Oqaluuserisassani immikkoortoq 59-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfineq-pingajuat, tallimanngorneq 19. april 2002, nal.
14:35
Ataatsimiinnermik
aqutsisoq: Lars-Karl Jensen, Siulittaasoqarfimmi ilaasortaq, Siumut.
Per
Rosing-Petersen, siunnersuuteqartoq, Siumut.
Qujanaq.
Tassa ilaatigut aamma malugigakku uumap siunnersuutip qulequtaa ullormut
oqaluuserisassani allanngorteqattaalaarnikuusoq, taassuma qulequtaa
ilanngullugu aallarniutigissuara.
Pisortat
inissialiortiterneranni aningaasiissutaasartut ilaasa inissialiortiternermi
pisortat sanatitsisutut inissisimanissaannik isumalluuteqarnerup
annikinnerulersinneqarnissaa siunertaralugu, kiisalu nunami tamarmi innuttat
namminerisamik ineqalernissaannut pitsaanerusumik assigiiaarnerusumillu
aningaasalinissamut periarfissaqalernissaat anguniarlgu naalakkersuisut
aningaasaliisarfimmik imaluunniit aningangaasalersuisarfimmik
pilersitsinissamik siunnersuusioqquneqarnissaa Inatsisartut
aalajangiiffigisassaattut siunnersuut.
Qanittukkut
paasisutissiinermi nalunaarutigineqarpoq nuna tamakkerlugu inissianut
utaqqisut allatsissimasut 4.500 missaaniittut, taakkunanilu 1.500 missaat
Nuummi allatsisimasuusut tamannalu ajornartorsiut imaannaanngitsuuvoq,
minnerunngitsumik qanoq nunatsinni immikkullu Nuummi inissianik
angummanniaalluni sanaartortitsisoqartigisoq nalunngikkaanni. Sanaartornersuaq
60-ikkunni aallartittoq maannangaaq ukiut 40-t sinnerlugit ingerlareerpoq.
Soorluli ajornartorsiut milliartorani illuatungaatigut alliartuinnartoq.
Angummanniaaneq
imaaginnavippoq pitsaassuserlu pingaarnerpaatikkunnaarlugu amerlassuseq
piffissaq sivikinnerpaaq atorlugu sanaartortoqarluni. Utaqqisutut
allattorsimaffinni allatsittartut akissarsiaat toqqammavigalugit
agguataassagaanni avataanniillu isigalugu tupinnartortaqarluni, tassami
taakkua iluaniimmat aamma isaasalerlugu akissarsiagittutut taaneqarsinnaasut,
periarfissinneqarunillu nammineq illuliorsinnaagaluartut.
Taama
oqariarluni aamma qanoq sanaartornerup piginnittutut agguataarisimaneq
qimerlooraanni equnganeq alla saqqummissooq. Tassanilu nunani allanut
siuarsimasunut sanilliulluta killormut pisortat inissiaataata
nunatsinni nammineq illuliornermiit amerlanerussuteqarluinnartutut
inissisimaneqartutut ersarilluarmat. Agguataarinermi procentinngorlugit
imaalluni 80 20 missaat, tassa pisortat inigisassatut sanaartugaat 80%
sinnersimallutik, namminerlu illuliat 20%-iinnaat ataaniilluni.
Tamannalu
ingerlariaaseq ineriartorneq equngavoq ernumanartortalik. Ernumanartortalik
tassami kialluunniit nalunngilaa qanoq nammineq peqarluni kiffaanngissuseq
anginerusartoq, aammalu taamaasilluni pisortanik isumalluuteqarnerujussuaq
ilukkut peqqinnanngitsoq annertoreeqisoq suli annertunerulersitsilluni.
Aningaasanngorlugu assersuusiussaganni imaappoq aningaasanut inatsimmi
sanaartornermut aningaasat pisortaniit illikartinneqartutut amerlassusaat
orinngorlugit Danmarkimisut amerlatigaat, uffa nunatsinni aningaasanut
inatsiserput Danmarkimiit una kukkunikuugakku qulerarterutaanaanngilaq kisiat
hundrederiarterutaatigaa.
Tamannalu
ineriartorneq peqqinnanngilaq illuatungaanimi piffissanngorluinnarpoq nammineq
angerlarsimaffissaminnik sanaartoruusuttut annertuumik iliuuseqarfigalugit
nukiit aningaasallu annerusumik tassunga sangutinneqarnissaat.
Inatsisartuusugut pisussaaffeqarpugut inuiaat kalaallit sapinngisarput tamaat
atorlugu assigiinnerusumik atugassaqartinnissaat sutigut tamatigut
isumaginiassallugu. Tamannalu tunngavigalugu nammineq illuliorusuttunut
periarfissarititaasut qiviarutsigit nassuerutigisariaqarparput nunatsinni
taamatut periarfissaqartitsisoqanngitsoq. Illuliornermut
aningaasalersuisarfiit arlallit nunatsinni nunatta avataaneersut nunatsinni
immikkoortortaqarfeqarput, taakkualu taamaasiornerat tunngaviatigut
isornartoqanngilaq, kisiannili taakku inuiaat kalaallit assigiimmik
periarfissippaat? Ajoraluartumik naamik, tassami illoqarfinni sisamaannarni
tassalu kujataani aallartikkutta Qaqortumi, Nuummi, Sisimiuni aammalu
Ilulissani taamaallaat illuliorusuttunut atukkeerusukkamik.
Nalunngilarput
nunarput suli kommunet taakku sisamat saniatigut 14-inik kommuneqartoq aammalu
saniatigut nunaqarfeqartoq angisuunik mikisunillu. Qulaanilu Inatsisartutut
pisussaaffipput toqqammavigalugu tamanna equnganeq
iliuuseqarfigisariaqarparput. Taamaatumik pisussaaffeqarpugut
aningasalersuisarfimmik pilersitsinissatsinnut. Nalunngilara periarfissat
allat arlallit inuiaqatigiit periarfissiissutigineqarnikuusut, kisianni
tamakkua kingunerat kialluunniit takujuminaatsippaa tigussaasumillu
iliuuseqartoqartariaqarpoq.
Assersuutigineqarsinnaavoq
BSU aqqutigalugu illuliortarneq manna tikillugu illorpassuarnik
pilersitsisimagaluarluni aamma aningaasanut inatsimmut ukiut tamaasa
nammakkisaartoq, taarsertariaqartutullu nalilerneqartartoq. Taasareernikuuara
nunani tamangajassuarni nammineq angerlassimaffiuteqartut imak
periarfissagissaatigisut allaat sulisartunit SIK-mut assingusunit ilaasortat
qummut akunnaatsumik isertitaqartartut sipporlugit naassaanngiusartunik
periarfissaqartitsisut.
Aningaasalersuisarfimmiit
aningaasanik atoriarluni nammineq illuliornissaminnik, massakkullu
inissiarsuarnik pisortat sanaartortitsinerujussuata kingunipiluisa ilagaat,
nunatta avataaniit piginneqatigiiffissuit imaasiallaannaq tikeriarlutik
pipallatarpassuarnik inissialioriarlutik pitsaassuseq pugorlugu nuna
tukiinnarlugu angerlaqqittarnerat aningaasaannaanngitsut nassarlugit, kisianni
aamma sanaartornermut qaammaasarpassuit misilittagarpassuit siunissami uagut
atorsinnaasaraluagut. Aningaasaliisarfimmillu pilersitsinikkut ilaqutariit
ataasiakkaat kisiisa periarfissinnagit aammali sanaartortitsisut
nunatsinneersut inissialiortiternermi unammillersinnaanngitsut illuinnarnik
sanaartornerulernermi nukittorsarnerulernissaminnut
atorluarneqarnerulernermikkut periarfissaqarnerulissammata.
Tassani
eqqarsaatigaakka mester-leeqqat. Tassami nunatta avataaniit manna tikillugu
aggipallattartut unammilleruminaatsittorujussuuaat illut ataasiakkaat
taamaasillugit sanaartornerugutsigit ilaatigullu nammineq nunatsinni
pilersitagut soorlu Sikublocki periarfissaqarnersulissallutik. Ukiut tamaasa
takutittuarpaat sanaartornermi aningaasaliissutit tamarmik
atorneqanngisaannartut, allaammi siorna aningaasat 300 millionit sinnerlugit
atorneqanngitsoortut taamaasilluta sanaartornermi anigaasaliissutit
aningaasalersuisarfimmik pilersitsinikkut atorluarnerulissagaluarpagut,
sanasuaqqallu periarfissiinnarnagit aammali kiffaanngissuseqarluni nammineq
illutaarsinnaaneq taamaalillugu ammaallugu.
Siullermik
siunnersuuteqarnittuut oqassuunga eqqaamassagatsigut aningaasalersuisarfiup
aningaasat illuliornermut atukkiuttagai ernialerlugit uteqqittartussaammata,
kisiannili aamma periarfissaq una aallaqqaataaniit kaammattuinertalimmik
pilerinarsakkamik iluseqartariaqarmat, ilaatigullu BSU-mik
aaqqiiniaraluarsimanermik kukkussutaasimasut atorluarlugit immaqa
anigaasalersuisarfimmik piginneqatigiiffik A/S-itut isikkulik aqqutigalugu
pilersittariaqarmat.
Naggataatigut
oqaatigissavara misilittakkat tamangajatta aqqusaarnikuusatta takutereerpaat
pisortat inissiaataanni najugaqaraluarutta akiligaagatta akiliutit
takoqqinnaviarneq ajoratsigit. Akerliani nammineq qulaani siunnersuutittut
periarfissaqalernitsigut aqaguunnaq piunnaarlugu siunissarlu ungasinnersusoq
eqqarsaatigalugu, nammineq illugisatsinnut naafferaarnitsinni aningaasat illup
nalinganut pituttorsimasut ikiliartuaarnerisa ilutigisaanik aningaasat taakku
allanut atugassanngorlugit periarfissaqalersitsissammata.
Assersuutigalugu
piginneqatigiiffinni aningaasaliisinnaanermut namminersortunngorsaanermullu
kalaallit aamma periarfissaqalersissagatsigit. Akissaqaraluarlutillu
periarfissaqannginnertik pissutigalugu pisortat inissiaataanni
uninngaannartunut aningaasalersuisarfimmik pilersitsinikkut ammaanneqarunik
aamma inissiaq akissatikinnertik pissutigalugu inissarsiortunut utaqqisunullu
allanut pisariaqartitsinerusunut taamaasilluni periarfissiisoqassagaluarput
aqqutit nutaat atorlugit. Qujanaq.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Siunnersuuteqartumut
Per Rosing-Petersenimut qujavugut.
Siullermeerinninnermi
akissuteqassaaq Ineqarnermut Attaveqarnermut Pilersuinermullu
Naalakkersuisuusoq Jørgen Wæver-Johansen.
Jørgen
Wæver-Johansen, Ineqarnermut Attaveqarnermut Pilersuinermullu Naalakkersuisoq,
Siumut.
Qujanaq.
Inatsisartunut ilaasortap Per Rosing-Petersenip siunnersummini siunissami
inissialiortiternermut aningaasalersuineq pillugu tunngaviusumik isummernissaq
saqqummiuppaa. Naalakkersuisut Inatsisartunut ilaasortap Per Rosing-Petersenip
siunnersuutaa ineqarnermut tunngasutigut ingerlatsinerminni siunertaannik
imaqarmat qujaruteqaat.
Naalakkersuisut
2001-imi ineqarnikkut iluarsaaqqinnerup immikkoortua siulleq Inatsisartuni
tapersersorneqartoq aallarnerpaat. Inatsisartut katersuunneranni matumani
ineqarnermut tunngasunik iluarsaaqqinnerup immikkoortuata aappaatut
taaneqarsinnaasoq. Tassunga atatillugu Inatsisartut peqqussutissaattut
siunnersuutit marluk pingaarutilerujussuit Naalakkersuisunit
saqqummiunneqarput. Siulleq naluneqanngitsutut tassaavoq illuliortitsinermut
aningaasalersuineq pillugu Inatsisartut peqqussutaata allanngortinneqarneranik
Inatsisartut peqqussutissaattut siunnersuut makkununnga sammisoq.
Ilaqutariinnut
akunnattumik qaffasissumillu isertitalinnut nammineq illutaarusuttunut aamma
suliffeqarfinnut ingerlatseqatigiiffinnulluunniit namminersortunut sulisut
inissannik pisariaqartitsisunut aammalu namminersorlutik aningaasaliisartunut
inissianik attartortittakkanik sanaartorusuttunut sammitinneqarluni.
Tassanittaaq inuit qassiit ataatsimoorlutik affarleriinnik uiguleriinnik
imaluunniit affarleriiaanik sanaartorusuttut eqqarsaatigineqarsinnaapput.
Peqqusutissatut
siunnersuut aqqutigalugu pisortat aningaasaataannik inissiarliortiterniarneq
ingerlateqqinneqassaaq, aammalu inuit namminerisamik pigisaannik
inissiaqarnerat annertusarniarneqarluni. Taamaaliornikkut inissianik pisortat
attartortittagaannik pisariaqartitsinerujussuaq oqilisaanniarneqarpoq.
Tamakkumi inunnut inissianut kikkunnut tamanut naatsorsuussanut
initaarnissaminni utaqqisunut aammalu ineqarnermi tapiissutinik
pisariaqartitsisunut atorneqarsinnaniassammata. Allannguutissatut siunnersutit
aappaa tassaavoq Namminersornerullutik Oqartussat kommunellu inissiaataasa
attartortittakkat ineqartunut pigisatut inissianngortinneqarsinnanerat pillugu
Inatsisartut peqqussutissaattut siunnersuut. Inisianik attartortut
attartukkaminnit piserusuttunut sammititaasoq. Siunnersuut inissiat
namminerisamik pigisat amerlisarniarneqarnerannut aamma ilaavoq.
Peqqussutissamut
siunnersuut kommunet inissiaatiminnit tuniniaajumalutik kissaataat suliniummut
attartortumiit piginnittumut atatillugu innuttaasullu attartukkaminnik
piginnittunngorusunnerat naaperiaaffiginiarlugu saqqummiunneqarpoq.
Inatsisartunut ilaasortap Per Rosing-Petersenip siunnersuummini matumani
oqaatigaa, qanorluunnit amerlassusilinnik isertitaqaraluaraanni nammineq
illuliorsinnaanermut periarfissaqartoqartariaqartoq sumi najugaqarneq
apeqqutaatinnagu.
Naalakkersuisut
paasinninnerat naapertorlugu peqqussutissatut siunnersuummi kiisalu
neqeroorutaareersuni ullumikkut nammineq illutaarnissamut periarfissaqareerpoq,
aningaasaqassuseq sumiissuserlu apeqqutaalluni. Erseqqilluinnartumilli
oqaatigineqartariaqarpoq ilaqutariit tamarmik namminerisamik inissaminnik
initaarnissaminnut akissaqannginnerat. Taamaattumilliuna siorna Inatsisartut
ineqarnermut tapiissutinut tunngasoq peqqussut nutaaq,
pitsanngorsarneqarsimaqisorlu akuersissutigigaat.
Nassuerutigisariaqarparput
ilaqutariit ilaat akissakinnertik pissutigalugu akilersinnaasaminnik pisortat
attartortittagaanni ajunngivissuni ineqarnissamut naleqqunnerummata. Inissamik
toqqaaniaraanni eqqaamasariaqarpoq taarsigassarsiat akilersorneqarnissaat
ineqarnermut aningaasartuutaanngimmata aningaasartuutaanngimmata tamaallaat.
Tassami soorlu innaallagissamut imermut kiassanermut sillimmatinut allanullu
aningaasartuutit aamma ilaasarput, aamma namminerisamik inissiaatillit
aserfallatsaaliinermut nutarterinermullu akuttunngitsunik pisartussanut
atugassaminnik ileqqaarnissamut akissaqartariaqarput.
Nunaqarfinni
isorliunerusunilu nammineq illuliortoqartarpoq, 1999-imiillu aamma taakku
illoqarfinni annerusuni periarfissaalersimapput. Namminerlu illuliortut 30.000
kronenik akiliillutik Illorput 2000-imik 104 kvadratmeteriusumik nammineq
sanaassaminnik illutaarsinnaapput. Aamma illoqarfinni nunaqarfinnilu
piginneqatigiilluni illutaartoqarsinnaavoq, sumiiffinni pigisanik
aalaakkaasunut qularnaveeqqusiilluni taarsigassarsisitsisarfiit Realkredit
institutionit taarsigassarsisitsisinnaanngiffiini taakkununnga assingusumik
atugassaqarluni inissialiornermut tapiissuteqartarneq pillugu peqqussut
naapertorlugu, piginneqatigiilluni illuliornermut taarsigassarsisoqarsinnaavoq.
Kiisalu inissialiornermut aningaasalersuineq pillugu aaqqissuusseq imaluunniit
10/40/50-i atorlugu illuliorneq
sumiluunnit atorneqarsinnaasoq periarfissaavoq, tassanili illuliorumasup
nammineq akiliisinnaassusia tunngavigineqartarpoq. Taamaammallu
Naalakkersuisut isumaqarput kikkulluunniit akissaqarsinnaasut illutaarusuttut
taamaaliornissaminnut periarfissaqartut.
Tassa
sumiluunniit najugaqaraluarunik isertitaqqortussitsimullu sumulluunniit
inissisimagaluarunik apeqqutaanani. Naalakkersuisulli erseqqissarusuppaat
inigissaq qanorluunniit ittoq aningaasaliiffiginiaraanni taava
aningaasaliinissaq ileqqaarnermik aallartittarmat. Tassa inigisassamut
neqeroorutit qanorluunnit ittut atorumagaanni aammalu taanna namminersortunit
pisortanilluunniit taarsigassarsinikkut pisiariniaraanni assigiimmik.
Tamatumunga
atatillugu Naalakkersuisut innersuusutigissavaat 1989-imi pilersinneqarsimasoq
ineqarnermut ileqqaarsinnaaneq. Akileraarutitaqanngitsumik 4%-imik
ernialiiviusinnaasoq aammalu Namminersornerullutik Oqartussanit 4%-mik
akileraarutitaqanngitsumik ernianut tapiiffiusinnaasoq. Naalakkersuisullu
qinnuteqartarneq taarsigassarsiniarnermullu tunngasut suliarineqartarnerat
pisariillisarniarlugu qanoq iliuuseqarsimapput kiisalu taarsigassarsiat
assigiinngitsut aqunneqarnerat aningaaseriviit arlaannut
isumagisassanngortinneqarsinnaanerat isumaliutigaat.
Ilisimatitsissutigisinnaavaralu
Naalakkersuisut attaveqarfigisimammassuk Islandimi ineqarnermut
aningaasaateqarfik tassaasoq Islandimi pisortat aningaasalersugaannik
inissialiortiternermik isumaginnittuusoq.
Aalaakkaasunik
qularnaveeqqusiilluni taarsigassarsisitsisarfiit periaasiannut assingusumik
obligationit sivisuumik taarsersugassat atorlugit taarsigassarsisitsisarnikkut
aningaasaateqarfik taanna 1999-imi pilersinneqarpoq. Pilersinneqartorlu taanna
illuliornermi aningaasaliisarfinnut pingasunut pisortanut tamakkiisumik
ilaannakortumilluunniit pigineqartunut taartaavoq. Aalajangiunneqarpoq
aningaasaateqarfik paasiniaavigeqqinneqassasoq aammalu isummerfigineqassasoq
ilumut Islandermiut periaasiat boligstøtte aqqutigalugu
taarsigassarsisarnerup piginneqatigiilluni illuliornermut
taarsigassarsisarnerup 10/40/50-i atorlugu sanaartornernut
taarsigassarsisarnerup kiisalu 60/40-p aamma 80/20 atorlugit kommunenut
sanaartornermut tapersiisarnerup ataatsimut eqiterneqarnissaat siunertaralugu
isumassarsivigineqarsinnaanersoq paasiniarneqassalluni.
Taamaaliornikkullu
nunatta karsia aningaasaliisarnikkut oqilisaanneqarnerusinnaaniassammat.
Tamatumanilu soorunami Inatsisartunut ilaasortap Per Rosing-Petersenip
siunnersuutaa suliamut tamarmiusumut ilapertuutaassaaq.
Taamaammat
massakkorpiaq Inatsiasartunut ilaasortap Per Rosing-Petersenip
siunnersuutaatut ittumik aningaasaliisarfimmik pilersitsisoqarnissaa
Naalakkersut pisariaqartutut isiginngilaat. Taamaammallu Naalakkersuisut Per
Rosing-Petersenip siunnersuutaata tapersersorneqarnissaa tunngavissat
pigineqartut aallaavigalugit kaammattuutigisinnaanngilaat.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Naalakkersuisumut
ilaasortamut qujavugut.
Mannakkut
partiit, Kattusseqatigiit attaviitsullu oqaaseeqartuinut nuuppugut.
Siulliulluni oqaaseqartuussaaq Simon Olsen, Siumup oqaaseqartua.
Simon
Olsen, Siumup oqaaseqartua.
Inatsisartunut
ilaasortap Per Rosing-Petersenip, Siumut, siunnersuutaa imatut Siumumiit
oqaaseqarfigissavarput. Siumumiit siunnersuutigineqartoq siunertaa
tunngaviatigut pingaarnerusutigullu tapersersorparput, tassami siunnersuutip
piviusunngortinneqarneratigut innuttaasut namminneq piumassutsiminnik
akilikkaminnillu illuliorniartut naligiimmik assigiimmillu maannakkornik
pitsaanerusumik periarfissaqartinneqartalissammata, nunatsinni sumiluunniit
najugaqaraluarunik. Siumumiit kissaatigaarput inissialiortiternermut
illuliortiternermullu aningaasalersuisarfimmik pilersitsinissaq siunertaralugu
Naalakkersuisut periuutsinik misissuinertik ingerlatiinnassagaat. Ullumikkummi
piffissanguleriartorpoq sanaartornermi pissutsit sanaartugassat 80%-it
pisortanit sanaartorneqartarnerisa mumitinneqarnissaa. Inuuttaasut
namminneq sanaartornerat annertunerulersillugu.
Ullumikkut
sanaartorniaraanni aningaasalersuisarnermi pisortanit aaqqissuusinerit
assigiinngitsut arlalissuit qujanartumik atorneqarsinnaapput.
Taamaakkaluartorli aaqqissuussinerit assigiinngitsut atorneqarsinnaaneri
nunatsinni sumi najugaqarneq pissutigalugu aporfissaqarsinnaasarlutik.
Taamaattumik
Siumumiit kissaatigaarput aningaasalersuisarfimmik pilersitsinissaq
siunertaralugu misissuinermi, anguniarneqassasoq kikkunnit tamanit
paasilertorneqarsinnaasumik aammalu atorneqarluarsinnasumik siunertaqarluni
misissuinerit ingerlanneqarnissaat. inuit illutaarniaraangamik imaluunniit
inissiamik pisaarniaraangamik pingaarnerutillugu najugaqarfissaminnik
pisaarusuttarput.
Aningaaseriviit
allallumi aningaasalersuisarfiit sanaartornermut aningaasalersuillutik
taarsigassarsisitsigaangamik ukiunut 15-inut imaluunniit 20-nut
taarsersuinissamut sivisussusiliisarput.
Siumumit
noqqaassutigissavarput misissuinermut ilanngullugu misissorneqassasoq
sanaartornermut atasumik taarsigassarsiat ukiuni amerlanerusuni
taarsersorneqartarsinnaanissaat. Aningaasalersuisarfimmik pilersitsiniarnermut
tunngatillugu Siumumiit oqaatigissavarput, utoqqalinermi
soraarnerussutisiaqalernissamut nunatsinni katersorneqarlutik
toqqorterneqartut pillugit maani nunami sanaartornermut iluaqutissanngorlugit
aaqqissuussisoqartariaqarnera misissukkanut ilaasariaqartoq.
Taamaattumik
Naalakkersuisut misissuinerannut peqatigitillugu nunatsinni aningaaseriviit
aamma soraarnerusutisiaqalernissamut aningaasaateqarfiit Siumumiit
sakkortuumik kajumissaarusuppagut Naalakkersuisut misissuinerannut
kaammattuillutik suleqataaqqullugit.
Taakkumi
aamma pisussaaffeqarmata nunap inuisa aningaasat katersugaat aamma nunatsinni
innuttaasut akornanni kaaviiaartinneqarnerisigut suli annertunerusumik
iluaqutaanissaat.
Oqaluuserisassatut
siunnersuummut matumunnga peqatigitillugu sanaartornerup suliffeqarfinnit
assigiinnitsunit amerlanerusunit siunissami isumagineqartarnissaa imaluunniit
isumagineqartarnissaata periarfissarsiuunneqarnissaa aamma Siumumiit
pisariaqartutut isigaarput.
Taamaattumik
kissaatigissavarput suliffeqarfiit sanaartornermik suliaqartut
aaqqissuussiffigineqassasut ajornannginnerusumik taamaattorli
aningaasarsiornermi nalinginnaasumik tungavii naapertorlugit sanaartugaasa
naammassineqarnissaannut qularnaveeqquserneqartarnissaannik.
Siumumiit
erseqqissaatigissavarput aningaasalersuisarnissami periuuserineqartussamik
aalajangersimasumik tikkuagaqannginnatta, pingaartikkatsigut
siunnersuutigineqartummi pineqartup misissorluarneqarnissaat, taamaattorli
Naalakkersuisut akissuteqarneranni tunngavilersuutigineqartut suliallu
ingerlanneqareersut paasillugit taamatut isikkoqarluni
aappassaaneerneqassaanut nalilersorneqarnissaa akuersaarparput.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Simon
Olsen qutsavigaarput. Maannakkut oqaaseqassaaq Jakob Sivertsen, Atassut.
Jakob
Sivertsen, Atassutip oqaaseqartua.
Qujanaq.
Siunnersuummi saqqummiussaqartup tunngavilersuutai paasilluarsinnaagaluarlugit,
siunnersuut taamatut iluseqartillugu akuersaarsinnaanngikkallaratsigu
matumuuna Atassummit oqaatigeriissavarput.
Inissianik
iluarsaassinissarsuarmut aningaasat siunertamut aalajangersimasumut
atugassatut pilersaarusiugaasimanerannut, aningaasat
allanngortinneqassagaluarpata inissiarsutit nunatsinni pisoqalisimaqisut
iluarsartuunneqarnissaat kinguarsaqqinneqassasoq nalunnginnatsigut, aammalu
Atassummit erseqqissartariaqarparput inuit namminerisaminnik
ineqalersinnaanerat anguniarlugu, inissiarsuarni najugallit attartortumiit
piginnittuulernissamut peqqussutitigut allanngortiterinerit aqqutigalugit,
periarfissat pitsanngorsarneqarnialeruttortut atuutilerpata Atassummit
naatsorsuutigilluinnaratsigu, inuit namminerisaminnik ineqalersinnaanerminnut
ullumikkorniit eqeersimaanerullutik piumassuseqarnerulernerannik tamanna
kinguneqarsinnaajumaartoq.
Taakku
saniatigut nammineq illuliornissamut, soorlu Illorput 2000 nunaqarfinni
illoqarfinnilu atorluarneqalersimasoq eqqarsaatigigaanni, kiisalu
piginneqatigiilluni illutaarniartarnerit nunatsinni atugaaleraluttuinnartut
eqqarsaatigalugit periarfissat pitsanngortitertuarneqarsimapput, kiisalu
inissiarsuarni najugallit attartortumiit piginnittuulernissamut periarfissat
pitsanngorsarniarlugit upernaaq manna Inatsisartut ataatsimiinnitsinni,
peqqussutitigut allanngortiterinerit suliarineqarput. Aammalu 10/40/50 tassa
nammineq illutaarusuttunut illup nalingata 10 %-ianit aallarniuteqarluni 40
%-imik Naalakkersuisunit imaluunniit kommunenit atortinneqarnikkut nammineq
illuliorsinnaanermik periarfissat ammaanneqartut eqqarsaatigissagaanni.
Atassummit
isumaqarpugut, siunnersuummi anguniagassatut saqqummiunneqartutuut immikkut
aningaasalersuinngikkaluartuni siunertaq ajornanngitsumik
piviusunngortinneqarsinnaanngortoq, kiisalu pingasunngormat apriilip
qulinganni immikkoortoq 19, inissialiortiternermi tapiissuteqartarneq pillugu
Inatsisartut peqqussutaat normu 19, 12. november 2001-imi
akuersissuigineqartup allannguuteqartinneratigut inissiat kommunet
Namminersornerullutik Oqartussat aningaasaleeqataaffigisaat,
tunineqarnerisigut aningaasat isertinneqartut kommunenit pineqartuni
isumaqatiigiinniutigineqarsinnaanngornerisigut nunatsinni piffinni
assigiinngitsuni inissialiortiternerup pitsanngoriaateqarnissaanik
kinguneqartussat isumalluarfigigatsigit siunnersuut maannakkut
tapersersinnaanngilarput.
Taamatut
oqaaseqarluni siunnersuut Atassummit taamatut iluseqartillugu
akuersaarnartinnginnatsigut matumuuna oqaatigaarput, Naalakkersuisullu
siunnersuummut akissuteqaataat erseqqissut tusaatissatut tigulugit. Qujanaq.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Jakob
Sivertsen qutsaviagaarput. Maannakkullu oqaaseqassaaq Asii Chemnitz Narup,
Inuit Ataqatigiit.
Asii
Chemnitz-Narup, Inuit Ataqatigiit oqaaseqartuat.
Qujanaq.
Inatsisartuni ilaasortap Per Rosing-Petersenip siunnersuutigaa Inatsisartut
Naalakkersunut piumasarissagaat aningaasaliisarfimmik pilersitseqqullugit,
innuttaasut namminerisamik ineqalernissaannut aningaasaliisartussamik.
Oqaluuserisassanngortitsisoq
maanna eqqartugassatsinnut assingusumik siorna upernaakkut Inatsisartut
ataatsimiinneranni saqqummiussaqarpoq majip qaammataani 2001-imi, immikkoortoq
79-itut nalunaaqutserneqarluni sammineqartoq Inatsisartullu Ineqarnermut
Ataatsimiititaliaa siunnersuummut isumaliutissiissusiorpoq,
ataatsimiitsitalialli isumaqatigiittup siunnersuut tapersersinnaasimanngilaa.
Taamaammat
Inuit Ataqatigiinni ippigaarput suna pillugu ukioq ataaseq
qaangiutinngitsorluunniit oqaluuserisaq taannarpiaq aammaarluni
oqaluuserisassanngortinneqarsinnaanersoq. Inuit Ataqatigiit tungaannit
nassuerutigissavarput aalajangiiffigisassatut siunnersuut
oqaaseqarfigiuminaatsikkatsigu, naak peqqissaartumik atuaqattaareeraluarlutigu.
Soorlu
apeqqutit makku saqqummiussiissummi akissutissarsisinnaannginnatsigit,
aningaasaliisarfissap qanoq aningaasalersorneqarumaarnissaa, qanoq
aqunneqarumaarnissaa, kikkunnut taarsigassarsisitsitsisinnaassanersoq,
taarsigarsarsititsinissamilu qanoq taarsigassarsisut
atugassaqartinneqassanersut
piumasaqaateqarfigineqassanersut ilaalli ilanngullugit.
Taamaammat
isummerfigiuminaatsipparput. Taamatuttaaq ersernerluppoq aningaasaliisarfissaq
kikkunnik isumalluutigineqarsinnaassasoq, akissarsiarissaartut,
initaarniarlutik utaqqisut allattorsimaffianni naluunaarsorneqarsimasutut
oqaatigineqartut, taakku imaluunniit isertitakinnerit.
Taamatut
aperinermut atatillugu paaserusunnarpoq suminnganniit ilisimaneqarnersoq
pisortat inissiaataannik initaarniarlutik utaqqisut isertitaqqortuujunersut
isertitakitsuunersulluunniit. Siunnersuuteqartumut erseqqissaqqussavarput
aamma suna pillugu BSU-kut taarsigassarsisitsisarnermut aaqqissuussineq
iluatsinngitsutut nalilerneraa. Pissutsit suut taamatut naliliinermi
tunngaviuppat? Aamma soorunami ukua apeqqutit akineqanngitsut
saqqummiussissummi maani akineqarnissaat kissaatigissavarput.
Taava
Per Rosing-Petersenip pingaartippaa inuit namminerisamik ineqalernissaminnut
periarfissaqalernissaat. Inuit Ataqatigiinni piviusorsiortuusorinngilarput
pisortat inissialiortartussatut isumalluutigineqarunnaavinnissaat.
Upperaarput innuttaasut ilaqartuassasut pisortat inissiaataaniinnissaminnut
atorfissaqartitsisunik.
Uppernarsaatit
ilaat taamatut naliliinitsinnut atuarneqarsinnaapput ippassaani attartortumit
piginnittuulernermut peqqussutissatut siunnersuutip nassuiaataanni.
Kisitsisitigut
piviusumik tunngaveqarluni assersuutit matumani innersuussutigissavagut,
taamaammat inuiaqatigiit innuttaasut ilaannut akisussaaffeqarnerat
sumiginnarneqassanngilaq. Pisortat inissiaataat najoruminartuussapput
alianaatsumillu avatangiiseqartariaqarlutik, apeqquserusunnarporlu ilumut
inuit pilluarnerulissanersut inigisartik namminneerlutik pigilerpassuuk.
Qallunaat
Nunaanni Centrumdemokratit tamanna pingaartitarigaat ilisimaneqarpoq. Inuit
Ataqatigiinni inuit namminneq illuminnik piginnittuunissaat
pingaarnerpaatitarinngikkaluarparput, kisianni suleqataarusuppugut tassa
erseqqissarupparput taanna isertitaqqortuut kisimik piginnittuusinnaanermut
periarfissinneqannginnissaat anguniarlugu.
Aamma
isumaqarpugut Inatsisartuni ineqarnermut tunngassuteqartut ippassaanikkunnili
maani inimi siullermeerneqartut periarfissiilluartut
aningaasalersueriaatsimut nalilersuiffiginissaannut.
Taamaamat
siunnersuutigissavarput aningaasalersueriaatsit Ineqarnermut
Ataatsimiititaliami oqallisigineqalerpata ilanngullugu eqqartorneqassasoq,
piginneqatigiilluni inissialiornermi pisortanit tapiissutit
assigiinngiiaartinneqarsinnaannginnersut, inuit isertitaqqortussiat
tunngavigalugu tapiisoqartalerluni.
Ilami
nassuertigisariaqarpoq ullumi piginneqatigiilluni inissialiornissamut pisortat
annertoorujussuarmik tapiissuteqartarmata, maanakkullu peqatigiilluni
inissialiortitsissagaanni aningaasarissaartuusariaqarmat. Siorna Per
Rosing-Petersenip oqaluuserisassanngortitaanut oqaaserisimasagut
innersuussutigalugit ullumikkut oqaaserisagut innersuussutigalugit
nalunaarutigissavarput aalajangiifigisassatut siunnersuut taamatut
isikkoqartillugu akuersaarsinnaannginatsigu.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Asii
Chemnitz-Narup qutsavigaarput. Tulliuppoq Kattusseqatigiit oqaaseqartuat
Anthon Frederiksen. Anthon Frederiksen oqaaseqartinnagu isumaqarpunga una
inissereertariaqartoq siulittaasunut apeqqut isigisariaqarmat Inuit
Ataqatigiinninngaaniit ippigineqartoq, tassalu ukioq ataaseq
qaangiutinngitsorluunniit oqaluuserisaq taannarpiaq aammaarluni
oqaluuserisassanngortinneqartoq ippigineqarmat. Taanna pillugu
oqaatigissavara ukioq manna inissaaleqineq pillugu annertuumik aamma
inuiaqatigiinni oqallinneqarmat.
Taamaattumik
siulittaasoqarfiup angersimavaa Inatsisartut una Inatsisartut ilaata
siunnersuutaa oqaluuserineqassasoq. Inuiaqatigiit oqallisigisaat
ineqarnermut tunngasoq annertooq, tassani isumaqaratta
siulittaasoqarfimminnganniik nalilersuiuartoqartariaqartoq, taannalu pillugu
angersimalluta.
Aamma
ilisimasitsissutigissavara apeqqut taamatut illuinnaqqissaartoq siorna
Lars-Karl Jensenip oqaluuserisassaatitaa maannakkut 24. april immikkoortoq
55-i pilerutsigu qaqinneqaqqittussaammat. Taanna ilaatigut imatut
qulequtaqarpoq; toqukkut qimaguttut Kalaallit Nunaannut assartorneqarneranni
aningaasartuutit akilerneqartarnissaat pillugu aalajangiiffigisassatut
siunnersuut.
Taanna
maannakkut Inuit Ataqatigiinninngaanniit qaffatsinneqarpoq. Apeqqutit tamakkua
nalilersortuarneqarnissaat Inatsisartuni tassaavoq uagut suliassarput.
Taamaattumik taakkua marluk angersimavagut, una maannakkut pineqartoq
aammalu pingasunngornermi 24. april pineqartussaq.
Neriuppunga
taanna paasissutissatut tiguneqassasoq. Tulliulluni oqaaseqassaaq Anthon
Frederiksen, Kattusseqatigiit.
Anthon
Frederiksen, Kattusseqatigiit oqaaseqartuat.
Inatsisartut
aalajangiiffigisassaattut siunnersuut pisortat inissialiortiterneranni
aningaasaliissutaasartut ilaasa aningaasaliisarfimmik pilersitsinissamut
atorneqarsinnaanngornissaannut, tamatumani siunertarineqarluni
inissialiortiternermi pisortat sanatitsisutut inissisimanissaannik
isumalluuteqarnerup annikinnerulerneqarnissaa, kiisalu nunami tamarmi
innuttaasut namminerisaminnik ineqalernissaannut pittaanerusumik
assigiiaarnerusumillu aningaasaliisarnermut periarfissaqalernissaat pillugu
Inatsisartuni ilaasortap Per Rosing-Petersenip siunnersuutaata
siullermeerneqarneranut Kattusseqatigiinniit imaattumik oqaaseqaateqassaagut:
Siunnersuut
arlalitsigut Kattusseqatigiinniit aamma siusinnersusukkut oqaluttarfimmiit
maanngaanniit saqqummiuttakkatsinnik imaqartoq tamakkiisumik taperserparput.
Tassami Kattusseqatigiinniit anguniakkatta ilagaat sapinngisamik innuttaasut
amerlanerpaat namminerisaminnik ineqalernissaat illoqalernissaalluunniit
anguniartariaqarmat.
Siullermik
inuiaqatigiinni ileqquliussimasatta ilaat ukiuni makkunani
ileqquliunneqarsimasoq tassalu pisortat inissialiuussillutillu
illuliuussisarnerat pissusissamisuugiinnalersimasutut ajoraluartumik
amerlasoorpassuarnik isigineqalersimammat.
Tamatta
eqqaamasariaqarparput siulivut nammineerlutik ilami allaat ukiat tamaasa
nammineerlutik illuliortarsimapput. Uagullu kingulliit illutaarniarutta
initaarniaruttaluunniit pisortat annerusumik kisiisa utaqqilersimavagut,
isumaqarluta pisortat qanoq iliuuseqanngippata initaarsinnaanata. Naagga
taamatut eqqarsartaaseqarnerput allanngortinniartariaqarparput.
Nammineerluni
illulioriaaseq nunaqarfinni ingerlanneqartoq assersuussat ajunngitsut ilagaat.
Tassa ilaqutariit inuillu ataasiakkaat namminneq initaarnissamut
peqataanikkut akisissaassuseqarnikkullu peqataanerusariaqarnerat
Kattusseqatigiinniit isumarput naapertorlugu annertusarneqartariaqarpoq,
tassami ukiuni makkunani nammineernerulernissarput eqqartorparput, ilaatigut
inuit ilaqutariilluunniit amerlaqisut namminerisaminnilluunniit ineqaratillu
illoqanngitsut.
Tassa
inuit ilaqutariillu amerlanerpaat pisortat inissiaataanni maannakkut
najugaqarmata. Kattusseqatigiinniit isumaqarpugut inuiaat kalaallit timikkut
anersaakkullu aamma suli nukittunerulissagutta imminullu
tatiginerulissagutta aamma akisussaassuseqartumik pisussaaffeqartumillu
ineriartoqqinnissaat ineriartoqqinnissarput anguniarlugu namminerisamik
inerisamik ineqalernerup pingaaruteqassusia Naalakkersuinikkut suli
annerusumik tapersersorneqarnissaa Kattusseqatigiinniit annertuumik
inuiaqatigiit katitigaanerannut ineriartortinnerannullu
pingaaruteqartorujusuartut isigigatsigut matumuuna erseqqissaatigaarput.
Taamaamat
siunnersuuteqartup siunnersuummini periarfissat assigiinngitsut tikkuussutai
tamakkiisumik taperserpagut minnerunngitsumik aamma ukiorpassuanngulersuni
nunatta pissarititai atorlugit illulioriaatsip tassa Sikublockip
illersorneqarnerulernissaa anguniarlugu aningaasalersueriaatsimut
naleqquttumik pilersitsisoqarnissaa pisariaqarmat.
Kattusseqatigiinniit
aamma oqaatigissuarput nunaqarfinni nammineerluni illulioriaaseq tamakkiisumik
isumaqatigigatsigut, kisianni periutsip taassuma illoqarfiit ilaanni maanna
periarfissaalerneranut tunngatillugu illoqarfinni aningaasalersueriaatsip
eqqarsaatigeqqinneqarnissaa aamma Kattusseqatigiinniit
kaammattuutigerusupparput, tassami aningaasarsiorneq eqqarsaatigalugu
illoqarfinni nunaqarfinnilu ilaatigut assigiinnginnerujussuaq tamatumani
qivianngitsoorneqarsinnaanngimmat.
Ilanngullugu
Kattusseqatigiinniit aamma nuannaarutigaarput pisortat inissiaataasa
attartortunit pigineqalersinnaanerat aamma maanna eqqartorneqartoq
Inatsisartut 1998-imi ataatsimiinneranni saqqummiussimasatta maannamut
paasilluarneqalernera nuannaarutigigatsigu. Periarfissat taamaattut suli
annerusumik timitalerneqassappata pissusissamisoorluinnarpoq
aningaasateqarfimmik siunnersuuteqartup siunnersuutaatulli pilersitsinissaq
tapersersorneqartariaqarpoq. Taamatut naatsumik oqaaseqarluta suliap
aappassaaneerneqannginnerani Inatsisartut ineqarnermut ataatsimiititaliaani
suliarineqarnissaa inassutigaarput.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Anthon
Frederiksen qutsavigaarput. Taavalu tulliulluni oqaaseqassaaq Per Berthelsen
attaviitsoq.
Per
Berthelsen, attaviitsoq.
Siullermik
tassa taalaassavara siunnersuutini itigariarluni ukioq affaq imaluunniit
ilivitsoq qaangiukkaangat miloriusseqqittarneq taanna uparuarniaraluarakku,
kisianni tassa siulittaasoqarfimminngaanniik nassuiaat ataqqillugu
tusaatissatut tiguara.
Assigiinnerusumik
atugassaqartitsinissaq politikkikkut suliaqartugut akisussaaffipput aap,
taanna ilumoortutut akerusuppara, kisianni aamma pisussaaffittut uanga
tunginninngaannit isigaara inuiaqatigiinni politikkikkut ingerlatsinitsinni
artukkiisinnaanermut ammaasinnginnissarput.
Siunnerfik
ajunngikkaluaqaaq, kisianni allatut ajornartumik minnerunngitsumillu
aningaasanut attuumassuteqartut immaqa inuiaqatigiinni ilaqutariinnut inunnut
ataasiakkaanut amikkisaartilluni sutigut tamatigut peqqissutsimut allaat
sunniisinnasumik naqisimannissutaasartut. Tamakkua
pilersinnaveersaartariaqarpagut.
Taamaattumik
minnerunngitsumik aningaasat pineqartillugit iviusorsiortumik
saqqummiussisarnissarput naliliisarnissarpullu pingaaruteqarluinnartuuvoq.
Uanimi aallarniutaapput illu, inuiaqatiginni assigiinnerusumik
atugassaqassagutta pisariaqartitagut amerlaqaat. Taava suut tulliutissappat.
Siunnersuuteqartup tusagassiutitigut annertuumik qaqqaqalaarutigisarpaa,
tapiissutit, taamaalillunilu inuiaqatigiit isumalluuteqarnerit
piiarneqartariaqartut.
Ilaatigut
aalajangersimasumik angissusilerlugu ukiumoortumik qallunaat
nunaanninngaanniit nunatsinnut tapiissutitut nakkartinneqartartut
eqqarsaatigalugit. Saniatigulli soorluli oqqap aappaa atorlugu tapiisutit
nutaat isumalluutissallu nutaat pilersinnissaat ilalersorlugit. Tamanna
paasiuminaassinnaavoq saqqummiunneqartoq una nutaanik imalerlugu, tassami
ukioq ataaseq piffissaanikuummat nalilersueqqinnissamut.
Inuit
Ataqatigiit oqaaseqartuata Asii Chemnitz Narupip oqaatigisaatut
nutaartaqartumik soorlu saqqummiussisoqaraluarpat nalilersuinermi
itisilerutaasinnaasunik paasinninnermullu sakkortusaataasinnaasunik ukioq
taanna atorneqarsimagaluarpat immaqa pimoorullugu una
sammineqarsinnaassagaluarpoq, kisianni tassa taamaanngilaq.
Taamaattumik
uani sumilluunniit taaneqarsimanngimmata ileqqaarinerup
pingaaruteqarsinnaanera, taamaattumillu inuiaqatigiinnut una
kiffartuussiniarneq pitsaanngitsumut sangusinnaammat sinnassaataalerluni.
Taamaattumik
uanga maannamut attartuisumiit piginnittusinnaanermut tassa pisortat
inissiaataat eqqarsaatigalugit aqqutissamik pilersitsiniarneq taanna
alloriarnertut pitsaasutut siullertut isigalugu tapersersorpara, uanilu
saqqummiunneqartuni nalunaarutigissallugu Naalakkersuisut nalilersuinerat
aammalu uani nassuiaateqarnerat inassuteqarnerallu isumaqatigilluinnarakkit,
sumilluunniimmi saqqummiussami eqqarsaatigineqanngimmata namminerisamik
illutaraluaraanni ulluinnarni aningaasartuutit qanorluunniit
piumanngitsigigaluarutta ingerlaavartumik nammatassagut.
Kiassarnermut
attuumassuteqartut, nunagissaanermut attumassuteqarsinnaasut,
innaallagissatigut kuuffitsigut attavilersuinermut aamma
attuumassuteqarsinnaasut, minnerunngitsumillu aamma pigisap nammineq pigisap
akisussaaffigalugu aserfallaatsaaliornissaanut akissaqarnissat. Allaammi
imaalersinnaavoq namminerisamik inissaqartitsiniarneq taanna pinermik
akissaaleqineq peqqutigalugu najugarisat taakkua
peqqiinnarluinnartunngorsinnaanissaat. Tamakkua uagut
aqqutissiuussinnaanngilagut.
Isumaqarpunga
tassani pingaartuujuassasoq taamaattumillu aamma aningaasaqarniarnikkut
illikartiterivigissallugu pingaarnerusoq innuttaasut amerlanerpaasut
attartugaagaluarpalluunniit inissaqarsinnaanissaata qulakkeerniarnissaa
tassanilu suliniarnermi salliutillugu pisortat inissiaasa pitsaasuunissaat.
Saqqummiunneqartumi
oqassaanga aningaasaateqarfimmik pilersitsisoqassappat pitsaanerugaluarpoq
taava uanga isiginnittaasera aallaavigalugu isertitat aallaavigalugit
najugaqarnermut akiliisarnerup arlaatigut ilusilersuunniarsinnaanissaa.
Taamak ililluni isertitani procenti aaliangersimasoq sinnerlugu
akiliisannginnissap qulakkeerniarnissaa. Taava isumaqarpunga siunertaqartoq
inuiaqatigiinni atukkat aallaavigalugit assigiinnerusumik
tunngavissaqarnissamik pilersitsiniarneq.
Taamatut
oqaaseqarlunga nalunaarutigissavara saqqummiunneqartoq una nammineq
isumaqatigisinnaannginnakku, patsisilersuutit maani taakkartukkakka
aallaavigalugit, taamaattumillu Naalakkersuisut nalilersugaat saqqummiussaat
inassutigisaallu uani isumaqatigilluinnarakkit. Qujanaq.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Per
Berthelsen qutsavigaarput, tulliullunilu oqaaseqassaaq siunnersuuteqartoq Per
Rosing Petersen.
Per
Rosing-Petersen, siunnersuuteqartoq, Siumut.
Qujanaq.
Akissuteqartunut tamanut, Naalakkeruisunut, partiinut Kattusseqatigiinnut,
soorunami aamma attaviitsumut qujarusuppunga.
Siullermik
Naalakkersuisut akissuteqaataanut oqarusuppunga, suu takusinnaavara aamma
tunngaviusumik paasillugu saqqummiisut aamma ilaatigut takusinnaavara siorna
taamaasikanninnerani aamma siunnersuuteqarninni ilaatigut aamma
aallaaveqarsinnaasut ilaatigut takusinnaagakku ilisanartoqartoq, tassa
ilaqutariinni akunnattumik qaffasissumillu isertitalinnut nammineq
illutaarusuttunut arlaatigut suliniuteqarlutik aallartissimanerannut
tunngassuteqarsinnaasoq, siorna itigartitsissutigineqarsimagaluartoq
takusinnaagakku misileeqqippunga.
Maannakkut
itisilernerullugu nassuiaatertaqarnerulertillugu ilaatigut
neriuutigigaluarakku
taamaalillugu paasinarnerulersimassagaluartoq, kisianni ilaatigut partiit
ilaanninngaaanniit taamaassorinanngimmat ajusaarutigissavara.
Tassa
uani pineqarpoq nalungilarput illoqarfimmi maani qiviarutta assigiinngitsuni
inissiarpassuit assigiinngitsut takussaasarput, aammalu inissianik
piginnittuunata inissisimanerput toqqammavigalugu aamma kusanarnerpaarsuartut
pinngortitamut aamma uanga takujuminaatsittarpakka. Saniatigullu illuinnarni
illoqarfinni minnerulaartunut pigaanni illuinnarnik ineqartut imalunniit
illoqartut kusanarnerujorujussuullutik naapertuunnerullutik nunatta
sananeqaataa imaluunniit iluseqaataanut isigisarakkit aamma taamaasilluni
illuliorneq annertusarlugu aamma illuliornerit piinnarnagit mesterleeqqanik
taasartakkagut periarfissaqarnerulernissaat siunertaralugu una sananikuuara.
Taakkua aammalu ingeniørit assigiinngitsullu uani
oqaloqatigiilluareerneratigut kingornatigut.
Naalakkersuisut
ilaatigut oqaaseqatimini qupperneq aappaani qeqqata missaani oqarpoq
siunnersuummi oqaatigaa qanorluunniit amerlassusilinnik
isertitaqaraluaraanni nammineq illuliorsinnaneq periarfissaqartariaqartoq.
Taanna immaqa eqquinnerpaarsuunnginnami uanga oqarama takornartaanngimmat
nunani allani soorlu sulisartut SIK-mut assingusuni ilaasortat ilaatigut aamma
ajornanngiivissumik taamatut periarfissinneqarmata.
Taamaattumik
aamma uagut nunatsinni taamannak periarfissiinissamik ammaassisoqarnissaa
kaammattuutigigakku. Taanna taamatut saqqummiuppara. Taavalu aamma
Naalakkersuisup aamma tikillatsiarpaa aamma oqaaseqartup kingulliup Per
Berthelsenip tikillatsiarpaa, ilutaarniaraanni assigiinngitsorpassuit kiammut
kallerup inneranut aserfallattaaliuinermut, isumaqarpunga tamakkua
pisariaqanngikkaluartut qallussallugit tassami kialluunniit nammineq
illutaarusulluni piumassuseqartup tamakkua tamaasa nalunngittariaqarpai.
Aamma
qularinngilara taakkua illutaarusuttunik nalunnginnittoqassagaluartoq.
Qupperneq
pingajuanni Naalakkersuisup ukua taakkartorpai assigiinngitsut
aamma10/40/50-imik aningaasalersuisinnaaneq atorlugu iluliorsinnaaneq
sumiluunniit atorneqarsinnaasoq tassani periarfissaanera taammagu.
Eqqaasissutigilaarusuppara tassa 10/40/50-imi imaakkami 10%-i nammineq
aningaasaliissutaavoq, 40%-ii
kommunit imaluunniit Namminersornerullutik Oqartussat aningaasaliissutissaat,
50%-ii atorneqartussaapput.
Tassanilu
nalinginnaavoq illoqarfinni taakkua sisamani taakkartukkanni Qaqortoq, Nuuk,
Sisimiut Ilulissallu. Taakkua kreditforeningit aqqutigalugit tassa
aningaasalersuisarfik uani siunnersuutiga toqqammavigalugu ilaa taamannak
atorneqartarpoq.
Taamaattumik
Narsamiikkutta Paamiuniikkutta Maniitsumiikkutta Qeqertarsuarmiikkutta
assersuutigiinnarlugu taanna periarfissaq Kangaatsiamiluunniit 10/40/50
atorneqarsinnaanngilaq, imaluunniit
atorneqarsinnaavoq immaqa banki erniakkaarujussuit periarfissat atorlugit,
kisianni kreditforeningit ukua nunatsinni immikkoortortaqartuartut taamatut
periarfissiinngillat, taamaattuminguku ilaatigut taakku aamma
toqqammavigalugit una siunnersuut saqqummiukkiga taamaasilluni aamma
aningaasalersuisarnerit 10/40/50-itut ittut illoqarfinni sisamaannarni
atoratik aammali sineriammi kommuneni tamani atorneqarsinnaalernissaat
siunertaralugu.
Taamatttumik
uanga oqarusuppunga taanna eqquissutut takusinnaanngilara, takujuminaatsippara,
tassami soorlu oqarnittuut aningaasalersueriaaseq taanna toqqammavigalugu
kreditforeningimik ilaqarpata illoqarfiit sisamaannaat tassani
periarfissaqartitaammata.
Taava
taakku toqqammavigalugit soorunami Naalakkersuisut pisariaqartutut
isiginngikkaluaraat kisianni ilaatigut akissuteqaatiminni
periarfissiuussinermi aamma eqqartorpaat assersuutigalugu Islandimi modeleq,
Islands Boligfond, illuliornermi aningaasaateqarfik, taakkualu aamma tassunga
assersuutaasinnaappata aamma naatsorsuutigisinnaassagaluarpara
qinnutigissagaluarpara aamma Naalakkersuisup nassuiaassinnaasuuppagu
Inatsisartunut qanoq taanna Islandimi Boligfondi qanoq isikkoqarnersoq
soorunami assingusinnaassappat aningaasalersuisarfimmut aamma
soqutiginaateqarsinnaassaaq Inatsisartuni aalajangiinissami.
Siumuminngaanniit
oqaaseqartup Simon Olsenip tapersiinera soorunami nuannaarutigaara aamma
ilaatigut uuma allaassutigilaaramiuk Inuit Ataqatigiit oqaaseqartuata, Asii
Chemnitz Narupip,
eqqumiigimmagu
eqqaasitsissutigissavara, ilaatigut siullermik siunnersuut una saqqummiukkakku
partiip ilaasortaaffigisama Siumup itigartitsissutiginikuummagu, taassumalu
akornaniippoq ataatsimeersuarsimaneq Siumup iluani, taavalu Siumup iluani
ataatsimeersuarnermi taamatut iluseqartumik partiip anguniagaqalernissaa
tunaartaralugu aamma massakkut Siumut akuersisunut ilaalernikuugami
allaalluinnartutut uanga aamma pingaarutissaqartutut isigigakku.
Aamma
soorlu partiip Siumup tamakkua tamaasa eqqartorai, aamma pingaaruteqartutut
oqaatigisaat tassa kissaatigaat taakku suliffeqarfiit sanaartornermik
suliaqartut aaqqissuussivigineqassasut ajornannginnerusumik taamaattorli
aningaasarsiornermi nalinginnaasumik tunngaviit naapertorlugit sanaartugaasa
naammassineqarsinnaasut qularnaveeqquserneqartarnissaannik, tassa ilaatigut
naatsorsuutigaat mestaleeqqat tassani eqqartorneqartut. Aammalu kaammattuinera
taamatut suliatta ingerlaqqereersut paasillugit taamatut isikkoqarluni
ingerlaqqinnissaa kaammattuutigaa.
Atassumminngaanneersup
Jakob Sivertsenip ajoraluartumik oqartariaqarpunga tassani siunnersuutk
paasisimanngilaa. Paasisimanngilaa imatut oqarami: AIluarsaassinersuarmut
aningaasat siunertamut aalajangersimasut tassunga atugassatut
pilersaarusiorneqarpoq taakku toqqammaviginiarivut.
Taamaattoqanngilluinnaqqinnaarpoq.
Taanna anlægsfondi, iluarsaassinissamut aningaasaateqarfik tassanngaanniit
tigusinissamut oqartoqanngilluinnaqqinnaarpoq siorna oqaaseqarninni, aamma
massakkut siunnersuuteqarninni ukioq manna aamma taamannak
siunertaqanngilluinnarpunga.
Nalunngilluinnaqqinnaarpara,
imaassinnaavoq Atassutikkut ilaasortaata ilaasa tamanna suli nalugaat,
kisianni taanna aningaasaateqarfik attorneqarsinnaanngilaq, taakkununnga
taamaallaat pituttornikunut aningaasanut atorneqarsinnaasoq uagut
nalunnginnatsigu taamaattumik taamatut isikkoqartinngilarput
siunnersuusiornitsinni. Taanna soorunami ajuusaarnarpoq, ajuusaarnarpoq immaqa
oqaaseqartussaq uannut saaffiginnilluni pisimagaluarpat aamma taamaasilluni
paasisinnaanerusimassagaluarpaa taanna aningaasaateqarfik pineqanngitsoq.
Aamma
tassuunartaatigut qupperneq kingullermi Jakob Sivertsenip taakkartorpaa taanna
aningaasaalersueriaaseq 10/40/50, tassa illutaarusuttut illup nalingata
10%-ianik aallarniuseqqaariarluni 40%-imik Naalakkersuisunut imaluunniit
kommunenut atorneqartunut nammineq illuliorsinnaanermik periarfissat
ammaanneqartut eqqarsaatigigigaanni. Atassummiit isumaqarpugut siunnersuummi
anguniagassatut saqqummiunneqartut immikkut aningaasalersuinngikkaluarluni
siunertaq ajornanngitsumik piviusunngortinneqarsinnaanngortoq, kisianni
Naalakkersuisut akissuteqaataanni aamma uani oqarusuppunga taakkua
10/40/50-sini 50% aningaasalersuisarfinninngaanniit atorneqartarpoq.
Taamaattumik tassani aamma pisariaqarluinnarnerata aningaasalersuisarfiup
takutiinnarpaa.
Asii
Chemnitz Narup Inuit Ataqatigiinninngaanneersoq, sineriammi nalugussiuk Asii
Chemnitz Narup uanga akinnguanni allaffeqarpoq, issiavitsinninngaanniit
nikuinngikkaluarluta immaqa nipivut nipittulaariarlugit immitsinnut
oqaluussinnaasarpugut.
Taamaattumik
apeqquterpassuit uani taakkartugai immaqa akisinnaasimassagaluarpavut
oqaloqatigiinnikkut, aamma nalunngilara ingeniøri siunnersuisartoq uuminnga
siunnersuummik tapersersuisoq Asii Chemnitz Narup pulaarnikuusoq
nassuiaassiartorluni. Tamakkualu assigiinngitsorpassuit apeqqutit immaqa
qulaareerneqarsimassagaluarput taamannak aggiussimagaluaruni.
Taamaattumik
itigartereerlugulu apeqqutinik piumasaqaateqassappat uanga
tunngavissaasorivallaarsuunngilara. Tassami ilaatigut assigiimmik
periarfissiinissamut eqqartuineratigut akissaqarnerusut ilaatigut tamaani
taakkartormagit oqarusuppunga imannanguna nalunngisatsituut takusinnaavagut,
oqareerpugut 80%-it inissialiornermi imaluunniit inissaqartitsinerup 80%-it
pisortatigut sanaartornerat sanaartortitsivoq piginnittuullutillu.
Taakkunani
amerlasoorpassuit akunnattunik akissarsiaqartut isertitaqartartut aammalu
isertitaqarnerusartut taakkunanngarninngaanniit amerlasoorujussuit inissiani
assigiinngitsuni inissaqartinneqartarput atorfeqarnermikkut imaluunniit
utaqqisuni inissisimareerlutik taamannak initaarnermikkut assigiinngitsutigut
periarfissakinnertik, uani Nuuk kisiat eqqarsaatiginngilara.
Soorlu
aamma siunnersuuteqarninni eqqaagiga sineriammi kommunet 18-iupput,
taakkunanilu kommunet sisamaannaat aningaasalersuisarfimmik
periarfissaqarnerat toqqammavigalugu taamannak perususseqartut
piumassuseqartut periarfissinneqarnissaat toqqammavigalugu uani
periarfissiinissaq ammaakkusullugu taamannak siunnersuuteqaraluarpunga.
Kattusseqatigiinninngaanniit
Anthon Frederiksenip tamakkiisumik aamma siunnersuuteqarninnut tapersiinera
qujassutigissavara. Assigiinngitsorpassuit tassani eqqartugai, ilaatigut aamma
Asii Chemnitz Narupip ujartorsinnaasai taasinnaavagut, tassami isumaqaramik
inuiaat kalaallit timikkut anersaakkullu aamma suli nukittunerulernissaat
imminullu tatiginerulernissaat aamma akisussaassuseqartumik
pisussaaffeqartumillu ineriartoqqinnissaat anguniarlugit namminerisamik
ineqarnerup pingaaruteqassusia naalakkersuinikkut suli annerusumik
tapersersornissaa Kattusseqatigiit annertuumik inuiaqatigiit katitinnerannut
ineriartortinneqarnerannullu pingaaruteqartorujussuartut isigigatsigu matuuma
erseqqissaatigissavarput.
Tassuunartaatigut
erseqqissaatigigamiuk aamma sooq aamma eqqaamanerlunngikkukku sapaatip
akunneri arlalinnguit qaangiupput Inuit Ataqatigiinninngaanneersoq Asii
Chemnitz Narupi tarnillu nakorsaannik aamma apersorneqartillutik oqarami, inuk
utaqqiinnarani aamma nammineq piumassuseqarluni iliuuseqarnissaa
pingaaruteqartittorujussuullugu.
Uani
illuliornermi periarfissaq taanna ilaatigut toqqammavigalugu una siunnersuut
uanga saqqummiukkaluarakku taamaasillugu ajoraluartumik suli paasisimanngilaa
taannartaa.
Aamma
taamatukanneq Per Berthelseni tapersiinngitsoq paasivara. Ajoraluartumik
pappiliartai tigumminnginnakkit tassuunartaatigut annertunerusumik
oqaaseqarfigissanngilara, kisianni tassa paasiinnarpara ajoraluartumik taanna
tapersiinngitsoq. Qujanaq.
Jørgen
Wæver-Johansen, Ineqarnermut, Ataaveqarnermut Pilersuinermullu
Naalakkersuisoq, Siumut.
Qujanaq.
Isumaqarpunga, piffissaq kina kimut aperiartorsimasinnaasimagaluarnersumut
atussanngikkipput, kisiannili uani siunnerfigineqaqquneqartut aammalu
akissuteqaatigineqartut taakkua tunngavigalugit oqallisissasugut.
Uanga
partiit oqaaseqartui assigiinngitsut oqaaseqarfigilaarusuppakka. Siullermik
Siumut sinnerlugu Simon Olseni oqaaseqarnermini maluginiarpara Naalakkersuisut
periutsinik misissuinertik ingerlatiinnassagaamik Siumup kaammattuuteqarnera
Naalakkersuisut taanna maluginiarparput, aamma suliagut tassani
misissuinertallit taakkua ingerlateqqissavagut. Aamma maluginiarpara
siunissami aaqqissuussinerit suugaluarpataluunniit taava Siumuminngaanniit
kissaatigineqartoq anguniarneqassasoq kikkunnit tamanit
paasilertorneqarsinnaasumik aammalu atorneqarluarsinnaasumik siunertaqarluni
misissuinerit taakkua ingerlateqqinneqarnissaat. Aamma taanna soorunami
Naalakkersuisuniit siunertaraarput.
Simon
Olsenip ilanngullugu saqqummiussaqarnermini tassa suliatta
ingerlateqqinneqarnissaannut atatillugu maluguniarpara kissaatigigaat aamma
misissuinermut ilaatinneqarnissaat taamatut taarsigassarsisitsisarnermi ukiuni
amerlanerusuni illutaarnermut tunngatillugu taarsersorneqartarnissaat
atukkiunneqartut taakkua ujartorneqartut. Taanna qularutigineqassanngilaq amma
misissuinissatsinni ilaatinneqassammat, ilaatigut naluneqanngimmat ukiut
attartorfiusut sivitsoriartuaartillugit taava qaammammiit qaammammut
akiliutigineqartussat taakkua annikinnerusarmata. Taamaalillunilu ukiuni
amerlasuuni atorniartoqarsinnaappat taava aamma soorunami inuit amerlanerusut
taamatut illuliornissamut atorniarnissaminnut akissaqarnissaat
periarfissaalissaaq.
Aamma
maluginiarpara Siumup tungaaninngaanniit oqariartuutigineqartoq
soraarnerussutisiaqalernissamut tunngatillugu aningasaateqarfiit pingaartumik
nunatsinniittut, naluneqanngilaq aningaasaateqarfiit taakku tamarmik PFA
soraarnikkut aammalu SISA tamarmik peqquneqarnikuupput malittarisassat
najoqqutaralugit akiliutigineqartut ilaasortaninngaanniit 40%-ii minnerpaamik
obligationinut annaaneqarsinnaanngitsunut aningaasaliisutigissagaat.
Taamaattumik
aamma soqutiginarpoq uani Simon Olsenip ujartugaa aaqqissuussinissani
siunissami
obligationit
ilaatigut immaqa tunngavigalugit aaqqissuussisoqarsinnaannginnersoq,
taamaaliornikkut sulisartut allallu nunatsinni
soraarnerussutisiaqalernissaminnut ileqqaartartut taakkua aningaasaataat
nunatsinni kaaviaartinneqarnerulernissaat taamaalilluni
aqqutissiuunneqalersinnaammat.
Aamma
maluginiarpara aningaaseriviit taamatullu aningaasaateqarfiit matumani
siunissami aaqqiissuteqarnissani peqataanerunissaat ilaatigut ujartorneqartoq,
taanna aamma isumaqatiginarpoq.
Kiisalu
maluginiarpara Siumup tungaaninngaanniit sanaartortut assigiinngitsutigut
qularnaveeqqusiisarnermut tunngatillugu atugassarisitaasa
pitsanngorsarneqarnissaat aamma Siumuminngaanniit kissaatigineqartoq. Taanna
uungarpiaq siunissamut uunga atasumik aaqqissuussinissamut allaalaartutut
isumaqarfigigaluarpara immikkut taanna misissorneqartariaqartoq allamut
tunngatillugu, kisianni eqqaamasassanut ilanngutissavarput.
Atassutip
tungaaninngaanniit Jakob Sivertsenip saqqummiussai maluginiarpara
Naalakkersuisut suliniuteqarnerat taanna Atassutip tungaaninngaanniit
tapersersorneqartoq. Iliuutsit upernaaq manna saqqummiussagut
isumaqatigineqarput aammalu assigiinngitsunik nammineq illutaarnissamut
imaluunniit nammineq inissiataarnissamut periarfissaqarluareernera Atassutip
tungaaninngaanniit tikkuartorneqarpoq.
Taava
aningaasat suminngaanniit aaneqarnissaat eqqarsaatigalugu maluginiarpara Jakob
Sivertseniminngaanniit oqariartuutiginiarneqartoq tassaasoq aningaasat
iluarsaassinissaminngaanniit aaniarneqannginnissaat taanna Atassup
tungaaninngaanniit pingaartinneqartoq, iluarsagassat taakkua salliutillugit
suliarineqartariaqarmata.
Inuit
Ataqatigiit oqaaseqartuat Asii Chemnitz Narupip ilaatigut ujartorpai
aningaasaateqarfimmik taamaattumik pilersitsisoqassappat, taava qanoq
malittarisassaqartoqarnissaanik, kikkunnut sammitinneqarnissaanut
allarpassuarnullu tunngassuteqartunik malittarisassat tassani
erseqqinnerusumik aatsaat paasisaqarfigalugit taamatut
aalajangiisoqarsinnaaneranik oqariartuuteqarpoq. Tamannarpiaq aamma
tunngavigalugu soorunami ilaatigut Naalakkersuisut akissuteqaataat taamatut
iluseqarpoq, tassalu misissuinerit siunissami aaqqiissutissanut soorunami
ingerlatiinnarneqartariaqartut, kisiannili aalajangiisoqassappat taava
aalajangiinissamut tunngavissat erseqqinnerusut aatsaat pigineqalerpata
aalajangiisoqarsinnaasoq.
Initaarusullutik
utaqqisuni allattorsimasut isertitaqqortuujunersut, naluara taanna taamatut
eqqoqqissaartumik oqaatigineqarsinnaanersoq. Initaarniarlutik utaqqisut affai
35-t inorlugit ukioqarput. Taamaattumik taakkua akornanni qassit
isertitaqqortuujunersut taanna oqaatigisinnaanngikkaluarpara, kisianni tassa
inuusuttuupput inissaminnik utaqqillutik allattorsimaffimmut allatsissimasut
affaasa missai.
BSU-t
imaluunniit boligstøtte aqqutigalugu tapersiilluni illutaartitsisarnermi
aaqqissuussineq iluatsissimanngitsutut immaqa tamakkiisumik
oqaatigineqarsinnaanngilaq, tassami naluneqanngitsutut BSU kapitali 4
najoqqutaralugu illutaarsimasut ilaqutariit 2.980-iupput nunatsinni, taakkulu
ukiorpassuarni inigisartik illortillu taanna soorunami iluaqutiginikuuaat.
Taamaattumik aamma imaaliallaannaq tamarmi aaqqissuussineq taanna tamarmi
ajortuinnartut nalilissallugu immaqa ingasalaarpoq. Kisianni
aaqqitassaqartoqarnera tassani BSU-mi kapitali 4-mut tunngatillugu taanna
qularutigineqarsinnaanngilaq. Taamaattumillu aamma majip
aallaqqaataaninngaanniit 128.000 inorlugit akissarsiallit taakkua akiitsumi
sinnerinut isumakkeerfigineqarnissaminnut periarfissaqartinneqarput. Taannalu
ukiaq Inatsisartuni aalajangigaraarput.
Taamani
aamma BSU-t oqaluuserigatsigit ilanngullugu aalajangiupparput misissuinerit
siunissamut BSU kapitali 4-mut tunngatinneqartut taakkua ingerlatinneqassasut.
Tassungalu tunngatillugu ukiamut annertunerusumik taakkununnga tunngatillug
saqqummiussaqarnissarput naatsorsuutigaarput.
Piginneqatigiilluni
illuuteqartarnermut tunngatillugu nalilersorneqarsinnaasutut Inuit
Ataqatigiinniit oqariartuutigineqarpoq immaqa piginneqatigiilluni
illuutileqatigiinngortarneq taanna isertitaqqortussuseq najoqqutaralugu aamma
aaqqissuunniarneqarsinnaanersoq misissorneqartariaqartoq. Taanna soorunami
misissorneqarsinnaavoq, kisianni Naalakkersuisut tungaaninngaanniit una
upperineruvarput attartorneqarsinnaasut piffissami sivisunerusumi
utertinneqarnissaat suliarineqartuuppat, taava aamma inuit amerlanerusut
akissaqartilissagaluarpaat aaqqissuussinermi taamaattumi peqataalernissartik.
Taamaattumik taanna aallaavigissallugu qularnanngitsumik aamma
allaffissornikkut ajornannginnerujussuussaaq, aammalu inunnik
assigiinnerusumik pinninnissamut aqqutaasinnaalluni.
Kattusseqatigiit
oqaaseqartuannut Anthon Frederiksenimut oqaatigerusuppara maluginiarakku
ilaatigut oqaatigigaa issuaavunga: "Naagga taamatut eqqarsartaaseqarnerput
allanngortinniartariaqarparput.@" Taanna Naalakkersuisuniit isumaqatigaarput,
taamaattumik sapinngisarput naapertorlugu periarfissat
amerlaneruneraluttuinnartut taamatut nammineq illutaarnissamut
inissiataarnissamullu periarfissat saqqummiussuuppagut, taamaaliornikkut
eqqarsartaaseq aammalu nammineq pigisamik ineqalernissamut periarfissat
taamaaliornikkut annertusassallugit.
Sikublockimut
tunngatillugu uani Kattusseqatigiinniit aamma ujartuisoqarpoq ilaatigut
nunatta pissarititai atorlugit aningaasalersueriaatsimut naleqquttumik
pilersitsisoqarnissaa ujartorneqarluni. Tassunga tunngatillugu
Kattusseqatigiit innersuukkusuppakka tallimanngormat kingullermi Siku Blocki
pillugu oqallinnitsinni oqaatigineqartunut. Tassani Naalakkersuisuniit
taamatorpiaq siunnerfilimmik ujartuisoqarneranik imaluunniit
suliaqartoqarneranik misissuisoqarneranik oqariartuuteqarpugut. Taamaattumik
taanna suliarineqareerpoq.
Maluginiarpara
aamma Kattusseqatigiinniit nuannaarutigineqartoq attartortumiit piginnittumut
maannakkut saqqummiussisoqarmat aammalu namminneq 1998-imi taamatut
saqqummiussaqarsimanerarput.
Tassa
ilumoorpoq inuppassuupput taamatut ukiut ingerlanerini isummamut tassunga
assingusumik saqqummiussaqarnikuusut. Uagut Naalakkersuisuni
nuannaarutigineruarput taamatut isummat takorluukkallu
piviusunngortinneqarnissaannut tunngatillugu qanoq
piviusunngortitsisoqarsinnaaneranik ilusissamik upernaaq manna
saqqummiussaqarsinnaagatta.
Attaviitsuniit
Per Berthelsenip oqaatigisaanut tunngatillugu oqaatigerusuppara ilaatigut
ilumoormat aamma BSU kapitali 4 eqqarsaatigalugu eqqaamassagatsigu
aaqqissuussinerit innuttaasunut artukkiisut taakkua soorunami siunissami
pinaveersaartinneqartariaqarmata.
Aamma
maluginiarpara Inatsisartuni ilaasortap Per Berthelsenip isertitat
aallaavigalugit taamatut aaqqissuussisoqarsinnaannginnersoq ilanngullugu
nalilersuinermi ilaatikkusukkaa, tassanilu oqaatigerusuppara isertitat
aallaavigalugit qaffasinnerpaaffiliilluni massakkut inissiani
attartortittakkani pisortat pigisaanni husleje massakkut ineqarnermut
akiliutit aaqqissuunneqarnikuupput. Massakkut pisortat pigisaanni inissiani
attartortinneqartartuni ineqarnermut tapiissutit nutaamik
aaqqissuunneqarnerisa kingunerisaannik ineqartut tamarmik annerpaamik
isertitamik 20%-ii tikillugit akiliutigisarpaat. Annerpaamik. Qanorluunniit
isertitaqaraluaraangamik. Taamaattumik taanna isuma tassuunatigut
piviusunngortinneqareernikuuvoq Inatsisartuni.
Naalakkersuisut
akissuteqaatigisimasaat siunnersuuteqartumit ilaatigut isumaqatigineqaratik
oqariartuutigisavut ilaat saqqummersinneqarput. Naalakkersuisut ilaatigut
oqaatigivaat ullumikkut periarfissaareersut aallaavigalugit
oqaatigineqarsinnaasutut isigalugu nunatsinni innuttaasunut piumassuseqartunut
nammineq illutaarnissaminnut periarfissat ammatinneqareersut. Aamma
taamaassoraara. Illoqarfinni, nunaqarfinni, avinngarusimasuni isorliunerusuni
suni tamani nammineq illuliassat 30.000 koruunillit tamanut periarfissaapput
qinnuteqaatigineqarnissaat. Soorunami tunniunneqarsinnaasut killeqartarput
tassani aallaaviusarmata Inatsisartuni uagut killiliussagut.
Taamaattumik
isumaqatiginngilara siunnersuuteqartup oqaatigimmagu makkua allat
aningaasartuutaasartut qallerneqarnissaat pisariaqanngitsutut
isigineqartariaqartut, kinaluunniimmigooq nalunngimmagu nammineq
illutaarniaruni aamma tamakkua ilanngullugit
nalilersoreersimasariaqaraluarlugit.
Taamaakkaluarpalluunniit
isumaqarpunga, saqqummiunneqartariaqartut nalilersuinermi ilaasariaqarmata
aamma unneqqarissumik immitsinnut oqarfigisariaqaratta allatut ajornartumik
nassuerutigisariaqarlugu nunatsinni inuit tamarmik akissaqalernavianngitsut
namminneq pigisaminnik illutaarnissaat, kisianni soorunami sapinngisamik
aaqqissuussinerit amerlanerpaat innuttaasunut iluaqutiginiarneqarsinnaasut
taakkua aqqutissiuunneqarnissaat uagut Naalakkersuisuniit aamma
soqutigisaraarput.
Siunnersuuteqartumit
itinerulaartumik Islandimi inissialiornermut aningaasaateqarfik, tassa
Boligfondip eqqartorneqarnissaa kissaatigineqarpoq. Tassunga tunngatillugu
oqaatigerusuppara Islandimi aaqqissuussinerit tamarmik aningaasaateqarfimmut
tassunga allaffissornikkut suliarineqarnissaat tunniunneqarnikuummat. Taava
innuttaasoq kinaluunniit illutaarusuttoq imaluunniit inissiamik piserusuttoq
aningaasaateqarfimmut tassunga saaffiginnittarpoq qanorlu
isertitaqartigisarnera, tassa aningaasatigut qanoq pisinnaasai tunngavigalugit
qaffasinnerpaaffilerneqartarput aningaasat atorsinnaasai. Taakkulu aningaasat
procentinngorlugit 90%-it tikillugit taamaalillutik atorsinnaasarpaat, taava
aningaasanngorlugit taakkua tunniunneqarneq ajorput.
Aningaasat
nalingi obligationinngorlugit tunniunneqartarput, obligationillu taakkua
soorunami aningaaserivinnit aammalu soraarnerussutisiaqarnermut
aningaasaateqarfinnit pisiarineqartarput Islandimi. Taamaalillutik
ileqqaarutit Islandimi atorneqartarput inuit illuliornissaannut. Taamaammanuna
nunatsinnut naleqqussarlugu aaqqiivigineqarsinnaanersoq taanna
soqutiginartikkipput, taamaaliornikkut aamma assingusumik nunatsinnut
eqqussisoqarsinnaanersoq massakkut misissorlugu suliarigipput.
Tassa
naatsumik taamatut akissuteqarusuppunga suliat maannakkut upernaaq manna aamma
sammisagut innersuukkusuppakka, taakkua annertunerusumik
piginnittunngornissamut periarfissiipput periarfissaareersut qaavisigut
aammali Naalakkersuisut suli misissuipput aningaasaateqarfittut ittunik
aaqqissuussisoqarsinnaanersoq misissorlugu. Taamaattumik taamatut
suliaqarnerput ingerlatiinnassavarput.
Simon
Olsen, Siumup oqaaseqartua.
Naatsuarannguamik.
Siumumi maluginiarparput Naalakkersuisup kaammattuutigisagut
paasilluinnarsimagai. Aammattaaq ilanngullugu oqaatigissavara uani
taaneqanngitsut assigiinngitsut misissorneqarsinnaasut ilagimmassuk aamma
nalunngilarput iluarsartuussinersuit aamma akitsoriaatsinik pilersitsisartut,
aamma taakkua soorlu siunnersuutigineqartutut siaarnerullugit taamaalilluni
aamma akikinnerusumik sivisunerusumik aningaasarsiakinnerusunut
inissaqarnerusumik aningaasatigut inissiisinnaaneq aamma
iluatinnarluinnartuusoq ilanngullugu oqaatigissagatsigu.
Taamaammat
inissaaleqinerup pilertornerusumik qaangilertorneqarsinnaanissaa
silinnerusumillu siunnerfeqaqqusinera siunnersuuteqartup Siumumiit
tapersersoratsigu aammalu Naalakkersuisut paasilluarmassuk tamanna assut
qutsatigaarput. Taamaalillutalu Naalakkersuisut suliaat ingerlaannaqqullugu
aamma isumaqatigilluinnaripput erseqqissaatigissavara. Qujanaq.
Jakob
Sivertsen, Atassutip oqaaseqartua.
Qujanaq.
Tassaana siunnersuuteqartup toqqarlunga oqarfigimmanga immaqa
pitsaanerusimassagaluartoq oqaasissannik suliaqannginninni ornillugu
paasiniaaffigisimagukku. Tassa uanga pingaartippara pappilissat
tunngavigalugit oqaasissiortaratta, pingaartumik uanga nammineq
oqaatigissavara Inatsisartuni sulineq nuannarilluinnarpara aamma
sapinngisannik malinnaaffiginiartarpakka saqqummiunneqartut tamarmik.
Aamma
uani siunnersuutinni oqaatigisatit toqqavissumik
isummerfigiuminaatsissimagakkit, taamaattumik sanilliussimavarput maannakkut
suliat ingerlanneqartut peqataaffigisagut. Ilaatigut aamma imatut allakkavit
issuaalaarsinnaaguma qujassagaluarpunga. Siunnersuutinni qupperneq 2-mi imatut
allapputit: "Inatsisartuusugut pisussaaffeqarpugut inuiaat kalaallit
sapinngisarput tamaat atorlugu assigiinnerusumik atugassaqartinnissaat sutigut
tamatigut isumaginiassallugu, tamannalu tunngavigalugu nammineq
illuliorusuttunut periarfissarititaasut qiviarutsigit
nassuerutigisariaqarparput nunatsinni taamatut periarfissaqartitsisoqanngitsoq".
Taanna
eqqortuunngilaq. Uani oqaatigaarput Illorput 2000. Uagut nammineq
misilittakkavut kommunemi erseqqissaatigissavakka. Sanaartorfissamut
aalajangersimasumik inissiinitsigut annat kuuffiinut, imermut tamarmik
atapput. Iserlugit nuanneqaat nammineq piumasut illuliarisaat.
Soorunami
aamma immikkut pilliuteqarput. Tamakku takullugit taamaattumik uani
siunnersuutinni periarfissaqartitsisoqannginneranik oqarnerit eqqortuunngilaq.
Kommunet mikigaluartut nammineq aamma peqataanermikkut innuttaasut
akissaqartorsuunngikkaluartut pitsaalluinnartumik inissisimapput.
Taamaattumik
oqarnerit atuarluarsimannginnermik taanna uanga tigorusunngilara.
Aamma
Naalakkersuisup erseqqissumik nassuiaataat akissutaat atuarpagut. Uagut
pingaartipparput nunatsinni aningaasanik qalaartunik peqannginnatta pioreersut
maannakkut naalakkersuinikkut peqqussutillu allanngortiternerisigut
ukiorpassuarni inissiani najugaqartuusimasut maannakkut qujanartumik kiisami
piginnittunngornissaminnik periarfissinneqarput, tassani immikkut
aningaasarpassuarnik pilliuteqanngikkaluarlutik. Isumaqarpugut tamakkua
ullumikkut alloriarnerit nutaat tikinneqartut atorluarneqarpata
siunnersuutinni anguniarneqartut ullumikkut sukkanerusumik anguneqarsinnaasut.
Maannakkut
tamakkua suli tamakkiisumik atorneqalinngitsut aamma allamik periarfissamik
innersuussissalluta nunarput akissaqanngilaq. Pioreersut aaqqissuullugit
atorluaqqaartigit, taava taakku naammanngippata periarfissaqassaaq aamma
allatut iliorluni periarfissiinissamut.
Taamaattumik
annertunerusumik oqaaseqarnanga Naalakkersuisup aamma akissuteqaataani
erseqqiivissumik misissuinerit ingerlanneqartut oqaatigineqarpoq, allaat aamma
Islandimi. Aamma maannakkuugallartoq erseqqissumik oqaatigaat akuerisinnaanagu
suliaq ingerlaqqissammat, taamaattumik uanga Naalakkersuisut akissuteqaataat
aamma erseqqimmat aamma oqaaseqaatigut uani aallaavigalugit siunnersuutip
maannakkuugallartoq ilaatigut paasiuminaannera tunngavigalugu
akuersaarsimanngilarput, kisianni soorunami Naalakkersuisut akissuteqaataat
taanna erseqqissoq tamakkiisumik taperserlugu suliniutinut ilanngunneqartoq
innersuussutigissavarput.
Kiisalu
aamma naggataarutigalugu oqaatigissavarput initaarniarluni inuusuttunik
periarfissiisimaneq. Tassa taanna aamma siunertaavoq pitsaasoq. Aamma
inuusuttorpassuupput siunissaminnik initaarnissaminnik bankini maannakkut
annertuumik uninngasuuteqarmata. Aamma taanna qujanarpoq, imaappoq inuusuttut
aamma siunissamik maanna eqqarsartut initaarnissaminnik
arlaqartorujussuummata. Qujanaq.
Asii
Chemnitz Narup, Inuit Ataqatigiit oqaaseqartuat.
Qujanaq.
Siullermik Inatsisartut siulitaasuannut qujarusuppunga paasitimmatigut
sunarpiaq tunngaviusimanersoq oqaluuserisassap siornaminngaanniit massakkumut
aamma qaqinneqarsinnaanngorsimaneranut.
Ilumoorpoq
ineqarnermut tunngasut ajornartorsiutaapput annertoorujussuit aamma Inuit
Ataqatigiinni piareersimavugut soorunami suleqataaffigissallugit. Uagut Inuit
Ataqatigiinni isumaqarpugut inissaaleqinerup annertutiginera imaluunniit
taamarsuaq annertutiginera tassaavoq ajornartorsiut annerpaarpaarpaaq
inissaaleqinerujussuaq. Aamma inissiat pitsaassutsimikkut
qaffassartariaqarnerat aamma taanna ajornartorsiutaavoq annertooq.
Pingajuattut
taarusupparput kvadratmeterimut akit sanaartornermi aamma
aqukkuminaatsorujussuullutillu qaffasippallaarujussuarnerat
ajornartorsiutaavoq. Kiisalu sisamassaattut tikkuanngitsoorusunngilarput
sanaartornermut iluarsaassinermullu aningaasaateqarfiup
ukiut kingulliit ukiup naanerani sinneqartoortarnera millionerpassuarnik.
Tamatuma ersiutigivaa pilersaarusiornerlunneq aammalu aqutsinerlunneq.
Taamaattumik
ajornartorsiutit taakkua annertupput imaannaanngitsuupput, taamaattumik
minnerunngitsumik aningaasalersueriaatsit qanoq ittut siunissami
tunngavissinneqarsinnaanersut eqqartussallugit pingaaruteqarpoq.
Taamaattumik
Per Rosing-Petersenip oqaluuserisassanngortitaa eqqumiilluinnartumik
misissorlugulu atuaqattaarlugulu pisimavarput. Aningaasalersueriaatsinut
tunngasoq pingaaruteqaqimmat. Taava soorunami pingaartissimavarput
aningaasaliisarfiup taassumap nutaassap kikkunnut
taarsigassarsititsisinnaasalernissaa taavalu aamma qanoq atugassaqartitsilluni
taarsigassaqartitsisalernissaanut tunngasut apeqqutit immikkut
ujartorsimagaluarpagut isumaqarluta tamakkua aamma
siunnersuusiorfigineqarsimassasut, peqqutigalugu taassumap
aningaasaliisarfissap nutaassap sanilliuttariaqaratsigu aningaasaleeriaatsinut
pioreersunut oqimaalutaasariaqaratta nalilersinnaassagutsigu una siunnersuut
aappimik tapersersorniarlugu imaluunniit itigartinniarnerlugu.
Ajorniussutigalugu tamakkua apeqquterpassuit qaqinngilagut maanngaanniit.
Jakob
Sivertsenip suleriaasia taavalu uagut Inuit Ataqatigiit suleriaaserput ugguuna
assingusimavoq, peqqissaartumik aamma siunnersuuteqartoq peqqissaartumik
soorunami utertiffigerusuttaratsigu siunnersuutaasoq sukumiisumik
nalilersorlugu. Taamaattumik misigisimavunga aappaatigut siunnersuuteqartoq
oqaaseqarfigigamitigut allaat nikassaarpalungajattumik uagutsinnut nipilimmik
oqaaseqartoq. Taanna nuanninngilaq aamma paasillaqquara peqqissaarnermik
tunngaveqarluta taakkua apeqqutit apeqqutigisimagaluaratsigit.
Taava
Jørgen Wæver-Johansen Naalakkersuisoq isumaqatigalugu oqaatigissavara
maanngaanniit kikkut kikkunnik oqaloqatiginnissinnaasimagaluarnerannik
oqalunneq piffissaajaatigisariaqannginnatsigu, aappaatigulli taanna
aalajangiusimavarput siunnersuut tunniunneqartoq agguaanneqartoq Inatsisartuni
ilaasortanut, taanna tunngavigalugu tassanilu saqqummiunneqartoq
tunngavigalugu naliliinissatsinnut periarfissaqartariaqarpugut.
Saqqummiussaq
Per Rosing-Petersenimit annertoorujussuuvoq aamma aningaasalersueriaaseq
taanna qitiutinneqarnera paasivarput, taava tassannganniit
avalequterpassuaqarpoq oqaluuserisassanngortitaq. Sorpassuit tikinneqarput,
kisianni tassa pingaartitatta aappaa aamma taamatut saqqummiussinermi
tassaagami tunngavilersorluakkanik saqqummiussinissaq inuiaqatigiinnut
Inatsisartunut ilaasortaqatinut, taamaattumik oqartoqarmat imaluunniit
siunnersuuteqartoq oqarmat akissarsiagittut aamma utaqqisut
allattorsimaffianni allassimasut, soqutigalugu taanna ujartuisimavugut
pisortaqarfinnut, Naatsorsueqqissaartaqarfimmut, A/S Inissiaatileqatigiiffik
INI-mut paaserusullugu inuit isertitaat taavalu utaqqisut allattorsimaffiat
paasissutissat taakkua kattunneqarsinnaanersut, taamaattoqarsinnaasuuppammi
soqutiginartorujussuussagaluaramik erseqqinnerusumik paasissallugu kikkunukua
utaqqisut allattorsimaffianni allatsissimasut. Taakkua paasissutissat datat
imminnut atassuserneqarsinnaanngimmata isumaqarpunga taamatut oqarneq
eqqoriaanerinnarmik tunngaveqartoq ajuusaarnaqisoq.
Paasivarput
oqaluuserisassanngortitsisup pingaartittorujussuugaa inuit namminneq
inigisartik pigissagaat. Aamma allaat ernumanartutut isigalugu massakkut
inissiat najugallup 80%-iisa pisortanit pigineqarmata. Aappaatigut nipi taanna
tujorminartorujussuuvoq, soorlulusooq pisortat inissiaataanni najugallit
oqarfigiartorai; Hej, ilissi pisortat inigisaanni najugaqarassi ernumanaqaasi.
Taamatut eqqarsartariaqanngilagut. Peqarniarneq pinnagu uagut allanik
tunngaveqarluta ineqarnermut politikkeqarpugut Inuit Ataqatigiinni.
Pingaartipparput
inuit kikkulluunniit inissaqartinnissaat. Pingaartipparput inuit
kikkulluunniit akilersinnaasaminnik inissaqartinnissaat. Aamma
pingaartipparput pitsaassutsip qaffasuunissaa taavalu aamma issittumut
naleqquttuunissaat. Inissiat aamma najukkat najoruminartut,
avatangiiserissaartut, tassani soorunami pinngortitaq eqqarsaatigivarput,
aamma eqqaamiut. Nuannersumik eqqaamioqatigiissinnaaneq taanna
pingaartittorujussuuarput. Aamma angerlarsimaffik inissiaq sunaluunniit
inuunermik nuannersumik toqqammavileeqataasinnaassasoq taanna
piumasaqaatigissavarput. Taava tassani pingaarnerunngilaq inuup nammineq
pigineraa imaluunniit attartortutut tassani inissiami imaluunniit illumi
najugaqarnersoq. Isumaqarpugut taanna tunngaviusumik isiginneriaaseq ideologi
taanna aamma illuatungilertariaqarpoq.
Ajornartorsiuterpassuaqarpugut
inuiaqatigiinni aaqqinneqartussat. Aap, kisianni aaqqiissutissatut matuersaat
tassaanngilaq namminersortunngorsaaneq peqarniarneq piinnarlugu aaqqiiniarneq.
Taanna uagut apeqquserujussuarparput.
Aamma
oqarpugut saqqummiinitsinni Per Rosing-Petersenillu saqqummiussaanut
naliliinitsinni eqqumaffigijuartariaqakkat tassaapput nammineq
akissaqalersinnaanngitsut qaquguluunniit nammineq pisinissamut. Taava tassani
Naalakkersuisup isumaqarpugut pissutsit pingaaruteqartorujussuit tikikkai
oqarami ileqqaaruteqartariaqarpoq taarsigassarsititsissagaanni. Tassa
taamaalluinnarami. Aamma ilisimavarput nunatsinni isertitat ima
naligiinngitsigipput nunaqqaterparpassuaqarpugut ulluinnarni ima
inuuniapiloortigisunik, ima isertitagissaartiginngitsunik
ileqqaarsinnaanatilluunniit. Taamaattumik pisortat aamma
pisussaaffeqartuassapput inissialiornissaq inissaqartitsinissarlu.
Per
Rosing-Petersenip akissaatikinnerusut isumakuluutigigunigit, taava uagut Inuit
Ataqatigiinninngaanniit isumaqarpugut akissaatit tunngaviusumik taava allatut
iluarsisariaqarput. Aamma isertitatigut naligiinnginnerujussuaq taanna
iluarsisariaqarpoq. Aamma Inuit Ataqatigiinninngaanniit upernaap ingerlanerani
oqaluuserisassanngortitsivugut imaluunniit siulittaasutta
oqaluuserisassanngortippaa akileraartarnermut tunngasut. Taakkua tikikkutsigit
soorunami qilanaassaagut tapersersorneqarnissarput naatsorsuutigigatsigu.
Jakob
Sivertsenip oqaatigivaa pioreersut tunuinnarlugit allanik nutaanik
pilersitsinissaq pioreersut nalilersorluaqqaarnagit taanna aqqutissaanngitsoq.
Isumaqarpunga oqartariaqarluta isumaqatigiittorujussuuvugut tassuuna.
Aningaasalersueriaatsit arlalipparujussuit pioreersut massakkut
ineqarniarnermut tunngasut ataatsimut isigalugit iluarsaqqinniarneqarmata
nuannaarutigaarput. Aamma isumaqaratta taakkua nalilersorluarneqartariaqartut.
Ilaat iluatinnarsinnaapput, ilaat allatorujussuaq ilusilerlugit
iluarsaanneqartariaqassapput. Aamma suliani taakkunani ataatsimiititaliaq
aamma aqqutigalugu suleqataanissarput neriorsuutigissavarput.
Taava
oqaatigilaassavara, uanga tupiginngilara Jakob Sivertsen ilaatigut
isumaqalersimammat Per Rosing-Petersenip aningaasat tassunga
aningaasaliisarfimmut isumalluutigisai tassaasut sanaartornermut
iluarsaassinermullu aningaasaateqarfimminngaanniit sinneqartoorutaasartut
ukiup naanerani. Peqqutigalugu Per Rosing-Petersen qupperneq 3-mi aningaasat
taakkua sinneqartoorutaasartut ukiup naanerani immikkut nammineq
taakkartoramigit. Uagut aamma aallaqqaammut isumaqarsimavugut taakkua
aningaasat isumalluutigalugit aningaasaliisarfimmik pilersitsisoqarnissaa
takorloorneqartoq. Kisianni qujanartumik radiokkut Per Rosing-Petersen
apersorneqarmat
taanna erseqqissarneqarmat paasitinneqaratta qujavugut. Tassa taakkuugallarput
Inuit Ataqatigiinninngaanniit oqaatigerusutavut.
Anton Frederiksen, Kattuseqatigiit oqaaseqartuat.
Inissaaleqineq annertuumik ajornartorsiutinut ilaasoq tamatta nalunngilarput. Aammalu tamatta oqaluttuarpugut aamma taassuma ajornartorsiutip sapinngisamik annikinnerpaaffissaa anguniartariaqartoq.
Taamaammat akissakinnerusut isertitakinnerusut periarfissinneqarnissaat annertunerusoq anguneqassappat isumaqarpunga Inatsisartut siorna aamma aalajangiukkaat akissaqarnerusut nammineersinnaasut inissiarsuarnilu pisortanit pigineqartuni ineqartut taakkua annerusumik suli aamma periarfissinneqartariaqartut nammineersinnaanerat anguniarlugu. Taakkua namminneq annerusumik imminnut isumagilissappata taava akissakinnerusut isertitakinnerusut taakkua periarfissaqarnerulissapput pisortat inissiaataanni ineqarnissaminnut. Taanna aamma Naalakkersuisut qujanartumik suliuniutigivaat, tamakkualu suliniutit nuannerput malinnaaffigalugit.
Taamaattumik tassungaannaq uniinnartariaqanngilagut, taamaammanuna Per Rosing-Petersenip suli periarfissanik allanik ujartuinera Kattusseqatigiinniit taperseripput paasilluarlugu, naak ilaatigut oqaluttoqaraluartoq siunnersuut paasiuminaatsinneqarluni. Uanga takusinnaanngilara paasiuminaatsortaa sumiinnersoq aamma isumaqanngilanga siunnersuuteqaraanni taava siunnersuummut malitsigitiinnarlugu malittarisassat apeqquteerarparpassuit assigiinngitsut tamaasa siunnersuuteqartup siullermeerneqarnerinnaaniluunniit tamaasa akiortariaqarai.
Aalajangiiffigisassanik siunnersuuteqaraangatta siunnersuuteqarnermut tunngatillugu suliassap aappassaaneerneqarnissaanut misissorneqarsinnaasarput apeqqutit assigiinngitsut. Suliakkiissutigineqarsinnaapput Ineqarnermut Ataatsimiititaliamut imaluunniit ataatsimiititaliamut arlaannut susassaqartumut.
Inatsisartut piumasaqarsinnaapput siunnersuummi uani paasisassat assigiinngitsut annertunerusumik pissarsiarerusuppagut suliassarlu Inatsisartut aalajangiinerisigut ingerlateqqinneqarsinnaavoq aappassaaneerneqarnissaata pingajussaaneerneqarnissaatalu tungaanut. Taamaammat isumaqarpunga pissusissamisoortutut oqaatigisinnaanagu aalajangiiffigisassatut siunnersuutip siullermeerneqarnerani imannak sakkortutigisumik siunnersuuteqartumut piumasaqassalluni apeqqutit tamarluinnaqqeqqissaasa akineqarsinnaanngorlugit saqqummiuttariaqarpatit, taamaaliunngikkuit siunnersuutit tapersersinnaanngilarput.
Isumaqarpunga tamatta suleqatigiissagutta ajunngitsumik periarfissarititaasut suleriaatsitta iluani, tassalu suliassaq aalajangiiffigisassaq pingasoriarluni suliarineqartussaavoq. Taakkua immikkoortut pingasut akornani misissugassat periarfissallu assigiinngitsut ujartorneqarnissaannut piffissaq isumaqarpunga atussagaanni pitsaanerpaajusoq. Aammalu naatsorsuutigaara Inatsisartut 1979-p kingorna inatsisartunngoramilli suleriaasissartik suliarigamikku tassani aamma periarfisseereertut.
Ullumikkut uagut Kattusseqatigiinni isumaliortaaserput malillugu inissaaleqinermi ajornartorsiutinut pissutaaqataasutut nalilertagarput aamma tassaavoq inoqutigiit tunngavigalugit akilersuisitsisarneq aammalu inoqutigiit tunngavigalugit pisartagaqartitsineq, soorlu utoqqalinersiutit, siusinaarluni sulisinnaajunnaarnersiuteqartut.
Utoqqaat assersuutigigutsigit ineqarnermut attuumavoq oqallisigisarput, utoqqaq ernuttaminik asasaminik najugaqateqarniarpat taava oqarfigineqassaaq: Illit pisartakkatit tapiissutigineqartartulluunniit inigisamut pisinnaanngilatit ernuttat imannak aningaasarsiaqarmat.
Aatsaat taanna anisikkukku pisartakkatit tamaasa pisinnaavatit. Ernuttat anisinniaruk. Allaat ullumikkut toqqaannartumik isumaginninnermik allaffeqarfimminngaanniit saaffigineqartarput. Isumaqarpunga tassaniittoq aamma ilaqutariinnik pisortatigoortumik avissaaartuutsitsineq inissaaleqinerujussuarmik kinguneqartoq. Allaat utoqqaat ilaannit oqarfigineqarpunga ukiorpaaluit matuma siorna: Illoq atorunnaarmat inissaaleqineq pilerpoq. Illoq atorunnaarmat ilaqutariit imminnut ataqatigiinnerat massakkut avissaartuutsinneqarput ilaqutariit. Taanna erseqqissorujussuuvoq. Inissaaleqineq annertusigaluttuinnarpoq pissutigalugu suut tamarmik inoqutigiikkuutaartumik isertitat aalajangersorneqarnerat aamma pissutaaqataalluni.
Isumaqarpunga, ajornartorsiutit assigiinngitsut inissaaleqineq qaangissagutsigu tamaasa qiviartariaqarivut. Illoqarfik Paamiut maannamut inissaaleqiffiunnginnerpaajusimasoq qiviarutsigu
ukiunilu ulluni kingullerni pisimasut qiviarutsigit Qasigiannguit assersuutigigutsigit. Qasigiannguani inissiat inuerukkaluttuinnarput. Meeqqeriviit matoorarneqarput, allaat ilaqutariit inissianut ataatsinut imminnut kattullutik najugaqarnialernertik ilaasa aallartissimagaat aviisini atuarsinnaavarput piffissami qanittumi. Sunaana pissutaasoq?
Pissutsit tamakkua tunngavii ujartorniartariaqarpavut.
Soorunami inuutissarsiorneq annertuumik aallaaviuvoq pissutsini tamakkunani,
kisianni aamma ineqarnikkut ajornartorsiutit namminerlu akisussaassuseqartumik
nammineq peqataanikkut initaarniarnissamut pisortat kisiisa
isumalluutigivallaarnagit alloriarnissaq isumaqarpunga
ujartuiffigisariaqaripput. Soorunami pisortat inissiaataat
pinngitsoorneqarsinnaanngillat, oqanngilagut pinngitsoorneqartariaqartut. Inissaaleqisut
inissaqanngitsorpassuit nalunngilagut.
Tamakkua
inissaqartissagutsigit, taava nammineq pisinnaanerusut nammineerlutik
periarfissiuunneqarnissaat annerusumik ujartortariaqaripput isumaqarnarpoq.
Aammalu Naalakkersuisup akissuteqarnermini Siku Blockimi periarfissat
ujartorneqartut eqqartugai soorunami qujanarput, kisianni isumaqarpunga aamma
Inatsisartuni qangali Inatsisartut tamarmik maani oqartarnerat malillugu
nunatta pissarititaanik atorluaaneq taanna timitalerneqassappat taava
apeqqutaatinnagu suminngaanniit siunnersuut takkunnersoq nunatsinni
iluaqutaasussat ikioqatigiilluta ujartorniartigit.
Aamma una
uanga eqqaalaarniarpara Inatsisartuni sulineq nuannarigakku, ilami kina
qineqqusaassava Inatsisartuni sulineq nuannarinngikkuniuk? Suliaq soorunami
nuannerpoq aamma ilaatigut oqimaattarluni. Apeqqutit assigiinngitsut ilaatigut
utaqqisut allattorsimaffiannut tunngasut pillugit isumaqarpunga piffissaq
aamma manna iluatsillugu Naalakkersuisut ujartuiffigilaassallugit. Tassa
ukiarmi Inatsisartut ataatsimiinnerisa nalaanni apeqqutigivara
tusagassiutitigut saqqummiunneqarmat inuit innuttaasut inissianiit
aniorartinneqartut illoqarfik aalajangersimasoq taamanikkut taaneqarpoq,
anisitaassamaartullu inuit ilaqutariit 54-t aamma taaneqarput.
Taamanikkulli
Naalakkersuisunut apeqquteqarpunga utaqqisut allattorsimaffiat aammalu INI
A/S-iminngaanniit anisitaajumaartussat qanoq nalunaarsorsimanerat innersoq.
Kisianni ajoraluartumik ulloq manna tikillugu taanna apeqqut akineqanngilaq.
Soorunami nammineerlunga INI A/S-imut ujartuisinnaanera periarfissaqarpoq,
kisianni Naalakkersuisut aamma paaserusunnarput tassani apeqqummi qanoq
eqqarsaateqarnersut aammalu akissutissaat suli maannamut utaqqivara.
Per
Rosing-Petersen, Siumut.
Qujanaq.
Asii Chemnitz Narup Inuit Ataqatigiinnit oqaatiginiakkakka amerlanerpaamik
Anthon Frederiksenip aallaqqaasiummini taareermagit uterfigeqqissanngilakka.
Qujassutigiinnassavara
naggataarunarama pingajussaaniilerama tassa una tunngaviatigut Naalakkersuisut
paasillugu tunngavia aallaavigalugu aamma suliniutit ingerlateqqinniarmatigit,
soorunami periarfissanik aamma ammaasussaammat taanna
ajorinngilluinnaqqinnaarpara.
Naggataatigut
Atassumminngaanneersoq Jakob Sivertsenip issuaanera tassunga killittoq
nangeqqilaarusuppara imannak oqarninni toqqammavigigakku aamma: Illuliornermi
aningaasalersuisarfiit arlallit nunatta avataaneersut nunatsinni
immikkoortortaqarfeqarput, taakkualu taamaasiornerat tunngaviatigut
isornartoqanngilaq, kisianni taakku inuiaat kalaallit assigiimmik
periarfissippaat? Ajoraluartumik naamik, tassami illoqarfinni sisamaannarni,
tassalu kujataani aallartikkutta Qaqortumi, Nuummi, Sisimiuni aamma Ilulissani
taamaallaat taamannak periarfissiimmat.
Taanna
ilanngutinnginnakku periarfissaq iluatsillugu ilanngukkusuppara. Taamannak
suliniartoqarnera soorunami Naalakkersuisuninngaanniit qujassutigissavara.
Immaqa qalipaatai assigiinnerpaarsuunngikkaluartut kisianni periarfissiineq
ammaassisussaavoq taamannak Islandip modeliatut ittunik periarfissanik
ujartueriarlutik aalajangiisoqassagaluarpat taamatut. Qujanaq.
Jørgen
Wæver-Johansen, Ineqarnermut, Attaveqanermut Pilersuinermullu
Naalakkersuisoq.
Tassa
oqaaluuserisassami matumani maluginiarpara Inatsisartuni
amerlanerussuteqangaartut kissaatigigaat Naalakkersuisut suliaat
ingerlareersut ingerlaqqiinnarnissaat. Taamaattumik suliat taamatut
ingerlateqqiinnassavagut, taava taakkua kingunissaat piareerpata Inatsisartut
soorunami uterfigissavaat naliliiffigalugillu.
Kattusseqatigiit
apeqqutaannut tunngatillugu akissuteqaatigisinnaavara ippassaanikkunni, tassa
sapaatip akunneri qassiunerpat qaangiupput nalunaarut nutaaq Naalakkersuisunit
akuersissutigaarput. Nalunaarummi tassani allaqqavoq 1. april 2002 sioqqullugu
akiitsorisimasat tunngavigalugit anisitaasoqarsinnaanngitsoq.
Taamaattumik
anisitaasartut allamik tunngaveqarluni anisitaasarmata taakkua
ataasiakkaarlugit iserfigisinnaanngilakka, kisianni nalunaarummi allaqqavoq
1. april 2002 sioqqullugu akiitsorisimasat tunngavigalugit
anisitaasoqarsinnaanngitsoq, unali piumasaqaataavoq ukioq manna naatinnagu
taamatut akiitsullit saaffigineqarnermikkut qanoq akilersuinissamik
isumaqatigiissuteqassasut A/S Inissiaatileqatigiiffik INI-imut. Tassa
taakkuupput malittarisassat atuuttut nunatsinni massakkut.
Taava
Sikublockimut tunngatillug nunatta pissarititai tunngavigalugit
ineriartortitsineq, assersuutitut oqaatigerusuppara kommunenut tamanut
periarfissaammat Sikublocki atorlugu inissianik sanaartornissaq, soorlu
Narsami periarfissaq taanna atorneqartoq, taamaattumik aamma Ilulissani
soqutigineqarnera Kattusseqatigiillu tungaanniit soqutigineqarnera
aallaavigalugu oqaatigerusuppara soorunami aamma Ilulissani periarfissaammat
inissialiassat kommunep aningaasaleeqataaffigisai nutaat tamaasa aamma
Sikublocki aallaavigalugu sananeqarsinnaanissaat. Qujanaq.
Josef
Tuusi Motzfeldt, Inuit Ataqatigiit.
Ineqarnermi
apeqqutini oqallittarnerni siusinnerusukkut Ineqarnermik Pisortaqarfimmut
imissutiginikuusarput uteqqikkusukkiga una oqaluuserisaq ineqarnermut
aaqqiiniarnermut soqutiginanngitsuunngimmat, tassalu Norgemi
aaqqissuussisimaneq Husbankimik taallugu. Taakku aamma qarasaasiami
qupperneqarput. Aaqqissuussineq iluatinnaateqarsinnaanersoq nunatsinnut
atatillugu misissorneqartariaqarpoq.
Taavalu
Siumup oqaaseqartua arlaleriarluni oqarpoq soraarnerussutisiaqarnissamut
aningaasateqarfiit taakkua aamma kaammattorneqartariaqartut, aningaasanngooq
maani sipaarneqartut aamma nunatsinni sulisinneqartariaqarmata. Taakkua
soorunami ilaasortat isumaannik najoqqutaqarlutik sunik
aningaasalersuissanerlutik aalajangiisartuupput. Kisianni soqutiginartua
uaniippoq naalakkersuisooqatigiit naalakkersuisunngornerminni
isumaqatatigiissutaanni ilaatigut taaneqarmat ineqarnermut akiliisarnermut
aaqqissuussineq nutaaq ukiortaamiit atulersoq isumaqatigiissutaareersut
najoqqutaralugit nalilersuiffigeqqinniarneqartoq. Ilaatigut ineqarnermut
akiliisarnermut periutsit allanngortinneqarput. Soraarnerussutisiaqarnermi
aningaasaateqarfiit allallu namminersortut inissialiornermikkut pisortat
inissialiaannut unammisinnaanerusunik sanasinnaanngornissaat siunertaralugu.
Taava massakkut periuseq nutaaq tassunga samminiartussaq aallartilaaginnartoq
Inatsisartunut soqutiginaateqanngitsuunngilaq, naalakkersuisooqatigiit
ineqarnermut akiliisarnerit nutarterneqarnera sumut sammivilimmik
allanngortinnialersaarneraat imaluunniit nalilersuinerminni suna
siunnerfigilersaarneraat.
Kiisalu
Atassutip oqaaseqartuata Illorput 2000-imik isumalluutissaqqissutut taasinera
ilumoortortaqarsinnaavoq. Tassami inuup illuliorniartup nammineq aningaasat
akiliutissai aallartinnermi tassaaginnarput illumut sananeqartussamut
atortussat nalingisa 5%-iat, kisianni taakkua qaavinut soorunami nammineq
illumik piginnittunngortussap sulinermigut sananermigut
naleqarnerulersitsinera aamma taanna qaavanut ileneqartarpoq. Taamaakkaluartoq
oqartariaqassagunarpugut Illorput 2000-imik pisaaraangatta innuttaasut
pisaaraangamik taakkunannga minnerpaamik 50% pisortaninngaanniit
akilerneqartarpoq. Akilersueriaaseq aamma taanna 10/40/50-ikkut
piginneqatigiilluni illuliat 60/40-mik illuliat taakkua akornanniippoq aamma.
Isumaqartitsiniartoqassanngilaq taanna pisortat tunissutisiaannaattut
innuttaasunut pigilersinneqartartoq. Nalilerneqartariaqarpoq allanut
illulioriaatsinut sanilliullugu aningaasartuutitigut pisortaninngaanniit qanoq
annertutigisumik matussuserneqartarnersoq.
Jørgen
Wæver Johansen, Ineqarnermut, Attaveqarnermut Pilersuinermullu
Naalakkersuisoq.
Inuit
Ataqatigiit tungaanniit kissaatigineqartoq maluginiarpara Husbankimik
aaqqissuussineq Norgemiittoq taanna aamma siunissami nalilersuinernut
ilaatinniarneqassasoq, taannalu aamma suliassanut aamma
ilanngunneqarsinnaanera ajoriffissaqartinngilarput Naalakkersuisut
tungaanninngaanniit.
Ineqarnermut
akilersuisarneq allallu aaqqissuisarnerit januarip aallaqqaataani atuutilersut
ilumoorpoq naalakkersuisooqatigiinnermut isumaqatigiissummi
naliliivigineqarnissaat allassimammat. Nalilersuineq taanna siusinnerusukkut
oqaatigineqartut aamma innersuukkusuppakka sapaatip akunnera ataaseq matuma
siorna maani Inatsisartuni tassani oqaatigineqarmat naatsorsuutigineqarluni
ukiamut nalilersuineq taanna naammassineqarsimalluni, soorlu aamma ukiaq
taamatut isumaqatigiissuteqartugut maani Inatssiartuni nalilersuineq taanna
saqqummiunneqarumaartoq Inatsisartunut. Nalilersuinermi soorunami
tunngaviusussat tassaapput aaqqissuussinermi nutaami maannamut
misilittagarilikkavut taassumalu kingunerisimasai. Tassaapput
nalilersuinissatsinnut tunngavissagut.
Tassungalu
tunngatillugu ilisimatitsissutigisinnaavara Naalakkersuisut ukiup
aallartilaarneraniilli suleqatigiissitamik pilersitsereernikuummata ilaatigut
Ineqarnermut Pisortaqarfiup peqataaffigisaanik aammalu Isumaginninnermut
Pisortaqarfiup peqataaffigisaanik kiisalu Aningaasaqarnermut Pisortaqarfiup
peqataaffigisaanik. Taakkuupput nalilersuinissamik suliaqartussat, soorluttaaq
taakkuunikuusut ineqarnermut akilersuisarneq pillugu nutaamik
aaqqissuussinermi suleqatigiissitaasut.
Daniel
Skifte, ataatsimiinnermik aqutsisoq.
Tassalu
taamaalilluta immikkoortoq 59 siullermeerneqarnera naammassivarput,
ingerlariaqqitsinnatali ilisimatitsissutigissavara Anton Frederiksenip
kingullermik oqaaseqarnermini una suliassaq Inatsisartuni
pingasoriarneqartussatut nipilimmik oqaaseqarnera eqqunngimmat. Suliassaq
suleriaatsitsinni §32 malillugu marloriarneqartussaavoq.
Immikkoortoq
59-ip suliarinerani imatut inaarut taassavara: Siunnersuut Siumup itigartippaa
aamma Atassutip aamma Inuit Ataqatigiit kiisalu aamma attaviitsup
Naalakkersuisullu. Taamaalillunilu suliassaq una ukiaru taamatut isikkoqarluni
aappassaaneerneqassaaq.
Taamaalilluni
ullormut oqaluuserisassavut naammassivagut. Ataasinngorpat 22. april
ataatsinut ukua oqaluuserineqassapput, qulequttat kisiisa taassavakka:
Immikkoortoq 89, immikkoortoq 80, immikkoortoq 79, immikkoortoq 81,
immikkoortoq 98, immikkoortoq 41, immikkoortoq 42. Aamma tassunga
ilanngutissaaq immikkoortoq 81, 98, 41 42-lu ataatsimoortillugit
suliarineqassammata, kiisalu kingulliit marluk immikkoortoq 78 aammalu
immikkoortoq 46.
Ullumikkut
ataatsimiinneq taamaalilluni naammassivoq.
Ullut
ataatsimiiffiust qulingiluaat, ataasinngorneq aprilip 22-at 2002, nal. 13:00
Daniel
Skifte, Inatsisartut Siulittaasuat, Atassut.
Ataatsimiinneq
ammarpoq.
Ullormut
oqaluuserisassat tikinnginnerani ilisimasitsissutigissavara Inatsisartunut
Inuit Ataqatigiinninngaanniit nalunaarutigineqarmat Inatsisartunut ilaasortaq
Josef Motzfeldt ullumikkut ataatsimiinnermi peqataasinnaanngitsoq
napparsimanini peqqutigalugu. Taamaattumillu sinniisussamik
aaggersaasoqannginnissaa aamma erseqqissarlugu.
Ullumikkut
eqqartorneqartussat ataasinngornermi 22. april ukuupput immikkoortut normui
kisitsisit taassavakka 89, 80, 79 taavalu tulleriit sisamat 81, 98 , 41,
42-lu, taakkua ataatsimoortillugit suliarineqarnissaat
ilisimassitsissutaareerpoq, kiisalu immikkoortoq 78, 46-lu.
Immikkoortoq
89-i erninermi suliffinngeqartarnerup sivitsorneqarnissaa, aammalu meeqqanut
inunngujaartunut angajoqqaat suliffinngeqarsinnaanermut periarfissaasa
pitsanngorsarneqarsinnaanissaat pillugit aaliangiiffiusut siunnersuut.
Siunnersuuteqartoq qinnuigissavara oqaaseqaqqullugu Tommy Marø, Siumut.
Ullut
ataatsimiiffiust qulingiluaat, ataasinngorneq aprilip 22-at 2002, nal. 13:03
Oqaluuserisassani
immikkoortoq 89
Erninermi
suliffinngeqartarnerup sivitsorneqarnissaa, aammalu meeqqanut inunngujaartunut
angajoqqaat sulinngiffeqarsinnaanermut periarfissaasa
pitsanngorsarneqarsinnaanissaat pillugit aaliangiiffiusut siunnersuut.
(Tommy
Marø)
(Siullermeernera)
Ataatsimiinnermik
aqutsisoq: Daniel Skifte, Inatsisartut Siulittaasuat, Atassut.
Daniel
Skifte, Inatsisartut Siulittaasuat, Atassut.
Siunnersuuteqartoq
qinnuigissavara oqaaseqaqqullugu Tommy Marø, Siumut.
Tommy
Marø, Siumut.
Qujanaq.
Ininermi suliffeqanngittarnerup inerninerup kingorna sapaatit akunnerinit
15-iit sapaatit akunnerinut 30-nut sivitsorneqarnissaanik kiisalu
siusinaartumik imaluunniit innarluutilinnik erninermi sulinngiffeqartarnerup
suli sivitsuiffigineqaqqinnissaanik Inatsisartut aalajangiiffigisassaattut
siunnersuuteqarpunga.
Erninerup
kingorna sulinngiffeqartarnerup sivitsorneqarnissaannik siunnersuuteqarninnut
tunngaviit arlaqarput. Siullermik oqartariaqarpunga angajoqqaatut
akisussaaffiit angajoqqaanit pitsaasumik isumagineqassappata tulluartutut
isigineqarsinnaanngitsoq meerannguaq arnaminit imaluunniit angajoqqaaminit
suli miluttoq meeqqerivimmut tunniutissallugu. Meeqqammi inunngornerminiit
qaammatit arlallit atortussaavai angajoqqaani ilisariniassallugit.
Ukiuni
kingulliunerusuni malinnaavigaarput nunani avannarlerni angajoqqaanngortunut
inatsisitigut angajoqqaatut atukkat pitsanngorsaateqartuartut. Soorlu aamma
kingullertut danskit naalagaaffiata tamanna nutaamik aaqqissuussimagaa.
Aammattaaq
taasariaqarpoq qaammatini 16-ni inatsisip nutarterlugu atuutereernerani
malunnartoq ernereernerup kingorna sapaatit akunnerinik 15-niniit suli
annertunerusumik pisariaqartitsineq annertunerusoq.
Tassami
taasariaqarpoq angajoqqaanngortut qaammatit siulliit ulloq unnuarlu
paarlakaattumik imaluunniit ataatsikkut meerannguamik
nakkutiginnittariaqartarnerat.
Soorunami
oqartoqarsinnaagaluarpoq inuunermi meerartaarsimagaanni pisussaaffiit
ilagiinnaraat. Kisiannili eqqaamasariaqarpoq ullutsinni inuuniarnerup
oqimaassinnaasup aammalu oqimaaqisup piumasaasa ilagigaat angajoqqaat
tamarmiullutik sulisariaqartarnerat. Taamaattoqartillugulu annertoqisumik
minnerpaamik anaanaasumik anaanaasumut oqimaatsumik ilungersunartumillu
eqquisarluni.
Aammattaaq
uagut inatsisiliortugut arajutsisimasatsinnut ilaagunarpoq siusinaartumik
imaluunniit innarluutilimmik meerartaartartut ullumikkut nalinginnaasumik
ernisimasutuulli suliffinngeqartarnerat aaqqissuussimagatsigut.
Ilisimassavarpummi siusinaartumik imaluunniit innarluutilimmik
meerartaarsimasoq meeqqap qaammataanni siullermi arlalinni annertuumik
angajoqqaaminik pisariaqartitsisarmat.
Naggataatigut
neriuutigaara Inatsisartut qulaani taakartorneqartut tapersersorumaaraat.
Taamaasilluta nunarput nunanut avannarnerlunut erninermi inatsisip
malinnaatinniarnera qulakkeersinnaassagatsigut. Aammalu angajoqqaat meeqqamik
inuunerat siulleq annertunerulaamik tamakkiisumik najornissaanut
periarfissaqarsinnaaqqullugit. Qujanaq.
Daniel
Skifte, ataatsimiinnermik aqutsisoq.
Tommy
Marø qutsavigaarput. Taavalu akissuteqassaaq Isumaginninnermut
Suliffeqarnermullu naalakkersuisoq Ole Dorph.
Ole
Dorph, Isumaginninnermut Suliffeqarnermullu Naalakkersuisoq, Siumut.
Erninermut
atatillugu suliffinngeqartarnerup sapaatit akunneri 15-niit sapaatit
akunnerinut 30-nut sivitsorneqarnissaa kiisalu erniaartumut meerartaarnermi
aamma innarluutilimmik meerartaarnermi erninermi atatillugu
sulinngiffeqartarneri sivitsorneqarnissa Inatsisartuni ilaasortap Tommy Marø
siunnersuutigaa. Siunnersuut siulittaasoqarfimmiit aalajangiiffigisassatut
oqaluuserisassanngortinneqarpoq.
Naluneqanngitsutut
erninermut atatillugu sulinngiffeqartarnermut tunngasumik 2001-mi januar-ip
aallaqqaataani kingullermik allannguisoqarpoq.
Sunngiffeqartarnerlu
ilaalu ilanngullugit pillugit aaqqissuussineq atuuttoq malillugu erniffissaq
naatsorsuutigineqartoq sapaatit akunneranik marlunnik sioqqullugu anaanaasoq
sulinngiffeqarsinnaatitaavoq. Erninerup kingorna anaananngortut ataatsimik
erninerminnut atatillugu sapaatit akunneri 15-nit sunngiffeqarsinnaatitaapput.
Marluliinermi arlalinnilluunniit meerartaarnermi sapaatit akunneri 19-nit
anaanaasoq sulinngiffeqarsinnaatitaavoq. Meeqqap inunnornerata kingorna
sapaatit akunneri 15-nit aamma 19-nit siulliit iluani sapaatit akunnerit 3-sut
ataataasoq aammattaaq sulinngiffeqarsinnaatitaavoq.
Anaanaasup
sulinngiffeqareernerata kingorna ataatsimik erninermi sapaatit akunnerini 6-ni
marlunnillu arlaqarnerusunilluunniit ataatsikkut erninermi sapaatit akunnerini
10-ni angajoqqaat sulinngiffeqarsinnaatitaapput. Angajoqqaat aalajangissavaat
arlartik sulinngiffeqassanersoq.
Sulinngiffeqartarneq
ilaalu ilanngullugit pillugit inatsisit atuuttut ullormusiaqarluni immikkut
sulinngiffeqarsinnaaneq pillugu aamma immikkut malittarisassaqarpoq. Meeraq
imaluunniit meeqqat inunngornermi kingorna napparsimaneq inunngujaarpallaarneq
imaluunniit inunngornermi oqippallaarnini pissutigalugu napparsimavimmi
unitsinneqarpat. Sulinngiffeqarneq sivisunerpaamik sapaatit akunnerinik 13-nik
sivitsorneqarsinnaavoq.
Sulinngiffeqartarneq
ilaalu ilanngullugit pillugit Inatsisartut peqqussutaata suliarineqarnerani
allanngortinneranilu kingullermi anaanaasup ataataasullu
sulinngiffeqartarnerat sapatip akunneranik sivitsorneqarpoq. Inatsisartut
200-mi ukiakkut ataatsimiinnerminni isumaqatigiissut oqaatigaat
sulinngiffeqartarnerup sivitsorneratigut angajoqqaat meeqqatik inoorlaat
najornissaanut sivisunerusumik piffissaqartinneqartarnerisigut ilaqutariit
meerartallit pitsaasumik atugaqarnissaat qularnaarneqassasoq.
Taamatuttaaq
erninermi ilaalu ilanngullugit sulinngiffeqarnermut atatillugu
akissarsiaqartitsinermut imaluunniit ullormusiaqartitsinermut aningaasartuutit
agguataarnerannut pillugit misissuinissaq Inatsisartunit
akuersissutigineqarpoq. Misissuineq
2001-mi aamma 2002-mi ingerlanneqarpoq.
Taamaasilluni
misissuinerup inernera 2003-mi upernaakkut piariissaaq qanorlu ittumik
inatsisiliortoqartariaqarnera taamaasilluni paasinarsissaaq.
Angajoqqaangorlaanut erninermut atatillugu sulinngiffeqartarnerannut
iluaqutaasussamik.
Inatsisartuni
ilaasortaq Tommy Marø Naalakkersuisut isumaqatigaat inoorlaat sivisunerusumik
najornissaanut angajoqqaanut pitsaanerpaamik periarfissaqarnerusumik
ilaqutariit meerartallik pitsaanerpaamik atugassaqartinneqarnissaasa
qulakkeernissaa pingaaruteqartoq.
Erninermi
sulinngiffeqartarnerup sivitsornissaa Inatsisartut kissaatigissappassuk
kammattuutigineqassaaq. Inatsisartut peqqussutaanik allannguinissaq 2003-mi
ukiakkut ataatsimiinnermi pissasoq. 2003-mi qaammatini siullermi misissuinerup
naammassineqarnissaa Naalakkersuisut utaqqimaaqqaaniarmassuk. Siunnersuutip
saqqummiutinnginnerani aningaasatigut kingunerisassaanik naatsorsuisoqassaaq,
kingunerisassaalu aningaasanut inatsimmut ilanngunneqartariaqassallutik.
Taamatut
oqaaseqarlutik Naalakkersuisut siunnersuutigaat siunnersuut Inatsisartuni
aappassaaneerneqannginnermini Inatsisartut Isumaginninnermik
ataatsimiititaliaani oqaluuserissanngortinneqassasoq.
Daniel
Skifte, Inatsisartut Siulittaasuat, Atassut.
Isumaginninnermut
Suliffeqarnermullu Naalakkersuisumut qujavugut. Taava maannakkut partiit
Kattusseqatigiit Attaviitsullu oqaaseqartuannut nuuppugut. Siulliulluni
oqaaseqassaaq Ruth Heilmann Siumut.
Ruth
Heilmann, Siumup oqaaseqartua.
Qujanaq.
Erninermiit sulinngiffeqartarnerup sivitsorneqarnissaa aammalu meeqqanut
inunngujaartunut angajoqqaat sulinngiffeqarsinnaanermut periarfissaasa
pitsanngorsarneqarnissaasa pillugit aalajangiiffigisassatut siunnersuut
Inatsisartuni ilaasortaq , Siumut taamatut siunnersuuteqarnera Siumumiit
paasilluarlugu tapersersornartuuteqaarput.
Siumumiit
pingaartittaqaarput meeqqat inuunortussat naartuunerminit inunngornerminiillu
pitsaanerpaamik atugassaqartitaanissaata qulakkeeriffigineqartuarnissaa.
Angajoqqaanngortut
ilaqutariillu sapinngisamik meeqqamut piffissaqarluarnissaat
pingaaruteqarluinnartuuvoq. Taamaaattumik anaanaasup ataataasullu naligiimmik
inatsisikkut sulinngiffeqarallarnissaminnik nunatsinni
periarfissaqartinneqarnissaat Siumumiit pissusissamisoorluinnartutut
pisariaqarluinnartutullu isumaqarfigaarput.
Siunnersuuteqartoq
isumaqatigaarput meeqqat suli nukangallunilu milutsitaasup meeqqerimmut
paarsisorisamullu tunniunneqartarnera anaanaasumut ataataasumullu
misigissutsikkut attorneqaataasarnera sakkortusinnaasarmat, ingammik
angajoqqaangortunut pingaartumillu meerannguamut sunniutigisartagaasa
arlaannik assigiinngitsutigut saqqummersarnerat tamatta meeraqartugut
aqqusaarinnissimasugullu tamanna nalunagulu misigisaqarfigisarparput. Ilami
qularnanngitsumik tamatta suli sivisunerusumik sulinngiffeqarnissamik
periarfissaqartitaanissatsinnik ujartuiuartarpugut. Tamannalu ullumikkut suli
minnerulinngilaq. Inuiaqatigiinni meeqqat ilaqutariinni annertunerusumik
qitiutinneqarnissaanik oqariartuuteqaleruttorfitsinni.
Anaanaasumut
sakkortusaqaaq sulinngiffeqareerluni ulloq tamaat suliffimmik
aallartitseqqittarneq. Soorlu angajoqqaajusunut oqinnerusinnaagaluartoq aamma
aallaqqaammut ullup affaanik
sapaatip akunneriniluunniit sisamani siullermi sulisitsisuinut
periarfissinneqarsinnaasuuppata suligallarnissaminnut taamatut.
Siumumiit
isumaqarpugut suliffeqarfiit namminneq sulisuminnut politik-eqarnerat
annertusiartortoq pitsaasumik aamma taasuma tungaagut
atugassaqartitsinermikkut tamanna Siumumiit siuariartornikkut isigaarput
annertusarneqartuarnissaanut kissaatigalugu.
Siumumiit
maluginiarparput atorfillit kattuffiata aamma ujartormagu erninermi
meeravissiartaarnermilu sulinngiffeqartarnerup malunnaatilimmik
sivitsorneqarnissaanik periarfissaqartitsinissap ammaffigineqarnissaa.
Nalunngilarput
sulisartuni aamma atorfilinnit piumasaqaatigineqartarpoq sulinerminnut
pitsanngorsaatissat ilaattut pissusissamisoortutut isigalugu. Pingaartumik
anaanaasumi ernereerluni taamatut sivikitsigisumik sulinngiffeqareerlutik
suliartorluni arlalitsigut misigineqartarmat meeqqami napparsimakulalernera,
malitsigisaanillu suliartunngitsuukulalertarnerannik
kinguneqartinneqartartumik. Taamalu suliffimmini
ajornartorsiuteqalersarnerannik ajoraluartumillu aamma suliffeeruttarnerannik
ilaannikkut kinguneqartinneqartartumik.
Taamatut
nipilimmik qanittukkut Atorfillit Kattuffiannik nalunaaruteqartoqarpoq.
Tamannalu Siumumiit ilanngullugu iliuuseqarfigillaqquarput.
Ullumikkut
ulloq ataasiinnaasumik aamma napparsimasoornermi taamaallaat suliffimmiit
akuerisaalluni sulinngitsoorsinnaanermik periarfissaqartitsisoqartarnera
Siumumiit pitsaanngitsutut isumaqarfigaarput. Siumumiit
eqqarsaatigillaqqunarpoq meeraq napparsimasoq nakorsamit
allagartalerneqarsimappat ajorunnaavinnissaa tikillugu angajoqqaaminit
najorteqarnissaminit periarfissaqartinneqartariaqartoq akissarsiaminit
annaasaqaatiginngikkaluarlugu. Taamaattumik Siumumiit isumaqarpugut tamavinnut
naammaginarnerusumik aaqqiissuteqarnissami tamakkua tamaasa
eqqarsaatigilluarlugit iliuuseqarnissaq pisariaqartuusoq.
Amerlasuut
meeqqamik inissinneqarnissaanik ajornartorsiuteqqassutip sulinngiffeqarnitsik
tallisinnaasarpaat, namminneq
aningaasartuutigisaminnik. Tamanna aningaasatigut ilaqutariinnut
oqimaassinnaasarpoq, kisiannilu meeqqamut qaninnerpaamik iluaqutissamillu
tunniussaqarnissamik pigisaqarnermik siunertaqarnera kingornamut
peqqissimissutissaqartitsinngilaq aningaasartassani annerutinneqarani
meeqqamut qanitaanullu iluaqutaanera annerusarmat.
Taamaattumik
Siumumiit isumaqarpugut taamatut aamma meeqqerivissaaleqinermi erninermi
sulinngiffeqartarnerup sivitsorneqarnera malunnaatilimmik pippat
naligiinnerusumik meeqqat pisariaqartitaanik tuniussaqarneq kingusinnerusumut
iluaqutaasumik kinguneqarumaartoq minnerunngitsumik meeqqap toqqissisimasumik
aamma perornissaanut pitsaasumik sunniuteqassalluni.
Siumumiit
siunertaraarput ilaqutariit atugarisaat pitsanngorsarneqartuartariaqartut.
Aamma maanna inuiaqatigiinni suliffeqarnerup ineriartortinneqarnissaanik
piumasaqaleruttorfitsinni. Meeqqat pisariaqartitaat puigornagit
pingaarnepaatinniartariaqaratsigit.
Meeqqat
ukiui siulliit pingaarnerpaammata tassuungakkullu pitsaanerpaamik
toqqissisimanarnerpaamillu meeqqamut tunniussaqarnissamut
periarfissaqartitsinissarput qullerpaanngortinniartariaqaratsigut.
Taamatut
sulinngiffeqarnissap tallineqarnissaanut periarfissinneqarsinnaaneq meeqqamut
inunngujaartumut imaluunniit inunngornermini akornuteqarluni inuusumut
annertunerusumik periarfissaqartitsinissamik siunnersuuteqartup ujartuinera
Siumumiit paasilluarparput tapersersorlugulu.
Angajoqqaat
namminneq meeqqamut qaninnerpaasut qanoq meeqqap pisariaqartitsineranik
annerpaamik ilisimaarinnittuusarput.
Arlaqarpulli
taamatut sulinngiffimminnik sivitsuiniaraluarlutik
noqqaassuteqaraluarnerminnit periarfissineqanngitsoortartut. Naak
pisariaqartitsisoqarnera paasinartaraluartoq itigartitaasoqartanera
takornartaasanngilaq.
Taakkuusarpullu
meqqamit allat assaannut tunniussisariaqalerfimmi allanik sakkortunerusumik
misigisaqartartut.
Siumumiit
isumaqarpugut taamatut atugaqartut suli sivisunerusumik periarfissaqarnissaat
maluginiarneqarnerullunilu isiginiarneqartariaqartoq.
Siumumiit
nuannaarutigaarput marlulisut arlalinnilluunniit meerartaartut aamma
eqqarsaatigalugit siunnersuuteqarnitsigut sivitsuisoqarnera pinikuummat.
Siumumiillu isumaqarpugut aamma taamatut meerartaartut suli annerusumik
oqilisaaneqarnerat ingerlanneqartuartariaqartoq.
Isumaginninnermut
iluarsaaqqinnermullu ataatsimiititaliarsuaq 1995-imiit 1997-imut suligami
meeqqat atugarisaannik annertuumik eqqartuivoq kaammattuuteqarlunilu.
Tassani
pingaartinneqarpoq meeqqap naartuunerminiit ilaqutariit pitsaanerpaamik
atugaqarnissaata qulakkeersimaneqarnissaa.
Aammalu
angajoqqaat meerartaarnermi meeravissiartaarnermilu sulinngiffeqartitaanerisa
nunanut avannarlernut naleqqussarneqarnissaat pisariaqartoq. Tamannalu
pissasoq nunatta aningaasaqarnera naapertorlugu ukiuni tulliuttuni tamani
sulinngiffeqartarnerup sivitsoriartortinneqarnissaa pilersaarusiorneqarluni.
Tamanna
uteqqinneqarpoq ukioq 2000-imi siunnersuuteqarnikkut sulinngiffeqartarnerup
tamanut atuuttumik sapaatip akunnerinik marlunnik sivitsuviffigineqarnissaanut
tamannalu Inatsisartut akuersaarpaat.
Taamanikkut
Inatsisartuni maluginiagassaavoq taamatut atsigisumik qaffaaneq
annikiginartinneqartoq. Taamaattumik maannakkut siunnersuutigineqartoq
sapaatit akunnerinik 15-inik sivitsuiniarneq Siumumiit tamakkiinerusumik
naammaginarnerusumillu aaqqiiniarnertut isigaarput.
Maannakkut
nunani avannarlerni Danmarkimullu pissutsinik ikaarsaariassagutta
piffissannorsoraarput qanoq iliuuseqarnissamut.
Siumumiit
Tommy Marøp siunnersuutaanut pineqartut tunngaviatigut tapersersorpagut,
kisiannili maannakkut nunani avannarlerni pissutsinut atoneqartunut
sanilliulluta nikinganeq annertoorujussuuvoq. Nikinganerlu taanna
sapinngisamik minnerpaanngortittariaqarluni.
Taamaattumik
Naalakkersuisut misissuinertik ingerlateqqissagaat tamakkiisumillu
aaqqiissutissatut siunnersuummik ukiakkut 2003-mi saqqummiillutik ukuinut
qaninnerusunut ungasinnerusorlu isigalugu qaffaanissanut piffissaliilluni
pilersaarutinik aningaasatigullu malitsigisassaanik aaqqiissutissanik
ersarinnerusunik takussutissiisumik.
Taamaakkaluartorli
Siumumiit noqqaassutigissavarput aningaasaliissutaareersut iluanni ukiamut
2003-mut aningaasanut inatsisissap suliarineqarneranut ilanngullugu
attanneqarsinnaasumik misissuisoqarnissaa Naalakkersuisut
periarfissarsiuutissagaat.
Taamatut
Siumumiit oqaaseqarluta Isumaginninnermut Suliffeqarnermullu
Ataatsimiititaliami nalilersorluarnqarnissaa piumasaraarput aappassaaneerlugu
ukiamut inaarlugu suliarineqarluni. Qujanaq.
Jakob
Sivertsen, Atassutip oqaaseqartua.
Qujanaq.
Erninermi sulinngiffeqartarnerup sivitsorneqarnissaa aammalu meeqqanut
inunnguaartunut angajoqqaat sulinngiffeqarsinnaanermut periarfissaasa
pitsanngorsarneqarnissaat pillugit aalajangiiffigisassatut siunnersuut Tommy
Marøp saqqummiussaanut Atassummiit imatut oqaaseqarniarpugut:
Naartunermi
erninermi qitornavissiartaarnermilu sulinngiffeqarsinnaaneq
ullormusiaqarsinnaanerlu 1980-ikkut naalerneranni oqallisigineqartalermat
Atassummit piviusunngortitseqataaniarluta oqallinnermi peqataasarsimavugut.
Qujanartumillu nunatsinni angajoqqaarpassuit minnerunngitsumillu anaanat
meeqqiortartut kissaatigiuagaat naartunermi erninermi
qitornavissiartaarnermilu sulinngiffeqarsinnaaneq Inatsisartut
peqqussutaatigut 22. oktober 1990 Inatsisartunit tamanit
tapersersorneqarluarni piviusunngortinneqarsimavoq. Tamatumalu kingorna
pequssut ulloq manna tikillugu tallimariarluni allanngortinneqartarsimavoq
Atassummit tapersersorluartakkatsinnit.
Anaanat
meeqqiortut minnerunngitsumik inuusuttut meerartaaqqaarnerminni piffissami
sivisunerpaamik meeqqap inunngorneraniit anaanaminit paaqqutarineqarnissani
pisariaqartittuaannarmagu tamanna meeqqap isumannaannerpaamik
pitsaanerpaamillu peroriartornissaanut ajunngitsuulluinnartartoq Atassummit
nalunnginnatsigu.
Siunnersuummik
saqqummiussaqartup siunnersuunni marloqiusatut tunngavilersuuteqartippaa.
Siullermik
erninermut atatillugu nalinginnaasumik sulinngiffeqartarnerup ullumikkut
sapaatip akunneranik 15-nik sivisussuseqartup marloriaatinngortinneqarnissaa
tassa sapaatip akunnerini 30-Naalakkersuisunut ilaasortaq sivitsorneqarnissaa
kissaatigaa.
Kiisalu
aappaattut siusinaartumik inunngortunut anaanaasup sivisunerusumik
sulinngiffeqarsinnaanerat tunngavilersuummini piumasaqaatigalugu. Kingullermut
atatillugu Atassummit erseqqissaassutigissavarput peqqussut kingullermik
allanngortinneqarmat marlulinermi amerlanerusunilluunniit ataatsikkut
meerartaarnermi sulinngiffeqarsinnaaneq sapaatip akunnerinik sisamani
sivitsorneqarsimammat.
Aammalu
Atassummit malugeqqussavarput meeqqap inunngornermi kingorna napparsimaneq
inunngujaarpallaarneq inunngornermini oqippallaarnera pissutaallutik
nakorsat napparsimavimmiinnissaq piumasaqaatigissappassuk sulinngiffeqarnerup
ajornanngitsumik sivisunerpaamik sapaatip akunnerinik 13-inik
Naalakkersuisunut ilaasortat malittarisassat periarfissaqartitsimmata.
Taamaattumik
siunnersuuteqartup saqqummiussaqarnermini tunngavilersuutaata aappaa
periarfissaareersut matumuuna periarfissaqareermat matumuuna Atassummit
oqaatigaarput.
Inatsisartut
2000-imi ukiakkut ataatsimiinnitsinni immikkoortoq 24-mi naartunermi erninermi
qitornavissiartaarnermilu sulinngiffeqartarnerup sapaatip akunneranik
ataatsimik sivitsorneqarnissaanik saqqummiussagut Atassummit tamakkiisumik
akuersaarnitsinnut ilanngullugu siunissami naartunermi erninermi
qitornavissiartaarnermilu sulinngiffeqartarnerup sivitsorneqarnissaanik
suliniarnerup ingerlatiinnarneqarnissaa piumasaqaatigisimavarput.
Soorlu
aningaasalersuisarneq eqqarsaatigalugu kikkunnut tamanut pitsaanerpaamik
aaqqiisoqassapat pisortat aningaasalersuinerisa saniatigut namminersortut
pingaartumik annertuumik ingerlataqartut aningaasaleeqataasinnaanissaat
kiisalu erninermut atatillugu sillimmasersinnaanermut periarfissaasinnaasut
aningaasanullu tunngasortai ilanngullugit sukumiisumik misissorneqarnissaat
Atassummit piumasaqaatigisimavarput.
Qujanartumik
2001-mi ukioq mannalu misissuinerit ingerlanneqartut Naalakkersuisunit
oqaatigineqarput. Kiisalu missuinermit paasissutissat tunngavigalugit 2003-mi
upernaakkut allannguiniarnissamut tamakkiisumillu aaqqiinissamut tunngavissat
piareersimanissaat naatsorsuutigineqarluni tamatumani siunissami
angajoqqaanngortarumaartussanut sulinngiffeqartarnerup pitsaanerpaamik
angusaqarfiginissaa pingaartumik sivitsuisinnaanermut tunngatillugu
aningaasanut tunngasortaasa aaqqiiffigineqarnissaat siunertaralugit matumuuna
Atassummit tamakkiisumik aaqqiiniarnissamut suleqataanissarput matumuuna
oqaatigeriissavarput.
Atassummit
siuliini oqaatigeereerparput naartunermi erninermi qitornavissiartaarnermilu
sulinngiffeqartarnerup pilersikkiartuaarneqarnerani pilersinneqarneranilu
meeraq pingaarnerutillugu sulinitsinni qitiutillugu suleqataasimagatta
taamaammat erninermut tunngatillugu sulinngiffeqartarnerup
pitsanngorsaaffigiuarnissaanut suleqataajuassaagut.
Naalakkersuisup
siunnersuummut akissuteqarnermini peqqussutinik allannguinissaq 2003-mi
Inatsisartut ukiakkut ataatsimiinnerannit pissasoq oqaatigaa. Tamatumani
misissuinerup inerneri tamakkiisut pissarsiarineqarsimanissaat
utaqqineqartariaqartut Naalakkersuisut pingaartimmassuk Atassummit
taperserparput.
Peqqussutissat
eqqortut paasissutissat eqqortut pilersaarusiorluarnerlu eqqortumik
aningaasaliinissamut tunngaviulluinnartartut Atassummit
misilittagaqarfigigatsigit.
Taamaattumik
Atassummit isumaqarpugut meeraq pingaarnerutillugu anguniagaq tamakkiisumik
anguneqassappat naartunermi erninermi qitornavissiartaarnermilu
sulinngiffeqartarnerup annikitsuinnermik aaqqiissuteqarfigineqartarnera
qimallugu siunissaq ungasinnerusoq isigalugu aaqqiiniarnissaq
pingaartinneqartariaqartoq.
Taamaattumik
Naalakkersuisut tamakkiisumik aaqqiinissamut misissuilluarnerit aningaasanullu
tunngasortaasa kingunerisassaat misissorluaqqaarumammatigit Atassummit
tamakkiisumik taperserparput.
Taamaakkaluartoq
naartunermi erninermi qitornavissiartaarnermilu aningaasartuutissatut
akuersissutigineqartut ukiuni kingullerni pingasuni tamakkerlugit atorneqarneq
ajornerat nalilersorluareerlugit matumuuna Atassummit Naalakkersuisut ukiamut
siunnersuutip aappassaaneerneqannginnerani aningaasatigut
illersorneqarsinnaasumik aaqqiigallarnissamut periarfissanik misissuinissaat
Atassummit kaammattuutigaarput.
Taanna
teknikkikkut kukkuluttornikkut nutserneqarsimannginnera ajuusaarutigaarput.
2000-mi
ukiakkut Inatsisartut ataatsimiinnitsinni meeqqat inuusuttullu pillugit
nassuiaat meeraq pingaarnerutillugu oqallinnermi oqaaserisatta ilaat
naggataarutigissavagut. Meerannguit illernatuutigaavut. Naasutulli
paaqqutassagut. Ullut tamaasa asanninnermik kissalaartumik imertigassagut
naasutulli kusanartumik sikkersoqarlutik nunatta siunissaanik
ineriartortitseqataasinnaaqqullugit. Taamatut Atassummit siunnersuut
oqaaseqarfigaarput. Naalakkersuisullu siunnersuummut akissuteqaataat
tusaatissatut tigullugit.
Kiisalu
ataatsimiititaliami siunnersuutip misissoqqissaarneqarnissaa
innersuussutigaarput. Qujanaq.
Lars Sørensen,
Inuit Ataqatigiit oqaaseqartuat.
Qujanaq.
Apeqqutit siunnersuutillu inunnit isumaginninnermut tunngassuteqartut
Inatsisartunut saqqummiunneqaraangata Inuit Ataqatigiinni pingaartittarparput
inunnik isumaginninnermut iluarsaaqqinnermut ataatsimiititaliarsuup apeqqut
pineqartoq tunngaviusumik isummersorfigisimaneraa inassuteqarfigisimaneraalu.
Isumaqarattami
ataatsimiititaliarsuup suliassai aallariarfigissallugit tunngavigissallugillu
pissusissamisoortuusoq. Isumaginninnermi iluarsaaqqinnermi
ataatsimiititaliarsuup isumaliutissiissummini oqaatigaa erninermi
sulinngiffeqartarneq pillugu peqqussut immikkut nalilersorumasimanagu. Taamani
maleruagassat misilittagaqarfigineqarnerat suli annikippallaaqimmat.
Ullumikkumullu
ilisimasatsitut suli tamanna pillugu itinerusumik naliliisoqanngilaq.
Kisiannili Inatsisartuni 2000-imi ukiakkut ataatsimiinnermi erninermut
sulinngiffeqartarnerup sivitsorneqarnissaanut tunngaviusussat aammalu
tamakkiinerusumik misissuinerit aallartinneqassasut taakkunanilu
aaqqissuussineq maanna atuuttoq nalilersorneqassasoq. Kiisalu meeqqat
ilaqutariillu meerartallit pillugit Naalakkersuinikkut anguniagassat
ilanngullugit inassutigineqarput.
Tamakku
pillugit Inatsisartut isumaginninnermut ataatsimiititaliaat isumaqatigiillutik
isumaliutissiissuteqarnermikkut Naalakkersuisunut suliakkiissutigaat.
Taamanikkut
Naalakkersuisut Inatsisartut kissaateqarnerat malillugu suleqatigiissitamik
pilersitsinermikkut ilaatigut inatsisinik atuuttunik meeqqanut
ilaqutariinnullu meerartalinnut tunngassuteqartunik taakkulu tungaasigut
misilittakkanik qinigaaffiup maanna atuuttup ingerlanerani qulaajaasussanik
pilersitsipput.
Misissuinerillu
inernerata 2003-mi upernaakkut naammassineqarnissaa Naalakkersuisut
Inatsisartunut ukiakkut 2000-imi ataatsimiinnermi aamma oqaatigaat.
Meeqqap
mikinerminiit toqqissisimanartumik angerlarsimaffeqarlunilu peroriartornissaa
inuunerata sinneranut mikinngitsumik tunngaviliisarpoq. Taamaattumik Inuit
Ataqatigiit meeqqat atugaanik pitsanngorsaanissat pingaartilluinnarpagut.
Inuit Ataqatigiit anguniarpaat erninerup kingorna sulinngiffeqartarnerup
siunissaq ungasinnerusoq eqqarsaatigalugu ukiup ilivitsunngortinneqarnissaanut
periarfissat sukumiisumik misissorneqassasut. Aammalu anguniagassatut
siunnerfigineqartariaqarsoraarput erninermi sulinngiffeqartitsisarneq meeqqap
pisariaqartitaanut aamma tunngatinneqassasoq.
Nunanilu
allani aaqqissuussinerit qanoq ittut atorneqarnersut aamma ilanngullugit
paaserusunnarlutik.
Inuit
Ataqatigiit piffissanngorsorivarput ilaqutariinnut politikki sunut
anguniagaqarfiussanersoq ataatsimut isiginnittumik sukumiisumik
oqallisigineqartariaqartoq. Oqallisigineqartariaqarpoq qanoq iliorutta
meerartarta siunissaat pitsaanerpaamik tunngavississaneripput.
Angajoqqaanngorlaat perortitsinissamut perorsaanissamullu akisussaaffiup
pitsaasumik naammassissappatigit qanoq inuiaqatigiit tungaanniit
ikorfartuisoqartariaqarnerpa. Angajoqqaat sulinerisa sivikillinerisigut.
Akileraarutitigut oqilisaaffigalugit, erninermi sulinngiffeqartarnerup
sivitsorneratigut imaluunniit angajoqqaanngortut sulinngiffeqartarnermut ullup
affaanik tamarmik assigiimmik avitseqatigiinnikkut periarfissinnerisigut.
Qilanaarisagut
pissutsit oqalliseqataaffigalugit Inuit Ataqatigiit taamaattumik Inuit
Ataqatigiit kaammattuutigissavarput Inatsisartut Inunnut Isumaginninnermi
Ataatsimiititaliaani tamakku pillugit ammasumik oqallinnerit
ingerlatinneqaqqullugit.
Taamatut
oqaaseqarluta siunnersuut Tommy Marømiit saqqummiunneqartoq itigartipparput
suliassaq aallatinneqareermat. Naalakkersuisunullu taakkulu upernaakkut
2003-mi erninermi sulinnginneqartarneq pillugu sukumiisumik
misissuisoqareerpat saqqummiussaqarnissaat qilanaaraarput.
Suliap
Inatsisartunik aappassaaneerlugu suliarineqannginnerani apeqqutit
saqqummiussagut inassuteqaatigullu Inunnik Isumaginninnermut
Ataatsimiititaliami oqallisigineqarnissaa kaammattuutigaarput.
Loritha
Henriksen, Kattusseqatigiit oqaaseqartuat.
Qujanaq.
Inatsisartunut ilaasortap Tommy Marøp siunnersuutaa eqqartoreerlugu
Kattusseqatigiinniit ima oqaaseqarfigissavarput. Kattusseqatigiinniit
soqutigilluinnagaraarput aammalu kingullermik oqallinnermi annertuumik
tapersersorsimasarput. Tassalu erninermi meeravissiartaarnermilu
siusinaartumillu meerartaarsimasunut sulinngiffeqartunut sivisunerusumik
siunissami meeqqat pitsaasumik atugaqartinneqarnissaat eqqarsaatigalugu.
Angajoqqaammi
angajoqqaarsianngortussanullu minnerunngitsumillu meeqqamut inunngortumut
tamanna pingaaruteqarluinnarmat pisariaqarlunilu. Sivisunerusumik meeqqap
angerlarsimaffimmini kissartumik pakkusimaneqarnissaa. Meeqqap anaanaasullu
meeqqamullu sivisunerusumik pingaaruteqarluinnarmat meeqqamut
toqqissisimasumik patajaatsumik peroriartornissamut annertuumik
aalajangiisuusarmat. Pingaartumik minnerunngitsumillu ukioq siulleq.
Siunissamilu
siunnerfilimmik ineriartortitissagutta pingaaruteqarluinnartutut isigaarput
tamannalu aatsaat anguneqarsinnaammat inatsisit allanngortinnerasigut.
Ernereernerup
kingorna sulinngiffeqarneq sivitsorneqarnissaa. Tamannalumi aamma nunatta
nunani avannarlerni killerni naapeqatigiittarnerni annertuumik
oqallisigineqarlunilu eqqartorneqartarsimavoq. Qanorlu pingaaruteqartigisoq
erninermi meeravissiartaarnermilu sulinngiffeqarnerup sivitsorneqarnissaata
anguniarnissaa annertuumik pingaarutilittut anguniagassatullu
aalajangiiffigineqarsimalluni. Aamma naligiissitaanermut ataatsimiititaliami
ukiuni siullerni malinnaaffigineqarluarsimasumik.
Oqallittarnernut
tamanut annertuumik pingaartinneqalunilu oqallisigineqartarsimavoq
ernereernerup
kingorna sulinngiffeqarnerup sivitsorneqarnissaa sivitsuinissarlu.
Oqallittarnernilu ilanngunneqartarsimavoq aamma sukumiisumik misissuinermi
uppernarsineqarsimammat ilumut meeqqat annertuumik pisariaqartikkaa anaanami
sivisunerusumik najorneqarnissaq. Tamakkua aallaavigalugit ullumikkut
qallunaat nunaanni anguneqarsimavoq ernereernerup kingorna sulinngiffeqarnerup
ukiumik ataatsimik sivitsorneqarnera ullumikkullu atuuttumik.
Taamaattumik
pisariaqarpoq aamma uagut nunatsinni atuutilertinnissaa piaartumik
anguneqarnissaa piviusunngortinnissaalu anguniartariaqarparput.
Kattusseqatigiinniit
oqaatigerusupparput pisariaqanngitsumik kinguarsaanissamut nunarput
akissaqanngitsoq. Ullumikkut pissutsit eqqarsaatigalugit tamatta meeraq
peqqissuunissaanik toqqissisimasumillu inuuneqarnissaanik kissaatigaarput
oqallisigijuarlugulu. Pingaaruteqarpormi meeraq angajoqqaaminit
patajaatsumik toqqissisimasumillu avatangiiseqarluni meeqqerivinnut
assigisaanullu inissinneqarnermini angajoqqaaminik patajaatsumik
tunngavilerneqarnissaa.
Aamma
taamaaliornikkut immaqa meeqqat peqqissuunissaa patajaatsumik
anguneqarsinnaammat.
Kattusseqatigiillu
aamma maluginiarparput eqqaaneqartariaqartorlu meeqqat siusinaarlutik
inunngorsimasut immikkut pisariaqartitsinerat aallaavigalugut sivisunerusumik
anaanamik najorneqarnissaa aamma aaqqiivigineqartariaqartoq ullumikkornit suli
aamma pitsaanerusumik.
Naggataatigut
Kattusseqatigiinniit Naalakkersuisut akissuteqaataat neriorsuutigalugit
oqaatigisaat tassalu ukioq 2003-mi upernaakkut ataatsimiinnermi
misissuinermi naammassineqarlutik saqqummiunneqarumaartut. Tamanna
neriulluarfigaarput.
Kattusseqatigiinniit
ilanngullugu eqqaarusupparput taamatut aaqqiinissaq pinngitsoorani aamma
aningaasanik naleqartussaammat naleqartussaallunilu. Kisiannili
puigussanngilarput meeraq pitsaasumik atugaqarluni peroriartornissaa
annertuumik pingaaruteqarmat. Tamannalu aningaasatigut
sipaarfigineqannginnissaat Kattusseqatigiinniit kissaatigaarput.
Ilanngullugu
apeqqutigerusupparput Isumaginninnermut Naalakkersuisumut erninermi
sulinngiffeqanermilu sivitsuinissaq qanoq naleqarnissaa
eqqarsaatigereersimaneraa aningaasallu suminngaaniit aamma aaneqarnissaat
piareersimaffigineraa.
Taamatut
Kattusseqatigiinniit oqaaseqarluta akissuteqaat iluarisimaarparput.
Aappassaaneerneqannginneranilu Inunnik Isumaginninnermut Ataatsimiititaliami
oqallisigineqarnissaa inassutigalugu.
Otto Steenholdt, Attaviitsoq.
Siunnersuut tassungalu akissuteqaatit atuarlugit oqartariaqarput takisuupilorujussualiuuttariaqassanngitsoq assortornartunik imaqanngimmata. Taamaattumik Inatsisartunut ilaasortaasunut aalajangersarsimasat ukiut tamaasa allanngorartinneqartarnissaat ilaatigut orniginarneq ajorpoq. Kisiannili pissutsit pinngitsooratik allannguinissaq piumasarippassuk allatut ajornartarpoq. Manna oqallisigisarput allannguinermik kinguneqarsimavoq 2001-mi massakkullu ukioq suna atoripput naluneqanngilaq.
Soorunami allannguutit tamaavimmik allanngortitassaajunnaavillugit allanngortinneq ajornartarput. Tassa tamatta meerartaartunut pitsaasumik iliuuseqarusuppugut. Tamannalu assortoruminaappoq. Tamannalumi aamma taamanikkut aalajangersaagatta pingaartillugu oqaatigisimavarput aammalu takisuupilorujussuarnik imaqarpianngitsunillu oqallinnerujussuaq aamma taamanikkut pisimalluni.
Saqqummiussami angajoqqaajusunut pissutsit taagorneqartut atuareerlugit oqartariaqarpoq pissutsit ajuvissorsuartut tassa ullumikkut pissutsit eqqarsaatigalugit oqaatigineqarsinnaanngitsut. Kisianni allannguinissaq pisariaqarluinnarsimappat misissuinerit ingerlanneqartut soorlu saqqummiussami taaneqartut naammassinissaat utaqqineqartariaqarput.
Taamaattumillu Naalakkersuisut kaammattuutaat tassalu allannguinissaq aappaagu ukiamut utaqqinneqarnissaa isumaqatigilluinnarpara taamanikkut misissukkat allannguinissamut pisariaqarsorisat qularnaatsumik nittarneqassammata.
Maanga qaqeqqinnginniassagama eqqaasitsissutigilaarlara oqaaseq meeravissiartaarneq atorneqarmat qitornavissiartaarneq atorneqarani.
Tommy Marø, Siumut.
Qujanaq. Siullermik nuannaarutigivara erninermi sulinngiffeqartarnerup aammalu meerannguanut inorlutik innarluuteqarlutilluunniit inuusimasunut angajoqqaatut periarfissat pitsaanerulernissaannik siunnersuutiga Naalakkersuisunit partiinit Kattusseqatigiinnit aammalu Attaviitsunit soqutineqarluni oqaaseqarfigineqarmat qujassutigaara.
Naalakkersuisut akissuteqarnerminni oqaatigisaanut tassalu misissuinerit ingerlanneqartut ukiumilu 2003-mi saqqummiussisoqarnissaanik oqariartuuteqarnerat tusaatissatut tigussavara. Tassanimi oqartariaqaratta ukiuni arlalissuarni misissuerusaarnerit annertuut ingerlassimagatsigit soorluttaaq aamma isumaginninnermut ataatsimiititaliarsuaq aqqutigalugu tamakku tikinneqarsimasut.
Taamaattorli neriuutigaara taamanikkussaq erninermi sulinngiffeqartarnerup tamakkiisumik inuiaqatigiinnut aammalu angajoqqaanngortartussanut naammaginarnerusumik aaqqiisoqarumaartoq. Tassani aningaasaq qitiutinnagu kisiannili ilaqutariit naqqaniit toqqissisimanartumillu ineriartornissaat salliutinneqarumaartoq.
Partiit ataasiakkaat oqaaseqarfigissagukkit tassa siumut siullermik oqaaseqarnermini aamma uani erseqqissaasutigisamini oqaatigisaanut atatillugu atorfillit kattuffiata aamma taanna siunnersuut tamakkiisumik tapersersoraat aammalu Naalakkersuisunut kaammatttuutigalugu taassumap sukumiisumik aaqqiivigineqarnissaa kissaatigineqarsimalluni.
Aammattaaq Siumumiit Atassummiillu assigiikannersumik imalimmik oqariartuuteqartoqarpoq ukiup tullissaanut aningaasanut missingersuusiornissatsinni maluginiarsimagaat takusinnaagakku aamma soorluttaaq uanga takusinnaasimagiga ukiuni kingullerni pingasuni erninermi meeravissiartaartarnermullu atatillugu aningaasat immikkoortinneqartartut iluanni aningaasat atunngitsoortakkat iluanni taamatut sulinngiiffeqartarnerup sivitsornissaanut aningaasanut inatsimmi innarliinngikkaluarluni pisoqarsinnaanera.
Neriuutigilluinnarpara aammalu kaammattuutigissavara Naalakkersuisunut 2003-mi ukiakkut saqqummiinissami tamakkiinerusumik kikkunnut tamanut naammagiartumik aaqqiinissaq Naalakkersuisut suliariumaaraat. Aammalu nuannaarutigivara partiinit tamanit aammalu Attaviitsumit immaqaluunniit Kattusseqatigiinniit kissaatigineqarmat uumap suliap aappassaaneerneqannginnerani Inunnik Isumaginninnermut Ataatsimiititaliami suliarineqarnissaa kaammattuutigimmassuk.
Aamma oqaatigissavara tamatut siunnersuuteqarninnut sapaatit akunnerini tamak amerlatigisunik siunnersuuteqarninnut toqqammavigigakku taamatut ukiuni arlaqalersuni ilaartuerusaarneq piunnaarlugu tamakkiinerusumik kikkunnut tamanut naammaginarnerusumik tassa sapaatip akunneri 30-t ernereernerup kingorna aaqqiinissaq uani siunnersuutigisimagakku.
Neriuppungali Naalakkersuisut oqariartuuteqarnerminni tassa 2003-mi taamatut aaqqiisoqarsinnaanera nalugaluarlugu neriuutigivara uani neriuutigaara aamma aningaasanik salliutitsinissaq pinaveersaaqqullugu. Aningaasat aaneqarsinnaapput assigiinngitsorpassuartigut uani oqallissaarinianngilluinnarama aammalu uani siunnersuutiga paaseqatigiinnikkut partiinit tamani Naalakkersuisumillu kissaatiginarteqigakku.
Aammalu uani Inuit Ataqatigiit oqaaseqarnerminni oqaatigisaat tamakkiinerusumik Naalakkersuisut 2003-mi saqqummiussinissaat isumalluarfigimmassuk. Soorluttaaq partiinit tamanit oqaatigineqartoq. Uangattaaq aamma isumalluarfigaara neriuppunga aamma taamanikkussamut siunnersuuteqarnittut imalimmik tassalu sapaatip akunneranut 30-nut sivitsuisinnaaneq piviusunngorumaartoq. Qujanaq.
Ole Dorph, Isumaginninnermut Suliffeqarnermullu Naalakkersuisoq, Siumut.
Qujanaq. Uanga takisuuliussanngilanga kisianni soorlu aamma siunnersuuteqartup aatsaannguaq oqaatigereeraa maani inimi oqallinneq ataatsimik nipeqarpoq tassa partiininngaaniit Kattusseqatigiinniit aamma Attaviitsuninngaaniit taperserneqarpoq erninermut atatillugu sulinngiffeqartarnerup sivitsorneqarnissaa sapinngisamik sulissutiginiarneqassasoq.
Kisianni taamaallaat apeqqutaatinneqarluni sivitsuiniarnissaq qanoq piffissaq qanoq sivisutigisoq atorlugu ingerlanneqassanersoq.
Aamma oqallinnermi uani ingerlanneqartumi partiininngaaniit aamma Kattusseqatigiinniit aamma Attaviitsuninngaaniit maluginiarpara soorlu oqareernittut tapersiineq aamma uumap suliassap ingerlaqqittariaqarnera oqaatiginiarneqartoq tassalu uuna suliassaq ingerlatiinnarneqaqqittussaassooq imaalillugu tassa misissuineq Inatsisartut 2000-mi ataatsimiinnerminni maani inimi aalajangersimasaat ingerlanneqassasoq. Taannalu pissaaq ukioq kingulliup ukillu matumap ingerlanerani upernaakkut 2003-mi ataatsimiinnermi misissuisimanerup inernera saqqummiunneqartussaassooq maanilu inimi tunngaviusumi inimi tunngaviusumik oqallinnermik pilersitsilluni.
Taavalu taanna oqallinneq aallaavigalugu 2003-p ukiassaani inatsisissap allanngortinneqarnissaa Inatsisartunut saqqummiunneqassooq. Tassanilu aalajangerneqarluni sivitsuinissaq qanoq ingerlanneqassanersoq.
Aamma ilumoorpoq oqaatigineqarmat ukiut kingulliit marlussuit erninermut atatillugut sulinngiffeqartarnerup sivitsutsiartarnera pisarsimasoq tassa 1999-mi sivitsuitsiarneqarsimavoq aamma ukioq kingulleq sivitsuineqarsimalluni. Tamakkuli sivitsuisarnerit soorunami ilaqutariinnut pisariaqartitsisunut angajoqqaanut qujanartarsimaqaat aamma qujanartuassapput soorunami.
Aningaasanut tunngassuteqartortai taakkua immaqa annikitsuaqqamik aamma apeqqutigineqarmata tikitsiarsinnaavakka. Tassa erninermut atatillugu aningaasartuutit aningaasartaasa 90%-tii Namminersornerullutik Oqartussaninngaaniit akilerneqartarput. 10%-tiilu kommunininngaaniit. Aamma ukiut kingulliit sisamat ingerlaneranni aningaasat atorneqartartut nikerujussuarsimanngillat.
1998-mi 19,8 millionit sinnilaarlugit tassunga kontomut atugassiissutigineqarsimapput. Atorneqarsimapput 16,1 millionit. Taava ukioq kingulleq 2001 17,9 millionit atugassiissugineqarsimapput atorneqarsimapput 16,3 millionit.
Aammalu ukioq manna 2001-mi taakkua 16,3 millionit atorneqarsimapput naak sulinngiffeqartarneq sapaatip akunnerinik sivitsorneqarsimagaluartoq. Tassa taakku aningaasat Inatsisartut akuersissutaasa iluini taakku aningaasat atorneqartussat nassaarineqarsinnaasimapput.
Peqqutaalluni ukiuni kingullerni qulit missaanni tassa 1994-minngaaniit ukiut tamaasa nunatsinni inunngortartut agguaqatigiissillugu 2%-mik ikiliartuaartarsimapput. Taamaattumillu qujanartumik aningaasat taakku akuersissutaareersut iluanni taamanna aningaasat naammatsinneqarsinnaasimallutik.
Aamma tassunga soorunami pissutaaqataanngitsuunngilaq ukiut kingulliit akissarsiat pillugit isumaqatigiinniartarnertigut anguneqarsimammat sulisut erninerminnut atatillugu sulinngiffeqarsinnaatitaanerat suliffimminninngaaniit akissarsiaqaannarlutik. Taanna aamma uagut pisortaninngaaniit aningaasartuutigisartakkatta qaffakkiartorsimannginnerannut aamma pissutaaqataavoq.
Aamma tamanna tamarmi eqqarsaatigineqartussaavoq sivitsuineqassappat. Soorunalimi sivitsuineqassappat suliffeqarfiillu aningaasatigut isumaqatigiinniarnerit pillugit qulakkeerisimanngippata aamma suliffeqarfinnut tamakkununga aningaasartuuteqarnerulernermik malitseqartussaavoq.
Taakkulu isumaqatigiinniarnerit uagut aamma akuleruffigisassarinngisagut maanngaanniit taakku aamma soorunami nangeqqinneqartussaassapput. Oqaatigissavaralu aamma sapaatip akunneranik ataatsimik sivitsuisoqasappat imaluunniit sivitsuineq agguaqatigiissillugu 1,2 million missaannik aningaasartuutinik malitseqartussaassooq.
Taamaattumik annertuuliornanga taakku apeqqutigineqartut taamaasillunga nassuiaatigaakka. Aamma soorunami arlaanik apeqquteqartoqassappat erseqqinnerusumik nassuiaateqassuunga. Aamma eqqaamassagatsigu una suliassaq Inatsisartut Isumaginninnermut Suliffeqarnermullu Araatsimiititaliaani suliarineqartussaavoq. Tassanilu apeqqutit saqqummertussat aamma Ataatsimiititaliap paaserusutai soorunalimi itisuumik eqqartorneqarlutillu isummerfigineqartussaassammata. Aamma una siunnersuut ukiassamut aatsaat aappassaaneerneqartussaammat.
Taamaattumik arlaannik soorunami apeqquteqartoqassappat aamma piareersimavugut akissuteqassalluta. Kisianni massakkut maannakkumut saqqummiunneqartunut tamassinnut qujassuteqassuunga aamma malugivara siunnersuut tapersersorneqartoq aammalu piffissaq ungasinnerusoq eqqarsaatigalugu siunniusimaarneqartoq ajornanngippat barselertarnerup ukiumulluunniit ataatsimut sivitsornissaa eqqarsaatersuutigineqartoq malugisinnagakku. Tamassinnut qujanaq.
Daniel Skifte, Inatsisartut Siulittaasuat, Atassut.
Isumaginninnermut Suliffeqarnermullu Naalakkersuisumut qujavugut. Tulliullunilu oqaaseqassaaq Asii Chemnitz Narup partiimi oqaaseqartup avataatigut.
Asii
Chemnitz Narup, Inuit Ataqatigiit.
Qujanaq.
Aningaasanut tunngasortai Inuit Ataqatigiinninngaaniit
oqaaseqarfigilaarusuppagut. Tassa maluginiarparput Siumuminngaaniit Ruth
Heilmannip oqaatigigaa immaattoq misissoqqullugu noqqaasut Naalakkersuisunut
aningaasaliissutaareersut iluanni attanneqarsinnaasumik
sivitsuisoqarsinnaanersoq. Aamma aatsaannguaq Isumaginninnermut
Naalakkersuisup ukiuni siuliini aningaasat atorneqartartut qanoq
amerlatigineri oqaatigivaat.
Inuit
Ataqatigiit akisussaassuseqartumik suleqataarusuppugut inimi maani aamma
suliniutit suulluunniit aningaasarpassuarnik naleqartarmata
pisariaqartittuaannaavittarparput aningaasatigut kingunissai
sukumiisorujussuarmik ilanngullugit nalilersuiffigineqartarnissai.
Tusaqqaarlugu
tusarnersorujussuuvoq aningaasat ukiut kingulliit nungullugit
atorneqartarsimanngitsut. Taamakkaluartormi eqqaasitsissutigissavarput
sapaatip akunnerata siuliani inimi maani oqallikkatta erseqqissarneqarmat
2001-mi Isumaginninnermut Naalakkersuisoqarfimmi millionerpassuarnik
sippuisoqarsimasoq. Taavalu taakkua aamma matussuserniarneqartussaassammata.
Taamaattumik
kontomi tassani aningaasanik sinneqartoortaraluarussiluunniit
Naalakkersuisoqarfimmi taava ilisimaneqartut pisariaqartitsineq
isumaginninnermi tamarmik ima annertutigivoq allaat sippuisoqarsimalluni.
Taamaattumik akisussaassuseqartumik sulisariaqarpugut aningaasanut
tunngasortai misissoqqissaartariaqarlugit.
Taassumap
saniatigut pingaartitatta aappaa tassaagami pisariaqartitsinerit
tamakkiitillugit ataatsimut nalilersuinissaq tassalu pingaarnersiuinissaq
avaqqunneqarsinnaasarnani Inatsisartuni. Taamaattumik meeqqat atugarisaannut
pitsanngorsaanissamik pisariaqartitsinerit inuiaqatigiinni
annertoorujorujussuupput.
Ulloq
unnuarlu angerlarsimaffiit piorsarneqartussaaput inissat taamannak
amigaatigineqarput. Ilaqutariit paaqqutarinninnissani piorsarneqartussaapput.
Ulluunerani meeqqeriveqarnernut tunngasut pissutsit tamakkua ataatsimut
isigalugit nalilersuisarnissat pisariaqarpoq. Atuarfimmi pissutsit atukkat
iluarsineqartariaqartut.
Taamaattumik
teqeqqusiuisaqattaarluta suliniarutta isikkivik tamakkiisoq
isigisinnaajunaarlugu ungasinnerusorlu piunnaarlugu aappaagu
iluarsiissutissat kuseriarnertut ittut meeqqat pisariaqartitaanut
tamakkiisumik sanilliullugu taava apeqqutaavoq akisissaassuseqarnermik
sulinerussanersoq, kisianni Isumaginninnermi Ataatsimiititaliami
suleqataanitsigut tamakkua oqaluuserineqarpata soorunami
suleqaaffigiumaarpagut.
Taava
2000-imi Ruth Heilmannip siunnersuutigimmagu sulinngiffeqartarnerup
sivitsornissaa taamani eqqaamagakku Siumuminngaaniit ujartorneqartoq
Naalakkersuisumullu imissutigineqarluni oqaatsip meeravissiartaartarnerup
allamik taarserneqarsinnaannginnersoq. Taava taanna Siumukkormiut
ujartunngimmassuk uanga ujartulaarusuppara oqaatsimik qanoq ittumik
nassaarsimanersut.
Ruth
Heilmann, Siumut.
Qujanaq.
Siullermik Otto Steenholdtip oqaatigisaanut ilumoorpoq aamma Asii Chemnitz
Narupip ilumoorpoq meeravissiartaarnermut oqaaseq qitornavissiartaarnermut
oqaatsimut taamanikkut kingullermik oqallikkatta misissoqarnissaanik
Siumuminngaaniit oqaaseqarpugut. Aamma oqaaseqarnitsinni taanna
eqqaasimanngilarput. Kisianni qujanarpoq massakkut aamma eqqaamaneqarluni
oqaatigineqarmat. Taamaattumik Naalakkersuisut tassuunakkut aamma immaqa
paarlaassimanerat peqqutaaqataasinnaavoq.
Uagut
nuannaarutigeqqarput Siumuminngaaniit Tommy Marø taamatut erninermi
sulinngiffeqartarnermut ersarissumik aamma pitsanngorsaaniarnermik
siunnersuuteqarmat tassa Inatsisartuni taanna pisinnaatitaaffigaarput.
Taamaattumillu aamma Inatsisartuni imaluunniit Siumuminngaaniit
ujartuerusussimavugut aamma periarfissanik pitsanngorsaataasussanik.
Taamaattumik
ukua aningaasat aamma atorneqanngitsoortartut eqqarsaatigalugit
Naalakkersuisup
nassuiaateqarnera qujassutigaarput taamaattumillu missueqqusinitsinnut ukiamut
periarfissiisoqarsinnaaneranik ammasoqarnera tassuunakkut aamma
malugisinnaallugu.
Isumaqarpunga
Siumuminngaaniit tassa pingaartikkatsigu tassa pingaarteqigatsigu meeqqap
naartuunermininngaaniit aammalu mikinermininngaaniit pitsaanerpaamik
atugaqarnissaa. Taamaattumik
soorunami nuannaarutigaarput aamma sapaatip akunneri 30-t
eqqarsaatiginngikkaluarlugit allaat ukioq ataaseq aamma eqqaaneqaqqimmat
maani inimi.
Kisianni
Siumuminngaaniit isumaqarpugut taamatut pitsanngoriartuaartitsineq aamma
ingerlanneqartuartariaqartoq. Tassami 1990-mili sapaatip akunneri 18-nit
aningaasartuutigisarsimavagut ullumilu ukiut aqqaneq marluk qaangiunnerini
sapaatip akunneri 19-t angusimavagut ilaatigut agguataartarlugu ataataasumut
sapaatip akunneri aamma pingasut anguneqarsimapput.
Taamaattumik
uani aamma ilaatigut marlulissat eqqarsaatigalugit aamma sapaatit akunnerinik
sisamanik pitsanngorsaasimanerit tamakku eqqarsaatigalugit soorunami
pitsanngoriartuaartitsineq ingerlanneqarsimagaluarpoq.
Kisiannili
arriitsorujussuarmik ingerlanneqarsimasutut uagut Siumuminngaaniit
oqaatigerusupparput. Tassami 1996-mi isumaginninnermut iluarsaaqqinnerup
iluani sulileruttorfitsinni aamma allanngoriaammi tassani Naalakkersuisut
siunnersuuteqarsimapput. Taamaattumik tassuunakkut immikkut soorlu Inuit
Ataqatigiit oqaaseqarput immikkut annerusumik isumaginninnermi
iluarsaaqqinnermi taanna siunnerfissanik eqqartuisimanngilaq. Taamaattumillu
2000-mi ilanngullugu taanna uagut kissaatigisimavarput ersarissumik
misissuinerit ukioq imaluunniit ukiut ingerlasut siunissarlu aamma
ungasinnerusoq eqqarsaatigalugu nunat avannarlernut anngukkiartuaarnissarput
taanna eqqarsaatigisariaqarmat.
Kisiannili
uani isumaqarpugut ukioq 2002-mi aamma Inatsisartut ukiakkut
ataatsimiinneranni taavalu Inatsisartut aningaasaqarnerannut inatsisissaannut
misissueqqunerput taanna naatsorsuutigaara aamma maluginiarpara
Naalakkersuisup ilassilluaraa. Tassuunakkut aamma ataatsimiititaliami
soorunami suleqatigiinnissarput soorunami Siumuminngaaniit
kissaatigissavarput.
Inuit
Ataqatigiinninngaaniit Asii Chemnitz Narupip allat
aningaasartuuteqarfissarpassuit taagormagit taava ukiup ataatsip
ingerlanerinnaani soorunami pingaarnersiuisussaassaagut. Taamaattumik
isumalluarpunga 2004-mi meeraq qitiutillugu aamma naartuunermini
pitsanngorsaatissat tassani ammmaffigineqarnerujumaartut. Qujanaq.
Jakob
Sivertsen, Atassut.
Qujanaq.
Naatsunnguamik erseqqissaateqalaarniarpunga. Tassa Inatsisartut 2000-mi
ukiakkut ataatsimiinnitsinni immikkoortoq 24. tassa naartunermi erninermi
qitornavissiartaarnermilu sulinngiffeqartarnerup sapaatip akunneranik
sivitsoqarnissaanut ilanngullugu erseqqissumik partiimi oqaatigaarput.
Tamakkiisumik
aaqqiinissaq utaqqinagu periarfissat atorlugit tassa 2004 utaqqinngikkarlugu
aaqqiigallartoqarnissaa anguniarneqartariaqartoq.
Taamaattumik
taanna nangeqqipparput aningaasat 99-minngaaniit 2001 tikillugu tamakkiisumik
atorneqartarsimannginnerat tassani iluani illersorneqarsinnaasumik
aaqqiigallartoqarsinnaappat aamma Atassummit suleqataaffigerusukkipput.
Nalunnginnatsigu anaanarpassuit suli kissaatigiuaraat sivisunerusumik meeqqat
nukanganeranni paaqqutarineqartarnissaat. Tassa taamaattumik ukiamut aamma
ataatsimiititaliami suleqataassaagut taassumap
nalilersoqqissaarneqarnissaanut. Qujanaq.
Tommy Marø,
Siumut.
Qujanaq.
Uani qaqininnut tunngavigerpiarpara uani Inuit Ataqatigiit oqaaseqartuata
immaqaluunniit partiip oqaaseqartuata avataatigut oqaaseqartup
oqaaseqarnermini aningaasat tikeriarmagit aammalu uanga isumaqarama
siunnersuutiga aningaasanik milloorlugu qammarlugu pineqannginnissaa tassani
kissaatigeqigakku. Aamma soorlu tassani oqaaseqarninni taamatut
oqaatigigiga.
Aamma
naatsorsuutiginngilara Inuit Ataqatigiit kisimik maani akisussaassuseqarlutik
sulisut. Inatsisartut maani inimi issiasut tamarmik akisussaassuseqarlutik
sulinerat uanga upperilluinnarpara. Soorluttaaq aamma ukioq kingulleq
peqqinissamut naalakkersuisoqarfik 80 millioninik amigaateqalermat
aningaasaliiffigisimagipput taamak annertutigisunik.
Uanga
upperilluinnarpara uku aningaasat eqqartorneqartut soorlu Siumukkut
Atassutikkullu ukiamut Naalakkersuisoq kaammattormassuk aningaasaliissutaasut
iluanni sivitsuilaarsinnaanerup aaqqiivinnissap tungaanut
kaammattuuteqarnerat upperivara. Aamma kaammattorusullugit Naalakkersuisut
iluminni suleqatigiilluinnarlutik tamanna aaqqissinnaassagaat. Tassami
imaassinnaanngilaq qineqqusaarnitsinni 1998-mi immaqaluunniit 99-ip
aallartilaarnerani immaqa tamangajaluinnatta uparuartorsimavarput
allaffissornerup qaffariartuinnarnerata unitsinnisaa ammullu aallartinnissaa.
Kisianni
tamatut pisoqarsimanngilaq. Ullumikkut killiffitsinni aningaasat
allaffissornikkut atukkatta qavatigut qaffariaateqarsimapput 42 millioninik.
Ukiut marluk kingulliit ingerlaneranni. Taamammat isumaqarpunga
pingaartitsineq aammalu tulleriiaarilluarneq pissagutsigu sorlaqarfigut
taakkua salliutillugit suliniarfigisariaqarigut. Tassalu angajoqqaanngortartut
meerarlu qitiutillugu ineriartornissaq. Qujanaq.
Ole Dorph,
Isumaginninnermut Suliffeqarnermullu Naalakkersuisoq, Siumut.
Aap,
naatsunnguamik aamma. Tassa siullermik Asii Chemnitz Narupip una oqaaseq
oqaatigimmagu meeravissiartaarneq taanna qanoq ullumikkut inissisimanersoq.
Tassa aatsaannguaruna paasitinneqartunga. Tassa oqaasilerusuninngaaniit
meeravissiartaarnerup atorunnaarneqarnissaa innersuussutigineqarsimavoq.
Tassalu siunissami qitornavissiartaarnissamik oqaatsimik taarseqarnissaa
siunnersuutigineqarsimalluni. Taanna siullermik erseqqissaatigilaassavara.
Ilumoorpoq
aaqqissuussineq sunaluunniit aningaasanik malitseqartarpoq. Aamma una
aaqqissuussineq allanngortinneqassaguni aamma soorunami aningaasanik
malitseqartinneqartussaassooq. Sullissinerit uani annertusisussaapput aamma
pinngitsoornatik taava taanna pissappat aamma aningaasatigut aamma qaffaaneq
avaqqunneqarsinnaassanngilaq. Taanna isumaqarpunga tamatta
takusinnaassallutigu.
Aatsaannguaq
maaniikkama oqaatigaara ukiuni kingullerni qaffaatsiartarnerit
qujanarsimagaluaqisut kisiannili pilersaarusiamik ukiuni siumut arlalinnik
isigisunik massakkut pisariaqartitsisoqartoq. Taamaattumillu Inatsisartut
siornaak aalajangersimasat nalilersuilluarneq pereerpat taava Inatsisartut
tunngavissamik pitsaasumik peqalissasut aalajangersinnaalissallutik
ukiuniuna tulliuttuni aaqqissuussineq qanoq isikkulik maani nunatsinni
atulerniaripput.
Tassa taanna
misissuinissaq massakkut, misissuineq massakkut ingerlasoq taassumap
qulakkeertussaava tamakku apeqqutit assigiinngitsut uani eqqartorneqartut
qulaajassallugit.
Aamma
oqaatigitsiarneqarpoq ukiuni qanininnerpaani imaluunniit ukioq manna
aappaaguluunniit qanoq isigineqarsinnaassasoq qaffaanermik
pilersitsissagaluaraanni.
Soorlu
aatsaannguaq oqaatigereeriga aamma ukioq manna aningaasat
atugassiissutigineqarnikut aappagumut ingerlaqqissappata, aammalu
meerartaartarneq oqaatigeriikkattut ukiuni kingullerni
annikilliartuaarsimasoq, taanna ingerlaannassappat, taava tamatta
takusinnaavarput, eqqoriarsinnaavarput sapaatip akunneranik
sivitsuisoqarsinnaanissaa aappaagu taanna aningaasat akuersissutaasimasut
iluanni immaqa ajornanngitsumik aaqqinneqarsinnaasoq.
Kisianni
taanna qaangerneqassappat sorunalimi aningaasat akuersissutigineqartussat
aamma qaffatsinneqartariaqartussaassapput. Ilumut qaangiisarnerit siunissami
pinngitsoortinniarneqassappata.
Taannalu
oqaatigeriikkattut soorunalimi maani ataatsimiittarfimmi peqquneqarnerput
aallaavigalugu aamma misissoqquneqarmat aamma taanna
misissortussaassavarput. Aammalu uumap aappassaaneerneqarnissaanut tamakkua
ilisimasat massakkut ilisimasat pigileriikkagut soorunami
saqummiuttussaassavagut. Aammalu naatsorsuutigaara ataatsimiitsitaliaq
qanittumik suleqatigalugu uumap aappassaannerneqarnerani suliassap
peqqissaartumik aamma uagut pisortaqarfitsinninngaaniit peqataanissarput
neriorsuutigissavarput. Qujanaq.
Daniel
Skifte, Inatsisartut Siulittaasuat, Atassut.
Isumaginninnermut
Naalakkersuisoq qutsavigaarput. Taavalu tulliullutik marlussuit
oqaaseqannginneranni ilisimatitsissitigissavara uteqattaarivallaarnissaq
pinngitsoorniarlugu Siumut Atassutip Inuit Ataqatigiit Kattusseqatigiit
Attaviitsullu aappata oqaseqartut maannakkumut tamarmik isumaqatigeeqqissaarlutik partiit oqariartuutaat
aallaavigalugit qanoq suleriaqqittoqassasoq aallaqqaataanili ersersereerpaat.
Taamaattumik
kaammattuutiginarpoq oqallinneq maannakkut erseqqissereermat naatsunik
oqaaseqartoqartarnissaa.
Loritha Henriksen, Kattusseqatigiit.
Tassa Kattusseqatigiinniit uagut erseqqissarusupparput pingaarluinnarmat massumap suliassap pingaarutillip aammalu aningaasanik naleqartussap peqqissaarullugu taanna peqqissaarullugu suliarineqarnissaa.
Sunaluunniit suliaq patajaatsumik suliarineqassappat aningaasat tungaatigut qulakkeerinissaq taanna salliusariaqarmat. Taamaattumik uagut isumaqatigilluinnarparput ukioq 2003-mi suna tamaasa saqqumiutereernerisigut aalajangiinissap qanoq sivisutiginissaanik tassani kissaatigiumagatsigu.
Kisianni soorunami uagut kissaatigeeqaarput ajornanngippat ukioq ataaseq soorlu oqarnitsigut meeqqaninngaaniit sunaluunniit suliassaq pitsaasoq aallartissappat meeqqap inunngorneraninngaaniit tunngavilerneqarnissaa pingaaruteqaqimmat.
Lars Sørensen, Inuit Ataqatigiit.
Tassa siullermik Tommy Marøp siullermik oqaaseqarnermini oqaatigisaa ilaartuerusaarneq qimannneqartariaqarneranik oqariartuutaa assorujussuaq iluarisimaaruttorlugu taava aappassaaneerluni oqaaseqarnermini ilaatigut pinngitsoornani 2003-mi erninermi sulinngiffeqartarnermi sapaatip akunneranik sivitsorneqarsinnaanissaanut tunngasumik siunnerfeqaqqusinera taanna ilaatigut ippigilaarlugu oqaatigisariaqarparput.
Tassa sulianut tunngatillugu ataatsimut nalilersuinissaq taanna saneqqunneqarsinnaanngilaq sulianik ataasiakkaanik isiginnittumik ingerlatsineq isumaqarpunga Naalakkersuisooqatigiit partiivisa qimattariaqaraat.
Tassami Asiip oqaaseqarnermini erseqqissumik oqaatigeerpaa pisortaqarfik 25 million kr-nit sinnerlugit sippuisimasoq qanoq ililluni taava aningaasanik ingerlatami iluani nassaarniarsinnaava? Pinngitsoornatik taakkua matussuserneqartariaqarput. Aammalu suliaminngaaniit suliamut assigiinngitsutigut naliliisarneq isumaqarpunga massakkut illuatungaani eqqartuinermi aamma isiginiartariaqaripput pimoorukkutsigi erninermi sulinngiffeqartarnerup sivitsorneqarnissaa ilaatigut soorlu Tommy Marøp siunnersuutaatigut sapaatip akunneranut 15-nik ilaneqarnissaa.
Taanna 17 million kr-nik naleqartussatut Naalakkersuisup oqaatigivaa. Illuatungaani aamma partiip Naalakkersuisooqatigiit isumaqatigiissutigivaat rejenut akitsuut 3%-ninngaaniit 1%-mut appartinneqarnissaa.
Tamakkua assigiinngitsut ataatsimut nalilersorneqartariaqarput. Asuli oqarluartaarnerinnaat immaqalu annertunerusumik piviusunngortitsinissamik suliniuteqarnerit siunnerfiginagit ataatsimut nalilersuisoqanngippat, assigiinngitsutigut utoqqaat atugarissaat, meeqqat pisariaqartitaat assigiinngitsut pitsanngorsarneqarsinnaanngillat. Tassami maannakkut suliniarnermi pissaqareersut suli amerlarnerusunik pissaqarlernissaannik siunnerfilinnik suliaqarnerup ilaatigut pisariaqartitsisut tassami partiit tamatta isumaqatigiissutigaarput erninermi sulinngiffeqartarnerup sivitsorneqarnissaa taanna pimoorullugu taanna anguniartariaqaripput.
Aammalu Naalakkersuisut oqaatigeerpaat sapaatip akunneranik ataatsimik sivitsuisoqassappat tamana landskarsimut 1,2 million kr-nimik naleqartussaavoq. Aammalu qularnanngitsumik taanna kuersiarnerinnaavoq. Pissutigalugu atorfillit suliffillit taakkua aamma isiginiarneqassappata tamatumani millionerparujussuit aamma eqqartorneqarmata.
Taamaattumik Naalakkersuisooqatigiinnut kaammattuutigissavarput aaqqiiniarnernut ataatsimut isiginnittumik nalilersuisaqqullugit tassami ataasiakkaarlugit aaqqiiniarnerit ilaartuiniarnerit soorlu siunnersuuteqartup qimattariaqartut oqaatigisai piviusunngortinneqassappata tamanna saneqqunneqarsinnaanngilaq. Taanna erseqqissaassugitiinnassavara.
Daniel Skifte, Inatsisartut Siulittaasuat, Atassut.
Lars Sørensen qutsavigaarput. Taavalu maannakkut oqaaseqassaaq Godmand Rasmussen partiimi oqaaseqartitap avataatigut.
Godmand Rasmussen, Atassutip.
Annertuunik oqaaseqarnianngilanga, kisianni nuannaarutigivara una suliassaq imaannanngitsoq ataatsimiititaliamut ingerlaqqinnissaa aamma tikilluaqquarput aamma suliarinissaa assut pissanganassooq.
Unaana nuanniigiusarlugu qaqisunga aamma Tommy Marø siullermik qutsavigissavara erseqqissumik oqaatigimmagu siorna aamma peqqinnissaqarfimmut aningaasanik qinnuuloortaqattaallarmat uagut aamma tassa illuatungiliuttuugaluarluta aamma ajornartorsiut takusimavarput.
Taamak tupigilaarpara massakkut taamatut oqariartaaseq atorneqaqattaalera illuatungiliuttuninngaaniit soorlu aatsaat sarfamik massakkut illuatungiliussinninngaaniit aatsaat sarfaq majorlugu aallartusi. Taavalu immaqa malugereerlugu sarfamik majorassinnaajunnaarsimallusi.
Uagut ukiorpaaluit sarfamit majorassimavugut suleqataalernerpullu aamma pingaartittarsimallutigu. Una assersuutigiinnarlugu taalara, immaqa nuanniikkaluarpalluunniit ippassaani tusagassiuutitigut tusarpugut meeqqat pillugit aningaasanik Inatsisartunut qinnuteqartoqarneq ajortoq taakkulu aamma ikippalunngillat. Taavalu oqartoqanngilaq ullumikkut pappialanngorlugu suli ataatsimiititaliamut takkutinngilaq.
Immaq Lars Sørensen tassani oqaatsit ilinnut atussagukkit tulluassooq tassaaginnarnerluni tamakku aamma avataaninngaaniit tusaqqusaarnerit. Aamma Asii atsaavinnaq oqarpoq isikkivik atorlugu aalalangersaasariaqartugut. Ilumoorpoq taanna uani saqqummiunneqartoq massakkut oqaluuserisassanngortinneqartoq tunngavia immini ajunngilaq, kiannili aamma uanga nammineq inuttut eqqarsaatigiummisara uaniippoq. Inatsisip periarfissiinera kikkunnut tamanut atuutsillugu inuit tamavimmik piumasaqaatigisinnaanerpaat ilumut taamatut meerartaarnerminni aamma sulinngiffeqarsinnaanerlutik aningaasarsiaqarlutik. Immaq inuit ilaasa aamma pisariaqartinngikkaluarpaat.
Qanormitaava isikkoqarsinnaagaluarpa Siumup oqaaseqartuani aamma oqaatigineqartoq soraarsinneqarsinnaaneri ilaatigut napparsimasuukulaarpallaarneq aallaavigalugu. Suliffeqarfiit ilaasa ammaffigisinnaassanngikkaluarnerlugu piumasaqaatigineqartut sulinngiffeqarsinnaanermik naammatsippata. Taava meeraq pingaarnerutippat inuiaqatigiit karsi isumalluutiginngikkaluarlugu kisianni suliffik annaanagu aamma sivitsuisoqallarsinnaanera taanna periarfissatut ilaasinnagaluannginnerluni. Ataatsimiititaliami taanna eqqartugassaqqippoq.
Aamma soorunami una tunngavik ajunngikkaluaqaaq. Siuleqarsimavugut. Aamma meeqqioraluaramik maani isersimasut immaqa arlaqarput angajoqqaavi taamak atugaqartitaanngikkaluartut massakkut peqqissorsuarnik inoqateqaratta tamanna aamma nuannaarutissaavoq.
Ullumikkut suna tamarmi tunngavimmigut ajunngikkaluarluni pisortanit isumalluuteqarnersuaq taanna milliartuaartinniarlugu oqaluppugut.
Aamma una siunnersuut tunngavimmigut ajunngilaq. Una pineruvara pisariaqartitsivallaanngitsunut inunnut inissisimanerissaatunut tamakku tamarmik ajornartorsiutilinnut tunniunneqarsinnaasut atugassinneqartassappata aamma taanna ilaatigut eqqarsarnalaarpoq. Immaqalu aamma uani aningaasat Naalakkersuisut oqarneratuut ilaatigut aamma taakkartorneqartut atunngitsoorneqartarnerat aamma patsiseqarsimasinnaannginnerluni tusagassiuutigut tusartarparput naartuersinnerparujorujussuit ukiumut atuuttut.
Naartuersittoqartarsimanngikkaluarpat aningaasat qanormita amerlatigut aamma artortinneqartarsimassagaluarpat meerartaarnernut. Inunngortartunilluunniit masakkut amerlanerusut oqaatigineqartarmata naartuersinnerit. Immaqa aamma tassani killiliinermi isumaqataasimasinnaassagaluarput.
Unaana naggataatigut oqaatiginiarlugu. Inuiaqatigiinnut
taamak pingaaruteqartigisuni oqallinnermi ataatsimoorfeqarluni
pitsaanerpaasarpoq. Aamma uanga isumaqarpunga isornartorsiuiniaannarluni
isornartorsiuinerit amerlavallaangajattartut suleqatigiinnerunissaraluatsinnut
immaqa tamakku aamma nukillaarsaatinut ilaasarput. Qujanaq.
Ruth
Heilmann, Siumut.
Naatsunnguaassaaq.
Tassa isumaqarpunga Inuit Ataqatigiit oqaaseqarnerminni Naalakkersuisup
sippuisimaneranik oqaaseqarnerat massumunnga oqallinnermut
taputartuutissallugu tulluartuunngitsoq. Tassami soorunami aningaasat taakku
Naalakkersuisut namminneq suminngaaniit aaneqassanersut aamma
kukkunersiuisut peqatigalugit suliassarivaat taamaattumik uani isumaqarpunga
taamak pingaaruteqartigisumik siunnersuummut tunngatillugu
oqarluartaarnertullu allaat siunnersuut oqaatigineqarmat taanna aamma
pissusissamisoortutut uagut Siumuminngaaniit isiginngilarput. Tassami
erninermi sulinngiffeqartarnerup sivitsorneqarnissaanik anaanarpassuit aamma
nilliaateqarput. Taamaattumik taamatut aningaasanik naleqarnera aammalu
periarfissaqarneraneralugulu taavalu aningaasatigut
periarfissaqannginnerarlugu. Taamatut oqalunneq isumaqarpunga
naapertuutinngitsoq. Taamaattumik Siumumiit neriuutigaarput Naalakkersuisoq
aamma saqqummiijumaartoq.
Kiisalu
aamma inuiaqatigiinni oqallisigineqassasoq taanna taamaattumillu ukiamut
saqqummiilinnginnermi aamma inuit peqataatillugit annerusumik
ammanerusumillu oqallisigineqarnissaa taanna isumaqarpunga
pingaaruteqarluinnartuusoq. Qujanaq.
Maliinannguaq
Markussen-Mølgaard, Inuit Ataqatigiit.
Qujanaq.
Unaana erseqqissaavigerusullugu oqaaseqartumut aamma kingullermut ilaatigut
uagunngooq tapersersorlugulu tapersersornagulu. Inuit Ataqatigiinngaaniit
erseqqissaatigeerparput tapersersoripput aallaat
siunnersuuteqartuminngaaniit suli sivitsornerunissaa taanna
kissaatigigipput, kisianni taamaattoqartinnagu karsip imaa qiviarlugu
pingaarnersiulluni misissuilluarnissaq ilaqutariit mikisunik meertartallit
atugaat ullumikkut qanoq isikkoqarpa? Pisariaqartitaat suuppat? Mikisunik
meerartalittut ilungersunarluinnartut ilagaat paarsisussaaleqineq
paaqqinnittarfissaaleqinerlu. Karsini aamma ataatsimiipput.
Privatini
paaritittaqattaarlugit allaniit allanut nooqattaarlugit tassa aamma
ilungersunarluinnaqqissaartut. Imatut sivitsorsimagaluarpaalluunnit sapaatip
akunnerani isumaqarnarpoq suli pingaarneqartoq aamma tassani.
Taamaattumik
Inuit Ataqatigiinninngaaniit pingaartipparput nalilersuilluarnissaq
pingaarnersiuinissarlu imaanngilaq isumaqatinnginnatsigu kisianni taanna
karsi aamma aappaagumut aappaguagumullu atuivallaarsimannginnissaat
siunertaralugu akisussaaqataasutut taanna pingaartipparput. Taavalu uani
peqqinnissaqarfik eqqaaneqaqattaarmat oqariartortunit oqaatigiinnassavarput
siorna taamaalinerani Naalakkersuisup naatsorsukannereersimavaa qanoq
sippuinissaq annertutigissanersoq. Unneqqarissumillu
Inatsisartunut taanna saqqummiullugu. Qaangiisoqannginniassammat.
Aamma
ajunngitsumik taanna Inatsisartut paasinnillutik aamma taanna kusanartumik
naammassivaat. Una allaavoq ukioq qaangiuteersoq taamannak millioninik
ilimagisaminngaaniit millionerpassuarnik sippuisimaneq
Naalakkersuisoqarfinni aalajangersimasuni. Qujanaq.
Mikael
Petersen, Siumup.
Siullermik
isumaqarpunga aamma uani assortuussutissaqarpallaanngitsugut tassa
Inatsisartut tamarmik oqaaseqartut tamarmik siunniusimavaat naartunermi
erninermilu sulinngiffeqartarnerup sivitsorneqarnissaa. Taanna
tamatta isumaqatigiissutigaarput. Aamma tamatta isumaqatigiissutigigunarparput
misissueqqissaarnerit ingerlanneqassasut. Naalakkersuisut siunnerfiat
tamavitta isumaqatigaarput.
Ukiakkut
2003-mi saqqummiisoqassasoq misissuinerit tamarmik naammasippata. Aamma taanna
assortuussutiginngilarput. Unali Siumuminngaaniit Atassumminngaaniit
piumasarineqartoq tassa kisimi ukiamut aningaasanut inatsisissap
suliarineqarnerani taassumalu tungaanut Naalakkersuisut
misissoqqissaassagaat aningaasaliissutaareertartut tassa ullumikkut 17,9
millioniusut ukiumut siorna 17,9 millioninik aningaasaliivugut aamma ukioq
mananmut 17,9 millionit aamma aappaagumut pilersaarutaavoq 17,9 millionit
taakkua iluini ilumut periarfissaqarsinnaanersoq sapaatip akunneranik immaqa
sapaatip akunnerinik marlunnik sivitsuigallarnissamik.
Naatsorsuutit
takuteermassuk atunngitsoorneqartartut millionit arlaqartut. Aamma
nalunngilarput naatsorsuutit 2000-meersut taakkua aningaasartaqarput tassani
kontomi 14,4 millioninik. Tassa 14,3-ugaluarput. 14,4. taavalu 17,9
millioninik immikkoortitaqarluta. Periarfissaqarpoq tassani 3,5 millionit
atorluarnerunissaannut. Atorluarnerunissaannut.
Taava
taakkua atorluarnerusariaqarpagut periarfissaqarpat. Taanna misissoqquvarput.
Taamaalillunilu taakku periarfissiissutaasinnaappata taava sapaatip
akunneranut ataatsimik marlunnilluunniit sivitsuisoqarsinnaavoq. Inuit
Ataqatigiit oqaatigineqartut kontot allat sipporneqarsimasut taanna tamatta
nalunngilarput. Aamma tasani kontomi allat pineqarput siunertat allat
pineqarput. Kommuninut isumaqatigiissutit naapertorlugit. Kommuninut
isumaqatigiissutit naapertorlugit tamakku pineqarput.
Aamma
taakku pillugit naatsorsuutit eqqartorneqalerpata qanoq
nassuiarneqarumaarnerat Naalakkersuisut saqqummiuttussaajumaarpaat. Aammalu
qanoq aningaasalersorneqarnissaat aningaasalersorneqarnissaat taanna
suliassaajumaarluni.
Taamattumik
uani paatsiveerussaasoqassanngilaq uani pineqartoq allamut
sangutinniarsaralugu.
Allat pisut aningaasalersorneqarnerat taanna uani naartunermi erninermilu
sulinngiffeqartarnermut attuumassuteqanngillat. Taamaattumik suliassaq taanna
allaavoq aamma allatigut taanna aningaasalersorneqartariaqarpoq.
Lars Sørensen,
Inuit Ataqatigiit.
Tassa
ilumoorpoq annertunerusumik assortuussutissaqanngilagut, kisianni
Aningaasaqarnermut Ataatsimiititaliap Siulittaasua pakatsissutigilaarpara
tassami ippasigamikkunni ingerlatsinermut aningaasartuutit 2002-mi pillugit
Inatsisartut oqallinneranni ilaatigut oqaatigineqarmat 268 millionit ukiut
ingerlanerini arlaatigut massakkut iliortoqanngippat taava landskarsip
ajutoorujussuarsinnaanissaa aamma tamanut saqqummiunneqarmat.
Tassa
isumaqarpunga aningaasaqarnermut ataatsimiititaliap Siulittaasuata
isigisariaqaraa ataatsimut isiginninneq soorunami ilisimaneqartutuut
isumaginninnermut ingerlatsinermut aningaasartuutit 800 million missaniipput.
Taamattumillu ukua 1,2 million kr-nit taakkua kisiisa
isiginiarneqarsinnaanngillat.
Kisianni
aamma Ruth Heilmannip oqarneratuut angajoqqaarpassuit pisariaqartitsipput
erninermi sulinngiffeqartarnerup sivitsorneqarnissaanut. Kiammi tamanna
nalummagu.
Partiit
tamavitta oqaatigeerparput massakkummi meeqqat inuusuttut sumiginnagaasut
nilliasut. Utoqqaat atugarisamikkut assigiinngitsutigut
pitsanngorsaaffigineqartariaqartut tamakkua aamma nilliammata
oqaatigisariaqarparput. Taamaattumik aamma ataatsimut nalilersuinissaq taanna
saneqqussinnaanngilarput pissutigalugu landskarsimi aningaasat
atugassaritinneqartut killeqarmata.
Taamaattumik
uani assortuunnata taamaallaat immitsinnut paasinnittaasitta assigiinnginnera
ersiinnarpoq. Uagut kissaatigigatsigit ataatsimut nalilersuisariaqartugut.
Taakkualu aallaavigalugit assigiinngitsut aaqqitassat
ingerlanniarneqartariaqarneri. Assortuuttoqanngilaq paasinninneq tassani
allaavinnarpoq tamani.
Ole
Dorph: Isumaginninnermut Suliffeqarnermullu Naalakkersuisoq, Siumut.
Aamma
uanga taakku aningaasat sippuisarnermik imallit eqqaaneqarmata aamma
soorunalimi qisuariatariaqarama eqqaalaassavara ilumoorpoq ukioq kingulleq
aamma ilisimaneqarpoq tamanit ulloq unnuarlu angerlarsimaffiit
ingerlanneqarnerannut annertuumik sippuisimavugut.
Aamma
ukioq manna taamaattussaavoq. Tassa ukioq manna taksteq atugarput siorna
junimi isumaqatigiissutaareerpoq kommuninut.
Kommunillu
aatsaat Namminersornerullutik Oqartussaninngaaniit aasamut juni juliluunniit
qaammat 2003-mi takstinut atugassanik isumaqatigiinniarfigineqartussaassooq.
Tassa
imaappoq siorna isumaqatigiinniarneq aallaavigalugu
qaffaasoqartussaasimagaluarpoq.
Taamaattoqarsimagaluarpat
sippuinerit massakkut ajoraluartumik atukkagut pisimassanngikkaluarput.
Taannalu
pinngitsoorniarsarivissorniarlugu massakkut kisitsisit tunngavissat
isumaqatigiinniarnernut tunngavissat maannakkut tamarmik sananeqareerput.
Aamma pissutsit taamatut ingerlaannassappata ukioq manna
naatsorsukannerneqarpoq 22 millioninik sippuinissarput. Taanna
kissaatiginngikkaluaqaarput tamatta.
Kisianni
naatsorsuutigaarput neriuutigalugulu kommunit
isumaqatigiinniarfigineqaqqissinnaappata ukiup matumaluunniit ingerlanerani
taanna periarfissaq atorlugu isumaqatigiinniarnerit pinngitsoornani
ingerlanneqartariaqartut.
Aamma
uani oqallinnermi eqqaatsiarneqarmat meeqqat soorunami sukkulluunniit
napparsimasarput. Erninermut attuumassuteqanngikkaluartut imaattoq kisianni
tassunga atatillugu oqaatigissavara ullumikkut suliffeqarnerup silarsuaani
isumaqatigiissutit aallaavigalugit angajoqqaat meerartik napparsimappat ulloq
ataaseq freersinnaatitaapput.
Taava
ullup ataatsip ingerlanerani meerartik aamma ullut marluk pingasut
napparsimassappata ullup ataatsip ingerlanerani ullup aappassaata
pingajussaanilu qanoq ililluni taanna meeraq paarineqassanersoq
aaqqissuunniarsarisussaavaat.
Ilumut
aaqqissuusseriarsinnaaneq tamakkununnga aamma attuumassuteqartoq aamma
pingaaruteqartorujussuuvoq oqaluuserissallugu erninermulluunniit
sulinngiffeqartarnermut atatillugu taakkutulli pingaaruteqartigivoq.
Taamaattumik
oqallinnermut uunga oqallinnermut uunga, uumap oqallinnerup saniatigut taanna
oqallinneq tassunga tunngassuteqartoq aamma ingerlanneqartariaqarpoq.
Barselertarnermut attuumassuteqanngilaq isumaqatigiinniarnernut
attuumassuteqarpoq.
Aamma
taanna taassumap pitsanngorteriarsinnaanissaa isumaqatigiinniarnerit
aallaavigalugit aamma isumaqarpunga eqqumaffiginiarneqartariaqartut
ilagilluinnartariaqaraat.
Daniel
Skifte, Inatsisartut Siulittaasuat, Atassut.
Isumaginninnermut
Naalakkersuisoq qutsavigaarput. Taamaalilluni immikkoortoq 89 tassunga
killippoq. Allanik oqaaseqarumasoqanngilaq. Imatullu naammassineqarpoq. Siumup
Atassutip Inuit Ataqatigiit Kattusseqatigiit Attaviitsullu isumaqatigaat
partiit aammalu apeqqutit assigiinngitsut missilluarneqarnissaat
suliarineqassasoq Isumaginninnermut Suliffeqarnermut Ataatsimiititaliamit
taannalu pissaaq ukiaru Inatsisartuni aappassaaneerneqannginnerani.