Ullut ataatsimiiffiusut aqqaneq sisamaat, tallimanngorneq majip 3-at 2002

Oqaluuserisassani immikkoortoq 83

Nungusaataanngitsumik atorluaanissamik Kalaallit Nunaanni siuarsaanissaq pillugu apeqquteqaat aallaavigalugu oqallinnissamik siunnersuut.

(Asii Chemnitz Narup)

 

 

Ataatsimiinnermik aqutsisoq: Anders Andreassen, Inatsisartut Siulittaasuata tullia, Siumut.

 

 

Asii Chemnitz Narup, Inuit Ataqatigiit.

Qujanaq. Inuuiaqatigiit aaqqissugaanerat pillugu iliuusissatut pilersaarusiami oqaatigineqarpoq inuussutissarsiornikkut ingerlatsinnermi pingaartinneqassasoq issuaavunga: Sutigut tamatigut avatangiisit isiginiarneqartarnissaat piujuartitsinissamillu tunngaveqarluni ineriartortitsinerup akulerutsinneqarnissaa tunngaviit pingaarnerit ilagissagaat.

 

Taama tunngaveqarneq susassaqartut qanimut suleqatigalugit Naalakkersuisut ineriartortinniarpaat.

 

Aamma piujuartitsinissamik tunngaveqarluni ineriartortitsilernermut ikaarsaariarneq nuna tamakkerlugu iliuuserisassamik tunngaveqartariaqarluni.

 

Tamakku tunngavigalugit Inuit Ataqatigiit sinnerlugit oqallisigitikkusuppara piujuartitsinermik nungusaataanngitsumik ineriartortitsiniarneq nunatsinni aqqutissat periutillu suut atorlugit piviusunngortinneqassanersoq peqatigitillugu oqallisigineqartariaqarpoq  piujuartitsinermik nungusaataanngitsumik ineriartortitsineq pimoorullugu ingerlanniaraanni taava qanoq iliortoqartariaqarnersoq.

 

Matuminnga oqallittoqarnissaannut kissaat tunngaveqarpoq Inatsisartunit Naalakkersuisuniillu ataasiaannarani oqaatigineqartarmat nunatsinni ineriartortitsineq nungusaataanngitsumik atuinermik tunngaveqassasoq.

 

Bruntlandip nalunaarusiaata 1987-imeersup nungusaataanngitsumik ineriartortitsineq pingasoqiusamik isaasalerlugu "Sukaqarnerarlugu" nassuiarpaa.

 

Siulleq aningaasarsiornermut tunngasoq. Aappaa avatangiisinut tunngasoq. Pingajuat inooqqatigiissutikkut sianigisassanut tunngasoq.

 

Taamaattumik Inuit Ataqatigiit tungaaniit nassuiaqquarput Naalakkersuisut isumaat malillugu nunatsinni nunguusaataanngitsumik ineriartornerup qanoq paasisariaqarnera.

 

Nassuiaqquneqarportaaq sutigut tamatigut avatangiisit isiginiartarneqartarnissaannut piujuartitsinissamillu nungusaataanngitsumillu tunngaveqarluni ineriartortitsineq akulerutsinneqarnissaannik nunatsinni anguniagaqarneq piviusunngortissinnaajumallugu kommunini nunami tamarmi nunarsuarmioqatitsinnullu sammisumik Naalakkersuisut qanoq ittunik suliniuteqarnersut.

 

Naalakkersuisut ilanngullugu nassuiartariaqarpaat nungusaataanngitsumik ineriartortitsinermi isuma qanoq ersialaartinneqarnersoq qanorlu aningaasanut inatsimmi oqimaalutarneqarsimanersoq.

 

Piujuartinissamik nungusaataanngitsumik ineriartortitsinissaq pillugu nunat tamalaat akornanni aalajangersakkat pisussaaffiliisut nunatsinnit aamma akuersaarneqarsimapput. Soorlu nunani avannarlerni Statsministerit 1998-imi anguniagassatut nalunaarutaat.

 

Inatsisartut tamakku pillugit paasissutissinneqartariaqarput taamaalioreernerullu  kingorna nunani avannarlerni piujuartitsinissamik nungusaataanngitsumik ineriartortitsinissamik anguniagaqarnermi iliuusissat oqallisigalugit.

 

Soorluttaaq EU-mi 1992-mi piujuartitsinissamik nungusaataanngitsumik iluaquteqarneq pillugu ataatsimeersuarsimanerup malitsigisaanik Sydafrikami 2002-mi augustip qaammataani Rio Plus 10-mik taaguuserlugu ataatsimeersuartitsinissamut tunngasut paasissutissiissutigineqarlutillu iliuserilissaakkat Inatsisartunit oqaluuserineqartariaqarput.

 

Pingaaruteqarluinnarpoq nungusaataangitsumik ineriartortitsineq tassaaginnaassanngitsoq oqaaseq tusarnersoq taaguutaannaq ilumoorunneqanngitsorli.

 

Taamaallaallu nalliuttorsiortoqartillugu oqalugiarnerni eqqaaneqartartussaq anguniagassatut siunnerfiup tigussaasunngortinneqarnissaa ingerlatsinermilu sumiluunniit titserussimanissaa pingaartinneqartariaqarpoq. Taamatuttaaq pingaarnersiuilluni tulleriissaarinitinni, qanorlu iliuutitsinni tamani malunnartinneqartariaqartoq.

 

Taamaaliornermi anguniagaq oqaasiinaanani paasinartumik isumaqalissaaq nunarsuarmioqatitsinnut tatiginassuserput uatsinnut kinguaassatsinnullumi taamaalilluni innarlerneqassanngilaq.

 

Qitornagut ernuttagullu inuuniarnikkut tunngavissaqatissagutsigit siunissamut ungasissumut isigaluta oqimaaqatigiissakkamik isumalluutitta uumassusillit atornissaannut pisussaaffeqarpugut. Soorlu nunat aamma allat taamaattariaqartut.

 

Naggasiutigalugu kissaatigissavara Inatsisartut apeqquteqaat aallaavigalugu oqallinnissaq ilassilluassagaat. Pissarsiffiulluartumillu ingerlanissaat kissaatigalugu.

 

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Taavalu Naalakkesuisut siulittaasuat saqqummiunneqartumut akissuteqassaaq.

 

Jonathan Motzfeldt, Naalakkersuisut Siulittaasuat, Siumut.

Piujuartitsinissamik tunngaveqarluni ineriartorneq pillugu Inatsisartunut ilaasortap apeqquteqaammini qinnutigaa nassiuiaatigineqaqqullu nunatsinni piujuartitsinissamik tunngaveqarluni ineriartortitsineq ineriartornissarlu qulakkeerneqassappata qanorpiaq iliortoqartariaqarnersoq. Tamannalu eqqarsaatigalugu najukkani nunatsinni nunallu tamalaat akornanni Naalakkersuisut qanoq suliniuteqarsimanersut.

 

Oqaluttarfimmi maanngaanniit suliniutaasimasut tamaasa taagussagaluaraanni takisuuliorpallaarnissaq mianersuuttariaqarpoq. Taamaattumillu Naalakkersuisut toqqarsimavaat ilanngussaq taanna ilanngullugu tunniussimavarput tassani assigiinngitsutigut suliniutit allaaserineqartut innersuussutigalugit.

 

Piuartitsinissami tunngaveqarluni ineriartorneq inuuiaqatigiinni immikkoortunut tamanut tunngavoq. Naalakkersuisut Inatsisartunut ilaasortaq                      isumaqatigaat piuartitsinissami tunngaveqarluni ineriartorneq oqariartaasuinnaassanngimmat timitalimmilli imaqartariaqarluni aningaasarsiornikkut avataangiisitigut imaluunniit inuttut atugarisat eqqarsaatigalugit piuartitsinissami tunngaveqarluni ineriartorneq pigutsigut assigiimmik piuartitsinissamik tunngaveqarluni ineriartorneq.

 

Taamaalilluni inuiaqatigiinni ineriartorneq pisuussutini uumassutilinnik iluaquteqarnermut taamaallaat tunnganngilaq.

 

Tassa 1987-imili Brundtlandip nalunaarusiaannik taaneqartartoq piuartitsinissamik tunngaveqarluni ineriartorneq imatut allaaserisaqarpoq: Nunarsuup inui piginnaassuseqarput ineriartorneq piujuartitsinissamik tunngaveqartilissallugu. Qulakkiissallugu maannarpiaq pisariaqartitat naammassineqarnissaat kinguaarissaat siunissami pisariaqartitassaat akornusinngikkaluarlugit.

 

Rundland-ip nalunaarusiaat tunngavigalugit 1992-mi Rio de Janeiromi avatangiisit ineriartornerlu pillugit nunarsuatsinni Naalakkersuinikkut siuttuni peqataaffigineqartumi ataatsimeersuartoqarpoq. Ataatsimeersuarnermik tamatuma annertuumik nalunaarusiortoqarpoq ukiut 100-it 21-ssaannut oqaluuserisassamik AAgenda 21"-mik taaguuseqartumik.

 

Naalakkersuisut  AAgenda 21"-mut atatillugu nunat avannarliit suliaqarnerannut peqataapput. Tamatumalu inerneri ilanngunneqartumut takuneqarsinnaapput.

 

Taavalu ukioq manna naatinnagu Naalakkersuisut saqqummiutissavaat nunatsinnut piuartitsinissamut tunngaveqartumut tunngatillugu iliuusissamut pilersaarut tamarmiusoq. Kalaallit Nunaanut AAgenda 21" tungaanut ingerlatsinitsinni tamanna alloriarnerit siullersarissavaat, kisianni Naalakkersuisut pingaartippaat oqaatigissallugu Kalaallit Nunaannut AAgenda 21" tassaassanngitsoq allakkiaq immikkoorluinnartoq Naalakkersuisut naalakkersuinerata ingerlatsinerata sinneranut atanngitsoq.

 

Taamaattumik piaarinaatsoornerunngilaq nunatsinni piuartitsinissamik tunngaveqarluni ineriartornissaq pisariaqassusia. Inuuiaqatigiit aaqqissugaanerat pillugu iliuusissatut pilersaarummi eqqartorneqarmat.

Taamaattumik Naalakkersuisut isumaqarput pinnanngitsumik tamanna nanginneqassasoq Kalaallit Nunaannut AAgenda 21"-mut missingiut siulleq Naalakkersuisoqarfiit tamarmik suleqatigiinneratigut suliarineqarpat tamatumani ilaatinneqassapput aningaasaqarnermut, inuutissarsiornermut, piniarnermut, niuernermut, peqqinnermut, ilinniartitaanermut, attaveqarnermut, pilersuinermut inuillu atugarisaannut tunngasut.

 

Naalakkersuisut isumaqarput taama iliornikkut qulakkiissagipput Naalakkersuisut aningaasaqarniarneq eqqarsaatigalugu naalakkersuinikkut ingerlatsinerata qulliunerusup nunattalu piuartitsinissamut tunngaveqarluni ineriartortup siunissami pilersaarusiorfiginissaata pisariaqartumik ataqatigiinnissaat.

 

Nunarput aamma peqataassaaq piuartitsinissamik tunngaveqarluni ineriartorneq pillugu ataatsimeersuarnissami ukioq manna septemberip aallartilaarnerani Johannesborgimi pisussami.

 

Naalakkersuisut sulipput siunertaralugu nunarsuarmioqatigiit paasissagaat sumiiffimmi nunallit nunallu inoqqaavisa pisariaqartillugulu pisinnaatitaaffigigaat pisuussutinik uumassusilinnik piujuartitsinissamik, tunngaveqarluni iluaquteqarniarsinnaaneqe niuffateqarsinnaanerlu, soolu aamma WTO-p tungaanut taama suliniuteqartugut.

 

Taamatut naalakkersuinikkut ingerlatsitsineq piujuartitsinissamik tunngaveqarluni ineriartornermut tunngaviusunut naapertuutiinnarani aamma nioqqutissiat pinngortitameersut nunanut allanut tuninissaannut nunatta pisariaqartitsineranut naapertuutissaaq.

 

Piujuartitsinissamik tunngaveqarluni ineriartorneq eqqartorneqartillugu nassuerutigisariaqarparput pisussutit uumassusillit atugaanerat piffissami kingullermi maani nunami annertuumik sammineqarsimammat. Taamaattumik tamannattaaq oqaaseqarfigissavara.

 

Namminersornerullutik Oqartussat nunat tamalaat akornanni ilungersortumik sulinermikkut pisuussutit uumassusillit piniarnissaannut pisinnaatitaaneq akueritissimavaat. Tamanna ukiuni amerlasuuni suliniutigisariaqarsimavoq nunani allani sakkortuumik akerlilersorneqartarsimavugut, naallu avataaniit saaffiginnissutit ilaatigut eqqunngitsunik tunngaveqaraluartut aammalu nunatsinni pissusiviusunik paasisimasaqannginnerannik pissuteqaraluartut taamaattoq taamatut eqqartornerlugaaneq inuiaqatigiinnut kalaallinut kingunerlorujussuarsinnaavoq.

 

Qularutigineqassanngilaq pinngortitamut avatangiisinullu tunngasut aqunniarneranni piviusumik ajornartorsiuteqaratta. Taamaattumik pisuussutitta uumassusillit piujuartitsinissamik tunngaveqarluni atorneqarnissaat pillugu maannarpiaq timitalimmik iliuuseqartariaqarpugut. Maannakkut qanoq iliuuseqaanngikkutta imaaratarsinnaavoq pisuussutinik uumassusilinnik atuinerput uagut piumassuserinngisatsinnik augustimi EU-p Ilulissani ataatsimiinnerani oqallisit pingaarnersarilersinnaagaat. Tamatumap kingunerilersinnaavaa takornariat peerunnerat imaluunniit suli ajornerusoq, tassalu nunarsuarmioqatitta avammut nioqqutissiagut pisiariumajunnaaraat.

 

Pissutsini maannakkutut atuuttuni Naalakkersuisut marlunnik iliuuseqarsimapput, siullertut:

 

Naalakkersuisut Avatangiisinik Pinngortitamillu Pisortaqarfik aamma Aalisarnermut, Piniarnermut Nunaqarfinnullu Pisortaqarfik qinnuigisimavaat ajornartorsiutit pisussutit uumassusillit iluaqutigineqarnerannut tunngasut tamaasa nassuiaasiorfigeqqullugt. Nassuiaatip inernerissavaa iliuusissanik pilersaarut timitalik, tassani nalunaarsorneqassallutik pisuussutit uumassusillit qanittoq ungasinnerusorlu isigalugit piujuartitsinissamik tunngaveqarluni iluaqutigineqarnissaanut aqqutissaq. Aappaattut:

Tusagassiivik piareersarpoq nunatsinni pisuussutit uumassusillit iluaqutigineqarnerat pillugu sukumiisumik paasititsiniaaniarluni. Paasititsiniarnermi ilaatigut ilisimatitsissutigineqassaaq pisuussutit uumassusillit piujuartitsinissamik tunngaveqarluni iluaqutiginianngikkutsigit qanoq kinguneqarsinnaanersoq.

Inuit nunarsuarmioqatitsinnut ataatsimiigiarlutik angalasartut aammalu maanna pissutsit pillugit paasisitsiniaanermik annertuumik suliaqareersut kajumissaassavakka Tusagassiivik attavigisaqqullugu paasissutissanik tunuliaqutaasunik pissarsiniarlutik apeqqutaajunnaartut akissuteqartikkumallugit.

 

Erseqqissassavara pisussutit uumassusillit atorneqarneranni ajornartorsiutiviit uagut kisitta qanoq iliuuseqarfigisinnaagatsigit. Tusaamanerlugaaneq ajunngitsumik sangutissagaanni ukiut amerlasuut atortariaqarput. Qularinngivippara iliuusitigut pilersaarut paasisitsiniaanerlu pitsaasumik naammassineqarpata nunatsinni peqataasut imminnut ataqqeqatigiilissasut. Naalakkersuisut neriupput nunarput piujuartitsinissamik tunngaveqartoq pillugu suliniutit tamarmiusut oqallittarnitsinnut aalajangiisarnitsinnillu tunngavissanngorluarumaartut.

 

Soorlu siusinnerusukkut oqareersunga Naalakkersuisut Inatsisartunut ilaasortat isumaqatigaat piujuartitsinissamik tunngaveqarluni ineriartorneq oqariartaasiuinnassanngimmat. Piviujuartitsinissamik tunngaveqarneq inuiqatigiinni sumiluunniit patajaatsumik tunngaveqartariaqarpoq. Taamaattumik suliniutit ilanngussami takuneqarsinnaasut Naalakkersuisut aallartippaat. Naalakkersuisut neriuutigaat suliassaqarfinni assigiinngitsuni suliniutit tamarmiusut nunatsinnut piujuartitsinissamut tunngaveqarluni ineriartortumut nuna tamakkerlugu ilioriusissamik siunissami attassiinnarnissamut iluarsiisarnissatsinnullu, oqaloqatigiittarnissatsinnut aalajangernissatsinnullu tunngaviussasut.

 

Neriuppunga suliniutit tamakkua kingunerannik nunarsuarmioqatitsinni suleqatigisatsinni ataqqineqarneq pilersinneqassasoq, eqqaamaannassavarpulli imaassinnaanngimmat nunatsinnut sinniisutut nunani allaniikkaangatta allatut oqalussasugut maaniikkaangattalu allatut oqalulluta.

 

Lars Karl Jensen, ataatsimiinnermik aqutsisoq.

Naalakkersuisut siulittaasuannut qujavugut. Taavalu partiit Kattusseqatigiit attaviitsullu oqaaseqartuinut ingerlaqqikkutta tulliuppoq Siumup oqaaseqartussaa Ruth Heilmann. Takanna.

 

Ruth Heilmann, Siumup oqaaseqartua.

Qujanaq. Nunatsinni piujuartitsinissamik tunngaveqarluni ineriartortitsisoqarnissaanik Naalakkersuisut siunnerfiata apeqquteqaat aallaavigalugu oqalliseqarnissamik siunnersuut.

 

Qangarsuaaniillu nunatsinni inuusut nunap pissarititaanik aallaaveqartumik atuisuullutik inuusimapput. Atorluaaneq aallaavigivaat piniapilunneq naluaat. Eqqaaginnartigu puisi tamaat iluaqutissartaa atorpaat nerisaralugu, atisaralugu, tuperalugu, qaammaqqutigalugu, qaanniaralugu, umiaralugu, sakkussussiaralugu allaat aamma meeqqat pinnguaannik aliikkutasssaannik pilersitsiffigisarlugu. Tassa atorluaaneq pinngortitap pissarititaanik aallaaveeqartut. Inooqatigiit arnaq, angut ilaqutariillu ikioqatigiilluinnarlutik ullaamiit unnummut puisi aallaavigalugu ukkataqartarput. Taamatut atugaqartut pilluarneq angusarpaat eqiasuikkunik ikioqatigiilluarunillu. Nuna imarlu inuussutissaqarfigalugu atugartik paarilluinnartuuaat nakkutigilluinnarlugulu, taamalu piniagassat aqullugillu malittariuarpaat.

 

Taamatut Siumumiit aallarniilluta piujuartitsinissamik oqallisissiamut oqaatiginiakkagut aallarniuteqartippagut siuligut eqqaaniarlugit ataqqinarluinnartuummata, nunamik allanngujuitsumik takusassaqartillutalu atugassaqartilersimammatigut. Kinguaariimmi kalaallit aamma kulturertik attattuinnarsimavaat piniartuunermik inuuniuteqarnertik ingerlakkamikku ukiorpaat. Piniarnermit aalisartuunermut ikaarsaariarneq aallartimmat aningaasaq naalaganngortinneqarpoq. Saarulliit niuernikkut nunamut ineriartortitseqataalerput tammakarnissartik tikillugu.

 

Maanna kinguppaat qalerallillu nalaanni inuuvugut qaleruallillu ilaatinneqalerput aningaasarsiutaallutik nunatsinnut napatitsiniutaalerlutik. Suliffissuaqarnermut ikaarsaariarpugut. Ilaqutariit ataatsimoorniarnertik ajornartorsiutigisalerpaat. Suliffik nakkutigilluagassaavoq, meeraq immineertinneqalerpoq ilaatigut allaat piffissaqarfigineqarnissaminut amikkisaartunngorsimalluni.

 

Inuiaqatigiit inuunerat qangamut uuttuullugu allanngoriartuinnarpoq. Ullumikkut killiffeqarpugut atorluaanermik ingerlatsiniarnitsinni tamakkiisuunngitsumik nunatta pissarititaanik atorluaannginnatta. Nutaartugassaqarniartuuvugut aammalu piniapilunneq ingerlallugu siulitsinnik kingornussarisarput imaaliinnarlugu aatsinnik timitsinnillu peersinneqarsinnaanngimmat.

 

Inuiannut allanut attaveqalersimavugut, qallunaat nunaat attavigaarput pilersorneqarnitsigullu pisiassarpassuit nalaanni inuulluta nunarsuarmioqatigiinnut attaveqarnerulersimagatta piorsarsarsimassutsikkullu pissutsinut nallersuukkumalluta malittariniarlugillu ilungersorumalluta siunnerfeqarsimavugut.

 

Siumut pilersinneqarmalli piujuartitsinermik isummat pingaartillugit anguniakkamini suliniaqataaffigai ullumimut taamatut ilungersuuteqarluni ingerlatsilluni. Tamanna pingaaruteqarpoq kinguaariimmi nunatta pissariritaanik ullumikkutut pilluaatigisatsinnik pissaqartittuassgutsigit nungukkiartuutaanngitsumik silatusaartumillu atuineq ingerlattuartariaqaratsigu. Mianersortumik iliuuseqartarluta ingerlanissarput tamatta isumagaarput. Inuit kikkuugunilluunniillu paaseqatigiillutik akaareqatigiilluinnarlutillu tamanna angusaqarfiginiartariaqarpaat.

 

Taamaattumik Siumumiit Pinngortitaleriffimmik aamma piniarnermut nakkutilliisunik pilersitsineq siumut ingerlariarnertut isigarput avammullu attaveqarnitsinnut sakkuullunilu iluaqutigineqarnera maanna ersarissunngoriartormat nuannaarutigaarput. Siumumiit pingaartitaraagut piniartut maanilu najugaqartut ilisimasaat aamma tusaaniartassallugit. Tamanna bilogit aamma atorluartariaqarpaat. Piniartut taakkuupput pinngortitamut qanilluinnartumik malittarinnittut taamaattumillu ilisimasarsuarnik ulikkaartut.

 

Nunatta pinngortitallu eriagisariaqarnerat pillugu Inatsisartunut ilaasortaq Ruth Heilmann, Siumut saqqummiussaqarnera naapertorlugu Inatsisartuni ippassannguaq nuannersumik oqallippugut taamatut pinngortitamik uumasunillu atuinerit pisinnaatitaaffillu pillugit inatsisiliornerit 1980-mi pisut nutarsarniarneqarmata ataatsimoortinniarneqarlutik. Siumumiit isumaqarpugut taamatut inatsisiliortoqartillugu pipallataanatik peqqissaaarluinnartumillu tusarniagassat tamaasa piffissaqartilluarlugit ingerlanneqartariaqartut innuttaasut tikillugit isumaat tamallu oqartussaaqataanerat aallaavigalugu oqallinnerit isumasiuinerillu ingerlanneqartariaqartut.

 

Pisortaqarfiit susassaqartut kommunet KANUKOKA-lu peqataatilluinnarlugit aalajangersagassat paaseqatigiilluarnikkut ilusilersorneqartarnissaat pisariaqarluinnarpoq. Tamanna pingaarpoq paaseqatigiittoqartillugumi illuatungeriinnut toqqissisimanarnerusarmat. Nuanniinnerpaasarpormi piniagassat pillugit akerleriittoqartillugu. Tamanna aamma siulitsinnik oqaluttuani nalunngilarput. Taamatut kukkusumik pisoqaraangat piujuaannartitsinissamik isuma aatsaat tassa oqaasiinnanngortarpoq, soorlulu anguniagaq pissusissaanngitsumik ungasinnerulersinneqaannartarluni. Tamanna pinngitsoortilluinnartariaqarpoq tamannalu uagut inatsisiliortut pisussaaffigaarput pitsaanerpaamik angusaqarfiginiassallugu.

 

Siumumiit Naalakkersuisut iliuusaat piujuartitsinissamillu suliniutaat isumaqatigilluinnarpagut suleqataaffigalugillu. Avatangiisinut Pinngortitamullu Pisortaqarfik aamma Aalisarnermut Piniarnermullu Pisortaqarfik peqquneqarmata pisuussutinut uumassusilinnik iluaquteqarniarnermut pissutsinik nassuiaateqarfiginissaannik. Siumumiit Eqqisisimatitsinermut Avatangiisinullu Ataatsimiititaliamut aamma taamatut piumasaqaateqarsimavugut oqaloqatigiinnerit isummersoqatigiinnerillu ingerlallugit.

 

Siumumiit isumaqarpugut aamma Aatsitassanik Pisortaqarfiup annerusumik peqataatinneqarlunilu nassuiaateqartinneqarnissaa aamma pisariaqartuusoq. Pisuussutit uumassusillit pillugit isumasiuineq ingerlanneqarmat kommunet pisinnaatitaaffeqarnerulernissaat aamma piumasaqaataavoq. Siumumiit isumaqarpugut sineriassuaq taamatut annertutigimmat pissutsillu kommunemiit kommunemut assigiinngeqimmata kommunet piniagassanut aqutsinissaminnik pisinnaatitaaffeqarnerunissaat pisariaqarpoq, tamannalu KANUKOKA peqatigalugu ingerlanneqartariaqarpoq.

 

Pinngortitamik eriagisaqarneq uumasuinik, naasuinik, ujaqqanik allarpassuarnillu allanngutsaaliuineq ingerlattuarniarlugu Naalakkersuisut iliuuserisaat tapersersornartuuteqaagut aammalu paasisitsiniaaneq suli annerusup ingerlanneqarnissaanik anguniagaqarnermi atorfinitsitsineq Siumumiit isumalluarnartutut isumaqarfigaarput. Piujuartitsissaguttalu aallaavigisariaqarpagut meeqqat, taamaattumik Atuarfitsialak aqqutigalugu inerisaanermi pinngortitamik atuinermik ilinniartitsissutigineqarnera suli annerusumik pimoorunniarlugu iliuutsit aallartinneqarnissaat Siumumiit kaammattuutigaarput. Aammalumi Naturskolemik pilersitsinissamik Siumumiit siunnersuuteqarnikuunerput matumuuna piviusunngortinniarlugu Naalakkersuiusut matumuuna suliniuteqarnissaannik eqqaasinniarpagut.

 

Siumumiit isumaqarpugut pinngitsoorata folketingimi ilaasortaatitavut qallunaallu nunaanni folketingi aqqutigalugu inuiaat allat nunatsinni pinngortitamik atuinitsinnik iluaquteqarnitsinnillu suleqatigimmut avammullu paasisitsiniaanerat peqataaffigisinnaagaat. Ataatsimiititaliamiillu nalunngilarput qallunaat nunaanni aamma taamatu soqutigisaqartut allaat nunatsinnut paasisassarsiorlutillu malittarinninnissaminnut.

 

Siumumiit isumaqarpugut nunarput inuisalu kulturiannik paasisimasakippallaartut amerlavallaarput nunarput pillugu kukkusumik ingasattajaartumillu avammut nalunaaruteqartartut, tamannalu pinngitsoortinniarlugu annertuumik suliniutit aallartinniarlugit kaammattuutigut Siumumiit peqataaffigissallugit piareersimavugut.

Siumumi isumaqarpugut nunanut allanut nunanilu avannarlernut suleqatigiinneq suli annerusoq ersarinnerusorlu ataqatigiinnerusumik ingerlanneqartariaqartut Nunanut Allanut Tunngasunut Allaffeqarfik annertusillugu immaqa International Center taamatut taaguuserlugu suliniarneq eqaannerusoq nukissaqarfiunerusorlu pilersissinnaagipput isumaqaratta matumuuna eqqarsaatigeqqullugu Siumumiit pilersinneqarnissaa suliniutigillaqquarput.

 

Taamatut oqaaseqarfigaarput Asii Chemnitz Narup, Inuit Ataqatigiit, piujuaannartitsinissaq pillugu oqallisissiaa Naalakkersuisullu akissutaat sukumiisutut isigalugu qujassutigaarput. Qujanaq.

 

Godmanf Jensen, Atassutip oqaaseqartua.

Piujuartitsinissamik nungusaataanngitsumillu tunngaveqarluni ineriartortitsisoqarnissaannik Naalakkersuisut siunnerfiat ullumikkut aammalu siunissami. Apeqquteqaat aallaavigalugu oqallinnikkut ersarissumik paaserusunneqarpoq. Atassummiit maluginiarparput siunnersuuteqartup siunnersuuteqarnermini siunertarigaa Inatsisartunit Naalakkersuisunillu ataasiarani oqaatigineqartarmat nunatsinni ineriartorneq nungusaataanngitsumik atuinermik tunngaveqartariaqartoq ullumikkut qanoq oqaatigisariaqarnersoq killiffillu pillugu qanoq nassuiaasoqarnersoq.

 

Siunnersuuteqartup oqallisissiamik suliaqarnermini malunnarpoq Brundtlandip nalunaarusiaa 1987-imeersoq tunngaviginiarsimagaa. Siunnersuuteqartup siunnersuuteqarnermini tikkuarniagaasa ilagaat nalunaarusiaq oqaatigineqareersoq misissorluaraanni pingasunik sukalittut oqaatigineqarsinnaasutut taaneqarsinnaasoq. Tassa siullermik aningaasarsiorneq, avatangiisit taavalu inooqatigiinnikkut sianigisassat. Atassummiit oqaatigissavarput anguniagassatut tikkuarniarneqartut isumaqatigilluinnaratsigit. Oqartariaqarpugut qangaaniilli ilisimariikkavut nalunaarusiakkut oqariartuutigineqartut angusaqarfiginirnerini innuttaasugut immaqa annikippallaamik uatsinnut piumaffigisartugut, tassa pisuussutinik uumassusilinnik nunamillu atuinitsinni.

 

Atassummiit maluginiarparput Naalakkersuisut akissuteqarnerminni nalunaarusiaq oqaatigineqareersoq aamma annertuumik tunngaviginiarsimagaat. Aammalu piujuartitsinissaq siunertaralugu suliniuterpassuit nunatsinni aamma nunatta avataani eqqartorneqarlutik. Isumaqarpugut tassuuna takusinnaallutigu nunarput avatangiisivullu pillugit suliniarnerit ilungersortumik patajaatsumillu ingerlanniarneqartuartut.

 

Atassummiit isumaqarpugut siunnersuutigineqartoq aamma Naalakkersuisut akissuteqaataat imminnut assortuutinngitsut, oqariartuutigineqartullu tunngavigalugit innuttaasugut tamatta akisussaaffik pigisarput paasilluarnerusariaqaripput nunatsinnik uumasuinillu atuinitsinni.

 

Naggataatigut oqaatigissavarput maluginiaratsigu oqallisissiatut siunnersuut aamma Naalakkersuisut akissuteqaataat assortuutinngimmata. Atassummiit isumaqarpugut Naalakkersuisut akissuteqarnerminni oqariartuutaasa ilaat, tassa augusti qaammat pernaataasumik EU-p Ilulissani ataatsimiinnissaani pissanngatigineqartumi peqataasussat inuiaqatigiinnit oqartariaqarpugut inuiaqatigiinnit neriulluarfigineqartut naatsorsuutigineqarpoq pisussaaffiligaanertik paasisimalluarlugu ataqqinassuseqartumik nunarput asasarput pinngortitaq suli ullumikkut minguinnerpaat ilaattut oqaatiginiarneqartartoq tummaaralugu inuiaqatigiinnillu kalaallinik tapersersorneqarneq uummammiugalugu peqataalluarumaartut.

 

Atassummiit taamatut oqaaseqarluta nungusaataanngitsumik atorluaanermik tunngaveqartumik ineriartortitsinissamik siunnersuut isumaqatigigatsigu oqaatigissavarput, taamatullu Naalakkersuisut akissuteqataanaannut qanoq isumaqarnerput tapersersuinerpullu taamatut sammivilerlugu oqariartuutigaarput.

 

Josef Motzfeldt, Inuit Ataqatigiit oqaaseqartuat.

Inuit Ataqatigiit sinnerlugit Inatsisartuni ilaasortaq Asii Chemnitz Narup oqalusserisassamik matuminnga piffissaq naleqquteruttortoq saqqummiussivoq. Brundtlandip nalunaarusiaata saqqummerneranit ukiut 15-inngorput, Riomi ataatsimeersuarnermit ukiut qulit qaangiupput. Nunatsinni pinngortitamik uumasuinerput maani nunanilu allani sammineqaruttorpoq qanorlu iliuuseqarnissatsinnik isumassatsialannik nassaarniarluta aalassassimaaruttorpugut. Iliuuserineqarnissat iliuuseqarnissat nunatsinni ilisimasaqaqatigiinnissamut sammiveqartut aamma iliuuseqarnissat avatitsinni nunat allat inuinut paasissutissiiniartussat. Aammami Naalakkersuiusut siulittaasuata nunani avannarlerni ministeriunernik piujuaannartitsinissaq siunertaralugu 1998-mili atsioqateqarneranit annertunerusutigut atsioqatigiinnerit timitaliiviginissaanut Inatsisartut isumasinneqaratillu namminneq sassartaaruteqarsimanngillat. Taamaattumik "Kalaallit Nunaanni pinngortitaq inuulluarit"-mik taasaminik aviisiliortup Keld Hansenip atuakkiaa kisiat pissutiginiartariaqanngilarput persuarsiornartunik atsioqatigiinnerit kinguneqartinnissaannut suliniuteqavittariaqalernitta pisariaqarsimaneranut. Atuakkiaq qanorluunniit eqqunngitsortaqartigigaluaruni oqaatsinut arlariinnut nutserneqareerami nunatta uagullu inuiaat isigineqarnitsinnut nalilersuiniarnermut sunniuteqartussaammat tamanna qularissanngilarput.

 

Ippassigamilu oqaluuserisassani immikkoortoq 86 oqaluuserigatsigu akissuteqaamminnut ilanngullugu Naalakkersuisut saqqummiuppaat immikkut aviisiliaaralersaakkaminni suut allaaserilersaarnerlugit. Inuit Ataqatigiit tamanna immikkut pingaarnertut uparuarnianngilarput. Taamaattoq qeqqaniit imaluunniit qulaaniit ima imalu isumaqarnerinnartut nipilimmik saqqummiiniarnerup kingunereratarsinnaasai isumaliuutigilluarneqartariaqartut isumaqarpugut.

 

Aamma pingaaruteqarpoq pinngortitap uumasuisa naasuisalu qanoq suujunnaarsitsinngitsumik atorluarneqartariaqarnerannik inatsisip nutarterniarnerani innuttaasut tamatta peqataanissarput, tamatuma ilumut siunertarineqartutut sunniuteqarluarnissaanut tamatta isummersoqataanissarput pisariaqarmat. Taamatummi periuseqarnerup paatsooqatigiissinnaanerit kingorna paaseqatigiissutiginiarlugit nukippassuatsiarsuarnik atuiffiusinnaanera pinngitsoortinngikkuniuk annikillerujussuarsinnaavaa. Uagullu Inatsisartuni inatsisiliortutut annertuutigullu inuiaqatigiinnut nunattalu avataanut kinnertartuuniartussatut nunarpullu sinnerlugu nunat tamalaat akornini suliniarnerni isummersortaasartutut aalajangersakkat sunut sammiveqarnissaat isummersoqataaffigalugillu ilisimalluinnartariaqarpugut.

 

Taamaattumik Inuit Ataqatigiit neriuutigaat oqaluuserineqartup matuma aamma Naalakkersuisut atuagassianngorlugu saqqummersitassaannut sunniuteqarsinnaanera aamma periarfissinneqarpoq matumuuna.

 

Inuiattut nammineerusuttutut ima inerisimatigisariaqarpugut nassuerutigisinnaassallugu ukiuni kingullerpiani pinngortitap attassinnaasai akimorlugit ilaatigut atuilersimagatta. Tamanna assigiinngitsorpassuarnik pissuteqarpoq, siullermik: Nunarsuarmi naalagaaffissuit pinngortitamik minngersaanerata kinguneranik silaannaap allanngoriartorneranik uumasunik nujuartanik tunisassiaqarsinnaanerup killeqassusianik imaluunniit killilersugaassusianik, nunat tamat akornanni piujuaannartitsinissamik isumaqatigiissutit killiliinerannit, piniarnermik inuutissarsiuteqavissut saniatigut angallatigissiartorneq peqatigalugu pinialunnissamut periarfissaqartut amerlanerujussuanngorsimanerannit kiisalu uumasut pisarineqartut tamakkiinngitsumik atorneqarnerannik. Tamakkuuppullu ullumikkut piniartuunerup aningaasartuutinut malinnaasinnaajunnaarsimaneranut pissuterpiaa.

 

Taavami uumassusillit eqqarsaatigalugit piujuaannartitsinissaq ilumut periutsitut atortariaqaratsigu qanoq iliorsinnaavugut? Killilersuinerit piffissami aalajangersimasumi uumasut ataasiakkaat piniarsinnaatitaanerisigut qanoq amerlatigisunik pisaqarsinnaanerup atuutinneratigut nunap immikkoortuini pissutsinut naleqqussarsimasunik eqqissisimatitsinermik aalajangersagaqarnikkut, nunaminertanik uumasoqatigiit najugannaavinik eqqissisimatitsineqarnikkut, uumassusillit pisarineqartut iluaqutissartaasa tamakkiinerpaamika tornerisigut, piniarnermik inuussutissarsiuuteqarnerup tapertarisinnaasaanik isertitsissutaasinnaasunik aqqutissiuussinikkut il.il.

 

Tamakku ilaat Inatsisartuni pineqartumut susassaqartut kattuffiit, soqutigisaqaqatigiiffiit, nunaqqatigiit allaammi innuttaasut sapinngisamik annertunerpaamik paaseqatigalugit ingerlanneqarsinnaapput. Aamma ilaqarput iliuuserisassanik nunap immikkoortuini innuttaasut qanimut qinigaasa isumagisassaannik pissutsit qanimut ilisimasatik toqqammavigalugit.

 

Qujanartumik ullumikkut soqutigisaqaqatigiittut peqatigiiffeqartitsineq eqeersimaarfiuvoq. Aalisartut piniartullu kattuffeqareerput, saniatigooralugu pinialuttartut taamatut, peqatigiiffeqarpoq "Timmiaq" nutaajunerpaatullu peqatigiiffik "Uppik" pilersinneqaqqammerpoq pinngortitamik avatangiisinillu soqutigisaqaqatigiiffittut sammisaqartut.

 

Tamakku taareerlugit Inuit Issittormiut Kattuffiat issittumi avatangiisinut suliniuteqarnermigut nunarsuup sinnerani tutsuviginartumik suliniuteqarnermigut malugineqarluatoq taasariaqarpoq, soorunalimi Inatsisartut Eqqissisimatitsinermut Avatangiisinullu nammineq ataatsimiititaliarput. Tassaavoq uagut Inatsisartuni isummatsinnik anitsiviusartoq apeqqutini tamakkunani avammut kiinnertarfipput.

 

Naalakkersuinikkut ilumut qanoq iliuuseqartariaqaleratta piffissanngorpoq, taamaattumik soqutigisaqaqatigiiffiit siuliani taagukkagut nukippassuatsiarsuit tamakkerlutik nunatta iluinnaani pinnatik assigiinngitsorpassuarnik nunatta avataani attaveqartut kattullugit paaseqatigiinnikkut sunniuteqarnerpaamik nunatsinni ataatsimoortumik pinngortitamik atuilluarnissatsinnut isummanik katersitinneqartariaqarput. Taamaattumik pinngortitap illersorneqarneranut inatsisip nutarterneqartariaqarnerata piareersarnerani isumasioqatigiinnissaq siunertaralugu nunatsinni nunattalu avataani pinngortitamik atuilluarnissamik siunertaqartut suleqatiseralugit aningaasanik pissarsiniarnissat Naalakkersuisut siunnerfigissagaat Inuit Ataqatigiit siunnersuutigaat.

 

Minnerunngitsumimmi nunanik qanigisatsinnik suleqatigiiffigeriikkavut matumani suleqatiserineqarsinnaasut arlaqarput, soorlu: Issittumi siunnersuisoqatigiit Arctic Council, Nunat avannarliit siunnersuisoqatigiivi Nordisk Råd, Nunat avannarliit killiit siunnersuisoqatigiivi Vestnordisk Råd, Pijuaannartitsineq pillugu Inatsisartut nunani tamaneersut suleqatigiiffiat SUPO, Atlantikup avannaani miluumasut imarmiut pillugit isumasioqatigiiffik NAMCO allallu kingullermik ukiakkut ataatsimiinnermi Naalakkersuisut nunanik allanik attaveqarneq pillugu nalunaarusiaanni piukkunnarnersiorneqarsinnaasut.

 

Ullumikkut annernartortaqarsinnaasunik aalajangiinissami qanga 70-ikkunni qassutinik tissukartittagarpassuarnik atuilluni kapisilinniarneq, helikopteriaqqat innanik timmissat erniorfiini qaninngoortarsimaneri, umiarsuit ilaasortaatit innani timmissat piaqqiviisa saannguini siggartaamminnik nilliatitsisarsimaneri, Europami, Amerikami avannarlermi, Ruslandimi akuutissat sinnikuinik kuussuartigut aniatitsinermikkut aamma naalagaaffissuit silaannarmik minngersaanermikkut uumassusilinnut annertuumik akornusiisimanerisa qanorluunniit ilumoortigigalutillu ajoqusiitigisimagaluarnerisa uumassusilittut pisuussutitsinnik nakkutigilluakkamik killilersuinikkut atuisariaqalernerput pinngitsoortissinnaanngilaa.

 

Avatangiisinut illersuiniarnermi aalajangersakkat uumassusilinnillu tunisassiaasinnaasunik killilersuilernikkut namminersornerunerup atuutilernerata kingorna iliuuserineqarsimasut naalagaaffiup nakkutilliisimaneranit iliuuserisarsimasaannillu malunnaateqartumik annertuseriarsimagaluarput. Pissutsilli ullumi atuttut takutippaat tamakku annertuutigut naleqqussarneqaqqittariaqalersut.

 

Nunatsinni nammineq atuinitta nakkutiginissaanut toqqammaveqarlutalu aalajangersaasarnissatsinnut pinngortitamik uumasuinillu paasissutissanik katersiveqarnissap Pinngortitaleriffimmit aallunneqarnerulernissaa periarfissinniartariaqarparput. Paasissutissat tamakku qaqugukkulluunniit nunat tamat akornanni suleqataanitsinni aamma sakkussatsialaapput, oqaluttuarisaanitsinnimi ukiut kingullerpaaginnaat misilittakkatta takutereerpaat paasissutissanik tamakkuninnga katersaqarneq qanoq pingaaruteqartigisoq, soorlu aalisagartassanik nunanik sanilerisatsinnik aalajangersaaniarluni isumaqatigiinniartarnitsinni misilittagaqarfigilereerparput kisitsisinik ilisimasanillu allanik uppernartunik peqarneq qanoq nukittoqqutaatigisarnersoq.

 

Naalakkersuinikkut qinikkatut biologit uumassusilinnillu inuuniuteqarlutik pissutsinik qanimut misilittakkamikkut ilisimasaqartut piniartut akornanni unammisitsiniarnertut nipeqarsinnaasartumut akulerunnaveersaartariaqartugut isumaqarpugut. Qinikkat apeqqummi matumani immikkut pineqartut tamaasa atorfissaqartikkatsigit isumaasa assigiinngissinnaasut naapisinniarnissaat pisussaaffitta pingaartut ilagaat.

 

Ulluimikkut ilisimasatsitut Pinngortitaleriffiup siulersuisuini, sinniisoqarfiani aamma Nalakkersuisut aalisarnermut aamma piniarnermut siunnersuisoqatigeeqartitsineratigut pineqartut naapinnissaminnut periarfissaqareeraluarput, tamakkuli biologit uumasorniarnermillu inuuniuteqartut akaareqatigiillutik suleqatigiikkiartornerannut kigaakkaluamik sunniuteqarput, taamaattumik siunnersuisarfimmik Naalakkersuisunut Inatsisartunullu attuumasuusariaqanngitsumik ikaarsaariarnermi pilersitsisinnaaneq susassaqartut akornanni isumaliuutigeqqussavarput. Tamannalu periarfissatsialattut nalilerneqaruni aggersaanissamut siullermut KNAPK Pinngortitaleriffiullu siulersuisui isumaginnittuussasut isumaqarpugut.

 

Ukiuni untritilinni maanna atukkatsinni pinngortitamik atuinitsinni najoqqutassamik nunarsuarmioqatigiit peqataaffigisaannut Agrmfs 21-mik taaneqartumut immersuinissami Naalakkersuisut nunat avannarlernik peqateqarnerarput suliarlu ataatsimut isummerfigineqartussaanerarlugu ukiup matuma naannginnerani pissasoq.

 

Inuit Ataqatigiit isumaqarput Agenda 21 innuttaasut peqataaffigisaannik  isummerfigineqartariaqartoq, taamaattumik isumasioqatigiinnissamik siusinnerusukkut oqarnitsitut piviusunngortitsinissaq suliap pineqartup naammassinnginnerani pisinnaassasoq Naalakkersuisunut siunnerfigeqquarput., siunnersuuteqartummi Asii Chemnitz Narupip tunngavilersornermini inuiaqatigiit aaqqissugaanerat pillugu iliuusissatut pilersaarummit issuagai ilumoorpoq ima allassimammat: "Pingaartinneqassaaq sutigut tamatigut avatangiisit isiginiarneqartarnissaat piviuartitsinissamillu tunngaveqarluni ineriartortitsinerup akulerutsinneqarnissaa tunngaviit pingaarnerit ilagissagaat. Taama tunngaveqarneq susassaqartut qanimut suleqatigalugit Naalakkersuisut ineriartortinniarpaat."  Matumanilu susassaqartut pingaarnerpaat Inuit Ataqatigiit isumaat malillugu tassaapput inuiaqatigiit sulinitsinni toqqammavigisagut.

 

Uumassusilinnik atuinerup aalajangersaaffigineqarnerata nutarternissaani makku aallutassat pingaartut ilagilluinnarpaat:

Uumassusillit nunatsinni tamavimmi nalunaarsoqqissaartariaqarnerat.

2.                      Silaannaap allanngoriartornerata uumasut nerisaqaqatigiinnerannut sunniutaasa nunat tamat akornanni sulinermi aallunneqarnerulernissaat

Nunat qanigisat suleqatiginerisa annertusaavigineqarnissaat.

Isumalluutit uumassusillit tamarmik ataqatigiissumik aqunneqartariaqarnerat, tamatumani siunnerfigalugu pinngortitap isumannaatsuunissaa, minguitsuunissaa aamma uumasut ataatsimoorlutik najugannaavisa, soorlu piaqqiorfiisa innimigisariaqarneri.

Piniartuunerup imminut napatissinnaasumik ingerlanneqarsinnaasunngortinnissaa atoarluaanerunikkut oqareernitsitullu tapertarineqarsinnaasunut aqqutissiornikkut minnerunngitsumillu uumasut suugaluartulluunniit nungusaataanngitsumik atuinermik tunngaveqarluni pisarineqartut nunat tamat akornini niuerutaasinnaanerisa nunat akornini suliniaqatigiiffinni paasineqarnissaata sulissutigineratigut, matumani USA-mi inatsit pukutsutsinniititarput tassaavoq Marine Mammal Protection, MMPA, inatsit USA-mi atuutsinneqartoq.

Nunatta immikkoortuini ukiup kaajallakkiartornerani uumassusillit ataasiakkaat piniartukkormiut aningaasaqarniarnerannut pingaaruteqassusiat misissussallugu, tamatumani nammineq pisarineqartunik atortoqarnikkut nerisaqarnikkullu pissarsiat nalingisa misissuiffigineqarnissaat ilanngullugu, kiisalu piniakkanik nakkutilliinermi innuttaasut qanoq pisussaaffilerlugit peqataatinneqarsinnaanerat.

 

Piujuartitsinissamik ineriartortitsinissamik oqaraangatta avatangiisit pinngortitap piniakkallu kisiisa uitsatiginiartarpavut, matumanilu oqaaseqarnitsinni apeqqut tamannarpiaq annertunerpaamik sammivarput pissutsit ullumikkorpiaq atuuttut tamanna pisariaqartimmassuk. Piujuartitsinissamilli oqaluuseqarnermi taamatulli pisariaqartigaaq eqqaamassallugu inuiaqatigiit aningaasarsiornerat inooqatigiissutsikkullu pissutsut ilanngullugit eqqaamajuartariaqarnerat, soorlu Brundtlandip nalunaarusiaani tamakku pingaartinneqartut.

 

Suliniutit aallartisarneqartut ingerlaqqinnissaannut Inuit Ataqatigiit peqataaffigissavagut matumanilu saqqummiussarput aallaqqaataannaavoq. Neriutigaarput ukiuni 2100-ukkunni nunatta iliuuserisinnaasaattut pingaartitat ukiakkut ataatsimiinnissami Naalakkersuisunut saqqummiunneqassasut.

 

Taamatut oqaaseqarluta Asii Chemnitz Narupip siunnersuutaa oqaaseqarfigaarput.

 

Anton Frederiksen, Kattusseqatigiit oqaaseqartuat.

Qujanaq. Inatsisartunut ilaasortap Asii Chemnitz Narupip siunnersuutaa minnerunngitsumillu aamma Naalakkersuisut akissuteqaataat tassungalu tunngatillugu ilanngussat paasissutissallu assigiiinngitsut Kattusseqatigiinniit soqutigalugit misissorsimavagut imaattumillu oqaaseqarfigissallugit.

 

Siullermik oqaatigissavarput Kattusseqatigiinni pingaartilluinnaratsigu Kalaallit Nunatsinni inuutissarsiornikkut, aalisarnikkut, piniarnikkut, aningaasarsiornikkut, pilersuinikkut, ilinniartitaanikkut allatigullu ulluinnarni inuuniarnermut tunngassuteqartutigut atugassarititaasut assigiinngitsut nunatsinni pissutsit piviusut tunngavigalugit ingerlanneqarnissaat soqutigilluinnaratsigu. Minnerunngitsumillu aamma kalaallit uagut piorsarsimassutsikkut inissisimanitta nunarsuarmioqatitsinnut allanut arlalitsigut assersuunneqarsinnaannginnerput pissutigalugit aammalu nunarujussuatta nunarsuarmi qeqertat annersaanni pinngortitami ilaatigut inuutissarsiornikkut inuuniarnikkullu ilungersunarsinnaasumi illoqinartorsiorfiusartumilu inuusugut ukiuni kingullerni ilaatigut Europa-miunit nunarsuarmioqatitsinnillu allanik annertuumik sunnerneqarsimalersimasugut assigiinngitsutigullu tatineqarsimasugut nassuerutigalugulu oqaatigisariaqaratsigu qanga kalaallit inuuniarnikkut piorsarsimassutsikkullu atugarisimasaat ullumikkumut ukiunullu kingullernut naleqqiullugit allannngorsimaqimmata.

 

Ileqquliussallu nutaat ajunngitsorpassuarnik aamma ilallit kisianni aamma nuanninngitsunik akoqarlutillu nalaataqarfiusartut inuuffigilersimasagut qanorluunniit piumanngitsigigaluarutta inuusaasatsinnullu ilanngussimasut nassuerutigisariaqarpagut.

Taamaammat kalaallit uagut qangaaniilli nunami maani inuusugut uatsinnut pinngortitamullu atugassarititaasunut naleqqussartuarluta inuusimasugut ukiorpassuarnilu nuna manna inoqartissimasarput pissutsini ukiunilu nutaajusuni naleqqussarluarlutalu pinngortitamik uumasuanillu aamma mianerinnilluta atorluaanitsigut nunarsuarmioqatitsinnut assuarnaatsumik ammasumik kusanartumillu ingerlaqqissinnaasugut Kattusseqatigiinniit qularutiginngilarput. Naak ineriartornermi sukkasuumi imaannaangitsunik ilungersunartunillu nalaataqartarsimagaluarluta.

 

Taamaammat tamatta suleqatigiittariaqarpugut! Soorlu siuligut aamma taama iliorsimasut.

 

Nalunngilarput tamanna anersaaq aamma suli pigineqartoq. Tassami siuligut sapiissuseqarlutik suliassanut suugaluartunulluunniit pikkorissuseqarlutik ingerlatsisimapput uagut kingulliit nuannaarutigiuagassatsinnik.

 

Mannalu iluatsillugu siulitta ilaata taalliamini oqaatsit uku atorsimasai isuaaffigilaarniarpakka imaattut: Saperuttaassusermik peqarput taamanikkut ingerlatsisut. Issuaaneq naavoq.

 

Tassami Kattusseqatigiinni isumarput naapertorlugu pissutissaqarluarpugut siulitta sapiissuseqarluarlutik ikioqatigiillutillu ingerlatsisimanerat nuannaarutigalugulu tulluusimaarutigissallugu.

 

Taamaattumik nunatta inuisalu pitsaanerusumik inuuniarnikkut periarfissinneqarnissaannut aammalu pinngortitarsuup uumasullu isumatuumik atorneqarnissaannut pissutissaqanngilagut nukippassuit assortuunnernut isumaqatigiinnginnernullu atussallugit.

 

Taamaattumik Kattusseqatigiinniit anguniakkanut ajunngitsunut suleqataanissatsinnut piareersimalluta assammik isaassivugut. Makkuninngalu aamma anguniagaqarnitsinnik ilanngullugu ilisimasitserusulluta.

 

Kattusseqatigiinniit anguniakkatta aamma pingaartut ilagaat inuttut isumalluutitta ilinniartitaajuarnikkut pitsanngorsaanikkut inuiaqatigiit timikkut anersaakkullu piginnaanngorsartuarnissaat aamma anguniarlugu minnerunngitsumillu aamma meeqqat atuarfiisa ilinniartitaanerullu suli annertunerusumik pitsanngorsaavigineqarnerisigut meerartatta pitsaasumik atugassaqalernissaat qulakkeerumallugu.

 

Aammalu qaammarsaanikkut paasisitsiniaanikkullu inuuiaqatigiinni ilisimasat ilisimasariaqartullu amerlanerpaat inuit ataasiakkaani pigilersinnaaqqullugit.

 

Kattusseqatigiinniit isumaqarpugut ilinniartitaaneq sutigut tamatigut inuuiaqatigiit ineriartortitaaneranni ingerlatsinnerannilu aqutissat pingaarnerit aamma ilagilluinnaraat .

 

Kalaallimmi  Nunatsinni ineriartorneq ukiuni 100-ni kingullerni qiviarutsigu tupinnaannartumik allanngornersuaqarsimavoq. Minnerunngitsumik aamma ukiuni kingullerni 50-ini ineriartorneq sukkasooq piorsarsimassutsikkullu allanngorneq annertooq pisimapput.

 

Tassami inuttussuseq tallimariaat angullugu annertusisimavoq. Aalisarnermi piniarnermi allaaniarnermi angallannikkullu atortorissaarutit tupinnaannartumik allanngorsimapput. Aammalumi periaatsit allanngorsimapput. Piniariaatsillu allanngorsimallutik.

 

Ilami suut tamarmik inuuniarnermut tunngasut allanngorsimapput. Aamma naalakkersuinikkut pissutsit allanngorsimapput. Nunattalu avammut attaveqarnera avataaniillu isigineqarnera aamma allanngorsimapput.

 

Assersuutigitigut ukioq Qeqertarsuup Tunuani aarluit pisarineqarsimasut pillugit nunarsuarmioqatitta allagarpassui nunatsinni Naalakkersuisut siulittaasuannut aamma danskit statsminister-iannut saaffiginnissutigineqarsimasut ilanngullugit maani Inatsisartunut agguaanneqartut amerlanersaat aarlunnik toqoraanerup unitsinneqarnissaannik piumasaqaateqartut. Nunatsinnut qanoq niuernikkut takornariaqarnikkullu sunniuteqapilussinnaanerat Kattusseqatiginniit isumakulunnartoqartipparput.

 

Naak uagut kalaallit nammineq paasisinnaalluaraluarlutigut kalaallit piniartortagut asuli uumasunik toqoraaniaannarlutik toqoraaneq ajortut.

 

Taamaattoq eqqaamasariaqarparput nunarsuarmioqateqaratta ilaatigut piniartuunerup silarsuaanik paasisimasaqanngilluinnartunik. Piniartullu inuuniutaannik aseruisinnaasunik mianersorfigisariaqakkatsinnik.

 

Soorlu taanna aamma puisit amiinut tunngatillugu misigisaqarfiginerlussimagipput.

 

Taamaammat Kattusseqatigiinniit aamma Naalakkersuisunut ilungersortumik kaammattuutigissavarput Kalaallit Nunatsinni piniarnermik inuutissarsiuteqarnerup kalaallinut qanoq pingaaruteqassusia nunarsuarmioqatitsinnut paasititsiniutigiuaqqullugu.

 

Ilanngullugu Kattusseqatigiinniit tamatsinnut kaammattuutigissavarput maangaannaq eqqaanerujussuatta killilersimaarnissaa aamma eqqumaffigeqqullugu. Tassami naalakkersuinikkut oqaluttuarpugut takornariaqarneq aamma inuutissarsiutinut pingaarnernut isumalluutinut ilaatinneqassasoq. Qujanartumillumi aamma annertusiartorpoq nunatsinnut aningaasarsiornikkut ajunngitsumik sunniuteqariartorluni, kisianni nunaannarmi eqqaavissuit pinngortitanik mingutsitsisut kusananngeqisullu isiginngitsuusaaginnarsinnaanngilagut, sulimi taakku amerlaqaat. Naak eqqakkanut ikuallaaviit aamma ukiuni kingullerni illoqarfinni arriikkaluartumik sanaartorneqaraluartut.

 

Taamaammat sumiiffinni assigiinngitsuni pissutsit piviusut tunngavigalugit aaliangersaasarnerit nunaqarfinni assigiinngitsuni innuttaasut atuisullu qanimut suleqatigalugit paaseqatigalugillu pisarnissaat Kattusseqatigiinniit kaammattuutigeqqisavarput.

 

Taamaaliornikkut suleqatigiinneq paaseqatiinnerlu annerusoq pitsaanerusorlu aamma anguneqassammat.

 

Taamatut naatsumik oqaaserluta oqallisissiat naakkaluamik isummersorfigaagut.

 

Anders Andreassen, ataatsimiinnermik aqutsisoq, Inatsisartut Siulittaasuata tulli, Siumut..

Qujanaq. Tulliulluni oqaaseqaqqissaaq siunnersuuteqartoq Asii Chemnitz Narup, Inuit Ataqatigiit.

 

Asii Chemnitz Narup, Inuit Ataqatigiit.

Qujanavunga Naalakkersuisut siulittaasuata akissuteqaataanut. Taamatuttaaq partiit Kattuseqatigiillu oqaasiinut.

 

Ilisimaneqarpoq nunarsuarmioqatigiit akornanni nunarput piuartitsinissamut tunngasuni ukiorpaalunngulersuni suleqataammat naalakkersuisutigoortumik taamatuttaaq Inuit Issittormiut Kattuffiat aqqutigalugu.

 

Oqarsinnaavugullu nunatta aallartitarisartagai aaliangersagassanut pingaarutilinnut sunniuteqarluartarsimasut taamaalillunilu nunarsuarmioqatigiit akornanni suleqatigiinnermi nunarput mikinngitsumik naatsorsuutigineqarlunilu tatigineqarmat.

 

Kalaaleqatigut tamatumuunakkut suleqataasut tulluusimaarutissaapput.

 

Inuit Ataqatigiit isumaat malillugu taamatulli pingaartigaaq nunatta nunarsuarmioqatigiit akornanni aaliangersakkanik atsioqataaffigisaasa angerlamut apuunnermi annertuumik inuuiaqatigiinnut paasissutissisuutigisarnissaat innuttaasullu aaliangersakkat piviusunngortinniarneranni suleqatissaraluit akisussaaqataatinnissaat.

 

Naatsoorsuutigisimagaluarpara Naalakkersuisut piviuartitsinissamik siunertaqarluni ineriartortitsinissamut tunngassuteqartumi Inatsisartunik upernaap manna ataatsimiinneranni oqaluuserisassanngortitsisimassasut.

 

Tassami augustip qaammataata naajartornerani Sydafrikami, Johannesburgimi nunarsuarmi nunat tamanit peqataaffigineqartumit piviuartitsinermik anguniagaqarluni ineriartortitsineq ataatsimeersuaatigineqassammat.

 

Inuit Ataqatigiit isumaqarpugut nunamut namminermut inuinullu pinertuunermit kingoqqisunut aammalu piniartuunermi suli ingerlataqartunut maanilu aamma aalisarnermik savaateqarnermillu nappateqartunut pissusissamisuuginnassasoq inuuiaqatigiittut piviuartitsinissamik tunngaveqarluni ingerlaaseqarnissaq.

 

Tamannami inuuianni kalaallini nutaajunngilaq. Siulitsinniillu kingornussarsiatta iluatinnarnerpaaq ilaattut isigalugu ukiunut makkununnga siunissamullu naleqqussarlugu atuuttuarnissaa qulakkeertariaqarpoq.

 

Inuit Ataqatigiinni anguniartariaqarsorivarput piviuartitsinissami siunertaqarluni ingerlaaseqarnissamik siunnerfiup tigussaasunngortinneqarnerunissaa anguniartariaqarlunissaaq kikkut tamarmik akisussaaqataasutut misigisimalernissaat.

 

Imaaginnassannginnamimi avatitsinniit tatisimaneqalerfiit alaatsinaanneqalerfiillu nalaanni.

 

Pinngortitarsuaq uumasut inuillu imminnut ataqatigiilluinnarlutillu imminnullu susareqatigiittutut inissisimanerat ilitsoqqussaraarput.

 

Pinngortitarsuup nukii inunnit ajugaaffigiuaanarneqarsinnaanngitsutut isumaqarnagit siuligut inuupput maniguuppaluttumillu pinngortitamut ileqqoqartuullutik.

 

Uumassusillit suulluunniit eriagisassatut isigalugit inuuneq attanneqarsimavoq. Nunami imaanmilu uumasut kinguaariippassuarni nerisassaqartitsiinnaratik oqortunik issittumi naleqquttunik atisassaqartitsipput.

 

Uumasullu nungusaataanngitsumik atornissaat siulitta ilisimatuuffigaat. Tamakkuupput inuiattut kinaassuseqarnitsinnut tunngaviliilluinnartut. Tassaniippullu pingaartitatta sorlaqarfii ileqquliussattalu pinngorarfii.

 

Taamaammat nunarsuarmioqatitsinik qaammatini makkunani pineqarnerput inuusaatitsinnik kinaassutsitsinillu saassussineruvoq imaannaanngitsoq illuatungilerlugu qisuariarfigineqartariaqartoq.

 

Atorluaaneq naammattusaarineq aqagussaq puigornagu kinguaariillu tullinnguukkumaartut napatittuarnissaat minguitsumillu imeqarnissaat silaannarmillu minguitsumik anersaartorfissaqarnissaat anersaaralugit anguniarlugillu inuunermit ingerlatsinissaq ilitsoqqussat allat iluatinnartut ilagaat.

Aningaasarsionissamik salliutitsilernerup ukiuini isiginneriaatsit pingaartitallu taakku sapanginneqaqqajaapput, taakkuli iluatigisariaqarpagut.

 

Suut tamarmik ataqatigiinnerani isummamik pingaartitsineq tamakkiisumillu paasinninneq tunngavigalugit ineriartortitsinissaq Inuit Ataqatigiit qitiutillugit Naalakkersuinikkut suleqataavugut.

 

Taamaattumik aamma Brundtlandi nalunaarusiaanit piviuartitsinissamik paasinnitaasia iluatigivarput. Nunatsinnilu ineriartortitsinissamut iluatigeqqussavarput.

 

Taamaalilluni aamma anguniakkap imaqqortoorujussuunera Brundtlandip nalunaarusiaani naqissuseneqartutut ippoq. Naallu piviuartitsinissamik oqallinneq pinngortitamik uumasuinillu atuinermik aallaavigineqarnerugaluartoq taamaattoq inuunermut tamakkiinerusumut inooriaatsinut inuillu pissusilersoqatigiittarnerannut aamma tunngavoq.

 

Inunnik inuunermillu tunngaviusumik isiginneriaatsinut aamma tunngalluni.

 

Aningaasarsiornermut tunngatillugu Josef Motzfeldtip Inuit Ataqatigiit sinnerlugu oqaaseqarnermini eqqaallatsiarpaa pingaartikkipput Inuit Ataqatigiinninngaanniit inuussutigut aningaasanik massakkut taleqartitsinngisagut siunissami nalunaarsoqqissaarlugit aamma aningaasanik naleqartittalissagigut.

 

Tassuunga tunngatillugu soqutiginarpoq atuassallugu Kangersuatsiaani piniartup Vilhelm Kristiansen (Viiliap) sukumiisorujussuarmik misissuereerluni nalunaarusiarisimasaa 1996, 1997, 1998 1999-ilu nunami tamarmi inoqutigiit avammut tuniniarnerit nammineq nappatigisaasa aningaasanngorlugit nalingat tassani paasinarsivoq allaat 300 million tungaanut nammineq inoqutigiit nerisartagaannut naleqartartut.

 

Tamakkua ilanngullugit paasiniartariaqarput aamma neriuutigivarput issittumi inuuniarnikkut atugarisat pillugit misissuinermi tamakkua ilanngullugit misissorneqarumaartut.

 

Artisk levevilkårsundersøgelse pillugu paasiniaanitsinni paasivarput Naalakkersuisut siulittaasua ukiuni siuliini annertuumi suliniuteqaqataasimasoq minnerunngitsumik issittumi siunnersuisoqatigiinni taasumap misissuinissap piviusunngortinnissaannik aqqutissiusseqataalluni.

 

Taamaattumik aamma paasisatta ilagivaat avataaninngaanniit 4 million kr.-nit aningaasaateqarfinninngaanniit katersorneqarsimasut taamaakkaluartoq misissuinissap piviusunngortinnissaannut 1,5 million kr.-nit massakkut amigaataasut. Taamaattumik misissuinissap pingaaruteqaqisup piviusunngortinnissaanut apererusupparput Naalakkersuisoq siulittaasua ukua sinneruttut 1,5 million kr.-nit qanoq eqqarsaatersorfiginerai.

 

Aamma aningaasaqarniarnermut tunngatillugu eqqartuinitsinni eqqaasitsissutigeqqikkusussavarput siornaak aningasanik inatsit eqqartoratsigu uterfigisimagatsigut 1970-ikkunni Geografisk Institutip nunatta aningaasaqarniarnera misissorsimavaa. Taamatuttaaq aamma ICC, Inuit Issittormiut Kattuffiat, 1980-ikkut aallartinneranni taakku misissuineri marluk soqutiginartunik paasissutissiipput. Tassa Danmarkiminngaanniit ataatsimoortumik tapiissutigisartakkagut nunatsinnut taakkua 80%-iisa missaat qallunaat nunaannut utertartut. Taamaattumik aningaasat ingerlaarneri nunatta qallunaat nunaatalu akornanni misissuiffigeqqinneqartariaqartut isumaqarpugut.

 

Aamma ilimanarmat suli utertartut qallunaat nunaannut amerlasoorujussuussasut.

 

Taava tikittakkatta ilagivaat aamma nunatsinni innuttaasut isertitaasa naligiinnginnerujussuat. Malugivarput Naalakkersuisut siulittaasuata akissuteqarnermini apeqqut taamanna tikitsiaraa. Oqarluni piitsuussutsip akiorniarneranit suliniutit assigiinngitsut nunatsinni aamma Naalakkersuisuni takorloorneqartut.

 

Taamaakkaluartoq uteqqissavarput Inuit Ataqatigiinni isumaqartuarsinnarpugut akileraaruseriaatsit tassani sakkussaasoq pitsaanerpaarpaarpaaq allanik pitsaanerusoqanngitsoq.

 

Taakkuugallarput. Qujanaq

 

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Qujanaq. Tulliulluni akissuteqassaaq Naalakkersuisut siulittaasuat. Tulliukkumaarpoq Siumup oqaaseqartua Ruth Heilmann.

 

Jonathan Motzfeldt, Naalakkersuisut Siulittaasuat, Siumut.

Oqaaserineqartoq maani assorujussuaq tusarnaarlugit nuannerpoq. Pissutigalugu Inatsisartut piviuartitsinissamut oqallinnermi matumani titarneq aappaluttutut ilillugu titarpaat oqaaserineqartut tusarnaaraanni.

 

Siullermik piviuartitsinissaq aaliangiusimaneqassaaq. Allaallu maannakkut oqaatigineqartuni sikinneqarpoq piniagassat pisarisassat tamarmik killilersugaanissaat tassa imaappoq rosa-lersuinikkut eqqarsaatit maani maannakkut ammasumik oqallisigineqalerput. Aammalu taanna oqallinneq tassuunga killinnera suliareqqinnissaanut assigiinngitsut assorujussuaq oqartariaqarpunga pisariaqarpoq. Paasillugu nuannerpoq taamak ittumik periarfissat maannakkut eqqartorneqarmata.

 

Oqaasigineqarput partiip oqaaseqartuaninngaanniit oqaatsitit Naalakkersuisut manna tikillugu suliariniagaannut tapersiiginnaratik aamma qiimmaallannartunik ilaatigut tusagaqarfigaqarfigisakka. Soorlu makku Siumup oqaaseqartuata Ruth Heilmann oqaaserisaanni allartiffissalluunniit atuarfimmi atuarfiup aamma ikiorlisigut periarfissani tassani.

 

Nunatta pinngortitaa atorneqarnera meeqqat angerlarsimaffimminni qularnanngilaq aamma naapittagaat. Atuarfimmi aamma taama ittoq suliassamut ilanngutissallugu soqutiginartut eqqarsaatissatut kusanartutut aamma tigorusuppara.

 

Aamma nunatsinni Folketingimut ilaasortat Siumut tungaaninngaanniit allaat kaammattorneqarnerat periarfissaqarluarput taakkua Folketingip maskinaat tamaat atorsinnaavaat. Nunanullu allanullu aamma tunngasutigut kiffartornermi suleqatigiserinissaannut aamma uagut naatsorsuutigigatsigit. Taakani aamma paasisitsiniaanermut Folketingimut ilaasortatta atorneqarnissanik innersuussutit aamma kusanartutut uanga paaserusuppakka. Suliallu ingerlanneqarneranni aamma isu... periarfissatut aamma eqqarsaatigineqartut ilanngunneqarsinnaanerat takorloorlugu.

 

Ilumoorpoq aamma Atassutip oqaaseqartuanit Brundtlandip nalunaarusiaa uani aallaavigalugu oqaatigineqartoq aamma taagorneqarmata.

 

Aamma uani taagorneqartunik tamakkiisumik soorunami oqarpunga aallaqqaataani "Tamaasa taagoraluarutsigit sorparujorussuit ilanngunnguttussaavagut".

 

Kisiani immikkut taalaarusuppara pinngortitap aamma paarineqarneranut tunngatillugu Ramsarkonventionimik. taaneqartartoq 1987-imiinnguatsiarpoq tamatuma nalaaninngaanniit pisoq tassa silarsuarmi eqqissiinnassasut nunat piukkunneqartut. Pissutigalugu uumasut timmissat allallu aamma inuuffigisaannut immininartutut isigineqarmata Ramsarkonventionimik taaneqartartoq taanna.

 

Ilumoorpoq taanna aamma tamakkiisumik atulersinneqalinngilaq, kisianni Kalaallit Nunaata ilaani 20-t tungaanut nunat immikkoortortai nunatut uumasunut inuuffigisatut naleqquttutut silarmilu tamarmi isigalugu eqqissiinnassasut isigineqartut. Aamma taakku taaneqareersimapput.

 

Nuannaarutigaara aamma ICC-p taaneqarluni suleqatigineqarnissaannut innersuussutigineqartut Inuit Ataqatigiinniit oqaatigineqarmata.

ICC-p silarsuarmi inissisimanera aammalu allaat nunani avannarlerninngaanniit miljø tungaatigut alaatinaanneqarluni nersorniarneqartarnera ilisimarereerparput. Aammalu taakkunani suleqatigiiffissat annertuut periarfissaqarput.

 

Inuit Ataqatigiit oqaluttuata Josef Motzfeldtip Arctic Umiaq Line aamma Asii Chemnitz Narupip oqaaseqaqqinnerminni taasaa nunami issittumi siunnersuisoqatigiit taakkua piviuartitsinissamut oqallisineqarnermi peqataanerat atorluartariaqarparput ilumoorpoq. Nordiskråd aamma taamaappoq.

 

Nunat avannarliit killiit eqqarsaatigalugit isumaqarpunga oqaatigineqartut tunngavigalugit aallartiffissatsinnut qaninnerpaatut ilaasut taakku Savalimmiut, Island-i uagullu Atlantikup annerpaaq aamma Norge tassani aamma ilaasariaqassaaq. Pinngitsooratik tassuunakkut aamma Atlantikup avannaaniittugut suleqatigiinnerit tassaniittut nukittorsartariaqarpagut Vest nordiskrådip suliassaannut pingaarnernut ilanngullugu taamaalillugu innersuutiginiarsinnaavarput.

Isumaqarpunga aamma oqaatigineqartut taamatut tunngavigalugit Inuit Ataqatigiit oqaaseqartuata aamma taasai tassani eqqarsaatigaakka pisuussuteqartut pinngortitap maani sunnerneqarneranut taagoraluarullutigiluunniit arlaleriarluta mingutsitsinerit helikopterit angallannermut tunngasut umiarsuit allallu. Qassutit nungusaasimasorujussuit ilaatigut timmissanik imaani appanik.

 

Tamakkuluunniit tamaasa taagoraluarutsigit, ataaseq allanngortinngissinnaasarput tassa oqaatigineqartoq manna uppernarsassallugu imaluuniit naaggaassallugu. Nunassinni Kalaallit Nunaanni timmissat ikiliartornerat angivallaalersimavoq.

 

Taanna naaggaarsinnaanerlugu?

Imaluunniit uppernarsissallugu. Piffissaq taama ittoq maani akisussaaffigaarput.

 

Taamaattumillu maannakkumut paasissutissiniaanerit atorneqartussat aammalu isumasioqatigiinnissat ingerlajuaraluartut pingaarluinnaqqissaarpoq aamma taakkua kingumut katiteqqinnissaat.

 

Tamanna uagut Naalakkersuisunut maannamut iliuuserisarput Avatangiisinut Naalakkersuisoqarfik, Piniarnermut Naalakkersuisoqarfik taavalu aamma Kattuffinnik suleqateqarluta nunatsinnik paasissutissiiniaanissamik aallartitsineq isumaqarpunga pingaaruteqarluinnartuusoq.

 

Maani akornatsinni paasissutissat inatsisiliamut nuna tamakkerlugu kommunini allanilu aamma ilisimaneqarnissaat pingaarluinnartutut isigigatsigut.

 

Taamaattumik aamma avataaninngaanniit isigineqarnitsinnut tunngasut eqqarsaatigalugit qisuariarnerit ilaatigut Anthon Frederiksenip aamma taasai maluginngitsuugassaanngillat, ilumoortortaqarmata aamma.

 

Oqaatigissavara nuannaarutigeqigiga Kattusseqatigiit aamma ullumikkut oqaaseqarnerminni Naalakkersuisut aammalu ullumikkut saqqummiisumut Asii Chemnitz Narupip saqqummiussaanut qanittumik aammalu erseqqissumik tapersiinerat malugisinnaasara pillugu. Tassa isumaqarpunga Kattusseqatigiit ullumikkut nalunaajaartuutaat pissutsit allanngorsimanerannik ilaatigut imaqartut aamma pissusiviusunik taamaalilluni akuersinerusut.

Taamaalillutalu nunarsuarmioqatitsinnut paasissutitsiniaanissaq aamma nunatsinniinnaanngitsoq avatangiisitsinullu aamma pingaaruteqartigisoq tassani aamma taaneqarluni.

 

Tassa taamatut oqaatigakka nuannaajallaatigalugu maani oqaatigineqartunik Inatsisartut erseqqilluinnartumik nalunaaruteqarmata piviuartitsinissaq tunngavigalu inatsiliornigut oqaloqatigiinnigut allallu. Silarsuarmullu aamma avammut paasisitsiniaanerput ilanngullugu ingerlanneqassasut.

 

Aamma uagut akornatsinni pinngortitamik paarsinerput nukittorsarneqassasoq.

 

Allaat ilaatigut eqqaavissuit tikillugit eqqartorneqartut ajoqutaasinnaanerup mingutsitsinermi ilanngunneqarput.

 

Tamakku tamaavimmik innersuussutigineqartut ullumi oqallinnermi taagorneqarneri nuannaarutigaakka iseqarfiullutik taagorneqarmata.

 

Aamma uagut siutigut atorlugit ingerlateqqinniassavagut.

 

Naggataatigut apeqqutigineqarpoq Asii Chemnitz Narupiminngaanniit aningaasat misissuinermi amigaatigineqartut 1,5 million missaaniittut taamatut aamma maannakkut avatangiisitsinnut tunngatillugu suliniarnermi inissinniarneqartut.

 

Oqaatigissavara Naalakkersuisuninngaanniit maannakkut aamma qinnutigineqartut tulleriiaarneqarnerannut ilanngullugit aningaasat taakkua isummerfissatut tigummineqarput. Naatsorsuutigaaralu inussiarnersumik aamma taakkua suliarneqarumaarnerat.

 

Taama oqaaseqarlunga qujavunga.

Iseqqissumik maani oqariartuutinut partiinit Kattusseqatigiinnillu.

 

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Qujanaq. Tulliulluni oqaseqaqqissaaq Ruth Heilmann Siumut. Tulliullukkumaarpoq Josef Motzfeldt, Inuit Ataqatigiit.

Ruth Heilmann, Siumut.

Qujanaq. Tassa siullermik utoqqassissutigissavara atuffarliorsimanera tassa allatorujussuaq paasineqarsinnaasumik qupperneq 2-mi pinialunneq taama oqarniarlunga piniapilunnermik oqarsimagama. Taanna naqqiissutigerusuppara. Allatorujussuaq aamma taanna isumaqarpoq.

 

Soorunami qujassutigaara Naalakkersuisut aamma Siumuminngaanniit oqaasigineqartut ilassilluarmagit. Aammalu siunnersuuteqartup taamatut aamma aappassaaneernermini oqaaserisai aamma qujassutigaakka. Aammalu qujassutigimmagu uagut aamma oqaaserisagut.

 

Inuit Ataqatigiinninngaanniit Josef Motzfeldtip siunnersuutigaa aamma Inuit Ataqatigiit isumasioqatigiinnissaq siunertaralugu aamma nunatsinni nunattalu avataani pinngortitamik atuilluarnissaannik siunertaqartut suleqatiseralugit taamatut Naalakkersuisut aningaasanik pissarsiniarnissaq isumagissagaat.

 

Taanna isumaqatigisorujussuuarput peqqutigalugu ippassaanik immikkoortoq 86-imut tunngatillugu oqallikkatta. Aamma Siumuminngaanniit isumasioqatigiissitsinissamik annertuumik Naalakkersuisut pilersitseqqullugit kaammattorpagut.

 

Taamaattumik taamatut isumaqatigiinnerput isumaqarpunga aamma sakkussaalluarsinnaasoq.

 

Avatangiisini eqqissisimasitsinermi ataatsimiititaliami eqqartortakkagut uani oqaaserineqartuni ilisarnartorujussuupput massakkut sammineqartut.

 

Tassa ataatsimiititaliami isumaqarpugut suliassat annertorujussuit aamma pingaarutilerujussuit massakkut ingerlanneqartut. Aamma Naalakkersuisutsigoortumik.

 

Taamaattumik nunanut avannarlernut aammalu ICC soorunami peqatigalugu isumaqarpunga aqqutaalluarsinnaasoq. Aamma pasisitsiniaaneq annertooq ikioqatigiiffigissallutigut.

 

Taamaattumik ilaatigut malunnartarmat Inatsisartuni suliniarneq aamma nunani avannerlerni suleqatigiinnissamik tunngatillugu nukissaaleqiffigineqartartup taasuma aaqqiivigineqarnissaannut eqqarsaativut naggataa tungaani oqaatigisagut neriuppunga aamma Naalakkersuisuni ilassilluarneqassasut.

 

Tassa isumaqaraatta nunat avataaniittut eqqarsaatigalugit nunatta ilisimaneqalernerunissaa aammalu suliniutigisatta avammut siarmarnerulernissaannik oqalunneq aammalu paaseqatigiiffiusumik piniartut atugarisaat pillugit aammalu inuuniuteqarnerat suli ullumikkut ingerlanneqartup pillugu aamma paasisitsiniaaneq annertooq isumaqaratta ingerlanneqartariaqartoq.

 

Aammalu atorluaanermik isuma taasumap aamma nunatsinni pisariaqartitaanera isumaqarpunga taanna aamma nunat alla paasisariaqarpaat suleqataaffigalugulu.

 

Tassami nalunngilarput aamma peqaratta pitsassuarnik tuttunik umimmannillu savanik allanillu. Taakku ajornartorsiutigisarpagut avatitsinnut aamma taakku niuerutiginissaat. Taamaattumik tassuungakkut angusaqarniarlutik aamma suliaqarnissaat isumaqarpunga aamma piniartunut aningaasarsiornikkut iluaqutaasuunissaannik siunertaqartumik pimmat aamma tassuunakkut isumaqarpunga paaseqatigiiffiunerusumik nunat allat aamma tassani soorlu EU pillugu eqqartuinermi annertuumik aamma taakku ajornartorsiutaasut saqqummiunneqarumaartut.

 

Eqqagassat arrorsinnaasut aammalu arrorsinnaanngitsut pillugit aammalu radioarktiv-itallit pillugit massakkut nunatsinni ingerlanneqartut siuarsaaneq tassa eqqaaveqarnikkut ikuallaaveqarnikkullu isumaqarpunga taasumapa aamma ajornartorsiutitai sukumiisumik qulaajarneqartariaqartut.

 

Tassami ikuallaaveqarnikkut pilersitsisoqarsimavoq ilaatigut nunaqarfinni amerlasuunik taakkuli aamma amerlasuut ullumikkut atorsinnaanngitsut.

 

Taamaattumik tassuunakkut aamma Naalakkersuisut suleqataanissaat Siumuminngaanniit kissaatigaarput taamaattumik Avatangiisinut Naalakkersuisoq aamma tassani pisussaaqataasutut isumaqarpugut apeqqummi peqataalluinnartariaqartoq.

 

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Qujanaq. Tulliulluni oqaaseqassaaaq Josef Motzfeldt, Inuit Ataqatigiit. Tulliukkumaarpoq Johan Lund-Olsen, Inuit Ataqatigiit partiit oqaaseqartuisa avataatigut.

Josef Motzfeldt, Inuit Ataqatigiit.

Inuit Ataqatigiit oqaaseqartuattut manna aappassaanik oqaaseqarninni piffissaq atorusuppara siunnersuuteqartoq qutsaviginiarlugu.

 

Naalakkesuisut siulittaasuata oqartussaasutut akissuteqarnermini siunnersuuteqartoq isumaqarpunga suusupajuillaaraa.

 

Qujanaqaaq ullumikkut maani inimi periarfissinneqaratta matuma oqallisiginissaanut.

 

Uggornaqaaq piffissaq imaalisoq ilinniartuunersiutinut tunngasut sivisoorsuarmik sammereerlugit innuttaasut periarfissaarullugit oqallisigigatsigut. Naak Naalakkersuisut periusissamittut oqaatigisaata ilaatigut oqaatigineqaraluartoq piviuartitsinissami tunngaveqarluni ineriartortitsilernermi ikaarsaarneq nuna tamakkerlugu iliorisussamik tunngaveqartariaqarluni innuttaasunut tunngaveqarluni. Taanna anersaaruuluutigaara.

 

Taama Naalakkersuisut siulittaasuata akissummini siunnersuuteqartoq annertunerusumik taanngilaa. Naluara takisuuliorpallaarnissaq pinaveersaarlugu siunnersuuteqartut aqqi taanerveersaarneqartalernersut ilaatigut tamanna isumaqarpugut tamanna atuuttariaqartoq. Illua tungiliuttut ilaannaa tunngatinneqarani.

 

Akisuarsulerinerusinnaavoq. Naalakkersuisooqatigiit ilaasortaatitaat siunnersuuteqaraangata siunnersuutit akissuteqarfiginerani ilaanni sisamariarluni aqqi taaneqartarput.

 

Naalisaaniarutta aqqi piiarlugit assigiimmik taanna atortinneqartariaqarpoq.

 

Ullumikkut nunarsuarmi nunap inoqqaavisa akornanni inissisimanerput siuttutut inissisimanerput amerlasuutigut innarlinngersaagatsigu isummersortariaqarneq manna iluatsillugu Inuit Ataqatigiinninngaanniit annertuumik isummersorpugut.

 

Assersuutigalugu nunat tamaat akornanni nunarsuarmi niueqatigiinnermik kattuffissuup ataatsimeersuarneranni 1999-ioqqooqaaq ukiakkut nunat inoqqaavisa katersuuffiannik nunat inoqqaavisa nioqqutissiaasa aallunneqarnerulernissaat ammaanneqarnerunissaat malunnaateqartumik siuttuuffigisimavarput.

 

Massakkullu aamma Afrikami kujallermi august-i naalerneranioqqooqaaq taamatut isumasioqatigiinnissaarsuaqarnissami nunarput oqariartuuteqartariaqarpoq. Tamatumanilu inuuiaqatigiit innuttaasut isumaat toqqammaveqarneq pingaartorujussuussooq.

 

Allaffissuarni akissuteqaatit suliat isummat pilersut ilaqartinneqartariaqarput inuiaat isumaannik.

 

Siumut oqaaseqartuanut nutaartaqangaannngitsumut Biolog-it piniartullu naapisinniarnissaat uagutsinnut isummerfigisimammassuk nuannaarutigaarput aammalu pinngortitamut illersuinermut tunngatillugu inatsiliornermut innuttaasut tikillugit piviusunngortitsiartornissaq ippassaani 86 oqaluuserinerani oqaaserisarput isumaqatigimmassuk aamma nuannaarutigaarput, kisianni paasisinnaanngisarput aajuna. Siumup oqaaseqartuata oqaasii uku ilumut ilumoornersut inuttaanut uppernarsitikkusukkaluarpakka oqarmat issuaavigissavara Siumup oqaaseqartuata quppernerup pingajuanni qeqqani allassimasoq oqaatigisaa imaattoq: Pinngortitamik eriagisaqarneq uumasuinik naasuinik ujaqqanillu allarpassuarnillu allanngutsaaliuineq ingerlattuarniarlugu Naalakkersuisut iliuuseriserisaat tapersersornertuuteqaagut.

 

Pinngortitanut atuinermi allanngutsaaliuineq pineqartanngilaq.

Aamma uani oqaluuserisami piviuaannartinissaq pillugu atuilluarnissaq pineqarpoq.

 

Uani allaanngilaq allanngutsaaliuinermi tassa eqqissitivillugu tamakku pineqassasut. Neriuppugut soorunami isumaq oqarliornertut taaneqartariaqassasoq.

 

Kattuseqatigiit oqaaseqartuata oqaaseqarnermini ilaatigut oqaatigisaa aamma issuaaffigilaarusutara tassaavoq AIleqquliussallu nutaat ajunngitsorpassuarnik aamma ilallit kisianni aamma nuanninngitunik akoqarlutillu nalaataqarfiusartut inuuffigilersimasagut qanorluunniit piumanngitsigigaluarutta inuusaatitsinnullu ilanngussimasut nassuerutigisariaqarpagut!

 

Inuit Ataqatigiinninngaanniit nassuerneq naammaginanngitsutut imaluunniit nassuerneriinnarmut killiffeqartariaqanngilaq.

Naalakkersuisut avammut kiinnagut isumaqatigiinniarnernut assigiinngitsunut Naalakkersuisooqatigiit suleqatigiiffiini isummersuisuusartut isummatsinnullu anitsisuusartut Inatsisartuni isummersorneqartariaqarpoq annertunerusumik.

 

Tassaavoq Inatsisartoqarnerup naammassiniagassaa pingaartoq.

 

Taamaattumik aamma ilaatigut soorlu  taama paasisimakissuseq avatitsinniittoq ajuusaarutigiinnarsinnaanngilarput. Kikkummi allat paasitissavaat, uagut paasitinngikkutsigit?

 

Taavalu arlalinni oqaatigineqartoq atuarfik aamma Naalakkersuisut siulittaasuat oqarneratut. "Atuarfitsialak massakkut ilusilersorparput" tassanilu uagut paasisagut najoqqutaralugit Atuarfitsialak ilaatigut pinngortitamut avatangiisinillu sammisaqarnerunerput annertuumik imaqartinneqartussaq aalajangersaavigineqareerpoq. Suliagut ataqatigiissut puigornaveersaassavagut.

 

Taamaattumik Naalakkersuisunut isummerfigitikkusukkaluarparput una nunanut allanut allaffeqarfik massakkut International Centerinngortinniarlugu Siumukkunninngaanniit siunnersuutigineqartoq qanoq Naalakkersuisuninngaanniit eqqarsaatigineqarnersoq.

 

Massakkut utaqqiisaagallartumik pisortaqartinneqarluni ukiup sinnerpaa.

 

Nukittorsarniagaq taama kingusitsigisumik inissisimatinneqartoq Naalakkersuisut isummerfigisariaqaraat isumaqarpunga. Allaffeqarfik pingaaruteqartumi inissisimavoq.

 

Taavalu Naalakkersuisunut apeqqutigerusussavarput isumasiuisitsinissamut tunngatillugu siunnersuupput isumaqaratta pinngortitamik mianerinninnermik atuilluarnermik suliniaqatigiiffiit tamatumunnga massakkut peqaterissallugu piffissatsialaasoq. Naalakkersuisut qanoq taanna isumaqarfigineraat taanna paaserusupparput.

 

Anders Andreassen, ataatsimiinnermik aqutsisoq, Inatsisartut Siulittaasuat, Siumut..

Qujanaq. Tulliulluni oqaaseqassaaq Johan Lund-Olsen, Inuit Ataqatigiit, partiit oqaaseqartuisa avataatigut.

Taannalu oqaaseqartinnagu oqaatigilaassavara aatsaannguaq oqaatigineqartoq tassalu siunnersuuteqartut atiisa taanaveersaaneqartarnerat erseqqissassavara pisussaaffiunngimmat. Aamma partiit oqaaseqartuisa namminneq aalajangertarpaat siunnersuuteqartup atia taallugu oqaaseqassanerlutik. Namminneerlutik taanna aalajangertarpaat.

Imaappoq pisussaaffiunngilaq atit taagussallugit taamaalaalli saqqummiussinermi tamatigut taaneqartarpoq kina siunnersuuteqartuunersoq. Taamaattumik suleriaatsinni allassimasoqanngilaq taanna eqqaassutigissavara atinik taaguisaqattaarneq.

 

Johan Lund-Olsen, Inuit Ataqatigiit partiit oqaaseqartuisa avataasigut. Minutsit tallimat periarfissaapput.

 

Johan Lund-Olsen, Inuit Ataqatigiit.

Qujanaq.

 

Tassa uanga siullermik siunnersuuteqartoq Asii Chemnitz Narup qutsavigerusuppara oqallissaarulluni maani saqqummiussaqarmat tassami piuaannartitsineq taanna pingaarutilerujussuuvoq Inatsisartunit aamma isummersorfigissallugu.

 

Pinngortitap pisuussutai kinguffattartut nungutsaaliornissaat sunniutigiuartariaqarparput. Tamatumani tunngavigalugit piuaannartitsineq inooqatigiit akornanni naapertuilluarneq aamma aningaasarsiornikkut siumukarneq.

 

Siunertaasariaqarpoq nungusaanani atuineq eqqortumik aqutsineq aammalu inuiaat kulturikkut ileqqutoqqatik naapertorlugit nerisaqartariaqarnerannik ataqqinninnissaq.

 

Akuersaartariaqarparput inuit pinngortitamut ilaavissuummata tassannga immkkoortuugatik aammalu pinngortitami inooqataasut suulluunniit avatiminni pisuussutinik sukkut arlaatigut atuisuummata. Ilaasa nerisaqarfigalugu, ilaasa oqqiffigalugu tamatigut annakkumallutik.

 

Aamma eqqaamasariaqarparput suliniaqatigiiffiit Naalakkersuisoortuunngitsut inuillu ataasiakkaat piuaannartitsineq tunngavigalugu atuinermut isaasalerlugu "Akerliuniat" amerliartormata sunniuteqaleriartorlutillu, soorlu tassaallutik atuakkiortoq tusaamarsarsuarput Kjeld Hansen Greenpeace maani nunatsinni aamma nalunngeqisarput, "People For the Arctical Treatment Of The Animals", tassa uumasut ileqqorissaartumik pineqarnissaannut suleqatigiit "Friends Of Animals". Tassa uumasut ikinngutaat. "The Human=s Society Of  The United States", tassa USA-mi inuppalaartumik pissusilersortut suleqatigiiffiat allarpassuillu.

 

Tamakku kalaallit inuussaasiissoqataannut inuuniuteqarnitsinnullu navianartorsiutitsisuupput. Paasissutissanillu eqqortunik taamaattumik pilersorneqartuartariaqarlutik.

 

Suliniaqatigiiffiit Naalakkersuisuutigoortuunngitsut tamakkut isaasalerlugu "Atueqqusinngitsut" tunoqqutariillutik silarsuarmi suliniaqatigiiffissuarnut soorlu CITES-imut tassa uumasunik naasunillu nujuartanik nunat tamalaat akornanni niueqateqarneq pillugu naalagaaffiit isumaqatigiissutaanni ilaasunut FIJO-mut tassa naalagaaffiit peqatigiiffiata inuussutissalerinermut nunalerinermullu suliniuteqarfissuannut CPD-mut tassa uumassusillit amerlasuuginnarnissaat pillugit naalagaaffiit isumaqatigiissutaannut tamakku suliniaqatigiiffiit sunniuteqartaqaat.

 

Piuaannartitsineq pillugu Inatsisartunut ilaasortat nunani tamaneersut aamma suleqatigiiffeqarput. Tassa Inuit Ataqatigiit oqaaseqartuata saqqummiussinermini aamma oqaatigisaa suleqatisseriniarneqartoq tassa SUPO.

 

SUPO-p pilersinneqarsimaneranut tunngaviuvoq uumasunik illersuiniaqatigiinneq eqqortumik tunngavilersuikkamillu paasisitsiniaajuarnissaq pisariaqarmat.

 

Suleqatigiiffiup taasuma tapersersugaraa piuaannartitsinermik tunngaveqarluni atuinissamik isumaliortaaseq piitsuussutsip avatangiisinut aseruisarneranik uumassuteqarfiillu mingutsinneqarnerinit aaliangiussisimaffiusoq.

 

Suleqatigiiffiup taasuma SUPO-p upperaa nunarsuarmiut piitsuussusianik unitsitsineq kaannersuit aammalu nappaatit taakku inuunerinik aserorsaasut qanoq iliuuseqarfigineqaqqaartariaqartut pinngortitap pisuussutaanik ilumoortumik nungutsaaliuineq allanngutsaaliuinerlu anguneqassappata.

 

Piuaannartitsinissamik ineriartortitsinissamik oqaraangatta avatangiisit pinngortitaq piniagassat kisiisa pineqartanngillat aamma pineqartassanngillat.

 

Aamma aningaasarsiorneq aningaasarsiorsinnaanerlu inooqatigiissutsikkullu pissutsit ilanngunneqartartussaapput.

 

Tassa 1992-mi Brasilliami ataatsimeersuarnermi isumaqatigiissutigineqartut.

 

Isumaqatiissutigineqartut tamakku suleqatigiiffiup, tassa piuaannartitsineq pillugu Inatsisartunut ilaasortat nunani tamaneersut suleqatigiiffiata aamma isumaqartigilluinnarpaat taakkulu tunngavigalugit aamma suliniarluni.

 

Qanittukkut tusagassiutitigut naqitatigut radiokkullu Politimester Jørgen Meyer, kiisalu maani Namminersornerullutik Oqartussat Piniarnermut Immikkoortortaqarfianni pisortaq isumaqatigiilluinnarlutik oqaatigivaat piniartut akornanni unneqqarissaarneq atorneqartoq piniagassanillu inerteqqutaasumik piniartoqarsimatillugu piniartut alaatinaalluartartut unioqqutitsisoqartillugulu poolitinut nalunaaruteqartoqartartoq.

 

Tamakku uppernarsarpaat piniartut akornanni nakkutilleeqatigiittoqartoq taamatullu piniartut namminneq pinngortitamik piuaannartitsinissamut soqutigisaqartillutillu annertuumik akisussaassuseqartut.

 

Taamatut oqaaseqarninni kaammattuutigerusuppara piuaannartitsineq pillugu Inatsisartunut ilaasortanut nunat tamaneersut suleqatigiiffianni Inatsisartuni ilaasortat aammalumi Naalakkersuisuni ilaasortat maani tassani suleqatigiiffimmi suliniutigineqartut eqqarsaatigalugit aamma ilaasortanngorniaqqullugit. Taannalu aqqutigalugu nunatta avataanut paasinitsiniaanermut aamma ingerlateqqeqqullugit.

 

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Qujanaq. Tulliulluni oqaaseqassaaq Paninnguaq Olsen, Inuit Ataqatigiit partiini oqaaseqartuisa avataatigut. Aamma minutit tallimat periarfissaapput.

 

Paninnguaq Olsen, Inuit Ataqatigiit.

Siullermik aamma uanga Asii Chemnitz Narup oqaluuserisassami ima pingaaruteqartigisumik oqaluuserisassanngortitsineranut qutsavigaara.

 

Una oqallinnertut ammasutut oqallinnerinnaammat neriullungalu siunissami arlaannik tikkuussiinertaqarfiusinnaammat peqataarusuppunga soqutigisarilluinnarakku nunatsinni naliginnaasutut allatulli innuttaaqataasutut akisussaqataarusunnera.

 

Siullermik inuttut isumaga oqaatigissavara namminersorneruleratta siullerpaatillugu pilersissimasariaqaripput naluarput immaqa tassaasariaqarsimagaluarpoq inuiattut maani nunaqartutut taasuminngalu atuisutut tunngavilimmik ilinniarfiliorsimasinnaasimasaqaraluarnerput.

 

Oqaatigerusuppara isummat maani amerlasuut pitsaasut ataatsimoorukkigut malunnarmat.

 

Aamma nunarsuarmioqatitsinnut ataasiakkaarluta pisortalluunniit aqqutigalugit avammut oqariartortartuusinnaagaluarpugut qanoq nunatsinni inuuneqarnerput pinngortitamillu atuisuunerput pillugu, kisianni isumaqarpunga inuiaat tamatta kalaaliusugut tamatta pisortat kisimik oqariartortartuunissaat kisimi utaqqinagu pinngortitami maani suli atuisutut inuuneqartutut ilisimasaqarfigisariaqaripput minnerpaamik nunami maani qanoq ittunik atugassaqarluta inuuneqarnerput.

 

Taamaammat isumaqarpunga pisariaqarluinnartoq inuiaat allat namminneq nunaminnik napatitsisutut pisarnerattulli maani nunami napaniutigut tunngavigalugit ilinniarfimmik peqarnissarput.

 

Taanna piviusunngorsinnaalluarpoq ullumikkut ilisimasaqarneqqusaatiinnartutupajaarluni maani oqallinneq ingerlanneqarmat, kisianni pitsaasumik tunngavissaliorneqarsinnaasoq takorloorneqarsinnaalluartoq uanga upperaara.

 

Taamaattumik innuttaasut tamarmik periarfissaattut pinngortitamillu atuisutut ilisimasaqarluartutut peqarnissaannut ilinniarfeqarnissaat oqallinnermi maani uanga eqqarsaatissanut ilaatikkusuppara assut.

Aamma tamatta massakkut killiffitsinni nunatta avataaniit isigineqarlunnissaa tamarluinnatta kissaatiginngikkipput isumaqatigissutigaarput. Aamma taamaappugut piujuartitsinissaq eqqarsaatigalugu.

 

Kisianni aamma sumut iluaqutaassava ataasiakkaaluinnaalluta avataaneersullu nunatsinnik ilisimasaqarluarniartut kisiisa qanoq iliortariaqarnitsinnik aaliangiitittassagutsigit?

 

Taamaammat inuiattut uagut Kalaallit Nunatsinni innuttaassutut kinaassuseqarpalaartumik inuiattulli allatut taanna uteqqillugu erseqqissaatigeqqittariaqarpara pimoorussinerulluta anguniagaqartariaqartugut.

 

Anders Andreassen, ataatsimiinnermik aqutsisoq, Inatsisartut Siulittaasuat, Siumut.

Qujanaq. Tulliulluni oqaaseqaqqissaaq Asii Chemnitz Narup siunnersuuteqartoq.

 

Asii Chemnitz Narup, Inuit Ataqatigiit.

Piujuartitsinermut anguniagaqarluni inuuiqatigiinnut ineriartortitsineq tamakkiiusunissaa Bruntlandrapportimi sukarsuit taakkua pingasut tamatta ataqqiniarlutigit maluginiarakku taanna isumaqarpunga nuannarutissaasoq immikkut.

 

Taava uterfigeqqikkusulaarpara sukarsuaq aningaasarsiornermut tunngasoq siorna aningaasanut inatsit eqqartoratsigut Inuit Ataqatigiinninngaanniit inuussutissat tungaasigut imminut pilersorsinnaanissaq pingaaruteqarluinnartuusoq oqaatigivarput.

 

Tassami puisinik, arfernik, tuttunik, savaaqqanik, timmissanik aalisakkanillu naammattorsuarnik peqaraluaratta.

 

Taakkulu uanga annerusumik isumalluutigisinnaagigut isumaqartuarsinnartarpugut.

 

Taamaattumik atorluarnerunissaannut suut kigaalaqutaanersut misissorneqarnissaat kissaatigivarput.

 

Tassanngaanniit taava ulluni makkunani paasissutissiinermi oqaatigineqarpoq Pinngortitaleriffimminngaanniit tassa ukioq manna tuttutassa 27.300-nngortinneqarnissaat siunnersuutigineqartoq.

 

Tusaannarlugu nuannaajallarnarsinnaavoq. Piniartulli tunitsiveqartinnissaat qulakkeerneqanngippat, taava piujuartitsinissamik siunertaqarluni ineriartortitsinissaq sumiissava?

Taamaattumik ataqatigiissaarinissaq sutigut tamatigut aamma Inuit Ataqatigiinninngaanniit oqaatigiuartagarput pisariaqarluinnartuunera aammaarluta oqaatigeqqikkusussavarput.

 

Taava sukarsuup pingajua inooqatigiissutsimut tunngasumut oqaaseqalaarusuppugut.

 

Tassa Inuit Ataqatigiinni pingaartikkatsigut nunarput ineriartortissallugu nunap inuiisa pisinnaasaat aallaavigalugit.

 

Pingaartipparput kikkut tamarmik piginnaasatik aallaavigalugit inuiaqatigiinni ineriartoqataatitsinissaat. Taamatuttaaq piginnaasamik atorluarnissaannut ineriartortittuaannarnissaanullu periarfissaqartitaajuarnissaat.

 

Kalaallit Nunaata inuttami inuuneqarusussuseqartuarnissaat tunngavississavaa. Sanngiinnerusortamilu ikiorsiivigineqarnissaat isumassorneqarnissaallu qulakkiissallugu. Meeqqat paarilluarneqarnissaat nakkutigisaralugulu periarfississavai.

 

Ukiuni makkunani aamma maani inimi annertuumik oqallissimavugut. Meeqqat aamma atugarisaat pillugit. Taakkua uteqqissanngilakka, kisianni suliniutit inooqatigiissutsimut tunngasuteqartut pinartutut isigisagut isumaqarfigisagut oqaatigerusuppagut matumani.

 

Ilisimaneqarpoq imminortorpassuaqartoq. Aamma siorna aningaasanut inatsit eqqartoratsigut taamani Peqqinnissamut Naalakkersuisuusoq ilungersorluta qinnuigaarput nunamut tamarmut atuuttussanik suleriusissanik pilersaarusioqqullugu.

 

Aamma ilisimavarput Peqqinnissaqarfimmi allallu suleqatigiissitaq Peqqinnissaqarfiup pilersitaa tamatuminnga suliaqarsimasoq aamma takorloorsimagaluarparput upernaaq manna ataatsimiinnitsinni saqqummiunneqarumaartoq Edward Geislerimiit kisianni takusaqanngilagut.

 

Ilisimaneqarpoq inuppassuaqartoq suliffissaarunnermik eqqorneqartartunik tassa nunatta aningaasaqarniarnera pillugu ataatsimiititaliaq siunnersuisartoq nalunaarusiaanni kingullermi marts 2002-mi saqqummersumi oqaatigineqarpoq ukioq 2000 ingerlanerani inuit nunatsinni 25-it 44-llu akornanni ukiullit sisamararterutaat pisartagaqarsimasut ikiorsiissutinik suliffissaarussimanertik peqqutigalugu.

 

Taava tassuunga atatillugu piujuartitsinissamik ineriartortitsiniarluta oqarutta inuillu isumalluutiginiarutsigit soorunami taakkua annertuumik suliffigineqartariaqarput.

 

Selvstyrekommissionip suleqatigiissitaata inunnik isumalluuteqarneq pillugu sammisaqartup tamanna ammasumik Nuummi ataatsimiititsimmat siornaak paasitinneqarpugut sulisartumut ilinnarsimanngitsumut ukiumut taamaallaat 1.900 kr.-ninik aningaasanik inatsit aqqutigalugit illuartitsisoqartartoq, taakku nalilersoqittariaqarput.

 

Aamma meeqqat sumiginnakkat eqqaaqqissavagut. Tassa Inuit Ataqatigiinninngaanniit taanna annertuumik malersortuarsimavarput.

 

Aamma eqqaasissutigissavarput 1999-imi ukioq 2002-mut aningaanik inatsit akuersissutigigatsigut meeqqat pisinnaatitaaffii pillugit annertuumik paasisitsiniaasoqassasoq nunatsinni.

 

Aningaasaliiffigineqaraluarpoq kisianni paasisitsiniaaneq taanna ulloq manna tikillugu suli piviusunngortinneqanngilaq.

 

Naak aamma meerartatta atugaat pillugit nunanit allaniinngaanniit tatisimaneqartugut oqaatigisariaqaraluartoq, kisianni tassa uumassusillit piniagassat pingaartinneqarnerupput.

 

Taava aamma isumaqarpugut suliffigisariaqartut imaannaannngitsut tassaasut apeqqut kalaaleqatitta Danmarkimut nuuginnartartut pillugit tassa ippassaaniinnannguaq Lisa Thorkebymik atillip nalunaarusiaa saqqummerpoq tassani allaat taavaat kalaaleqatigut Danmarkimut nuuginnartartut taaguuteqartinneqarput "Sociale flygtninge" nunatsinni inooqatigiinnikkut pissutsit peqqutigalugit qimaasut.

 

Uagut susassaqarfigut uagut nunaqqatigut taamaattumik nunarput imak nuannersumik ineriartortittariaqarparput kikkulluunniit kalaallit maaniiginnarnissaminut kajumittuaqqullugit.

 

Taamaattumik sukarsuup pingajua piujuartitsinissamik ineriartortitsinissamut aamma imaannaanngitsuuvoq, kisianni tassa oqaatigeriikkattuut nuannaarutigaara tamatta pingasoqiusamik tamakkiisumik  isiginninniarluta ingerlariaqqinnissamut isumaqatigiissutigigatsigut.

 

Aamma Inuit Ataqatigiinninngaanniit tamakkiisumik isiginnilluni oqallinnissaq aammalu oqimaaqatigissaakkamik ataqatigiissaakkamillu ersarissunik anguniagaqanissaq anguniagassanik siunnerfiliinissaq pingaarteqaarput. Aamma minnerunngitsumik taakkua piviusunngortinnissaannut pilersaarusiornissaq tullinnguuttariaqarpoq. Aamma siunnerfiliinermi anguniagassa ima erseqqissarneqartigisariaqassapput ukiut tamaasa uterfigineqaqqissinnaanngorlutik anguniagassat suut anguagut suut ilungersorfiginerusariaqarpagut.

 

Pilersaarusiortanngikkutta taamatut taava timitaliinissaq ungasilliartortutut isumaqarfigeqqajaanartoq. Qujanaq.

 

Anders Andreassen, ataatsimiinnermik aqutsisoq, Inatsisartut Siulittaasuat, Siumut .

Qujanaq. Tulliulluni oqaaseqaqqissaaq Anthon Frederiksen Kattusseqatigiit.

 

Anthon Frederiksen, Kattusseqatigiit.

Naatsorsuutiginngikkaluarakku qaqeqqissallunga oqallinneq manna isumaqatigiiffioqimmat aamma assortuunnissamut pisariaqarfiunngilluinnarmat tusaasinnaasakka malillugit, kisianni Inuit Ataqatigiit oqaluttata issuaavigimmanga tamaangaannaq killittoqarsinnaangitsoq nassuerutigisariaqartumik taanna issuaanera pillugu aperiinnarniarpara imaluunniit eqqasiinarniarpara ukua issuagai atuaqqilaariarlugit.

 

Sooq issuakkani tassuunga killiinnarlugit nanginnera issuannginneraa? Tassa nanginnera imaammat: Tamaammat kalaallit uagut qangaaniilli nunatsinni maani inuusugut, uatinnut pinngortitamullu atugassarititaasunullu naleqqussartuarlutalu inuusimasugut. Ukiorpassuarnilu nuna manna inoqartissimasarput pissutsini ukiunilu nutaajusuni naleqqussarluarluta pinngortitamik uumasuinillu aamma mianerinnilluta atorluaanitsigut nunarsuarmioqatitsinnut assuarnaattumik ammasumik kusanartumillu ingerlaqqissinnaasugut Kattusseqatigiinniit qularutiginngilarput.

 

Soorukua taakkua issuanngiligit ilanngullugit?

 

Issuarsimassagaluarpatit oqaannarnak "Tassa nassuerutiginninnerput naammagigipput"!

 

Issuaanialeraangatta ajortussarsiuilaarneq immaqa ajortussarsiulaariniinnaq kisiat siunertaralugu issuaasannginnissarput aamma kaammattuutiginassagaluarpoq naak soorunami uanga killilersuerusunngikkaluarlunga ilaasortat ataasiakkaat qanoq oqarnissaannut, kisianni pissutsit piviusut aamma takutereerpai uani.

 

Aamma Inuit Ataqatigiit allaanngiivippoq arlaannik ugguaarisaqarluni maani tulleriiaaginnavillutik qaqisaqattaartut. Soorunami pisinnaatitaaffigaarsi taanna.

 

Oqaluttup kingulliup oqaatigaa nuannaarutigalugu isumaqatigiinneq taama annertutigisoq pimmat. Aamma nuanneqaaq tamanna!

 

Kisianni uanga Kattusseqatigiit sinnerlugit oqassaguma oqassuunga ugguarneq Asii-p atiata taaneqaqattaannginnera tupigusuuteqaara.

Suna ugguaatigineqassammat siunnersuutigineqartup atia taaneqartaqattaarsimanngippat?

Uagut oqaaseqarnitsinni issuaaqqilaassuunga imannak oqarpugut: Inatsisartunut ilaasortap Asii Chemnitz Narup siunnersuutaa "Asiinnguaq taavarput"! "Atinngua taavarput"! Taamaattumik pissutissaqanngilaq Kattusseqatigiit akerlilersorniarsaralugit imaluunniit allamik ajortussarsiorfiginiarsaralugit pissutissarsiussalluni.

 

Uagut siunnersuuteqarneq ajorpugut atigut taagoqquniaannarlugit. Taanna pingaarnerunngilaq.

 

Uagut siunnersuuteqartarpugut inuuiaqatigiinni maanga anngutassat pingaaruteqartut saqqummiukkumallugit. Atigut kisiisa piinnarnagit, atigut kisiisa pingaarnerutillugit maanga qaqisaqattaassagutta taava sullitassagut inuuiaqatigiit puigorsimassavagut. Immaqa Inuit Ataqatigiit taamaalisimavoq?

 

Aamma tupigusuutigeqaara Inuit Ataqatigiit oqaluttuata oqarnermini taamannak kingusitsigisumi uumap oqaluuserisap oqaluuserilerneqalernera ugguarimmagu oqanngiluitsiaannarpoq radio matureersoq ilinnartut pillugit ualimut oqallinnerput pisuutinniartullu sooq inniarlugu una kingulliulluni oqaluuserineqarmat.

 

Isumaqarpunga Inatsisartuni sulinermi taamatut tusaqqusaarneq aammalu atinik Inuit Ataqatigiinneersunik immaqa taakuivallaannginneq mamiagissallugu pissutissaqanngitsoq.

 

Nuanniippoq oqallinneq taamatut aallartinneqassappat. Allaat Inuit Ataqatigiinneersut tamarmik qaqigamik "A=, Asiinnguaq qujanarujussuaq siunnersuuteqarsimagavit"!

 

Soormi uanngaanneersoq siunnersuuteqarsimappat taamannak oqaloqattaarnianngilasi. Nuanniillivoq oqallinneq!

 

Uagut Kattuseqatigiinniit oqarpugut manna oqaluttarfik atorlugu immikkoortoq pineqartoq pillugu minnerpaamilluunniit akerleriinnissamut nukippassuit atunngilagut.

 

Nuannaarutigiinnassavara immikkoortoq 86-i ippassaani eqqartoratsigut timmissat nujussimanerannut tunngasut. Aamma massakkut Inuit Ataqatigiit oqaluttuata oqalunnermini issuaqqiinnarluta tusarsimallugit saqqumiummagit kusanartumik.

 

Tassa nuannersoq aamma tamanna Kattuseqatigiit oqarsimanerisa ingerlateqqinneranik aqqut taanna atoqqillugu aniseqqinneqarneri.

 

Appat nujussimaneri, umiarsuit siggartartarneri, helikopter-iaqqat nipitoorsuit taakkua ippassaanitsiaannannguaq oqaaseqarnitsinni oqaaserisagut issuaqqinnaarlugit Inuit Ataqatigiit oqaluttuata saqqumiuteqqikkamigit assorujussuaq nuannaarpugut. Qujanarujussuaq.

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Qujanaq. Tulliulluni oqaaseqaqqinniarpoq Ruth Heilmann, Siumut. Pingajussaaniileramilu naatsuararsuarmik.

 

Ruth Heilmann, Siumut.

Qujavunga.

Siullermik Josef Motzfeldtip uparuagaa naluara tassami isumaqaraluarpunga aamma nammineq eqqarsaatigisuuguniuk aamma suut pineqartut ersarissumik takorlooreersinnaagaluaraa.

 

Tassami taamatut naatsumik imaluunniit piffissaq killeqartarmat immaqa una naalisaavallaarsimanerput taanna allarpassuarnillu allanngutsaaliugaaneq ingerlattuarniarlugu.

 

Allarpaasuit uani imarivaa nunat eqqissisimatitat katersugaasiviup eqqissisimatitai aammalu assersuutigalugu ilivitoqqat assigiinngitsullu.

 

Isumaqaratta aamma oqaluttuarisaanitsinnut tunngasut tassani paarilluarnissaat tassa uani aamma oqariartuutinut ilaapput.

 

Asii Chemnitz Narupip atia taanginneqarnera uagut ileqqorigaluarparput Siumumi siunnersuuteqartoq siulliullugu taasarlugu, kisianni torrallaaniapiloorluta sooq naggaterlaaserlaatillugu siunnersuuteqartup atia taavarput. Tassami tassani Naalakkersuisut Asiilu qutsaviginiarlugit. Taamaattumik soorunami nuannaarutigaarput taamatut Asii Chemnitz Narupi oqaluuserisassan-ngortitaqarmat taama pingaaruteqartigisumik.

 

Uani erseqqissaatigerusuppara aamma massakkut paarsilluarnissamik allanillu piuartitsinissamik tunngasut oqallisigineqarnerani kukkussutigisarsimasagut aamma ilinniarfigalugit maannakkut killiffipput oqallisigigatsigut.

 

Tassami uagut pisussaavugut nammineerluta kukkussuteqarsimagutta aaqqissallugit.

 

Uagut nammineq nunarput aquttussaavarput. Aamma tamatta taama oqartarpugut.

 

Aamma nunatta paarilluarnissaa uagut akisussaaqataaffigaarput.

Taamaattumik ajortut ajunngitsullu pisimappata aamma Inuit Ataqatigiit ukiorpassuarni aamma issiaqataasimagunik aamma taanna akisussaaqataaffigaat.

 

Asii Chemnitz Narup-imut eqqaasissutigissavara meeqqat ajornartorsiortullu allallu eqqartorneqaraangata soorlu allat kisimik pisuutinniarneqartarmata. Qujanaq.

 

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Qujanaq. Tulliulluni oqaaseqassaaq Maliinannguaq Markussen-Mølgaard, Inuit Ataqatigiit, partiit oqaaseqartuisa avataatigut. Minutillu tallimat periarfissaapput.

 

Maliinannguaq Markussen-Mølgaard, Inuit Ataqatigiit.

Qujanaq.

 

Siullermik oqaatigissavara uparuarneqarmata Inuit Ataqatigiit ataasiakkaarlutik majuaqattaartut. Aap, oqaluuserisaq soqutigigatigut pingaaruteqarmat aamma maani oqaaseqarnissaq killilerujussuuvoq 5 minutit periarfissaraakka taamaattumik oqaasererusutamut kialluunniit killilersussanngilaatigut oqaaserusutatta aninnissaannut.

 

Taava kiap siunnersuuteqartutut taasimannginnerannut tunngatillugu oqaatigissavara malunnarpallarsimasoq uani Inatsisartut pineqanngillat Naalakkersuisut uparuarneqarput siusinnerusukkut assersuutigalugu ineqarmut tunngasut eqqartorneqarmata Naalakkersuisut akissutaani parteeqatigigamiuk pingasoriarlugu taavaa.

 

Massakkut Naalakkersuisup akissuteqarnermini ataasiarluguluunniit Asii Chemnitz Narup taanngilaa. Taannaana uparualaaginnaripput neriutigalugu Inatsisartut ataqqineqarlutik assigiimmik maani oqaluttarfimminngaanniit pineqarumaartut.

 

Taava una oqaatigerusuppara aamma massakkut inissisimanerput qiviassagaanni. Avataaninngaanniit isigineqarnerput innarlerneqarujussuarpoq, aammalu suliassaqarpugut annertuumik taasuma tungaatigut

 

Taamaattumik massakkut Pinngortitaleriffik inissisimanera aatsaat taama pingaaruteqartigilerpoq. Aamma suliassai annertupput Pinngortitaleriuffigiinnaanngitsoq aamma piniartup Pinngortitaleriffiullu suleqatigiinnerisa sakkortusarnisaat pingaaruteqarluinnaqqeqqeqqissaarpoq massakkut aaqqissuulluakkamik. Ilaatigut qunneq pilersimasoq piniartut allatut oqaluttut bíologit allatut oqaluttut. Tassani ataatsimik sapinngisamik nipeqarluni avammut nittarsaattarnissaq ukiuni makkunani imaluunniit ulluni makkunani pingaaruteqartorujussuuvoq.

 

Taamaattumik taakku aqqutissiuunnissaat pisariaqarluinnarpoq. Naluara allaat taakkorpiaat pillugit siunersueqatigiinni imaqaluunniit arlaannaanut attuumassuteqanngikkaluartunik pilersitsisoqarsinnaanera siunissami takorloorneqarsinnaannginnersoq.

 

Avataaninngaanniit tikittartut eqqarsaatigalugit takornariaqarneq mianersuutassaqarpugut. Tassa massakkut periuserineqarpoq pilattunik imaluunniit arlaannik pisaqarsimasunut takornarianut ornigutsitsilluni.

 

Uagut qallunaat nunaannulluunnii tikikkutta ingerlaannaq nersussuarnut toqoraavinnukaanneqarunnanngilagut.

 

Taamaattumik allatut eqqarsartariaqalerpugut allaat paasitinneqarpunga issannguakkunni Amerika-miut tikeraartut ilaat inuusuttuaqqat pilattunik isiginnaarlutik qissassimasut.

 

Taamaattumik aamma takornariaqarnerup tungaatigut nutaamik eqqarsartariaqalerpugut. Taavalu aamma avataanut arlartittakkagut qallunaat nunaaninngaanniit pisuussutitsinnik uumassusilinnik tunngasunik aallartitaqartittarnerit ataatsimeersuarnermi assigisaanullu nakkutiginerusariaqalerpagut annermik nunatsinninngaanniit oqaariartuutissaat taakuummatami uagut sinnerluta kiinnertartut. Annermik nunatsinneersuunissaat aammalu nunatta oqariartuutaanik ersarissunik nassataaqartarnissaat taanna maanna qulakkeertariaqarparput.

 

Taasumap saniatigut naggasiutigalugu oqaatigiinnassavara eqqissisimanermut ataatsimiititaliamut aamma Inuit Ataqatigiinniit sulinitsinni aamma siunissami annertuumik suliassaqaratta aammalu suleqataarusukkatta aammalu suleqataanissarput qilanaaralugu.

 

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Qujanaq. Tulliulluni oqaaseqassaa Otto Steenholdt, attaviitsoq. Tulliukkumaarpoq Naalakkersuisut siulittaasuat.

 

Otto Steenholdt, attaviitsoq.

Tassaana takornarissanik aamma oqalunneq maani oqaaseqarfigilaarusullugu.

 

Soorluli takornarissat tassaasut pitsaasuinnaqqeqqissaarsuarnik takunnikkusullutik orniguttut.

 

Spaniami nersussuarmik toqoraasarneq isiginnaartitsivissuarmi ila qissattut taamaalisannguatsiaqaat tassani. Kaporlugit tassani toquleraangatigit tamakku nersussatsiarsuit kamassaarlugit. Isumaqarpunga taama amerlatigisut qiasarunnanngitsut Spaniami takugaangamikkit tamakkua.

 

Imaluunniit kukkukuunik kamaatsitsineq nunatsinni pissuserinngisarput. Takornariarparujussuit ornittarpaat tamakku takujartorlugit, immaqa qiajartorlutik.

 

Sooruna avataaninngaanniit isigineqarnerput taama ersigineqartigisoq?

 

Qasseriarnerlunga tusalerpara internetikkunngooq Hjemmestyre imaannaanaqqissaaq allagarsisorsuaq.

 

Uanga tupiginngingaarakku internet-ikkut nassiussinnaasut nalunngilaat. Ataasiarlutik toortaannarlugu inuit qasserparujussarnik ataatsikkut nassiussinnaallugu. Taakkulu aamma taamartorluinnaq pisinnaallutik.. Ajornaquteqanngissusia inuit qassinnguunersut silarsuaq tamaaviat siaruarterisinnaavaat ullumi. Tamaakkuukua upperiinnagassaanngitsut qanga allagannguanik uagut nammininnguaq allalluta pisarallaratta taamatorsuaq avammut siaruarterisinnaannngilagut.

 

Aap kisianni Maliinannguaq Markussen-Mølgaard killilersorneqassanngilasi kimilluunniit, kisianniuna maani ilikkarsimagipput partiit oqaluttoqartarlutik. Taannaana pissutigalugu uparuarneqartusi soorlungaasiit massakkut arfinilinnik oqaluttoqalerassi.                  

 

Pisussaaffigaarsi, kisianni eqqaamalaassavarput oqaluttoqartarneq maani pingaartitarigatsigut. Taamaatumiguna uparuaatigisarissi.

 

Uanga oqaaseqarniarsimanngilanga 86-imi oqaaserisinnaasakka tassuunga tunngasut tamangajaasa oqaatigereersimagakkit.

 

Nangitsineruinnartoq tusarnaarpara maani allamik nutaarsiarsartaqartutut oqaatiginngilara.

 

Ilulissani aamma ataatsimeersuartoqartussaavoq.  Tassalugooq taakkua isaassiutaallu imaappoq kalaallit tungaannut. Ila soorlu imaattoqalersoq tamakku tikippata. Tamaavitta aallarnaveersaassaagut illutsinniit aninaveersaarluta oqaatigeqinammatigut qanoq iliortartugut meeqqanngooq qiaqinapput pilattoqalerpat.

 

Pilattoqassanngilaq ulloq taanna Ilulissani naamerluinnaq. Soorlu tamakkuninnga oqalunneq.

 

Aajuna takornarissanut takutinnagarput uagut inuusaaserput maani. Eqqarsaatigisariaqarpagut naasorissaanermik inuutissasiutilipparujussuit avatitsinni. Taakkukua nilliasut. Eqqarsaatiginngilluinnarpaat uumasulinnik uagut inuussuteqarnerput, ilaatigut nammineq perortitarinngisatsinnik.

Taakkutoruku uagutsitut inuuniaraluarlik, paasillugulu qanoq ilungersunaqqisinaartigisoq maani inuuniarneq. Takuniarlissuk naatitsisinnaanngitsugut. Toqutaannangajaavinnik inuussuteqartugut, immamit aalisakkanik, puisinik, arfernik allarpassuarnillu.

 

Tamakkua assorsuaq assorsuaq takullugit tupinnarput, naasorissaaneriinnnarmik inuussuteqartunut.

 

Ajornaqaaq tamakkua eqqarsaatigitillugit.

 

Aamma tupigaara Inuit Ataqatigiit oqaaseqartua ilaatigut oqarpallammat piniartut tunitsivissaqanngitsulluunniit. Uanga isumaqarpunga piniartut tunitsivissaqarluartuugunik amerlanerparujussuarnik pisaqarsinnaagaluartut.

 

Tassa immaqa ilissinnut kisimi qujanaqutaa, piniartut tunitsivissaqannginnerat. Imaallaat toqutaalikinnerupput.

Taamatut soorlu paasineqarsinnaasunik oqalunneq, avataaniit qaqiffinngitsoorfiunngilaq maanga oqariartorluni piniartut tunitsivissaqarnissaat amerlanerusunik uanga kissaatigeqaara. Nalunngikkaluarlugu taakku toqutassa asuli amerlanerussasut tunitsiveqalerunik pitsaasunik, kisianni tassa ajoraluartumik oqaatigisassaq aana:Ajoqaaq taakkua inuuniarnerat ajornartorsiuteqarmat.

 

Tassa aqagu allaat konsulent-eqatariaqalerneq aamma tikikkumaarparput.

 

Tassa ajuusaarnarpoq "Social flygtninginik" taaneqartut allaat aallartalersimappata. Ilami inuuniarnerput taama imannak malunnaateqatigaaq nunatsinni suut tamaasa killilersugaalerpata piniakkat. Piniartup suna suliarissavaa? Aalisartup suna suliarissavaa amerliartuinnassagunik? Sinneruttut allatut ajornartumik allamut uiasariaqalissapput.

 

Oqaluttuat nalunngilagut Europaminngaanniit Amerika-mut nutsernerujussuusimasut oqaluttuaarisaanerup ingerlanerani. Suna aallaavigaat? Nammineq nunaminni tattoqillutik pitsaanerusumut ujarlilernerat. Aamma kalaallit taama iliornissamut periarfissaqarput.

 

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Qujanaq. Tulliullunilu akissuteqaqqissaaq Naalakkersuisut Siulittaasuat.

 

Jonathan Motzfeldt, Naalakkersuisut Siulittaasuat, Siumut.

Inuit Ataqatigiit oqaluttuannut oqaatigissavara maani oqaaserineqartut tunngavigalugit aaliangiiffissaanngimmat, kisianni nassuiaateqarfiummat Naalakkersuisuninngaanniit.

 

Oqaaseqarninni siullermi oqaatigisimavakka innersuutitut paasisakka ilaatigut Inuit Ataqatigiit tikkuartugaat suleqatigineqarsinnaasut Arctic Council, Nordisk Råd, Vestnordisk Råd, SUPO, NAMMCO allallu tamakkua taagorneqartut.

 

Ilumoorpoq tamakkua suleqatigalugit ingerlaqqinnissat. Kaammattuutigisariaqarput. Aammalu Inatsisartut namminneq Nordisk Rådikkunni aamma Vestnordisk Rådikkunni oqaluuserisassanngorlugit taama ittut saqqummiussinnaavaat, namminneq parlamentarikerit tassani naapisimaarnermi                      siunnersuutit taama  ittut aamma uumarissarsinnaavaat ingerlatillugillu.

Uani pineqarpat isumasioqatigiinnissaq aamma taanna eqqartorneqarsimavoq Naalakkersuisuni aamma Avatangiisinut Naalakkersuisup aamma taanna Naalakkersuisuni taanna ilanngullugu eqqartortareernikuuaat. Periarfissaq taanna isumaqarpunga iluatinnartutut isikkoqarmat, aammalu Naalakkersuisut maannakkut pilersaarusiornerannut naleqqummat.

Aamma nuannersumik tiguarput Inuit Ataqatigiinninngaanniit oqariartuutaasoq, isumaqaratta taama oqariartuutaasumik aaqqissuussinissaq pisariaqalersimasoq aamma.

 

Taamaattumik uani oqaaserineqartut tamaasa ataatsimilluunnit oqaaseqarfiginnikkaluarlugit iluatinnartunik innersuussutinik ilaqartut taakkua oqaaseqarfigisimavakka.

 

Aamma Inuit Ataqatgiit ugguuna  ilumoornerassavakka, saqqummiussamik ullumikkut saqqummiussisoq Inatsisartuni  ilaasortaannarmik taagorsimanera, taanna ippinnarpoq, aamma taamaattussaanngilaq. Utoqqassissutigissavara uanga taanna taamaalillugu Inatsisartuni ilaasortaannarmik taagorlugu Inatsisartut ilaasortaq apeqquteqaammini qinnutigaa taamatut ittoq maluginngitsoorsimagakku, soorunami siunnersuuteqartup aqqa ilaasussaavoq. Taanna utoqqatsissutigissavara.

 

Anders Andreassen, ataatsimiinnermik aqutsisoq, Inatsisartut Siulittaasuat, Siumut.

Qujanaq. Maannalu Inuit Ataqatigiit oqaaseqartuat Josef Motzfeldt, pingajussaaniilerami naatsunnguamik.

 

Josef Motzfeldt, Inuit Ataqatigiit.

Tassa naatsunnguussooq suu.

Kattusseqatigiit oqaaseqartuannut oqaatigiinnassavara: kusanartumik ingerlaqqinnissarput upperaarput. Tassa oqaatsima naggataat: Aap, qanoq ingerlaqqissuugut?

Tassa taanna ujartorneqartoq oqaluuserisami matumani.

 

Kingusinneranut radiokkoorneranut arlaata kiaanerpoq aamma Anthon Frederiksenioqqooqaaq uparuarpaa. Tassani uggorisarput qanoq iliorsinnaanngilagut uggoriinnarparput. Innuttaasut uggorikkuppagu Naalakkersuisut anguniagassamittut oqaatigimmassuk tamassuma ilusilersornissaa Agenda 21-p allanut oqariartuutiginissaa ajornanngippat inuttaasut peqatigalugit manna periarfissatsialassuugaluaramiluunniit uggoriinnarakku. Uagut radio nalinginnaq taamatorsuaq tusaqqusaarfittut atornianngilarput, iluatsikkussiinnartugununa.

 

Appat nujussimaneri Kattusseqatigiinniit nassaarisimagaat Anthon Frederiksen isumaqartitsiniarsarivoq uanga helikopteri Maarmoralimmiit Uummannamut utikaajaallrallarmat taavaniippunga. Taamanikkullu taanna oqaluuserineqarpoq, kisiannili uani oqaaseqarnitsinni pingaarnertut oqaatigisarput mannaavoq: Helikopteriaqqat innanik timmissat erniorfiini qaninngoortarsimanerat qanorluunniit ilummoorlutillu ajoqusiitigisimaneraluarnerisa uummassusilittut pisuussutinik nakkutigilluakkamik killilersuinikkut atuisariaqalernikkut pinngitsoortissinnaanngilaa. Tassa taama pingaaruteqarpoq.

 

Taavalu piniartut tunitsivissaasa amigassusii Otto Steenholdtip immaqa malinnaarpiarsimanini taamatut oqaatigaa..

Uagut oqaatigisarput mannaavoq: Piniakkat nungusarneri pisarineqartulluunniit avammut nioqqutigeqqusaanngimmata, taanna uagut ammaanneqaqquarput. Nungusaataanngitsumik pisat tassaasariaqarput nunatta akornanni niuerutigineqarsinnaasut aammalu ilisimasatsitut miluumasut imarmiut pisarineqartut Europamut tuniniarnissaat killilersugaasorujussuuvoq. USA-mi  ajornarluinnaqqissaarpoq.

 

Taamaattumiguna taakkua uagut tikkuaavigiinnarigut taamaattumik Anthon Frederikseni "Asii-nguamut" oqalulluni mitallernera ilaatigut Inatsisartut aqutsisuanit illaatigineqarluni aliikkusersuutaanera oqaaseqarfigissanngilara.

 

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Tassa ataatsimiinneq ilisarnarsigaluttuinnarpoq imminut saaqattaannerit attattut pilerput. Kissaatigissavara tamakku pinaveersaartaqqullugit, tamatta inersimasuuvugut aamma immitsinnut taamatut pisarnissarput mianersuutigilaaqqussavara. Tassami oqariartuutissagut tassaapput avammut inuuiaqatgiit kalaallit oqariartorfigisassarivagut, maani assortuunneq pinnagu. Imaluunniit qanoq pissusilersorneq.

 

Kingulliulluni naggasiillunilu oqaaseqaqqinniarpoq naatsuaraararsuarmik siunnersuuteqartoq Asii Chemnitz Narup.

 

Asii Chemnitz Narup, Inuit Ataqatigiit.

Qujanaq.

Naalakkersuisut Siulittaasuanut qujarusuppunga imaattoq Anthon Frederiksen tupigivallaaqimmagu "Atiinnguaq-Atiinnguaq-Atiinnguaq".

 

Inuit Ataqatigiit ileqqorivarput sutigut tamatigut sulinerput peqqissaartumik nalilersortarlugu. Aamma maluginiutigut atortarpavut angerlaraangatta allaffitsinni nalilersueqqittarpugut. Taava soorunami maluginiagassat ilagisarpaat. Naalakkersuinikkut sulinermi pissaaneqartut illuatungerisap kinaassuseerutsinniarlugu pissusilersorsimappata, taava ila sakkussaaleqisimaqaat. Taamatununa eqqarsarluta toortaalaartugut.

 

Taava Ruth Heilmannimut oqaatsigerusuppara uani piujuaannartitsiniarluni ineriartortitsinerup ingerlatsinermi sukarsuit taakku pingasut iluatigigatsigit taava inooqatigiissutsimmut tunngasunut suliniarfigisariaqartut qulequttat arlallit taavagut taava meeqqat tikeqqippagut. Uagut soorunami maangaanniit oqariartortarpugut Inuit Ataqatigiit anguniagai suunersut. Taava partiit allat suliniutitik soorunami suliniutigissavaat.

 

Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.

Qujanaq.

Tassa aatsaaginnaq oqaraluarpunga naggasiisoqassasoq, kisiannili Anthon Frederiksen Kattusseqatigiit. Pingajussaaniilerami  naatsuaraarsuarmik.

 

Anthon Frederiksen, Kattusseqatigiit.

Tassa Inuit Ataqatigiit oqaluttuata taakkua ilumut immaqa saqqumiussara atuaqqiinnarukku pitsaanerussagaluarporluunniit. Ukua sooq ilanngullugit issuaqinngiinnarpigit?

Taamaammat tamatta suleqatigiittariaqarpugut soorlu aamma siuligut taama iliortarsimasut. Tassa kaammattuineq.

Aamma Asiinnguaq taajulerakku aamma ajorilerpaat. Ila qanoq iliornialerpisiuna?