Samling
DANSK TEKST MANGLER
|
KATTUSSEQATIGIIT |
|
Anthon Frederiksen Upa - 2003/64-0 |
ulloq, 06. marts 2003 |
|
Nunatsinni paarnaarussivimmik matoqqasumik pilersitsinissaq pillugu apeqquteqaat aallaavigalugu oqallinnissamik siunnersuut.
Inatsisartuni ilaasortap Per Rosing-Petersen-ip siunnersuutaa Kattusseqatigiit sinnerlugit imaattumik oqaaseqarfigissuara:
Siunnersuuteqartup tunngavilersuutai paasinartut aamma soorunami suli allanik amerlanerusunik ilaneqarsinnaasut erserseqqippaat uppernarsiseqqillugulu danskit inuiattut uatsinnut kalaallinut aamma qanoq suusupaginnitsigisinnaaneri, minnerunngitsumik kultur-erput oqaatsivullu eqqarsaatigalugit, immaqqaluunniit isumaqaannartarnerput - aa kalaallit 1953-imi inatsisit tunngaviusut allanngortinneqarmata uatsinnut danskinut ilanngunnikuungamik danskisut eqqarsartaaseqalerlutillu, danskit kultur-iat oqaasii allallu danskit ileqqui atuinnartussaagaat.
Kisianni qularinngilara kialluunniit danskip takusinnaallugulu paasisinnaassangaa kalaallit Nunarput Europamiit 4000kmt sinnerlugit ungasitsigisumiimmat, aamma kalaaleq imaaliallaannarlugu danskinngortinneqarsinnaanngimmat, kultur-i, oqaatsit nerisat ileqqullu assigiinngitsut eqqarsaatigalugit.
Taamaattumik assut nuannaraara siunnersuuteqartup eqqaammagu; danskit nunani allani paarnaarussaasartut pillugit danskit nalakkersuinermik suliaqartut ilungersorlutik sulissuteqartarmata, danskeqatimik Danmarkimut utertinneqarnissaat pillugit.
Ilanngullugu eqqaanngitsoorusunngilara; danskit oqaatsiminnik pingaartitsinerat aamma Nunatsinni malinneqartariaqarluinnarmat, tassami nalunngilarput danskit politikkeriisa sakkortuumik piumasaqaatigimmassuk; inuiaat allat Danmark-imut nunasisut pinngitsooratik danskit oqaasiinik ilinniagaqartariaqartut.
Tamatta takorloorsinnaangunarparput kalaaleqartivut pillangaallutik Danmark-imi matoqqasumik paarnaarussivimmiitinneqartut ilaat danskit oqaasiinik pisinnaassuseqanngitsunik ilallit aammalu ilaat siornatigut Danmarkimiissimanngisaannartut avatangiisinut takornarluinnakkaminnut mattunneqarlutik inissinneqartarnerat inuit piginnaatitaaffiinut naapertuutinngilluinnartut atorlugit iliorfigineqartarnerat inunnut taamatut pineqartunut soorunami sutigut tamatigut sakkortussaqisut.
Oqartoqarsinnaavoq; inuit taamatut paarnaarunneqartartut namminneq pisuussutigingaat, aap pinerlussimaneri pillugit pillarneqarnissaat Kattusseqatigiinniit soorunami pissusissamisoortutut taamaattussatullu isumaqarfingaarput, kisianni inuit nunamut allamut aallartillugit pillaasarneq iluarsineqartariaqarpoq, tassa Nunatsinni matoqqasumik paarnaarussiviliornikkut tamanna naammassineqarsinnaammat.
Tassami namminiilivinnissatsinnut pissutsit taamaattut iluarsereertariaqarput, tamannalu naalakkersuisut piaartumik dansk-it naalakkersuisuinut saaffiginnissutigisariaqarpaat.
Nalunngilarali aamma Nunatsinni Eqqartuusseqarneq pillugu Ataatsimiititaliarsuup suliaq manna pillugu sulissuteqartoq, taamaammat Ataatsimiititaliarsuup isumaliutissutissaa aamma Inatsisartunut saqqummiunneqartussaq; qanoq imaqarumaarnersoq pissanganartussaavoq, kisianni siunnersuuteqartup oqarneratuut utaqqiinnartoqarsinnaanngilaq.
Taamatut oqaaseqarlunga siunnersuut taperserpara.