Ullut ataatsimiiffiusut tallimaat, ataasinngorneq 15. april 2002, nal. 15:35

Oqaluuserisassani immikkoortoq 72

Uummannap eqqaani Qaarsuni oqaluffiliornissaq pillugu aalajangiiffigisassatut siunnersuut.

(Mikael Petersen)

(Siullermeerneqarnera)

 

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Taannalu siunnersuutigineqarsimavoq Mikael Petersenmit, kisiannili inuttaa maani najuussinnaan-ngimmat sinniisorisaata Jens Napaattuup siunnersuummik saqqummiussissaaq.

 

Jens Napaattoq, Siumut.

Uummannap Kommuniani Qaarsuni oqaluffiliornissap 2003-mi aningasanut inatsisissami ilanngunneqarnissaa Naalakkersuisut  suliniuteqaqquneqarnissaanik Inatsisartunut aalajangiiffigineqarnissaanut siunnersuut Inaatsisartunut ilaasortap Mikael Petersenip siunnersuutiginikuusaa saqqummiutissavara.

 

Nunaqarfik Qaarsut ukiuni kingullerni 20-nngortuni namminerisaminik oqaluffeqanngilaq, meeqqallu atuarfiata atuartitsivittut iniisa ilaat naalagiarnermut atorneqartarluni, naak meeqqat atuarfiat ullumikut atuartsitsivissaaleqillunilu iluarsaanneqarnissaminik pisariaqartitsigaluaqisoq.

 

Qaarsut nunaqarfiuvoq inukilliartorani inuttusiartortoq, minnerunngitsumik suluusalinnut mittafeqalernerup kingorna ineriartortitsinissaminut periarfissaqarluartoq.

 

Qaarsuni amigaataasut malunnaateqarnerpaat ilagaat oqaluffeqannginnera, naak qanga oqaluffeqartuarsimagaluarluni, Qaarsunut naleqquttumik pilersaarusiorluagaasumillu oqaluffiliortoqassasoq taamaalillunilu meeqqat atuarfianni naalagiartarneq atuarfimmilu inagiisimajuarneq atorunnaarneqarsinnaaqqullugit aammalu Qaarsunni ilagiit ilagiinnullu sullissisut atugarisamikkut malunnaatilimmik pitsanngorsaaffigineqarsinnaaqqullugit.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Jens Napaattooq qutsavigivarput, taava maannakkut Nalakkersuisut siulittaasuat akissuteqassaaq.

 

Jonathan Motzfeldt, Naalakersuisut Siulittaasuat, Siumut.

Inatsisartuni ilaasortap Mikael Petersenip Qaarsuni Uummannap palaseqarfiani oqaluffiliornissaq pillugu ataatsimiinnermi matumani siunnersuummik saqqummiussaqarpoq siunnersuuteqartup siunnersuutimnut tunngavilersuutigaa Qaarsuni ukiuni 20-nngortuni immikkut oqaluffittut atuuttumik oqaluffeqannginnera aammalu atuarfimmi init atuartsitsivigineqartartut ilaanni naalagiartoqartariaqartarnera, naak aamma atuarfik inissaaleqiffiugaluartoq, siunnersuummi aammattaaq  tunngavilersuutigineqarpoq innuttaasut ikiliartunngitsut amerliartorlutilli.

 

Naalakkersuisut siunnersuuteqartup aalajangiiffigisa siunnersuutaanut paasinnipput, aningaasatigulli maannamut atorneqarsinnaasunut killissarititat pissutigalugit Uummannap Palaseqarfiani Qaarsuni oqaluffiliornissamut aningaasaliissutissanik immikortitsisoqarsinnaasimanngilaq, Naalakkersuisut aammattaaq ukiuni missingersuusiorfiusuni sanaartugassanik tulleriiaarinerminni tamatumani tamatuma ilanngunnissaanut periarfissaqarsimanngillat.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Naalakkersuisut siulittaasuat qutsavigaarput, taava maannakkut partiit, Kattusseqatigiit attaviitsullu oqaaseqartuanut nuuppugut. Siulliulluni oqaaseqassaaq Laannguaq Lynge, Siumut.

 

Laannguaq Lynge, Siumup oqaaseqartua.

Qujanaq, Siumumi tunngaviusumik ilagiinnut sullissinerup atuarfeqarnermi ingerlatsineq najoqqutaralugu ingerlannginnissaa anguniagassatut pingaartutut isigaarput, nalunngilarpulli  nunaqarfeqarmat suli Qaarsunitulli allatut ajornartumik atuarfiuutigisumik oqaluffeqartinneqartunik, pingaartumik nunaqarfinni inuttusiartorfiusuni pissutsit taamaattut qaangerniartariaqartut Siumut isumaqarpoq.

 

Siunnersuut paasilluarsinnaagaluarlugu Naalakkersuisut tunngavilersuutaat, tassalu piffissami matumani oqaluffiliornissamut aningaasatigut periarfissaqanngitsoq, tusaatissatut Siumumit tiguarput, inassutigissalluguli nunaqarfiit inuttusiartorfiusut, pingaartumik eqqarsaatigalugit ilagiinnut sullissinerit, pitsanngorsaaffigineqarnissaa siunissami eqqumaffigilluartariaqartoq.

 

Taamaattumik Siumumiit Naalakkersuisunut kaammattuutigissavarput ukiuni missingersuusiorfiusuni aningaasanik ilanngussisoqarsinnaanersoq misissuiffigeqqullugu, tassungalu ilanngullugu paaserusussallugu oqaluffiit sanaartugassat imaluunniit iluarsaassassat tulleriiaarneqarneri takussutissaqarnersut. Taama oqaaseqarluta oqaluuserisassap aappassaaneerneqannginnerani taasagut ilanngullugit paasiniaaffigineqarnissaat kissaatigaarput.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Laannguaq Lynge qutsavigaarput, taava Jakob Sivertsen, Atassut, oqaaseqassaaq.

 

Jakob Sivertsen, Atassutip oqaasrqartua.

Siunnersuummik saqqummiussaqartup Qaarsuni oqaluffiliornissap pisariaqarneranik saqqummiussaa Atassummit paasilluarparput, tassami ukiuni kingullerni nunaqarfinni atuarfiit oqaluffiuutigisut ullutinnut naleqqukkunnaarsimanerannik.

 

Atassummiit inimi maani saqqummiuttakkatsinnut naapertuummat pisariaqartunut nalilerlugu sanaartugassanut pilersaarusiornermut ilanngunneqarnissaa kissaatigaarput, ullumikkut nunaqarfinnguani atuarfipalaannguit oqaluffiuutigisut amerlanersaat nungullarsimapput, ullut tamaasa atuarfittut atoriarlugit kiisalu ilagiit sapaatini nalliuttunilu aamma naalagiartarfittut atortarlugit, eqqaamassavarput init atuarfittut atoreerlugit naalagiarfissatut atorneqassagaangata atuartitsinermi atortut ininut allanut qaleriiaaginnarlugit nussorneqartarput oqaluffittut isikkoqalersinniarlugit.

 

Ajornerpaasorli tassa init naalagiartarfittut atorneqartarneri peqqutaallutik meeqqat soqutigisaat aallaavigalugit atuarfiit allat assigalugit init assiliartarlersorneqarlutilluunniit pinnersarneqarsinnaanngimmata, pissutsit tamakku ullutsinnut naleqqukkunnaarnerat.

Atassummiit arlaleriarluta oqaluttarfik manna atorlugu erseqqissaatigisarsimaqaarput, taamaattumik siunnersuut paasilluarlugu siunissami atuarfitsialaap piumasaqaataanut ilanngullugit nunaqarfiit oqaluffeqarnikkut atuarfeqarnikkullu naleqqussaaffigineqarnissaat anguniarlugu sanaartugassat pilersaarusiorneqarnerannut siunnersuutip ilanngunneqarnissaa.

 

Atassummit piumasaraarput 2003 immaqa ilaatigut kingornatigulluunniit, pilersaarusiorluarneq eqqortumik aningaasaliinissamut tunngaviulluinnartarmat taamatut oqaaseqarluta siunnersuut tunngaviatigut Atassummit taperserparput,qujanaq.

 

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Jakob Sivertsen qutsavigaarput, maannakkut oqaaseqassaaq Maliinannguaq Markussen-Mølgaard, Inuit Ataqatigiit.

 

Maliinannguaq Markussen-Mølgaard, Inuit Ataqatigiit oqaaseqartuat.

Qujanaq, Inuit Ataqatigiinnit pingaartipparput nunatsinni ilagiinni suliaqartut pitsaasumik atugaqarnissaat, ilaageeqarnemilu suliat pitsaasumik ingerlanneqassappata soorunami oqaluffitsigut pitsanngorsaajuarnissaq pisariaqarpoq illoqarfiuppata nunaqarfiuppataluunniit.

 

Inatsisartunut ilaasortap Mikael Petersenip Qaarsuni oqaluffeqalernissaanut siunnersuutaa Inuit Ataqatigiinniit paasilluarparput aammali maluginiarlugu Naalakkersuisut akissuteqarnerminni oqaatigimmassuk Qaarsuni oqaluffiliornissamut aningaasaliissutinik immikkoortitsisoqarsimanngitsoq sanaartugassanillu ukiuni tulliuttuni missingersuusiornermi tamanna ilanngunneqarsimanngitsoq.

 

Inuit Ataqatigiinniit isumaqarpugut siunissaq eqqarsaatigalugu nunatsinni nunaqarfiit ataatsimut isigalugit oqaluffeqarnikkut pitsanngorsaaffigineqarnissaat sukumiisumik nalilersorneqartariaqartoq, tassungalu ilanngullugu Qaarsuni oqaluffittarnissaq ilanngunneqartariaqartoq.

 

Taamatut pisariaqartitsisuni oqaluffiliorsinnaanerit ilaatigut kommunini inuusuttut sullivii aqqutigalugit suliarineqarsinnaaneri misissuiffigineqartariaqartut Inuit Ataqatigiinniit kaammattuutigerusupparput, tamannalu ataatsimiititaliat attuumassuteqartut malinnaaatinneqarnerisigut aamma pisinnaasoq.

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Maliinannguaq Markussen-Mølgaard qutsavigaarput, maannakkut oqaaseqassaaq Loritha Hendriksen, Kattusseqatigiit.

 

Loritha Hendriksen, Kattusseqatigiit oqaaseqartuat.

Qujanaq. Inatsisartunut ilaasortap Mikael Petersen siunnersuutaa misissoreerlugu imatut  Kattusseqatigiinnit oqaaseqarfigissavarput:

 

Sinnersuuteqartup siunnersuutaa paasilluarparput, nunaqarfinnguamilu namminerisamik oqaluffeqarusuttut annertuumik kissaateqarnerat  tapersersorumallugu

 

Kattusseqatigiinnit oqaatigerusupparput. Ukiunimi qinigaaffiusuni kingullerni angalaarnitsinni annertuumik maluginiakkatta ilagisimavaat nunaqarfinni amerlanerni annertuumik ajornartorsiutaasoq oqaluffeqarniarneq, tamatigummi atuarfiit oqaluffiuutigalutik ingerlammata, annertuumillu aserfallassimallutik, taamaattumik tulluartuuvoq atuarfiit piorsarnerinut atasumik oqaluffiit atuarfimmiit immikkoortinneqarnissaat pisariaqartoq, pingaartumik nunaqarfinni inuttusiartortuni siunissaqartunilu.

 

Tamaattumik taarusupparput qanoq ullutsinnut naleqqutinngitsigisoq, assullu eqqarsarnartarluni atuarfiit iserlugit qinngui saaguliinnarlugit imaluunniik alterii assiinnarlugit oqaluffittut aamma atorneqarneri, aammalumi maani oqaluttarfimmi eqqaajuarparput siulitsinnut naleqqiulluta qanoq tarnitsigut upperisap tungaatigut  sanngiilliartorsimanerput.

 

Oqaatigerusupparpullu ukiuni kingullerni upperisap pimoorullugu nukittorsarneqarnissaa qanoq inummut kinaagaluartumulluunniit pingaaruteqartigisoq pinngitsoorneqarsinnaanngitsorlu, pingaartumik nunaqarfinni malunnartinneqartartoq pingaartinneqartartorlu ilisimaaraarput.

 

Siunissami meerartatta pitsaasumik atuartinneqarnissaat atuarfitsialak eqqartorneqaannarani patajaatsumik sinaakkutalimmillu sullinnissaat pisariaqarpoq annertuumillu pingaaruteqarluni atuartitsiviit inissallu pitsaasut suliffissarlu pitsaasoq anguneqarnissaa. Taamaattumik pisariaqartutut isigaarput atuarfiup oqaluffiullu sapinngisamik immikkoortinnissat suliniutaasariaqartoq pingaarutilittut angusariaqartunullu ilaasariaqartoq. Taamaattumik siunnersuuteqartup siunnersuutaa taperserluinnarparput taamaalilluni aamma siunissami atuarfiit innuttaasunut ataatsimut suliniutinut qaammarsaanernullu atorneqarluarneqarsinnaaqqullugit, sukumiisumik aamma innimiginagu atorneqarsinnaanerat ammaaffigineqarnissaa eqqarsaatigalugu.

 

Nalunngilarpummi uagut kalaallit annertuumik tamatigut oqaluffitsinnut pingaartitsisuunerput, ersarissumik takussutissaqartipparput minnerunngitsumik inuttut misigissutsikkut atugassarititaasut nuannersut aammalumi ilaquttat ikinngutillu naggammik qaniguinerup oqaluffitsinni katersuuttarnigut eqqaassagutigit, taammaattumik Kattusseqatigiinniit pisariaqartutut isigaarput siunnersuuteqartup siunnersuuttaa tapersissallugu, taamatut oqaaseqarluta siunnersuuteqartup siunnersuutaata aapaassaaneerneqannginnerani ataatsimiititaliamut ingerlanneqarnissaa suliarineqarnissaalu inassutigaarput.

 

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Loritha Hendriksen, Kattusseqatigiit, qutsavigaarput. Taavalu maannakkut oqaaseqassaaq Otto Steenholdt, attaviitsoq

 

Otto Steenholdt, attaviitsoq

Siunnersuut soqutiginartippara ukiuni makkunani tusartuarpagut oqaluffiit pisoqalisut nutartertariaqaraluartut, aningaasassaaleqineq pillugu itigartitaajuartut. Siunnersuummi taateqqaaneqarpoq nunaqarfik oqaluffeerussimasoq inuilu ikiliartunngitsut.

 

Ataatsimmiinnermi maani illussat inissiallu oqallisigeqaagut Sikublock sammeqaarput, uangalu illoqarfiit taamaattunik illuliorfigissallugit piukkuppakka, tassa inoqutigiit illussaannut piukkunnagit, illoqarfinni taakkua piukkunnerullugit, immaqaana Qaarsuni Sikublock aamma misiliutigalugu oqaluffilioraanni sumi napparnissaa oqallisererusaarparput.

 

Ila immaqa piukkunnarsinnaasoq, qisuunngitsoq kalaallinit sanaaq taamaattoq oqaluffik misiliutitulluunnik tassani napparaanni, taama sanasinnaanngikkaanni aamma nunaqarfinni illuliarisartakkat katitiinnarissat aamma oqalorfiliornermi atorneqarsinnaapput akisoorsuunngitsut angissusii naammatseriarlugit nunaqarfimmiunut nammineq sanaqqullugit innersuunneqarsinnaasut, tamanna eqqarsaat sammineqanngippallaartarpoq.

 

Siunnersuutinnguaq una oqaluffissaarsualiornissamik imaqanngilaq, taamaattumik tamakku atorsinnaasut immaqa eqqarsaatigineqarsinnaapput akikitsoralaarsuarmik nammineq illuliortaaseq taakkununnga illuliarineqartartoq aamma qanoq ilillugit atorneqarsinnaanersoq.

 

Isumaqarpunga akisoorsuunngitsumik oqaluffinngualiortoqarsinnaasoq tassa qulaani taariikkakka aamma aqqutigalugit, itigartiinnarnagu akuerineqarniarli kujataanimi qallunaatsiaat oqaluffiliuullugit kalaaleqatigut oqaluffittaarusuttut tusaanngitsuusaaginnarsinnaanngilagut.

Tassa uanga isumaqarluinnarpunga ilageeqarnermi aamma ataatsimiititaliarsuaqaratta maani suliassaaleqinnguatsiaqisumik, taassumattoruna atagu ataatsimiissutigalugu nalilerliuk Sikublock atorsinnaaneripput atorsinnaanngikkutsiguli nammineerluni illuliornermi atortakkagut akikitsut nammineerlutik nuannaarutigalugillu nunaqarfimmiut namminneq taakkuninnga imminnut oqaluffeeranngualiuussinnaanersut? Eqqarsartaaseq nutaajunnguatsiarmat tamualluaqqissaagassaavoq.

 

Anders Andrassen, ataatsimiinnermik aqutsisoq, Inatsisartut Siulittaasuata tullia, Siumut.

Otto Steenholdt qutsavigaarput, maannakkut Naalakkersuisut siulittaasuat Jonathan Motzfeldt akissuteqassaaq.

 

Jonathan Motzfeldt, Naalakkersuisut Siulittaasuat, Siumut.

Akissutigisatsinni oqaatigisassara erseqqissaatigilaassavara uani oqaatigineqartoq ukiuni sanaartorfissani taaneqartartuni tassunga suli inissinneqarsimanngimmat, kisianni ilumoorpoq taanna kisianni soorunami oqaluffissaq nutaaq pilersaarutinut aamma ilaavoq.

 

Qaarsuni oqaluffissaq nutaaq kisiannili mannakkut sanaartugassat tulleriiaarneqarnerani ukiuni tulliuttuni qaninnerpaani tassunga inissinneqarsinnaasimanani, taanna erseqqissaatigilaassavara. Imaappoq pilersaarutini tassani ilaatinneqareerpoq aammalu taamaattumik pisaarniarnissaq siunnerfigineqarluni, taamaattumik Naalakkersuisuninngaannit taanna erseqqissaatigiinnassavara, aamma oqaaserineqartut uani najoqqutaralugit uagut aamma  pingaartipparput nunaqarfinni oqaluffiit pioreersut aamma ajunngitsumik atorneqarsinnaasutut isikkoqartuarnissaat aserfallatsaaliinerit allallu tamarmik ingerlannissaat aammalu nunaqarfinni ilaatigut oqaluffiit nutaat aamma sananeqartarneri ingerlapput.