Samling

Anthon   Frederiksen   Upa - 2003/52-01

ulloq,   26.  marts   2003

 

 

Inuussutissarsiutigalugu   aalisartunut   piniartunullu   ikiorsiisarnermut   aninga-asaateqarfimmik   2003-imi   aningaasanut   inatsimmi   ukiunilu   missingersuusiorfinni   pilersitsinissamik   sulissutiginninnissamut   Naalakkersuisut   peqquneqarnissaannik   Inatsisartut   aalajangiiffigisassaattut   siunnersuut.

 

Inatsisartunut   ilaasortap   Johan   Lund  Olsen-ip   siunnersuutaa   soquti-ginarluinnartoq  Kattusseqatigiit  sinnerlugit   imaattumik   oqaaseqarfigissuara:

 

Siunnersuuteqartoq   ilumoorluinnarpoq   pingaartumik   ukiuni   makkunani   aalisarnermik  piniarnermillu   inuutissarsiorneq    sumiiffiit    ilaanni   aalisarnermik   piniarnermillu   inuutissarsiuteqartunut   ilaatigut   annertuumik   eqquinnerliortitsisarpoq.   Siunnersuuteqartup  oqaatigaa;   Qaanaami   Ittoqqortoormiinilu   qimussimik   piniarniarnissaq  sikuniannginnerata   ajornarsisitaraa,    ilumut   taamaalluinnarpoq,   kisianni   aamma   taamaappoq   Upernaviup   kommune-ani   qularnanngitsumillu   aamma   kommune-qarfinni kujasinnerusuniittuni   tamanna   assigiinngitsutigut    piniartunut   aalisartunullu  ajornartorsiortitsivoq.

 

Tassami   aalisartoq   piniartorluunniit   ullumikkut   namminersortutut   inuutissarsiuteqartutut   inatsisitigut   isigineqarpoq,   tamanna   tusaannarlugu   tulluusimaarnarlunilu   usorsisimanarsinnaangaluarpoq,   kisianni   pissutsit   piviusut   qiviassangaanni   aalisartut  piniartullu   ullumikkut   nunami   inuutissarsiuteqartunut   naleqqiullugit   assigiinngitsorujussuarmik   pineqarput,   allaammi   oqartoqarsinnaavoq:   aalisartut   piniartullu   inuutissarsiuteqartuniit   allaniit   immikkoortinneqarput,   tassami   silap   pissusaa   imaluunniit  pinngortitap   qanoq   ilinera   aalisartumut   piniartumullu    inuutissarsiorniarnermi apeqqutaalluinnartarmata.

 

Assersuutigeriarutsigu;   ullumikkut   aalisartoq   piniartorluunniit   assigiinngitsunik   peqquteqavilluni   inuutissarsiorsinnaajunnaaruni   pisortanit   annertussusileriikkanik   ikiorserneqarsinnaanngilaq aamma  taamaappoq,   erninermut   meeravissiartaarnermullu   tunngatillugu,   aamma   tassani   aalisartoq   piniartorluunniit   allanit   immikkoortinneqarput,   taamanna   Kattusseqatigiit    sinnerlugit   isumaqarpunga   akuersaarneqarsinnaanngitsoq   pissutsit   ilaatigut   taama   erloqinartigisinnaasut,    maani    Nunami   ilaatigut   inuuniarfigissallugu   ilaanneeriarluni   peqqarniittaqisumi.

 

Taamaattumik   siunnersuuteqartoq  Kattusseqatigiit   sinnerlugit   tamakkiisumik    taperserpara   aammalu   Naalakkersuisunut   kaammattuutigiinnarnagu   piumasaqaatigalugu;  aalisartut   piniartullu   annertussusileriikkanik   ikiorserneqartalernissaat,   kiisalu   erninermi   meeravissiartaarneremilu   aamma    aalisartut   piniartullu   inatsisitigut   allatullu  pineqalernissaat   ilanngullugu   sulissutigeqqullugu,   taamaanngippat   Kattusseqatigiit  sinnerlugit   inatsisartut   tulliani   ataatsimiinnissaannut    tamanna   aalajangiiffigisassatut  oqaluuserineqarnissaa   saqqummiunneqarumaarmat.

 

Tassami   aalisartoq   piniartorluunniit   immikkut   illuinnartumik    ullumikkut   kommune-mut saaffiginnikkaluarpat,   allamik   oqarfigineqarneq   ajorpoq,   taamaallaat   pissarsiarisarpai   oqaatsit   imaattut:   Namminersortuungavit   ikiorsinnaanngilatsigit,   isumaqarpunga aamma   Naalakkersuisup   akissuteqarnerattuut   suliaq   manna   aalisarnermik   piniarnermillu   inuutissarsiuteqartunut   aamma   annertuumik   pingaaruteqaqimmat,     itingartiinnaqinagu  suliamut   attuumassuteqartut   tamaasa   peqatigalugit,   inatsisitigut malittarisassat   pisariaqartitat   suliarineqartariaqartut.

  

Taamatut   oqaaseqarlunga   inassutigissuara   suliap   aappassaanneerneqannginnerani  susassaqartut   tamarmik   tusarniaavigineqassasut,   suliallu   ukiamut    aappassaanneerneqannginnerani   inuutissarsiornermut   ataatsimiititaliami   suliarineqassasoq.