Oqaluuserisassani immikkoortoq 49-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut aqqaneq pingajuat, marlunngorneq aprilip 30-at 2002, nal.
17:00
Ataatsimiinnermik aqutsisoq: Daniel Skifte, Inatsisartut Siulittaasuat, Atassut.
Lars-Karl Jensen, Siumut.
Taamatut siunnersuuteqarnera tunngaveqarpoq ukiuni arlaqalersuni akileraarutitigut akiligassallit ikiliartunngitsut ikilisarneqarnissaat suliuniutigalugu Inatsisartutigoortumik aqqutissiuisoqartariaqalermat.
Maannakkut innuttaasut akileraarutitigut akiligassaannik akiliisitsiniarnermi aqqutissaavoq suliffeqarfiit piumaffigineqartarlutik akiligassallit aningaasarsiaanniit ilanngaassisoqarnissaanik.
Taamaakkaluartoq maannakkut malunnarpoq innuttaasut
akileraarutitigut akiligassaat ikiliartunngitsut sulisitsisut ilaasa
akileraarutissanik unerartitseriarlutik uani sulisut akileraarutissaat
pivakka. Piffissaanerani ilaannakuusumik akiliisarnerat pissutigineqarullugu. Ullumikkut
pisortanut akiligassaagaluit kinguartinneqartarnerat periarfissaavoq. Ukiulli
tamaasa nutaamik ilaartortuartillugit pisortanut akiitsut ikiliartoratik
ilaatigut ilaqqiinnarneqartarnerat akiligassat
amerlatsikkaluttuinnarnerannik kinguneqartarpoq.
Akiitsut
ikilisarniarlugit periarfissat nunatsinni atulerneqanngitsoq savalimmiormiut
atulereerpaat. Tassalu akiligassallit aningaaserivik sullissisorisaat
aqqutigalugu pisortanit toqqaannartumik attavigineqarluni akiligassallit
akiligassaannik akilersuisitsisarneq ingerlanneqartarluni.
Tamatuma
nunatsinni periarfissatut atugaalernissaannik aqqutissiuussinissamik
periarfissarsiuussisinnaanissamik Naalakkersuisut peqquneqarnissaat
matumuuna oqaluuserisassanngortippara.
Augusta
Salling, Aningaasaqarnermut Naalakkersuisoq, Atassut.
Qujanaq.
Naalakkersuisut isumaqarput siunnersuuteqartup siunnersuutaa Kalaallit
Nunaanni eqqartuussisarnermik inatsisinut naleqqutinngitsoq. Aammalu
siunnersuut akileraarutinut akiitsunik akiliisitsiniartarnermi maleruagassanik
atuuttunik paatsuuinermik tunngaveqartoq.
Pigisat
qularnaveeqqutissanngorlugit arsaarinnittarneq matumani aamma inuit
aningaaserivinni uninngasuutaat qularnaveequtissanngorlugit
arsaarinnittarneq kiisalu aningaasarsianik unerartitsisarneq pillugit
maleruagassat Kalaallit Nunaanni eqqartuussisarnermik inatsimmik
aalajangersagaapput. Inatsimmullu tassunga akisussaanneq folketingimiippoq.
Taamaattumillu
Inatsisartut akileraarutinut akiitsunik akiliisitsiniartarnissamut
maleruagassanik aningaasarsianik akileraarutit pillugit Inatsisartut
inatsisaani akiliisitsiniartarnermut maleruagassanut Kalaallit Nunaanni
eqqartuussisarnermik inatsimmiittunut akerliusunik
atuutitsilersinnaanngillat.
Akiliisitsiniartartoq
Kalaallit Nunaanni eqqartussisarnermik inatsit aqqutigalugu ullumikkut
periarfissaqarpoq inuup akileraarutinut akiitsullip aningaaserivimmi
uninngasuutaanik tamanik qularnaveeqqutissatut arsaarinninnissamut
taamaattorli napaniutissatut pisariaqartitat minnerpaaffissaat ataqqillugu.
Savalimmiuni
aaqqissuussineq siunnersuuteqartup innersuussutigisaa akileraarutinut akiitsunik
akiliisitsiniartarnermut attuumassuteqanngilaq. Siunertaraluguli sulisuusup
aningaasarsiaanik tunniussinermut ilutigitillugu akileraarutinik A-nik
akileraartarnermi oqartussaasunut akiliuteqartarnerup aningaaserivimmik
isumagineqarnissaa.
Sulisitsisup
aningaaserivimmi kontoani aningaasaatai naammassimanngikkaangata sulisuusup
aningaasarsiassaasa ilaannaat tunniunneqartarput. Taamatuttaarlu akileraarutit
akileraartarnermik oqartussaasunut akilerneqartut aningaasarsiassat
ilaannaanut tunniunneqartunut tunngasuusarlutik. Tassa imaappoq
aaqqissuussineq akiligassanik isumaginninnissamik aaqqissuussineruvoq.
Akiliisitsiniarnermik aaqqissuussinerunani.
Savalimmiuni
aaqqissuussineq Kalaallit Nunaanni atulersissallugu naleqquttuunersoq
siusinerusukkut nalilersorneqarnikuuvoq. Ilaatigut IT-p tungaatigut
attaveqaatit nunap aammalu aningaaseriveqarnerup tungaatigut pissutsit
pissutigalugit aaqqissuussineq nunatsinni atorneqarsinnaanngitsutut
nalilerneqarpoq.
Taamak
naliliineq Naalakkersuisut suli isumaqatigineqarpoq.
Akileraarutinut
akitsuut ukiuni arlaqalersuni ikiliartunngitsutut isikkoqarnerannik
siunnersuuteqartup isumaa Naalakkersuisut isumaqatiginngilaat.
Taamaattumillu akileraartarnermik pisortaqarfik suliakkesimallugu ukiuni
kingullerni tallimani akerleraarutinut akitsuutit kisitsisinngorlugit
naatsoqqissaaqqullugit. Taannalu naammassineqaruni akileraarutinut
akitsuutinullu ataatsimiititaliamut nassiunneqassaaq.
Aammattaaq
akileraartarnermut pisortaqarfimmit oqaatigineqarpoq sulisitsisut
sulisorisamik akileraarutinut akiitsuinik unerartitsinissamik allakkatigut
peqquneqarlutik akileraartarnermi oqartussanut ingerlatitseqqiineq ajortut
aningaasanngorlugillu naatsorneqarsinnaanngitsut.
Akiliisitsiniartarneq
pillugu Naalakkersuisut pingaarnertut anguniagaraat pisortat innuttaasunit
suliffeqarfinnillu pisassaasa akilersinniarneqarnissaannut maleruagassat
pitsaasuunissaat pisortanullu akiitsoqartoqalernissaanut
pinaveersimatitsinissaq.
Akiitsut
ataasiakkaaginnaat akilersinniarneqartarnissaanut immikkut
maleruagassiornikkut tamanna anguneqarsinnaanngilaq. Misilittakkammi
tamarluinnarmik takutittareerpaat akiitsut aalajangersimasuinnaat
isiginiarneqaleraangata taakku ikilisartut aammali tamatuma kingunerisaraa
akiitsut allat amerliartulersarnerat.
Naalakkersuisut
isumaqarput akiliisitsiniartarneq pillugu Kalaallit Nunaanni
eqqartuussisarnermik inatsisini maleruagassat pisortanut akiitsunik
akiliisitsiniartarneq akiitsoqalinnginnissarlu pillugu Inatsisartut
inatsisaani maleruagassani kiisalu akiliisitsiniartarneq pillugu immikkut
inatsisini maleruagassanik ilallugit tassaasut pisortanut akiitsunik
akiliisitsiniartarnermi tunngavissat pitsaasut.
Akiliisitsiniarnerulli
pitsaasuunissaannut pinngitsoorneqarsinnaanngitsoq tassaavoq kommunini
akiliisitsiniartarfiit sulisunik naammattunik piginnaasalinnik
inuttaqartinneqarnissaat.
Akiliisitsiniartarnermi
maleruassanik atuuttunik allanngortitsinissaq Naalakkersuisut
pilersaarutiginngilaat taamaattumillu siunnersuut tapersersinnaanagu. Qujanaq.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Aningaasaqarnermi
naalakkersuisoq qutsavigaarput. Taava maannakkut partiit, Kattusseqatigiit
attaviitsullu oqaaseqartuinut nuuppugut. Siulliulluni oqaaseqassaaq Tommy Marĝ
Siumut.
Tommy
Marĝ, Siumup oqaaseqartua.
Qujanaq.
Inatsisartuni
ilaasortap Lars-Karl Jensenip Siumut siunnersuutaa oqaluuserilluareerlugu
nalilersorluariarlugulu Siumumiit imaattumik imalimmik oqaaseqarfigissavarput.
Siunnersuuteqartup
akileraarutinut akiligassallit ikilisarnissaat siunertaralugu
Inatsisartutigoortumik aqqutissiuuneqarnissaa pillugu. Tassanilu
kaammatuutigalugu Savalimmiuni periuusaalersimasoq tassalu aningaaseriviit
aqqutigalugit akiligassallit ikilisarneqarsinnaanerannik inatsisitigut
aqqutissiussisimaneq.
Naalakkersuisup
siunnersuuteqartumut akissuteqaataat Siumumiit paasilluarparput. Inatsisitigut
periarfissat killeqarmata aammalu taamatut akiitsut ataasiakkaat pillugit
inatsisiliorfiginissaat innersuukkumanngikkaat. Misilittakkat aallaavigalugit
akiitsut allat qaffartarmata. Tassani akiligassat allat kisiisa
aallunneqalersarmata.
Naalakkersuisup
Siumumiit isumaqatigaagut akiliisitsiniartarnermi tunngavissat pitsaasuusut
oqaatigimmassuk. Akiliisitsiniartarnerullu pitsaasuunissaanut
pinngitsoorneqarsinnaangitsoq tassaasoq kommunit akiliisitsiniartarfii
sulisunik naammattunik piginaasalinnik inuttaqartinneqarnissaat.
Akiliisitsiniartarnermi
maleruagassat atuuttunik allanngortitsinissaq Naalakkersuisut
pilersaarutiginngikkaluaraat Inatsisartuni ilaasortap Lars-Karl Jensenip
tikkuagaa Siumumiit malersoqqittariaqartutut isumaqarfigaarput.
Pisortanut
akiligassat aningaasat amerlaqisut ilisimaneqarput. Tamanna kommunini aamma
Namminersornerullutik Oqartussani takuneqarsinnaavoq.
Akilersuinissamulli
iliuusissat suli naammattumik angusaqarfiusimanngillat, naak tamatumani
sulissuteqarnerit nukittorsarneqaraluartut.
Siumumiit
paasilluarparput inatsisitigut aporfissat taagorneqarmata aammalu inatsisit
pineqartut allannguuteqarsinaaneri folketing-imi Inatsisartunilu
suliarineqartut eqqarsaatigalugit. Tamanna piffissami annertuumik
tigusisinnaasoq.
Taamaattumik
Siumumiit kissaatigissavarput ukiut tallimat kingulliit akileraarutinut
akiligassat allanngorarnerini pillugit Akileraartarnermut Pisortaqarfiup
takussutissamik naatsorsuusiaata akileraartarnermut akitsuusiisarnermillu
ataatsimiititaliami ukiamut 2002-mi Inatsisartut ataatsimiinneranni
suliarineqarnissaa.
Tamatuma
suliarineqarnerani akileraarutinut akiligassat ikilisarneqarnissaat
siunertaralugu suliniuteqartoqarnissaa nalilersorneqassasoq.
Imaluunniit
inatsisinik allannguisoqarsinnaanera nalilersorlugu aammalu akiligassanik
akilersitsisuisinnaanermi allaffissornikkut ingerlatsineq qanoq
pitsanngorneqarsinnaanersoq nalilersorlugu.
Siumumiit
taamatut oqaaseqarluta siunnersuutip matuma aappassaaneerneqannginnerani
Inatsisartut inatsisit atortinneqarnerannut ataatsimiititaliami
nalilersuiffigineqaqqaarnissaa kaammattuutigissavarput.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Tommy
Marĝ qutsavigaarput. Tulliulluni oqaaseqassaaq Jakob Siverthsen, Atassut.
Jakob
Siverthsen, Atassutip oqaaseqartua.
Qujanaq.
Aningaaseriviit aqqutigalugit akileraarutinut akitsuunik akiliisarnissaq
pillugu aalajangiiffigisaasutut siunnersuut Lars-Karl Jensenip saqqummiussaa
Atassummiit imatut oqaaseqarfigissavarput.
Siunnersuummik
saqqummiussaqartup akileraarusinut akiligassat aningaasiviit aqqutigalugit
akiligassalinnik akiliisitsiniartarnissaasa periarfissiunneqarnissaat
ujartorpaa.
Siunnersuuteqartup
akileraarutinut akiligassat ullumikkornit sukkanerusumik
akiliraasuarneqartarnissaannik ujartuinera Atassummiit paasilluarparput.
Kommuninut
akiligassat suulluunniit akileraasuarneqartaraluarpata kommunit
aningaasaqarnerat malunnavissumik ikorfartorneqassagaluartoq nalunnginnatsigut.
Taamaakkaluartoq
Naalakkersuisup siunnersuuteqartumut akissuteqarnermini oqaatigisaat soorlu
Kalaallit Nunaanni eqqartuussisarnermik inatsisit tunngavigalugit
akiligassanik akiliisitsiniartarnermi periarfissaritsitaasut atoneqartarnerat
saneqqukkuminaatsoq erseqqissaatigalugu.
Tassalu
inuit akiligassaqartut tamarmik ulluinnarni inuuniutissaqartinnissaat
eqqaamallugit ataqqillugillu akiliisitsiniartarneq ingerlanneqartarmat.
Atassummiit
isumaqarpugut ullukkut inuit pisortanut akiligassallit
isumaqatigiissuteqarfiginerisigut naaffeqartumik akiliisitsiniartarnerit
ingerlanneqartaraluartut ullumimut pisortanut akiligassat
akilinngitsoorneqartartut suli amerlavallaartut. Naak akiliitsiniartarnermi
periuutsit sulisunillu pikkorissaasarnerit ingerlanneqartaraluarput
periarfissat atortorissaarutillu nutaat ullutsinni atugaalersimasut
periarfissarititaat nalilersoqqissaaneqaqqittariaqartut.
Ullumikkummi
atortorissaarutit ima pitsanngortigisimapput illuinnannguaniit Internet
atorlugu silarsuaq tamaat attaveqarfigineqarsinnaanngorsimalluni. Taamaammat
siunnersuuteqartup nunatsinni akiliisitsiniartarnerup
pitsaanerulersinneqarnissaannik ujartuinera Atassummiit pissusissamisoortutut
isigaarput.
Siunissami
akiligassanik akiliisitsiniartarnerup pitsanngorsartuarneqarnissaa
atortorissaarutit ineriartortinneqarnerannut peqatigitillugit
Naalakkersuisunit eqqumaffigineqarnissaata Atassummiit kissaatigaarput.
Pingaartumik
siunnersuuteqartup akileraaruteqartunut akiligassanik akiliisitsiniartarnermi
ajornartorsiutit ujartugaat matumani eqqarsaatigalugit.
Taamatut
Atassummiit siunnersuut oqaaseqarfigaarput. Naalakkersuisullu akissuteqaataat
akuersaarpagut. Ukiamullu siunnersuutip aappassaaneerneqarnissaanut
ataatsimiititaliami sammeqqissaarneqarnissaa innersuussutigaarput. Qujanaq.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Jakob
Siverthsen qutsavigaarput. Tulliulluni oqaaseqasssaaq Olga Poulsen, Inuit
Ataqatigiit.
Olga
Poulsen, Inuit Ataqatigiit oqaaseqartuat.
Qujanaq.
Inuit Ataqatigiinniit akileraarutinik akiliisussaanerup pissusissamisoortumik
ingerlanneqartuarnissaa tapersersortuassavarput. Tassami innuttaasut
akileraarutitigut akiliutigisartagaat ulluinnarni ingerlanneqartussanut
akilersuutigisussaagatsigit.
Ullumikkut
innuttaasut ataasiakkaat akileraarutitigut akiligassallit
aningaasarsiassaminnik ilanngaaffigineqartarput taamaasillutillu
inuuiaqatigiinnut akilersueqataasussaanerminnik tassuungaarlutik
ingerlatsisarlutik.
Suliffeqarfiit
namminersortut suugaluarunilluunniit inuuiaqatigiinnut akisussaaqataallutik
akilersuisussaatitaasut akileraarutissaminnik uninngatitsigallartarnissaannut
inatsisitigut sukateriffigimmeqqammerpagut.
Inuit
Ataqatigiinniillu naatsorsuutigivarput tamanna aqqutigalugu suliffeqarfiit
nunami suliffeqarfiugunik aalisariutaagunilluunniit inuuiaqatigiinnut
akisussaassuseqartumik akileraartarnermikkut pissusissamisoortumik
ingerlatseqataalerumaartut.
Taamatut
oqaaseqarluta Naalakkersuisut siunnersuuteqartumut akissuteqaataat
tusaatissatut tigullugu siunnersuut Inuit Ataqatigiinninngaanniit
itigartipparput.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Olga
Poulsen qutsavigaarput. Tulliulluni oqaaseqassaaq Anthon Frederiksen,
Kattusseqatigiit.
Anthon
Frederiksen, Kattusseqatigiit oqaaseqartuat.
Aningaaseriviit
sulisitsisutulli akileraarutit akiitsunik unerartitsissutaalernissaat
siunertaralugu Naalakkersuisut akileraartarnermi inatsimmik
allanngueqquneqarnissaannik Inatsisartunut ilaasortap Lars-Karl Jensenip
aaliangiiffigisassatut siunnersuutaata siullermeerneqarnera
Kattusseqatigiinniit imaattumik oqaaseqaateqarfigissavarput.
Inatsisartunut
ilaasortap Lars-Karl Jensenip siunnersuutaata tunngavia tassa
akileraarutitigut akiligassallit ikiliartortinnissaat anguniarlugu akiitsunik
akilersuisitsisarnermi periusissanik ujartuinera Kattusseqatigiinniit
paasilluarparput, kisianni aningaaseriviit sulisitsisutulli akileraarutitigut
akiitsunik unerartitsisinnaanngorlugit peqquneqarsinnaanerat
Kattusseqatigiinniit eqqarsarnartoqartillugulu apeeqquserparput.
Tassami akiitsunik akiliisitsiniartarneq pillugu eqqartuussisarnermi inatsisip kapital-iata 7-at naapertorlugu siunnersuuteqartup siunnersuutaa ullumikkut nunatsinni periarfissaanngimmat. Taamaaliortoqassagaluarpallu eqqartuussisarnermi inatsit pillugu allanngortinneqaqqaartariaqassammat. Tamannalu aatsaat danskit Folketingianni pisinnaavoq.
Taamaammat Naalakkersuisut siunnersuuteqartup siunnersuutaannut tunngatillugu tunngavilersuutaat aamma paasilluarpagut, kisiannili Kattuseqatigiinniit pakassutigaarput Naalakkersuisut akiliisitsiniartarnermi maleruagassanik allanngortitsiniarneq anguniarlugu suliniuteqarnissaminnut kajumissuseqannginnerat.
Tassa naluneqanngimmat pisortanut akiligassarpassuit aamma akileraarutinuinnaanngitsoq kisiannili aamma allanut pisortaqarfinnut akiligassat akiliisitsiniartarnikkut inatsisitigut pitsaanerusumik sulisunut periarfissiinikkut suliassat amerlanerusut naammassineqartarsinnaanerat periarfissaqalernerulissagaluarmat. Qularnanngitsumillu aamma akiligassatoqanngortut ilaat akilersinneqarsinnaanatik uninngassutigineqaannartut taamaaliornikkut isumakkeerneqarsinnaanerat pitsaanerusumik periarfissaqalersinneqalissagaluarmat.
Kattusseqatigiinniimmi qularutiginngilarput akiliisitsiniartarnermik suliaqartut inatsisitigut sakkussanik ullumikkut periarfissaareersut saniatigut pitsaanerusunik periarfissinneqaraluarunik eqaannerusumik sullitaminnut pitsaanerusumik naammassisaqarsinnaanerat anguneqarsinnaagaluarmat.
Taamaammat Kattusseqatigiinniit kaammattuutigerusupparput pisortanut akiligassat amerligaluttuinnannginnissaat anguniarlugu eqqartuussisarnermi inatsisikkut imaluunniit Namminersornerullutik Oqartussat pisinnaatitaaffiisa oqartussaaffiisalu iluanni akiligassanik isumakkeerinnissinnaanermut akiligassanilluunniit akilersueriaatsinut tunngassutigut ajornartorsiutinut aaqqiissutaasinnaasunik periarfissarsiuussisoqartariaqaraluartoq isumaqarpugut.
Taamatut naatsumik oqaaseqarluta siunnersuut taamannak oqaaseqarfigaarput.
Daniel Skifte, ataatsimiinnermik aqutsisoq, Inatsisartut Siulittaasuat, Atassut.
Anthon Frederiksen qutsavigaarput. Taava tulliulluni oqaaseqassaaq siunnersuuteqartoq Lars- Karl Jensen.
Lars-Karl Jensen, Siumut.
Qujanaq. Immaqa apereqqaasinnaagaluarpunga oqallisissagutsigut kina paatsuuinersoq paasiniarlugu aamma oqallissinnaagaluaratta.
Tassa ilisimaarilluarpara Kalaallit Nunaannut inatsisit ilaat folketing-ip suliassarigai. Soorlu aamma uani akileraartarnermut inatsit akiliisitsiniartarnermut inatsit tassani pineqartoq.
Pisortanut akiliisitsiniartarneq akiitsoqalernerullu pinaveersaartissinnaanerat taakkua immikkoortikkutsigit. Inatsisartut uagut nammineq Inatsisartut inatsisaattut malillugu pisussaaffigaarput Namminersornerullutik oqartussat taakkua pillugit nalunaarutinik suliaqartussaammata. Soorlumi aamma kingullermi 1996-imi majip aappaani maani inimi eqqartorsimasatsinni aamma taama ittumik pilersitsinikuusugut. Tassa pisortanut akiitsut akilersinniarneqartarnerat pinaveersaartinniarneqarnissaallu pillugit Inatsisartut inatsiseqarpugut.
Uani Folketingip suliassaa akiliisitsiniartarnermut tunngasoq soorunami iluarsisariaqassappat Inatsisartutigoortumik oqariartuuteqarnitsigut aamma Naalakkersuisunut suliakkiutigalugu folketing-imut apissinneqarsinnaasoq qularinngilara.
Naalakkersuisut akissuteqaatigisaat ataatsimut isigalugu oqaatigissavara iluarisimaarakkut. Tassa Naalakkersuisut akissuteqaatiminni oqarmata ukiuni kingullerni 5-ni akileraarutinut akiitsut kisitsisinngorlugit naatsorsueqqissaarnissaq suliakkiutigisimallugu. Tamanna nammasseriarpat akileraartarnermut akitsuutinullu ataatsimiititalimut aamma saqqummiunneqartussaasoq oqaatigineqarluni.
Siunnersuuteqarninni akiligassaqalersimaneq pillugu pigisanik qularnaveqqusiisarneq arsaarinnittarneq aningaasanillu uninngasuutinik qularnaveequtissanngortitsisarneq qiteritinngilara. Nalunnginnakku kommunini akiliisitsiniartarnermi suliaqartut inatsisit peqqussusiallu sulinerminni najoqqutassat malillugit suleriaaseqarlutik suiaqartut.
Siunnersuutimma qiterisaa uterfigissagukku tassani pivakka sulisitsisut nunami suliffiuteqarunik imaluunniit aalisariutinik piginnittuugunik sulisumik tassa inuttamik akileraarutissaannik pisussaaffeqarnerat. Taanna malillugu maannakkumut aaqqissuussineqarpoq nunatsinni qaammatit tamaasa sulisoqarneq pillugu najukkami kommunimut immersugassamik immersuisoqartarluni. Taakkulu qaammatikkaartumik nassiunneqartarput, kisianni aamma pisinnaatitaapput sulisumik akileraarutissaannik akiliinissamut kinguartitsigallarnissamik ukiup naanissaannut. Taassumallu nassatarisarpaa allaat martsip naaneranut akiligassaat sulisumik skat-eerutissaat akileraarutissaat tigummisarmatigit.
Immaqalu uani akiitsoqalersarnermi aamma patsisaasa ilaat nunatsinni tusarnartuugunanngilaq kommunit akornanni. Tassa piffissaatillugu kinguartitsisinnarlutik taava akiliiffissaq nalleraangat oqaatigisinnaavara isaasalerlugu oqaatigissagaanni "Sulisumik inuttamik aalisariuutaasimaguni inuttamik akileraarutissannguakkului allamut atoreersimallugit taava qinnuteqaqqittarsimapput suli kinguartitsigallarnissamik". Soorunami akileraarutinut kommunimi akileraaruserisunut aammalu akiliisitsiniartartunut suliaqutissanngorujussuartarpoq taamalillugillu aamma akiligassat ikiliartuutiginngisaanik qaleriiaartumik akiligassaqalertoqalertarluni.
Soorunami tamanna nassatarissavaa akiliisitsiniarnikkut pigisanillu arsaarinnikkut imaluunniit pigisanik qularnaveequsiinikkut suliassat aallartinnerat.
Oqaluuserisassanngortitara una tunngavissarsiorniarlugu kisitsisinnguanngorlugu piniarnikuuvaat. Kisitsisinik taaguinngikkaluarlunga takussutissaqarpoq 1985-imiit 1990-ip tungaanut akileraarutini akiligassat sinneruttut kalitaqarput aningaasanik mikinngitsunik. Taamatuttaaq 1990-imiit 1995 ilanngullugu.
Taava akiitsoqalersitsinaveersaanermut pisortanut akiitsut pinaveersaartinniarneranut Inatsisartut inatsiliaata 1996-imiit takussutissaavoq tassani tamakkunuuna inuuiaqatigiit sukannersumik piumaffigineqarnertik malillugit ingerlalersimasut, kisianni taamaakkaluartoq suli takussutissaqarluni aamma immaqa ulorianartoq uani inissisimasinnaallusi soorunami namminneq akisussaaffigisarpaat, kisianni nunap karsianut tuttussaagaluit annaaneqartartut eqqarsaatigigaanni isumaqarpunga pitsaanerusumik suleriaaseqarsinnaasugut.
Paasivara aningaaseriviit atorlugit akiliisitsiniarsinnaaneq uani aamma paatsuuallanneqarsimasoq. Tassa sulisitsisoq aningaasanik ilisippat sulisumi imaluunniit aalisariutaasimassaguni inuttami akiligassaqarpata akileraarummi qaammammi tassani. Soormi kommunip akiliisitsiniartuata attavigiinnarsinnaassanngilaa taavalu ingerlaannartumik taakku akigassat tuffissaannut tutsillugit akileraarutaasussaammata.
Uani ataasiakkaat oqaaseqaataat ussernartorsiornaraluartoq oqaaseqarfigilaassallugit allamut sanguniannginnama uani siunnersuutigisara takusinnaavara Siumup Atassutillu pingaartikkaat ataatsimiititaliami susassaqartumi suliarineqarnissaa. Taavalu aamma Naalakkersuisut isumalluarfigivakka uani oqarmata ukiuni kingullerni tallimani akileraarutitigut akilinngitsuukkanik qulajaasitsinissaminnik aammalu taakku neriuppunga ilanngullugu ukiuni siuliini nunarpummi tamakkerlugu akiligassarpassuaqarmat assigiinngitsunik. Akiligassaalersimasut susassaqartunut qulajaaffigineqarumaartut isumakkeerfigissagutsigit aamma isumakkeerfigisariaqartut suliasserissagatsigit. Qujanaq.
Daniel Skifte, ataatsimiinnermik aqutsisoq, Inatsisartut Siulittaasuat, Atassut.
Lars-Karl Jensen qutsavigaarput. Taavalu oqaaseqaqqissaaq Naalakkersuisuni ilaasortaq Augusta Salling.
Augusta Salling, Aningaasaqarnermut Naalakkersuisoq, Atassut.
Qujanaq. Uangattaaq Naalakkersuisut siunnersuuteqartumut akissuteqaataannik oqaatsitsinnut tunngatillugu partiit Kattusseqatigiillu oqaaseqaataannut qujarusuppunga. Aammalu Naalakkersuisut oqaaseqaataat taperserluarneqartoq malugisinnaagakku taamaattumik nuannaarutigaara. Taavalu oqaaseqartut assigiinngitsut ilaatigut oqaaseqarfigilaarusuppakka imaluunniit oqaaseqaataat uparuaassuteqarfigilaarusuppakka.
Tassa ilaatigut Tommy Marĝ Siumuminngaanniit pisortanut akiligassat qaffakkiartuinnartarnerannut tassani pitsaanerusumik iliuuseqartarnissaq taanna anguniarlugu qanoq iliuuseqarnissaq ujartorpaa.
Oqartariaqarpugut akiliisitsiniartartutut kommunini assigiinngitsuni akiliisitsiniartartut periarfissaqarput pitsassuarnik atorneqarluarunik pitsaaneruviarfissaqanngitsunik. Taamatut oqartariaqarpugut.
Tassami imaappoq akiliisitsiniartartut imannak piginnaatitsissummik annertutigisumik pigisaqarput soorlu aamma saqqummiussatsinni oqaatigigipput. Akiitsoqartoq pigisaqarsimappat aningaasanik uninngasuuteqarsimappat taakkua arsaarinnissutigineqarsinnaapput akitsuinut matussutissatut. Taamaallaat isumagineqartussaalluni inuuniarnermini ingerlariaqqinnissaminnut ajornartorsiunnginnissaa taanna qularnaarlugu. Sinneri tamaasa arsaarinnissutigineqarsinaapput.
Taava imaappoq pitsaaneriviarfissaqanngilaq taanna akiliisitsiniartarnermut inatsit periarfissani annertoorujussuarnik periarfissaqartitsivoq. Imaaginnarpoq kommunit akiliisitsiniartartuisa piginnaatitaaffitsik nammattumik atorunikku taava ajunngitsunik periarfissaqarput. Apeqqutaalluarunarlunili kommunini atorfeqartitat aammalu piffissaq periarfissagisaat aammalu pikkorissaasarnerit. Taakku tassunatigut qularnanngilaq pitsanngorsaanissaq periarfissaasariaqarsinnaasoq, kisianni oqaatigisariaqarpara ullumikkut Akileraartarnermut Pisortaqarfik suleqatigalugu kommunit assigiinngitsut aamma akiliissitsiniartartunit pikkorissaasarnerat ingerlanneqarmat, aamma iluatsittumik.
Taamaattumillu aamma akiitsut ikiliartulernikuunerat malunnartumik massakkut takussutissaqalernikuusoq taanna qujanarluinnartumik oqaatigisariaqarpara.
Kattusseqatigiinninngaanniit pakatsissutigineqarpoq Naalakkersuisut akiliisitsiniartarnermi maleruagassanik allanngortitsiniarneq anguniarlugu suliniuteqarnissamut kajumissuseqanngimmata.
Naalakkersuisut allatut suliniuteqarnissami imaluunniit akiliisitsiniartarnermi periarfissanik allanik siunnersuuteqarnissamut suliniuteqarnissamut piareersimanngilagut pissutigalu isumaqaratta massakkut akiliisitsiniarnermi atuuttut ajunngilluinnartuusut periarfissallu tamarmik tassaneereersut. Atorluarneqarunik ajunngitsumik kinguneqartussaasut.
Taava siunnersuuteqartup tassami oqallisigineqarsinnaavoq kina paatsuualaalaarnersoq. Kisianni oqaatigisariaqarpara siunnersuutip imarisai aallaavigalugit akiitsut pineqarmata. Tassanilu akiitsut tassaasarput akilereerneqarsimasussaagaluarlutik suli akilerneqarsimanngitsut.
Taakkua tuungavigalugit uagut akissuteqaaterput suliaraarput, kisianni aamma paasisinnaavara siunnersuuteqartoq allamut aamma sanguallalaarluni oqaaseqartoq. Tassalu suliffeqarfiit sulisumik akileraarutaat periarfissaqartut uninngasissallugit ukiup ilivitsungajassuaq. Taama periarfissaqartitaanngillat sulisitsisut! Sulisitsisut qaammammi ataatsimik periarfissaqarput. Taasumalu kingorna aamma akileraartarnermut allaffiit assigiinngitsut pisinnaatitaaffeqarput inatsimmi allassimasumik akileeqqusilluni siullermik saaffiginneqqaarnermik tullerisaanni ernialersuillutik aallartissapput aammalu taassumap qaatigut pillaatinik tunniussuilersinnaallutik.
Taamaalillutik akiliisitsiniarneq perrannerujussuarmik ingerlatissinnaassavaat. Tamakkulu atortussat assigiinngitsut atorluarunikkit pinngitsooratik akiitsut suli ullumerninngaanniit ikiliartorneraninngaanniit pitsaanerusumik isumaqarpunga ingerlanneqarsinnaasut.
Una isumaqarpunga siunnersuuteqartup kaputartuukkaa sulisitsisut namminneq ingerlatsinerminni ukiup naanerani akileraarutissatik taakkua ukiup ingerlanerani agguarlugit akilersunngikkaluarlugit taava kinguarsitsisinnaasarmata nalunaaruteqarnissaminnut. Tassalu ukioq sioqqullugu immersuereertarput "Ukiumi uani naatsorsuutigaarput imannak isertitaqassalluta" taavalu taanna tunngavigalugu akilersuinissaannut aaqqissuisoqartarpoq.
Tassalu imaappoq sulisitsisup sulisumi akileraarutai ukiumut tullermut kinguartissinnaanngilai. Taanna naqissuserlugu erseqqissaarusuppara.
Nuannaarutigaara aamma siunnersuuteqartup qujarummagu ataatsimiititaliamut paasissutissat neriorsuutigisagut takkua naatsorsuutigilluinnarpara aamma ataatsimiititaliap suliaqarnissaminut soorunami paasissutissat taakku atorluarlugit aammalu periarfissat akiliisitsiniartarnermut periarfissat misissorluarlugit tassani sulinermini ingeriaqqissasoq. Qujanaq.
Daniel Skifte, ataatsimiinnermik aqutsisoq, Inatsisartut Siulittaasuat, Atassut.
Aningaasaqarnermut naalakkersuisumut qujavugut. Tulliulluni oqaaseqassaaq Lars-Karl Jensen.
Lars-Karl Jensen, Siumut.
Tassa oqareernittuut assortuutigisinnaavarput kina paatsoornersoq, kisianni uani akileraaruteqartarnissamut periuutsit aamma taakkua aaliangersagaapput malinnerartarlugillut aamma akiliisitsiniartartunit. Taamaattumik taakku equngassutaannik nassataqartumik qularutissaanngilaq ukiut tamaasa ukiup naanerani aningaasarsianinngaanniit akileraarutissaagaluaannik sulisitsisut tigummiartuugaanni kinguattoortarpoq. Taanna miserratissaagunanngilaq.
Taamaattumik inassutigiinnassavara uani neriorsuutaareersoq tamakkua pillugit misissuinissat sukumiisutut ingerlanneqarnissaat. Taavalu aamma aaqqittarialillit aaqqillugit kiisalu tamakkuninnga kommunini sullissisuusut aamma suli annertunerusumik pikkorissartinneqartarnissaat. Kommunimmi akissaqanngillat aamma ilai amerlasoorparujussuarnik akileraaruseqarfimmi sulisoqassallutik aamma taamaappoq akiliisitsiniartarnermi kommunit tamatta immaqa suliffeqarpugut, kisianni nuna tamakkerlugu aamma suleqatigiiffiusinnaasuni imaluunniit kommunikkaartumi aamma eqqarsaatigis.. suleqatigiiffigisinnaaneri. Qujanaq
Daniel Skifte, ataatsimiinnermik aqutsisoq, Inatsisartut Siulittaasuat, Atassut.
Lars-Karl Jensen qutsavigaarput. Tulliulluni oqaaseqaassaaq Anthon Frederiksen.
Anthon Frederiksen, Kattusseqatigiit.
Akileraartarnermut tunngasut siunnersuuteqartup soorunami siunnersuuteqarnermini tunngavigivai. Uagulliuna oqaaseqarnitsinni pisortanut akiligassarpassuit aamma allat kinguaattoorutaasut eqqaasissutigalugit periarfississusiorneqarnissaa manna iluatsillugu ilanngukkipput. Tassami akileraartitsisarnermi akiliisitsiniartartut kommunini atorfillit pisinnaatitaanngillat akiliisitsinissaminnut. Pisinnnatitaaffimmik peqanngillat ernialersuisinnaanermut peqanngillat. Kisianni Akileraartarnermut Pisortaqarfik akileraartarnermut inatsit tunngavigalugu taamaaliorsinnaavoq, kisianni akiliisitsiniartartut taamannak sakkussaqartitaanngillat. Akiliisitsitaasinnaanngillat. Pisortaqarfit taama iliorsinnaavoq.
Akiligassat allat eqqarsaatigalugit soorlu ESU-mut allanullu pisortanut akiligassat peqqussutsit inatsisillu malillugit aamma taama iliorsinnaatigaanngillat.
Ernialiisinnaatitaasutuat tassaapput akileraartarnermi inatsimmik tunngaviliisut taakkua.
Uagununa eqqartoripput ulluinnarni akiliisitsiniartutut sulisut taakkua eqqartuussisarnermik inatsimmik kapitali 7-mi tunngaveqarlutik suliaqartut.
Taakkua naalakkersuisup akissuteqarnermini oqaatigivaa: Taakkua inatsisitigut periarfissaat pitsaanerulersinneqarsinnaanngitsut. Ila taamatut eqqarsaraanni taamatut unittoorsimassuugut aamma tassani suliniarnermi pitsaanerulersitsiniarnermi oqalunnermi.
Periarfissat suulluunniit pitsaanerulerfissaqartissinnaaneri suliniutigineqarsinnaasut uagut Kattusseqatigiinniit ilisimavagut. Taamaatumiguna taanna ujartorlugu periarfissiuusseqqugaluartugut. Ulluinnarni akiliisitsiniartartut sulinerminni pitsaanerusunik atugassaqarnissaat aammalu inatsisitigut pitsaanerusumik tunngavissaqartinnissaat ujartorlugu.
Tassami nalunngilarput ulluinnarni akiliisitsiniartartut eqqartuussisutulli inississinnaapput pisinnaatitaaffii annertoreerput, kisianni taamaakkaluartoq suli pitsaanerulersinneqarsinnaapput. Taamaammat saqqummiussaqarnitsinni minissimasarput manna iluatsillugu ilanngukkusuppara tassa aamma kissaatigissagatsigut uumap suliap aappassaaneerneqannginnerani ataatsimiititaliami eqqartorneqarnissaa massakkut saqqummiunneqartut tamaasa ilanngullugit aamma eqqartorneqaqqinneqassammata.
Daniel Skifte, ataatsimiinnermik aqutsisoq, Inatsisartut Siulittaasuat, Atassut.
Anthon Frederiksen qutsavigaarput. Tulliulluni oqaaseqassaaq Aningaasaqarnermut naalakkersuisoq.
Augusta Salling, Aningaasaqarnermut Naalakkersuisoq, Atassut.
Qujanaq. Annertunerusumik oqaaseqarfigeqqinnagu kisianni una naqissuseqqilaaginnassavara soorunami akileraarutitsigut akiitsunngortut taakkua akileraaruserfimmi suliarineqaqqaassapput, kisianni aamma imannak sivittuuttooraangata taava akiliisitsiniartartunut aamma ingerlatinneqaqqittarput tassuungaatigullu suliassat ingerlaqqikkaangamik taava periarfissat taakkua inatsisigoortut tunngavigalugit aamma pigisanik arsaarinnissuteqarsinnaaneq taakkua matussuserniarlugit ingerlaqqittarput. Taamaattumik inuup inuuniarnermini periarfissai sernigalugit allatigut akiitsuinut matussusissanik tigusisinnaassuteqarneq taanna pisinnaatitaaneq annertoorujussuuvoq. Killissani tikillugu periarfissaqartinneqarput tassani. Tassami soorunami isumaqartoqarsinnaanavianngilaq Antuut naaggaartoraluaruilluunniit inuussutissaminnik peerullugit arsaartorneqarnissaat siunertarineqarnavianngilaq, kisianni taanna avataatigut pissarsiarineqarsinnaasut tamaasa akiitsunut matussutissatut tiguneqarsinnaapput taamatut akiitsut akilerumajunnaaneqarsimappata imaluunniit akilersorniarlugit isumaqatigiissummik atsiortoqarsimasinnaanngippat. Qujanaq.
Daniel Skifte, ataatsimiinnermik aqutsisoq, Inatsisartut Siulittaasuat, Atassut.
Aningaasaqarnermut Naalakkersuisoq qutsavigaarput. Tulliulluni oqaaseqassaaq Lars Sĝrensen, partiimi oqaarseqartup avataatigut.
Lars Sĝrensen, Inuit Ataqatigiit.
Tassa soorunami una oqallinnermi tunngatillugu naatsorsuutigaarput siulittaasut uuma suliap ingerlatinneqaqqissappat sumut ingerlateqqinneqarnissaa aaliangissagaat. Kisianni Akileraartarnermik ataatsimiititaliami suna suiarineqassanersoq maannakkumut paasinngilara.
Naalakkersuisullu nassuiaatai eqqorluinnartuusoq uppernassaannarsinnaallugu aammalu siunnersuuteqartut taavalu partiit oqaaseqartui ataasiakkaat aamma borgmesteritut inissisimammata akileraartarneq pillugu aammalu akiliisitsisarneq pillugu pikkorissarnissamik kaammattuinnassavakka. Tassami Akileraartarnermut Pisortaqarfimminngaanniit kommunit ataasiakkaanut tikeraartoqartarpoq. Aammali kommunit ataasiakkani akiliisitsiniartarfimmi sulisut aamma ilanngullugit pikkorissarneqartarmata. Taamaattumik aamma kollega-kka kaammattuinnassavakka pikkorissaanermut peqataaqqullugit.
Daniel Skifte, ataatsimiinnermik aqutsisoq, Inatsisartut Siulittaasuat, Atassut.
Lars Sĝrensen qutsavigaarput. Tulliulluni oqaaseqassaaq Anthon Frederiksen pingajussaaniilerami naatsuararsuarmik.
Anthon Frederiksen, Kattusseqatigiit.
Ilumut pikkorissaanissaq neqeroorutigineqarpat soorunami peqataarusussuugut, kisianniliuna nammineq akiliisitsiniartartunut sulisimalluni aamma misilittakkat assigiinngitsut takoreersimallugit amigaatigineqartut paasisimallugit ajornartorsiutit imaaliallaannaq qaangerneqarsinnaanngitsut taakku ujartorneqartut maanngaanniit uagut tungitsinniit.
Imaappoq akiligassallit tamarmik suutaarutiivillutik periarfissaqartuunngillat kisiannili akiligassallit ilaqarput akiliisinnaagaluarlutik aningaasaateqaraluarlutik akiliisitsiniartuninngaanniit qimaajuartut. Tamakkuukua uagut malersorneqarnissaat pigigut. Inuppassuit taamaattut ilisimaneqarput naluneqaratillu.
Tamaammat pikkorissartitsinissami oqalunneq minnerpaamilluunniit uanga sanninngaarlugu eerusunngilara. Namminneerlunga ukiuni 27-ni taanna kapitali aallaqqaataaniit naaneranut atuarsimavara. Aammalu misilittagaqarfigalugu nammineq eqqartuussisarnermi inatsimmi akiliisitsiniartarnermut tunngasut.
Apersulaariarsigit ilissi nammineq taakkunani suliaqartut suut ajornartorsiutigigaat. Taava paasigussigit paasilissavasi suut ajornartorsiutigineraat. Maanngaanniit asuli qungujulaarluni oqaannartoqarsinnaanngilaq, "Pikkorissarniaritsi"!
Daniel Skifte, ataatsimiinnermik aqutsisoq, Inatsisartut Siulittaasuat, Atassut.
Anthon Frederiksen qutsavigaarput. Taavalu maannakkut allanik oqaaseqarumasoqanngimmat taamaallilluni immikkoortoq 49 naammassivoq. Imalu naammassineqarpoq: Amerlanerussuteqarluartut siunnersuut tapersinngilaat. Taamaakkaluartoq amerlanerussuteqartut ataatsimiititaliami suliarineqarnissaa ukiaru aappassaaneerneqannginnerani inassutigineqarpoq.
Inatsisartut inatsisit atortinneqarnissaannut ataatsimiititaliaanni siunnersuutigineqartutuut suliarineqassaaq aappassaaneerneqannginneranni.