Ullut ataatsimiiffiusut arfineq-aappaat, pingasunngorneq 17. april 2002, nal. 14:35 

Oqaluuserisassani immikkoortoq 74

Nakkutilliisoqarfimmik aktiaateqarluni piginneqatigiiffinnik Namminersornerullutik Oqartussanit pigineqartunit sukumiisumik nakkutiginnittussanik pilersitsinissaq pillugu aalajangiifigisassatut siunnersuut.

(Anthon Frederiksen)

(Siullermeernera)

Ataatsimiinnermik aqutsisoq: Ole Lynge, Inuit Ataqatigiit.

Ole Lynge, ataatsimiinnermik aqutsisoq, Inuit Ataqatigiit.

Anthon Frederiksenip siunnersuutaa Kattusseqatigiinni sinniisussap siulliup Anthon Frederiksen sinnerlugu saqqummiutissavaa.

 

Tom Ostermann, Kattusseqatigiit.

Taamatut siunnersuuteqarninnut tunngavigaara ukiuni kingullerni tusartualeratsigu suliffeqarfissuit ilaasa inuiaqatigiit piginneqatigiinnikkut pigineqartut ingerlanneqarneranni naammaginanngitsumik akisussaassuseqanngitsumillusooq iliornikkut suliffeqarfissuit ilaat ingerlatsinermut amigartoorujussuanngikkunik ilaatigut akiliisinnaajunnaarlutik nunatta karsianut akisoqisumik kinguneqartumik unittuuinnartarnerat. Imaluunniit ingerlatsisut siulersuisullu ilaatigut kanngunaannartumik akuersaaruminaatsumillu aningaasanik akisussaassuseqanngitsutut nalilerneqarsinnaasumi ikinngutigiinnerup iluani nunatta karsia tunulequtsiullugu agguagassarsisoqartarnera unitsinneqartariaqarluinnarmat.

 

Arlalinnik assersuutissaqarpugut soorlu makkuninnga ukiorpaaluit matuma siornatigut nunatta kujataani Qorlortorsuarmi eqalunnik tukertitsinialersaatoqalillarmat nunatta karsia 40 millionit missiliorlugit aningaasartuuteqarpoq, kisianni tamanna iluatsinngitsoormat ikinngutigiinnerup iluani supalaannguamik nalilerlugu tunineqarpoq.

 

M/S Diskop Landskarsimut aningaasarpassuarnik atuiffioreerluni landskarsimut iluanaarutaanngilluinnartumik tunineqarneranut tunngasut Puisi A/S-imi pisimasut tupinnaannarmik akisussaassuseqanngitsumik isikkulimmik ingerlanneqarsimanerat landskarsimut millioninik arlalissuarnik ajunaarutaasumik kinguneqarput.

 

Royal Greenland milliardit pingasut missaanik akiitsoqalersimanera minnerunngitsumillu naatsorsuutit kingulliit milliardit sisamararterutaat sinnerlugit amigartooruteqaraluartoq pisortaanerusimasoq taassumalu tullersortaa tamarmik immikkut koruunit 5-10 millionillu akornanni sinnersimanngikkunikkit koruunit 10 millionit tungaanut sinnerlugilluunnit soraarnerussutissinneqarpaluttut tusarlugit inuiaqatiginni akisussaaqataasutut misigisimaniaraluarluni kanngusunngitsoorfiunngilaq.

 

Pisut taamak tupinnartigisut takorloorlugit meerartatta ilaat atuarfissaqaratik uffarfeeqqani atuartinneqarput. Allamik oqarfiunngilaq politikkerit atorfillillu nuimanerit ilaat nunatta karsiata aningaasaataannik iluarisannguaminnik pinnguarput.

 

Taamaammat Inatsisartut ataqqinartusi ilissi tassaavusi nunatsinni oqartussaasut qullerpaartaat.

Aningaasat nunatta pisariaqartitai amerlaqaat. Inuiaqatigiit aningaasaataannik pinnguarneq unitsinneqartariaqarpoq aningaasanik akisussaassuseqanngitsumik pinnguarneq akisussaatinneqarnissaat ilanngullugu piumasaqaatigineqartariaqarpoq.

 

Jonathan Motzfeldt, Naalakkersuisut Siulittaasuat, Siumut.

Inatsisartut aktieteqarluni ingerlatseqatigiiffii Namminersornerullutik Oqartussat pigisaannik pilersitsinissamik aalajangiimmata siunertat pingaarnerit ilagaat ingerlatseqatigiiffiit taakku tuniniaavinnut naleqqussartuarsinnaanissaat.

 

Tassa imaappoq ingerlateqatgiiffiit ingerlanneqareranut niuernermut tunngasut isiginiarneqarnerulissasut aamma kissaatigineqarsimavoq iluanaaruteqarniarluni niuerneq pisortat ingerlatsineranni aammalu Naalakkersuisuinikkut sulinermi tamatumanilu suliassaasunit immikkoortinneqassasoq.

 

Ingerlatseqatigiiffiit Namminersornerullutik Oqartussat pigisaat aktieteqarluni ingerlatseqatigiiffiit pillugit inatsit aallaavigalugu immikkuullarivissuupput. Naalakkersuisullu tassa piginnittunit sinniisuusunit siulersuisulerneqartarlutik. Siulersuisullu ingerlatseqatigiiffiit ingerlaneranut aningaasaqarneranullu nakkutilliisussaapput akisussaallutillu.

 

Ingerlatseqatigiiffiit Namminersornerullutik Oqartussat pigisaat tamaasa eqqarsaatigalugit Naalakkersuisut pingaarnertut anguniagaraat pitsaasumik isumannaatsumillu aningaasaqarnermikkut ingerlassasut. Tassa imaappoq siulersuisut ingerlatseqatigiiffiit ataasiakkaat aqutsisuisa sapinngisamik pitsaanerpaamik ingerlatsinerat nakkutigissallugu akisussaaffigaat.

 

Ukiut kingulliit tallimat missaasa ingerlaneranni eqqarsaatit tamakku ingerlateqqinniarlugit kiffartuunneqarnissamik isumaqatigiissutit atorneqartalerput. Tamatumanilu siunertarineqarpoq ingerlatseqatigiiffiit niuernermik tunngaveqarlutik suliarisinnaasaat aammalu suliaq Namminersornerullutik Oqartussat suliareqqusaat soorlu agguaaqatigiinneq sulissaqartitsinerlu eqqarsaatigalugit suliareqqusaasut erseqqissumik immikkoortinneqarnissaat.

 

Aktieqarluni ingerlatseqatigiffiit pillugit inatsisit naapertorlugit ataatsimeersuartut ingerlatseqatigiiffimmi oqartussaanerpaapput. Ataatsimeersuartut suliassaraat tassa generalforsamlingimik taaneqartartup uani ataatsimeersuarnermik nutserneqarsimasup, siulersuisunik kukkunersiusunillu toqqaanissaq ukiumut naatsorsuutinik akuersinissaq sinneqartoorutit amigartoorutit qanoq atorneqarnissaanik aalajangiinissaq immaqalu aamma ingerlatseqatigiiffiup malittarisassaanik allanngortitsineq. Aammalu qaqutiguinnaagaluaq ingerlatseqatigiiffimmik atorunnaarsitsineq.

 

Generalforsamlingip akornanni ingerlatseqatigiiffik siulersuisunit aqunneqartarpoq taakkulu generalforsamlingeqarnermi tullermut piffissami qaangiuttumi ingerlatseqatigiiffiup siulersorneqarsinanernik akisussaapput.

 

Kukkunersiusut suliassaat inatsisitigut piumasaqaatinik assigiinngitsunik tunngaveqarput. Kukkunersiuisoq aamma inuiaqatigiit tatigisatut sinniisuattut taaneqartarpoq. Kukkunersiuisup pisortanit akuerisaasup inuttut akisussaaffeqartarmata aammalu akisussaaffimminnut sillimmasertarmata Siulersuisut suliffeqarfimmilu ulluinnarni aqutsisut tamatumuuna isumannaallisaaserneqartarput.

 

Aammalu kukkunersiuisut kukkunersiuineq isumagisarpaat pituttorsimannginnissamut suliani inuttut akuliusimannginnissamut nipangersimasussaatitaanermullu malittarisassat sukangasuut tunngavigalugit.

 

Naalakkersuisut aktiaateqarluni ingerlatseqatigiiffimmi Namminersornerullutik Oqartussat tamakkiisumik ilaannakortumilluunniit pigisaannit toqqaannartumik piginnittutut inissisimanerat eqqarsaatigalugu aktiaateqarluni ingerlatseqatigiiffiup ukiumoortumik ataatsimeersuarnerini generalforsamlingiini sioqqullugit ukiumoortumik naatsorsuutit kukkunersiuisumit avataaneersumit misissoqqissaarneqartarput. Naalakkersuisut ingerlatseqatigiiffiup aningaasaqarneranik naliliinerannut aamma tunngavigineqartartunik.

 

Naalakkersuisut ilisimavaat inuussutissarsiortut namminneq avatangiisaallumi allanngorartuartuummata. Aktiaateqarluni ingerlatseqatigiiffiit pisortat pigisaasa sulineranni atugassarititaasut iluarsilaartuarneqartariaqartartut.

 

Massakkorpiaq Naalakkersuisut siunissami periusissiorlutillu siulersuisunik ilaasortanik toqqaasarnermut toqqammavissiorput. Siulersuisut akisussaaffiinik sillimmasiisarnermut aammalu aningaasaqarnerup aaqqissugaaneranut malittarisassiorlutik. Aammalu ingerlatseqatigiiffinni ataasiakkaani aningaasatigut sillimassuseq pissarsiassatullu siunertaasut eqqarsaatigalugit. Aammalu siunissami nalunaaruteqartarnermut sakkussanik allanillu piareersaallutik.

 

Periaasissat maleruagassallu taakku 2000-imi nalinginnaasumik ataatsimeersuarnerni aalajangiinernut toqqammaviussapput. Naalakkersuisut aamma isumaqarput ingerlatseqatigiiffiit Namminersornerullutik Oqartussat pigisaat inuiaqatigiinnit pigineqaramik aammattaaq soorunami piginnittuminnut inuiaqatigiinnullu avatangiisiminnut assut annertuumik pisussaaffeqartut. Tamanna inatsisit atuuttut malersoqqinneqarnerisigut iluarsineqarnerisigullu aallaqqaammut ersersinneqartariaqarpoq.

 

Ingerlatseqatigiiffiit iluatsinngitsoorsimasut siunnersuuteqartut assersuutigisaat eqqarsaatigalugit Naalakkersuisut isumaqarput suliniutaasimasut taakku ingerlatseqatigiiffiit Namminersornerullutik Oqartussat pigisaannut ingerlareersunut assersuunneqarsinnaanngitsut.

 

Qorlortorsuaq M/S Disko aammalu Puisi A/S tassaapput pingaartumik aallarteriaqqaarnerminni pisortanit ikiorneqarlutik inuussutissarsiornikkut ineriartortitsiniarluni suliniutaasimasut immikkuullarissut. Piviusorlumi tassaavoq anguniakkat siunertallu pitsaasuugaluartut taamaattoq suliunitit taakku tamamarmik aningaasat pissutigalugit taamaatiinnartariaqarsimasut.

 

Suliniutit kukkuluttorfiusimasut aallaavigalugit aammalu siunissami suliniutit imminut napatissinnaanngitsut pinngitsoorniarlugit Naalakkersuisut Namminersornerullutik Oqartussat siunissami suliniutinut aningaasaliissuteqarnissaat pillugit aalajangiinermi tunngavissanik pitsanngorsaallutillu nukittorsaasimapput.

 

Taamattorli Namminersornerullutik Oqartussat aningaasaliisarnerisa ilarpaalui pisartut najoqqutassiat Inatsisartut inatsisaasigut aalajangersarneqarsimasut naapertorlugit.

 

Imaluunniit taakku naapertorlugit aalajangersarneqarsimasut tunngavigalugit. Soorlu taaneqarsinnaapput ESU aammalu nunami inuussutissarsiutinut aningaasalersuinikkut tapersiisarneq allallu.

 

Aningaasaliinerit immikkut inatsisiliat saniatigut pisartut tassaakkajupput suliniutit imarisamikkut pissutsimikkullu najoqqutassiat nalinginnaasut tunngavigalugit aalajangiiffigissallugit ajornakusoortut siunertamulluunniit naapertuutinngitsut. Aningaasaliinernut taamak ittunut piumasaqaatit suliat pineqartut Naalakkersuinikkut allaffissornikkullu aningaasaliissutitut suliarineqarneranni ersertassapput.

 

Naalakkersuinikkut tunngavissanut ilanngullugu Naalakkersuisuttaaq pingaartittarpaat aningaasatigut ingerlanneqarnerisa paasiuminartuunissaat. Tamatumani aamma missingersuutit ingerlatsinerlu erseqqissumik nassuiarneqarsimassallutik.

 

Tamatumani missingersuutini ileqqoreqqusat naapertorlugit Naalakkersuisunut piumasarineqartarpoq missingersuusiortoqarsimassasoq ingerlatsinermut naatsorsuutit oqimaaqatigiissinneqarnerannut kiisalu aningaasanut tigoriaannarnut.

 

Takkulu immikkut ilisimasalinnut avataaneersunit soorlu kukkunersiuisunit naalagaaffimmit akuerisanit misissorneqarsimassasut. Suliniutit taakku pillugit inassuseqaasiortoqarnissaa sioqqullugu.

 

Naalakkersuisut isumaqarput siunissami inuussutissarsiutinik ineriartortitsilluni suliniutit pillugit isumatunerpaamik aalajangiinerit pisinnaasut soorlu ilaatigut pitsaassutsimik qularnaarinikkut. Aammalu immikkut ilisimasalinnit naliliisitsisarnikkut.

 

Soorlu Sulisa A/S aallaavigalugu taassumami siunertarimmagu inuussutissarsiutinut suliniutit nalilertassallugit aallarnertassallugit tapersersortassallugillu.

 

Naalakkersuisullumi siunnersuuteqartut suliareqqusaat tigujumavaat. Aktiaateqarluni ingerlatseqatigiiffiit inuiaqatigiit pigisaasa pitsaanerusumik isumannaannerusumillu ingerlanneqartarnissaat qularnaarniassallugu. Taamaaliussappullu inatsisitigut toqqamavissat atuuttut naleqqussarnerisigut.

 

Taamallilluni aktiaateqarluni ingerlatseqatigiiffiit namminersortut aammalu inuiaqatigiit aktiaateqarluni ingerlatseqatigiiffiutaasa immikkoortinnerisigut. Pissusiviusut eqqarsaatigalugit Namminersornerullutik Oqartussat aktiaateqarluni ingerlatseqatigiiffiutaat ukiup affaanut ukiumoortumillu naatsorsuutiminnik aammalu ingerlatsineq pillugu nassuiaatinik taakkununnga atasunik saqqummiussisarnerminni ersarinnerusariaqarput.

 

Taamaaliornikkut kikkulluunniit ingerlatseqatigiiffiit ingerlanneqarnerannik pillugit malinnaasinnaanerulissapput.

Naalakkersuisut Namminersornerullutik Oqartussat aktiaateqarluni ingerlatseqatigiiffiutaani piginnittutut inissisimanerminnut atatillugu aktiaateqarluni ingerlatseqatigiiffiit pisortanit pigineqartut sulinerannut killiliussanik iluarsiinialereersimammata kiisalu inatsisit tamakkununnga attuumassuteqartut iluarsineqartussaammata Naalakkersuisut siunnersuutigisinnaavaat imaluunniit siunnersuutigissavaat siunnersuut massakkut tunngavissat tunngavigalugit saqqummiunneqarnermisut isikkoqarluni akuersissutigineqassanngitsoq.

 

Taamak oqaaseqarlunga Naalakkersuisut sinnerlugit Inatsisartunut ilaasortaq Anthon Frederiksenip aalajangiiffigisassatut siunnersuutaa Inatsisartuni oqaluuserisassanngortippara.

 

Ole Lynge, ataatsimiinnermik aqutsisoq, Inuit Ataqatigiit.

Qujanaq. Taava partiit oqaaseqartuinut ingerlaqqipugut.

 

Per Rosing-Petersen, Siumup oqaaseqartua.

Qujanaq. Siumumiit imatut Inatsisartunut ilaasortaq Anthon Frederiksenip aalajangiiffigisassatut siunnersuutaanut oqaaseqassuugut.

 

Upernaaq manna Inatsisartuni sulinitsinni siunnersuutit arlallit ingerlatseqatigiiffinnut piginnittuunermut tunngassuteqarsinnaasut sammineqartussaapput.

 

Ilaatigut Anthon Frederiksenip siunnersuutaata saniatigut kukkunersiuinermi ataatsimiititaliamut ilaasortat siunnersuutaat aappassaaniigassaavoq. Siullermeernera tamakkiisumik taperserneqartoq tassalu suleriaatsiminni ilaatigut piginneqatigiiffiit Namminersornerullutik Oqartussanit pigineqartuni misissuisinnaatitaalernissamut tungasoq. Aammalu Inatsisartunut ilaasortaq Johan Lund-Olsenip misissuisussanut kommissioniliortoqarsinnaanera tassa ataatsimiititaliortoqarsinnaaneranut tunngasoq sammisussaavagut.

 

Anthon Frederiksenip siunnersuutaani assersuutinik ajalusoornikunik arlalinnik taasigaluarluni siunnersuummini qanoq aaqqiissuteqarsinnaanermik tikkuussisoqannginera ilaatigut toqqammavigalugu Siumumiit ilalertikkuminaatsipparput.

 

Naluneqanngitsutullu Naalakkersuisut allattoqarfiata ataani ingerlatseqatigiiffimmut allattoqarfimmik pilersitsisoqarnikuuvoq suli ineriartortitamik. Ilaatigullu allattoqarfiup taassuma aamma nukittorsarneqarneratigut soorlu aamma tamanna siusinnerusukkut Inatsisartuni oqaluuserineqartareersoq sukaterineq anguneqarsinnaavoq. Aammalu suliniutit allat qulaani taaneqartut tunngavigalugit suliap ingerlateqqinnissaa anguneqarsinnaasoq Siumumiit isumaqarpugut.

 

Taamaattumik Anthon Frederiksenip siunnersuutaat taamatut isikkoqartillugu ilalernartinngilarput.

 

Finn Karlsen, Atassutip oqaaseqartua.

Siunnersuuteqartup qulequtaq qulequtsiussimasaa tusaannarlugu isumaqatiginarluinnartutut oqaatigiinnarneqarsinnaagaluarpoq. Tamatumani aamma tunngavilersutai atuarlugit ilaatigut ilumoortortaqarmata.

 

Kisianni suliffeqarfissuit aktiaateqarluni piginneqatigiinnikkut ingerlanneqartut eqqarsaatigalugit maleruagassaqarput imaasiallaannaq akuleruffigineqarsinnaanngitsunik. Soorlu Naalakkersuisut akissuteqarnerminni erseqqissumik oqaatigigaat ingerlatseqatigiiffiit Namminersornerullutik Oqartussat pigisaat immikkuullarissumik inatsimmik toqqammaveqarlutik ingerlasuusut nammineq siulersuisullit siulersuisullu ingerlatseqatigiiffiup ingerlanneqarneranut aningaasaqarneranullu nakkutilliisuusussaapput akisussaallutillu.

 

Aammattaaq oqaatigisariaqarput aktiaateqarluni ingerlatseqatigiiffiit pillugit inatsisit naapertorlugit ataatsimeersuartut ingerlatseqatigiiffimmik oqartussaanerpaapput. Aammalu ataatsimeersuartut suliassaraat siulersuisunik kukkunersiuisunillu toqqaaneq.

 

Naalakkersuisuttaaq akissuteqarnerminni erseqqissumik oqaatigaat siunnersuuteqartup suliareqqusaa tigujumallugu aktiaateqarluni ingerlatseqatigiiffiiit pigisaasa pitsaasumik isumannaatsumillu ingerlanneqartarnissaat qularnaarnissaallu. Taamaaliorumappullu inatsisit toqqammavissat atuuttut naleqqussarnerisigut.

 

Taamatut oqaseqarluta ingerlatseqatigiiffiit Namminersornerullutik Oqartussanit pigineqartut isumannaannerusumik ingerlanissaat pingaartillugu Naalakkersuisut siunnersuuteqartumut akissuteqaataat tamakkiisumik isumaqatigaarput.

 

Johan Lund-Olsen, Inuit Ataqatigiit oqaaseqartuat.

Qujanaq. Inuit Ataqatigiit pingaartipparput aktiaateqarluni ingerlatseqatigiiffiit Namminersornerullutik Oqartussanit ilaannakortumik tamakkiisumilluunniit piginneqataaffigineqartut maannamit pitsaanerujussuarmik nakkutigineqarsinnaaleqqullugit maannamiillu inuiaqatigiinnut ammanerusumik ingerlatsiviulersinnaaleqqullugit erseqqinnerusunik malittarisassaqartitsilernissatsinnut piffissanngortoq. Kinguartiteriuarnissamullu Inatsisartut aamma pissutissaqanngilluinnartugut.

 

Pisariaqartitsisoqavinnera maani najuuttunit tamanit naluneqanngilluarmat. Aammalumi oqaluuserisassatsinni tullinnguuttumik misissuisussatut ataatsimiititaliorsinnaalernissatsinnik piginnaatinneqalernissamik Inuit Ataqatigiinniit siunnersuutigineqartutuut tamanna uppernarsarneqareermat taamaammat tamanna takisuuliutiginagu ilisimatsissutigiinnassaavarput Inuit Ataqatigiit ukiuni arlalinngortuni aktiaateqarluni ingerlatseqatigiiffiit Namminersornerullutik Oqartussat ilaannakortumik tamakkiisumilluunniit piginneqataaffigineqartut annertunerusumik inuiaqatigiinniit nakkutigineqartalernissaat anguniarlugu maani Inatsisartuni siunnersuuteqartarsimagatta.

 

1994-imi upernaakkut aappassaanik Inatsisartuni ataatsimiittoqarmat taamani siullerpaamik Inatsisartut ombudsmandeqalissagatta siunnersuutivarput ombudsmandip aamma Namminersornerullutik Oqartussat ingerlatseqatigiiffissui nakkutiginnittooqataaffigilertariaqarai. Ajuraluartumilli taamani iluatsinngitsumik.

 

1996 upernaakkut katersuunnitsinni Inuit Ataqatigiit siunnersuutigivarput misissuisussatut ataatsimiititaliorsinnaanissatsinnut namminerisatsinnik inatsiseqalertariaqartugut - ukioq taanna tassa 1996. Tassalu Inatsisartut ukiakkut ataatsimiinneranni aamma siunnersuuteqarpugut Namminersornerullutik Oqartussat aktiaateqarluni ingerlatseqatigiiffissui nakkutilliiveqartinneqartariaqartut kommunit susassaqartullu allat peqataaffigissaannik suliffeqarfissuit tamakku aamma nakkutigineqarnerusinnaaniassammata.

Taamaattumik siunnersuuteqartarnigut tamakku eqqaasitsiutigiutigalugit uggorilaanngitsuunngilarput matumani aalajangiiffigisassatut siunnersuuteqartoq tigussaanerusumik qanorlu iliortariaqanermik tikkuussinerusumik siunnersuusiorsinnaasimanngimmat.

 

Oqaatigineqareersutulli oqaluuserisassatsinni tullinnguuttumi Inuit Ataqatigiit siunnersuutigisaannut siunnersuuteqartoq tapersiuteqarnermigut taamak periarfissaqalissammat aalajangiiffigisassatut siunnersuutaa taamak isikkoqarallartillugu maanna akuerisinnaanngiarput. Kaammattutigissalluguli oqaluuserisassatta tulliani Kattusseqatigisanilu ilagalugit siunnersuuteqartoq tapersersuilluarumaartoq.

 

Naalakkersuisut siulittaasuata siunnersuuteqartumut akissuteqaataa taamaattumik annertunerusumik aamma oqaaseqarfiginngikkaluarlugu tikkuaannassavarput ingerlatseqatigiiffiit ukioq affakkaartumik naatsorsuutinik saqqummiussisalernissaannik piumasaqarfigineqartalernissaat taamatullu aamma ingerlatsinerminni ammanerusumik periaaseqalernissaat siunertaralugu iliuusissanik aqqutissiuussisoqarnissaanut piareersimanerarlutik oqarmata Inuit Ataqatigiit isumaqataaffigimmassuk, soorlumi Børsenimi ingerlatseqatigiiffiit allat taamatut maanna nalunaartussaatitaallutik aamma pisussaatinneqartut.

 

Taamatulli oqaaseqareerluta naggataatigut aamma piumasarissavarput ingerlatseqatigiiffiit selskabet pillugit inatsisit naatsorsuutinillu kukkunersiuisartoqarneq pillugit inatsisit tassa revisorlovgivning kingullermillu Inatsisartuni 1994-imi sammineqartut sukumiisumik qimerloorneqaqqissasut nunatsinni pissusiviusunut inuussutissarsiornikkullu nunatsinni ukiuni nutaani makkunani immikkut atukkatsinnut naleqqussaavigineqaqqullugit.

 

Tassa taanna eqqaagatsigu tassa massuminnga pissuteqarpoq, aajuku tigummiarpakka kingullermik Inatsisartut annertuumik ingerlatseqatigiiffiit pillugit inatsisit aammalu naatsorsuutinik kukkunersiuisartoqarneq pillugu inatsisit sammimmatigit, tassa ukiut arfineq-pingasut matuma siornatigulli maannakuut naleqqussaaqqittariaqalernerput taanna erseqqilluinnarmat.

 

Tassalu taamatut oqaaseqarluta siunnersuuteqartup aalajangiiffigisassatut siunnersuutigisaa manna taamatut isikkoqarallartillugu Inuit Ataqatigiit akuerisinnaanngikkaat nalunaarutigivarput.

Ole Lynge, ataatsimiinnermik aqutsisoq, Inuit Ataqatigiit.

Johan Lund-Olsenimut qujanaq.

Taava tullinnguuppoq Mads-Peter Grønvold, Kattusseqatigiit, tulleriumaarpaa Per Berthelsen.

 

Mads-Peter Grønvold, Kattusseqatigiit oqaaseqartuat.

Anthon Frederiksenip Kattusseqatigiinneersup siunnersuutaa Kattusseqatigiinniit misissoreerlugu imatut oqaaseqarfigissavarput:

 

Siunnersuuteqartoq oqarami ilumoorpoq Namminersornerullutik Oqartussanik aningaasaliissutigineqartartut akisussaassuseqarnerusumik siunissami nakkutigineqartariaqartut. Kattusseqatigiinniit akuersaarsinnaanngilarput Namminersornerullutik Oqartussani aningaasaliissutigineqartarsimasut annaaneqarsimagaangata annerusumik naalakkersuinikkut kinguneqartinneqartannginnerat.

 

Soorlumi siunnerusuteqartup siusinnerusukkut pisimasut assersuutigalugit oqaaseqarami eqqaagai aningaasat millionit arlallit nunatta karsiani annaaneqartarsimasut. Taamatut ingerlatsinerliornerup kinguneranik nunatta aningaasaliissutigisarsimasaanik annaasaqartarnera unitsinneqassappat, pinngitsoorneqarsinnaanngilaq nakkutilliinerup suli annertunerusumik ingerlanneqartarnissaa.

 

Tassami apeqqutigineqartariaqarpoq Puisi A/S-imi pisimasoq qiviaraanni Namminersornerullutik Oqartussat Puisi A/S-ip siulersuisuinut ilaasortaatitaasa annerusumik aningaasaqarnikkut ingerlatsinermi nakkutilliisimannginnerat pissutaalluni Namminersornerullutik Oqartussat aningaasaliissutaat annaaneqarsimammata.

 

Soorlumi aamma M/S Disko ajutoormat nunatta karsia millionit arlaqartunik aningaasaliisariaqarsimasoq. Kattusseqatigiinniit taamatut ingerlatsisarsimanerit akuersaarsinnaanngilagut. Taamaattumik Kattusseqatigiinniit Naalakkersuisunut piumasaraarput selskabinut Namminersornerullutik Oqartussanut aningaasaliissuteqarniaraangata siulersuisut aningaasaqarnikkut ingerlatsinerliorsimappata akisussaatinneqartarnissaanut piumasaqaateqartariaqarmat.

 

Tassami tulluartuusinnaanngimmat assersuutigalugu Puisi A/S aningaasaqarnikkut ajutoormat, ulluinnarni ingerlatsinermi pisortaq aammalu siulersuisut, siulittaasoq siulersuisullu aningaasaqarnikkut ajutoornermut akisussaatinneqartannginnerat, naak siulersuisut ulluinnarni ingerlatsinermi nakkutilliinerat pitsaanerusimagaluarpat taamatut aningaasanik annaasaqarnissaq pinngitsoorneqarsinnaasimagaluartoq.

 

Kattusseqatigiinniit isumaqarpugut Namminersornerullutik Oqartussat aningaasaliissutinik nakkutilliinerat annertusarneqartariaqalersoq, naak selskabinut Namminersornerullutik Oqartussat direktørit imaluunniit pisortat ilaat sinniisutut toqqarneqartaraluartut aningaasaqarnikkut ingerlatsineq annerusumik soqutiginnillutik nakkutilliisarsimannginnerat aamma pissutaalluni aningaasaliissutigineqartarsimasunik annaasaqartoqartarsimanera.

 

Soorlumi Puisi A/S pileruttormat oqaatigineqartoq tunisassiorfimmut aningaasaliisoqartarsimasoq, sunaaffa Kina-mi tunisassiorfeqanngitsorluunniit - ila tassuunaannarluunniit takuneqarsinnaavoq Namminersornerullutik Oqartussanik aningaasaliissutigineqartartut suli annertunerusumik nakkutigineqartariaqarnissaat.

 

Ilumoorpoq aamma aningaasaqarnikkut nakkutilliineq annertusarneqartariaqartoq Namminersornerullutik Oqartussat selskabini assersuutigalugu Royal Greenland-imi ukiuni kingullerni ingerlasimanera qiviaraanni aningaasaqarnikkut ingerlatsisimaneq akuersaarneqarsinnaanngilaq. Selskabi sunaluunniit aningaasaqarnikkut amigartooruteqarluni ingerlanneqartoq pisortaqarnikkut naammaginartumik ingerlatsisoqarsimannginnera pissutigalugu pisortaasut allanik taarsertariaqalersillugit 10 mio.kr.-nit tungaanut sinnerlugilluunniit soraarnerussutisiisoqarsinnaanngitsoq Kattusseqatigiinniit isumaqaratta.

 

Taamaattumik pisariaqarluinnarpoq aktieselskabini Namminersornerullutillu Oqartussani pigineqartuni ingerlatsinermut malittarisassat nutarterneqartariaqarnerat, taamatullu selskabit inatsisaanik nutarterinik ingerlanneqartariaqarluni nunatsinnut naleqqussaanerit tunngavigalugit.

 

Ilumoorpoq nunatsinni aningaasat annertuumik atorfissaqartinneqartut, taamaattumik nunatsinni aningaasaqarnikkut aqutsineq pitsaanerusumik ingerlanneqartariaqalerpoq aamma Namminersornerullutik Oqartussat selskabiutaani.

Kattusseqatigiinniik isumaqarpugut naalakkersuisoqarfiit selskabillu akornanni aningaasaqarnikkut ingerlatsineq ataqatigiinnerusumik nakkutilliineq ingerlanneqartariaqalertoq, tassami tulluartuunngimmat aatsaat aningaasaqarnikkut ajutoortoqartillugu Naalakkersuinikkut qanoq iliuuseqarniartarnerit.

 

Naggataatigut Kattusseqatigiinniit iluarisimaarparput kiisami Naalakkersuisut piginneqatigiiffiit, tassalu aktieselskabit eqqarsaatigalugit qanoq iliuuseqarnialernerat, tassami ukiorpaalunngulerput oqaluttarfik manna atorlugu mianersoqqusisarsimanigut Naalakkersuisunit tusaaniarneqalermata iluarisimaarparput.

 

Taamatut oqaaseqarluta Kattusseqatigiinniit, naak Naalakkersuisut siunnersuut akuersaartinnanngikkaluaraat paasivarput siunnersuuteqartup siunnerfia tunngavigalugu suliniuteqarnialertut.

 

Taamatut oqaaseqarluta Naalakkersuisut akissuteqaataat taperserparput.

 

Per Berthelsen, attaviitsoq.

Inatsisartuni ilaasortap Anthon Frederiksenip uani qaqitaa isornartorsiuinerummat qularnanngitsumik amerlanerit naatsorsuutigissagaluarpaat peqataaffigiinnassagiga, kisianni taamaanngilluinnarpoq. Uani killormut saatilaarlugu oqaatigerusuppara isornartoqartillugu isornartorsiuisup maani najuutinnginnera. Isornartoqartippara sapaatit akunneri pingasut borgmesteriuneq qularnanngitsumik peqqutigalugu.

 

Ole Lynge, ataatsimiinnermik aqutsisoq, Inuit Ataqatigiit.

Utoqqatserpunga Per Berthelsen, aqutsisutut oqartariaqarpunga taanna Siulittaasoqarfimmit qangali akuersissutaanikuummat, pissuteqartumik tunngaveqarpoq.

 

Per Berthelsen, attaviitsoq.

...kisianni uungarluinnaq attuumassuteqarpoq isornartorsiuinerummat, kisianni ingerlariaqqiinnassaanga taava.

 

Isornartorsiuinerinnarmi aallaavigalugu taamaattumillu isoriniarneqartut eqqoriaannarlugit oqallissinnaaneq ajornakusooqaaq. Taamaattumik uani saqqummiussap tunngavissiorneqarnera amigaralugu isummersorfiginerusinnaanissaa ajornakusoortikkakku Naalakkersuisut nassuiaataat tusaatissatut tigullugu inassutigisaat tassalu itigartitsineq taanna ilalerumavara.

 

Tulliuppummi siunnersuutit oqarta neqitaqarnerujussuusut taamaakkamillu aalajangiiniarnissamut tunngavissanik ammaassinerujussuusut, tassanilu eqqarsaatigaakka ullumikkut ilaatigut aamma oqallisigisassarput immikkoortoq 39-tut taaneqartoq misissuissatut ataatsimiititaliat pillugit, inatsit kunngip peqqussutaatigut atuutilersinneqarnissaa pillugu aalajangiiffigisassatut siunnersuut kingusinnerusukkullu aamma Inatsisartuni Kukkunersiuinermut Ataatsimiititaliaata siunnersuutigisaat. Taakkuninnga taakkulu pillugit oqallisilernisatsinnut piareersagaasumik saqqummiussassakka utaqqisissavakka.

 

Otto Steenholdt, attaviitsoq.

Tassa uanga siunnersuuteqartoq paasilluarpara. Taamanikkut assaat kultimik itumammioqarlutik tunniussisimanerat nunatsinni innuttaasunut tamanut assut aalassatsitsisimavoq. Siunnersuuteqartullu aamma taanna aallaavigigaa naatsorsuutigilluinnarpara, soorluttaaq uanga aamma sakkortuumik qisuariaateqarsimasunga, uani immikkoortoq 8-mi eqqaareerpara oqarlunga Naalakkersuisut Siulittaasuat arlalissuarnik apeqquteqarfigisimagiga, akissutillu naammagisimaarlugit suliniarnissanni katersorsimagikka.

 

Isumaqarpunga Naalakkersuisut Siulittaasuata akissutaa ersarissaatinik ilalik tutsuiginartuusoq.

 

Tamanna tassa allaavigalugu siunnersuuteqartup uparuartuinera iluaraara nipangiutiinnagassaanngimmat, uparuartortariaqarmallu Naalakkersuisulli Siulittaasuata akissutaa naammagisimaarpara, neriullunga massakkut mallit portuallaarunnaariartorneranni tamanna puigorneqaannassanngitsoq, pisimasoq avaanngunartoq nanginneqartariaqanngilaq, pisimasuullu aallaavigalugit siunnersuuteqartup taamatut aalassaataasinnaasumik siunnersuuteqarnera uanga pissusissamisoorsoraara, taamaallaat akissuteqaatit tassunga tunngasut naammagalugit.

 

 

 

Ole Lynge, ataatsimiinnermik aqutsisoq, Inuit Ataqatigiit.

Otto Steenholdtimut qujanaq. Taavalu siunnersuuteqartoq sinnerlugu Tom Ostermann oqaaseqaqqikuvoq.

 

Tom Ostermann, Kattusseqatigiit.

Siullermik assigiinngitsorpassuit maani Naalakkersuisut aamma akissuteqaataani erserpoq suliniutit assigiinngitsut aallartinneqartussanngorsimasut imaluunniit ingerlalersimasut, taakkua nuannaarutigisariaqarpagut ilami inuiaqatigiinni annertuumik aalassatsitsisoqarnikuuvoq pissutsit uku Royal Greenland-imut tunngasut qiviarutsigit.

 

Aamma una aktieselskabinik sunngissinnaanermik oqartarneq immaqa ilaatigut apeqquserneqarsinnaavoq, tassami nalunngilarput Royal Greenlandip siulersuisuunerisimasai, taakkua Uffe Ellemann Jensenikkut ilanilu inuit nuimasuutut isigineqartut, aamma taamaapput ullumi, kisianni taakku soraarsinneqarsimapput tassa alloriarnerit assigiinngitsut tiguneqartalersimapput, uagut qangali aamma Kattusseqatigiinniit nilliaatigisimasagut.

 

Una Per Berthelsenip oqaaseqaatigisai annertunerusumik iserfigissanngilakka aamma ilisarnarsigaluttuinnalermat taamatut pissusilersuutai, kisiannili illuatungaatigut Otto Steenholdti qutsavigerusuppara aamma uatsinnut tapersiissuteqarmat.

 

Ukualu aamma Kattusseqatigiinniit oqaaseqaatigineqartut ersarissut isumaqarama taakkua aamma qujassutigerusuppakka, kisianni malunnarpoq siunnerfiit ukua tamatta maani inimi siusinnerusukkut annertuumik oqallisaasarsimasut aamma takusareersimagigut sutigut assigiinngitsutigut eqqumaffissagut eqqum­maariffigiartulerigut aammalu aktieselskabinut tunngatillugu malunnarpoq Inatsisartuni ilaasortaasut aamma eqqummaarinnerulersimasut pisariaqartutullu isigilersimagaat tamakkua qanoq iliuuseqarfiginissaat.

 

Taamatut oqaaseqarlunga naatsumik qutsavigivassi akissuteqaatissinnut.

 

Ole Lynge, ataatsimiinnermik aqutsisoq, Inuit Ataqatigiit.

Tom Ostermannimut qujanaq. Takusinnaasakka malillugit allanik nappaasoqarsimanngilaq - aa utoqqatserpunga, Naalakkersuisut Siulittaasuat takassa.

Jonathan Motzfeldt, Naalakkersuisut Siulittaasuat, Siumut.

Qujassutigaara uanga aamma akissuteqaatinni tapersiisoqarmat, aammalu taamaalilluni akissutigisarput Inatsisartuni naammagisimaarneqarluni.

 

Ilumoorpoq apeqqut taanna taannarpiaq Royal Greenlandimut tunngasoq aamma Inatsisartunut Ilaasorta Otto Steenholdtimut akissuteqarfigineqareersimmat Naalakkersuisunit apeqqutigineqarnera najuqqutaralugu, tassanilu aamma neriorsuutigineqarsimalluni aamma suliarineqarpoq maannakkut atorfinitsitsinermi soraarnermilu selskabini pisortaasut, tassani iliuusissat sinaakkusissaat ilusilersorneqarmata, soorunami oqaatigereerparput Naalakkersuinerminngaanniit akulerunnertunaasiit taaneqassagaluarpalluunniit isumaqarpugut pisariaqartoq, taamatut sinaakkutissanik malittarisassanik aaqqissuussinissaq.

 

Aamma oqaatigissavara apeqquteqaammut uunga tunngatillugu apeqquteqaatigineqartut imaluunniit oqaatigineqartut uani suliassat arlaleriarujussuarluni maani oqaluttarfimminngaanniit sammineqartareernikuupput. Tassani pivakka Puisi A/s, Disko A/S aammalu Qorlortorsuarmut tunngasut. Nassuiaaterpassuit apeqqutini tassani Inatsisartunut tunniussaareernikuupput, aammalu saqqummiussisoq apeqqutinut taakkuninnga innersuuttariaqarpara tamakkua aamma apeqqutit pillugit nassuiaatit assigiinngitsorpassuit Inatsisartuni ingerlanneqartarsimasut aamma nammineerluni misissoqqissinnaagai.

 

Apeqqutit taamak ittut saqqummiuteqattaartuarnerisigut akissutigut taakkua aamma taakkuujuartut allatut ajornartumik innersuuttariaqarpagut, misissorluagaallutik akissutit suliarineqartarmata, aammalu taamaalillutik inaarutaasumik suliarineqartutut isikkoqartarlutik, kisianni qujavunga taamatut illuatungaliuttut aamma ilanngullutik suliassaq taamaalillugu naammassinneqarnissaa akuersaarmassuk.

 

Ole Lynge, ataatsimiinnermik aqutsisoq, Inuit Ataqatigiit.

Naalakkersuisut Siulittaasuanut qujanaq. Taava aamma oqaaseqaqqikkumavoq

 

Mads-Peter Grønvold, Kattusseqatigiit.

Siulittaasoqarfimmununa qinnutiginiarlugu Inatsisartut ataatsimiinnerani eqqartukkap avataatigut  oqaaseqaqattaartarnerit tamaani pinngitsoorneqartariaqaraluarmata, eqqartukkat avataani pisut. Soorlu Inatsisartuni Ilaasortat ataasiakkaat peqanngittarnerannut tunngasut. Tamakkua isorineqassappata siulittaasoqarfimmut allagaqarnikkut isorineqarsinnaammata maani oqaluuserisarnissaat naleqquttutut isiginnginnakku. 

 

Ole Lynge, ataatsimiinnermik aqutsisoq, Inuit Ataqatigiit.

Neriuppunga taanna uteqqinneqassanngitsoq Siulittaasoqarfimmiit akuerisat taamatut saqqummiussinissaannut aamma inuttaalu paaseqatigiissutigineqartarput. Taanna ilumoorputit kisianni ugguuna, siulittaasoqarfimmut aqutsineq pillugu naammagittaalliuutissaqarsimagussi allakkatigut pinngitsoornagu tunniunneqartarnissaa kissaatiginarpoq, aamma siulittaasoqarfiup taanna gruppinut tamanut kaammattuutigaa.

 

Mads-Peter Grønvold, Kattusseqatigiit.

Gruppi sinnerlugu akisariaqartutut misigisimagama, ugguuna oqaluttarfikkut oqaatigineqarmat taamatut oqariartorsimavunga, kisianni nuannaarutigaara Naalakkersuisut Siulittaasuata akissuteqarnermini suliniutit allallu aallartinneqareersut eqqaammagu aammalu ulluni aggersuni suliassat taamatut ittut suliarineqartussaasut oqaatigalugu.

 

Ole Lynge, ataatsimiinnermik aqutsisoq, Inuit Ataqatigiit.

Qujanaq. Johan Lund-Olsen oqaaseqarumavoq

 

Johan Lund-Olsen, Inuit Ataqatigiit.

Qujanaq. Uanga annertoorujussuarmik oqaaseqarusunngilanga tassa malugisinnaagakku aamma Inuit Ataqatigiinninngaanniit oqaatigisagut taakkua aamma Naalakkersuisut tungaanninngaanniit aamma, naak annertunerusumik oqaaseqarfigineqanngikkaluarlutik aamma isumaqatiginartinneqartutut aamma isumaqartinneqarunaramik, kisianni unaana erseqqissaateqarfigilaarusullugu aamma tassa maannartunga.

 

Saqqummiussinitsinni oqaatigivarput maannakkut aamma pisariaqalivissoq ingerlatseqatigiiffiit, selskabit, pillugit inatsisit annertoorujorujussuusut, tassa aktiateqarluni aamma anpartiuteqarluni ingerlatseqatigiiffiit pillugit inatsisit annertoorujussuit taassumalu saniatigut naatsorsuutinik kukkunersiuisartut naalagaaffimmit akuersaagaasut pillugit inatsisit aammalu konkursertarnermut  inatsisit allarpassuillu tassa selskabit pillugit inatsisaannut attuumassuteqartut, taakkua sukumiisumik qimerloorneqaqqinnissaat taanna aamma pisariaqavimmat, taannalu aamma Naalakkersuisut ammaffigimmassuk taanna oqaatigimmassuk taanna iluarisimaarparput Inuit Ataqatigiinninngaanniit.

 

Tassami ilumoortoq aajuna, tassa Inatsisartut kingullermik Inatsisit taakkua annertoqisut pillugit sukumiisumik maani Inatsisartuni oqallikkamik, tassa tamanna pivoq ukiut arfineq-pingasut matuma siornatigulli, tassa Inatsisartut 1994-imi ukiakkut ataatsimiinneranni. Taamanili pissutsit soorunami allanngorsimaqaat inuiaqatigiinni ineriartorneq unissimanngilaq, aamma ingerlatseqatigiiffiit eqqarsaatigalugit.

 

Taamaammat soorunami iluarisimaarnarpoq Naalakkersuisut tamanna aamma eqqarsaatigalugu iluarsartuusseqqinnissaq, tassa inatsisit tassa selskabit pillugit inatsisit naleqqussaavigineqarnissaat taanna isumagisimagunikku taamaaliulersaarnerarlutik oqalummata.

 

Tassani pingaaruteqartorujussuuvoq ingerlatseqatigiiffiit ukiut affakkaartumik naatsorsuutinik saqqummiussisalernissaannik aamma piumasaqarfigineqartalernissaat, maannamummi aktiaateqarluni imaluunniit anpartiuteqarluni ingerlatseqatigiiffiit pillugit inatsisini atuuttuni, maani nunatsinni atuuttuni, tamanna piumasarineqanngilaq.

 

Nunani allani piumasaqaataavoq, soorlu Danmarkimi ingerlatseqatigiiffiit Børsenimi taamatut nalunaartussaatitaallutik tassa pisussaaffilerneqarnikuupput, tassa børsnoteret selskabitut aammalu tassa tamanna aamma isumaqarluinnarpugut maani nunatsinni aamma pisariaqarluinnartoq.

 

Assersuut alla aamma tikkuaavigilaassavara, tassa konkursertoqartillugu pillugu soorlu Puisi A/S-i taanna assersuutissaqqissuuvoq kingulliummat, taanna eqqarsaatigigaanni qularnanngilluinnarpoq tassani aamma sukatiterisoqangaatsiartariaqarmat.

 

Tassami ilisimaneqartutuut taamani Puisi A/S-i imaluunnit Puisi A/S-imi pisimasut Inatsisartuni oqallisigineqallarmata ukiut marluk matuma qaangiunneratigulli, taamani Inatsisartut allatut ajornartumik Puisi A/S-i konkursilermat inuiaqatigiit aningaasaataannik atuillutik aningaasaliisariaqalermata.

 

Taamani Naalakkersuisut Inatsisartullu isumaqatigiillutik kuratori suliakkerpaat misissuinermik ingerlatitseqqullugu, kisianni tassa tupinnartua uaniipooq kuratorit taamani marluusut tassa Inatsisilerituut advokatit taamatut iminneqarsimasut ukiut marluk, ukiut marluk misissuinertik ukiut marluk atorlugit misissuinertik ingerlammassuk, taavalu misissuereerlutik suliartik taanna Naalakkersuisunut tunniummassuk Inatsisartut ulloq taannarpiaq qanoq iliuuseqarsinnaajunnaareersut, aammalu Naalakkersuisut qanoq iliuuseqarsinnaajunnaareersut.

 

Taamaammat tassani tassa konkurslovimi aammalu aktieselskabit pillugit inatsimmi aalajangersakkat taakkua sukatiterneqartariaqarput.

 

Puisi A/S-i eqqaagakku tassa taanna assersuutissaqqissuuvoq, tamattami eqqaamalluinnarparput ukiaq tusagassiuutitigut tutsiummat, tassagooq kuratorit eqqaamanerlunngikkukku 18. december juullilivissoq kuraatorit ukiut marluk misissuereersimallutik misissuinerminni tunniussassatik Naalakkersuisunut ulloq taannarpiaq, 18.12.2001, Naalakkersuisunut tunniuppaat, taavalu kingunitsianngua politimestereqarfimminngaanniit politimesteri oqaaseqarpoq - ila Inatsisartut aammalu Naalakkersuisut qanoq ilioqqissinnaajunnaareerput, ulloq taannarpiaq 18. december kuraatorip tunniussinerani malersueqqissinnaanissaq mattunneqarmat.

 

Taamaammat tassa suliaq unitsinneqarpoq, naak tassani Puisi A/S-imi aningaasaleeqataasimasut Nanortalimmi aamma soqutigisaqaqatigiit 1 million kruunit tungaannut aningaasaliissuteqarsimasut kissaatigigaluaraat, tassami eqqorneqaramik naapertuilluarneq eqqarsaatigalugu, taava Naalakkersuisut aammalu Inatsisartut iliuuseqalissasut, kisianni tamanna ajornartinneqarsimavoq oqaatigeriikkattut tassa kuraatorip pisussaatitaanertik kisiannili inatsisitigut piumasarineqartut killissarpiarpiaa tikivillugu taanna atornerlummassuk, imaluunniit atorluataarmassuk.

 

Tassalu taassuma kingunerisaanik politimesteri qanoq iliuuseqarsinnaajunnaarsilugu aammalu Inatsisartut Naalakkersuisullu aamma malersueqqissinnaanissaat taamaalilluni aamma pisinnaajunnaartimmassuk.

 

Taamaammat tassa pisariaqavippoq ingerlateqatigiiffiit pillugit inatsisit assigiinngitsut naatsorsuutinik kukkunersiuisartoqarneq pillugu inatsisit, aammalu konkursertoqartillugu periuserineqartussat eqqarsaatigalugit inatsisit taakkua sukatiterneqangaatsiartariaqarmata. Tamannalu neriuppugut Naalakkersuisut Naalakkersuisooqatigiit matuma kingorna aamma ilumoorullugu taanna ingerlanniarumaaraat.

 

Ole Lynge, ataatsimiinnermik aqutsisoq, Inuit Ataqatigiit.

Qujanaq, taava kingulliulluni oqaaseqarumavoq Naalakkersuisut Siulittaasuat, Jonathan Motzfeldt.

 

Jonathan Motzfeldt, Naalakkersuisut Siulittaasut, Siumut.

Børsnoterede selskaber taakkua ingerlatseqatigiiffiit nalunaarsorneqarsimasut pisussaaffiinik assingusumik tassa ukioq affakkuutaarlugu nalunaartarnissaannik selskabit iliuuseqarnissaannik, aamma taamaanngikkaluartunut børsnoterede selskabiunngikkaluartunut iliuuseqarnissaq aamma misissorneqarsinnaapput, aammalu taanna Naalakkersuisuninngaanniit naammassiniassallugu misissorsinnaavarput, taanna ajornartorsiutaassangatinngilara.

 

Aamma oqaluuserisassat ataasiakkaatut isiginngilakka Puisi eqqartussagipput, Qorlortorsuaq imaluunniit Disko allallu tamarmik. Suliassa tassaniittut naammassereersimasutut Naalakkersuisut isigalugit maanngaanniit suliarineqarneri, suliassat allat ingerlaqqipput ilaatigut eqqartuussivinni.

 

Maani suliassat naammassineqarsimanngippata oqaluuseriassanngortinneqarsinnaapput, kisianni immikkut Puisi A/S-i oqaluuserisassasut ikkunneqanngilaq, uani pineqarput Naalakkersuisut inuiaqatigiit piginnittut sinnerlugit suliffissuaqarfinni piginneqatigiiffinni, inuiaqatigiit pigisaanni ingerlatsinermut tunngasut pillugit akisussaassuseqartumik ingerlatsisoqarnissaa qulakkeerniarlugu suliniuteqarnissamik peqquneqarnissaa pillugu aalajangiiffigisassatut siunnersuut - taanna pineqarpoq.

 

Kisianni uteqattaarinerit piumanagit Puisi A/S aamma eqqartorlugu pissagutta inuiaqatigiit aatsaat iliuusissaat saqqummertarput privatinillu allanillu aallartitsinissaq tigujumaneqanngikkaangata. Taamak ittunik aallartitsisussanik peqanngikkaangat inuiaqatigiit sassartarput. Nanortalik nalunngilarput illoqarfik siunissaaruttutut isigineqartoq, suliffissaqanngitsoq taamaattumik Puisip aallarnisarniarneqarnera Naalakkersuinikkut aalajangiiffigineqarpoq misilinneqassasoq, iluatsinngimmat taava maan­nakkut Puisip illuutai atorlugit assagiarsunnik nioqquteqarneq aallartippoq, ingerlavorlu taakani suliffissaqartitsivoq, taannalu siunertarpiaavoq.