Oqaluuserisassani immikkoortoq 69-2 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut
arfersaneq pingajuat, ataasinngorneq 13. maj 2002 nal. 14.17
Daniel Skifte, ataatsimiinnermik aqutsisoq, Inatsisartut siulittaasuat, Atassut.
Apeqqutigissavara taanna pillugu oqaasissaqarumasoqarnersoq. Aap peqqinnissamut avatangiisinullu Naalakkersuisoq.
Edward Geisler, Peqqinnissamut Avatangiisinullu Naalakkersuisoq, Atassut.
Inatsisartunut ilaasortap Godmann Jensen aalajangiiffigisassatut siunnersuutaata aappassaaneerneqarnissaanut Inatsisartut eqqissisimatitsinermut avatangiisinullu ataatsimiititaliaata isumaliutissiissutaanut akisussaassuseqarluartumut suliareqqiinissamullu tunngavissiilluartumut Naalakkersuisut sinnerlugit qujassuteqarpunga.
Naalakkersuisut iluarisimaarlugu paasivaat tunngavissat ataatsimiititaliap 1996-mili takuteriigai eqqisisimatitsinermut avatangiisinullu atatsimiititaliamit tapersersorneqartut. Tunngavissat taakku sulinermut timmissat illersorneqarnerat pillugu Namminersornerullutik Oqartussat nalunaarutaannut normu 38. 6. december 2001-meersumut killeqartumut qitiulluinnarsimapput.
Pisussutinik iluaquteqarniarnermut tunngavissat taakku qitiulluinnartut puigussanngilagut. Taamaattumik matumuuna aammaarlunga uteqqissavakka. Piujuartitsinissamik tunngaveqarluni iluaquteqarniarnermik isuma nuna tamakkerlugu najukkanilu ataasiakkaani maleruarneqassaaq. Sapinngisamik piaqqiornerup iluatsilluarnissaa qulakkeerniarneqassaaq tassa piaqqiorniarnerup nalaani timmissat eqqissisimatinneqassallutik. Mianersornissamik periaaseq maleruarneqassaaq.
Naalakkersuisut paasivaat siullermeerinninnermut Naalakkersuisut akissuteqaataat eqqissisimatitsinermut avatangiisinullu ataatsimiititaliap taperseraa. Kiisalu tunngavissatut aalajangerneqarsimasut malitsigisaannik ataatsimiititaliap Inatsisartunut ilaasortap Godmann Jensenip siunnersuutaa itigartittariaqaraa.
Naalakekrsuisut aamma nuannaarutigalugu Eqqissisimatitsinermut Avatangiisinullu Ataatsimiititaliap isumaliutissiissutaani oqariartuutit pingaarutilerujussuit allat maluginiarpaat, ilaatigut uku:
Tunngavissanik maleruaaneq kinguneqarsinnaammat qangaaniilli iluaquteqarniariaatsit atorunnaarneqarnerinik.
Malittarisassat sapinngisamik najukkani nunallu immikkoortuini ataasiakkaani pissutsinut naleqqussarneqarsimassasut, tunngavissalli aallaaviusut saneqqunnagit.
Sapinngisamik kommunit namminneq iluaquteqarniarnermik aqutsisinnaanissaat sulissutigineqassasoq, aamma
piniarnerup avataatigut pissutsit allat timmiaqassutsimut sunniuteqarsinnaasut aamma misissorneqartarnissaat pingaaruteqartoq.
Naalakkersuisut timmissat pillugit nalunaarummik atuuttumik tunngavissaqarluarluni iluarsineqarfigisinnaasaatigut iluarsartuussinertik maanna nangeqqissavaat.
Naggataatigut oqaatigissavara Eqqissisimatitsinermut Avatangiisinullu Ataatsimiititaliap tusarniaareernerup kingorna Naalakkersuisunili akuersissutigineqarnissaata siorna nalunaarummik saqqummiussivigineqarnissaminnik immikkut kissaataa Naalakkersuisut naammassiniarmassuk.
Taamatut oqaaseqarlunga siunnersuut Inatsisartunut oqaluuserisassanngortippara.
Daniel Skifte, ataatsimiinnermik aqutsisoq, Inatsisartut siulittaasuat, Atassut.
Peqqinnissamut Avatangiisinullu naalakkersuisumut qujavugut. Maannakkut partiit Kattusseqatigiit Attaviitsullu oqaaseqartuinut nuuppugut, siulliullunilu oqaaseqassaaq Vittus Mikaelsen Siumut.
Vittus Mikaelsen, Siumup oqaaseqartua.
Inatsisartunut ilaasortap Godmand Jensenip, Atassummeersup, aalajangiiffigisassatut siunnersuutaa, tassalu timmissat pillugit nalunaarutip nr. 38, 6. december 2001-imeersup aappassaaneernerani Siumumit imatut oqaaseqarfigissavarput:
Siumumi nuannaarutigaarput siullermeernerani partiinit aamma Siumumi oqaaserisavut aallaavigalugit, Inatsisartut Eqqissisimatitsinermut Avatangiisinullu Ataatsimiititaliani siunnersuuteqartoq Bodmand Jensen peqatigalugu peqqissaartumik suliaqarsimammata.
Siumumit maluginiarparput Naalakkersuisut aalajangiiffigisassatut siunnersuut aamma partiinit oqaatigineqartut aallaavigalugit aappassaaneernissaanut suliaqarsimasut tamakkulu toqqammavigalugit aalajangiiffigisassatut siunnersuut itigartinneqassasoq saqqummiunneqarpoq.
Siumumi itigartitsinissami saqqummiussaq isumaqataaffigaarput pissutigalugu Naalakkersuisut akissuteqarnerminni erseqqissaqqimmassuk kommuninut tusarniaanerit piffinni tamani maannakkut ingerlanneqarmata, maannakkullu akissuteqaatit takkussuuttut naammassippata Naalakkersuisut timmissat pillugit nalunaarut kommuniniillu saaffiginnissutit misissorluaqqereerunikkit nalileeqqinniarmata.
Siumimi maluginiarparput Inatsisartut Eqqissisimatitsinermut Avatangiisinullu Ataatsimiititaliap maluginiarsimammagu oqallinneq uunga killittoq, Naalakkersuisuni oqaatigineqarluni nalunaarut assigiinngitsut ilaatigut aamma timmissat ilaat pillugit suliamut toqqammavissat atorlugit iluarsiivigineqartariaqartoq isumaliutigeqqittariaqartorlu Siumumi isumaqatigaarput.
Aammattaaq Siumumi maluginiarparput Naalakkersuisut oqarnerat, Naalakkersuisut timmissat pillugit nalunaarummik atuuttumik tunngavissaqarluarlutik iluarsiissuteqarnissamut aamma iluarsartuussinertik maanna nangeqqinniaraat.
Naggataagut Siumumi taamatut oqaaseqarluta siullermeerinninnermi Siumumit oqaaserisavut innersuussutigalugit Inatsisartunut ilaasortap Godmand Jensenip, Atassummeersup, aalajangiiffigisassatut siunnersuutaa itigartinneqarnissaani taaseqataassaagut.
Naalakkersuisullu saqqummiussaat isumaqataaffigaarput Naalakkersuisullu timmissat pillugit nalunaarummut suliartik peqqissaartumik ingerlateqqissagaat Siumumit neriuuteqarfigalugu sulilluarnissaannik kissaappavut.
Daniel Skifte, ataatsimiinnermik aqutsisoq, Inatsisartut siulittaasuat, Atassut.
Vittus Mikaelsen qutsavigaarput. Tulliulluni oqaaseqassaaq Konrad Steenholdt, Atassut.
Konrad Steenholdt, Atassutip oqaaseqartua.
Timmissat pillugit peqqussutip naliliiffigineqarnissaa pillugu aalajangiiffigisassatut siunnersuut. Tassa Godmand Jensen-iminngaanniit.
Siunnersuutip aappassaaneerneqannginnerani Ataatsimiititaliami suliarineqarsimanera Naalakkersuisumillu akissuteqaat oqallisigereerlugu Atassummit imatut oqaaseqarfigissavarput:
Akissuteqaataasut paasivavut, siunnersuuteqartullu siunnersuutigisamini toqqammavigisaa sikusartumiinneq aaqqiiniarnermi ilanngullugu nalilerniartariaqartoq paasineqarsimasoq erseqqippoq. Aaqqiiniarnissa aasaq manna angumerineqarsinnaanngitsoq uggornarpoq, tassami timmiarpassuit maanna avannamukaaleruttorput mannilioreerunilli aallarareertullu aallaaniarneqarsinnaanerat aatsaat ammaanneqassalluni. Taavani nalugaqartunut pissutsit taamaannerat artornartumik eqqorneqaataasussaavoq.
Pissutsilli immikkut ittuunerat tunngavigalugu ukiumi tulliuttumi aaqqiissutissat, tusarniaaffigineqartussat aqqusaareerlugit takkuttussaq, naammaginartuunissaat kissaatigaarput.
Taamatut oqaaseqarluta Naalakkersuisut saqqummiussaat isumaqatigalugu taaseqataassaagut.
Daniel Skifte, ataatsimiinnermik aqutsisoq, Inatsisartut siulittaasuat, Atassut.
Konrad Steenholdt qutsavigaarput. Tulliulluni oqaaseqassaaq Malînánguak= Markussen Mølgaard, Inuit Ataqatigiit.
Maliinannguaq Markussen-Mølgaard, Inuit Ataqatigiit oqaaseqartuat.
Qujanaq.
Timmissat illersorneqarnerat pillugu Namminersornerullutik Oqartussat nalunaarutaani allannguinissamik Inatsisartuni Godmand Jensen-ip siunnersuutaata maanna aappassaaneerneranut atatillugu Inuit Ataqatigiinniit eqqissisimatitsinermut Avatangiisunullu Ataatsimiititap isumaliutissiissutaa tapersersoratsigu oqaatigissavarput.
Timmissat illersorneqarnissaanut apeqqut misigissutsinik mikinngitsumik eqquivoq, inuiaqatigiinnilu oqallisaaqaluni. Pingaartumik appat mitillu eqqarsaatigalugit uumasunik ilisimatuut ukiuni arlaqalersuni erseqqissartuarpaat timmissat taakku ikiliartormata mianersortariaqartugut. Illuatungaaniillu piniartut pinialuttartullu killilersuineq akerleraat ilaatigut sumiiffiit ilaanni timmissanik taakkuninnga piniartoqarsinnaajunnaassammat.
Inuit Ataqatigiinniit piujuaannartitsinissaq pingaaruteqarluinnartutut isigaarput. Tassami kinguaassagut eqqarsaatigisariaqarpagut, killilersuisoqarneralu piffissap killilersuinerup iluani eqqorneqartunut ilungersunaraluartoq, kingusinnerusukkut tamanna piniagassat amerlineranik kinguneqartussaammat eqqaamasariaqarparput. Taamatummi iliorneq ileqqaarnertut isigisariaqarpoq.
Oqareernitsitullu apeqqut manna misigissutinik attuisuummat inuiaqatigiinni paaseqatigiilluarnissaq pingaaruteqarpoq, taamaattumillu maanna sinerissami paaseqatigiilluarnissaq pingaaruteqarpoq, taamaattumillu maanna sinerissami paasisitsiniaanissaq aamma pingaaruteqarluinnartoq Inuit Ataqatigiinniit isumaqarpugut, tamatumanilu Naalakkersuisut qanoq iliuuseqalersaarnersut apeqqutigerusullugu.
Maanna danskip atuakkiortup Kjeld Hansen-ip atuakkiaata avataaniit isigineqarnitsinnik innarliisup illuatungilernissaa pisariaqartoq isumaqaratta, nunatta avataani paasisitsiniaanissaq aamma pingaaruteqarluinnartoq Inuit Ataqatigiinniit isumaqarpugut.
Paasisinnaalluarparput sumiiffiit ilaanni ukiorpassuarni kulturimut ilaatillugu timmiarniarneq ilaammat, killilersuineq mamiagineqarmat. Taamaattumik apeqqutip matuma ataatsimut isiginnittumik mianersortumilli aaqqiivigineqarnissaa nalilersoqqinnissaalu pisariaqarpoq. Tamatumani kommuunit sumiiffinnilu piniartut peqatigiiffiisa paaseqatiginiarnissaat pingaaruteqartutut Inuit Ataqatigiinniit isumaqarfigaarput.
Sikusartumiinneq imaluunniit kujasinnerusumi sikusartumiinnginnermi inunnut piniagassanullu atugassarititaasut assigiinngisitaarsinnaaneri aallaavigalugit, tamatumap nalilersuinermi eqqumaffigineqarnissaa pisariaqarsoraarput.
Tassami paasisagut malillugit timmissat pineqartut ikiliartorneranut patsisaasut piniarnerinnarmik pinngimmata, pinngortitap pissusaanut, angallannermut, allarpassuarnillu pissutaaqataanerat eqqaamasariaqarparput.
Taamaattumik siunissami killilersuiniarneq kisiat pinnagu tamakku aamma nalilersueqqinnermi avaqqunneqarsinnaanngitsut Inuit Ataqatigiinniit isumaqarpugut.
Maannalu iluatsillugu Naalakkersuisunut apeqqutigerusupparput ilisimaneqarnersoq siorna Paamiuniit kujammut apparpassuit toqorarsimasut sumik patsiseqarnersut ilisimaneqarnersoq?
Mannalu iluatsillugu timmissat illersorneqarnerat pillugu Namminersornerullutik Oqartussat nalunaarutaanni nr. 38, 6. december 2001-imeersumi § 6-ip kalaallisuuata qallunaatuaatalu assigiinnginneri uparuarusuppagut, tassami sumiiffinni tikeqqusaanatillu angalaffigeqqusaanngitsuni piffissaliussat assigiinngimmata. Kalaallisuaani 1. juni-miit 31. august allassimasoq qallunaatuuani 1. maj-imiit 31. august allassimammat. Tassani sorleq atussanersoq matumuuna apeqqutigerusupparput?
Taamatut oqaaseqarluta InuitAtaqatigiinniit Avatangiisinut Eqqissisimatitsinermullu Ataatsimiititaliap isumaliutissiissutaa tapersersorparput, taakkununngalu attuumassuteqartunut Ataatsimiititaliap qanimut malinnaatinneqarnissaa kissatigalugu.
.
Daniel Skifte, ataatsimiinnermik aqutsisoq, Inatsisartut siulittaasuat, Atassut.
Maliinannguaq Markussen-Mølgaard qutsavigaarput. Tulliulluni oqaaseqassaaq Anthon Frederiksen Kattusseqatigiit.
Anthon Frederiksen, Siulittaasup tulliata sisamaat, Kattusseqatigiit.
Qujanaq. Inatsisartunut Ilaasortap Godmand Jensen-ip Upernaviup Kommuniani appat meqqillu september 1.-niit maj-ip 31.-nut Qaanaap Kommuniatuulli piniarneqalerat pillugu Namminersornerullutik Oqartussat nalunaarutaata nr. 38-ip december-ip 6-ni 2001-meersup Inatsisartunit nalilersorneqartariaqarneranik siunnersuutaa Kattusseqatigiinniit siullermeerluta oqaaseqarnitsinni oqaaserisagut innersuussutigalugit naatsumik imaalillugu aappassaaneernerani oqaaseqassuugut:
Tassa soorlu siunnersuutip siulleerneqarnerani erseqqissaripput matumuuna erseqqissaqqissavarput Kattusseqatigiinniit anguniakkatta ilagimmassuk sulluunniit aalajangersakkat sapinngisamik pissutsip piviusut tunngavigalugit aammalu pinngortitaq, uumasut minnerunngitsumillu inuit sumiiffinni assigiinngitsumni najugallit peqatigalugit aalajangeersaasoqartarnissaa anguniartariaqarmat.
Taamaammat siunnersuuteqartoq taperserparput siunnersuummini oqarmat nunarput tamaat ataatsimut timmissat pillugit maleruagassaqartitsilluni tulluartuunngitsoq. Tassa nunarujussuatsinni qeqertat annersaanni silap, sikut, pinngortitap inuuniarnikkullu atugassarititaasut ilaatigut assigiinnginnerujussuat naluneqanngimmat.
Tassami pissutsit piviusut ima assigiinngitsigaat assersuutigalugu avannaani sikusartumi timmissat pingaartumik appat meqqillu ilaatigut taavunga tikerartarput piniaqqusaajunnaareerlutik. Tassalu aamma piniarneqarsinnaalersimatsiarlutillu aamma kujammut aallaqqittarlutik.
Suliap aappassaaneerneqarnerani Naalakkersuisut akissuteqaataat malittarisassanik sapinngisamik najukkani nunallu immikkoortuini ataasiakkaani pissutsinut naleqqussarneqarsimassasut oqaatigineqarmat, aammalu sapinngisamik kommunit namminneq iluaquteqarniarnerminnik aqutsisinnaanerat sulissutigineqassasoq ilaatigut oqaatigineqarmat Kattusseqatigiinniit iluarisimaarparput.
Godmand Jensen-ip siunnersuutaa naak itigartikkuminaakkaluartoq Naalakkersuisut maanna qanoq iliuuseqarniarnerat paasilluarlugu Naalakkersuisut akissuteqaataat tusaatissatut tigullugu taaseqataaffigissavarput.
Daniel Skifte, ataatsimiinnermik aqutsisoq, Inatsisartut siulittaasuat, Atassut.
Anthon Frederiksen qutsavigaarput. Tulliulluni oqaaseqassaaq Peqqinnissamut Avatangiisinullu naalakkersuisoq.
Edvard Geisler, Peqqinnissamut Avatangiisinullu Naalakkersuisoq, Atassut
Matumani akissuteqaaterput Siumup oqaaseqartuanut Vittus Mikalsen-imut, kiisalu Atassutip oqaaseqartuannut Konrad Steenholdt-imit, aammattaarlu Kattusseqatigiinniit Anthon Frederiksen-imit tusagassatut tiguneqartoq qujassutigaarput. Inuit Ataqatigiinninngaaniit apeqqutigineqartut eqqarsaatigissagaanni uani akineqartariaqartut tassaapput:
Kjeld Hansen atuakkiaata sunniutigisaanik nunatsinni kinguneqapilussinnaaneranik eqqarsaatigalugu aamma nunatta avataani paasisitsiniaasoqarnissaa, taanna Naalakkersuisunit pingaartillugu suliniutigineqarpoq.
Taamaattumik nunatinniinnaanngitsoq kisiannili aamma
avatitsinni inuuiaqatgiit nunatsinni inooriaatsimik paasisaqarnerunissaat
anguniarlugu tassungakkut aamma pilersaaruteqartoqarpoq. Taannalu
Naalakkersuisut eqqumaffigivaat. Taanna pilersaarutinut ilaareerpoq.
Oqaatigisariaqarparput
eqqumaariffigivarput matumani aaqqiinissamut tunngassuteqartut ilaatigut aamma
Inuti Ataqatigiinniit eqqartorneqartut.
Paamiuni
siorna apparpassuit toqorarsimaneranik tunngatillugu paasiniaanerit
kingullermik paasisagut ima oqaaseqarput:
"Appat
taamatut toqorarsimaneranut suna patsisaasoq erseqqissumik suli
nalunaarutigineqanngimmat, inuunermut navianarsinnaaneranut oqariartuutilinnik
suli paasisaqanngilagut. Taamaattumik taakkua nassiussimasagut erseqqissumik
suli akissuteqarfigineqanngillat.@"
Tassa
appat atsaat taamatut toqorarnerat nunatsinni takussaalinngimmat aamma
1976-kunni Narsaq eqqaani aamma eqqaanni apparpassuit taamanikkut toqorarmata,
assigiinngitsunik patsiseqarnera sumillu patsiseqarsinnaanera
akissutissineqanngillat. Kisianni taanna misissoqqissavarput ilumut sunarpiaq
patsisaasimanersoq. Massakkumuugallartorli suli akissutisiffiginngilarput,
tassa taamanikkut tutsiuteqqaamata erngerlugit paasiniaanerit
ingerlanneqarsimapput. Akissutissiaraagut taamaallaat nassuiaatissaqanngitsut
aammalu ulorianaateqarsinnaanerannut takussutissaqanngikkallartut. Taakkua
akissutissarsiffigaagut.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Naalakkersuisumut
ilaasortamut qujavugut. Tulliullunilu oqaaseqassaaq Lars Karl Jensen partiimi
oqaluttup avataatigut.
Lars-Karl
Jensen, partiimi oqaluttup avataatigut, Inatsisartuni siulittaasup tulliata
pingajuat, Siumut.
Qujanaq.
Upernaviup
Kommuniani inuttaasut piffissami aalajangersimasumi appanik miternillu
piniarsinnaanerat Godmand Jensen siunnersuutaa isumaqarpunga sikusartunut
tamanut attuisuusoq, aamma taasuma suliarineqarneranut oqaaseqarnikuuvunga,
kiisalu aamma uanga siunnersuutinnut tunngasunik.
Sikusartumiittunut
tamanut attuisuusut oqaatigigakku eqqarsaatigivara neqissaqarniarneq tassuunga
innarlerneqarmat. Maannakkummi allannguisoqannginnerani
periarfissaasaraluarpoq piffissami aalajangersimasumi taavani sumiiffinni
assigiinngitsuni timmissat avammukaalernerani soorlu aamma Atassumminngaanniit
oqaaseqartup oqaatigigaa timmiarniarsinnaaneq ammatinneqarluni, kisianni
maannakkut nalunngisatsitut ukioq peqqussusiortoqarpoq februar-ip 15.-ni,
taasumap kingornatigut appat mitillu timmissallu arlaqaqisut allat
piniaqqusaagunnaartut.
Uani
Eqqissisimatitsinermut Avatangiisinullu Ataatsimiititaliap
isumaliutissiissutaa paasilluarpara, aammalu Naalakkersuisut kommuninut
tusarniaanerat taanna avaqqukkuminaappoq, kommunillu qanoq
qisuariaateqarnissaat pissanganartuulluni aamma tusassallugu,
minnerunngitsumillu
Naalakkersuisutsigoortumik siunissami qanoq aaqqissuisiornissaat aamma.
Tassa
siusinnerusukkut oqaaseqarninni ilanngullugu aamma oqaatiginikuuara
avatitsinninngaanniit tatineqartarpugut, soorlumi aamma taanna atuakkiarsuaq
tupinnartoq Kjeld Hansen atuakkiaa eqqarsaatigalugu taama oqarsinnaasugut:
"Inuiannguugatta immaqa ikittut".
Kisianni
eqqarsaatigilaariartigut sutigut tamatigut avatitsinniittunut
suleqateqarnerput. Uani Canada suleqatigivarput. Canadami ukiumut
appattassarineqarsinnaasut annertoorujussuupput, aammali qangali
ilisimaneqareerpoq biolog-it tungaaninngaanniit Kalaallit Nunaanni appat
tukerartut, aamma allaat New Fondland angullugu siaruartarmata Canadami.
Taamaattumik
isumaqarpunga pissusissamisuussasoq aamma suleriaqqinnissami Canadamiut
paaseqatiginiassallugit, uagut pisassagut kisiat ikilinagit taamatut
pisoqassappat, aamma Canadamiut ikilisitsisinnaanersut. Taamaalilluta
naligiimmik aamma piviuaannartitsinissaq suleqatigiiffiginiassagatsigut
nunamut qanigisatsinnut.
Na...
innarlerneqarmat tupiginngilara sikusartumiittut taamatut maallateqarnerat,
aammalu eqqarsaatiginngitsoorsinnaanagu allamik taarteqartissinnaanerannik
Naalakkersuisut periarfissiinngivillutik matussinerat taanna
pissusissamisoornersoq? Nalunngisatsitut tikaagulliusaartassat nungunneqarneq
ajorput. Soormi Upernaviup eqqaani mangusalereernikuuaat, Diskobugt-iinnarmut
killinnagit avannarpasinnerusumut aamma agguaanneqartalerunik.
Neqissaqarniarneq
eqqarsaatigalugu tikaagulliit, aamma tikaagulliit agguaanneqartarnerat aamma
immaqa tassani oqimaalutaavigineqarsinnaavoq.
Kiisalu
tuttutassat ukioq manna tuttut amerlatsissimangaarmata
nungunniarsarisussaavagut aalasinnaasut tamaasa, peqquneqarnerput malillugu.
Taama ingasatsiginngikkunaraluarpoq. Kisianni aamma eqqarsaatigineqarsinnaavoq
Upernaviup eqqaaninngaaniit taakkumi avannarliit nunarput tamakkerlugu immaqa
tuttutassanik taamaallaat pissarsineq ajormata. Pissarsisinneqarsinnaanersut
taamalillutik neqissaqarneq tungaatigut timmissanik innarligaanerat aamma
taarteqartinneqassammat.
Piffissara
naasimammat qujanaq.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Lars-Karl
Jensen qutsavigaarput.
Tassa
aappassaaneernerani partiimi oqaaseqartat avataani oqaaseqartussat
naatsuararsuarmik oqaaseqartartussaasut suleriaasitsinni allassimavoq. Aamma
taamaassaaq tulliulluni oqaaseqartussaq Ruth Heilmann partiimi oqaaseqartitap
avataatigut. Aappassaaneermat naatsuararsuarmik.
Ruth
Heilmann, partiimi oqaaseqartitap avataatigut, Siumut.
Qujanaq.
Tassa uanga Ataatsimiititaliami siulittaasutut aamma taamatut
isumaliutissiissuterput partiinit aammalu Kattusseqatigiinniit
isumaqatigineqarmat, aamma Naalakkersuisut suliniuteqarniarnertik massakkut
ingerlakkaat aamma paasilluarlugu isumaqarpunga taamatut
isumaqatigiitsigigatta annerusumik oqaaseqartariaqanngikkaluarlunga. Kisianni
uani Godmand Jensen-ip taamatut siunnersuuteqarnermini pigamiuk tassa
timmissat kommunimut anngukkaangata, taava piffissaq aallaaniarfissaq
qaangiuteriikatassammat, taavalu piffissaq aallaaniarfissaq aallartikkaangat,
timmissat kommuni qimareersimasarlugu.
Taanna
nalunaarut nutaaq, tassani taamatut erloqinartumik isigititsimmat sikusartuni,
taamaattumik taamatut Godmand Jensen siunnersuuteqarpoq. Kisianni uagut
Ataatsimiititaliami nalunngilarput aamma Naalakkersuisut oqaloqatiginerani
paasillugu tusarniaanerit annertuut massakkut ingerlanneqartut, taavalu aamma
isumasiuinerit. Taamaalilluni naak aamma Atassut oqaraluartoq aasaq manna
nalunaarutip allanngortinnissaa angumerineqarsinnaanngitsoq.
Isumaqarpunga
uagut Ataatsimiititaliami kinguarsaajumanata tassuunakkut isumaliutissiissut
naammassiniarsimavarput upernaakkut ataatsimiinnermi. Taamaattumik
naatsorsuutigaarput Naalakkersuisut aamma tunngavissaqarlualereersut taassumap
nalunaarutip nutaap iluarsinissaannut. Aamma taanna Ataatsimiititaliami
isumaliutississuunni allakkatigut kiisalu aamma Siumut oqaaseqarnerminni
taanna erseqqarisseqqillugu. Qujanaq.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Ruth
Heilmann qutsavigaarput. Tulliulluni oqaaseqassaaq Malînánguak= Markussen Mølgaard,
aappassaanik oqaaseqassaaq.
Maliinannguaq
Markussen-Mølgaard, Inuit Ataqatigiit oqaaseqartuat.
Qujanaq.
Apeqqutitsinnut Naalakkersuisut akissutaannut qujavugut.
Ilaatigut
isumaqarsimavugut uagut Inuit Ataqatigiinninngaanniit imaluunniit
isumaqarpugut massakkut avataaninngaanniit tatisimaneqarnerput annertoqimmat,
aammalu taanna atuakkiaasimasoq pinngitsoorani piffissaq ungasinnerusoq
eqqarsaatigalugu sunniuteqarnerluttussaammat paaasisitsiniaanerit avammut
pingaaruteqarluinnartut, nunatta avataani. Soorunami suliap
aallartissimanerani oqarnera nuannaarutigaarput, kisianni
apereqqikkusukkaluarpara:
Suliat
suut?
Qanoq
ittorpianik pilersaaruteqarassi paasisitsiniaanissami?
Qanoq
iliuuseqarlusi paasisitsiniaaniarassi?
Taanna
assut akitikkusukkaluarparput.
Taavalu
aamma apeqqutitta pingajuanut tunngatillugu uani § 6-mi tassani ullorititaasut
qallunaatuuani kalaallisuuanilu assigiinngimmata, taanna akinnginnakku
Naalakkersuisoq assut akitikkusukkaluarparput, soorunami pisariaqarpoq inatsit
atuuttut ilisimaqqissaassallugit ulloq sorleq eqqortuunersoq.
Inuit
Ataqatigiinninngaanniit pinngortitaq pillugu nalunaarusiassamik, taavalu aamma
timmissat pillugit nalunaarusiami uumap oqallisaaqisup nalilersoqqinnissaanut
tunngatillugu tusarniaanerit ingerlanerit pissanngatigaarput qanoq
kinguneqarumaarnersoq, aammalu qanoq oqariartuuteqartoqarumaarnersoq.
Tassungalu
tunngatillugu soorunami taamatut timmissat sumiiffii ilaani allaat
piniarsinnaajunnaarneri tupinnanngilaq ukiorpassuarni piniartartunit
mamiagineqarmat.
Taava
aamma tungitsinninngaanniit ilaatigut eqqartorsimavarput ilumut taamatut
assaariinarani piniarsinnaanermik arlaatigut immikkut kommunit aammalu immaqa
piniartut peqatigiiffii isumasiornerisigut ilaagiilaarsinnaanissaq
immaqaluunniit kvo..-lerlugit piniarnermik inuussutissarsiuteqartunut
periarfissiisinnaanginnersut immikkut ittumik? Tassanngaannaq piniarsinnaaneri
matutipiloornagit.
Taamaattumik
taanna aamma eqqarsaatinut ilanngutillaqqunarpoq nalunaarummik
suliaqartussamut. Qujanaq.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Maliinannguaq
Markussen-Mølgaard qutsavigaarput. Tulliulluni oqaaseqarumavoq Peqqinnissamut
Avatangiisinullu naalakkersuisoq, tulliukkumaarpoq Konrad Steenholdt.
Edward
Geisler, Peqqinnissamut Avatangiisinullu Naalakkersuisoq, Atassut.
Kingullermik oqaaseqartumut tassa Inuit Ataqatigiit oqaaseqartuanut Malînánguak= Markussen Mølgaard-imut oqaatigissavara una taanna eqqartukkat peqqussut nr. 38 december ulluisa 6.-ni 2001-mi. Tassani ajuusaarnaraluartumik nutserneqarnerani naqitsinerliortoqarsimanera tassani patsisaavoq. Tassa qallunaatuuani maj-ip 1.-taat aallaaviulluni, kalaallisuuani juni-p 1.-taat pineqartoq. Tassani taasumap piviusunngungilaataani tassani pisimanera assuarutigivarput. Ajuusaarnarpoq. Eqqortorli tassani pineqartoq tassa maj-ip 1.-taat. Tassa taanna aallaaviuvoq. Maj-ip 1.-ningaanniit augustip 31.-at tungaanut.
Tassani nutserisoqarnikkut immaqa naqinnerliumasoqarsinnaanera taamanikkut qanoq pisoqarsimanersoq imaalillugu ... atuuttoq taannaavoq.
Uani ujartorneqartoq aamma ilagaat suut avammut paasisitsiniutigissallugit suliniutiginiarneqarnersut. Avammut suaaruteqarnitsinni pingaartillugu oqariartuutigisassarput unaavoq:
"Inuiaqatigiittut uagut uumasunik nungusaasuunnginnerput pingaaruteqarpoq suaarutigissallugu aamma inuuiaqatigiit piniapiluttuunnginnerput tassuungakkut aamma oqariartuutigineqartussaavoq".
Erseqqisumilli taakkununnga uilliullugit aamma oqariartuutissat ilagivaat:
"Nunat tamat isumaqatigiissutaat nungusaataanngitsumik tunngaveqarluni piniarsinnaanermut tunngasumut" Kalaallit Nunaata atsioqataaffigisimasaat aamma ataqqineqarput.
Taamaattumik tamakkua tunngavilersuutit pinngitsooratik avammut suaaruteqarnermi ilaasussaapput.
Tamakkua oqariatuutigineqarnissaat pingaarutilerujussuupput.
Naalakkersuisut aamma pingaartippaat uani oqaatigineqarmat arlaat igaassarsiornermulluuniit tunngatillugu aaqqiisinnaanerit, tamakkuattaaq pingaarteqaagut. Taamaattumik tamanut naammaginartumik aaqqiisoqarnissaa anguniarlugu, massakkut kommuninut apeqquteqaatit ingerlanneqarput, KANUKOKA-lu oqarpoq sapaatip akunnera una naanngitsoq akissuteqaatit tamarmik takkutereersimanissaat naatsorsuutigalugu.
Taamaakkaluartorli kommunit arfineq-pingasut maannakkut
akissuteqarsimapput. Suli sinneri
arfineq-pingasut akisimanngillat. Taamaattumik aamma
kaammattorusunnassagaluarpoq kommunit ila tamanut attuisartoq, pitillugu aamma
namminneerlutik aaqqiinissami peqataallualaarnissaannut kissaatiginartarmat.
Naalakkersuisut
pingaartikkatsigu taamatut pereerpat aamma tusarniaanerit susassaqartunut
allanut ...råd-ikkunnut, KNAPK-nut atuisunullu taanna pisussaammat.
Taamaattumik ilungersortumik qinnuvigaagut ilungersortumik pitsaasumillu
aaqqiinissatsinni suleqataassagunik aamma namminneerlutik peqataalaarnissaat.
Qaanaaminngaanniit
akissuteqaammit takkuttoqarpoq, Illoqortoormiut suli aamma utaqqivagut.
Uku
Lars-Karl Jensenip eqqaasai neqissaqarniarnermut tunngassuteqartut soorunalimi
misissorneqarsinnaapput. Uani Canadami pisutsit appat aamma eqqaallatsiarpai
soorlunalimi Naalakkersuisut aamma inussiarnersumik taamatut
saaffiginnissuteqarsinnaapput.
Eqqaasissutigissavara
Canadami ukiut 50-it matuma siornatiguulli appat inuussutissasiutitut
piniaqqusaagunnaarnikuupput. Taamaallaat nammineq pisassanik appanik Canadami
piniartoqartarpoq. Ukiut 50-it qaangiuppulli taamatut aaqqiisoqarmat.
Taamaattumik
aamma inussiarnersumik taamatut kissaatigineqartut saaffigineqarsinnaapput,
tassa inuussutissarsiutigalugu piniarsinnaatitaanngillat akilinermiut.
Aamma Ruth
Heilmann-ip Eqqissisimatitsinermut Ataatsimiititaliap siulittaasuata aamma
oqaatigisaa ukua allannguutissat eqqarsaatigalugit allaat ukiamut
angumoqqunnissaat kissaatigineqartoq oqaatigineqartoq. Taanna
aamma pingaartipparput. Inuiaqatigiinniuna pitsaasumik aaqqiinissarput
siunnerfigalugu taamaattumik sukumiisumik massakkut pisugut.
Pipallataanngitsumik
taanna suliarineqassaaq, kisianni aaqqiinissaq qularnaattumik siunnerfeqarluni
pissasoq pingaartikkatsigut. Taamaattumik pipallannata massakkut
aaqqiinissarput siunnerfigalugu taamatut aaqqiiniartugut ukiamut arlaat
siunnerfiit taamatut paatarsinnaanissaat.
Ajuusaanartarpoq
massakkut pissutsit taamaakkallartillugit oqarsinnaanngilagut "Ullormiit
ullormut ukua pinialissavasi, ukualu piniassanngilasi"! Naak tamanut
ussernarfiusinnaagaluartoq. Kisianni sukumiisumik pitsaasumillu
aaqqeerusuppugut. Taanna pingaartipparput.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Peqqinnissamut
Avatangiisinullu qujavugut. Tulliulluni oqaaseqassaaq Konrad Steenholdt
aappassaanik.
Konrad Steenholdt, Atassutip oqaaseqartua.
Qujanaq. Siunnersuuteqartup toqqammiviliussimasaa tassaavoq sikusartumik pissutsit. Taannalu oqaaseqarninni siullermik oqaatigaara paasigipput, aammalu paasillugu isumaliutissiissutip imarisaa, taavalu aamma Naalakkersuisuminngaanniit. Immikkut illuinnartuunerat paasineqarsimasut.
Soorunami Atassummi aamma eqqartorsimavarput suna tamarmi taartuinnarsuartut eqqartorneqaraangat soorunami nuannersuuneq ajorpoq, inimi aamma maani.
Taamaattumik Inatsisartut Eqqissisimatitsinermut Avatangiisinullu Ataatsimiititaliaata siulittaasua uannut oqaatigisai taavalu aamma Naalakkersuisup oqaatigisaa. Massakkut maj-iuvoq ukiamut Inatsisartut ataatsimiissapput, september-imi oktober-imilu. Taavalu tassani uuma aaqqinniarnerani inuit tamarmik oqalupput Naalakkersuisut aammalu Inatsisiliortut sinerissamilu KNAPK-p ilaasortai suulluunniit inatsisiliat peqqissaartumik suliarineqassasut. Tusarniagassat tamaasa tusarniaqqaarlugit.
Paasivarpullu kommunit arfineq-pingasut maannamut akissuteqarsimasut, kommunit arfineq-pingasut suli amigaataasut.
Tassanilu uanga oqaaseqarninni oqaatigisara taanna aasamut "angumerineqarsinnaanngitsut" oqaaseq atorpara. Kisianni soorlu arlaatigut qaammanimininnguamik takusaqartunga, uani oqallinnermi. Isumaqarpunga taanna periarfissaappat, aammalu angumerineqarsinnaappat, tamarmik maani oqaaseqartut piumassuseqarput qaamaniminaalaannguamik takutitsiumallutik. Taasumap aaqqiiffigineqarsinnaanissaa sikusartumiittunut taamatut iluaqutaasussamik kinguneqartussamik anguneqassappata. Isumaqarpunga tassani aamma taanna anguniarneqartariaqartoq.
Imatut naggasiinnarusuppara Naalakkersuisut taavalu Inatsisartut Eqqissisimatitsinermut Avatangiisinullu Ataatsimiititaliaata suliassami tassani peqqissaarussillutik kinguneqarluartumillu sulilluarnissaannik kissaappagut.
Daniel Skifte, ataatsimiinnermik aqutsisoq, Inatsisartut siulittaasuat, Atassut.
Konrad Steeholdt qutsavigaarput.
Taavalu maannakkut allanik oqaaseqarumasoqanngimmat, taava taasissaagut.
Immikkoortoq 69 tassalu:
Timmissat pillugit peqqussutip naliliiffiginissaa pillugu aalajangiiffigisassatut siunnersuut. Aappassaaneerneqarnerani taasissutigisassat:
Eqqissisitsinermut Avatangiisinullu Ataatsimiititaliap isumaqatigiittup Naalakkersuisut siullermeerinermut akissuteqaataat naapertorlugu aalajangiiffigisassatut siunnersuutip itigartitsissutigineqarnissaa isumaliutississuummini inassutigaa.
Maannalu aalajangiiffigisassatut siunnersuut inaarutaasumik taasissutigissavarput.
Aalajangiiffigisassatut siunnersuummut isumaqataasut qinnuigissavakka nikueqqullugit.
Isumaqataasoqanngilaq.
Aalajangiiffigisassatut siunnersuummut akerliusut qinnuvigissavakkat nikueqqullugit
21.
Aalajangiiffigisassatut siunnersuummut isumaqataanatillu akerliunngitsut qinnuvigaakka nikueqqullugit
2.
Taamaalilluni aalajangiiffigisassatut siunnersuut itigartinneqarpoq.