Ullut ataatsimiiffiusut aqqaneq-aappaat, ataasinngorneq 29. april 2002

Oqaluuserisassani immikkoortoq 50

Aquuteralaat atugaanerannut tunngasumik Naalakkersuisunut apeqqut.

(Lars-Karl Jensen).

 

 

Ataatsimiinnermik aqutsisoq: Daniel Skifte, Inatsisartut Siulittaasuat, Atassut.

 

 

Lars-Karl Jensen, Siumut.

Aquuteralaat 2-taktmotorinik taaneqartartut nunatsinni annertuumik atugaanerat takornartaanngilaq. Taakkualu atugaanerat pillugu niunnertut atuisunik pikkorissartitsisarnerat ukiuni kingullerni atugaaneq aamma iluarisimaarneqartarluni.

 

Paarlattuanilli takornataanngilaq aquuteralaat ilaasa Kalaallit Nunaata silaannaanut naleqquttunngorlugit sananeqaateqannginnerat pissutigalugu atuisunit navialissutaasarnerat.

 

Aquuteralaat ilaqarput atuisut naallutigisartagaannik imarluttumi angalatilluni unittooriataartartunik allaat aallarteqinnissaat ajornarluinnalersartunik.

 

Apeqqutiginiarpara tamakkua naalluutigineqartartut aaqqiivigineqarnissaat suliniutigalugu iliuuseqartoqartarnersoq ullumikkullu iliuuseqartoqarsimanngippat ajornartorsiutaasut pillugit Naalakkersuisut qanoq iliuuseqalersaarnersut.

 

Taamatuttaaq ilanngullugu oqaatigeriissavara aquuteralannut 2-taktmotorinik maannakkut atugaasunut taarsiullugit motorit 4-taktiusut atugaalereersut issittumi allartikkuminaaqisut aaqqiivigineqarnissaat atuisunut annertunerusumik kissaatiginartinneqarmata. Tassami 4-taktmotorit ukiut marlussuit qaangiuppata pinngitsaaliisumik atugaalersussaapput motorit taakku issittumut naleqqussarnissaat anguniarlugu Naalakkersuisut iliuuseqalersaarnersut ilanngullugu apeqquteqaatigissavara.

 

Daniel Skifte, Inatsisartut Siulittaasuat, Atassut.

Lars-Karl Jenseni qutsavigaarput. Maannakkut akissuteqassaaq Naalakkersuisunut ilaasortaq Hans Enoksen, Siumut.

 

Hans Enoksen, Aalisarnermut, Piniarnermut Nunaqarfinnullu Naalakkersuisoq,, Siumut.

Inatsisartunut ilaasortaq Lars-Karl Jenseni aquuteralaat pillugit imatut apeqquteqartoq Naalakkersuisullu sinnerlugit apeqquteqaat akissuteqarfigissavara.

 

Inatsisartut ukioq manna upernaakkut ataatsimiinneranni qulaani pineqartoq pillugu Naalakkersuisunut apeqquteqaateqarputit. Maani Naalakkersuisoqarfinniit akisassanngortinneqartumik. Apeqquteqaatigivat 4-taktinik taaneqartartut nunatsinnilu annermi ukiumi aallartikkuminaannertik pillugu maallatigineqartartut pillugit Naalakkersuisut qanoq iliuuseqalersaarnersut. Aammattaaq apeqquteqatigalugu motorit 4-taktinik taaneqartartut ukiut marlussuit qaangiuppata pinngitsaaliissummik atugaalertussat nunatsinnut naleqqussarnissaat pillugu Naalakkersuisut qanoq iliuuseqalersaarnersut.

 

Ulluinnarni annermik namminersortunik suliffiutilinnik aquuteralaat tuniniarneqartarput taakkuullutillu aserorsimasunik isumannaallisaanermillu normulluunniit tunngasunik suliarinnittartuusut.

 

Nunatsinni aquuteralannut atugaanerpaanut tuniniaanermut immikkoortortaqarfiit qallunaat nunaaneersut nalunaaruteqarput aquuteralannut 4 takt-inik taaneqartartunut sulilu maannamut nutaajoqisunut nunatta pissusiinut naleqqussaanermi aaqqiinissamut pitsanngorsaatit suliarineqaleruttortut. Taamaattumik atuisut tuniniaasullu iliuuseriliigaat pitsaasutut isigaarput.

 

Ukiup 2006-ip aallartinneraniik Amerikami aquteralaat 4taktit kisimik tuniniaqqusaalertussaasut nalunaarutigineqarpoq. Nunalu taanna nunarsuarmi aquuteralannik amerlanerpaanik tunisiffiusartuummat naatsorsuutigineqarpoq tuniniaasartut 4-taktiinarnik tuniniaasalissasut, tamannalu nunatsinnut tuniluutinngitsoornavianngitsoq.

 

Taamaattumik qulaani taaneqareersut saniatigut annertunerusumik Naalakkersuisut iliuuseqalersaanngillat. Neriuutigalugu akissuteqaat paasissutissiisimassasoq. Qujanaq.

 

Daniel Skifte, Inatsisartut Siulittaasuat, Atassut.

Aalisarnermik naalakkersuisumut qujavugut. Taavalu oqaaseqassaaq maannakkut Lars-Karl Jensen naatsuararsuarmik.

 

Lars-Karl Jensen, Siumut.

Aap, tassa uani paasisinnaavara ajunaarutaasarsimapput ajoquteqarneri pillugit iliuueqarfigineqarusunngitsut, kisianni tamanna uanga akueriinnarusunngilara arlaatigut periarfissat atorlugit ingerlateqqikkumaarakku.

 

Peqqutigalugu aquuteralaat annertoorujussuarmik nunatsinni atugaapput. Niuertut maalaarfigineqarsinnaapput imaaluunniit aamma atuisartut, kisianni taakkununnga maalaarfigigaluaraanni nioqqutissaq nunatsinnut akuerinerlugu eqqunneqarsimappat qanoq ilioruminaattua attuilluni. Tamaattumik atuisut illersorniarnissaat aallaavigalugu aamma aquuteralaat immaqa imartatsinnut silaannatsinnullu naleqqunnerusunik inerisaaffigineqarnissaat biilit sermersuarmi misiligaaffigineqarnittuulli aamma ilusilimmik aaqqissuunneqarsinnaassaaq Naalakkersuisunit piumassusilinnik. Qujanaq.

 

Daniel Skifte, Inatsisartut Siulittaasuat, Atassut.