Oqaluuserisassani immikkoortoq 47-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq sisamaat, marlunngorneq 14. maj 2002, nal. 15:02.
Mads Peter Grønvold, siunnersuuteqartoq, Kattusseqatigiit.
Taamatut siunnersuuteqarninnut tunngavigaara kingullermik ineqarnermut inatsit allanngortinneqarmat ineqartut akiliisinnaanerat innarlerneqartutut ilaatigut oqaatigineqarsinnaammat. Soorlumi inatsit taamatut allanngortinneqarmat inissiani illuinnarnilu najugaqartut akiliisinnaanerat ilaatigut innarlerneqarsimasoq.
Soorlumi tusagassiuutitigut eqqartorneqartoq inissiani najugaqartut ilaasa qaammammut ineqarnermut akiliutaat 25%-miit 40%-tit tungaanut ilaatigut qaffanneqarsimasut.
Soorlumi aamma BSU illuutaani najugaqartut taamatut eqqorneqarsimasut. Isumaqarpunga taamatut iliorsimaneq allanngortinneqartariaqartoq. Ukiuni kingullerni inuiaat Kalaallit Nunatsinni najugaqartut inuuniarnerat qiviaraanni takuneqarsinnaavoq ulluinnarni inuuniarnermik aningaasartuutit qaffakkiartuinnartut naak illuatigut innuttaasut ilaasa aningaasarsiaat amerliartunngitsut.
Soorlumi aamma qaammammut aningaasanik tigusartagaqartut aningaasat tigusartagaat qaffakkiartortinneqanngitsut naak illuatigut ulluinnarni inuuniarnermi aningaasartuutit qaffakkiartuinnartut.
Ulluinnarni aningaasartuutit qaffakkiartuinnarnerat isumaqarpunga Naalakkersuinikkut illuatungilersorneqartariaqalersoq. Soorlumi aningaasartuutit qaffakkiartornerat malillugu aningaasat aammalu aningaasat pisortanit tunniunneqartartut eqqarsaatigalugit aningaasartuutit qaffakkiartornerat malillugu aningaasat tunniunneqartartut amerliartortinneqartariaqarluartut isumaqarama. Soorlumi ineqartut ineqarnermut akiliisinnaanerat innarlerneqartartoq ilaatigut aningaasat pisortanit tunniunneqartartut aningaasartuutit qaffakkiartortinneqarnerat malinnatinneqarneq ajormata.
Taamatut oqaaseqarama ilaatigut pivakka sulisinnaarnersiutillit utoqqaat allallu taaneqarsinnaasut ukiuni kingullerni ilaatigut aningaasarsiaat pillugit pisortanit isumaqatigiinniartarnermi malinnaatinneqarneq ajortut eqqarsaatigalugit.
Nunatsinni aningaasat aningaasarsiat pillugit isumaqatigiinniartarnerni sulisartut kattuffiisa assigiinngitsut ilaatigut ukiut marlukkaarlugit aningaasarsiat pisortaniit isumaqatigiinniutigineqartarput. Taamaaliornikkut ineqarnermut aningaasartuutit allallu akiisa qaffakkiartornerat illuatungilerniarlugu aningaasarsiat malinnaatinneqartarlutik.
Siusinnerusukkut oqaaserissakka eqqarsaatigalugit isumaqarpunga ineqarnermut BSU-llu illuutaani najugaqartut pisortat aningaasatigut tapiissutigineqartarnerat eqquteqqinneqartariaqartoq. Malunnarmat inatsit atuisunut pitsaanngitsumik kinguneqartitsilersimasoq.
Soorlumi inatsisip allanngortinneqartarnerata kingorna takuneqarsinnaasoq assersuutigalugu utoqqaat inissiani allanilu illuinnarni najugaqartut inissianut naleqqutinnginnerusunut nuuttariaqalersimasut ilaatigut ineqarnermut akiliisinnaanerat artukkerneqarmat.
Soorlumi aamma taamaaliornikkut ininut pitsaannginnerusunut pineqartut nuuttariaqalersimasut. Ilaatigut inissiat pitsaannginnerusut akitigut unammillerneqarsinnaanerummata, ineqartunit unammillerneqarsinnaanerummata.
Soorlumi aamma utoqqaat illuinnarni najugaqartut taamatut nuuttariaqalersimasut inatsisip allanngortinneqarnerata kingorna isumaqarpunga taamatut inatsisip allanngortinneqarsimanera iluarsineqartariaqartoq. Tassani inatsit pineqartoq allanngortinneqarmat anguniarneqarpoq ilaatigut inuit pissakinnerusut illersorneqarnissaat. Kisiannili sooq ilaatigut inuit pissakinnerusut taamatut maannakkut eqqorneqarpat.
Taamatut oqaaseqarlunga neriuutigaara inatsit maannakkut atuuttoq Inatsisartunit ilaasortanit aammalu Naalakkersuisunit allanngortinneqarnissaa tapersersorneqarumaartoq.
Anders Andreassen, ataatsimiinnermik aqutsisoq, Siulittaasup tulliata aappaa, Siumut.
Maannalu akissuteqassaaq Isumaginninnermut Suliffeqarnermullu Naalakkersuisoq.
Ole Dorph, Isumaginninnermut Suliffeqarnermullu Naalakkersuisoq, Siumut.
Qujanaq. Inissiani attartortittakkani ineqarnermut tapiissutit pillugit Inatsisartut peqqussutaat 31. maj 2000-meersoq januarip aallaqqaataani 2002 aallarnerfigalugu atuutilerpoq. Taamalu qaammatialunnguani atuussimalluni.
Peqqussutip akuersissutigineqarnerani Inatsisartut Isumaginninnermut Suliffeqarnermut Ataatsimiititaliaa peqqussutip atortuulersinneqarnerata kingorna ukioq ataatsip qaangiunnerani peqqussutip tamarmiusup sunniutaata naliliivigineqarnissaa imaluunniit inissiani attartortittakkani ineqarnermut tapiissutit pillugit Inatsisartut peqqussutaata kiisalu inissiani attartorneq pillugu Inatsisartut peqqussutaata ataatsimut isigalugu kinguneqaataasa naliliivigineqarnissaat kissaatigaa.
Taamaalilluni nalilerneqassammat aaqqissuussinermi iluaqutissinniarneqartut ilumut iluaqutissinneqarsimanersut imaluunniit putoqqutaarisoqarsinnaanersoq.
Tamanna Naalakkersuisut malinniarpaat Inatsisartut Isumaginninnermut Suliffeqarnermut Ataatsimiititaliaannut aammalu Inatsisartut Attaveqarnermut, Pilersuinermut aamma Ineqarnermut Ataatsimiititaliaannut 2002-mi ukiakkut ilisimatitsissuteqarlutik.
Inissianut attartortittakkanut ineqarnermut tapiissutit pillugit peqqussutip akuersissutigineqarnerata kingorna Naalakkersuisut aningaasanut killiussanik nammineq akiliutaassutissanik ilaallu ilanngullugit aalajangersaapput.
Pisortaqarfiup ilitsersuut kommunini sulianik ingerlatsisartunut atugassanngorlugu suliaraa taamatullu kommunini sulianik ingerlatsisartut pikkorissartinneqarlutik kiisalu innuttaasut paasissutissiissummik quppersagaliuunneqarsimallutik.
Tamatuma saniatigut ineqarnermut tapiissutit pillugit internet-imi immikkut nittarsagaliortoqarpoq. Tassanilu innuttaasut nammineerlutik ineqarnermut tapiissutinik naatsorsuisinnaanerat qinnuteqarnermi immersugassanik aallersinnaanerat aammalu peqqussutit nalunarutillu kiisalu pisinnaatitaaffitik pillugit paasissutissat atuarnissaannut periarfissaqarluni.
Nittartagaq aamma kommunini sulianik ingerlatsisartut sakkussaannik peqqussutip kommunini kommuniminni allaffissornikut aqunneqarnerani qulakkeerinnissutaasussanik imaqarpoq. Pisortaqarfiup maannamut kommunini sisamani nakkutilliiartorluni takusaasarnermigut atasumik paasivaa inissiani attartortittakkani ineqarnermut tapiissutinik aaqqissuussineq ajunngitsumik ingerlanneqartoq.
2001-mi ukiakkut ataatsimiinnermi inissialiornermut tapiissuteqartarneq pillugu Inatsisartut peqqussutaata allanngortinneqarnissaa akuersissutigineqarpoq. BSU-p illuutaani najugallit 2000-mi majip ulluisa aallaqqaataata kingorna taarsigassarsiaminnut akiligassaasa kinguuaattoorutaasalu isumakkeerfigineqarsinnaanerat periarfissinneqarluni.
Tassa imaappoq BSU-p illuutaani najugallit 30. april 2002 tikillugu ineqarnermut tapiissutisisarsimasut kiisalu allanik taamaaqataanik isertitaqartartut taarsigassarsiaminnik immaqalu akiligassani kinguaattoorutinik isumakkeerfigineqarsinnaalerput.
Tamatumuuna BSU-p illuutaani najugallit manna tikillugu ineqarnermut tapiissutinik pissarsisartut imaluunniit tapiissutinik pissarsinissaminnut periarfissaqarsimasut eqqorneqannginnissaat qulakkeerneqarpoq.
Naalakkersuisut aaqqissuussinermi nutaami ineriartorneq alaatsinaappaat. Aammalu allaffissornikkut aqutsineq sunniutaalu sapinngisamik malittarineqassallutik. Aaqqissuussinerup naliliivigineqarnissaata tungaanut.
Aningaasanut killiliussat nammineq akileeqataassutissat kiisalu ineqarnermut tapiissutit aningaasartaasa minnerpaaffissaat annerpaaffissaallu pillugit aalajangersaanissamik Naalakkersuisut pisinnaatinneqarput.
Ukiup ataatsip qaangiunnerani naliliinermi paasinarsippat isertakitsut akunnattumillu isertitaqartut malittarisassani nutaami iluaqussinniarneqartut naammaginartumik iluaqusinneqarsimanngitsut aaqqissuussap iluarsineqarnissaanut Naalakkersuisut periarfissaqarput.
Naalakkersuisut naliliipput minnerpaamik ineqarnermut tapiissitit ukiata ataatsip ingerlareerneratigut aatsaat tutsuginarnartumik tamarmillu kiisalu innuttaasunut sunniutilimmik uuttortaasoqarsinnaalissasoq.
Misilittakkammi takutippaat aaqqissuussineq nutaaq sunaluunniit pitsaanerpaamik sunniuteqassaguni sivikinnerpaamik ukioq ataaseq atuuttariaqartoq. Allaffissornikkut aqutsinermi innuttaasunilu aaqqissuussinerup nutaap sungiunneqarnissaa periarfissaqartariaqarpoq. Amigaataasinnaasut kiisalu pitsaaqutit pitsaanngequtillu nalinginnaasumik aatsaat tamatuma kingorna uuttorneqarlutillu oqimaalutarneqarsinnaalersarput.
Inissiani attartortittakkani ineqarnermut tapiissutit pillugit peqqussutip atorunnaarsinneqarnissaanut taarsiullugulu ineqarnermut tapiissutit pillugit malittarisassat siornatigut atuuttut atortuulersissagaanni tamanna innuttaasunut annertuumik kinguneqarnerluttussaavoq.
Tamatumani ilaatigut kingunerisussaassavaa ineqarnermut tapiissutinik pissarsisinaanermut killigitinneqartoq inoqutigiinnut kingumut 128.000-ulissasoq tamatumanilu aamma kingunerissallugu assersuutigalugu aappariit utoqqalinersiallit ineqarnermut tapiissutinik pissarsisinnaajunaarnerat.
Taamatullu 128.000 kr-nik amerlanerusunik isertaqartartut aammattaaq ineqarnermut tapiissutinik pissarsisinnaajunnaassallutik. Inissiani attartortittakkani ineqarnermut tapiissutit pillugit malittarisassat nutaat eqqunneqarnerannut atasumik inissiami attartortittakkani ineqarnermut meeqqanut tapiissutit pillugit aaqqissuussineq atorunnaarsinneqarpoq.
Tamanna kinguneqarpoq ineqarnermut akiliutissat meeqqat ataasiakkaarlugit annikillilerneqartarunnaarmata. Taamaattumik malittarisassat nutaat atorunnaarsinnerisigut malittarisassallu atuutereersimasut atuutilersinnerisigut aningaasarsiatigut akunnattunik isertitaqartartut annertuumik eqqugaassapput.
Taakkuami inissiani attartortittakkani ineqarnermut tapiissutit pillugit malittarisassani nutaani ineqarnermut meeqqanut tapiissutit pillugit aaqqissuussinermi atorunnaarsimasumik meeqqat ataasiakkaarlugit ineqarnermi akiliutitigut annikilliliivigineqartarsimanerannut meeqqanut ataatsimut amerlanerusunik pissarsisarput.
Assersuutitut taaneqarsinnaavoq 180.000 kr-nit 343.999 kr-nillu akornani isertitaqartut marlunnik meerallit aaqqissuussinermi nutaamik ineqarnermut akiliutimik 28%-at ineqarnermut tapiissutitut tigusarmassuk. Ineqarnermilu meeqqanut tapiissutit pillugit aaqqissuussinermik atorunnaarsinneqartumik ineqarnermut akiliut anikillisussatut taamaallaat 20%-ulluni.
Taamaattumik taamatut oqaaseqarlunga Naalakkersuisut Inatsisartunut ilaasortap Mads Peter Grønvold siunnersuutaata akuersissutigineqannginnissaa inassutigaat.
Lars-Karl Jensen, ataatsimiinnermi aqutsisoq, Siulittaasup tulliata pingajuat, Siumut.
Isumaginninnermut Suliffeqarnermullu Naalakkersuisoq qujavugut. Taavalu partiit kattusseqatigiit Attaviitsullu oqaaseqartuinut ingerlaqqikkutta. Siulliussaaq Tommy Marø Siumup oqaaseqartussaa. Takanna.
Tommy Marø, Siumup oqaaseqartua.
Qujanaq. Inatsisartunut ilaasortap Mads Peter Grønvoldip Attaviittut kattusseqatigiit aalajangiiffigisassatut siunnersuutaa tassalu ineqarnermut tapiissutit pillugit malittarisassat januarip qaammataa atuutilersinneqartut atorunnaarsinneeqarnissaannik kingumullu siusinnerusukkut atuuttut uterfigineqarnissaannik siunnersuutaa Siumumiit oqaluuserereerlugu nalilersorluareerlugulu imaattumik oqaaseqarfigissavarput.
Siullermik oqaatigissavarput Siumumi pingaartillugulu attaqigatsigit inatsisiliornermi inatsisit Inatsisartunit akuerisat atortuulersinneqarsimasut imaasiallaannarlugit atorunnaarsinneqarnissaat ileqqorinagulu akueriuminaatsikkatsigu.
Tassanimi siunnersuuteqartup siunnersuutaani inatsit atorunnaarsikkumaneqartoq aatsaat qaammatini sisamani ingerlasimalermat. Ilanngullugit Siumumiit erseqqissaassutigissavarput peqqussutip akuersissutiginerani Naalakkersuisunit neriorsuutigineqarmat ineqarnermut tapiissutit pillugit peqqussutip ukiup ataatsip atuutereernerani nutaamik nalilerneqarnissaa piumaartoq.
Tassalu neriorsuut eqqortinneqassappat ukiamut Inatsisartut ataatsimiinnerisa nalaani tamanna pissasoq Siumumiit naatsorsuutigivarput. Taamaattumik Siumumiit paasiuminaatsipparput peqqussut ukioq kingulleq akuerisimasarput qaammatialuinnarni atuuteriilaavinnartoq atorunnaarsinneqarnissaanik Inatsisartunut ilaasortap Mads Peter Grønvold Attaviitsut kattusseqatigiinneersut aalajangiiffigisassatut siunnersuuteqarnera.
Eqqaamaneqassaaq ineqarnermut tapiissutit pillugit peqqussut nutarterneqarmat akissaatikinnerusunut pitsaasumik eqaatsumillu aaqqiinissaq siunertaralugu aalajangeeqataasimagatta. Tassungalu atasumik akiliisinnaassuseqarluartut tapiissutinik pisarunnaarnissaat siunertaammat.
Taamaattorli Siumumiit Naalakkersuisunut kaammaatuutigissavarput peqqussutip ukiamut naliliiffigineqarnissaa sioqqullugu kommuninut aammalu sineriammi A/S Inissiaatileqatigiiffik INI-p immikkoortoqarfiinut tamanut peqqussutip atuisunut kinguneri pitsaaqutaat ajoqutaallu pillugit ersarissumik tusarniaaqqaarnissaq kissaatigissagatsigu.
Naggataatigut Siumumiit eqqaamaqqussavarput ineqarnermut tapiissutit pillugit nutaamik nalilersuinikkut aaqqissuusseqqinnissaq Inatsisartut namminneq ukiuni arlaqalersuni kissaatiginikuummassuk.
Taamatut oqaaseqarluta aalajangiiffigisassatut siunnersuut Siumumiit itigartipparput. Naalakkersuisullu ukiamut saqqummiussinissaat qilanaaralugu utaqqissavarput.
Lars-Karl Jensen, ataatsimiinnermi aqutsisoq, Siulittaasup tulliata pingajuat, Siumut.
Tommy Marømut qujanaq. Taava Atassutip oqaaseqartussaa Godmand Rasmussen. Takanna.
Godmand Rasmussen, Atassutip oqaaseqartua.
Qujanaq. Uanga naatsuaraararsuarnik oqaaseqarfigilaassavara. Inatsisartunut ilaasortap Mads Peter Grønvoldip siunnersuutaa Atassummiit imaatut oqaaseqarfigissavarput.
Peqqussutip akuersissutigineqarnerani Inatsisartut Isumaginninnermut Ataatsimiititaliaani ukiup ataatsip atuutereernerani naliliiffigineqarnissaa kissaatigineqarpoq. Tamannalu Naalakkersuisut akissuteqaataanni ersarippoq. Tassalu ukiamut 2002-mi ataatsimiititaliamut ilisimatitsisoqassalluni.
Saqqummiussaqartup
ersersitai ilumoorpoq. Aaqqiinerli kingulleq arlalitsigut
akuersaaruminaatsinneqarsimavoq. Tassungali uniinnartoqanngilaq. Tassami
ukiamut ataatsimiinnissami ersarinnerusumik paasissutissiisoqarniarmat
Atassummiit annertunerusumik oqaaseqarata Naalakkersuisut akissuteqaataat
taperserlugu oqaatigissavarput.
Lars-Karl
Jensen, ataatsimiinnermi aqutsisoq, Siulittaasup tulliata pingajuat, Siumut.
Taava
ingerlaqqissaagut Inuit Ataqatigiit oqaseqartussaat Lars Sørensen
tullinnguuppoq.
Lars Sørensen,
Inuit Ataqatigiit oqaaseqartuat.
Qujanaq.
Inatsisartunut ilaasortaq Mads Peter Grønvold inissiani attartortittakkani
ineqarnermut tapiissutit pillugit Inatsisartut peqqussutaat normu 3. 31. maj
2001-meersoq ukioq manna januarip aallaqqaataani aallarnerfigalugu
atuutilersoq atorunnaarsinneqarsinnaanissaanik Naalakkersuisut
peqquneqarnissaat pillugu Inatsisartunut aalajangiiffigisassatut
siunnersuuteqarpoq.
Inuiaqatigiit
aaqqissuussaanitta nutarterneranut atatillugu iliuusaareersut ilagaat
ineqarnermut akiuliutit ukiortaamiit allannguiffigineqarneri.
Tamatuma
Inatsisartunut saqqummiutinnginnerani pisortaqarfiit minnerpaamik marluk tassa
ineqarnermut aamma isumaginninnermut ukioq sinnerlugu misissuereernerannik
tunuliaqutaqarpoq.
Nutarterinermi
siunertaavoq akissarsiakinnerit akunnattumillu isertitaqartut iluaqutissaannik
ineqarnermut tapiissuteqariaatsip pitsanngorsarneqarnissaa. Aammalu pisortat
inissiaataanni ineqarnermut akiliutit inissialiornermut aningaasartuutinut
naleqqunnerulernissaat.
Inuit
Ataqatigiit pisortaqarfinni aammalu atuisut akornanni misissuereerluta
paasivarput innuttaasut ilaat aaqqissuussinermi nutaami eqqornerlugaasimasut.
Tamatumani eqqarsaatigaagut utoqqalinersiallit aamma allatigut pisartagallit
maanna akikinnerusumik ineqarnermut tapisitinneqartalersimasut. Nutaamik
peqqussusiornermi tamanna siunertaanngilluinnarmat peqqussutip inimi maani
oqaluuserineqarnerani uagut erseqqissaatigereerparput.
Ilalersorneqarsinnaanngilluinnarpoq
innuttaasut taakkununnga eqqornerlunneqarsimanerat. Ilami 400-500 kr-nik
ineqarnermut akiliinerulernermi ulluinnarni inuuniarnermut atukkat annertuumik
ajorseriarput. Equngassut taanna iluarsiniarlugu Inuit Ataqatigiit
Naalakkersuisut qinnuigaagut Inatsisartut ukiamut ataatsimiinnissaannut
ineqarnermut tapiissuteqariaatsip allanngortinneqarnissaanik siunnersuummik
saqqummiussaqaqqullugit.
Aamma
Inuit Ataqatigiit siusinnerusukkulli oqaatigereerparput tamanna pisinnaasoq
siorna ukiakkut ataatsimiinnermi Aningaasaqarnermut Naalakkersuisup
neriorsuineratut tassa inuiaqatigiit aaqqissugaanerat pillugu iliuusissatut
pilersaarutip taanna 2000-mi ukiakkut ataatsimiinermi nalilerneqarnissaanik
neriorsuutaata oqaluuserineranut atatillugu.
Inuit
Ataqatigiit naggataatigut BSU-mi taakkunani BSU-p illuutaani najugalinnut
kaammattuutigissavarput ukioq manna majip ulluisa aallaqqaataata kingornatigut
taarsigassarsiaminnut akiligassaasa kinguuaatoorutaasalu
isumakkeerfigineqarsinnaanerannut Inatsisartut periarfiissinerat
atorluaqqullugu.
Tamatumuuna
BSU-p illuutaani najugallit 30. april 2002 tikillugu ineqarnermut
tapiissutinik pissarsisartut imaluunniit tapiissutinik pissarsinissaminnut
periarfissaqarsimasut eqqorneqannginnissaat qulakkeerneqarsinnaassammat.
Taamatut
oqaaseqarluta Inuit Ataqatigiit siunnersuuteqartumut Naalakkersuisut
akissuteqaataat tamakkiisumik tapersersorparput.
Lars-Karl
Jensen, ataatsimiinnermi aqutsisoq, Siulittaasup tulliata pingajuat, Siumut.
Lars Sørensenimut
qujanaq. Taava tullinnguuppoq Kattusseqatigiit oqaaseqartussaat Mogens Kleist.
Takanna.
Mogens
Kleist, Kattusseqatigiit oqaaseqartuat.
Qujanaq.
Ineqarnermut tapiissutinik aaqqissuussinerup atuutsileqqinneqarnissaa pillugu
Mads Peter Grønvoldip aalajangiiffigisassatut siunnersuutaanut
Kattusseqatigiinniit naatsumik imatut oqaaseqaateqassaagut.
Aallaqqaammut
oqaatigissaavarput siunnersuuteqartup taakkartugai
ilisarilluinnarsinnaagatsigit. Tassami innuttaasut ikinngeqisut ineqarnermut
tapiissutip allanngortinneratigut eqqugaanikuummata. Manna oqaluttarfik
aqqutigalugu ukioq kingulleq Naalakkersuisut siunnersuuteqarmata
Kattusseqatigiinniit akerliunerput ersarissumik oqaatiginikuuvarput.
Ullumikkullu
aammattaaq qaqeqqinneqarpoq ineqarnermut tapiissutip allanngortinneqarnissaa.
Kattusseqatigiinniit oqaatigissavarput siunnersuuteqartoq tamakkiisumik
taperseratsigu. Tassami nalunngilarput utoqqalinersiutillit aammalu
akunnattumik akissarsiallit annertuumik eqqorneqarsimanerat eqqarsaatigalugu.
Naalakkersuisup
akissuteqaataa tusaatissatut tigorusupparput taamaattorli siunnersuuteqartoq
annertunerusumik oqaaseqaateqarata taperserusupparput taamatut
allannguisoqarnissaanut siunnersuuteqarmat. Taamatut naatsumik oqaaseqarluta
aalajangiiffigisassatut siunnersuut Kattusseqatigiinniit tamakkiisumik
taperserusupparput.
Siornatigullu
tassa ukioq kingulleq oqariartuutigisarsimasagut innersuussutigalugit.
Lars-Karl
Jensen, ataatsimiinnermi aqutsisoq, Siulittaasup tulliata pingajuat, Siumut.
Taava
tulliulluni oqaaseqaassaaq Ataaviitsoq Otto Steenholdt.
Otto
Steenholdt, Attaviitsup oqaaseqartua.
Siunnersuut
allannguutissatut sakkortuutut takuara aammalu ukiorluunniit ataaseq suli
naanngitsoq taamatut allanngortitsinissaq uanga inissaminiissorinngilara.
Taamatut aalajangernermi atuutilerneranilu oqallisigineqarneranilu
pasitsaanneqarsimannguatsiarpoq imaluunniit pasitsaanneqarpoq utoqqaat
kisimiittut pensionistit tassani pingaartumik illoqarfinniittut tassuuna
aalajangersakkakkut eqqorneqarnersut pasitsaanneqarluni.
Taamaattumik
nalunngilara pilersaarutigineqartoq qaammatip augustip tungaanut taakkua
isigimallugit misissuineqassasoq. Misissukkallu taakku aamma atorneqassasut
ukiamut Naalakkersuisut immaqa taakkorpiaat pillugit saqqummiussaqarnissaannut
ajunnginnersoq aaqqittariaqarnersorluunniit Inatsisartunut oqaatigissallugu.
Taamatut
eqqoriaakannernera neriuppunga Naalakkersuisut naqqiuteqarfigiumaara. Kisianni
taamaassoraara.
Taamaattumik
siunnersuut tamaat nalilersorlugu isumaqarpunga siunnersuut
isumaliutigiilluagaanngitsoq. Tassa inatsisip putorisinnaasaa aatsaaqqissaaq
oqaatigisara Naalakkersuisunit tassa taaneqarluni misilikkallarusutaq
siunnersuuteqartup qularnanngitsumik iluatseriarsimavaa. Ajunngilarmi.
Taava
pisoqqamut tassa inatsimmut utersaariarnissamik siunnersuuteqarneq
isumaqarpunga eqqarsaatigilluagaanngitsoq. Aamma tassani taamatut
allanngortitsinikkut kingullermik allanngortitsigatta aningaasat ikkussuutat
aamma equtinneqarnissaat tassani uanga perusunngilara.
Tassa
augustimi misissuineq piariissaaq taamak naatsorsuutigaara.
Aaqqittariaqassappallu Naalakkersuisut ukiamut aaqqiiumanerat
tusarniarneqarluni atortariaqarluinnartutuut uanninngaaniit nalilerneqarpoq.
Lars-Karl
Jensen, ataatsimiinnermi aqutsisoq, Siulittaasup tulliata pingajuat, Siumut.
Otto
Steenholdtimut qujanaq. Taava tullinnguuppoq Mads Peter Grønvold, tassalu
siunnersuuteqartoq. Taanna pereerpat Naalakkersuisut tullinnguutissaq.
Mads Peter Grønvold, siunnersuuteqartoq, Kattusseqatigiit.
Tassa naluneqanngilaq soorlu Kattusseqatigiit ersersikkaat kingullermik inatsit taanna taamatut aaqqinniarneqarmat akerliusimanerput. Taamaattumik tulluartuutissimavara Inatsisartunut oqaluuserisassanngortinnissaa.
Uani taamatut oqaluuserisassanngortitsininnut tunngavigaakka annertunerusumik aamma tunngavigaakka siusinaarlutik sulisinnaajunnaarnersiutillit aammalu utoqqalinersiutillit inatsimmik annertuumik eqqorneqarsimammata. Tassa annerusumik eqqarsaatigineqarsimanngilaq inatsit taamani allanngortinniarneqarmat utoqqaat inissiani najugaqartut illuinarnilu, inissiani najugaqartut tapiissutisisarnerat ilaatigut mattunneqarmat tassa marluk sinnerlugit sinittarfilimmik najugaqarunik tapiissutinik tunineqarsinnaanngillat.
Tassagooq ataatsimik sinittarfilimmik aatsaat najugaqarunik tapiissummik pissarsisinnaapput.
Taanna uanga illoqarfigisanni taamatut tusarpara taamatut
aaqqissuussisoqarsimasoq. Taamaattumik isumaqarpunga Naalakkersuisut pissutsit
taamaattut tusarniarluartariaqaraat ilumoornersut. Tassami uanga tusakkakka
aammalu utoqqaat taamatut atugaqartut taamatut pineqarsimapput. Aammalu
akiliutaat takuakka taamatut pineqarsimasut, tapiissummik arsaarsimavaat
ineqarnerminnut. Tassa marluk
sinnerlugit sinittarfilimmiimmata.
Tamakkua
eqqumaffigineqanngitsoorsimammata. Taamaattumik siunnersuuteqarsimavunga
taamaattumik inatsit allanngortinneqartariaqartoq. Taannami inatsimmik
taamatut aaqqinneqarmat tamakkua siunertaanngikkaluarmata taamatut
kinguneqartitsinissaat.
Uani BSU-p
illuutaani najugaqartut akiligassanut kinguaattoorsimasut akiligassanut
kinguarsiiviginearnerinnaasigut tapiissutisisarunnaarnerat iluarsineqanngilaq.
Taamaattumik utoqqalinersiutaannaqarut BSU-p illuutaani najuaqartut
ineqarneminnut tapiissutisisarunnarnertik pissutigalugu akilersuisinaanerat
aamma innarlerneqarnikuuvoq. Aammalu aralaqartut
najugaqaannarsinnaajunnaarsimapput BSU-p illuutaani. Taamaalillutillu
inissianut akikinnerusunut nuunniartariaqalersimallutik.
Isumaqarpunga
taamatut ineqartunut BSU-p illuutaani najugaqartunut innarliinerusoq aamma
taamatut inatsimmik aaqqiineq. Aammalu isumaqarlunga
eqqarsaatigilluarneqanngitsoorsimasoq. Tamakkua BSU-mi illoqartut
kalluarneqarnissaat taamatut.
Taamaattumik
isumaqarpunga nammineerlunga siunnersuuteqartutut inatsit kingumut
utertinneqaqqittariaqartoq siunnerfiusut ilaatigut killorluinnaanut,
killorluinnaa atorneqalersimasoq oqaatigineqarmat. Soorlumi aamma Atassutip
oqaaseqaatimini oqariartuutigigaa naak annertoorujussuarmik
oqaaseqanngikkaluartik arlalitsigut ilumoortortaqartoq taamatut
aaqqissuussinermi aaqqissuussinerluttoqarsimasoq, soorlu oqaatigigaa.
Taamaattumik neriuutigaara maannakkut ajornartorsiutaasut assigiinngitsut
Naalakkersuisuni eqeersimaarlutik iluarsiniarneqapallannissaat piffissaq
siulleq atorlugu.
Tassami
inatsisit assigiimmik atortinneqartariaqarmat imaanngitsoq
illoqarfikkuutaartumik immikkut inatsit atortinneqassasoq.
Lars-Karl
Jensen, ataatsimiinnermi aqutsisoq, Siulittaasup tulliata pingajuat, Siumut.
Taava
tulliulluni oqaaseqassaaq Isumaginninnermut Suliffeqarnermullu Naalakkersuisoq,
Ole Dorph.
Ole Dorph,
Isumaginninnermut Suliffeqarnermullu Naalakkersuisoq, Siumut.
Qujanaq.
Tassa siullermik Naalakkersuisut sinnerlugit partiit Kattusseqatigiit aammalu
Attaviitsut oqariartuutaannut qujassuunga. Aamma uunga siunnersuummut
Naalakkersuisut akissutaat maluginiarpakka partiininngaaniit aamma
oqaaseqartuninngaaniit tamaninngaaniit paasineqartut.
Aamma una
aaqqissuussineq Inatsisartut aalajangesimasaat, tassa aalajangerneqarsimavoq
siorna upernassakkut ataatsimiinnermi. Tassa peqqussut Inatsisartunut
ilaasortat tamarmik akuersissutigisimavaat. Taassumalu kingorna septembip
qaammataani Naalakkersuisut nalunaarusiorsimapput. Tassanilu qanoq
akiliutaasartussat inississorneqarsimallutik.
Tassa taanna
aallaaveqarpoq socialreformkommissionip 1997-mi innersuussutaasa ilagimmassuk
akiliisinnaanerusut sapinngisamik nammaqataanerulernissat anguniarneqarsimavoq.
Aammalu pisortaninngaaniit aamma privatininngaaniik illugitinneqartartut
sapinngisamik naligiinnerulersinnaanissaat aamma qaammammut
akiliutigineqartartoq sapinngisamik aamma eqqortuusariaqarnissaa taanna
aalajangiunneqarsimalluni.
Tassa
assigiinngitsunik tunngaveqarluni taanna peqqussut aammalu kingusinnerusukkut
nalunaarut pilersinneqarsumavoq.
Aammalu
oqaatigissavara tassa qammammut akiliutigineqartartoq innuttaasuninngaaniit
marloqiusanngorluni avinneqarsimammat tassa qallunaatut kapitalafkast aamma
driftudgiftit tassa aningaasaliisimasunit iluanaarutissaq aammalu
ingerlatsinermut aningaasartuutit.
Tassalu
taakkua aamma aalajangersorneqarsimapput assigiinngitsunik aalajangersimasunik
periuseqarluni. Tassa siusinnerusukkut kapitalafkasti 2,95%-simavoq. Tassalu
massakkut aaqqissuussineq januarip aallaqaataani atuutilersoq malillugu taanna
imaluunniit 2,75%-usimavoq. Massakkullu taanna aaqqissuussineq januarip
aallaqqaataani atulersoq 1,5%-tiusimalluni.
Tassuunalu
assigiinngissut takuneqarsinnaavoq aammalu taana 1,5%-ti tassa illup
kvadratmeterimut akigititaasoq malillugu annertussuseqarluni.
Aammalu
taanna sioqqullugu tassa januarip aallaqqaataa sioqqullugu illup
kvadratmeterimut akia 6.500 kr-nik ilanngaateqarteriarlugu taanna
kapitalafkasti taamanna angissusilerneqartarsimavoq.
Tassalu
peqqussutip uuma aaqqissuussinerullu uumap atuuttup atuuttussanngornera
sioqqullugu naatsorsuutigineqarsimavoq missingersuusiarineqarlunilu.
Aaqqissuussinermi inuit innuttaasut atuisullu 25%-tii qaammammut
akiliutigisartakkaminnik annikilliliivigineqassasut. Aammalu atuisut 15%-tii
qaammammut 200 kr-nit missaanik annertussusilimmik qaffaaffigineqalaassasut.
Tassalu aamma 20%-tii allat 200 kr-niit 400 kr-nillu akornanni qaammammut
akiliutaasa qaffanneqarnissaat pissasoq.
Aammalu
15%-tit qaammammut 400-600 kr-nillu akiliutaat qaffanneqassasut. Aammalu 10%
qaammammut 600-1000 kr-nut akiliutaat qaffanneqassasoq. Taavalu kingulliit
taakkua suli annertunerusumik qaffaavigineqarnissaat taamanikkut aamma
takorloorneqareersimavoq.
Tassalu
taanna Naalakkersuisut ukua inuit innuttaasut akiliutissai
inissinniarnialeramikkit tassa Isumaginninnermut Pisortaqarfik aamma
Inissiaqarnermut Pisortaqarfik aamma Aningaasaqarnermut Pisortaqarfik
suleqatigiilluinnarlugit taanna suliassaq naammassiniarsarisimavaat aammalu
oqaatigineqareersutut soorlu aamma ukiassaq taanna Naalakkersuisuninngaanniit
oqaatigineqartoq nalilersuineq pisussaavoq aamma ataatsimiititaliamik
pilersitsisoqarsinikuuvoq, tassa taakkua pisortaqarfiit pingasunik
peqataaffigineqartunik. Kisiannili taakkua naliliisinnaanissaat tamakkiisoq
pisinnaasimanngilaq qaammatit ukua kvartaleq siulleq aallaavigiinnarlugu,
tassani tupinnanngitsumik takinerusumik periarfissamik pisariaqartitsisoqarpoq
sapinngisamik pitsaanerpaamik nalileeriarsinnaaneq taanna pissappat.
Taamaattumik
oqaatigissavara soorlu aamma oqaatigereeriga aallaqqaammut, taanna
nalilersuineq ukiamut Inatsisartut ataatsimiititaliaanut
ingerlanneqartussaavoq. Aamma oqaatigineqartutut arlaatigut aaqqitassaqarpat
aamma taanna uparuunneqareernikuuvoq, soorlu utoqqalinersiallit
assigiinngitsut assigiitsunik aningaasarsiallit taakkua illup, illuliap qanoq
akeqarnera, qanoq pisoqaatiginera qanorlu nutaajutiginera malillugu arlanni
ineqarneq apeqqutaatinneqarluni, tassa inissiat akii ilaatigut
qaffaavigineqartarsimapput aamma utoqqalinersiutilinnut, taamaattumik tamakku
tamarmik soorlu aamma partiit oqaaseqartuninngaanniit uparuarneqartut taakku
aamma nalilersuinerni tamarmik ilaatinneqartussaassapput.
Aamma
ilumoorpoq soorlu oqaatigineqartoq Mads Peter Grønvold-iminngaanniit ukua
inissiat inigineqartut qanoq annertutigineri massakkut peqqussummi aamma qanoq
tapiissutinik pisartagaqarnissamut aamma aalajangiisunngorsimapput, taakkulu
aamma peqqussummi taamaattussaasoq allaqqavoq. Kiisalu aamma soorlu Lars Sørensen-ip
Inuit Ataqatigiinninngaanniit oqaatigigaa BSU-imi illullit
periarfissinneqarput akiitsuminnik isumakkeerfigineqarsinnaanissaminnik
taannalu aamma uanga periarfissaq innuttaasunut BSU-imi illuutilinnut
atorneqarnissaa assut kissaatigivara.
Tassa
annertuulioqqinnanga massakkut uku innersuussutigineqartut partiininngaanniit
aamma amerlanernit taperserneqarmata, oqaatigissavara massakkut suliap una
malinnaaffigineqartoq taavalu aamma ukiamut nalilersuineq pereerpat arlaatigut
peqqussutikkut nalunaarutikkulluunniit aaqqissuisoqassappat taanna
Naalakkersuisuni imaluunniit Inatsisartuni peqqussutip allanngortinneqarnissaa
pissappat, taanna aamma ingerlanneqarnissaa soorunami
avaqqunneqarsinnaanngilaq.
Tassa
annertunerusumik taanna oqaaseqarfigeqqissanngilara massakkut.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Taava
aappassaanik oqaaseqarniarluni nappaanikuuvoq Mogens Kleist, Kattusseqatigiit
oqaaseqartuat. Takanna.
Mogens
Kleist, Kattusseqatigiit oqaaseqartuat.
Pissanganarpoq
ukiamut Naalakkersuisut taamatut misissuisimanerat toqqammavigalugit qanoq
saqqummiussissanersut, naatsorsuutigisinnaavarput aamma pinngitsoorani
aningasanik naleqartussaavoq. Taamaattumik pissanganarpoq Naalakkersuisut
taakkua saqqummiussassaat qanoq issanersut.
Isumaginninnermut
Naalakkersuisumut oqaatigilaassavara ukioq kingulleq siulianiinngikkuni
eqqaamanngilara, uagut akerliunikuuvugut tassunga, taamaattumik oqassanngilaq
Inatsisartut tamarmiusut akuersaartut, amerlanerussuteqartut taanna
akuersissutigisimavaat - uagut akerliusimavugut nalunnginnatsigu akunnattumik
isertitallit, utoqqalinersiutillillu taakku annerpaamik eqqorneqartussaammata.
Assersuutitut
taasinnaavarput qaammammut inigisaminnik qaffaaffigineqartut 500 kr. 500
kr.-ini immaqa ulluinnarni annertunngilaq, kisianni ukiumut naatsorsorukku
tassa 6.000 kr. ilaa. Ataasiakkaanut kisimiittunut aningaasat
annertoorujussuupput. Aammalu Mads Peter Grønvold-ip oqaatigisaa
Qasigiannguani atuutinneqalersimasoq soorlu sinittarfiit marluuppata taava
tapiisinaanermut killigititaq piiarneqarsimasut, taanna oqaatigilaassavara
kommunini allani atuummat aamma BSU-imi najugalinnut, soorlu Sisimiut
kommuniani atorneqarpoq aamma Nuuk kommuniani nalunngilara atorneqartoq,
tassalu init amerlavallaarpata taava tapiissuteqarsinnaaneq aamma
kommuniminngaanniit killilerneqartarmat.
Tassa taanna
uanga nalunngilluakkama ilagivaat. Taamaattumik annertunerusumik
oqaaseqarnanga pissanngatigaara Naalakkersuisut ukiamut saqqummiussinissaannut
qanoq taamatut aaqqiisinnaanissamut periarfissat suunersut
saqqummiussassaannut pissangatigaarput Naalakkersuisut qanoq ittunik
saqqummiiumaassanersut, kisanni naatsorsuutigissavarput aamma
boligsikring-inut tunngatillugu aamma Namminersornerullutik Oqartussat,
kommunillu aamma taassumap tungaatigut suleqatigiittarmata pinngitsoorani
aamma naleqarsinnaanissaa ukiamut naatsorsuutigisinnaavara.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Mogensimut
qujanaq. Taava kingulliup tullia nappaasuni Inuit Ataqatigiit oqaaseqartuat
Lars Sørensen. Taanna pereerpat Atassutip oqaaseqartua tullinnguutissaaq.
Lars Sørensen,
Inuit Ataqatigiit oqaaseqartuat.
Qujanaq.
Tassa soorunami aamma uunga allannguinermut tunngatillugu paasinninneq
apeqqutaasartorujussuuvoq inatsisit qanoq periarfissaqartinneqarneranut. Tassa
Mads Peter Grønvold-ip siunnersuutaa uagut imatut paasivarput massakkut
peqqussut 1. januar 2002 atuutilersoq atorunnaarseriarlugu taava pisoqqamut
utissasugut. Pisoqqami allassimavoq 128.000 kr. qaangersimagukku taava
boligsikringimik pisinnaanngilatit. Inatsisartut januar
aallaqqaataaninngaanniit aalajangerput taanna 180.000 kr.-inut
qaffanneqassasoq taavalu aamma amerlanerpaamik 350.000 kr. tungaanut taanna
atuutinneqarsinnaasoq.
Taamaakkami
aamma siunertaq ajunngilaq, kisianni ajortortaa uaniittoq
oqaatigisariaqarparput aamma taanna teknikkimut tunngammat taammaakkami aamma
Mogens Kleist-ip inuiaqatigiinni aningaasarpassuarnik naleqarsinnaaneranut
tunngatillugu uagut isumarput malillugu aaqqinneqarsinnaavoq, tassa
kapitalafkastip tassa piginnittup iluanaarutissaanut tunngasut procentiata
aalajangersarneratigut.
Taamanikkut
suliarneqarneranut oqaatigineqarpoq tassa 6.000-6.500 kr. akornanni illu
sananeqarsimaguni taava piginnittut pissarsiaqaatigissanngilaa, kisiannili
peqqussumi uani nutaami 1,00 kr. siullerminngaanniit aaqqissuussinerup
kingunerivaa assersuutigiinnarlugu Blok 1-imi najugallit taakkua ineqartut
pinngitsoornatik tamaavimmik akiliutaat qaffassimassooq.
Taavalu
aamma aaqqiiniartoqarpat taava piginnittup iluanaarutaanut tunngasoq tassa
kapitalafkastimut tunngasoq maannakkut 1,5%-iusup taassumap
nalilersoqqinneqarneratigut aningaasartaqanngitsumik aaqqinneqarsinnaavoq.
Oqareernitsituut
Inuit Ataqatigiinninngaanniit uagut soorunami utoqqalinersiallit,
akissaatikkinnerusullu eqqorneqarnissaat siunertarinnginnatsigu, taamaattumik
aamma ukiamut nalilersuinissamut tunngatillugu aamma oqaloqataasariaqarpugut
aammalu oqaatigereernitsituut aaqqiisoqassappat marlut periarfissat taakkua
atorluarneqarnissaat kaammattuutigissavarput, tassalu piginnittut
iluanaarutaat procentiata nikisinnerisigut aaqqinneqarsinnaaneranut
taamaalilluni aamma siunertaq ajunngitsoq, tassami taamatut aaqqiisoqarpat
taava ilaat 330.000-350.000 kr. tungaanut isertitalinnut tamanna
iluaqutaasinnaanissaa anguneqarsinnaassammat.
Ukiamut
pissangalluta utaqqissuugut aamma oqareernittuut Mads Peter Grønvold-ip
siunnersuutaanut akerliunitsinnut aamma tunngavitta pingaarnersarimmassuk
128.000 kr.-inut killiliussap
taassumap amerlanernut iluaqutaanissaa siunertaralugu aaqqiisimanerup
allanngortinneqannginnissaa taanna pingaartutut oqaatigisariaqarmat.
Godmand
Rasmussen, Atassutip oqaaseqartua.
Uanga
takisuuliornianngilanga. Saqqummiussamununa oqaaseq atugaq una erseqqimmammi
saqqummiussaqartup ersitaa ?? Ilumoorpoq,
taanna oqaaseq atugaa tapersermagu aamma erseqqissarusukkiga - ilumuuvippoq,
taanna aaqqissuussineq assigiinngitsunik qularnanngitsumik arlaatigut
paatsuunganernik aamma kinguneqartarsimasoq paaserrajunnikuuvarput.
Taamaattumik
Naalakkersuisut naliliinerminni minnerpaamik tapiissut taakkua ataaseq ukiup
ingerlareernerani nalileqqissinnaanissaat pitsaasumik naliliinissaq aamma
uagut qilanaarisorujussuuvarput.
Naluneqanngilaq
uani alloriarneq Mads Peter Grønvold-ip aamma saqqummiussinerani pingaartumik
angerlarsimaffiani immikkut immaqa taasariaqanngikkaluartumi, boligstøttemik
illuuteqarfiunerusuni annertuumik taanna aamma iluaqutissartalerujussuuvoq,
soorlu illoqarfeqarpugut ilaatigut inissiarpassuaqarfiunngitsuni kalaallit
nunaata ilaani.
Kisianni una
Naalakkersuisunut uanga boligstøttiinnarmik inissianik akiitsunik
isumakkeerinnissinnaaneq aqqutissiuunneqassappat aamma naammaginartunik
imaluunniit akissaatikitsunik appasissunik akissarsiallit aamma inissiarsuarni
najugallit taakkua naliliinissami assut eqqumaffigineqarsinnaanissaat
pisariaqassasoq. Tassa illoqarfiit ilaanni taanna ajornartorsiut
nalunngilarput immaqa arlaatigut paasititsiniaanerup annikissusia
arlaatungaatigulluunniit pissuteqarluni aamma saqqummiussisup oqaasii ukua
assortuinnarneqarsinnaanngitsunik imaqarput, nalunngisaqarpugut taamak ittunik.
Kisianni
tassa taanna soorunami nalilersueqqissaarnissaq uagut aamma
Atassumminngaanniit ukiamut qilanaarisorujorujussuullugu utaqqisussaavarput.
Tassami innuttaasut pitsaanermik atugaqarsinnaanerat aallaavigalugu taamak
inatsit aaqqissuussaammat. Taamaattumik taamak sivikitsigisumik
atuutissinnarluni allanngortinneqarnissaa orniginanngilaq. Taamaattumik
nalilersuilluartoqaqqinnissaa ukiamut taanna pissangalluta aamma uagut
utaqqissavarput, aamma neriuppugummi tamatta kissaatigissavarput aamma
atuisunut pitsanngoriaatinik taanna kinguneqarumaartoq.
Qujanaq.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Taava
oqaaseqartussatut kingullertut nappaasimasoq tassaavoq Isumaginninnermut,
Suliffeqarnermullu Naalakkersuisoq Ole Dorph.
Ole Dorph,
Isumaginninnermut, Suliffeqarnermullu Naalakkersuisoq, Siumut.
Oqasseqartunut
kingullernut naatsuarannguamik. Tassa una aaqqissuussineq atortussanngormat
naatsorsuutigineqareerpoq tamanit naammagittaalliortut amerlasuut
takkutissasut, aamma taamaaliortoqarsimavoq. Soorunalimi inuit ilaat
eqqorneqarput, akiliutaat qaffanneqarput ilaasa akiliutaat apparput,
appaavigineqartut qujapput, qaffaaffigineqartut naammagittaalliorput, tassa
taanna tamatta ilisimareersimavarput.
Aamma
ilumoorpoq soorlu Mads Peter Grønvold-ip siunnersuutaa
piviusunngortinneqassappat, soorlu pisariaqanngitsutut uanga
isigisimagaluarpara, kisianni Lars Sørensen-ip Inuit Ataqatigiinniit
erseqqissarpaa taanna amerlasuut nanertorneqalernerannik
malitseqaqqittussaavoq, tassa killigititaq 128.000 kr. tassa taanna
aallarteqqissooq aammalu utoqqalinersiallit aappariit tassani aamma
boligsikring-inik pisinnaatitaaffeerutissapput aammalu inuit amerlasoorpassuit
allat ullumikkut aaqqissuussamik tassannga iluaquteqartut
pisinnaajunnaassapput.
Taamaattumik
uumap aaqqissuussinerup siunertaraa sapinngisamik inuiqatigiinnut
naapertuuttumik akilersuilernissap ingerlalernissaa, taanna tunngavigalugu
aaqqitassat assigiinngitsualuvit aaqqissuunneqarnissaat pinngitsoornani
ingerlanneqassooq.
Aamma
ingerlatsinermut aningaasartuutinut atatillugu oqaatigisinnaavara ukua
inissiaatileqatigiinni immikkoortortaqarfiit aamma ingerlatsinermut
aningaasartuutinik sipaarnermikkut aamma qaammammut ineqarnermut
aningaasartuutigisartakkatik akiliutigisartakkatik apparsarsinnaagamikkit.
Ganginik sanertarnerit, asaasarnerit, aputaajaasarnerit, viceværtitigut
sipaarnerit allatigullu ileqqaarinerit tamarmik qaammammut akiliutip
apparsarneqarneranut iluaqutaasussaapput, taamaattumik makkua peqatigiiffiit
assigiinngitsunik ingerlasut pioreersut atorluarnerisigut najugaqartut
annertoorujussuarmik sunniuteqaqataasinnaapput ulluinnarni ingerlatsineq
eqqarsaatigalugu.
Aammalu una
aaqqissuussineq pineqartoq atuutilermat, annertuumik paasititsiniaaneq
ingerlanneqarsimavoq annertungaatsiartorujussuarmik ingerlanneqarsimavoq,
kisiannili tupinnanngitsumik aaqqissuussineq nutaajuvoq - nutaarujussuuvoq,
taamalu nutaajutigisumik aaqqissuussinermi eqqusigaanni inuit
tupinnanngitsumik aamma ilaasa periarfissatik arajutsisarsimavaat, taanna
ilimagineqarpoq. Taamaattumik atuunnerata sivitsoriartuaannera ilutigalugu
inuit pisinnaatitaaffitik ilikkariartuaarnerat ilutigalugu inuit qanoq
siunissami aaqqiivigineqarsinnaanissartik naniartuaassavaat.
Taamaattumik
aaqqissuussineq una ajunngitsoq, kisiannili assigiinngitsualunnik
aaqqiiffigineqartariaqartoq taanna ingerlatissaqqaarparput. Aamma una
naggataatigut oqaatigissavara angivallaartunik, mikivallaartunik ineqartarneq.
Angivallaartunik inissianik ineqarneq taanna nutaajunngilaq aamma peqqussummi
pisoqqami allassimavoq, kisiannili kommuni taanna annertunerusumik isiginiarneq
ajorsimavaat aatsaallu massakkut piffissaq kingulleq, ukiut kingulliit
ingerlaneranni tappiffigiartulersimavaat massakkullu qanoq inip annertutiginera
assut aallaavigalugu tapiissutip, tapiisarnerup qanoq annertutiginissaa
annertuumik aallunneqalersimalluni.
Taamaattumik
annertuulioqqinnanga oqaaserisakka aamma neriuutigalugit paasineqartut, taanna
neriorsuuterput Naalakkersuisuninngaanniit taanna neriorsuutigissavara pissasoq
aammalu tamassinnut qujaasuteqaqqissuunga aammalu neriuutigalugu uuma
aaqqissuussinerup aamma paasisititsiniutigineqarnera aamma ilissi
periarfissaqarnissigut aamma ingerlattarsinnaagissi inuiaqatigiinnut, soorunami
Inatsisartuni ilaasortat aqqusinermi sumi tamaani naapinneqaraangamik
apersorneqartarput annertuumik ilaatigut. Taamaattumik tamakku periarfissat
aqqutigalugit aamma taamannak ikiuussinnaagussi assut aamma qujanassooq.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Isumaginnermut,
Suliffeqarnermullu Naalakkersuisumut qujavunga. Taava maannakkut
allanikoqaaseqartoqarnianngimmat uanilu oqaluuserineqartumut tassunga
oqaaseqartut partiit, Kattusseqatigiit, Attaviitsullu oqaaseqartui
najoqqutaralugit amerlanerussuteqartut Naalakkersuisut siunnersuutigisaat
malillugu taassuma akuersissutigineqarnissaa inassutiginngilaat taamaalillunilu
taamatut isikkoqarluni ukiamut aappassaannerneqarnissaa ingerlanneqarnissaa
inassutigissavara. Ajorineqanngilaq.