Samling
Dansk tekst mangler
UPA 2002/08.1
17. april 2002
Josef Motzfeldt
Nunatta Ameerniarfiata, Great Greenlanip aamma Great Greenland A/S-ip 2002-mi kattunissaannut naalakkersuisut piginnaatinneqarnissaannut siunnersuut.
1. behandling
Great Greenlandip immikkoortuisa kattullutik A/S-itut ingerlatsivin-ngornissaannut naalakkersuisut piginnaatinneqarnissaminnut aalajangiiffigisassatut siunnersuut matumuuna saqqummiunneqartoq ukiut arlaqalersut pilersaarusiorneqarsimavoq. Taamali ukiut arlaqartut pilersaarusiorneqarsimanerinnaata A/S-nngortitsinissap aqqutissatuaanera qulakkiinngilaa.
Soorunami sulisunut, pisortanut aamma siulersuisunut naalakkersuisoqarfinnit kaanngarluni ingerlatsilernissaq ornigineqarmat paasilluarsinnaavarput. Kisianni ukiut kingulliit qulit missaannaanni A/S-nngortiterisimanerup nassatai nalilersussallugit Inatsisartut pissutissaqarpugut.
Ilaatigummi piginneqatigeeriaatsit allat ingerlatseriaaseq pillugu isumasioqatigiittarnerni tikkuartorneqartut ilanngullugit nalilersuisarisariaqarpugut. A/S-nngortitsereeraangatta Inatsisartunit aningaasalersukkavut annertunerusumik sunniuteqarfigisinnaajunnaartarpagut, soorlu aamma A/S-ujunnaarsitsiniarneq pisariullunilu aningaasanik annikigisassaanngitsunik annaasaqarfiusinnaasartoq misilittagaqarfigilersimagipput.
Great Greenlandip ukiuni ajornartorsiorfiugaluartuni nunatsinnik nittarsaasimanera nersortariaqarpoq. Ullumikkullu nunarsuarmi tamarmi puisit ameerniarnerup pingajorarterutaanik initussuseqarnermigut kusanartumik siunnerfeqartumillu ingerlatsisimanermigut, ilaatigut pitsaassutsikkut siuttunermigut, puisit amiisa akiisigut angusaritissimasai sulisunut pisortarisaannullu nersorinnissutigissallugit Inuit Ataqatigiit pissutissaqarluta misigisimavugut.
Inatsisartut ukiut ingerlanerini puisit ameerniarnerup isiginerluttunngorsarneqarfiini annertuutigut aningaasalersuisuusimapput, tamanna qujanaqaaq. Maannalu Inatsisartunit ammit pitsaassusiisigut piumasaqaatigineqartarsimasut iluatsiffiusutut kinguneqarlutik akitigut iluatsisimaaleriartornikkut takussutissiipput.
Puiserpassuilli pisarineqartartut amiinnaasa annertunertigut niuerutaanerat uumassusilinnik ukiorpanni atuisuusimanitsinnut naleqqutinngilaq. Taamaattumik Great Greenlandip aningaasatigut iluatsisimaaleriartornermini ilaatigut puisip orsuanit tunisassiorsinnaanerminik qangali pilersaarutaa nukissaqarfigineqalissasoq neriuutigaarput.
Nunat allat, soorlu Norgip aamma Canadap, tamanna ullumikkut iluatsittumik niuerutigigaat nalunngilarput.
A/S-nngortitsinissaq saqqummiinermi oqaatigineqartutut paasiuminarnerusumik ingerlatsilernissamik kinguneqassasoq oqaatigineqarpoq. Aammami piginneqatigeeriaaseq tamanna annertunerusumik annikinnerusumillu iluatsittumik misilittagaqarfigereerparput.
Taamaakkaluartoq aalajangiiffigisassatut siunnersuutip aappassaaneerlugu oqaluuserineqannginnerani Inuussutissarsiornermut Ataatsimiititamut siunnersuutip nalilersorneqarnissaa Inuit Ataqatigiit inassutigaat.
Ilaatigut makku ataatsimiititaliap nalilersuifigissavai:
Ersarinnerusumik ingerlatseriaaseqarnissamut A/S-tut piginneqatigeeriaaseq aqqutissatuaava?
Namminersornerulluni Oqartussat saniatigut piginneqataasinnaasunik allanik ilassarsiornissaq soqutigineqarpa aamma iluatinnaateqarpa?
Inuussutissarsiornermut Ataatsimiititaliap saniatigut naalakkersuisunut piginnaatitsissutitut oqaasertaliunneqartussatut siunnersuutigineqartut Aningaasaqarnermut Ataatsimiititalimit naliliiffiginissaat Inuit Ataqatigiit pissusissamisoortut isumaqarfigaat.