Samling
DANSK TEKST MANGLER
UPA 2003/ 64
6. marts 2003
H. Rasmussen
Nunatsinni parnaarussivimmik matoqqasumik pilersitsinissaq pillugu apeqquteqaat aallaavigalugu oqallinnissamik siunnersuut.
Inuit Ataqatigiit arajutsisimanngilaat sakkortuumik pinerluuteqarsimasut pineqaatissinneqartarnerat nunatsinni pinnani Danmarkimili parnaarussivinni inissinneqartarnerat annertuumik equngassuteqartoq. Inunnut pineqartunut sakkortuumik misigitinneqaannaratik aammali tamatumuuna nunatta inuit pisinnaatitaaffiinik unioqqutitsisutut uparuartorneqartarneranik kingunerqartarsimavoq.
Pingaartumik Pinerluttaalisitsinermik Inatsit nunatsinnut atuuttoq matoqqasumik parnaarussiviliornikkut tunngavimmigut allanngortittariaqarneranik kinguneqartussaavoq. Tassani pineqarput inatsisit tunngavimmikkut siunertarimmassuk pinerlussimasunik pillaaneq pinnagu pineqaatissiinerli inuiaqatigiinnut akuujuarnissamik uteqqinnissamillu siunertaqartoq matoqqasumik parnaarussiviliornikkut innarlerneqartussaavoq.
Inuit Ataqatigiinni isumaqartuarpugut pinerlussimasut inuiaqatigiinnut pineqaatissinneqarnermikkut perorsarneqarluartareerlutik akuleruteqqinnissaannut siunertat pitsaanerpaasut. Tamannarpiarlumi pissutigalugu Eqqartuussiveqarneq pillugu Ataatsimiititaliarsumi apeqqut tamanna qulaajarneqassasoq ukiorparujunngortut matuma siorna innersuussimavarput.
Ataatsimiititaliarsuup isumaliutissiissutaa upernaamanna saqqumertussaq pappialani apeqquteqaammut uunga tunngatillugu agguaanneqarsimasunut issuarneqarsimavoq. Tassani ilaatigut takuarput matoqqavinngittumik isertitsiviliortoqarnissaa Nuummi siunniunneqarsimasoq. Tassani sakkortuumik pinerluuteqasimasut pineqaatissinneqarsimanermi nalaanni katsorsaasunut immikkut ilisimasalinnut ungasissumiinnginnissaat anguniarneqarpoq, aammalu suliffissaqarnissaat. Isumaqarpugut, tamakku siunertat neriunartoqartut aammalu Inatsisartuni Eqqartuusiveqarneq pillugu Isumalioqatigiissusiaq utaqqimaassagipput tamanna pillugu aaliangiisinnatik.