarsiutitigut aningaasaleeqataasinnaanissaat pillugu Inatsisartut inatsisaattut naapertorlugu siunnersuuteqarpunga. Kommunit inuussutissarsiutinut aningaasaliisinnaanerat aningaasaliissutissatut immikkoortitat Sulisa A/S-imik aqutsivigineqassasoq atorlugit pisassasoq.
Kommunit ataasiakkaarlutik immikkoortitaat qanoq annertussuseqarnissaat aaliangertassavaat. Taakkummi ukiumiit ukiumut angissuseq assigiinngitsuutitaarsinnaapput kommunit tamakkerlutik immikkoortitaasa aqutsivigineqarnissaat Sulisa A/S-ip isumagissavaa. Taama ilillugulu immikkoortitat ataasiakkaat kommunip pineqartumi inuussutissarsiutinut sulliviup pilersinneqarnissaanulluunniit inerisaavigineqarnissaanulluuniit aningaasaliissutitut atorneqassallutik. Sullivinni aallarnissaasuinilluunniit qinnuteqaatit tunngavigalugit aningaasat immikkoortitat Sulisa A/S-ip atortassavai.
Kommunip ataatsip aningaasat ingerlatanut sullivittulluunniit aaliangersimasumut ilusilinnut taamaallaat atugassanngortissinnaanngilai.
Sulisa A/S naliliippat sullivik pineqartoq siunissami aningaasatigut akilersinnaasumik ingerlalissasoq aningaasaliussat taamaallaat sullivimmut pilersitsinermut sulliviulluunniit inerisaavigineqarnissaanut aningaasaliissutigineqarsinnaapput.
Kommunimut ukiumoortumut atugassiissutit tamakkiisumik atorneqanngippata aningaasat sinneruttut ukiup naanerani kommunip karsianut utertinneqartassapput.
Siunnersuut arlalinnik pitsaaquteqarpoq:
Kommunit inuussutissarsiutinut aningaasaliisarnerat nukittorsarneqassooq. Paasisimasaqarluartunik naliliinerit tunngavigalugit sullivinnut siunissami imminut napatissinnaasutut isigisariaqalertunut sammitinneqarpata. Taamaalilluni ilimanarnerulissaaq aningaasaliinerup pissarsissutaanissaa tassuungalu ilanngullugu suliffinnik ataavartunik akileraarutitigullu tunngavissanik pitsaanerulersunik peqalernissaa. Taamaalilluni sullivinnik niuernikkut tunngavik peqqinnartoq toqqammaveqanngitsunut aningaasaliisuusinnaanerata aarleqqutigineqarnissaa annikinnerulissaaq. Taamaalilluni aningaasaliussat annaaneqarnissaat kommunit tassaniluunniit innuttaasut ajoqutaasumik aarlequtigineqarnissaat annikinnerulissaaq.
Kommunit inuussutissarsiutinut aningaasaliisarnerat nukittorsarneqassaaq. Aningaasaliinerit inuussutissarsiutit inerisaavigineqarneranut ingerlatsitseqatigiiffimmik paasisimasaqarluartunik aqutsivigineqarnerisigut, tassa aningaasaliissutit ingerlatitseqqinnermut atatillugu niuertut peqqinnartumik tunngaveqarnissamut aallaavissat siammasissumik assigiinngissusilimmik siunnersuinissamik neqerooruteqarnikkut.
Taamaaliornikkut
aallarnisaanikkut siunnersorneqarnermik aallartilluarnissamut annertunerpaamik
periarfissiisumik siunnersorneqarnissaat qulakkeerneqassaaq. Aamma taamaappoq
sullivinnut sullivittut inerisaanissamik siunertaqarlutik
aningaasaliivigineqarnissaminnik kissaateqartunut tunngatillugu.
Kommunit inuussutissarsiutinut aningaasaliisarnerup aqqutigivigineqarnerata Sulisa A/S-imut nuunneqarnerata kinngunerissavaa unammilleqatigiinnikkut pitsaanngitsumik sunniuteqataasinnaasut tamakkiisumik tamakkiisuuminngikkaluamilluunniit peerunnissaat.
Sullivimmi
suugaluartumiluunniit aallarnisaasulluunniit kikkuugaluartut Sulisa A/S
aqqutigalugu taamatut aningaasaliiffigineqarnissaminnik qinnuteqarsinnaapput.
Tamatumunnga taamaallaat piumasaqaataavoq suliniut pineqartoq
paasisimasaqarluartunut naliliiviigineqarnermigut siunissami akilersinnaasutut
isigineqartariaqassasoq.
Kommunit
sunniutigeqarfigineq ajorpaat Sakæusip Benjamiilluunniit kommunip
inuussutissasiutip aningaasaliissutigisartagaasa atorlugit
aningaasaliiffigineqarnersut.
Inuussutissarsiutinummi
aningaasaliinerit Sulisa A/S aqqutigalugu aqqutivigineqartussaammata
taamaalilluni kinaluunniit kommuninik pisuutitsiniarunnaassooq
inuussutissarsiutinut aningaasaliissutit aqqutigalugu sulliviit
aaliangersimasut salliutinnerarlugit imaluunniit inuussutissarsiutinik
nammineertunik ingerlatsisut unammillerneqarfiginerisigut
illikartitsiniaasutut.
Tamatuma
pingaarutaa uaniippoq inuussutissarsiutini ingerlatat kommunini annertusisamik
aningaasaliinissami piviusumik periarfissinneqalertussaanerat namminersortullu
inuussutissarsiutinik ingerlatsisut aningaasaliivigineqarnissaminnut nutaamik
periarfissinneqarnerat.
Neriuutigaara
Inatsisartunut siunnersuut soqutigineqarluni kajumillutik oqallisigissagaat.
Sunnersuut aappassaaneerneqannginnerani Inatsisartut Inuussutissarsiornerup
Ataatsimiititaliaanut suliarineqarnissaa inassutigaara.
Anders
Andreassen, ataatsimiinnermik aqutsisoq, Inatsisartut Siulittaasuata tullia,
Siumut.
Qujanaq
saqqummiussamut takisuumut. Taavalu maannakkut Naalakkersuisut Siulittaasuat
akissuteqassaaq suliassanut pingasunut.
Jonathan
Motzfeldt, Naalakkersuisut Siulittaasuat, Siumut.
Inatsisartunut
ilaasortap Anthon Frederiksen taavalu Tommy Marø kiisalu Mads-Peter Grønvold
saqqummiussaat aalajangiivigisassatut siunnersuutit pingasuusut kommunit
inuussutissarsiornikkut suliffeqarfinnut aningaasaliisinnaanerata tunngasut
ataatsimoortillugit matumani Naalakkersuisut sinnerlugit
akissuteqarfigissavakka.
Siunnersuutit
tamarmik kommunit suliffeqarfinnik ineriartortitsinermut toqqaannnartumik
aningaasaliisinnaanerannik tunngavissanik pitsaanerusumik ujartuuffiupput.
Taakkuli qanoq issusii assigiinngissuteqarput.
Inatsisartuni
ilaasortap Anthon Frederiksen aamma Tommy Marø kissaateqarput kommunit
taamatut aaliangiisinnaanerat eqaannerulersinneqarlunilu
annertunerulersinneqartariaqartoq. Siunnersuuteqartut naapertorlugit maani
inatsisitigut killiliussat sukangavallaarput suliffeqarfinnilu nutaamik
aallarniinermi kommunit peqataasinnaaneruneranut aporfeqartitsillutik.
Taamaattumik
inatsit tamatumani malittarineqartut, tassa inatsit normu 22, 3. november
1994-imeersoq kommunit inuussutissarsiutinut aningaasaliisinnaanerannut
tunngasoq allanngortinneqassasoq kissaatigineqarpoq.
Inatsisartunullu
ilaasortap Mads-Peter Grønvoldip kommunit suliffeqarfinnik pilersitsinermut
akuunerulernissaat aamma ujartorpaa.
Kommunit
suliffeqarfinnik toqqaannartumik tapiisinnaanerata ajornakusuussusia
paasillugu siunnersuutigineqarpoq aningaasaliissutit toqqaannanngitsumik
tunniunneqartarsinnaassasut. Erseqqissumik Mads-Peter Grønvoldip
siunnersuutigaa inuussutissarsiutinut aningaasaliissuttissanik kommuninut
immikkoortitsisassasut Sulisa A/S-imik aqunneqartussamik.
Siunnersuutigineqartut
kommunit ataasiakkaat namminneq aningaasaliissutissatik qanoq amerlatigissasut
aalajangertassagaat, taakkulu ukiuni aalajangersimasuni kommunini tassani
aningaasaliinermut atugassanngorlugit aalajangerneqartassasut pineqarpoq.
Akerlianilli aningaasa taakku inuussutissarsiutinut aalajangersimasunut
sorpianut atorneqassanersut kommunit aalajangertassanngilaat.
Siunnersuuteqartoq
naapertorlugu Sulisa A/S-ip aningaasat immikkoortitat kommunit sinnerlugit
aningaasaliissutigisarsinnaavaat, tassa suliffeqarfiit aallarnisaasullu
qinnuteqaraangata.
Aningaasaliisarneq
taama ittoq iluanaarutaasinnaasutut Sulisa A/S-imit isigineqarpat
Kommunit
inuussutissarsiutinut aningaasaliisuusinnaanerat aamma inuussutissarsiutinik
siuarsaaneq nassuiaammi aamma eqqartorneqartut ilagaat. Taannalu
saqqummiunneqartoq aamma matumani inimi ilisimaneqarpoq.
Ilaatigut
suleqatigiissitat ilaat kommunit inuussutissarsiutinut piorsaasarnerannut
tunngasunik suliaqartussaq KANUKOKA-p pilersitai paaseqatigalugu nassuiaammi
oqaatigineqarpoq
inatsip atortinneqarnera ajornaatsuinnaanngitsoq.
Tassami
killiliussat suussusii ersarissartariaqarnerat takuneqarsinnaavoq, aamma
suliffeqarnermi inatsit eqqarsaatigalugit. Aammattaaq nassuiaammi
kaammattuutigineqarpoq inatsip
allanngortinneqarsinnaanera siunertaralugu inatsit nalilersortariaqartoq.
Taamaammat
kommunit inuussutissarsiutit pillugit akulerussimanerannut Inatsisartuni
inatsisaat kiisalu suliffeqarnermut inatsit allallu ataatsimut
nalilersorumallugit inatsisit toqqammivigalugit sukumiinerusumik
Naalakkersuisut misissuataassavaat. Inatsit tamatumuunakkut
oqimaaqatigiinnissaat qulakkeerumallugu.
Taamaliornissaq
pingaaruteqarpoq kommunimmi ilaanni nalornissutigisarpaat
suliffissaaleqileqisoqalernerasinnaaneratigut, tamannalu akiorniarunikku
inatsit sorliit toqqammavigissallugit nalornigisarmassuk.
Kommunit,
Namminersornerullutillu Oqartussat kiisalu Inuusutissarsiutinik
ingerlatsisuusut suleqatigiillutik inatsisit misissussavaat Naalakkersuisut
assut taanna pingaartinniarpaat, taamaammallu inatsisip
allanngortinneqarnissaannut siunnersuummik 2002-mi ukiakkut ataatsimiinnermi
saqqummiutilersaartik.
Inuussutissarsiornikkut
suliffeqarfinnut kommuni aningaasaliissutiminnut periarfissaqalernerunissaat
pillugu aalajangiiffigisassatut siunnertip matuma eqqartorneqarnerannik
pissutik pingaarutillit qassiit Naalakkersuisut isiginiartariaqartut
pingaartippaat:
Siullermik:
Inatsisit piffissarititaat annertoreerput kommunit suliffeqarfinnik
suliniutinillu aallarniinermut peqataasinnaalluareerput.
Ukiullu
kingulliit takutippaat kommunit inuussutissarsiornermut akuusarnerat
alliartuinnarsimasoq.
Aamma
paasineqarpoq kommunit tamakkerlutik inuussutissarsiormut
aningaasaliisarnertik inatsit naapertorlugu Naalakkersuisunut
nalunaaruteqartussaanerminnik naammassinninneq ajorsimasut.
Inatsit
siunertamisut atuunnersoq aqunneqarnersorlu nalilersinnaassagaanni
aningaasaliissutit tamakku assigiissaartumik nalunaarsorneqartuarnissaat
pingaaruteqarpoq.
Aappaattut:
Kommunit nammineerlutik toqqaannartumik suliffeqarfinnut
aningaasaliisinnaanerat kommunit pineqartuni inuussutissarsiutinik
siuarsaanermut sakkussaqqippallaarunanngilaq.
Inatsisartuni
ilaasortap Mads-Peter Grønvoldip aalajangiivigisassatut siunnersuutiminni
tamakku kingunerlussinnaanerat aarleqqutigaa. Soorlu suliariniakkap pineqartup
naammattumik misissorneqarsimannginnera pissutigalugu annaasaqartoqarsinnaavoq.
Kiisalu
kommunit suliffeqarfinnut allanut toqqaannartumi tapersersuinerat aamma
suliffeqarfinnik pioreersunik akornusiisinnaavoq. Taamatut aarlerineq aamma
Naalakkersuisuni isumaqatigaarput.
Kommunit
inuussutissarsiutinik ineriartortitsinermik suliassaat pingaartumik
tassaasariaqarpoq nammineq eqqaamiorisallu pisinnaasaat periarfissaallu
tunngavigalugit inuussutissarsiorneq eqqarsaatigalugu
Naalakkersuinikkut
ingerlatsinermik siunertaqarluartumik suliffeqarfinnik pilersitsinissamut
kajumissaataasumik aalajangersaaneq aamma suliffeqarfinnik ingerlalluartunut
peqataaneq. Allatut oqaatigalugu, kommunit suliffeqarfinnut ataasiakkaanut
toqqaannartumik aningaasaliisinnaanerata kisimi oqallisigineqannginnissaa
pingaaruteqarpoq. Aammali kommunit qanoq inissisimanerat
isigineqarniartariaqarluni.
Matumani
taaneqarsinnaapput inuussutissarsiortut pitsaasunik
atugassaqartitaasariaqarnerat, kiisalu ineriartortitsilluni suliniutit
pitsaasuunissaat.
Kommunit
inuussutissarsiutinut toqqaannartumik aningaasaliisinnaanerat
periarfissaqartitaanerunerpat?
Aamma
inuussutissarsiornikkut aningaasaliisarnerat ingerlareersut
ipitinneqarsinnaapput. Taamalisoqaraluarpat tamanna inuuiaqatigiit
aningaasaqarneranni isigalugu aamma ajussasoq oqaatigisariaqarpoq.
Pingajussaattut:
Aamma taasariaqarpoq oqaatigineqareersutut inatsit ukiuni arfineq-marlunni
atuussimasoq ilumut nutartertariaqarpoq.
Tamatumanilu
anguniagaq siullermik tassaasariaqarpoq inatsip assigiissumik
atortinneqalernissaa kommuninut inuussutissarsiortunullu
allaffissornerpaallaannginnissaa kiisalu ajornartorsiutit eqqaaneqartut,
soorlu suliffeqarfinnik namminersortunik pilersitsinermut
ineriartortitsinermullu pisortat aningaasaliinerata kingunerlussinnaanera
pinngitsoortinniartariaqarnerat.
Kommunit
nammineq aningaasatigut pisinnaassusiat taamalu inatsimmik
periarfissarititaasunik atuisinnaassusiat kommunimiit kommunimut
assigiinngeqaaq. Imaakkajuttarpormi kommunit inuussutissarsiornikkut
periarfissakitsut, aamma aningaasaqarpallaaratik akileraarutitigut
isertitaqarsinnaassusiat tamatumani annikittarmat. Taamaammat inatsit
qasukkarneqarpat, kommunit atugarissaarnerusut suli annerusumik tamatumani
soorunami periarfissaqalissapput.
Sulinissami
inatsimmi aalajanersakkat kommunini ullumikkut paatsoorneqartartut
misissuataarnissaat pisariaqaqaaq, aalajangersakkat pingaartumik tassaapput
kommunit pilersaarusiornermut piareersarnermut imaluunniit aningaasaliinermut
periarfissamik misissuinermik naammaginartumik aningaasartuutitik
matussusisinnaanerannut tunngasut, kiisalu aningaasaliinikkut equngasumik
unammilleqatigiittoqalersinnaanerannik pinngitsoortinniarnermut tunngasut.
Naalakkersuisut
isumaqarput Mads-Peter Grønvoldip siunnersuutaanni periaaserineqartussatut
eqqaaneqartup siunissami inatsisip atorneqartinnerata passunneqarnissaa
pillugu isumaliutersuutini iluaqutissartalimmik atorneqarsinnaassasut.
Sukumiinerusumik
misissuereernikkut paasinarsissappat periaasissaq suleqataasunik aammalu
kommunit inuussutissarsiortunut kiisalu aningaasaliisartunik tunngaviusumik
atorneqarsinnaasoq, taava pissutsit qassiit eqqumaffiginiartariaqarput, tassa
ilaatigut.
Periaaseq
taanna nammineq kajumissut tunngavigalugu atorneqartariaqarpoq
Taavalu
kommunit ataasiakkaat isumaqatigiissuteqarfigineqartassallutik immaqa Sulisa
A/S-imit kiffartuunneqarnissamik isumaqatigiissuteqarnikkut ilaatigullu
apeqqutaalerpoq aaliangiisinnaatitaaneq ilumut Sulisa A/S-imut
tunniunneqassanersoq imaluunniit inuussutissarsiutinut
ineriartortitseqatigiiffinnut allamut tunniunneqassanersoq.
Ajornartorsiut
taama ittoq aningaasalersuinikkut tapersiisarneq pillugu Inatsisartut
inatsigisimasaanni naammattoorneqarsimavoq. Tassami aallaqqaammut
siunertagineqarpoq inatsimmik atortitsinermi nammineq Sulisa A/S-imut
inissinneqassasoq.
Tamannali
inatsisartut Ombudsmandia saaffiginnissuteqarmat iluarsineqarpoq. Suliassat
periarsarneqartarnerat taamaallaat Sulisa A/S-imut inissinneqarluni.
Naalakkersuisullu aalajangiisinnaatitaanermik namminneq tigummiartunngorlutik.
Ataatsimut
isigalugu Inatsisartunut ilaasortat pingasut, taakku kiisalu Naalakkersuisunut
isumaqatigiissut Kommunit inuutissarsiornermut peqataaneranni ajornartorsiutit
ilumut misissuataartariaqartut. Naalakkersuisullu isumaqarput
aalajangiiffigisassaq taamatut isikkoqartillugit
akuersissutigineqartariaqanngitsut, kisiannili oqaaseqatigineqartut
ilanngullugit kommuunit inuussutissarsiornikkut suliffeqarfinnut
aningaasaliisinnaasarnerat pillugu Inatsisartut inatsisaata
iluarsaateqqinnerani tunngavigineqassallutik.
Taamatut
oqaaseqarlunga naalakkersuisut sinnerlugit aalajangiiffigisassatut
siunnersuutigineqartut pingasuusut inatsisartunut oqaluuserisassanngortippakka.
Anders
Andreassen, ataatsimiinnermi aqutsisoq, Inatsisartut Siulittaasuata tullia,
Siumut.
Qujanaq.
Tulliulluni oqaaseqassaaq Michael Petersen, Siumut.
Mikael
Petersen, Siumup oqaaseqartua.
Inatsisartunut
ilaasortat Tommy Marø, Anthom Frederiksen Mads-Peter Grønvoldilu
assigiikannersunik siunnersuuteqarput. Ataatsimoortillugit
oqaluuserineqartussanit, taamaalillutillu ataatsimoortillugit
naalakkersuisuniit atassuteqarfigineqartunit. Taakkualu ataatsimoortillugit
Siumumiit oqaaseqarfigissavagut.
Siunnersuuteqartut
tamarmik kissaatigaat Kommuunit inuussutissarsiutinut aningaasaliisinnaanerat
pillugu inatsit nr. 22, 3. november-eersoq allanngortinneqassasoq,
eqaallisarneqarluni Kommuunit taamatut inuussutissarsiutinut
aningaasalersueqataasinnaanerat pitsaanerulersikkumallugu.
Siumumiit
erseqqissumik oqaatigissavarput taamatut kissaateqarneq tamakkiisumik
isumaqatigigatsigu aammalu naalakkersuisut pineqartunut siunnersuutinut
akissuteqaataat tunngavilersuutaallu suliap ingerlaqqinnissaani
aallaavigineqartussatut innersuussutiginiarlutigit.
Siumumiit
arajutsisimanngilarput taamatut kommuunit inuussutissarsiutinut
aningaasaliissuteqarsinnaanerat pillugu inatsisip nutartertariaqarnera aammalu
kommuunit periarfissatik pisinnaasatillu naapertorlugit
aningaasalersuinissamut periarfissarissaanerulernissaminnik
kissaateqartarnerat arajutsisimanatigu. Taamaattumik kingullermik nutaanik
Atassut peqatigalugu naalakkeruisunngortitsinermi isumaqatigiissutitsinnut
ilanngupparput imatut oqaasertalik, issuaaneq aallartippoq:
Kommuunit
inuussutissarsiutitigut tapiisarnerat pillugu inatsisitigut aalajangersakkat
nutarterneqarnissaat kommuunini inuussutissarsiornikkut periarfissat
naapertorlugit eqaannerusumik ingerlatsitsisoqalernissaa siunertaralugu. Tassa
naalakkersuisooqatigiinnermi
Siumup
Atassutillu isumaqatigiissutaanni taamatut allassimasoqarpoq.
Siumumiit
isumaqarpugut kommuunit taamatut inuussutissarsiutitigut peqataalluarlutik
siunissami aningaasalersueqataanissaat nutaamik eqqarsariaaseqarluni
ingerlanneqartariaqartoq. Naatsumik oqaatigalugu kommuunit peqataanissaannaat
pinnagu, kisiannili inuussutissarsiutitigut patajaatsumik ineriartorfiusumik
ikioqatigiiffiusumillu aaqqissugaasumik ingerlatsinissaq siunertaralugu
aaqqissuisoqartariaqarluni.
Taamaattumik
Siumumiit sakkortuumik kaammattuutigissavarput nunatsinni
inuussutissarsiutitigut ineriartortitsineq aammalu aningaasalersuineq
siunissami pissasoq. Kommuunit ataasiakkaat kisiisa aallaaviginagit nunalli
immikkoortui aallaavigalugit suliniutit ineriartortitsinerillu
ingerlanneqartillugit.
Siumumiit
naalakkersuisunut kaammattuutigissavarput, soorlumi naalakkersuisut taamatut
siunnerfeqartut ukiamut Inatsisartut ataatsimiinnissaannut inatsisitigut
naleqqussaanerit saqqummiuteqqullugit, taamaalilluni kommuunit
inuussutissarsiutitigut aningaasalersuisinnaanermut periarfissaat nutaat
2003-miit aallartittumik periarfissiissutaasinnaaqqullugit.
Taamannak
oqaaseqarluta naalakkersuisut akissuteqaataat suliap ingerlateqqinneqarnissaa
akuersaarparput.
Anders
Andreassen, ataatsimiinnermi aqutsisoq, Inatsisartut Siulittaasuata tullia,
Siumut. Qujanaq. Tulliulluni oqaaseqassaaq Finn Karlsen, Atassut.
Finn
Karlsen, Atassutip oqaaseqartua.
Inatsisartunut
ilaasortat Anthon Frederiksen aamma Tommy Marø assigiikannersumik
siunnersuuteqarput kommuunit inuussutissarsiornermut aningaasaliisinnaanerat
eqqarsaatigalugu, taavalu aamma Mads-Peter Grønvold allaanerulaaraluartumik
siunnersuuteqarluni.
Sulianut
taakkunnga pingasunut ataatsimoortillugit suliassiissutigineqartumut
Atassummiit imatut oqaaseqassaagut: Siullermik oqaatigissavarput siunnersuutit
taakku pingasut naatsumik oqaaseqarfigissagatsigit naalakkersuisup akissutaa
ersarimmata.
Soorlu
naalakkersuisut akissuteqarnerminni oqaatigigaat kommuunit inuutissarsiutinut
akulerusimanerat pillugu Inatsisartut inatsisaat, kiisalu suliffeqarnermi
inatsit allallu ataatsimut nalilersorumagaat inatsisitigut toqqammavii
inatsisit oqimaaqatigiinnissaat qulakkeerumallugu, tamatumani inatsit
qulakkeerumallugu.
Atassummiittaaq
oqaatigissavarput naalakkersuisut 2002-mi ukiakkut Inatsisartut
ataatsimiinnissaannut inatsip allannguutissaannik saqqummiiniarnerat
qilanaaralugu utaqqiumagatsigu. Pingaartillugulu Atassummiit eqqaamaqquarput
suliffiit pisortaniit pigineqaleriartunnginnissaat, tassami namminersortut
ingerlataasa ukiuni kingullerni ilaatigut pisortaniit tiguneqartarnerat
takornartaanngimmat. Aammattaaq naalakkersuisut akissuteqarnerminnut
oqaatigisaat aarlerinartutut oqaatigineqarsinnaasoq, tassa kommuunit
pigissaarnerusut kommuunillu pissakinnerusut akornanni avissaarsinnaaneq
annertusiartuinnarsinnaasoq. Tamatumani Atassummiit tamatuma
pinaveersaarnissaa pingaartikkatsigu erseqqissasavarput.
Taamaattumik
Atassumiit isumaqarpugut kommuunit inuussutissarsiornikkut siuarsaanissami
assigiinnerusumik pisoqassappat naalakkersuisut ukiamut inatsisissap
allanguutissaa saqqummiinissaa utaqqigallartariaqartoq. Taamaammat
naalakkersuisut isumaqatigaagut aalajangiivigisassatut siunnersuut taama
isikkoqartillugu akuersissutigineqannginnissaannut innersuussutigineqarmata.
Aammattaaq
naalakkersusut isumaqatigaagut oqarmata oqaaseqaatigineqartut ilanngullugit
kommuunit inuussutissarsiornikkut suliffeqarfinnut aningaasaliisarnerat
pillugu Inatsisartut inatsisaata iluarsaateqqinneqarnissaat
tunngavigineqarnissaat, iluarsaateqqinnerannut tunngavigineqarnissaat.
Taamatut oqaaseqarluta naalakkersuisut akissuteqaataat, akissuteqarnermini
oqaaserisaat taperserpagut.
Anders
Andreassen, ataatsimiinnermi aqutsisoq, Inatsisartut Siulittaasuata tullia,
Siumut. Qujanaq. Tulliulluni oqaaseqassaaq Lars Sørensen, Inuit Ataqatigiit.
Lars Sørensen,
Inuit Ataqatigiit oqaaseqartuat.
Qujanaq.
Aallaqqaasiullugu Inuit Ataqatigiit oqaatigissavaat, Inatsisartunut ilaasortat
kommuuninut inuutissarsiutinut aningaasaliinermut
periarfissaqalernerulernissaannik siunnersuutaannut naalakkersuisut
akissuteqaataat iluarisimaaratsigu.
Naluneqanngitsutut
kommuunit ataasiakkaat kissaateqarnerat tunngavigalugu inatsit tamatumani
malittarineqartoq, tassalu inatsit nr. 22, 3. november 1994-imeersoq kommuunip
inuutissarsiutinut aningasaleeqataanerannut tunngasoq allanngortinneqassasoq
naleqqussarneqassasorlu kommuunit kattuffiannut, tassa KANUKOKA-mut siorna
suliakiissutigineqarpoq.
Maanna
KANUKOKA-p suleqatigiissitaq kommuunit inuussutissarsiutitigut piorsaanerannut
tunngasunik suliaqartussaq pilersereerpaa suleqatigiissitarlu naalakkersuinit
qanimut suleqateqarluni inatsisip allanngortinneqarsinnaanera siunertaralugu,
kiisalu suliffeqarnermut inatsisit allallu ataatsimut nalilersorumallugit
inatsisitigut toqqammaviit sukumiisumik nalilersorlugit suliaralugit
aallartereerlugit. Tamakku tunngavigalugit Inuit Ataqatigiit
iluarisimaarparput naalakkersuisut inatsisip allanngortinneqarnissaannut
nalilersuilluareerlutik siunnersuummik 2002-mi ukiakkut Inatsisartut
ataatsimiinnissaannut saqqummiussilersaarmata.
Inuit
Ataqatigiit tunngaviusumik isumaqarpugut kommuunip inuutissarsiutinik
ineriartortitsinermi suliassaat pingaarneq tassaasoq nammineq eqqaamiorisallu
pisinnaasaat periarfissaallu tunngavigalugit pitsaasumik
pilersaarusiorluarnikkut nunaqqataasut suleqatigalugit ineriartortsineq.
Tamanna kommuunit ilaannit pitsaasumik angusaqarfiulluartumillu
namminersortunik suleqateqarnikkut ullumikkut inatsitsit periarfissarititaasut
atorlugit ingerlaanneqarpoq. Tamatunani soorunami kommuunip
nakkutilliisoqarfiata akuersineratigut pilersinneqarsimasut eqqarsaatigalugit.
Inuit
Ataqatigiit arajutsisimanngilarput kommuunit ilaannit suliffeqarfinnit
suliniutinillu aallartitsiniarnermut ukiuni makkunani annertunerusumik
suliniutigilermassuk. Tamanna assigiinngitsunik peqquteqarpoq. Aalisakkanik
suliffissuit annertunerusumik atorneqaratik uninngatiinnarneqartut kommuuninut
suliffissaqartitsiniarnikkut aningaasarsiornikkullu pingaaruteqarluinnartumik
inissisimasut uninngatiinnarneqarnerat qatsullugu namminersortunik
suleqatissarsiorlutik aalisakkanik tunitsivginnik umiarsuarnik
pilersitseqataasalerput uffalu kommuuneqarfinni pineqartuni Royal Greenlandi
pitsassuarnik suliffissuaateqaraluartoq. Allatut ajornaqaaq
Namminersornerullutik Oqartussat ingerlataat taakkunani ingerlatsiumanngippata,
taava kommuunit pinngitsooratik iliuuseqartariaqartutut misigisimanerat
tapersersorneqartariaqarpoq.
Inatsisartut
ukiakkut ataatsimiinneranni aalajangerneqarpoq sinerissap qanittuani
aalisarnikkut nutaterisoqartariaqartoq. Tamanna pisariaqarmat Inuit
Ataqatigiit oqaatigereerparput, taamaakkaluartoq ullumikkut ilisimavarput
aammalu ilisimasarput tassaavoq aalisariutitigut nutarterinissami amerlasuunit
isumalluutigineqartoq, tassalu ESU ukioq manna aallartilaaginnartoq
nalunaaruteqarpoq Inatsisartut ukioq manna aningaasaliissutaat
atorneqareermata naatsorsuutigineqarsinnaanngitsoq nutaanik qinnuteqartut
taakkulu akuerineqarnissaannut. Inatsisartunut ilaasortat nunatsinni
aningaaserivinnut annersaannut suliniutinut tunngatillugu
paasisassarsiorsimasut nalunngilaat aningaaseriviit orniginerugaat
umiatsiaaqqanik nuannaariutinik pisaarniartunut aningaasanik
atortitsinissartik. Tamakku qaammatit tamaasa aalajangersimasunik
naatsorsuutigineqarsinnaasunillu akissarsiaqarmata, taamaalilluni aningaasat
attartorsimasat utertinneqarnissaat tamakkiisumik qularnaaneqartutut
isigineqartarlutik. Taakkualu ingerlatsinikkut aningaasanik
iluanaaruteqarfiusussatut aamma isigineqarlutik.
Inuit
Ataqatigiit isumaqarpugut aningaaseriviit inuutissarsiutinut siuarsaanissamut
periarfissaqartitsinerat pitsaanerusariaqartoq ullumikkut innuttaasut
aningaaserivitsigut sullissinermi assigiinngitsunik pineqartutut
misigisimapput. Aningaaseriviillu taama aamma tamanna nassuerutigereerpaat.
Illoqarfinni sisamani najugaqaraanni ajornannginnerusumik pitsaanerusumillu
sullinneqarnissaq naatsorsuutigineqarsinnaasoq oqaatigineqartareermat.
Soorlu
piginneqatigiilluni illuliornissamut aningaasanillu nalinginnaasumik
attartornissamut periarfissat eqqarsaatigalugit.
Aningaaseriviit
inuutissarsiutinut aningaasaliinissamut tunuarsimaapallaarnerisa
kingunerisaanik nunatta ilaanni inuutissarsiuutitigut arriinnerutsuinnarmik
ingerlavoq.
Kommuunini
taakkunani najugaqartut kommuunertik peqatigalugu inuutissarsiutitigut
aningaasaleeqataanissamut periarfissat pitsanngorsarneqartariaqartut,
taakkunani Inuit Ataqatigiinni isumaqarpugut. Taamaattumik kommuunit
inuutissarsiutini aningaasaleeqataasinnanissaat pillugu Inatsisartut
inatsisaat nr. 22, 3. november 1994-imeersoq pillugu suleqatigiissitaq
inatsimmik qulaajaasussaq sulilluni aallartereersup ukiukkut Inatsisartut
ataatsimiinnissaannut suliaminik saqqummiussaqarnissaat Inuit Ataqatigiinniit
qilanaaralugu utaqqissavarput. Taamatut oqaaseqarluta inatsisartunut
ilaasortat siunnersuutaannut itigartitsinerput oqaatigaarput suliassarlu
naalakkersuisunit aallartinneqareersimasoq naalakkersuisullu
siunnersuuteqartunut akissuteqaataat akuersaarlugu.
Anders
Andreassen, ataatsimiinnermik aqutsisoq, Inatsisartut Siulittaasuata tullia,
Siumut. Qujanaq. Tulliulluni oqaaseqassaaq Loritha Hendriksen,
Kattusseqatigiit:
Loritha Hendriksen, Kattusseqatigiit oqaaseqartuat.
Qujanaq. Inatsisartunut ilaasortat pingasuusut siunnersuutaat, tassasut Anthon Frederiksen, Tommy Marø, kiisalu Mads Peter Grønvold. Kattusseqatigiinniit siunnersuuteqartut siunnersuutaat ataatsimoortillugit imatut oqaaseqarfigissavarput.
Nalunngisatsituut ukiuni kingullerni annertuumik ersarissigaluttuinnarsimavoq Inatsisartut inatsisaanni nr. 22, 3. november-imi 1994-imi pilersinneqarsimasut §3-ip piaartumik nalorninaatsumillu erseqqissumik ersarissaneqartariaqalersimasoq. Ullumikkummi takuneqarsinnaammat inatsip atuuttup ersernerlunnera peqqutaalluni iluaqutigineqarsinnaanerugalua atorluarneqarsinnaanerigalualu assigiinngitsunik paasineqarsinnaasoq atortinneqarlunilu. Taamaammallu kissaatigaarput piaartumik inatsit ullumikkut atuuttup misissorluarlugu oqaasertaasa allanik ersarissunik taarsertariaqarnerat pisariaqavissoq Kattusseqatigiinniit oqaatigeqqikkusupparput. Taamaalilluni atuisut atuisussallu minnerunngitsumillu kommuunit nalorninaatsumik assigiimmillu periuseqarluni atorluarneqalersinnaanera periarfissaq pitsaasutut ammaanneqarnissaa isigigatsigu.
Isumaqarpugummi ullumikkut atuuttoq pissutinillu piviusunut naleqqukkunnaarsimasoq. Minerunngitsumik ersernerlunnera peqqutaalluni paatsoorneqarsinnaaneralu ersarissigaluttuinnarpoq. Ukiuni kingullerni ersarissigaluttuinnartoq takusinnaavarput. Innuttaasut nammineerusunnerat peqatigiinnikkullu aallartitseqatigiissinnaanerat annertuumik ujartorneqartoq ullumikkut malugereerparput. Tamannalumi tulluusimarutissatut tapersersugassatullu Kattusseqatigiinniit pingaarteqaarput. Pingaartitaraarpummi inuup nammineersinnaanini nammineerusulerneralu tapersersussallugu. Taamaattumik pinngitsoorneqarsinnaanngilaq inatsimmik allanngortitsinissaq. Siunissami suli eqaannerusumik inuutissarsiuummillu aallartitserusuttut annerusumik aqqutissiuunneqarsinnaaqqullugit. Aatsaallu tamakku anguneqarsinnaapput nalorninaatsumik patajaatsumillu kommuunit namminneq eqaatsumik ersarissumillu aningaasaleeqataasinnaanerata periarfissaai inatsitsitigut ammaanneqarpat. Siunnersuuteqartummi ersarissumik tamarmik ujartorpaat kommuunini nammineerluni suliffiusinnaasunik aallartitserusuttunik aningaasaleeqataasinnaanermik periarfissami qanoq ullumikkut periarfissaq qanoq ullumikkut pingaaruteqartigisoq. Taamaaliornikkut ataavartumik inuutissarsiuuteqarniarnertik aallartikkusuttullu patajaatsumik anguneqarsinnaammat. Naatsorsuutigisimavarpummi qanoq kommuunimut namminermut iluaqutaalersinnaatigisoq, soorlu suliffissaaleqisunut suliffissaqartitsilernissaq aammattaaq minnerunngitsumik kommuunimi akileraarutit isertitassat kusanartumik sunniuteqarsinnaaleqqullgit.Tamannalumi nunaqavissunut nunaminnullu suleqataarusuttunut ineriartornermillu piorsaaqataarusuttunut ammaasussaammat periarfissarlu pitsaasuusussaammat.
Siunissami inuusuttut tassuuna kajuminnerulernissaat kialluunniit naatsorsuutigisinnaavaa.
Taamaattumik §3-ip misissorneqarnissaa ersarissumik nalorninaatsumillu oqaasertalerneqarnissaa kissaatigaarput. Tassungalu taarsiullugu inuutissarsiutinut patajaatsumik pilersitsiniarnermi kommuunit aningaasaleeqataalernissata ammaaffigineqarnissaa aaqqiivigineqarnissaalu inatsisitigullu eqaatsumik aaqqiivigineqarnissaa oqaatigeqqikkusupparput makku tunngavigalugit:
Ullumikkummi illoqarfiit nunaqarfiillu nnertuumik ineriartoprfiusut nunaqavissut suliffinnik ... nalunngilarpummi ullutsinni inuuniarnermi minnerunngitsumillu akiligassanut allanullu annertuumik angummanniapiloortoqartoq saniatigut aningaasanik annertuunik toqqorterinissamut ajornarluinnartarmat. Qularinngilarparpummi taamatut periarfissiinikkut angusassaq pitsaasoq patajaatsorlu inunnattaasunut iluaqutaasussaq oqinnerusorlu anguneqassammat periarfissiissallunilu pitsaasumik. Taamattaaq erseqqissaqqikkusupparput isumaginnginnatsigu kommuunini namminersortut suliffiutaannit tigooraaniarsarisoq, kisianni siunertaammat suliffinnik aallartitaqarnermi suliffiit nammineersinnaanngoriartornerat aallaavigalugu kommuunit piginneqataasutsiminit tunniussinnaanera siunertaasussaammat.
Naggataatigut oqaatigerusupparput pingaartikkatsigu kommuunit aningaasaliisinnaatsimi naapertorlugu aallarnisarnissaminut aningaasaliinissaminut ingerlatsinissaa pingaartikkatsigu.
Allanik avataanersunit akuliuffigineqarnani. Taamaalilluni akisussaaffiit kommuunimiiginaasinnaaqqullugu. Taamatut oqaaseqarluta Kattusseqatigiinniit siunnersuuteqartut tamakkiisumik taperserparput susassaqartunullu oqaluuserineqarnissaa innersuussutigalugu. Nipera ajormat utoqqatsissutigaara nuannermik.
Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut. Qujanaq. Tulliulluni oqaaseqassaaq Per Berthelsen, attaviitsoq.
Per
Berthelsen, Attaviitsup oqaaseqartua.
Qujanaq.
Siunnersuutip nr. 77, 90 aammalu 44 imminnut naapeqatigiiffeqarput, tamanimi
piummat kommuunit inuutissarsiornermut aningaasaliisinnaassuseqarnerisa
annertusarneqarnerinik kissaateqarneq. Eqqarsaat tamanna nutaajunngilaq
siornatigummi kommuunit namminneq taarsigassarsisitsisarallarmata tamanna
aallutarineqarnikuummat.
Periarfissarli
taamak ittoq ukiut arlalialuit matuma siorna allanngortinneqarpoq, taamallu
kommuunit akuliussinnaanerat tunngavissiuunneqarluni, ilaatigut
killeqarnerusumik eqarnerusumillu suleriaassiissutaasutut
nalilerneqartalersumit. Tamannalu siunnersuuteqartut isumaqatigivaat maannalu
ujartorlugu suleriaasitoqqamut immaqa assingusumut utersaaqqissinnaaneq.
Taamak iliornikkut kommuunit qitiusumit, tassalu kommuumit
nakkutilliisoqarfiannit pituttugaannginnerullutik suleqataasinnaanissaat
ammaanniarumaneqarluni. Nassuerutigeriissavaralu uanga nammineq
siunnersuuteqartut ataatsimut siunnerfiat paasilluarlugu
tapersersornartikkakku.
Maannami
maleruagassiaasut malillugit kommuunit peqataasinnaanerat qangaanerusumik
sanilliullugu eqarnerusutut ittutut taaneqarsinnaavoq. Tassami ilaatigut
mattussesoqanngikkaluartoq ajornakusoornerulernikuullunili inuinnaat
ataasiakkaat aallartitsiniarsinnaanerannut peqataasinnaaneq.
Ukiuni
makkunani pisortat tungaannit kommuunit ataasiakkaat
namminersinnaajartoqartinnissaat siunnerfiusutut oqaasinnaajusarpoq
maannamulli siunnerfiusumi malunniunnerpaasoq tassaavoq aningaasartuutit
iluini kommuunit nammakkersorneqarnerujartornerat tassani tassa
malinnaatinneqarnani kommuunit isertatigut qaffassaataasinnaasunut eqaatsumik
peqataatinneqarsinnaanissaat. Isumaqarpungalu taamatut suleriaaseqarneq
siunnerfiusumut naapertuilluanngitsoq imaluunniit naapertuulluanngitsoq,
taamallu kommuuninik ingasappallaartumik qitiusumik oqartussaaffeqarfiusunit
ammut naqisimannittoqarpallaalersoq, taamallu ilisumit kommuunit
ineriartortitsinissap iluani eqaatsumik akuliusimallutik
periataarsinnaassuseqarnissaat naaffeqartutullusooq illuni.
Imaanngitsoq
anguniarneqassasoq inuutissarsiutitigut aallartinneqartut qalliusumik
oqartussaaffigineqarnissaat. Naamerluinnaq, tamannami siuarnerunani
kinguarnerussaaq, kisiannili tassani pisariaqartoq tassaavoq kommuunit
ataasiakkaat aningaasaqarnikkut periarfiargisinnaasamisut nalilikkami iluani
kiffaanngissuseqannginnerusumik akuutinneqarsinnaanissaat. Suummi tamarmik
assigiissartariaqanngillat assigiissarneqarsinnaanatillu. Kommuunimmi
ataasiakkaat periarfissaat assigiinngissitaaqaat, tamannali
unissaataasariaqanngilaq eqaannersumik suleriaaseqarsinnaanerusumik
ammaassisinnaanissamut. Pingaarnerpaasoq tassa sumiiffinni ataasiakkaani
piukkunnartunik aallartitserusussuseqartut aallartitsiniartullu
sullissisinnaanerup oqimaannerujussuusinnaanera peqqutigalugu ipisarmagit
pisariillisaagaasumilli sullissinermi suleqataasinnaanermillu
takutsivigineqarsinnaanissaat. Taamatummi ililluta aamma politikkikkut
ukiorpassuarni qaqqaqqalaarutigineqartuartoq, tassalu allaffissornerujussuup
imaluuniit qitiusumik allaffissornerujussuup qumarsarneqarnissaa
qularnanngitsumik suleqatigiilluta timitaleruminarsarlugu
aqqutissiuuffigisinnaaqataaffigisinnaalissagaluarparput.
Taamaammat
nuannaarutigaara naalakkersuisut nalunaaruteqarnerat, tassa naak
siunnersuuteqartut siunnersuutaat maleqqissaanngikkaluarlugit
assigiinngitsutigummi tamarmik immikkut sanngeequteqarsinnaammata, maanna
kommuunit inuutissarsiornermut aningaasaliisinnaassuseqarnissaannut inatsisip
nutarterlugu nutaamik nalilersuiffigineqarsinnaanissaa
tunngavissaqarsorinarpoq. Tamatumalu Inatsisartut ataatsimiititaliai
susassaqartut peqatigalugit ingerlanneqarnissaa kaammattuutigigakku matumuuna
nalunaarutigissavara.
Anders
Andreassen, ataatsimiinnermik aqutsisoq, Inatsisartut Siulittaasuata tullia,
Siumut.
Qujanaq.
Maannalu Naalakkersuisut Siulittaasuat partiit oqaaseqaataannut
akissuteqassaaq.
Jonathan
Motzfeldt, Naalakkersuisut Siulittaasuat, Siumut.
Partiit
Kattusseqatigiit aammalu Demokraatit matumani tapersiinerat Naalakkersuisut
ukiaru inatsisissamik imaluunniit inatsimmik matumani allannguutissatut
iunnersuuteqarnissaat qujassutigaara aammalu malugisinnaasakka
najoqqutaralugit inatsisip taassuma tamakkiisumik atortinneqarsinnaanera
imaappoq siunertaminut uani siunnersuutigineqartunut naammattumik
allariarfigineqassappat inatsimmik taamatumik allanngortitsinissaq
pinngitsoorneqarsinnaanngilaq.
Soorlu
aamma oqaaseqartut, Siumup oqaaseqartuata taamatullu aamma Partiinit allanit,
Atassummit Inuit Ataqatigiinniillu aamma tamanna paasineqartoq inatsisip
allannguuutissai naammassineqaqqaartariaqartut alloriarfissaq taamak ittoq
atorniarneqassappat. Aamma taanna Demokraatiminngaanniit tapersinneqartoq, Per
Berthelsenimit aamma malugisinnaavara aammalu taamak toqqaannatumik
Kattusseqatigiinniit oqartoqanngikkaluartoq paasivara aamma Kattusseqatigiit
matumani aamma taakkua suliarineqarnissaa isumaqatigigaat. Taamaalillutik
periarfissat taakkua tamarmik taamaalillutik periarfissinneqarumaarput.
Ataasiinnavik
oqaatigilaassavara kommuunit inuussutissarsiormi peqataanerannut tunngatillugu,
taannami matumani pineqarmat nalunaaruteqarnermut maqaasigisatsinnut
ilanngullugu oqaatigissavara kommuunit tamakkunatigut nalunaarutigisartagaat
soorunami tamaasa pissarsiarisarpagut aammalu kommuunit malinnaaffigineri
allaffeqarfimminngaanniit maani Namminersornerusut allaffeqarfianninngaanniit
malinnaaffigineqarput. Kommuunit soqutiginninnerat annertoqaaq kommuuniminni
suliassanik aallartitsiniarlutik aammalu tamatumani aallartitsiniarnermi
nuannersuusarpoq kommuunit namminneerlutik suliassanik taakkunani
siuttuugaangata. Kisiannili aamma Kommuunit nakkutilliisoqarfianinngaanniit
nakkutigeqqullugu eqqaasutigineqartartoq imaanngitsoq akuleruffiginiarlugu,
kisianni nakkutilliivimminngaanniit eqqaatitsissutigineqartartoq
unaajuartarpoq aammalu taanna suliassaraarput inuutissarsiutinik
atuutereersunik ingerlalluartunik kommuunit unammillerlutik namminneq aamma
allartitsisinnaanerat. Taanna kaammattuutigineqarneq ajorpoq. Kisianni
nutaanik kommuuneqarfimmi ingerlanneqanngitsunik aallarniiniarpata nammineq
oqassaagut namminersortut kommuunimi ingerlateriigaanngisaannik periarfissat
taamak ittunik peqataaniarnerat ammaffigineqarpoq. Assersuummik taasaqassaguma
aamma ullumikkut ullaatungaa oqallinnermi erseqqissumik oqaatigineqartoq
assersuutigalugu imeq kalaallit nunaata ernga pinguitsoq avataaninngaanniit
aamma maannakkut isiginiarneqartupilussuaq.
Maannakkut
Inatsisartut akuersissutigaat erngup tungaatigut nioqquteqarnermik
aallarniinissat. Taamaattumik imermik niuerneq ingerlanneqanngimmat
annertunerusumik , taamaattumik kommuunit pineqartut soorlu assersuutigalugu
fabrikkimik taamak ittumik aallartitsiviusussami aallaqqaammut
ernisussiortumik peqataanissaminut noqqaasutaa akuerineqarsinnaavoq. Tassa
allanik imermik tunisasiornermik kommuunimi peqarfiunngitsumi. Tamakku
assersuutitut taalaarpakka una aamma ilaannikkut paatsoorneqarsinnaasarmat
qitiusuminngaanniit naalagaaniarnertut isiginiarneqartarlu. Tassa
akuleruttoqaraangat una unalu akuerineqarsinnaanngillat, kisianni
eqqaamassavarput inatsit profitillu allagaat najoqqutaralugit, tassani
oqaatigineqarmat inuutissarsiutit ingerlanneqareersuni unammillerluni
kommuunit aallartitsinissaat taanna periarfissinneqassanngitsoq. Taanna
aporfissaqartarsinnaasarpoq.
Aamma
kommuunit nammineernerata, soorlu aamma Kattusseqatigiit ilaatigut
oqaaseqarneranni aammalu Demokraatit tungaanninngaanniit oqaatigineqarneranni
oqaatigissavara kommuunit nammineersinnaassusiat aamma tamatumani
allilerniarneqarpoq. Imaappoq pisinnaatitaaffiit annertunerusumik
periarfissinneqarnissaat noqqaassutigineqarpoq.
Taamaattumillu
taanna tunngavigalugu inatsisip tunngavilerneqarnissaa
periarfissinniunneqarluni aamma.
Kommuunit
sukkulluunniit nammineerlutik aalajangersimasinnaavaat isertitassami qanoq
aaqqissuunnissaat. Kommuunit nammineerluni aaqqissuusinnaavaat
aningaasartuutissami tulleriiaarneri qanoq issasut. Ukiut tamaasa aqqusineq
asfalt-isilerlugu kommuunit namminneq taanna aalajangersinnaanaa imaluunniit
aningaasat allanut atussanerlugit.
Tamakkua
qitiusuminngaanniit akuleruffigineqarneq ajorput. Aningaasartuutissat
kommuunit nammineerluinnarlutik tassuuna inatsisitigut periarfissaminnik
nalilersuillutik tulleriiaralutik taamaalillutillu qinersisartuminnut
innuttaminnut akisussaaffigalugu suliaat uani pineqartut
akuleruffigineqanngillat. Uani pineqartoq inatsisitigut ukiaru
allannguutissami siunnertaqarpoq akisussaassuseq suli anginerusoq kommuuninut
tunniunneqarnissaa ilusilersorneqassalluni.
Anders
Andreassen, ataatsimiinnermik aqutsisoq, Inatsisartut Siulittaasuata tullia,
Siumut.
Qujanaq. Maannalu siunnersuuteqartup oqaaseqaqqissapput. Siulliulluni Tommy Marø.
Tommy Marø, siunnersuuteqartoq, Siumut.
Qujanaq. Siunnersuuteqartut nuannaarutigalugu oqaatigissavara naalakkersup aammalu naalakkersuisoqataasa aammalu minnerunngitsumik partiit oqaaseqartuisa siunnersuutiga ilassilluarmassuk. Tassami uani qularutigineqassanngilluinnarpoq maani oqaluttarfik atorlugu siunnersuuteqarninni qitiutilluinnarakku inuit suliffissaqarnissaat maani kommuuniisaarluta oqalussanngilagut, kisianni Inatsisartutut maani oqaaseqarninni oqaatigissavara kommuunini ataasiakkaani ajornakusoortorujussuummat sulifinnik aammalu suliffinnik nutaanik aallarnisaarnermi kommuunit namminerisaminnik akuuniarnerat. Aammalu naalakkersuisunut kaammattuutigissallugu inatsisip uumap allanngortinnissaannut ukiamut pisussamut neriorsuutigisamittut annertunerusumik KANUKOKA-p peqataatinnissaa. Tassami aamma ilisimagakku KANUKOKA-p maannakkut piffissami kingullermi siusinnerusukkullu inatsisip uumap nutarternissaannut annertuumik suliniuteqartut.
Aammalu nuannaarutigivara Kattusseqatigiinninngaanniit aamma Mads Peter Grønvoldip aammalu Anthon Frederiksenip sinnerlugu Tom Ostermannip saqqummiussinerminni uanga siunnersuutinnut assingusumik aamma saqqummiussimmata. Tassa takuneqarsinnaavoq Inatsisartuni ajornartorsiutip taassumap nutarternissaa soqutigineqartoq. Neriuppungalu aamma ukiamut annertunerusumik naalakkersuisut saqqummiussinerata kingorna annertunerusumik oqalliteqqinnissarput qilanaarivara.
Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.
Qujanaq. Tulliulluni oqaaseqaqqissaaq Tom Ostermann, Kattusseqatigiit.
Tom
Ostermann, Kattusseqatigiit oqaaseqartuat.
Siullermik
uangattaaq siunnersuuteqarsimasoq Anthon Frederiksen sinnerlugu matumani
partiit Kattusseqatigiit Attaviitsullu oqaaseqaatigisaat
qujassutigerusuppakka. Kisianni taamatut oqareeruma illuatungaatigut Tommy
Marøp oqaatigisai KANUKOKA eqqarsaatigalugu isumaqatigilluinnarpara.
Taamaattorli aamma nunatta isorartunerujussua aammalu pinngortitakkut
allaanerussuteqarnera taanna eqqaamasariaqarpoq. Soorlu maannakkut
assersuutigisinnaavagut qanga Royal Greenlandiusimasut Upernavik
Seafood-inngorlutik aammalu Uummannaq Seafood-inngorlutik
ingerlatarineqalersimasut.
Upernavimmi
aalisarnikkut periarfissat ullumikkut killeqangaatsialersimammata aammalu
aalisartut ullumikkut qiviaraanni unammilleqatigiinnerup aaqqani ilaatigut
snescooterinik tuniorarneqartarsimallutik, taavalu aamma aalisarneq
ajalusooriartulermat akissaaruffigineqarsimallutik tamakkua aammalu
annertuumik inunnut ataasiakkaanut artukkiisimammata.
Taamaattumik
pingaaruteqarluinnartutut isigaarput aamma tamakku
eqqummaariffigineqarnissaat. Aammalu Upernaviup Kommuunia annertuumik
piffissami kingullermi suliniuteqarsimagaluarpoq, kisianni ajoraluartumik
aamma inatsisit ukua aamma aporfiusimallutik.
Taamaattumik
taamatut suliniutit soorlu naalakkersuisup siulittaasata oqaatigereeraa
kommuunit ernisussiortutut peqataasinnaanissaannut inatsisikkut
eqeersaasoqarnissaq pisariaqarluinnartutut isigaarput. Taassumasaniatigut
aamma Ittoqqortoormiini NUKA A/S-i assersuutigalugu uninngaannartuuvoq.
Tamakkua pinaveersaartinniarneqarnissaannut immaqa aamma kommuunit
peqataasinnaagunik eqaannerusumik periarfissat
pitsaanerusinnaagaluarput.Maannakkummi aamma nalunngilagut assersuutigalugu
Robery Fish-i nammineerlutik aallartissimapput. Aammalu Qeqertaq Fish aamma
maannamut ilisamasagut toqqammavigalugit ingerlalluarlutik. Taamaattumik
tamakkua siunissami kommuuninut eqaannerusumik iliuuseqarnissanut
eqqarsaatigillaqquneqarpoq. Qujanaq.
Anders
Andreassen, ataatsimiinnermik aqutsisoq, Inatsisartut Siulittaasuata tullia,
Siumut.
Qujanaq.
Tulliulluni oqaaseqaqqinniarpoq siunnersuuteqartoq Mads-Peter Grønvold.
Mads-Peter Grønvold, siunnersuuteqartoq, Kattusseqatigiit.
Siullermik iluarisimaarpara naalakkersuisut akissuteqarnerminni oqariartuutigineqartut ilassilluamatigit. Naak maannakkorpiaq upernaakkut ataatsimiinnitsinni inatsisissaq allanngortinneqarnissaa allanngortinneqartussaanngikkaluartoq oqariatuutigaat ukiamut Inatsisartut ataatsimiinneranni kommuuninut tapersiisarneq pillugu inatsit suliarineqassasoq aammalu inatsisip suliarineqarnerani maannakkut oqallinnermi siunnersuuteqartut oqariartuutaat tunngavigilluarneqassasut atorluarneqarumaartullu.
Taamatut naalakkersuisut akissuteqarnerat qujassutigaara. Neriuppunga taamanikkussamut oqallilluarumaarluta aammalu kommuunit kattuffiat KANUKOKA suleqatigilluinnarlugu suliassat ingerlanneqarumaartut aammalu tusarniarneqarluarumaartut. Soorlumi naalakkersuisut siulittaasuata oqaatigaa pioreersunik kommuunit aningaasaliinermigut unammillernaveersaatariaqartoq, kisiannili kommuunerpassuaqarpoq ilaatigut tunissiassanik peqareeraluarlutik tunisassiorfeqanngitsunik tamakkuninnga tunisassiornisamut, taamaattumik kommuunit tamakkununnga aallarniinissanut aningaasaleeqataasinnaanerisa periarfissinneqarnissaat eqqunneqarsinnaappat suliffissat amerlanerusut pilersinneqartussaapput aammalu akileraarutitigut isertitassat amerliartorsinnaallutik taamaaliornikkut.
Isumaqarpunga periarfissat taamaattut atorluarneqartariaqartut. Siulliullutik oqaaseqartut siunnersuuteqarsimasut annerusumik oqaasissakka oqaatigereermatigit oqaaseqaqqissanngilanga, kisiannili iluarisimaarlugu partiinit Demokraatinillu tapersersorneqarmat taamatut siunnersuuteqarneq. Ukiamut oqallilluarumaarpugut aamma neriuppunga pitsaasumik suliariumaaripput siunnersuut.
Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.
Qujanaq. Naalakkersuisut siulittaasuat naatsunnguamik akissuteqarusuppoq.
Jonathan Motzfeldt, Naalakkersuisut Siulittaasuat, Siumut.
Kingulliit oqaaserineqartut tamaasa tusaatissatut tiguagut naalakkersuisuninngaanniit. Saqqummiussami oqaatigineqarpoq kommuunit assigiinngissitaaqimmata ilaatigut aningaasatigut ingerlanerat ilaanni pitsaanerullu ilaannilu nukilaannerulluni ingerlasoqartoq.
Aamma taamaappoq . Taamaattumik apeqqutit uani ilaatigut tikinneqartut Ittoqqortoormiunut tunngatillugu apeqqutigineqartut aamma tassunga tunngatillugu misissorneqarnerat soorunami ingerlakkumaarparput. Apeqqutit taamaattut tikinneqaraangata oqallinnermut tunngaviunngikkaluartut, kisianni aamma misissugassatut tigusinnaasaratsigit oqaatigissavara.
Taamaattumik tassa naammassiniarnissaannut pisussaaffilerneqarput annertooq aamma Siumup oqaluttuata, Michael Petersen-ip ullumikkut oqaaseqarfigisaa ilumoorpoq, tassa Atassullu isumaqatigiissummi pisussaaffilersimagatta aamma kommuunini inuussutissarsiutiliisarneq pillugu nutarterinissamik suliassaq. Taamaattumik naalakkkersuisut maannakkut naalakkersuisut Siumut Atassullu tassuunakkut aamma imminnut pisussaaffimmik angisuumik ...
Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.
Qujanaq. Tassa ullumikkut oqaluuserisassat immikkoortut 77,
90, 44-lu ataatsimoortillugit suliarineqarneri tamaanga killeqarpoq. Paasinarporlu
aamma amerlanerussuteqarluartut. Naalakkersuisut akissuteqaamminni taperseraat,
taamaalilluni suliassat pingasuusut taakkua ataatsimiititaliamut
ingerlaqqaanngikkaluarlugit aappassaaneerneqarnissaminnut taamak isikkoqarlutik
saqqummiunneqaqqikkumaarput kingusinnerusukkut.