Oqaluuserisassani immikkoortoq 58 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq sisamaat, marlunngorneq 14. maj 2002, nal. 14:56
Qujanaq.
Kalaallit inuiattut inatsisitigut inissisimanera pillugu apeqquteqaat
aallaavigalugu oqallinnissami siunnersuut imannak qulequtalik, nunarput suli
nunasiaava?
Tassani
siunnersuuteqarninni ilaatigut naalagaaffiit peqatigiit nuna tamat kattuffissuat
taanna naqqiuteqarfigilaarlugu imannak saqqummiissaanga.
Naalagaaffiit
peqatigiit aaliangersagai ilaatigullu aamma Danmarkip naalagaaffiata
atuuttussanngortissimasai toqqammavigalugit 1953-imi Danmarki tunngaviusumik
inatsisaata attuuttussaanngortinnerani, uppernarsisinneqarpoq Danmarkip
naalagaaffiata nammineerluni aaliangersakkat atuuttussanngortinnikuusani
unioqqutissimagai.
Ilaatigut
nunat tamat naalagaaffiit peqatigiiffiata ataatsimeersuarnerani aaliangersagaq,
resolution 5 41 toqqammavigalugu, tamanna atuarneqarsinnaavoq ilisimatuup
Gudmundur Alfredssonip inatsisini doktorinngorniutaani, Greenland and the law of
political the colonisation, kalaallisuunngorlugu Kalaallit Nunaat potikkikkullu
nunasiaataajunnaarsitaanermut inatsit.
Unioqqutitsinerlu
Danmarkip naalagaaffiata nammineerluni nalunnginnamiuk, tamanna tunngavigalugu
naalgaaffiit peqatigiit allaffigisimallugu Kalaallit Nunaannigooq nunap
inoqqaaverummat, danskinik akusaasimanerup kingunerisaanik Kalaallit
Nunaaniittut danskisut isigineqartariaqalersimammata, naalagaaffiit peqatigiit
aalajangersagaat Danmarkillu atuuttussanngortissimasaa tunngavigalugu
Kalaallit Nunaannik taasisitsisoqartariaarussimasoq.
Paasissutissat
tamakku allarpassuillu uppernarsaatitallit atuarneqarsinnaapput ilisimatuup
Gumundur Alfredssonip doktorinngorniutaani. Havardip ilisimatusarfissuata
inatsisileriffiani 1982-imeersumi.
Tamakkulu
uppernarsaatip sumulluunniit attuumassuteqanngitsumik suliarineqarsimasut,
uagut kalaallit nalinginnaasumik naalagaaffeqatigiinnermut
isiginnittaaseqarnitsinnut sakkortuumik sajuppillatsitsimmata,
qassupiinnarlugit qaangiinnarsinnaanngilagut.
Tassami
aamma nalunnginneqartutuut ukiamut aamma namminersorneq pillugu
isumalioqatigiissitap isumaliutissiissutaa Inatsisartuni
oqaluuserisussaavarput.
Uumallu
uppernarsaatip uagutsinnut nutaajusup aaliangiinissatsinnut
pingaaruteqarluinnartoq inissisimanera pissutigalugu, isumaliuutissiissutit
saqqummiunnissaa sioqqullugu isummerfigereerneqartariaqarpoq.
Inatsisartunk
aammalu minnerunngitsumik inuiaqatigiinnit.
Aammami
naalagaaffiit peqatigiit aaliangersagaat malillugit 50´-ikkunni amigartumik
periarfissinneqarsimagutta, taava maannangaaq periarfissaq taamanili
periarfissiissutaasimagaluartoq periarfissiissutaasimassagaluartoq
ilanngunneqartariaqassaaq, tassungalu tassalu nunasiaajunnaarluta Danmarkimiit
avissaavinnissaq.
Tamakkuli
pilersinnagit aamma paaserusunnarpoq ilaatigut aamma paasinarmat, Inatsisartut
minnerunngitsumillu Naalakkersuisut ilaasa paasissutissat uku, inuiattut
naleqassutsitsinnut ataqqinassutsitsinnullu pingaaruteqarluinnartut
ilisimaarigaluarlugit, sooq tamanut ingerlateqqissimannginneraat paasissallugu.
Paasissutissammi
oqaluttuarisaanerup manna tikillugu allanneqarsimaneranik
allannguilluinnartuummata, uanga inuttut pisussaaffittut isigilluinnarakku
kinaluunniit paasisutissamik taamaattunik piginnittoq inuiaqatigiittut
ingerlatseqqittariaqartoq.
Taamatullu
pisimasoqarsimannginnera paasissutissat qulaaniittut tunngavigalugit,
isorinarluinnartutut isigisariaqarpoq, nassuiaammillu
tunniussisoqartariaqarluni.
Annertunerusumik
doktorinngorniutaasoq tigulaariffigissanngilara, ilassutitummi siunnersuummi
ilaareermat, oqallinnermi tunngavilersuinermilu aammalumi nassuiaanermi
tikinneqarumaarmat.
Kisianni
pisariaqarluinnarpoq inuiaat aammalumi minnerunngitsumik Inatsisartut
isummerfigisariaqarneranik isumasioqatigiissitarsuup isumaliuutissiissutaanik
isumminnginnitsinni.
Ilanngullugu
pisariaqarpoq aamma paasissutissat tassanilu aamma uppernarsaatit
naalagaaffiit peqatigiit aaliangersagaanut naapertuutinnersut
misissortissallugit. Tamannalu Inatsisartuni sakkortuumik Naalakkersuisunit
kaammattuutaasariaqarpoq, ilaatigut naalagaaffiit peqatigiiannut
saaffiginninnikkut piumasaqarnermik.
Tamassuma
kingorna naatsorsuutigineqartariaqarpoq inuit, inuiaat pisinnaatitaaffiani
eqqartuussivimmut akuerisaasumik ingerlatitseqqinnissaq nalilersussallugu.
Neriullunga
oqallinneq inerititaqarfiusoq pissarsiviusorlu inuiaqatigiinni
kinguneqarluarumaartoq. Qujanaq.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tulliulluni
akissuteqassaaq Naalakkersuisut siulittaasuat
Jonathan
Motzfeldt, Naalakkersuisut Siulittaasuat, Siumut.
Inuit
uattut isumallit allat amerlaqisut peqatigalugit qinikkatut sulineq
iserfiginiarlugu, aammalu Kalaallit Nunaata inuiaallu kalaallit
akuerineqarnissaat sorsuutiginiarlugit aalajangerama pissutigaara, paasigakku
soriarsinnaanngitsutut qatsussisimasutullu misigineq iliuuseqarnermik
taarserneqartariaqartoq.
Pereersimasummi
misissornissaat eqqunngitsumillu pineqarsimasutut misigineq,
naammagiinnarsinnaasimanngilakka.
Iliuuseqarattalumi
aamma angusaqangaarpugut.
Nunarput
uanga paasinnissinnaassusera pitsaanerpaaq naapertorlugu, nunasiaanngilaq.
Kalaallit inuiaapput Kalaallillu Nunaat nunaavoq. Ukiualuit ingerlanerinnaani
nunasiaanerminit annertuumik, maannamut namminersoornerulersimasoq.
Inuiaat
kalaallit qanoq inissisimanerat inatsisilerituunik, inuiannik misissuisunit
imaluunniit kikkunnit kingoqqisuunitsinnik ilisimatuutut oqallinnermit
aaliangerneqassanngilaq. Uagummi inuiattut immitsinnut isigaagut.
Inuiaavugullumi.
Soorunami
siunnersuuteqartup misigissutsimigut ataqqinassutsimigullu
eqqunngitsuliorfigineqarsimasutut misigisimammat, paasisinnaalluarpara.
Kisiannili
nunatta siunissaa silarsuaq piviusoq ullumi isigisarput aallaavigalugu
sukumiisumik silatusaarlutalu isumaliorluarnitsigut aaliangersagassaraarput.
Qanorluunniit
eqqortuliornerusutut naapertuilluartuiliornerusutullu isikkoqaraluarpat,
isumaqarpunga nunarput inuiaallu kalaallit iluaqutissiornavianngikkigut,
Danmarki ukiut 50-it matuma siorna qanoq iliuuserisimasaa pillugit. Inatsisit
inuunermi ileqqussat aammalu pissuserissaarneq tunngavigalugit
eqqartuunniaraluarutsigu.
Silarsuaq
Danmarki minnerunngitsumillu Kalaallit Nunaat ukuit 50-it matuma siorna
allaalluinnarsimapput.
Danmarkip
nunarput pillugu nalaagaaffinni peqatigiiffinni iliuuserisimasaat
assigiinngitsut tamanut ammasumik eqqartorneqartarsimapput. Soorluttaaq
nunatta namminersornerulernissaa pillugu isumaliutissiissummi normu 837
1978-imi tamanna sammineqarsimasoq.
Kinguaariillu
pinngnuartuarmata oqaluttuarisaaneq aammalu nunatta sorsunneersuup kingorna,
oqaluttuassartaa pillugu ilisimannittut ikiliartornerat
avaqqunneqarsinnaanngilaq.
Oqaluttuarisaanerli
pingaaruteqarpoq oqaluttuarineqartariaqarporlumi kingornussisussatsinnut
eqqaasitsissiissusitaalluni pisinnaatitaaffiit akisussaaffiillu, isumaminnik
takkunneq ajormata. Pisinnaatitaaffigilersimasagut nunattalu akuerineqarnera
aatsaat ilungersungaarnikkut pisinnaasimapput. Soorluttaaq anguniakkat nutaat
aatsaat ilungersorluni angusaqarfigineqarsinnaasut.
Oqaluttuarisaanerlu
uniffigiinnassangilarput. Oqaluttuarisaanermi pisimasut ajunngitsut
ajortulluunniit siumut isiginerput, kiisalu uatsinnut sullinniarluta
aqqutissarsiornissatsinnut piumassuserput unitsissanngilaat.
Pereersut
allanngortinneqarsinnaanngillat. Taamaallaalli oqaluttuarineqarsinnaapput
nassuiarneqarsinnaallutillu.
Siunissarpulli
sunniuteqarfigisinnaallugulu ilusilersorsinnaavarput.
Isumaqarpungalu
nunarput inuiattullu immitsinnut iluaqutissarsiornerussasugut nukigut tassunga
atorutsigit.
Sumut
ingerlassanerluta nammineq aaliangigassaraarput.
Maani
Inatsisartuni oqallisigiuartarparput inuiaqatigiiusugut qanoq
aaqqissuutissanersugut. Aamma oqallinneq pisarpoq partiini kommuneni
tusagassiorfitsigut soqutigisaqatigiilluunniit soorunalumi aamma inuit allat
ulluinnarni naapittarnerini.
Oqallinnerillu
ingerlaavarput taakku aallaavigalugit namminersorneq pillugu
isumalioqatigiissitat pilersissimavagut, taakkulu nunatta namminersornerata
ineriartortinneqarneranut periarfissat pillugit aamma isumaliuutissiissummik
saqqummiussaqarumaarput.
Aqqut
sunaluunniit toqqaraluarutsigu angusat isummaminnik takkunnavianngillat.
Angusaqarumalluta ilungersortariaqarpugut aammalu akornatsinni avatitsinnullu
amerlaqisunik isumaqatigiinniartassaagut. Kiisalu aporfeqartarumaarpugut aamma
aporfeqartaqaagut kisianni qaangerniartariaqarpagut.
Nunatta
nalaagaaffimmi inatsisitigut inuiaallu akornanni inatsisitigut inissisimanera
pillugu, allaaserisat qassiit atuartarsimavakka.
Akissutit
nassuitsut qaqutigooqaat.
Naalagaaffiit
peqatigiit angerfigeqatigiissutaat inatsisaanngilaq. Soorlu tamanna maani
Inatsisartni ilisimagipput.
Naalagaaffiit
peqatigiit angerfigeqatigiissutaat 1946-meersoq nunarsuarmioqatigiit isumaanik
naaperiarfissaqartitsinermut ersiutaavoq. Taanna nunani amerlaqisunit aammalu
assigiinngeqisunit soqutigisaqartunit akuersissutigineqarsinnaavoq.
Tamannalu
ilaatigut erserpoq kapitali 11-mi tassinimi naalagaaffiit peqatigiit nunallu
ilaasortaasut piginnaatitaaffiisa agguataarneri. Siammaseqisumik
ersernerloqisumillu aaliangersarneqarsimammata.
Nunat
tamalaat suliniaqatigiiffii pillugit paasinnittaaseq qangaanersoq
naalagaaffiit namminersortuulluinnarnerannik aallaaveqarpoq. Tassalu imaappoq
naalagaaffiit kisimik inuiaat pillugit inatsisitigut
pisussaaffilerneqarsinnaasut, aatsaat akuersigunik.
Taamaammallu
nunat tamalaat suleqatigiiffii naalagaaffinnik pituttuisumik
aalajangiisinnaassuseqanngillat. Tamanna nunat tamalaat suleqatigiiffiisa
pilersinneqarnissaa pillugu, naalagaaffiit isumaqatigiissutaanit
tunngaveqanngippat.
Naalagaafiit
peqatigiit angerfigeqatigiissutaani artikel 10 naapertorlugu
ataatsimeersuartut siunnersuutinik oqallisiginnittartussaapput
saqqummiussusartussaallutillu. Nunanut ilaasortaasut sanilliulluta
ataatsimeersuartut taamaallaat ilassuteqaatinik aaliangiisinnaapput. Aamma
taamaapput akuerisat aaliangersakkanik nalunaarutinillu taaneqartartut.
Aammattaaq
naalagaaffiit aaliangersakkanut akuersillutik taaseqataasimasut
ataatsimeersuartut aaliangersagaannut pituttorsimaneq ajorput.
Tamatumani
isiginiartariaqarpoq naalagaaffiit aaliangersakkanik akuersillutik
taaseqataasimasut, naatsorsuutigisimasinnaammassuk aaliangersakkanik
inatsisitigut pituttorneqartussaanatik.
Soqutigisatsinnik
sulissutiginninniartilluta nunat tamalaat inatsisitigut sunik
periarfissaqarnersugut ilisimassallugu pingaaruteqarpoq. Taamaammat
inatsisinik ilisimasaqartut allat naliilersuineri nalilersuinerillu siunissami
periarfissagut pillugit, Gudmundur Alfredssonip nalilersuinera aamma
soqutiginaateqarput.
Periarfissat
tamakku nunatta ineriartornera siunissaalu pillugit oqallinnermut aamma
toqqammavissaapput.
Qularinngilarali
nunatta inuiaallu kalaallit uatsinnut iluaqutissaq pitsaanerpaaq
toqqarsinnaagaat. Aammalumi nammineernerulerneq naligiiffiusumik
naalagaaffeqatigiinneq imaluunniit namminersulivinneq aqqutigalugit
nunatsinnut iluaqutissaq annerpaaq anguniarneqalissagaluarpat.
Taama
oqaaseqarlunga Inatsisartuni oqallinnissaq qilanaaraara.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Maannalu
partiit Kattusseqatigiit Attaviitsullu oqaaseqartussai oqaaseqassapput.
Siulliulluni oqaaseqassaaq Mikael Petersen, Siumut.
Mikael
Petersen, Siumup oqaaseqartuat.
Qujanaq.
Inatsisartunut ilaasortaq Per Rosing Petersen Siumut apeqquteqaat
aallaavigalugu oqallisissiamik saqqummiussivoq, kalaallit inuiaat
inatsisitigut inissisimanerat pillugu tamanna soorunalumi soqutigalugu
Siumumiit oqaaseqarfigissavarput.
Siunersuuteqartup
oqallisissiamini aallaavigaa ilisimatuup Gudmundur Alfredssonip inatsisini
doktorinngorniutigisimasaa, Kalaallit Nunaata naalakkersuinikkullu
ingerlatsinermi nunasiaataajunnaarsitaanerat tunngassuteqartoq.
Soorunami
Siumumiit uaguttaaq pingaartipparput, kalaallit inuiaat uagut
oqaluttuarisaanitta ingerlaatsittalu nunanit allamiunit soqutigineqarlutik,
isiginiarneqarlutillu misissuiffigineqartarnerat allaaserineqartarnerallu
malinnaaffigissallugu.
Soorunami
tamatta taamaattariaqaratta minnerunngitsumik naalakkersuinikkut suliaqartuni.
Taamaattumillu matumuuna oqallisissiakkut paasissutissat ilanngunneqartut
sukkulluunniit oqallinnermi atorneqarsinnaasut, qanorlu isumaqarneq
siunertaqarnerlu aallaavigalugit tunngavilersuutitut atorneqartarsinnaasut,
uaguttaaq tusaatissatut tigullugit qujaruppagut.
Kisianni
maanngangaaq Siumumiit oqaatigeriissavarput Naalakkersuisut siulittaasuata
akissuteqaammini ilanngullu oqaatigisaa isumaqatigilluinnaratsigu. Tassalu
inuiaat kalaallut qanoq inissisimanerat inatsisilerituunit inuiannik
misissuisunit imaluunniit kikkunnit kingoqqisuunitsinnit ilisimatuutut
oqallinnermi aaliangerneqassanngilaq.
Ilumut
Naalakkersuisut siulittaasuata oqarneratut uagummi inuiattut immitsinnut
isigaagut, inuiaavugullumi.
Inuiaqatigiit
siumut ingerlanitsinni kingumut qiviarneq, pisarsimasunillu nalilersuisarneq
iluaqutissaasunik atortarparput. Taamaaliortuartassallutalumi.
Nalunngilluinnarparput
massakkut ukiorpassuanngotuni danskinit qanimut suleqateqarluta
suleqateqarlutalu inooqateqarnitsinni, arlalippassuartigut eqqunngitsumik
pineqartutut misigisimasaratta.
Tamakkuli
pissutsinik ilaannikkut paatsooqatigiinnerpassuarnik aallaveqartutut, aamma
oqaatigineqarsinnaasunik ilaqartut nalunngilarput.
Siumumiit
matumuuna erseqqissumik oqaatigissavarput, inuiaat uagut oqaluttuarisaanermi
nutaanersumi ukiuni 281-inik Kalaallit Nunatta nunaata, Danmarkillu
ataqatigiilluta ingerlaqatigiissimanitsinni pisimasorpassuit nuannersut
nuanniitsullu, pissanganartorpassuillu tamaasa aqqusaarsimavagut.
Inuiaatmarluk
kalaallit danskillu immitsinnut qalligaluttuinnarfigisimallutigit, allaallumi
ataatsimut qileruterpassuit pilersinneqarfiannik kinguneqartumik. Tamannalumi
uagut Siumumit peqqissimissutissaqarfiginngilluinnarparput.
1953-imi
Kalaallit Nunatta inuiaallu kalaallit Danmarkimut aaliangersimasumik
ilaatinneqalersimanerput, taamanikkullu taamatut aaliangerniarnermi Danmarkimi
nunatsinnilu naalakkersuinikkut qinikkatut suliaqartut taamanikkut
pissusiviusut aallaavigalugit qanoq iliuuseqarsimanerat, uagut Siumumiit
ataqqilluinnarparput. Avoqqaarliutissaqarfiginagulu.
Taamanikkummi
qinikkatut akisussaasut nunatsinni pitsaanerpaasussatut isigisartik
naapertorlugu aaliangersaasimammata.
Soorluttaaq
aamma taamaattoq taamanikkut 1979-imi inuiaat kalaallit
namminersornerulerniarlutik aaliangermata.
Siumumi
pingaartittuarparput inuit tamarmik nunarsuarmioqatigiinni
nutaanngoriartorneranni, nunat tamalaat sutigut tamatigut minnerunngitsumik
niueqatigiinnikkut suleqatigiinnermi, imminnuut palligaluttuinnarfianni uagut
nunatsinni pissusitoqqat uninngaarfigiinnarnargit periarfissat
nutaanngortuartut atorluarlugit ingerlaqqittarnissarput.
Taamaattumik
pissusissamisoortumik isigaarput manna iluatsillugu Siumup anguniagaasa
pingaarnerit ilaat, ilanngullugit oqaatigilaassallugit.
Siumup
anguniarpai sulissutigissallugu nunatta namminersortunngornissaa,
sulissutigissallugu nunamik piginnittussaaneq, pilersikkumallugit nunatsinni
inuiaqatigiit kikkuunnut tamanut pitsaasumik atugassaqartitsisut,
naligiimmillu periarfissaqartitsisut.
Pilersikkumallugit
nunatsinni inuiaqatigiit naligiissitaaffiusut, apeqqutaatinnagit sumi
inunngorsimaneq, arnaaneq angutaanerluunniit, sumilluunniit upperisaqarneq.
Siumup
qularutiginngulluinnarpaa naalagaaffeqatigiinnerup iluani ataqqeqatigiilluni
suleqatigiinnikkut tamanna anguneqarsinnaassasoq.
Nunatsinni
namminersornerulersimanermut inatsit malillugu inuiaqatigiit immikkut ittut,
naalagaaffeqatigiinnerup iluani annertuumik politikkikkut imminnut
oqartussaaffigisinnaalerput.
Siumup
partiitut aallartikkamili nunasiaataajunnaarsaanermik politikkini
ingerlateqqininarpaa.
Siumup
sulissutigaa nunatta namminersortunngornissaa uagutsinnut tunngasutigut
nammineerluta akisussaaffigilernissarput.
Siumup
kissaatigaa uagut nunatta inui nammineerluta killilersugaanatalu, nunatta
soqutigisai pillugit nunanik isumaqatigiissuteqartalernissarput.
Siumup
kissaatigaa Danmarkip ammasumik naalagaaffeqatiginissaa, ataqqeqatigiinneq
peqatigiilluarnerlu tunngavigalugit suleqatigiinnikkut.
Siunissami
ungasippallaanngitsumi naalagaafeqatigiinneq allannguuteqarsinnaavoq. Siumut
isumaqarpoq inuiaqatigiit imminnut aaliangiuussisinnaatitaanerat
ataqqisariaqartoq, aammalu innuttaasut nunatsinnilu qinikkat namminneq
aaliangertariaqaraat, qanoq ingerlatseriaaseqarnissaq.
Naalagaaffeqatigiinnerullu siunissaa.
Pisinnaatitaaffeqarneq
kiffaanngissuseqarnermik kinguneqartarpoq. Naqisimaneqarneq ersiornerlu
qimallugit kisiannili aamma pisinnaatitaaffiit piumasarisarpaat
akisussaaffimmik tigusinissaq.
Inuiaqatigiit
nutaaliaasut atugarissaartut kikkut tamarmik kiffaanngissuseqarfigisaat
toqqissisimaffigisaallu, taamaallaat ineriartorsinnaassapput kikkut tamarmik
namminneq inuunerminnut, ilaquttaminnut, ikinngutiminnut, eqqaamiuminnut,
suleqatiminnullu inunnut ajornartorsiornerusunut akisussaaqataanermik
misigisimappata.
Inuiaqatigiinni
naqisimaneqanngitsuni tunngaviusussaapput naqisimaneqarani oqaaseqarsinnaaneq.
Politikkikkut suliaqarsinnaaneq aammalu akerliussutsimik takutitsisinnaaneq
suliumajunnaarsinnaanerlu. Periarfissanik nutaanik nammineerluni
ujartuisinnaaneq, nutaanik ilisimasaqalerneq paasisaqarnerulernerlu.
Naqisimaneqarani
nammineersinnaaneq naligiinnerlu imminnut akerleriinngillat. Akerlianilli
imminnut pisariaqarteqatigiipput. Naqisimaneqarani nammineersinnaassusivimmut
tunngaviummat kikkut tamarmik nammineersinnaassusertik atorluarumallugu
naligiimmi periarfissaqartinneqarnissaat.
Naligiinnerup
ilagaattaaq kikkut tamarmik naligiimmik ilinniarsinnaatitaasarnissaat
assassornikkut atuagarsornikkullu akissarsiat sumilu najugaqarneq
apeqqutaatinnagit. Aammalu nammineq piginnaasat aallaavigalugit
suliffeqarsinnaasariaqarluni.
Naligiinneq
demokratip tunngavigissavaa inuit tamarmik naligiimmik naleqassusiat
aallaavigalugu. Inuiaqatigiit aaqqissuuttariaqarpagut kikkut tamarmik
kissaatigisartik malillugu pisinnaasaminnik atuisinnaanngortillugit
ataatsumooqatigiinnerput mianeralugu.
Siumup
qulakkeerumavaa kikkut tamarmik peqataanissaat inuit tamatta
assigiinngissuseqarnerput nassuerutigalugu.
Taamannak
oqaaseqarluta Naalakkersuisut akissuteqaataat tusaatissatut tiguarput.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tulliulluni
oqaaseqassooq Jakob Sivertsen, Atassut.
Jakob
Sivertsen, Atassutip oqaaseqartua.
Qujanaq.
Kalaallit inuiattut inatsisitigut inissisimanerat pillugu apeqquteqaat
aallaavigalugu oqallinnissamik siunnersuut Per Rosing-Petersenip
saqqummiussaanut Atassummit imatut oqaaseqarniarpugut.
Kalaallit
Nunatsinni politikkikkut nammineeriartornermi ineriartorsimaneq inuiattut
inatsisitigut inissisimanitsinnut pingaaruteqarmat matumuuna Atassummit
erseqqissaassuteqalaassaagut.
Nunatsinni
nammineeriartorneq 1911-mi landsrådet pilersinneratigut politikkikkut
nammineerusussuseqarneq malunnartumik ilaasortanit atorluarneqarluni
sunniuteqarsinnaaneq pingaartinneqarsimavoq. Naak landsrådet nammineerlutik
inatsisiliorsinnaanngikkaluartik ataatsimiinnerni isumaqatigiissutertik
qallunaat Naalakkersuisuinut ingerlateqqissinnaanngorlugit
periarfissinneqarnertik assut pingaartillugu atortuarsimavaat.
Naak
piumasaqaatit tamarmik akuerineqartarsimanngikkaluartut. Taamatullu aamma
Kalaallit Nunarput pillugu ataatsimiititaliarsuaq 1948-mi pilersinneqartoq
kalaallit qinigaannik tassa landsrådenik peqataaffigineqartoq assut qallunaat
Naalakkersuisuinit soqutigineqarluni piumasaqaatigineqartunit
tusaaniarneqartarsimapput.
Soorlu
Kalaallit Nunarput pillugu ataatsimiititaliarsuup 1948-meersup 1950-mi
isumaliutissiissutaani kalaallit aallartitaasa illoqarnerup
pitsaanerulersinneqarnissaanik kissaatigisimasaat qallunnaat
Naalakkersuisuinit assut pingaartinneqarluni tusaaniarneqarsimavoq. Illut
issunik ujaqqanillu suliarineqarsimasut peqqinnissakkut
naleqquttuunnginnerannik kalaallit ilaasortaatitaasa uparuartuutaat
paasilluarneqarlutik inissaqarniarnikkut suliniarneq pimoorullugu
pilersaarusiorneqarluni aallartinneqarsimavoq.
Kalaallit
Nunaat pillugu ataatsimiititaliarsuup isumaliutissiissutaa tunngavigalugu
danskit Naalakkersuisui kalaallit ilaasortaatitaasa kissaatigisaat
tusaaniarneqaleriartuinnarsimapput soorlu ilinniartitaanikkut
suliuniuteqarnerup pitsanngorsarneratigut kalaallit ima
siuariartortissinnaagaat allaat aningaasaqarnikkut isumaginninnikkut
kulturikkullu kalaallit ulluinnarni inuunerminni atukkatik
allanngortinngikkaluarlugit danskinut naligiillutik ineriartortinneqarnissaat
pimoorullugu anguniarneqalersimalluni.
Tamatuma
kongorna 1950-mi 51-milu suliuniutit ingerlanneqalersimapput. Suliassaqarfinni
makkunani, kalaallit danskisullu naligiillutik ineriartortinneqarnissaat
siunertaralugu.
Kalaallit
Nunaanni suliassaqarfinni makkunani Kalaallit Nunaanni landsrådet kommunerådet
ilaalu ilanngullugit pisortat aningaasaqarnerat, ilageeqarnermut tunngasut,
ilinniartitaaneq peqqinnissaqarfik, Den Kongelige Grønlandske Handel KGH-mik
taaneqartartoq. Niuernermut tunngasut, kalaallit inussutissarsiornerannut
taarsigassarsiniartarfik ESU, pilersinneqarnera, BSU tassa Boligstøttemik
illutaarniarnermi taarsigassarsiniartarfik. Kalaallit nunaanni
eqqartuussisarneq pillugu inatsit kiisalu nioqqutissanik eqqussuinermik
akitsuusersuisarnerit pillugit inatsit 1951-mi danskit Naalakkersuisuisa
nunatsinnut naleqqussarlugit aningaasalersornissaat ilanngullugit akuerivaat.
Suliani
siuliini oqaatigisanni taamanikkut imaannaanngeqisumik Kalaallit Nunaat
pillugu ataatsimiititaliarsuarmi tassa Grønlandskommissionimi
taaneqartartumik kalaallit ilaasortaatitaat nersortarialimmik
tatigineqarluarlutillu suliaqarsimapput. Tamatumalu kinguneraa Kalaallit
Nunaata danskit inatsisaanni tunngaviusuni ilaatinneqalernera, tamannalu pivoq
1953-mi.
Tamatumalu
kinguneraa Kalaallit Nunaat danskit folketingeanni marlunnik
sinniisoqartitaalernera. Kalaallit danskit folketingeanni sinniisoqalernerat
assut sukkasuumik malunniussimavoq. Kalaallillu nunatsinni ineriartorneq
sukkasoorujussuarmik aallartinneqarsimalluni. Kalaallit danskit
folketinngianni ilaasortat siulliit nunatsinni politikkikkut eqeeriartornermut
assorsuaq sunniuteqarsimapput. Pingaartumik kalaallit inuiaassutsimikkut
qallunaanit assigiinngissuteqarnerat ilinniartitaanissamillu
pisariaqartitsinerat naalagaaffeqatigiinnerup iluani periarfissarititaasut
atorluarneqarnissaannik assut pingaartinneqarluni oqaatigineqartarsimasoq
sunniuteqarluartumik kinguneqarsimavoq.
Nunatsinni
politikkikkut eqeeriartorneq kalaallit qallunaat naalagaaffiata ataani
naligiimmik periarfissinneqarnerata kingorna 1970-kkut aallartinneranni tassa
1971-mi landsrådemi qinersinermi inuusuttut peqataasunnerannit annertuumik
takutitsiviuvoq. Mumisitsinermik aallaat taaneqarsinnaasumik.
Tassa
kalaallit inuusuttut arlallit landsrådetoqqanik taarsiillutik qinigaammata.
Tassalu qallunaat nunaanni inatsisit tunngaviusut nunatsinnut
atuutilernerannik ukiut 18-nit qaangiuttullu. Tassalu Kalaallit Nunaat
inersimasutut nammineersinnaalerluni periarfissinneqarnera eqqorluavillugu.
Tamatumalu kingorna kalaallit nammineerusussuseqarnerat kuuttut
unitsitassaajunnaarluni anguniarneqarnissaa aallartinneqarpoq.
Siullermik
Namminersornerulernissamik ataatsimiititaliarsuaq pilersinneqarpoq
puigunaaqisumillu majip aallaqqaataani 1979-mi Kalaallit Nunarput
Namminersornerulernissaanut inatsit ataqqinartorsuup dronninngip taamanikkut
landsrådemi siulittaasuusumut Lars Gemnitzimut tunniullugu.
1979-miit
ullumimut inatsisiliornerit peqqussusiornerit uagut nammineerluta
ilusilersorlugit aaqqissuussinnaalersimavagut. Kukkusimagaangatta
nammineerluta kukkunerit aaqqissuuttarlugit. Tamatigut inuiaqatigiinnut
pitsaanerusussaq anguniarlugu.
Namminersornerulernitsinniit
ukiut 20-t qaangiunneranni tassa 1999-mi Kalaallit Nunatsinni
Namminersornerulersimanitsinni killiffik aallaavigalugu ineriartornerup
periarfissarititaasa naleqqussarneqarnissaat anguniarlugit Kalaallit Nunatta
qallunaat naalagaaffiannit avissaarani namminiliivinnissamik
ataatsimiititaliornissaq Inatsisartunit tamanit akuerineqarsimavoq.
Maannamullu
ataatsimiititaliaq assigiinngitsorpassuarnik suliaqarsimavoq. Suliaasa
pingaaruteqartut ilaat ataaseq taasinnaavara. Tassalu nunatta
illersornissakkut inissisimanera siunissami sunik periarfissaqarsinnaaneranik
apeqqut aamma pingaartillugu periarfissaasinnaasunik sammineqartunut
ilaatinneqarsimalluni.
Kalaallit
Nunatsinni inuiattut inatsitigut danskit naalagaaffiata ataani
inissisimagaluarluta Atassummit oqaatigisariaqarparput inuiattut
immikkuullarinnerput ataqqineqarluni inatsisitigut danskit naalagaaffiannit
illersugaanerput iluaqutigalugu ineriartorneq 1953-miit danskit tunngaviusumik
inatsisaata ataanni pitsaasumik ullumimut ingerlasutut Atassummit
nalilersinnaagatsigu.
Aammalu
Inatsisartut ukiamut ataatsimiinnissaannut Namminiilivinnissaq pillugu
ataatsimiititaliap isumaliutissiissutaa assut Atassummit
isumaliutissiissutissaa assut Atassummit pissanngatigalugu utaqqigatigu.
Namminersornerulernitsinniit
alloriaqqinnissatsinnut sunik periarfissaqarnissatsinnik tikkuussiumaarnera
qularinngilluinnaratsigu. Taamaattumik oqaluuserisassamik saqqummiussaqartup
qulequtsiussaminik nunarput suli nunasiaavamik apeqqutigisaa Atassummit
naameerlugu akissavarput.
Nunasiaasimagutta
nammineerluta inatsisiliorsinnaanatalu peqqussusiorsinnaanngikkaluaratta.
Soorlumi Namminersornerulernissatta tungaanut nunatsinni landsrådet danskit
naalakkersuisuinut siunnersuisuuvinnartutut inissisimasimasut.
Aamma
Atassummit upperaarput nunatta namminiilivinnissaa angusinnaagipput.
Ullumikkut inuusuttortatta ilinniarluarnermikkut angusarisartagaat
uppernarsaataapput piumagutta angusaqarnissamut sapinngitsugut tamannalu
oqaannarluni anguneqarsinnaanngitsoq nalunngilarput. Ilinniarluarnitsigut
suliffinnik paarsilluarnitsigut pisussaaffimmik ataqqinninnitsigut
peqatigiillutalu anguniakkani angusaqarniartarnitsigut angusassaq
pitsaanerpaaq angusinnaallugu ilisimaarigatsigu.
Soorlumi
USA-mi præsidentiusimasoq ajoraluartumik anguniakkani pimooruteruttorlugit
toqutaasoq John F. Kennedy qineqqusaarluni oqarnikuusoq. Nunalli qanoq
iliornissaa utaqqissanngilarsi ilissiuna sulinissigununa
ineriartortinneqassasoq. Oqaatsit assortorneqarsinnaanngitsut.
Atassummit
isumaqarpugut nunatta namminiilivinnissaani siunnerfeqarnitsinni
nammineersinnaanerput atorluartariaqaripput allat uagutsinnut qanoq
iliornissaat utaqqiinnarnagu. Atsaat taamatut ingerlaaseqalerutta nunarput
asasarput allanit ikiorneqarani nammineersinnaanngussaaq.
Naggataagut
apeqquteqaammut saqqummiussaqartup Godmunddur Alfredssonip
doktorinngorniutaani danskinit naalagaaffeqateqarnitsinnut attuumassuteqartut
kalaallinit sajuppillatitsisimasut Atassummit qassiiliuutigissanngilagut.
Pereersut
kukkuneqarsimappata ilinniutigalugit iluarsiniassavagut pereersut
iluatinnaateqarsimappata ineriartornermi iluaqutigalugit atussagavagut.
Aatsaat taamaaliorutta ineriartornermi siunnerfitsinni ajunnginnerusussaq
angusinnaagatsigu.
Naggataagut
taalliortorsuatta ilaasa taalliaminik kalaallit ineriartornissaannik
siunissamut tikkuussisoq naggataarutigissavara issuarpara imatut
oqaaseqartalik."Taqilluni naamik ajornaveqaaq kalaallit siumut makigitsi
inuttut inuuneq piuminaqaaq saperasi isumaqaleritsi.@"
Taamatut
Atassummit apeqquteqaat oqaaseqarfigaarput. Naalakkersuisullu siulittaasuata
akissuteqaataa sukumiisoq akuersaarlugu. Qujanaq.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tulliulluni
oqaaseqassaaq Johan Lund-Olsen Inuit Ataqatigiit.
Johan
Lund-Olsen, Inuit Ataqatigiit oqaaseqartuat.
Qujanaq.
Inatsisartunut ilaasortap Per Rosing-Petersenip apeqquteqaat aallaavigalugu
oqallittoqarnissaanik siunnersuuteqarneranut atatillugu Inuit Ataqatigiit
imaattunik oqaaseqassaagut.
Danmark
naalagaaffiuvoq ataaseq ataasiusunik tunngaviusunik inatsiseqartoq. Ataatsimik
naalagaaffittut qullersaqartoq tassa kunngeqanngikkuni taava kunngeqarpoq
arnamik. Ataasiusunik naalakkersuisoqartoq.
Kisianni
ukiunik 50-usunik amerlanerusut kingulliit ingerlaneranni
naalagaaffeqatigiinneq Danmarkip aammalu Namminersorneruffiusut tassalu
Savalimmiut nunattalu akornanni pinngorsimavoq. Oqaaserli
naalagaaffeqatigiinneq ulloq manna tikillugu qanoq paasisariaqarnersoq
aalajangersimanani silaannarmi erfattutut suli ippoq.
Peqatigiinneq
nalinginnaasumik naalagaaffiit namminersortut qilersorsimanngitsullu akornanni
atorneqartaraluartoq taamaattoq nunatta Namminersorneruffiusup Savalimmiut
kiisalu danskit naalagaaffiata akornanni attaveqatigiinneq
naalagaaffeqatigiinnertut taagorneqarpoq.
Tamanna
isumaliulernarpoq eqqarsalersitsillunilu. Oqaatsit taakku taamaaginnartillugit
paasigutsigut taava ima nassuiartariaqannginnerput ilumut taakkunani
pineqartut tassaasut danskit savalimmiormiut aammalu kalaallit naalagaaffii.
Tassa
inuiaat pingasuusut aalajangersimasut suleqatigiilerniarlutik ataatsimut
naalagaaffimmik aaqqissuussillutik inuiaat naligiinnerat aallaavigalugu
pisussaaffeqatigiinnertalimmik ataatsimoorlutik.
Taamaanngilluinnarporli
tassami Namminersornerunermik aaqqissuussisimaneq maannamut atuuttoq
tunngaveqarpoq nunatta Namminersornerulernissaa pillugu isumaliutissiissummik
normu 837 1978-meersumik kalaallit inuiattut ullumikkut inissisimanitsinnik
imaattumik oqariartuuteqartumik.
Taanna
issuaaneruvoq aallartippunga, "Kalaallit Nunaannut Hjemmestyreqarnissaq
piuviusunngorsinnaanngitsoq inuiaat naalagaaffiilluunniit akornanni
isumaqatigiissummik atsiugaqarnikkut. Aatsaalli
piviusunngortinneqarsinnaalluni danskit inatsisaatigut folketingep
aalajangiisusaatitaanermik ilaanik erseqqinnerusumik killilikkamik
Hjemmestyremut nuutsivigisassaatigut.@" Issuaaneq naavoq.
Tassa
allatut oqaatigalugu imaappoq naalagaaffiit inatsisaat aallaavigalugu
Namminersornerullutik Oqartussat inatsisiliortuunerat aqutsisuunerallu tassa
tunngaveqarpoq folketingep inatsisiliortuusutut suliassanik tunniussineranik.
Taamaammallu inatsisiliortuusinnaatitaaneq aamma folketingemit
inatsisiliornikkut utertinneqarsinnaavoq imaluunniit
atorunnaarsinneqarsinnaalluni.
Namminersornerulerneq
pillugu inatsimmi atuuttumi aalajangersakkami siullermi tassa paragraf 1-mi
aamma ima allassimasoqarpoq. Issuaaneruvoq, "Kalaallit Nunaat immikkut
inuiaqatigiiffiuvoq danskit naalagaaffiata iluani.@" Issuaaneq naavoq.
Tassalu
imaappoq Namminersornerulerneq pillugu inatsisikkut nalagaaffiit peqatigiinni
paasinnittaaseq naapertorlugu inuiattut ulloq manna tikillugu suli
akuerineqanngilagut. Tassaatinneqaannarpugummi inuiaqatigiit
immikkooruteqartut.
Taamaammat
Naalakkersuisut Siulittaasuat oqaraluarmat kalaallit inuiaasugut immitsinnullu
inuiattut isigiuartugut Inuit Ataqatigiit tamanna eqqortuusorisinnaanngilarput.
Tassami danskit oqartussaasuisa maannamut akueriumanngittuarsinnarpaat
savalimmiormiut kalaallillu inuiattut akuerineqarnissaat inatsit tunngaviusoq
imaluunniit Namminersornerulersimanerput inatsit aqqutigalugu.
Inuiaassuserput
aap tarnikkut anersaakkullu qamuuna ilorlitsigut misigivarput pingaartillugulu.
Kisiannili inatsisitigut tamanna maannamut oqaatigeriikkattut akuerisaanngilaq.
Tassalu qiterititassarput inatsisitigut inuiattut akuerisaanissarput.
Taamaattuminguna
Inuit Ataqatigiinnut pingaaruteqartoq ilisimassallugu nunatta nunat tamalaat
akornanni kinaassuseqarnissaminik kissaataa aatsaat anguneqarsinnaammat
silarsuarmioqatigiinnut suaaruteqarnikkut inuiaqatigiit kalaallit imminnut
inuiattut isigiuarsimasut naalagaaffiit peqatigiit inuiannik
paasinnittarneratulli aammalu anguniartuartariaqaratsigu namminerisatsinnik
inatsisinik tunngaviusunik peqalernissarput.
Kalaallit
inuiattut misigissuseqarpaluttumik pigisatsitut aamma taasinnaasatsinnik
danskinik attartugaralugulusooq maannakkutut misigisarfiginngisatsinnik.
Inatsimmi
tunngaviusoq 1953-meersoq nunatsinnut atortussanngortinneqarnera naalagaaffiit
peqatigiit aalajangersagaat maleqqissaaarlugit aamma pisimanngitsoq ullumikkut
nalunngilereerparput. Qujanartumik Namminersorneq pillugu
isumalioqatigiissitap ataanni suleqatigiissitap inatsisinik tunngaviusunik
inatsisinillu inuiannut tamanut tunngassuteqartumik suliaqartitap ukioq manna
februarimi maani Nuummi isumasioqatigiissitsisimanera aqqutigalugu.
Inuiaat
kalaallit naalagaaffiit peqatigiit angerfigeqatigiissutaat malillugu
kiffaanngissuteqartitaallutik taasinermikkut qinigassanik arlariiannik 1953-mi
1979-milu toqqagassinneqarsimanngissaannarput.
1952-mimi
landsrådetoqaasimasoq taamaallaat isumasiorneqatsiaannarsimavoq. Aamma naak
Avanersuarmiut nunattalu kangiarmiut tassalu Tunumiut taamani landsrådemi
aamma sinniisuutitaqanngitsut.
Periuseq
tamanna immini isornartulerujussuusoq Inuit Ataqatigiit
isumaqarfigiuarsimavarput. Taamaammalluimiuna Inuit Ataqatigiit
Namminersornerulernissarput 1979-mi eqqunniarneqartussanngormat aamma
naaggaqqusisugut tassuunakkummi inuiattut inatsisitigut akuerineqarnissarput
anguniarneqanngilaq. Soorluli aamma 1953-mi taamatorluinnaq aamma pisoqartoq.
Inuit
Ataqatigiit neriuutigivarput ullumikkut pisariaqartumik oqallinnissarput manna
misigissutsit aallaavigivallaarnagit ingerlanneqassasoq. Akerlianilli
siunertaraqartumik Naalakkersuinikkullu ingerlariaqqinnissamik
tikkuussiffiusumik tunaartaqartinneqassasoq.
Sumut
ingerlassasugut nammineq aalajangigassarigipput Naalakkersuisut Siulittaasuata
siunnersuuteqartumut akissuteqaammini oqaatigivaa. Inuit Ataqatigiit tamanna
isumaqatigilluinnarparput. Kisiannili isumaqanngilluinnarpugut Danmarkimi
attaveqarnitsinnik pissutsit ullumikkutut ittut attatiinnarneqarsinnaasut.
Tamanna
oqaluuserisatta siuliani tassalu illersornissaq pillugu 1951-mi danskit
amerikamiullu isumaqatigiissutaata allanngortinneqarnissaa pillugu
aalajangiiffigisassatut siunnersuutip oqaluuserineqarnerani aamma
uppernarsivarput.
Peqatigiit
naligiinngittuartillugit naalagaaffeqatigiittoqarsinnaanngilaq
ataatsimoortoqarsinnaananiluunniit. Inatsisinimmi naammaginartumik
tunngavissaqarluta immitsinnut oqaatigisinnaavugut inuiaasugut. Taamatut
inuiaagatta avammut pissutsit pillugit aalajangiinissamut
pisinnaatitaaffeqarpugut. Taamalu nunat tamalaat akornanni kinaassuseqarluta.
Imaanngilarli
Inuit Ataqatigiit akerleriinniarneq siunertarigatsigu. Paarlattuanimmi Danmark
tassaalissaaq akerleriinnermik siunertaqarsimasoq danskit Naalakkersuisuisa
isumaqatigiinniarnissani tullinnguuttuni inuiaat kalaallit namminneq inuiattut
aalajangiisinnaatitaanerat taamatullu inuiattut akueritinniarnissartik
akueriumassanngippassuk.
Ilumoortormi
aajuna tassa seqerngup ullaat tamaasa nuisarneratulli aamma taamak
ilumoortigaluni Namminersorneruneq pillugu inatsit nunatta Naalakkersuinikkut
inooqatigiinnikkullu ineriartorneranut akimmiffiuvoq. Soorluttaaq 1953-mi
inatsit tunngavisoq aperineqaqqaannguarnata uagutsinnut aamma
tunniunneqaannarsimasoq taamaattoq. Taakkunatigummi inuiattut
akuerineqanngisaannarpugut.
Taamaattumik
naggataarutaasumik oqaaseqarnitsinni Inuit Ataqatigiinniit piumasarissavarput
inuiaqatigiit kalaallit 1953-mi pisimasussaagaluartutut taasisinneqassasut
inuiaqatigiinnut apeqqutigineqassallutik naalagaaffittut
namminiilerusunnerluta. Imaluunniit free association tassa
kalaallisuunngortikkaanni ima nipeqartoq kiffaanngitsumik peqatigiinneq.
Imaluunniit naligiiffiusumik naalagaaffeqatigiinneq qilerneqassanersoq.
Imaluunniit periarfissat pingajuattut ullumikkutut Namminersornerulerneq
ingerlateqqinneqaannassanersoq.
Kingulleq
Inuit Ataqatigiit unnersiutiginngilaat inuiattummi taanna aqqutigalugu
akuerineqarsinnaanngilagut.
Taamatullu
oqaaseqarluta Inuit Ataqatigiit naatsorsuutigivarput siuliani oqaatigisagut
aamma namminersorneq pillugu isumalioqatigiissitanit
ingerlateqqinniarneqarumaartut.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tulliulluni
oqaaseqassaaq Anthon Frederiksen, Kattusseqatigiit.
Anthon
Frederiksen, Siulittaasup tulliata sisamaat, Kattusseqatigiit.
Kalaallit
inuiattut inatsisitigut inissisimanerat pillugu Inatsisartunut ilaasortap Per
Rosing-Petersenip apeqquteqaataa aallaavigalugu oqallinnitsamut siunnersuutaa
apeqquteqaataalu imaattoq "Nunarput suli nunasiaava?@"
Siullermik
Kattusseqatigiinniit oqaatigissavarput uagut Kattusseqatigiinni nunarput
nunasiatut takorluunnginnatsigu. Aammalu pissutsit piviusut inatsisillu
tunngaviusut tunngavigalugut aamma Namminersornerulerneq pillugu inatsit
tunngavigalugu minnerunngitsumillu uagut kalaallit timikkut anersaakkullu
nammineq misigisimasavut atukkagullu naapertorlugit nunasiaanermik
Namminersornerulernermut ikaarsaariarnermi ajortut ajunngitsullu aqqusaakkagut
imaannaanngitsut immaqalu inuiassuarnut allanut naleqqiulluta
ikaarsaariarnermi atupiluuinerpaatut oqaatigineqassagutta tupinnartuliatut
isiginngikkipput.
Tassami
naluneqanngitsutut uagut kalaallit tupinnartumik ineriartorneq sukkasooq
aqqusaarsimavarput ilaatigut ilatsinnut sutigut tamatigut atupiluuiffiusoq.
Taamaammat
Per Rosing-Petersenip apeqqutaa "Nunarput suli nunasiaava?"
Kattusseqatigiinniit naaggamik akissavarput. Taamatut akissuteqarnitsinnut
pissutaasut arlallit taagorneqarsinnaagalurput. Kisianni naatsumik
oqaatigalugu kalaallit siulitta atoreersimasaat uagullu aamma ilaatigut
nalaatavut tunngavigalugit Kattusseqatigiinniit isumaqarpugut ataqqinarluartut
siulitta naammattumik akiliussimagaatigut nunarput nunasiaajunnaarsillugu.
Taamatut
siulitta sapiissuseqarlutik suliniarluarsimanerat arlalinnik aamma suli
maannamut takussutissaqarpoq. Tassa kalaallit siulivut imaannaasimanngillat
saperuttaassusermik peqarlutik suliniarluarsimapput. Soorlu assersuutigalugu
1700-kkunni Iluliarmiut piniartut ikioqatigiillutik Sionip oqaluffia suli
ullumikkut napasoq orsuernermikkut namminneq akilerlugu pilersissimagaat.
Allarpassuillu
eqqartorneqarsinnaagaluartut maanna annerusumik eqqartornagit naatsumik
oqaatigiinnassavarput. Kalaallit Nunarput alianaatsorsuaq kisianni aamma
ilaanni alianaaginnarani allaat peqqarniitsorsuulluni inuuniarfigissallugu
ilaanni ilungersurnarsinnaasaraluartoq. Taamaattoq siulitta uagutsinnut
kingornutassanngortissimavaat tulluusimaarutigisariaqakkatsinnik.
Taamaattumik
Kattusseqatigiinniit nalornissutiginngilluinnarparput nunarput nunasiaanersoq
imaluunniit nunasiaannginnersoq eqqartussallugu. Tassami nunarput
qularutissaanngitsumik maanna nunasiaanngilaq.
1953-mi
junip tallimaata kingorna Danmarkip nammineq inatsisinik tunngaviusut
unioqqutissimanerai imaluunniit unioqqutissimannginnerai eqqartussallugit
ussernartorsiornaraluarput.
Kisianni
uagut Kattusseqatigiinnit isumaqarpugut ini manna atorlugu
eqqartuussisuusaarnissatsinnut immitsinnut pisinnaatissanngitsugut. Tassami
suliassat taamaattut allami suliarineqartussaammata.
Kisianni
siunnersuuteqartoq paasilluarparput isumaqatigilluinnarlugulu oqarmat
nunatsinnut aamma nunatta Danmarkillu akornanni pissutsit pillugit
paasissutissat inuiaqatigiinnut pingaaruteqarluinnartut Naalakkersuinikkut
qangali ilisimaneqaraluartut sooq inuiaqatigiinnut
ingerlateqqinneqarsimannginnerat isornarluinnarmat.
Tassami
paasissutissanik inuiaqatigiinnut ingerlatseqqissimannginneq isornaannarani
pisussaaffimmillu sumiginnaanertut Kattusseqatigiinniit nalilerumavarput.
Tamannalu pillugu Naalakkersuisut Inatsisartunut nassuiaateqartariaqartut
piumasaqaatigaarput.
Naalakkersuisut
Siulittaasuata akissuteqaataa allaanngilaq ima paasisariaqartoq, "Ullummi
qaangiuttut uteqqissanngillat taakkuli uummatinni katattussaanngillat."
Tassami
Kattusseqatigiinni Naalakkersuisut akissutigisaat allatut
nalilersinnaanngilagut. Naalakkersuisut soriarsinnaajunnaarsimasutut imminnut
nalunaarutigimmata.
Taamatut
naatsunnguamik oqaaseqarluta Inatsisartut Namminersorneq pillugu
isumalioqatigiissitaata ukiamut nalunaarummini saqqummiinissaanut
oqalliseqataanissatsinnut qilanaarluta saqqummiilaarpugut.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tulliulluni
oqaaseqassaaq Otto Steenholdt Attaviitsoq.
Otto
Steenholdt, Attaviitsup oqaaseqartua.
Soorunami
aamma oqallitsilluni ilaa qullaassilluni ilaannikkullu versinik
issuaanerujussuit pileraangata eqqarsaatigilerpara maani
siunnersuuteqartaratta oqallittaqalutalu. Ilaanneeriarluta anguniakkagut
eqqunngitsoortaratsigit. Issuarusunnassagaluarpoq siorna siuttukassaagaluup
arfermik qulaatsinera. Tamatigummi eqqorneq ajoratsigit.
Isertussanngilara
Nuummut aggersillugu oqalugiartitap Gudmunddur Alfredssonip oqalugiaataata
oqallisigineqarnerujussua eqqarsaatigisarsimagakku. Taamatut
oqalugiarfigineqarneq eqqarsaatissiisarpoq. Taamaattorli aamma piaarnerpaamik
oqaatigineqartoq atugassatut tigusinissaq aamma nangaanartoqartarluni.
Naalakkersuisut
Siulittaasua isumaqatigaara oqarmat. Inuiaat kalaallit qanoq inissisimanerat
inatsisilerituunik inuiannik misissuisunik imaluunniit kikkunnik
kingoqqisuunitsinnik ilisimatuutut oqallinnermit aalajangersarneqasanngilaq.
Ippassaq
tusatsiakkat inatsisiliorniarnitsinnut eqqunneqarmata oqallisigingaatsiaqaagut.
Aamma taamatorpiaq pisoqarsinnaasarpoq kinaluunniit eqqarsaatersortoq
tusaannavillugu isumai tamanut aallaavigilerlugit ingerlanialersinnaaneq.
Siunniutanukua
imaannaanngikkaangata paasisassat aamma imaannaanngitsut amerlaqisut
ataatsimut tapersertariaqalersartut saqqummiussaqarnialernermi atugassatut.
Ilaat kasiilerneqarumaarput ilaallu atorluarneqarumaarlutik.
Naalakkersuisut
Siulittaasuata akissutaa naammagigakku annerusumik oqaaseqartariaqanngilanga.
Oqaloqatigiissutissamilli saqqummiisup pisuutitsilluni oqaasii ilami aamma
akeqqusai assut alapernaalerpakka. Danmarkimit avissaavinnissaq
saqqummiussisup nukingiuttuarmagu oqaaseqarfigissanngilara.
Pilersaarutaami
piviusunngussaguni qanoq iliornikkut anguneqarsinnaanersoq nammineq
sakkortuumik pilersaarusiortarmagu. Pingaartumik ilaatigut Danmarkimit
tapiissutinik taamaatitsinikkut. Tamakkuli aamma atuartartunit
tusarnaartartunillu sammineqartareeqimmata maana uterfigisariaqanngilakka.
Pisuutitsinerliuna
imaannaanngitsoq sammilaarusukkiga. Hr. Per Rosing-Petersenip paaserusutaa
paasinareermanngooq Inatsisartut minnerunngitsumillu Naalakkersuisut ilaasa
paasissutissat inuiattut naleqassutsitsinnut ataqqinassutitsinnullu
pingaaruteqarluinnartut ilisimaarigaluarlugit sooq tamanut
ingerlateqqittarsimannginneraat paaserusummagu.
Nangipporlu
aamma pisussaaffittut isigilluinnarlugu kinaluunniit paasissutissanik
taamaattunik piginnittoq inuiaqatigiinnut ingerlatitseqqittariaqartoq
nassuiaammillu tunniussisariaqarluni.
Inatsisartut
aamma pisuutimmagit uanga oqallisigisap taagugaanik naak sivisuumik
ilaasortaasimagaluartillunga sunik isertuussisimanissara nalulluinnarpara.
Imaassinnaavoq Inatsisartunut ilaasortat allat isertugaqarsimasut
tusagaqarsimagaluartut isertuutaminnik. Taamaassasorinnginnakkuli
pisuutitsissut Naalakkersuisunut ingerlateqqittariaqarlugu. Naak
qularinngilluinnaraluarlugu uattulli akissutissaaleqitigissasut.
Aamma
matuma kingorna naatsorsuutigiumammagu inuiaat pisinnaatitaaffiannut
eqqartuussivimmut akuerisamut ingerlatitseqqilluni nalilersuinissaq
pissanngatigilluinnarlugu Naalakkersuisut tamatumunnga akissuteqarnissaat
akissutissaqassagunimmi assorsuaq pissanganartissavara.
Naggataatigut
oqaatigiinnartariaqarpara paatsuunganerujussuanni unikaallallunga
oqaatigiinnartariaqarpara siunnersuut eqqumiikajaajusoq tupaallatsitsinissamik
siunertaqarunartoq pisuutitsiniutaagaluartorlu uanga nammineq isumaga
najoqqutaralugu tunngavilersugaangitsumik allaat taasariaqarlugu.
Oqallissaarut
taamaatuinnaq oqaaseqarfigaara.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tulliulluni
oqaaseqaqqissaaq siunnersuuteqartoq. Per Rosing-Petersen, Siumut.
Per
Rosing-Petersen, siunnersuuteqartoq, Siumut.
Qujanaq.
Takornartaanngilluinnarpoq danskit naalagaaffiata aammalumi DOPIp
paasissutissanik nunatsinnut pingaaruteqartunik tunngassutilinnik
isertuunniartuarnera. Kisianni tupinnartuuvoq uku paasissutissat taamak
inuiannut uagutsinnut pingaaruteqartigisut inuiaqatigiinnut
apuunneqarsimanngimmata. Minnerunngitsumillu Naalakkersuisunit qangali
nalunnginneqanngippata pisussaaffeqarnermut misigittaassimaneq.
Pereersut
misilittakkat ajunngitsut ajortullu toqqammavigalugit siumut
isiginnittoqartarpoq. Taamaattumik ukua paasissutissat 1982-meersut eqqortut
danskinut suleqatigiinniarnitsinnut avaqqunniassagutsigit immitsinnut suli
annerusumik salloqittassuugut.
Paasissutissat
taamak naalaagaaffeqatigiinnermut isiginnittaaseqarnitsinnut
pingaaruteqarluinnartigisut isiginngitsuusaavinnarlugillu
tusaanngitsuusaaginnarsinnaanngilagut nalilersuinitsinni toqqammavittut
ilaatinneqartariaqarlutik.
Tamanna
pissutissaqarpoq pisariaqaleqqissanngippat ilisimatuup inuiaqatigiit
ingerlaasiinik ilisimasallip ataqqisaasup 1953-mi Danmarkip naalagaaffianut
toqqusassineqarluta ikkutaanitsinnut pisimasunut 1976-mi oqaasii imaattut
uteqqinneqassanngippata. Issuaavunga, "Kalaallit qinikkat ilaasa
aaqqissuussinermut nutaamut taamak akuersaartiginerat aallaavigalugu
apeqqajaananngitsuunngilaq ilumut paasilluarsimaneraat nunasiaanerup qanoq
allanngorsimanngitsiginera." Issuaaneq naavoq.
Kalaallit
Nunaat politikkikkullu nunasiaajunnaarsitsinermut inatsit pillugu allakkani
ilaatigut ima naggasiinermik ilanngussaqarpoq issuaaneq, "Tassa
ilanngutivitsitsineq uani pineqartoq 1953-mi Danmarkip nalagaaffianut
inatsisitigut oqaluttualiaannaavoq.@" Issuaaneq naavoq.
Tamakkualu
inerniliinerit ilumoortut sakkortuullu tunngaveqarput naalagaaffiit
peqatigiiffiata aalajangersagai aammalu Danmarkip atuuttussanngortinnikuusai.
Taamaattumik
aamma qanorluunniit uagut kalaallit upperalugu Namminersornerulernissarput
angerlugu taasisimagaluarutta ima inatsisitigut inernilerneqarpoq, issuaaneq,
"Kalaallit danskillu qinikkat atorfilittallu Namminersornerulerneq pillugu
ataatsimiititaliarsuarmi oqallittarneri killilimmik
namminersorsinnaatitaalernermik Namminersornerulermik taaneqartartumik 1979-mi
kinguneqartup nammineq aalajangiisinnaatitaanermik atuisimanertut
oqaatigineqarsinnaanngilluinnarput.@" Issuaaneq naavoq.
Taamaattumik
pinngitsoorani periarfissaq 50-kkunnili inuiaqatigiinnit kalaallinit
periarfissiissutigineqartussaagaluaq paasitsiniaareernikkut kalaallinit
periarfissiissutigineqartariaqartoq naalagaaffiit peqatigiit aalajangersagai
Danmarkillu atuuttussanngortinnikuusai eqquutitissagutsigit.
Taamaanngippat
Danmarkip inatsisaatsuliorsimanera uani uppernarsineqartoq uagut
Naalakkersuinikkut akuersaartutut isigineqaatigilissavarput. Uangalu inuttut
tamanna akuersaarsinnaanngilluinnarpara.
Aningasanimmi
aqutsinerup sakkuginiarneqarnera malunnarpoq Danmarkip uani atornerlukkaa
uagullu siorasaarinerit tamakku toqqammaviginagit kiffaanngissuseqarnerput
takutillugu inuiaanerput nittarsaallugu sulissutigisariaqarparput tamanna
aamma naalagaaffiit peqatigiiffissuanni pisortatigoortumik akueritillugu.
Ataqqinassusiiagaasimanerpummi
inuiattut akisuvallaarujussuaqaaq. Taamatummi allorianngikkutta immitsinnut
suli nungusaanermik kingeqartussaalluni.
Inatsisaatsuliorsimaneq
paasissutissanillu eqqunngitsunik inuiannut kalaallinut apuussisarsimaneq
akuersaarsinnaanngilarput illuatungaatigulli uagut nammineq aaqqinnissaa
suliniutigisariaqarparput tamannalu naammassillugu suliarinissaa
pisussaaffitta pingaarnersaasa ilaattut isigisariaqarparput.
Minnerunngitsumillu
inuiaqatigiinnut paasissutissanik tamakkuninnga apuussinissatsinnut
pisussaaffeqarluaannartutut pinngitsoorata aamma misigisariaqarpugut.
1920-kkunnili
inuiaqatigiit akornanni aammalu qinikkat akornanni pikialaarneq
eqeeriartulernerlu takussaalereersimavoq. Qularnanngitsumillu tamanna aamma
tunngaviusimassooq Danmarkip naalagaaffiata nunarput iperusunnagu
paasissutissanik eqqunngitsunik naalagaaffiit peqatigiinnut aammalu landsrådetoqqamut
apuussisarsimavoq. Minnerunngitsumik sorsunnersuup kinguninngua takuneqarmat
nunarput qanoq pingaartigisutut inissisimanera ersarinnerulersinneqarmat.
Taamanikkut pikialaarnerup nalaani landsrådetoqqat ilaasa ataqqinartup Josva Kleistip taalliaa eqqortoq issuaaffigilaassavara suli atuuttutut isigineqartariaqarmat, "Qamuuna ilumigut sapiissusilik qunussanani naalagaassusilik, kinaassava aamma sumiippa? Ajunngissavoq nuannissavoq nunatsinni taakku amerlippata. Kalaaliusugut misiliissasugut ilukkut tamatta sapiinnersugut inortutut ittaannaqaagut ileqqorsiat suli pigisat noqittutut soorlu pisarmasigut."
Taamatut
oqariarlunga partiit ataasiakkaat Kattusseqatigiillu oqaaseqaataannut
annikitsumik oqaaseqassuunga.
Tassa
ilaatigut una ataasiakkaanik ersarittutut isigineqarsinnaavoq partiit
ataasiakkaat minnerunngitsumik oqaatsit nassuerutigissavara Atassumminngaaniit
Jakob Sivertsenip aammalu ilaatigut Attaviitsup Otto Steenholdtip una
doktorinngorniutaani allaaserisimasaq Gudmuddur Alfredssonip naluara
atuarsimaneraat. Kisianni atuarsimagaluarunikku paasisimanngilaat. Taanna
nassuerutigisariaqarparsi.
Ukua
taamak paasissutissat silaannarmit tigusaanngillat. Uppernarsaatitaallinukua
naalagaaffiit peqatigiiffianinngaaniit pappilianik una sanaaq
dokterinngorniut. Taamaattumik ilaatigut tupigaara tamakkuninnga oqalunneq.
Taamatut
oqarlunga taava aamma ilaatigut eqqaamasariaqarpaa Jakob Sivertsen Atassut
sinnerlugu oqarami taamanikkut landsråde aalajangiitinneqarmat nunarput
tamarmik peqataatinneqanngilaq. Aamma qineqqusaarnermi taamanikkut landsrådemi
ilanngunneqarnikuunngilaq qineqqusaarutigineqarnikuunngilaq aamma
nalilersorneqassasoq landsrådemik, qanoq inuiaqatigiit kalaallit
aalajangersimassanersut.
Aammalu
taamanikkut naalagaaffiit peqatigiit aalajangersagaat toqqammavigalugu
periarfissinneqartussagaluarput kalaallit Inuit Ataqatigiit Johan Lund-Olsenip
tassai periarfissat pingasut taakkua. Tamakkualuunniit eqqarsaatigalugit
Atassumminngaaniit oqaaseqaateqartut oqaaseqataat qiviassagaanni allanngillat
aliikkusersuilluni oqaluttuarusaarnerit. Takusariaqarpassi pissutsit piviusut
qanoq ingerlasimanersut.
Tassani
aamma tamakku toqqammavigalugu Atassumminngaaniit apeqqutigineqartoq nunarput
suli nunasiaanersoq taannagooq naameerpaat. Ila atuarneq naammanngilaq aammali
paasinnittaaseqarneq pisariaqarpoq taannalu ersarippoq uani Atassutikkut
oqaaseqarneranni. Taamatut nassuerutigisariaqarparput.
Illuatungaatigut
oqartariaqarpunga Inuit Ataqatigiit sinnerlugit Johan Lund-Olsenip
oqaaseqaatai annertoorujussuarmik uani Godmunddur Alfredssonip paasissutissat
pissutsit piviusut toqqammavigalugit paasissutissani tunniussimasaani
aallaaveqartumik oqariartuuteqartut. Tassanilu aamma oqariartuutiginiagara
ersarilluinnaqqeqqissaartumik saqqummiuppaa.
Tassalu
namminersulerneq pillugu isumasioqatigiissitap isumaliutissiissutaata
saqqummiunnerani inuiaqatigiit kalaallit periarfissinneqartariaqartut
minnerpaamik pingasunik. Tassaniittariaqartorlu aamma nalagaaffittut
namminersulivinnissarput ilaatinneqartariaqartoq. Taannalu uanga
isumaqatigilluinnartutut nalilertariaqarpara. Tassunga..
oqaasissaqaraluaqalunga tassunga killiinnarpunga. Qujanaq.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tulliulluni
akissuteqaqqissaaq Naalakkersuisut Siulittaasuat.
Jonathan
Motzfeldt, Naalakkersuisut Siulittaasuat, Siumut.
Oqaaserineqartut
tamaasa immikkut oqaaseqarfigissanngilakka. Kisianni oqaatigissallugu
Naalakkersuisuni paasisinninnerput partiit ilaanninngaaniit tassa
Siumuminngaaniit aamma Atassumminngaaniit aammalu Naalakkersuinikkut
ineriartorsimanermik naliliinerput isumaqarpunga assut qanittumik tassuunakkut
paaseqatigiissinnaanerput tunngaveqartoq.
Taavalu
oqaatigissavara Inuit Ataqatigiit saqqummiussaat taamatullu aamma
saqqummiussinermini aatsaannguaq takisoorujussuarmik aamma saqqummiussisup
oqaatigeqqitaa. Godmunddur Alfredssonip ilisimatusaatigisimasai
soqutinarsinnarsinnaapput. Inuit kikkulluunniit ilisimatusartut apeqqutinik
aalajangersimasunik soqutiginaatilinnik suliaqarput. Kisianni
suliassarinngilarput uagut Naalakkersuisuni maani doktorafhandlinngit
suulluunniit nalilersussallugit eqqortumik allatulli iliorsimanersut. Tamarmik
oqaluttuarisaanermi kikkut qanorlu oqarsimanerannik aalajangiisimanerannillu
eqqortumik misissuinerupput.
Doktorip
tamanna doktorinngorniutini tamanna suliarineqartarpoq. Taamaattumillu aamma
opponentenik illuatungilerlutik allaatigisaat eqqornersut
eqqunnginnersulluunniit nalilersorneqartarput. Taakku oqallisissarinngilagut
maani.
Kisianni
inuiattut imminut isiginerpulluunniit aamma sivisoorujussuarmik
oqallisigineqarsinnaavoq. Nuannaralugu oqaatigissavarput 1951-mi Danmarkimit
statsministereqarfiup saqqummersippaa atuagannguaq Det grønlandske folk,
kalaallit inuiaat, taamak nutserneqarsinnaavoq.
Det grønlandske
folk, statsministeriap 1951-mi Godmunddur Alfredssonikkut oqaluuserisaasa
peruttulernerata nalaani saqqummersippaa. Taanna Inatsisartuni ammaanermi
ilaannikkut issuaavigisarpara ukiut qaangiuttut ingerlaneranni. Tassani
erseqqivissumik nalunaariartuummi allaatigineqarmat kalaallit inuiattut
isigineqarnitsinnut allaatiginninnerit. Taamanikkut ilinniarfissuarmi
siulittaasuusup ukiorpassuarni allaatigisimasaa.
Aamma
uanga tamakku isigaakka danskit unneqqarillutik aamma pisortarisaasa
saqqummiussassaminnut ilaatissimasaattut. Toqqorterisoqanngilaq amma
oqaatiginiarlugit kalaallit inuiattut isigineqarnerat. Aamma tamaalillugu
statsministereqarfiup saqqummiussamigut aamma peqasersorsimammagu.
Tamakkorpassuupput
taperserlugit, illersorlugit assortorlugit pilerutta tikinneqarsinnaasut.
Kisianni naatsumik oqaatigissavara Kattusseqatigiit saqqummiussaat
soqutiginaateqartinngilluinnarpara, soorunami nuannaraara nunasiaannginnatta.
Kisianni naliliineq ullummi qaangiuttut uteqqissanngillat ilaallu
ilanngullugit oqaaseqarfigissanngilara.
Otto
Steenholdtip oqaaserisaani Attaviitsup oqaaserisaani ataaseq nuannaralugu
aamma uterfigilaassavara. Naalakkersuinermik suliaqarnitsinni
ingerlatitassagut suut uninngatinneqartarsimanersut imaluunniit suut
ingerlatittariaqarsimanertut apeqqutigineqartutut nipilimmik aamma
oqaatigineqarmat aqaatigissavara Naalakkersuisut suliassanik Inatsisartunik
suliarineqartunik allanik paasissutissanik suliarissartagaat suulluunniit
tamarmik aammalu maannakkut ilisimateqatigiittarnissanut assigiinngitsunik
inatsiliornikkut periarfissat najoqqutarissagaanni inuit kikkulluunniit
paasissutissanik aamma namminneq paasiniaalaarnissaminnut periarfissaqartut
tamarmik ammaffigineqarput.
Taamaattumillu
tassuunakkut immikkut soqutigisat allaallu ilusilerlugit paasiniarneqassagunik
aamma nammineerluni paasiniagassat tassaniipput. Kisianni
Naalakkersuisutigoortumik paasissutissat sulianut tunngassuteqartut
soqutiginaateqartut aalajangiinissamullu pingaaruteqartut taakkuupput
saqqummersinneqarnissaanik aamma Naalakkersuisut suliassinneqarunik
naammassinninniartuusartut.
Uani
oqallinnissarput ukiamut malunnarpoq sumut kissarnersiut ingerlasoq maannakkut
malugisinnaagipput. Ukiamut nalunaarusiaq nammineerluta
ingerlaniarnissatsinnut tunngavissarput saqqummiunneqarpat malunnarpoq sumut
sammivilimmik oqallissinnaaneq tassani saqqummiivigineqartoq.
Inuit
Ataqatigiit allaat taasissutissanik tunngavigineqarsinnaasunik saqqummiinerat
aamma soqutiginarpoq. Kisianni aamma ilimananngilaq ullumikkut taakku
tunngavigalugit taamatut aalajangiinissamut saqqummiinissaq piffissaasoq.
Kisianni
aamma malunnarpoq eqqarsaatit sumut sammisut taamanikkut naapineqarumaartut.
Taamaattumik annertunerusumik oqaaseqarfigissanngilara
oqaaseqarfigeqqissanagulu una maannakkut saqqummiussarput naatsorsuutigigakku
ukiamut immikkut nunatta siunissamut ingerlanissaanut tunngavissat
eqqartorneqalerpata. Sivisunerusumik aammalu silinnerusumik
eqqartuisinnaajumaartugut.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tulliulluni
oqaaseqaqqissaaq Jakob Sivertsen Atassut. Tulliukkumaarpoq Johan Lund-Olsen
Inuit Ataqatigiit.
Jakob
Sivertsen, Atassutip oqaaseqartua.
Qujanaq.
Tassa siunnersuuteqartup maanga aliikkusersuiartortutut nalilermanga taanna
akuerisinnaanngilluinarpara aliikkusersuiartunngilagut. Aamma uanga maani
sulininni sidet 25-t doktorinngorniutit maanga ataatsimiissutigiartorlugit
maannganngilanga. Maaniuna pissutsit nunatsinni aaqqikkiartorlugit maani
ataatsimiittugut. Taamaattumik oqarnerit isumaqarpunga taanna
utertittariaqarit.
Aamma
suliffik manna ukiut 23-t ataqqillugu pingaartillugulu suliffigisimavara.
Taamaattumik aliikkusersuisartutut nalilersimassagumma neriuppunga taanna
oqqarlunnertut oqaatigisimassagit. Uagut siunnersuutinnut tunngasumik
Godmunddur Alfredssonip saqqummiussaa pisimassagaluarutsigu taava ullumikkut
uanga nammineq
doktorinngorniutinnik saqqummiussaqarsimassagaluarpunga. Kisianni taanna
piumasimanngilara.
Taamaattumik
uagut pingaartipparput politikkikkut nammineeriartornermi pisussaaffimmik
tigusiartuaarnermi kingumut qivialaarneq
isumaqarpunga aamma taanna pingaartuusoq ilaatigut aamma naggataatigut
erseqqissumik oqaatigivara nangeqqissavakka oqaatsikka. Peereersut
kukkuneqarsimappata ilinniutigalugi iluarsiniassavagut. Pereersut
iluatinnaateqarsimappata ineriartornermi iluaqutigalugi atussagut.
Aatsaat
taamaaliorutta ineriartornermi siunnerfitsinni ajunnginnerusussaq
angusinnaagatsigu. Taamaattumik doktorinngorniutit takkuttullu maani aamma
oqallisigisalissagutsit uanga soorunami soqutigisinnaavakka. Kisianni
tamatigut ineriartornermut ilaatigut naleqquttuunngitsunik imaqarsinnaapput.
Ataaserli siunnersuuteqartup oqaaserisaa oqaaseqarfiginngilara aamma maani oqaluttarfimmi inissaqartinnginnakku, imaattoq issuarusussavara. "Siunnersuutinnut naggataarutaasumik oqaaserisakka imaapput. Tamassumap kingorna naatsorsuutigineqartariaqarpoq inuit inuiaat pisinnaatitaaffiannut eqqartuussivimmut akuerisaasumut ingerlatseqqinnissaq nalilersussallugu."
Uanga
pisinnaatitaaffinut eqqartuussiartorlunga maani oqaluttarfik atorusunngilara.
Kisiannili siunnerfitsinnik pitsaanerpaamik angusaqarnissatsinnut maani
siunnersueqataassallunga. Qujanaq.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tulliulluni
oqaaseqaqqissaq Johan Lund-Olsen Inuit Ataqatigiit.
Johan
Lund-Olsen, Inuit Ataqatigiit oqaaseqartuat.
Qujanaq.
Tassa Naalakkersuisut Siulittaasuannut taavalu partiit assigiinngitsut aamma
oqaaseqaataannut uaguttaaq amma Inuit Ataqatigiinninngaanniit qujassaagut
soorunami oqallinneq manna pisariaqarpoq soorlu saqqummiussinitsinni taanna
aamma saqqummiukkipput.
Tassa
pisariaqavippoq taamatut oqalliseqarnissaq maani Inatsisartuni. Kisianni tassa
mianersoqqussutigerusussavarput aamma tassa misigissutsit
aallaavigivallaarnagit kissaatigivarput oqallinneq taamatut
ingerlassanngitsoq. Tassami akerlianik siunertaqartumik aammalu
Naalakkersuinikkut ingerlariaqqinnissamik tikkuussiffiusumik neriuppugut
oqallinneq manna ingerlariaqqinnissamik tikkuussiffiusumik
tunaartaqartinneqarumaassasoq.
Taamaammat
tassa naak aamma oqaluttoqaraluartoq tassa Naalakkersuisut
Siulittaasuanninngaaniit aammalu Siumut partiiata oqaaseqartuannit aammalu
kingulleq aatsaaginnaq oqaaseqartup tungaaninngaaniit tassa Jakob
Sivertseniminngaaniit tassa pisussaanngilagunngooq doktorinngorniutaasimasut
aqqutigalugit pasissutissat saqqummiussuunneqarsimasut maani
oqallisigissallutigit.
Ila
kisiannimi tassa aajuna oqaatiginiartariaqagarput, imaluunniit
akuerisariaqagarput. Paasissutissat tamakku pissarisarigaangatsigit
doktornngorniartuningaaneerpataluunniit imaluunniit
kinannguugaluartuminngaaniilluunniit doktoriunngikkaluartumilluunniit kisianni
paasissutissat pingaaruteqarsorigutsigit nunattalu siunissaanut aamma
aalajangiisuulluinnartumik naleqarpata taava Inatsisartut pisussaaffeqarpugut
taakkua piviusumik aammalu peqqissaartumik aamma suliarissallutigit.
Doktorinngorniuteqarsimasoq
Godmunddur Alfredsson taanna ilaatigut Otto Steenholdtimut
ilisimatitsissutigalugu oqaatigilaassavara aammalu ilisaritilaassallugu. Tassa
professor Godmunddur Alfredsson maani nunatsinni namminersorneq pillugu
isumalioqatigiissitat sulisinneqarneranni aamma peqataalluinnarluni
suleqataasuuvoq. Tassa eqqaamanialaartariaqarparsi Godmunddur Alfredssonip
Naalakkersuisut aammalu Inatsisartut ataatsimiititaliami pilersitaanni
maannamut ukiuni marlunngulersuni aamma tassa suleqataasuummat. Taammallu
tassuuna aamma paasissutissat aamma tassanngaaneersut tassaapput
Inatsisartunut aammalu Naalakkersuisunut apuunniarneqartut.
Tassanilu
aamma pingaaruteqartoq unaavoq Godmunddur Alfredssonip
doktorinngorniuteqarnermini tassa 1982-mi saqqummiussai taakkua soorunami
uissuumminartorujussuarnik imaqartiterput. Kisianniuna tassa pingaaruteqartoq
unaasoq uppernarsaatitassai tassalu paasissutissat doktorinngorniuteqarnemini
tunngavigisimasai taakkua pissarisiarineqaqqaarnissaat.
Tamannalu
tassa ataatsimiinnissaq manna sioqqullugu Inuit Ataqatigiinninngaaniit
ilungersuutigingaarsimavarput ilungersuutigingaarlugu allaat maani nunatsinni
pissarsiarisinnaasimannginatsigit paasissutissat uppernarsaatitassartai
Danmarkimi ilisimagatsigit Det kongelige bibliotekimi aammalu soorunami
danskit naalagaaffiata ministeriaqarfiini pigineqassammata tassa
noqqaassutigisimavagut perusullutigit. Aammalu taanna eqqarsaatigalugu
ataatsimiinneq aallartimmat tassa aprilip tallimaanni maani aallartikkatta
Inatsisartut Siulittaasoqarfiat qinnuigisimavarput paasissutissat tassa
naalagaaffiit peqatigiinnut 1946-minngaaniit 1954 ilanngullugu taakkua
paasissutissiissutigineqartarsimasut Inatsisartuninngaaniit
pissarsiariniaqqullugit.
Kisianni
tassa ajuusaarnaraluartumik Inatsisartut Siulittaasoqarfiannit
naliliisoqarsimavoq tamanna namminneq pisussaaffiginngikkaat. Kisianni tassa
Inuit Ataqatigiinninngaaniit uagut taakkua pissarsiariniarsimavagut.
Pissarsiarisimavagullu tassalu 1954-mi naalagaaffiit peqatigiinnut
nalunaarutigineqartarsimasut tassa eqikkaanerusut 1946-minngaaniit 1954
tikillugu nalunaarutigineqartarsimasut eqikkarneri naalisarnerilu.
Taakkua
tassa maanga nunatsinnut oqqussimavagut Inuit Ataqatigiinninngaanniit
suliuniuteqarnitsigut. Taakkulu tuluttuujummata taava
kalaallisuunngortinnissaat aamma isumagitinniarsimavarput taannalu
Inatsisartunut ilaasortanut maaniittunut Naalakkersuisunullu aamma
agguaanneqareernikuupput. Tassanilu tassa paasissutissat uissuumminartut
arlallit naammattuugassaapput.
Aammalu
tassa tassa taakkuupput uppernarsaataasut taamani Danmarkip FN-imut tassa
naalagaaffiit peqatigiinnut kukkusumik tunngaveqarluni aamma
nalunaarusiortoqartarsimasoq.
Kisianni
aamma una eqqaalaarusuppara naalagaaffiup sinniissaa nutaaq maani
nunatsinniilersoq inussiarnisaarluni danskit statsministeriata piffissami
1949-minngaaniit 1954 ilanngullugu FN-mut nalunaarutigisarsimasai tassa
rigsombudsmandip inussiarnissarluni aamma Inatsisartunut
tunniutereersimammagit. Tassalu taakkua pigivagut. Kisianni tassa taakkua
tuluuvinnaapput annertungaatsiarlutillu.
Kisianni
tassa eqqumiitsua uaniikkami 1946, 1947, 1948 taakkua pissarsiarineqanngillat
suna tamatumunnga pissutaasimanersoq soorunami nalunarpoq.
Una
naggataatigut oqaatiginngitsoorusunngilara tassa pakatsissutigigatsigu
pingaartumik Siumup oqaaseqartuaninngaaniit aammalu Naalakkersuisut
Siulittaasuaninngaaniit tassa oqaatigineqaqattaarmat inuiaat kalaallit, tassa
inuiaavugut tassa taanna assortuussutigineqarsinnaanngilaq. Qamuuna tamatta
misigimavugut inuiaalluta inuiaavugut kalaallit. Kisianniuna
ajornartorsiuterput uaniittoq inatsisitigut taamatut inuiaasugut maannamut
suli akuerineqarnikuunngisaannarpugut.
1953-mi
inatsit tunngaviusoq inuiaat kalaallit aperineqaqqaannguarnatik taanna
nunatsinnut atortussanngortinneqarmat tassani inuiattut immikkut
akuerineqanngilagut. 1979-mi Namminersornerulernerput pillugu inatsit maani
nunatsinni atortussanngortinniarneqarmat aamma tassa tassani inuiattut aamma
akuerineqanngilagut.
Taamaammat
ilungersuutigiuartariaqarparput inuiattut akuerisaanissarput. Tamannalu
aatsaat pisinnaavoq nutaamik inuiaqatigiit kalallit aperineqarisigut. Tassalu
taamaammanuna Inuit Ataqatigiit oqaaseqaqqaarnitsinni naggataatigut tassa
siunnersuuteqartugut maannakkut ukiuni tulliuttuni allaqquttussaajunnaarpoq
inuiaqatigiit kalaallit 1953-mi taamatut aperineqarsimanngimmata taava ukiuni
tullinnguuttuni pinngitsoornatik inuiaqatigiit kalaallit
aperineqaqqittariaqarput naalagaaffiit peqatigiit taakkua
periarfississutigisai pingasut 1953-mi atorneqanngitsut aamma 1979-mi
Namminersornerulernissarput eqqunneqartussanngormat aamma atorneqanngitsut
taakkua aamma inuiaqatigiinnut apeqquteqaatigissallugit.
Tassalu
naalagaaffittut namminiilerusunnerluta. Imaluunniit aaqqissuusseriaaseq alla
tassa free association tassa kiffaanngitsumik peqatigiinnermik
nutserneqartartoq imaluunniit naligiiffiusumik naalagaaffeqatigiinneq taanna
qinerneqarusunnersoq. Imaluunniit periarfissat kingullersaattut ullumikkutut
Namminersornerulerneq ingerlatinneqaannarusussanersoq inuiaqatigiinni
kalaallininngaaniit.
Inuiaat
kalaallit tamanna namminneq aalajangigassarivaat. Uagut Inatsisartuninngaaniit
aalajangersinnaanngilarput qanoq aalajangertoqassanersoq. Kisianni tassa
naalagaaffiit peqatigiit angerfigeqatigiissutaanni aalajangersarneqarpoq
inuiaat sumiikkaluarunilluunniit namminneq siunissartik namminneq
aalajangertussaavaat taasitinneqarnermikkut. Tassalu taanna
naammassineqarnikuunngisaannavippoq maani nunatsinni taamaamanuna
siunnersuutigigipput ilungersuutigigippullu inuiaat kalaallit aamma nutaamik
taasitinneqarumaarnissaat taanna noqqaassutigigatsigit.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tulliulluni
oqaaseqaqqinniarpoq Anthon Frederiksen Kattusseqatigiit.
Anthon
Frederiksen, Siulittaasup tulliata sisamaat, Kattusseqatigiit.
Tassa
Naalakkersuisut Siulittaasuata akissuteqarnermini Kattusseqatigiinniit
saqqummiutagut soqutinngilluaasakkaluarai kisianni maluginiarpara taamaattoq
soqutiginaateqarsimammata taakkua uterlugit atuaqqikkai tassalu
oqaaseqarnitsinni eqqaasagut Naalakkersuisut Siulittaasuat akissuteqaatai
imatut nalileratsigit ullummi qaangiuttut uteqqissanngillat taakkuli
uummatinni katattussaanngillat.
Tassa
taanna uagut aalangiusimavarput pissutigalugu Naalakkersuisut Siulittaasuata
akissuteqarnermini siunnertuuteqartup siunnersuutaanut
soqutiginnippalaanngitsumik nipeqartumik akissuteqarmat. Uffalu massa nammineq
akissuteqarnermini aallaqqaataani nammineq paasisakka malillugit
politikkerinngornialerami ilaatigut akissuteqarnermini allatai imaammata.
Pissutigaara paasigakku soriarsinnaanngitsutut qatsussusisimasutut
misiginarput iliuuseqarnermik taarserneqartariaqartoq.
Taakkorpiaat
oqaatsit illuatungilerlugit Kattusseqatigiinniit naliliinerput taamatut
oqaatigaarput. Pissutigalugu soriarsinnaanngitsutut Naalakkersuisut
inissimmata uani apeqqummi. Tassa taanna taamatut erseqqissaassutigilaarpara.
Aammalu eqqaasitsissutigilaassallugu taamatut Naalakkersuisuninngaaniit aamma
akineqarneq ajuallattartuugaanni nuannerunanngikkaluarpoq allaat oqaaseqaatit
soqutaanngilluinnartutut Inatsisartuninngaaniit saqqummiunneqartut
nalilerlugit.
Uanga
soqutigisaqaakka Naalakkersuisut saqqummiuttagaat aammalu Inatsisartunut
agguaattagaat aamma oqanngisaannassuunga taanna eqqaamaniarumaarpara,
oqanngisaannassuunga Naalakkersuisut saqqummiutaat soqutaanngingaarmata
qiviarumanagilluunniit.
Pakatsinarpoq
Naalakkersuisuninngaaniit taamatut suusupagineqartutut aammalu
sussaanngitsutut immaqa oqaaseqarnermi isigineqarluni. Allaat
ajukkutiisarnangajapporluunniit immaqa maanga oqaluttarfimmut qaqinissaq
taamatut soqutaanngitsigisumik oqaaseqaatit tiguneqarpata
Naalakkersuisuninngaaniit.
Neriuppunga
ataaqqinartup Naalakkersuisut Siulittaasuata aamma taakkua oqaasiminninnguit
siutaanut pulajumaartut. Tassami oqareernittuut uanga
pilersaarutiginngilluinnarpara Naalakkersuisut oqaaseqaataat
saqqummiussaalluunniit soqutaanngitsutut oqaatigissallugit.
Uani
annerusumik oqaaseqannginnitsinnut pissutaaneruvoq nalunnginnatsigut
Namminersornersulivinnissaq pillugu ataatsimiititaliaq suliaqartoq
suleqatigiissitat aammalu ukiamut oqaaseqaateqartussaasut
saqqummiussaqartussaasut Inatsisartuni. Taanna oqaaseqarnitsinni aamma
eqqaavarput.
Tamaammallu
annertunerusumik oqaaseqaqqinnata kisiannili Naalakkersuisut Siulittaasuata
soqutiginngisai inuiaat kalaallit siulivut ataqqinarluartut siulivut taakkua
ilaatigut eqqaasagut soorlusooq soqutigisimanngikkai.
Neriuppunga
taanna paatsoornerusoq aammalu soqutiginninnerusariaqartoq taamaattunut
saqqummiussanut neriuutigiinnassavara. Qujavunga.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Oqaaseqartussat
tulleq tikitsinnagu paasissutissamininnguaq oqaatigilaassavara, tassalu
aatsaannguaq Johan Lund-Olsenip Inuit Ataqatigiinninngaanniit oqaatigimmagu
Siulittaasoqarfik ilaatigut aammalu Godmunddur Alfredssonip pappiaraataanut
atatillugu oqaatigissavara naalagaaffiup sinniisua suleqatigilluinnarlugu
pappilissat pissarsiarisimagatsigit aammalu Siulittaasoqarfiup taakkua
nutsertissimavai. Aningaasartuutillu naleqarpuq 100.000 kr-nik tassa
paasissutissat taakkua pissarsiarineranni. Taamaattumik aamma
oqaatigisinnaavara aamma Siulittaasoqarfik qanoq iliuuseqarsimasoq.
Taava
tulliulluni oqaaseqaqqissaaq Mikael Petersen Siumut.
Mikael
Petersen, Siumup oqaaseqartua.
Tassa
soorunami Naalakkersuinikkut nalunngilluinnarparput immitsinnut oqallinnermi
qanorluunniit saassussinnaasartugut. Kisianni qanoq
iliuuseqartoqarsimannginneranik oqalunneq aatsaat pissutissavilluni soorunami
atorneqartarpoq. Kisianni pissutissaqarani atorneqarpallaaleraangami
tusarnerunnaavittarpoq.
Isumaqarpunga
Inuit Ataqatigiit Kattusseqatigiit oqaaseqartui ullumikkut uani oqallinnermi
pissutissaqanngivissumik minnerunngitsumik Naalakkersuisunut aamma Siumumut
uani saassussisut aappassaanik oqaaseqarneq aallaavigalugu.
Namminersorneruneq
pillugu sulineq inuiaqatigiit ingerlaasianik allanngortitsiniarneq
ilisimaneqarpoq taamanikkut 1979-mi Siumut aallartimmat siuttuusut 75-kkunni
70-kkut aallartilaarneranniilli qanoq ilungersuutigitigigaat kalaallit
inuiaqatigiit uagut inissisimanitta nutarterneqarnissannissaa. Aamma
inatsisitigut atugarisagut eqqarsaatigalugit.
Ulloq manna
tikillugu sulineq ingerlattuarpaat aamma Siumut partii aqqutigalugu uagullu
tamatta peqataaffigilersimavarput aamma taanna. Ila tupinnassusia
oqartoqarsinnaappat Siumut qanoq iliuuseqanngitsoq. Asuli
tusaqqusaarnerinnaavoq taanna.
Aamma uagut
inatsisilerituutut inatsisilerituujusaarluta maani oqaluttarfimmiit
pinnguarnianngilagut. Naalakkersuinikkut siunnerfigut inatsisilerituut
aqqutigalugit aamma sulisillugit naammassiniarneqartarput. Politikkikkut
isummerfigut siunnerfigut inatsisinik tunngavissinneqartarput aamma
inatsisilerituut suleqatigalugit sulisillugillu. Aamma taamaaliussaqqaarpugut.
Isumaqarpunga
paatsoorneqarsinnaanngilluinnartoq Siumup uagut matumani
oqaaseqaatitsinni erseqqilluinnartumik oqariartuuterput ullumikkut
inissisimanerput uninngaarfigiinnarnagu ingerlaqqittariaqarpugut.
Naalaagaaffeqatigiinneq
allanngorsinnaavoq piffissami aggersumi qanittunnguami. Taamak
ersaritsigisumik oqaatigaarput. Aamma taamak pisoqassappat inuiaqatigiit
tamanna aalajangertariaqarpaat aamma Naalakkersuinikkut akisussaasut.
Tassa
imaappoq inuiaqatigiit aalajangissagunikku soorunami taasinikkut tamanna
aalajangissavaat. Tamakku oqaatsit naqitanngorlugit matumani saqqummiussagut
isiginngitsuusaarneqarsinnaanngillat.
Taamaattumik
utikulunneq perusunngikkaluarlugu allatut ajornartumik tamakku uteqqillugit
aamma oqaatigeqqittariaqartarpagut. Aamma erseqqilluinnartumik oqaatigaarput
siunissami aggersumi Danmarkip ammasumik naalagaaffeqatiginissaa
ataqqeqatigiinneq peqatigiilluarnerlu tunngavigalugit suleqatigiinnikkut.
Tassa tamakkuupput oqaatsit saqqummiussagut.
Taamaattumik
Inuit Ataqatigiit aamma oqaaseqartuata saqqummiussai periarfissat
pingasuusinnaasut aamma tamakku nalunngilagut. Aamma Namminersorneq pillugu
isumasioqatigiissitarsuarmi aamma eqqartorneqartoq.
Taamaattumik
inuiaqatigiit soorunami aalajangissaqqaarpaat siunissami
naalagaaffeqatigiinnerup iluani Namminersorneq atussanerlugu imaluunniit
namminersuinneq tassa nammineq naalagaaffittut inissilluni. Imaluunniit
ullumikkutut inissisimaneq atuinnassanerlugu. Tassa qinigassaapput tamakku.
Uagut
erseqqilluinnartumik signalimik tassa imaappoq oqariartuummik aamma nipimik
erseqqissumik massakkut tunniussaqareerpugut. Aamma nalilersuinermi
ingerlaqqinnermi nalilersuinermi aamma ilanngullugu nalilersugassamik.
Taassumap
saniatigut inatsisitigut qanoq inissisimanerput pillugu aamma isumaqarpunga
pikkorinneqqusaatissanngitsugut. Nalunngilarput namminersornerulluta aamma
naalagaaffeqatigiinnerup iluani inatsisit tunngaviusut grundlovet
tunngavigalugit aamma atugaqartitaalluta.
Tamakku utikulunneqassanngillat maani. Taava
nutaanerusumik aaqqissuussinerit nutaarluinnaat atulerutsigit
atornialerutsigillu taava inatsisitigut allannguutissat malitseqartillugit
suliarineqarumaarput. Aamma uagut tulluarsorinngilarput kingumut qiviariarluta
ilisimatuut ataasiakkaat oqartullu taamaassivoq taamaassimavoq. Taava kingumut
qiviariarluta taamanikkut Naalakkersuinermik akisussaallutik oqartussaasimasut
taamanikkut inuiaqatigiit ingerlaatitsinni inooqataasimasut kingumut
qiviariarluta eqqartuuteqartaarlugit maani pissanngitsugu. Naamerluinnaq.
Tamanna ineriartornerunngilaq.
Taamanikkut
pissutsit pissusiviusut aallaavigalugit isummertoqartarsimavoq
alloriartoqartarlunilu. Isumaqarpunga taammaannerata aamma takutikkaa
nunatsinni ullumikkut killiffitsinni qanoq annertutigisumik 1950-mit
massakkumut angusaqartoqarsimanersoq.
Isumaqarpunga
inuit ataasiakkaat aperigutsigit erseqqilluinnartumik aamma amerlanerpaat
akissasut qujanarpormi taamatut iliuuseqarsimaneq.
Pissutsit
assigiinngitsut ippinnartut eqqunngitsumik iliuuseqarsimasutut
iliortoqarsimasutut oqariartorfigineqarsinnaasut uagut
uninngaarfigiinnarnianngilagut. Siumut ingerlaqqinniarpugut, killiffitsinniik
ingerlaqqinniarpugut Namminersorneq pillugu isumasioqatigiissitarsuaq Siumup
pilersitseqataaffigaa. Aamma taassumap suliassai suliassaasa
aalajangersarneqarnerannut peqataavoq.
Aamma maani
Inatsisartuni taakkua suliaat naammassippat saqummiunneqarpallu
oqalliseqataajumaarpugut. Aamma qularutiginngilluinnarpara siunissami
taassumap suleqatigiissitarsuup inassuteqatai assigiinngitsut siunissami maani
inimi aamma siuliarineqartalerpata aamma Siumut suleqataajumaartoq.
Taamaattumik
nalornissutigineqassanngilaq nunatta inuiaqatigiillu inissisimanerata
nutaanngoriartortinneqarnerani Siumut peqataajuassasoq.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Maannalu
akissuteqaqqissaaq Naalakkersuisut Siulittaasuat.
Jonathan
Motzfeldt, Naalakkersuisut Siulittaasuat, Siumut.
Oqaqqissananga
oqaraluarama maannakkut naatsunnguamik oqaqqilaassaanga. Una taarusutakka
tassa marluupput uani oqaatigineqartunut ilanngullugu. Uanga takorloorpara
ukiamut oqallinneq naammassippat sumullu sammivipput tunngavigalugu
isumaqatigiissutigineqarsinnaasoq anguneqarpat aamma pinngitsoorata
siunnerfigissagipput inunnik taasisitsinissaq. Soorlumi aamma 1978-mi
taasisitsisimasugut namminersornerulernissaq ilusissaa taamanikkut
naammassineqarmat.
Taamaattumik
Kalaallit Nunaata qanoq ilisamik allannguutit nunamini pisussat taasinermigut
pinngitsoorani aaqqittassagai taanna naatsorsuutigisatsinnut
ilaalluinnartariaqarpoq. Aamma taamak takorloortariaqarpoq.
Kisianni
Godmunddur Alfredssonip manna tikillugu saqqummiussugai taanna
soqutiginnittunii soqutiginarsinnaammat kisianni taakkua saqqummersitai sumut
atussagatsigit. Oqaluttuarisaanermut ilaapput aammalu ajornartorsiutit
tikkuarsimasai qularnanngitsumik soqutiginaatillit atorneqarsinnaapput.
Kisianni
ukiut 2000-t maannakkut iserfigineranni kalaallillu ukiuni kingullerni 50-sit
sinnerlugit nutaamik ineriartorsimaneranni naliliinissagut uagut nammineq
maani atukkagut ingerlaniarnerput aningaasarsiornerput allatigullu inuiattut
nammineerluta ingerlasinnaanitsinnut naliliinigut aqqutigalugit pissaaq.
Allat
aperinissaanut tassani takorluugaqartoqassanngilaq. Uagut nammineq
aperinissarput sumut killittugut inuttut ataasiakkaatut inuattullu aamma
aperineqartussaavugut. Taanna qularutigissanngilarput taamak ittoq siunnerfik
aamma uagut ataqqillugu malinniarumaaripput. Taamaattussatullu aamma
isumaqarfigissallugu.
Taavalu
naggaterpiaatigut aamma una oqaatigilaarlara isumaqatigakku uanga aamma manna
tikillugu saqqummiunneqartoq selstyrekommissionimullu ilaasortaasut ilaatigut
Mikael Petersenip saqqummiussamini taanna oqaatigisaa uagutsinnullu aamma
Naalakkersuisut saqqummiussaanut atatillugu oqaatigisaa aamma upperigakku
taanna siunnerfiusoq.
Taamanikkussamut
saqqummiinissami saqqummiussat ima isikkoqartussaassammata kalaallit uagut
Naalakkersuisuni Naalakkersuinermik suliaqartut Inatsisartuni Kalaallit
Nunaamiullu tamarmik kattuffiit peqatigiiffiit kikkullu
periarfissaqartinnneqassasut oqaloqatigiissutiginissaannut
ingerlariaqqiffissaq Kalaallit Nunaannut pitsaanerpaaq qanoq ittoq
paaseqatigiiffiginiassagipput.
Taamaattumik
maannaminngaaniit ilusileriikkamik taasissutiginissaanut
eqqarsaateqarsinnaaneq maannakkut uanga takorluunngilara aamma isumaqarpunga
taanna siunnerfigineqanngitsoq. Taamaattumik ukiamut erseqqinnerusumik
angusaqarnissarput taanna qularinnginneruvara.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tulliulluni
oqaaseqassaaq Lars Sørensen, Inuit Ataqatigiit, partiip oqaaseqartuata
avataatigut.
Lars Sørensen,
Inuit Ataqatigiit.
Tassa
Inatsisartut Siulittaasuanut tunniuppara oqaluuserisassamut tullermut
ingerlaqqinnissamik siunnersuut. Tassa Inatsisartuni suleriaatsitsinni
paragraf 50-mi aalajangersakkat najoqqutaralugit matumuuna Inuit Ataqatigiit
siunnersuutigaarput oqaluuserisassamut tullermut ingerlaqqittoqassasoq
Inatsisartut imatut nipilimmik aalajangersagaqarnerisigut.
Inatsisartut
paasimmassuk Kalaallit Nunaat pingaartumillu Kalaallit Nunaani innuttaasut
inuiattut imminnut aalajangiisinnaatitaanerat 1953-mi naalagaaffiit peqatigiit
kukkusumik tunngaveqarlutik akuerisimagaat. Taamaammallu kalaallit inuiattut
inatsit tunngaviusoq 5. juni 1953-meersutigut kingornalu 1. maj 1979-mi
Namminersornerulerneq eqqunneqarmat inuiattut akuerineqarsimanngisaannartutut
Inatsisartut piumasaqarput inuiaqatigiit kalaallit suli taasitinneqarnissamik
piumasaqarsinnaasut.
Inuiaat
inuiannik allanik aniguisinneqarsinnaanngillat namminneq taamaallaat
aniguisinnaapput. Inatsisartut taamatut piumasaqaateqarlutik taamaammat ukiuni
qaninnerpaani inuiaqatigiit kalaallit taasitinneqaqqussavaat inuiaqatigiinnut
apeqqutinngortinneqassallutik. Tassa siullertut, naalagaaffittut
namminiilerusunnerluta. Aappaattut free association, tassa kiffaanngitsumik
peqatigiinneq imaluunniit naligiinnersuumik peqatigiinneq qinerneqassanersoq.
Imaluunniit ullumikkutut Namminersornerulerneq ingerlateqqiinnarneqassanersoq.
Taamatut aalajangersagaqarlutik Inatsisartut oqaluuserisassamut tullermut
ingerlaqqipput.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tassa
oqaatigissavara suleriaatsimi paragraf 50 naapertorlugu ullormut
oqaluuserisassani immikkoortumut tullermut ingerlaqqittoqarnissaa pillugu
siunnersuummik saqqummiussisoqarpoq.
Suleriaatsimi paragraf 50 ima oqaasertaqarpoq. Inatsisartunut ilaasortap suliat suulluunniit oqaluuserineqarnerani siunnersuutigisinnaavaa oqaluuserisassamut tullermut ingerlaqqittoqassasoq. Siunnersuut taamaattoq ataatsimiinnermi aqutsisumut nalunaarutigineqassaaq. Allaganngorlugulu tunngavilersuummik naatsumik ilaqartinneqarluni. Tamanna taasinikkut aalajangiiffigineqassaaq siunnersuut akuerineqarpat oqaluuserisassaq pineqartoq atorunnaassaaq.
Tassa ullormut oqaluuserisassani immikkoortumut ingerlaqqinnissaq pillugu siunnersuutip suleriaatsimi piumasaqaatit eqqortippai. Tassalu tunniussisoqarpoq aatsaannguaq siunnersuummik. Siunnersuummi tunngavilersuummik tassa ilaqartinneqarpoq. Taannalu tunniunneqartoq tassa atuaqqissavara.
" Inatsisartut paasimmassuk Kalaallit Nunaat pingaartumillu Kalaallit Nunaani innuttaasut inuiattut imminnut aalajangiisinnaatitaanerat 1953-mi naalagaaffiit peqatigiit kukkusumik tunngaveqarlutik akuerisimagaat. Taamaammallu kalaallit inuiattut inatsit tunngaviusoq 5. juni 1953-meersutigut kingornalu 1. maj 1979-mi Namminersornerulerneq eqqunneqarmat inuiattut akuerineqarsimanngisaannartutut Inatsisartut piumasaqarput inuiaqatigiit kalaallit suli taasitinneqarnissamik piumasaqarsinnaasut.
Inuiaat inuiannik allanik aniguisinneqarsinnaanngillat namminneq taamaallaat aniguisinnaapput."
Taavalu
imatut aamma ilaqarpoq. " Inatsisartut taamatut piumasaqarlutik taamaammat
ukiuni qaninnerpaani inuiaqatigiit kalaallit taasitinneqaqqussavaat
inuiaqatigiinnut apeqqutinngortinneqassallutik makkua. Naalagaaffittut
namminiilerusunnerluta imaluunniit free association, kiffaanngissutsimik
peqatigiinneq naalagaaffiusumik naalaaffeqartigiinneq qinerneqassanersoq.
Imaluunniit ullumikkutut Namminersornerulerneq ingerlateqqiinnarneqassanersoq.
Tassa
oqaatigissavara uani paragraf 50 suleriaatsitsinni, suleriaatsini paragraf 50
malillugu taasissutigineqartussaammat taamaallaat pineqartup tassa ullumikkut
oqaluuserisap atorunnaartinneqarnissaa. Aallamik ilaqartussaanngilaq.
Tassa
taamaalilluni immikkut piumasaqaateqartoqarsinnaanngilaq. Taamaammallu tassa
taasissutiginissaa tullinnguutissaaq. Tassa taasinikkut taanna
aalajangerneqartussaammat.
Taavalu
imatut taassissaagut tassa ullormut oqaluuserisassani immikkoortoq tullermut
ingerlaqqinnnissaq pillugu siunnersuut taasissutigissavarput. Tassalu
siunnersuutigineqartumut isumaqataasut nikueqqussavakka. 10. akerliusut
nikueqqussavakka. 16. taaseqataanngitsut. Ataaseq.
Taavalu
oqaatigissavara siunnersuut tassa itigartinneqarmat. Maannalu ullormut
oqaluuserisassap oqaluuserineqarnera nangissavarput. Tulliullunilu
oqaaseqarniarpoq Otto Steenholdt Attaviitsoq.
Otto
Steenholdt, Attaviitsup oqaaseqartua.
Oqaaseqarninni
erseqqissaatigisimavara saqqummiussaqartup oqaaserisai pisuutitsinerpalaartut
Inatsisartunut Naalakkersuisunullu uanga Inatsisartut immaqa sinnikannerlugit
oqarpunga sivisuumik ilaasortaasimaninni taamaattumik isertuussisimanissara
ilimananngilluinnartoq nalulluinnarigalu taamaaliortoqarsimassanersoq.
Naalakkersuisut
Siulittaasuata aamma namminneq imminnut tunngasortaa akissuteqarfigereerpaa.
Taamaalilluni oqarnerit soorlu uannut tunngatillugit
atuarsimasariaqaraluarlugit suugaluarnersut taanna uniffiginngilara.
Taavalu
avataaniit akuliuffigisaaneruna uanga soqutigisarinngikkiga. Inuup
eqqartorneqaqisup nunatsinnut periarluni oqaallannera soorlulu aatsaat
nutaarsuartut pillugu taamatut iliorfigineqalernera iluatigaara. Kisianni
tamakkununnga saqqummiussisartussanut allanut tassumap saqqummiussai
ilaajumaarput nalilersuinermut iluatigineqarlutik tiguneqarumaarput.
Namminersortunngorusuppunga
uanga nammineq akilikkannik. Inuttut namminersorusuppunga allanit
akuliuffigineqarnanga. Oqaluttut namminersulissasugut Danmarkillu aallaat
taanna akilerumaaraa. Taamatut uanga upperisaqanngilanga. Inuup namminersortup
nammineq pisinnaasani akilertussaavaa.
Taamaattumik
aamma oqaatigerusuppara namminersulivinnissamut ullumikkut uanga
eqqarsartaasera najoqqutaralugu akissaqanngitsugut taanna naammaqaaq.
Soorunami misiliutigineqarsinnaapput namminersortunngorusuissut
qeqertannguamulluunniit allamut ilillugit nammineq ingerlasinnaassappata.
Takuat maani
assorujussuaq suut tamaasa ataqqinarluartut siulitta, ullummi qaangiuttut,
aamma ilaata Atassummeersup ilarpallappaa nationalsangitsinnik inuiattut
erinarsuuterput issuaaffigigamiuk kukkusorsuarmik oqaatigaa.
Tassa
oqarpunga aallaqqaammut issussisaraluarpugut ilaannik arfernik
qulaatsisarpugut. Oqarmat taqilluni naamik ajornaveqaaq. Taamaattoqanngilaq
inuiattut erinarsuuterput imaappoq. Taqqilluni naamik atunngiveqaaq
taamaattumik issuaassagaangassi eqqortumik issuaassaasi. Pingaartumik qamuuna
attortissimaarlusi namminersorusullusiluunniit pileraangassi. Inuiattut aamma
atugassagut eqqortumik oqaatigisariaqarput.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tulliulluni
oqaaseqaqqissaaq siunnersuuteqartoq Per Rosing-Petersen Siumut.
Per
Rosing-Petersen, siunnersuuteqartoq, Siumut.
Qujanaq.
Tassa kingullermik oqassuunga Otto Steenholdt ilisarnarsiivilluni popcornitut
taamatut pisseqattaalillaraangamik ilaatigut qinngarnaammertaqaaq. Immaqa
popcornimik taasalerutsigu.
Kalaallit
qinikkat ilaasa aaqqissuussinermut nutaamut taamak akuersaartiginerat
aallaavigalugu apeqqajaananngitsuunngilaq ilumut paasilluarsimaneraat
nunasiaanerup qanoq allanngorsimanngitsiginera. Taanna uteqqissavara. Ilami
una nutaarsiassaanngilaq ukiut 20-t qaangiupput ukioq manna
saqqummiunneqarmat.
Ilisimatuut
alla inatsisilerituut Isi Foigel, Frederik ? periarfissaqarnikuupput ukiut
20-t una eqqaassutissaq ilumoortuunngippat illuatungilissallugu. Tamanna
pisimanngilaq illuatungiliisoqarsimanngilaq.
Kisiannili
ilutsinni ilavut nipangersimalluinnaqqissaarlutik paasissutissat
ingerlateqqissimanngilaat. Tamannalu inuiaqatigiinnut taamak
pingaaruteqartigisunut paasissutissanik ingerlatitseqqiisimannginneq
akuersaarneqarsinnaanngilaq.
Unami
paasissutissat piviusut toqqammavigalugu sanaajuvoq. Uppernarsaatitaqarpoq
pappilissanik naalagaaffiit peqatigiinninngaaneersunik. Aalajangersakkat
assigiinngitsullu. Tamannalu toqqammavigalugu aamma soorlu
siunnersuuteqarninni ilanngutereeriga ilannguttariaqarpoq inuiaqatigiit
qinersisinneqalerpata. Aamma nunarput naalagaaffittut
inissisimatinneqalernissaa. Tassuunartaatigullu Inuit Ataqatigiit
isumaqatigilluinnarpakka.
Periarfissaq
tassaneereermat aamma uagut periarfissaq taanna inuiaqatigiinnut
periarfissiissutigisariaqarparput. Taanna avaqqussinnaanngilarput.
Inatsisineereerpoq, taanna aamma Danmarkip atuuttussanngortinnikuugamiuk
periarfissaraa taamaasiornissamut.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Inatsisartut
ilaasortat qinnuigissavakka maani oqallinneq torersumik ingerlateqqullugu
aammalu imminut sammiuaarnerit pivallaarnagit kisiannili saqqummiunneqartoq
oqaaseqarfigeqqullugu. Aamma imminnut qinngarineq isumaqarpunga maani
atortariaqanngikkipput inersimasuuvugut tamatta aammalu immikkut
isummertaaseqarluta.
Tulliulluni
oqaaseqassaq Inatsisartut siulittaasuat.
Daniel
Skifte, Inatsisartut Siulittaasuat, Atassut.
Qujanaq.
Maanga qaqivunga erseqqissaassuteqalaarniarlunga taassami Inatsisartunut
ilaasortap Johan Lund-Olsenip siusinnerusukkut oqaaseqarnermini ilaatigut
oqaatigimmagut Inatsisartut Siulittaasoqarfiat soorlusooq qanoq
iliuuseqarsimanngitsoq. Tassani ataatimiinnermi aqutsisoq oqaaseqareerpoq.
Taannalu ilaneqartariaqarluni. Tassani ilaaneqaatissaasa ilagaat inatsit
taaneqanngimmat isumaqarlunga uani pingaaruteqartoq.
Inatsisartunut
ilaasortat aprilip 17-anni allaffigineqarput tassunga tunngasumik
nassuiaanneqarlutik immikkoortup ullumikkut pisatta 58-p suliarinerani.
Tassani
Inatsisartut Siulittaasoqarfiat oqaluttarfimminngaaniit assigiinngitsunut
pisortaqarfinnut assersuutigalugu soorlu nunanut allanut pisortaqarfimmi
Danmarkimi statsministeriaqarfimmut, Kongelig Bibliotekkimut allanullu
saaffiginneqquneqarpoq. Soorlusooq tassa Inatsisartut Siulittaasoqarfiat
Naalakkersuisoqarfiusoq.
Naalakkersuisoqarpugut
ulluinnarni taamaattumik suliassaq uagut suliarinagu taakkua suliarissagaat
isumagaarput. Taamaattumik taamatut oqaaseqarneq Johan Lund-Olsenip
tungaaninngaaniit puussaarinertut nalilerpara. Peqqutigalugu
kissaatigineqartut ulloq taanna pissarsiarineqarsimapput aajukua quppernerit
570-t qujanartumik rigsombudeqarfik suleqatigalugu pissarsiarineqartut
maannakkut tuluttuuminngaaniit kalaallisuumut nutserniarneqartut. Aammalu
soorunami taakkua qularnanngitsumik qallunaatut nutserneqassapput.
Taakkununnga
akissaajaatit taaneqareerput uppernarsivakka 100.000-tit sinnerlugit
akeqartussaapput.
Taamaattumik
uninngasoqarsimanngilaq oqariartuutiga uanngaaniit uaniiginnarpoq.
Siulittaasoqarfik tamakkuninnga sulisussaanngilaq. Inatsisartut
Naalakkersuisoqarput. Tamakkulerisussaapput.
Taamatut
oqariarlunga isumaqarpunga pissusissamisoortoq aamma oqaatigissallugu
torernerusumik Inatsisartut ataatsimiissinnaasariaqarput. Maluginiakkakka
kingulliit uaniikkamik Inatsisartut taasisinneqalerunik taasigunillu
tunuatungaaniinngaaniit nikuissaasorsuit assamminnik ussersorlutik.
Taasineruna
Inatsisartuni pingaaruteqartoq. Asuli pissusilersornerunngitsoq. Aamma ugguuna
Inuit Ataqatigiit isumaqatigaakka oqarmata aallaqqaataani ajornanngippat
misigissutsit aallaaviginagit oqallittoqassaaq. Kisianni eqqortunik
oqaaseqartoqarluni. Qujanaq.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tulliulluni
oqaaseqassaaq Josef Duusi Motzfeldt Inuit Ataqatigiit. Partiip
oqaaseqartuata avataatigut. Minutsit tallimat periarfissaapput.
Josef
Duusi Motzfeldt, Inuit Ataqatigiit.
Qujanaq.
Inatsisartut Siulittaasuata piumasaqaataa eqqortunik oqalunnissamik
sakkortoorsuaq malinniarsarissavara.
Uani
oqaluuserisami Namminersornersulernissarlu eqqartorneqarnerani ilaatigut
oqaluttup kisermaap oqariartornermigut kingullikkut oqaatigaa
namminersulernissaq akissaqartinngikkipput. Ullumikkut inuiaqatigiit
taamannani Namminersornerusimanitsinni akiliutigisimasagut
annikigisasssanngeqaat. Pilliutigisimasavut inoqativut misigissutsit
atornianngikkaluaraanniluunniit inoqatigut pilliutigineqarsimasut annertoqaat.
Ilaatigut
isumalluarnermik nammineq nunamik oqartussaalernermik isumalluarsimaneq
ullumikkut oqaluttunit upparnarsarneqartoq tassaavoq tamanna
anguneqarsimanngitsoq. Inuiattut akuerineqarnissamik isuma aamma
itigarteqqinneqarpoq. Nunatsinni piginnittutut akuerinninneqannginneq
noqqaassutiginiarneqaraluarmat akuersaarneqanngilaq.
Ullumikkut
ilisimaneqartutut Inatsisartuni aningaasatigut toqqammaviusumik maani
ingerlatsinermi 60%-tii sinnerlugit uagut namminneq nalilinnit
pilersitarisimanngisatsinnit aallaaveqarput.
Taamaattumik
qallikkut atugarliorneruminilerneq imaluunniit ilukkut atuarliuutit
Namminersornerulernerup ingerlanerani nalaassimasagut taakkua
eqqarsaatigisariaqarpagut suliap matuma ingerlateqqinnerani.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tulliulluni
oqaaseqaqqissaaq Johan Lund-Olsen Inuit Ataqatigiit, pingajussaaniilerami
naatsunnguamik.
Johan
Lund-Olsen, Inuit Ataqatigiit oqaaseqartuat.
Qujanaq.
Tassa Inatsisartut Siulittaasuannunguna una oqaatigilaarniarlugu aamma
siusinnerusukkut tassa oqaatigisareernikuuvara aamma Inatsisartut
ataatsimiinnerput manna tassa upernaakkut ataatsimiinerput aallartimmat
aprilip tallimaanni taamani aamma maani oqaluttarfimminngaaniit oqaatigivara
Inatsisartut inatsisiliortutut pingaartittariaqaraat paasissutissat
aalajangiiniarnerminni tunngavissaat tamakkiisut taava aamma
pissarsiariniaqqaartariaqartassagaat. Taakkulu paasissutissat tunngavigalugit
tassa toqqissimanarnerpaamik aammalu tutsuginarnerpaamik taamaalillutik aamma
aalajangersaasinnaaniassammata.
Tassa
taamaammat taamani aprilip tallimaanni maani oqaluttarfimminngaaniit tassa
noqqaassutigisimavara ilumoortumik Statsministeriaqarfimmut Det Kongelige
Bibliotikkimut, aammalu nunanut allanut ministeriamut Siulittaasoqarfik
saaffiginnissuteqassasoq. 1946-miit 1954 ilanngullugu FN-mut
nalunaarutigineqartarsimasut paasissutissat tamaaviisa taakkua Inatsisartunut
oqqunnneqarsinnaanissaat taanna sulissutigineqaqqullugu taanna
noqqaassutigivara.
Tassa
taakkua aap Siulittaasoqarfimminngaaniit naammassiniarneqarsimapput. Kisianni
tassa Inatsisartunut ilaasortat allaffigineqarput ilumoortumik aprilip 17-ani
tassani tassa Inatsisartut Siulittaasoqarfiat sinnerlugu Inatsisartunut
ilaasortaq aah= Siulittaasoq allagaqarpoq ilaatigut imatut nipilimmik, tassa
taakkua noqqaassutigisat eqqarsaatigalugit. "Inatsisartunut ilaasortanit
saaffiginnissutit taaneqartutut ittut pillugit saaffiginninnissamut
Siulittaasoqarfik pisussaasutut isiginngilaq." Issuaaneq naavoq.
Taanna
ila ajuusaarnalaarpoq tassami Inatsisartut oqaatigeriikkattut
pingaartittariaqaratsigu aalajangiiniarnissatsinnut tunngavissagut tamakkiisut
taakkua pissarsiariniarnissaat. Aap qujanaqaaq allaminngaaniit taava
paasissutissanik taava aamma pissarsitinneqaratta.
Tassa
oqaatigeriikkattuut siusinnerusukkut maani nunatsinni naalagaaffiup sinniisua
nutaaq inussiarnisaarluni tassa Inatsisartut Siulittaasoqarfiannut 1949-miit
1954 ilanngullugu Statsministeriaqarfimminngaaniit FN-mut
nalunaarutigineqartarsimasut taakkua Inatsisartut Siulittaasoqarfiannut
tunniuppai.
Taakkulu
tuluttuujupput annertoorujussuullutillu uanga aamma pissarsiarivakka. Taakku
qujanaqaat. Aamma qujanaqaaq maannakkut taakkua kalaallisuunngortinniarneri
ingerlanneqarmata.
Kisianniuna amigaataasoq ukua ukioq 1946, 1947, 1948. tassa taanna uggornartua. Immaqa taakkua pissanganarneroruttortut.
Anders Andreassen, ataatsimiinnermik aqutsisoq, Siulittaasup tulliata aappaa, Siumut.
Tassa naammassingajaliivippugut. Kingulliulluni oqaaseqartussaq Anthon Frederiksen, Kattusseqatigiit. Pingajussaaniilerami naatsuararsuarmik.
Anthon Frederiksen, Siulittaasup tulliata sisamaat, Kattusseqatigiit.
Uangasinngitsukkut Naalakkersuisut Siulittaasuata
saqqummiussamut soqutaannginnerarluinnarlugit uparuareermagit aamma
kingunitsianngua Inatsisartut Siulittaasuata Inatsisartut appisaluuppai
oqaluullugit eqqortumik oqaaseqartaqqullugit. Kikkunuku eqqunngitsunik
oqaluttut. Inatsisartut
tassa taamak taginanngitsigippat.
Isumaqarpunga
taamatut Inatsisartuni maani qulliunerpaasut inissisimasut Inatsisartunut
tatiginninngitsigisunik oqaaseqartarneri unittariaqalersut. Aamma immitsinnut
qiviartariaqarlerpugut maani kikkut qanoq pissusilersortarnerat pillugu.
Taanna isumaqarpunga nammineq ilutsinni aaqqinniartariaqaripput tamatta
assigiinnguatsiaratta.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Tassa
aap taava Inatsisartut Siulittaasuat oqaaseqarniarpoq.
Daniel
Skifte, Inatsisartut Siulittaasuat, Atassut.
Naatsunnguamik
apeqqutigerusunnarpoq sunaana Inatsisartut Siulittaasuata eqqunngitsumik
pissuseqarnerliorluni iliuuserisimagaa.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Taavalu
immikkut akuerineqarpoq Anthon Frederiksen Kattusseqatigiit.
Naatsuararsuarmik.
Anthon
Frederiksen, Siulittaasup tulliata sisamaat, Kattusseqatigiit.
Tassa
apeqqutaa naatsunnguamik akissavara oqarmat Inatsisartut maanngaaniit eqqortumik
oqaluttariaqartut tassa kisimi.
Anders
Andreassen, ataatsimiinnermik aqutsisoq, Siulittaasup tulliata aappaa, Siumut.
Aap
aqutsisutut oqaatigissavara ullumikkut eqqartorneqartoq tassammat Kalaallit
Nunaanni inuiattut inissisimanerput pillugu suleriaatsimi paragraf 35
naapertorlugu apeqquteqaat aallaavigalugu oqallinnissamik siunnersuut.
Taannalu
sammeqqussavara. Uanilu oqaaserineqartut kingullerni isumaqarpunga
Siulittaasoqarfiup taakkua akunnerminni aamma oqaluuserisariaqassagaat. Tassalu
taamaalilluni ullumikkut oqaluuserisassaq immikkoortoq 58 tassalu Kalaallit
Nunaanni inuiattut inissisimanerput pillugu suleriaatsimi paragraf 35
naapertorlugu apeqquteqaat aallaavigalugu oqallinnissamik siunnersuut tamaanga
killeqarpoq.